<a href="https://kyzylorda-news.kz/">Kyzylorda-news.kz.</a> Президент Қасым-Жомарт Тоқаев Конституцияға түзетулер енгізу бойынша 5 маусымда республикалық референдум өткізуді ұсынды. Референдум – қоғам арасында қызу талқыланып, қолдау тауып отыр. Конституцияны бүкілхалықтық дауыс беру арқылы өзгерту – халықтың еркін білдіруінің айқын көрінісі.
Осы орайда республикалық референдумды қолдауға бағытталған аудандық штабтың үгіт-насихат жұмыстары бастау алған болатын.
ҚР Парламенті Мәжілісі төрағасының орынбасары Балайым Кесебаева, Қызылорда облыстық маслихатының хатшысы Наурызбай Байқадамов «Шалхия ЦИНК» еңбек ұжымымен кездесу өткізді.
Кездесуде Президентіміз ұсынған оң өзгерістер мен реформалардың іске асуына, Жаңа Қазақстанның қалыптасуына үлес қосу – әрқайсымыздың негізгі азаматтық борышымыз деп атап өтті. Осы тұрғыда біздер Қазақстанның демократиялы, әділетті және өркениетті мемлекет болып құрылуына үлес қосатындықтарын жеткізді. Өз кезегінде ауданның зиялы қауым өкілдері бұл жобаны қолдап, игі істерге бата берді.
Сондай-ақ, алдағы референдум – жекелеген топтарды күшейтуді емес, мемлекетімізді жетілдіру, жаңғырту және нығайтуды көздейтіндігін жеткізіп, 5 маусымда дауыс беруге шақырды.

Референдум – мемлекетті жетілдіруді, жаңғырту және нығайтуды көздейді

<a href="https://kyzylorda-news.kz/">Kyzylorda-news.kz.</a> Даму дегеніміз ең алдымен, адам ағзасындағы физиологиялық және психологиялық сапалық өзгерістер. Бұл өзгерістер белгілі бір әлеуметтік орта жағдайында өтеді. Әлеуметтік көзқарас тұрғысынан қарағанда тәрбие қоғам бақылайтын және түзету енгізетін, жастарды мемлекеттік және қоғамдық құрылымдар арқылы басқарып, бағыттайтын үрдіс. Қоғамның жаһанданған қазіргі және болашық өміріне қатысуға мақсаттылықпен даярлау ісі тәрбие арқылы жүзеге асырылады.
Мектеп оқушыларының жеке тұлға ретінде дамуына халықтық педагогаканың мұралары, ұлттық тәлім-тәрбие зор үлес қосады. Тәрбие үрдісінде халық педагогикасының тәлімдерін енгізу арқылы қаны да, жаны да таза, елін, жерін, тілін қастерлей алатын азамат дайындауға жол ашылады. Бүгінгі мектептің оқу-тәрбие үрдісіне халықтық педагогиканың тәлімдерін және әлемдік мәдениет құндылықтарын енгізу мәселелері көптеген ғалымдардың еңбектерінен орын алады.
Жеке тұлғаның дамуы оның әрекетінен және басқа адамдармен ой алмасу, соңдай-ақ сана-сезімінің пісіп жетілу үрдістерінде өтеді. Жеке тұлғаны әлеуметтендіру мектепте атқаратын іс-шараларда негізгі орын алады. Яғни, оқушының өмірге деген көзқарасын, адамзат мәдениетін меңгерту, қоғамдағы орнын еркін табуы, ұлтаралық мәдени қатынастарды меңгерту мектептің оқу-тәрбие жұмысынын негізі. Сондықтан біздің алдымыздағы негізгі міндет-білімді, тәрбиелі мәдениетті жеке тұлғаны қалыптастыру. Жаһандану жағдайында мәдени этникалық білім мен тәрбие берудің негізгі міндеттері ретінде мыналарды ұсынады және үнемі басшылыққа алынады: жан-жақты мәдениетті тұлғаны тәрбиелеу. Тұлғаның өзінің төл мәдениеттен сусындауы және өзге мәдениеттерді ұғынуы үшін жағдай жасау. Мәдениеттер алмастығына, бірін-бірі байытуына бағдар ұстау, көп тілді тұлғаны қалыптастыру. Өзінің ана тілінде және мемлекеттік тілінде еркін ұғынысуға қабілетті азаматтарды даярлау.
Бүгінгі мектеп қабырғасында отырған жас буынды ұлттық менталитет дәстүрлерге негіздей отырып тәрбиелеу қажеттілігі, осыған дейінгі өмір тәжірибелерімізден айқын аңғарылады. Жалпы адам бойындағы мәдениеттілік адам мен адамның, қоғам мен адамның, адамның іс-әрекеттері негізінде көрініс табады. Адамның мәдениеттілігін айқындайтын негізгі күш – орта. Осы тұжырымдардың қай-қайсысы да мәдениеттің ұлттық формада өмір сүретінін аңғартады. Сондықтан да, мәдениет арқылы этностық, тарихи, мемлекеттік, экономикалық, әлеуметік, этнографиялық болмыс бейнесі көрініс табады деуге әбден болады. Көптеген авторлар жеке адамның дамып қалыптасуына әсер ететін факторлар тұқым қуалаушылық, әлеуметтік орта т.б. дей келе, тәлім-тәрбие жұмыстарына жан-жақты тоқталады.
Тәрбие қоғамдық өмір талаптарына сай өзгеріп, жетіліп отыратыны белгілі жағдай. Мәселен, ұзақ мерзімді іске асырылатын және күн сұрасына қарай жедел шешімін күтетін мақсаттар болады. Тәрбие мақсаты әрдайым қоғамдағы мәдениет пен өркениеттің айнасы тәрізді (Мәселен, руханилық, адамгершілік, бостандық т.б.). Біздің қоғамыздағы жедел шешуді қажет ететін тәрбие мақсатына: өзіндік ой-әрекетін дамыту (инициатива), қоғамдағы жетістіктерге ілесу, нарықтық-экономикалық қатынастарды түсіну т.б. Тәрбие теориясында қамтылған мәселе адамды тұлға ретінде қалыптастырып, дамыту. Психология тұлғаның мінез-құлқын, түрткілерін, тұлғаның сипаты мен іс-әрекеттерінің негізін анықтайды. Жалпы адамзаттық адамгершілік құндылықтар тәрбие мақсатының өзегі. Олар-руханилық, бостандық жауапкершілік, ізгілік т.б. адамның өмір сүру мәнділігін айқындайтын мақсаттар мен мүдделер жиынтығы.
Мектеп оқушыларының адамгершілік қасиеттерді бойына сіңіруі, оның өзін-өзі танып, өз айналасындағылармен, қоғамдық ортамен, отбасы мүшелерімен дұрыс қарым-қатынасқа түсуі-әлеуметтік және рухани дамуының алғы шарттары болып есептеледі. Сондықтан балаға жастайынан өзінің төл мәдениетімен қатар басқа да әлемдік мәдениетті меңгертуге жағдай жасау қажет. Дүнетанымдық көзқарасын қалыптастыруда этно-мәдени білім негіздерін меңгертудің маңызы ерекше. Кез келген халықтың өмірінде жалпыадамзаттық құндылықтардың орнығуы тарихи дамудың заңды құбылысы. Сондықтан жас ұрпақ бойына жалпы адамзаттық құндылықтарды сіңіру-тәрбиенің өзекті мәселелерінің бірі.
Жас ұрпаққа жан-жақты тәрбие беруде, білім негіздерін меңгерту арқылы оның тәндік, жандық, рухани, қоғамдық, әлеуметтік үйлесімділігі сақталады. Өмір сүру құндылықтары мен мәнін түсініп, табиғатпен сабақтаса отырып, адамдық игі қасиеттер негізінде дамуға мүмкіндіктер алады. Адам өзін-өзі рухани дамыту үшін үнемі тәрбиелеп, өздігінен білім алып, өз бетінше оқып үйренуге ұмтылуы шарт. Осы қасиеттер оқушы бойынан көрініс табу үшін, жас ұрпақ тәрбиесінде халқымыздың рухани байлығы, әдет-ғұрып, салт-дәстүр, ұлттық сана, дін және рухани құндылықтарды жоғалтпай пайдаланып отыру өз нәтижесін береді.
Сондықтан мектепте ұйымдастырылатын тәлім-тәрбиелік іс-шаралар мен тәрбиелік жұмыстар, оқушыларды жан-жақты дамытып, үнемі жетілдіріп отыру басты мақсатымыз деп есептеймін.
Эльмира Көрпелесова, 
Шиелі ауданы, №150 орта мектебінің 
бастауыш сынып мұғалімі

Тәлімді тәрбие тамыры тереңде

<a href="https://kyzylorda-news.kz/">Kyzylorda-news.kz.</a> Бүгін Қорқыт Ата атындағы Қызылорда университеті ұжымының алаңында жалпыұлттық референдум өткізу бастамасын қолдау жөнінде кездесу болып өтті.
Отырысқа қатысқан білім саласының өкілдері референдум өткізу мәселесі бойынша өз көзқарастарын білдіріп, билік тармақтары арасындағы қатынастарда конституциялық реформаның рөлін, халықтың елді басқаруға қатысуын кеңейтуді және азаматтардың конституциялық құқықтарын қорғауды күшейтуді талқылады.
Кездесуге «AMANAT» партиясы облыстық филиалы Атқарушы хатшысының орынбасары, облыстық штаб төрағасының орынбасары Алтынбек Жарылқасынов, штаб мүшелері философия ғылымдарының докторы, профессор Баймырза Қожамберлиев пен тарих ғылымдарының кандидаты Нұрлыбек Мыңжас қатысты.
Жиында сөз алған «AMANAT» партиясы облыстық филиалы Атқарушы хатшысының орынбасары, облыстық штаб төрағасының орынбасары Алтынбек Жарылқасынов бүгінгі таңда басты міндет азаматтарды Конституцияға өзгерістер мен түзетулер туралы хабардар ету екендігіне назар аударды. Сондай-ақ, Мемлекет басшысы қабылдаған саяси қадамдар «халық үніне құлақ асатын мемлекет» қағидатымен көрініс тауып отырғандығын атап өтті.
Президент шешіміне облыстық штаб мүшесі Баймырза Қожамберлиевте түсініктеме берді. Оның пікірінше, елдің әрбір азаматы референдумға қатысудың маңыздылығын сезінуі тиіс. «Әрине, қазір ұсынылып отырған Конституцияға енгізілетін өзгерістер қоғамды одан әрі демократияландыруға, әлеуметтік-экономикалық даму мәселелерінде мемлекеттік органдардың жауапкершілігін арттыруға бағытталғаны қуантады».
Отырысқа қатысқан Қорқыт Ата атындағы Қызылорда университетінің тәрбие жұмыстары жөніндегі проректоры Жандос Базартай мемлекет басшысының референдумды өткізу идеясын қолдап, Конституцияға енгізілетін түзетулер жобасы саяси институттардың құрылымдық қайта құруларын қамтитынын айтып, мықты Парламент, мажоритарлық сайлау жүйелеріне енгізілетін өзгерістердің оң нәтиже беретініне сенетінін жеткізді.
Жиын барысында басқа да штаб мүшелері өз пікірілерімен бөлісіп, маңызды күні науқанға белсенді қатысуға шақырды.

«Жаңа Қазақстан» тақырыбында университет ұжымымен кездесу өтті

<a href="https://kyzylorda-news.kz/">Kyzylorda-news.kz.</a> Нұр-Сұлтан қаласында Ұлттық академиялық кітапханада Қазақстан Жазушылар Одағының мүшесі, ҚР Мәдениет қайраткері, қаламгер Қуаныш Жиенбайдың 70 жылдық мерейтойына арналған жиын өтті.
Басқосуға ҚР Президентінің кеңесшісі Бауыржан Омаров қатысып, жазушыға ҚР Мемлекеттік хатшысы Ерлан Карин мен Мәдениет және спорт министрі Дәурен Абаевтың құттықтауын жеткізді. Сондай-ақ, Қуаныш Жиенбайға Сыр елінің мәдени-рухани дамуына қосқан ерекше үлесі үшін Қызылорда облысының Құрмет грамотасы табысталды.
Іс-шараға жазушының жерлесі, «Сыр медиа» ЖШС бас директоры Аманжол Оңғарбаев арнайы барып қатысты.
Айта кетейік, Қуаныш Жиенбай 1952 жылдың 3 мамырында Қызылорда облысы Арал ауданы Бөген ауылында дүниеге келген. 1976 жылы ҚазМУ-дің журналистика факультетін бітірген. Жазушы республикалық мерзімді басылымдарда қызмет атқарған. Оның «Жалғыз желкен», «Теңіздегі бір тамшы», «Құлан жанарындағы ғұмыр», «Даңқ түрмесінің тұтқыны», «Жер үстінде де жұмақ бар» және т.б. шығармалары бар. Жазушының драмалық туындылары еліміздің әртүрлі театрларында сахналанып жүр. Оның шығармалары бірнеше тілге аударылған.
Қуаныш Жиенбай «Жалын» баспасы жариялаған жабық бәйгенің бірнеше мәрте жүлдегері. Халықаралық «Алаш» әдеби сыйлығының, халықаралық ПЕН-клуб сыйлығының лауреаты. ҚР Мәдениет қайраткері, «Құрмет», «Парасат» ордендерінің иегері.

Елордада жазушы Қуаныш Жиенбайдың 70 жылдығына арналған шара өтті

<a href="https://kyzylorda-news.kz/">Kyzylorda-news.kz.</a> Қызылордалық үкіметтік емес ұйымдар өз жобаларына қаржылай көмекті қалай ала алатынын білді. «Samruk-Kazyna Trust» қорының өкілдері өңір жұртшылығымен кездесті.
«Samruk-Kazyna Trust» әлеуметтік жобаларды дамыту қорының қызметкерлері үкіметтік емес ұйымдардың өкілдерімен кездесті.
«Samruk-Kazyna Trust» қоры Қазақстанның қайырымдылық саласындағы ірі донорларының бірі бола отырып, «Самұрық-Қазына» АҚ компаниялар тобы атынан еліміздің барлық өңірінде жобаларды жүзеге асырады. Сыр бойындағы кездесу жергілікті ҮЕҰ-дарды ынтымақтастыққа тарту мақсатында ұйымдастырылды.
ҮЕҰ бұқарада қалыптасқан әлеуметтік мәселелерді шешуге қатысты өз жобаларын ұсына алса, қор тарапы олардың ішінен барынша көп халыққа пайдалы әрі жүйелі, орнықты болатынын қолдауға әзір.
<blockquote>
 «Біз бұл кездесуді аймақтық үкіметтік емес ұйымдарды жаңа әлеуметтік жобаларды ұсынуға ынталандыру үшін өткізуді ұйғардық. Осылайша еліміздің ең шалғай жерлеріндегі адамдардың өмірін қалай жақсартуға болатыны туралы қызықты идеялар күтеміз. Бұл тұста қорымыз азаматтық секторды шағын бастамаларының ауқымын кеңейтуге шабыттандыруға күш салмақ. Мысалы шағын қаланың бастамалары бүкіл облыс, тіпті бүкіл ел үшін игілікті болуы мүмкін. Бұл дегеніңіз, Қызылорда облысының белсенді ҮЕҰ-ын ынтымақтастыққа шақырамыз», – деді «Samruk-Kazyna Trust» бас директоры Альфия Адиева.
</blockquote>
Кездесуге қатысқан ҮЕҰ өкілдері өздерінде бар жобалар туралы айтып бергеннен тыс, өңірлеріндегі қордың қызметі мен жобаларына қызығушылық танытты.
Бас директордың сөзінше, «Samruk-Kazyna Trust» қоры «Самұрық-Қазына» АҚ компаниялар тобының атынан көптеген жылдар бойы Қызылорда облысының дамуына үлес қосып келеді. Мәселен, 2017-2021жылдар аралығы, өңірде жалпы сомасы 957 млн теңгеге 11 әлеуметтік жоба іске асырылды.
Бұл қаражатқа қор:
• Қызылордадағы 3 түзету мектебін арнайы жабдықпен жабықтады;
• Қызылорда қаласы мен Арал, Жаңақорған, Шиелі және Қармақшы аудандарында 8 әмбебап алаң орнатты. Ауданы 1 200 шаршы метрден асатын әрбір алаң Workout элементтері бар футбол алаңынан, балалар мен спорт аймағынан тұрады;
• жергілікті ҮЕҰ-ға әлеуметтік бастамаларын іске асыру үшін 500 мыңнан 3 миллион теңгеге дейін мөлшерде 20 грант бөлді;
• Ұлы Отан соғысының 300-ден астам ардагері мен тыл еңбеккеріне әлеуметтік-тұрмыстық қолдау көрсетті;
• пандемия кезінде облыстың медициналық мекемелеріне 7 Damas санитарлық машинасын, өкпені жасанды желдету аппаратын, оттегі концентраторларын және пульсоксиметрлерді жеткізді;
• Махамбетов ауылында көпфункционалды спорт кешенінің құрылысын қаржыландырды. Кешен әмбебап алаңды (футбол, волейбол, баскетбол, үлкен теннис), бокс рингін және жүгіру жолын қамтиды;
• өңірдің «Көпбейінді облыстық балалар ауруханасы» аясында оңалту орталығы ашылды және оны барлық қажетті заманауи оңалту жабдықтарымен жабдықталды;
• Арал қаласында мүмкіндігі шектеулі балаларға арналған бейімделген спорт бойынша 2 топ (бочча) ашты.
Қазір қор өңірді дамыту бойынша жаңа бастамаларға ашық екенін мәлімдейді. Өтінімді қалай беру туралы барлық ақпарат сайтта, «Серіктес болу» бөлімінде қолжетімді: www.sk-trust.kz. Сондай-ақ қорда call-орталық жұмыс істейді: +7 (7172) 57-68-98.
<img src="https://kyzylorda-news.kz/wp-content/uploads/2022/05/64af6de3-035e-44cf-8828-02876606b878.jpg" alt="" />

Қызылордалық ҮЕҰ өз жобаларына қаржылай көмекті қалай алады?

<a href="https://kyzylorda-news.kz/">Kyzylorda-news.kz.</a> Бүгін облыс әкімі Нұрлыбек Нәлібаевтың төрағалығымен кадрлық өзгерістерге байланысты арнайы актив отырысы өтті.
Аймақ басшысы жаңадан тағайындалған бірқатар басқарма басшыларын таныстырып, қызметтеріне сәттілік тіледі.
<blockquote>
 «Өздеріңізге жақсы мәлім, біз жергілікті атқарушы органдарды оңтайландыру бойынша бірнеше басқарманы біріктіру жұмыстарын атқардық. Бұл ретте конкурстық, жан-жақты іріктеуден өткен, өздерінің кәсіби біліктілігі мен тәжірибесін таныта білген мамандарды басқармаларға тағайындадық. Бүгін де жаңа басшыларды таныстырудың реті келіп отыр. Біздің басты мақсатымыз – ел игілігі, халықтың қамы үшін барын салып жұмыс істейтін азаматтарды тарту, өңірдің әлеуетін арттыру болып табылады», – деді Н.Нәлібаев.
</blockquote>
Актив отырысында Қалдарбеков Мұса Оспанұлы Қызылорда облысының кәсіпкерлік және өнеркәсіп басқармасының басшысы лауазымына тағайындалды.
Мұса Оспанұлы тәжірибелі маман, жауапты салаларда басшылық қызмет атқарған, әлеуеті жоғары кадр. Ол 1972 жылы Қызылорда облысында дүниеге келген. Алматы технологиялық институтын инженер-механик, экономист мамандықтары бойынша бітірген.
Еңбек жолын Кентау тігін фабрикасының слесарі ретінде бастап, Алматы қаласындағы «Кереге» кәсіпорнында басшылық қызмет атқарған.
Әр жылдары Алматы қаласының Әуезов, Жетісу және Алатау аудандарының салық комитетінде жауапты қызметтер атқарды.
Салық саласының майталманы ретінде әр жылдары Қаржы министрлігі Мемлекеттік кірістер комитетінің Батыс Қазақстан, Қызылорда, Жамбыл облыстары бойынша департаменті басшысының орынбасары болды.
2019-2021 жылдары Қармақшы ауданының әкімі, 2021 жылдан бері Қызылорда облысының жұмылдыру дайындығы басқармасының басшысы қызметін атқарып келді.
<img src="https://kyzylorda-news.kz/wp-content/uploads/2022/05/mwsa.jpg" alt="" />

Қызылорда облыстық кәсіпкерлік және өнеркәсіп басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a>&nbsp;Кадрлық өзгерістерге байланысты өткен арнайы актив отырысында облыс әкімі Нұрлыбек Нәлібаев Қызылорда облысының бақылау жөніндегі басқармасының жаңа басшысы Шәменов Бауыржан Серікұлын таныстырды.
Бауыржан Шаменов 1981 жылы Қызылорда облысында дүниеге келген. Қазақ гуманитарлық заң университеті мен Құқық және нарық академиясын бітірген.
Еңбек жолын «Рух» заң компаниясының заңгері ретінде бастаған. Әр жылдары облыстық қазынашылық департаменті мен Мемлекеттік қызмет істері агенттігінің облыс бойынша басқармасында жауапты қызметтер атқарған.
2008-2013 жылдары облыс әкімі аппаратының мемлекеттік-құқықтық жұмыстар бөлімінің басшысы болған.
6 жылдан астам облыстық табиғи ресурстар және табиғат пайдалануды реттеу басқармасы басшысының орынбасары лауазымында, 2019 жылдан бастап осы аталған басқарманың басшысы болып қызмет атқарды.
Облыс әкімі жаңадан тағайындалған басқарма басшысының қызметіне сәттілік тілеп, жауапты қызметте абырой тіледі.
<blockquote>
 «Қазіргі кезде түрлі секторларда әлеуметтік мәселелерді желеу етіп, мәселелерді тек минтинг немесе рұқсат етілмеген жиындарда шешкісі келетіндер көбейді. Басты себеп заңмен реттелетін нормаларды дұрыс түсіндірмеуден немесе жұмысшы қауымның ұсыныстарына дер кезінде мән бермеудің салдары түрлі дау-дамайларды туындатты. Өңірде орын алған еңбек қатынастарындағы дауларды, аймақтың айшық келбетін келтіретін сәулет-құрылыстардың сапасына байланысты мәселелерді орнықты түрде шешуде Бауыржан Серікұлы заңгерлік білімі мен тәжірибесін, іскерлік ұстанымын іс жүзінде жоғары деңгейде көрсететініне сенімдімін», – деді Н.Нәлібаев.
</blockquote>
<img src="https://kyzylorda-news.kz/wp-content/uploads/2022/05/bawyrzhan.jpg" alt="" />

Қызылорда облыстық бақылау жөніндегі басқарма басшысы тағайындалды

<a href="https://kyzylorda-news.kz/">Kyzylorda-news.kz.</a> Оқу жылы аяқталған соң орта білім беру ұйымдарының базаларында 26 мамыр мен 17 маусым аралығында 1-8, 10 сыныптағы білім алушылар үшін жазғы мектеп жұмыс істейтін болады. Бұл туралы брифингте облыстық білім басқармасының басшысы Ақзира Қасымова мәлімдеді.
Жазғы мектеп жұмысында үлгерімі төмен білім алушыларға күрделі пәндерді игеруіне айрықша басымдық берілетін болады және бұл кезеңде үй тапсырмасы берілмейді. Сонымен қатар білім алушылар үшін еркін киім үлгісін киюге рұқсат беріледі. Оқыту процесін жүргізу үшін волонтерларды немесе студенттерді тартуға да болады.
<blockquote>
 «ҚР Білім және ғылым министрлігінің 2021 жылғы 26 мамырдағы №240 бұйрығына сәйкес, жазғы мектепті ұйымдастыру жөніндегі әдістемелік ұсынымдар барлық білім беру ұйымдарына бүгінде жолданды. Әдістемелік ұсынымдар оқыту сапасын арттыру, білім алушылардың, оның ішінде үлгерімі төмен білім алушылардың біліміндегі олқылықтарды қалпына келтіру және білімін толықтыру мақсатында әзірленді», – деді Ақзира Бақтыбайқызы.
</blockquote>
Айта кету керек, білім беру ұйымдарында жазғы мектептің сабақ кестесі мен жұмыс жоспары бекітіліп, топтардағы немесе сыныптардағы толымдылық – 25 адамнан аспайтын болады. Топтармен сабақтар өткізуге рұқсат етіліп, күніне 3-4 сабақтан оқу пәндері бойынша сабақ уақыты 40 минут болады. Сондай-ақ, кестеге балалардың оқу әдетін қалыптастыратын күнделікті 20-30 минуттық кітап оқуды қосу ұсынылды.

Жазғы мектеп бірнеше форматта жұмыс істейді

<a href="https://kyzylorda-news.kz/">Kyzylorda-news.kz.</a>&nbsp;Бүгін актив отырысында Қызылорда облысының әкімі Нұрлыбек Нәлібаев жаңадан тағайындалған бірқатар басқарма басшыларын таныстырды.
Қызылорда облысының энергетика және тұрғын үй-коммуналдық шаруашылық басқармасының басшысы қызметіне Дәрібаев Айдос Нағымадинұлы тағайындалды.
Айдос Нағымадинұлы 1987 жылы Қызылорда қаласында дүниеге келген. Алматы энергетика және байланыс институтын, Ресей халық шаруашылығы және мемлекеттік қызмет академиясын, Қорқыт ата атындағы Қызылорда мемлекеттік университетін бітірген.
Еңбек жолын «KEGOC» (КЕГОК) акционерлік қоғамының инженері болып бастаған.
Әр жылдары Қызылорда электр тарату тораптары компаниясының Сырдария, Қазалы аудандық, Қызылорда қалалық электр тораптарының директоры қызметтерін атқарды.
2014-2018 жылдары Еуразиялық экономикалық комиссиясы Энергетика департаментінің консультанты, Алматы, Қызылорда электр тарату тораптары компаниясының басқарма төрағасының орынбасары, бірінші орынбасары лауазымдарын атқарды. Энергетика министрлігі Электр энергетикасын дамыту департаментінің директоры ретінде жұмыс жасады.
Аймақ басшысы жаңа қызметке кіріскен Айдос Дәрібаевқа сенім білдіріп, қызметіне сәттілік тіледі.
<blockquote>
 «Айдос Нағымадинұлы жас та болса, іскерлігімен танылып, білікті маман ретінде өзін дәлелдеген азамат. Энергетика саласының барлық сатысынан өткен, орталық деңгейде жұмыс жасаған тәжірибесін ескере келе, осы саланың жандануына күш салып, алған білімі мен жиған тәжірибесін тиімді пайдаланады деген сеніммен шақырдым», – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2022/05/ajdos.jpg" alt="" />

Қызылорда облыстық энергетика және тұрғын үй-коммуналдық шаруашылық басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Биыл Қызылорда облысы бойынша 292 оқушы «Алтын белгі» белгісіне үміткер болып отыр. Олардың 99-ы Қызылорда қаласы мен облыстық мектептің түлектері болса, ал, қалған 193-і аудандардан. Бұл туралы Қызылорда облыстық білім басқармасының басшысы Ақзира Қасымова хабарлады.
Алтын белгіге үміткер оқушылардың Назарбаев Зияткерлік мектебі базасында алгебра және анализ бастамалары пәнінен тапсыратын мемлекеттік емтиханы келесі, яғни, 2022-2023 оқу жылына ауыстырылды. Осы орайда, биыл мектеп бітірушілер емтиханды өз мектебінде тапсырады. Сондай-ақ, биылғы ҰБТ қорытындысы бойынша «Алтын белгіні» берудің объективтілігі бағаланатын болады.
<blockquote>
 «Осыған байланысты мектеп әкімшілігі мен білім бөлімдері мемлекеттік қорытынды емтихандардың ашықтығы мен объективтілігін қамтамасыз етулері керек. Әрбір үміткер оқушының ҰБТ нәтижелеріне талдау жүргізілетіндігін тағы да назарларыңызға саламын», – деді Ақзира Бақтыбайқызы.
</blockquote>

ҰБТ қорытындысы бойынша «Алтын белгіні» берудің объективтілігі бағаланатын болады

<a href="https://kyzylorda-news.kz/">Kyzylorda-news.kz.</a> Қызылорда облысының тұрғындары Әлеуметтік медициналық сақтандыру қорына 31,8млрд теңге аударды.
<blockquote>
 «Жүйе іске қосылған 2017 жылдың 1 шілдесінен 2022 жылдың 1 мамырына дейінгі аралықта Қызылорда облысының тұрғындары әлеуметтік медициналық сақтандыру қорына 31,8 млрд. теңге аударды, оның 20,6 млрд. теңгесі (64,8%) жұмыс берушілердің аударымдары болса, қалған 11,2 млрд. теңге (35,2%) – жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі», – деді «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Жарна төлеу жағынан Қызылорда қаласы, Шиелі мен Жанақорған аудандар көш бастап тұр.
Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.

МӘМС: Қызылордалықтар қорға 31,8 млрд. теңге аударды

<a href="https://kyzylorda-news.kz/">Kyzylorda-news.kz.</a> 2021-2022 оқу жылында 8 мыңға жуық білім алушы мектепті бітіреді. 14 мамырға дейін Ұлттық бірыңғай тестке өтініш жасау электронды форматта қабылданады. Сондай-ақ, биылғы оқу жылында 7 508 оқушы ҰБТ-ға қатысады деп күтілуде. Бұл туралы Өңірлік коммуникациялар қызметінде өткен брифингте облыстық білім басқармасының басшысы Ақзира Қасымова хабарлады.
ҰБТ және барлық деңгейдегі олимпиадалар электронды форматқа көшірілді. Басқарма басшысы мұның ең басты артықшылығы – барлық процестің ашықтығы мен азаматтарға қолайлы жағдай жасалуында екенін айтты.
<blockquote>
 «ҰБТ-ға өтініштердің басым көпшілігінің электронды форматта тапсырылуы азаматтар арасында сұранысқа ие екенін көрсетеді. ҰБТ-ға өтініш қабылдау 28 сәуір мен 14 мамыр аралығында app.testcenter.kz сайтында жүргізілуде. Сондай-ақ, биыл ҰБТ тапсырушы түлектерге тест тапсыруға және грантқа түсуге екі мүмкіндік беріледі. Яғни, тек бір бейіндік пәндер комбинациясын таңдай алады. Пәндердің санында өзгеріс жоқ. Ең жоғарғы ұпай саны – 140», – деді басқарма басшысы Ақзира Бақтыбайқызы.
</blockquote>
Түлектердің ҰБТ-ға дайындалуына Ұлттық тестілеу орталығының тегін онлайн-сынақ тестілеуі бүгінде іске қосылып, көмек ретінде оқушыларға мүмкіндіктер жасалынуда. Мұнымен қоса, Ұлттық тестілеу орталығымен бірлесіп әзірленген білім беру орталықтарының тегін онлайн сабақтары да жалғасып жатыр. Ал, ерекше білім беруді қажет ететін талапкерлерге қолайлы жағдай жасау үшін алғаш рет негізгі 240 минутқа қосымша тағы 40 минут берілді. Сонымен бірге олар үшін тест нұсқалары суреттерсіз, диаграммаларсыз және сызбаларсыз әзірленді.
Айта кетейік, академиялық адалдықты сақтау үшін талапкерлердің тест нұсқасы таңбаланады. Ережелерді бұзған және тест тапсырмаларын аудиториядан тыс жерге шығаруға тырысқан жағдайда, Ұлттық тестілеу орталығы ереже бұзушыларды анықтап, оның тест нәтижелерін жояды. ҰБТ кезінде компьютер экранында калькулятор, Менделеев кестесі және металдардың бірқатар белсенділігі қосылған тұздың ерігіштігі кестесі қолжетімді болады.
Үміткерлер тестілеу аяқталғаннан кейін 30 минут ішінде апелляцияға өтініш бере алады.

Қазақстан және Қызылорда облысының жаңалықтары