Kyzylorda-news.kz. ҚР Білім және ғылым министрлігі екіге бөлініп, ҚР Оқу-ағарту министрлігі және ҚР Ғылым және жоғары білім министрлігі құрылды. Тиісті Жарлыққа Мемлекет басшысы қол қойды.
***
Қазақстан Республикасының мемлекеттік басқару жүйесін одан әрі жетілдіру жөніндегі шаралар туралы Қазақстан Республикасы Конституциясының 44-бабының 3) тармақшасына сәйкес мемлекеттік басқару жүйесін жаңғырту және тиімділігін арттыру мақсатында ҚАУЛЫ ЕТЕМІН:
1. Қазақстан Республикасының Білім және ғылым министрлігі:
Қазақстан Республикасы Білім және ғылым министрлігінің мектепке дейінгі, орта, техникалық және кәсіптік, орта білімнен кейінгі білім беру, қосымша білім беру, балалардың құқықтарын қорғау, мектепке дейінгі, орта, техникалық және кәсіптік, орта білімнен кейінгі білім беру саласындағы сапаны қамтамасыз ету, мектепке дейінгі, орта, техникалық және кәсіптік білім беруді цифрландыру саласындағы функциялары мен өкілеттіктері беріле отырып, Қазақстан Республикасының Оқу-ағарту министрлігіне;
Қазақстан Республикасы Білім және ғылым министрлігінің жоғары және жоғары оқу орнынан кейінгі білім беру, тіл саясаты, ғылым, жоғары және жоғары оқу орнынан кейінгі білім беру мен ғылым саласындағы сапаны қамтамасыз ету, жоғары және жоғары оқу орнынан кейінгі білім беруді цифрландыру саласындағы функциялары мен өкілеттіктері беріле отырып, Қазақстан Республикасының Ғылым және жоғары білім министрлігіне бөлу арқылы қайта ұйымдастырылсын.
2. Мемлекеттік органдар берілетін функциялар мен өкілеттіктерге сәйкес қайта ұйымдастырылатын мемлекеттік органның құқықтары мен міндеттемелерінің құқықтық мирасқорлары болып белгіленсін.
3. Қазақстан Республикасының Үкіметі:
1) қайта ұйымдастырылатын мемлекеттік органның штат санын Қазақстан Республикасы Президентінің Әкімшілігімен келісім бойынша қайта бөлуді;
2) осы Жарлықты іске асыру жөнінде өзге де шаралар қабылдауды қамтамасыз етсін.
4. «Қазақстан Республикасы Үкіметінің құрылымы туралы» Қазақстан Республикасы Президентінің 1999 жылғы 22 қаңтардағы № 6 Жарлығына мынадай өзгеріс пен толықтырулар енгізілсін:
1-тармақ мынадай мазмұндағы жолдармен толықтырылсын:
«Қазақстан Республикасының Оқу-ағарту министрлігі;
Қазақстан Республикасының Ғылым және жоғары білім министрлігі;»;
«Қазақстан Республикасының Білім және ғылым министрлігі;» деген жол алып тасталсын.
5. Осы Жарлықтың орындалуын бақылау Қазақстан Республикасы Президентінің Әкімшілігіне жүктелсін.
6. Осы Жарлық қол қойылған күнінен бастап қолданысқа енгізіледі.

ҚР Білім және ғылым министрлігі екіге бөлінді

Kyzylorda-news.kz. Бүгін Қазалы ауданының әкімі Мұхтар Оразбаев бірқатар құрылыс нысандарын аралады.
Аудан басшысы алдымен Қазалы қаласында салынып жатқан «Өрімтал» балабақшасының құрылысын көрді.
Қазіргі таңда 140 орындық балабақша құрылысы қарқынды жүріп жатыр. Құрылысшылар жаңа нысанның іргетасын қалап, кірпіштерін өру жұмыстарын жүргізуде. Мердігер мекеменің жауапты мамандары құрылыс жұмыстарына ешқандай кедергілердің жоқ екенін атап өтті.
Аудан әкімі Мұхтар Оразбаев тиісті сала басшылары мен мердігер мекеменің жауапты қызметкерлеріне балабақша құрылысы сапалы жүргізіліп, белгіленген кестеге сәйкес жүру қажеттігін тапсырды.
Мұхтар Әуесұлы мұнан соң Қазалы қаласындағы Ү.Түктібаев көшесінің бойынан салынып жатқан спорт алаңының құрылысын көрді.
Спорт алаңының құрылыс жұмыстары аяқталуға жақын қалды. Жақын күндері бұл нысан да пайдалануға беріліп, қала жастарына қуаныш сыйлайтын болады.
Аудан әкімі Мұхтар Оразбаев спорт алаңына да қатысты бірқатар сын-ескертпелер барып екенін айтып, мердігер мекеме тез арада ретке келтіру қажеттігін айтты.
Қазалы қаласына сапары барысында Мұхтар Әуесұлы елді мекен іргесіндегі бақшалық жерлерге де арнайы барды.
Бақшалық басында аудан басшысы Қазалы қаласының әкімі Рахметулла Ізтілеуге тұрғындардың бақша дақылдарын егуге барлық жағдай жасалуға қажеттігін айтты. Егер жер алып, өз-өзін бақша өнімдерімен қамтамасыз етуге өтініш білдірген тұрғындар болатын болса, оларға да көмек қолын созуды тапсырды.
Қазалы қаласынан соң аудан әкімі Мұхтар Оразбаев Қашақбай Пірімов атындағы ауылға барып, спорт кешенінің құрылысын көрді.
Құрылыс басында аудандық құрылыс, сәулет және қала құрылысы бөлімінің басшысы Нұрбек Күзембаев атқарылып жатқан жұмыстардың жайымен таныстырды.
Аудан әкімі Мұхтар Оразбаев тиісті сала басшыларына құрылыс жұмыстарын белгіленген мерзімде сапалы аяқтауды тапсырды.
<img src="https://kyzylorda-news.kz/wp-content/uploads/2022/06/fb_img_1654939119490.jpg" alt="" />
<img src="https://kyzylorda-news.kz/wp-content/uploads/2022/06/fb_img_1654939124023.jpg" alt="" />

Қазалыда балабақша құрылысы басталды

Kyzylorda-news.kz. Бала анасының бойына біткеннен бастап, шыр етіп дүниеге келген кезде де даму үстінде болады. Осы орайда ата-ана бала дүниеге келгеннен бастап оның ұсақ моторикасын және сөйлеу тілін дамытуға баса көңіл бөлуі керек.
Мамандардың айтуынша, бір жастағы бала кемінде 10-15 сөзді, екі жастағы бала 300-дей сөзді анық айтып, ал үш жастан асқан соң еркін сөйлесе алатын жағдайда болуы қажет.
Қазіргі кезде тілі мүкіс не уақытынан кеш шығатын балалар саны көп. Бала тілінің кеш шығу себептері мен оларды емдеу жолдарын психолог, логопед маман Әлия Ерлан айтып берді.
<blockquote>
 «Ең алдымен әр ата-ана өзінен бастауы керек. Себебі, сөйлеу өздігінен пайда болмайды, оны үйрену және балаға үйрету қажет. Бұл тек қарым-қатынас процесінде ғана жүзеге асады. Егер сіз табиғатыңыздан үнсіз, көп сөйлемейтін жан болсаңыз да, балаңызбен міндетті түрде сөйлесіңіз. Себебі балаға өзіне қатысты жағдайды және айналасында не болып жатқанын түсіндірсе, балаға айтқаныңды түсіну оңай болады. Сондықтан өз әрекетіңізді сөзбен түсіндіріп отыруға тырысыңыз», – дейді маман.
</blockquote>
Екіншіден, кез келген жағдайды баяндап отыруға тырысу керек. Бұл – бала сізді тыңдап, көріп отырғанына көз жеткізгенде ғана баратын әрекет. Өйткені бала үшін сіз – үлгі алатын бірінші адамсыз. Сөйлеген кезде сөзіңіз балаға бағытталуы тиіс. Одан бөлек көзіне қарап сөйлеңіз. Бұл балаңыз мазасыз, бір орында отырмайтын, көп қимылдайтын болса маңызды.
Маманның айтуынша, егер сіздің кішкентайыңыз әлі де тілі шықпаған болса немесе аз сөз айтса, артикуляциялық жаттығуды қолдануға болады. Ол дегеніміз – сөйлеу тілі аппаратының бұлшық еттерін шынықтыратын, оның мүшелерінің қимыл-қозғалыстарын қалыптастыратын және нығайтып, жетілдіретін арнайы іріктеліп алынған жаттығулар болып табылады.
Сонымен қатар түзеу жұмысында белсенді қолданылатын логопедиялық массаж және өзін-өзі уқалауға үйрету артикуляциялық бұлшық еттердің тонусын тез қалпына келтіруге және үйлесімді артикуляциялық қимылдарды қалыптастыруға ықпал етеді. Тыныс алу жаттығуларының да берері мол. Тыныс шығару, үзіліс және тыныс.
Сондай-ақ логопед ата-ана әр сөзді, сөйлемді асықпай, анық, түсінікті айтуы керек, дейді. Балалар өте сезімтал. Тіпті бір сөзді тәртібін өзгертіп бірнеше рет қайталап айтыңыз. Бала жаңа сөзді меңгеруі үшін сол сөзді бірнеше рет түрлі бағытта қолданған дұрыс.
Бала тілінің даму ерекшеліктері
«Баланың тілі дұрыс шығу үшін ата-аналарға қандай кеңес айтасыз?» деген сауалымызға: «Баланың тілі тез және дұрыс шығуы үшін үлкендер әр қимылын, ойын дауыстап айтып түсіндіріп отыруы керек. Балаларға көбіне үлкендердің әңгімелесіп, тілдесуі жетіспейді. Сәби керек нәрсесін қолмен көрсетсе немесе ымдаса ата-анасы бірден оны қолына ұстатады. Енді түк қиналмастан қажеті өтеліп жатса бала сөйлеп қиналып қайтсін? Сол үшін сұрақтар қою арқылы сөзге тарту керек. Бұл – баланың сөздік қорын молайтудың бір жолы», – деген жауап қатты.
Одан бөлек ұсақ моториканы дамыту жағын естен шығармаған жөн. Себебі саусақты қимылдату мидағы сөйлеу функциясына жауапты тітіркендіреді. Басында ата-анасы баласының дұрыс сөйлемеуін еркелік деп ойлауы мүмкін. Сол ойымен көп уақытын өткізіп алатын көрінеді.Кейбірі әкесі бала кезінде кеш сөйлегендіктен тұқымнан деп топшылайды.
Маманның айтуынша, бұл – қате түсінік. Мектепке барғанға дейін бала дұрыс сөйлемесе ата-ана дабыл қаққаны жөн.
<blockquote>
 «Әр ата-ана баласының үйлесімді дамығанын армандайды және соған ұмтылады. Баланың мықты және дені сау, ақылды, табысты, жақсы сөйлесе екен деп ойлайды. Сөйлеудің дамуы балада ерекшелігіне байланысты әртүрлі. Егер кейбірі 1,5 жасында тоқтамай сөйлеп, толыққанды сөйлем құрай алса, басқасы алғашқы сөздерін екі жасынан кейін ғана айта бастайды. Әрине алғашқы кезде сәби анасы не әкесінен естіген әр сөзді қайталауға тырысады. Әріптер мен сөйлемдер көңілді комбинация ретінде көрінуі мүмкін. Бірақ балаға дұрыс үлгі көрсетсе, тілі тез шығады», – дейді Әлия Ерлан.
</blockquote>
Логопедтің айтуынша, балада туылған сәттен бастап дыбыстық реакциялар пайда болады.
Бала тілінің 0-ден 2 жасқа дейінгі дамуын бірнеше кезеңге бөлуге болады.
Яғни, 2-3 ай: бұл уақытта бала уілдеп, былдырлай бастайды. Бала үндемесе, ата-ана дабыл қаға бастауы керек;
9-10 ай: ересектердің сөйлеуі мен алғашқы сөздер туралы түсінік қалыптасады. Бірақ бұл жаста бала ересектердің сөйлеуіне емес, жағдай мен интонацияға жауап береді;
11-12 ай: сөйлеушінің интонациясына және қоршаған жағдайға қарамастан, не айтып жатқанына реакция бар;
1-1,5 жас: баланың ситуациялық сөйлеуі дамиды. Сөздері жағдайға байланысты әртүрлі мағынаға ие болуы мүмкін. Бала дыбыстарды жиі шатастырып, бұрмалайды;
1,5-2 жас: ересектердің сөйлеуін түсінудің қарқынды даму кезеңі.
Баланың сөздің қорындағы сөз саны тез артады, алғашқы тіркестер пайда болады. Сөздер ситуациялық емес, жалпыланған. Осы кезеңде бала үлгі алуы және қайталауы үшін сөйлеудің қажетті көлемін қамтамасыз ету өте маңызды. Ми жасушалары сөздерді және оларды сөйлемге қосу ережелерін барынша меңгеруге дайын.Бала қалай сөйлеп үйренеді?
<blockquote>
 «Әр балада тілінің даму ерекшелігі әртүрлі жүретінін айттық. Сол себептен баланы дамыту және тәрбиелеу мәселесін тиімді шешу үшін ересек адам өзінің дамуының белгілі бір кезеңінде баланың нені білуі керек екенін нақты түсінуі керек», – деген психолог маман екі жастағы баланың даму деңгейіне тоқталды.
</blockquote>
Екі жастағы бала тілінің орташа даму деңгейі:
Балалар қарапайым сюжеттік суреттерде көрсетілген әрекеттер мен заттарды және үстелге қой, диванға отыр деген сияқты сөздерді түсінеді;
Екі бөліктен тұратын ересектердің өтініштерін орындай алады;
Бір жарым жасқа дейін баланың сөздік қоры шамамен 50 сөзді құраса, екі жасында 200-400 сөз болады.
Баланың сөздік қорының басым бөлігі ойын және тұрмыстық тақырыптағы заттарды білдіретін зат есімдер, сондай-ақ қарапайым әрекеттерді білдіретін етістіктерден тұрады.Бір жарым жастан асқаннан кейін балалар «бұл қалай аталады?», «бұл не?» деген тараптағы сұрақтарды жиі қоя бастайды. Десе де сөйлеу әлі де аграмматикалық тұрғыда, яғни сөздің грамматикалық құрылысындағы қателер болады.
<blockquote>
 «Балалар 2-4 сөзден тұратын сөз тіркестерін қолданады, қазіргі кездегі 3-ші тұлғаның етістіктерін зат есімдермен келістіреді. Кейбір жағдайлардың формаларын қолданады. Етістіктердің бірінші жағы және «мен» есімдігі пайда болады. Баланың сөйлеуіндегі қателік ана тілінің көптеген дыбыстарының дұрыс емес дыбысталуымен сипатталады (физиологиялық тіл сатысы). Баланың әрбір қимылын қадағалаңыз. Әрбір бала өз жасына сай жетіліп-дамуы қажет. Оның денесіндегі, қимылындағы әрбір өзгеріс оның дамуын тежеуі мүмкін. Сөйлеуде де солай. Кекештеніп сөйлесе, ойын жеткізуде қиналса, сөйлегенде ауыз қуысының мүшелерін қалыпты жағдайда қимылдатпай, өзгеше әрекет жасаса, мұның бәрі баланы дәрігерге апаруға себеп болуы мүмкін», – дейді психолог.
</blockquote>
Балаға жаңа сөзді қалай үйретеміз?
<blockquote>
 «Балаға жаңа сөздерді үйрету кезінде есте сақтау керек бірінші нәрсе: «Жақсы көңіл-күй – сәттілік кепілі». Бала білмейтін жаңа сөздерді эмоционалды жағымды жағдайда айтыңыз. Психологтар мұндай жағдайда бала он есе жақсы оқып, тез үйренетінін байқаған. Сондай-ақ баланың көру, жанасу, иіс сезу, яғни тақырыпты әртүрлі тәсілдермен зерттеу мүмкіндігінің болуы маңызды. Егер сіз баланың бір затты алып, ұстап отырғанын байқасаңыз, зат атауын түсінікті, анық әрі мәнерлеп бірнеше рет айтыңыз», – деген логопед маман бала сізбен сөйлескісі келсе, көңілін қайтармау керек екенін айтты.
</blockquote>
Маман баланың сөйлесуге деген ынтасын әрдайым қолдап отыруы керек дейді. Егер баланың былдырлауы бірсарынды болса, өзгертуге тырысыңыз. Нақтыласақ, басқа да дауысты, дауыссыз дыбыстарды (ля-ля-ля, ку-ку, дю-дя) пайдалана отырып, өзгешелеу керек.
<blockquote>
 «Жалпы бала 6 жасқа дейін барлық әріпті толық айтуға тиіс. Сөйлеуінде кедергі, ақауы бар балаларды 3-сыныпқа логопед мамандарға көрсетсе, түзеліп кетеді. Ал логопедтің жұмысынан кейін де әріптері дұрыс болмаса, ол баланы сөйлеу кемістіктерін түзейтін арнайы мектептерге берген жөн», – деп қорытындылады Әлия Ерлан.
</blockquote>
<a href="https://sputnik.kz/20220611/bala-tili-logoped-kenesi-25463757.html">Sputnik Қазақстан</a>

Бала тілі дұрыс шықсын десеңіз – логопед кеңесі

Kyzylorda-news.kz. Қасым-Жомарт Тоқаев Алматы облысының әкімі лауазымына Марат Сұлтанғазиевті тағайындады.
<blockquote>
 «Марат Елеусізұлы Сұлтанғазиев Алматы облысының әкімі лауазымына тағайындалсын», – делінген президент қаулысында.
</blockquote>
Ал бұған дейін Алматы облысын басқарған Қанат Бозымбаев басқа жұмысқа ауысуына байланысты қызметінен босатылды.
Марат Сұлтанғазиев 1976 жылы Алматы облысында дүниеге келген. Абай атындағы Алматы мемлекеттік университетін, Қазақ мемлекеттік заң академиясын, Т. Рысқұлов атындағы Қазақ экономикалық университетін тәмамдаған. Мамандығы бойынша — экономист-қаржыгер, заңгер, іскерлік әкімшілендіру магистрі.
Еңбек жолын 1997 жылы Салық бөлімінің заңды тұлғаларды тексеру бөлімінің бірінші санатты маманы болып бастаған. Сонымен қатар Алматы қаласы салық комитетінде, Қаржы министрлігінде лауазымды қызметтер атқарған. Мемлекеттік кірістер комитетінің төрағасы болып та жұмыс істеген.

Марат Сұлтанғазиев Алматы облысының әкімі болып тағайындалды

Kyzylorda-news.kz. Берік Әбдіғалиұлы Ұлытау облысының әкімі лауазымына тағайындалды. Тиісті Жарлыққа Мемлекет басшысы қол қойды, деп хабарлайды Ақорда.
1971 жылғы 18 қыркүйекте Қарағанды облысы Жезқазған кентінде дүниеге келген.
1988 жылы Тараз қаласындағы №45 гимназияны бітірген.
1994 жылы әл-Фараби атындағы Қазақ ұлттық университетін «Тарих» мамандығы бойынша тәмәмдаған. Саясаттану ғылымдарының кандидаты.
1994-1995 жылдары – ҚР Президенті жанындағы Қазақстанның стратегиялық зерттеулер институтының (ҚСЗИ) ғылыми қызметкері, 1995-1997 жылдар – ішкі саясат бөлімінің меңгерушісі, директордың орынбасары.
1997-1999 жылдарда ҚР Баспа және бұқаралық ақпарат ісі жөніндегі ұлттық агенттігінде, ҚР Мәдениет, ақпарат және қоғамдық келісім министрлігінде қызмет атқарды.
1999-2001 жылдары ҚР Президент Әкімшілігінде жұмыс істеді.
2001-2002 жылдары – Қарағанды облысы Теміртау қаласы әкімінің орынбасары.
2002-2005 жылдары «Ақ жол» ҚДП Ұлттық зерттеулер институтының директоры, «Саяси ағарту қоры» ҚҚ президенті болып жасады.
2005-2006 жылдары – «Атамекен» кәсіпкерлер мен жұмыс берушілердің жалпыұлттық одағында кеңесші, «Атамекен» ұлттық даму орталығы» ЖШС директоры.
2007-2008 жылдары – ҚР Президент Әкімшілігінде бас инспектор, Ішкі саясат бөлімі меңгерушісінің орынбасары.
2008-2010 жылдары – «Мемлекеттік тілді дамыту қоры» ҚҚ директоры.
2010 жылғы қаңтар мен 2012 жылғы қаңтар аралығында – Қарағанды облысы Ұлытау ауданының әкімі, Жезқазған қаласының әкімі.
2012 жылы – 1-ші Вице-Премьердің кеңесшісі.
2012 жылғы мамыр мен 2013 жылғы наурыз аралығында – Қостанай облысы Арқалық қаласының әкімі.
2013 жылы – Қарағанды облысы әкімінің орынбасары.
2016-2017 жылдары – ҚР Президенті жанындағы ҚСЗИ директорының кеңесшісі, бас ғылыми қызметкер, ҚР Қарулы Күштері Әскери-тарихи мұражайының бас ғылыми қызметкері, ҚР Қорғаныс министрлігі.
2017 жылғы мамыр мен 2019 жылғы мамыр аралығында – ҚР Ұлттық мұражайының «Қасиетті Қазақстан» ғылыми-зерттеу орталығының жетекшісі, 2019 жылғы мамыр мен қазан аралығында – ҚР Мәдениет және спорт министрінің штаттан тыс кеңесшісі, ҚР Ұлттық мұрағатының «Архив-2025» ғылыми-әдістемелік орталығының жетекшісі.
2019 жылғы қазан мен 2021 жылғы қаңтар – Қарағанды облысы Ұлытау ауданының әкімі болды. 2021 жылдан Парламент Мәжілісінің депутаты.
2017 жылы «Өңірлік және муниципиалдық менеджмент» мамандығы бойынша MBA дәрежесін РФ Президенті жанындағы Ресей халық шаруашылығы және мемлекеттік қызмет академиясында (Мәскеу қ.) қорғады.
10 кітаптың және қазақстандық және шетелдік ғылыми басылымдардағы 100-ден астам ғылыми жарияланымдардың авторы.
«10 жыл Астана» (2008 ж.), «Қазақстан Тәуелсіздігіне 20 жыл» (2011 ж.), «20 жыл Астана» (2008 ж.), «Құрмет» орденімен (2017 ж.) марапатталған. Төсбелгілер – ҚР БҒМ «Қазақстан Республикасының ғылымын дамытуға сіңірген еңбегі үшін» (2016 ж.), ҚР МСМ «Мәдениет саласының үздігі» (2019 ж.).

Ұлытау облысының әкімі тағайындалды

Kyzylorda-news.kz. Кеше Қызылорда облысында арнайы жұмыс сапармен «Kazakh Invest» ҰК» Басқарма төрағасы Мейіржан Юсупов келді.
Басқарма төрағасы мен облыс әкімінің орынбасары Мархабат Жайымбетов қаладағы жаңадан салынатын жылу орталығына барды. Жұмысымен танысып, оған қатысты мәселелерді талқылады.
Облыс орталығында қуаты 240 МВт болатын заманауи бу-газ қондырғысын салу жоспарлануда. Жобаны іске асыруға құны – 215,1 млрд теңге қаржы бөлініп, 2025 жылы пайдалануға беріледі деп көзделуде. Бұл жоба іске асырылса электр тапшылығын жоюға мүмкіндік тумақ.
Жоба инвесторлардың қаржысы есебінен іске асырылады. Осыған орай, осы жылдың 13 шілдесінде ҚР Энергетика Министрлігі аукцион түрінде сауда-саттық өткізеді. Оған дүниежүзінен ірі инвесторлар тартылады. Аукцион голландық тәсілмен жүргізілетін болады.
Биыл жоба-сметалық құжаттары мен құрылыс-монтаж жұмыстары басталса, 2025 жылы аяқтау жоспарлануда.
<img src="https://kyzylorda-news.kz/wp-content/uploads/2022/06/fb_img_1654924283062.jpg" alt="" />
<img src="https://kyzylorda-news.kz/wp-content/uploads/2022/06/fb_img_1654924278487.jpg" alt="" />

«Kazakh Invest» ҰК» Басқарма төрағасы жылу орталығына барды

Kyzylorda-news.kz. Қызылорда облысы әкімі аппаратының басшысы Шахмардан Байманов облыстық қоғамдық штаб мүшелерімен кездесіп, аймақ басшысы Нұрлыбек Нәлібаевтың алғысын жеткізді.
Мемлекет Басшысының «ҚР Конституциясына өзгерістер мен толықтырулар енгізу туралы» Жарлығына сәйкес аймақта референдумды қолдау шараларына азаматтық қоғам өкілдерінен облыстық штаб құрылып, халық арасында үгіт-насихат жүргізуге белсенді атсалысты. Оның құрамына үкіметтік емес ұйым өкілдері, журналистер, ғалымдар, заңгерлер, қоғам белсенділері кірді.
<blockquote>
 «Конституцияға өзгерістер енгізу бойынша халық арасында кездесулер өткізіп, түсіндірме жұмыстарын жүргізуде облыстық қоғамдық штаб мүшелерінің рөлі зор болды. Жаңа Қазақстанды жаңғыртуды Президенттің Конституциядан бастауын барша Сыр жұртшылығы әділеттіліктің нышаны ретінде қабылдап, Мемлекет Басшысының бастамаларына сенім артты және қолдау білдірді. Оның айқын дәлелі, республика деңгейіндегі дауыс беру көрсеткішімен Қызылорда облысы екінші орынға тұрақтап, үздік өңірлер қатарынан көрінді», – деді Шахмардан Байманов.
</blockquote>
Кездесу барысында штаб төрағасы Жандос Базартай сөз алып, штаб мүшелерінің Жаңақорған ауданынан бастап Арал ауданына дейін елді мекен тұрғындарымен және еңбек ұжымдарымен кездесулер өткізіп, ақпараттық-түсіндіру жұмыстарының жоғары дәрежеде жүргізілген атап өтті.
Кездесу соңында Шахмардан Байманов штаб мүшелеріне облыс әкімінің «Алғыс хатын» және «Кітап ал» дүкенінің сертификатын табыстады.
<img src="https://kyzylorda-news.kz/wp-content/uploads/2022/06/fb_img_1654923145702.jpg" alt="" />

Қызылордада қоғамдық штаб мүшелеріне алғыс білдірілді

Kyzylorda-news.kz. Қызылорда облысының әкімі Нұрлыбек Нәлібаев кезектілік тәртібімен жазылған 9 тұрғынды жеке сұрақтары бойынша қабылдап, көкейтесті мәселелерін тыңдады.
Қабылдауға келген азаматтардың басым бөлігі әлеуметтік көмек, тұрғын үй, жұмыспен қамту мәселесіне қатысты сауалдар көтерді.
Облыс әкімі сала басшыларына әлеуметтік мәселелерді мемлекеттік бағдарламалар шеңберінде қарап, ұтымды жақтарын ұсыну қажет екенін жеткізді. Ал, тұрғын үй беру заң аясында кезек тәртібімен берілетінін баса айтып, уақытша баспанамен қамту жұмыстары жүргізілетінін жеткізді.
Айта кетейік, тұрғындар облыс әкімінің қабылдауына e-gov порталы арқылы, е-otinish бірыңғай базасы немесе әкімдікке келіп жазбаша арыз тастау арқылы жазыла алады.
<img src="https://kyzylorda-news.kz/wp-content/uploads/2022/06/fb_img_1654922613198.jpg" alt="" />
<img src="https://kyzylorda-news.kz/wp-content/uploads/2022/06/fb_img_1654922611083.jpg" alt="" />
<img src="https://kyzylorda-news.kz/wp-content/uploads/2022/06/fb_img_1654922615832.jpg" alt="" />

Нұрлыбек Нәлібаев жеке қабылдауға келген тұрғындардың мәселесін тыңдады

Kyzylorda-news.kz. Қазақстан аумағының басым бөлігіне циклон әсер етеді және онымен байланысты атмосфералық фронтальды бөліктерде құбылмалы ауа райы сақталады, деп хабарлайды Қазгидромет.
Жаңбыр жауады, оңтүстік-шығыста қатты жаңбыр жауады. Республика бойынша найзағай, бұршақ, желдің күшеюі, оңтүстік-батыста шаңды дауыл соғады. Тек еліміздің батысында антициклон жотасының ықпалымен жауын-шашынсыз ауа райы болжанады.
Қызылорда ​​облысының орталығында төтенше өрт қауіпі сақталады.

11 маусымға арналған ауа райы болжамы

Kyzylorda-news.kz. Сыр өңірінде бірқатар ірі индустриялық жобаны іске асыру аймақ экономикасына ауқымды инвестиция салуды қажет етеді.
Бүгін облыс әкімі Нұрлыбек Нәлібаев «Kazakh Invest» НК» АҚ Басқарма басшысы Мейіржан Юсуповпен кездесіп, өңірдің инвестициялық әлеуетін арттыру мәселелерін талқылады. 
Аймақ басшысы «Kazakh Invest» басшысына Сыр елінде жаңа жылу электр орталығын салу, шыны зауыты жанынан 8 ілеспе өндіріс ашу, «Арал Сода» кальцийленген сода зауыты мен «Шалқия» тау-кен комбинатын іске қосу секілді ірі инвестициялық жобаларды таныстырды.
<blockquote>
 Қазіргі таңда осы өндірістер бойынша инвесторларды іздестіру жұмыстары жүргізілуде. Мәселен, жылу электр орталығының құрылысын салуға Түркия мен Қытай елдерінің инвесторлары қызығушылық білдіруде. Биыл конкурс өткізіліп, құрылыс-монтаждық жұмыстар басталған жағдайда 1,5 жыл ішінде жаңа жылу орталығы пайдалануға беріледі,-деді облыс әкімі.
</blockquote>
Кездесу барысында Сыр елінде жалпы құны 660 млрд. теңгені құрайтын 26 жобаны жүзеге асыру ұсынылды. Облыс әкімі аймақта мұнай қоры сарқылуына байланысты жаңа өндірістерді ашып, оның арқасында көптеген жұмыс орындарын құру және салық базасын ұлғайту қажеттігін алға тартты. 
Өз кезегінде, Мейіржан Юсупов бірлесіп жұмыс жасауға ниет білдіріп, Қызылордаға іссапары аясында ұсынылған жобалармен жіті танысып, оны іске асыру мүмкіндігін мұқият қарайтынын жеткізді. 
Еске салсақ, жуырда өңірге жұмыс сапармен Энергетика министрі Болат Ақшолақов пен Ұлттық экономика министрі Әлібек Қуантыров келіп, Сыр елінің өзекті мәселелерін талқылаған болатын.

Нұрлыбек Нәлібаев «Kazakh Invest» НК» басшысымен кездесті

Kyzylorda-news.kz. Магистратураға түсу үшін кешенді тестілеуге қатысуға өтініштер қабылдау басталды. Тіркеу ҚР БҒМ Ұлттық тестілеу орталығының app.testcenter.kz сайтында 2022 жылғы 15 шілдеге дейін жүргізіледі. ҚР БҒМ баспасөз қызметі хабарлады.
Үміткерлер білім беру бағдарламалары тобы, үміткерлердің тестілеуді өткізу тілі мен орнына өтінімдерді қабылдау мерзімі аяқталғанға дейін өзгерістер енгізе алады. Тестілеу күні туралы ақпарат үміткердің жеке кабинетінде қолжетімді болады. Ал кешенді тестілеу 20 шілдеде басталып, 10 тамызға дейін жалғасады.
<blockquote>
 «Кешенді тестілеу электронды форматта өткізіледі және үш бөліктен тұрады: шет тілі, оқуға дайындықты анықтау және білім беру бағдарламалары тобының бейіні бойынша тест. Оған 4 сағат беріледі. Шет тілін білу деңгейін растайтын халықаралық сертификаттары болса, үміткерлер шет тілінен тест тапсырудан босатылады», – деп түсіндірді ҚР БҒМ Ұлттық тестілеу орталығының директоры Руслан Емелбаев.
</blockquote>
Талапкерлерге магистратураға түсу үшін білім беру бағыттарының сәйкестігін анықтау бойынша нұсқаулықтар енгізілді. Бұл білім беру бағдарламаларының сабақтастығын, үздіксіздігін сақтау және бакалавриат мамандарын даярлау сапасын арттыру үшін қажет. Сондықтан белгілі бір білім беру бағдарламасына құжаттарды тапсырар алдында талапкерлер университеттің қабылдау комиссиясымен кешенді тестілеудің форматы және таңдалған білім беру бағдарламасы тобының талапкер алған мамандыққа сәйкестігі туралы кеңесуі қажет. Кеңесті университеттің виртуалды қабылдау комиссиясынан да алуға болады.
Биыл ғылыми-педагогикалық магистратураға түсу үшін шекті балл – 75, мамандандырылған магистратураға түсу үшін – 50 балл.
Кешенді тестілеу нәтижелерімен келіспеген жағдайда, үміткерлер тестілеуден өткеннен кейін онлайн апелляцияға бере алады.
2022-2023 оқу жылына арналған магистратураға мемлекеттік білім беру тапсырысы 13 мыңнан астам грант екенін еске сала кетейік.

Магистратураға түсу үшін кешенді тестілеуге тіркелу басталды

Kyzylorda-news.kz. Қорқыт ата атындағы Қызылорда университетінде «Оқу процесіндегі цифрлық трансформация және қолданбалы бағдарламалауды қамтамасыз ету» атты халықаралық ғылыми-тәжірибелік конференция өтті.
Конференция Еуропалық Одақтың Эразмус+ бағдарламасы шеңберінде «Информатика саласындағы PhD докторанттары мен жас зерттеушілерге арналған алдыңғы қатарлы орталық – ACeSYRI» бірлескен жобасы бойынша ұйымдастырылды.
Халықаралық ғылыми-практикалық конференция онлайн және офлайн режимінде гибридті форматта жүргізілді. Конференцияға жақын және алыс шетелдердің ғалымдары, Болгария, Ресей, Украина, Қазақстанның жоғары оқу өкілдері, сондай-ақ ACeSYRI жобасы консорциумының мүшелері қатысты.
<blockquote>
 «Конференция алаңы әр түрлі елдердің жас және тәжірибелі ғалымдары арасында пікір алмасуға ықпал етті. Конференция барысында айтылған ұсыныстар алдағы уақытта қолданысқа енбек. Шара қорытындысы бойынша арнайы жинақ даярланады. Жалпы конференцияны Қорқыт ата атындағы Қызылорда университетінде өткізу – өңір үшін де маңызы зор оқиға», – деді университеттегі Халықаралық жобалар мен стипендиялық бағдарламалар жөніндегі топ жетекшісі Темірболат Кеншінбай.
</blockquote>
Жиында IT технологияның қазіргі даму кезеңі бойынша өзекті мәселелер қозғалды.
Конференцияның ұйымдастыру комитетіне 128 ғалым мен оқытушыдан 88 ғылыми мақала келіп, 9 мақала пленарлық отырыста талқылауға шығарылды. Ал, қалған 79 мақала 4 секцияда талқыланбақ.

Қазақстан және Қызылорда облысының жаңалықтары