<a href="https://kyzylorda-news.kz/">Kyzylorda-news.kz.</a> Екі жарым мыңнан астам жанұя Қазақстанның үздік отбасы атағына үміткер.
Өтінімдер тек отбасылардың өздерінен ғана емес, сондай-ақ білім беру, денсаулық сақтау, мәдениет ұйымдары, еңбек ұжымдары, өнеркәсіптік кәсіпорындар, ҮЕҰ және басқа да заңды тұлғалар тарапынан ұсынылды.
Бұл ретте, «Мерейлі отбасы-2022» ұлттық конкурсының өңірлік кезеңінде – 2 542, оның ішінде отбасылардан – 1 407, заңды тұлғалардан – 1 135 өтінім тіркелді.
Өтінімдердің ең көп саны – Алматы (310), Жамбыл (247) облыстары мен Алматы (193) қаласында.
«Мерейлі отбасы» ұлттық конкурсының лауреаты атағы қыркүйек айында Отбасы күні (қыркүйектің екінші жексенбісі) қарсаңында Қазақстанның барлық өңірлерінен үздік шыққан отбасыларға беріледі.
Естеріңізге сала кетейік, Ұлттық конкурс 2014 жылдан бастап өткізіліп келеді. Осы уақыт ішінде «Мерейлі отбасы» ұлттық конкурсына 20 мыңға жуық отбасы қатысты.

«Мерейлі отбасы» конкурсына өтінім қабылдау аяқталды

<a href="https://kyzylorda-news.kz/">Kyzylorda-news.kz.</a> «AMANAT» партиясы Саяси менеджмент академиясы ұйымдастырып отырған көшпелі семинардың екінші кезеңінде Қызылорда облысынан 56 ауыл және ауылдық округ әкімдері біліктілік курсынан өтуде.
Олардың біліктілігін арттыру үшін Саяси менеджмент академиясы толыққанды дайындық бағдарламаларын әзірледі. Бүгін қатысушылар өздері басышлық ететін ауылдық округке скрининг жасап, анықталған деректерге сәйкес тиімді бизнес жобаларды дайындау, әрбір ауылдық ерекшелігіне, мамандануы негізінде кооперация құру, сонымен қатар ауылдағы дайын өнімді стандарттау мен сертификаттаудың мемлекеттік нормалары төңірегінде прақтикалық курстардан өтуде. Оқу барысында олар тәуекелдер, күтпеген жағдай туындаған кездерде бизнесті қайта бағдарлауға машықтануда.
3 күннен, күніне 8 сағаттан білімін жетілдіріп жатқан ауыл әкімдері ауыл халқының табысын арттыруға, елді мекенді экономикалық тұрғыда өркендетуде алып жатқан білімдерінің септігі зор екендігін айтады. Мәселен, Сырдария ауданына қарасты Н.Ілиясов ауылының әкімі Сағдат Нұрмағамбетов дайын өнімді стандарттау мен сертификаттаудың мемлекеттік нормаларын үйрену ірі бизнес жобаларды жүзеге асырып отырған ауыл әкімдері үшін өте қажет деп санайды.
<img src="https://kyzylorda-news.kz/wp-content/uploads/2022/06/20b749fe-3768-4313-940c-c1ad6380bed7.jpg" alt="" />

Қызылордада 56 ауыл әкімі біліктілік курсынан өтіп жатыр

<a href="https://kyzylorda-news.kz/">Kyzylorda-news.kz.</a> Қызылордада жеке балабақша иелері Кәсіпкерлер палатасының алаңында бас қосып, балабақшаны лицензиялауға қатысты пікірлерін білдірді. Бір топ лицензия керек десе, екіншісі оның шығыны мен тәуекелдері көп дегенді айтты.
Шараға Кәсіпкерлер палатасы директорының орынбасары Салават Құлмахан, облыстық білім саласында сапаны қамтамасыз ету департаменті басшысының орынбасары Айгүл Мырзағалиева, «Қазақстандық үздіксіз білім беру қауымдастығы» жеке кәсіпкерлер мен заңды тұлғалар бірлестігі Қызылорда облыстық филиалының төрайымы Наталья Мишукова, облыстық білім басқармасының өкілі және жеке балабақша құрылтайшылары қатысты.
Жақында оқу-ағарту министрі Асхат Аймағамбетов әлеуметтік желідегі парақшасында балабақшаларға қойылатын талаптарды күшейту туралы пікірін жазып, министрліктің лицензияны қайтару бойынша жұмыс істеп жатқанын жеткізді.
Кәсіпкерлер палатасының алаңында өткен кездесуде жеке балабақша иелері уәкілетті мемлекеттік орган басшысының пікірін қызу талқылап, алаңдаушылық білдірді.
«Қазақстандық үздіксіз білім беру қауымдастығы» жеке кәсіпкерлер мен заңды тұлғалар бірлестігінің Қызылорда облыстық филиалының төрайымы Наталья Мишукова лицензияны қайтадан енгізу мәселені түбегейлі шешпейді деген пікір білдірді.
<blockquote>
 «Осыдан он жыл бұрын елімізде балабақшалар жетіспеген кезде мемлекет «Балапан» бағдарламасын қабылдап, лицензияны алып тастады. Нәтижесін өздеріңіз де көріп отырсыздар. Балалар мектепке дейінгі ұйыммен толық қамтылды. Енді жағдай оңалғанда Оқу-ағарту министрлігі лицензияны енгізіп, жеке балабақшалар санын қысқартпақ. Мұны қалай түсінуге болады», – деді қауымдастықтың облыстағы өкілі Наталья Мишукова.
</blockquote>
Кәсіпкерлердің мектепке дейінгі ұйым мәселесін шешуге айтарлықтай үлес қосып келе жатқанын Қызылорда облысы кәсіпкерлер палатасы директорының орынбасары Салават Құлмахан атап өтті.
<blockquote>
 «Қазір тек Қызылорда облысы бойынша 667 мектепке дейінгі білім беру ұйымы болса, оның 415-і, яғни 62 пайызы – жеке балабақшалар. Министрліктің ұсынып отырған қадамы кәсіпкерлерге қандай қиындықтар мен кедергілер тудыруы мүмкін? Мәселені шешудің қандай жолдары бар?Осы сұрақтарды талқылау үшін жиналдық», – деді Салават Құлмахан.
</blockquote>
Наталья Мишукова балалардың қауіпсіздігі мен оларға жасалатын жағдайдың дұрыс болуына кәсіпкерлер де мүдделі екенін атап өтті. Талаптарға сай жұмыс істемейтін жеке ұйымдар кездессе, заң аясында жауап бергенін қалайды. Алайда бар мәселені лицензияға әкеліп тіреп қоюға қарсы.
<blockquote>
 «Біз министрліктің осы жылы енгізген балабақшаларды аттестациядан өткізу туралы бастамасымен келістік. Облысымыздағы мемлекеттік балабақшалардың 51 пайызы аттестациядан өтпей қалды. Бұл нені білдіреді? Мәселе тек жеке балабақшада ғана ма? Аттестациядан өтпеген балабақшалар жабылуы керек екенін ескерсек, бір ғана Қызылорда облысында мемлекеттік мектепке дейінгі ұйымның жартысынан астамы жұмысын тоқтатуы керек. Ал қазір бұл балабақшалар жұмыс істеп жатыр», – деді Наталья Мишукова.
</blockquote>
Төрайым лицензиядан бұрын мемлекет балабақшаларда жұмыс істейтін маман тапшылығын жоюға, олардың біліктілігін, жалақысын көтеруге қолдау көрсетуін сұрап отыр.
Маман тапшылығы, сондай-ақ мамандардың біліктілігіне қатысты проблеманың бар екенін «Ұмай» мектеп жасына дейінгі балаларға арналған қайырымдылық сауықтыру және тәрбиелеу үйі» мекемесінің құрылтайшысы Анар Ізден атап өтті. Ол балаларға мектепке дейін тәрбие беретін ұйымдарды лицензиялау керек деген пікірде.
<blockquote>
 «Алкагольдік ішімдіктерді сату, құрылыс материалдарын шығару үшін лицензия керек, ал білім сатысындағы ең басты кезеңді лицензияламау керек дегенді түсінбеймін. Балабақшадан өзге қосымша білім беру ұйымдары да лицензия алу керек. Лицензияға қарсы әріптестерімді де түсінемін. Лицензиялау міндеттелген жағдайда жұмыс қалай ұйымдастырылады? Саладағы жемқорлық сипатындағы тәуекелдер көп болғандықтан, кәсіпкерлердің басым көпшілігін мәселенің осы жағы көбірек мазалайды. Екінші маңызды проблема, жеке балабақшаларда санаты бар мамандар жоқтың қасы. Ал лицензия алуда қойылатын негізгі талаптардың бірі осы», – деді Анар Ізден.
</blockquote>
Анар Ізден мемлекеттік балабақша мамандары мемлекет қаржысымен оқып жатқанда, жеке балабақша иелері мамандардың біліктілігін арттыру үшін өз қаржысына оқытуға мәжбүр екенін атап өтті. Ол мемлекет балабақша мәселесіне келгенде жеке немесе мемлекеттік деп бөлмей, бірдей жағдай жасауын сұрайды. Сонымен бірге, балабақша жұмысының сапасын қамтамасыз ету жолдарын нақты айқындау керек деген ұстанымда. Ол үшін министрлік және жергілікті жерлерде облыстық білім басқармалары жанынан арнайы кеңес құрып, балабақшаларды лицензиялаудағы нормативтік құжаттарды зерделеуді, жеке балабақшалар жабылуға мәжбүр болған жағдайда мектепке дейінгі білім берумен қамту көлемінің азайып кетпеуін қадағалап, жұмыссыздық секілді шиеленіс ошағын тудыратын мәселелерді шешіп алуды ұсынды.
Кездесуде жеке балабақша иелері салаға қатысты бұдан өзге де мәселелерді ортаға салды. Ол облыста мемлекеттік субсидияның тек үш жасқа толған балаларға берілетініне (2 жастан бастап беретін өңірлер де бар – авт.), субсидия толық төленбейтініне, сондай-ақ жолдама берудегі проблемаларға тоқталды.
Жиын соңында Палата директорының орынбасары Салават Құлмахан айтылған ұсыныстарды жинақтап, «Атамекеннің» Орталық аппаратына жолданатынын, әрі қарай барлық облыстан берілген ұсыныс негізінде министрлікке Ұлттық палата позициясы ұсынылатынын жеткізді.

Жеке балабақшаны лицензиялау керек пе?

<a href="https://kyzylorda-news.kz/">Kyzylorda-news.kz.</a> Бүгін Қызылорда облысы әкімдігі жанындағы мемлекеттік рәміздер жөніндегі комиссия отырысы өтті.
Жиын барысында күн тәртібіндегі 4 мәселе қаралды. Атап айтқанда, мемлекеттік рәміздердің насихатталу және оның қолданылу жай-күйіне байланысты облыстық инспекциялық топтың тексеру жұмыстарының қорытындысы, Қызылорда облысының мәдениет және спорт басқармасына қарасты мекемелерде мемлекеттік рәміздердің қолданылу аясы, Жалағаш және Сырдария аудандарында мемлекеттік рәміздердің ұлықталуы туралы сөз етілді.
Ведомствоаралық облыстық инспекциялық топ құрамында – Қызылорда облысының қоғамдық даму басқармасы, облыстық полиция департаменті, Техникалық реттеу және метрология комитетінің Қызылорда облысы бойынша департаментінің өкілдері бар.
Аталған инспекциялық топ қала және аудандардағы 198 мемлекеттік мекемеде рәміздердің стандарттарға сәйкес қолданылуы мен орналастырылуы бойынша зерделеу жұмыстарын жүргізді. Нәтижесінде, 18 мекемеде кемшіліктер анықталып, оның үшеуі дер кезінде қалпына келтірілді.

Қызылордада 18 мемлекеттік мекемеде рәміздерді стандартқа сәйкес қолданбағаны анықталды

<a href="https://kyzylorda-news.kz/">Kyzylorda-news.kz.</a> Сырдария ауданының әкімі Мұрат Ергешбаев А.Тоқтамағанбетов атындағы елді мекендегі бірқатар шаруашылықтың жұмысымен танысты.
2006 жылы іргесі қалаған «Шуақ» қожалығы бүгінде 53 гектар алқапқа Сыр дәні мен 6 гектар алқапқа бақша дақылдарын егуде. Шаруашылық төрағасы Әубәкір Маханбетов 2 дана ауылшаруашылық техникасымен бірнеше адамды жұмыспен қамтуда.
<blockquote>
 «Жалпы елдің орнықты экономикалық дамуын қамтамасыз ету жеке кәсіпкерліктің және ең алдымен шағын және орта бизнестің даму деңгейіне тікелей тәуелді. Сондықтан шағын және орта кәсіпкерлік пен жеке кәсіп иелерінің дамуына қолдау көрсету мемлекеттің басты қызметі. Басты мақсатымыз – аудандағы кәсіпкерліктің тұрақты өсуін қамтамасыз ету, сондай-ақ тұрақты жұмыс істейтін жаңа жұмыс орындарын құру», – деді Мұрат Нәлхожаұлы.
</blockquote>
Мұнан соң аудан басшысы аталған ауылдық округтегі мал шаруашылығымен қатар егінмен айналысатын «Қарақоныс» қожалығына атбасын тіреді. Төраға Болатбек Надиров 2013 жылы «Сыбаға» мемлекеттік бағдарламасы аясында 12,5 млн теңге несие қаржысына 120 бас аналық сиыр мен 5 асыл тұқымды «Ақбас» бұқа сатып алып, тауарлы бағыттағы селекциялық жұмыс жүргізуде. Осыдан бірнеше жыл бұрын мал басы кеңейтіп, оны бордақылауға жаңа алаң тұрғызған.
Бүгінде аталған шаруамен қатар егін егуге де ден қойған. Шаруа қожалығы 30 гектар алқап алтын дән орналастырып, 25 гектарға жоңышқаның жаңа және ескі түрін егуде. Шағын қожалық 6 адамды жұмыспен қамту үстінде, дейді төраға Болатбек Қарақонысұлы.
Шаруалардың жұмысымен танысқан аудан әкімі кәсіпкерлікті қолдау тетіктерін одан әрі жетілдіру керек екендігін атап өтті.
<img src="https://kyzylorda-news.kz/wp-content/uploads/2022/06/288680846_1144261719470052_4961583919482374568_n.jpg" alt="" />
<img src="https://kyzylorda-news.kz/wp-content/uploads/2022/06/288676999_1144261709470053_7827044789697051658_n.jpg" alt="" />

Мұрат Ергешбаев: Мақсатымыз – аудандағы кәсіпкерліктің тұрақты өсуін қамтамасыз ету

<a href="https://kyzylorda-news.kz/">Kyzylorda-news.kz.</a> Қызылорда облысы Полиция департаментінің басшылығы мен ІІО Ардагерлер кеңесі дәрігер-әріптестерін кәсіби мерекемен құттықтады.
Тәртіп сақшылары медицина қызметкерлері күні қарсаңында ведомстволық емхана қызметкерлеріне тынымсыз еңбектері үшін алғыс білдірді.
Емхананың дәрігер-терапевті Райкүл Сейтенова, хирург Мұхтар Туйгунов, дәрігер-бактериолог Гульнара Ахметова, аяжан Раушан Түлкібаева грамоталармен, емхананың аяжаны Айгүл Бакеева, лаборант Айгерім Жаппасбаева алғыс хатпен марапатталды.
Медицина қызметкерлерін мерекемен құттықтай отырып, Полиция департаменті бастығының орынбасары полиция полковнигі Әміржан Өтегенов дәрігерлер мен медбикелердің еңбегін атап өтіп, олардың барлық бастамаларына сәттілік тіледі.
<img src="https://kyzylorda-news.kz/wp-content/uploads/2022/06/0v4a7709-scaled.jpg" alt="" />
<img src="https://kyzylorda-news.kz/wp-content/uploads/2022/06/0v4a7717-scaled.jpg" alt="" />
<img src="https://kyzylorda-news.kz/wp-content/uploads/2022/06/0v4a7736-scaled.jpg" alt="" />
<img src="https://kyzylorda-news.kz/wp-content/uploads/2022/06/0v4a7744-scaled.jpg" alt="" />
<img src="https://kyzylorda-news.kz/wp-content/uploads/2022/06/0v4a7746-scaled.jpg" alt="" />

Қызылордалық полицейлер медицина қызметкерлерін құттықтады

<a href="https://kyzylorda-news.kz/">Kyzylorda-news.kz.</a> Қызылорда қалалық кәсіпкерлік, өнеркәсіп және туризм, қалалық сәулет және қала құрылысы және қалалық тұрғын үй-коммуналдық шаруашылығы, жолаушылар көлігі, автомобиль жолдары бөлімдерінің өкілдері қала аумағында орналасқан жеке кәсіп иелері мен тұрғындарын тазалық сақтауға шақырды. Бөлім мамандары аталған бағытта түсіндірме жұмыстарын жүргізді.
Қаланың келбетті көркі тазалыққа тікелей байланысты. Алайда, кәсіп иелері мен жеке сектор тұрғындары көше бойларына, көпқабатты үйлердің аулаларына бейберекет қоқыс және құрылыс қалдықтарын тастау әрекеттерін азайтар емес.
Осыған байланысты қала әкімінің тапсырмасына сәйкес шаһардың сәулеттік келбетін қалыптастыру, ғимараттардың сыртқы қасбеттерін ретке келтіру, абаттандыру және көркейту, ең бастысы санитарлық тазалығын қамтамасыз ету бағытында түсіндірме жұмыстарын жүргізу қолға алынды.
<img src="https://kyzylorda-news.kz/wp-content/uploads/2022/06/288784002_1807247976333634_9105139848563973270_n.jpg" alt="" />
<img src="https://kyzylorda-news.kz/wp-content/uploads/2022/06/287233221_1807248169666948_1285208789479311030_n.jpg" alt="" />
<img src="https://kyzylorda-news.kz/wp-content/uploads/2022/06/287134190_1807248006333631_15514200478264674_n.jpg" alt="" />
<img src="https://kyzylorda-news.kz/wp-content/uploads/2022/06/288543381_1807248239666941_9072972936459740263_n.jpg" alt="" />

Басты талап &#8211; қаланың сәулеттік келбеті мен тазалығын сақтау

<a href="https://kyzylorda-news.kz/">Kyzylorda-news.kz.</a> Денсаулық сақтау министрі Ажар Ғиният медицина қызметкерлерін кәсіби мерекесімен құттықтады, деп хабарлайды <a href="https://lenta.inform.kz/kz/kazakstanda-78-mynnan-astam-dariger-bar_a3945432">ҚазАқпарат</a>.
<blockquote>
 «Медицина – ерекше жан-дүниені сезіне білу қасиетін, жоғары кәсіби біліктілікті, білім мен тәжірибені қажет ететін сала. Дәрігерлер әрдайым адамгершілігімен, жанқиярлығымен және өз ісіне деген адалдығымен ерекшеленеді. Медицина – адам туғаннан бастап өмірінің соңына дейін араша түсетін жалғыз мамандық. Адамның өмір сүруіне үміт беретін дәрігер. Бүгінгі таңда Қазақстанда 260 мыңға жуық медицина маманы, оның ішінде 78 мыңнан астам дәрігер және 189 мың орта медицина қызметкері жұмыс істейді. Елімізде күн сайын 2 мыңнан астам операция жасалады, тәулігіне 600-ден астам әйел босанады, стационардан 7 мыңнан астам науқас емделіп шығады, емханаларда 420 мыңнан астам адамға және жедел жәрдем 19 мың адамға қызмет көрсетеді» делінген министр Ажар Ғинияттың құттықтауында.
</blockquote>
Оның айтуынша, Қазақстанда денсаулық сақтау саласы қарқынды дамып келеді. Халықтың қалың тобына, оның ішінде ауыл тұрғындарына қолжетімді және жедел алғашқы медициналық көмекті ұйымдастыру тәсілдері қайта қаралып жатыр.
Жоғары технологиялық көмек көрсету көлемі өсіп, жаңа перинаталдық орталықтар салынуда. Инновациялық бағдарламалар енгізіліп жатыр.
Осындай жаңалықтардың арқасында бүгінгі күні сирек кездесетін және күрделі ауруларға сәтті диагностика жүргізіліп, емделіп жүр.
Онкологиялық және гематологиялық ауруларға күдік туындаған кезде пациенттерді тексеруді және емдеуді жеделдету үшін «Жасыл жол» енгізілді.
<blockquote>
 «Соңғы жылдары біз ең маңызды екі көрсеткіштің жақсарғанын байқайдық – өмір сүру ұзақтығы және туу көрсеткіші өсті. Қазақстан Республикасының Президенті 2022 жылды «Балалар жылы» деп жариялады. Балалардың денсаулығын сақтау іс-шараларын іске асыру шеңберінде біз профилактикаға ерекше назар аударамыз. Соған байланысты жүргізілетін зерттеулердің ағымдағы көлемін ескере отырып, балаларды профилактикалық тексеру кеңейтіледі. Осындай жетістіктерге сіздердің қажырлы еңбектеріңіздің, өз ісіне жауапкершілікпен қарайтын сала мамандарының еңбегі ерекше зор. Барлық медицина қызметкерлеріне қазақстандықтардың денсаулығын сақтауға қосқан баға жетпес үлесі үшін шынайы ризашылығымды білдіремін. Ерекше алғыс сөздерін сала ардагерлеріне айтқым келеді. Сіздердің тәжірибелеріңіз дәстүрді сақтауға көмектесіп, мамандардың жаңа буынына үлгі болары сөзсіз» дейді Ажар Ғиният.
</blockquote>

Қазақстанда 78 мыңнан астам дәрігер бар

<a href="https://kyzylorda-news.kz/">Kyzylorda-news.kz.</a>&nbsp;18 маусым күні Қызылорда қаласы «Титов» қыстағында «Байқоңыр» ӘКК» АҚ ұйымдастыруымен өңірлік тұрақтандыру қорынан алынған әлеуметтік маңызы бар азық-түлік тауарларының жәрмеңкесі өтеді.
<img src="https://kyzylorda-news.kz/wp-content/uploads/2022/06/288658759_1555910088137831_5129265909709815859_n.jpg" alt="" />

Қызылордада жәрмеңке өтеді

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы әкімінің міндетін атқарушы М.Жайымбетовтың №572 қаулысына сәйкес «Қайсар» Қызылорда облыстық футбол клубы» ЖШС директоры міндетін уақытша атқаруға белгілі спорт маманы және жанашыры Садық Шоңмұрынұлы Мұстафаев тағайындалды.
Жаңа директорды таныстыру мақсатында облыстық мәдениет және спорт басқармасының басшысы Руслан Рүстемов келді. Ол футбол клубының алдында тұрған зор міндетті сабақтап, жаңа басшыға артылар аманат ауқымды екенін жеткізді. Сөйтіп, Садық Мұстафаевқа сәттілік тіледі.
Өз кезегінде Садық Шоңмұрынұлы: «Қайсардың» бұл маусымда бірінші лигадан Премьер-лигаға шығуына барынша атсалысатынын, клубтың қаражат мәселесін шешуге мүмкіндік қарастыратынын айтып, команда жауапкершілігі ортақ екенін білдірді.
Клуб ұжымы келелі мақсатты алға оздыруға айрықша атсалысатын жаңа директордың қызметіне сәттілік тіледі.

«Қайсар» футбол клубын уақытша Садық Мұстафаев басқарады

<a href="https://kyzylorda-news.kz/">Kyzylorda-news.kz.</a>&nbsp;ҚР аумағының басым бөлігіне, әлі де атмосфералық фронтальды бөлімдер әсер етеді. Осыған байланысты тұрақсыз ауа райы сақталады, найзағай болып, жаңбыр жауады, сондай-ақ бұршақ, дауыл күтіледі, деп хабарлайды Қазгидромет.
Еліміздің солтүстігінде, оңтүстігінде көбінесе жауын-шашынсыз ауа райы күтіледі. Республика бойынша желдің күшеюі, оңтүстікте шаңды дауыл күтіледі.
Күндіз Қызылорда облысында қатты ыстық болады. Аймақта төтенше өрт қаупі күтіледі.

Жұма күнге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Әлеуметтік медициналық сақтандыру қоры жыл сайын профилактикалық медициналық тексерулерді қаржыландыруға қаражат бөледі. Уақытында жүргізілген тексерулер аса ауыр ауруларды ерте кезеңде анықтауға және емдеуді бастауға көмектеседі. Скринингтік тексерулерді өткізіп алмау неліктен маңызды және оны қалай жасауға болады? Осы және басқа да сауалдарға «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетовке жауап берді.
Скрининг дегеніміз не және ол не үшін қажет?
Скрининг – бұл шағымдары жоқ белгілі бір жастағы адамдарды ауруларды ерте сатысында анықтау және алдын алу үшін профилактикалық медициналық тексеру. 
Яғни, емханаға бір рет бару арқылы сіз арнайы тексеру әдістерін қолдана отырып, қатерлі ісік немесе басқа аурулардың болуының (скрининг түріне байланысты) алдын аласыз немесе олардың пайда болу ықтималдығын уақытында анықтай аласыз.
Сақтандыру қажет пе?
Профилактикалық қарап-тексеру және скрининг бойынша медициналық көмек ТМККК және МӘМС бойынша көрсетіледі. Яғни учаскелік дәрігердің қабылдауы ТМККК шеңберінде жүргізіледі, сондықтан сақтандырылған тұлға мәртебесі қажет емес. Алайда пациентті консультациялық-диагностикалық қызметтерге (кардиолог, эндокринолог және офтальмологтың консультациясы, талдаулар алу, рентгеннен өту немесе қандай да бір басқа тексерулерден өту) жіберу үшін түлғаның сақтандырылған мәртебесі болу керек, өйткені бұл қызметтер МӘМС жүйесінде көрсетіледі.
Кімге және қандай скринингтік тексеруден өту қажет?
– 30-39 жас аралығындағы әйелдер мінез-құлық қауіп факторларын ерте анықтау мақсатында скринингтен өтеді. Темекі шегу, дұрыс тамақтанбау, дене белсенділігінің төмен болуына немесе алкогольді шамадан тыс тұтынуға байланысты пациентке салауатты өмір салты мен дұрыс тамақтану жөнінде ұсынымдар беріледі.
– 40-тан 70 жасқа дейінгі ерлер мен әйелдер артериялық гипертонияны, жүректің ишемиялық ауруын, қант диабетін және глаукоманы ерте анықтау үшін скринингтен өтеді. Қан қысымының, холестериннің, қан глюкозасының деңгейі және дене салмағының индексі анықталады.
– 30-дан 70 жасқа дейінгі әйелдер жатыр мойны обырын ерте анықтауға тексеруден өтеді, оның ішінде ПАП-тест және тереңдетілген диагностика – (бейне) кольпоскопия, биопсия және гистологиялық зерттеу, бейінді мамандардың консультациясын алады.
– 40 – тан 70 жасқа дейінгі әйелдер сүт безі обырын ерте анықтауға-екі проекцияда маммографияға тексеруден өтеді. Қажет болған жағдайда тереңдетілген диагностика – нысаналы маммография, сүт бездерінің УДЗ, трепанобиопсия, пункциялық немесе аспирациялық биопсия, гистология, бейінді мамандардың консультациясы жүргізіледі.
– 50-ден 70 жасқа дейінгі ерлер мен әйелдер гемокульт-тесттің көмегімен колоректалдық обырды ерте анықтауға тексеруден өтеді немесе қажет болған жағдайда тереңдетілген диагностика – жаппай бейне колоноскопия, оның ішінде наркоз, эндоскопиялық шертпелі биопсия, гистологиялық зерттеу арқылы мамандардың консультациясын алады.
Скринингтер өткізу «Скринингтік зерттеулерге жататын адамдардың нысаналы топтарын, сондай-ақ осы зерттеулерді жүргізу қағидаларын, көлемі мен кезеңділігін бекіту туралы» ҚР ДСМ м.а. № 174 бұйрығымен регламенттеледі.
Скринингтен қалай өту керек?
Көңіл-күйіңізге, денсаулығыңызға ешқандай шағым болмаса да, скринингтен міндетті түрде өту қажет. Профилактика – сіздің денсаулығыңызды қорғаудың маңызды әдістерінің бірі. Бүкіл әлемдегі медицина қазір дәрігерлердің, мемлекеттің ғана емес, азаматтардың өздерінің де денсаулығы үшін ортақ жауапкершілікті көтеруге шақырады. Сондықтан жасына қарай жасалынатын тексерулерді өткізіп алуға болмайды.
Әдетте, пациент тіркелген емхананың учаскелік медбикесі оны скринингтен өтуге шақырады. Алайда, сіз ол жерге жеке куәлігіңіз қолыңызда болса, өздігіңізден хабарласа аласыз.
Әрбір емханада скринингтік кабинеттер құрылған, онда дәрігер өмір салты мен тамақтану рационы, зиянды әдеттердің, тұқым қуалайтын аурулардың болуы туралы сұрақтар қояды, бойын, салмағын, қан қысымын өлшейді, қандағы қант пен холестерин деңгейін тексереді. Содан кейін қажет болған жағдайда пациент қосымша тексеруге немесе бейінді маманның кеңесіне жіберіледі. Жүргізілетін іс-шаралар тізбесі скринингтік зерттеу түріне байланысты болады.
Халық денсаулығы және денсаулық сақтау жүйесі туралы кодексте қызметкерлерге скринингтік зерттеулерден өту үшін жыл ішінде 3 жұмыс күніне дейін әлеуметтік демалыс берілетінін білу маңызды. Яғни, жұмыс беруші өз қызметкерін оның лауазымы мен орташа жалақысын сақтай отырып, скринингтен өтуге кедергісіз босатуы керек.
Егер сұрақтарыңыз болса, сіз оларды емханаңыздан пациенттерге қолдау көрсету қызметіне хабарласып сұрай аласыз. Егер сізге сол жерде көмектесе алмаған жағдайда, онда сіз ыңғайлы байланыс арнасы арқылы Әлеуметтік медициналық сақтандыру қорына өтініш жібере аласыз: fms.kz ресми сайты, 1406 байланыс орталығы, Telegram-да SaqtandyryBot және Qoldau 24/7 мобильді қосымшасы.

Қазақстан және Қызылорда облысының жаңалықтары

«Мерейлі отбасы» конкурсына өтінім қабылдау аяқталды

Қызылордада 56 ауыл әкімі біліктілік курсынан өтіп жатыр

Жеке балабақшаны лицензиялау керек пе?

Қызылордада 18 мемлекеттік мекемеде рәміздерді стандартқа сәйкес қолданбағаны анықталды

Мұрат Ергешбаев: Мақсатымыз – аудандағы кәсіпкерліктің тұрақты өсуін қамтамасыз ету

Қызылордалық полицейлер медицина қызметкерлерін құттықтады

Басты талап – қаланың сәулеттік келбеті мен тазалығын сақтау

Қазақстанда 78 мыңнан астам дәрігер бар

Қызылордада жәрмеңке өтеді

«Қайсар» футбол клубын уақытша Садық Мұстафаев басқарады

Жұма күнге арналған ауа райы болжамы

Скринингтік зерттеулер туралы не білу қажет?

Қазақстан және Қызылорда облысының жаңалықтары

«Мерейлі отбасы» конкурсына өтінім қабылдау аяқталды

Қызылордада 56 ауыл әкімі біліктілік курсынан өтіп жатыр

Жеке балабақшаны лицензиялау керек пе?

Қызылордада 18 мемлекеттік мекемеде рәміздерді стандартқа сәйкес қолданбағаны анықталды

Мұрат Ергешбаев: Мақсатымыз – аудандағы кәсіпкерліктің тұрақты өсуін қамтамасыз ету

Қызылордалық полицейлер медицина қызметкерлерін құттықтады

Басты талап &#8211; қаланың сәулеттік келбеті мен тазалығын сақтау

Қазақстанда 78 мыңнан астам дәрігер бар

Қызылордада жәрмеңке өтеді

«Қайсар» футбол клубын уақытша Садық Мұстафаев басқарады

Жұма күнге арналған ауа райы болжамы

Скринингтік зерттеулер туралы не білу қажет?

Басты талап – қаланың сәулеттік келбеті мен тазалығын сақтау