<a href="https://kyzylorda-news.kz/">Kyzylorda-news.kz.</a>&nbsp; Бүгін Белкөл кентінде теміржолдың екі бетін байланыстыратын жаяу жүргіншілер көпірі пайдалануға берілді.Ел игілігіне арналған көпірдің ашылу салтанатында сөз алған шаһар басшысы «Бұл көпір халықтың көптен бергі сұранысы бойынша салынып, тұрғындардың теміржолдан өту қауіпсіздігін қамтамасыз етуге мүмкіндік береді.Көпір құрылысы өткен жылы басталды. Құрылыс жұмыстарын сапалы әрі мерзімінде жүргізгені үшін мердігер мекеме «Голден сити» жауапкершілігі шектеулі серіктестігінің қызметкерлеріне алғысымды білдіремін.Ұлт даналығында «құдық қазған, көпір салған және ағаш еккен» деген үш сауап бар. Бүгінде біз сол сауаптың ең күрделісі және маңыздысын орындадық. Мұны адам тағдырына жауаптылық, қолайлы мүмкіндік жолы деп есептеймін» – деді.Бірнеше жылдан бері көтеріліп келген мәселеге нүкте қойылып, қолайлы жағдай жасалғанына белкөлдіктер ризашылықтарын білдіріп, ел азаматтарына ақ батасын берді.Айта кету керек, қазіргі таңда аймақ басшысының қолдауымен қала көлемінде жол инфрақұрылымын дамыту мақсатында ауқымды жұмыстар атқарылуда.Биыл қала мен оған қарасты кент және ауылдық округтер бойынша жалпы сомасы 10 млрд. теңгеге 231 көше жөнделеді. 19 көшеге жаяу жүргіншілер жолы салынады. &nbsp;Ол үшін облыстық бюджеттен 690 млн теңге бөлінді. Сонымен қатар, Ғани Мұратбаев және Яссауи көшелерінің қиылысындағы теміржол арқылы өтетін жаяу жүргіншілер көпірі құрылысына Ұлттық қор және облыстық бюджеттен 320,6 млн теңге бөлініп, алдағы айларда құрылыс-монтаж жұмыстары бастау алады.Жанқожа батыр көшесі арқылы өтетін темір жол өтпесін салуға жоба-сметалық құжаттамасын сараптама қорытындысымен әзірлеуге облыстық бюджеттен 51,2 млн теңге бөлініп, құжаттары рәсімделуде.Бәйтерек тұрғын ауданына «Қызылжарма» каналы арқылы көпір құрылысы да қарқынды жүргізілуде.

Жаяу жүргіншілер көпірі ел игілігіне берілді

<a href="https://kyzylorda-news.kz/">Kyzylorda-news.kz.</a> Руханиятымыздың алтын қазығы – қазақ халқының ғасырлар бойы қалыптасқан әдет-ғұрпы, салт-дәстүрі, мәдениеті мен өнері екендігі көпке белгілі. Тек қала орталықтарында ғана емес, ауылдарда да мәдениет пен өнердің жаңғыруы сондағы клубтар мен мәдениет үйлеріне қатысты. Қалаға қарасты ауылдық округтердің мәдениет саласындағы жетістіктері қандай? Бүгінде ауыл мәдениетін жоғары деңгейге жеткізу үшін қандай ауқымды жобалар жүзеге асуда? Осы сұрақтарға жауап алу мақсатында Ақсуат ауылдық округінің мәдениет үйіне&nbsp; бет алдық.Үлгілі елді мекенАқсуат ауылдық округіне осымен бірнеше рет жол түсті. Бұған дейін ауылдың өсіп-өнуі, кәсіпкерлігі жайында сөз еткенбіз. Бүгін рухани тұрғыда дамуына назар аударғанды жөн көрдік. Алдымен&nbsp; тарихтан бастасақ. Деректерге сүйенсек, Ақсуат ауылының негізі 1928 жылы қаланған. Ауыл алғашқы ауыл шаруашылығы артельдерін ұжымдық шаруашылықтарды ұйымдастыруға қатысқан Ешпан Жанбосыновтың атымен Ешпан ауылдық кеңесі аталған. 1928-1932 жылдар аралығында құрылған майда серіктестіктер 1934 жылы төртінші ауылдық кеңесі бойынша Жасқайрат, Жаңатұрмыс, Киров, Қызылорақ, Қызылқұм, Қара Қожа, Батбаққара ұжымдық шаруашылықтары болып ұйымдасқан. 1938 жылы мамыр айында бұл 7 шаруашылық бірігіп, Жасқайрат, Жаңатұрмыс, Кировтай 3 шаруашылық құрылды. Одан кейін бұл үшеуі іргелі шаруашылық Киров колхозы болып құрылды. 1972 жылы колхоз көкөніс және сүт өндіретін шаруашылыққа айналды.1993 жылдың ақпан айында халық депутаттары облыстық кеңесінің қаулысымен Сырдария ауданы Ақсуат ауылдық кеңесі болып аталды. Ал бір жылдан соң елді мекенге Кеңес Одағының батыры Жақыпбек Махамбетовтің аты берілді. 1997 жылдың маусымында ауыл Сырдария ауданы құрамынан шығарылып, Қызылорда қаласына қарады.Ауылдағы көнекөз қариялар – тірі тарихтың көзі. Олардан ауыл жайлы мәліметке толық қанығуға болады. Білім саласының ардагері Қадыр Әмзеев «Ауылым сұлу Сырдың жағасында» атты кітап жазып шығарған. Мұнда елді мекеннің дамуына еңбегі сіңген кісілер туралы толық жазылған. Ақсуат жайлы жазылған кітап жан-жақты зерттелген. Ал «Ауылым» атты ән округтің әнұраны болып қабылданған.Бүгінгі Ақсуат бейнесі өзгерген. Қазір елді мекен жаңарған. Осындай жетістік нәтижесінде 2014 жылы «Үлгілі елді мекен» деген атаққа ие болды. Жан-жақты даму жолынан көрінген ауылдың мәдениеті де жоғары деңгейде.Таланттар ауылдан шығады&nbsp;«Театр – киім ілгіштен басталады» демекші, ауыл мәдениеті де клубтан басталады.&nbsp; Ауылдың мәдениетін қалыптастыруға үлесін қосқан Жақыпбек Махамбетов ауылдық клубы 2013 жылы пайдалануға берілген. Одан кейін 2014 жылдың тамыз айынан бастап Ақсуат ауылдық округі әкімі аппараты жанындағы «Ақсуат мәдениет үйі» мемлекеттік коммуналдық қазыналық кәсіпорны болып құрылған. Ауылдағы мәдениет үйі – қаншама адамға ізгілік дәнін сеуіп, өнерді сүюге тәрбиелеген. Қазіргі таңда мұнда 6 үйірме жұмыс істейді. Оған 75 адам қатысады.&nbsp;<blockquote>«Мәдениеттің мәйегі өнер арқылы дәріптеліп, халықтың құлағына жетіп жатады. Мұндағы атқарылып жатқан игі істер – ұлттық дәстүрді дамыту, өнер мен мәдениеттің өмірмен өзектестігін бағамдау, өнерді өнеге тұтқан елдің рухани дүниесін байыту мақсатын көздейді. Үйірмелер өнерлі жастардың өнерге деген қызығушылығын оятып, үлкен сахнаға баулу үшін жас өрендермен тығыз байланыста. Мәселен, «Бұлбұл»&nbsp; ән&nbsp; үйірмесі&nbsp;ән&nbsp; &nbsp;айтуға,&nbsp; танылмай&nbsp;жүрген&nbsp; өнерпаздарды&nbsp; халық-қа&nbsp;таныту,&nbsp;өнерлерін шыңдау,&nbsp; бейімдеу бағытында жұмыс істеуде. Үйірме&nbsp; мүшелері&nbsp;қалалық,&nbsp; облыстық,&nbsp; республикалық&nbsp;байқауларға қатысып,&nbsp; жүлделі&nbsp; орындарға&nbsp;ие&nbsp; болды. Атап айтсақ, осы үйірменің қатысушысы Дильназ Жаханова көптеген биіктен көрініп жүр. Ол ХХІV облыстық «Бозторғай» конкурсында ІІІ орын, «Сырдария – достық өзені» атты республикалық әншілер байқауында ІІІ орынмен марапатталған. Сондай-ақ VI республикалық «Жарық жұлдыз» атты балалар өнер байқауында «Эстрада вокал» жанрында өнер көрсеткені үшін «Балдаурен» ән үйірмесінің қатысушысы Орынбай Асылымның өнері І орынға лайық деп танылды. Сонымен қатар «Көркемсөз»&nbsp; оқу&nbsp; үйірмесі балаларға тіл байлығын үйрету,&nbsp; келешекте&nbsp;қаламгерлерлікке бейімдеу мақсатында ашыл-ған.&nbsp; «Қызғалдақ»&nbsp;би&nbsp; үйірмесі де қалалық іс-шараларда өз өнерлерін көрсетіп келеді. Олар Алматы қаласында өткен «Наурыз айы туғанда!» атты І халықаралық өнер мен білім фестиваль-конкурсында І дәрежелі лауреат атанды», – дейді мәдениет үйінің әдіскері Гүлназ Алданазарова.</blockquote>Таланттар ауылдан шығатыны осының дәлелі. Ал бұл таланттарды таныту үшін мәдениет үйі қызметкерлері аянбай еңбек етіп келеді. Атап айтсақ, олардың жетістіктері өз алдына бөлек. Мәселен, «Ел іші – өнер кеніші» атты қалаға қарасты кент және ауылдар арасында ұйымдастырылған дәстүрлі қалалық байқауда «Ақсуат мәдениет үйі» ІІІ дәрежелі дипломмен марапатталған. Қармақшы ауданында өткен «Жеті қазына» атты ашық аспан астындағы клуб қызметкерлерінің облыстық байқауында мәдени ұйымдастырушы Еркеғали Нұрғали ІІІ орынға лайық деп танылған.<blockquote>«Мәдениет үйінде өтіп жатқан барлық шараның тың ойлы, жаңашылдықпен өтуіне өз үлесімізді қосып жүрміз. Осы жолда жеткен жетістіктер көп. Жасаған еңбегіміздің нәтижесінде шәкірттер биіктен көрінуде. Бізге бұдан асқан марапат жоқ. Әр істі бастарда одан шығатын нәтижеге назар аударамыз. Жас өрендермен, халықпен жұмыс істеу біздің міндетіміз. Мәдениет үйінің есігі жастарға қашанда ашық. Тың ой, идеясы бар ортаны қа-лыптастырып, халықты мәдени шаралармен сусындатып, жаңашылдықты енгізу – біздің басты мақсатымыз», – дейді мәдениет үйінің әдіскері.</blockquote>Әнімен әдемі әжелерАқ жаулықты әжелер – ұлтымыздың ұлағат тұтар ардақтылары. Оларға қандай жылы сөз айтсақ та, сый-сияпат көрсетсек те артық етпейді. Олардың ел алдында айдай болып жарқырап жүргені жүрегімізге жылулық сыйлайды. Қазіргі уақытта көптеген ауылда әжелер ансамблі құрылып, ұлттық өнерді паш етіп жүр. Солардың бірі – ауылдағы «Ақ бата» әжелер ансамблі.Жылдан-жылға ұжым өнеріне ынтық көрермендер қатары артып келеді. Әжелер тобы облыстық, қалалық бәйгелерде топ жарып жүр. Ансамбль жетекшісі әрі әншісі Жәмила Тәжікова:<blockquote>«Бұл – халықтың сұранысы. Қазір жұртшылық жанды дауысқа, ұлттық өнерге құштар. Ансамбль құрылғалы бері ауылда екі рет жеке концертімізді қойдық. Сол кезде жұртшылықтың ұлттық өнерге сусындап қалғаны байқалды. Қошемет жақсы болды. Қазір ауыл әкімі, жеке кәсіпкерлер, мәдениет үйі демеушілік жасайды», – деді ағынан жарылып.</blockquote>Ансамбль мүшелері әр салада қызмет еткен, бүгінде зейнетке шыққан әжелер қауымы. Бүгінде шаңырақтарының құты мен берекесін кіргізіп отырған аяулы жандар. Алғашқыда олардың қатары аздау болатын. Уақыт өте келе ниет білдірген әжелер көбейді. Әрбірі қазақы салт-дәстүрді де, халық әндерін де жақсы біледі<blockquote>«Жанды дауыста баян, домбыра секілді аспаптардың сүйемелдеуімен орындаймыз.&nbsp; Ансамбль мүшелері жеке-жеке де ән айтады. Олардың ішінде қазақтың халық әндері, композитор Ш.Қалдаяқовтың туындылары бар. Ән орындап қана қоймаймыз, халықтың салт-дәстүрлерін насихаттаймыз. Көрініс көрсетеміз, жүн сабап, ұршық иіріп, диірмен тартамыз, киіз басу, сырмақ сыруды да ұмытпаймыз. Мысалы, ана туралы ән айтсақ ананың балаға деген махаббатын, баланы бесікке салу, тұсау кесу сияқты дәстүрлерді дәріптейміз», – дейді Жәмила әжей.&nbsp;</blockquote>Бұл ұжым облыс, қала көлемінде өткізілетін мәдени шаралардың бәріне қатысады. Сондай-ақ аудандарда, ауылдарда өнер көрсетіп жүр.Балалар кітабы көбейсе…Мәдениет үйінің ішінде қалалық орталықтандырылған кітапханалар жүйесіне қарасты №8 кітапхана орналасқан. Мен де ішіне бас сұғып, тұрғындардың кітап оқуға деген қызығушылықтарын байқадым.<blockquote>«Ауыл тұрғындары бір сәт осында келіп, кітап оқығанды жақсы көреді. Кітап қоры&nbsp; – 17053 дана. Оның ішінде 10559-ы қазақ тілінде. Барлық салалық кітаптар қамтылған. Тұрақты 600-ден аса оқырман жиі бас сұғып, өзіне қажетті дүниелерді іздейді. Соңғы жылдары кітапханаға келушілер саны көбеюде. Балаларға арналған кітаптар көбірек болса екен дейміз. Оқырмандар залы бар. Мұнда түрлі іс-шара, көрме ұйымдастырылады. «Ертегімен есейемін» жобасы бойынша жақында түрлі тақырыпта іс-шара өтті. Атаулы мереке күндері ескерусіз қалмайды. Мәселен, «Әке – шаңырақтың тірегі» әңгімелер кеші, «Табиғат – сырлы да қазыналы әлем» тақырыбында эко-логиялық сағат, «Қылқаламның хас шебері» сурет байқауы өткізілді», – деді кітапханашы Сәнім Шәкиева.</blockquote>Ауыл – ұлттың қаймағы. Еліміздің даңқын асырып жүрген таланттардың көбі сол ауылдан шықты. Ауылдың өнері өркен жайса, қазақтың мәдениеті қанатын кең жаяды.

Қызылорда: Ақсуат мәдениетінің ауқымы кең

<a href="https://kyzylorda-news.kz/">Kyzylorda-news.kz.</a> Қазалы тепловоз жөндеу зауыты Қазақстан теміржолы бойынша қалған зауыттардың арасында өзінің ерекше орны бар ірі өндіріс орны қатарында. Ондағы негізгі тұлға – білікті мамандар, мұнда күн-түн деместен жүретін жұмысшылар көптеген жылдар бойы осы зауытқа өздерінің күш-қуатын жұмсап, аянбай еңбек етуде.Әркез зауыт ұжымы бір мезет те жоспарсыз жүрмейді. Жұмысшылардың алға қойған мақсаттары айқын. Олардың басты міндеті – халыққа сапалы қызмет көрсету. Жеке тұлға есебінде сыйлау, еңбек жағдайын жасау, өндірстік табыс пен байлық болып табылады. Діттеген мақсатқа жету үшін кәсіпорынның қуатын күшейту, ғылыми техниканы кеңінен пайдалану, еңбек нәтижесі пайдалы болу, зауыттың келешекте өркендеуіне, болашақ күнге сеніммен қарап, үнемі жеткен жетістіктерді жаңартып отыру – келешек өркендеуіміздің қажеттілігі негіз болады.Бұл жерде ерлермен қатар әйелдер де иық тіресе ауыр жұмысты атқарады. Солардың қатарында Лиза Тұрсынбайқызы «Қамқор Локомотив» ЖШС филиалы Қазалы локомотив жөндеу зауытының көпірлі кран жүргізушісі болып жұмыс істейді.Қырық жылға жуық уақыт 5 разрядты көпірлі кран жүргізушісі қызметін мұнтаздай орындап келеді. Осы жылдарда еселі еңбегі еленіп, талай құрметке бөленді. Жақында аудан әкімінің «Алғыс хатымен» марапатталды. Ұжым, ағайын-туыс, дос-жарандардың арасында сыйлы жан өз кәсібін ерекше сүйіспеншілікпен орындайды. Оның өмірдегі бұлжымас ұстанымы – қиындыққа қайыспау жетістіктің бастауы. Ол ақиық ақын Мұқағали Мақатаевтың «Адам өз өмірінде екі нәрсені таңдауда қателеспеуі керек: біреуі – жар таңдау, екіншісі – мамандық таңдау» деген тәмсілін жанына жақын тұтады.<blockquote>«Краншы болғаныма намыстанып, немесе ауырсынбаймын. Өйткені өзімнің қалауыммен таңдалған кәсібім. Шүкір соның арқасында бұйырған несібемді тауып отырмын. Үш қызымды қияға ұшырдым. Ұлымды оқыттым. Алты нәзікжанды менімен Ақалтын, Күлзипа, Гүлбаршын, Айнұр, Жәмила, Қаламқас есімді қыз-келіншек кезектесіп, аусыммен жұмыс істейміз. Екі күніміз кранда өтсе, екі күн демаламыз. Қызмет барысында үлкен зілдей темірлерді көтереміз. Сондайда слесарьлардың өміріне алаңдаймыз. Солардың қауіпсіздігін ойлаймыз», – дейді Лиза Құспанова.</blockquote>Лиза Тұрсынбайқызы теміржолшылар отбасында тәрбиеленген. Ата-анасы осы депода қызмет еткен.<blockquote>«Анам бала кезімде бізде үлкен кран бар. Оны жас қыздар басқарады. Өздеріне ұнайды кәсіптері деп айтып отыратын. Сонда іштей қызығып жүретінмін. Әкеме түстенуге тамақ тасығанымда көзімнің қиығымен сол краншыларға қарап кетемін. Уақыт өте қызығушылығым оянды. Мектеп бітірген соң анам өзінің жанына жұмысқа орналастырды. Әуелде тазалықшы болдым. Кейін кранды меңгеру жолдарын үйретіп, емтиханнан өткен соң осы мамандықты маған жүктеді. Жұмыстың қиындығы мен қызығы бірге жүреді. Дегенмен бұл ісімді жақсы көремін. Жұбайым да теміржолшы», – дейді краншы.</blockquote>Осындай еңбекқор, ауыр жұмысқа төтеп беретін жұмысшылардың арқасында зауыт бұрынғысынша көрікті, қайта қуатталып жаңа өмір талаптарына сай алға қарай қарқынды қызмет атқаруда.

Білікті маманға бай Қазалы тепловоз жөндеу зауыты 

<a href="https://kyzylorda-news.kz/">Kyzylorda-news.kz.</a> Медициналық мамандықтардың ішінде жеңілі жоқ. Сол сияқты педиатордың баланың өміріндегі рөлі орасан. Ол кішкентай адамға туғаннан бастап қамқорлық жасайды. Халықтың алғысына бөленіп жүрген сондай дәрігердің бірі – Зарина Әділжанқызы.Жас маман Қазалының тумасы М.Горький атындағы №16 мектебінен түлеп ұшып, М.Оспанов атындағы медициналық университетінің емдеу ісі факультетіне түседі. Бұл жерден бала кезіндегі арманына қол жеткізіп, жалпы тәжірибелі дәрігер бойынша оқуды бітіріп шығады.&nbsp;Еңбек жолын «Болат жолы» аудандық емханасында аймақтық балалар дәрігері болып бастаған. Кейін 2013 жылы Қазалы теміржол ауруханасына аймақтық дәрігер-педиатр есебінде қабылданып, осы уақытқа дейін қызмет атқарып келеді.&nbsp;Зарина Әділжанқызы «Апаттар медицинасының теміржол госпитальдары» АҚФ Қазалы теміржол ауруханасының жалпы тәжірибиелі дәрігерлік қызмет жасаған жылдарында апатты жағдайда қажетті көмек көрсете алатын білікті маман ретінде өзін көрсете білді. Ол емдеу-диагностикалық жұмысында медицинаның соңғы жетістіктерін қолданады. Он жылдан аса уақытта баланың ағзасындағы ерекшеліктері мен ауруының клиникасын тап басып тауып, балалар және ата аналармен қарым қатынас жасай алады. Сонымен бірге балаға, медицинаға деген сүйіспеншілігінің арқасында жұмыс барысында кез келген жауапкершілікті өз мойнына алады. Әрдайым ізденіп, үйренуге қабілетті, дәрігерге сай шыдамдылықпен науқасқа жылы жүзбен барынша ем-дом көрсетеді. Оның амбулаторлы емханалық көмек бағдарламасы бойынша жасалып жатқан жұмысы өз деңгейінде жүргізілуде.&nbsp;<blockquote>«Келушілерге үлкен ілтипатпен қарайды. Ұжымда білікті мамандар қатарынан саналады. Халық арасында беделі жоғары, өте сауатты әрі жаңашыл дәрігер ретінде қабылдаймын. Жас мамандардың үйретуші ұстазы бола біледі. Өз білгенін кейінгілерге үйретуден жалықпайды. Аурухана өміріндегі әртүрлі мәдени жұмыстарға қатысып, белсене араласады», – дейді «Апаттар медицинасының теміржол госпитальдары» АҚФ Қазалы теміржол ауруханасының директоры Құбыл Ршымбетов.&nbsp;</blockquote>Жас дәрігер медицина саласында елеулі қызмет атқарып, жұмыс кезінде өзінің ұйымдастыру қабілетін, білімділігін, жұмысқа белсенділігін көрсете білді. Осыны ескерген аурухана әкімшілігі және кәсіподақ ұйымының төрағасы «Медицина қызметкерлерінің» төл мерекесінде марапатқа ұсынған. Бүгінде отбасында екі бала тәрбиелеп отырған бақытты ана.

Қазалы: Халықтың алғысына бөленген дәрігер

<a href="https://kyzylorda-news.kz/">Kyzylorda-news.kz.</a> Сан ғасырдан бері қалыптасып келе жатқан қазақтың рухани жан дүниесіндегі ерекше қасиеттерінің бірі – ана мен қыз балаға деген шексіз құрмет көрсету тәрбиесі еді. Мұны ананың қоғамдағы ерекше орны мен сипатын бағалай білген ұлтымыздың ешкімге ұқсамас бірегей қасиеті деп ұғынған жөн. Қазақ тарихы мен мәдениетін зерделесек, сан ғасырлар бойғы күресте елдігін ерен ерлігімен, асқан парасатымен, даналығымен, шексіз шыдамдылығымен сақтай білген, ұлттық рухты ұрпағының бойына игі ісімен сіңіре білген әйел-аналар да аз емес.Дүйім жұртты тамсандырған Домалақ анаДомалақ ана қазақ даласына VII ғасырда жеткен Араб халифатының әскери өкілдерінен бұрын бейбіт мақсатпен келген, ислам дінін уағыздаушыларының бірі болған араб дегдарының қызы. Өзі де елді имандылыққа шақырып, жас кезінен сәуегейлігімен танылған. Осындай игі ісімен, тартымдылығымен Бәйдібек бабамыздың назарына іліккен. Ел аузында ол кісі жөнінде аңыз-әңгіме көп. Соның былай өрбиді: «Бәйдібек заманында жайлауында үйір-үйір жылқысы, келе-келе түйесі, отар-отар қойы өрген, шығыс пен батысқа керуендер жүргізген асқан бай адам болған. Бірде Алатау асып келген қалың жау Қаратау жонын жайлап отырған Бәйдібектің ауылын шауып, сан мың жылқысын түре айдап кетеді. Бәйдібек бастаған ел азаматтары ауылда болмаса керек. Содан жау шапты деген хабарды естіп, Бәйдібек елден жасақ жиып, қасына үлкен әйелі Сары бәйбішеден туған алты ұлын алып, жауға аттанғалы жатқанда Нұрилә:&nbsp;<blockquote>«Байеке, малдың құты, жылқының иесі құла айғыр қолда қалды. Амандық болса, алты күннен кейін жылқы жауға қайыру бермей өзі ауылға келеді. Жауды қума, азаматтар аман болсын, осы тілегімді беріңіз», – деп өз отауының белдеуінде матамен байлаулы тұрған, жүген-құрық тимеген шу асау айғырды көрсетіпті.&nbsp;</blockquote>Бірақ жауға кектенген батыр әйелінің тілін алмай, жасағын бастап жүріп кетіпті. Бәйдібек &nbsp;жасағы жауға Күйік асуында жетіп, қырғын ұрыс салыпты. Алайда жасанып келген жау аттанға ілесіп атқа қонған аз жасаққа теңдік бермепті. Осы соғыста қаза тапқан алты ұлын Үшқарасай жазығына жерлеп, кері қайтыпты. Арада алты күн өткенде байлаулы тұрған құла айғыр жер күңіренте дүлей күшпен кісінеді дейді. Сол күні кеш шамасында шығыстан қалың шаң көтеріліп, ұзамай Бәйдібектің қалың жылқысы көрінеді. Ереуілдеп барып, кері қайтара алмаған жылқыны Домалақ ана осылайша үйде отырып-ақ түгел қайтарып алса керек. Осылайша ел анасы жалғыз отағасына емес, барша елге даналығымен дараланған. Домалақ ана ел арасындағы ушыққан дау, асқынған араздықтың бейбіт шешімін табуға үлес қосқан. Ел билеген азаматтардың өзі кейбір келелі мәселелерді шешерде Домалақ анамен кеңесіп отырған. Домалақ анадан тараған ұрпақтарының бәрі де біліммен, ақылымен көзге түсіп, ел билеген.&nbsp;Дербіс әулетіне билігі жүрген Қаракемпір анаШежіре дерегінде Кіші жүз Қыдырсиықтан − Шеркеш, одан − Қосым, Қойыс, Жауғашты, Шумақ, Қылышкескен туыпты дейді. Осылардың Қойысынан − Дербіс туады. Дербістің бәйбішесі Зылиха деген кісі, өңі қара болған соң «Қаракемпір» аталып кеткен көрінеді. Бүкіл Дербіс әулетіне ұйтқы болып, жөн үйреткен, жол көрсеткен адам. Дербіс батырдың бәйбішесі Зылихадан − Тоқтар, Базар, Қошқар, екінші әйелінен − Түрке, Шыңбай, үшінші әйелінен – Сатай, Сатылған туған. Дербістің осы үш әйелінен тараған ұрпақтан жөн сұраса «шеркешпіз, оның ішінде қаракемпірміз» дейді. Сөйтіп, Қаракемпір ру атына шыққан. Қаракемпір туралы айтылатын қария сөз көп. Бірде әлімнің ел қамымен жүрген жақсы-жайсаңы жолаушылап келе жатып Сағыз бойында отырған Дербіс батырдың үйіне тап болыпты. Дербіс батырдың өзі үйде жоқ екен, сыйлы қонақтарға жақын жерден алдыра қоятын малдың реті болмай, Зылиха сол жерде күйеуі Дербіс батырдың жауға мінетін екі атының бірін сойып, қонақтарды құрметтеп аттандырыпты. Әлімнің жақсыжайсаңы былай шыққан соң «Апырай, Дербістің құты үйіндегі Қаракемпірі екен ғой!» деп таң-тамаша болысыпты. Содан, Дербіс батыр үйіне келеді. Бәйбішесі Зылиха: «Әлімнің алты жақсысы келіп еді, ақтабан атыңды сойып құрмет көрсеттім», – депті. Сонда, Дербіс батыр: «Әлімнің алты жақсысына құрмет көрсеттім дегенше, мені алпыс жауымнан құтқардым десейші!» – деген екен. Қаракемпірге халықтың құрметі сияқты ел ішінде тартылатын «Қаракемпір» атты күй бар.&nbsp;Наймандардың басын қосқан ана өсиеті&nbsp;Найман әулетіне дұшпан жолын тауып елге жойқын шабуыл жасапты. Тұтқиылдан тиген жау еркек кіндіктіні қырғындай қырып, қарт Найманның төрт ұлын көз алдында өлтіріп кетіпті. Найманның Тоқбан ұлынан Әлпеш (Ақсұлу, Мәзбура деп те айтылады) деген келіншегі жесір қалады. Әлпеш үйсін Дулат бидің қызы болса керек. Шабылған әулет пен қорғансыз қарт Найманның ауыртпалығы енді Әлпештің иығына түседі. Сол үміт жетегімен Әлпеш төркін жұртына барып, туысқан сіңлісі Гүлшені Найманға айттырып алып қайтады. Гүлше бір ұл табады. Бұл кезде Найман шаңырағының бас иесі болып отырған Әлпеш алты алаштың басын қосып, ақ түйенің қарынын жарып, ұланасыр той жасайды. Осы тойда үйсін Дулат би:&nbsp; – Найман – қаны араласқан қадірлес құдам еді, мына нәресте артында қалған белгі ғой, атын Белгібай қояйық дейді.<blockquote>«Балаға ат қою жолы біздікі еді, Найман атамыздың Тәңірден өкіріп жылап жүріп тілеген баласы ғой, атын Өкіреш қоямыз», − деп арғындар да тілек білдіреді.&nbsp;</blockquote>Қазақтың бүгінгі қалың рулы елінің болашағына осылайша Әлпеш ана сеп болып, әулетіне ұйытқы болыпты. Найманның кіндігінен тараған ұрпақ жиырма шақты ауыл болғанша «жат &nbsp;болып кетпесін» деп, енші бермей, мал-жанын ортақ ұстатыпты дейді.&nbsp;<blockquote>«Байдың малы ортақ болсын, батырдың жаны ортақ болсын, шебердің қолы ортақ болсын, шешеннің тілі ортақ болсын, балуанның күші ортақ болсын, біреуге біреу зорлық жасамасын!» деген өсиет осы Әлпеш анадан қалыпты деген сөз бар.</blockquote>

Қазақ халқы қастерлеген аналар

<a href="https://kyzylorda-news.kz/ru/">Kyzylorda-news.kz</a>. Айдынды Аралдың сәні – балық өндірісі мен балықшылардың маңдай тері, тынымсыз тіршілігі. Бала кезден сүйіп оқыған Әзілхан Нұршайықовтың «Қан мен тер» романында олардың тұрмыс-тіршілігі, бастан кешірген қиындығын айқын бейнелеген. Содан болар, шалғайдағы ағайынның ахуалын үнемі назарда ұстауға тырысамыз. Айта кетейік, аудандық кәсіпкердің көмегімен көнерген қайықтың барлығы жаңаруда. Жансерік Нысанбаев алғаш боп шыны пластиктен ескекті қайық шығаратын кәсіпорынды іске қосып, өндірісті жөнге қойды. Жаңа кәсіптің тізгінін ұстаған кәсіпкер бірнеше жылдан бері қайық жасау өндірісін қолға алып келеді. Өнімге өзге қалалардан да сұраныс жоғары.Ж.Нысанбаев ауданда алғашқылардың бірі болып жиһаз шығаруды жандандырды. Қажетті қондырғы сатып алып, шағын бөлмені жалға алу арқылы өзінің кәсібін бастаған еді. Кейін «Бизнестің жол картасы – 2020» мемлекеттік бағдарламасының тиімділігін пайдалана отырып, корпусты қатқыл жиһаз шығаратын цех ашқан болатын. Ал бүгінде бизнесін кеңейтіп қана қоймай, оны әртараптандыруға мүмкіндік алды. Бүгінде жиһаз цехы ауыл аймаққа қажетті барлық түрдегі жиһазды шығарады. Яғни, шкаф, ас үй гарнитурасы, сөре, стеллаж секілді жиһаздар жасауда. Бір артықшылығы, жиһаз жасағанда дайын үлгі емес, тапсырыс берушінің талабына үлкен мән беріледі. Дизайн, материал сапасы, жеткізу мен жиһазды құру қызметі де қарастырылған.– 2009 жылдан бері жиһаз жасаумен айналысқан болатынбыз. 2013 жылы аудан орталығынан ғимарат тұрғыздық. Ал қайық өндірісін қолға алу идеясы 2016 жылдан бастап жүзеге асқан еді. Оған себеп болған кіші Арал теңізінің толуы, балықшылардың көбейуі екені даусыз. Балықшылардың басты құралы су көлігі болғандықтан сұраныс жоғары. Оның үсітне қолданыстағы қайықтардың басым бөлігі көнерген, суда жүзуге жарамсыз. Салдарынан қайғылы оқиғалар орын алуда. Біз мұның алдын алу үшін осы шешімге келдік. Суда қауіпсіздікті күшейтетін қауіпсіз қайықты шығаруды ойластырдық, – дейді кейіпкеріміз.Кәсіпкердің сөзінше, қайықты жасау технологиясы ерекше. Өнім пластиктен құрастырылады. 2016 жылы сынақтан өткізіп, 2017 жылы басқа үлгілерді қоса бастаған. Осылайша, үшінші жыл дегенде сынақтан өткен дайын өнімдерді сатылымға шығарған екен. Әсіресе, балықшыларға ыңғайлап, құрылымын ақылдасып, бір жүйеге түсіруге мүмкіндік алыпты.Нәтижесінде, қазіргі таңда айына 6-7 қайық дайындайды. Сұраныс тек Арал өңірінен емес, Қазақстанның түкпір-түкпірінен түсуде. Сұраныстың мұнша артуы қолжетімді бағадан туындаса керек. Бүгінде өндірісте 8 адам жұмыс істейді. Жаңа ғимарат жұмыстары аяқталса, тағы 5 адамды жұмыспен қамту жоспарланған. Кәсіпкердің басты мақсаты – отандық бренд қалыптастыру арқылы Қазақстандағы өндіріс сапасын жаңа деңгейге көтеру. Жұмыс жайын есткерсек, бұл арманның жүзеге асуы да алыс емес секілді.Осы уақытқа дейін 100-ден аса қайық шығарылған екен. Бағасы 450 мың теңгеден басталады.<blockquote>– Бұған дейін шеберлер қайықтың пішінін жасау, желімдеу, бояу жұмысын қолмен істеген болатын. Қазір бұл процестің жартысы автоматты қондырғы көмегімен жүзеге асады. 4 түрлі қайық түрін жасау еш қиындық туғызған емес. Шикізат Еуропадан әкелінеді. Айта кетерлігі, 3 күнде бір су көлігін құрастыруға мүмкіндік бар», – дейді ол.</blockquote>Бүгінде қайықтар Арал және Қазақстанның барлық өңірлеріне жеткізіліп жатыр. Қазіргі таңда жиһаз және қайық өндірісі толық қуатпен жұмыс жасауда. Болашақта шыныталшықты құрылыс материалын өндіру жоспарда. Яғни, кәсіпкердің негізі ұстанымына айналған отандық өндіріс саласын дамыту межесі алыс емес деген сөз.Жансерік Нысанбаевтың айтуынша, мықтылығы мен сапалылығы ескеріліп, қайықтың бағасы қолжетімді деңгейге сәйкестендірілген. Бұған дейін қайықтың пішінін жасау, желімдеу, бояу жұмыстарын қолмен істеген еберлер қазір процестің жартысын автоматты қондырғымен тындырады. 1 тоннадай жүк көтере алатын 4 түрлі қайық жасайтын аралдық ұсталар қажетті шикізатты Еуропадан алдырады. 3 күнде бір су көлігін құрастыратын шеберхананың 8 қызметкері отандық өндіріс көлемін арттырмақ ниетте.Қайықтар Арал және Қазақстанның барлық өңірлеріне жеткізіліп жатыр. Кәсіпкердің негізі ұстанымы отандық өндіріс саласын дамыту. Қазіргі таңда жиһаз және қайық өндірісі толық қуатымен жұмыс жасап тұр. Осы уақытқа дейін 100-ден аса қайық шығарылды, бағалары 450 мың теңгеден басталады. Болашақта шыныталшықты құрылыс материалын өндіру жоспарда бар. &nbsp;

Қайық өндірісі қайта жандануда

<a href="https://kyzylorda-news.kz/">Kyzylorda-news.kz.</a> Америка құрама штатының Нью-Йорк қаласында аяқ-киім фабрикасында әйелдер 1857 жылы ереуілге шыққандығы жайлы тарихта жазылды. Олар жұмысшы ер азаматтармен тең құқық, бірдей жалақы алуды талап еткен. Арада 13 жыл өткен соң Копенгагенде жұмысшы әйелдердің қатысуымен II-халықаралық конференция өтеді. Сонда социал-демократ партиясының әйелдер тобының көшбасшысы Клара Цеткин 8 наурыз Халықаралық әйелдер күнін жыл сайын белгілі бір күнде тойлау керектігі жөнінде мінберге шыққанда нық айтқан болатын. Оның бұл батыл ұсынысы әйел құқығын қорғауға бағытталған үлкен ұран ретінде қабылданды. Бірақ мұның қоғам дамуының тенденциясы мен демографияны тежеуші фактор екенін аңғарғандар аз болды.&nbsp;Ал Домалақ ананың ізінен ерген қазақ әйелдері өзіне лайық құрметке бағзы заманнан-ақ бөленіп келеді. Еріне бойұсынып, рухани демеу көрсететін, қазақ балаларының бәріне мейіріммен қарап, тәлімді тәрбие беріп жүрген ақжаулықтылар әлі де көптеп кездеседі. Сондықтан қазақ демографиясында соңғы он жылдағы бала өсімі де көңіл қуантарлықтай. Мереке алдында нәзікжандылардың басты мақсат-мүддесі – Ана бақытына ұмтылысы қандай деген сауал төңірегінде өздігімізше сараптауға тырыстық.Оң нәтижелі табиғи өсімЖаңа туған сәби мен келесі бір тоқтаған өмірдің арасындағы алшақтық демографиялық көрсеткішті құрайтыны белгілі. Статистикалық көрсеткіш бойынша Қазақстан халқының саны өткен айдың басында 19 миллион 848 мың адамнан асты.&nbsp; Биыл Қазақстан халқы 302 760 адамға өсті. Халықтың табиғи өсімі оң нәтижені көрсетеді. Бір жыл ішінде шамамен 439 384 бала дүниеге келіп, 173 369 адам көз жұмған. «Countrymeters» сайтының сараптамасына сенсек, әйелдер ерлерден миллион адамға жуық көп. Қоян жылы басталғалы күн сайын 1200 сәби дүние есігін ашса, шамамен 475 отандасымыз бақилыққа аттанып жатыр. Сондай-ақ елге жүздеген адам уақытша немесе біржола көшіп келеді. Жалпы туу көрсеткіші бойынша Алматы облысының әйелдері көш бастап тұр. Сонымен бірге сәбилі болуға асыққан астаналықтардың да үлесі басым. Көп баланы қаламайтындардың көшін Солтүстік Қазақстан өңірі бастайды. Мұндағы халық саны былтыр 5 мың адамға кеміген. Мұнымен қоса, Қарағанды, Қостанай, Павлодар, Шығыс Қазақстан облыстарының демографиялық көрсеткіші көңілді көншітпейді. Мұның негізгі себебі еуропалық стилде өмір сүретін өзге ұлт өкілдерінің басымдығының әсері екені даусыз.&nbsp;Былтыр еліміз бойынша 128 мың шаңырақ бой көтерген. Салыстырсақ, өткен жылы көршілес Ресейде 41 мың ғана неке қиылған.Сауаттылық өмір деңгейін жақсартады &nbsp;«Тегінде адам баласы адам баласынан ақыл, ғылым, ар, мінез деген нәрселермен озбақ» деген хәкім Абайдың сөзі маңыздылығын жоғалтқан жоқ. Қазақтың тегінде бар тектілік, мұқалмас мінез бен жаннан қымбат ардың әр қандасымызда бары анық. Бірақ тарихи факторлардың әсерінен білім жинау жағынан Батыстан кешеуілдеп келе жатқанымызды жасыру қиын. Есесіне, оларды қуып жетуге деген ұмтылыс зор. Қазақстанда 15 жастан асқан 15 298 841 адам ана тілінде оқи және жаза алады. Бұл жалпы ересек халықтың 99,7 процентін құрап тұр. Осы жағдайда ересек популяция 15 жастан асқан барлық адамдарға жатады. Сәйкесінше, 32090-ға жуық адам әлі де сауаты жоқ десек қателеспейміз. Сарапшылардың зертеуінше, ерлер мен әйелдердің сауаттылық деңгейінде пәлендей айырмашылық жоқ. Дегенмен жастар арасында нәзікжандылардың үйретері сәл де болса басым деген болжам бар. Ал жастардың жалпы сауаттылық деңгейі 99,84 процентті көрсетуде. Бар гәп – 15 пен 24 жас аралығындағы халықты қамтуы.&nbsp;Демографтар бала туу көрсеткішіне алаңдаулы&nbsp;Көпбалалы отбасы – қазақ дүниетанымы үшін қалыпты жағдай. Елең еткізері, соңғы уақытта мүсін сақтағыш, мансап қуғыш, бір-екі баланы жеткізуді алдымен ойлайтын нәзікжандылар қатары күн санап артуда. Бірақ әлі де болса бір шаңырақта 10-15 баланы дүниеге әкеліп жүрген батыр аналардың мерейі үстем, абыройы асқақ болып қала береді. Қазақстанда төртеуден көп бала тәрбиелеп отырған 500 мыңға жуық отбасы бар. Мұндай отбасыға бала 18 жасқа толғанға дейін, жоғарғы оқу орнында білім алса, 23 жасқа дейін жәрдемақы төлейді. &nbsp;Төрт бала саны үшін төлем сомасы – 47 мың теңгеден басталады.&nbsp;Бұдан бөлек, әлеуметтік жағдайы төмен отбасыларға атаулы әлеуметтік көмек тағайындағаны белгілі. Десек те, демографтар алдағы уақытта бала туу көрсеткіші күрт төмендейтініне алдын ала болжам жасап, айрықша алаңдаулы.<blockquote>«Алдағы уақытта белсенді туу жасындағы аналар мен әкелердің саны азая бастайды. Мысалы, 1998, 1999 жылдардағы қиын экономикалық дағдарыс кезеңінде баланың ең аз туу саны белгіленген. Сол ең аз туған жылғы балалардың жасы қазір 23- 25-те. Олардың саны оның алдыңғы жылдармен салыстырғанда аздау. Сондықтан алдағы уақытта туу да азаяды», – дейді Бәтжан Ақмолдина.&nbsp;</blockquote>Маманның айтуынша, бала туу көрсеткішінің төмендеуіне Қазақстандағы некені қию жасының ұлғаюы да себеп.Репродуктивті жастардың туу белсенділігі бұрын 21-22 жаста болса, қазір 24-25 жаспен өлшенеді.&nbsp;<blockquote>«Үшінші – экономикалық жағдай. 1999 жылғы бала туу санының аз болуына экономикалық дағдарыс әсерін тигізді. Осы сынды бүгінгідей экономикалық дағдарысқа байланысты бұрынғы жағдай ептеп қайталануы мүмкін. Қазір де инфляция жоғары, халықтың &nbsp;әл-ауқаты төмендеп, нақты табысы күннен-күнге азайып барады. Осыған байланысты отбасылардың екінші, үшінші немесе кейінгі баланы сүю жоспары кейінге қалдырылады. Мәселен, қазір үйленгеннен кейін көбі көп ұзамай балалы болады. Екінші баланы да арасында 1,5 жыл, не болмаса 3 жыл салып жоспарлайды. Ал үшінші баланы туу ол отбасыларда да экономикалық және әртүрлі әлеуметтік төлемге байланысты кейінге қалдырылады», – деді демограф.</blockquote>

Елдің дамуы халық өсіміне тәуелді

<a href="https://kyzylorda-news.kz/ru/">Kyzylorda-news.kz</a>. Адам кітап оқуды қойған күні ойлаудан қалады. Ал ойлауды қойса, дамудан, сапалы өмірден, өркениеттің ең жоғары жетістіктерінен мақұрым қалмақ. Ой мен идея талқыға түсетін «Puzzle coworking center» – қы¬зылордалықтардың сүйікті орны. Л.Гумилев атындағы ЕҰУ-ды IT мамандығы бойынша аяқтаған қызылордалық Батыр Темірханұлының бұл жобасы бұрынғылардан өзгерек. 24 жастағы кейіпкерімізбен бизнес жобасы, алдағы жоспарлары жайында сұқбаттасқан едік.– Коворкинг орталық ашу идеясы қалай келді?– Шамамен бір жыл бұрын кірісіп, кофехана ашқан едік. Осыған дейін басқа форматта, яғни, B2G секторы бойынша мемлекеттік жұмыс істейтінмін. Уақыт өте келе B2c секторына өтіп, тұтынушы сұранысын қамтамасыз ететін бизнес бастағым келді. Қызылордада тамақтанатын орын, кафе, клубтар жеткілікті. Киім дүкендері де бар. Меніңше, тұлғалық, интеллектуалдық жағынан дамуға септігін тигізетін жаңа орындар ашылу керек. Осылайша алғашқыда кітап оқуға арналған кофехана ретінде ашылған едік. Бірақ кофеханадан гөрі «coworking» ашқым келген екен. Оны жақында ұқтым. Өйткені ол кезде коворкингтің не екенін, мәнісін түсінбеппін. Білсем, басынан бастап осы форматта ашар едім. Қазір мұнда 5 адам жұмыс істейді. Наурыз айында ашылғанымызға бір жыл толады.– Тұрғындар неге сіздерді таңдайды?– Басқа кофеханалардан ерекшелігіміз – біздің міндет тек кофе мен тәтті ұсыну емес, білім ұсыну, мидың дамуына, рухани демалуға жағдай жасау. Яғни, қызылордалықтардың қарым-қатынасын нығайтуға себепші болсақ дейміз. Мұнда апта сайын ашық түрде бизнес-кездесу, семинарлар, тренингтер өткізіледі. Қазір кофехана деп танитындар аз. Коворкинг орталық ретінде танылып келеміз. Сондықтан өзге кофеханалармен салыстырып, оларға бәсекелес ретінде қараудың қажеті жоқ.Бізде үстел ойындарының түр-түрі бар. Монополия, мафия, шахмат ойнауға келетін клиенттер қатары көп. Тимбилдингке қатысты топтық дамытушы ойындар да жеткілікті. Семинар өткізуге ыңғайлы болу үшін проектр орнаттық, арнайы тақталар әкелдік. Сонымен қатар жоғары жылдамдықтағы интернет жүйесі қосылған. Негізі «антикафе» бағыты – коворкингтің бір тармағы. Коворкингте білім беру жағы көбірек қолға алынса, антикафеде көңіл көтеру мен білім қатар жүреді. Бізде де коворкинг ретінде білім жағына маңыз берілгенмен, антикафенің де қажетті тұстарын алдық. Мысалы, үстел ойындары миды дамытуға да әсер етеді, жағымды көңіл-күй де сыйлайды.Біздің тұрақты келушілер – 20-30 жас аралығындағы қызылордалықтар. Жасқа ешқандай шектеу жоқ. Кейде 10 жастағы балалар да келеді. Мәселен, бізге күнара келіп тұратын мұғалім бар. Өзімен бірге сыныбындағы оқушыларын ертіп әкеліп, білім береді. Сол секілді үлкен кісілер де қонақ болады. Олар көбіне бизнес жобаны талқылауға, маңызды іскерлік кездесу жасауға бізді таңдайды. Осыған орай тұрақты келушілер арасында сауалнама жүргізген болатынбыз. «Неге бізді таңдадыңыз?» деген сұраққа көбісі «Басқа кофеханаларға қарағанда тыныш. Жайлылық бар» деп жауап берді. Демек, қонақтар үшін үстел ойындары мен кофеден де маңызды дүние – жайлылық.– «Кино time» форматында ашық отырыс өткізілді. Тағы қандай жобалар бар?– Кешегі аптада белсенді жас Талғат Меңдібаевтың бастамасымен «Кино time» форматында ашық отырыс өтті. Яғни, барлық адамға кіру тегін. Проектр арқылы ағылшынша кино қосылып, орысша субтитрлар ұсынылды. Көрермендер туындыны толық қарап біткен соң өзіндік әсерімен бөлісіп, режиссердің айтқысы келген ойын талқыға салды. Дәл осылай әр апта сайын өзгеше бағыттағы бір шара ұйымдастыруды қолға алдық. Мысалы, бір аптада кітапқұмарлардың отырысы болса, келесіде қандай да бір жобаның талқылауы өтеді. Менің тарапымнан осындай бағыттағы шараларды бізде өткізуге ұсыныс тасталады. Әр сенбі не жексенбіде тегін семинар не вебинар өткізуге болады. Алайда жиындар міндетті түрде ашық болу қажет. Бастысы – қызылордалықтардың дамуына, білімін жетілдіруіне мүмкіндік жасау. Жабық форматта да өткізуге болады.&nbsp;Бірақ ол ақылы түрде, келісім арқылы ұйымдастырылады. Алдағы уақытта жоспар көп. Негізгі мақсат – осы жобаны кеңейту, үлкен коворкинг орталығына айналдыру. Сол арқылы франшизамен айналысып, Қазақстанның басқа да қалаларына коворкинг орталықтарын ашсам деймін.– Ісіңізге сәттілік! &nbsp;

 Қызылордалықтарға coworking керек

<a href="https://kyzylorda-news.kz/ru/">Kyzylorda-news.kz</a>. Қазір кәсіп бастаймын дегенге көрсетілер қолдау көп. Тек қаржының көзіне айналар хоббиің болса, жеткілікті. Бұл жағынан жастар алдыңғы буынға қарағанда алға озғанын мойындау керек. Соның бірі – заманауи тәсілмен кілемшелер тоқып, сұранысқа сай сапалы дүниелерді жасап жүрген жерлесіміз, жеке кәсіпкер Жандос Шораев.Кілем тоқу ұрпақтан-ұрпаққа жалғасып келе жатқан өнер екені белгілі. Бұрын қабырғаға іліп, еденге төсеп, үйдің жылуын сақтау үшін пайдаланса, кейін сәндік бұйымға айналды. Ал кейіпкеріміз бүгінде тафтинг әдісімен кілем тоқумен айналысуда.XVII ғасырдан бері адамзат игілігіне жарап келе жатқан тафтинг технологиясын зерттеген кәсіпкер арнайы станок сатып алған. Технологияны тереңінен игеріп, алғашқы табысқа да қол жеткізіп отыр. Кәсіпкер өткен жылы 2021-2025 жылдарға арналған кәсіпкерлікті дамыту жөніндегі ұлттық жоба шеңберінде жаңа бизнес-идеяларды іске асыру бағдарламасы аясында 2,5 миллион теңге қайтарымсыз грант иегері атанып, жаңа құрылғылар мен керекті материалдар сатып алған.Бүгінде ол жергілікті үш тұрғынды жұмыспен қамтып, санына сапасы сай тапсырысты қабылдап отыр. Оның айтуынша, кілем тоқу цехы әзірге өз үйінде орналасқан. Цехта екі кілем тоқу станогы және өзге де қажет құрылғылар бар. Кілем сапалы шығу үшін арнайы Алматыдан әкелінген жібек жіптер пайдаланылады.<blockquote>– Ағылшынша «tuft» сөзі «түйін» деп аударылады. Бұл өндіріс технологиясының мәнін көрсетеді. Олар бір жіппен тоқымайды, түйінделген шоқтармен толтырылады. Осы технологияны меңгергеннен кейін алғашқы тапсырыстарды қабылдап, тұтынушылардың қалауына сай кілемшелер тоқи бастадым. Қазір айына бірнеше кілем жасаймын, – деді Жандос.</blockquote>Тафтинг әдісіндегі кілемдер табиғи жіптермен бірге синтетикалық жасанды талшықтар, жүн тәріздес жіптер, химиялық қабыршық жіптер арқылы тоқылады. Машинамен тоқылатын кілемдердің түгі мынандай түрлерге бөлінеді: тігілген тафтинг, тоқылмалы, трикотаж, тоқыма – тігілмелі, шыбықшалы киіз, флокировты.Өңірде жоқ, тың тәсіл арқылы кілем тоқып жүрген кәсіпкер болашақта тәжірибе жинап, кәсіби біліктілікті кеңейту арқылы жобасын табысты бизнеске айналдырғысы келеді. Сол үшін Алматы қаласындағы кәсіпкерлік негіздеріне арналған курсқа да қатысыпты.<blockquote>– Механикалық тоқу станогы арқылы шығарылатын тоқыма кілемдер бір немесе түрлі түсті болады. Құрылымы жағынан көпқабатты материалға ұқсас. Кілем тоқылып бітісімен атқарылатын жұмыстар легі мынадай: алдымен түгі қырқылады, тазаланады, ыстық буға ұсталады, шеті әдіптеледі немесе оған шашақ тігіледі, сөйтіп, қосымша өңдеуден өткізіледі. Содан кейін ғана тапсырысымыз дайын болмақ, – деп түсіндірді кәсіпкер.</blockquote>Тафтинг тәсілімен тоқылатын кілемдерге тапсырыстар жан-жақтан түседі екен. Көбісі жақындарын қуанту мақсатында сыйлық ретінде тапсырыс береді. Өнім төрт күнде тоқылып, дайын болады. Ал кейіпкеріміз осы уақытқа дейін 2 ай ішінде 20-дай кілем тоқыған.<blockquote>«Соңғы жылдары қолөнер бұйымдарының қадір-қасиетін түсінетіндердің қатары көбеюде. Кілем туралы бір-бірінен естіп, қызыққан соң тапсырыс беретіндер қатары бар. Сол себепті сапаға аса мән береміз. Жібекке синтетиканы араластырып, кілемнің жылтырауын, суреттің дәл келуін қадағалаймыз. Жібек пен синтетиканы араластырмаса да болмайды. Екеуі үйлесім тапса, кілем жылтырып, көздің жауын алады. Көбінесе балалары ата-аналарына тосынсый жасағысы келеді. Сонымен қатар, көбінесе халық қалаулылары, сыйлы азаматтарға, атақты ақын-жазушыларға арналып портреттік кілемдер тоқылады», – дейді кәсіпкер.</blockquote><figure class="image"><img src="https://knadmin.beoblood.kz/uploads/2_1e87db7696.jpg" alt="2.jpg"></figure> &nbsp;

Тафтинг тәсілі трендте

Жаңақорғандық кәсіпкер ай сайын 70-ке жуық отбасыға көмектесіп тұрады

<a href="https://kyzylorda-news.kz/">Kyzylorda-news.kz.</a> А.Тоқмағанбетов атындағы мәдениет үйінде қала әкімдігінің қолдауымен және жергілікті кәсіпкерлердің демеушілігімен ерекше жандарға арналған «Арман» инклюзивтік театрымен алғаш рет Талғат Телеубаевтың «Қолымнан ұста» атты пьесасы сахналанды.Қойылымның қорытындысында қала әкімінің орынбасары Жанмұрат Сейілов өнер ұжымын алғашқы қойылыммен құттықтап, алдағы уақытта толағай табыстарға жете беруіне тілектестігін жеткізді.Айта кету керек, биыл қаңтар айынан бастап А.Тоқмағанбетов атындағы қалалық мәдениет үйі жанынан ерекше жандарға арналған «Арман» инклюзивтік театр үйірмесі құрылды. Үйірменің жұмысын үйлестіру мақсатында қалалық мәдениет және спорт бөліміне қарасты кәсіпорын арқылы арнайы штат бөлініп, бір маман жетекшілік етуде.Қазіргі таңда, үйірмедегі оннан аса мүмкіндігі шектеулі жандарға өнердің қыр-сырын, сахнаға театрлық қойылымдарды қоюды ғана емес, эмоциялық мәдениет пен актерлік шеберлікті қалыптастыруды үйретуде.<blockquote>«Мүмкіндігі шектеулі жандардың Қызылорда облыстық филармониясының жас өнерпаздарымен бірлесе қойған қойылымы өте әсерлі, шынайы шықты. Бір сөзбен айтқанда жоғарғы деңгейде өтті. Қыз тағдыры сараланған қойылымның барысында бір сәт жүзімізге күлкі үйрілсе, бір сәт мұңайдық. Тіпті, залда отырған көрермендер көзіне жас алып, көңілдері босады. Бұл қойылым қай заман болмасын адамдар арасындағы қарым-қатынастың әр қилы болатынын көрсетті. Барлық өнерпаз өздеріне берілген рөлді өте керемет алып шықты. Алдағы уақытта да осындай халықтың жүрегіне жақын туындыларды сомдап, елдің құрметіне бөленіп, биіктен көрінулеріне тілектеспіз», – деді жеке кәсіпкер Қайрат Ераназаров.</blockquote>

Қызылордада ерекше жандар алғаш рет қойылым қойды

<a href="https://kyzylorda-news.kz/">Kyzylorda-news.kz.</a>&nbsp;Қазақстанда педагогтардың кәсіби мерекесі – Мұғалімдер күні енді 5 қазанда атап өтіледі. ҚР Үкіметі тиісті қаулы қабылдады.Мемлекеттік мерекелер тізіміне сәйкес, республикада Мұғалімдер күні осы уақытқа дейін қазан айының бірінші жексенбісінде тойланып келді. Енді бұл мереке 5 қазанда әлемнің 100-ден астам елі атап өтетін Дүниежүзілік мұғалімдер күнімен сәйкестендірілді.Мұғалімдер күні – білім беру саласындағы қызметкерлердің барлығына ортақ кәсіби мереке. Бұл күні ұстаздар қауымының қоғам дамуындағы рөлі мен еңбегі, оған қосатын зор үлесі аталып өтіледі.Оқу-ағарту министрлігінің мәліметінше, бүгінде Қазақстанда мектепке дейінгі, орта, техникалық және кәсіптік білім беру ұйымдарында 556 мың педагог еңбек етеді.

Қазақстан және Қызылорда облысының жаңалықтары