<a href="https://kyzylorda-news.kz/">Kyzylorda-news.kz.</a>&nbsp;Өткен тәулікте коронавирус инфекциясын жұқтырған 253 жағдай тіркелді, деп хабарлайды coronavirus2020.kz.
Аймақтар бойынша:
Нұр-Сұлтан қаласында – 15,
Алматы қаласында – 80,
Шымкент қаласында – 2,
Ақмола облысында – 7,
Ақтөбе облысында 2,
Алматы облысында – 10,
Атырау облысында – 3,
Шығыс Қазақстан облысында – 12,
Жамбыл облысында – 3,
Батыс Қазақстан облысында – 10,
Қарағанды облысында – 41,
Қостанай облысында -16,
Қызылорда облысында -4,
Маңғыстау облысында – 0,
Павлодар облысында – 15,
Солтүстік Қазақстан облысында – 32,
Түркістан облысында – 1.
Елімізде коронавирус инфекциясын жұқтырғандар саны 1 303 063 жетті.

Қызылордада 4 адамнан коронавирус анықталды

<a href="https://kyzylorda-news.kz/">Kyzylorda-news.kz.</a>&nbsp;3 наурыз күні ел аумағының басым бөлігі антициклонның ықпалында болып, жауын-шашынсыз ауа райы күтіледі, деп хабарлайды Қазгидромет.
Тек республиканың батысында атмосфералық фронтальды бөліктердің өтуімен жаңбыр және қар түріндегі жауын-шашын, көктайғақ, шаңды дауылмен бірге желдің күшеюі күтіледі. Республиканың кей жерлерінде тұман болады. Сондай-ақ Қызылорда облысының орталығына қалың тұман түседі.

3 наурызға арналған ауа райы болжамы

Kyzylorda-news.kz. 3-4 наурыз аралығында «2022 жылғы су тасқыны кезеңі жағдайларындағы төтенше жағдайларды жою кезіндегі іс-қимылдарға АҚМЖ-нің басқару органдарын, күштері мен құралдарын дайындау» тақырыбында&nbsp;«Көктем – 2022»&nbsp;республикалық командалық – штабтық оқу – жаттығуы өтеді.
«Баршаңыздың назарына» тұрғындарды құлақтандырудың бірыңғай жүйесін іске қоса отырып, облыс аумағындағы төтенше жағдайлардың қаупі туралы тұрғындарды құлақтандыру жүйесіне тәжірибелік пысықтау жұмыстарын жүргізу жоспарлануда.
Құлақтандыру жүйесіне тексеру жүргізу кезінде алаңдаушылық тудырмай, тыныштық сақтауларыңызды сұраймыз.
«Баршаңыздың назарына!» –&nbsp;бұл ескерту дабылы. Бұл дабыл&nbsp; авариялар, зілзалалар, табиғи апаттар, қарсыластардың шабуыл қаупі туралы тұрғындардың назарын аударту мақсатында беріледі. Дабыл сиренаны, үзіліп шығатын дыбыс (гудок), көліктегі және басқа да құралдардағы дауыс зорайтқыштарды қосу арқылы беріледі.
Дабыл берілген кездегі халықтың іс-әрекеті: сиренаны, үзіліп шығатын дыбысты (гудок) немесе т.б. естіген кезде тез арада радионы, теледидарды қосып, Қызылорда облысы Төтенше жағдайлар департаментінің іс-әрекет тәртібі туралы хабарламасын тыңдаңыздар. Алынған ақпаратты көршілеріңізге жеткізіп, естіген іс –әрекет тәртібі бойынша әрекет етіңіздер.

 Қызылордада «Көктем – 2022» республикалық оқу-жаттығуы өтеді

<a href="https://kyzylorda-news.kz/">Kyzylorda-news.kz.</a> Халықтың әл-ауқатын арттыруға бағытталған әлеуметтік мәселелер кезең-кезеңімен шешіледі. Тұрғындар үшін өзекті газбен қамту, су жүргізу, электр желісін тарту және жол сапасын жақсарту мәселелеріне ұдайы мән беріледі. Бүгін облыс әкімі Гүлшара Әбдіқалықова Қызылорда қаласының шеткері аймақтарына барып, тұрғындардың талап-тілектерін тыңдады.
Алдымен аймақ басшысы Ақжарма ауылдық округіне қарасты Талдыарал ауылына барды. Мұнда тұрғындар ескі жатақхананы игілікке асыру және мектеп жанынан шағын балабақша ашу мәселесін көтерді. 1965 жылы салынған 2 жатақхананың біреуінің қазірде тозығы жеткен. Оның орнына жеке кәсіпкер ғимаратты спорттық нысанға қайта бағыттауға ұсыныс білдірді. Облыс әкімі балалардың бұқаралық спортпен айналысуына жағдай жасау үшін бос тұрған ғимаратты тиімді пайдалану қажеттігін айтып, ауыл әкіміне тиісті жұмыстарды атқаруды тапсырды. Ал, мектеп жанынан балабақша ашу ұсынысы ескерілетінін және тиісті деңгейде қаралатынын жеткізді.
Мұнан кейін Гүлшара Әбдіқалықова Баймұрат батыр ауылының тұрғындарымен кездесіп, мәселелерін тыңдады. Ауыл ақсақалдары дәрігерлік амбулаторияны салу мәселесін көтеріп, көшені жарықтандыру керек екенін алға тартты. Қажеттілікті ескере келе, аумағы 3000 шаршы метрді құрайтын амбулаторияны салу үшін өткен жылы 3,4 млн.теңгеге жоба-сметалық құжаттары дайындалып, мемлекеттік сараптамадан өткізілді. Қазіргі таңда құрылысты бастауға дайындық жұмыстары жүргізілуде. Ал, электр желісін тарту үшін тиісті құжаттар әзірленген.
Әрі қарай облыс әкімі Ақсуат ауылдық округіндегі Ж.Махамбетов ауылына аялдады. Он мыңға жуық тұрғыны бар ауылда газ желісін жүргізу өзекті. Тұрғындар бірнеше жылдан көгілдір отынға қосу мәселесін көтеріп келеді. Ауыл ақсақалдарымен тілдескен өңір басшысы тұрғындардың талап-тілегіне орай ауылды көгілдір отынға қосу жұмыстары екі жылда аяқталып, биыл ұзындығы 9 шақырымды құрайтын 5 көшеге газ құбыры орнатылатынын жеткізді. Бұл ретте мердігер компания басшысына жұмысты сапалы әрі уақытында орындауды тапсырды.
Еске салайық, облыс әкімі осы уақытқа дейін 100-ден аса ауылға барып, тұрғындармен кездесіп, ұсыныс-пікірлерін тыңдады. Әлеуметтік мәселелерді шешу нәтижесінде өңірде газбен қамту 67%, жақсы жолдардың үлесі 75%, ауыз су жүргізу 98% жеткен.
<img src="https://kyzylorda-news.kz/wp-content/uploads/2022/03/275043037_254163900238195_2068479824129513817_n.jpg" alt="" />
<img src="https://kyzylorda-news.kz/wp-content/uploads/2022/03/275073313_254163890238196_987328194824048566_n.jpg" alt="" />
<img src="https://kyzylorda-news.kz/wp-content/uploads/2022/03/274987204_254163903571528_1674638703392797720_n.jpg" alt="" />
<img src="https://kyzylorda-news.kz/wp-content/uploads/2022/03/274937480_254163896904862_8004048933711861581_n.jpg" alt="" />

Гүлшара Әбдіқалықова Ақжарма және Ақсуат ауылының тұрғындарымен кездесті

<a href="https://kyzylorda-news.kz/">Kyzylorda-news.kz.</a> Тұрғындардың өмір сүру сапасын жақсартуға бағытталған өзекті мәселелер өз уақытында шешіледі. Қалаға қарасты шеткері аймақта орналасқан елді-мекендерді аралаған облыс әкімі Гүлшара Әбдіқалықова Тасбөгет және Белкөл кенттеріне де барды.
30 мыңнан аса тұрғыны бар Тасбөгет кентінде биылдан бастап спорттық сауықтыру кешенін салу жоспарлануда. 150 орынға арналған кешен құрылысына қажетті жұмыстарды саралап өткен облыс әкімі халықтың талап-тілегін тыңдап, жас спортшылармен де кездесті. Тұрғындар демографиялық өсімге байланысты қазіргі емханадағы орын тапшылығы, спорттық нысан салу, жастарды жұмысқа тарту сынды мәселелерге мән беруді сұрады.
<blockquote>
 «Жастардың бос уақыты болмас үшін, әрі назарын спортқа бұру үшін кентте спорттық сауықтыру кешенін саламыз. Ол үшін қажетті қаражатты қарастырамыз. Мұнан бөлек, емханадағы орын тапшылығы мәселесін шешу үшін фтизиопульмонология орталығын Талсуаттағы орталыққа көшіріп, бұл нысанды емханаға ыңғайлы етіп бейімдеп, жөндеу жұмыстарын жүргізетін боламыз. Сол арқылы өздеріңіз айтқан орын тапшылығы мәселесін жоямыз. Сіздер айтқан әрбір ұсыныстарды зерделеп, жан-жақты саралап, кезең-кезеңімен шешеміз»,-деді Гүлшара Әбдіқалықова.
</blockquote>
Аймақ басшысы кент әкіміне жастарды жұмыспен қамту ісінде нақты алгоритм әзірлеуді және жұмыссыз жүрген жастарды санатына қарай бөлу, оларды сұранысқа ие салаларға бейімдеу ісін нақты жүргізу қажеттігін ескертті. 
Әрі қарай облыс әкімі Белкөл кентіне барып, тұрғындармен бірге ортақ мәселелерді талқылады. Мұнда бірнеше жылдан бері темір жол үстінен өтетін жаяу жүргіншілер көпірін салу мәселесі айтылып келді. Ұзындығы 110 метр, биіктігі 8 метрді құрайтын көпір құрылысы жыл соңына дейін пайдалануға беріледі. Облыс әкімі көпір салу ісінің тұрғындардың қауіпсіздігі үшін өзекті екенін алға тартып, мердігер компания басшысына тиісті тапсырмалар жүктеді.
Еске салайық, облыс әкімі осы уақытқа дейін 100-ден аса ауылға барып, тұрғындармен кездесіп, ұсыныс-пікірлерін тыңдады. Әлеуметтік мәселелерді шешу нәтижесінде өңірде газбен қамту 67%, жақсы жолдардың үлесі 75%, ауыз су жүргізу 98% жеткен.
<img src="https://kyzylorda-news.kz/wp-content/uploads/2022/03/274947222_254164743571444_3452623126907433288_n.jpg" alt="" />
<img src="https://kyzylorda-news.kz/wp-content/uploads/2022/03/274931515_254164683571450_2408282468443234580_n.jpg" alt="" />

Облыс әкімі Тасбөгет және Белкөл кенті тұрғындарының өзекті мәселелерін тыңдады

<a href="https://kyzylorda-news.kz/">Kyzylorda-news.kz.</a> Облыста онкологиялық ауруға шалдығу көрсеткіші 2020 жылмен салыстырғанда 3,7 пайызға төмендеген. Қазіргі таңда қатерлі дертке шалдыққан 4 721 науқас диспансерлік есепке алынды. Ал балалар арасында онкогематологиялық диагнозбен 446 бала анықталған.
Бұл жөнінде Өңірлік коммуникациялар қызметінде өткен брифингте облыстық денсаулық сақтау басқармасы басшысының емдеу, алдын алу жөніндегі орынбасары Жалғасбек Үсенов хабарлады.
<blockquote>
 «Былтыр 1194 науқас диспансерлік есепке алынды. Соңғы бес жыл ішінде аурушаңдық көрсеткіші 1,8 пайызға өсті. Тұрғындар арасында өкпенің қатерлі ісігі, сүт безі қатерлі ісігі және асқазанның қатерлі ісігі көбейіп барады. Онкологиялық аурулардың алдын алу мақсатында жыл сайын скринингтік тексеру жүргізіледі. Нәтижесінде, 40 азаматшадан сүт безі, ал 19 әйелден жатыр мойны қатерлігі ісігі анықталды. Сондай-ақ, онкологиялық ауру жылдан-жылға жасарып, балалар арасында кең таралуда. Былтыр 42 баладан аты жаман аурудың белгілері анықталды. Осы себепті тұрғындарға қатерлі ісіктің алдын алу мақсатында скринингтік тексеруден дер кезінде өтулеріңізді сұраймыз», – деді Жалғасбек Үсенов.
</blockquote>

Жалғасбек Үсенов:  Онкологиялық ауруға шалдыққан қызылордалықтардың саны артқан

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласындағы мешіттің садақа жәшігіне ұрлыққа түскен облыс тұрғындарының әрекеті бейнебақылау камераларына түсіп қалды.
Қызылорда қалалық Полиция басқармасының Жедел басқару орталығының бейне бақылау камералары арқылы 1 наурыз күні түнгі уақыт 02:30 шамасында орын алған ұрлықтың ізі суымай ашылды.
Белгісіз тұрғындар қала аумағында орналасқан мешіттердің бірінде аулада тұрған садақа жәшігін бұзып, ішіндегі ақшаларын ұрлап кеткен.
Бейне бақылау камераның көмегімен екі облыс тұрғыны ұсталды.
Аталған дерек бойынша Қазақстан Республикасы Қылмыстық кодексінің 188-бабының 2-бөлігі (Адамдар тобының алдын ала сөз байласуымен жасалған ұрлық) сотқа дейінгі тергеп-тексеру амалдары жүргізілуде. Оқиғаның мән-жайлары анықталуда.

Қызылордада мешітке ұры түсті

<a href="https://kyzylorda-news.kz/">Kyzylorda-news.kz.</a> Ауыл шаруашылығы өндірісін дамытуда «Аграрлық несие корпорациясы» тауар өндірушілерді қаржыландырудың 3 бағдарламасын жүзеге асырып келеді. Биыл бұл бағдарламалар аясында өңірге 7 млрд. теңгеден аса қаражат қарастырылмақ. Бұл туралы Өңірлік коммуникациялар қызметінде өткен брифингте «Аграрлық несие корпорациясы» АҚ Қызылорда облысы бойынша филиалының басшысы Маханбет Тұрмаханов мәлімдеді.
<blockquote>
 «Ауыл шаруашылығы саласын дамытуда қолжетімді әрі тиімді жүйені қалыптастыру маңызды. Осы орайда біздің корпорация агроөнеркәсіптік тауар өндірушілерді қолдау мақсатында үш бағдарлама әзірледі. Атап айтсақ, «Кең дала» бағдарламасының несиелеу мерзімі келесі жылдың 1 наурызына дейін жалғасады. Ал пайыз мөлшерлемесі 5% құрайды. «Агробизнес» бағдарламасы құрылыс монтаждау жұмыстарына – 120 айға дейін, айналым қаражатын толықтыру – 48 айға қарастырылған. «Іскер» бағдарламасы 60 айға дейін қамтылған», – деді Маханбет Тұрмаханов.
</blockquote>
Облыс бойынша «ҚазАгроҚаржы» АҚ 51 млрд.теңге көлемінде инвестиция бөлінді. Сондай-ақ, қаңтар және ақпан айында 10 шаруа қожалығына 20 дана техника берілді.
<blockquote>
 «Жыл басынан көктемгі дала жұмыстарына дайындалу мақсатында 491 млн.теңге құрайтын 21 өтініш келді. Оның 5-і мақұлданып, 10 өтініш бойынша келісім шарт жасалды. Ал 4 өтініш қаржыландырудан бас тартылды», -деді «ҚазАгроҚаржы» АҚ Қызылорда облысы бойынша филиалының директоры Оразбек Қарақожаев.
</blockquote>

Қызылордада «Аграрлық несие корпорациясы» тиімді бағдарламаларды іске асыруда

<a href="https://kyzylorda-news.kz/">Kyzylorda-news.kz.</a> Елордадағы «Қазақстан» концерт залында отандық және шетел эстрада жұлдыздарының қатысуымен Роза Бағланованың 100 жылдық мерейтойына арналған «Қазақтың қаһарман қызы» атты салтанатты концерт өтті.
Концерттің беташар сөзінде Мәдениет және спорт министрі Дәурен Абаев ЮНЕСКО деңгейінде тойланатын Тұлғалар тізіміне енген даңқты әншінің ғасырлық тойы ресми түрде басталғанын айрықша атап өтті.
Кеште Роза Рымбаева, Тамара Асар, Ренат Гайсин, Жұбаныш Жексен, Айгүл Қосанова, Зарина Алтынбаева, Әміре, Рухия Байдүкенова, Жанэт (Беларусь), Хулкар Абдуллаева (Өзбекстан), Мирбек Атабеков (Қырғызстан) және т.б. елімізге танымал әртістер өнер көрсетті.
Роза Тәжібайқызы Халық Қаһарманы атағына ие болған Қазақстандағы жалғыз әнші. Ол өмірінің 70 жылынан астамын сахнада өткізіп, әлемнің 50-ден аса елінде болып 25 тілде ән айтқан шырқаған. Сөйтіп, жарты ғасырдан астам уақыт бойы қазақ халқының дәстүрлі мәдениеті мен өнерінің өркендеп, әлемге танылуына үлкен үлес қосты. Концертте Тәжібайқызының ұлы Тәжен мен келіні Марал және әншімен бірге 24 жыл етене қызмет еткен продюсері Қуаныш Әбдіқалымов та болды.
Роза Бағланованың азан шақырылып қойған есімі Үрбибі екен. Кеше айтулы сахна жұлдыздарымен бірге даңқты Тұлғаның немересі он жастағы Үрбибі Бағланова да өнер көрсетті.
<img src="https://kyzylorda-news.kz/wp-content/uploads/2022/03/275014728_507760820706197_9195047846364753515_n.jpg" alt="" />
<img src="https://kyzylorda-news.kz/wp-content/uploads/2022/03/275064510_507760987372847_7425861165116240280_n.jpg" alt="" />
<img src="https://kyzylorda-news.kz/wp-content/uploads/2022/03/275135115_507761014039511_8363211355089697479_n.jpg" alt="" />
<img src="https://kyzylorda-news.kz/wp-content/uploads/2022/03/275167848_507760780706201_6156127789515079611_n.jpg" alt="" />

Елордада «Қазақтың қаһарман қызы» атты салтанатты концерт өтті

<a href="https://kyzylorda-news.kz/">Kyzylorda-news.kz.</a> Биыл 1 наурыз бен 30 маусым аралығында 700-ге жуық жас Отан алдындағы борышын өтеуге әскерге аттанады. Жас сарбаздар ҚР ҰҚК Шекара қызметінде, ҚР Қарулы Күштері қатарында, ҚР ІІМ Ұлттық ұланы мен ҚР Төтенше жағдайлар министрлігіне қарасты бөлімдерде өтейтін болады.
Бұл туралы Өңірлік коммуникациялар қызметінің ақпарат алаңында өткен брифингте облыстық қорғаныс істері жөніндегі департаментінің бастығы Айдын Сағынбеков хабарлады.
<blockquote>
 «Әскерге шақыру науқанын жергілікті атқарушы органдар ұйымдастырып, қамтамасыз етеді. Комиссияларды қала және аудан әкімдерінің орынбасарлары басқарады. Әскери қызметке аттанатын азаматтарға 1414 сервистік қызметінен SMS-хабарламалар жіберу арқылы шақырылатын болады. Әскери бөлімдерге елімізді қорғауға қабілетті, денсаулығы мықты, дене бітімі шыныққан, сауаты жеткілікті, моральдік-іскерлік қабілеті жоғары азаматтар жіберіледі», – деді Айдын Сағынбеков.
</blockquote>
Айта кетейік, мемлекеттік органдармен жастардың әскери қызметке деген ынтасын арттыру мақсатында сарбаздардың несие мерзімін ұзартуға, белгіленген мерзімдегі қызметіне біржолғы ақшалай сыйақы төлеуге, білім беру секторында жеңілдіктер беруге, отбасы мүшелеріне коммуналдық қызметтерге ақы төлеуде жеңілдік жасау шаралары қарастырылуда.

Қызылордадан  700-ге жуық азамат әскерге аттанады

<a href="https://kyzylorda-news.kz/">Kyzylorda-news.kz.</a> Қызылорда қаласындағы «QOGAM TV» телеарнасы жерсеріктік телевизия OTAU TV пакетіне қосылды.
Телеарнаны бүгінгі күннен бастап, спутниктік «тәрелкесі» бар тұтынушы, республиканың кез-келген аумағынан көре алады.
<blockquote>
 _«Қызылорда облысы бойынша ақпарат таратуға мүмкіндікті 4 жыл бұрын алған болатынбыз. Пандемия жағдайына байланысты бұл жұмыстар кейінге шегеріліп келді. Биылғы жылы аталған жұмыстарды қайта қолға алып, қазіргі таңда техникалық және құжаттама мәселелері шешімін тапты. Бүгінде телеарна «Отау ТВ» жерсеріктік желісіне қосылды. Енді біздің арнаны Қазақстан бойынша көруге мүмкіндік бар. Телеарнаны қазір қала тұрғындары ғана емес, республика халқы тамашалайтын болғандықтан, жоспарға сәйкес хабар кестесі жаңа бағдарламалармен толығатын болады», – дейді «QOGAM TV» телеарнасының атқарушы директоры Мұрат Шалабаев._
</blockquote>
QOGAM TV телеарнасының ұжымын жаңа жетістікпен құттықтап, шығармашылық табыс тілейміз!

Мұрат Шалабаев: «QOGAM TV» телеарнасын Қазақстан бойынша көруге мүмкіндік бар

<a href="https://kyzylorda-news.kz/">Kyzylorda-news.kz.</a> Мәдениет және спорт министрі Дәурен Абаев чемпиондар мен олардың жаттықтырушыларына өмір бойы төленетін төлемақының көлемін 306 000 теңгеге дейін көтеруді тапсырды.
<blockquote>
 “Вице-министрге чемпиондарға, жүлдегерлерге, сондай-ақ олардың жаттықтырушыларына өмір бойына төленетін материалдық қолдау төлемінің мөлшерін 100 АЕК-ке (306 300 теңге) дейін арттыруды пысықтауды тапсырамын”, – деді Абаев.
</blockquote>
Оның айтуынша, қазір спортта жоғары нәтиже көрсеткендерге берілетін қосымша төлем 70 мың теңгені шамасында және бұл “өте дұрыс емес”.
<blockquote>
 “Сондықтан жоғары нәтижеге қол жеткізген адамдар лайықты материалдық қолдауға ие болуы керек”, – деп есептейді Абаев.
</blockquote>
Сондай-ақ ведомство басшысы салада білікті бапкерлер тапшы екенін айтты. Бұл жағдай олардың жалақысына тікелей байланысты.
<blockquote>
 “Қазіргі таңда (…) еңбек өтілі жоқ біліктілік деңгейі орташа жаттықтырушы 63 мың теңге жалақы алады. Осыған байланысты дене шынықтыру факультеттерінің түлектері спортты таңдамайды, олар қызмет көрсету саласы, күзет фирмалары, құқық қорғау органдары қызметкерлерінің қатарын толықтырып жатыр”, – деді Абаев.
</blockquote>
Ол үкіметке жаттықтырушылардың жалақысын көтеру, сондай-ақ оларды материалдық ынталандыру мәселесі ұсынылатынын айтты.
<a href="https://sputnik.kz/20220302/chempiondar-tolemaqy-23226210.html">Sputnik Қазақстан</a>

Қазақстан және Қызылорда облысының жаңалықтары

Қызылордада 4 адамнан коронавирус анықталды

3 наурызға арналған ауа райы болжамы

Қызылордада «Көктем – 2022» республикалық оқу-жаттығуы өтеді

Гүлшара Әбдіқалықова Ақжарма және Ақсуат ауылының тұрғындарымен кездесті

Облыс әкімі Тасбөгет және Белкөл кенті тұрғындарының өзекті мәселелерін тыңдады

Жалғасбек Үсенов: Онкологиялық ауруға шалдыққан қызылордалықтардың саны артқан

Қызылордада мешітке ұры түсті

Қызылордада «Аграрлық несие корпорациясы» тиімді бағдарламаларды іске асыруда

Елордада «Қазақтың қаһарман қызы» атты салтанатты концерт өтті

Қызылордадан 700-ге жуық азамат әскерге аттанады

Мұрат Шалабаев: «QOGAM TV» телеарнасын Қазақстан бойынша көруге мүмкіндік бар

Чемпиондарға төленетін төлемақы 306 мың теңгеге дейін көбейтілмек