<a href="https://kyzylorda-news.kz/">Kyzylorda-news.kz.</a>&nbsp;«AMANAT» партиясы Байқоңыр филиалы жанынан құрылған Партиялық бақылау комиссия мүшелері Төретам кенті мен Ақай ауылдық округіндегі дәріханалар, азық-түлік дүкендері мен жанар-жағармай құю бекеттеріндегі бағаларға байланысты мониторинг жұмыстарын жүргізді.
Осыған орай, мониторинг жұмыстары барысында дәріханалардағы дәрілердің бағасы қаншалықты тұрақты екені бақыланды.
Сонымен қатар мониторинг жұмыстары барысында шектік бағадан асырған жағдайда тиісті шаралар қолданылатындығы туралы түсіндірме жұмыстары жүргізілді. Алдағы уақытта мониторинг жұмыстары өз жалғасын табатын болады.
Мониторинг барысында азық-түлік дүкендерінде тауарлардың сатылымдағы бағаларына сәйкес айырмашылықтарына мән беріп, жіті бақыланды. Алдағы уақытта Төретам кенті мен Ақай ауылдық округі аумағындағы сауда орындары мен дүкендерде мониторинг жұмыстары тұрақты түрде жалғасады.
Мониторинг кезінде жанар май құю бекеттерінде дизель отынының тапшылығы бар екендігі және талонмен ғана сатылымда тұрғаны анықталды. Алдағы уақытта мониторинг жұмыстары өз жалғасын табатын болады.
<img src="https://kyzylorda-news.kz/wp-content/uploads/2022/09/304814764_810224009981746_8443433027930958978_n.jpg" alt="" />
<img src="https://kyzylorda-news.kz/wp-content/uploads/2022/09/304874904_810233939980753_8393445815651309985_n.jpg" alt="" />
<img src="https://kyzylorda-news.kz/wp-content/uploads/2022/09/303382394_810232136647600_7337929291252282603_n.jpg" alt="" />

Төретам мен Ақай ауылдарында мониторинг жұмыстары жалғасуда

<a href="https://kyzylorda-news.kz/">Kyzylorda-news.kz.</a> Биыл Қазалы қаласындағы «Өрімтал» балабақшасы типтік жобада салынған жаңа ғимаратқа көшеді.
Қазіргі таңда 140 орындық балабақшаның құрылысы қарқынды жүргізілуде. Бас мердігер «СМП – Қызылорда» ЖШС ғимараттың қабырға кірпішін қалау жұмыстарын толық аяқтап, төбе шатырын жабуда. Сонымен қатар, ішкі сылақ жұмыстарын жүргізуде.
Балабақша ғимараты қазан айының соңына дейін пайдалануға беріледі деп жоспарлануда.
<blockquote>
 «Биыл ауданда 4 нысан халық игілігіне пайдалануға беріліп, қазіргі таңда 17 нысанның құрылыс жұмыстары жүргізілуде. Аудандағы құрылыс саласында айтарлықтай өсім бар. Дәлірек айтқанда, осы жылы құрылыс жұмыстарның көлемі – 2,5 млрд. теңгені құрап, 11,3 пайызға артты. Нәтижесінде 17 нысанның құрылыс жұмыстары басталды. Оның 7-і өткен жылдан өтпелі болса, 10 нысан жаңадан бой көтереді», деді аудан әкімі Мұхтар Оразбаев.
</blockquote>
Айта кетейік, бүгінде Қазалы ауданының әлеуметтік-экономикалық жағдайы қарқынды дамып келеді. Өнеркәсіп өнімінің көлемі – 106,9 пайызға, ал өңдеу өнеркәсібі – 107,6 пайызға артты. Сондай-ақ, ауданда шағын және орта кәсіпкерлік нысандарының саны – 5299 бірлікті құрап, оның 95,6 пайызы тұрақты жұмыс істеуде.
<img src="https://kyzylorda-news.kz/wp-content/uploads/2022/09/063532fd-6623-431e-b011-c3a8828171c8.jpg" alt="" />

Қазалы қаласында 140 орындық балабақша салынып жатыр

<a href="https://kyzylorda-news.kz/">Kyzylorda-news.kz.</a> Бүгін – ұлт ұстазы Ахмет Байтұрсынұлының туған күні. Осыдан тура 150 жыл бұрын қазіргі Қостанай облысы, Жангелді ауданы Ақкөл ауылында дүниеге келген алаш арысының бүгінгі мерейтойы ЮНЕСКО көлемінде тойланып, түйіні өзі туған өлкеде қойылуы керек болған еді.
Тарихи тұлғасы мен арқалаған жүгі, көрген азабы ешбір ханның, ешбір батырдың, ешбір бидің, ешбір ғұламаның тұлғасымен салыстыруға келмейтін екі алыптың бірі Әлихан Бөкейхан болса, екіншісі – Ахмет Байтұрсынұлы.
Қазақ тарихының ең бір шешуші кезеңінде қатар өмір сүрген қос арыстың маңайына топтасқан ұлт элитасы халқын ұлтсыздандыру нөпірінен аман алып шығу үшін өткел болып төселді. Бәрінің басы бәйгеге тігіліп, бәрінің әулеті қуғынға ұшырады.
Абай Құнанбайұлы туралы «Қазақтың бас ақыны» атты мақала жазып, ойшылға қазақ жазба әдебиетінің төрін ұсынған Ахмет Байтұрсынұлының өзіне «Қазақтың бас ғалымы» деген атақ берсе жарасады.
Оған қазақ тілінің дыбыстық жүйесін, грамматикалық құрылымын, қазақ әліпбиі мен емлесін ғылыми дәйекпен ретке келтіріп, қазақ тілінің лексикалық қоры мен синтаксистік құрылымын өзге тілдердің ықпалынан тазартуға күш салған ғылыми еңбектері мен алғашқы оқулықтар дәлел.
ХІХ-ХХ ғасырда қазақ халқы үшін қандай ауыр болғанын түсіну үшін Байтұрсын әулетінің арғы-бергі тарихына көз салса жетіп жатыр.
Әкесі мен ағаларының нақақ қудалануы жүрегіне шоқ боп түскен алаш арысы 1937 жылы атылғанға дейін ұлт ұпайын түгендеп өтті.
Бұған да оның бүгінге цензура мен плагиаттан әупіріммен аман жеткен ғылыми еңбектері мен әлі күнге дейін табылмай келе жатқан құнды дүниелерінің даңқ-дақпырты дәлел.
Ол қазақ публицистикасы мен ғылыми тілін жасанды, қасаң сипаттан арылтып, халық тіліне жақындату үшін төл терминологияның негізін қалады.
Ақын, лингвист, әдебиетші, түркітанушы, публицист, педагог, аудармашы, мемлекет қайраткері, қазақ тіл білімі мен әдебиеттану ғылымдарының негізін салушы, ұлттық жазудың реформаторы, араб графикасының негізінде қазақтың төл әліпбиін түзіп, төте жазудың көмегімен «Қазақ» газетін ұйымдастырды, ұлттық журналистиканы дамытты.
Алашорда үкіметінің мүшесі болған.
2017 жылы Үкімет қаулысымен Қазақстан халқы тілдерінің күні 22 қыркүйектен Ахмет Байтұрсынұлының туған күніне ауыстырылды.
Жоғарыда айтқанымыздай, ұлт ұстазының бүгінгі мерейтойы ЮНЕСКО көлемінде тойланып, түйіні өзі туған өлкеде қойылуы керек болған еді. Бірақ дәл той қарсаңында тұтанған алапат өрттің бірнеше күнге созылып кетуіне байланысты шаралар кейінге шегерілді.
<a href="https://www.inform.kz/kz/bugin-ahmet-baytursynulynyn-tuganyna-150-zhyl-toldy_a3974656">ҚазАқпарат</a>

Ұлт ұстазы Ахмет Байтұрсынұлының туғанына 150 жыл толды

<a href="https://kyzylorda-news.kz/">Kyzylorda-news.kz.</a> Орманды қасақана жою немесе зақымдағаны үшін мүлкін тәркілей отырып, 8 жылға дейін бас бостандығынан айыру жазасы қарастырылған. Ішкі істер министрлігі тергеу департаментінің басқарма басшсы Ермек Шүлден мәлім етті, деп хабарлайды <a href="https://www.inform.kz/kz/ormanga-adeyi-ot-koygandar-8-zhylga-deyin-bas-bostandygynan-ayyrylady-iim_a3974702">ҚазАқпарат</a>.
<blockquote>
 «ҚР Ішкі істер министрлігі қолданыстағы заңнамаға сәйкес, ормандарды жою немесе зақымдағаны үшін қылмыстық жауапкершілік көзделгенін ескертеді. Орман қорына кіретін және кірмейтін ағаштар мен бұталарды өрт қою арқылы немесе қоқыспен ластап, өзге де әрекетпен қасақана жою немесе зақымдау ҚР Қылмыстық кодексінің 341-бабымен сараланады. Аталған әрекет ауыр қылмыстар санатына жатады және ол үшін мүлкін тәркілей отырып, 8 жылға дейін бас бостандығынан айыру жазасы көзделген», – деді ІІМ тергеу департаментінің басқарма бастығы Ермек Шүлден.
</blockquote>

Орманға әдейі от қойғандар 8 жылға дейін бас бостандығынан айырылады

<a href="https://kyzylorda-news.kz/">Kyzylorda-news.kz.</a> ҚР Денсаулық сақтау министрлігі соңғы тәулікте 197 адамнан коронавирус індеті табылғанын жариялады.
Олардың ішінде:
Нұр-Сұлтан қаласында – 57,
Алматы қаласында – 25,
Шымкент қаласында – 1,
Ақмола облысында – 20,
Ақтөбе облысында – 5,
Алматы облысында – 2,
Жетісу облысында – 1,
Атырау облысында – 5,
Шығыс Қазақстан облысында – 2,
Абай облысында – 1,
Жамбыл облысында – 5,
Батыс Қазақстан облысында – 9,
Қарағанды облысында – 31,
Ұлытау облысында – 1,
Қостанай облысында – 14,
Қызылорда облысында – 2,
Маңғыстау облысында – 12,
Павлодар облысында – 3,
Түркістан облысында – 1.
Елімізде коронавирус инфекциясын жұқтырғандар саны 1 390 109 жетті.

Қызылордада тағы 2 адам коронавирус жұқтырды

<a href="https://kyzylorda-news.kz/">Kyzylorda-news.kz.</a> Бүгін атмосфералық фронталды бөліктердің өтуіне байланысты еліміздің батысында, солтүстігінде және оңтүстік-шығыс таулы аймақтарында найзағай ойнап, жаңбыр жауады, деп хабарлайды Қазгидромет.
Қазақстанның қалған бөлігінде күн жауын-шашынсыз болады. Республиканың батысы, солтүстігі, оңтүстігі мен таулы аудандарында жел күшейіп, оңтүстікте шаңды дауыл тұрады.
Жамбыл, Қызылорда, Түркістан, Ақтөбе, Алматы, Жетісу облыстарының басым бөлігінде, Батыс Қазақстан, Абай, Қостанай облыстарының оңтүстігінде, Қарағанды, Ұлытау облыстарының оңтүстік-шығысында төтенше өрт қаупі сақталады, ал Абай облысының шығысында төтенше өрт қаупі күтіледі.
Қостанай облысының басым бөлігінде өрт қаупі сақталады.
Күндіз Жетісу, Ұлытау, Қызылорда облыстарының басым бөлігінде, Қарағанды, Қостанай облыстарының оңтүстігінде, Алматы облысының солтүстігінде, оңтүстігінде, Жамбыл облысының солтүстігінде, оңтүстігінде, батысында, Ақтөбе облысының оңтүстігінде, шығысында қатты ыстық сақталады.

5 қыркүйекке арналған ауа райы болжамы

Kyzylorda-news.kz. Сырбойылықтар Қостанай өңірінде орын алған табиғи апатқа байланысты зардап шеккендерге гуманитарлық көмек көрсету жұмыстарына кірісіп кетті.
Осы мақсатта «AMANAT» партиясы облыстық филиалымен Қызылорда қаласы, 7 аудан және Төретам кентінде, барлығы 9 гуманитарлық көмек қабылдау пункттері ашылып, сағат 9:00 ден бастап азаматтардан келген көмектерді қабылдауда.
Қабылдау пункітіне алғаш болып өз көмегін жеткізгендердің бірі партия белсендісі, «BIALI»ЖШС –нің төрағасы Асхат Шәукенбаев. Ол осындай қиын сәтте өзінің қостанайлықтармен бірге екенін жеткізіп, барлық жерлестерді жұмыла көмек көрсетуге шақырды. Қостанайлық ағайынға көмекке «AMANAT» партиясы облыстық, қалалық, «Тұран», «Теміржол» филиалдарының ұжымы да ортақ қаржы жинап, азық-түлік өнімдері мен төсек бұйымдарын алуға үлес қосты.
Қазір гуманитарлық көмек қабылдау пункттерінде «Jastar ruhy» жастар қанаты облыстық филиалының мүшелерінен волонтерлер тобы құрылып, қайырымдылық көмекті аталған өңірге жөнелту шараларына белсене атсалысуда.
Атап өтейік, қабылдау пунктіне тез бұзылмайтын азық-түлік өнімдері, гигиеналық заттар, киім-кешек пен төсек бұйымдары жинақталады. Қаржылай көмек көрсету үшін ертең республика бойынша арнайы есеп шот ашылмақ.
Қазіргі таңда көмек қабылдау пунктерінің жұмысы жалғасып жатыр. Барша жерлестерді қайырымдылық шараға белсенді атсалысуға шақырамыз!
<img src="https://kyzylorda-news.kz/wp-content/uploads/2022/09/42601341-fe7f-46ba-a71c-f0dcbdf5a7fe.jpg" alt="" />
<img src="https://kyzylorda-news.kz/wp-content/uploads/2022/09/de30812d-8bc0-445e-9560-9be455e782e4.jpg" alt="" />
<img src="https://kyzylorda-news.kz/wp-content/uploads/2022/09/b92ab63f-99c3-4f82-9a19-a0b974aa33b6.jpg" alt="" />
<img src="https://kyzylorda-news.kz/wp-content/uploads/2022/09/fc95c646-83dc-4ffa-b083-fd647c2aabd6.jpg" alt="" />

Сырбойылықтар Қостанай жұртымен бірге!

Kyzylorda-news.kz. Қостанай облысының Әулиекөл ауданындағы орман шаруашылықтарының бірінде қарағай мен құрғақ шөп тұтанып, арты алапат өртке ұласты, деп хабарлайды ҚазАқпарат.
Қостанай облысында орман өрті 2 қыркүйек күні басталды. Сағат 15:10-да Басаман және Семиозерное шаруашылықтарының аумағында ағаш пен құрғақ шөп өртенді.
<blockquote>
 «Осы күні бір жағы күн 36 градусқа дейін қатты ысып, жел секундына 26 метрге дейін күшейіп, метеорологиялық жағдай күрделене түсті. Өртенген аумақтың көлемі 9 400 гектарды құрады. Орманың жалпы аумағы 70 мың гектар»,-деді ТЖМ өкілдері.
</blockquote>
Оқиға орнында жедел штаб құрылып, оның құрамына ҚР Төтенше жағдайлар министрі Юрий Ильин мен өзге де бірқатар мемлекеттік органдардың басшылары кірді. Өртті сөндіруге Қостанай, Ақмола, Қарағанды және Солтүстік Қазақстан облыстарының жеке құрамы жұмылдырылды.
Өрт орман алқабынан елді мекендерге тарап, жағдайды күрделендіре түсті. Осыған байланысты негізгі күш Аманқарағай мен Новонежинка елді мекендерін өрттен қорғауға жұмылдырылды.
Озерное ауылынан 1841 адам, Аманқарағай ауылының солтүстік бөлігінен 1000 адам, Калинино ауылынан 228, Лесное ауылынан 363 адам қауіпсіз жерге көшірілді.
Эвакуацияланғандардың барлығы Әулиекөл орта мектебі мен мектеп-интернатына орналастырылды және олар тамақпен қамтамасыз етілді.
Кешірек Юрий Ильин өрттің елді мекендерге тарап, өрт сөндірушілер 60 үйді өрттен аман алып қалуға күш салып жатқанын хабарлады.Өрттен зардап шекккендерге аймақта шұғыл желі іске қосылып, психологтардың жұмысы ұйымдастырылды.
Жолдың нашар көрінуіне байланысты билік өкілдері «Қостанай- Әулиекөл» трассасын жауып тастады.Қостанай облысына 15 автоцистерна, екі вахта автобусы, 1 қызметтік көлік, Нұр-Сұлтан қаласының Төтенше жағдайлар департаментінен 98 адам жіберілгені хабарланды.
<blockquote>
 «Сағат 22:00-дегі жағдай бойынша Әулиекөл ауданына Ақмола облыстық Төтенше жағдайлар департаментінен 9 техника мен 50 адам келді. Солтүстік Қазақстаннан 6 техника мен 50 адам, қосымша Атбасар мен Новоишимка ауылдарынан екі өрт сөндіруші пойыз келді. Сағат 21:00-де №51 және №82 жолаушылар пойыздары тоқталды»,-деп хабарлады ТЖМ жедел штабынан.
</blockquote>
Жергілікті әкімдік қазір жергілікті деңгейде төтенше жағдай жариялау мәселесін ойластырып жатыр.
Қостанай облысында сондай-ақ Мемлекет басшысы Қасым-Жомарт Тоқаев қатысуы керек болатын Ахмет Байтұрсынұлының 150 жылдығымен байланысты іс-шаралар да кейінге қалдырылды.
Мемлекет басшысы мұнда енді басқа мақсатпен, яғни өртпен күрес бағытында атқарылып жатқан жұмыстармен танысу үшін келеді.
Үкімет төтенше жағдайдың салдарымен күреске қаржы бөлетін болады.

Қостанай облысында бір тәуліктен бері өрт сөндіріліп, адамдар қауіпсіз аумаққа көшіріліп жатыр

Kyzylorda-news.kz. Қызылорда қаласында көп қабатты үйде болған өрттен 12 адам құтқарылды.
Оқыс оқиға 3 қыркүйекте сағат 13:08 шамасында Қызылорда қаласына қарасты Қызылжарма ауылында болды. Көп қабатты үйдің бесінші қабатындағы пәтерде тұрмыстық заттардың жануынан өрт шыққан.
<blockquote>
 «Оқиға орнына облыстық төтенше жағдайлар департаменті мамандары барды. Олардың күшімен 12 адам (оның ішінде 3 бала) қауіпсіз жерге шығарылды. Өрт толық сөндірілді. Қаза болғандар мен зардап шеккендер жоқ. Өрттің шығу себебі анықталуда», – деп мәлім етті облыстық төтенше жағдайлар департаменті.
</blockquote>
<img src="https://kyzylorda-news.kz/wp-content/uploads/2022/09/img-20220904-wa0004.jpg" alt="" />
<img src="https://kyzylorda-news.kz/wp-content/uploads/2022/09/fb_img_1662263574739.jpg" alt="" />
Ок

Қызылордада көпқабатты тұрғын үйден өрт шықты

Kyzylorda-news.kz. Өткен тәулікте коронавирус инфекциясын жұқтырған 365 жағдай тіркелді, деп хабарлайды COVID-19 таралуына жол бермеу жөніндегі ВАК баспасөз қызметі.
Оның ішінде:
Нұр-Сұлтан қаласында – 65,
Алматы қаласында – 33,
Шымкент қаласында – 1,
Ақмола облысында – 30,
Ақтөбе облысында – 8,
Алматы облысында – 0,
Жетісу облысында – 4,
Атырау облысында – 7,
Шығыс Қазақстан облысында – 5,
Абай облысында – 5,
Жамбыл облысында – 4,
Батыс Қазақстан облысында – 48,
Қарағанды облысында – 39,
Ұлытау облысында – 7,
Қостанай облысында – 35,
Қызылорда облысында – 2,
Маңғыстау облысында – 20,
Павлодар облысында – 21,
Солтүстік Қазақстан облысында – 30,
Түркістан облысында – 1.
Елімізде коронавирус инфекциясын жұқтырғандар саны 1 389 912 жетті.

2 қызылордалықтан коронавирус анықталды

Kyzylorda-news.kz. Қазақстанда 468 адам коронавирус инфекциясынан жазылып шықты, деп хабарлайды COVID-19 таралуына жол бермеу жөніндегі ВАК баспасөз қызметі.
Олар:
Нұр-Сұлтан қаласында – 0,
Алматы қаласында – 94,
Шымкент қаласында – 0,
Ақмола облысында – 0,
Ақтөбе облысында – 0,
Алматы облысында – 16,
Жетісу облысында – 16,
Атырау облысында – 0,
Шығыс Қазақстан облысында – 12,
Абай облысында – 7,
Жамбыл облысында – 0,
Батыс Қазақстан облысында – 57,
Қарағанды облысында – 97,
Ұлытау облысында – 10,
Қостанай облысында – 0,
Қызылорда облысында – 8,
Маңғыстау облысында – 17,
Павлодар облысында – 33,
Солтүстік Қазақстан облысында – 69,
Түркістан облысында – 32.
Елімізде барлығы 1 359 257 адам COVID-19-дан емделіп, сауығып шықты.

Қызылордада 8 адам коронавирустан жазылып шықты

Kyzylorda-news.kz. Қазақстанның басым бөлігінің күн райына бұрынғыша құрғақ болып келетін антициклон әсер етеді, деп хабарлайды Қазгидромет.
Тек Қазақстанның батысы мен солтүстігінде атмосфералық фронттардың өтуіне байланысты өткінші жаңбыр жауып, күн күркірейді. Республиканың батыс, солтүстік, оңтүстік бөлігінде жел күшейіп, оңтүстік-батыста, оңтүстікте шаңды дауыл тұрады.
Жамбыл, Қызылорда, Түркістан, Ақтөбе, Алматы, Жетісу облыстарының басым бөлігінде, Атырау облысының батысы мен оңтүстігінде, шығысында, Батыс Қазақстан облысының оңтүстігі мен шығысында, Абай, Қостанай облыстарының оңтүстігінде, Қарағанды, Ұлытау облыстарының оңтүстік-шығысында төтенше өрт қаупі сақталады. Ақмола, Қостанай облыстарының басым бөлігінде жоғары өрт қаупі сақталады.

Қазақстан және Қызылорда облысының жаңалықтары