<a href="https://kyzylorda-news.kz/">Kyzylorda-news.kz.</a> Бұл – Әділет&nbsp; Айтмағанбетов (суретте). Былтыр ғана оқу бітірді. Алматыдағы Қаныш Сәтбаев атындағы Қазақ ұлттық техникалық университетін тәмамдаған. Мамандығы жол саласына қатысты. «Автомобиль жолдарының құрылысы» бойынша бітірген кейіпкеріміз бүгінде жұмыс істейді. Дұрысы, Қызылорда облысындағы «Жол активтері сапасының ұлттық орталығы» филиалының зертханашысы.«Жол активтерінің ұлттық сапа орталығы» деп аталатын құзырлы мекеме төрт жыл бұрынғы Президент Қасым-Жомарт Тоқаевтың Жолдауынан соң құрылды. Біздің облыста бұның филиалы бар. 2019 жылдың наурызында Үкіметтің №131 қаулысымен ашылған мекеменің негізгі міндеті – республика аумағында салынып жатқан немесе жөнделіп, жаңартудан өткен автожолдардың сапасын сараптау. Мына жол қалай салынды, қалыңдығы, ұзындығы мен ені&nbsp; құжат бойынша сәйкес пе, асфальт құрамы, битум сапасы, бәрін-бәрін арнайы зертханада анықтап, қорытындысын қолыңа ұстата қояды.Әділет үш жыл бұрын осында тәжірибеден өткен. Бес ай бойы теориядан алған білімін практикада ұштастырыпты. Әрі арнайы келісім-шарт негізінде жалақы алып жүрді.<blockquote>Былтыр оқу бітірген соң осы орталыққа қайта келіп, тамыз бен желтоқсан айы аралығында тағы да жұмыс істедім. Жалақы төленіп тұрды. Ал биыл сәуір айынан бастап тұрақты жұмысқа тұрдым. Бұйырса, әлі де жолдағы құрылыс материалдарының сапасы мен кемшілігін анықтауда көп нәрсе үйренемін. Мұндағы білікті мамандар бар білгенін түсіндіріп отырады. Қазірдің өзінде асфальт құрамы, ондағы суды сіңіру пайызы, жолдың астыңғы қабатына төселетін материалдар сапасын анықтауда зерттеу жасап жүрмін. Алдағы уақытта мамандығым бойынша жол саласында жұмыс істегім келеді, – деп ағынан жарылды бізге жас маман.</blockquote>Ресми дерекке сүйенсек, республика бойынша бұған 10 мыңнан астам маман жетіспейді екен. Мектеп бітірушілердің көбі гуманитарлық бағыттағы мамандыққа әуес. Жол құрылысын меңгеруге құлшыныс танытатындар аз. Ал қазіргі жол саласында жүргендер көбі маман емес екенін ашық айтуымыз керек. Төселіп жатқан асфальт не басқа да материалдың жағдайы жіті зерттелмеген соң сапасы оңды бола ма?! Кеше салған жолдың бүгін тозатыныны тағы бір себеп осы. Дұрысы, жол салудан бөлек, оны күтіп ұстауды да білетін кадр керек-ақ.<blockquote>Мысалы, оқу орнында біздің топта 32 бала оқыды. Соның ішінде он шақты студент қана өз мамандығымен жұмыс істеп жүр. Қалғаны басқа салада. Жалпы, жол саласындағы жалақының аздығы да бұған әсер етеді деп ойлаймын. Екіншіден, қазіргі жастарды білесіз ғой, бірден басшы болғысы келеді, – деп күлді Әділет.</blockquote>Оның айтуынша, орталықтағы жұмысы өзіне ұнайды. Жаңа зертханалық құрал-жабдықтар келіп, жұмыс бұрынғыдан жеңілдене түскен. Сондай-ақ бұл салаға мол тәжірибе керек. Қазір Әділет облыс орталығындағы жолдарды түгел аралап, танысыпты. Инженерлермен бірге салынған жолдың сапасын білу мақсатында аудандарға да сапарға шығып жүр.Мемлекет басшысы 2025 жылға дейін елдегі жолдың 95 пайызы жақсы жағдайға жетуі тиіс деген пәрмен берді. Ал жыл сайын республикада шамамен 10 мың шақырым жергілікті жолдар жаңғыртудан өтеді. Бірақ, сапаға көңіл тола ма? Мерзімді баспасөз бен телеарнада әлеуметтік желідегі жазбаларда жол сапасына деген сын көп. Бұл жерде кадр тапшылығы анық көрініп тұр. Жоғарыда айтқан «Жол активтері сапасының ұлттық орталығы» бұл қиындықты жыл өткен сайын еңсеріп келеді. Облыстық филиалдағы зертхана меңгерушісі Мағжанның айтуынша, орталық басшылығы өзін жақсы жағынан көрсетіп, тәжірибеден өтуде талпынысы жоғары студенттерге қосымша жалақы төлеуге шешім қабылдаған.<blockquote>&nbsp;Бұл ынталандыру. Қазір біздің жол саласында маман тапшы екенін мойындауымыз керек. Сол себепті студенттерді арнайы бағдарлама шеңберінде зертханалық іс-тәжірибеге үйретіп, жол саласына жұмысқа тартудамыз. Біз бұған дейін де бірнеше студентті тәжірибеден өткіздік. Олар еліміздің әр түрлі қаласында жұмыс істеуде. Негізгі мақсат осы. Өзіңіз білесіз, жаз бойы бізде жұмыс қарбалас. Ал қыста қарап жатпаймыз. Мысалы, барлық мамандар болып облыстағы мектеп оқушыларымен кездесу өткізудеміз. Кәсіпорынның арнайы «Екі мың мектеп» атты бағдарламасы бар. Мақсатымыз – біздің мамандыққа деген қызығушылығын ояту. Жыл басынан бері облыс бойынша бірнеше мектепте кездесу өткізіп, оқушыларға кәсіби бағыт-бағдар берілді. Мойындау керек, жалғыз зертханаға ғана емес, жол салушылардың өзі қазір түрлі техникалық мамандыққа зәру, – дейді Мағжан Қасымхан.</blockquote>Оның айтуынша, нәтиже де көңіл қуантарлықтай. Осы кейінгі үш-төрт жылда салаға қызығушы жастарды саны артқан. Екінші бір қуаныш, Қызылорда қаласындағы Исатай Әбдікәрімов атындағы аграрлық-техникалық колледжінде биыл алғаш рет «автомобиль жолдары мен аэродромдар құрылысы және пайдалану» мамандығы ашылған еді. Қазір 25 студент оқиды. Мұндай шаралардан соң жол құрылысы саласына қызыққан жігітердің аз болса да қатары көбейіп келеді. Ал біздің кейіпкер – Әділеттің таңдауы көп жастарға үлгі десек қателеспеспіз. Өйткені, нағыз қат мамандыққа сұраныстың жоғары болатынын да ескеру керек.<figure class="image"><img src="https://knadmin.beoblood.kz/uploads/92ea3ea0_de4f_410b_921c_ff9c31d24d20_a0e21e5a09.jpg" alt="92ea3ea0-de4f-410b-921c-ff9c31d24d20.jpg"></figure>

Жергілікті өнімге сұраныс жоғары

<a href="https://kyzylorda-news.kz/">Kyzylorda-news.kz.</a> Қызылорда облыстық мәслихатының экология, өндіріс, шаруашылық және кәсіпкерлікті дамыту мәселелері жөніндегі тұрақты комиссия отырысы депутат Бауыржан Сандыбаевтың төрағалық етуімен өткізілді.&nbsp;Депутат Ж.Нұрымбетов, Д.Жұмбеков, Р.Ибраев, Е.Қалиев, Б.Мақашев, Қ.Нұрсейітов, А.Рахметов, Қ.Сақтағанов, Н.Сопбеков, О.Төлепов қатысқан отырыста Қызылорда облысының ауыл шаруашылығы және жер қатынастары басқармасы басшысы Т.Дүйсебаевтың есебі тыңдалды.&nbsp;Өз есебінде 2020-2022 жылдар аралығында республикалық және облыстық бюджеттерден барлығы 37,6 млрд қаржы бөлініп, ауыл шаруашылық, жер мәселелері бойынша атқарылған жұмыстарға тоқталып, жоспармен бөлісті.&nbsp;Осы сұраққа байланысты, депутат Орынбасар Төлепов шабындық жерді халыққа берудегі мәселені қозғады. Ауылдардағы, егістіктердегі ішкі су жолдарын тазалау мәселесін айтқан Депутат Жорабек Нұрымбетов суды мөлшермен пайдалану, егістікке берілген жердің сапасын бақылау және егістікті суару үшін су шаруашылығынан рұқсат алу керектігін де сөз етті.&nbsp;Депутат Бақдәулет Мақашев әр шаруашылықтағы ішкі су жолдарын тазалау үшін пайдаланылған шығындардың есебі жүргізіліп, қаржысы бөлінсе суға үнемділік болатындығын алға тартты.&nbsp;Сонымен қатар, депутат Ерлан Қалиев қазіргі таңда жанар жағар май және техниканың бағасы қымбаттағанымен жұмысшы еңбекақысының сол күйі қалғандығын мәселе етіп көтеріп, шаруашылықтарға ең алдымен осы мәселені шешу керектігін айтты.&nbsp;Күн тәртібіндегі «Әлеуметтік маңызы бар қатынастардың тізбесін айқындау туралы» Қызылорда облыстық мәслихатының 2016 жылғы 10 ақпандағы №352 шешіміне өзгеріс енгізу туралы мәселесі бойынша Қызылорда облысының жолаушылар көлігі және автомобиль жолдары басқармасының басшысы П.Шамұратов хабарлама жасап, ұсынған облыс бойынша халық көп шоғарлануына байланысты әлеуметтік маңызы бар қатынастар тізбесіне өзгеріс енгізу мәселесі депутаттар тарапынан қолдау тапты.&nbsp;Сондай-ақ, «Қызылорда облысында жылу маусымына дайындық және оны өткізу қағидаларын бекіту туралы» Қызылорда облыстық мәслихатының 2016 жылғы 19 мамырындағы №28 шешіміне өзгерістер енгізу туралы облыстық энергетика және тұрғын-үй коммуналдық шаруашылық басқармасының басшысы Р.Нұрмағанбетов хабарлама жасады. Ол сыртқа ауа +10 градустан төмен болған жағдайда жылуды қосу мәселесімен таныстырды. Халық игілігі үшін жасалатын жұмыстарға депутаттар қолдау білдірді.&nbsp;Комиссия отырысы соңында депутат Ерлан Қалиев Байқоңыр қаласындағы бірқатар мәселені қозғады. Ашып айтар болсақ, адам денсаулығына зиян келтіретін радиацияға байланысты жергілікті тұрғындарға көмек көрсету, 3 ай сайын тариф бағасы көтерілуі және қазақстандық кәсіпкерлерге Ресей Федерациясы заңының аясында жасалып отырған қиянаты ҚР қаржы министрлігіне ұсыныс ретінде жолдау қажеттілігін баса айтты.&nbsp;Осыған орай тұрақты комиссия депутаттары уақытша комиссия құрып, мәселені егжей-тегжей зерделеу керектігін бір ауыздан қолдады.&nbsp;

Тұрақты комиссия: Ауыл шаруашылығы саласы назарда

<a href="https://kyzylorda-news.kz/">Kyzylorda-news.kz.</a> Қазақ «Үлкеннің мыңына бергенше, баланың біріне бер» дейді. Неге? Өйткені, бала – алдымен, ізбасарың. Бергеніңді бағалайды. Айтқаныңды тыңдайды. Сүйкімді үнімен, былдырлаған тілімен жүректі жаулайды. Мейірім сыйлайды. Осыны ескерген дана халқымыз сәбиі дүниеге келген әр ата-анаға «ұзағынан сүйіндірсін» деп бата береді. Келешек елім, жерім дейтін жас ұрпақтың болуын қаласақ, балаларға жасынан жол көрсетіп, бағыт-бағдар беруге ұмтылатынымыз да сол. Сондықтан да, Мемлекет басшысы Қасым-Жомарт Тоқаевтың өткен жылды «Балалар жылы» деп жариялағаны бекер емес. Расында аталған жылда аудандағы бүлдіршіндерді қалай қуанта алдық?! Атқарылған жұмыстардың легі қандай болды? Бір сөзбен айтсақ, бар жақсымыз балаларға арналды ма?Құрметті оқырман, ашығын айтыңыз, «Балалар жылы» сіздің есіңізге нені салады? Жер-жерден балалар алаңы, ойын-сауық орталықтарының іргетасы қаланып, пайдалануға берілді дегенімізбен, мұны өзі аз секілді көрінеді. Одан бөлек, балалар күні құлыншақтарды қуанышқа кенелтіп, ауқымды шараның өткені бар. Сол тұста көптеген бүлдіршіннің жүзіне күлкі ұялаған еді.Еске салсақ, бұл күнді аудандық білім бөлімі жоғары деңгейде атап өтуді жөн санаған еді. Жүздеген балғындарды аудандық Оқушылар үйінің алаңына жинап, мерекелік көңіл-күй құшағындағы қуаныш иелеріне түрлі сыйлықтар дайындады. Ұйымдастырушылар шараға қатысушы балабақша бөбектеріне арнап жүзден астам тегін билет таратты. Бұл нақ сол уақытта жұмысын бастаған аттракциондар мен ойыншықтарды тегін пайдалануға мүмкіндік берді.Біле білсек, «Балалар жылы» аясында аудан орталығында «Pony» балалар ойын-сауық орталығы ашылғанды. Онда үлкен сырғанақтар, құрғақ бассейндер, балалар атракциондары бар. Сондай-ақ, айтулы күн немесе балалар мейрамы болған жағдайда 150 орынға арналған үлкен зал мен аниматорлары бар. Яғни, бүлдіршіндердің тиімді тынығуы үшін таптырмас орын.«Строй Модуль Астана» деген жауапкершілігі шектеулі серіктестік бар. Былтыр осы мекеме өз қаражаты есебінен Әйтеке би кентінен ойын алаңын салып берді. Мұнда да балалар үшін сырғанақ, әткеншек сияқты ойын жабдықтары мен әртүрлі спорт құрылғылары орнатылған. Алаң оқушылар үйінің ауласынан салынған. Ойын алаңдарын орнату жұмыстарын жергілікті жеке кәсіпкер Жасұлан Шамұратов мойнына алды.Айтпақшы, балалары жылында облыс бойынша 80 спорттық ойын алаңы берілген екен. Соның бірқатары ауданда ашылды. Сонау Сарбұлақ ауылындағы саябақтан бастап, Байқожа ауылындағы бір спорт алаңы, Әйтеке би кентінен екі спорт алаңы пайдалануға берілді. Одан бөлек, аудан орталығындағы балалар алаңын қоса аламыз. Яғни, мұнда жергілікті кәсіпкерлер төбе көрсетіп, бір ауыздан жұмыла кетті. Тартынбады. Таршылық танытпады. Табысынан жырып әкеліп, «болашақ осылардікі» деп үлес қосты.Айта кетейік, бұл былтырғы балғындар үшін жасалған игі шаралардың бірсыпырасы ғана. Одан өзге ауыз толтырып айтарлығы жетерлік.Ұлт ұстазы Ахмет Байтұрсыновтың: «Балам деген жұрт болмаса – жұртым дейтін бала қайдан шықсын» деген тамаша бір сөзі бар. Осыдан-ақ, қазақ халқының бала тәрбиесіне ерекше көңіл бөлгенін байқаймыз. Ал, өткен «Балалар жылындағы» бүлдіршіндердің қуанышы үшін жасалған шаруа аз болмады. Дегенмен, айтпағымыз, тек арнайы жылда ғана емес, жыл сайын құлыншақтардың қуанышқа кенелуі үшін тоқтаусыз игі істер жасай берудің ешқандай артығы жоқ.

Қазалыда балаларға арналған арнайы орындар жетерлік

<a href="https://kyzylorda-news.kz/">Kyzylorda-news.kz.</a> Синоптиктер Қазақстанда 22-24 сәуірде ауа райы қандай болатыны туралы болжам жасады.&nbsp;Болжам бойынша, алдағы тәуліктерде Қазақстанның басым бөлігінде ауа райына Қара теңіз аймағынан келетін циклон әсер етеді. Ол батыстан шығысқа қарай жылжып, жауын-шашын (негізінен жаңбыр түрінде) және тұман; оңтүстік облыстарда найзағай және құмды дауыл болады.&nbsp;&nbsp;

Демалыс күндері ауа райы қандай болады? 

<a href="https://kyzylorda-news.kz/">Kyzylorda-news.kz.</a> «Отан – отбасынан басталады» деген халық даналығы бекер айтылмаған. Отанға деген құрмет алдымен әркімнің өз отбасында қалыптасады. Әке, ана, бала ошақтың үш тағаны секілді, бірін-бірі толықтырып тұрады. Бақытты отбасын құру екі-ақ адамның қолынан келеді. Бірі – отағасы болса, екіншісі – отанасы. Ол үшін бұл екі тұлғаның болмысы бүтін болуы керек. Біз сөз еткелі отырған әулет осындай қағидаларды берік ұстанады.Тіршілігі теміржолмен біте қайнасып, темірдей тәртіпке бағынған Ерхановтар көпке үлгі. Бұл отбасының барлық мүшесі дерлік ел экономикасының күретамыры саналатын темір жол саласында еңбек етуде. Нағыз еңбек адамын осы әулеттен табасыз.Жақсылық Ерханов бүгінде сексеннің сеңгірінен асқан. 1955 жылдан бастап «Қазақстан темір жолы» АҚ-да еңбек жолын бастаған ол 1957 жылы Дина Ерхановамен шаңырақ көтереді. Отбасында 5 ұл, 3 қыз тәрбиелеп, балаларын құтты орнына қондырып, бүгінде 38 немере, 48 шөбере тәрбиелеп отырған бақытты әке.«Әке көрген оқ жонады, шеше көрген тон пішеді» дегендей, балаларына «менің жолымды қусаңдар, жаман болмайсыңдар, теміржол – күре тамыр ғой, осы салада еңбек еткендерің жөн секілді» деген ақылы бүгінде олардың теміржол саласында еңбек етуіне алып келді.Жақсылық аға Қорқыт бекетінің жол бойында ұзақ жыл еңбек етіп 1995 жылы зейнетке шығады. Зейнеттік демалысқа шықса да жұмыстан қол үзбей мал шаруашылығы мен егін жұмыстарымен айналысып, ұрпақтарын еңбекке баулып келеді.Теміржол бойы өзіндік өмірлік үрдіс пен реттілікке құрылған. Оның жартылай әскериленгендігі де осы талапқа саяды. Теміржол бойындағы үлкен көлемдегі жүк тасымалы, жолаушылар қатынасы бәрі де экономиканың нығаюына қызмет жасайды емес пе?! Сондықтан Жақсылық Ерханов осыбір жауапты қызметті абыроймен атқарды. Өзінен кейінгі немерелеріне де жауапкершілік артатын жүктің салмағына мән беруді талап етеді.«Атадан ұл туса игі, ата жолын қуса игі» дегендей, 5 ұлы мен 3 немересі әке салған сара жолды жалғастырып, теміржол саласында еңбек етіп келеді. Ерхановтар әулетінің ұзақ жылдар бойы теміржол саласында сіңірген еңбегі мен жеткен жетістіктері, қабілеттілігін, базалық дайындықтары ескеріле отырып жақында қоғамда Еңбек адамының мәртебесін арттыру және еңбек өнімділігін ынталандыру мақсатында облыстан «Үздік еңбек әулеті» номинациясы берілген болатын.<blockquote>«Жастайымыздан жұмысқа ерекше жігермен араласып, жаздың шыжыған ыстығында, қыстың сақылдаған сары аязды күнінде болат жолдың бойында аса жауапкершілікпен тынбай еңбек еттік. Қазіргі теміржол саласы заман ағымына қарай дамып келеді, тепловоздар ауысып, жұмысшылардың жұмысы шамалы да болса жеңілдеді. Бір тетікті түртіп қалсаң болғаны. Дегенмен де, қай кәсіптің болмасын жеңілі жоқ. Ендігі жерде балаларымыз болашағы жарқын елде бейбіт өмір сүруге жазсын. Еліміздегі әрбір шаңырақ үлкен де үлгілі отбасы болуына тілектеспіз», – дейді Жақсыбек аға.</blockquote>Отбасының тұңғышы Бақберген Ерханов 1978 жылдан бастап ПЧ-60 айналымында еңбек етеді. Саладағы үздіксіз еңбегі үшін құрмет грамоталар мен «Құрметті теміржолшы» атағын алған.Шымберген Ерханов аудандағы ПЧ-60 айналымында 1982 жылдан бастап жұмыс істеп келеді. Бүгінде жол бойы мекемесінің аға жол шебері. Еңбек жолында «ҚР Тәуелсіздігіне 30 жыл» медалін кеудесіне тақса, «Қазақстан темір жолы» АҚ-ның құрмет грамотасымен марапатталған. Ағаның ұлы Айбек Жақсылықов та осы саланың маманы. Бүгінде ол Жосалы жол бойы мекемесінде еңбек етеді.– Мен де әке жолын қуған ұрпақпын. Өзім де, балам да шойын жолда еңбек етеміз. Мұнда босаңсуға болмайды. Себебі адам тағдырынан қымбат жауапкершілік жоқ. Жол бойының майы қалай жұқса, наны да солай сіңімді болады екен. Сондықтан да балаларға қай істе де жауапкершілікпен адал еңбек еткенде ғана абыройлы отбасы боласыңдар деп ылғи айтып отырамын, – дейді ол.Әулеттің үшінші ұлы Бақберген Жақсылықұлы Қызылорда қаласында жол бойында еңбек етсе, оның ұлдары Нұрбек пен Нұрсұлтан ата кәсібін жалғап, теміржолдың тынымсыз тірлігімен айналысып жүр. Ал Бекберген мен шаңырақтағы кенже ұл Жақсыбек Қорқыт бекетінде жұмыс істейді.Теміржолшылардың тынымсыз тірлігі ел экономикасына қомақты үлесін қосуда деп қабылдаған дұрыс. Өйткені, айшылық алыс жерлерге аман-есен жетуде, жолаушының жолын қысқаруына оған қоса, жүк тасымалының қарқынды дамуында теміржолшылардың темірдей тәртібі менмұндалап тұр. Әулеттің әрбір мүшесі теміржол саласының бейнеті мен зейнетін көріп, берекелі ғұмыр кешуде.

Қармақшыда бір әулет теміржолшы мамандығын игерген

<a href="https://kyzylorda-news.kz/">Kyzylorda-news.kz.</a> Елімізде әлеуметтік сала бойынша көптеген шаруалар атқарылуда. Әлеуметтік сала – бұл халықтың тұрмыс-тіршілігінің, өмір сүру қағидаты мен әлеуетінің көрсеткіші. Осы ретте Қазақстан Республикасы Президенті Қасым-Жомарт Тоқаев «Жаңа Қазақстан: Жаңару мен жаңғыру жолы» атты халыққа жолдаған Жолдауында «...Маңызды шешімдер жұртшылықтың қатысуымен ашық қабылданады. Өйткені мемлекет әр азаматтың үніне құлақ асады. Адал еңбек, озық білім және үздік тәжірибе әрдайым жоғары бағаланады. Мен жаңа Қазақстанның осындай ел болғанын қалаймын...» деп айта келе тиісті ведомстволарға нақты тапсырмалар жүктеген болатын. Мемлекет басшысының берген тапсырмасына сәйкес бірқатар ілкімді жұмыстар тізбегі ауданымызда да атқарылып, жалғасын табуда. Оның ішінде Ұлттық жоба, мүмкіндігі шектеулілердің оңалту бағдарламалары, басқа да мәселелер бойынша Қармақшы аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Ғалымжан Ақжігітовпен сұқбат жүргізген болатынбыз.&nbsp;– Ғалымжан Амангелдіұлы, сөзіңізді елімізде ең өзекті болып саналып отырған жұмыссыздық мәселесінің аудандағы ахуалынан бастасаңыз?– Өңірдегі жұмыссыздық пен жұмыспен қамтылу деңгейі туралы айтатын болсақ, өткен жылдың 6 айында 2091 адам жұмыссыз есебінен тіркеліп, олардың үлес салмағы 4,8 пайызды құрауда. Осы мерзім аралығында 555 адам (Қармақшы – 212 адам, Байқоңыр – 343 адам) тұрақты және уақытша жұмысқа орналастырылды. Биыл аудан бойынша 2533 жаңа жұмыс орнын ашу жоспарланса, оның бүгінгі таңда 1045 жаңа жұмыс орны ашылып, жылдық жоспар 41,2 пайызға орындалып отыр.– Кәсіпкерлікті дамыту – ел экономикасының тамырына қан жүгіртетін негізгі фактордың бірі десек қателеспейміз. Осы тұрғыда 2021-2025 жылдарға арналған кәсіпкерлікті дамыту жөніндегі Ұлттық жобаның іске асырылу барысы өңірде қалай жүріп жатыр?– Бағдарламаның І бағыты аясында қысқа мерзімді кәсіптік оқуға 80 адамды оқытуға облыстық бюджеттен қаржы бөлінген. ІІ бағыты бойынша жаңа бизнес идеяларды іске асыруға республикалық бюджеттен және Ұлттық қордан 400 АЕК бойынша 501 адамға 582 273 000 теңге қайтарымсыз грант қаралған, оның ішінде Қармақшы ауданына 370 адамға, Байқоңыр қаласы бойынша 131 адамға қаржы қарастырылған. Ал ІІІ бағыты аясында әлеуметтік жұмыс орындарына жоспар бойынша барлығы республикалық бюджеттен 75 адамға қаржы қаралды. Жастар тәжірибесіне барлығы 249 адамға қаражат қаралып, оның 124-і нақты жұмысқа жолданды. «Алғашқы жұмыс орны» жобасына 2 адам жіберілсе, «Ұрпақтар келісім-шарты» жобасына 4 адамға қаржы қаралды. «Күміс жас» жобасына 1 адам жолданды. «Онлайн – оқу курстарымен» жобасына оқытуға 62 адам жоспарланса, ол 158,1 пайыз болып орындалып, оқу курсын 98 талапкер бітіріп шықты. Байқоңыр қаласы бойынша «Алғашқы жұмыс орны» жобасына 10 адам жолданып, тиісті жұмыстар атқарылды. Біздегі жүзеге асырылып жатқан тағы бір жоба – «Ұрпақтар келісім-шарты». Бұл жоба аясында 5 адам жұмысқа жіберілсе, оның 1-еуі тұрақты жұмыспен қамтылды. «Күміс жас» жобасына 10 жұмыссызға қаражат қаралып отыр. Аудандағы тұрмысы төмен, аз қамтамасыз етілген отбасылар мен мұқтаж азаматтарды әлеуметтік қолдау бойынша да бірқатар жұмыстар жүргізілуде. Әлеуметтік көмектер үшін бүгінге 584 адамға 94 020 000 теңге төленді. Атап айтқанда оған туберкулезден емделудің сүйемелдеу сатысындағы науқастарға қосымша тамақтануға әлеуметтік көмекке, гемобластоздар мен апластикалық анемияны қосқанда гематологиялық аурулармен ауыратын, диспансерлік есепте тұрған балаларға дәрі-дәрмек алуға әлеуметтік көмекке, өмірлік қиын жағдайдың туындауына байланысты әлеуметтік көмекке, Ауғанстан аумағынан Кеңес әскерлерін шығару күніне орай біржолғы әлеуметтік көмекке, Жеңіс күніне орай 1941-1945 жылдар кезеңінде тылда 6 айдан кем емес жұмыс істеген азаматтарға, Тәжік-Ауған, Таулы Карабах қақтығыстары, Ирактағы халықаралық бітімгершілік операцияға бітімгерлер ретінде қатысқан, Вьетнам соғысы, ядролық сынақ полигонына қатысушы, 1986-1987 жылдары Чернобыль АЭС-індегі апаттың, азаматтық немесе әскери мақсаттағы объектiлердегi басқа да радиациялық апаттар мен авариялардың зардаптарын жоюға қатысқан, сонымен қоса ядролық сынақтар мен жаттығуларға тiкелей қатысқан азаматтар, тағысын тағы кіреді.– «Мүгедектерді жеке оңалту» бағдарламасы бойынша істеліп жатқан жұмыстарыңызды да бір қамтып өтсеңіз?– Бөлім арқылы айтылған уақыт мерзімінде 2091-ден астам мүгедек арнайы құрал-жабдықтармен қамтамасыз етіліп және арнайы қызметтер бойынша көмектер көрсетіліп келеді. Биылға міндетті гигиеналық құралдарға республикалық және жергілікті бюджеттен қаржы қаралып, міндетті гигиеналық құралдармен қамтамасыз ету үздіксіз жүргізілуде. Халықтың әлеуметтік осал топтарын қолдау мақсатында ерекше тәртіпті қолданумен мүгедектерді тасымалдау (Инватакси) қызметіне аудан бойынша 40 адамға және Байқоңыр қаласы, Төретам кенті, Ақай ауылы бойынша 80 адамға сапалы қызмет көрсетілді. Кемтар балаларды әлеуметтiк және медициналық-педагогикалық түзеу арқылы қолдау туралы ҚР Заңына сәйкес бөлімде үйде әлеуметтік қызмет көрсету бөлімшесі жұмыс атқаруда. Ауданда 28 күтім жөніндегі әлеуметтік қызметкерлердің қарамағында 130 үйде әлеуметтік қызметке мұқтаж қызмет алушылар қамтылып, қызмет алушы балаларға арнайы кестемен әлеуметтік қызметкерлер тарапынан сауықтыру жаттығулары мен өзін-өзі қамтамасыз ету, бос уақытын ұйымдастырып өткізу, консультативтік, медициналық және құқықтық көмек беру жұмыстары ұдайы жүргізіліп тұрады.– Халыққа көрсетіп отырған қызметтеріңіздің бірі – мемлекеттік атаулы әлеуметтік көмек жайында не айтар едіңіз?– «Азаматтарға арналған үкімет» мемлекеттік корпорациясы» коммер- циялық емес акционерлік қоғамы арқылы атаулы әлеуметтік көмек төлеу жөніндегі пилоттық жобасын Ақмола, Батыс Қазақстан, Қарағанды, Павлодар, Түркістан облыстарының, Алматы, Нұр-Сұлтан және Шымкент қалаларында іске асыру туралы» ҚР Еңбек және халықты әлеуметтік қорғау министрінің және ҚР Цифрлық даму, инновациялар және аэроғарыш өнеркәсібі министрінің бірлескен бұйрығына өзгерістер мен толықтыру енгізу туралы бұйрығына сәйкес «Азаматтарға арналған үкімет» мемлекеттік корпорациясы» коммерциялық емес акционерлік қоғамы арқылы атаулы әлеуметтік көмек төлеу жөніндегі пилоттық жобаны іске асыру кезіндегі мемлекеттік органдардың өзара іс-қимыл алгоритмінде, АӘК төлеуді уәкілетті орган атаулы әлеуметтік көмек төлеу жөніндегі уәкілетті ұйымдағы банк шоттарына аудару жолымен жүргізеді.Пилоттық жоба шеңберінде 2022 жылғы 1 сәуірден 2022 жылғы желтоқсанға дейін қабылданған өтініштер бойынша АӘК төлеу Мемлекеттік корпорация арқылы алушыларға жүзеге асырылады. Пилоттық жобаның қолдану кезеңінде Мемлекеттік корпорация қызметті қайтарымсыз негізде көрсетеді. Уәкілетті орган АӘК төлеуге қажеттілік сомасы туралы өтінім келіп түскен күннен бастап 2 жұмыс күні ішінде мемлекеттік корпорацияға есепті кезеңге АӘК төлеуге қажеттілік сомасы туралы өтінімде көзделген сома шегінде республикалық бюджет қаражаты есебінен 80 пайыз және жергілікті (облыстық) бюджет қаражаты есебінен 20 пайыз нысаналы трансферттердің арақатынасында ақша қаражатын аударады. Бұл ретте бюджет қаражаты төлемдерінің толық көлемі уәкілетті орган деңгейінде жүзеге асырылады.– Алда қандай жоспарларыңыз бар?– Мемлекет басшысы осы жылғы қазақстандықтарға арнаған Жолдауында «...Бір-бірімізді жат көрмей, жақын тартып, қоғамда нақты өзгерістерге деген сенімді орнықтырамыз. Жұртымыздың күш-жігеріне, дарыны мен еңбекқорлығына сүйенеміз. Әр азаматтың өз қабілетін іске асыруына барынша қолайлы жағдай жасаймыз. Біз осылайша ғана халқымыздың жасампаздық әлеуетін арттыра аламыз...» деген еді. Осы маңызды құжатта берілген тапсырмаларға сай алда халықтың әл-ауқатын көтеруде жыл аяғына дейін &nbsp;жаңа жұмыс орнын ұйымдастырып, аз қамтылған отбасыларды жұмыспен қамтуда «Бақытты отбасы» орталығын ашуды межелеп отырмыз. Сондай-ақ өңірдегі жұмыссыздардың санын азайтуда 2021-2025 жылдарға арналған кәсіпкерлікті дамыту жөніндегі Ұлттық жоба аясында жұмыссыз азаматтарды жобаға қатыстыру болып табылса, әлеуметтік төлемдерге қаралған қаржыларды толығымен және сапалы игеру жұмыстарын да әрі қарай жүйелі жүзеге асыра беретін боламыз.– Әңгімеңізге рақмет!

Қармақшыда 584 адамға әлеуметтік көмектер берілген

<a href="https://kyzylorda-news.kz/">Kyzylorda-news.kz.</a> Мектеп қабырғасында білім алып жүргенде, жасыратыны жоқ, он күндік демалыс пен жазда шығатын үш айлық каникулды асыға күтетінбіз. Себебі, әр мезгілдің өзіндік қызықтары бар еді. Көктемде ләңгі теуіп, асық ойнасақ, жаздыгүні іздеген адам кішкентайларды «мотор» деп атап кеткен «Жеңіс» паркі жанындағы су айдау бассейінен табатын. Күзде кенттен тысқары орналасқан «Водакачкаға» барып, балалар болып жидек теретін күндер тура кеше ғана болғандай көз алдымызда тұр. Қыстың қызығы өз алдына. Саусақ сіресіп, салқыннан бет дуылдағанша шана жетектеп, қар атысып-ақ он күн демалыстың қалай өтіп кеткенін байқамай қаламыз. Бірақ қазіргі балалардың серуені бөлек. Енді бір айдан соң Қазалы ауданындағы мектеп оқушылары ең ұзақ жазғы демалысқа шығады.Расын айту керек, 2000-шы жылдары ойын баласына қауіп қазіргіден әлдеқайда аз еді. Ата-ананы «баламды ит қуып, балтырын қанатпаса» деген қорқынышы ғана болды. Қазір ше? Бүгінде бала ұрлығы, жол көлік оқиғасы, кішкентайлардың үйден кетіп қалуы, педофилия: тізе берсек тереңдей береміз. Тіпті, топтық төбелесте бесіктен белі шықпаған балалардың төбе көрсетіп жүргені де жасырын емес. Мұның себебі, белгілі. Ересек адамдардың құндылықтан алшақтап бара жатқаны осындай жайттарға себеп болып отыр. Әсіресе, әлі бұғанасы қатаймаған жанға қастандық ойлайтындардың көбеюі жүрекке батады. Ата-аналардың жұмысбастылығы салдарынан қараусыз қалған құлыншақ та кімге қарап, бой түзейтіні, қандай ортаға тап болатыны белгісіз. Осы тұста отбасы институтының әлсірей бастағаны байқалады. Бұл жақсылықтың нышаны емес.<blockquote>«Ең алдымен отбасы құндылығының құлдырауы түрлі әлеуметтік қиындықтардың туындауына себеп болып отыр. Біздің жас кезімізде балаларға міндетті түрде бір адам баскөз болып, үйде отыратын. Мәселен, мен ұстаздық еткен жылдары бала тәрбиесімен, олардың мектептен тыс уақытта немен айналысатынын енем бақылауда ұстап отырды. Кейін мен зейнетке шыққаннан кейін, немерелерімнің бос уақытын тиімді ету, оларға баскөз болуды өз мойныма алдым. Қарттары жоқ туыстарымыздың үйінде әкесі нәпақа тапса, шешесі бала күтімімен айналысатын. Бұл біріншіден, құдай берген құлыншақтардың амандығына сеп десек, екіншіден, жаман ортағы түсіп кетуінің, ата-ана алдында жауапсыз болудың алдын алады», – дейді зейнеткер Ұлдай Мүсірепова.</blockquote>Демалыс күндері бала көп уақытын үйде өткізетіндіктен ата-ананың қоғам мен бала алдындағы жауапкершілігі де сыналатыны сөзсіз. Мәселен, біршама жыл бұрын аудан мектептерінің бірінде оқитын 9 сынып оқушысы жоғалып кеткені туралы мессенджерде хабар тарады. Ата-анасы құзырлы органға хабар бергеннен кейін көп уақыт өтпей, оқушы үйіне оралған. Алайда, дабыл қағушы баланың табылғаны жайында хабар бермей, жұртты дүрліктіріп қойды. Ересек адамның неге мұндай қадамға барғаны жайында әзірге ақпарат жоқ.<blockquote>«Оқушылардың белгісіз себептермен хабарсыз кетуі орын алып тұратыны рас. Қуанышымызға орай, көп ұзамай аман-есен табылып жатады. Бұған құзырлы органдармен бірлесе күш салатынымызды жақсы білесіздер. Көп жағдайда адамдар бала алдындағы ең бірінші жауапкершілік, оның ата-анасында екенін терең сезіне бермейді. Соған байланысты, күзгі демалыс қарсаңында ата-аналарға мектеп директорлары атынан ескертпе хат жолданды. Онда баланың мектептен тыс уақыттағы қауіпсіздігі мен амандығына өздері тікелей жауапты екені көрсетілген. Осылайша, көптеген қиындықтың алдын аламыз деген ойдамыз. Сондықтан, ата-аналар демалыс күндері баласының уақытын тиімді өткізудің жолын тауып, қауіп төндіруі мүмкін жерге бармауын қадағаласа, нұр үстіне нұр болар еді», – дейді аудандық білім бөлімінің бас маманы Қуаныш Ерімбетов.</blockquote>Әрине, жеткіншектердің мектепте жүргенде ұшырасқан сәтсіздіктеріне сынып жетекшісін, мектеп директорын кінәлі ете салу қазір өте оңай. Олардың белгілі бір деңгейде жауапкершілік арқалайтыны да рас. Алайда, бұзықтың тәртіпсіздікке баруы үйдегі ақыл-кеңестің дефицитінен болып жүргенін естен шығармағанымыз абзал. Баласына ешкім жамандық тілемейді. Ал, дұрыс тәрбие бермеу – жамандық атаулының алғашқы әрі кешірілмес қателігі екенін естен шығармаған жөн-ақ.

Баланы қадағаламау – тәртіпсіздікке әкеледі

<a href="https://kyzylorda-news.kz/">Kyzylorda-news.kz.</a> Өңірде жұмыс орындарын ашу, жұмыспен қамту, кәсіпкерлікті дамыту аудан экономикасы мен әлеуетінің алға жылжуына септігін тигізетін басты фактордың бірінен саналады. Ол үшін елімізде кәсіп ашуға, сондай-ақ сүйемелдеуге арналған бағдарламалардан қаншалықты хабардармыз? Осы және кәсіпкерлік саласына қатысты басқа да сауалдар бойынша аудандық кәсіпкерлік, өнеркәсіп және туризм бөлімінің басшысы Біржан Өмірзақовтан сұрап білген болатынбыз.– Біржан Мүтәлұлы, бөлімге былтыр басышлыққа келдіңіз. Жалпы кәсіпкерлік саласында мол тәжірибеңіздің бар екенін білеміз. Осы салада табысты еңбек етіп келе жатқан білікті маманның бірісіз. Алғашқы сауалымызды кәсіп бастағысы келетін, бірақ көзін таппай жүрген жастарымыз бен қолға алған кәсібін дөңгелетіп алып кете алмай қиналып жүрген кәсіп иелеріне арналған қандай да бір мемлекеттік қолдау бағдарламалары турасынан сабақтасақ?– Мемлекеттік қолдау бағдарламалары кешенді іс-шараларды қамтиды. Қолдау өзі бірнеше түрге бөлінеді. Атап айтқанда, ақпараттық-консультациялық, кәсіпкерлік негіздерін оқыту курстары, төмен пайыздық мөлшерлемемен несие, грант беру деген секілді. Жұмыс істеп тұрған кәсіпкерлерге кәсібін әрі қарай өрбітуге арналған несиелеу бағдарламалары да қарастырылған. Алдымен жаңа бизнес идеяларды іске асыруға грант беруге тоқталып өтетін болсақ, грант беру 2 бағдарлама арқылы жүзеге асырылады. Оның біріншісі «Ұлттық жоба» бағдарламасы шеңберінде 400 АЕК көлемінде грант беру болса, екіншісі «Бизнестің жол картасы – 2025» мемлекеттік бағдарламасы шеңберінде жаңа инновациялық бизнес идеяларды іске асыруға 5 млн теңге көлеміне дейін грант беру.– Осы жерде түсінікті болу үшін, нақтылап айтып кетсеңіз. «Ұлттық жоба» бағдарламасы шеңберінде 400 АЕК көлеміндегі грантты кімдер ала алады?– Грант алу жолдары мен қойылатын талаптар туралы https://business.enbek. kz/ порталынан алуға болады. Дегенмен шарттарға қысқаша тоқталып кетсем, грант алуға үміткер келесідей талаптарға сай болуы тиіс. Біріншіден, жұмыспен қамтудың мынадай санаттарының біріне жатуы керек. Тіркелген жұмыссыздар, жеке кәсіпкерлер (3 жылға дейін), бірыңғай жиынтық төлемді төлеушілер. Екіншіден, келесі әлеуметтік санаттардың біріне жатуы: жастар (18-ден 29 жасқа дейінгі), көпбалалы тұлғалар-көпбалалы жәрдемақы алушылар (жұбайы, зайыбы), қоныс аударушылар және олардың еңбекке қабілетті отбасы мүшелері, мүгедек баланы тәрбиелеуші жәрдемақы алатын адамдар (жұбайы, зайыбы), атаулы әлеуметтік көмек алушы, аз қамтылған адамдар және олардың отбасы мүшелері, асыраушысынан айрылу жағдайы бойынша әлеуметтік жәрдемақы алушылар және қандас қолданыстағы мәртебесі бар және мүгедек адамдар жатады. Үшіншіден, «Бастау Бизнес» жобасы бойынша кәсіпкерлік негіздеріне оқығаны туралы сертификатының болуы қошталады. Төртіншіден, мәртебесін тексеру сәтінде ерікті түрде қоныс аударуға қатысушылардан басқа (оңтүстіктен солтүстікке қарай) жұмыспен қамтуға жәрдемдесудің белсенді шараларына қатысушы болып табылмауы қажет. Грант алу талаптары, өтініш беру, грант алу аталған портал арқылы жүргізіледі.– Жаңа айтқаныңыздай, «Ұлттық жоба» бағдарламасы аясындағы 400 АЕК көлеміндегі грант қандай мақсатта беріледі?– Мемлекеттік грант – бұл жаңа бизнесті бастау және дамыту үшін қайтарымсыз негізде берілетін 400 еселенген айлық есептік көрсеткіш мөлшеріндегі бастапқы капитал. Гранттар қаражаты ісін жаңа бастаған жас кәсіпкерлерге, сондай-ақ жекелеген әлеуметтік санаттарға жататын адамдарға өз бизнес әлеуетін іске асыруға, өндірісті жолға қоюға және дамытуға, сол арқылы өзін тұрақты табыспен қамтамасыз етуге мүмкіндік береді. Ол қажетті еңбек құралдарын, технологиялық жабдықтарды, жануарлар, мал, құс, көшет, бұта, тұқым сатып алу және де үй-жайларды жалға алу ақысын төлеу мақсатына бағытталған. Ескере кетерлігі, грант тұтынушылық мақсатқа, кредиттік қарызды өтеуге, жылжымайтын тұрғын үй сатып алуға немесе салуға, жер учаскелерін сатып алуға, акцизделетін өнімдер өндіруге берілмейді.– Жаңашылдық қай салаға да керек әдіс. Ол кәсіпкерліктің тамырына қан жүгіртіп, жандандырады десек қателеспейміз. Инновациялық жобаларға берілетін грант көлемі қандай соманы құрайды? Оған кімдер қатыса алады?– «Бизнестің жол картасы – 2025» мемлекеттік бағдарламасы шеңберінде шағын кәсіпкерлік субъектілеріне грант беру қарастырылған. Ол конкурстық негізде жылына бір мәрте өткізіледі. Грант көлемі 5 млн теңгеге дейін беріледі. Жобаны іске асыруға керек қаржы көлемін жоба бастамашысы өзі анықтайды. Жаңа бизнес-идеяларды іске асыру үшін мемлекеттік гранттарды алуға үміткер өтінішін және міндетті құжаттарын «www.qoldau.kz» цифрлық порталы арқылы тапсырады. Грант алуға үміткер кәсіпкерлер келесі құжаттарды аталған цифрлық портал арқылы тіркеу керек. Құжаттарына келсек, жеке кәсіпкердің өз қолымен және мөрімен расталған өтінім беру кезіндегі жалдамалы жұмыскерлердің орташа саны туралы анықтама (бар болса), «Ұлттық жоба» шеңберінде кәсіпкердің оқудан өткенін растайтын, ескіру мерзімі 2 жылдан аспайтын құжат (бар болса, болуы міндетті емес), берілетін мемлекеттік грант көлемінің кемінде 10 пайызы мөлшерінде бизнес-жобаны іске асыруға арналған шығыстарды (бизнес-жобаға қатысатын ақша қаражатымен, жылжымалы, жылжымайтын мүлікпен) қоса қаржыландырудың болуын растайтын құжаттар, кәсіпкердің ағымдағы шотында ақша қаражатының болуы туралы банктік шоттан үзінді көшірме немесе бизнес-жобаға қатысатын жылжымалы немесе жылжымайтын мүліктің бағалау құнын растайтын құжаттар (халықтың әлеуметтік осал топтарын, оның ішінде 3-топтағы мүгедектікті қоспағанда), өтінім берушіде халықтың әлеуметтік осал топтарына жатқызу мәртебесінің бар екенін растайтын құжат (ақпараттық жүйелердің өзара іс-қимылы нәтижесінде мәліметтер түспеген жағдайда), кәсіпкердің экономиканың басым секторларында қызметті жүзеге асыруы туралы мәліметтері бар дара кәсіпкерді тіркеу туралы хабарламаның көшірмесі дайындалады.– Анық болу үшін инновациялық жобаларға берілетін грант талаптарын да айта кетсеңіз? Бұл жобаға кімдер қатыса алмайды?– Кәсіпкерлер жаңа бизнес-идеяларды іске асыруға арналған мемлекеттік грант қаражатын тауар шығаруға немесе қызмет көрсетуге қажетті негізгі құралдарды (оның ішінде негізгі құралдарды салу, жаңғырту, реконструкциялау, күрделі жөндеу), шикізат пен материалдарды, материалдық емес активтерді, технология, кешендi кәсiпкерлiк лицензияға (франчайзинг) құқықтарды сатып алу мен зерттеу жұмыстарына, жаңа технологияларды енгізумен байланысты шығыстарға пайдалана алады. Жаңа бизнес-идеяларды іске асыруға арналған мемлекеттік грант қаражатын жылжымайтын мүлікті, жер учаскесін сатып алуға, жалдау ақысының төлемі ретінде, үлестес компаниялардан, тұлғалардан негізгі құралдарды, активтерді сатып алуға (көрсетілетін қызметтерді алуға, жұмыстарды орындауға), бұрын қолданыста болған негізгі құралдарды (жабдықтарды) сатып алуға, шанағы немесе кабинадан оқшауланған жүк платформасы бар жүктерді тасымалдауға арналған автокөлікті, сондай-ақ отандық өндірушілердің жеңіл автомобильдері мен жеңіл автокөлік құралдарын жалға алуға және прокаттауға байланысты жобаларды қоспағанда, жеңіл автокөлікті сатып алуға, өңдеуші өнеркәсіпке жататын тамақ өнімдерін өндіру жөніндегі жобаларды қоспағанда, ауыл шаруашылығы жануарларын (ірі, ұсақ қара малды, құс, бал арасы, сондай-ақ өзге де ауыл шаруашылығы жануарларын) сатып алуға пайдалануға болмайды. Қандай кәсіпкерлерге бұл гранттар берілмейді деген сауалға жауап бере кетсем, қайта ұйымдастыру, тарату немесе банкроттық сатысындағы қызметі Қазақстан Республикасының қолданыстағы заңнамасына сәйкес тоқтатыла тұрған, салықтар мен мемлекеттік бюджетке, басқа да міндетті төлемдер бойынша берешегі бар, қызметінің негізгі түрі жылжымайтын мүлікті жалға беру болып табылатын, конкурсқа қатысушының кредиттік тарихына сәйкес қаржылық міндеттемелері бойынша мерзімі өткен берешегі бар, мемлекеттік гранттар беру қағидалары шеңберінде жаңа бизнес-идеяларды іске асыру үшін гранттар беру бойынша қолдау алғандарға (оның ішінде «Бизнестің жол картасы – 2025» бизнесті қолдау мен дамытудың мемлекеттік бағдарламасы және «Бизнестің жол картасы – 2020» бизнесті қолдау мен дамытудың мемлекеттік бағдарламасының қолданылу кезеңінде), конкурс өткізілетін өңірге сәйкес келмейтін басқа өңірде тіркелген және бизнес-жобаны іске асыруды жоспарлайтын кәсіпкерлерге гранттар берілмейді. Сонымен қатар, ескере кететін жайт, грант жеңіп алған кәсіпкердің бизнес-жобаны іске асыру мерзімі грант беру туралы шартқа қол қойылған сәттен бастап 18 айдан аспайды. Егер көрсетілген іске асыру мерзімі ішінде кәсіпкер қызметін жүзеге асырмаса сатып алынған негізгі құрал өткізілген болса және бизнес-жобаны іске қосу және кейіннен іске асыру үшін ұқсас, балама құралмен ауыстырылмаса кәсіпкер грант қаражатын мемлекетке қайтаруға міндетті болып табылады. Бұл дегеніңіз – мемлекеттің қаражатын тиімді әрі ұқыппен пайдалануға жауапкершілік жүктейді.– Ауданда кәсіпкерлікті дамытуда келешекте қандай жоспарларыңыз бар?– Алдымен ақпараттық-насихаттық жұмыстарын жүргізу мақсат етіледі. Халыққа жалпақ тілде түсініктеме беріп, мемлекеттік қолдау бағдарламаларының талап-шарттарымен таныстыру, олардың тиімділігін айтып жеткізу басты міндетіміз. Әрі қарай оны қалай жүзеге асыруға болады деген сұрақ-сауалдармен кәсіби тұрғыда айналысамыз. Қандай керекті құжаттар жинау керек, оған кімдер үміткер бола алады деген мәселелер бойынша жан-жақты түсіндірме жұмыстарын жүргіземіз.– Уақыт бөліп, әңгімелескеніңізге рақмет!

Кәсіп ашамын дегенге мемлекет қолдау көрсетеді

<a href="https://kyzylorda-news.kz/">Kyzylorda-news.kz.</a> Қармақшы ауданы, Жосалы кентінен 18 шақырым қашықта жатқан «Қорқыт ата» кешеніне бара қалсаңыз, міндетті түрде ондағы тарихи-өлкентану музейіне ат басын тірейсіз. Мұражайдың сол беткейінде орналасқан тарихи орында құнды жәдігерлер мен құжаттар әрбір келушінің қызығушылығын тудырып, сонау алыс ғасырларға жол тартып кетеді. Жергілікті халық бар, алыс, жақын шетелден келетіндер бар, солардың бәріне Оғыз заманынан бастап, кешеннің бүгінгі күніне дейінгі тарихын тәптіштеп түсіндіріп беретін бір маман бар – ол заманауи тілмен айтқанда гид деп аталады. Осы қызметті бірнеше жыл төңірегінде абыроймен атқарып келе жатқан Айгүл Бермаханованың есімі Сыр еліне кеңінен таныс десек, қателеспеген болар едік.А.Боранбекқызы еңбек жолын 2006 жылы облыстық тарихи-өлкетану музейіне қарасты «Қорқыт ата» музей филиалының зал қараушысынан бастаған. 2010 жылдан бастап музей экскурсоводы, 2019 жылдан бастап осы кезге дейін «Қорқыт ата» атындағы мемориалды музейінің ғылыми қызметкері қызметін атқаруда.&nbsp;<blockquote>«Мәдениетке, әсемдікке жастайымнан құштар болып өстім. Әдемі дүние көрсем, соған қызыға қарайтынмын. Нәзік жанның жүрген жері әдемі, әсем болу керек деген ой маған сол балалық кезден қалыптасты. Мүмкін, осы мәдениет, оның ішінде туған жердің тарихына деген ынтам, құрметім осы салаға әкелген болар деп топшылаймын. Жалпы адам баласы өзінің табиғатына жақын мамандық таңдаса, еңбек еткенінде одан жақсы нәтиже шығарған болар еді. Ұнатып істеген істен адам рухани ләззат алады. Оның рақатына кенеледі. Жемісін көреді. Мектептен бастап ағылшын тілі пәнін жақсы көремін. Осы мамандықты таңдағанымда мұғалім болмаса стюардесса боламын деп ойлағанмын. Бұйырғаны шығар киелі мекенде Қорқыт ата музейінде жұмыс табылып, ең алғашқы зал қараушы болып жұмысқа орналастым. Экскурсия жүргізгенде бірінші кезеңдерде қиналасың. Сөйтіп үйрендім. Көптеген адамдарды көресің. Атақтысы бар, атақты емесі бар. &nbsp;Қызметім өзіме сондай ұнайды. Бұл жердегі жұмыстың ерекшелігі – келген адамдар алғысын айтып, тілектерін білдіріп жатады», – дейді ғылыми қызметкер бізбен әңгімесінде.&nbsp;</blockquote>Кейіпкеріміздің айта кетерлік ерекшелігі, шетелден келетін мейман, саяхатшылармен емін-еркін сөйлесе білуі. Түркістан облысындағы Халықаралық гуманитарлы-техникалық университетінен «Ағылшын тілі пәнінің мұғалімі» мамандығы бойынша білім алған оған мұндай жұмысты атқару ешбір қиындық келтірмейді. «Бір тіл білсең – бір адам, екі тіл білсең – екі адамсың...» деген бар емес пе?!<blockquote>«Айгүлдің музей ісін жетілдірудегі жетістегі аз емес. Саланың мәртебесін жоғарылату және беделін арттырудағы еңбегі үшін оның есімі музей ісінің үздіктерін анықтау мақсатында ұйымдастырылған "Музей ісінің үздіктері" жобасы негізінде шығарылған энциклопедиялық кітапқа енген. Ол облыс аймағында жүргізілген археологиялық экспедициялар құрамында бірнеше рет болып, ортағасырлық Оғыз қалашықтарына жүргізілген археологиялық қазба жұмыстарына қатысса, қазақ, орыс, ағылшын тілде жүргізілетін тақырыптық экскурсия, жылжымалы көрме, тарихи-мәдени ескерткіш орындарына танымдық саяхат жасау, түрлі мәдени-тарихи кеш, кездесу, мерекелік іс-шаралар және мектептермен байланыс орната отырып өткізілетін лекциялар оқуда белсенділік танытып жүрген тәжірибелі маман. Оның еселі еңбегін 2017 жылғы халықаралық көрме аясында өткізілген экскурсияны ерекше атап өтуге болады» дейді әріптестері.&nbsp;</blockquote>«Еңбегіне қарай – өнбегі» дегендей, ғылыми қызметкердің саладағы атқарған жұмысы бір түйеге жүк болардай. Атап айтқанда, мәдениет саласында ұйымдастырылған іс-шараларда белсенділік танытып, тәуелсіз еліміздің дамуы мен қалыптасуына қосқан үлесі үшін &nbsp;облыстық тарихи-өлкетану музейінің, ауданның әлеуметтік-экономикалық өрлеуіне қосқан еселі еңбегі үшін облыс, аудан әкімдерінің, сондай-ақ Сыр өңірінің мәдениеті мен өнерінің дамуына қосқан айрықша үлесі үшін облыстық мәдениет, архивтер және құжаттама басқармасының Алғыс хаттарымен марапатталған. Облыстық «Үздік экскурсовод» байқауының ІІ орын жүлдегері атаныпты. «ЭКСПО-2017» халықаралық мамандандырылған көрмесі аясында Астана қаласындағы облыстың мәдениет күндерін жоғары деңгейде ұйымдастыруға қосқан үлесі үшін де облыс әкімінің, Астана қаласында Қазақстан Республикасы Мәдениет және спорт министрлігінің ұйымдастыруымен өткен Мәдениет және өнер қызметкерлерінің кәсіби мерекесіне байланысты «Рухани қазына – 2018» республикалық байқауында алғыс хатпен мадақталған. Республикалық көшпелі көрме жобасы аясында «Музей саласындағы ақпараттандыру» атты ғылыми-тәжірибелік семинарда сертификатқа, 2020 жылы ұлттық өнеріміз бен мәдени мұрамызды насихаттаудағы еңбегі үшін облыс әкімі орынбасарының Алғыс хатына, осы жылы кәсіподақ күніне орай кәсіподақ қозғалысын дамытудағы және нығайтудағы үлесі үшін Құрмет грамотасына ие болған.<blockquote>«Туған елімнің өркендеуіне қызмет ету мен үшін бақыт. Өмірге әкеліп, бағып-қаққан ата-анамның сенімінен шықсам деймін. Музей қызметкері тек қана жинақталған құндылықтарды таныстырушы ғана емес. Ол ұлттың өкілі әрі айнасы іспеттес. Менің де ұстанатын басты қағидам – мен қазақтың қызымын, ұлтымның айнасымын. Былайша айтқанда, шетелдік саяхатшылар, Қорқыт атамыздың кешеніне сонау ит өлген қияннан тамашалауға келетін мейман-қонақтар бізді ұлт тұрғысынан қабылдайды. Қазақтың ұл мен қызы деп біледі. Сол үшін де намысқа тырысып, қазақ қызының мына дүбірлі әлемде өзіндік орны бар екенін, оның мәдениетті, білімді, парасатты екенін көрсетуге барымызды салып келеміз», дейді Айгүл Боранбекқызы.</blockquote>

Қорқыт ата кешеніне шетелден келетін туристер аз емес

<a href="https://kyzylorda-news.kz/">Kyzylorda-news.kz.</a> &nbsp;Мемлекет басшысы Қ.К. Тоқаевтың бастамасымен елімізде 2025 жылға дейін 800 мың баланың заманауи мектепте білім алуына жағдай жасау мақсатында «Жайлы мектеп» ұлттық жобасы қолға алынған болатын. Облыс әкімі Нұрлыбек Нәлібаевтың ұсынысы негізінде алдағы 3 жылда Қызылорда облысында 15100 орынға арналған заманауи 21 мектеп салынады деп жоспарлануда. Жобаның жалпы құны – 100 млрд. теңге. Атап айтқанда: Қызылордада - 8, Аралда - 4, Қазалыда - 2, Қармақшыда - 2, Жалағашта - 1, Сырдарияда - 1, Шиеліде – 1 және​ Жаңақорған ауданында заманауи 2 мектеп бой көтереді.Облыстық білім басқармасының басшысы жоба аясында биыл өңірде 10 мектептің құрылысы басталатынын айтып, олардың өзге мектептерден айырмашылығын сөз етті.<blockquote>«Мамыр-маусым айында &nbsp;10 мектептің құрылысын бастаймыз. Бүгінде барлығының жері рәсімделді. Сметалық құжаттары дайындалды. Жалпы ерекшелігіне келсек, бастауыш және жоғары сынып оқушылары мектеп ғимаратының жекелеген блоктарында оқитын болады. Сәйкесінше, олардың өз оқу кабинеттері, әжетханалары, спортзалдары болады. Сондай-ақ бейнебақылау, дыбыстық дабыл сияқты қауіпсіздік нысандары орнатылады, заманауи физика, химия, биология, робототехника сияқты кабинеттермен қамтамасыз етіледі. Арнайы білімді қажет ететін балалар үшін қажетті жағдай жасалады», - деді М. Шермағанбет.</blockquote>Жалпы, 2023 жылға &nbsp;білім саласына 260 млрд. теңгеге жуық қаржы бөлініп отыр. Алдағы 3 жылда облыстағы үш ауысымды және апатты мектептердің жағдайы толық шешіледі деп күтілуде, &nbsp;ауылдық елді мекендердегі мектептер жаңғыртудан өтеді.&nbsp;Былтыр апатты деп танылған 6 мектептің үшеуінің мәселесі шешімін тапты, ал қалған 3 мектеп «Жайлы мектеп» жобасы аясында салынатын болады. Бұдан бөлек, биыл 5 мектепті пайдалануға беру жоспарлануда. Сондай-ақ ағымдағы жылы жоспарға сәйкес ауылдық елді мекендегі 47 мектеп жаңғыртудан өткізіліп, 51 мектепке пәндік (физика, химия, биология) кабинеттер алынатын боладыБілім саласындағы тағы бір қуанышты жаңалық, аймақ басшысының тапсырмасына сәйкес, биыл 1-4 сынып оқушылары мектепте тегін ыстық тамақпен қамтылуда. Бұл облыс бойынша алғаш рет жүзеге асырылып отыр.&nbsp;&nbsp;

Жайлы мектеп: Биыл Қызылорда облысында 10 мектептің құрылысы басталады

<a href="https://kyzylorda-news.kz/">Kyzylorda-news.kz.</a> Мұсылманның екі мейрамы болса, соның бірі – Ораза айт. Биыл айттың алғашқы күні 21 сәуірге сәйкес келіп отыр. Бұл күні отыз күн ораза ұстаған жандар Рамазан айымен қоштасып, ауыздарын ашады. Туған-туысқандарын аралап, жетім-жесір, мүгедекке көмек көрсетеді.Мұсылмандар Рамазан айына амандықта-саулықта жеткеніне шүкіршілік айтып, келесі Рамазан айына да есендікте жетулерін тілеп, дұға етеді. Айттың мән-мағынасына келсек, айт сөзі – қуаныш пен шаттыққа толы күн деген немесе «мереке», «мейрам» деген ұғымды білдіреді екен.&nbsp;Ораза айт күндері әрбір мұсылманның шаңырағында шелпек, бауырсақ пісіріліп, әр үйде әдеттегіден сәні де, салтанаты да ерекше мерекелік дастарқан жайып, қонақтар шақырылады. Сонымен қатар жағдайы төмен адамдарға жәрдем көрсетіліп, олар да мейрамнан тыс қалдырылмайды. Бұл күндері туған-туыстар бір жерге жиналып немесе зират басына барып өмірден озған жақындарының әруағына бағыштап құран оқиды. Қасиетті Рамазан айынан кейін келетін осы ұлық мерекені әлемдегі жалпы бүкіл мұсылмандар айрықша қуанышпен, зор ықыласпен атап өтеді. Арада қаншама ғасыр өтсе де, бұл ұлық мейрамның мән-маңызы кемімей, керісінше жыл өткен сайын артып келеді. Бұл мейрамның әдеттегілерден негізгі ерекшеліктері – адамдарды бауырмалдылыққа, кішіпейілділікке, кешірімділікке, сүйіспеншілікке шақырады.&nbsp;Ораза айт пен Құрбан айтта ауыз бекітуге тыйым салынған. Ал оразаның қазасын айттан кейін келесі жылдың ораза айына дейін өтеуге болады.

Ораза айт – ізгілік мерекесі

<a href="https://kyzylorda-news.kz/">Kyzylorda-news.kz.</a> Сыр өңіріндегі Назарбаев Зияткерлік мектебінде химия-физика пән бірлестігінің апталығы аяқталды. Оқушылар түрлі сайыстарда бақ сынасып, жаратылыстану ғылымдары бойынша білімдерін арттырды.&nbsp;9-сынып арасында өткізілген «Тәжірибелік кабинеттер» байқауында оқушылары қызықты экперименттер көрсету арқылы сыни ойлауын дамытса, 7-сынып білім алушылары «Game drive» ойынында түрлі логикалық тапсырмаларды орындап, үздік команда атағына таласты. Ал 8-сынып өрендері ғажайыпқа толы ғылыммен физикалық және химиялық тәжірибелер арқылы танысты.Таңертеңгі «Жұлдыз жорамал» акциясында оқушылар ұстаздарын алдағы күтілетін жаңалықтармен қуантты. Сондай-ақ, түрлі ғарыш апппараттарын құрастырып, &nbsp;көпшілікке таныстырды және ұстаздарымен бірге мектеп ауласында 5 зымыранды көкке ұшырып, бақылап көрді. &nbsp;«Сұрақ бізден, жауап Сізден!» викторинасында оқушылар пән бойынша білімдерін сынап, қызығушылықтарын арттырды. Сондай-ақ, «Қызық екен» сайысында мектеп қызметкерлерімен бірге топтарда проблемалардың шешу жолдарын қарастырды.&nbsp;«Netflix-тегі химия» шарасында қатысушылар ақпараттық технологияларды қолдана отырып, ғылыми негіздегі фильмдерді тамашалады және түрлі деңгейдегі сұрақтарға жауап іздеді.&nbsp;Апталық соңында барлық жеңімпаздар мен жүлдегерлер арнайы Дипломдармен марапатталды.<figure class="image"><img src="https://knadmin.beoblood.kz/uploads/337416493_619100859707013_1992857474141370846_n_75255d410a.jpg" alt="337416493_619100859707013_1992857474141370846_n.jpg"></figure><figure class="image"><img src="https://knadmin.beoblood.kz/uploads/337722631_211829801543345_6322259910549999001_n_196ded35e3.jpg" alt="337722631_211829801543345_6322259910549999001_n.jpg"></figure><figure class="image"><img src="https://knadmin.beoblood.kz/uploads/337717017_1629695407452281_2687051424699245661_n_a472408e28.jpg" alt="337717017_1629695407452281_2687051424699245661_n.jpg"></figure>

Қазақстан және Қызылорда облысының жаңалықтары