Kyzylorda-news.kz. Мемлекет басшысы Қасым-Жомарт Тоқаев қазақстандықтарды Ұлттық домбыра күнімен құттықтады, деп хабарлайды Ақорда.
***
Құрметті отандастар!
Баршаңызды Ұлттық домбыра күнімен шын жүректен құттықтаймын!
Бұл – еліміз үшін ерекше мейрам. Оны ел болып атап өту арқылы халқымыздың рухын көтеріп, танымын арттырамыз. Сондай-ақ, ұлы дала дәстүрлерін жас ұрпақтың санасына сіңіріп, төл өнеріміздің құдіретін танытамыз.
Шын мәнінде, қазақтың қара домбырасы – ұлтымыздың бойтұмары. Оның үні әрқайсымыздың жүрегімізге жақын. Өйткені, қазақ пен домбыра – бір-бірінен бөліп қарауға болмайтын егіз ұғым. Академик Ахмет Жұбанов «Домбыра – көшпелі елдің көнекөз шежіресі» деп бекер айтпаған. Қастерлі аспаптың қос ішегіне халқымыздың бүкіл болмысы сыйып тұр.
Сонау Кетбұғадан бері жалғасып келе жатқан дәулескер күйшілеріміздің мол мұрасы – баға жетпес рухани байлығымыз. Біз төл өнерімізді дәріптеу арқылы асыл құндылықтарымызды ұлықтай түсеміз.
Қазір Жаңа Қазақстанды құруға кірістік, ұлттың жаңа сапасын қалыптастыруды қолға алдық. Өркениетті ел болу үшін жаңа дәуірдің жақсы үрдістерін бойға сіңіру жеткіліксіз. Сонымен бірге, салтымызды сақтап, еңбекқорлық құндылықтарын кеңінен дәріптеп, бабалар жолын берік ұстанамыз.
Ендеше, жұртымызбен бірге домбыра да мәңгі жасайды. Күй өнері азаттық рухын ұрпақтан ұрпаққа жалғастырады.
Домбыра әр шаңырақтың төрінде тұрсын!
Еліміздің мерейі тасып, абыройы асқақтай берсін!

Мемлекет басшысы: Күй өнері азаттық рухын ұрпақтан ұрпаққа жалғастырады

Kyzylorda-news.kz. Қазақстан полициясының 30 жылдығына орай, Қызылорда облысының полиция департаменті бөліністері қызметкерлерінің арасында арнайы даярлық басқармасының ұйымдастыруымен қоян – қолтық ұрысынан жарыс өтті.
Қызылорда облысының Мәдениет және спорт басқармасына қарасты облыстық жоғары спорт шеберлігі мектебінде өткен бұл сайысқа полиция департаментінің басшылығы, ішкі істер органдарының ардагерлері және құрама командалар қатысты.
Жарыстың ашылу салтанатында Департамент бастығының орыбасары полиция полковнигі Әміржан Өтегенов құттықтау сөз сөйлеп, жарысқа қатысушыларға сәттілік тіледі.
Салауатты өмір салтын насихаттау, күш құрылымдары қызметкерлерінің физикалық дайындықтарын сынға салу мақсатында ұйымдастырылған бұл сайысқа қатысуға 11 құрама ниет білдіріпті.
Бүгінгі спорттық додада жалпы ережеде командалық есепте ОПД ЖҚАЖ командасы бірінші орынды иеленсе, екінші орынды ОПД Оқу-жаттығу взводының командасы тізгіндеп, Арал аудандық полиция бөлімі командасы үшінші орынға табан тіреді. 
Жеңімпаздар кубок, медаль және бағалы сыйлықтармен марапатталды.
<img src="https://kyzylorda-news.kz/wp-content/uploads/2022/07/fb_img_1656787997434.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656788049765.jpg" alt="" />

Қызылордада қоян – қолтық ұрысынан жеңімпаздар анықталды

Kyzylorda-news.kz. 3 шілдеге арналған ауа райы болжамы жарияланды.
Күндіз&nbsp;Қызылорда облысының&nbsp;оңтүстік-батысында найзағай ойнайды деп күтіледі. Солтүстік-батыстан, батыстан таңертең және күндіз 15-20 м/с жылдамдықпен жел тұрады.&nbsp;Қызылордада&nbsp;төтенше өрт қауіпі сақталады.

Жексенбіге арналған ауа райы болжамы

Kyzylorda-news.kz. Қарақалпақстанның Жоқарғы кеңесі Нүкістегі оқиға бойынша ресми мәлімдеме жасады, – деп хабарлайды Tengrinews.kz тілшісі.
“Өзбекстан Республикасы жүргізіп отырған ашықтық және еркін ерік білдіру саясатына қарамастан, 2022 жылдың 1 шілдесінде Нүкіс қаласында қылмыстық топ Қарақалпақстан Республикасының мемлекеттік басқару органдарын басып алуға әрекет жасау түріндегі заңсыз әрекеттер ұйымдастырды.
Популистік ұрандарды жамыла отырып, азаматтардың санасы мен сеніміне айла-шарғы жасап, тәртіпсіздіктерді ұйымдастырушылар билік өкілдерінің заңды талаптарына бағынбай, азаматтарды республиканың әкімшілік ғимараттары кешенінің алдындағы алаңға жинады.
Арандатушылар жиналған адамдарға сүйене отырып, осы мемлекеттік мекемелерді басып алуға және осылайша қоғамға іріткі салуға, Өзбекстандағы қоғамдық-саяси жағдайды тұрақсыздандыруға әрекет жасады”, – делінген хабарламада.
Парламент өкілдері заңсыз әрекеттердің жолы кесіліп, жаппай тәртіпсіздік әрекеттері ауыздықталғанын атап өтті.
<blockquote>
 “Мемлекетіміз жағдайдың одан әрі ушығуына жол бермеу үшін қажетті әлеуетке ие екенін жауапкершілікпен мәлімдейміз. Тәртіпсіздіктерді ұйымдастырушылар тобы мен құқық қорғау органдарына белсенді қарсылық көрсеткен адамдар ұсталды. Қазір оларға қатысты тергеу амалдары жүріп жатыр. Барлық арандатушы анықталып, қолданыстағы заңнамаға сәйкес жауапқа тартылады”, – деп мәлімдеді Жоқарғы кеңес.
</blockquote>
Еске салайық, елдің қолданыстағы конституциясында Қарақалпақстан халқы жалпы референдум негізінде Өзбекстаннан шығу құқығына ие егемен республика ретінде көрсетілген. Жақында ел конституциясына түзетулер жобасына сәйкес бұл ережелерді алып тастау ұсынылатыны белгілі болды.
Өзбекстан ІІМ мәліметінше, заңсыз демонстрациялар 1 шілдеде сағат 15.00-де басталды. Қарақалпақстан тұрғындары қала бойынша шеру ұйымдастырды, содан кейін олар орталық дехкан базарының аумағына жиналып, заңсыз демонстрация ұйымдастырды.

Жоқарғы кеңес Нүкістегі оқиға туралы айтты

<a href="https://kyzylorda-news.kz/">Kyzylorda-news.kz.</a> Жазда ағзаға дәрумен жетіспеуі мүмкін емес секілді көрінуі мүмкін. Алайда олай емес. Сыртқы келбет пен жақсы хал-жайды сақтау үшін жылдың ыстық мерзімінде мына маңызды 4 дәруменді тұтыну керек.
Жаз айларында суық мерзімге қарағанда ағзаға мүлдем басқа дәрумендер қажет. Ол қатты ыстық ауа-райымен, жылдам зат алмасумен және қуаттың көбірек керек болуымен байланысты. Физикалық денсаулық үшін маусымдық дәрумендердің жеткілікті болуы маңызды. Егер олар ағзаға түспесе, өзіңізді шаршаңқы және жабырқаңқы сезінесіз.
А дәрумені
Жазғы күннің ультракүлгін сәулелері жасушаларды зақымдайды. Ол терінің қартаюына және әжімдердің пайда болуына әкелуі мүмкін. Сондықтан қалыпқа келтіруші А дәруменін қабылдау маңызды. Оның ағзаға жетіспеуі тері проблемаларын ғана емес, тіс, сүйектер, тырнақ және шаш жағдайының нашарлауын болдыруы мүмкін. Сондай-ақ ол көруге және жалпы хал-жайға әсер етеді.
А дәруменін брокколи, кәді, сәбіз, картоп, қызыл бұрыш, бұршақ, қауын, қарбыз, грейпфрут, сүт, май, ірімшік, йогурт, жұмыртқа және балық майынан алуға болады.
С дәрумені
С дәрумені иммунды жүйе үшін өте қажет. Ағзаға С дәрумені жетіспесе, тері құрғақ, ал шаш түйіндері әлсіз бола түседі. Сондай-ақ, мұрын жиі қанауы мүмкін, жаралар ұзақ жазылады және бұлшықеттер мен буындар ауырады.
С дәруменін құлпынай, киви, апельсин, грейпфрут, мандарин, лимон, қауын, қаражидек, итмұрын, ақжелкен, руккола, кресс-салат, пияз, қызыл қырыққабат, брокколи, жасыл үрмебұршақ, бұршақ, жасыл және қызыл бұрыш, тәтті картоптан ала аласыз.
Е дәрумені
Е дәрумені жасушалы жарғақшаға антиоксиданттық әсер береді және жасушалардың жаңаруына ықпал етеді. Сондай-ақ, ол тері мен шаш саулығын жақсартады. Оның бұл артықшылықтары оны жаз мерзімі үшін маңызды элемент етеді.
Жазда Е дәруменін алу үшін мына өнімдерді рационыңызға қосыңыз: күнбағыс дәні, бадам, жержаңғақ, орман жаңғағы майы, бадам майы, мангольд, асжапырақ, қасқыржем, сарымсақ.
D дәрумені
D дәрумені күн сәулесінің әсерінен синтезделетіндіктен, ұзаққа созылған суық мерзімде оның деңгейі қатты түсіп кеткен болуы мүмкін. Егер ағзаға D дәрумені жетіспесе, әлсіздік, бұлшықеттер мен буындардың ауыруы, артық салмақтың қосылуы және асқорыту проблемалары пайда болады. Ағза қысқа дайын болуы үшін оның орнын жазда толтырған жөн.
D дәрумені ағзада күн сәулесінің әсерінен синтезделеді. Алайда оны кей өнімдерден де алуға болады. Құрамында D дәрумені бар негізгі өнімдерге ірімшік, айран, йогурт, сүт, сұлы, ақжелкен, саңырауқұлақ, балық майы, скумбрия, албырт және бауыр жатады.
<a href="https://massaget.kz/layfstayl/zhadnama/68839/?fbclid=IwAR3uGxXnO88GwoW_qM30MaBvVq9XfvxuImG44M3qw_gsZjqHbr13FeNsDEE">Massaget</a>

Сізге жазда қажет маңызды 4 дәрумен

Шілде жаздың қызған&nbsp;ортаңғы айы. Бұл 31-нен аяқталатын жеті айдың бірі болып саналады. Жердің солтүстік жарты шарының көп бөлігінде ең ыстық ай болса, оңтүстік жарты шарында ең суық ай болып табылады. Кейбіреулер үшін бұл ай беріктік пен ұстамдылықтың сыналатын кезі&nbsp;болып саналса, біреулер үшін&nbsp;керісінше&nbsp;мансап пен жеке қарым-қатынаста табыс әкеледі.&nbsp;<a href="https://stan.kz/">Stan.kz</a>&nbsp;ақпарат агенттігі 2022 жылдың шілде айына арналған жұлдыз жорамалды ұсынады.
Шілде айының басында туылғандар сезімтал, эмоционалды адамдар. Олар әркез өзін зерттеп&nbsp;қазбалауға&nbsp;көп уақыт бөледі. Мұндай жандар жұмыс пен отбасына көп уақыт бөледі.&nbsp;Алайда&nbsp;іштей өзіне көңілі толмауы мүмкін. Олардың өзінің ішкі және сыртқы жағдайына назар аударғаны абзал.
Шілде айында жұлдыз жорамал&nbsp;белгілерінің әрқайсысын не күтетінін біздің болжамнан біліңіздер:
Тоқты
Шілде айында торпақтар үшін шешілмеген мәселелер мен бітпеген жұмыстардың көп болып көрінуі мүмкін. Тіпті ештеңеге үлгермейтіндей күй кешуіңіз мүмкін. Алайда бұл үшін көңіліңізді түсірмеңіз. Себебі бұл –&nbsp;беріктік пен ұстамдылығыңызды тексеруге арналған сынақ. Егер соңына дейін төзімділік танытсаңыз жұлдыздар сіздің жағыңызда болады. Сізге қолдау көрсетіп, ақыл айтатын, демеу білдіретін адамдар жаныңыздан табылады. Бастығыңыз сіздің талпынысыңызды көреді. Алайда маңызды шешімдер қабылдауда асығыстық танытпаңыз.&nbsp;
Айдың соңына қарай сізді мол табыс қуантады. Немесе көптен армандаған&nbsp;жаңа қызмет пен жаңа жұмыс орынына ауысуыңыз мүмкін.
Торпақ
Бұл кезең Торпақтар үшін жетістікке жету жолында сәттілікке толы болады.&nbsp;Жұмыстағы ең маңызды атқарылуы керек істерді айдың бастапқы бөлігіне жоспарлаңыз. Сізге көп тапсырмалар мен қосымша қызметтер міндеттелуі мүмкін. Бірақ бұның соңы соған тұрарлық мол табыс әкелетінін ұмытпаңыз.&nbsp;
Бұдан бөлек, айдың алғашқы жартысында жаңа таныстықтар болады. Осылайша сіз жақсы достар мен серігіңізді кездестуіңіз мүмкін. Алайда Торпақтар үшін шілде айының екінші жартысы қарбаласқа толы болады. Дипломаттық қасиеті туабітті қалыптасқан торпақтар үшін жұмыстағы шиеленісті&nbsp;шешу қиын емес. Тіпті жан-жағындағы адамдармен қарым-қатынасы жақсара түседі.
Егіздер
Шілде айында егіздер жұмысқа көңіл бөліп, түрлі идеялар мен жаңашыл дүниелерді&nbsp;ұсынғаны жөн. Сонда жетістіктің ауылы алыста болмайды. Мансаптық өсу жолында Егіздер үшін шілде айы – сәттілікке толы ай.&nbsp;
Жұмыс&nbsp;қаражатқа да әсер етеді. Яғни Егіздерді мол ақша түсімдері күтіп тұр. Алайда жақындармен қарым-қатынаста уақыт пен көңіл бөлмегеніңіз үшін олқылықтар туындайды. Сондықтан сабырлылық пен ұстамдылықты сақтаңыз.
Шаяндар
Айдың басы шаяндар үшін сәтсіз болуы мүмкін. Кәсіпте кідірістер болып, жоспарларыңыз өзгеруі мүмкін. Алайда бұл үшін көңіліңізді түсірмеңіз. Өйткені шілденің ортасында ісіңіз алға басып, жақындарыңызға көп уақыт бөле аласыз.
Сүйіктісімен аралары келіспей жүрген Шаяндарға кездесу жасап, мәселені шешуге кеңес беріледі.&nbsp;
Еркіндікке үйренген Шаяндар үшін шілденің соңы сәттілікке толы болады. Жеке қарым-қатынас тұрғысында&nbsp;да өте қолайлы ай болмақ.
Арыстандар&nbsp;
Шілде айының басында әттеген-ай дейтін ұсақ-түйек мәселелер кезігуі&nbsp;мүмкін, бірақ оларға назар аудармаңыз. Керісінше байырғы бітпей қалған істеріңізді аяқтағаныңыз абзал. Айдың екінші онкүндігінде жұлдыздар сіздің жағыңызда болады – іскерлік қарым-қатынас қуаныш сыйлайды.&nbsp;Сонымен қатар, ескі байланыстарды қалпына келтіруге мүмкіндік туады.
Әсіресе шілде айының ортасы арыстан-кәсіпкерлер үшін&nbsp;қолайлы уақыт болмақ.
Жеке қарым-қатынастарға келер болсақ, отбасыңызда бәрі әдеттегідей үйлесім тауып кетеді. Ал махаббатта арыстандар өзінің екінші жартысымен арадағы барлық келіспеушіліктерді жояды. Өзіңізді әңгімелесу барысында ашық әрі байсалды ұстауға дайын болыңыз. 
&nbsp;
Бикештер
Жалпы, бұл ай олар үшін қолайлы болмақ. Бикештер жұмыстағы әдеттегі шаруларын еш қиналмай істейді. Бикештердің көпшілігі жұмыс орнын ауыстыру туралы ойланады. Ал оларға жаңа жұмыс туралы ұсыныстар айдың басында түсуі мүмкін. 
Егер сіз &nbsp;қазіргі жұмыс орнында қалуға бел байласаңыз, жаңа таныстарыңызға көбірек көңіл бөлген дұрыс. Сізге туа біткен “адамдармен қарым-қатынас орната білу” қабілетіңіз қажет болмақ. Кез-келген адаммен ортақ тіл таба білу –&nbsp;болашақта сізден көмегін аямайтын дос табуға мүмкіндік береді.&nbsp;Жеке қарым-қатынасыңыз позитивке толы болмақ. Бикештер ақырында азаптаған уайымдардан арылып, екінші жартысымен қарым-қатынас жасауға кедергі келтіретін мәселелерді шешеді. Басы бос бикештер айдың екінші жартысында өз адамын кездестіруі мүмкін.
Таразылар
Айдың басы – сіз үшін оқуға көңіл бөлуге қолайлы уақыт болады. Өзіңізді жұмыста немесе кез келген жерде жақсы жағынан көрсетіп, алдыңыздан кезіккен қолайсыз жағдайлардың бәрінен шешім тауып шығасыз. Осы мінездің арқасында Таразылар басшылықтың құрметіне ие бола бастайды. Әріптестерімен келіспей қалған Таразылар 10 шілдеге дейін арадағы мәселелерді реттегені дұрыс. 
Бұл уақытта сіздің жеке қарым қатынасыңыз үйлесімді түрде дами түспек. Шілде айының екінші жартысына демалыс жоспарлауға әбден лайықсыз. Таразылар осы айдың ортасынан кейін жақындарымен бірге сапар шегіп, өмірден ләззат алады.
Сарышаяндар
Бизнестегі барлық шиеленіскен мәселелерді шілде айының басында шешуге тырысқан дұрыс, өйткені айдың бірінші онкүндігі іскерлік қатынастар тұрғысынан табысты болмақ. Көптеген сарышаяндарға жаңа жұмыс орнынан ұсыныстар түседі, сондықтан дайын болғаныңыз жөн.&nbsp; 
Бірақ шілде айының ортасынан бастап қиын кезең басталады. Көп сарышаяндар бұл уақытта өзінің бойынан ұзақ уақыттан бергі шаршауының шарықтау шегіне жеткенін байқайды. Өздеріне тым қатал олар жақын адамдарына ауыр сөз айтпағаны дұрыс. Себебі, ұрыс-жанжалдың арты жақсылыққа апармайды. Жаңа таныстықтағы адамдармен әңгімелескенде де абай болыңыз. Олардың бәріне бірдей сене беруге болмайтынын біліңіз. Кімнің кім екенін уақыт көрсетеді.
Мергендер
Бұл айда көп мергендер өздерінің жеке біліктіліктерін арттырған дұрыс. Жаңа білімнен бас тартпаңыз. Білім ешқашан артық болмайды. Соңғы уақытта шаршағаныңыздың әсерінен айналаңызбен тіл табысу қиындап кетті. Сізге көңіл күйіңізге мән беру керек. Әріптестермен қарым-қатынаста аздаған кідіріс жасаған дұрыс. Егер сіз сәл көбірек көңіл бөлсеңіз, отбасында және жақын адамыңызбен арада бәрін жақсы жаққа өзгерту оңайға түседі. 
Айдың екінші жартысы ерекше танысу мен кездесулерге толы. Күтпеген жерден ақша келіуі мүмкін. Мергендер ұзақ уақыт қарызға берген ақшасын алады.&nbsp;
Тәуешкілер
Тауешкілер үшін шілде – маңызды сұрақтарға жауап іздейтін уақыт. Бұл белгінің көптеген өкілдері өз өмірінде не істегісі келетінін түсініп қана қоймай, тіпті жұмыс орнын ауыстыруды ұйғармақ. Тез арада достық немесе тіпті романтикалық қарым-қатынасқа айналатын таныстықтар болуы мүмкін. 
Сонымен қатар Тауешкілерге күтпеген жерден сапарға немесе іс-шараға баруды ұсынуы мүмкін. Бұл мүмкіндікті қолданғаныңыз дұрыс, себебі сапар барысында сіз бизнесте қолдау көрсететін адамдармен байланыс орнатуыңыз ықтимал.&nbsp; 
Бұл айда ұзақ уақытқа созылған кикілжіңдерді шешуге болады. Сізге ренжіп жүрген адам кенет мейірімдене түссе, таңғалмаңыз.
Суқұйғыштар
Суқұйғыштарда жыл басынан бері мұндай қарқынды кезең болған жоқ, сондықтан бұл шілде қалай өтетініне байланысты – сіз неғұрлым көп уақыт өткізсеңіз, айдың үшінші онкүндігінде сізді қызықты және жағымды оқиғалар күтеді. 
Көптеген Суқұйғыштар шетелге сапар шегуді күтуде, сондықтан барлық жиналған істерді айдың ортасына дейін аяқтау маңызды. Сонымен қатар, көмектен бас тартпаңыз – жақын адамдар барлық мәселелерді шешуге көмектеседі. 
Бизнес саласына келетін болсақ, Суқұйғыштардың көпшілігі жаңа жұмыс туралы ұсыныстар алады. Шілде айының соңғы аптасы жеке қарым-қатынаста сәттілік әкеледі – сіз және сіздің екінші жартыңыз алға жылжуға кедергі болған ұзақ уақытқа созылған мәселелерді шеше аласыз.
Балықтар
Шілде айында балықтар шабытның шарықтағанын сезінеді. Ойыңызға жаңа идеялар келіп қуанасыз. Бастапқыда шындыққа жанаспайтын болып көрінсе де, өз мақсатыңызды орныдаудан бас тарпаңыз. Оларды іске асыру жолында сіз міндетті түрде сізді қолдайтын адамдары кезіктіресіз. Сол жандар тіпті сіздің сіздің жақын досыңызға айналуы да мүмкін.. 
Шілде айының екінші жартысы іскерлік салада да қолайлы. Әсіресе осы уақытта келіссөздер жүргізген дұрыс, себебі сіз бәріне керемет әсер қалдырасыз. 
Үшінші онкүндікті отбасыңызбен өткізіңіз. Жақын адамдарыңызбен демалу көптеген жағымды эмоциялар береді.

Шілде айына арналған жұлдыз жорамал

​Kyzylorda-news.kz. Қызылорда қалалық мәдени және демалыс паркінде Ұлттық домбыра күніне арналған “Ұлттың үні – Домбыра” атты мерекелік шара өтті.
​Шараға арнайы қатысқан шаһар басшысы Асылбек Шаменов алдымен ұлттық бұйымдар көрмесін, этноауыл үлгісіндегі алаңқайда ауыл өнерпаздарының өнерін тамашалады.
​Мерекелік концерт қалалық Жастар театрының сахналауындағы тақырыптық қойылымымен басталды.
<blockquote>
 ​”Домбыра күнінің ұлттық мерекеге айналуы – көнеден жеткен рухани байлығымызға берілген лайықты баға деп білемін. Сондықтан, ұлттық мәдениетімізді әлемге асқақтататын қасиетті аспаптың ұлықталуы заңдылық”, – деген қала әкімі Асылбек Шаменов мереке аясында қаламызда ұлттық аспабымыздың ұлықталуына үлес қосып, талантты шәкірттер тәрбиелеп жүрген бірқатар ұстаздарға алғыс хаттар тапсырды.
</blockquote>
​Сондай-ақ, Ұлттық домбыра күніне орай ұйымдастырылған “Күй керуен” атты жас домбырашылардың дәстүрлі облыстық байқауына қатысып, жүлдегер атанған жас күйшілерді марапаттады.
<img src="https://kyzylorda-news.kz/wp-content/uploads/2022/07/fb_img_1656734639887.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656734637259.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656734631497.jpg" alt="" />

“Ұлттың үні &#8211; Домбыра” атты мерекелік шара өтті

Kyzylorda-news.kz. Қазақтың айтыс өнеріне қарымды олжа салып, халықтың ықыласына бөленіп жүрген жерлесіміз, үш дүркін «Алтын домбыра» иегері Мұхтар Ниязов Халықаралық ақындар айтысында жүлделі бірінші орынды иеленді.
Айтыс Шығыс Қазақстан облысының Қатонқарағай ауданы әкімшілігінің ұйымдастыруымен, Қатонқарағай ауданы кәсіпкерлері мен Толықпаевтар әулетінің демеушілігімен “Алтайдай жер қайда?” деген атаумен өтті. Ақынның айтулы жеңісі Сыр жұртшылығын бір серпілтіп тастады.
Ғасырдан ғасырға, атадан балаға, заманнан заманға ұласып келе жатқан асыл мұраны насихаттап, суырыпсалма ақындық дәстүрді дәріптеп, өз бойына біткен өнерге жас ақын-жыршыларды баулып жүрген Мұхтар Мәуленұлын жеңісімен құттықтаймыз!

Мұхтар Ниязов Халықаралық ақындар айтысында жеңіске жетті

Kyzylorda-news.kz. Синоптиктер 2 шілдеге арналған Қазақстанның ауа райы болжамын ұсынды. Еліміздің басым бөлігінде ауа райы құбылмалы болады.
Жаңбыр жауады, батыста қатты жаңбыр жауады. Республика бойынша найзағай ойнайды, батыста бұршақ жауып, дауыл тұрады, жел күшейеді, оңтүстік-батыста шаңды дауыл соғады, түнде және таңертең Қазақстанның солтүстігінде тұман түседі.

2 шілдеде ауа райы қандай болады?

<a href="https://kyzylorda-news.kz/">Kyzylorda-news.kz.</a> Шілденің бірінші онкүндігінде Қазақстанның басым бөлігінде ауа райы құбылмалы болады.
Синоптиктердің болжамынша, Қазақстаның батысында айдың басында, ал қалған өңірлерде бірінші онкүндіктің ортасында ауа райы жауын-шашынды, оқта-текте нөсер жауын жауады.
Бұл кезеңде Солтүстік теңіз аудандарынан суық ауа массаларының ығысуына байланысты елдің солтүстік жартысында түнде +5+13°С, күндіз ауа температурасы +18+28°С-тан +12+17°С-қа дейін төмендейді. Республиканың оңтүстік жартысында түнде сынап бағанасы +20+25°С-тан +12+20°С-қа дейін, күндіз +30+38°С-тан +23+30°С-қа дейін түседі.
Бірінші онкүндіктің соңы мен екінші онкүндіктің басында аптап ыстық қайта оралады.
Күндіз ауа температурасы: 
оңтүстік-батыс жартысында – +30+40°С; 
солтүстікте, орталықта және шығыста +25+33°С дейін көтеріледі.
Айдың ортасында ауа температурасы тағы төмендейді. Республиканың басым бөлігінде күн күркіреп, жаңбыр жауады. Оңтүстік және батыс өңірлерде шаңды дауыл тұрып, жел күшейеді.
Айдың екінші жартысында ауа температурасы құбылады: 
елдің оңтүстік жартысында түнде +15+20°С-тан +18+25°С-қа дейін, 
күндіз +25+30°С-тан +35+42°С-қа дейін; 
солтүстік жартысында түнде +10+15°С-тан +15+20°С-қа дейін, 
күндіз +20+28°С-тан +28+35°С-қа дейін.

Шілде айында ауа райы қандай болады? 

<a href="https://kyzylorda-news.kz/">Kyzylorda-news.kz.</a> Қармақшылық жеке кәсіпкер Бахтияр Жұмабеков азық-түлік сатумен айналысады. Кәсіпкер өткен жылдың тамызында «Байқоңыр» әлеуметтік-кәсіпкерлік корпорациясы» АҚ-нан жеңілдікпен қарыз алады. Аталған қаржыға Жосалы кентіндегі «Достық» сауда үйінен әлеуметтік азық-түлік өнімдері бұрышын ашып, 19 түрлі халық тұрақты тұтынатын тауарды осы жылдың сәуір айына дейін арзан бағамен тұтынушыларға ұсынып келді.
Биыл ақпанда Қармақшы аудандық ауылшаруашылығы бөлімінің қызметкері кәсіпкердің дүкеніне оның қатысуынсыз және алдын ала ескертусіз барып, тексеріп, нәтижесімен қарыз беру шартының талаптары орындалмағаны жөнінде «Байқоңыр» әлеуметтік кәсіпкерлік корпорациясына хабарлайды.
<blockquote>
 «Аудандық ауылшаруашылығы бөлімі бұл қадамын кәсіпкер, корпорация және бөлім арасында қол қойған Меморандумға сәйкес жүргізген мониторингпен түсіндірді. Бірақ заңда «мониторинг» деген термин жоқ. Мемлекеттік орган қызметкерінің кәсіпкерлік нысанда болғанын және корпорацияға жағдайды баяндап хабарлама беруін тексеру деп қана қабылдауға болады. Мемлекет басшысының шағын кәсіпкерлік субъектілерін тексеруге мораторий жариялағанын басшылыққа алып, біз ауылшаруашылығы бөлімінің қабылдаған шешімдерімен келіспейтінімізді жеткіздік», – деді деді Кәсіпкерлер палатасы директорының орынбасары, бизнес-омбудсменнің Қызылорда облысындағы өкілі Салават Құлмахан.
</blockquote>
Кәсіпкерлер палатасының заңгерлері ары қарай мән-жайды баяндап аудан әкімдігіне, Сыбайлас жемқорлыққа қарсы іс-қимыл агенттігінің Қызылорда облысы бойынша департаментіне, өзге де жауапты салаларға хат жолдайды.
<blockquote>
 «Бөлімнің тексеруі кәсіпкерге айтарлықтай шығын әкелді. Корпорация кәсіпкерге 20 мың теңге айыппұл салды, сондай-ақ келісімшартты бір жақты бұзып, берген қарызын қайтаруды талап етіп отыр. Корпорация да кәсіпкерлік субъектісі болғандықтан екі кәсіпкердің арасындағы мәселеге араласа алмаймыз. Салаға жауапты мемлекеттік органдардан алдағы уақытта кәсіпкерлерге қатысты қандай да бір шара қабылдамас бұрын салдарына мән беруін сұраймыз», – дейді Салават Құлмахан.
</blockquote>
Жақында Кәсіпкерлер палатасына Қармақшы ауданы әкімінің аппаратынан хат келді. Хатта аудандық ауылшаруашылығы бөлімінің әдіскері Қуаныш Булакбаевқа «ескерту» түрінде тәртіптік шара қолданылғаны жазылған.
Айта кету керек, кәсіпкерлердің қызметіне заңсыз араласқаны үшін облыста осы жылдың 5 айында 7 лауазымды тұлға тәртіптік жауапкершілікке тартылды.

Кәсіпкерді заңсыз тексерген мемлекеттік органның өкілі тәртіптік жауапкершілікке тартылды

<a href="https://kyzylorda-news.kz/">Kyzylorda-news.kz.</a> Көмекке мұқтажға жылылық таныту – ортақ мүдде. Бұл ретте Қазалы қаласындағы белсенді жастардың ұйытқы болуымен әлеуметтік дүкен жұмыс істеп тұр.
Әлеуметтік дүкеннен әлеуметтік жағдайы төмен отбасыларға, көпбалалы аналар мен мүмкіндігі шектеулі жандарға барлық заттар тегін үлестіріледі.
Бүгін аудан әкімі Мұхтар Оразбаев Қазалы қаласына арнайы барып, әлеуметтік дүкеннің жұмысын көрді.
«Өнегелі» қоғамдық бірлестігінің белді мүшесі, үнемі қоғамдық жұмыстардың бел ортасынан табылатын Жәнібек Жұбанғанов әлеуметтік дүкеннің ашылу тарихы мен негізгі мақсаттарын таныстырды.
Жәнібектің сөзінше, дүкен ашылғанда, Қазалы қаласындағы тұрғындар бұл сауапты іске үн қосып, әрқайсысы киімдер мен үйде пайдаланылмай тұрған теледидар, компьютерлерін ұсынған. Жергілікті кәсіпкерлер де игі акциядан қалыс қалмаған. Соның нәтижесінде әлеуметтік дүкенде су жаңа тауарларда бар. Бұның барлығы тұрмысы төмен отбасыларға, мүгедек жандарға, көпбалалы отбасыларға, әке-шешесінен айырылған балаларға таратылыпты. Қазіргі таңда да солай, ұйымдастырушылар шынымен көмекке зәру адамдарға қолдау көрсетеді.
Әлеуметтік дүкендегілер өздерінде киімді есептемегенде, кітаптар, ойыншықтар, кішкентайларға қажетті құралдар барын айтады. Аталған бұйымдарды керек еткендер Қазалы қаласының орталығында орналасқан әлеуметтік дүкеннен алып кетуіне болады.
Аудан әкімі Мұхтар Оразбаев қала жастарының игілікті істеріне ризашылығын білдіріп, алғысын жеткізді.

Қазақстан және Қызылорда облысының жаңалықтары

Мемлекет басшысы: Күй өнері азаттық рухын ұрпақтан ұрпаққа жалғастырады

Қызылордада қоян – қолтық ұрысынан жеңімпаздар анықталды

Жексенбіге арналған ауа райы болжамы

Жоқарғы кеңес Нүкістегі оқиға туралы айтты

Сізге жазда қажет маңызды 4 дәрумен

Шілде айына арналған жұлдыз жорамал

“Ұлттың үні – Домбыра” атты мерекелік шара өтті

Мұхтар Ниязов Халықаралық ақындар айтысында жеңіске жетті

2 шілдеде ауа райы қандай болады?

Шілде айында ауа райы қандай болады?

Кәсіпкерді заңсыз тексерген мемлекеттік органның өкілі тәртіптік жауапкершілікке тартылды

Қазалыда әлеуметтік дүкендегі заттар тегін таратылуда

Қазақстан және Қызылорда облысының жаңалықтары

Мемлекет басшысы: Күй өнері азаттық рухын ұрпақтан ұрпаққа жалғастырады

Қызылордада қоян – қолтық ұрысынан жеңімпаздар анықталды

Жексенбіге арналған ауа райы болжамы

Жоқарғы кеңес Нүкістегі оқиға туралы айтты

Сізге жазда қажет маңызды 4 дәрумен

Шілде айына арналған жұлдыз жорамал

“Ұлттың үні &#8211; Домбыра” атты мерекелік шара өтті

Мұхтар Ниязов Халықаралық ақындар айтысында жеңіске жетті

2 шілдеде ауа райы қандай болады?

Шілде айында ауа райы қандай болады?

Кәсіпкерді заңсыз тексерген мемлекеттік органның өкілі тәртіптік жауапкершілікке тартылды

Қазалыда әлеуметтік дүкендегі заттар тегін таратылуда

“Ұлттың үні – Домбыра” атты мерекелік шара өтті