<a href="https://kyzylorda-news.kz/">Kyzylorda-news.kz</a> Бүгінгі қоғамда еңбек нарығына қажетті мамандарды оқытып шығаруда әлеуеті нық қалыптаса түскен өңіріміздегі бірден-бір кәсіби- техникалық оқу орны – Жаңақорған агротехникалық колледжі.&nbsp;Аталған оқу орнында «Жұмысшы мамандықтардың қоғамдағы ролі мен маңызы» деген тақырыпта облыстық семинар болып өтті. Семинар жұмысына облыстық оқу орталығы кәсіптік білім беру бөлімінің басшылығы бастап келген өкілдер қатарында аудандардағы техникалық колледждердің оқу ісі жөніндегі меңгерушілері мен жетекші мамандары және өз өңіріміздегі өндіріс орнының жауапты қызметкерлері қатысып, жұмысшы мамандықтардың беделін арттыру, техникалық және кәсіптік білім беру жүйесі реформасын іске асыру бағытында ортақ міндеттерді таразылады.Алдымен Жаңақорған аграрлы-техникалық колледжінің директоры Тәттімбет Тұрғалиұлы сөз алып, оқу орнының тыныс-тіршілігімен таныстырды. 65 жыл тарихы бар білім ордасы алғашқы жылдары ауыл шаруашылығына қажетті машинист-тракторист мамандықтарын ғана дайындап келсе, қазіргі уақытта аграрлы-техникалық бағытта 19 мамандық, 24 біліктілік бойынша мамандар даярланатынын айтты. Оқу орнында 2 ақпараттық технология кабинеті, 2 шеберхана, 4 зертхана, 27 интерактивті тақтамен қамтылған оқу кабинеті студенттердің жан-жақты кәсіби білім алуына негіз қалап отыр. Колледждің 200 орындық акт залы, 160 орындық асханасы, 100 орындық жатақханасы бар. Түлектердің сапалы білім алып, тәжірибелік дағдыларын шыңдау үшін оқу орны басшылығы өңіріміздегі кәсіпорындар, шағын және орта кәсіпкерлер, ірі қожалықтармен меморандумға отырып, колледж білімгерлерінің өндірістік тәжірибеден өтуіне, жұмысқа орналасуына және дуальды оқу жүйесін жетілдіруге үлкен мүмкіндік туғызып отыр. Бүгінгі таңда колледж студенттерінің 134-і аудан көлемінде дуальды оқыту бағыты бойынша жергілікті жердегі өндіріс пен кәсіпорындарда іс- тәжірибеден өтуге мүмкіндігі барын білдік. Бұл нақты өндіріспен білімнің өзара байланысын көрсетеді.Семинарда облыстық оқу орталығы кәсіптік білім беру орталығының әдіскері Ұлан Жетібайұлы сөз алып, бүгінгі жиынның мән-маңызына тоқталды. Одан әрі жиынға арнайы шақырылған ардагер-ұстаздар қатарында Мадияр Ахметов оқу орнының бүгінгі әлеуетін тиімді пайдану бағытында ақыл-кеңестерін берді. 65 жылдық тарихы бар оқу орнынан 17 мектеп директоры, 12 ауыл әкімі шыққанын, кезінде Қазақ ССР Жоғарғы кеңесінің депутаты болған Әзия Қыстаубаеваның осы оқу орнының түлегі екеніне тоқталды. Сондай- ақ осы оқу ошағында білім алғандар қатарында 5 бірдей ғылым докторы, 11 ғылым кандидаты, басқа да мемлекеттік марапаттарға ие азаматтар бар екенін тілге тиек етті. Семинардың келесі бөлімінде қонақтар оқу орнында «Жас маман» жобасы аясында бес жылдан бері тиімді жүзеге асырылып келе жатқан заманау технологиялардың кәсіптік білімге бағдарлау процестерімен танысты. Нақтылап айтқанда, колледжде дәнекерлеу ісі және автомобиль көлігіне техникалық қызмет көрсету, жөндеу және пайдалану мамандықтары заманауи ақпараттық құрылғылармен оқытылуда. Мұның барлығы ғылыми-зерттеу тәжірибесін дамытып, инновациялық білім ортасын қалыптастыруға мықты тетік қалыптастырып келеді.Автокөліктерге техникалық қызмет көрсету мамандығы бойынша құрал-жабдықтармен таныстырған оқытушы Жасұлан Мұстапаев интерактивті тақтада жасанды интеллект арқылы автокөліктің құрылысын түсіндірді. Орталықта арнайы қойылған автокөлік макетінде көлікті басқару ережелерін бақылайтын камера бар екенін, В,С категориясынан оқушылар куәлікті соңғы курста осы жерде сынақ тапсырып алатынын айтты. Осындай ізденістердің нәтижесі болу керек, колледждің ұстаздары мен білімгерлері түрлі деңгейде өтіп жатқан білім мен кәсіби шеберлік байқауларында үнемі алдыңғы орыннан табылып жүр. Оның ішінде сандық бағдарламалық басқару, аспаз ісі, дәнекерлеу ісі, автомобильді жөндеу және техникалық қызмет бойынша колледж ұстаздары мен студенттері үнемі жүлделі орындарды иеленіп келеді. Оқу орнында 3 сарапшы, 15 модератор педагог, 48 магниттік педагог бар екендігі белгілі. Білім саласындағы көрсеткіштерімен қатар облыстық және республикалық техникалық және кәсіптік білім беру ұйымдарының арасында дәстүрлі волейболдан ұйымдастырылған жарыстарда ерлер арасында 15 дүркін, қыздар арасында 7 дүркін чемпион атануы да үлкен еңбектің нәтижесі.Өңірдің экономикалық дамуына үлес қосып, кәсіптік деңгейі жоғары мамандар даярлауда мемлекет қолдауын нәтижелі жетістіктерімен дәлелдеп келе жатқан оқу орны ұжымының бірлігі мен ынтымағы бүгінгідей ауқымды шарада айқын көрініс берді. Жиынға арнайы келіп, өздерінің қолдауын білдірген аймағымыздағы «СКЗ-U» күкірт қышқылы зауыты, «Қызылқұм» ЖШС, «Жаңақорған транзит» ЖШС мекемелерінің басшылары сөз алып, өндірістік мекемеде еңбек ететін мамандардың 80 пайызы жергілікті тұрғындардың өкілі екенін жеткізді. Тіпті бүгінде мекеменің инженерлері, цех басшылары, ұжым директорлары кезінде еңбек жолын операторлықтан бастаған жас мамандар, тәжірибеден өтіп, білімін үздіксіз жетілдірудің арқасында осындай дәрежеге қол жеткізіп отырғанын айтып, жас талаптырды жақсы оқуға қанаттандырды. Осы оқу орнында жұмысшы мамандығын игеріп шыққан түлектерідің келешек толық маман иесі болып шығуына мол мүмкіндік бар екенін айтып, мотивация берді.&nbsp;Семинардың келесі бөлімінде әлеуметтік серіктестіктермен меморандум рәсімі өтіп колледж басшылығы мен өңіріміздегі өндіріс мекемелері – «Байкен – U» ЖШС, «Қызылқұм» ЖШС, «СКЗ-U» ЖШС , «Шалқия Цинк ЛТД» ЖШС мекемелері басшылары келісімшартқа қол қойды. Осы келісімдердің бастамасы есебінде колледждің бітірушісі Диас Абдуллаевқа дәнекерлеу ісі мамандығы бойынша «СКЗ- U» ЖШС-на жолдама табыс етілсе, «Қызылқұм» ЖШС-на осы мамандық иегері Нұрперзент Оймауытов жұмысқа қабылданды. «Жаңақорған транзит» ЖШС басшысы Сансызбай Махметжан Бәкірұлы мен колледж директоры Тәттімбет Абдраймов өзара меморандумға қол қойды. Бұл мекемеге автомобиль көлігін жөндеу және пайдалану факультетінің бітірушісі Бекахмет Нұрғазы жолдама алды. Сондай-ақ «Шалқия Цинк ЛТД» ЖШС мекемесіне пайдаланған қазбаларды кен орындарын жер астында өңдеу мамандығы бойынша Мейірхан Даниялға жолдама берілді.Осы күні «Агросервис Жаңақорған» ЖШС басшылығымен меморандумға отыру рәсімі өтіп, колледж бітірушісі Оспан Ерсайын осы мекемеге ветеринария мамандығы бойынша жолдама алды. Жиын соңы оқу орны өнерпаздарының концертіне жалғасты.<img src="https://knadmin.beoblood.kz/uploads/Whats_App_Image_2025_12_22_at_11_06_33_fde66cb2c2.jpeg" alt="WhatsApp Image 2025-12-22 at 11.06.33.jpeg">

Техникалық және кәсіптік білім беру жүйесі реформасын іске асыру барысы қаралды

<a href="https://kyzylorda-news.kz/">Kyzylorda-news.kz</a> &nbsp;Бүгінгі таңда кредиттер – қазақстандықтардың көпшілігінің өмірінің бір бөлігі. Ипотека, автокредит, тұтынушылық қарыз немесе картаға «жылдам ақша» — кредит алудың жол көп және ол оңай сияқты. Бірақ оны стрессіз қайтару – бұл басқа әңгіме.Кредит проблемаға айналмас үшін оған сауатты қарау керек: өз мүмкіндігіңізді дұрыс бағалаңыз, шарттарды зерттеңіз және құжаттарды мұқият оқып шығыңыз. Төменде оны қалай жасау керектігі туралы қарапайым нұсқаулық берілген.1. Нақты қажеттілігіңізді анықтап алыңыз&nbsp;Кредитті рәсімдемес бұрын өзіңізге сұрақ қойыңыз: расында да кредитсіз болмай ма? Кредит – бұл көмек емес, қаржылық міндеттеме және сіз алынған әрбір теңге үшін алғаныңыздан көп төлейсіз.Егер әңгіме шұғыл әрі өмірлік шығындар жайында болса — мысалы, емделу, оқу немесе апаттан кейін үйді жөндеу туралы айтатын болсақ, кредит тығырықтан шығудың жолы болуы мүмкін. Бірақ, егер мақсат жаңа гаджет, демалыс немесе «көңіл-күй үшін» қымбат нәрсе сатып алу болса, артын күтіп, қаражат жинақтаған дұрыс.Кеңес: қажетті соманың болмағанда бір бөлігін кейінге сақтаңыз. Егер сіз үнемі ақша жинай алсаңыз – бұл сіздің ай сайынғы төлемді төлей алатындығыңыздың белгісі. Егер олай болмаса, дәл қазір кредит жақсы нұсқа болмауы мүмкін.2. Кредит жүктемеңізді есептеңізЖаңа қарыз алмас бұрын, кірісіңіздің қанша бөлігін кредит «жеп жатқанын» түсіну маңызды. Ол үшін көрсеткіш бар – борыш жүктемесінің коэффициенті (БЖК) — кредиттер бойынша барлық ай сайынғы төлемнің сіздің ай сайынғы жиынтық кірісіңізге қатынасы.Формуласы қарапайым:&nbsp;БЖК = (Барлық ай сайынғы төлемдер сомасы/Бір айдағы кіріс)×100%Қазақстанда заңнамалық шектеулер белгіленген: егер сіздің&nbsp;БЖК 50%-дан асса,&nbsp;банктің жаңа кредит беруге құқығы жоқ. Бұл дегеніміз, кірістің жартысы күнделікті шығындарға — тамақ, баспана, көлік және күтпеген шығындарға қалуы керек.Мысал:&nbsp;Егер сіздің табысыңыз 300 000 теңге болса, онда барлық кредит бойынша жалпы төлемдер айына 150 000 теңгеден аспауға тиіс.Сіз өзіңіздің БЖК-ді банк сайттарындағы калькуляторлардың көмегімен тексере аласыз.3. Нарықты зерттеп, шарттарды салыстырыңыз&nbsp;Көптеген қарыз алушылардың қателігі – асығыстық. «5 минутта мақұлдаймыз» деген сөзді естіген адам терең үңілмей, шартқа қол қоя салады. Бірақ дәл соларда үстеме төлем бар.Кредитті таңдамас бұрын:жылдық тиімді сыйақы мөлшерлемесін (ЖТСМ)&nbsp;салыстырыңыз – бұл комиссиялар мен сақтандыруды есептегенде, кредиттің толық құнын көрсетеді;қызмет көрсету, шот ашу немесе мерзімінен бұрын өтегеніңіз үшін&nbsp;жасырын төлемдер&nbsp;бар-жоғын тексеріңіз;банк&nbsp;өмірді немесе мүлікті сақтандыруды&nbsp;талап ете ме жоқ па және бас тартуға бола ма екендігіне назар аударыңыз;&nbsp;кредитті&nbsp;айыппұлсыз&nbsp;мерзімінен бұрын өтеуге&nbsp;болу-болмауын біліп алыңыз — бұл қосымша ақша пайда болған жағдайда үнемдеуге көмектеседі.&nbsp;Ерінбей бірнеше банктің ұсыныстарын тексеріңіз – мөлшерлемелер арасында айтарлықтай айырма болуы мүмкін. Кейде жалақы алатын банктен кредит алу тиімдірек болады – онда тәуекел төмен, демек пайыз да аз болады.4. Кредиттік тарихыңызды тексеріңіз&nbsp;Тағы бір маңызды қадам — өз кредиттік тарихыңыздың жақсы екеніне көз жеткізу. Кез келген кешіктіру, тіпті бұрынғы болса да, банктің шешіміне әсер етуі немесе мөлшерлемені көтеруі мүмкін.&nbsp;Есепті&nbsp;Бірінші кредиттік бюро&nbsp;немесе&nbsp;eGov.kz&nbsp;порталы арқылы алуға болады. Егер сіз қателерді немесе әлі көрініп тұрған өтелген ескі қарыздарды көрсеңіз – түзету туралы өтініш беріңіз. Жақсы кредиттік тарих – бұл сіздің «қаржылық дерекнамаңыз», тек мақұлдау ғана емес, сонымен қатар кредит талаптары да соған байланысты болады.&nbsp;5. Титулдық бетті мұқият қарап шығыңыз&nbsp;Банк кредит шартын дайындаған кезде, бірінші кезекте титулдық бетке назар аударыңыз — бұл сіздің кредитіңіз туралы барлық негізгі ақпарат жинақталған ресми құжат.Титулдық бетте:&nbsp;кредит&nbsp;сомасы;өтеу мерзімі мен кестесі;&nbsp;жылдық тиімді мөлшерлеме (ЖТСМ);ай сайынғы төлем мөлшері;кредиттің бүкіл мерзімі үшін төлейтін жалпы сома;айыппұлдар, комиссиялар және мерзімінен бұрын өтеу талаптары көрсетіледі.Титулдық &nbsp;бетті Қаржы нарығын реттеу және дамыту агенттігі (ҚНРДА) бекітеді және ол стандартты нысанда болуы керек.Оған қол қою арқылы сіз барлық талаптармен танысқаныңызды және нақты немен келісіп жатқаныңызды растайсыз.Асықпаңыз: құжатты үйге апарыңыз, мұқият оқыңыз. Егер түсініксіз тармақтар болса – түсініктеме немесе кеңес сұраңыз. &nbsp;Сауатты түрде кредит алу – бұл қарыздан бас тарту емес,&nbsp;ақшаға саналы көзқарас. Жоспарлаңыз, есептеңіз, тексеріңіз және құжаттарды оқыңыз.Сонда кредит сізге жаңа қиындық әкелмей, мәселені шешуге көмектеседі.&nbsp;<img src="https://knadmin.beoblood.kz/uploads/kredit_fingramota_06e2e450bc.jpeg" alt="кредит финграмота.jpeg">Барлығын дұрыс есептеңіз және Fingramota.kz-пен бірге қаржылық сауаттылығыңызды арттырыңыз!Фото: fingramota.kz

Кредит алмас бұрын: ақылмен қалай қарыз алуға және ол үшін өкінбеуге болады?

Жаңақорғандағы толымды тірлік 

<a href="https://kyzylorda-news.kz/">Kyzylorda-news.kz</a> Әлемнің көптеген елі, оның ішінде дамыған мемлекеттер цифрландырудың ұлттық бағдарламаларын нақты іске асыруда. АҚШ секілді алпауыт елдер бұл жүйені осыдан отыз жыл бұрын қолданысқа енгізе бастады. Нәтижесін көрген өзгелер де ерте қамданып, бәсекеге қабілеттілігін арттырды. Бұл қатарда біздің елдің де қарқыны күн санап артып келеді. Барлық салаға цифрландыру мен жасанды интеллект жүйесі енгізіліп, озық отыздыққа нық қадам бастадық.&nbsp;Жаңақорған ауданындағы ахуал да көңіл қуантады, бұл жөнінде аудан әкімі аппаратының цифрлық технологияларды дамыту және мемлекеттік көрсетілетін қызметтердің мониторингі бөлімінің басшысы Эльмира Шоқыбаевадан білдік.Шыны керек, цифрлық трансформациялау идеясын әлемдік тренд деуге болады. Цифрлық технологиялар көптеген елдің экономикасын дамытуда маңызды рөлге ие болды. Қазақстанның да көшке ілесуі оң нәтиже көрсетуде. Бүгінде мемлекеттік қызметтердің 90 пайыздан астамы онлайн форматта көрсетіледі. eGov, Smart Data Ukimet, Digital ID және Alem.AI платформалары күн сайын мыңдаған мамандардың жұмысын қамтамасыз етіп, қызметтерді ыңғайлы, қолжетімді және қауіпсіз етіп жатыр.&nbsp;Жалпы, Қазақстанда IT саласында 200 мыңнан астам адам еңбек етеді екен. Соның ішінде 20 мыңы – жасанды интеллект саласының мамандары. Бұл туралы Жасанды интеллект және цифрлық даму министрлігі бүгін ақпарат таратты. Олар алдағы бес жыл ішінде 1 миллион азаматқа жасанды интеллект дағдыларын үйретуді көздеп отыр. Айта кететіні, 10 қараша елімізде Цифрландыру күні аталып, осы салада жүрген қызметкерлерге құрмет көрсетіледі.&nbsp;Цифрландыру – уақыт талабы ғана емес, ел дамуының негізгі тірегі. Осы орайда алдымен ақпараттық технологиялар саласында еңбек етіп жүрген барлық әріптестерді кәсіби мерекелерімен құттықтаймын. Бұл сала болашақтың баспалдағы деуге болады, сондықтан бұл күн – жаңа технологияларды игеріп, цифрлық қоғам құруға үлес қосып жүрген барлық сала қызметкерлерінің еңбегін мойындау және құрметтеу күні. Мемлекет басшысы да бұл бастамаға ерекше мән беріп, соңғы Жолдауында жылдам дамуға тапсырма берді. Үкіметтің алдыға қойған талабы осы жүйені толықтай жетілдіру. «Қазақстан-2050» стратегиясы, «Қазақстанның цифрлық трансформация тұжырымдамасы» аясында еліміздің барлық өңірінде мемлекеттік қызмет көрсетудің жаңа форматтары енгізіліп, басқару жүйесі заманауи технологиялармен үйлесім тапты. Бұл бастамалар халыққа қолжетімді, ашық және тиімді қызмет көрсетуді қамтамасыз етудің кепіліне айналып отыр. «Жаңақорған ауданы әкімінің аппараты» КММ де осы бағытты жүзеге асыруда өзіндік үлесін қосып келеді. Құжат айналымын электрондық форматқа көшіру, цифрлық платформалар арқылы қызмет көрсетуді жетілдіру, ақпараттық қауіпсіздік шараларын күшейту – басты назарда.– Сіз бұл саланы болашақтың баспалдағы дедіңіз, демек өскелең жастар бұл бағытта көбірек білгені дұрыс шығар?<blockquote>– Әрине, келешектің кілті жастардың қолында болған соң жаңа технологиялар мен ЖИ-ді жақсы меңгеру міндеті тұр. Жас мамандардың цифрлық сауаттылығын арттыру мен инновациялық ойлауды дамыту – ұжым жұмысының негізгі басымдықтарының бірі. Цифрлық трансформация – қоғамның өмір сүру сапасын жақсартатын, еңбек өнімділігінің өсуін қамтамасыз ететін, экономиканың бәсекеге қабілеттілігін арттыратын негізгі факторлардың бірі. Ақпараттық технологиялар саласындағы мамандар еңбек нарығында жоғары сұранысқа ие. Бүгінгі күні цифрлы кеңістікте жастар ерекше белсенділік танытуда. Себебі кейінгі жылдары Қазақстанда жастар арасында интернет қолданушылар саны артып, әлеуметтік желілер мен түрлі онлайн-платформаларда белсенділік аясы кеңейіп келеді. TNS деректері бойынша, 2020 жылдан бастап елімізде әлеуметтік желіні пайдаланушылар саны күрт өскен. 2021 жылдың қаңтарында жалпы саны 12 миллион адамға жетіп, 2020 жылдың басымен салыстырғанда 26 пайызға (2,5 миллион адамға) артты. 2020 жылы әлеуметтік желілер өздерін кез келген аудиториямен байланыстың негізгі арнасы ретінде танытты. Бір жағынан, оған әлемде орын алған постпандемиялық кезең де өзінің белгілі бір деңгейде ықпалын тигізгенін айтпасқа болмайды. Статистикалық деректерге сүйенсек, 2021 жылы Қазақстанда әлеуметтік желіні қолданушылардың үлес салмағы 63,5 пайызға дейін жеткен. Цифрлық деп жүргенде әлеуметтік желінің де тым жылдам дамығаны қауіп тудырып тұр. Бұл алаяқтардың ең басты олжасына айналды. Сондықтан ақпараттық қауіпсіздік – заман талабына айналды. Қазақстанда электронды үкімет 2006 жылы енгізілсе, жеке деректер мен киберқауіпсіздікке қатысты заңдар 14 жылдан кейін, яғни 2020 жылы қабылданған. Сарапшылардың айтуынша, цифрландыру жағынан озық болсақ та, киберқауіпсіздік тұрғысында сәл артта қалғандықтан бізге киберқауіпсіздікті тез арада күшейту қажет, себебі неғұрлым көп дерек онлайнға көшсе, соғұрлым мүмкіндіктер кеңейіп, шабуыл жасауға қызығатындар көбейеді. Шыны керек, цифрландыру игілігін ел көріп отыр. Бұрын құжат алу – күрделі әрі уақытты қажет ететін процесс болатын. Мысалы, 16 жасқа толғанда: АХАЖ-ға барып, туу туралы анықтама алу, кезекке тұру, қажетті құжаттарды жинау – бірнеше күндік шаруа еді. Қазір – туу туралы куәлік, ата-анасының бірі болса жеткілікті, жеке куәлік бір күнде дайын болады. Міне, бұл – цифрландырудың нақты жетістігі. Қазіргі цифрландыру кезеңінде ақпараттың құндылығы артып келеді. Сол себепті дербес деректерді қорғау, құпия ақпараттың сақталуын қамтамасыз ету – әрбір қызметкердің маңызды міндеті. Ақпараттық қауіпсіздік мәдениетін қалыптастыру – тек IT мамандарының ғана емес, баршамыздың ортақ жауапкершілігіміз. Сенімді және қауіпсіз цифрлық кеңістік – еліміздің дамуының кепілі, – дейді бөлім басшысы Эльмира Жалғасқызы.&nbsp;</blockquote>Түйіндей айтқанда, цифрландыру үдерісі – жоғарыда айтылғандай, тоқтаусыз алға қарыштап дамып бара жатқан әлемдік тренд. Бұл әлемдік трендтен еліміз тыс қала алмайды. Сондықтан жаһандық трендке жылдам бейімделіп, еліміз экономикалық, инновациялық және технологиялық тұстарын жетік меңгеріп, пайдалы жақтарын барынша алуға тиіс. Ал жастардың ақпараттар ағымын сараптап, сыни ойлау қабілетін дамыту қажет. Жастар барлық мәселені рационалды және демократиялық тәсіл тұрғысынан қарастыруға тиіс. Мемлекет осы орайда әлемде цифрландыру үдерісінен туындаған трансформация жағдайында ақпараттық қауіпсіздік саласына қатысты заңнамалық негіздерді қайта қарап, оларды уақыт талабына сай үнемі жетілдіріп отыруы қажет.Әлібек Жарықбаев&nbsp;

Цифрландыру – болашақтың баспалдағы

<a href="https://kyzylorda-news.kz/">Kyzylorda-news.kz</a> Қызылорда облысы Полиция департаментінің Жедел басқару орталығында «Қоғамдық қауіпсіздік пен ашықтық» тақырыбында ашық есік күні өткізілді. Ашық есік күніне жоғары, техникалық және кәсіптік білім беру ұйымдарының студенттері, жастар ұйымдарының өкілдері, әлеуметтік желі блогерлері мен белсенді жастар қатысты.Ашық есік күнінің мақсаты – «Заң мен тәртіп» қағидатын іске асыру, жастар мен тұрғындар арасында полиция қызметінің обьективтілігін және айқындық қағидатын нығайту, тұрғындардың құқықтық мәдениеті мен құқық қорғау органдары туралы түсінігін кеңейту, жастардың саналы азаматтық ұстанымын қалыптастыру.Қатысушылар Жедел басқару орталығының қызмет ерекшеліктерімен, материалдық-техникалық базасымен және заманауи бейнебақылау жүйесімен танысты.Сонымен қатар, Ашық есік күні барысында Қызылорда облысы Полиция департаменті бастығының орынбасары Омаров Оралбек Тәубақабылұлы студент жастармен кездесті.Кездесу барысында ол полиция қызметінің негізгі бағыттары, құқық қорғау саласындағы өзекті мәселелер және жастардың қоғамдағы рөлі туралы кеңінен әңгімеленді. Студенттер тарапынан түрлі сұрақтар қойылып, полиция қызметіне орналасу талаптары, қызмет барысындағы жауапкершілік, құқық бұзушылықтың алдын алу және жастар арасындағы қылмыстың профилактикасы тақырыптары қозғалды.Омаров Оралбек Тәубақабылұлы қойылған сұрақтарға нақты әрі жан-жақты жауап беріп, студенттерді заңға бағынуға, белсенді азаматтық ұстаным қалыптастыруға шақырды. Кездесу еркін форматта өтіп, студенттер үшін пайдалы әрі мазмұнды болды.<img src="https://knadmin.beoblood.kz/uploads/5694b887_ad58_4a92_bc19_70381f1a1a98_c92ba7d553.jpg" alt="5694b887-ad58-4a92-bc19-70381f1a1a98.jpg">Фото: Полиция департаменті

Жедел басқару орталығындағы ашық есік күні

<a href="https://kyzylorda-news.kz/">Kyzylorda-news.kz</a> Қазақстан бойынша күріш өндірісінің негізгі үлесі тиесілі Қызылорда облысы ежелден диқандардың маңдай терімен танылған өңір. Сыр бойының берекелі даласында өсірілген ақ маржан – ел ырысы, халық несібесі. Ала жаздай атыз жағалап, аптап ыстықта бел жазбай еңбек еткен шаруалардың қажырлы еңбегі қандай құрметке де лайық.Осындай ауыр да абыройлы жолды ширек ғасырға жуық уақыт бұрын таңдаған жандардың бірі – Сырдария ауданына қарасты Шаған ауылының тұрғыны, тәжірибелі диқан Кенжетай Омаров. Ол облыс орталығынан шамамен 60 шақырым қашықта орналасқан, егіншілікпен аты шыққан берекелі ауылда дүниеге келіп, осында өсіп-өнді. Ауылдағы №37 орта мектепті тәмамдаған соң туған жерден алыстамай, ірі шаруашылық саналатын «Шаған-Жер» серіктестігіне жұмысқа орналасты. Содан бері ширек ғасырдан астам уақытын дала еңбегіне арнап келеді.Күріш шаруашылығы – сырт көзге қарапайым көрінгенімен, аса үлкен жауапкершілік пен тиянақтылықты талап ететін сала. Егіс науқаны көктемнен басталып, күзге дейін бір сәтке де тыным таппайды. Әсіресе су режимін дұрыс сақтау, атызды уақытылы бастырып, қайта құрғату – мол өнім алудың басты кепілі.<blockquote>– Күріш егудің өзіне тән қиындығы аз емес. Әр кезеңнің өз талабы бар. Шаруашылықта бірнеше сорт егіледі. Соның ішінде «Маршал», «Лидер», «Янтарь» сорттары тұрақты түрде өсіріледі. «Маршал» ауруға төзімділігімен ерекшеленсе, «Лидер» нәзік болғанымен, дәмдік сапасы жоғары. Халық сұранысына ие болған соң бұл сорттарды жыл сайын егеміз, – дейді тәжірибелі диқан.</blockquote>«Шаған-Жер» серіктестігі – кезінде Кеңес одағы тұсында рекордтық өнім жинап, «күріш фабрикасы» атанған алпауыт шаруашылықтардың бірі. Бүгінде бес мыңға жуық тұрғыны бар ауыл халқының едәуір бөлігі осы серіктестікте еңбек етіп, күнкөрісін қамтып отыр. Аграрлық аймақ саналатын өңір үшін мұндай шаруашылықтардың ел экономикасына қосып отырған үлесі зор.Соңғы жылдары Сыр өңірінде су тапшылығы сезілгенімен, шағандық диқандар тығырықтан шығудың жолын тауып келеді. Ұтымды жоспарлау мен тәжірибеге сүйенген еңбектің арқасында биылғы егін көлемі де жылдағыдан кем болмайды деген сенім бар. Қазіргі таңда күріш жинау науқаны қызу жүріп, әрбір дәнді ысырапсыз жинау басты мақсатқа айналған.Шаруашылықта егіншілікпен айналысып, жоғары көрсеткішке қол жеткізіп жүрген озаттар аз емес. Солардың қатарында Кенжетай Омаров та бірнеше мәрте үздік күрішші атанып, әріптестері арасында абыройға ие болған. Биыл да ол өткен жылдардағы рекордтық нәтижесін қайталауға ниетті.<blockquote>– Жақсы өнім алудың тағы бір маңызды шарты – техниканың жарақтылығы. Соңғы жылдары серіктестік басшылығы заманауи техникаларды сатып алып, егістікті тегістеу, себу және жинау жұмыстарын толық механикаландыруға күш салды. Бұл біздің жұмысымызды жеңілдетіп қана қоймай, өнім сапасын арттыруға мүмкіндік берді, – дейді диқан.</blockquote>Осындай еңбек адамдарының маңдай тері мен табандылығының арқасында Сырдария даласында ақ күріштің даңқы артып, ел қамбасы толығып келеді. Озат күрішші Кенжетай Омаровтың еңбегі – ауыл шаруашылығына адалдықтың, туған жерге деген жанашырлықтың жарқын көрінісі.

Сырдария ауданындағы озат күрішші – дала еңбегінің жарқын үлгісі

<a href="https://kyzylorda-news.kz/">Kyzylorda-news.kz</a> Бүгінгі білім беру кеңістігінде мұғалімнің жетістікке жетуі үшін ондаған жылдық еңбек өтілі шарт емес. Ең бастысы – шәкірт жүрегіне жол таба білетін кәсіби шеберлік, жаңашыл көзқарас пен өз ісіне деген шынайы сүйіспеншілік. Осы талаптардың барлығы Сырдария ауданына қарасты Аманкелді ауылындағы Қ.Баймағанбетов атындағы №42 мектеп-лицейінің химия пәні мұғалімі Піржан Ержанұлы Төлегеннің бойынан толық көрініс тапқан.Ұстаздық жолды таңдағанына небәрі бес жыл ғана уақыт өтсе де, жас педагог осы қысқа мерзім ішінде облыстық, республикалық деңгейдегі көптеген байқауларда топ жарып, кәсіби ортада үлкен беделге ие болды. Оның еңбегі ауыл мектебінде де жоғары нәтижеге қол жеткізуге болатынын дәлелдеп отыр.Піржан Төлеген әр жылдары «Үздік жас маман – 2022» облыстық байқауының жеңімпазы, «Жаңа мектепке – жаңашыл ұстаз», «Дарынды балаларға – талантты ұстаз», «Педагогикалық идеялар фестивалі – 2024», «Педагогикалық идеялар панорамасы» секілді кәсіби сайыстардың республикалық кезеңдерінің жүлдегері атанды. Ең басты жетістіктерінің бірі – Қазақстан көлемінде іріктелетін «ТОП-10» жас ұстаздың қатарына енуі.Сонымен қатар ол Сырдария ауданы бойынша «Жыл үздігі – 2023» атағына ие болып, республика көлемінде «Energizer ұстаз» номинациясымен марапатталды. Аудан әкімінің «Өрлеу» жастар сыйлығын алуы – оның жас та болса, үлкен жауапкершілікпен еңбек етіп жүргенінің айқын дәлелі. Қазіргі таңда Піржан Ержанұлының біліктілік санаты – педагог-зерттеуші.Жас ұстаздың озық тәжірибесі ҚР Оқу-ағарту министрлігіне қарасты Ы.Алтынсарин атындағы Ұлттық білім академиясы әзірлеген «Ауыл мектептері педагогтерінің озық тәжірибелерін тарату бойынша әдістемелік ұсынымдар» жинағына енгізіліп, республика педагогтеріне үлгі ретінде ұсынылды. Бұдан бөлек, ол Оқу-ағарту министрімен бірнеше мәрте кездесіп, республикалық деңгейдегі тақырыптық тренингтер мен кәсіби семинарларға белсенді қатысқан.Көпшілікке мәлім, химия пәні – оқушылар үшін күрделі әрі терең дайындықты талап ететін ғылым саласы. Соған қарамастан, Піржан Төлегеннің шәкірттері жыл сайын пәндік олимпиадаларда үздік нәтиже көрсетіп келеді. Оның жетекшілігімен дайындалған оқушылар ұлттық бірыңғай тестілеуде жоғары балл жинап, медицина және химия пәні мұғалімі мамандықтарына 100 пайыз мемлекеттік грант иегері атануда.Атап айтқанда, 2023–2024 оқу жылында Жұбатқан Нұржайна, Есіркепқызы Ақжан, Ғабитқызы Фарида, Тыным Сабина, Жарылқасын Кәусар жалпы білім беретін пәндер бойынша олимпиадалардың жеңімпаздары атанды. Ал 2025 оқу жылында Жарылқасын Кәусар ауыл мектептерінің оқушыларына арналған республикалық олимпиаданың финалдық кезеңінде I орын алып, алтын жүлдені жеңіп алды. Сондай-ақ Қайраддин Жәния республикалық жасөспірімдер олимпиадасының облыстық кезеңінде III орын иеленсе, Жаханша Бақдәулет «IQanat» олимпиадасының жеңімпазы атанып, білім грантына қол жеткізді.Қазіргі заман – білім мен технологияның бәсекесі күшейген кезең. Жасанды интеллект пен цифрлық жүйелер дамыған сайын, ұстаздың рөлі тек білім беруші емес, бағыт-бағдар беруші, тұлға қалыптастырушы ретінде арта түсуде. Осындай жауапты кезеңде Піржан Ержанұлы сынды ізденімпаз, шығармашыл, жаңашыл ұстаздардың еңбегі ерекше құрметке лайық.Ауыл мектебінен түлеп шығып, республикалық деңгейде мойындалған жас педагогтың жетістігі – жас ұрпаққа үлгі, әріптестеріне мотивация, ал білім саласы үшін үлкен мақтаныш.

Сырдария ауданынан шыққан жас ұстаз – елдегі «Топ-10» мұғалімнің бірі

<a href="https://kyzylorda-news.kz/">Kyzylorda-news.kz</a> Сырдария ауданының орталығы саналатын Тереңөзек кентінде соңғы жылдары халықтың тұрмыс сапасын арттыруға бағытталған ауқымды әлеуметтік жобалар кезең-кезеңімен жүзеге асырылып келеді. Әсіресе денсаулық сақтау саласын дамыту мен экологиялық ахуалды жақсарту бағыттарында нақты әрі маңызды нәтижелерге қол жеткізілуде.Өткен жылдың желтоқсан айында облыс әкімі Нұрлыбек Нәлібаевтың қолдауымен және облыстық денсаулық сақтау басқармасының бастамасымен аудандық аурухана аумағында жаңа, заманауи емдеу ғимараты пайдалануға берілді. Бұл нысан облыстық деңгейде қызмет көрсетіп, тек аудан тұрғындарына ғана емес, көршілес аймақтардан келетін науқастарға да медициналық көмек көрсетуге мүмкіндік беріп отыр.Жаңа ғимаратта «Паллиативтік көмек» және «Медициналық оңалту» бөлімшелері жұмыс істейді. Бұл бөлімшелер ауыр хәлдегі науқастар мен ұзақ уақыт бойы оңалтуды қажет ететін жандарға тәулік бойы медициналық қызмет көрсетуге бағытталған. Мұнда ем қабылдаушылар дәрігерлердің тұрақты бақылауында болып, барлық қажетті ем-шаралар уақытылы жүргізіледі. Сонымен қатар бөлімшелердің материалдық-техникалық базасы толық жаңартылып, заманауи медициналық құрал-жабдықтармен қамтамасыз етілген.Аталған екі бөлімшеде 5 дәрігер және 50-ге жуық орта және кіші буын медицина қызметкерлері еңбек етеді. Физиотерапия, логопедиялық көмек, психологиялық қолдау, массаж және емдік дене шынықтыру қызметтері демалыс күндеріне қарамастан үздіксіз көрсетіледі. Айта кетерлігі, паллиативтік көмек көрсету бөлімшесі 60 төсек-орынға арналған және дәрі-дәрмекпен, медициналық бұйымдармен толық қамтылған.Медицина саласымен қатар, кентте экологиялық тұрақтылықты қамтамасыз етуге бағытталған маңызды жоба да жүзеге асырылды. Атап айтқанда, 2024 жылы Тереңөзек кентінде тұрмыстық қатты қалдықтарға арналған арнайы полигон салынды. Құны 475 миллион теңгені құрайтын бұл нысан желтоқсан айында ресми түрде пайдалануға берілді.Полигонның басты ерекшелігі – мұнда тұрмыстық қатты қалдықтарды сұрыптауға арналған арнайы қондырғылардың орнатылуы. Яғни, пластик, шыны, темір және қайта өңдеуге жарамды өзге де қалдық түрлері осы жерде бөлініп, тиісті өңдеу кәсіпорындарына жөнелтіледі. Бұл өз кезегінде қоршаған ортаны қорғауға, қоқыс көлемін азайтуға және қайта өңдеу мәдениетін қалыптастыруға оң әсерін тигізеді.Жалпы алғанда, Тереңөзек кентінде жүзеге асырылып жатқан бұл жобалар өңірдің әлеуметтік-экономикалық дамуына серпін беріп, тұрғындардың өмір сүру сапасын арттыруға бағытталған нақты қадамдардың бірі болып отыр.<img src="https://knadmin.beoblood.kz/uploads/leumettik_ce7c44eaeb.jpg" alt="әлеуметтік.jpg">

Тереңөзек кентінде әлеуметтік инфрақұрылым жүйелі түрде жаңғыртылуда

<a href="https://kyzylorda-news.kz/">Kyzylorda-news.kz</a> Бүгінде Сырдария ауданы серпінді даму жолына түсті. Ауданға қарасты әрбір ауылда іргелі істер қолға алынып, жүйелі жұмыстар жүзеге асырылуда. Мемлекеттік бағдарламалар аясында бірқатар маңызды жобалар іске қосылып, ауыл тіршілігіне жаңа серпін беруде.Соның айқын көрінісі – Сәкен Сейфуллин ауылы. Елді мекенде соңғы жылдары инфрақұрылымды жаңғырту, әлеуметтік нысандарды жөндеу, абаттандыру бағытында ауқымды жұмыстар атқарылып келеді. Ауыл көшелері ретке келтіріліп, тұрғындардың тұрмыс сапасын арттыруға бағытталған бастамалар кезең-кезеңімен жүзеге асуда.Жуырда ғана Сәкен Сейфуллин ауылы өзінің 50 жылдық мерейлі белесін жоғары деңгейде атап өтті. Ауыл тарихына көз жүгіртіп, бүгінгі жетістіктерін паш еткен бұл мерейтой ел бірлігін нығайтып, тұрғындардың туған жерге деген сүйіспеншілігін арттыра түсті. Жарты ғасырлық тарихы бар ауыл бүгінде жаңарып, болашаққа нық қадам басып келеді.Ауыл тарихынанЕлі ырысты, жері күрішті ауданның тарихы биыл 96-шы жылға қадам басса, аудан орталығына жақын елді мекеннің бірі – Сәкен Сейфуллин ауылының құрылғанына осы жылы – 50 жыл толады.Мемлекет қайраткері, қазақ әдебиетінің негізін қалаушы, ақын, жазушы Сәкен Сейфуллин атын еншілеген ауылдан Сәрке, Байқадам, Сейіл, Бәйтен батырлар, Шортанбай, Жүзбасар, Қырғи секілді билер, дарынды ақын-жазушылар, танымал тұлғалар шыққан. Киелі мекеннің алғашқы құрылуы негізінен 1934 жылдан бастау алады. Ол кезде «1 Май» және «Құндызды» колхоздары біріктіріліп, соның негізінде «1 Май» атындағы колхоз құрылған. Одан кейінгі жылдары «Каганович» колхозы, «Ленин» атындағы іргелендірілген колхоз, «Партияның ХХІ съезі» атындағы совхоз болып қайта құрылымдаудан өткені ауыл тарихында қаттаулы тұр.Ауыл тарихы туралы деректе: «1 Май» колхозы 1934 жылы құрылып, басқарма төрағасы Сейітжан Сақтағанов болса, «Құндызды» колхозы да 1934 жылы құрылып, алғашқы колхоз төрағасы болып Досмырза Бақтыбаев сайланды. Екі жылдан кейін екі колхоз біріктіріліп, «1 Май» атындағы колхозды Сейітжан Сақтағанов басқарған. Техника жоқтың қасы болғандықтан барлық шаруалар қол күшімен атқарылған. Колхозшылар Әбдірахман Құрланбаев, Созақбай Меңліғараев, Досжан Нұржанов ұсталар соққан еңбек құралдарымен арық қазды, егін егіп, шөп орды. Егінді сумен қамтамасыз етуден атақты Мұрат Қосбармақов пен Жүніс Жотаев басшылық жасады. Ал диқаншылықта Алмағанбет Дүйсебаев, Тұрғанбай Бұланбаев, Бимағанбет Аяпбергенов, Игілік Бақшақбаев, Сүйін Бақшақбаев, Дәрібай Бәйменов, т.б. ақсақалдар елге өнеге болды» деп жазылған.Ауданға жақын орналасқан шағын ғана Сәкен ауылы – өз-өзімен тіршілік кешіп, берекелі өмір сүріп жатқан мекен. Тарихы өткен ғасырдың 30-жылдарынан басталатын округ әуел баста кішігірім «1 Май» және «Құндызды» атты екі колхоздан құрылды. Одан соң 1949 жылы бірігіп «Каганович» колхозын, 1959 жылы «Амангелдімен» қосылып «Ленин» атауын алды. Кейін тағы да колхоздар бірігіп ХХІ партъезд атындағы совхозға айналды. Ал 1975 жылы Сәкен Сейфуллин атындағы совхоз болып, өз алдына отау тікті.Бүгінде 1630 ғана тұрғыны бар елді мекен өзінше даму жолына түсіп, берекелі өмір сүруде. Онда 10 көше, 460 орындық №137 орта мектеп, 90 орындық «Ақ көгершін» бөбекжай балабақшасы, дәрігерлік амбулатория, 150 орындық ауылдық клуб үйі, №4 модельді кітапхана, мал дәрігерлік пункті, учаскелік пункт, «Міркемел Кәлпе» мешіті, және «Қазпошта» бөлімшелері халыққа қызмет көрсетеді. Ауыл халқы 100 пайыз ауыз сумен қамтамасыз етілген. Ауылда балаларға арналған 4 ойын алаңы бар. Мұнда 6 көше жарықтандырылып, 3 шақырым жолға тротуар салыныпты.«Ауыл Ел бесігі» бағдарламасы аясында 6 көшенің автомобиль жолдарына күрделі жөндеу жұмысы жүргізілген. &nbsp;Бір қуаныштысы, былтыр елді мекенді газдандыру жұмысы толық аяқталып, тұрғындардың 90 пайызы көгілдір отынмен қамтамасыз етілген.Биыл да іргелі істер бастау алған. Ең негізгі нысандар орналасқан үш көшеге күрделі жөндеу жұмысы жүргізілуде. Елді мекенде мал ұрлығы және құқық бұзушылықтын алдын алу, анықтау мақсатында негізгі көшелерге 5 млн теңгеге 6 бейнебақылау камерасы орнатылған. Барлығы толық жұмыс жасап тұр. Соның арқасында ауылда ұрлық-қарлық азайып, бұзақылықтар да тиылған.Ауылдық округі бойынша 85 кәсіпкерлік субъекті тіркелген. Оның ішінде 80 жеке кәсіпкер, 3 шаруа қожалығы және 2 жауапкершілігі шектеулі серіктестік бар. Мемлекеттік бағдарламалар бойынша Өткен жылы Қызылорда өңірлік инвестициялық орталығы арқылы 2 жоба мақұлданып, қаржыландырылып, жұмыстарын жүргізуде. Аграрлық несие корпорациясы «Агробизнес» бағдарламасы бойынша да 2 жоба мақұлданып, қаржыландырылды. «Бастау бизнес» оқу курсына 8 адам қатысып, &nbsp;олар мемлекеттік қайтарымсыз грант алып, жұмыс жасауда.Елді мекендегі «С.Сейфуллин-Жер», «Құндызды-Жер», «Желкен Вент» ЖШС, «Жандос» шаруа қожалылығы және жеке кәсіпкер Қуаныш Сайран аз қамтамасыз етілген, асыраушысынан айырылған, көпбалалы отбасы мен мүмкіндігі шектеулі жандарға азық-түлік және заттай қайырымдылық көрсетеді. Сонымен қатар мектеп, балабақша, клуб мекемелерінің іс-шараларына, балалардың жазғы демалысына тұрақты демеушілік жасап келеді. Ауылда 7 дүкен, 2 монша бар.Заманауи үлгіде жаңарадыАуылда бір ғана №137 орта мектеп бар. Біршама жылдан бері күрделі жөндеу көрмеген білім мекемесін заманауи үлгіде жаңарту көпшіліктің талап-тілегінен туындаған екен. Ашылғанына 50 жылға жуық уақыт болған білім ордасына бұған дейін тек жай жөндеу жұмысы жасалған.Құрылыс басында бізді ауыл әкімі Бекзат Қыдырбаев күтіп алып, жұмыс барысын көрсетті. Құрылысты «Н-Строй сервис» серіктестігі мекемесі жүргізуде. Қазір жұмыстың 80 пайызы аяқталған, ішкі жақта әрлеу және сырлау жүргізілуде. Тамыз айында оқушылар жаңа кейіпке енген мектептің табалдырығын аттайды. Жалпы күрделі жөндеуге облыстық бюджеттен бөлінген 309,1 млн теңге бөлінген.Барлық жерде қандай құрылыс болсын, соңғы үлгіде салынып жатыр. Біз де ішкі жұмыстарына өзгеріс енгіздік. Мұнда спорт залдың едені ағаштан емес, резеңкеден жасалады. Бояуы да «Жайлы мектептің» жобасында сырланады. Ішкі жұмыстың тең жартысынан астамы аяқталып тұр, – дейді ауыл әкімі.50 жылдыққа орай ауылдан шыққан танымал ақын-жазушыларға арналған арнайы кабинет жасақталып, олардың жаңа туындыларының тұсаукесерін өткізу жоспарда бар. Жалпы мектепте 380 оқушы білім алады. Биыл оқу жылында 30 оқушы түлеп ұшса, оның 3-уі «Алтын белгі», 7-уі «Үздік аттестат» иегері. ҰБТ сынағына бітірушілердің 80 пайызы қатысып, орташа балл 83,3 болыпты.50 жылда ел жаңа«Ауылына қарап, азаматын таны» демекші, шағын ауылының шаруасы да беталысы да қарқынды. Биыл елді мекеннің құрылғанына 50 жыл болғандықтан, қазірден дайындық жұмысы басталып кеткен тәрізді. Бұл істе ауыл әкімі бірінші болып белсенділік танытып жүргені байқалады. Осы жердің тумасы, екі рет қатарынан әкімдікке сайланған Бекзат Қыдырбаевтың іскер азамат екені көрініп тұр. Сөзі мен ісі үйлескен, әр істің басында өзі жүр. Тіпті жұмысшы жетіспей жатса, оған да кірісіп кетеді. Туған жерге қызмет етуге келген ол: «Ауылды алдыңғы қатарға қосқым келеді», – дейді.Орта мектеп те, ауыл клубы да бір үлкен көшенің бойына орналасқан. Сол Ә.Байназарұлы атындағы көше биыл күрделі жөндеуден өтуде.Аймақ басшысының қатаң талабын білетін құрылыс мекемелері бірінші жұмыстың сапасына мән береді. Оны облыс, аудан басшылары, техникалық қадағалау орындары, жергілікті халық бақылап отыр. Қазір талап бойынша жолдың енін 5,75 метр, қалыңдығын 7-8 см етіп артығымен төсейді. Себебі ол тартылып кетіп, қысқаруы мүмкін. Кепілдік мерзімі 2 жыл. Бұрын мұндай уақытқа берілмейтін. Жол жөндейтін мекемелер бір істі қайта келіп жасамас үшін, барлығын тыңғылықты орындап кетуге тырысады. Осы үш көше толық жөнделсе, ауылдағы жолдың мәселесі 100 пайызға шешімін тапқалы тұр, – дейді ол.Ауылда мұнан өзге атқарылған тірлік көп. Халыққа қажетті ең негізгі – ауызсу мен жарық, газ бар. Дегенмен электр бағаналарын толық қайта жаңғыртудан өткізу керек. Ол іс те таяуда жүзеге асып қалады. Өзге ауылмен салыстырғанда жаңашылдық, өзгеріс, толымды істер байқалады. Бюджет қаражатына орай әлі де жасалатын жобалар бар.Мерейтойға орай демеушілер көмегімен клубтың жанынан орталық алаң салынып, онда субұрқақ, әдемі гүлзар жасалған. Басты демеуші Абзал Ералиев субұрқақ салуға көмек берді. Жұдырықтай жұмылып, алға қарай ұмтылып, табанды тірлік етіп жатқан Сәкен ауылындағы серпінді істер, міне осындай.&nbsp;

50 жылда жаңа кейіпке енген Сәкен ауылы

<a href="https://kyzylorda-news.kz/">Kyzylorda-news.kz</a>&nbsp; Үкімет басшысының кеңесшісі Ералы Тоғжанов облыс әкімінің орынбасары Ардақ Зебешевпен бірге «Ауыл аманаты» жобасы арқылы қаржыландырылған өндірістік, одан бөлек әлеуметтік нысандар жұмысымен танысуды Қызылорда қаласында жалғастырды.Алдымен сол жағалаудағы халықаралық стандарттарға сәйкес келетін 11 мың орындық Орталық стадионға және Үстел теннисі орталығына барды. Стадион қазан айында футболдан Қазақстан кубогының финалдық ойынымен ашылды. УЕФА классификациясы бойынша ІV санатқа кіреді.Ерекше атап өту қажет, стадион облыс бюджетінен үнемделген қаражат есебінен салынды. Материалдық-техникалық базасы соңғы үлгідегі заманауи жабдықтармен қамтамасыз етілген.Үстел теннисі орталығында 16 үстел теннисі орналасқан ойын алаңы, 350 көрерменге арналған орындар, жаттығу залы мен әкімшілік бөлмелер бар, 31 қызметкер еңбек етеді.Әрі қарай Ералы Тоғжанов «Тұмар» шағын өнеркәсіптік аймағы мен «BAUKIN» ЖК жиһаз цехында болды. Шағын өнеркәсіптік аймақта «Момыш» ЖК кондитерлік цехы тәулігіне 40-60 кг, «Жапахов» ЖК сүт өнімдері цехы 1200 л, «Жапахов» ЖК нан-тоқаш өнімдері цехы 600-800 кг, «Берлибековна» ЖК ет және шұжық өнімдері цехы 60-100 кг, «Есимсейтова» ЖК жартылай фабрикаттар цехы 60-100 кг, «Ерниязова» ЖК жартылай фабрикаттар цехы 40–60 кг, «Адил и К» ЖК жартылай фабрикаттар цехы 50-80 кг, «Абил» ЖК жартылай фабрикаттар цехы 50-70 кг өнім өндіреді. Жиһаз цехы айына 2-3 жиһаз шығарады.<img src="https://knadmin.beoblood.kz/uploads/2_Eraly_To_zhanov_ndiristik_zh_ne_leumettik_nysandar_zh_mysymen_tanysty_05d76451a3.jpg" alt="2Ералы Тоғжанов өндірістік және әлеуметтік нысандар жұмысымен танысты.jpg">«Раманкулова» ЖК жартылай дайын тағам өнімдері цехында да жұмыс жүйеге қойылған. Кәсіпорын тәулігіне 5-15 кг тұшпара, манты, тефтели дайындайды.Нысандарды аралаған соң Ералы Тоғжанов «Аяла» ЖК тігін цехына барды. Мұнда айына 50-60 көрпе, көрпеше, жастық, ұлттық киімдер тігіледі.Премьер-министр кеңесшісі аймақтағы серпінді жобаларға, тындырымды тірлікке оң бағасын беріп, алдағы міндеттерді де атап өтті.Фото: Қызылорда облысы әкімінің баспасөз қызметі

Ералы Тоғжанов өндірістік және әлеуметтік нысандар жұмысымен танысты

<a href="https://kyzylorda-news.kz/">Kyzylorda-news.kz</a> Жақында Египеттің Кипр қаласында өткен Пара-пауэрлифтнигтен жерлесіміз, Қазақстан республикасының ұлттық құрама командасының мүшесі Фариза Қалыбайқызы Әлем чемпионы атанып, мемлекет байрағын биікке желбіретіп қайтты. Жаңарық ауылындағы No167 орта мектебінің түлегі, халықаралық дәрежедегі спорт шебері Фаризаның бұдан бұрын ел көлемінде өткен Қазақстан Республикасы чемпионатында бірнеше рет үшінші, екінші, бірінші орынды қанжығалап, жүйелі жеңіске қол жеткізуінің арқасында «Үздік спортшы» номинациясын иеленіп, Қазақстан республикасының рекордшысы атағын алғаны белгілі. Ең үлкен жеңіс – Әлем чемпионы болып оралған қызымызға туған жер халқының құрметін жеткізген аудан әкімінің орынбасары Бектас Нуридиновтің лебізі төмендегіше өрілді.<blockquote>– Ауданымызда 370 спорттық нысан жұмыс жасайды, халықтың 40 пайызы бұқаралық спортпен айналысады. Аймақ басшысының тікелей қолдауымен облыс орталығында ерекше жандарға арналған спорт кешені салынып жатыр. Спорттағы жетістік – бәрінен бұрын жеке тұлғаның табанды ерік-жігеріне, қайтпас қайсарлығына байланысты екенін дәлелдеп, Әлем чемпионы болып оралған Фариза қызымыздың жеңісі – Сыр елінің ортақ жеңісі. Қайсар қарлығаштың қанатын қатайтып, осындай деңгейге жеткізген ата-анасына, бапкеріне рахметтен басқа айтарымыз жоқ, – дей келіп, чемпион қызымызға алқызыл гүл шоқтарын табыстап, ауданның Құрмет грамотасымен марапаттады. Одан әрі балуан қызымыздың қара күштің қасиетін ақылмен бағындырып, бағасын биіктетуіне кәсіби бейімдеп, пара-пауэрлифтинг технологиясының қыр-сырына баулып келе жатқан жаттықтырушы ұстазы Бақытбек Рысбаев сөз алды. Бұған дейін Сыр өңіріне алтын әкелген Илья Ильиннің рекордын жаңартып, Әлем чемпионы атанған шәкіртіне шын жүректен ризашылығын жеткізді. «Бұл атақ – жылдар бойы төгілген маңдай тердің, төзім мен еңбектің арқасы. Фариза – өте намысшыл қыз. Оны талай дәлелдеп жүр. Ауылдан шыққан тұңғыш Әлем чемпионы. Фаризаның бұл биікке қол жеткізуінде ата-анасының ықпалы зор. Осындай азамат тәрбиелеп өсірген ол кісілерге басымды иіп құрмет көрсетемін, - деді ол.</blockquote>Айтса айтқандай, Фаризаның әкесі Қалыбай ағамыз палуан денелі, соған сай мінезі де тұйық, баяғының батырларындай кесіп бір-ақ айтар, нар тұлғалы кісі. Бала кезінде кеудеде тұншыққан асыл арманын қыз да болса өз қанынан жаратылған перзенті жалғап, жалауын желбіретіп жүргенін көңілге қуаныш санап іштей толқулы. Ал анасы Мейрамкүлдің осы қыз туғалы қабағына кірбің ұяламаса екен деп маңдайынан жел ұшырмаған мейірімді жүзінен шаттықтың лебі еседі. Иә, кісі бойында Тәңірдің тарту еткен таланты он бес пайыз болса, қалғаны табанды ерік пен жігердің, не қиындықты да жеңуге бағытталған таудай талаппен келетіні рас. Осы жолда тас жұтқан тәуекелмен алып шыңды бағындырған Фариза қызымызға аудан халқы атынан жеңісің құтты болсын демекпіз!Баян ҮСЕЙІНОВАФото: Сыр спорты

Фариза – үздіктер қатарында

<a href="https://kyzylorda-news.kz/">Kyzylorda-news.kz</a> Қоршаған ортаға қамқорлық орман-тоғай қорын молайтудан бастау алады. Орманшылардың табиғатты қорғау бағытындағы іс-қимылдары жөнінде есеп берген Жаңақорған аудандық орман шаруашылығы мекемесінің басшысы Мұхамеджан Рүстемовтің айтуынша, мекеме қарауындағы мемлекеттік орман қорының жалпы жер көлемі – 791 557 гектар. Соның ішінде орманмен қамтылған аумағы 543281 гектарды құрайды екен. Орман қоры төрт орманшылыққа – Жаңақорған, Ақтас, Түркістан және Төменарық аумағына созылып жатыр. Штаттық кесте бойынша 100 қызметкер орманды күзету, қорғау және өсімін молайту бағытында еңбек етіп келеді. Қоршаған ортаны қорғау бағытында сала қызметкерлерінің жұмысы ауқымды.– Орман тұқымбағын молайту ісіне тоқталсаңыз.<blockquote>– Орманды молықтыру бойынша бекітілген жоспарға сәйкес, 2025 жылы көктем мезгілінде мекеменің 20 гектарлық уақытша сексеуіл тұқымбағынан Аралдың құрғаған ұлтанына 755 мың дана сексеуіл көшеті жөнелтілді. Оның 229 мыңы Қазалыға, 426 мыңы Қармақшыға, 100 мыңы Шиеліге жеткізілді. Ал «Ордакент» уақытша тұқымбағында 0,5 гектар жерге үйеңкі, қарағаш, сәнағаш және айлант ағаштарының тұқымы себілді. Сонымен қатар, 0,5 гектар мектеп бөлімінде 5000 дана жиде, 5000 дана терек, 10000 дана тал қаламшадан отырғызылды. Қазіргі таңда көшеттерді суару, арам шөптерден тазарту және бұрын егілген саялы ағаштарды күтіп-баптау жұмыстары жүйелі жүргізілуде. 2024 жылы күзде егілген 20 гектар сексеуіл тұқымбағындағы жас көшеттерді суару жұмыстары да жалғасуда. Көшеттердің шығымдылығы орташа деңгейде.</blockquote>– Орман өртімен күрес мәселесі де өзекті. Бұл бағытта қандай шаралар қабылданды?<blockquote>– Орман өртінің алдын алу – басты міндетіміздің бірі. Биылғы өрт қауіпті маусымда Қызылорда облысы бойынша арнайы іс-шаралар жоспарына сәйкес аудан көлемінде алдын алу және дайындық жұмыстары жүргізілді. Шаруақожалықтарының иелері мен ауылдық округтерге ескерту хаттар таратылып, тұрғындар арасында түсіндіру жұмыстары жүргізілді. Қазір мекемеде үш өрт сөндіру автокөлігі мен 10 тұрақты өрт сөндіруші қызмет атқарады. Өрт маусымына 2,5 тонна жанар-жағармай қоры дайындалды. Орман қоры аумағында 114 шақырым жаңа өрт жолақтары салынса, 228 шақырым ескі жолақтар қалпына келтірілді. Сонымен бірге 110 дана аншлагтың беті жаңартылды.</blockquote>– Биыл орман өрті тіркелді ме?<blockquote>– Өкінішке қарай, биыл 2 өрт жағдайы тіркелді. Жалпы өртенген аумақ – 1,6 гектар. Оның ішінде 1 гектар орманды жерден 11,3 текше метр шеңгел мен жыңғыл бұталары өртенген. Кінәлі тұлғалар анықталып, заң шеңберінде 98 300 теңге айыппұл салынды. Табиғатқа келтірілген 13 191 теңге 56 тиын залал мен өрт сөндіруге жұмсалған 67 449 теңге толық өтелді.</blockquote>– Орманды қорғау бағытында қандай шаралар қолға алынды?<blockquote>– Орманды қорғау – біздің басты мақсатымыз. Осы жылы орман заңнамасын бұзудың алдын алу үшін 49 рет рейдтік іс-шаралар өткізілді. Нәтижесінде 22 құқықбұзушылық анықталып, әкімшілік хаттамалар толтырылды. Оның ішінде 16 жағдай – аң аулау тәртібін бұзу болса, 6 жағдай – орман заңдылығын бұзу дерегімен тіркелген. Сонымен қатар 52,6 мың гектар жерге санитарлық потологиялық зерттеу жүргізіліп, зиянкестер мен жұқпалы аурулардың ошақтарына тексеру жасалды.</blockquote>– Мемлекеттік қызмет көрсету бағытында қандай жұмыстар атқарылуда?&nbsp;<blockquote>– Орман пайдалану бойынша биыл 2 673,95 мың теңге қаржы жергілікті бюджетке түсті. Оның ішінде орман қоры жерінен 344,2 гектар аумақтан 2241 текше метр жыңғыл бұтасы рұқсатпен кесіліп, жергілікті тұрғындарға 498 текше метр жыңғыл босатылды. Бұл қызметтен 538,48 мың теңге қаржы бюджетке түсті. Ал жанама пайдалану аясында 116 азаматқа орман қоры жерінен 42 900 гектар жайылым, 502 гектар бау-бақша, және 0,10 гектар омарта жері берілді. Осыдан түскен кіріс көлемі 2 135,47 мың теңгені құрады.</blockquote>– Мекеменің материалдық-техникалық базасы көңілдегідей ме?<blockquote>– Бұл бағытта да оң өзгерістер бар. ҚР Ауыл шаруашылығы министрінің No18-02/664 бұйрығына сәйкес жұмыстар жүргізілуде. Қазіргі таңда мекеменің теңгерімінде 1 дана «Lutong LT2404» тракторы, 1 тіркеме, 3 өрт сөндіру автокөлігі, 1 «ГАЗ 3307» жүк көлігі, 3 патрульдік автокөлік, 11 мотоцикл, 4 мініс аты және жылжымалы тұрғын вагоны бар. Сондай-ақ биыл мекемеге қосымша 1 дана дискілі соқа, 8 дана рация және 2 дана мотолампа (су тартатын құрылғы) сатып алынды.</blockquote>– Жануарлар дүниесін қорғау бойынша қандай жұмыстар жасалып жатыр?<blockquote>– Биыл «Жануарлар дүниесін қорғау» бағдарламасы аясында биотехникалық шараларға 230 мың теңге бөлінді. Орман алқаптарында жабайы аң-құстарды қоректендіру мақсатында 1916 кг жем мен 183 кг тұз шашылды. Сонымен бірге көктемгі аң-құс санағы жүргізілді. «Киікті қорғау және браконьерлікпен күрес» шаралары бойынша тұрғындарға түсіндірілді.</blockquote>– Аудан орман шаруашылығы мекемесі қызметкерлерінің міндетті жұмысынан бөлек спорттық жетістіктері де көңіл қуантады. Бұл жөнінде не айтасыз?<blockquote>– Иә, біздің ұжым спортқа да ерекше мән береді. Жыл сайын 19 қазан – кәсіби мерекемізге орай өтетін жарыстарға белсене қатысып келеміз. Биыл облыс көлемінде өткен спорттық сайыста біздің команда жеңімпаз атанып, «МТЗ Беларусь» тракторын иеленді. Сондай-ақ облыс әкімдігі ұйымдастырған байқауда «Үздік саялы жасыл бақ» номинациясын жеңіп алдық.</blockquote>– Сұхбатыңызға рақмет. Табиғатты қорғаудағы еңбектеріңіз жемісті болсын.Айсұлу АЛДАНАЗАРФото: freepik.com

Қазақстан және Қызылорда облысының жаңалықтары