<a href="https://kyzylorda-news.kz/">Kyzylorda-news.kz.</a> Қызылорда облыстық денсаулық сақтау басқармасының мәжіліс залында басқарма басшысы Олжас Искаков медицина ұйымдары басшыларына жаңа жұмысы барысындағы алғашқы апталық лездеме отырысын өткізді.&nbsp;Кездесуге емдеу, алдын алу ұйымдарының басшылары қатысты.&nbsp;Жиында мүгедектікке шығару мәселелері, медицина ұйымдарының конго-қырым геморрагиялық қызбасына дайындық жұмыстары және пробация есебінде тұратын азаматтарға медициналық көмек көрсету барысы қаралды. Одан бөлек өзге де тақырыптар бойынша тарқатылып, медицина ұйымдарының басшылары тарапынан ұсыныстар айтылды.&nbsp;Жиын барысында аймақтың бас дәрігері Олжас Ермекұлы емдеу, алдын алу ұйымдарының басшыларына аталған мәселелерге сәйкес нақты тапсырмалар берумен қатар, алдағы уақыттағы қызметті асқан жауапкершілікпен атқаруды, ана мен бала денсаулығын жақсарту, жүкті аналарға ерекше күтім көрсетуді және халыққа сапалы әрі қолжетімді медициналық көмек көрсету жұмыстарын қатаң жүргізуді тапсырды.Қорытындыға сәйкес, аталған тапсырмалар хаттамаға енгізіліп, алдағы уақытта жүзеге асырылу бойынша шешім етілді.&nbsp;<figure class="image"><img src="https://knadmin.beoblood.kz/uploads/1d8b1551_7388_46f4_a542_4f1f0b172e63_6fa6dfa705.jpg" alt="1d8b1551-7388-46f4-a542-4f1f0b172e63.jpg"></figure>

Қызылорда облыстық денсаулық сақтау басқарманың басшысы асқан жауапкершілікпен жұмыс істеуді тапсырды 

<a href="https://kyzylorda-news.kz/">Kyzylorda-news.kz.</a> Тұрандық Жандәулет Қарекеев тіккен таза былғары аяқ киімдер жайлы естідіңіз бе? Аядай ауыз бөлмеде өндіріліп жатқан өнімдер отандық нарықта өзіндік орнын алып үлгерген. Қанымен дарыған өнерді қасиетіне балаған шебер атадан қалған кәсібін дөңгелетіп отыр. Жұмыстың көзін тауып, кәсібін кәдеге жаратқан етікшінің өнімдеріне бүгінде сұраныс көп. Таяуда шебердің ұстаханасына арнайы барып, әңгімелесіп қайттық.– Етікшілік – атакəсіп. Бұл өнерді жаңғырту ойы қалай пайда болды? Əлде атадан жеткен шеберлік пе?– Ата-бабам ұста болған. Атам – бір қыздың жасауын киімінен зергерлік бұйымы, аяқ киіміне дейін жалғыз өзі жасап береді екен. Әкем өз әкесінен көргенін маған үйретті. Ары қарай өзім ізденіп, алып кеттім. Қазір Қостанай, Көкшетау, Петропавл секілді ауа райы суық облыстардан тапсырыс берушілер көп. Желтоқсан, қаңтар айлары жұмыс қызу жүріп жатыр. Тапсырысты уақытылы орындау үшін күні-түні жұмыс істеудеміз.– Ең бірінші тапсырысты қалай бастадыңыз? Алғашқы тұтынушыңыз кім?– Алғашқыда бірден етік тігуге тапсырыс қабылдай қоймадым. Бірінші ағайын-туысқа тігіп бердім. Қазақтың керемет сөзі бар «Кілем сатсаң ауылдасыңа сат, бір шетінде өзің отырасын деген» менде осы ұстаныммен өзіміз жасаған өнімді әп дегеннен сатылымға шығара қоймадым. Алдымен үйдегілерге, балаларыма, туыстарыма тігіп жүрдім. Қай жерінде кемшілігі бар, аяқты талдырама, оның кию барысында тез тозама соның бәріне баса назар аудардым. Былайынша айтқанда шеберлігімді ұштап, даярлап алдым. Әбден сапасына көзім жеткен соң ғана тапсырыс қабылдай бастадым. Шүкір, қазір 4 жылға жуықтады, бірде-бір теріс пікір айтылған емес.– Бір аяқ киімді тігуге қанша уақыт жұмсайсыз?– Бір дана қыстық аяқ киімді тігуге екі күн жетеді. Алдымен лекалды, яғни былғарыны пішіп-қиып, машинада тігу, қалыпқа салып тарту, бір күн кептіру, табанын жапсыру сықылды жұмыстар атқарылады. Ал бір саптама етікті тігу үшін бір апта уақыт керек. Алдымен оның шегесін, былғарысын дайындаймыз, одан соң аяқтың өлшем бірлігіне шығарамыз. Шұқыма жұмысы көп. Етік тігу әсілі, оңай іс емес, оған ерінбейтін, төзімді, бұл кәсіпті сүйетін адам ғана барады. Бастысы ақшаны көбірек «қабу» емес, өнімнің сапасына жұрттың көзін жеткізу маңызды.— Аяқ киімге қажетті сапалы табан, желім құралдарын қайдан аласыз? Былғарыны арнайы тапсырыспен алдыртасыз ба?— Тараздық Жанболат деген кісі бар. Сол кісі арнайы шақыртумен әр қалаға келіп теріні илеп кетеді. Одан бөлек отандық «Тұран» атты былғары зауыттың өнімін пайдаланамын. Ал өзге құрал-жабдықтарды Алматы, Шымкент секілді ірі қалалардан тапсырыспен алдырамын.– Етік тігуде қандай технологияны қолданасыз?– Нақты бір технологияны қолданып отырған жоқпыз. Қолымызда бар құрал-саймандарды – тігін машинасын, станоктарды пайдаланамыз. Арнайы қалыптарымыз бар. Көбі қолдың жұмысы. Аяқ киімдер тек таза былғарыдан тігіледі. Дизайнын да өзіміз жасаймыз– Сіздің аяқ киімдеріңіздің базардағы өнімдермен салыстырғанда нендей айырмашылығы бар? Саудагерлер: «Қытай аяқ киімдерінің фирмадан шыққан түрі бар, алсаң ұтылмайсың» деп жатады. Осыған не айтасыз?– Біріншіден, адам денсаулығына зиян келмес үшін аяқ киім таза былғарыдан жасалуы тиіс. Базардағы аяқ киімдердің қандай теріден жасалып жатқаны белгісіз. Ал біз негізінен сиыр терісін пайдаланамыз. Екіншіден, базардағы аяқ киімдердің табанына көп жағдайда қатты қағаз салып жібереді. Бұл мүлде дұрыс емес. Табанына да тері пайдаланылуы керек. Сонда ғана аяғымыз терлемейді, жағымсыз иіс шықпайды. Бұдан бөлек біз білмейтін қауіпті химикаттың түрі толып жатыр емес пе?! Зияны туралы айтпаса да түсінікті.– Демек, дұрыс аяқ киім таңдау әлдеқайда маңызды дейсіз ғой. Ал сіздегі сапалы өнімнің бағалары қандай?– Әрбір тапсырыс берушінің аяқ өлшемі әртүрлі келеді. Басқа тұрмақ, бір адамның екі аяғын салыстырмалы түрде өлшеп қарасақ, бірдей емес. Себебі жалпы оң аяққа көбірек салмақ түседі. Барлығы ескерілуі тиіс. Қолдан шыққан дүние сол үшін де құнды. Біздегі ерлер етігінің құны 25 мыңнан басталады. Одан кейін қонышына, басқа да ерекшелігіне байланысты баға өседі. Ең қымбаты – 45 мың теңге. Мәсілер де қонышына, материалына байланысты 25-35 мың тұрады. Ал саптама етіктер – 120-150 мың теңге, іші сырты былғарыдан, ағаш шегемен шегелеп тартып, көмкереміз, ішіндегі байпағы киізден жасалады, өкшесі үш қабатты, тұмсығы екі қабатты былғарыдан тұрады. Өте сапалы, аяққа жеңіл, төзімді келеді. Сонан соң кез келген сатып алушыға кепілдік беремін. Егер аяқ киіміңіз ешқандай себепсіз жыртылып қалған күнде ақысыз қайта жөндейміз. Бірақ бүгінге дейін ешбір адамнан мұндай шағым болған емес.– Қазақта «Ерінбеген етікші болады» деген сөз бар. Бұған қарап етікшілік өнердің табандылықты талап ететіндігін байқаймыз. Дегенмен нарықтық заманда еңбектің жануы үшін қолдау да қажет сияқты. Мемлекеттен қандай да бір көмек алдыңыз ба?– Әрине, дұрыс айтасыз. Екінің бірі етікші болмайды. Бұл – өте қиын кәсіп. Десе де бұған дейін ешқандай көмек алмадым. Бірақ мемлекеттен қайтарымсыз грант алып, шағын кәсібімді цехқа айналдырсам деймін. Қазір қасымда екі інім бар. Арасында әкем көмектеседі. Құдай қаласа үйдің жанынан үлкен цех ашуды жоспарлап отырмыз. Ойымыз жүзеге асып жатса жас жігіттерді тәрбиелеп, жаңа жұмыс орындарын ашатын боламыз.– Аяқ киім шебері ретінде көпшілікке қандай кеңес берер едіңіз?– Бір ғана кеңес айтқым келеді. Кезкелген арзан аяқ киімнің зияны қымбатқа түседі. Басты байлық денсаулық десек, оны күту сол аяқ киімге мән беруден басталады. Сондықтан да өзіңіз үшін де, балаңыз үшін де аяқ киімнің сапалысын таңдаған дұрыс.– Тапсырысты қалай қабылдайсыз?– Адамдар көбіне әлеуметтік желілерден көріп, хабарласып, тапсырыс беріп жатады. Сосын ватсаптағы бейнеқоңырау арқылы тұтынушыға аяқ өлшем бірлігін қалай алуды түсіндіреміз. Дайын аяқ киімдерді тапсырыс берушінің қалауы бойынша, пошта, пойыз, автобус немесе таксиден салып жібереміз.– Отандық өнімге сұраныс қалай? Нақты қандай аяқ киім түрлерін тігесіз?– Сұраныс өте көп деуге болады. Тіптен үлгере алмай жатырмыз. Мәселен саптама етікті тігу үшін бір апта қажет. Ал қарапайым қыстық етікті 2 күнде тігіп бітіреміз. Етік, саптама етік, құрым етік, ағаш шегемен шегеленген мәсі, одан бөлек тапсырыспен күздік аяқ киімдер, балалар аяқ киімдерін тігемін. Енді әйелдер етігін тігуді бастамақпын.– Әңгімеңізге рахмет!Қорыта айтқанда, етікшілік – ерен кәсіп. Мағжан Жұмабаевтың: «Жүрген жанның артында ізі қалар, Етікші өлсе, балға мен бізі қалар» дегені бар. Өкінішке қарай, қазір ел арасында етікшілікті кәсіп қылғандар кем. Кеңес одағының кезінде Қазақстанда 11 аяқ киім фабрикасы жұмыс істепті. Ал қазір етік тігетін фабрикалар жоқтың қасы. Әрине, жекелеген етікшілер бар. Қазақтың ежелден келе жатқан ата кәсібінің жүгін арқалап жүргендер солар ғана. Сондықтан осындай тың кәсіпті жандандырып жүрген еңбек адамдарына ерекше қолдау қажет.

Жандәулет Қарекеев: Солтүстік өңірлерден тапсырыс берушілер көп

<a href="https://kyzylorda-news.kz/">Kyzylorda-news.kz.</a> Қызылорда облысы бойынша &nbsp;«КРЭК» АҚ теңгерімінде 10 мың шақырымнан астам электр желілері мен 1867 қосалқы трансформаторлық станция бар.&nbsp;Бүгінде осы электр құрылғыларының 68 пайызының тозығы жеткен. Сәйкесінше, биыл «Қызылорда қаласында электр желілерін дамыту, қайта құру және жаңғырту» қаржылық-экономикалық негіздеме бағдарламасы аясында 3,1 млрд.теңгенің жобасы жүзеге асады. Бұл туралы Өңірлік коммуникациялар қызметінің ақпараттық алаңында өткен брифингте Қызылорда облысының энергетика және тұрғын үй-коммуналдық шаруашылық басқармасы басшысының орынбасары Қайсар Мұстафаев мәлімдеді. &nbsp;<blockquote>«Қазіргі таңда жоба екі кезеңге бөлініп, облыстық бюджеттен бірінші кезең жұмыстарына 1,6 млрд.теңге қаражат бөлінді. Яғни, 35 дана 10/0,4кВ қосалқы станцияларын КТПБ типті трансформаторлы қондырғысына ауыстыру, 27 дана 10/0,4кВ кірпіштен қаланған қосалқы станцияларына күрделі жөндеу жұмыстары жүргізіледі. 31,6 шақырым 10/0,4кВ кабель желілері ауысады. Бұған қоса, 16 дана УАЗ автокөлігі сатып алынады. Қазіргі таңда жөндеу жұмыстары басталды. Қыркүйек айына дейін аяқтау жоспарлануда», - деді Қайсар Мақсұтұлы.&nbsp;</blockquote>Сонымен қатар, аудан және елді мекендердегі жоғарғы кернеудегі электр желілерінің тозуына байланысты 10 дана электр желісіне жоба жасау жоспарлануда.<figure class="image"><img src="https://knadmin.beoblood.kz/uploads/338872247_616986453159098_3795859115388081551_n_2c5a422d58.jpg" alt="338872247_616986453159098_3795859115388081551_n.jpg"></figure>

Қызылордада электр желілері жаңартылады

<a href="https://kyzylorda-news.kz/">Kyzylorda-news.kz.</a> Ауыл тұрғындары медициналық көмекті тек аудандық ауруханаларда ғана емес, ірі республикалық медициналық орталықтарда да ала алады. Соның бір дәлелі – Қызылорда облысы Жалағаш ауданының тұрғыны Гүлбану Манасованың Алматы қаласында тізе буынын эндопротездеу отасынан сәтті өткені. Қазір ол Жалағаш ауруханасында оңалтудан өтіп жатыр және дәрігерлерге өз бетінше жүруге мүмкіндік бергені үшін алғыс білдіреді.Гүлбану Манасова бірнеше рет жарақат алған. 2005 жылы күйеуімен бірге ескі үйді бұзып жатқанда, әйел үйінді астында қалып қойған. Сол кезде оң аяғының жамбас сүйегінен ауыр жарақат алған. Дәрігерлер сүйектерді жинап алды, – деп еске алады Гүлбану көзіне жас алып. 15 жылдан кейін тағы бір жарақат. Туыстарымен бірге апатқа ұшырады. Әйел оң аяғының тізесін сындырды.Ота мен емнен кейін ауырсыну басылмады. Жалағаш дәрігерлері науқасты Алматыға тізе буынын эндопротездеуге жіберді.<blockquote>«Мен үшінші топтағы мүгедекпін, жеңілдік санатына кіремін. МӘМС жүйесінің арқасында «Емдеуге жатқызу бюросы» порталы арқылы 2020 жылы Алматыға жіберілдім, дәрігерлер отаны сәтті жасады. Енді өз бетімше жүру, ауыртпалықсыз өмір сүру маған маңызды. Дәрігерлерге және барлық медициналық қызметкерлерге мың алғыс», - дейді Гүлбану Манасова.</blockquote>Қазір әйел жыл сайын аудандық ауруханада оңалтудан өтеді, бұл оған жарақаттардың салдарын азайтуға және аурулардың дамуын бәсеңдетуге көмектеседі.<blockquote>«Отадан кейін науқас көбінесе жатып, көп қозғалмады. Енді қалпына келтіру емінен кейін таяққа сүйеніп, өз бетінше жүріп жүр», - деп атап өтті дәрігер-реабилитолог, Жалағаш аудандық ауруханасының оңалту бөлімшесінің меңгерушісі Әсем Шамитаева.</blockquote>Айтпақшы, ауруханада пациенттерге парафин, лимфодренаждық массаж, емдік дене шынықтыру қол жетімді және «Артромот» аппаратымен пассивті механотерапия қолданылады.Оңалту жарақаттардың салдарын азайтуға, аурулардың дамуын бәсеңдетуге көмектеседі. Қалпына келтіру шараларын ақысыз негізде өтуге болады: тегін медициналық көмектің кепілдік берілген көлемі шеңберінде – негізгі ауруды, сондай-ақ туберкулезбен ауыратындарды емдеу кезінде; міндетті әлеуметтік медициналық сақтандыру жүйесінде– аурулар мен проблемалардың халықаралық жіктемесі бойынша аурулар тізбесіне сәйкес (https://mkb-10.com/).Айта кетейік, 2022 жылы Жалағаш аудандық ауруханасында барлығы 300-ге жуық медициналық оңалту қызметі көрсетілген. Осы мақсаттарға Әлеуметтік медициналық сақтандыру қоры шамамен 87 миллион теңге бағыттады.Жалпы, өткен жылы өңірде оңалту көмегіне 2 736,8 млн. теңге бағытталды. ТМККК шеңберінде және МӘМС аясынан оңалту қызметтерін көрсетуге облыстың 32 медициналық ұйымы тартылды, оның 14 - і жеке, 18-і мемлекеттік.Ағымдағы жылы оңалту қызметтерінің қаражаты 3 258,5 млн. теңгеге дейін өсті. Бұл дегеніміз, пациенттердің көпшілігі қалпына келтіру емінен өтуі мүмкін. Медициналық ұйымдардың саны да өсті. 2023 жылы Қызылорда облысының тұрғындарына медициналық оңалту қызметтерін 41 медициналық ұйым көрсетеді, оның 23-і - жеке, 18-і - мемлекеттік. &nbsp;<figure class="image"><img src="https://knadmin.beoblood.kz/uploads/20210519_113804_75049094a1.jpg" alt="20210519_113804.jpg"></figure>

Қазақстандық дәрігерлер  ауыл тұрғынына ауыр жарақаттан сауықтыруға көмектесті

<a href="https://kyzylorda-news.kz/">Kyzylorda-news.kz.</a> Бүгін Қызылорда облысы орталығындағы «Достық үйінде» Қызылорда облысы Полиция департаментінің бастығы полиция полковнигі Қожабаев Мұхтар Аманқұлұлы &nbsp;халыққа есеп берді. Жиынға үкіметтік емес ұйымдары, ардагерлер Кеңесі, облыс және қала тұрғындары қатысты. Аталған шара тікелей желіге қосылды.Есептік кездесудің өтуі жөнінде &nbsp;әлеуметтік желілерде және жергілікті бұқаралық ақпарат құралдарында алдын ала арнайы хабарландыру жарияланған болатын. Бұл хабарландыруға сәйкес, облыс және қала тұрғындары өз сауалдарын әлеуметтік желілер арқылы жолдауларына мүмкіндік алды.Халық алдында есеп беру кездесуін Мұхтар Аманқұлұлы ашып, қылмыстық ахуал мен қылмыстық құқық бұзушылықтың алдын алу бағытындағы &nbsp;атқарылған жұмыс туралы айтып, өткен 2022 жылды және ағымдағы жылдың есепті мерзімін қорытындылады. &nbsp;олиция қызметі көп салалы болғандықтан, өзекті бағыттарға тоқталып өтті. &nbsp;Жалпы, Қызылорда облысында жедел жағдай тұрақты. Өткен жылы облыс көлемінде тіркелген қылмыстар саны 14 пайызға, &nbsp;мал ұрлығы, тонау, бұзақылық, алаяқтықтың саны төмендеді. 10 мың халыққа шаққанда қылмыс деңгейі республикада 88 бірлікті құраса, облыста бұл көрсеткіш 43-ті құрады. Бұл ретте Мұхтар Аманқұлұлы Қызылорда облысын ахуалы тұрақты аймақтардың бірі екендігін атап өтті.Мемлекет басшысының тапсырмасы бойынша «полиция қадамдық қолжетімділікте» қағидаты аясында, ішкі істер органдары ауқымды және терең сапалы өзгерістер енгізуді бастады. Негізгі мақсат – халықтың сенімін арттыру, бюрократиядан арылу, адамның сұранысына бағытталған жұмыс моделіне көшу. Бұл бағытта жұмыс процестерін автоматтандыру, цифрландыру және оптимизациялау шаралары туралы да айтылды. &nbsp;Тәртіп сақшылары мен халық арасындағы өзара іс-қимылды жандандыру полиция қызметінің ашықтығы мен тиімділігін арттыратынын алға &nbsp;тартты. ​Сонымен қатар, бүгінгі жиын барысында Полиция департаментінің бастығы полиция полковнигі Мұхтар Қожабаев қоғамдық тәртіпті сақтау және заңдылықты нығайту жолында азаматтық парызына адалдықпен қарап, құқық бұзушылықтардың жолын кесуге үлестерін қосып, қырағылық танытқан белсенді облыс тұрғындарын Алғыс хатпен марапаттап, арнайы дайындалған &nbsp;естелік сыйлықтарды табыстады.Жалпы, халықтың мұң – мұқтажын тыңдап, олардың &nbsp;өтініштері мен ұсыныстарын &nbsp;жедел және сапалы қарау &nbsp;мәселесі полиция қызметіндегі маңызды бағыт екендігі белгілі. Полиция департаментінің бастығы тұрғындардың, оның ішінде әлеуметтік желілер арқылы келіп түскен барлық сұрақтар мен ұсыныстарды &nbsp;мұқият &nbsp;тыңдады. Еркін сұхбатта облыс тұрғындары департамент бастығына өз сауалдарын тікелей қоюға мүмкіндік алды.Тұрғындардың бірі белгілі жекелеген қылмыстық істер бойынша мәлімет алғысы келсе, енді бірі полиция қызметкерлеріне алғысын білдіріп, ел тыныштығын қорғау жолындағы қиын да жауапты қызметтеріне &nbsp;сәттілік тіледі.Департамент бастығы облыс тұрғындарының барлық уәждерін ескеріп, полиция қызметіндегі жұмыс барысын жетілдіруге қатысты тұрғындардың ұсыныстары бойынша және барлық көтерілген мәселелер мен өтініштердің &nbsp;бақылауға алынатындығын айтты. &nbsp; &nbsp;<figure class="image"><img src="https://knadmin.beoblood.kz/uploads/336705798_599567521779163_6314148418384533151_n_1568243be6.jpg" alt="336705798_599567521779163_6314148418384533151_n.jpg"></figure>

Қызылорда облысы полиция департаментінің бастығы Мұхтар Қожабаев халыққа есеп берді

<a href="https://kyzylorda-news.kz/">Kyzylorda-news.kz.</a> Аймақ аудандарында қолға алған кәсібін дөңгелетіп, оны одан әрі дамытып отырған кәсіпкерлер жетерлік. Солардың бірі – Жанар Разақбергенқызы. Ал сөзіміздің дәлелі алыстан көз тартып, менмұндалайтын «Анель» сауда орталығы.Қазіргі заман талабына сай салынған нысанның сыртқы келбетіне сүйсіне қарайсың. Батыстан күн сәуле шашқан орын Төретам кентінің ажарын нұрландырып-ақ тұр. «Анель» сауда орталығының тұрғындарға есігін айқара ашқанына көп бола қойған жоқ. Салтанатты іс-шараның ашылу рәсіміне Қармақшы ауданының әкімі Жандос Еркінбек қатысып, жаңа сауда үйінің тұрғындарға сапалы өнім ұсынып, тиімді қызмет көрсетуіне тілектестігін білдіріп, кәсіпкердің жұмысына сәттілік тілеген еді.Сауда үйінің иесі, жеке кәсіпкер Жанар Разақбергенқызы 2013 жылдан бастап текстиль және ыдыс-аяқ сататын дүкен ашып, ауданның экономикасын дамытуға өз үлесін қосып келе жатқан кәсіпкер. Ол жаңа ғимаратта халық игілігіне қызмет жасауға 15 адамды жұмыспен қамтуды жоспарлап отыр.Екі қабатты заманауи сауда орталығының бірінші қабатында азық-түлік тауарлары сатылса, ал екінші қабаты қызмет көрсету орындарына арналмақ. Сауда нысаны алдағы уақытта аудан экономикасының әлеуетін арттырып, сауда бәсекелестіктігін дамытуға және баға тұрақтылығын сақтауға септігін тигізетін болады.Бүгінде шағын бизнеске ден қойылып, қолдау көрсетілуде. Ол үшін түрлі бағдарлама мен жобалар да жүзеге асуда. Ал бұл қадам – өрісімізді кеңейтіп, талапқа сай өмір сүруімізге тынысын ашуда. Иә, аймаққа қарасты аудандарда кәсіп ашып, бизнесін дөңгелеткендер қатары еселенген. Қуантарлығы да – осы.&nbsp;

Төретамда жаңа сауда үй тұғындарға қызмет көрсетуде

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев кезектілік тәртібімен жазылған азаматтарды қабылдады. Жеке қабылдауға 13 адам келді, 1 азаматша өтінішін онлайн байланыс арқылы жеткізді.Қабылдауға келген тұрғындардың басым бөлігі тұрғын үй алу, жұмысқа орналасу және балаларының оқу ақысын төлеуге көмек сұрады.Облыс әкімі алдағы уақытта қабылдауға келген азаматтардың мәселелері зерттеліп, шешімі заң талаптарына сәйкес қарастырылатынын жеткізді. Кейбір мәселелер бойынша жауапты тұлғалар заң аясында түсіндірме беріп, шешу жолдарын ұсынды.Мәселен, 49 жастағы жалғызбасты азаматша «Ягодка» саяжайындағы жеріне іргетас құюға көмек сұрады. Денсаулығының нашар екенін айтып, дәрі-дәрмекпен қамтамасыз етуді өтінді. Сондай-ақ, қаланың бір топ тұрғыны созылмалы ауруға қойылған диагноз бойынша ем қабылдауға жолдау туралы мәселе көтерді.Қала маңындағы Махамбетов ауылының 70 жастағы тұрғыны жол және көше жарығына қатысты мәселені қозғады. Осыған орай қала әкімінің орынбасарына көшелерге тас жол төсеу және электр бағаналарын орнату мүмкіндігін қарастыру тапсырылды.Осы уақытқа дейін облыс әкімі 29 жеке қабылдау өткізіп, 600-ден астам тұрғынның өзекті мәселесіне ден қойды.Айта кетейік, тұрғындар облыс әкімінің қабылдауына egov.порталы, е-otinish бірыңғай базасы немесе әкімдікке келіп жазбаша өтініш тастау арқылы жазыла алады.<figure class="image"><img src="https://knadmin.beoblood.kz/uploads/338126809_534111741969872_685856803874038617_n_fbb90ec75d.jpg" alt="338126809_534111741969872_685856803874038617_n.jpg"></figure>&nbsp;<figure class="image"><img src="https://knadmin.beoblood.kz/uploads/akim2_e375b9c48b.jpeg" alt="аким2.jpeg"></figure>

Облыс әкімі тұрғындарды жеке мәселелерімен қабылдады

<a href="https://kyzylorda-news.kz/">Kyzylorda-news.kz.</a>&nbsp;Аймақта 680 мыңнан астам адам МӘМС жүйесіне тіркелген. Бұл жалпы өңір халқының 84 пайызын құрайды. Бұл туралы Өңірлік коммуникациялар қызметінің ақпараттық алаңында өткен брифингте «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.&nbsp;<blockquote>«Жүйе іске қосылғаннан бастап облыс тұрғындары қорға 47,8 млрд. теңге аударған. Оның 29,8 млрд. теңгесі жұмыс берушілердің аударымдары болса, қалған 18 млрд. теңгесі жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі. Сондай-ақ, жыл сайын медициналық сақтандыру қаражаты есебінен халыққа кардиохирургия, нейрохирургия, урология, травматология, онкология және хирургия бейіндері бойынша көптеген қымбат оталар жүргізіледі. Бұған қоса, МӘМС жүйесінде көрсетілген қызметтердің ішінде оңалту басым бағыттардың бірі болып табылады. Жыл сайын оңалту қызметтерін алу мүмкіндігі жақсарып,медициналық құрылғылардың да, емдеу әдістерінің де саны артып келеді.Оңалту қызметтерін көрсету үшін өткен жылы Әлеуметтік медициналық сақтандыру қорының филиалы 32 медициналық ұйыммен шарт жасасты», - деді Бақыт Торғайбайұлы.</blockquote>Өз сөзінде Қор міндеттердің бірі – пациенттердің құқықтарын қорғау екенін тілге тиек етті. Сондықтан халық медициналық көмек алу кезінде құқықтары бұзылған жағдайда Қорға жүгінеді және келіп түскен арыз-шағымдар ерекше бақылауда болады.Айта кетейік, өткен жылы Қорға облыс тұрғындарынан 1 092 өтініш қабылданып, өңделген.<figure class="image"><img src="https://knadmin.beoblood.kz/uploads/338015652_942774820490093_7215327192959438689_n_e1a26acb2c.jpg" alt="338015652_942774820490093_7215327192959438689_n.jpg"></figure>

Қызылордада 680 мыңнан астам адам МӘМС жүйесіне тіркелген

<a href="https://kyzylorda-news.kz/">Kyzylorda-news.kz.</a> &nbsp;Мемлекеттік бағдарламаның арқасында бүгінде өз кәсібін ашып, шаруасын дөңгеленткендердің саны артып келеді. Қармақшы ауданында кәсіптің көзін тауып, оны ширатып отқан жастың бірі – Жомарт Рахымжанов. &nbsp;Кәсіп ашқан талапты жасты көргенде «бәрекелділейтініміз» рас. Әсілінде екі қолға бір күрек алып, нәпақасын маңдай термен тапқанның наны да тәтті. Қоғамның нені көтермейтінін айта, айта жауыр болдық. Жалқаулықпен дос болып, бос сенделуді серігіне айналдырды талайы. Ондайдан арашалайтын тек сол адамның бойындағы талабы мен жігері ғана.Кейде ұйықтар алдында түрлі-түрлі идеямызды ойша армандап, қиял әлеміне әкететініміз бар. Бірақ ол сол тұста «мазасыз ойлар» болып қалып қояды. Ал неге қиялыңыздағы сол ойды жүзеге асырмасқа? Әрине, «кәсіп аш» дегенде «тежеліп» қаламыз. Өйткені бастапқыда қорқыныш болады. «Бастай аламын ба? Қалай жүзеге асырамын?» деген сан сауалдан сананы арашалай алмаймыз. Мұндайда бізге не істеу керек? Алдымен жігер қажет. Айқын мақсат пен нық сенім керек. Одан соң мемлекет берген мол мүмкіндікті тиімді пайдаланып, сол арманның жүзеге асуына қарекет етуіміз тиіс. Мысал ретінде аудандағы сондай жандардың бірін алайық. Жомарт Рахымжанов – мемлекеттен 2 млн теңге көлемінде қайтарымсыз грант жеңіп алған. Бала күнінен қолөнерге жақын өскен ол арман жолындағы тынымсыз еңбегінің нәтижесінде ұлттық нақыштағы дүниелерді шығаруда. Көкжиегін қолөнермен кеңейткен кейіпкерімізбен әңгімелесудің сәті түскен болатын. Ауылдан түлеп ұшып, арман қуған бозбала Кентау қаласындағы көпсалалы колледжге оқуға түседі. Мұнда «Жылумен қамту, жылу құрылғыларын пайдалану» мамандығы бойынша білім алады. Оқуын ойдағыдай тәмамдаған соң ауылға келіп, мамандығы бойынша жұмысын бастайды. Дегенмен бала күнінен сурет салып, мүсін жасаған оның тұла бойы қолөнерге бейім еді. Сол арманын жүзеге асыру үшін өткен жылы Кәсіпкерлер палатасына табан тірейді. Мұнда ол арнайы курстан өтіп, жобасын қорғап, кәсіп бастарға қажет қаражатты ұтып алады.<blockquote>«Бизнестің жол картасы – 2025» бағдарламасы бойынша «Кәдесыйлар өнімін шығару» атты жобам грантқа лайықты деп танылды. Бөркімді аспанға атқаным рас. Өйткені бұл бала күнгі арманым еді. Аталарымнан дарыған бойдағы өнерімді паш еткім келді. Елге қызмет етіп, ұлттық өнерімізді дамытқым келді. «Армандар орындалады» деген рас екен. Қазір ерекше сыйлықтар, түрлі ою-өрнекпен көмкерілген бұйымдар, кәдесыйлар жасаймын. Сұраныс артып, көпшіліктің қызығушылығы одан әрі еселенуде», &nbsp;дейді ол.</blockquote>Мұндай кәсіпті дөңгелете алғанның тасы өрге домалайтыны белгілі. Өйткені сәнді, ұлттық нақыштағы қолөнер бұйымына қызықпайтын адам кем де кем. Кәсібінің күннен күнге кеңейіп, жұмысының оңға басуы оның жасынан ағаш жонуға икемінің әрі тынымсыз еңбекқорлығының арқасы. «Ұлымның әке жолын қуып, ұлттық өнердің дамуына үлесін қосса деген арманым бар» дейді талапты жас сөз арасында.«Армансыз адам болмайды. Мен де армандай білдім. Онымен қоймай, оның жүзеге асу жолында еңбектендім. Бастысы – мемлекет көрсеткен қолдауды тиімді пайдаланып, кәсібімді одан әрі дамытқым келеді», &nbsp;дейді ол.

Қармақшылық жас кәдесыйды кәсіп етті

<a href="https://kyzylorda-news.kz/">Kyzylorda-news.kz.</a> Қазалыдағы Р.Бағланова атындағы аудандық мәдениет орталығы жанындағы «Өнеге» әжелер ансамблі 2012 жылдың желтоқсан айынан бастап құрылды. Алғашында ансамбльге ҚР мәдениет саласының үздігі Гүлнар Төребекова жетекшілік етті.Ансамбль 2016 жылы Қызылорда қаласында өткен облыстық ардагерлер арасында өткізілген байқауға қатысып, бірінші орынды иеленді. Кейіннен ансамбльді ҚР мәдениет саласының үздігі Галя Оспанова жүргізді. Ансамбльге Майра Қазбекова, Ұлжан Ахметова, Набира Момбекова, Гүлнар Рысмаханова,Бейсенгүл Тәжібаева, Жадыра Садықова, Нағима Қарымсақова, Бақыт Зарипова, Гулшахра Сарбалаева және баянмен сүйемелдеуші Мұрат Әділов мүше.<blockquote>«Біздің мақсаты зейнеткерлікке шыққан әжелерімізді қоғамдық ортаға тарту. Ансамбль мүшелері тек ән айтумен ғана шектелмей, қазақтың ұлттық салт дәстүрлерін насихаттау яғни ұршық иіру, құрақ көрпе жасау, кссте тігу, бесік жырын айту сияқты дәстүрлерді кейінгі жас ұрпақтарға үйрету болып табылады. Ансамбль мүшелері жыл басында жоспарға сәйкес дайындық жұмыстарын жүргізіп өз ойларын ортаға салады. Біздің өнерлі әжелер аудандық, облыстық, республикалақ байқауларға қатысып отырады. Ансамбль репертуарында қазақтың халық әндерімен бірге Қазақстан шетел композиторларының әндері бар. Ауданымызда өткізілетін мәдени шаралардан қалыс қалмай, үнемі үлес қосып келеміз», – дейді ансамль жетекшісі Галя Оспанова жүргізді.</blockquote>Өнерімен талайды тамсандырып жүрген өнерлі де, өнегелі әжелер 2020 жылы 10 қыркүйекте Қазалы аудан әкімдігінің қолдауымен Қызылорда облыстық халық шығармашылығының дамыту және мәдени прюдессерлік орталығы, Қазалы аудандық мәдениет орталығының ұйымдастыруымен ақын Абай Құнанбаевтың 175 жылдығы аясында «Әжелер сөзі – тәрбие көзі» атты әжелер ансамбльдерінің онлайн байқауында бас жүлде иемденді. 2020 жылдың 30 қазан айында «Болашаққа бағдар; Рухани жаңғыру» бағдарламасы аясында Қызылорда қалалық мәдениет және тілдерді дамыту бөлімімен Қарауылтөбе ауылдық клубы және «Қарауылтөбе» бастауыш партия ұйымының бірлесе ұйымдастыруымен отбасы құндылықтарын кейінгі ұрпақтың бойына сіңіріп қазақтың салт дәстүрлерін қадірлеу, ене мен келін арасындағы сыйластықты дәріптеу мақсатында «Ізет, Иба, Парасат» облыстық онлайн байқау өткізілді. Байқауға «Өнеге» әжелер ансамблінің мүшесі Нәбира Момбек (енесі) мен Айым Байсенгірова (келіні) қатысып, бас жүлде иеленді. Оларға арнайы Дипломмен және 70 мың тенге сыйлығы табысталды. Ансамбль мүшелерінің репертуарында халық әндері «Көкем-ай», «Сәулем-ай», «Әттең тонның келтесі-ай», «Угәй-әй», «Дүние-ай», «Шилі өзен», «Хәләулім», «Сусамыр елдің жайлауы», «Қоғал-ай», «Еркемай», Ә.Бейсеуовтың «Алтыным», Ә.Еспаевтың «Су тасушы қыз», Қ.Жолдыбаевтың «Қазалы вальсі», М.Өзбековтың «Тобылғы сай» тағы басқа әндері орын алған.Ансамбль мүшелері облыстық әйелдер Кеңесінің ұйымдастыруымен «Төркіндеу» бағдарламасына орай өткізілген мәдени шарада қатысушы қонақтарды аудан орталығындағы «Бегім ана» ескеркіші маңындағы алаңында әндерімен қарсы алса аудандық мәдениет орталығында аудандық әйелдер Кеңесінің ұйымдастыруымен форумда әжелер ансамблі өнер көрсетті. Осы жылғы наурыз айының екінші жұлдызында Қызылорда облысында өткен облыстық «Ұлағатты әжелер» байқауында «Өнеге» әжелер ансамблі І орынды иемденіп, 80 мың теңге сыйақы алды.Сондай-ақ осы байқаудың «Аналар форумында» тәлім тәрбие бағытында келін мен ене арасындағы сыйластық туралы ансамбльдің мүшесі көп балалы ана өнегелі келін тәрбиелеп отырған Нәбира Момбекова өз пікірін ортаға салды. 21 наурыз мерекесіне орай өткізілген «Қош келдің, Әз Наурыз» атты мерекелік шарада да әжелер өнерлерін ортаға салып, тыңдарманын тәнті етті. Олар халық әні «Бипылды» орындап, көрерменнің көңіліне серпілтті.– Жуырда ауыл тұрғындарына есептік концертін ұсынбақшымыз. Ал мамырдың 2 жұлдызында ансамбльдің мүшесі Майра Қазыбекованың 70 жасқа толуына орай «Өмірін өнерімен өрнектеген – Майра» атты шығармашылық кеші өткізуді ойға алып отырмыз. Алда әлі талай жоспарларымыз бар, – дейді ансамбль жетекшісі бізбен әңгімесінде.

Қазалы: Сахнаның сәні – «Өнеге» әжелер ансамблі

<a href="https://kyzylorda-news.kz/">Kyzylorda-news.kz.</a> Қызылорда қаласы әкімінің орынбасары Жанмұрат Сейіловтың төрағалығымен өткен қылмыстық жазаларды және өзге де қылмыстық-құқықтық ықпал ету шараларын орындайтын мекемелер мен органдардың қызметіне жәрдемдесу, сондай-ақ қылмыстық жазасын өтеген адамдарға әлеуметтік және өзге де көмекті ұйымдастыру бойынша Қызылорда қаласы әкімдігінің жанындағы консультациялық-кеңесші органның кезекті отырысында үш мәселе қаралды.Бас бостандығынан айыру орындарынан босатылған және пробация қызметі есебінде тұрған азаматтарды еркін өмірге бейімдеу, жұмысқа орналасуына, сондай-ақ қайта кәсіптік даярлауға көмектесіп, әлеуметтік мәселелерін шешу бүгінгі күннің өзекті мәселесі болып отыр. Аталған мәселе бойынша Қызылорда қаласының жұмыспен қамту, әлеуметтік бағдарламалар және АХАТ бөліміне қарасты «Қылмыстық жазасын өтеген адамдарды әлеуметтік бейімдеу мен оңалту орталығының директоры Бахыт Нұртазаев хабарлама жасады.&nbsp;Қазіргі таңда қалалық пробация қызметі есебінде тұрған 613 адамның ішінде 53-і жұмыссыз болып табылады. Жұмыссыз азаматтың 13-і ғана қалалық жұмыспен қамту орталығына тіркелгендігі анықталып отыр. Кеңес барысында қалған 40 азаматты жұмыспен қамту бойынша нақты жұмыстар жүргізуді және пробация қызметі есебінде тұрған азаматтар туралы уақытылы мәлімет алмасумен қатар, «Бос жұмыс орындары» жәрмеңкесінің ай сайын өткізілуін қамтамасыз ету тапсырылды.Келесі, жаза өтеу орындарынан бостылғандар мен пробация қызметінде есепте тұрған азаматтардың медициналық көмекпен қамтылуы және оның ішінде туберкулезбен ауыратын адамдарды және амбулаторлық емдеудегі туберкулезбен ауыратын азаматтарға көрсетілген қызметтер туралы қаралды. Аталған мәселе бойынша баяндама жасаған Қызылорда облысының денсаулық сақтау басқармасы басшысының орынбасары Жангелді Шаймбетовке жаза өтеу орындарынан босатылғандар мен пробация қызметінде есепте тұрған азаматтардың тегін медициналық көмектің кепілдендірілген көлемі шеңберінде тұрақты түрде көмек көрсетілуін жүзеге асыру және пробация қызметі есебіндегі азаматтарға психологиялық, әлеуметтік көмек көрсету бойынша және профилактикалық тексеруден өткізу жұмыстарын жалғастыру жүктелді.Күн тәртібіндегі үшінші мәселе, діни көзқарастарды ұстанатын жазасын өтеушілерді қоғамға бейімдеу мақсатында жүргізілген жұмыстарды және өмірлік қиын жағдайға тап болған бас бостандығынан айыру орындарынан босатылғандар мен пробация қызметінің есебіндегілерді (оның ішінде жастарды) қаладағы мемлекеттік тапсырыс шеңберінде жүргізіліп жатқат әлеуметтік жобаларға тарту және атқарылып жатқан шараларды БАҚ-да жариялау туралы Қызылорда облысының дін істері басқармасының бөлім басшысы Гүлсім Романқұлова және қалалық қоғамдық даму бөлімінің басшысы Парасат Жанабергенов баяндама жасады.Бүгінде Қызылорда қаласы әкімдігімен деструктивті діни ағым ықпалында жүрген азаматтармен жұмыс жасау алгоритмі бекітілді. Алгоритм негізінде қалаға қарасты кент және ауылдық округтері аумағында ДДА ұстанушы азаматтармен профилактикалық жұмыстар үйлестіріліп, олардың әлеуметтік статустарын анықтауға және теологтармен кездесулер ұйымдастыруға мүмкіндіктер жасалды, ДДА ұстанушылардың әлеуметтік карталары жаңартылды және нақты тұрғылықты мекен-жайлары анықталды.Жанмұрат Жақсымұратұлы, діни көзқарастарды ұстанатын жазасын өтеушілерді қоғамға бейімдеу бағытындағы жұмыстарды одан әрі күшейтуді тапсырды.

Қызылорда қаласы әкімдігінің жанындағы консультациялық-кеңесші органның кезекті отырысы өтті

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында биыл 250-ден астам жас пен 600-ден астам ауыл азаматы 2,5 пайызбен несие алады деп жоспарланып отыр. Ол үшін өңірге республикалық бюджеттен 4,3 млрд теңге бөлінді.Қызылорда облысы кәсіпкерлер палатасының директоры Пірмұхаммед Сыздықов мұндай қолдау аймақ тұрғындарының кәсіппен айналысуға қызығушылығын арттырады деп санайды.<blockquote>«Бүгін Мемлекет басшысы VIII сайланған Қазақстан Республикасы Парламентінің бірінші сессиясында ел дамуына үлес қосатын кәсіпкерлердің «жаңа толқынын» қалыптастыру қажет екенін айтты. Биылдың өзінде жастар мен ауыл азаматтарына 2,5 пайызбен несие беру үшін облысқа 4,3 млрд теңге бөлінді. Бұл – үлкен қолдау. Кәсіп бастаймын деген азаматтар үшін жақсы мүмкіндік», – дейді Пірмұхаммед Сыздықов.</blockquote>Кәсіпкерлер палатасының басшысы мемлекеттің қолдауы мұнымен шектелмейтінін айтты.<blockquote>«Атамекен» Ұлттық кәсіпкерлер палатасы «2021-2025 жылдарға арналған кәсіпкерлікті дамыту жөніндегі ұлттық жоба» аясында «Мен кәсіпкер» жобасын жүзеге асырып жатыр. Биыл осы жоба аясында 600-ге жуық қызылордалыққа қызмет көрсетуді көздеп отырмыз. Атап айтқанда, кеңес береміз, оқытамыз, жобасын нақты өнім шығарғанға дейін сүйемелдейміз», – деді Палата директоры.</blockquote>Пірмұхаммед Сыздықов бүгінгі Парламент сессиясында Президенттің шағын және орта бизнесті қолдауға арналған кешенді шара қабылдау жөніндегі тапсырмасы да бұл бағыттағы жұмыстарды жандандыратынын атап өтті.<blockquote>«Халық қазір кәсіппен айналысуға жан-жақты қолдау бар екенін жақсы түсінді. Рас, кейде әкімшілік кедергілер кездесіп жатады. Ондай жағдайда кәсіпкерді қорғауға, көмек көрсетуге біз әзірміз», – деді Кәсіпкерлер палатасының басшысы.</blockquote>Кәсіпкерлікке қатысты сұрағы бар азаматтар Қызылорда облысының кәсіпкерлер палатасына 8 /7242/ 40-09-81 нөмірі арқылы хабарласа алады немесе Facebook желісіндегі «Сыр өңірі мен Қызылорда қаласындағы БИЗНЕС» тобынан барлық жаңалықпен танысуына болады.

Қазақстан және Қызылорда облысының жаңалықтары