<a href="https://kyzylorda-news.kz/">Kyzylorda-news.kz.</a> Мемлекет басшысының Жарлығымен Руслан Фатихұлы Жақсылықов Қазақстан Республикасының Қорғаныс министрі лауазымына тағайындалды, деп хабарлайды <a href="https://t.me/aqorda_resmi/7704">Ақорда</a>.Руслан Фатихұлы 1966 жылы 4 наурызда Алматы облысының Қаскелең қаласында дүниеге келген. Ұлты – қазақ.I, II дәрежелі «Даңқ» орденімен, Түркия Республикасы Қарулы Күштерінің Орденімен және КСРО, ТМД, Қазақстан Республикасының 40 медалімен наградталған. Педагогика ғылымдарының кандидаты. Әскери атағы - генерал-лейтенант.1983 жылы Алматы облысы Қаскелен ауданының Киров атындағы орта мектебін бітіргеннен кейін И.С. Конев атындағы Алматы жоғары жалпы әскери командалық училищесіне командалық тактикалық басшылық мамандығы бойынша оқуға түсіп, оны 1987 жылы бітірді.1996 жылы М.В.Фрунзе атындағы Әскери академиясын командалық-штабтық жедел-тактикалық әскери барлау мамандығы бойынша тәмамдады.2004 жылы Ресей Федерациясы ҚК Бас штабы Әскери академиясында мемлекеттің әскери қауіпсіздігі мамандығы бойынша Жоғары академиялық курстарын аяқтады.2003 жылы Шымкент қаласының мәслихаты 3-ші шақырылымының депутаты болып сайланды.1987 және 2006 жылдар аралығында взвод командирінен бастап құрама командиріне дейінгі әртүрлі лауазымдарда қызмет атқарды.2006 және 2007 жылдар аралығында Қазақстан Республикасы ІІМ Ішкі әскерлері Қолбасшысының орынбасары.2007 және 2008 жылдар аралығында Қазақстан Республикасы ІІМ Ішкі әскерлері Қолбасшысының бірінші орынбасары – Қазақстан Республикасы ІІМ Ішкі әскерлер Бас штабының бастығы.2008 жылғы 4 қыркүйектен бастап Қазақстан Республикасы ІІМ Ішкі әскерлерінің Қолбасшысы.2013 жылғы 22 қантардан бастап Қазақстан Республикасы ІІМ Ішкі әскерлерінің Бас қолбасшысы.2014 жылғы 24 сәуірінен бастап Қазақстан Республикасы Ұлттық ұланынының Бас қолбасшысы.2021 жылғы 29 қыркүйектен бастап Қазақстан Республикасы Ішкі істер Министрінің орынбасары – Ұлттық ұланының Бас қолбасшысы.2022 жылдың қаңтар айынан бері ҚР Қорғаныс министрі.

Руслан Жақсылықов Қорғаныс министрі қызметіне қайта тағайындалды

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысы бойынша Соттар әкімшісінің ұйымдастыруымен облыс соттары қызметкерлері арасында «Тәрбие – ұлттың қазығы» атты шығармашылық байқау өтті.Қазақ халқының ұлттық құндылықтарын насихаттау, ұлттық тәрбиені келешек ұрпақтың бойына сіңіру және сот қызметкерлерінің шығармашылық әлеуетін дамыту мақсатында өткізілген игі шараға қызмет пен өнерді қатар алып жүрген 14 қызметкер қатысты.Байқауға ардагер судья, облыстық билер кеңесінің төрағасы З.Нұрсейітов, Қызылорда облысы бойынша Соттар әкімшісінің басшысы С.Сүлеймен, Қорқыт ата атындағы Қызылорда университетінің оқытушысы, филология ғылымдарының кандидаты А.Айтбаева, «Сыр бойы» газетінің бөлім басшысы Д.Аяшұлы, ҚР Мемлекеттік қызмет істері агенттігінің облыс бойынша департаменті басшысының орынбасары М.Бибітова қазылық етті.Сайысты С.Сүлеймен ашып, бойына ұлттық құндылықтарды сіңіре білген жас қызметкерлердің мемлекетшіл, адал, әділ болатынын айтты. Мұндай қасиеттердің әсіресе, адам тағдырына билік айтатын сот қызметкерлері үшін маңызды екеніне тоқталды.&nbsp;<blockquote>«Сот саласындағы шығармашылыққа жаны жақын өнерпаз қызметкерлердің қабілетін арттыру мақсатындағы мұндай сайыстар жиі өткізіліп тұрады. Жас қызметкердің әдеті, әдебі, білімі, бейімділігі сынға түсетін байқаулардың қорытындысы олардың болашақтағы қызмет сатысында да есепке алынатын болады», – деді ол.</blockquote>Сайыстың бірінші кезеңінде қатысушылар тақырып бойынша эссе жазды. Алдын ала дайындалған шығармада қатысушылар ұлттық тәрбие хақындағы орамды ойларын бөлісті. Екінші кезеңде қатысушылар өнер көрсетті. Бірі салт-дәстүрлер бойынша көрініс қойса, енді бірі домбырамен күй шертті. Келесі бір талапты өзі жазған өлеңін оқып, бірі ледэкран арқылы ұлттық тәрбие маңызын насихаттаған бейнежазбасын көрсетті. Ал, үшінші кезеңде ұлттық құндылықтарымыз төңірегінде сұрақ қою арқылы қатысушылардың ой ұшқырлығы сыналды.Байқау қорытындысында Байқоңыр қалалық сотының бас маманы Н.Нұрбайқызы І орынға лайық деп танылды. Сырдария аудандық сотының жетекші маманы О.Дүйсенов жүлделі ІІ орынды олжаласа, облыстық соттың маманы Л.Әбдуәли ІІІ орынға ие болды.Мұнан бөлек қазылар шешімімен Қармақшы аудандық сотының жетекші маманы А.Жақыпбек «Үздік ұлттық киім үлгісі», Қызылорда қалалық сотының жетекші маманы М.Мұсабек «Үздік шығарма», облыстық соттың бас маман-сот отырысының хатшысы А.Молдаш «Үздік туынды», мамандандырылған ауданаралық экономикалық сотының маманы Б.Ердәулет «Белсенді қатысушы» номинациялары бойынша жүлдеге ие болды. Мемлекеттік қызмет істері агенттігінің облыс бойынша департаментінің арнайы «Белсенді қатысқан мемлекеттік қызметші» номинациясын Қызылорда қаласының әкімшілік құқық бұзушылықтар жөніндегі мамандандырылған сотының бас маман-сот отырысының хатшысы Д.Камзаевқа табысталды.Жарыс соңында қазылар алқасы ұйымдастырушыларға, қатысушы мамандарға ыстық ықыластарын білдіре отырып, сын-ескертпелері мен ақыл-кеңестерін айтты.&nbsp;&nbsp;

Сот қызметкерлері арасында шығармашылық байқау өтті

<a href="https://kyzylorda-news.kz/">Kyzylorda-news.kz.</a> Жаңақорған ауданының экономикалық потенциалы, әлеуметтік деңгейі өте жоғары. Соңғы жылдары Жаңақорған аймағы өзіндік даму жолын тауып, Сыр өңірінің аудандары арасында көптеген салалар бойынша көш бастап келді. Әсіресе, инвестиция тарту, мемлекеттік бағдарламаларды орындау, жастар саясатын жүргізу, кәсіпкерлік, құрылыс, ауыл шаруашылығы, спорт және т.б. салада айтарлықтай нәтиже бар. Яғни, тұрақты дамудың тиімді жолын көруге болады. Оны статистика да айғақтайды.Біріншіден, кәсіпкерлік саласын алайық. 2023 жылдың 1 қаңтарында тіркелген кәсіпкерлер 3952-ға жетіп, 2022 жылмен салыстырғанда 115,8 процентке артты. Бұл – Сыр өңірінде шағын және орта бизнес құрылымдарының сандық және сапалық даму деңгейі (белсенді кәсіпкерлер) жөнінде алдыңғы сапта екенін көрсетеді. Өзге аудандармен салыстырмалы түрде қарасақ, Жаңақорған ауданында бір жылда жаңадан ашылған кәсіпкерлік субъектісі 845-ке жетсе, екінші орындағы ауданда 788-ді құрайды. Мұнын бәрі әкімнің кәсіпкерлік саласының дамуына ерекше жағдай жасауының нәтижесінен. Яғни, апта сайын кәсіпкерлікпен айналысуға ниетті азаматтарды жеке қабылдап, ұсыныс-пікірін мұқият тыңдап, қолдаудың нақты шараларын көрсетуі оң әсерін берді. Мәселен, 2022 жылы аудандағы кәсіпкерлер 296 жобаға 2 млрд. теңге жеңілдетілген пайызбен қаржы алса, 19 жобаға 21 млн. 127 мың теңге қайтарымсыз қаржы және 2 үлкен жобаға 461 млн. теңге жеңілдетілген пайызбен несие алды. Осыдан-ақ Жаңақорған ауданының кәсіпкерлік саласындағы әлеуетін бағамдауға болатындай.Ең бастысы, кәсіпкерлік саласын дамытуда орта тапты қалыптастыруға басымдық беріл-гені қуантады. Жүгеріден «Кәусар» сусынын өндіруші Әбжаппаров Сейдмұхаммед, лего кірпіш өндірісін жолға қойған Жомарт Шәуенов сынды кәсіпкерлердің жаңа буыны шығуы соның дәлелі.Аудан әкімі Мұрат Жолкелдіұлы бірге шалғайдағы ауылдық округке барып, жастармен жүздестік. Онда Алматы қаласынан арнайы ІТ университетінің білікті мамандары шақырылып, тың идеялар талқыланды. Сарапталды. Содан кейін көзінде жалыны, бойында жігері бар жаңақорғандық жастар бағдарламаға белсенді қатысып, 160 жоба ұсынды. Нәтижесінде 69 жоба қаржылай қолдау тауып, жеңімпаз атанды. Қайтарымсыз 69 млн. теңге, оған қоса, жобаға қатысушы 247 жас 6 ай бойы 40-60 мың теңге көлемінде шәкіртақы алды. Бұл дегеніміз – аудан жастарына 149 млн. теңге инвестиция құйылды деген сөз.&nbsp;Қаржы саласында талай жылғы тәжірибемде аудан жастарына осыншалықты деңгейде инвестиция тартылғанын көрмеппін. Шыны керек, жастар корпусын дамытуға бағытталған жобаның келешегі кемел. Қызылорда облысы мемлекеттік-жекеменшік әріптестікті (МЖӘ) дамыту бойынша елдегі бес үздік аймақтың бірі десек, Жаңақорған бағдарламаға белсенді қатысқан аудандар қатарында. Мәселен, былтыр әріптестік аясында ауданда 2 ФАП, 2 медпункт салынып, 2 спорт кешені пайдалануға берілгеніне куә болдық. Биыл бағдарлама аясында 38 жобаны іске асыру жоспарланып отыр екен. Оның ішінде, энергетика саласы бойынша – 8, білім саласы бойынша – 7, спорт саласы бойынша – 12, денсаулық сақтау саласы бойынша – 4, мәдениет саласы бойынша – 5 және әлеуметтік қорғау саласы бойынша – 2 жоба. Бұл – нақты жүзеге асатын жобалар. Мұны аудан басшысы есептік кездесулерде айтқан болатын.Жалпы, Жаңақорған ауданы тұрғындары нарықтық қатынастардың заңдылықтары мен қыр-сырларын меңгеріп, біліктілігін арттыруда және қаржылық ұйымдардан қаржы тартуда белсенді екені белгілі. Нақты айтқанда, «Бастау Бизнес» және «Бизнес-кеңесші» жобасы аясында нарықтың заңдылықтарын зерделеуші тұрғындар саны артып келеді. Соның нәтижесінде, «Бизнестің жол қартасы 2020», «Өңірлік Инвестициялық Орталығы» микроқаржы» ЖШС, «Ауыл шаруашылығын қаржылай қолдау қоры» АҚ, «Байқоңыр» әлеуметтік-кәсіпкерлік корпорациясы», ұлттық компаниясы» АҚ, «Қамқоршы» және т.б. қаржы институттарынан қаржы тартуда белсенділігі артып келеді. Сонымен қатар, «Сыбаға», «Алтын асық», «Құлан» бағдарламаларының игілігін тиімді пайда¬ланудың арқасында облыста ғана емес, республика бойынша алдыңғы қатардан көрініп келеді.Ауданда атқарылып жатқан ауқымды бастамаларды ардагерлер кеңесі біліп, көріп жүр. Сондықтан өзіміздің «Ардагер мерейі» газетінде ауданның жетістіктерін арқау етіп, көпшілік жиналған жиындарда сөз етіп, елдің мерейлі мәліметтерін дәріптеп жүреміз.Бір сөзбен айтқанда, Жаңақорған ауданы әлеуметтік-экономикалық дамудың жаңа сатысына көтеріліп, еліміздің озық отыз елдің қатарына қосылуда лайықты үлес қосып келе жатқанын көрсетеді. Мұндай игілікті істе біздің азаматтардың біліктілігі де, белсенділігі де жетеді.

Жаңақорғанда бір жылда жаңадан ашылған кәсіпкерлік субъекті 845-ке жеткен

<a href="https://kyzylorda-news.kz/">Kyzylorda-news.kz.</a> Жаңақорған ауданының әкімдік залында өңірге белгілі әрі белсенді ару-аналар бас қосып, мемлекет басшысы көтерген елдің әлеуметтік-экономикалық дамуын қамтамасыз етуде темірқазық ететін 8 бағыт туралы кеңінен тоқталып, тұщымды ой қозғады.&nbsp;Жаңа Қазақстанға қадам басуға мүдде біріктірген мемлекетімізде сапалық жаңғыруымызға керітартпа болып келе жатқан қасаң қағида, тоңмойын төрешілдіктен тез арада арылуда нақты талаптарды бекемдеп алу күн тәртібіне шықты. Әйтпегенде елдің жарқын болашағына сенімсіздік көңіл-күйдің екпін алып, еңсе түзеуімізге елеулі нұқсан келерін жоққа шығаруға болмайды. Міне, осының алдын алуда Мемлекет басшысы Қасым-Жомарт Тоқаевтың төрағалығымен еліміздің әлеуметтік экономикалық даму мәселелері жөнінде кеңейтілген мәжілісте сегіз басым бағыт бойынша тапсырмалар берілді. Осы күні Жаңақорған аудандық әйелдер кеңесінің 2023 жылға арналған жұмыс жоспары бекітіліп, оның құрамы мен мүшелері тағайындалған жиын соңы Елордада өткен барша Қазақстан халқына жауапкершілік жүктейтін кеңейтілген кеңесте қаралған мәселелер тақырыбына ойысып, қызу талқылауға ұласты.Әйел-ана – қоғамның тұрлаулы қазығы, сертке берік, сенімге лайық тілекшісі. Мемлекеттің жалпы дамуының жанашыры ретінде де әйелдер қауымы әлеуетін төмендеткен емес. Жиынды ашқан аудан әкімі орынбасары Бектас Нуридиновтың ұсыныс-пікірлерінің мазмұны осы бағытта өрбіді. Шараға модераторлық еткен аудандық әйелдер кеңесінің төрайымы Әзия Қыстаубаева 2022 жылы атқарған жұмыстарының қорытындысы және 2023 жылға арналған жұмыс жоспары жөнінде баяндады.Әйелдер қауымының бірлестігі бұқарамен байланысты нығайту керек. Отырыста ортақ арна тапқан тақырып мазмұны осыған келіп тірелді. Ел жағдайын оңалтуда, әр жерде қылаң берген кемшіліктерден арылып, экономиканы түбегейлі жаңғыртудың берік негізін қалауда саяси реформалардың маңызы бөлек. Осы бағыттағы Президент тапсырмалары қоғам өміріне табанды таяныш болуға ұмтылумен келе жатқан әйелдер ұйымына да биік міндеттер жүктейді. Бұл туралы Президент 19 сәуір күні өткен кеңейтілген кеңесте не деді?– Осында отырған әрбір мемлекеттік қызметші өзіне орасан зор міндет жүктеліп отырғанын сезінуге тиіс. Бұл ең алдымен барша Қазақстан халқының алдындағы жауапкершілік. Сіздер мемлекетшіл реформатор болуларыңыз керек. Реформаның түпкі мақсаты – халықтың өмірін жақсарту. Ол үшін тұрғындардың табысын көбейту керек. Жайлы өмір сүруіне жағдай жасап, қауііпсіздігін қамтамасыз ету қажет, - деді Қасым-Жомарт Тоқаев.Халық үніне құлақ асатын Үкімет қағидасын қалыптастыруға баса мән берді. Әкімдер халықтың көңілінен етене орын алу үшін тіпті көліктен түсіп, жұртпен қатар жаяу жүріп те жақсы жұмыстарды тындыра алатынын айтты. Енді кеңейтілген кеңесте талқыланған еліміздің әлеуметтік-экономикалық дамуын қамтамасыз етуде темірқазық ететін 8 бағыт туралы тоқталсақ, олар мыналар:• – Агроөнеркәсіпті дамыту. Ауылдың потенциалын көтеруде ынталы азаматтарға 2,5 пайызбен несие беріледі. Екі жылға дейін аяғынан нық тұрып алғанша үстемесін төлемейді, жұмысын еркін жүргізуге құқы бар. • – Табысты арттыру. Азаматтардың өзін-өзі дамытуына барлық мүмкіндік жасалуға тиіс. • – Макроэкономикалық саясат. Қазақстан мұнай және газ өндіруші ел ретінде жаңа геоэкономикалық жағдайға бейімделуі керек. Экономиканы жүйелі әртараптандыру – стратегиялық міндетіміз болуға тиіс. • – Экономиканы монополиядан арылту. Жарық, су, жанармай бағасын тұрақты ұстап тұруда мемлекеттік бақылауды күшейту. • – Инфрақұрылфмды дамыту. Қазірде ауыл мен қала айырмашылығы жойылып келеді. Осы жұмыстарды одан әрі тереңдету маңызды. • – Азаматтардың сапалы медицина мен білімге қол жеткізуін қамтамасыз ету. • – Табысты жұмыс орындарын ашу. • – Мемлекеттік басқару ісін жетілдіру. Әрбір азаматтың табысының жариялылығын жетілдіру.Бұл көлеңкелі бизнеске тосқауыл қояды. Бұл бағыттағы жобалар жөнінде аудандық қоғамдық даму бөлімі басшысы Әбілғазы Төлегенов түсіндірме жасады. Бұл міндеттерді баянды ету жергілікті жердегі ҮЕҰ-на да зор жауапкершілік жүктейді.

Жаңақорған ауданында әйелдер кеңесі 8 бағыт бойынша жұмыс жасамақ

<a href="https://kyzylorda-news.kz/">Kyzylorda-news.kz.</a> Жаңақорғандық жас өрендер Түркістан қаласында өткен республикалық «ART Baiterek» байқауында бейнелеу және би өнері бойынша үздіктер қатарынан көрініп, олжалы оралды.«Атадан мұра» қоғамдық қорының бүлдіршіндер, мектеп оқушылары мен жасөспірімдер арасында ұйымдастырған өнер додасында асығы алшысынан түскен жаңақорғандық өрендерді жеңісімен құттықтағымыз келеді. Аталмыш өнер ұжымы атынан аудан намысын «Бейнелеу өнері» саласы бойынша экологиялық бағытта қорғаған Баянсұлу Жұмағазының «Құтқаршы» картинасы ІІ орынды иеленсе, пейзаж жанрында «Өткелде» тақырыбын салып, қоршаған болмыстағы құбылыстар мен заттарды бейнелеу тәсілдеріне машықтанғанын дәлелдеген Асылбек Орынбек үздік үштіктен көрінді. Ал осы оқушыларды бейнелеу өнеріне тәрбиелеген жетекшісі әрі өнер мектебінің директоры Қалдыбай Қошқарбаев үздік шәкірт дайындағаны үшін «Алғыс хатпен» марапатталды.<blockquote>«Қазіргі заманда сурет салу балабақшадан бастау алса деген тілегім бар. Өйткені баланың ой-өрісін кеңейтіп дамыту үшін бұл сала ең қажетті оқу түрі деген болар едім. Негізі сурет салу арқылы өмірде кездесетін қарапайым заттарды бейнелеуді үйренеміз. Ал бұл дегеніміз бала қабілетінің дұрыс қалыптасуына жол ашады. Біздер осы бағытта жас суретшілерді дайындауды мақсат еттік. Демек, суреттің тілін түсіну үшін балаңыз кішкентай күнінен осы өнердің қыр-сырына қанығып өсуі керек. Сонда ғана Баянсұлу мен Асылбектей өрендерімнің қатары артатынына сенімдімін», – деді Қалдыбай Шілтенұлы жеткен жетістіктерімен бөлісіп.</blockquote>Бұл өнерлі ұжымның кшкентай бишілері де осал емес. Құрылғанына 10 жыл болған, 60 биші қыздан құралған «Еркеназ» би тобы да аудан атын талай додаларда асқақтатып жүр. Бұл жолы киелі Түркістан шахарында ұйымдастырылған республикалық байқауға 18 қатысушысы қатысқан Ажар Айқынбекқызы қызының шәкірттері Бас жүлдені қанжығаға байлады. Құрамында Жанұзақ Гулшара, Шанияр Ақнұр, Жұмат Зере, Жұмағазы Магда, Сунетулла Раяна, Бекахмет Әсел, Ерман Наз, Бауыржан Ұлсана, Әбілқасым Гулшат, Сапилла Еркеназ, Абдужолдас Айзере, Алжан Айсұлу, Жанәділ Жаухар, Амангелді Айман, Амангелді Шолпан, Серік Жасмин, Қызайбай Інжу, Бахыт Асылай сынды мың бұралған биші қыздары бар бұл топ байқаудан Ташкент қаласында өтетін Халықаралық конкурсқа жолдаманы жеңіп алды.Сондай-ақ аталмыш сайыста тағы бір өнер ұжымының белді маманы белгілі биші Гүлнар Ибадуллаеваның жетекшілігіндегі «Аққу» би тобынан түрлі жастағы үш топ қатысып, нәтижесінде сәбилер тобы Бас жүлдені, кіші тобы ІІ орынды иеленді.Ал аспапта ойнау жанры бойынша сайысқа түскен тартысты додада Нұрсезім Әлихан, Адиля Сембек, Сезім Икрамхан мен Зарина Қалидың басын қосқан «Мереке» тобы жүлделі ІІІ орыннан көрінді.Расымен өнерлі жан өзіне ғана емес, өзінің білім алушыларына да бақыт сыйлай алады. Бүгінде «Әлшекей» өнер мектебі шәкірттерінің бірнеше байқауларда қол жеткізген жетістіктерін ауыз толтырып айтуға болады. Демек, өнер адамның рухани азығы, ол халықтың бүгіні мен келешегі, арманы мен қиялы, жалпы болмысы дегенді дәлелдеп келе жатқан ұжымға дарынды шәкірттеріңіз мұнан да биік белестерді бағындыра берсін деген тілек айтамыз.

Жаңақорғандық өрендер олжалы оралды.

<a href="https://kyzylorda-news.kz/">Kyzylorda-news.kz.</a> Қазалы және Арал аудандарында кәмелетке толмағандар арасындағы құқық бұзушылық профилактикасы жөніндегі аудандық комиссияның кезектен тыс отырысы өтті.&nbsp;Жиынға аудан әкімдері, Қызылорда облысы полиция департаменті бастығының бірінші орынбасары полиция полковнигі Шамшадин Амитов, аудандық құқық қорғау органдарының басшылары, бөлім басшылары мен мектеп директорлары, тәрбие ісі жөніндегі орынбасарлары және мектеп психологтары қатысты.&nbsp;Отырыста &nbsp;ағымдағы жылы аудан көлемінде кәмелетке толмағандардың арасында құқық бұзушылық профилактикасы, олардың жыныстық қол сұғылмаушылығына және жасөспірімдер арасында топтық төбелестер бойынша атқарылған жұмыстардың тиімділігі, сондай-ақ &nbsp;алдағы уақытта атқарылатын іс-шаралар талқыланды.&nbsp;Полиция департаменті бастығының бірінші орынбасары полиция полковнигі Амитов Шамшидин &nbsp;баланың теріс іс-әрекетіне тек полиция немесе білім ұйымдары емес, ата-ана, бүкіл қоғам жауапты екендігін баса айтты.&nbsp;Сонымен қатар, тұрмыстық зорлық-зомбылықтан зардап шеккен жанұялардың жағдайына тұрақты түрде мониторинг жүргізіп, атқарылатын іс шараларды жыл көлемінде жүйелі түрде жалғастыруды, білім беру ұйымдарындағы қауіпсіздікті қамтамасыз ету, бейнекамералар орнату, жасөспірімдердің әлеуметтік желіге кіруіне шектеу қою мәселелерін қадағалауға алу жөнінде ескертті. &nbsp;&nbsp;Жиын барысында тиісті сала &nbsp;мамандары баяндама жасап, &nbsp;күн тәртібіндегі мәселе бойынша атқарылатын &nbsp;іс – шаралардың ұйымдастырылу тиімділігін арттыру қажеттігін атап өтті.&nbsp;<figure class="image"><img src="https://knadmin.beoblood.kz/uploads/339414731_6170703556378102_7469458336211352192_n_e72cce2bfb.jpg" alt="339414731_6170703556378102_7469458336211352192_n.jpg"></figure>

Кәмелетке толмағандар арасында құқық бұзушылық профилактикасы жөніндегі мәжіліс өтті

<a href="https://kyzylorda-news.kz/">Kyzylorda-news.kz.</a> Жаңақорған аудандық емханада баласын құшақтап жүрген ата-ана аз емес. Бірі жөргектегі баласын құндақтап алса, енді бірі тәй-тәй басқан сәбиін жетектеп жүр. Күніне 10-12 баладан дисплазия анықталуда. Яғни, әрбір 3 бала атаулы дертпен күресіп жатыр деген сөзге саяды. Бұл жөнінде балалар дәрігерлері алаңдаушылық білдіріп отыр.Сәбилерде ортан жіліктің ұршық басы дисплазиясы деген сырқат жайында жиі құлағымыз шалады. Кез келген жаңа туылған шақалақ 1 айдан соң дәрігерлік тексеруден өтуі тиіс. Кейбіріміз сол тексеруді елең қылмай 5-6 ай өткен соң немесе 1 жасында дәрігерге қаратамыз. Сондай немқұрайлылықтың салдарынан дәрігер балаларға "дисплазия" деген диагноз қойып жатады. Яғни, бұл туабітті жамбас ұршығының дамымауы немесе мүлдем болмауынан туындап жататын дерт десек болады. Аңдамаса, ана құрсағында жатқанда-ақ жабысатын бұл кеселдің ақыры сәбиді кемтар етуі әбден мүмкін. Бір аяқтың екінші аяқтан кемдігіне әкеліп соғады. Жамбастағы жіліктің ұршық басы дисплазиясы сәби жатырда жатқан кезінде сүйектерінің дұрыс дамымауынан пайда болады екен. Мұның себептерін мамандар түрлі етіп айтады.Бұл дерт тұқымқуалаушылық, анасының жүкті кезінде түрлі сырқаттармен ауруы, бала маңындағы судың аздығы, экологиялық жағдай, анасының айналысқан кәсібінің зияндығы, болашақ ананың дұрыс тамақтанбауы сынды сан алуан себебі бар. Біздің ауданда да атаулы дертпен ауыратын балалар жетерлік. Жылдан жылға көбеймесе азаймағанын дәрігерлер алға тартады. Осы тұста аудандық емхана травматология Бағдат Бодықовпен тілдесіп, көкейдегі сауалға жауап алдық.– Күніне тексерісімнен өткен он баланың алтауында осы сырқат кездеседі. Жалпы, ұршық бала жатырда жатқан кезден дами бастайды. Әр түрлі мультифакторлы ақаулардан жамбас ұршығының түзілуі кешігеді. Егер, ол уақтылы емделмеген кезде, ол ұршық орнынан тайып кетеді. Содан соң ұршықтың туа біткен шығуы пайда болады.Дисплазия прогрессивті түрде үдей берсе ұршықтың шығуына алып келеді. Біз баланы 1-3-6 айында және 1 жасқа толғанда, яғни, жасқа толғанша төрт рет тексеруден өткіземіз. Егер дисплазия болатын болса ата-аналар емді ертерек бастаса нәтижесі де соғұрлым жақсы болады. Алдымен баланы физиотерапия сәулемен емдеу тағайындалса, екінші массаж, үшінші парапинмен емдеуді ұсынамыз.Егер балада дисплазия анықталса баланы бесікке бөлеуге, арбаға жүргізуге болмайды. Жасына толғанша аяғын жерге бастырмау қажет. Өйткені, баланың аяғына күш түседі. Жылына екі рет жүйелі ем алып, үш жасқа толғанша жалғастыру қажет, – дейді травмотолог.Әйтсе де, балаңыздың болашағына алаңдап, безек қағып, уайымға берілудің қажеті жоқ дейді дәрігер. Өйткені, дертті емдеу оңай. Тек дер кезінде анықтап, кешенді ем жүргізу қажет. Туа бітті дисплазияның ұршығы шығып кеткен және екінші диплазия деген түрі бар. Дисплазия деген ол – ұршықтың басы кальций жетіспеушілігіне байланысты бос болып дамымай тұрады. Негізінде мұны емдеудің сан түрі бар. Мәселен, баланың аяғына шина кигіземіз немесе массаж қабылдайды. Бала перзентханада дүниеге келген сәтте балада дисплазия бар не жоқтығын неанатолог дәрігер анықтайды.Дәрігердің сөзіне сүйенсек, бала дүниеге келгеннен бастап-ақ, бұл аурудың белгілерін байқауға болады. Ең бірінші жамбастағы және сандағы қатпарлардың ассенометриясы, екіншіден, ауырған буын жақтағы аяқ ұзындығының салыстырмалы түрде қысқалығын байқауға болады, үшіншіден, аяқты айналдырғанда сан мен жамбас сүйегінің жалғасқан жерінен сытырдың естілуі, төртінші белгісі аурудың ең асқынған кезі, бір аяқ екінші аяқтан қысқа болғандықтан, аяқты сілтіп басуынан аңғару қиын емес дейді. Ақпараттарға зер салсақ, дисплазияға ұл балалардан гөрі қыздар жиі шалдығады. Осы тұста айта кетейік, сәбидің екі аяғының арасы жөнді ашылмауынан, табандарының сыртқа қайырылып тұруынан, жамбас пен сан сүйектері сызықтарының бірбіріне сәйкес келмеуінен атаулы дертті байқау қиын емес. Сонымен қатар, дисплазияға шалдыққан сәби аяғының ұшымен тұратынын да естен шығармау керек. Біз осы орайда баласы туабітті жамбас буынының дисплазиясына шалдыққан кент тұрғыны Назым Асылбаевамен сөйлескен едік.– Үлкен қызымның жасы 22-де, кішкентайында дәрігерге көрсетіп, тексеруден өткізген емеспін. Сол үшін әлі күнге дейін өкінемін. Қызым үш жасқа дейін жүрмеді. Баста еркелік деп ойладық. Отырған қалыпты алғаартқа жылжитын. Сөйтсем, қызымның жүруге дәрмені келмей жатыр екен &nbsp;жағалайтын болды. Сол кезде бір аяғының екінші аяғынан қысқа екенін аңғардық. Дереу дәрігерге апарып едім, қызымның ұршығы дұрыс дамымай қалғанын және уақыт өткізіп алғанымды айтты. Соған қарамастан, дәрігерлер жауапкершілікті сезініп, қызымды жанжақты тексеруден өткізіп, ем жасай бастады. Аяғына бірнеше мәрте шина кигізіп, гипсте салды. Бір жыл гипспен жүріп, әбден азаптанды. Қазір қызым бой жетті. Өкінішке қарай, аяғын ақсаңдап басады. Қыз емес пе, намыстанады, үйден шыққысы келмейді. Осыдан кейін балаларым болсын, немерелерім болсын туылғаннан кейін араға бір ай салып толықтай дәрігерлерге көрсетіп аламын. Бір жыл бұрын немереме де дисплазия деген диагноз қойды. Дереу массаж алып бастадық. Бір жасқа келгенше 7 курс массаж алдық. Қазір шүкір, жүгіріп ойнап жүр. Осының бәрі ата-ананың сауатсыздығынан екен ғой, – дейді.Жалпы, бұл аурумен ауырған сәбиді әр 3 ай сайын дәрігерге көрсеткен дұрыс. Ал 4 айдан кейін жамбасы мен санын рентгенге түсіруге болады. Егер сырқатты дер кезінде анықтап, ем қолданбаса, бала ертеңгі күні әбіржиді. 4-5 жасында аяғы талады, буынға тұз жиналып, үнемі шаршағыш келеді. Мұндайда массаждың пайдасы өте көп екенін мамандар алға тартады. Балалар массажисті Нұргүл Исмаилова мен сөйлесіп, біраз мағлұмат алған едік.– Қазіргі кезде жас нәрестелер арасында ұршық басының толық жетілмеуі кеңінен тарады. Оның бірнеше себебі бар. Мәселен, аналық жасуша дұрыс дамып жетілмейді және ұрықтың жамбаспен төмен орналасып дамуы немесе ұрықтың ірі болуынан туындап жатады. Бұл жағдайда іштегі нәрестеге жатырдың тарлығынан, ондағы судың аздығына байланысты механикалық қысым көреді. Ол қабынуға алып келеді. Сонымен қатар, жүктілік кезінде әйелде гармондардың бұзылуы, жас аналардың геникологиялық аурулары, жатыр миомасы және баланың жатыр ішілік қимылын қиындатуы мүмкін. Дисплазия салмағы 2 немесе 2,5 кг болып туылған нәрестелерде де байқалады. Сол себепті де, болашақ аналар бойына бала біткеннен денсаулығына жауапкершілікпен қарап, дәрумендерге бай тағамдармен қуаттануы керек.Негізі ұршық басының жетілмеуін дәрігер-ортопед көріп, анықтайды. Есіңізде болсын, баланы 6 айға дейін рентгенге түсіруге мүлде болмайды, узи-ге түсіреді. Содан кейін ғана дәрігер ем тағайындайды. Дисплазияның бірінші емі массаж. Сырқаттың ауыр немесе жеңілдігіне қарай массаждың түрі мен қанша уақыт қабылдайтынын белгілейді. Соған қарай маған көп атааналар келіп, ем алып жатады. Осы тұста айта кетейін, массаждың негізгі қызметі аяқ бұлшық еттерінің жоғарғы тонусын босату және буындардағы қан айналымын арттыру. Массаждың бір курсы он күн болса, дисплазияда 3 курстан 10 курс аралығында жалғасуы мүмкін. Оны баланың жағдайына қарап тағайындайды. Маған күніге 10-12 ата ана баласын әкеледі. Егер ем жүйелі түрде жасалса, атаулы дерттен құлан таза айығып кетеді. Осы уақытқа дейін алдыма келген балалардың барлығы да жақсы болып кетуде. Тағы бір жайт, бұрын баланы бесіктен алған соң әжелер сылап-сипап, аяқ-қолын тартып, жазып отыратын. Қазір ілуде біреу болмаса баланың қол-аяғын тартқылап отырғандарды өте сирек кезіктіреміз, – дейді.Байқағанымыздай, ертеңгі күні сәбиі дисплазия болмас үшін әрбір болашақ ана аяғы ауыр кезінде құнары мол тағамдарды пайдаланғаны дұрыс болар еді. Ас пен судың құрамында иод пен темір көп болуы керек. Сонда ғана дүниеге келетін баланың денсаулығы жақсы болмақ.Осы жерде мына бір мәселені еске салғанның артықтығы бола қоймас. Ертеректе апа-әжелеріміз немере-шөберелерін арқасына салып арқалайтын. Ал қазір ондайды сирек көретін болдық. Көненің көзін көрген апаларымыздың айтуынша, баланы арқалау өте пайдалы екен. Ондайда баланың екі аяғының арасы жақсы ашылатын көрінеді. Нәтижесінде ата-анасы арқалап өсірген балалар дисплазиядан аулақ болатынын уақыт өзі көрсетеді емес пе?

Дисплазия дертінің емі бар ма?

<a href="https://kyzylorda-news.kz/">Kyzylorda-news.kz.</a> Қазалы ауданының әкімі Мұхтар Оразбаев Әйтеке би кентіндегі бірқатар құрылыс нысандарын аралады. Ең алдымен аудан басшысы 5 квартал аймағындағы 210 гектар жердегі инфрақұрылым жобаларымен танысты.&nbsp;Аталған учаскедегі қалып қойған тұрғын үйлерді төмен қысымды газ желілерімен және электр желісімен жабдықтау жұмыстары осы жылы аяқталмақ. Жоба бойынша 137 тұрғын үй электр желісімен, 450-ге жуық тұрғын үй газ желілерімен қамтылады. Қазіргі таңда бұл жұмыстармен «Ремстрой» ЖШС айналысуда.&nbsp;Одан соң аудан басшысы Достық көшесінде салынып жатқан 250 орындық мектептің құрылысымен де танысты. Мектеп ғимаратының құрылысы аяқталуға жақын. Мұхтар Әуесұлы мердігерлерге сапаны басты назарға алып, құрылысты тиянақты аяқтауды жүктеді.&nbsp;Күнделікті тіршіліктің тынымсыз қозғалысы үшін жолдың маңызы зор. Биыл аудан орталығы Әйтеке би кентіндегі 35 көшеге орташа жөндеу жұмыстары жүргізіледі. Аудан әкімі Мұхтар Әуесұлы 5 квартал аймағындағы қиыршық тас төселетін көшелер мен Т.Әубәкіров көшесіндегі асфальт қабатын төсеу жұмыстарын бақылады.&nbsp;Т.Әубәкіров көшесін орташа жөндеу жұмыстарын жүргізуге биыл «Ауыл – ел бесігі» бағдарламасы аясында 32,4 млн теңге бөлінген. Қазіргі таңда «Нұрас и К» ЖШС негізгі қабатын тегістеу жұмыстарын жүргізуде.&nbsp;Аудан басшысы жол жөндеу жұмыстарына жауапты мердігерлермен кездесу барысында жұмыстың сапалы атқарылуын қатаң назарға алуды тапсырды.<figure class="image"><img src="https://knadmin.beoblood.kz/uploads/336126590_548340504070715_5289666212018989019_n_34a60cba48.jpg" alt="336126590_548340504070715_5289666212018989019_n.jpg"></figure><figure class="image"><img src="https://knadmin.beoblood.kz/uploads/336268844_1168628133849821_7068444509678587720_n_d2847ec292.jpg" alt="336268844_1168628133849821_7068444509678587720_n.jpg"></figure>

Мұхтар Оразбаев құрылыс нысандарын аралады

<a href="https://kyzylorda-news.kz/">Kyzylorda-news.kz.</a> Қазақстан Республикасының Президенті Қасым-Жомарт Тоқаевтың «Әкімдердің халықпен кездесулерін өткізу туралы» Жарлығына сәйкес, аудан әкімі Нұржан Ахатов Сұлутөбе, Майлытоғай, Тартоғай, Қоғалы ауылдық округі және Шиелі кенті тұрғындарымен кездесулер өткізді.&nbsp;Кездесулер барысында аудан әкімі алдымен барша аудан халқына Парламент Мәжілісі мен мәслихат депутаттарын сайлау науқанында белсенділік танытып, дауыс бергендері үшін алғысын білдірді. Мұнан соң, әр ауылдық округ бойынша депутат болып сайланған аудандық мәслихат депутаттарын таныстырып, алдағы уақытта депутаттардың қолдауымен көпеген істер атқару жоспарланғанын айтты.&nbsp;Ең алдымен аудан басшысы биылға жылға 6 бірдей ауылға газ жүйесін тарту, 2 ауылға ауыз су жүйесін жүргізу, 2023-2024 жылдары 8 бірдей елді мекенде амбулаториялық ғимараттардың құрылысын жүргізу жоспарланып отырғанын айтты. Келесі кезекте, Нұржан Сәбитұлы 3 ай бұрын көтерілген мәселелердің шешімін тапқанын бір бөлек, алдағы уақытта шешілетінін бір бөлек баяндап, тұрғындардың сауалдарына жауап берді. Ауылдық округ тұрғындарының тарапынан аяқ су каналдарының тазалығы, жедел жәрдем көлігін жаңарту, 2022 жылы берілген трансформаторларға қосымша жаңа трансформатор орнату секілді мәселелер көтерілді.&nbsp;Ал, кент тұрғындарын мазалаған мәселелер қатарында, кенттің ішкі көшелеріне асфальт жабындысын төсеу, қоқыс контейнерлерінің санын көбейтіп, айналасына қоршау орнату, тоқтап қалған бірнеше қоғамдық көлік бағыттарын қайта жаңғырту мәселелері бар. Аталған мәселелерге қатысты аудан басшысы пікір білдірді.<blockquote>«Биылғы жылы Шиелі кентінің біршама көшелерінде асфальт жабындысын толықтай жаңартуды жоспарлап отырмыз. Асфальт жабындысы ұзақ сақталуы үшін суағар жүйесін жүргізу де жоспарымызда. Ал, уақытша жүруіне тоқтатқан қоғамдық көліктерге келер болсақ, біз біршама жұмыстар атқарып, осы бағыттарды «әлеуметтік маңыздағы бағыт» деп танып, қоғамдық көлік иелеріне мемлекет тарапынан субсидия бөлуді қарастырып жатырмыз. Алдағы уақытта бұл мәселе де шешімін табады», – деді Нұржан Сәбитұлы. &nbsp;</blockquote>Кездесу соңында Шиелі кенті ардагерлер кеңесінің төрағасы Болат Күлімбет аудан көлемінде жүргізіліп жатқан тазалық жұмыстарына алғысын білдіріп, өзге де кент тұрғындарын осы бір игілікті іске үн қосуға шақырды.<figure class="image"><img src="https://knadmin.beoblood.kz/uploads/338352136_741055977424575_8199429918049965816_n_1635206bef.jpg" alt="338352136_741055977424575_8199429918049965816_n.jpg"></figure><figure class="image"><img src="https://knadmin.beoblood.kz/uploads/338360482_926333615302565_7541280590368539881_n_2a1e8f9f2d.jpg" alt="338360482_926333615302565_7541280590368539881_n.jpg"></figure>

Шиелі ауданының әкімі тұрғындарымен кездесті

<a href="https://kyzylorda-news.kz/">Kyzylorda-news.kz.</a>&nbsp; Қарекет қылған адамның қарны да, көңілі де тояды. Расында солай. Талап қылып, алға талпынған азаматтарға бүгінде мүмкіндік көп. Бұл мүмкіндіктер алдағы уақытта да әрі қарай жалғасын табатыны ақиқат. ҚР Президенті Қасым-Жомарт Тоқаевтың да басты назарындағы кәсіпкерлік саласы бүгінде біз айтқан азаматтарға жан-жақты қолдау көрсетіп келеді.&nbsp;<blockquote>&nbsp;Мемлекет кәсіпкерлікті жан-жақты қолдау үшін тиімді тәсілдер қолданып жатыр. Атап айтқанда, гранттар, шағын және жеңілдетілген несиелер беріледі. Аймақтардағы кәсіпкерлердің санын айтарлықтай көбейту үшін мемлекет тарапынан қолдау шараларын күшейту қажет. Осы мақсатта арнайы ұлттық жоба жүзеге асырылып жатыр. Бірақ бұл туралы халықтың көбі білмей жатады. Сондықтан ел ішінде бизнесті қолдау саясаты туралы ақпараттық-түсіндіру жұмысын жүргізу қажет, – деген болатын ел Президенті.</blockquote>Міне, аймақтарда, өңірлерде кәсіпкерлікті жан-жақты дамытып, түсіндіріп, халыққа тиімді жағын насихаттап келе жатқан, сондай-ақ кәсіп бастаушыларға таптырмас мүмкіндік тудырып келе жатқан аудандық кәсіпкерлер палатасының жұмысы жүйелі. Соған бір дәлел жуырда ғана Аралдан ашылған «Aral sabyn» бренді. Кәсіп иесі Нұртай Бозғұлов «Ұлттық жоба» шеңберінде қайтарымсыз грант жеңіп алып, ауданда алғашқы рет сабын шығару жұмысын бастады.1993 жылы туған жас кәсіпкер осы уақытқа дейін кәсіппен айналыспаса да, осындай тың бастаманы бастауға тәуекел етіп, қазіргі уақытта мемлекеттің қолдауын пайдаланып, Алматы қаласынан сабын жасауға арналған екі техника алдырған. Осы техникалардың көмегімен бүгінгі таңда алғашқы өнімдерін дайындап шығарып жатыр.<blockquote>Кір сабынның құрамы өте оңай. Өсімдік майының, малдың майының қалдығы, каучук соданы қолданамыз. Жасалу жолы да аса қиын емес. Араластыратын қоспаларды мөлшерімен қосып, барынша араластырған соң, нығыздап, оны сабынның пішініне келтіретін құрылғыға ауыстырамыз. Бірақ шикізатты сырттан алдырып отырмыз. Алматыдан, Ақтөбеден алдыруға тура келеді. Оған да себеп бар. Өйткені біз жақта олардың бағасы қымбатқа түседі, – дейді кәсіпкер.</blockquote>Расында қай уақытта да сұраныстан түспейтін тауардың түрін таңдаған жас кәсіпкер алдағы уақытта өз өнімін нарыққа шығару жолын да қарастырып қойған. Қазірде базар нарығындағы бағадан төмен бағада тұтынушыларға ұсынуды көздеп отырған жас кәсіпкердің болашақтағы жоспары да ауқымды.<blockquote>&nbsp;Әзірге басты мақсат – сапалы өнім шығарып, тұтынушылардың көңілінен шығу. Қай өнім болса да бағасына сапасы сай болғаны дұрыс қой. Бірақ тек сабын өндірумен ғана шектелмейміз. Алдағы уақытта сұйық сабын мен жуынуға, жууға арналған гельдер шығаруды да жоспарлап отырмыз. Бәрін уақыт көрсетеді, – дейді Нұртай Малкаждарұлы.</blockquote>Алдыға мақсат қойып, сол мақсатқа жетудің жолын таба білген жас кәсіпкерге біз де сенім артамыз. Өзінің сүйікті ісін істеген адам емес, өз ісін сүйіп істеген адам ғана бақытқа бөленеді деген емес пе?!

Аралдық кәсіпкер кір сабын шығарып жатыр

<a href="https://kyzylorda-news.kz/">Kyzylorda-news.kz.</a> Еліміздегі жоғары оқу орындарында білім алып, одан әрі ілімін шетелде жалғастырып жүрген жастарымыздың қатары көбейіп келеді. Сондай жастардың қатарында сыр сүлейлерінің ізбасары, сырлы өнердің тереңіне үңіліп жүрген Малика Алдамжарованы қуана айтқан болар едік.Ол 2001 жылы дүниеге келген. Ш.Уәлиханов атындағы орта мектебінің «Алтын белгі» иегері. 2010-2015 жылдар аралығында аудандық Т.Салқынбайұлы атындағы әуез мектебінің «Домбыра» сыныбын күй жанры бойынша бітірген. Сонымен қатар, К.Рүстембеков атындағы жыраулар үйі үйірмесінен жыр жанры бойынша білім алған. Қорқыт ата атындағы Қызылорда мемлекеттік университетінің дәстүрлі жыр мамандығының түлегі. Жоғары оқу орнындағы «Домбыра-думан» ұйымының негізін қалаушы жас. 2021-2022 оқу жылында Қызылорда қаласы, Ақсуат ауылдық мәдениет үйінде домбырашы және домбырадан дәріс беруші қызметін атқарған.Біздер үшін әркез өнер адамының өнерге келуі, оны таңдауы – қызықты сұрақ. Бұл сауалдан тағы да аттап кете алмадық.<blockquote>«Мектеп уақытысында 4-сыныптан домбыраға деген қызығушылығым өте қатты болды. Бірақ үйде анам қарсылық жасады. Көрші үйдегі Айгүл Жағалова деген апайым домбырадан сабақ беретін. Менің қоймай өтінгенімнен анам сол кісінің сыныбына күй жанры бойынша музыкалық мектепке берді. Сөйтіп, музыкалық мектепте 5 жыл Айгүл апайдың сыныбында оқыдым. Негізі әу бастан қызығушылығым күй емес, домбырамен жыр айту болған. Өйткені, мұғалімімнің Жұлдызай есімді қызы терме айтатын. Соған қатты қызығып, үйіне сылтаумен терме тыңдауға жиі баратынмын. Дауысы сондай әдемі. Содан ауданда Жыраулар үйінің бар екенін есіттім. Анам «Бидас Рүстембеков деген жырау кісі бар. Үйренемін десең, соған бар» — деді. Домбыра ойнап үйреніп қалған уақытым ғой. Ол үйден алыс болды, баруға қорқатынмын. Бірақ қызығушылық қойсын ба?! Не керек көрші сыныптас досымды қасыма ертіп бардым бірде. Анам онымды жақтырмады. Ол уақытта Бидас ағай Жыраулар үйінің директоры. Ағайға кіріп, танысып қайттым. Қуанышымда шек жоқ болып үйге қайттым. Ағай бірінші сабақта Тұрмағамбет атамыздың «Жаныңнан жақын нәрсе жоқ» деген термесінің тек бір қатарын үйреткен. Мен соған мәзбін, мақам үйрендім деп, ол кезде сөздің мағынасын түсінбейтін кезім ғой. Тек терме айтып, сол домбырадағы әуен сазы мақамын үйренсем болды деп жүргем. Ол кезде қателеспесем 6-7-сыныпта оқимын. Үйге келіп тек мақамның бір қатарын тарта беремін. Сол кезде бірден үйреніп алғанмын. Ішімнен ойлап қоямын, мен домбыра тарта аламын, болмағанда төрт қатарын үйретпей ме деп, балалық-ай. Сөйтсем, ағай сөзінің мағынасын түсініп асықпай үйренсін дегені екен ғой. Солай-солай үйреніп кеттік. Одан кейін ұстазым өзінің шәкірті Әйгерім Ешбаеваға мені табыстады. Солай жыр термедегі әрі қарайғы ұстазым Әйгерім апай болды. Оның болмысы, тұрысы бәріне менің бала көңілім ауып, ол кісіні үлгі тұттым. Кейін бәрі: «Әйгерім шәкіртің өзіңнен айнымайды» деп. Апайымнан өмір жолында да, өнер жолында да тәлім-тәрбие көп алдым. Менің осы күндегі өзіндік орны бар жыршытермеші болып қалыптасуымның баспалдағы – аудандық К.Рүстембеков атындағы жыраулар үйі. Мақтанамын сол үйдің шәкірті болғаныма. Қазіргі таңдағы Қармақшы өңірінен шыққан талантты жыршы-термеші қыз-жігіттеріміздің бәрі сол үйірменің шәкірттеріміз. Ал, өнер жолындағы баспалдағым музыка мектебінде Айгүл Жағалова мұғалімімнің сыныбынан басталды. Ұстаздарыма мың алғыс!», – дейді көптеген халықаралық, республикалық байқаулардың жеңімпазы.</blockquote>Маликаның Қорқыт ата атындағы Қызылорда мемлекеттік университетіне оқуға түскенінде алғашқы ұстазы Нұртуған жыр мектебінің өкілі, жырау – Шолпан Бимбетова болған. Одан соң Жиенбай жыр мектебінен де дәріс алған. Ол өнер өлкесінде осы кезге дейін бірқатар жетістікке жетсе, соның кейбіріне тоқтала кетейік. Атап айтқанда, Байқоңыр қаласында өткен «Мой родной край» XII халықаралық балалар байқауында, Қызылорда қаласында өткен «Жыр жүйрігі – Жиенбай» атты жыршы-термешілер байқауында I орын, ауданда өткен «Домбырасын моншақтаған жыр жампоздары» тақырыбындағы облыстық жыршы қыз-келіншектер фестивалінде лауреат атанады. Жырау Ш.Төлепованың 85 жылдығына орай өткізілген облыстық «Шалқыған Шамшат жырлары» атты жыршы-термешілер фестивалінің дипломанты болса, облыстық XVII «Бозторғай» байқауының II орын иегері, облыстық «Қорқыттан қалған қоңыр үн» өнер байқауында бас жүлдені қанжығасына байлайды. «Әбіш шығармалары» атты ғылыми-танымдық зерделеу жобасында ІІІ орын алса, «Сөз шеберлері» атты аймақтық сайыста да бабы келісіп, биіктен көрінеді.Малика Маратқызы «Өнерде шекара болмайды» дегендей, Қазақстанда алған білімін одан да жоғары деңгейде дамыту үшін бүгінде шет мемлекетте білімін жетілдіруде. Атап айтқанда, Түркияның Анкара қаласында «Ankara müzik ve güzel sanatlar», яғни Анкара музыка және бейнелеу өнері университетінің «Музыкатану» мамандығында магистратура ғылыми дәрежесінде білім алуда. Дарын иесі – «Türkiye bursları» әлемдегі түркі жастарының халықаралық бағдарламасы негізінде грант ұтып алған болатын.«Мұнда оқуға талап қатты. Сұраныс та жоғары. Оқу орнында әлемнің әр түкпірінен түркі жастары жиналған. Ара-кідік іс-шараларға қатысып тұрамыз. Қазақтың домбырасына, оның ішінде жыр-термеге, біздің Сыр елінің мақам-сазына деген қызығушылықтары керемет. Достар таптым. Араласып тұрамыз, мәдени-өнер жағынан тәжірибе алмасамыз. Олар – Қазақстанды болашағы зор мемлекет деп есептейді. Мемлекет басшысына құрметпен қарайды. Қазақ халқын жандарына жақын тұтады» дейді ол сонау түркі елінен ұялы байланыс арқылы.– Ең әуелі қасиетті жүз шайыр шыққан мекенде туғаныма мақтанамын. Елге тілегім – ауданымның өркендегенін, қай саласы болсын жоғары деңгейде жұмыс жасағанын қалаймын. Елдің атын шығарар азаматтары көп болсын. Естіп жатырмын, зілтемірші Ерасыл ініміз екі дүркін әлем чемпионы атаныпты. Ауыл-ел аман болсын. Өзімнің сол Сыр елінде туғанымның өзі бір жетістік деп айтар едім. Мен үшін ауыл өте ыстық әрі қымбат, – дейді арнайы Түркия төрінен сәлем жолдаған жыршы-термеші қызымыз.

Қармақшылық ару Түркияда білімін жетідіруде

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің тапсырмасымен Шиелі ауданында ақпан айының 27-нен бастап көркейту-көгалдандыру жұмыстары қарқынды түрде жүргізіліп жатыр.Бүгін де бұл игі істер жалғасын тауып, аудан ардагерлерімен бірге Шиелі ауданы әкімінің уақытша міндетін атқарушы Болатбек Ысмағұлов және жаңадан сайланған аудандық VIII шақырылым мәслихат депутаттары кент аумағында бірнеше жерге көшет екті.Айта кетейік, аудан орталығындағы "Шымкент-Самара" трассасының бойында шаруа қожалықтардың демеушілігімен 3,6 гектар жерге мыңдаған түп көшеттер егіліп, 6,4 шақырым аумақ қоршауланды. Одан бөлек, кенттегі И.Әбдікәрімов, Яссауи көшелерінің және технологиялық жолдың бойына ірі өндіріс орындарының, мекемелер мен жеке тұрғындардың жұмылдырылуымен 7,1 гектар жерге көшеттер отырғызылуда.&nbsp;Биылғы меже 24 000 түп көшет егу болса, біз елді мекендерді қоса алғанда жалпы аудан бойынша бүгінгі күнге дейін 40 мың 200 түп көшет отырғызылды. Аталған аумақтар арықпен келетін аяқ судан бөлек, арнайы ұңғымалардың көмегімен суғарылып жатыр. Егілген көшеттердің шығымдылығына жыл көлемінде күтіп баптау шаралары жүргізілетін болады.<figure class="image"><img src="https://knadmin.beoblood.kz/uploads/339113497_2429182983913317_3390240205691426343_n_6a5ce8a293.jpg" alt="339113497_2429182983913317_3390240205691426343_n.jpg"></figure>

Қазақстан және Қызылорда облысының жаңалықтары