<a href="https://kyzylorda-news.kz/">Kyzylorda-news.kz</a> &nbsp;Сырдария ауданының орталығы Тереңөзек кентіндегі көпқабатты тұрғын үйлерге күрделі жөндеу жұмыстары жүргізілуде. Бұл күні бірнеше көпқабатты тұрғын жайды жөндеу аяқталып, оның игілігін қарапайым халық көруде. Қайта жаңғыртудан өткен тұрғын үйлер тұрғындардың жайлы, жақсы жерде өмір сүруіне жасалған қолайлы жағдай. Мұнан басқа көпқабатты тұрғын үйлердің аулалары да абаттанып, ойын алаңдары салынуда.«Елу жылда – ел жаңа» дегендей, кенттегі көпқабатты тұрғын үйдің құрылысының алды осыдан жарты ғасырдан астам уақыт бұрын жүргізілген. Осы уақыт аралығында бұл үйлерге күрделі жөндеу жүргізілді десек, шындыққа жанаспауы мүмкін. Дегенмен соңғы жылдары қолға алынған нәтижелі жұмыстың арқасында бірнеше көпқабатты тұрғын үйлердің қасбеті жаңарды.&nbsp;Биылғы жылы кенттегі А.Иманов көшесіндегі №25, №37 және Жеңістің 50 жылдығы көшесіндегі №19, №32, №36, №38 үйлерге жалпы сомасы 44 246,0 мың теңге қаржыға күрделі жөндеу жұмыстарын жүргізу жоспарланған. Бұл жайында «Сырдария-Нұрдаулет» ЖШС директоры Б.Ильясов айтып берді.<blockquote>– Өткен жылы серіктестік пен «ПСК Qabylet» ЖШС арасында 11 759,0 мың теңгеге келісімшарт жасалып, тиісті жоба-сметалық құжаты дайындалды. Аталған көпқабатты тұрғын үй тұрғындарымен жиналыс өткізілді. Бас мердігер ретінде «Жәрдем-1» және «Мұрат Құрылыс және К» ЖШС, техникалық қадағалау жұмыстарын атқаруға «Достар Строй Груп» ЖШС-ын таңдады. Авторлық қадағалаушы – «ПСК Qabylet» ЖШС. Келісімшартта көр¬сетілгендей, тұрғындар күрделі жөндеу жұмысы үшін әр шаршы метр тұрғын алаңына 102-110 теңге көлемінде 15 жыл мерзімде төлейтін болып бекітілді, – дейді серіктестік басшысы.</blockquote>Осы күні бірінші кезекте 1968 жылы салынған кенттегі Жеңістің 50 жылдығы көшесіндегі №19, №32, №36 және №38 мекен-жайдағы тұрғын үйлерге жөндеу жұмыстары жүргізілуде. Мердігер тарапынан тұрғын үйлердің сыртқы күрделі жөндеу жұмысы, атап айтқанда, шатыр жабындылары, үйдің қасбеті және есіктері ауыстырылады.<blockquote>– Кенттің орталық көшелеріндегі көпқабатты тұрғын үй¬лер¬ге жөндеу жүргізілгенін көріп қуанғанбыз. Біздің де үйімізге осындай жөндеу жүргізілсе деген тілегіміз де болды. Қазір үйдің шатыры ауысып, сырты жөнделген соң еңсеміз де көтеріліп қалды. Қандай керемет, көз сүйсінеді. Енді тұрғындар осы жасалған жұмысты бағалап, осылай таза етіп ұстауға дағдылануы керек, – дейді кент тұрғыны Мардан Ықыласұлы.</blockquote>Қайта жаңғырту жұмыстары жүргізіліп жатқан көпқабат¬ты тұрғын үй иелері жасалып жатқан оң тірлікке қолдау білдіріп, бір мезгіл айналасын тазартуды қолға алса, таза¬лықтың, жасалған жұмыстың нәтижесі болады. Сонымен қатар үйден шыққан тұрмыстық қалдықтарды, қоқысты кез келген жерге тастамай, арнайы орынға апарып салуға дағдылану қажет. Себебі кент тазалығы – ортақ міндет.Б.ТАҢАТАРҚЫЗЫ

Тереңөзек кентінде көпқабатты тұрғын үйлер қайта жаңғыруда

<a href="https://kyzylorda-news.kz/">Kyzylorda-news.kz</a> &nbsp;Бар ғұмырын шәкірт тәрбелеу, үлкен өмірге жол сілтеп, оны биікке жетелу, қанаттандыру, жаны мен тәнін, болмысы мен барын беру тек ұстаздың ғана қолынан келеді. Қазақтың аса көрнекті ағартушы-педагогы Ыбырай Алтынсарин «Мен үшін жақсы мұғалім бәрінен де артық, өйткені мұғалім – мектептің жүрегі» деп бекер айтпаса керек-ті. Әрқашан еліміздің келешегі кемел, болашағы жарқын болып, дамыған мемлекетке айналуы үшін ұлағатты ұстаздар қауымы аянбай еңбек етіп келеді.«Ұстаздық еткен жалықпас, үйретуден балаға» демекші, ұлағатты ұлы есімді ұлық¬тап жүрген ұстаз Салтанат Кенебаева Сырдария ауданына қарасты үлгілі Н.Ілиясов ауылындағы Т.Айтбаев атындағы №132 орта мектептің қазақ тілі мен әдебиеті пәнінің мұғалімі. Бүгінде бала жанының бағбаны өскелең ұрпаққа тәрбие мен білім беруде білімімен қоса біліктілігінің арқасында жан-жақты қырымен оза шап-қан үлгі тұтар ұстаздың бірі. Салтанат Арыстанбекқызы – Қызылорда облысына қарасты Абай ауылының тумасы. Мектеп кезінен білімді, талантты оқушы оқу бітірген соң М.Мәметова атындағы педагогикалық училищенің қазақ тілі мен әдебиеті мамандығы бойынша оқуға түседі. Оқуын тәмамдаған соң өзінің ауылындағы мектепте ең алғашқы еңбек жолын тәлімгер болып бастайды. Екі жыл көлемінде жұмыс істеген тәлімгер Н.Ілиясов ауылына қоныс аударып, осындағы білім ордасында тәлімгерлік қызметін жалғастырады. Жаңа орта, жаңа мектепте қызметін бастаған жас ұстаз ұжымдастарымен жақсы қарым-қатынас орнатып, оқушылармен көптеген қызықты іс-шаралар өткізіп, саналы ұрпақ дайындауда өз үлесін қоса біледі. Тәлімгерліктен бастап, мектеп директорының хатшысы, кадр бөлімінде, шағын орталық тәрбиешісі болып түрлі қызметте өзін сан қырынан көрсете білді. Осындай жауапты қызметті атқара жүріп, мектептің қоғамдық жұмыстарына да белсене араласты. Сондай-ақ білімін жетілдіру мақсатында «Болашақ» университетіне қазақ тілі мен әдебиеті мамандығы бойынша оқуға түседі. Ең бастысы, «өз пәніммен және сыныппен жұмыс жасау мен үшін үлкен бақыт» дейді саналы ғұмырын ұлы қызмет жолына арнап, қызмет етіп келе жатқан білікті ұстаз.<blockquote>– Өзімді дамытудан, ізденуден ешқашан жалыққан емеспін. Себебі біздің қолымызда келер ұрпақтың болашағы тұр. «Ұстазы жақсының ұстамы жақсы» дегендей, жан-жақты, білімді ұстазды көрген жас ұрпақ өздерінің бойына ұстаздағы жақсы қасиетті алып, ұстазына ұқсауға тырысатыны айтпаса да түсінікті. Бала – біздің болашағымыз. Олардың жұлдызын жағып, мемлекетіміздің саналы, білімді, тәрбиелі ұрпағы болып қалыптасуына біздің қосатын үлесіміз өте көп екенін сезінемін. Балалармен жұмыс жасаудың қиындығы мен қызықшылығын түсіне білдім. Ұстаздық жолымды жетістіктер мен жақсы, сәтті күндерге толтыруға тырысамын. Өсіп келе жатқан ұрпақтың жүрегінде еліне, жеріне деген сүйіспеншілік пен патриоттық сезімін дамыту үшін әлі де күш-жігерімді саламын. Барша ұстаздарды төл мерекемен құттықтаймын! Қиындығы мен қызығы қатар жүретін қызметтік жолдарына толағай табыс тілеймін, – дейді шәкірт тәрбиелеу мен адал қызмет етуді өмірлік ұстанымына айналдыра білген Салтанат Кенебаева.</blockquote>Өзінің 20 жылдық тәжірибесі арқылы жан-жақты дами білген ізденімпаз ұстаздың жеткен жетістігі бір төбе. Әрқашан оқушыларын өз пәніне қызықтырып қана қоймай, әр сабағын жаңа әдіс-тәсілмен өткізетін жаңашыл ұстаз Қызылорда облысы білім басқармасының дипломы, Білім және ғылым қызметкерлері кәсіподағы облыстық комитетінің Құрмет грамотасы, аудандық білім бөлімінің Алғыс хатымен марапатталды. Мұнан бөлек, спорт пен өнерді қатар алып жүр¬ген ұстаз Қазақстан Республикасының білім саласындағы кәсіподақ ұйымының 100 жылдығына орай мұғалімдер арасында ұйымдастырылған 6 шақырым қашықтыққа жүгіруден жүлделі 1-орын иеленді.Шәкіртінің жетістігі – ұстаздың еңбегінің жемісі екені сөзсіз. Бүгінде республикалық, облыстық, аудандық байқауларда, пәндік олимпиада, мектеп театрында да өнер көрсететін шәкірттері жетістікке жетіп келеді. Атап айтар болсақ, «Театрдың ғажайып әлемі» республикалық фестивалінде ІІІ орын, «Темірбек Жүргенов – тарихи тұлға, ұлт жанашыры» тақырыбында театрланған көрінісінде ІІІ орыннан көрінді. Сондай-ақ биыл «Театрдың ғажайып әлемі» республикалық фестивалінде ІІ орын және де «Үздік жас актер» номинациясын шәкірті Айтөре Жалғасбай жеңіп алды. Бұл ұстаздың жеткен жетістігінің бір бөлігі ғана.Қазіргі таңда қызметімен қатар отбасын да қатар алып жүрген асыл жар, аяулы ана. Жолдасы нағилық Нұржан Телеуовпен 4 бала тәрбиелеп отыр. Үлкен қызы анасының жолын қуып, Абай атындағы педагогикалық университетінің 3-курс студенті. «Отбасында көрген-білгенін әрі қарай дамыту, шыңдау мақсатында балаларымның ұстаздық жолды таңдауына қарсы емеспін» дейді ұстаздық сара жолды өнеге етіп көрсете білген ұстаз-ана.Саналы ғұмырын шәкіртінің өмірде тұлға болып қалыптасуына өз үлесін қосып жүрген ұстаздың еңбегі қашан да бағалы.Таңшолпан Шанжарханова

Бала жанының бағбаны

<a href="https://kyzylorda-news.kz/">Kyzylorda-news.kz</a> &nbsp;Білім мен тәрбиенің қайнар көзі – мектеп. Мағжан Жұмабаев «Қазақтың тағдыры, келешекте ел болуы да мектебінің қандай негізде құрылуына барып тіреледі. Мектебімізді таза, берік һәм өз жанымызға, қазақ жанына үйлесетін негізде құра білсек, келешегіміз үшін тайынбай-ақ серттесуге болады» деген екен мектеп жайында. Сырдария ауданына қарасты әсемдігімен, әдемілігімен, тазалығымен аты шыққан Нағи Ілиясов атындағы ауылды облыс, аудан жұртшылығы ғана емес, республика халқы жақсы біледі. Осы орайда, ауыл балаларына тәлім мен тәрбие беріп келе жатқан білім ордасы Т.Айтбаев атындағы №132 орта мектеп тарихы жайлы қалам тербедік.Ғасырдан астам тарихы бар ауыл мектебінде небір тұлғалар, азаматтар тәлім мен тәрбие алған. Бүгін­де ауылды көркейтіп, атын асқақтатып жүрген азаматтар осы қара­шаңырақтың табалдырығын аттаған. Бұл – ауыз толтырып айтарлық мақтаныш.Өркениетке бет алған еліміздің болашағы білім беру саласымен тығыз байланысты. Жауапты міндеттерді жан-жүрегімен ұғынып, жұмы­ла көтерген ізгілік ұясының тарихы тым тереңнен бастау алады. Өткен ғасырдан сыр тартсақ.1903 жылдың тамыз айында Түркістан өлкесі, Сырдария облысы, Перовск уезі, Кеңтүп болысына қарасты 4 ауылда Хан мектебі ашылады. Олай аталуының себебі, қазіргі Сырдария ауданы, Қоғалыкөл ауылының бергі жағында «хан» деген қасиетті ағаш болыпты дейді. Соған сай хан деп аталған мектеп атауының терең астарлы мәні бар. Шын мәнінде, сол жерде бұрын егілген қызыл ағаш болған. Жазды күндері кескен жерінен қызыл сөл ағады екен. Діни адамдар бұл ағаштың жай ағаш емес екенін айтып, нәрімен, сөлімен халықты сусындандырып отырған, тамыры терең ағаштың құрметіне мектепті осылай атау­ды жөн деп тапқан.1909 жылы Құлке қорғаны жанынан 10 бөлмелі Хан мектебі мен интернат салынып, 1911 жылы іске қосылған. Сол мектептің орны қазіргі Шіркейлі өзенінің сол жағасындағы Құлке төбесінің жанында. Осы жылдан бас­тап 4 жылдық орысша-қазақша мектеп болып қайта құрылады. 1935 жылы халық комиссарлар советі жалпыға бірдей міндетті жетіжылдық оқу заңын енгізуіне байланыс­ты Қызылорда ауданына қарасты №6,7,8 ауылдардың ортасынан жетіжылдық болып қайта құрылып, «Құлымбетов» атындағы мектеп болып аталған. 1937-1938 оқу жылында мектеп «Шіркейлі» мектебі деп аталса, 1939-1940 оқу жылында мектептің аты өзгеріп, Э.Тельман атындағы жетіжылдық мектеп деп аталған. Сол жылдары 50 балалық қоғамдық интернат ашылып, онда 5-6 сынып оқитын оқушылар орналастырылған.Тарихқа көз жүгіртсек, біздің мақаламызға арқау болып отырған білім ордасы ауданда алғаш құрылған мектептердің бірі. Бүгінгі ғимарат 1971-1972 оқу жылында пайдалануға берілген.<blockquote>– Қазіргі таңда аудандағы озық оқу орда­сының бірі №132 мектебіміз Ұлы Отан соғысының ардагері, Қазақ ССР Білім беру ісінің үздігі, «Ғасыр адамы» Түймебай Айтбаевтың есімімен аталады. Бұл мектепте «Ұлы Отан соғысы» ардагерлері Меңлібай Қаймолдаев, Алмат Наурызбаев, Сәдуақас Әлиев, Түймебай Айтбаев секілді азаматтардың ізі қалған. Өз кезегінде ұстаздық еткен аға буын мектебіміздің бүгінгі келбетін қалыптастыру жолында аянбай еңбек еткен. Қазіргі таңда 640 орындық мектебімізде 91 қызметкер жұмыспен қамтылуда. Оның ішіндегі 86 педагог маманның «Педагог-зерттеуші», «Педагог-сарапшы», «Педагог-модератор» санаттары бар. Мектепте ауқымды іс-шаралар тұрақты түрде өткізіліп келеді. Аудан мектептері арасында да жоғарғы көрсеткішке ие, – дейді мектеп директоры.</blockquote>Жыл өткен сайын білім ордасының мате­риал­дық базасы нығайтылып келеді. Биыл мектепке күрделі жөндеу жұмыстары жүргізіліп жатыр. Күрделі жөндеу жұмыстары мен оқушы, ұстаздарға демеуші­лер тарапынан әркез қолдау көрсетіліп отырады.<blockquote>– Тарихы терең мекте­біміздің қабырғасынан ел­ге, қоғамға белгілі талай шәкірт түлеп ұшып, білік­ті ұстаздар шыңдалды. Олардың есімдерін бүгінгі ұрпақ мақтанышпен айта алады. Кеңес Одағының батыры Нағи Ілиясов, Социалистік Еңбек ардагері Күләнда Абдраманова, облыс­тық мәжіліс депутаты болған қайраткер Алмагүл Божанова, ауыл шаруашылығы ғылымдарының докторы, профессор Досқали Найманов, жазушы Танаш Дәуренбеков, ауыл шаруашылығы ғылымдарының кандидаты Ибадулла Таутенов, ОІІБ-нің ардагері Серікбол Тұңғышбаев, «Абзал және К» толық серіктестігінің президенті Қазақстанның Еңбек Ері Абзал Ералиев, ірі басшылық қызметтерде ауданның дамуына өзіндік үлесін қосқан Балшекер Өтегенова, облыстық жедел жәрдем бөлімінің абыройлы ардагері Сағындық Шамшиев, тарих ғылымдарының кандидаты Роза Айтбаева, журналист Несібелі Рахметова, Индира Ибраева, ауыл шаруашылығы ғылымдарының кандидаты Мыңбай Үмітжанов және тағы да басқа түлектерді мақтанышпен атап өтуге болады, – дейді мектеп директоры.</blockquote>«Жақсының жақсылығын айт, нұры тасысын» деген. Осы мектептің түлегі Абзал Жұмашұлы өзі білім алған мектепке әркез қолдау көрсетіп, қаржылық демеушілік көрсетіп отырады. Атап айтар болсақ, «Жылдың үздік мұғалімі», «Жылдың үздік оқушысы» аталымы бойынша анықтап және «Үздік аттестат» пен «Алтын белгі» иегерлеріне қаржылай сыйақы ұсынады. Бұл да болса жас өркенге алға талпыну үшін қолдау, қамқорлық деуге негіз бар.ХХІ ғасыр – ғылым ғасыры. Ал мектептің жүрегі – мұғалім. Аталған білім ордасы ұстаздары да іскер әрі ізденімпаз. Үнемі ізденіс үстінде жүретін, жаңашылдықты тез қабылдай білетін жас мамандар дөңгелек үстел, шеберлік сағаттарын жүйелі түрде өткізіп отырады. Қазыналы білім ордасына айналған орта мектептің әрбір шәкірті білім көкжиегіне сеніммен ұмтылып, мақтанышына айналуды мақсат етеді. Білгенін балаға үйретуден жалықпайтын ұстаздар да елдің кемел келешегі үшін елеулі еңбек етуде. Қандай жетістік болса да, ұжымның қажырлы еңбегінің жемісі. Ұстаздардың ұлағатты істеріне ата-аналар да дəн риза. Ел болашағын тәрбиелеуде, білім беру ісіне жаңашылдықты енгізуде, ұстаз­дардың білігін арттыруда, қоғамдық жұмыс­тарды белсене атқаруда білім ордасы алда талай белестерді бағындырарына сенім мол.А.МҰХАНБЕТҚАЛИ

Ғасырдан астам тарихы бар ауыл мектебі

<a href="https://kyzylorda-news.kz/">Kyzylorda-news.kz</a> Бүгінде еңбек адамы – ел мақтанышы екені даусыз.&nbsp; «Ауыр жол ерді сынайды» демекші, темір тұлпарымен адал еңбегінің арқасында өз нәпақасын тауып жүрген ер азаматтарымыз баршылық. Бірі екі ортада зат тасымалдаса, енді бірі жолаушыны діттеген жеріне дер кезінде жеткізеді. Сондай жанның бірі Мейрамбек Мұратов. Сырдариялық жүргізуші ең бірінші жолаушының қауіпсіздігін басты назарда ұстайтын еңбек адамы.42 жыл көлік тізгіндеген тереңөзектік Мейрамбек Тұрлыбайұлы есімі кент тұрғындарына етене таныс. Бүгінде ол – кентішілік қоғамдық көліктің жүргізушісі. Сонымен бірге жұмыстан бос уақытында аудан тұрғындары той-томалаққа, өзге аудан немесе қалаға түрлі жарыс, байқаулар өтсе, осы кісінің көлігін жалдайды. Тереңөзектіктердің дені «газелист Мако» деп атап кеткен. Бұл есімді Мейрамбек Тұрлыбайұлы да жатсынбай қабылдаған. Жеке кәсіпкер Алмасбек Арысбаймен келісім шарт негізінде кентішілік жолаушылар тасымалы қызметімен айналысады.<blockquote>– Газель жүргізушісі Мейрамбекпен 15 жылдан бері жұмыс жасап келе жатырмыз. Сондай-ақ келісім шарт негізінде тағы да бес газель бар. Оның үшеуі кентішілік, үшеуі елдімекендерге қатынайды. Кент тұрғындары Мейрамбекке алғысын айтып, ризашылығын білдіріп жатады. Тазалыққа қатты мән береді. Жұмысына адал, жауапкершілігі мол. Қыстың көзі қырауда да «машинам жүрмей қалды, майы қатып қалды» демейді. Жұмысына жауапкершілікпен қарайтын азамат, тәжірибесі мол жүргізуші, – дейді жеке кәсіпкер.</blockquote>Мейрамбек Мұратов – Тереңөзектің тумасы. Қай кезде де қолынан келген көмегін аямайтын азамат – №35 мектептің түлегі. Ең алғашқы еңбек жолын сол кездегі санитариялық-эпидемиологиялық станцияда бастаған. 10 жыл сол мекемеде жүргізуші болып жұмыс істеген. Одан әрі қызметтік жолын 8 жыл бойы орман шаруашылығында жалғастырады.<blockquote>– Жастайымнан көлік айдап, ұзақ жолға шыққанды ұнататынмын. Міне, бүгінде 15 жылдан бері кентішілік маршруттың жүргізушісімін. Жұмыстан бос уақытымда аудан тұрғындары той-томалаққа, мектеп мұғалімдері оқушыларды жарысқа немесе түлектерді ҰБТ сынағына апару үшін жалдайды. «Сақтансаң, сақтаймын!» демекші, қай кезде де алыс жер болсын, жақын жер болсын жолда барынша мұқият әрі сақ болуға тырысамын. Өйткені қанша жанның қауіпсіздігіне жауапты болатынымды білемін. Әрқашан жолға шықпас бұрын, көлігімді тексеріп, тазалық жұмысын жүргізіп, қауіпсіздік шараларын басты назарға аламын. Әр жолаушы тасымалдайтын жүргізуші қашанда ережеге бағынғаны дұрыс.</blockquote>«Жол қадірін жүрген білер» демекші, техника тізгіндеген адам тек жүргізіп қана қоймай, жөндеуді де білуі тиіс деп ойлаймын. Себебі, көлікке сенім жоқ. Шүкір, бірақ әлі ондай жағдай орын алмапты. Жолға шыққан кезде үйге жеткенше уайым¬дап отырамын, – дейді жолаушының алғысына ие болған жүргізуші.Әрқашан жолаушының көңілін таба білетін жүргізушінің тұрақты жолаушылары да бар.<blockquote>– Мәкеңді бұрыннан білеміз. «Жақсының жақсылығын айт, нұры тасысын» деп жатады ғой. Өзі ақкөңіл, әрбір жолаушының тілін таба біледі. Қай кезде болмасын, сол кісінің газелін жалдауға тырысамыз. Жаупкершілігі мол азамат баратын жерімізге уақытында жеткізеді. Әрі қанша жыл жүргізуші болған соң жолдың сырын біледі, – дейді кент тұрғыны Ә.Ыдырысова.</blockquote>Еңбек етуден шаршамайтын жан қашан да кез келген жұмыстың ебін таба біледі. Қандай шаруа жасаса да аяғына жеткізбей тынбайды. Қазақтың ұлы ақыны Абай Құнанбайұлының «Еңбек қылмай тапқан мал дәулет болмас» деген қанатты сөзін өмірлік ұстанымына айналдырған. Нәпақасын маңдай тер, адал еңбекпен тауып келе жатқан Мейрамбек Тұрлыбайұлының бір бойынан еңбек-қорлық, іскерлік, қарапайымдылық, жауапкершілікті байқауға болады. Адал еңбегінің арқасында кәсіби мерекесінде аудан әкімінің Алғыс хатымен марапатталса, тұрғындардың риясыз алғысына әркез ие болуда.Бүгінде Мейрамбек Мұратов – берекелі шаңырақтың отағасы, балаларының асқар тауы. Жұбайы Жанат Көшербаевамен 4 қыз тәрбиелеп өсірді. Екі қызын құтты орнына қондырып, жиендерінің нағашы ата-әжесі болып отыр. Кейінгі бір қызы студент болса, кенжесі оқушы. Отағасына барынша қолдау білдіріп отыратын Жанат медбике болып жұмыс істейді.&nbsp;Таңшолпан ШАНЖАРХАНОВА

Ұзақ жылғы еңбектің жемісі – алғыс

<a href="https://kyzylorda-news.kz/">Kyzylorda-news.kz</a> Деректерге сүйенсек елдегі әр алтыншы отбасы бедеуліктің зардабын шегуде. Оған экологияның нашарлауы, жастардың денсаулығының әлсіздігі себеп. Бұрын тек кинодан көріп, шетелдік ақпарат көздерінен еститін «жасанды ұрықтандыру» деген термин қазір біздің де қоғамға еніп кетті. &nbsp;Иә, бүгінде экстракорпораль - ды ұрықтандыру, біздіңше экоға ж ү г і н е т і н д е р көп.Бағасы да қарапайым отбасы үшін әжептәуір қымбат. Сәби аңсап, бірақ қаражаттан қысылып жүрген жандарға үміт сыйлау үшін Президенттің тапсырмасымен 2021 жылы «Аңсаған сәби» бағдарламасы іске қосылған еді. Жоба 2030 жылға дейін жалғасады. Жасанды ұрықтандыру қашан басталды? Қазір денеден тыс ұрықтандыру әдісі медицина саласында қалыпты құбылысқа айналды. Әлемде жасанды жолмен дүниеге келген сәбилердің саны бүгінде 6 миллионнан асады. Жалпы, бедеулік пен белсіздік – тек бір отбасының ғана емес, күллі қоғамның қасіреті. Қай кезеңде де өзекті болған бұл мәселені оңтайлы шешу үшін медицина саласының мамандары аз тер төккен жоқ. Табиғи жолмен бала көтеруге қауқарсыз жандарға көмектесу үшін ғалымдар өткен ғасырдың қырқыншы жылдарынан бастап жатырдан тыс ұрықтандыру әдісін сынап көре бастады. Алғашқы сынақтар әуелі кеміргіштерге жүргізілді. Ғалымдар аналық жасушаның ұрықтану уақытын, оның жатырға дейінгі өмір сүру ұзақтығын, сақталу әдісін ұзақ зерттеді. Одан кейін британдық ғалымдар адам ұрығын зертханалық жағдайда өсіру мәселесін зерттеуді қолға алды. Аналық және аталық жасушаны жатырдан тыс ұрықтандырып, пайда болған эмбрионды жатырға әкеліп салу әдістерін игеру үшін ғалымдарға 10 жылдай еңбектенуге тура келген. Әрине, басында қоғам бұл әдісті онша қабылдай қойған жоқ. Діни көзқарас тұрғысынан да талай сынға іліккеніне қарамастан зерттеушілер 1975 жылы денеден тыс ұрықтандыру әдісін адамға қолданып көрді. Алайда алғашқы талпыныс сәтсіз аяқталды: ұрық жатыр түтікшесінде біткендіктен оны алып тастауға тура келді. Араға екі жыл салып жатырдан тыс ұрықтандыру әдісіне тағы бір қадам жасап көрді. Осылайша 1978 жылдың жазында әлемдегі ең алғашқы «құтыдағы сәби» Луиза Браун дүниеге келіп, оған дейін тоғыз жыл бойы бала сүйе алмаған британдық отбасыға үлкен қуаныш сыйлады. Ал жасанды ұрықтандыруды сәтті жүзеге асырған профессор Р.Эдвардс болса, адамзатқа пайдалы істің негізін қалағаны үшін Нобель сыйлығымен марапатталды. Қазақстанда денеден тыс ұрықтандыру әдісі алғаш рет 1995 жылы енгізілгенін, оны елімізге алып келген белгілі ғалым, репродуктолог-эмбриолог Салтанат Байқошқарова екенін жұртшылық жақсы біледі. Дәл осы жылы Салтанат Берденқызының бастамасымен Алматыдағы «Экомед» адам ұрпағын өрбіту орталығында тұңғыш рет ЭКҰ жасалып, бір жылдан кейін еліміздегі алғашқы құтыдағы сәби дүниеге келеді. 1996 жылдың шілдесінде туған қыз бала бүгінде – 28 жаста. Жасанды ұрықтандыруға 2010 жылдан бері мемлекет қаржы бөле бастады. Бірақ бұрын жылына 400-500 квота ғана бөлінетін. Ал қазір «Аңсаған сәби» мемлекеттік бағдарламасымен жыл сайын 7 мың әйел жасанды жүктілік жасатуға мүмкіндік алды. Соның арқасында 3 жылда 6 мыңдай отбасы сәбидің күлкісіне толды. Ал көмекке мұқтаждар әлі де көп.ЭКО-ны ТЕГІН ЖАСАТУДЫҢ ТЕТІГІЖасанды ұрықтандыруды тегін жасату үшін, яғни квотаға ілігу үшін алдымен жергілікті емханаға есепке тұру қажет және медициналық көрсеткіштері болуы керек. Айталық, әйелдің жатыр түтікшелерінің екеуі де бітелген жағдайда немесе ер адамда белсіздік 2-3 дәрежелі болған кезде жасанды ұрықтандыру көмегіне иек артуға тура келеді. Жатырдан тыс ұрықтандыруға квота бойынша жіберілетін пациенттерді арнайы комиссия іріктейді. Олардың оң шешімінен кейін әйелдің сырқаттану себептері мен тарихы жазылған құжат және барлық медициналық тексерудің нәтижелерімен бірге ЭКҰ жасалатын арнайы клиникаға жіберіледі. Бұл емдеу мекемесі де құжаттарды тексеріп, дұрыс деп тапқан жағдайда ЭКҰ жасайтын уақытты белгілейді. Бүгінде 15 мыңға жуық ерлі-зайыпты бедеулік есебінде тұр. Қазір жастар отбасын құрғасын 1 жылда бала сүйе алмаса, бірден квотаға өтініш берсе болады. Бұрын 3-4 жылдан кейін еді. Яғни, талап жеңілдеген. Дегенмен, әйел денсаулығына қатысты 3 критерий бар. Олар қандай критерийлер? Бұл сұраққа аудандық емхананың гинеколог дәрігері Бақтыгүл Әлсерікова жауап берген еді. – АМГ дейміз. Антимюллерлік гармон 1-ден төмен болмау керек. ФСГ 12-ден жоғары болмау керек. Және аналық безінде оң жақ, сол жағында үш үштен 6 фолекул болу керек. Әйелдердің жасанды жүктілікке дайын екенін репродуктолог маман шешеді. Сол кісілер келісім берсе, әрі қарай біз дайындап, жолдама береміз, – дейді.«АҢСАҒАН СӘБИМЕН» АЛТЫ МЫҢ БАЛА ДҮНИЕГЕ КЕЛДІӘрбір адамға шаңырақ құрып, артына ұрпақ қалдыру – парыз. Бақыттың төресі де – бала сүю. Өкінішке қарай, нәрестенің іңгәлаған үнін есту бақыты некеге тұрған барлық отбасына бірдей бұйырмаған. «Аңсаған сәби» бағдарламасы қабылданғаннан кейінгі үш жылда Қазақстан бойынша 20 мыңнан астам экстракорпоральды ұрықтандыру жасалған. Бағдарлама аясында жыл сайын міндетті медициналық сақтандыру қорынан шамамен 7 млрд теңге жұмсалады. Бұл көмекті әр отбасы жылына бір рет қолдана алады. Бағдарлама 2030 жылға дейін жалғасса, жеті жылда 49000 отбасының ата-ана атану мүмкіндігі бар.&nbsp;<blockquote>– « А ң с а ғ а н с ә б и » б а ғ д а р л а м а с ы қабылданғалы шиелілік 39 әйел жасанды ұрықтандыру жасатуға мүмкіндік алды. Оның 27-сі мемлекет берген мүмкіндік арқылы айкүні жетіп, аман-есен сәбиін құшағына алса, 6 ана мерзімінен бұрын босанды. Ал биыл жыл басынан бері 19 әйелге квота берілді. «Аңсаған сәби» арқылы 8 әйел ана атанды, – дейді Бақтыгүл Әлсерікова. Жалпы Шиелі ауданында 217 әйел бедеулік бойынша есепте тұрады. Олардың диагнозы әртүрлі, бірақ армандары біреу ғана – тар құрсағын кеңітіп, жүкті болу, сәбиін құшағына алып, армансыз иіскеу. «Аңсаған сәби» бағдарламасы басталғалы квота алу барынша жеңілдеп келеді. Мәселен, қазір көмекті бір рет пайдаланған отбасы келесі жылы тағы да қатыса алады. Қазір мемлекеттік квота 42 жасқа дейін әйелдерге ғана беріледі. Өйткені 40 жастан кейін әйелдің денсаулығы нашарлап, сәбилі болу мүмкіндігі азая береді. Не десек те, ЭКҰ – басқа емдеу жолдары тиімсіз болғанда ғана қолданылатын тәсіл. Ең дұрысы бедеулік пен белсіздіктің алдын алу қажет. Әр ата-ана баласының бойындағы өзгерістерді қалт жібермей, дер кезінде дәрігерге қаратуы керек. Әсіресе жұқпалы инфекциялардың алдын алып, қандай да бір эндокринологиялық бұзылыстарды уақыт оздырмай емдеген жөн. Сондай-ақ саламатты өмір салтын сақтап, әйелдер түсік жасатудан аулақ болып, еркектер аталық бездің, қуық асты безінің қабынулары мен жыныс-несеп мүшелерінің дамуындағы ауытқуларды дер кезінде емдеу керек, дейді мамандар.</blockquote>Гүлхан ЯХИЯФото: egemen.kz

"Аңсаған сәби" биыл Шиелілік 19 отбасыға үміт сыйлады

Шиелідегі Мансап орталығы 2 мыңнан аса жасқа жұмыс ұсынды

<a href="https://kyzylorda-news.kz/">Kyzylorda-news.kz</a> Экология тақырыбы қай кезде де өзектілігін жойған емес. Жыл санап оның маңызы да артқан. Экологиялық тұрғыда өңірде өзекті мәселелер жетерлік. Бұл ретте аймақтың экология саласында арнайы «Жол картасы» әзірленіп, жолға қойылған жүйелі жұмыс істелуде.&nbsp;Осы бағытта Қызылорда облысы бойынша экология департаменті басшысы орынбасарының міндетін атқарушы Алмас Ысқақовпен сұхбаттасқан едік.– Алмас Илиясұлы, облыстың эколо­гиялық ахуалын шешу мақсатында әзірленген «Жол картасы» аясында қандай жұмыстар атқарылуда?– Аймақтың&nbsp;экологиялық мәселелерін кешенді шешу жөніндегі 2020-2025 жылдарға арналған Жол картасының орындалуы көңіл қуантады. Мемлекет басшы­сының тапсырмасына сәйкес, Экология тақырыбының әрқайсымыздың күнделікті тыныс-тіршілігімізде ерекше орын алатын бұл саланың айрықша маңыздылығын ескере отырып, 2020 жылы экологиялық мәселелерді кешенді шешу және экологиялық жағдайды одан әрі жақсарту мақсатында Қызылорда облысының әкімдігі және Экология және табиғи ресурстар министрлігі бірлесіп, 2020-2025 жылдарға арналған «Қызылорда облысының экологиялық мәселелерін кешенді шешу жөніндегі Жол картасы» бекітілді.&nbsp;Жол картасында көрсетілген іс-шаралардың іске асырылу мерзімдері «тұрақты» және 2020-2025 жылдар аралығы болып белгіленген. Маңызды іс-шаралар легі белгіленген Жол картасы 7 бөлімнен, 52 тармақтан тұрады. Әр бөлімде өзекті мәселелер қарастырылып, орындалу мерзімдері де белгіленген. Қазіргі таңда 52 іс-шараның бүгінгі күні 16 іс-шарасы орындалды. Ал қалған бағыт өз ерекшеліктеріне сәйкес кезең-кезеңімен жүзеге асуда. Аталған құжатта тұрақты көздерден атмосфераға ластау­шы заттар эмиссиясын қысқарту, жылжымалы көздерден атмосфералық ауаға ластағыш заттардың шығарындыларын азайту, қалдықтарды басқару, жасыл белдеуді дамыту, көгалдандыру және көркейту, коршаған ортаның жай-күйіне мониторинг және өзге де мәселелер қамтылған.– Тұрғындар тазалық мәселесіне қалай қарайды? Заңбұзушылықтармен қалай күресесіздер?– Экологиялық талаптарды сақтау – адамзат баласының ортақ міндеті.&nbsp;Табиғат-Ананы аялау, экологиялық ахуалды сақтау күн тәртібінде тұр. Қызылорда облысы бойынша экология департаментімен есепті кезеңде табиғат қорғау іс-шараларының орындалуына, қоршаған ортаға эмиссияларды төмендетуге, табиғат пайдаланушылардың қоршаған ортаға жауапкершілікпен қарауын қалыптастыру және Қазақстан Республикасының Экологиялық заңнамасын бұзу деректерінің алдын-алуға ерекше ден қойылды. Жыл басынан бері қоршаған ортаны қорғау саласында 23 нысанға бақылау шаралары &nbsp;ұйымдастырылды. Оның ішінде 12 бару арқылы профилактикалық бақылау және қадағалау, 10 жос­пардан тыс және 1 талаптарға сәйкестік тұрғысынан тексеру бар. Нәтижесінде, экологиялық заңнама талаптарын бұзған 47 факт анықталып, әкімшілік құқық бұзушылық жөнінде іс қозғалды. Заңдылықты бұзушылыққа жол берген жеке және заңды тұлғаларға 539,7 миллион теңге көлемінде 22 айыппұл салынды. Оның 8,6 миллион теңгеге жететін 18 әкімшілік айып­пұлы өндірілсе, сот шешімімен екі нысанның қызметі уақытша тоқтатылды. Сондай-ақ, облыс көлемінде заңсыз карьерлерді анықтау, зерттеп-қарау, мониторинг жұмыстарын жүргізу, олар бойын­ша тиісті шараларды қабылдау үшін құқық қорғау және мүдделі мемлекеттік органдардың қатысуымен бірнеше мәрте бірлескен рейд жүргіздік.&nbsp;Жоғарыда айтып өткендей, қалдықтар мәселесі өзекті болып отыр. Өкінішке орай, тұрғындар арасында белгілен­беген орындарға қоқыстарды бей-ерекет тастап кету, төгу секілді әрекеттерге жол беруде. Бұл бағытта «Қазақстан Ғарыш сапары» АҚ жүзеге асырған ғарыштық мониторинг нәтижесінде Қызылорда облысында 98 рұқсатсыз қалдық орны анықталып, оның 56-сы тазартылып, қалған 42заңсыз қалдықтар орнын тазарту, бүлінген жерлерді қайта қалпына келтіру бойынша тиісті шаралар атқарылуда. Сонымен қатар, департамент «Байқоңыр» кешенінде мем­лекеттік экологиялық бақылау жүргізіп келеді. Бақылау Ресей Федерациясының Үкіметімен «Байқоңыр» кешенінің аумағындағы қоршаған ортаны қорғау мәселелері туралы келісім құжаттары, олардан туындайтын хаттамалар мен ережелер негізінде жүзеге асырылады.– Бүгінде кәріз суын кез-келген орынға төгіп, қоршаған ортаны ластау дерегі азаймай отыр. Мұрын жаратын жағымсыз иіс алдымен адамға, содан соң тамылжыған табиғатқа зардабын тигізетіні анық қой.– Қоқыс тастау мәдениеті бізде әлі де болса кенжелеп тұр. Осыдан он жыл бұрынғы мәдениет сол деңгейде тәрізді. Баяғы жартас, сол жартас. Тіпті заң бұзушылықтың жаңа түрі – кәріз суын жеке сектордан алып, орталық кәріз жүйесіне төгіп жүрген ассенизаторлар туралы әлеуметтік желіде әңгіме желдей есіп жүр. Кейде тұрғындардың жаға ұстасқан төбелесі де мәселенің ушыққанын көрсететін сияқты… Осы бағытта мүдделі және құқық қорғау органдарымен бірлескен Қызылорда қаласы аумағында заңсыз кәріз суларды төгуге жол бермеу бойынша 2024 жылға арналған іс-шара жоспары бекітілді.&nbsp;Аталған іс-шара аясында тұрақты түрде қала аумағында ассенизатор автокөліктері­нің заңсыз кәріз суларын төгу деректерін тоқтату мақсатын­да рейд жүргізіп келеміз. Осындай кәріз суын белгіленбе­ген орындарға төгіп, ластаған 8 тұлғаға полиция органдары­мен айыппұл салынды.– Заң бұзушылықты азайтып, халықты тәрбиелеуге әкімшілік хаттама қауқарлы деп ойлайсыз ба?– Әрине, хаттама толтырып, қалтасын жұқартқанмен, оның арғы жағында жауапкершілік деген үлкен ұғым оның бойында болу керек.&nbsp;Айналаны ластап жүретін адамдардың өзінің жан дүниесі көркем деп айта алмас едім. Екі көршінің оқиғасы есіңізде болар. Бір адам үнемі көршісінің ауласына қоқыс тастай береді екен. Көршісі ол қоқысты үнсіз алып, айналаны жинап, таза ұстайды. Бір күні оған көкөніс толы себет апарып беріпті де түк түсінбеген көршісіне: «Әркім өзінде барын береді» деген екен. Иә, жан дүниеңіз қандай болса, әрекетіңіз де сондай болмақ…– Жоғарыда зерттеліп, тексерілгеннен кейін айыппұл салынған нысандарды айтып өттіңіз. Департаменттің зертханасының деңгейі қаншалықты? Талапқа сай тексеріс жүргізе алатын шамасы бар ма?– Әрине, құрал-сайман мен керек-жарақ көп маңызға ие.&nbsp;Экологиялық заң талаптарын бақылау жұмыстары сынақ зертханасымен қамтамасыз етілген. Департамент 2024 жыл­дың І жартыжылдығында барлығы 12 субъектіге бару ар­қылы профилактикалық бақылау, 4 жоспардан тыс тексеру және Байқоңыр кешені бойынша 6 нысанға зертханалық-талдамалы бақылау жұмыстары жүргізілді. Сонымен қатар, Департаментпен қосымша 44 объектіге мониторингтік бақылау жүзеге асырылды. Егер өзімізде осындай мүмкіндіктер болмаса, біз мұндай тексерістерді жүргізе де алмас едік.Осы зертханамыздың арқасында біз «Қызылорда облысы бойынша қоршаған ортаны сауықтыру жөніндегі кешенді &nbsp;іс-шаралар жоспарына» сәйкес «Таза ауа» іс-шарасы аясында 109 автокөлікке зертханалық бақылау жүргіздік. Осы іс-шараның нәтижесінде ластағыш заттардың белгіленген нор­мативтерден асып кеткен 6 автокөліктің иелеріне полиция департаментімен шаралар көрілді. Департаменттің зертханалық-талдамалы бақылау жұмыс­тары барысында І және ІІ санаттағы объект операторлары тарапынан тапсырылған өндірістік экологиялық бақылау есептеріне талдау жұмыстары тоқсан сайын жүргізіліп отырады. Сонымен қатар биыл есеп тапсырмаған және уақытынан кеш тапсырған субъектілер бойынша прокуратура органдарымен бірлесе 11 субъектіге ҚР ӘҚБтК-нің 325-бабымен әкімшілік іс қозғалып барлығы 1,4 млн теңге айыппұл салынды. Экологиялық кодекстің талаптарына сәйкес, I са­наттағы объектілерге қатысты қоршаған ортаны қорғау саласындағы уәкілетті орган бекіткен қоршаған ортаға эмиссиялардың авто­маттандырылған мониторингін жүргізу тәртібіне сәй­­кес, эмиссиялар­­дың негізгі стационарлық көздерін­де қоршаған ортаға эмиссиялар мониторингінің автоматтандырылған жүйесін орнатуға міндетті.&nbsp;Облыста қоршаған ортаға эмиссиялар мониторингтің автоматтандырылған жүйесін орнатуға міндетті 3 кәсіпорын бар. Олар «СКЗ-U» ЖШС, «Гежуба Шиелі Цемент Компаниясы» ЖШС және «Orda Glass LTD» ЖШС.Қазіргі таңда, «Гежуба Шиелі Цемент Компаниясы» ЖШС-гі «Ұлттық Деректер Банкі» ақпараттық жүйесіне деректерді негізгі режимде беруде. Ал, «СКЗ-U» ЖШС мен «Orda Glass LTD» ЖШС ақпараттық жүйеге негізгі деректерді беру бойынша «Ұлттық Ақпараттық Технологиялар» АҚ-мен жұмыстар атқаруда.– Өңірде тазалық іс-шарасы күнделікті жүргізілуде.&nbsp;Тіпті, сенбі сөзін аптаның барлық күніне де телитін болдық. Тақырыптың бір ұшы экологиялық ахуалға келіп тұр. Әрине, сенбілікті экологиялық жағдайды қалыптандырудың бір бағыты десек, жарасады.– Сөзіңізбен толықтай келісемін. Мемлекет Басшысы Қ.Тоқаев былғы халыққа Жолдауында «Экологиялық ахуалды жақсарту – алдымызда тұрған негізгі міндеттің бірі. Біз қоғамда қоршаған ортаны қорғаудың мән-маңызын кеңінен дәріптеуіміз керек» деген еді. Сонымен қатар, «Таза Қазақстан» жалпыұлттық экологиялық акциясы жүріп жатыр. Бұл – тұтас халықты ұйыстырған берекелі бастама екенін де атап өтті. Биыл қоршаған ортаны қорғау және экологиялық мәдениетті қалыптастыру мақсатында облыс көлемінде үкіметтік емес ұйымдардың, мемлекеттік органдардың, қоғамның өкілдерінің, жергілікті тұрғындардың, сондай-ақ экобелсенділер мен волонтерлердің қатысуымен «Таза Қазақстан»және электр энергиясын үнемдеу мақсатында халықаралық «Жер сағаты» республикалық экологиялық акциялары өткізілді.&nbsp;«Таза Қазақстан» республикалық экологиялық акциясы аясында ұйымдастырылатын облыстық іс-шаралар жоспары облыс әкімімен бекітілді. Іс-шара жоспарына сәйкес «Таза өлке», «Киелі мекен», «Жасыл аймақ», «Өнегелі ұрпақ» және «Мөлдір бұлақ» тақырыптарында апталық шаралар ұйымдастырылуда.Облыс бойынша ұйымдастырылған сенбілік­тер мен акцияларға барлығы 400 мыңнан аса адам қатысып, іс-шараларға 500-ден аса техника жұмылдырылды, 16 мың тоннадан астам қоқыс қалдықтары шығарылды.&nbsp;Қалада &nbsp;129&nbsp;мыңнана астам ағаш көшеті егілді.&nbsp;Апта сайынғы негізде Қызылорда қаласы және аудан әкімдіктерімен бірлесіп мемлекеттік мекемелер ұжымдары, еріктілер мен волон­терлардың қатысуымен сенбілік жұмыстары атқарылуда.–&nbsp;Әңгімеңізге рахмет.Аян Спандияр

Тазалық санадан басталады

<a href="https://kyzylorda-news.kz/">Kyzylorda-news.kz</a> Сыр жұртының негізгі тіршілік көзінің бірі – аграрлық сала екені белгілі. Алажаздай маңдайы күнге күйген диқандардың еңбегі ауыл шаруашылығы өнімдерінің бітік шығуымен қайтады. Жыл сайын егіні бітік шығып қамбас астыққа толатын Сыр халқы үшін биылда жемісті өнім болды.Қыстың қамын жаз ойлап, күні бұрын қамданатын әдет күні бүгінге дейін маңызын жойған жоқ. Бұл ретте биыл 8257 гектарға ауыл шаруашылығы дақылдары егілді. Оның ішінде негізгі дақыл күріш – 3856 гектар, бидай – 368 гектар, қант құмайы – 40 гектар, жаздық арпа – 2 гектар, жаңа жоңышқа – 224 гектар, ескі жоңышқа – 1317 гектар, картоп – 130 гектар, көкөніс – 1330 гектар, бақша – 990 гектарды құрады. Биылғы егіске 903,5 тонна күріш тұқымы құйылған. Құйылған тұқымының 4,4 пайызын отандық сорттар құраса, 95,6 пайызын ресейлік сорттар құраған. Атап айтқанда, отандық сорттар бойынша 20 тон­на «Сыр сұлуы» және 20 тонна «Маржан», ресейлік сорттар бойынша 730 тонна «Лидер», 133,5 тонна «Янтарь» сорттары бар.&nbsp;Қажетті минералдық тыңайтқыштың көлемі 3010 тоннаны құ­рап, толығымен сатып алынды. Сонымен қатар арамшөптерге қарсы қолданатын гербицидтердің қажетті көлемі 2863 литр толығымен сатып алынған. Қашыртқылар, каналдарды тазалау, гидротехни­калық құрылыстарды жөндеу жұмыстары бойынша ішкі су жолдарының &nbsp;54300 текшеметр (100%) топырақ шығарылып, 4 дана гидробекеттер (100,0%), 2 дана су құрылыстары (100%) жөндеуден өткізілді.&nbsp;Егіннің бітік шығуына барлық жағдай жасалды.Бүгінде жаз бойы еткен еңбек жемісін берді. Диқандар егілген 368 гектар бидайдан 379 тонна өнім жинап, орта өнім 10,3 центнерден келді. Өткен жылы бұл көрсеткіш гектарына 10 центнер болған.&nbsp;Ал 2 гектар арпа дақылынан 3 тон­на өнім жиналып, орта өнім 15 центнерден келген. Шаруашылық құрылымдар бойынша мал азықтық жоңышқа шөбінен 7603 тонна жоңышқа шөп дайындалған. Орташа көрсеткіш 20 центнерге жеткен.&nbsp;Сонымен қатар көкөніс, бақша дақылдарын жинау да қарқынды жүруде. Көкөністің 1230 гектарынан (92,5%) 135 центнер, бақшаның 880 гектарынан (88,9%) 136 центнерден өнім жиналуда. Күріш дақылын күтіп-баптау бойынша 1600 гектар үстеп қоректендірілсе, 1850 гектар гербицидпен өңделді. Биылғы егілген 3856 гектар күріш егістігінің шығымдылығын сала мамандарының зерделеу барысында 2892 гектары (75,0 %) «жақсы», 771 гектары (20,0%) «орташа», 193 гектары (5,0%)&nbsp;«қанағаттанарлық» деп бағаланған.Аграрлық салада аймақ көрсеткіші жылдағыдан төмендеген жоқ. Аймақтағы ірі шаруашылықтар күріштің әр гектарынан орташа есеппен 90 центнерге жуық өнім алды. Мәселен, Жалағаш ауданындағы «Ер-Әлі» шаруа қожалығы 3500 гектарға ауыл шаруашылығы дақылдарын еккен. Оның ішінде 1300 гектарға күріш егіп, оның әр гектарынан орташа есеппен 89 центнерден өнім алынды. Сондай-ақ, салада ұзақ жылдық тәжірибесі бар «Таң ЛТД» ЖШС биыл 3000 гектар жерге егін егіп, оның ішінде 1500 гектарға күріш дақылы орналастырса, оның әр гектарынан орташа есеппен 85 центнерден өнім алды. Басым бөлігі шетелдік жаңа каурис сорты және лидер, альянс сорттары жерсіндірілген. Бұдан бөлек, 80 гектарға қант құмайы, 800 гектарға жоңышқа, 150 гектарға түйежоңышқа дақылдары егілді. Жалпы облыс бойынша 189 мың гектар жерге ауыл шаруашылығы дақылдары егілген. Оның ішінде негізгі дақыл күріш 85,6 мың гектарды құраған. Мемлекет тарапынан көрсетілген қолдаудың арқасында биылғы жылы су қажетті деңгейде жеткізілді. Шаруашылық құрылымдары егілген ауылшаруашылығы дақылдарына күтіп-баптау жұмыстарын агротехникалық талаптарға сай жүргізе алды. Сонымен қатар, егін жинау жұмыстарына қажетті ауыл шаруашылығы техникалармен, жанар-жағармаймен, минералды тыңайтқыштармен толық қамтамасыз етілген. Аймақтағы ауыл шаруашылығы саласы мамандарының айтуынша, «Таң ЛТД» ЖШС Қытайлық компаниямен бірлесіп тамшылатып суару әдісімен 3000 гектар жерге жүгері егу жобасын іске асырған. Нәтижесінде 800 гектарға &nbsp;тамшылатып суару әдісімен жүгері дақылы егілген. Бұдан бөлек, «Ер-Әлі» шаруа қожалығында тамшылатып суару әдісімен 6 гектар жерге қарқынды алма бағын орналастырған. Бүгінде 5000 түп «Голден Делишес», 5000 түп «Джонатан», 2650 түп «Ренет Семиренко» ағаш сорттары отырғызылып, күтімге алынған.Ал қаладағы ахуалды туралы қала әкімінің орынбасары Пахуатдин Шамұратов айтты.<blockquote>– Облыс әкімінің су тапшылығын ескере оты­рып күріш көлемін азайту бойынша хаттамалық тапсырмасына сәйкес, күріш дақылы 3856 гектарға егілді. Осыған байланысты, қалаға қарасты ауыл шаруашылығы құрылымдарына инженерлік жүйеге келтірілмеген деңгейі биік жерлерге күріш дақылын екпеу, ауыспалы егіс көлемін сақтау, суды аз қажет ететін дақылдарды егу туралы ескертпе хаттары таратылып, түсіндірме жұмыстары жүргізілді. Нәти­жесінде былтырғы жылмен салыстырғанда күріштің көлемі 280 гектарға кем егілді. Өткен жылы бұл дақыл 4136 гектарға егілген болатын. Биыл күріштің орнына суды аз қажет ететін би­дай 368 гектарға, арпа 2 гектарға, қант құмайы 40 гектарға, 224 гектарға мал азықтық жоңышқа, 990 гектарға бақша дақылдары егілді. Әрине, мұның барлығы ауыспалы егістіктің ережесін сақтай отырып, орындалған жұмыс.Ауыл шаруашылығы өнімдерін ұлғайту мақса­тында су үнемдеу технологияларымен 6 гектарға тамшылатып суару әдісі арқылы ауыл шаруашылығы дақылдары егілді. Атап айтқанда, Ыбырай Жақаев атындағы Қазақ күріш ғылыми-зерттеу институты осы әдіспен 0,5 гектарға көкөніс, 3 гектарға бақша өнімдерін екті. Ал «Іскер М» &nbsp;ЖШС бастамасымен 2,5 гектарға жүгері егілді. Су жетіспеушілігі мәселесін жоюға арналған бас­тамалар жетерлік. Өйткені егіс алқабын күтіп-баптап, реттеп отырмаса, жердің де тозып кету қаупі болады. Сондықтан осындай мәселелердің алдын алуда біз жоспарлы әрекет еттік Биыл 350 гектарға лазерлік тегістеу жұмыстарын жүргізу жоспарланып, 650 гектар тегістелді. Яғни, жоспардан 186 пайызға артық орындадық. Осылай реттеле берсе, көп жердегі егіннің өнімділігін артыруға мүмкіндік бар. Мәселен, тегіс жерге егілген күріштің өнімділігі жоғары болады. Себебі су егінді тегіс басады.&nbsp;Дер кезінде күріш те бас алады. Бұл – тәжірибеде бар нәрсе, – дейді әкім орынбасары.</blockquote>Сыр диқандары суды үнемдеу мақсатында соңғы 10 жыл көлемінде күріш егістігінің 55 мың гектарын лазерлік тегістеген. Алдағы 5 жылда бұл 72 мың гектарға жеткізіледі деп жоспарлануда. Биыл су үнемдеу технологиясын пайдалану 4,4 мың гектарға жетсе, алдағы 5 жылда оны 24,2 мың гектарға арттыру жоспарлануда. Биыл «Таң ЛТД» серіктестігі қытайлық компаниямен бірлесіп, Шиелі ауданында 800 гектарға тамшылатып суару әдісімен дән жүгері еккен. 2025-2026 жылдары тамшылатып суарылатын егістік көлемі 3 мың гектарға дейін ұлғайтылады. Сол сияқты Қазалы және Арал аудандарында ауқымды жобалар бастау алды. Арал ауданындағы «Кэмел Про» шаруа қожалығында 830 гектар жоңышқаны, Қазалы ауданындағы «РЗА Агро» серіктестігінде 184 гектар мал азықтық дақылдарды жаңбырлатып суару жобалары бар.Аймақтағы аграрлық саласын қарқынды дамытуда мемлекеттік бағдарламалар игілігнін де айта кеткен жөн. Соның нәтижесінде өңірде бірқатар ауыл шаруашылық жобалары жүзеге асуда. Мәселен, мемлекеттік бағдарламалар аясында есік алдына жылыжай кешенін дамытуға өткен жылы 33 млн теңгені құрайтын 5 жоба мақұл­данған. Атап айтқанда, «Ауыл аманаты» бағдар­ламасы бойынша 23,5 миллион теңгеге 920 шаршы метрді құрайтын 3 дана жылыжайдың құрылысы аяқталып, егін егу жұмыстары жұмыстары жүргізілген. Оның екеуі Ақсуат ауылдық округінде болса, біреуі Қарауылтөбеде жүзеге асуда. Сонымен қатар «Қызылорда өңірлік инвестиция орталығы» арқылы Талсуат ауылдық округінен 9,5 миллион теңгеге 457 шаршы метрді құрайтын 2 дана жылы­жайдың құрылысы аяқталып, іске қосылған. Бұл жылыжайларда қияр егілді.Егін егу, оны күтіп баптаудан бөлек бітік шыққан өнімді суыққа қалдырмай дер уақытында жинап алуда шаруалар үшін маңызды іс. Бұл ретте ауыл шаруашылығы техникаларының сақадай сай болғаны дұрыс-ақ. Биылғы күзгі егін жинау науқанына 20 дана жатка, 29 дана комбайн, 83 дана трактор, 21 дана трактор тіркемесі мен 5 дана жүк көлігі қатысқан. Қажетті дизель отынынын жеткізуші оператор ретінде «РК Мұнай» және «Жибек Жолы ЛТД» ЖШС мекемелері белгіленіп, ауыл шаруашылығы құрылымдарының қажеттіліктеріне сәйкес босатылған. Нарық бағасынан әлдеқайда төмен бағада, бір литрі 250 теңгеден беріліп қарапайым шаруа үшін көп жеңілдік жасалған. Күзгі егін жинау жұмыстарына 188 тонна дизель отыны жұмсалған. Алдағы уақытта күріштің көлемін тұрақтандыра отырып, әртараптандыру бағытында мал азықтық, майлы және әлеуметтік маңызға ие көкөніс, картоп, бақша дақылдарының көлемін арттыру, су үнемдеу технологиясын өндіріске енгізуді жандандыру, ауыл шаруашылығы техникаларының машина-трактор паркінің жаңаруын 5 пайызға дейін жеткізу, жылыжай шаруашылығын және қарқынды алма бақтарын дамыту, өңдеу кәсіпорындарын, оның ішінде майлы дақылдарды өңдеу,мал шаруашылығы өнімін өндіру мақсатында жұмыс жасап тұрған кәсіпорындардың қуаттылықтарын арттыру және дамыту мен жақсарту бағытындағы жұмыстар жүргізілмек.&nbsp;Әрине, мұнан бөлек те байыпты бастамалар қолға алына береді. Бастысы, қандай бастама болса да, өнімді арттыруға негізделеді.Фото: smartnews.kzД.Қырдан

Аграрлық салада ауқымды жұмыс атқарылды 

<a href="https://kyzylorda-news.kz/">Kyzylorda-news.kz</a> &nbsp;Заман талабына сай, халықтың сұранысына қарай кәсіп ашу бүгінде жақсы жолға қойылған. &nbsp;Ең бастысы ниет пен іскерлікке, қаржыға байланысты. Қандай да болсын кәсіпті қолға алып, дамытамын деген адамға мемлекет тарапынан көптеген көмек көрсетілуде. Қазақтың ұлы ақыны Абай Құнанбайұлы «Неге арналсаң, соны істе» деп бекер айтпаса керек-ті.Сырдария ауданына қарасты берекелі Бесарықта жұмыстың көзін тауып, жеке кәсіппен айналысып жатқан кәсіпкер жетерлік. Сондай жанның бірі де бірегейі – Гүлзира Рсым. Бүгінде ерекше кәсіп иесі бір рет пайдаланатын жұмыс қолғабын шығаруды бастады. Кәсіпкер «Қызылорда» өңірлік инвестициялық орталығы» микроқаржылық ұйымы» ЖШС-нің ауыл­шаруашылық өнімдерін өңдеуді дамытуға арналған пилоттық жоба арқылы қаржылық қолдау тапқан.<blockquote>– Негізі бұл кәсіпті бастауды жолдасым екеуі­міз біраздан бері ойланып жүр едік. «Көз – қорқақ, қол – батыр» демекші, ойлана келе тұрмысқа қажетті бір рет қолданатын қолғап шығармаққа бекіндік. Өйткені қазіргі таңда қалада көпқабатты үйлер салынып, құрылыс жұмыстары қарқынды жүргізілуде. Сондай-ақ ауыл тұрғындары да шаруа­шылыққа көптеп қажет етеді, әрі қолданады деп ойлаймыз. Осылайша құжаттарды реттеп 6 млн теңге несие алдым. Кәсіпті бастағанымызға бір айдай уақыт болды, – дейді кәсіпкер Гүлзира Ерназарқызы.</blockquote>Өз кәсібін бастаған ерлі-зайыптылар 2,5 мил­лион­ға «JOMDA» қолғап тоқитын екі тігін машинасын алса, 1 миллион теңгеге жұмсақ жібек жіп, резинка алған. Қолғапқа қажетті заттарды Қытай мемлекетінен тапсырыспен алдыруда. Тігін машинасы сағатына 10 жұп қолғап шығарса, екі тігін машинасы 20 жұп, бір күнде 230-250 жұп, аптасына 1500 қолғап шығаруға болады екен.<blockquote>– Қолғап таза мақтадан тігілген соң қолды терле­тіп, аллергия тудырмайды. Бір рет қолдануға арналғандықтан, бағасы да арзан. Бір жұбы – 80 теңге. Ал базарда мұндай қолғаптың бағасы ең төменінің өзі 100-110 теңгені құрайды. Бұл қолғап құрылыста, шаруашылық жұмысын жасағанда қолды сүйелденуден, жарақаттан сақтайды. Қазір өнімді өткізудің жолын қарастырып жатырмыз және алға қойған жоспарымыз да көп. Егер жасап жатқан кәсібіміз дөңгеленіп кетсе, дәнекерлеу, балқыту секілді құрылыс жұмысына киетін, мал терісінен тігілген қолғап шығару да ойда бар. Сондай-ақ арнайы жұмыс киімін тігу жоспары­мызда бар, – дейді кәсіпкерге қолдау білдіріп жүрген жұбайы Самат Ақпамбетов.</blockquote>Кәсіп нан сұрамайды, өзі тамақтандырады. Жұмысын жақын арада бастағанына қарамастан бүгінде тұрақты тұтынушылары да бар. Сонымен қатар кәсіпкер облыстағы құрылыс фирмаларымен келісім жасауда. Ал қолғапты сатып алып пайдаланған ауылдастары өз ризашылықтарын білдіруде.Шаруасын жүргізіп, бір-біріне қолдау білдіріп отырған жұбайлар ауыл балаларын біліммен сусындатып жүрген ұлағатты ұстаздар. Білімнің қарашаңырағы №147 орта мектептің білікті мамандары Гүлзира Рсым мен Самат Ақпамбетов бүгінде 5 бала тәрбиелеп отырған үлгілі отбасы. Үлкені ата-анасының жолын қуып ағылшын-қытай мұғалімі мамандығында оқып жатса, үшеуі оқушы, кенжесі балабақшаға барады.Кәсібін бастауға мемлекет тарапынан қолдау тауып, оны іске асырған берекелі шаңырақтың отағасы мен отанасының алға қойған жоспары анық, мақсаты айқын.Таңшолпан ШАНЖАРХАНОВА

Ерекше кәсіп иесі

<a href="https://kyzylorda-news.kz/">Kyzylorda-news.kz</a> Биыл облыс бойынша «Руханият жылы» жарияланған болатын. Жыл басынан бері атаулы жылға байланысты Сырдария ауданында жоспарға сәйкес түрлі мәдени іс-шаралар өтуде. Сонымен қатарғы ауылдық округтердегі мәдениет үйлері мен клубтарының жұмысы да назардан тыс қалмады. Осы орайда оқырмандарға Нағи Ілиясов ауылдық округіндегі мәдениет ошағының атқарған жұмысы туралы арнайы сұхбатты ұсынамыз. Нағи Ілиясов ауылдық округі мәдениет үйінің директоры Нұрбол Тұранов ауыл өнерпаздарының тыңғылықты жұмысы мен жеткен жетістіктері туралы &nbsp;әңгімелейді.– Нұрбол Мұхтарұлы, ауылдағы мәденеит пен руханияттың мекені саналатын өнер ордасының іргесі қашан қаланған, алғашқы сұрағы­мызды дәстүрлі түрде мәде­ниет үйінің тарихынан баста­сақ…– Нағи Ілиясов ауылдық мәде­ниет үйі 1974 жылы тиіптік жоба­да салынып, 1976 жылы пайдалануға берілген. Мәдениет үйінің ғимараты қос қабаттан тұрады. Елу жылдан бері өзгерістер мен жаңашылдықтар орын алғаны белгілі. Мәдениет ошағы ауыл халқы мен сырттан келетін қонақтарға қалытқысыз қызмет көрсетіп келеді.– Мәдениет үйінде қызмет ететіндер мен үйірмелердің жұмысы қалай жүріп жатқанын айтсаңыз?– Қазіргі таңда ұжымда 10 үйірме жұмыс істейді. Сондай-ақ 10 қызметкер бар. Хор, домбыра, би, көркемсөз, драма, ән үйірмелерінің жұмысы жолға қойылған. Жалпы мен бұл мәдениет үйіне 2020 жылдан бастап басшылық жасап келемін. Директорлық қызметім карантин уақытымен тұспа-тұс келді. Нақтырақ айтқанда, көпшілікпен жанданған жұмысты 2022 жыл­дан бастадық деуге негіз бар. Жалпы бұған дейін ауылдық мәдениет үйінде 6 үйірме болған. Қазіргі таңда еліміздің бола­шақ өнерпаздарын даярлау жолында ауыл балаларына 10 үйір­ме қызмет көрсетіп келеді.– Мәдениет пен өнер адамдары үшін маңызды жыл аяқталуға жақын. Жыл бойына өткізіліп жатқан іс-шаралар мен жетістіктеріңізге тоқталсаңыз?– «Адал адам» мәдени-тәрбие орталығы жобасы аясында жыл басынан бері ауқымды жобалар жүзеге асырылып келеді. Атап айтар болсақ, ауылдық мәдениет үйі жанынан құрылған үйірмелер мен «Сұлу-ай» шығармашылық орталығының өнер­паздары бірлесе отырып, кең көлемде ауқымды концерттік бағдарлама өткізді. Мерекелік іс-шаралар мен жоспарлы байқауларды айтпағанда, өкізіліп жатқан ауқымды іс-шара­­лар да жеткілікті. Жақында өткен өнер фестивалі ауылы­мыздың өнерпаздарын, мәдениет саласының беталысын айшық­тап көрсетіп берді. Аталған фестивальге ауылымыздың бетке ұстар азаматтарынан бастап, аудан көлеміндегі ардагер­леріміз түгелдей қатысып, жақсы кештің куәсі болды. Облыс­тық күйшілер байқауының жоғары деңгейде өткізілуі де ауызбіршіліктің үлгісін көрсетті. Еңбек аллеясында кешкі уақытта ауыл халқының бос уақытын тиімді өткізу мақсатында поэзия кеші, концерттер өткізіледі. Ауылдық клуб үйі «Рухани қазына» республикалық байқауының облыстық кезеңінде топ жарып, республикалық кезеңде облыс намысын қорғауға дайындық үстінде. Ауқымды жобаларда озық шығып, аудан, облыс намысын үлкен сахнада қорғау біз үшін үлкен мәртебе әрі жауапкершілік.– Сіз ауылдық мәдениет үйіне төрт жылдан бері басшылық етесіз. Осы жылдар ішінде ауыл мәдениетін қаншалықты жаңалық енгізе алдыңыз? Жаңа жобалар болды ма?– Нағи Ілиясов ауылдық округіндегі мәдениет үйін сонау жылдан бері ұзақ уақыт Күләш Құдабаева апайымыз басқарған. Ол кісі мәдениет үйінің ыстығы мен суығына төзіп, негізін қалаған кісі деп айта аламыз. Жалпы өзімнің жұмысыма тоқталар болсам, соңғы жылдары ауыл өнерпаздары республикалық деңгейдегі үлкен байқауларда топ жарып, ауданның ғана емес, облыстың намысын қорғап жүрген жайы бар. Жоғарыда атап өткендей, үйірмелер санын көбейтіп, жұмысын жандандырып, ауыл балаларын руханият саласына кеңінен тартудамыз. Жаңа жобалар бастау алып, игілігін халық көріп келеді. Біздің «Ақ әжелер» ансамблі туралы да айтпай кетуге болмайды. Биыл құрылғанына 15 жыл толып отырған ансамбль республикалық деңгейдегі байқауларға қатысып жүр. Қазіргі таңда әжелермен бірге шырқап, бірнеше өлең жаздырдық. Мәдениет үйінің техникалық базасы да жаңартылып келеді. Қашан да көмегін аямайтын ел ағаларының демеушілігімен алда бірнеше жоспарлы жұмыстар атқарылады деп күтілуде. Жалпы өнер адамының бағасын беруші – халық. Еңбегіміз, қызметіміз халыққа арналады. Бағасын да көпшілік береді.– Нағи Ілиясов ауылдық мәдениет үйінің белді өнерпаздары «Ақ әжелер» ансамбілі. &nbsp;Әжелердің салған әнін тыңдап жүрміз. Керемет. Өнерлі әжелердің де бағындырған белестері қаншалықты биік болды?– Иә, «Ақ әжелер» ансамблінің құрылғанына биыл 15 жыл толып отыр. Осы орайда ауқымды іс-шаралар жоспары да бар. Ансамбль 2008 жылы ауылдық мәдениет үйінің жанынан құрылған. Халықтық атағы бар ұжым құрамында түрлі сала маман ардагерлерінен құралған күміс көмей әншілеріміз өнер көрсетеді. Жақында республикалық телевизиялық байқауда, республикалық байқауда топ жарып, жүлдемен оралған ұжымның жетістігі туралы аудандық газетте арнайы мақала жарияланған болатын. 15 жылдық мерейтой қарсаңында Абзал, Дархан Ералиевтердің қолдауымен, Ақтөре Ибрагимұлы бауырымыздың үлкен еңбек сіңіруімен «Әжелер ән салады, жұртшылық тамсанады» атты кітап жарыққа шықты. Күміс көмей, жезтаңдай әжелер аудандық көлемдегі іс-шараларда да белсенді.<img src="https://knadmin.beoblood.kz/uploads/m_deniet_ji_6f3aa1ede7.jpg" alt="мәдениет үйі.jpg">– Нағи Ілиясов ауылы – республикаға белгілі, гүлденген, үлгілі ауыл. Ауылда Мемлекет басшысы да мейман болды. Мұнан басқа Үкімет басшысы мен Үкімет мүшелері, депутаттар құрметті қонақтардың көпшілігі осы ауылға ат басын бұрады. Осы ретте жауапты жұмысты үйлестіру қиындық туғызбай ма?– Өткен жылы Президентіміз Қасым-Жомарт Кемелұлы Тоқаев ауылымызға келіп, оң бағасын беріп кетті. Одан бөлек Министр, лауазымды азаматтар, ел ағалары ауылымызға ат басын тіресе, міндетті түрде мәдениет үйіне арнайы келеді. Жақында ауылымызда телехикая да түсірілген болатын. Бұның бәрі өз кезегінде қызық. Десек те үлкен жауапкершілікті талап етеді. Ең бастысы, халыққа, өнерге адал, жауапкершілік жүгін сезініп жұмыс істеу керек.– Алдағы жоспарларыңыздың ауқымы қандай, бөліссеңіз…– Жоспар көп. Ауыл мәдениетін жан-жақты жандандыру – басты мақсат. Ауыл негізінен өнердің ордасы ғой. Небір талант та, өнерпаз да, басқа саланың майталмандары да ауылдан нәр алып шыққан. Осы орайда осындай таланттарды та­уып, оларды шыңдап, болашақта елімізге танымал тұлғаларды шығаруды арман-мақсат етеміз. Үйірмелер жұмысын жандандыруды, жаңа үйірмелер ашуды жоспарлаудамыз. Мысалы, шешендік өнерді, ұмыт болып бара жатқан айтыс өнерін насихаттайтын, үйрететін үйірмелер болса деген мақсатымыз бар. Қазіргі таңда, қарап отырсаңыз, шешендік өнерді дамыту кенже қалып бара жатқандай. Осы мәселелерді оңтайлы шешу үшін өз үлесімізді қоссақ дейміз. Сондай-ақ үлкен мақсатымның бірі – ауылда әуез мектебінің филиалын ашу. Игі бастама біздің ауыл­да да қолға алынса, кәсіби мамандармен бірге балалардың шығармашылығын шыңдасақ, солай болашақта ауылымыздан танымал тұлғаларды шығарсақ деген үлкен жоспарымыз бар.– Нұрбол Мұхтарұлы, еліміздің мәдениеті мен өнерін, соның ішінде ауыл мәдениетін жандандырудағы әрбір бастамаңызға сәттілік тілейміз! Өнерпаздарымыздың өнері өрге жүзсін!– Әркез ақпараттық қолдау көрсетіп отыратын газет ұжымы­на алғысымды білдіремін. Биыл аудандық газеттің өз жұмысын бастағанына 85 жыл толып отыр екен.&nbsp;Шығармашылық табыс, жұмыстарыңызға жеміс тілеймін!ӘңгімелескенАружан МҰХАНБЕТҚАЛИ

Нұрбол Тұранов:  Ауыл мәдениетін жан-жақты жандандыру – басты мақсат

<a href="https://kyzylorda-news.kz/">Kyzylorda-news.kz</a> Сырдария ауданы әкімдігінің мәжіліс залында аудан әкімі Берік Сәрменбаевтың төрағалығымен актив жиыны өтті. Кадрлық өзгеріске байланысты ұйымдастырылған жиынға "Сыр медиа" ЖШС бас директоры Марат Аралбаев, аудандық ардагерлер кеңесінің төрағасы Мұса Келдібаев, Қоғамдық кеңес төрағасы Марат Еспенбетов, бөлім басшылары, аудандық "Тіршілік тынысы" газетінің ұжымы мен сала ардагерлері қатысты.Актив отырысында аудан басшысы Берік Әбдіғаппарұлы мен "Сыр медиа" ЖШС бас директоры Марат Жайылханұлы 2019 жылдан бастап аудандық газет редакциясын абыроймен басқарып, бүгінде "AMANAT" партиясының аудандық филиалының Атқарушы хатшысы қызметіне ауысқан Ақтөре Ибрагимұлына Алғыс хат табыстады.Жиында аудан басшысы Сырдария аудандық "Тіршілік тынысы" газетінің бас редакторы қызметіне журналист Аружан Мұханбетқалидың тағайындалғанын айтып, жаңа қызметіне сәттілік тіледі.Жаңадан тағайындалған аудандық газеттің бас редакторын "Сыр медиа" ЖШС бас директоры Марат Аралбаев таныстырды.Айта кетейік, Аружан Мұханбетқалиқызы 1997 жылы Сырдария ауданы, Тереңөзек кентінде туған. 2015-2020 жылдары Алматы қаласындағы әл-Фараби атындағы Қазақ ұлттық университетінің филология факультетінде білім алған. 2020-2022 жылдары Қызылорда қаласы, Қорқыт ата университетінде жоғарғы білімнен кейінгі бөлімде білімін жалғастырып, "Гуманитарлық ғылымдар магистрі" атағын алған. Журналистика саласында облыс, республика көлемінде ауқымды жетістіктерге жетіп жүрген жас журналист өзінің еңбек жолын республикалық "Қазақ" газетінен бастаған. 2021 жылдан бастап Сырдария аудандық "Тіршілік тынысы" газетінің тілшісі, 2023 жылдың қараша айынан аудандық газет бас редакторының орынбасары қызметін атқарған. 2024 жылдан бастап Қазақстан Журналистер Одағының мүшесі.Сондай-ақ актив отырысында "Тіршілік тынысы" газеті бас редакторының орынбасары болып журналист Балтабай Аябекұлы тағайындалғаны айтылып, аудан әкімі редакция ұжымына табыс тіледі.Жиын соңында аудандық ардагерлер кеңесінің төрағасы М.Келдібаев, халықаралық "Қазақ тілі" қоғамдық бірлестігінің аудандық филиал төрағасы Ш.Нұрсейіт, редакцияның бастауыш ардагерлер ұйымының төрағасы М.Қалмұратұлы тілектестігін білдірді.<img src="https://knadmin.beoblood.kz/uploads/1_402be5fa46.jpg" alt="1.jpg"><img src="https://knadmin.beoblood.kz/uploads/2_b7b2594b08.jpg" alt="2.jpg"><img src="https://knadmin.beoblood.kz/uploads/4_59e524533a.jpg" alt="4.jpg">

"Тіршілік тынысы" газетінің бас редакторы тағайындалды

<a href="https://kyzylorda-news.kz/">Kyzylorda-news.kz</a> 15 қараша – Ұлттық валюта күніне орай қала әкімдігінде салтанатты жиын өтті. Шарада қала әкімінің орынбасары Дархан Тұрсынбаев қаржы саласының бірқатар қызметкеріне қала әкімінің «Алғыс хатын» табыстап, мерекелік лебізін білдірді.- Еліміздің экономикалық қуатын еселеп, тұрғындардың әлеуметтік жағдайын арттыру қаржы саласындағы жемісті еңбекпен тікелей байланысты. Бүгінгі таңдағы бұл жетістіктерге қызылордалық қаржы саласы қызметкерлерінің де қосқан үлесі аз емес. Осы орайда Сіздерді кәсіби мерекелеріңізбен шын жүректен құттықтаймын. Еңбектеріңіз әрдайым табысты бола берсін. Ел игілігі жолында қарышты қадаммен жаңа жетістіктерге жете беріңіздер, - деді Дархан Есалыұлы.Айта кету керек, ұлттық валютамыздың айналымға енуі - Қазақстанның экономикалық кеңістігін қалыптастырып, халықаралық аренада танылуына ерекше әсер етті. Күрделі кезеңдерді еңсере отырып, Теңгені енгізу арқылы қаржылық тәуелсіздікке жол ашылды.<img src="https://knadmin.beoblood.kz/uploads/2_9cb0e0594e.jpg" alt="2.jpg"><img src="https://knadmin.beoblood.kz/uploads/3_e6be6f5d69.jpg" alt="3.jpg"><img src="https://knadmin.beoblood.kz/uploads/4_8ee7868c24.jpg" alt="4.jpg">

Қазақстан және Қызылорда облысының жаңалықтары