<a href="https://kyzylorda-news.kz/">Kyzylorda-news.kz.</a> Қармақшы ауданы, Төретам кентіндегі «Сулпак» сауда үйі өртенді.
Оқиға 6 маусым күні сағат 23:51-де болған. Жалпы ауданы 758,8 шаршы метрді құрайтын сауда үйінің 275 шаршы метр болатын шатыры, төбе жабыны және тұрмыстық заттары толығымен жанды. Өрт сағат 00-ден 53 минут кеткенде оқшауланып, 01 сағаттан 15 минут өткенде толық сөндірілді.
<blockquote>
 «Қаза болғандар мен зардап шеккендер жоқ. Өрттің шығу себебін анықтау мақсатында өрт сынақ зертхана жұмыстары тағайындалды. Шығыны анықталуда. Оқиға орнында Өрт сөндіру және авариялық-құтқару жұмыстары қызметінен 10 қызметкер, 2 техника, Ресей Федерациясы №70 мамандандырылған өрт сөндіру бөлімінен 13 қызметкер, 4 техника өрт сөндіру жұмыстарын атқарды», деп мәлімдеді Қызылорда облыстық төтенше жағдайлар департаментінің баспасөз қызметі.
</blockquote>
<img src="https://kyzylorda-news.kz/wp-content/uploads/2022/06/swlpak1.jpg" alt="" />

Қызылордада «Sulpak» сауда үйі өртенді

<a href="https://kyzylorda-news.kz/">Kyzylorda-news.kz.</a> Мемлекет басшысының өкімімен Қайрат Ырзақұлұлы Нұртай Қазақстан Республикасы Президентінің «Байқоңыр» кешеніндегі арнаулы өкілі лауазымына тағайындалды, деп хабарлайды Ақорда.
Нұртай Қайрат Ырзақұлұлы 1982 жылы Қызылорда облысы Қармақшы ауданында дүниеге келген.
2004 жылы Қ.И.Сатпаев атындағы Қазақ ұлттық техникалық университетін инженер-механик, 2006 жылы Д.А.Қонаев атындағы университетін заңтану мамандықтарын тәмәмдап, 2019 жылы Ресей Федерациясы Президентінің жанындағы Ресей халық шаруашылығы және мемлекеттік қызмет академиясын бітіріп Мемлекеттік және муниципалдық басқару магистрі ғылыми дәрежесін алған.
Еңбек жолын 2004 жылы ҚР Мемлекеттік қызмет істері агенттігінің мемлекеттік қызметті кадрлық қамтамасыз ету департаментінің жетекші маманы ретінде бастаған. 2005-2006 жылдары ҚР Энергетика және минералды ресурстар министрлігі мұнай өнеркәсібі департаментінің жетекші маманы болған.
2006-2014 жылдары Қазақстан Республикасы Президенті Кеңсесінің аға, бас сарапшысы, консультанты, сектор меңгерушісі (А корпусы); 2014-2015 жылдары Қазақстан Республикасы Президенті Әкімшілігінің мемлекеттік бақылау және аумақтық-ұйымдастыру жұмысы бөлімінің мемлекеттік инспекторы. 2015-2018 жылдары Шымкент қаласы әкімінің орынбасары қызметтерін абыроймен атқарған.
2018-2019 жылдары Шымкент қаласы әкімінің бірінші орынбасары қызметінде болды.
2021 жылғы шілде айынан бастап Қызылорда облысы Қармақшы ауданының әкімі қызметін атқарды.
Ал 2022 жылы 2 наурызда Қызылорда облысы әкімінің орынбасары болып тағайындалды. Бүгінгі күнге дейін сол қызметті атқарып келді.

ҚР Президентінің «Байқоңыр» кешеніндегі арнаулы өкілі тағайындалды

<a href="https://kyzylorda-news.kz/">Kyzylorda-news.kz.</a> Биылдан бастап жаңа бизнес идеяларды іске асыруға берілетін қайтарымсыз гранттардың мөлшері 200-ден 400 айлық есептік көрсеткішке дейін ұлғайды. Сонымен қатар осы жылдан бастап 29 жасқа дейінгі жастар мен әлеуметтік осал топтарға жататын азаматтар мемлекеттік грантқа қол жеткізеді. Бұл жөнінде Өңірлік коммуникациялар қызметінде өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева хабарлады.
<blockquote>
 «Қазіргі уақытта әлеуметтік желілерде мемлекет тарапынан берілетін қайтарымсыз гранттарға байланысты әртүрлі ақпараттар таралуда. Осыған байланысты нақты түсіндіріп кетейін, биыл грант беру процесі электронды түрде өтеді. Яғни, кәсіп бастау үшін қаржы алғысы келетін үміткерлер туралы ақпарат электронды жүйе арқылы расталады. Биыл мемлекеттік қайтарымсыз грант көлемі – 1 млн.225 200 теңгені құрады. Айта кететін жайт, бұрын мемлекеттік грантқа барлық азаматтардың қатысуға мүмкіндігі болатын. Ал биылдан бастап әлеуметтік осал топтарға жататын азаматтарға, атаулы көмек алатын отбасы мүшелеріне, көп балалы отбасыларға беріледі. Сондай-ақ, қайтарымсыз грантқа үміткерлер «Бастау бизнес» жобасының сертификатын соңғы 3 жыл ішінде алған және кемінде 1 жыл тұрғылықты жері бойынша тұрақты немесе уақытша тіркеу туралы мәліметтерді ұсынуы керек. Азаматтарға мемлекеттік грант тек бір рет қана беріледі», – деді Жанар Жұмабекқызы.
</blockquote>
Өңірде жалпы саны 297 қылмыстық іс тіркелген болса, оның 158-і интернет алаяқтыққа жатады. Облыстық полиция департаментінің мәліметінше, алаяқтық деректер былтырғы жылмен салыстырғанда 27 пайызға төмендеген.
<blockquote>
 «Әлеуметтік желіні пайдаланушылар арасында алаяқтардың жалған сөзіне сеніп, қомақты қаржысынан айырылып қалуда. Сол үшін жеке басыңызға тиесілі құжаттарға абай болуларыңызды сұраймын», – деді облыстық полиция департаментінің Тергеу басқармасының бастығы Нұрсұлтан Әлтай.
</blockquote>

Мемлекеттік қайтарымсыз грант беру тәртібі өзгерді

<a href="https://kyzylorda-news.kz/">Kyzylorda-news.kz.</a> 5 маусымда өткен жалпыхалықтық Референдумда қазақстандықтар өз бірлігін көрсетті. Орталық референдум комиссиясының алдын ала қорытындысы бойынша дауыс беруге қатысқан барлық азаматтардың 77,18 пайызы Конституцияға енгізілетін өзгерістерді қолдап дауыс берді. Сыр өңірі халқы ел үшін маңызды саяси науқанда аса жоғары белсенділік танытты, аймақта дауыс беретін халықтың 79,89 пайызы өз таңдауын жасады, бұл көрсеткіш өңірлер арасында жоғарғы деңгейлер қатарынан табылды.
6 маусым күні Референдумды қоғамдық қолдау республикалық штабы ұйымдастырған брифингте Қазақстан Республикасы Кәсіподақтар Федерациясы мен оған мүшелік ұйымдардың ақпараттық-түсіндіру жұмыстарының нәтижелері туралы мәлімет айтылды.
Ел Президентінің референдум өткізу туралы шешіміне алғашқылар қатарында қолдау білдіріп, Қазақстан Республикасы Кәсіподақтар Федерациясы Қазақстан Республикасының Конституциясына өзгерістер мен толықтырулар енгізу бойынша референдумды қолдау туралы Үндеуін жариялаған болатын. Қазірде Кәсіподақтар Федерациясы Қазақстан еңбеккерлерінің ең ірі бірлестігі. Еңбек адамының құқықтары мен заңды мүдделерін қорғай отырып, қоғамдағы әлеуметтік әділеттілікті дамытуға өз үлесін қосып келе жатқан Кәсіподақтар Федерациясының Үндеуі заңнамалық өзгерістерге жалпыхалықтық дауыс беру – әрбір қазақстандықтың саяси бағытты қалыптастыруға қатысу құқығын және өз елінің болашақ тағдыры үшін жауапты шешім қабылдау құқығын айқындайтын тарихи әділеттілік актісі екендігіне назар аудартты. Кәсіподақтар барша қазақстандықтарды бүкіл әлем үшін қиын-қыстау кезеңде бірігіп, Жаңа Қазақстанды құру жолындағы маңызды қадамды қолдауға, азаматтық ұстанымын танытып, алдағы референдумға белсене қатысуға шақырды.
Үндеуді толық қолдай отырып, өңірде біздер де Қызылордалық кәсіподақтар да ақпараттық жұмыстарды белсенді жүргіздік. Республикалық штаб жұмысы аясында кәсіподақ ұйымдары 1339 іс-шара өткізіп, оның барысында 631 мың адам түсіндіру жұмыстарымен қамтылды, оның ішінде Сыр елінің жұмыскерлері де бар. Еңбек ұжымдарымен кездесулерде азаматтар Ата заңға ұсынылған өзгерістер топтамасын оң ынтамен қабылдады.
5 маусым күнгі Референдумда Жаңа Қазақстанды құрудағы маңызды қадамның, тарихи сәттің куәсі барша халық болды, ел бірлігін танытты. Негізгі Заңға ұсынылып отырған өзгерістер мен толықтырулар әрбір азаматтың басты құқықтары мен кепілдіктерін, қоғамдағы тұрақтылық пен бірлікті қорғауға бағытталған, осы конституциялық реформаны қолдаған әрбір қазақстандық елде түбегейлі өзгерістер енгізілетініне зор сенім білдірді. Сыр халқының республикалық референдумдағы белсенділігі қуантты, бұл біздің азаматтардың азаматтық ұстанымдарының белсенділігін және сайлау құқықтарын қолдану ұстанымдарының беріктігін көрсетеді.
Мақсұт НӘЛІБАЕВ, 
«Қызылорда облысы кәсіподақтар орталығы» 
аумақтық кәсіподақтар бірлестігінің төрағасы, 
облыстық мәслихаттағы «AMANAT» партиясы депутаттық фракциясының мүшесі

Мақсұт Нәлібаев: Ел бірлігін көрсетті

<a href="https://kyzylorda-news.kz/">Kyzylorda-news.kz.</a> Премьер-министрдің орынбасары Ералы Тоғжановтың төрағалығымен Қазақстан Республикасының аумағында коронавирус инфекциясының таралуының алдын алу жөніндегі ведомствоаралық комиссияның отырысы өтті. Комиссия жұмысына мемлекеттік органдардың, «Атамекен» ҰКП өкілдері мен өңірлердің басшылары қатысты, деп хабарлайды primeminister.kz.
Елдегі және әлемдегі эпидемиологиялық ахуалдың тұрақтануын ескере отырып, ведомствоаралық комиссия мынадай шешімдер қабылдады:
Бірінші: биылғы 8 маусымнан бастап ҚР азаматтары мен шетелдіктерге Қазақстан Республикасының Мемлекеттік шекарасын кесіп өту кезінде ревакцинация немесе COVID-19-ға қарсы вакциналаудың толық курсын (COVID 19-ға қарсы вакциналау туралы паспортты/сертификатты/анықтаманы) құжаттық растау бойынша, ал олар болмаған кезде ПТР-тестілеудің теріс нәтижесі көрсетілген анықтаманы ұсыну талабы алынып тасталады;
Екінші: республиканың 7 өңіріндегі Қазақстан Республикасы Мемлекеттік шекарасының жекелеген учаскелерінде уақытша жабылған 12 автомобиль өткізу бекетіне жұмыс істеуге салынған тыйым алынып тасталады.

Вакциналау мен ПТР растау талаптары алынып тасталады

<a href="https://kyzylorda-news.kz/">Kyzylorda-news.kz.</a> Ливанның Джуния қаласында 1-5 маусым аралығында самбодан жастар мен жасөспірімдер арасындағы Азия чемпионаты өтті. Қазақстан құрамасы сапында өнер көрсетіп, 80 келі салмақ дәрежесі бойынша қарсыластарына дес бермеген Шынар Абатова Азия чемпионы атанды.
Шынар Абатова – Қорқыт ата атындағы Қызылорда университетінің 2-курс студенті. Самбо, дзюдо және қазақша күрестен ҚР спорт шебері. Бұған дейін ол самбодан Азия чемпионатының күміс жүлдегері, ҚР-ның үш дүркін жеңімпазы атанған. Спортшының алдағы жоспары – Әлем чемпионатына қатысып, ел мерейін асқақтату.
Айта кету керек, Азия чемпионы Шынар Абатованы жанкүйерлері салтанатты түрде қарсы алды. Ел намысын қорғап, алтыннан алқа таққан жерлесімізге жиналған қауым ізгі-тілектерін білдірді.
<img src="https://kyzylorda-news.kz/wp-content/uploads/2022/06/imgl2875-scaled.jpg" alt="" />

Қорқыт ата атындағы Қызылорда университетінің студенті Азия чемпионы атанды

<a href="https://kyzylorda-news.kz/">Kyzylorda-news.kz.</a> Елімізде Жалпыхалықтық референдум өтті. Республика бойынша Қызылорда облысы тұрғындарының дауыс беру белсенділігі 79,89 пайызды құрап, екінші орынға тұрақталды. Жалпы аймақта дауыс беру барысында заңбұзушылық деректер тіркелмеген. Бүгін Өңірлік коммуникациялар қызметінде өткен брифингте референдумға байланысты құрылған облыстық штабтың төрағасы Жандос Базартай саяси науқанның өту барысын баяндады.
<blockquote>
 «Республика бойынша референдумның қорытындысы жүргізіліп жатыр. Алдын ала нәтиже бойынша, облыс халқының дауыс беру қарқындылығы Түркістан облысынан кейінгі екінші орында. Аудан және елді мекендердің тұрғындары саяси науқанға белсенді түрде қатысты. Бұл халқымыздың алдағы өзгерістерге сеніммен қарайтынына дәлел. Айта кетейін, Мемлекет басшысының Жарлығынан кейін облыстық қоғамдық штабтың белсенді мүшелері елді мекендерде халықпен кездесулер және түсіндірме жұмыстарын жүргізген болатын. Соның арқасында облыс тұрғындарының жаңа өзгеріске деген оң көзқарасы қалыптасты», – деді Жандос Базартай.
</blockquote>
Айта кету керек, аймақ бойынша 345 ашық дауыс беру учаскесі таңғы сағат 07:00-ден кешкі сағат 20:00-ге дейін үздіксіз жұмыс істеді. Онда 3800-ге жуық қоғамдық ұйым өкілдерінің байқаушылары референдумға байланысты бақылау жүргізді.
<blockquote>
 «Біздің байқаушылар екі ауысымда жұмыс істеді. Әрбір 2 сағат сайын сайлау учаскелерінде талдау жұмыстарын жүргіздік. Жалпы өңір тұрғындарының референдумға қатысу белсенділігі өте жоғары деңгейде болды. Оны республика бойынша берілген мәліметтерден анғаруымызға болады. Сондай-ақ, облыста дауыс беру кезінде ешқандай заңбұзушылық деректері тіркелген жоқ», – деді «Партиялық емес байқау орталығы» республикалық қоғамдық бірлестіктің облыстық филиал төрағасы Жандос Тұсмағамбетов.
</blockquote>

Қызылорда: Саяси науқанға дауыс беру барысында заңбұзушылық әрекет тіркелмеді

<a href="https://kyzylorda-news.kz/">Kyzylorda-news.kz.</a> Шиелі ауданы Бәйгеқұм елді мекеніндегі&nbsp; Ханқожа көліне суға батқан 8 жасар бала дер кезінде құтқарылған.
Бәйгеқұм ауылының тұрғыны 1987 жылы туған Ғабит Ахметов баланы көлден сыртқа шығарып, алғашқы медициналық көмек көрсеткен. Оған қоса оны «Шиелі» трассалық медициналық құтқару пунктіне апарған. Трассалық медициналық құтқару пунктінің қызметкерлері аудандық ауруханаға &nbsp; тасымалдаған.
<blockquote>
 «Қазіргі таңда құтқарылған баланың жағдайы жақсы. Ғабиттің бұл әрекеті оны «Бүгінгі күннің батыры» деген атқа лайықты екендігін көрсеткендей. Сондықтан да Ғабитке алдағы уақытта да зор денсаулық пен бақ-береке тілейміз. Өңір тұрғындарына балаларды су айдындары маңына балаларды ересектердің қарауынсыз қалдырмауды ескертеміз», – дейді ТЖД-ның баспасөз хатшысы Айгүл Нұрманова.
</blockquote>

Шиеліде 8 жасар бала құтқарылды

<a href="https://kyzylorda-news.kz/">Kyzylorda-news.kz.</a> Көптен күткен республикалық референдум да өз мәресіне жетті. Жерлестеріміз референдумға белсенді қатысып, шынайы дауыстарын берді. Алайда Референдум жалпы халықтық сипат алғанда ғана өз нәтижелілігін көрсетеді. Алдын ала жариялған қорытынды мәліметке жүгінсек ел азаматтарының жалпы жаңашылдықты қолдайтындықтарын көріп отырмыз.
Бұл референдум халқымыз үшін қолайлы, тең мүмкіндікті пен қауіпсіз әрі жайлы қоғам қалыптастыру үшін жұмыс істейтін, өзгерістер әкелетін реформалардың жүзеге асуына жасалған мүмкіндік деп есептеймін.
Шынына келгенде еліміздегі Конституциялық реформалар саяси жүйені түбегейлі өзгерту үшін емес, саяси институттарды жаңғырту үшін де жүргізіліп отыр. Жүргізіліп жатқан реформалардың өзіндік ерекшелігін конституциялық – құқықтық өлшемде бағамдасақ, әлеуметтік мемлекеттің қағидаларымен ұштасып жатқаны байқалады.
Сонымен қатар, бұл реформа мемлекетіміздің егемендігі мен тәуелсіздігін қорғау және нығайту мақсатында да қажет.Халықымыздың Президенттің конституциялық және құқықтық бастамаларына қолдау білдіруі мемлекет дамуының стратегиялық мақсаттарын жүзеге асырудың шарты ретінде танылады.
Референдум Жаңа Қазақстанды қалыптастырудағы жаңа Конституциялық тәртіптің іргетасы болмақ. Мемлекет басшысы атап өткедей, Жаңа Қазақстанды құру елді дамыту парадигмаларын өзгертуге бағытталған. Біз ендігі жерде өзгерістерді өзімізден бастап, жаман әдеттерден бойымызы бен ойымызды алшақтатып, елдің түп тамырына балта шабатын сыбайлас жемқорлыққа табанды түрде қарсы тұрып, нақты өзгерістірге деген сенімді орнықтыруымыз керек деп есептеймін. 
Жаңа әділетті Қазақстанның болашағынан күтеріміз көп. Сондықтан оның шынайы жүзеге асуына осы елдің азаматы ретінде өз үлесімді қосатын боламыз.
Қажденбек БАЙМАХАНОВ, 
«Жаңару»Сыбайлас жемқорлыққа қарсы РҚБ-нің Қызылорда облысы бойынша филиалының басшысы

Қажденбек Баймаханов: Әділетті Қазақстанның алғашқы қадамын аттадық

<a href="https://kyzylorda-news.kz/">Kyzylorda-news.kz.</a> Ел үшін маңызды күн референдумда Сыр халқы ауызбіршілік көрсетті. Мемлекеттік маңызы бар саяси науқанға қатысып, өз таңдауларын жасады.
Аймақ басшысы Нұрлыбек Нәлібаев аймақ тұрғындарының референдумға ерекше ықылас білдіріп, өзгерістер жолына қадам жасауда белсенділік танытқанын атап өтті.
<blockquote>
 «Наурыз айында Мемлекет басшысы Қасым-Жомарт Кемелұлы Тоқаев Қазақстан халқына Жолдауында оң өзгерістер жасауға 10 бағыт айқындап берген болатын. Сыр жұртшылығы бұл өзгерістерді әділдіктің нышаны ретінде қабылдап, бірауыздан қолдады. Мұның бәрі мызғымас бірлігіміздің, тату-тәтті тірлігіміздің, қазақы болмысымыз бен жарқын болашаққа деген халықтың зор сенімінің арқасы деп білемін. Бұл ретте дайындық жұмыстарын жоғары деңгейде ұйымдастырған мемлекеттік орган, сайлау комиссиясы, қоғамдық ұйым қызметкерлеріне, ардагерлер мен зиялы қауым өкілдеріне, құқық қорғау органдарына, сондай-ақ, алдын-ала түсіндірме жұмыстарына белсенді атсалысқан тұлғалар мен ақпараттық сүйемелдеуді қамтамасыз еткен БАҚ өкілдеріне ризашылығымды білдіремін», – деді облыс әкімі.
</blockquote>
Жиында облыстық мәслихат хатшысы Наурызбай Байқадамов пен аймақтық ардагерлер кеңесінің төрағасы Серік Дүйсенбаев әріптестеріне референдумға белсенді атсалысқаны үшін алғыс білдіріп, алдағы жұмыстарына сәттілік тіледі.
Айта кетейік, аумақтық референдум комиссияларынан келіп түскен мәліметке сәйкес, өңірде дауыс беруге 369909 адам қатысты. Бұл тізімге енгізілген дауыс берушілердін жалпы санының 79,89% құрады.

Сыр халқы  референдумда ауызбіршілік көрсетті

<a href="https://kyzylorda-news.kz/">Kyzylorda-news.kz.</a> 7 маусымда Қазақстанның басым аумағында құбылмалы ауа райы күтіледі: найзағай ойнап, жаңбыр жауады.
Батыста, солтүстікте, оңтүстіктің таулы аудандарында бұршақ, дауыл болжанады. Еліміздің оңтүстігінде, орталығында, шығысында ауа райы – жауын-шашынсыз. Республика бойынша жел күшейіп, солтүстікте – тұман, оңтүстік-батыста, солтүстікте – шаңды дауыл болады.
Күндіз Қызылорда облысының орталығында желдің жылдамдығы 15-20 м/с артады.
Қызылорда облысының батысында, шығысында, орталығында төтенше өрт қаупі күтіледі.

Сейсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың референдум қорытындысы бойынша Қазақстан халқына жасаған үндеуі жарияланды.
Құрметті отандастар!
Кеше елімізде айрықша мәні бар тарихи оқиға болды. Мемлекетіміз дамудың жаңа кезеңіне қадам басты. Ата заңымызға ұсынылған өзгерістерді азаматтардың басым көпшілігі қолдады. Референдум жоғары деңгейде өтті. Мұны халықаралық және отандық байқаушылар да айтып жатыр. Конституциялық реформалар қоғамда қызу талқыланды. Дауыс беру барысы демократия талаптарына сай өтті. Ешқандай мәжбүрлік болған жоқ. Референдум нәтижесі саяси жаңғырудың анық символына айналды. Азаматтарымыз зор жауапкершілік танытты және отансүйгіштік қасиетін паш етті. Біз Жаңа, Әділетті Қазақстанды құру жолындағы бірлігіміз бекем екенін көрсеттік. Конституциялық түзетулер мемлекеттігіміздің тұғырнамасын түбегейлі өзгертеді. Бүкіл қоғамның дамуына тың серпін береді. Референдумға белсене қатысып, қолдау білдірген барша халқымызға зор ризашылығымды білдіремін. Сондай-ақ, конституциялық өзгерістердің мән-маңызын түсіндіруге атсалысқан азаматтарға, түрлі қоғамдық ұйымдарға алғыс айтамын.
<hr />
Референдум еліміздің тарихындағы маңызды белес болды. Ұлтымыздың шынайы өзгерістерге деген дайындығы мен ұйымшылдығын көрсетті. Дауыс беруге азаматтарымыздың белсенді қатысуы қоғамымыздың кемелдігі мен жауапкершілігін білдіреді. Сайлау учаскесіне келіп, елімізді жаңғырту бастамасын қолдағандардың бәріне алғыс айтамын.
Сіздер нағыз патриотизмнің үлгісін көрсетіп, Қазақстанның дәйекті дамуына зор үлес қостыңыздар. Еліміз үшін осы бетбұрысты сәтте заңды құқықтарын пайдаланып, өздерінің ұстанымдарын айтқан бүкіл азаматқа ризашылығымды білдіремін.
Ата заңға өзгерістер енгізу реформаларымыздың соңғы сатысын емес, енді басталғанын білдіреді. Біз елімізді жан-жақты жаңғыртуды жалғастырамыз. Жаңартылған Конституция негізінде биліктің барлық институты қызметінің мейлінше тиімді моделін қалыптастырамыз. Олардың арасындағы үйлесім мен тепе-теңдік механизмін нығайтамыз. Дәйекті саяси жаңғыру ұлттық экономиканы дамытуға, ұлттық кәсіпкерлікті нығайтуға ықпал етеді.
Енді біздің алдымызда ашық әрі әділетті экономика құрып, заңнамаға реформа жүргізу міндеті тұр. Қолдан жасалған монополияларды түбегейлі жойып, сыбайлас жемқорлыққа тосқауыл қою маңызды. Біз кәсіпкерлердің бастамаларына қолдау көрсетіп, жекеменшікті сақтап, бәсекелестікті күшейтуіміз керек.
Алдымызда экономиканы шынайы әртараптандыру бойынша ауқымды жұмыстар тұр. Жоғары өнімді ауыл шаруашылығы мен қуатты көлік-логистика жүйесін дамыту, барлық салада цифрлық экожүйе қалыптастыру үшін шаралар қабылдау қажет. Еліміздің орнықты дамуының негізгі қозғаушы күші еңбек, білім және азаматтық белсенділік болуға тиіс. Тек сонда ғана өзін-өзі қамтамасыз ететін орта тап пен тиімді экономика қалыптастыра аламыз. Бұндай экономика кірісті әділетті бөлуге, сапалы жұмыс орнын ашуға, тұрмыс сапасын тұрақты арттыруға және барлық азаматтардың толыққанды жетілуіне мүмкіндік береді.
Мемлекеттік аппаратты жаңғыртып, бюрократиядан барынша арылту үшін жүйелі жұмыс жалғасады. Біз қоғамның барлық өкілдерінің талап-тілектеріне жауап беретін озық мемлекет құруымыз керек. Басқару жүйесінің тиімділігі жұмыстың барысымен емес, түпкі нәтижемен өлшенетін болады. Мемлекеттік аппарат бизнеспен, үкіметтік емес ұйымдармен және азаматтармен тығыз жұмыс істеуге баса назар аударуға тиіс. Сол арқылы ел мүддесіне сай тиімді шешімдер қабылданып, халыққа көрсетілетін қызмет сапасы жақсара түседі. Мемлекеттік қызметкерлер барынша ашық жұмыс жүргізіп, халыққа шынайы есеп беруі керек.
Мемлекеттік қызмет дегеніміз – жеке бастың бақ-дәулетін арттыратын жер емес. Бұл – туған халқыңның алдында айрықша жауапкершілік арқалау деген сөз.
Конституциялық реформа бүкіл құқық саласын жаңғыртуға жол ашады. Парламент пен Үкімет Конституцияға енгізілген өзгерістерге сай Заңнамаға тиісті өзгертулер енгізуі қажет. Қазақстанда тиімді құқық қорғау және сот жүйесін құруға мүмкіндік беретін реформалар әзірленуге тиіс. Мұны әлемдік тәжірибені ескере отырып жүзеге асырған жөн.
Біз қоғамның және бизнес өкілдерінің өз құқықтары мен заңды мүдделерін қорғауға сұранысы арта түскенін көріп отырмыз. Елімізге азаматтар мен кәсіпкерлерді барынша қорғайтын құқық жүйесі қажет. Заңнамада мемлекетіміздің тұрақты дамуын тежейтін ешбір кедергі қалмауға тиіс. Заман талабына сай келмейтін және күмән туғызатын нормалардың бәрі күшін жоюға тиіс.
Еліміздің экономикалық ресурстарын шағын ғана топтың қолына шоғырландырып, оларға артықшылық берген заңнаманы қайта қарау қажет.
Елден жылыстатылған қаржыны және заңсыз жекешелендірілген активтерді мемлекеттің иелігіне қайтару жөнінде Мекемеаралық комиссия құрылды. Бұл үшін мен арнайы Жарлыққа қол қойдым.
Біз адам құқығы мен бостандығын қорғау жүйесін кешенді түрде күшейтуге негізделген бағдарымызды жалғастыра береміз. Құқықтық реформа аясында Конституциялық сот қайта құрылады. Оның қаулыларына жедел әрекет ету тетігін енгізу қажет. Сонда азаматтарымыз осы аса маңызды институт қызметінің пайдасын сезіне алады. Жаңа, Әділетті Қазақстанда полицейлердің озбырлығына, біліксіз прокурорлар мен біржақты судьяларға жол берілмейді. Қоғам құқық қорғау және сот жүйесінің шын мәнінде өзгергенін қалайды.
Мен елімізді дамытудың осы және басқа да мәселелері бойынша нақты шешімдерді қыркүйек айында өтетін Парламенттің кезекті сессиясының ашылуында айтамын.
Қастерлі Тәуелсіздігімізді, ел бірлігін және қоғамдық келісімді нығайту – біздің негізгі міндетіміз. Бұл реформалар құр атақ-абырой үшін қолға алынған жоқ. Мұның бәрін Жаңа, Әділетті Қазақстан құру үшін жасап жатырмыз. Халқымызда «Кеңесіп пішкен тон келте болмайды» деген сөз бар. Бабаларымыз маңызды мәселені алқалы жиында шешкен. Мен осы дәстүрді жаңғыртып, Ұлттық құрылтай құру туралы бастама көтердім. Оған қоғамның түрлі топ өкілдері, беделді әрі белсенді азаматтар шақырылады. Құрылтайдың алғашқы отырысы ұлт ұясы – Ұлытауда өткізіледі. Осылайша, азаматтардың мемлекет ісіне атсалысу мүмкіндігі арта түседі. Шын мәнінде, еліміздің тағдыры – әрқайсымыздың қолымызда.
Біз қоғамдық және жеке құндылықтар жүйесін түбірімен жаңғырта білуіміз керек. Сонда ғана барлық салада түбегейлі өзгеріс жасай аламыз. Жаңа Қазақстанның ең басты байлығы – халық. Ал, ең негізгі мақсаты – азаматтардың бақытты өмір сүруін қамтамасыз ету. Әрбір азаматымыз саяси өзгерістер мен экономикалық өсімнің жемісін көруі қажет. Құрғақ уәде мен бос сөз ешқайда апармайды. Мен үшін нақты іс пен шынайы өзгеріс бәрінен маңызды. Бұл мақсатқа қол жеткізу үшін бар күш-жігерімді саламын.
Референдум қорытындысы біздің мемлекеттігіміздің тарихында мүлде жаңа дәуір басталғанын көрсетеді. Халқымыз өз таңдауын білдіру арқылы түбегейлі бетбұрыс жасауға ұмтылысын көрсетті. Жасампаз ел болуға деген ықылас-ынтасын байқатты.
Елімізді дамыту үшін әлі де көп жұмыс атқаруымыз керек. Бүкіл ел болып жұмылсақ, көздеген мақсатымызға міндетті түрде жетеміз. Мен бұған кәміл сенемін. Бүгін тәуелсіз Қазақстанның даму тарихында жаңа дәуірге жол ашылды. Осы жолда бірлігіміз әрдайым бекем болсын!
Жаңа Қазақстанды бәріміз бірге өркендетейік, ағайын!

Қазақстан және Қызылорда облысының жаңалықтары