<a href="https://kyzylorda-news.kz/">Kyzylorda-news.kz.</a> Елімізде 3-6 шілде күндері Қарағанды қаласында дзюдодан 23 жасқа дейінгі жастар арасында Қазақстан Республикасының чемпионаты өтті.
Дүбірлі додаға Қорқыт ата атындағы Қызылорда университетінің студенттері қатысып, жүлделі оралды. Тартысты бәсекеде 63 келі салмақ бойынша Ақтоты Зарип пен 78 келі салмақ дәрежесінде бақ сынаған Шынар Абатова чемпионатта 3 орын иеленді.
Айта кетейік, Шынар Абатова Ливанның Джуния қаласында өткен самбодан жастар мен жасөспірімдер арасындағы Азия чемпионы атанған болатын.

Қызылордалық спортшылар жеңіс тұғырынан көрінді

<a href="https://kyzylorda-news.kz/">Kyzylorda-news.kz.</a> Қаңтардан бастап балабақша тәрбишілерінің жалақысы 25 пайызға өседі. Бұл туралы оқу-ағарту министрі Асхат Аймағамбетов Түркістан облысының тұрғындарымен кездесуде айтты, деп хабарлайды ҚазАқпарат.
Министр жақын арада мемлекеттік тапсырыс алып отырған балабақшаларға талап күшейетінін мәлім етті. Яғни, санитарлық және өртке қарсы талаптарды сақтау, бейнебақылаудың болуы, балалармен жұмыс істейтін мамандардың білімді, білікті болуы шарт. Сондай-ақ, қызметкерлердің типтік штаттардағы статусқа сәйкес болуы қажет.
<blockquote>
 «Кейбір фактілерді қарап анализ жасайтын болсақ, кей балабақшалар 40-50 баланы бір топқа жинап қойып жұмыс істейді екен. Ол қандай мықты тәрбиеші болса да, 5-6 күннен кейін қиын жағдайға ұшырайды. Ал, мемлекеттік балабақшаларда түске дейін бір, түстен кейін бір тәрбиеші бар. Топтардағы бала саны 25 – тен аспайды. Бұл бостан босқа жасалмаған. Міне, осындай қажетті, маңызды, ғылыммен дәлелденген шешімдерді қабылдап, енгіземіз» – деді министр.
</blockquote>
Сондай-ақ, Асхат Аймағамбетов қаңтар айынан бастап балабақша тәрбиешілерінің жалақысы 25 пайызға өсетінін айтты.
<blockquote>
 «Жалақы бойынша қосымша мәселелерді қарастырып жатырмыз. Зерттеулер балабақшада балалардың болашағы қалыптасатындығын көрсетіп отыр. Сондықтан балабақшадан бастап сапалы білім, сапалы тәрбие берсек, мектепте де, колледжде де жақсы көрсеткішке қол жеткізеді» – деді министр.
</blockquote>

Асхат Аймағамбетов: Қаңтардан бастап балабақша тәрбиешілерінің жалақысы 25 пайызға өседі

<a href="https://kyzylorda-news.kz/">Kyzylorda-news.kz.</a> Қызылордада «Балық шаруашылығы қызметкерінің күніне» арналған салтанатты шара өтті. Оған облыс әкімінің бірінші орынбасары Серік Қожаниязов қатысып, аймақтың ата-кәсібінің иесі саналатын балық шаруашылығы қызметкеркерлерін төл мерекесімен құттықтады.
<blockquote>
 «Қазіргі таңда облысымыздың балық шаруашылығы саласы қарқынды дамуда. Қызылорда облысы Республика бойынша бірінші болып «Балық шаруашылығын дамытудың 2021-2030 жылдарға арналған өңірлік бағдарламасын» бекітті. Бағдарламаға сәйкес, 2030 жылға қарай, облыстың балық экспортын 2 есеге, тауарлы балық өндіру көлемін 111 есеге арттырып, 500-ден астам жаңа жұмыс орындары құрылады деп жоспарлап отырмыз. Соңғы 5 жылда балық экспортының көлемі 5 есе өсіп, 10-нан астам шет елдеріне экспортталуда», – деді облыс әкімінің бірінші орынбасары.
</blockquote>
Сыр елінің балығын өсіріп, оны қорғаумен қатар молықтыруға аянбай үлес қосып жүрген балық шаруашығы саласының бір топ қызметкерлері Қазақстан Республикасы Экология, геология және табиғи ресурстар министрлігінің «Балық шаруашылығы саласында еңбек сіңірген қызметкер» құрмет атағымен, ҚР Экология, геология және табиғи ресурстар министрлігінің «Балық шаруашылығы саласында мінсіз қызметі үшін» төсбелгісімен, ҚР Экология, геология және табиғи ресурстар министрлігінің «Құрмет грамотасымен», сондай-ақ министрліктің Балық шаруашылығы Комитеті төрағасының «Алғыс Хатымен» және Облыс әкімінің «Алғыс Хатымен» марапатталады.
<img src="https://kyzylorda-news.kz/wp-content/uploads/2022/07/292823717_1248488439239969_3832241385817443157_n.jpg" alt="" />

Серік Қожаниязов: Соңғы 5 жылда балық экспортының көлемі 5 есе өсті

<a href="https://kyzylorda-news.kz/">Kyzylorda-news.kz.</a> Балалар жылына орай аймақтың мектептерінде педагог-ассистенттердің саны көбеюде. Ол үшін мектептердің штаттық кестесіне педагог-ассистенттердің жаңа штаты енгізіліп, олардың саны 56-дан 86-ға көбейді. Сондай-ақ, мемлекеттік бала бақшаларда жұмыс жасайтын педагог-асисстенттердің саны 37-ге дейін өсті.
Осыған дейін Оқу-ағарту министрлігінің бастамасымен ел мектептерінде педагог-ассистент лауазымы енгізілген болатын. Ең алдымен, мұндай мамандар ерекше білім беру қажеттілігі бар балаларға көбірек көңіл бөлуді талап ететін инклюзивті оқытуда сұранысқа ие. Педагогтер олардың мектепке және оқу үрдісіне бейімделуіне көмектеседі.
<blockquote>
 «Ерекше білім беру қажеттілігі бар балалардың білім алуына қажетті жағдай жасау басқарманың басты назарында. Осыған дейін министр Асхат Аймағамбетов педагог-асисстенттердің штатын енгізуді және көбейтуді тапсырған болатын. Осы орайда облыс бойынша енді 123 педагог-ассистент ерекше балалар оқитын мектептерде жұмыс істеп жатыр. Бұл мамандар балаларға бағыт беріп, оқу үрдісіне бейімделуге көмектеседі. Сонымен қатар бала өздігінен қозғала алмаса, дефектологтың көмегі қажет болса олар педагогикалық қолдау көрсетеді», – деді облыстық білім басқармасының балалар мен жасөспірімдерді әлеуметтік қорғау бөлімінің бас маманы Гүлмира Ақжігіт.
</blockquote>
Сонымен қатар педагог-ассистент ерекше білім беру қажеттілігі бар балаларға арналған жеке білім беру бағдарламаларын әзірлеуге қатысады. Қажет болған жағдайда оқу бағдарламалары оқушылардың қажеттіліктеріне қарай бейімделеді. Педагог-ассистенттер өткен материалды меңгеруге көмектесіп қана қоймай, ерекше баланың дағдыларының даму деңгейін де бақылайды. Сондай-ақ, олар ерекше білім алуды қажет ететін балалардың қауіпсіздігі мен денсаулығына қажетті жағдайлардың сақталуын қадағалайды.
Айта кетейік, бүгінгі күні облыс бойынша 295 мектептің 255-де ерекше білім алуды қажет ететін балалар білім алуда. Оларға 288 арнайы мамандар және 9072 арнайы курстан өткен мұғалімдер сабақ береді.

Қызылорда облысының мектептерінде педагог-ассистенттердің саны көбеюде

<a href="https://kyzylorda-news.kz/">Kyzylorda-news.kz.</a> Қызылордада әлеуметтік маңызы бар 19 түрлі азық-түлік тауарларының бөлшек сауда бағаларына «Сауда қызметін реттеу туралы» Заңы аясында мемлекеттік бақылау тұрақты жүзеге асырылуда.
Қазіргі уақытқа дейін 2&nbsp;192 кәсіпкерлік субъектісіне хабарламалар беріліп, аталған нысандарға апта сайын мониторинг жүргізілуде.
Мониторинг нәтижесі бойынша үй жанындағы шағын маркеттер мен дүкендерде әлеуметтік маңызы бар азық-түлік тауарларының 11 түрі бойынша бағалары шекті межеден 15%-дан аса жоғары бағамен сату фактілері анықталған.
Сондай-ақ, азық-түлік тауарларына бағаларының өсуіне жол бермеу үшін арнайы комиссия құрылып, баға белгілеудің бүкіл тізбегі бойынша делдалдық схемаларға тексеру жүргізді.
Нәтижесінде баға белгілеудің бүкіл тізбегіне қатысушы 5533 субъекті анықталып, Бәсекелестікті қорғау және дамыту департаментімен кешенді тексеру басталды.
<blockquote>
 «Жалпы жыл басынан бері тұрғындардан түскен арыз негізінде әлеуметтік маңызы бар азық-түлік бағалары бойынша 17 сауда нысанына жоспардан тыс тексерулер тағайындалған. Нәтижесінде, 6 сауда нысанына сауда үстемесін сақтау бөлігінде заң бұзушылығы анықталып, әкімшілік шарасы қолданылса, қалған 11 объекті бойынша жұмыстар жүргізілуде.
 Айта кету керек, аталған мәселе облыс әкімдігінің тікелей бақылауында», – делінген облыс әкімдігінің хабарламасында.
</blockquote>

Қызылордада әлеуметтік маңызы бар азық-түлік тауарларына мемлекеттік бақылау жүргізілді

<a href="https://kyzylorda-news.kz/">Kyzylorda-news.kz.</a> Қаржылық мониторинг агенттігінің Қызылорда облысы бойынша департаменті бірнеше заңды тұлғамен заңсыз мәміле жасап, нақты орындалмаған жұмыс үшін 2018-2021 жылдар аралығында жалған шот-фактура жазумен айналысқан «Жетіашар» ЖШС-нің әрекетін әшкереледі.
Компания бірнеше кәсіпкерлік нысанға салықтан жалтару мақсатында әртүрлі тауарларға есеп айырысқаны жөнінде қосымша құн салығы көрсетілген жалған шот-фактура жазып берген.
Оның айналым сомасы 370 млн теңгеге жеткен.
Қызылорда облысы бойынша мемлекеттік кірістер департаменті мемлекетке төленбеген салық түрінде 118 млн теңге көлемінде залал келгенін көрсетті.
Сот үкімімен серіктестік басшысы Избасар Айбек кінәлі деп танылып, 6 ай мерзімге бас бостандығын шектеу жазасы тағайындалды.

Қызылордада 370 млн теңгеге жалған шот-фактура жазып берген компания анықталды

<a href="https://kyzylorda-news.kz/">Kyzylorda-news.kz.</a>&nbsp; Еліміздің тарихи және мәдени маңызы бар көрнекті орындарының туристік әлеуетін арттыру мақсатында биылғы “Neo Nomad 2022” республикалық акциясын өткізу көзделуде.
Осы мақсатта Қазақстан ішінде туристер келуге ұсынылатын 20 көрнекті аймақтар таңдалып, оларға арнайы фотоспот фотоалаңдарын орнатылу жоспарланған.
Акция шартына сәйкес туристер тізімге енгізілген барлық 20 нысанды аралап, фототүсірілімдерде суретке түсу арқылы олардың әлеуметтік желілерде <a href="https://www.facebook.com/hashtag/neonomad2022">#NeoNomad2022</a> хэштегімен жүктеуі қажет.
Шартты орындаған туристер «NEO Nomad 2022» атағымен марапатталып, бағалы сыйлықтарға ие болуға мүмкіндігі бар.
Бүгінде, фотоспотты бірінші болып Нұрсұлтан қаласында орнатылды. 20 көрнекті орынның ішінде облысымыздан Қармақшы ауданында орналасқан “Қорқыт ата” мемориалдық кешені енгізілген болатын.
Жоспарға сәйкес Қорқыт ата кешенінде фотоалаңды тамыз айында орнату көзделуде.

Қорқыт ата кешені: «Neo Nomad 20» акциясы басталды

<a href="https://kyzylorda-news.kz/">Kyzylorda-news.kz.</a> Жапонияның бұрынғы премьер-министрі Синдзо Абэ қастандық жасалғаннан кейін ауруханада <a href="https://sputnik.kz/20220708/zhaponiya-eks-premer-qastandyq-26010985.html">көз жұмды</a>.
NHK телеарнасының хабарлауынша, саясаткер Нара медициналық университетінің ауруханасында жан тапсырған. Ол 67 жаста еді.
Синдзо Абэ Жапонияның Нара қаласында жергілікті уақыт бойынша сағат 11:30 шамасында далада сөз сөйлеп тұрған кезде оққа ұшты. 41 жастағы Тэцуя Ямагами саясаткердің артында тұрып шамамен 10 метр қашықтықтан екі рет оқ атқан. Ол мойны мен кеуде тұсына тиген. Екінші оқтан кейін Абэ жерге құлаған.

Жапонияның экс-премьеріне қастандық жасалды: Абэ ауруханада көз жұмды

<a href="https://kyzylorda-news.kz/">Kyzylorda-news.kz.</a> Бүгін қала әкімі Асылбек Шаменов аймақтағы су шаруашылығы қызметкерлерін қабылдап, кәсіби мерекелерімен құттықтады.
Шаһар басшысы мамандығына адалдық танытып, әрбір тамшының ысырап болмауына барын салып жүрген сала мамандарына алғысын білдірді.
<blockquote>
 «Құрғақшылық алқымнан алған тұста кенезесі кепкен көлдер мен табанынан шаң бұрқыраған атыздарға Сырдың суын үнеммен үлестіріп, Жер-Ана бұлағын байыпты болжаммен бағыттаған берекелі істеріңізді халық біледі. Жылдың төрт мезгілінде дамыл таппай, су бөліп беру шаруасын ұқыптылықпен атқаратын гидротехник мамандарының тапшы екендігін жақсы білеміз. Дегенмен, жауапкершілік жүгін, артылған сенім үдесін биік қоятын сала майталмандары әр кезде де мәртебе мінберінде болуы тиіс. Бұл салада кәсібіне деген құрметті ұрпақтан ұрпаққа жеткізіп келе жатқан сала ардагерлері мен мамандарға адал еңбектері үшін ризашылық білдіргім келеді», – деді қала әкімі Асылбек Өмірбекұлы.
</blockquote>
Басқосуда шаһар басшысы «Қызылордасушар» өндірістік учаскесінің бірқатар қызметкерін марапаттап, алғыс хат табыстады.

Қызылордада су шаруашылығы қызметкерлері марапатталды

<a href="https://kyzylorda-news.kz/">Kyzylorda-news.kz.</a> Қазгидромет Қазақстан бойынша 2022 жылғы 9-11 шілдедегі ауа райы болжамын жариялады.&nbsp;
Синоптиктер еліміздің кей аймақтарында күн күркіреп, жаңбыр жауатынын айтады.&nbsp;
<blockquote>
 “Атмосфералық фронтальды бөліктердің өтуімен республиканың барлық аумағында тұрақсыз ауа райы сақталады. Найзағай болады, жел күшейеді, бұршақ жаууы мүмкін. 
 Еліміздің оңтүстік-батысы мен оңтүстігінде шаңды дауыл, солтүстігінде, солтүстік-батысында түнде және таңертең тұман күтіледі”, –&nbsp;делінген ауа райы болжамында.
</blockquote>
Қазгидромет хабарлауынша, еліміздің оңтүстік-батысында күн 41 градусқа дейін ысиды.&nbsp;
<blockquote>
 “Ауа температурасы күндіз батыста +30+38°С, оңтүстік-батыста + 30+41°с, солтүстік-батыста + 22+33°С, солтүстікте, орталықта +22+30°С, шығыста ауа температурасы + 17+25°С-тан +23+31°С-қа дейін, оңтүстік-шығыста +20+29°С-тан +23+32°С-қа дейін жоғарылауы болжанады, елдің оңтүстігінде ауа температурасы +27+35°С күтіледі”, –&nbsp;деп қосты синоптиктер.
</blockquote>

Ертеңнен бастап күн 41 градусқа дейін ыстық болады

<a href="https://kyzylorda-news.kz/">Kyzylorda-news.kz.</a> Еңбек және халықты әлеуметтік қорғау министрі Тамара Дүйсенова әйелдер қозғалысы өкілдерімен зейнет жасын 58 жасқа төмендету мәселесі бойынша кездесу өткізді.
Министр белсенділердің ұсыныстарын арнайы жұмыс тобы жан-жақты зерттегенін, сондай-ақ зейнетақымен қамсыздандыру жүйесін жетілдіру бойынша ұсынылатын тәсілдер туралы айтты. 
Тамара Дүйсенованың мәліметінше, еңбек және халықты әлеуметтік қорғау министрлігі ұсыныстарды зерделеу кезінде мынадай факторлар ескерілді:
1998 жылғы 1 қаңтарға дейін, яғни жинақтаушы жүйе енгізілгенге дейін жинақталған еңбек өтілі үшін алынатын ынтымақты зейнетақы жүйесі мөлшерінің кемуі;
экономиканың түрлі секторларындағы жасы 50-ден асқан әйелдердің табыс деңгейі;
әйелдердің зейнеткерлік демалысқа ерте шыққан кездегі зейнетақыларының болжамды мөлшері, олардың табыстары және жинақтаушы зейнетақы жүйесіне қатысу өтілі.
Министр еңбек өтілі жоқ және бүгінде жинақтаушы зейнетақы жүйесіне қатыспайтын қазақстандықтар үшін 50+ жасында зейнетке ерте шығу лайықты төлемдерді қамтамасыз етпейтінін де атап өтті.
Алайда қолданыстағы заңнамаға сәйкес, азаматтарға зейнетке ерте шығу құқығы беріледі. Осылайша зейнетақы қорында жинағы 55 жасқа (ерлер) және 52,5 жасқа (әйелдер) толғанда жеткілікті болған кезде қазақстандықтар зейнетақы аннуитетін рәсімдей алады.
Тамара Дүйсенова қозғалыс белсенділеріне азаматтарды зейнетақымен қамтамасыз етуді жетілдіру мақсатында министрлік әзірлеген жаңа тәсілдер жөнінде де айтты.
<blockquote>
 “Біз, біріншіден, базалық және ынтымақты зейнетақы тағайындау кезінде параметрлерді өзгерту туралы бастама көтердік. Қазір біздің ұсыныстарымыз басқа да мүдделі мемлекеттік органдарда қаралады. Егер қолдау тапса – бұл келесі жылдан бастап бюджеттен төленетін зейнетақы төлемдерінің мөлшерін ұлғайтуға мүмкіндік береді. Жұмыс істеп жүрген және болашақта құрметті демалысқа шығатын зейнеткерлер де оң әсерін тигізеді”, – деді Тамара Дүйсенова.
</blockquote>
Екіншіден, “Күміс жас” жобасының тетіктерін зейнет жасына дейінгі әйелдердің жұмыспен қамтылуын қамтамасыз ету үшін қайта қарастырылады.
<blockquote>
 “Біз жобаға қатысу мерзімін 3 жылға дейін ұлғайтуды жоспарлап отырмыз және әйелдерді жұмысқа орналастыру үшін бюджет қаражаты есебінен олардың жалақысын ішінара субсидиялай отырып, арнайы бағыттарды қарастырамыз. Бұл олардың зейнетке шыққанға дейін жинақтаушы зейнетақы жүйесіне барынша белсенді қатысуына мүмкіндік береді. Бұл әсіресе еңбек өтілі аз және зейнетақы қорында жинағы аз әйелдер үшін өте маңызды”, – деді министр.
</blockquote>
Қазақстанда белсенділер тобы зейнетақы жасын төмендетуді көтеруде. Бұл норманы парламент депутаттары да қолдайды. Қоғам белсенділері әйелдердің зейнеткерлік жасын 58 жасқа дейін төмендетуді талап етіп отыр.
<a href="https://sputnik.kz/20220708/ayelder-zeynet-zhasyn-tomendetu-26000685.html">Sputnik Қазақстан</a>

Министр зейнет жасын төмендету мәселесі бойынша кездесу өткізді

<a href="https://kyzylorda-news.kz/">Kyzylorda-news.kz.</a>&nbsp; Қазақстанда өткен тәулікте коронавирус инфекциясының 334 жаңа жағдайы тіркелді.
Оның ішінде: 
Нұр-Сұлтан қаласында – 101, 
Алматы қаласында – 121, 
Шымкент қаласында – 22, 
Алматы облысында – 29, 
Атырау облысында – 14, 
Шығыс Қазақстан облысында – 1, 
Жамбыл облысында – 13, 
Батыс Қазақстан облысында – 1, 
Қарағанды облысында – 20, 
Қостанай облысында – 1, 
Қызылорда облысында – 2, 
Маңғыстау облысында – 3, 
Павлодар облысында – 4, 
Солтүстік Қазақстан облысында – 1, 
Түркістан облысында – 1.
Коронавирус инфекциясы Ақмола және Ақтөбе облыстарында ғана тіркелмеді. Бір күн бұрын Қазақстанда коронавирус инфекциясын жұқтырудың 330 жағдайы тіркелген болатын.
Алматы қаласы Covid таралу жылдамдығына байланысты “сары” аймақта, ал қалған өңірлер – “жасыл” аймақта.

Қазақстан және Қызылорда облысының жаңалықтары