<a href="https://kyzylorda-news.kz/">Kyzylorda-news.kz.</a>&nbsp; «12 мамыр – халықаралық медбикелер күні» қарсаңында медицина саласында өзіндік орны бар мектеп медбикесі қызметін абыроймен атқарып жүрген маманмен әңгімелескен едік. Көп жылдан бері Сырдария аудандық емхана мен кенттегі білім беру мекемесінің арасын жол қылған Лариса Оспанова – өз ісінің майталманы.Ұзақ жылдан бері денсаулық сақтау саласында өзіндік орнын қалыптастырған мектеп медбикесінің қызметі қай кезде де қауырт. Негізінен ақ халатты абзал жандардың тәуліктің кез келген уақытында науқас адамға алдымен жететін жанның бірі десек артық айтқандық болмас. Сондықтан қиындығы мен қуанышы қатар жүретін мамандық иесіне қандай құрмет көрсетілсе де лайықты.Үнемі білікті маман ретінде әрітестерінің ортасында даралана білетін Лариса Оспанова осыдан 53 жыл бұрын Тереңөзек кентінде дүние дидарын ашқан. Есімі Сырдария ауданына етене таныс, Ұлы Отан соғысының ардагері Шәкі Оспанов пен зайыбы «Батыр ана» Қарақас Оспанова Ларисаның ата-анасы. Көп балалы отбасында Ларисамен бірге 11 перзент тәрбиеленген. Болашақ медицина маманы Лариса Шәкіқызы аудан орталығындағы бұрынғы М.Калинин, қазіргі №35 Иса Тоқтыбаев атындағы мектеп-лицейді тәмамадаған.<blockquote>&nbsp;«Дені сау адам – табиғаттың ең қымбат жемісі» деген сөз бар. Адам жанының арашасы бола білген медицина мамандығына оқып, маманданғанына еш уақытта өкінген емеспін. Мектепте сегізжылдықты бітірген соң 1989 жылы Қызылорда медициналық училищесінің «Медбике ісі» мамандығы бойынша диплом алдым. Еңбек жолым аудандық аурухананың терапия бөлімшесінен басталды. Алғаш жас маман ретінде осы бөлімшеде тәжірибе жинап, науқасқа ем-шара жүргізіп, дәрігердің нұсқаулығы бойынша жақсы жұмыс істеуді үйрендім. Кейіннен отбасылық жағдайға байланысты Қарағанды қаласына қоныс аудардық. Үлкен қалада жүріп облыстық клиникалық ауруханасының «Нефрология» бөлімшесінде қызмет еттім. Сонан соң туған жерге қайта оралған сәтте №6 "Ботакөз" балабақшаның медбикесі қызметін атқардым. Төрт жыл көлемінде іргелі ұжымды басқарған меңгеруші Қазына Жақыпбекова әрбір қызметтің қыр-сырын үйрете білді, – дейді медбике Лариса Оспанова.</blockquote>Иә, бала бақша, мектеп медбикесі бола білу – қиынның-қиыны. Осыдан 19 жыл бұрын қазіргі №131 Т.Қозыбаев атындағы орта мектепке қызметін ауыстырған Лариса Оспанова өз саласына қатысты мәселелердің шешілуін оңтайлы жолмен қарастырады. Әрине, 340 оқушы мен мектеп ұжымының әрбір мүшесінің денсаулығын күнделікті жіті бақылау зор жауапкершілік жүктейді.<blockquote>«Мектеп табалдырығын аттаған әрбір оқушымен жұмыс жасаудың өзіндік қиындығы мен қызығы қатар жүреді. Мектеп медбикесінің жұмысы өте күрделі. Күнделікті міндетімізге, жұмысымызға профилактикалық тексеріс-тен өткізу, гигиеналық тазалыққа жауап беру секілді бірнеше бағыттағы қызмет кіреді. Балалардың аурушаңдық белгісіне көз жеткізіп, дәрігерге жолдаймыз. Әрине, осы қызметте жүргелі мектеп директорлары Гүлнұр Божанова, Мұрат Төлегенов, Ләззат Палымбетова, Айнұр Әлиевамен қызметтес болағаныма дән ризамын. Әр жылдары маған қолдау көрсеткен мектеп басшылығына алғыс айтамын», – дейді Лариса Шәкіқызы.</blockquote>Біздің кейіпкеріміз өзінің сүйікті мамандығымен қатар отбасылық өмірді назардан тыс қалдырған емес. Дүниеге 4 перзент әкеліп, отағасы Бердібек Мұсаевпен бақытты ғұмыр кешуде. Үйдегі отағасы зайыбының мамандығы күрделі екеніне түсіністікпен қарап, үнемі қолдау көрсетіп отырады.Бұл күні балтыры сыздап, ауырмайтын жан кемде кем. Қазір ауру жас таңдамайды. Үлкен де, кіші де түрлі дертке шалдығып, оның емін іздеп әлек. Дегенмен кез келген дертке шалдықпау үшін адам саламатты өмір салтын ұстануы керек. Оған қоса экологияның, дұрыс тамақтанудың әсері де бар. Сондықтан мектеп медбикесі оқушылармен күнделікті осы мәселелерге байланысты түсіндіру жұмыстарын жүргізуді әдетке айналдырған. Ал ерте кезден баланың бойын¬дағы сырқатты анықтау Лариса секілді мамандардың тікелей міндетіне кіреді.&nbsp;Өз жұмысына аса жауапкершілкпен қарайтын тәжірибелі медбикені кәсіби мерекесімен шын жүректен құттықтаймыз! &nbsp;

Мектеп медбикесі 

<a href="https://kyzylorda-news.kz/">Kyzylorda-news.kz.</a> Бүгінгі жас ұрпақ білімді болса, елдің келешегі кемел болары ақиқат. Сол себепті, мемлекет жастарға барлық мәселеде қолдау білдіріп, мүмкіндік жасауда. Білім жүйесінде де гранттардың саны артып, шетелде білім алуына мол мүмкіндік бар. Жыл сайын мыңдаған студент әлемнің үздік университеттеріне оқуға кетіп жатыр. Осының барлығы жастардың жаһандық дәуірде бәсекеге қабілетті мемлекеттің негізін қалауына жол ашады.&nbsp;Мұндағы негізгі ой – білім бәйгесінде биіктен көрінетін білікті маман, жаңа әлемнің сандық технологияларын жетік меңгерген, уақыт талабына сай, кез келген кезеңде бәсекеге дайын тұлға қалыптастыру. Мемлекет әу бастан-ақ білімге айрықша назар аударды. Өйткені, білім – сауатты болудың іргетасы ғана емес, кемелденіп, келешекке нық қадам басқан әлемнің алпауыт елдерімен терезе теңестірудің күретамыры, алтын көпірі. &nbsp;Бұл тұста аудан мерейінің асып, абыройының асқақтауында осы сала қызметкерлерінің еңбегі зор. Жыл сайын білікті де білімді, бәсекеге қабілетті тұлға қалыптастырып, талай шәкіртті ұядан ұшырып отырған, жұмысы жүйелі мектептердің бірі – Ш.Ермағанбетова атындағы №246 орта мектеп. Бұл мектеп туралы айтарда Шекер апамыздың еселі еңбегіне тоқталып өтпеу мүмкін емес.&nbsp;Биыл білім ордасы жаң оқу жылын 379 оқушымен бастаған. Оның ішінде 34 бала мектеп табалдырығын алғаш аттап отыр. Білім ошағының басшысы Айнұр Айбосынова 19 бала мектеп бітіретінін айтады. Әзірге барлығы да ұлттық бірыңғай тестілеуге қатысуға ниетті. ҰБТ-ға дайындық жұмыстары қыркүйек айында басталған. Сол уақыттан бері балалардан айына 4 мәрте тест алынып тұрады.&nbsp;<blockquote>«Әзірге көрсеткіш жаман емес. Оқушылардың барлығы ҰБТ-ға қаты-суға талаптанып отыр. Көбісі жаратылыстану бағытындағы пәндерді таңдаған. Әзірге орташа балл – 73, ал ең жоғарысы 123 балл. Бұл да біз үшін жақсы көрсеткіш емес, сондықтан алдағы уақытта дайындық жұмыстарын күшейтеміз», – дейді мектеп директоры.</blockquote>Айта кетейік, былтыр аталған білім ошағын 17 бала тәмамдаған. 100 пайыз ҰБТ-ға қатысып, оның сегізі мемлекеттік грантқа үміткер есебінде құжат дайындапты. Нәтижесін сұрасаңыз, 8 баланың жетеуі жоғары оқу орындарында мемлекеттік грантпен білім алуға қол жеткізсе, 1 бала облыс әкімінің грантына ие болған. Бүгінде мемлекеттік грантпене білім алып жатқан жеті баланың үшеуі техникалық, біреуі ауыл шаруашылығы саласы бойынша мамандық игерсе, қалғаны педагогикалық бағытта білім алуда.&nbsp;Мектеп оқушыларының пәндік олимпиадаларға қатысу қарқыны да жаман емес, осыған дейін мектепішілік олимпиадаларға 58 бала қатысқан. Айнұр Шыңғысқызы олардың 25-і аудандық кезеңге жолдама алғанын айтады. Тіпті оның 8-і жүлделі орындардан бой көрсеткен. 1-7 сынып оқушыларының зерттеу жұмыстары мен шығармашылық жобаларының «Зерде» республикалық конкурсына мектеп оқушысы Айсұлтан Қуанышбекұлы қатысыпты. Аудандық кезеңде оқ бойы озық келген ізденмпаз оқушы бас бәйгені қанжығалаған. Ал облыстық кезеңде үздік үштіктен табылған Айсұлтанның жетекшісі Самал Еспанова шәкіртінің болашағынан үлкен үміт күтеді.Мұнан бөлек «Алтын қазына» көркем және сәндік қолданбалы өнер &nbsp;бойынша «Ұлттық нақыштағы интерьердің ерекше дизайн жобасы» номинациясы бойынша Әнуар Көшербай облыстан &nbsp;III &nbsp; орын иеленді. Жетекшісі А.Қанатбаева алдағы білім додаларында мұнан да жоғары нәтижеге қол жеткізетінін айтады.&nbsp;<blockquote>«Жалпы, мұндай білім додаларында топ жарып жүрген оқушыларымыз жетерлік. 5-9 &nbsp;сынып оқушылары арасында «Сыр өңірінің флорасы мен фау¬насы және экологиясы» ғылыми жоба конкурсына Мақпал Ғалымбекқызы қатысқан еді. аудандық кезеңде қарсылас шақ келтірмеген шәкіртіміз облыстан III орын иеленді. Ал 7-11 сынып оқушылары арасында «Жарқын болашақ» атты республикалық олимпиаданың аудандық кезеңінде 10 сынып оқушысы Мардан Ортай I орын иеленіп, облыстан сертификат алды. Жетекшісі – қазақ тілі әдебиеті пәні мұғалімі &nbsp;Қуанышбекұлы Рахат. «Алтын қазына» көркем және сәндік қолданбалы балалар шығармашылығының &nbsp;көрме байқауына «Ағаштан, тастан, саздан, (қыш, саз), сабан, тоқымадан шағын формадағы мүсіндер жасау» номинациясы бойынша 10 сынып оқушысы Алдажаров Тамерлан облыстан I орын иеленіп, республикалық кезеңге қатысып жатыр, қорытындысы 15 мамырда белгілі болады. Жетекшісі – технология пәні мұғалімі Сейтжанов Ғалымжан. Ал «Алтын қазына» көркем және сәндік қолданбалы өнер &nbsp;бойынша «Ұлттық ою-өрнегі бар халықтық киімдерінің үлгісін жасау» номинациясы бойынша 8 сынып оқушысы Айзере Мұхамеджан облыстан II орын иеленді», – дейді мектеп директоры А.Шыңғысқызы.&nbsp;</blockquote>Мектеп оқушылары пәндік олимпиадалардан бөлек ғылыми жобаларда да түрлі тақырыпта жұмыс жасап, жүлделі орындардан бой көрсетіп жүр. &nbsp;Мәселен, «Сыр жұрты» атты танымдық-пассионарлық жоба аясында «1925-1929 жылдары Қазақ АКСР &nbsp;атқару комитетінде жұмыс жасаған зиялы қауым өкілдері» тақырыбында мектеп оқушылары арасында өткен ғылыми жоба конкурсына 11 сынып оқушысы Әбдіразақ Зарина қатысып, облыстан II орын иеленген. Ал «Менің Отаным – Қазақстан» &nbsp;туристік экспедициялық жасақтары республикалық слетінің «Халық дәстүрлері, әдет-ғұрыптар мен мәдениеті бағыты бойынша Балжан Бекасылқызы ауданнан бірінші орын иеленіп, облысқа жолдама алған.&nbsp;Мектеп оқушылары салауатты өмір салтын ұстанып, спорт саласында да бірқатар жетістікке қол жеткізген. Бүгінде бұл салада тек мектептің ғана емес, ауданның, қалаберді аймақтың, еліміздің абыройын асқақтатып жүрген оқушылар білім алуда. Мәселен, мектеп оқушысы Альбина Смайл биыл &nbsp;самбодан ҚР чемпионатында 47 келі салмақ дәрежесінде 3 орын иеленсе, Кәусар Алматқызы белбеу күресінен ҚР чемпионатында 45 кг салмақ дәрежесінде 2 орынды жеңіп алған.&nbsp;Назым Қанибай &nbsp;да биыл 2010 жылы туған жасөспірім қыздар арасында өткен қол добынан ҚР чемпионатында 3 орынға ие болса, волейболдан ҚР чемпионатында 1 орыннан көрінді. Бұған дейін де жеңіс тұғырынан табылған Нұрай Мейрамбекқызы биыл Таеквондодан ересектер арасындағы облыс біріншілігінде 2 орын иеленді. Жүлделі орындардан бой көрсетіп жүрген оқушылар сапында Нұрай Тахир мен Мардан Ортай да бар. Мәселен, осыған дейін белбеу күресінен Нұрай Тахир &nbsp;ҚР чемпионатының қола жүлдегері болса, Мардан Ортай шахматтан облыстық, аудандық кезеңдерде бас жүлдені берген жоқ. 2022-2023 оқу жылында білім ошағында Болат Өтемұратов қоры атынан құрылған «Жас лидер Академиясы» жұмыс жасайды.Бүгінде «Көшбасшылық» факультативтік сабақтары, жобалар, тренингтер өткізіліп жатыр. Жалпы, жазар болсақ, мектеп ұжымының, ондағы шәкірттердің жетістігін бір мақаламен тауысу қиын. Бастысы, атқарылған жұмыс нәтижесін беріп жатыр. Бастауыш сынып оқушылары толықтай ыстық тамақпен тақматасыз етілген. Кабинеттер қажетті құрал-жабдықтармен жарақталған. Мектепте білім сапасын жақсартуда бірқатар жоба қолға алыныпты. Алда ұстаздар мен шәкірттер үшін бір белес бар, ол – ҰБТ. Ұстаздар шәкірттеріне сенім артады, ал оқушылар жоғары балл жинайтынына сенеді.

Жалағаштағы қайраткер атындағы мектептің жұмысы жүйелі

<a href="https://kyzylorda-news.kz/">Kyzylorda-news.kz.</a> Жиһаз жасау өндірісі жылдан-жылға дамып келеді. Осыдан он жыл бұрын халықтың басым көпшілігі қажетті жиһазды шетелден тапсырыс арқылы алдыратын. Тіпті отандық шеберлердің туындысына сенімсіздікпен қарайтын. Бүгінде түрлі қиындықты еңсерген шеберлер соңғы технология құралдарымен ел нарығын жаулап үлгерді. Сондай шебердің бірі – жас кәсіпкер Данияр Қожаниязов.Уақытша жұмысым- бүгінгі кәсібім&nbsp;– Негізгі мамандығым – мұнайшы. Оқуды аяқтаған соң жұмысқа орналасу үшін қажетті тест тапсырмасынан өтуім қажет болды. Ал ол тесттің нәтижесі 3 ай дегенде дайын болады екен. Содан не керек, бос жүргенім жарамас деп жұмыс іздестіре бастадым. Мұны естіген туыс ағам жиһаз жасайтын фабрикасына жұмысқа қабылдады. Жұмыстың маған ұнағаны соншалық, сол жерде күн-түн демей еңбек ете бастадым. Сөйтіп, алғаш мың теңге жалақыға жұмыс істеуді бастадым. Біртіндеп жалақымды көтерді. Ағамнан жиһаз жасаудың қыр-сырын меңгеріп, бүгінде өз алдыма жеке кәсіп аштым. Қарамағымда 6 адам жұмыс істейді. Бүгінде жеке тұрғындардан бөлек, мектеп, балабақшалардан, кеңселерден көлемді тапсырыс түседі. Тапсырыс берушінің талғамына қарай, жиһазды сапалы етіп жасағандықтан жергілікті өнімге сұраныс жоғары. Дегенмен бәсекенің жоғары екенін де жасырмаймын. Өйткені өңірімізде жиһаз құрастыратын кәсіпорындар саны артуда. Кәсіпкер болған соң, жаңашылдық іздеп, жаңа жобаларды жүзеге асырып, сұранысты арттыру маңызды. Осы бағытта біршама жұмыстар атқарылды. Бүгінде көп қабатты үйлерге арналған жиналмалы керуетке сұраныс артты. Өйткені қаламызда оны жасайтын мамандар жоқтың қасы. Сол себепті сұраныс қай жерде жоғары, сол бағытта дамуды алдыма мақсат етіп қойдым.Есепке жүйрік болу маңызды– Тапсырыстың барлығын өзім қабылдаймын. Біз өндіріске өте көп қаражат жұмсаймыз. Өкінішке қарай материалдық базамыз жоқ. Маңызды жабдықтар елде өндірілмейді, керек жабдықтарды көршілес Қытай мен Ресейден алдырамыз. Отандық компаниялардың өнімдерін де жиі тұтынамыз. Отандық заттардың қытайлық, ресейлік өнімнен сапа жағынан сәл ғана айырмашылығы бар. Болашақта біржола отандық нарыққа ойысуымыз мүмкін. Ол үшін халықты үйретіп алуға уақыт қажет. Негізінен ЛДСП, яғни ағаш жаңқалы плита, сондай-ақ МДФ – орташа тығыздықтағы ағаш талшықты плитадан жасалған материалдарды пайдаланамыз. Тапсырыс алғаннан кейін материалдың өлшемі нақты алынып, станокқа беріледі. Станок оны кесіп, жабыстырып, қайтадан бізге дайындап береді. Одан соң құрау жұмыстары басталады. Осы тұста айта кетерлігі, жаһаз жасаумен айналысам деген жастар есепке мықты болу қажет. Әрбір детальді есте сақтап, түстердің үйлесімділігін таба білу маңызды. Әр миллиметрге мән беру маңызды. Өйткені 3-4 миллиметрдің өзі жиһазды қисық етіп көрсетеді. Мысалы, үсті 2 метр, асты 2 метр 5 миллиметр болып қалса, ол бірден көзге түседі. Одан кейін, әрине шығармашылық қабілет те қажет. Ой-қиялың қаншалықты бай болса, соғұрлым көзтартар түрлі жиһаздарды жасайсың. Ал цехтың жұмысына келер болсақ, шеберхана соңғы үлгідегі құралдармен жабдықталған. Нәтижесінде әрбір кескін мен пішінді жарты миллиметрге дейінгі дәлдікте өлшеп, кесіп пішеді. Тек дұрыстап бағдарлама жасап енгізе білу қажет. Әр жұмысшының өзіндік міндеттері бар. Бірі өлшеуге шығады, бірі жиһазды сырлайды, құрағыштар бөлек жұмыс істейді. Шамамен бір жиһазға көлеміне қарай, 8-10 күндей уақыт кетеді. Алдағы мақсатымыз – сапа мен табыс көлемін арттыра түсу. Жарнамаға да жиі ақша бөлеміз. Өйткені жарнамасыз кәсіптің тұралап қалу қаупі жоғары. Instaqram парақшамызды да дамытуды жолға қойдық. Әр тапсырысты сәтті аяқтаған соң оқырмандарымызбен бөлісеміз. Нәтижесінде сұраныс артуда.&nbsp;

Жергілікті өнімге сұраныс жоғары

<a href="https://kyzylorda-news.kz/">Kyzylorda-news.kz.</a> Жас агроном жол бастады. Соңынан жалғыз аяқ жолға ілесе кеттік. Білімдар екені көрініп-ақ тұр. Әрбір тыңайтқыштың ерекшелігін, өсімдікке пайдасын айтып, аузы бір тыным таппады. Бәлки, ізденісі зор жан болды ғой деп топшылағаным рас. Жаңылыспаппын. Агрономия ғылымдарының магистрі екен. Жастайынан туған жерге кіндігін байлаған Рүстем Сматов еді бұл. «Шаған Жер» ЖШС агрономы. Бір сәт уақытын босқа жібермейтін маман.<blockquote>– Біз биыл 2872 гектар күріш ектік, – деді ол бас киімін қисайтып күнге қарап тұрып. – Дәл осы күнге 455 гектарын ордық. Бастырылған көлем – 220 гектар. Орташа өнім көлемі гектарына 52 центнерден келіп тұр. Ал тұқымды дәрілеп еккен жерлер өнімді жоғары беріп жатыр. Мұндай әдіспен 400 гектар жерге дән септік. Бұл әдіс күріштің тез өнуіне ықпал етіп, әлсіз кезінде инфекцияларға қарсы тұру күшін арттырады. Мұндай жерден 73, 60 центнерден өнім алып жатырмыз. Әлі 320 гектардай жер бар. Бұл әдістің тағы бір ерекшелігі тұқымды үнемдеуге көмектеседі.</blockquote>Рүстем Нұржанұлы осында келгелі тыңайтқышты үнемдеп себу идеясын қолға алды. Былайша айтқанда, шағын ұшақпен немесе делтапланмен екі мәрте сепкеннен тыңайтқыштың екі түрін араластырып, бір-ақ рет себеді. Біріншіден, уақыттан үнем. Екіншіден, жанар-жағармай да аз кетеді. Ал техниканы жалға алатындарға үлкен пайда.<blockquote>– Менің дипломдық диссертациямның тақырыбы да – тыңайтқышты үнемдеп себу идеясы. Нәтижесінде өнімділікке 5-7 центнерден қосып отыр. Былтыр 24 гектарға тәжірибе жасап едік, биыл барлығына сол әдіспен ектік. Бұл – биологиялық тыңайтқыштар: биодукс пен псевдобактерин. Бұлар өсімдіктің бойын өсіреді, төзімділігін арттырады. Қолайсыз жағдайларға бейімдейді. Оған қоса, ауруға төтеп беру қабілетін арттырады. Екеуі қатар жүреді. Биыл бұл тыңайтқыштарды барлық күрішке қолдандық, – дейді маман.</blockquote>Жер-жерде суды үнемдеу жайы көп қозғалды. Биыл «Шаған Жер» серіктестігі қашыртқыдағы суды насоспен кері айдап қайта қолданысқа жұмсады. Онысы біраз шаруашылыққа үлгі. Бұл су тапшылығы дегеннен гөрі, табиғаттың кәусар байлығын үнемдеу дегенге көбірек келеді.– Жаңашылдық деген ұғым ауыл шаруашылығына керек-ақ. Қазір агродрон деген техника бар. Тыңайтқышты да себесің, дәнді де себесің. Қай жерге қанша мөлшер керек екенін компьютер сканер арқылы анықтайды. Ақысы да әжептәуір. Бір данасы өзін 3-4 жылда ақтайды. Бұл егіс аумағы 400-500 гектар болатын шағын шаруашылықтарға тиімді. Біз 3 мың гектарға жуық күріш егеміз. Бізге оның бірнешеуін алу керек болады. Бізге тиімдісі – делтаплан мен ұшақ, – деді күріш сабағын қолына ұстаған күйі агроном.Айтпақшы, «Шаған Жер» серіктестігі шаруашылықта әртараптандыру бағытын ұстанған. Биыл егіннің қасына жылыжай кәсібін де қосады. Бір ай уақыттың бедерінде құрылысы толық аяқталады. Тұқымы, тыңайтқышы, топырағы да дайын. Тек егін бітіп, құрылыс жұмыстары аяқталса, іске кіріседі.<blockquote>– Бұл жылыжай бір ауылды қамтамасыз етеді. Күз бітіп қыс келгенде жаңа жұлынған қияр жеудің өзі – бір керемет. Көкөністің қат кезінде егіп шығарып, халыққа ұсынамыз. Баға тұрақтылығының тиімділігі жоғары. Бұл жылыжайдың ашылуына қатысарсыздар, сол кезде жаңа технологияларымыз бен әдіс-тәсілдерімізге қанық боласыздар, – дейді Р.Сматов.</blockquote>Рүстемнің жалын атқан көздері әлі де тынбай елге қызмет ететінін аңғартқандай. Ауыл тақырыбына ойысқанда жүзінде нұр ойнап, күнұзақ егіс даласында тер төккенін де ұмытады екен. Елге, туған жерге деген махаббат оның нұр ойнаған көзінен көрінді.<blockquote>– Менімен бірге оқығандар қазір белді қызметтерде жүр. Бірақ айырмашылығымыз, олар галстук тағады. Жалақылары да менің жалақымнан көп емес. Қазір еңбектің бағаланған дәурені. Менің өз ортамда абыройым бар, отбасымды асырауға жететін жалақым бар, тұрақты жұмысым бар. Алдымда мақсатым, асқақ арманым бар. Мен толыққанды тұлғамын, – деді елжанды азамат.</blockquote>Рүстем Нұржанұлы ауыл шаруашылығы саласын өркендетіп, биікке қадам басуына көп еңбек етіп келеді. Осы ауылдың маңдайалды механизаторы Нұржан Сматовтың тәрбиесін алған ұлы емес пе?! Бүгінде әкелі-балалы екеуі серіктестікке серпін сыйлап жүрген жандардың қатарында.Қоғалыкөлдегі алқапта 1000 гектардан аса күріш егілген. Бүгінде мұнда да Сыр салысына алғашқы орақ түсті. Десе де жұмыс енді басталған. Құлболды Ишан мазарының маңынан өте бере ауыл іргесінде жатқан Бидайкөл алқабы қарбаласқа толы. Берекелі маусымда шаруашылық жеріне көкөніс еккен ауыл еңбеккерлері де жексенбіде бір уақыт картоп-сәбізін қазып, қауын-қарбыз, асқабағын жинап жатыр. Соңғы уақытта жастар ауылға бетбұрыс жасап, ауылшаруашылығы саласына қомақты үлесін қосып жатыр. Солардың бірі – Жандос Есенбаев. Ол – сушы.<blockquote>– Мектеп бітірген соң көпшілігі арман қуып алысқа аттанып жатады. Бәріміз кетсек, ауылда кім қалады? Мен ауылда еңбек даласына аттанатын болып шештім. Осылайша білек сыбанып кірісіп кеткеніме де қазір он жылдан асыпты. Биылдан бастап күріш егіп, сушы жұмысына кірістім. Күріштің шығымы жаман емес. Орақ енді түсті. Жұмыс жаңа басталған соң пәлен центнерден беріп жатыр деп айту қиын. Бұйыртса, үдеден шығамыз деп отырмыз, – дейді Жандос Байронұлы.</blockquote>Осы алқапта Жамбыл Жаппаровтың басқаруымен Ораз Ермашев, Руслан Байдырахманов, Азамат Мотышев, Бақыт Көшербаев, Айдос Жақыпбеков тәрізді азаматтар жұмыс істейді. Олардың әрбірінің маңдай тері туған жердің төсінде тамып келеді. Елдің несібесін теретін науқанда бұлардан бөлек механизаторлардың еңбегі ерен. Олар таңның атысынан күннің батысына дейін, күннің батысынан таңның атысына дейін жұмыс істейді. Күндіз-түні гектар-гектар алқапты жауын-шашынға қалдырмай есен-аман жинап алу – олардың басты мақсаты.Қызылорда қаласының іргесінде Қарауылтөбе атты ауыл бар. Елге белгілі Ы.Жақаев атындағы «Қазақ күріш шаруашылығы ғылыми зерттеу институты» ЖШС тәжірибе алаңы осында орналасқан. Бүгінде олар күріштің «Янтарь», «Лидер» сорттарымен қатар жаңадан «Сыр сұлуы» сорты да егілген болатын. Бұған дейінгі қолданыстағы сорттар 110-120 күнде пісетін болса, жаңа сорт 90 күнде толық дайын болады.<blockquote>– Су тапшылығын жұртшылық күріш еккенімізбен байланыстырады. Бірақ күріштің өңір басты әрі экологиялық дақыл екенін естен шығарады. Күріш көлемін көп қысқартсақ, жер тұзданып кетеді. Ал тұзданған жерге басқа дақылдар шықпайды. Сондықтан ауыспалы егісті таңдаймыз. Күріш егілген жерге басқа дақылдар жақсы шығады. Біздің ойымызша, күріш алқабын 50 проценттен 25 процентке дейін қысқартуға болады. Оның орнына басқа дақылдарды егу мүмкіндігіміз бар. Бірақ суды үнемдеу ғылыми жобалардың негізімен ғана жасалуы керек, – дейді Ы.Жақаев атындағы «Қазақ күрішшаруашылығы ғылыми-зерттеу институты» ЖШС-ның бас директоры Бақытжан Дүйсембеков.</blockquote>Алқаптың төбесінде агродрон қалықтап жүр. Жаңашыл технологияны өндіріске енгізетін бұл серіктестікте шаруалар шығынға батпаудың жолын іздейді әрі өзгелерге ұсынады. Бұрын тұқым сепкіш құралдармен тым биіктен тыңайтқыш сепкенде сепкен дән желге ұшып әбігер болатын. Ал агродрон жер бауырлай ұшып, өнімнің үстіне жақындай себеді. Мұның тиімділігі жоғары.<blockquote>– Биыл қаладағы ауыл шаруашылық саласы тың идеяларға толы болды. Агродронмен қатар, «Сыр сұлуы» сортының өзі ерекше. Басқа сорттардан 15-20 күн ерте піседі. Сабағы аласа болғанмен, дәні ірі. Гектарына 50 центнерден кем болмайды деп отырмыз. Бұдан бөлек, қант құмайын егуді қолға алдық. Одан 100 тоннаның үстінде малазықтық дақылын алуға болады. Су тапшылығы болған жоқ, – дейді Қызылорда қалалық ауыл шаруашылығы бөлімінің басшысы Дәулетбек Абдрасулов.</blockquote>«...Тізілген тісі күріштен аппақ, Сырдан да жаны ерке еді...». Шәмшінің әнін ыңылдата айтып келемін. Жайқалған күріш – елдің ырысы мен берекесі, шаттығы мен мерекесі. Толқыны тулаған Сырдария жағасындағы алып шаһардың кіре берісіндегі «Сыр Ана» да күріштің символы. Иә, біздің ырысты, күрішті өңірде осы өнімді жоғары қоямыз. Мейліңіз, су тапшылығы мәселесі қылаң берген күннің өзінде біз мүлде бас тартпаймыз, тек көлемін азайтамыз. Өйткені Ақмешіт – ақ күріштің мекені... Сол шығар, маңдайдағы бақ бес елі.

Егіс басындағы ерлік

<a href="https://kyzylorda-news.kz/">Kyzylorda-news.kz.</a> Жұмыссыздық жайы, «табақтай» дипломы бола тұра қызмет таппай сенделу – күн тәртібіндегі өзекті мәселе. Халықты жұмыспен қамту мен әл-ауқатын арттыру мәселесі Мемлекет басшысының әркез бақылауында. Бұған дейін Президент «Жұмыспен қамтудың жол картасын» сынға алып «қағаз жүзінде ғана жұмыспен қамту» мәселесі шешім таппайынша, халықтың күнкөріс деңгейі артпайтынын айтқан болатын.Ресми ақпараттарға сүйенсек, Еуразиялық экономикалық одақ мемлекеттерінің халықты жұмыспен қамту қызметтерінде тіркелген жұмыс-сыздар саны 2023 жылдың бас кезіндегі есеп бойынша 884,2 мың адамды құраған. Бұл былтырғы көрсеткішпен салыстырғанда жұмыссыздар саны 10 пайызға азайғанын көрсетеді.Ал ұлттық статистика бюросының мәліметі бойынша Қазақстанда жұмыссыздық деңгейі биыл 4,9 пайызды құраған. Ал жалпы халықаралық еңбек ұйымының болжамынша, 2023 жылы жұмыссыздар саны 3 миллионға артып, 210 миллионға жуықтаған. Бұл көрсеткіш 2020-2021 жылдардағы «ко-ронадағдарыс» кезіндегі көрсеткіштен едәуір төмендеген. Пандемия кезінде белең алған жұмыссыздық мәселесі жайлап өз шешімін тауып келеді.Десек те, қазіргі таңда жұмыс табу – үлкен мәселе. Себебі жоғары оқу орнын бітірген қаншама дайын маман жұмыс таппай сенделіп жүр. Бұл жерде кінәні екі жақтан қарамасқа тағы болмайды. Ең алдымен тәжірибе жинақтау үшін қандай жұмыстан да қорқудың қажеті жоқ екенін айта кеткіміз келеді. «Білдей университет бітірген, жұмыс таппай жүр» дегенді жиі естіп жатамыз. Мәселе жоғары оқу орнын бітірсең, біреу алдыңнан жұмыс тауып, яки орнын босатып күтіп тұрады деген сөз емес. Қандай да жақсы жетістікке жету үшін үлкен тәжірибе алаңынан өту керек. «Ана жұмысты істемеймін, мына жұмысты істемеймін» деген өзіндік принциптерін арқалаған қаншама адам жұмыссыздар тізімін толықтырып жүр.Содан соң мамандықты дұрыс таңдау маңызды. Бұл ретте оқуға түсуді ниет еткен жас түлектің ішкі дүниесін тыңдай отырып, таңдау жасауына мүмкіндік беру керек. Себебі адамның өз жанымен сүйіп жасаған еңбегі ғана өнімді болмақ. Жаман жұмыс жоқ, дұрыс таңдалмаған мамандық болуы мүмкін.Ал Сырдария аудандағы ахуалға оралсақ, жұмыспен қамту, әлеуметтік бағдарламалар және азаматтық хал актілерін тіркеу саласында жоспарға сай бірқатар жұмыстар атқарылып келеді. 2023 жылдың 1 мамырындағы есеп бойынша аудандық жұмыспен қамту орталығына 1897 адам хабарласып, олардың 1295-і жұмыспен қамтудың белсенді шараларымен қамтылса, 139 адам тұрақты жұмыспен қамтылған.Сондай-ақ «Әлеуметтік жұмыс орындары» бойынша жыл соңына дейін 41 адамды жұмыспен қамту жоспарланса, қазірдің өзінде елу пайызы қамтылып, яғни 20 адам жұмысқа жолданған. Ал «Жастар тәжірибесі» бойынша 357 жас қамтылу көзделсе, қазіргі күні 26 жас маман өз тәжірибелерін жинақтауда. «Қоғамдық жұмыстарға» 2023 жылы 670 адамды тарту жоспарланса, бес айдың қорытындысы бойынша 752 адам қоғамдық жұмыстарға жолданған. Биылдыққа екі адам «Алғашқы жұмыс орындарына» жолданса, «Ұрпақтар сабақтастығы» бойынша 2023 жылға жоспарланған үш адамның біреуі қамтылған. «Күміс жас» бойынша жыл бойына 22 адамды қамту жоспарланғанымен, бүгінгі таңда 31 адам қамтылып отыр.Қазіргі таңда мемлекет кәсіпкерлікті дамытуға баса назар аударып келеді. Осы ретте түрлі бағдарламалар қолданысқа еніп, сол арқылы өз-өзін, кейін келе өзгелерді жұмыспен қамтып отырған кәсіпкерлер баршылық. Кәсіпкерлік, жаңа кәсіп түрлерін ашу бір жағынан халық тұрмысын оңтайландыру жолы болса, екіншіден жұмыссыздықпен күрестің ұтымды тәсілі. Осы ретте Сырдария ауданында «Жаңа бизнес идеяларды іске асыруға мемлекеттік гранттар беру» тетігі бойынша 2023 жылы 144 адамды қамту жоспарланса, бес айдағы көрсеткіш бойынша 36 адам грант иегері атанған. 2022 жылы «Бастау Бизнес» кәсіпкерлік негіздері курсын аудан бойынша 951 адам аяқтаса, 2023 жылдың қазіргі сәтіне дейін 288 адам өз сертификатына қол жеткізген. Сондай-ақ биылғы жоспар бойынша 800 тұрақты, 1342 уақытша – барлығы 2142 жаңа жұмыс орнын құру жоспарланса, бүгінгі таңда бекітілген жоспар 46,5 пайызға орындалған.Үкімет жұмыссыздықпен күрес мәселесін шешу мақсатында ауқымды жұмыс жүргізуде. Ол дегеніміз үйде жатқан кісіні орнынан тұрғызып, жұмысқа орналастырып береді дегенді білдірмейді. Үкімет халыққа «балық орнына қармақ беріп», ол үшін қажетті қаржы да бөлініп жатыр. Тек тиісті бағдарламалар межелі мақсатына жетіп, жауапты тұлғалар тиісті шараларды ұтымды үйлестірсе, бұл мәселе де түбегейлі өз шешімін таппақ. &nbsp;

Сырдарияда жұмыссыздық мәселесі қалай шешілуде?

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласы бойынша білім бөлімінің басшысы Ерлан Теңізбайұлы мен қалалық кәсіподақ комитетінің төрағасы Орынша Міржақыпқызы және қалалық білім бөлімінің мамандары Әли Мүсілімов атындағы №101 мектеп-лицей ұжымымен кезектен тыс педагогикалық кеңес өткізді.&nbsp;Жалпы 2022-2023 оқу жылында мектепте 94 сынып комплектісі бойынша ІІІ ауысымда 2307 оқушы білім алуда. Бүгінде мұнда 89 зерттеуші, 57 сарапшы, 51 модератор мұғалім оқушыларға білім беруде.&nbsp;Жиында мектеп директоры Айгүл Алтынбекқызы өткен жылы атқарылған жұмыстар мен мектептің даму жоспары туралы баяндама жасады.&nbsp;Мектеп-лицейдің жалпы білім беретін пәндер бойынша қалалық, облыстық олимпиададағы жетістіктері мен ғылыми жобалар байқауларындағы толағай табыстары, оқушылар мен ұстаздардың шығармашылық жетістіктері туралы республика, Халықаралық деңгейде мектеп абыройын асқақтатып жүрген шәкірттері туралы сөз етілді.Сонымен қатар педагогикалық кеңесте 2023-2024 оқу жылына арналған мұғалімдердің &nbsp;болжамды сағат жүктемесі мәселесі де талқыланды.&nbsp;Бүгінде Әли Мүсілімов атындағы №101 мектеп-лицейінде салынған 375 орындық бастауыш сыныпқа арналған құрылыс та аяқталуға жақын. Нәтижесінде оқушы тығыздығы, мектеп тарлығынан болған қиындық та шешімін тауып, жаңа, заманауи ғимаратқа кіргелі отыр. Бұл өз кезегінде сынып жетіспеушілік мәселесін шешетін болады.&nbsp;Ерлан Теңізбайұлының ұжымға барып, жұмыс барысымен, оқу ағынымен танысып, ашықтық пен жариялылықта кері байланыс орнатқаны алдағы уакытта да «бір жағадан бас, бір жеңнен қол» шығаратын ынтымақты ұжымның іргелі істері арқылы алғы шептен көрінуіне үлкен серпін бермек.Сонымен қатар жиында мұғалімдердің сағат жүктемесі мәселесі талқыланды. Бөлім басшысы мектеп ұстаздарымен кері байланыс жасап,ұсыныс-пікірлерін білдірді.Әли Мүсілімов атындағы №101 мектеп-лицей &nbsp;қосымша 375 орындық бастауыш сыныпқа арналған қосымша құрылыс жұмыстарының жүргізіліп жатқанын айта кету керек.<img src="https://knadmin.beoblood.kz/uploads/346459291_190038890620561_1148185905292847117_n_8c2b9f6f07.jpg" alt="346459291_190038890620561_1148185905292847117_n.jpg">

Қызылорда қалалық бөлімнің басшысы мектепте кезектен тыс педагогикалық кеңес өткізді

<a href="https://kyzylorda-news.kz/">Kyzylorda-news.kz.</a>&nbsp;11 мамыр күні күн райының бұзылуына байланысты бірнеше өңірде ескерту жарияланды, деп хабарлайды Қазгидромет.Еліміздің батысында тұман түсіп, найзағай жарқылдайды. Солтүстік өңірлерде жаңбыр жауады деп күтілуде.&nbsp;Ал Қызылорда облысында төтенше өрт қаупі сақталады.

11 мамырға арналған ауа райы болжамы

Kyzylorda-news.kz. Бүгін облыс әкімі Нұрлыбек Нәлібаевтың төрағалығымен өткен мәжілісте облыс аумағының санитарлық тазалық жағдайы талқыланды.Жиында аймақ басшысы облыс аумағындағы санитарлық тазалық мәселесі күн тәртібінен түспегенін атап өтті.<blockquote>«Облыс әкімі аппаратының инспекторлары апта сайын облыс аумағында мониторинг жұмыстарын жүргізуде. Қорытындысы бойынша маған ақпарат ұсынылып, қала және аудан әкімдеріне тиісті тапсырма беріліп келеді. Алайда, айтарлықтай нәтиже жоқ. Тексеріс жұмыстары жүргізілген елді мекендердің барлығының дерлік тазалығы көңілден шықпайды. Елді мекендердің іші мен айналасы қоқысқа толы, демалыс саябақтары қираған, ойын алаңдары тозған», - деді Нұрлыбек Машбекұлы.</blockquote>Облыс әкімі аппаратының басшысы Шахмардан Байманов өңірдегі елді мекендер мен мекеме, ұйымдардың сыртқы келбетi мен санитарлық жай-күйін баяндады. Тексерілген елді мекендердің барлығының санитарлық тазалығында, бірқатар мекеменің &nbsp;сыртқы қасбеттерiнде кемшіліктер анықталған.Жиын қорытындысымен аймақ басшысы қала, аудан әкімдеріне көрсетілген кемшіліктерді шұғыл түрде қалпына келтіруді тапсырды. Оның ішінде, жазғы лагерьлердің санитарлық жағдайын тез арада жақсарту, темір жол және автовокзалдың тазалығына ерекше назар аудару керектігін &nbsp;ескертті. Салынғанына аз уақыт болған нысандардың &nbsp;тозығы жетсе, мердігер мекемелер оларды жөндеп, қалпына келтіруi тиiс. Мұнан бөлек, облыс әкімі барлық басқарма, департамент және аумақтық инспекция басшыларына қарамағындағы мекемелердің жағдайына күнделікті бақылау жүргізуді міндеттеді.<img src="https://knadmin.beoblood.kz/uploads/IMG_20230510_WA_0008_9f3eb4ee9b.jpg" alt="IMG-20230510-WA0008.jpg">

Қызылорда: Тазалық мәселелері талқыланды

<a href="https://kyzylorda-news.kz/">Kyzylorda-news.kz.</a>&nbsp;Сыр еліндегі казақ және корей халықтары арасындағы ашық әрі сенімді достық қарым-қатынастың бекігеніне 80 жылдан астам уақыт өтті. Кеңес заманында Қызылорда облысына депортацияланған корейлердің біршама ұрпақтары қоныстанып, тату-тәтті өмір сүруде.&nbsp;Бүгін облыс әкімінің орынбасары Нұрымбет Сақтағанов Сыр өңіріне арнайы жұмыс сапарымен келген &nbsp;Корея мәдени орталығының бас хатшысы Джонг Гён Вон бастаған делегация мүшелерін қабылдап, аймақ үшін маңызды бірлескен жобаларды жүзеге асыру мәселелерін талқылады.&nbsp;<blockquote>«Облысымызда 29 кәріс ұлтының өкілі КСРО Социалистік Еңбек Ері атағын алған болатын. Бұл кәріс халқының өте еңбекқор екендігінің бір дәлелі. Біздің халқымызбен кәріс жұртының ұқсайтын бір қасиеті – үлкенді сыйлау. Кореяның азаттығы үшін күрескен бірегей тұлға, нағыз батыр Хон Бом Доны ерекше атап өткім келеді. Ол өмірінің соңғы жылдарын Сыр елінде өткізген болатын. Батырдың құрметіне Қызылорда қаласында мемориал тұрғызылып, оның есімімен қала көшесінің бірі аталды. 2021 жылы ҚР Президенті Қасым-Жомарт Кемелұлының Корея Республикасына барған іс-сапарында Кореяның ұлттық батыры Хон Бом До сүйегін тарихи Отанына қайтару рәсімі мақұлдасқан болатын. Бұл – Қазақстанның корей жұртына деген шынайы ықыласы мен зор құрметінің белгісі. Былтыр &nbsp;Кореяның 100 студенті Сыр елінде болып, &nbsp;Хон Бом До және Ге Бон У корей халқының батырларының тарихымен танысты. Бұл ортақ келісімнің дамуының айқын көрінісі. Мұнан өзге, алдағы уақытта Тэчжон қаласымен және Чоллабук-до провинциясымен дамыған ауыл шаруашылығы саласымен ынтымақтасу жоспарлануда. Бүгінгі таңда осы бағыттар бойынша жұмыстар жүргізілуде»,-деді Нұрымбет Аманұлы.</blockquote>Кездесу аясында мәртебелі меймандар өңірлік корей этномәдени бірлестігінің де атқарып жатқан ауқымды жұмысы, Корея және Қазақстан арасындағы үлкен дәрежедегі достықты, жан-жақты байланысты сөз етіп, бұл сапар ынтымақтастық бағытындағы екіжақты әріптестікті одан әрі нығайтуға мүмкіндік беретінін айтып, алғысын жеткізді.<img src="https://knadmin.beoblood.kz/uploads/345435399_966682264459983_3569089252390776124_n_e61e3f3067.jpg" alt="345435399_966682264459983_3569089252390776124_n.jpg">

Сыр елінде Кореямен әріптестік аясы кеңейе түспек

<a href="https://kyzylorda-news.kz/">Kyzylorda-news.kz.</a> Қазалы көлік-техникалық жоғары колледжі кітапханасында кітапханашы Сәуле Сүгірованың ұйымдастыруымен «Оқуға кұштар колледж» іс-шаралар жоспарына сәйкес «Тамыры терең, тарихы кенен – Қазалым» тақырыбында таным сағаты өтті.&nbsp;Бұл шараның мақсаты – студенттердің туған жерге, туған ауылға деген сүйіспеншілігін арттыру, туған ѳлкенің байлығы, алуан түрлі табиғаты туралы түсінік беру. Отанынды қорғай білуге, табиғатты аялауға, таланты ақындардың ѳлеңдері мен ата-бабаларымыздың ѳнеге етіп қалдырған даналық сѳздері арқылы студенттерді ұлтжандылыққа, атамекенін кѳздің қарашығындай сақтай білуге тәрбиелеу.<blockquote>«Сыр елінің экономикасы мен әлеуметтік дамуында Қазалы ауданының алар орны ерекше. Астарына үңілсең көптеген деректі кезіктіресіз. Ұлан байтақ қазақ даласында мұндай қастерлі орындар көп. Қазақылықтың қаймағы бұзылмаған Сыр бойында осындай жер-су атаулары жетерлік. Мәселен, өзіміз тұратын аудан туралы «Тарихы терең, тамыры кенен – Қазалы», «Қасиетті Қазалы», «Қазыналы Қазалы» деген тіркестерді жиі қолданамыз. Қазалы атауына байланысты мына бір болжам да аракідік айтылып қалады. Ол көне Жанкент шаһарына қатысты. Бұл қаланың тарихы жайлы айтылар әпсана аз емес. Солардың бірі – Бегім сұлу оқиғасы. Бегім – Жанкенттің билеушісі Санжардың әйелі. Көрікті жарын қызғанған Санжар оның бір қолы мен бұрымын қырқып тастайды. Бегім сұлудың ақтығы дәлелденіп, қолы мен бұрымы бұрынғы қалпына қайта келген екен. Қызының жазықсыз зәбір көргеніне көзі жеткен Қарабура әулие күйеу баласы Санжарға налиды. Жазықсыз жабылған жаладан әйеліне опасыздық жасаған ханның қаласына жыландар шабуыл жасайды. Қайғылы оқиға салдарынан қаза болғандар көп болған екен. Сондықтан бұл аймақ Қазалы аталып кеткен деседі», – деп кітапханашы Сәуле Сүгірова сутденттерге туған өлке тарихынан сыр шертетін бірнеше деректерді тілге тиек етті.&nbsp;</blockquote>Таным сағаты кезінде студенттер арнайы жасақталған көрмені тамашалап,жергілікті ақын-жазушылардың кітаптарымен танысты. Қойнауы құтқа оранған қасиетті топырақ туралы көнекөздерден қалған естелік сөздерді тыңдады.&nbsp;

Туған жерді дәріптеуге арналған таным сағаты

Kyzylorda-news.kz. Бүгін облыс әкімі Нұрлыбек Нәлібаевтың төрағалығымен өткен актив отырысында кадрлық өзгерістер хабарланды.&nbsp;2015 жылдан бастап ҚР Стратегиялық жоспарлау және реформалар агенттігі Ұлттық статистика бюросының Қызылорда облысы бойынша департаментінің басшысы қызметін атқарып келген Мариям Баекеева ротация тәртібімен Ұлттық статистика бюросы Ақпараттық технологиялар департаментінің Ақпараттық жүйелерді үйлестіру және интеграциялау басқармасының басшысы қызметіне тағайындалды.&nbsp; Аймақ басшысы Мариям Жәдігерқызын құттықтап, жаңа қызметінде сәттілік тіледі.<blockquote>«Мариям Жәдігерқызы – статистика саласында мол тәжірибе жинап, қызметте сатылап өскен өз ісінің майталман маманы ретінде Сыр өңіріне белгілі. &nbsp;Қызылорда облысының статистика басқармасында қарапайым экономистен бастап, жоғары басшылық лауазымға дейінгі жолдан өтті. Өңірдің мемлекеттік статистикасын дамыту мен жетілдіру ісіне елеулі үлес қосқан білікті кадрлардың бірі. Өзіне сеніп тапсырылған жұмысты абыроймен атқарып, тұрақтылығы мен тиянақтылығының арқасында өз саласында жемісті қызмет атқаруда. Қызметті үйлестірумен қатар жауапты салада шәкірт тәрбиелеу ісімен орны қалыптасқан бірегей кадр. Статистика органдарында 33 жылдан аса қызмет атқарған кезеңде қажымай еңбек етіп, білікті кадрлар тәрбиелеуге айтарлықтай үлес қосты», - деді Нұрлыбек Машбекұлы.</blockquote>Статистика саласында атқарған еңбегі үшін Мариям Жәдігерқызы Сыр жұртшылығы атынан Қызылорда облысының Құрмет грамотасымен марапатталды.Актив отырысында облыстық мәслихат төрағасы Наурызбай Байқадамов Мариям Баекееваға жаңа қызметте сәттілік тіледі. Өз кезегінде, Мариям Жәдігерқызы әріптестеріне көрсетілген құрмет үшін ризашылығын білдірді.Мариям Жәдігерқызы аймақтағы статистикалық деректерді қалыптастырумен қатар тіркелімдерді цифрландыруға бағытталған тың жобалардың жүзеге асырылуына дәнекер болды. Оның бастамасымен департамент аумақтық статистика органдары арасында бірінші болып есептерді «Бір терезе» қағидаты бойынша қабылдауға көшті. Мемлекеттік органдардың қызметін бюрократиядан арылтуға бағытталған ауқымды шараларды атқарды. &nbsp;2010 және 2016 жылдары еліміздің әлеуметтік-экономикалық жағдайын анықтауға бағытталған ЮНИСЕФ-тің «Мульти-индикаторлық класттерлік зерттеу» халықаралық жобалары өткізілді. Жоба аясында еліміз үшін маңызды ұлттық мақсаттар мен жаһандық міндеттерді орындауға бағытталған деректер жинақталды. &nbsp;Шаруашылықтардың есепке алу кітаптары электрондық форматқа көшіріліп, нақты статистикалық деректерге онлайн қолжетімділік артты. 2009 және 2021 жылдары өткізілген ел тарихындағы елеулі оқиғалардың бірі - Ұлттық халық санағы өңірімізде сапалы және жоғары деңгейде өткізіліп, сәтті жүзеге асты. Өңірдегі статистика департаментінде атқарған көп жылғы жемісті еңбегі үшін Мариям Жәдігерқызы «Ерен еңбегі үшін» медалі (2018 ж.) және «Статистика үздігі» төсбелгісімен (2013 ж.) марапатталды.<img src="https://knadmin.beoblood.kz/uploads/IMG_20230510_WA_0001_9ab356f120.jpg" alt="IMG-20230510-WA0001.jpg"><img src="https://knadmin.beoblood.kz/uploads/IMG_20230510_WA_0003_e996e2affd.jpg" alt="IMG-20230510-WA0003.jpg">

Әріптестері Мариям Баекееваны жаңа қызметке шығарып салды

<a href="https://kyzylorda-news.kz/">Kyzylorda-news.kz.</a> Дәрігер мамандығының өзге салаға қарағанда рөлі басым. Алдымен сол жолды таңдау үшін үлкен жүрек керек. Ақ халатты абзал жан адам өмірінің арашасы екенін білуі әрі түйсінуі тағы бар. &nbsp;Иә, дәрігер &nbsp;халыққа қызмет етуге өмірін арнайтын абзал мамандық. Ауыртпалық жүгін қорықпай арқалаған &nbsp;көпбейінді облыстық балалар ауруханасының неонатологы &nbsp;Мереке Алтынбекова 5 жылдан бері науқастар жанына араша болуда. Күтімді қажет ететін нәрестерлерді айықтырып, ата-анасына аман-сау қауыштыратын тәжірибелі маманмен әңгімеліскен едік.– Мереке, өкінішке қарай қазір белгілі бір ақаумен дүниеге келетін сәбилердің саны күрт көбейді. Статистиканың өзі мұны растап тұр. Мұның алдын алу үшін жүкті әйелдер қандай шаралар атқаруы тиіс?– Жүкті әйел ең бірінші жергілікті емхана есебінде тіркелу қажет. Егер анасында қауіп тобы бар болса, қосымша бақылау есебінде тұрған жөн. Дені сау ұрпақ болуы үшін жүктілік мерзімінде дұрыс күтіну, рационалды құнарлы тамақтану, күйзеліске туспеу қажет.– Түрлі аурумен немесе күтімді қажет ететін сәбилермен жұмыс істеу қаншалықты жауапкершілікті жүктейді?– Дүниеге сәби келіп, халықтың саны көбейгені қуаныш. Бірақ өкінішке қарай нәрестелердің кейбірі ақаумен туылады. Мұндай жағдайда тек ата-аналарға ғана қиындық тумайды, біз үшін де үлкен жауапкершілік жүгі артылады. Сондықтан 24/7 режимі бойынша қызмет көрсетіп, артылған сенімді ақтауға тырысамыз.– Науқастың диагнозын дөп басып анықтау медицина мамандары үшін маңызды рөл атқарады. Десек те кей сәтте қойылған диагноз дұрыс болмай, ауру асқынып жатады. Диагнозға байланысты күтпеген кезеңдер орын алды ма?– Енді медицина болған соң түрлі жайттар орын алады. Бір нәрестенің өзінде қосымша көптеген диагноз кездесіп жатады. Бөлімшеге түскен әрбір науқасқа толыққанды зерттеу жұмыстары жүргізіледі. Біздің деңгейден аса күрделі асқынулар шыққан жағдайда республика деңгейіндегі мамандармен кеңес жүргізіп, қосымша еміне нұсқаулар аламыз.– Жаңа туған нәрестенің дені төспен емуге қабілетсіз болуда. Бұл мәселеден қалай айығуға болады?– Мұндай мәселе сәбилердің арасында белең алды. Басым көпшілігі мерзімде туған нәрестелерде кездеседі. Себебі шала туған нәресте ағзасы толыққанды дамып үлгермейді. Бұндай нәрестелерде жұтыну рефлекстері өте төмен болғандықтан, асқазан зонды арқылы ана сүтін қажетті мөлшерде беріп, уақыт өте сору ему рефлекстері қалыптаса бастаған жағдайда ана омырауына беру жұмыстары жүргізіледі.– Бүгінде жаңа туған сәбилер арасында қандай аурулар белең алды?– Жаңа туылған нәрестелер &nbsp;көптеген қосымша ақаумен туылып жатыр. Ол туа пайда болған ақаулар, яғни ондай аурулар ұрық болып қалыптасу кезеңінде пайда болады.–“Сары уыз өзегі &nbsp;толық облитерацияланбауы” диагнозы біздің өңірде алғаш рет тіркеліпті. Науқасты емдеп шығу қиынға соқпады ма?– Жұмыс барысында бұл диагноз бірінші рет кездесті. Алғаш рет кездесуіне байланысты абдырап қалғанымыз жасырын емес. Сондықтан науқастың әрбір зерттеу жұмыстары тыңғылықты жүргізілді. Мықты мамандар Болат Маханбетияров, Серік Нүсіпқожаев, Мағжан Абытов, анестезиолог Әбілғазы Жұмасейтұлы, неонатолог-реаниматолог Ольга Хегай сынды дәрігерлермен бірге &nbsp;барлығы сәтті өтті.– Неонатологтар біздің өңірде жеткілікті деп ойлайсыз ба?– Қазір еліміз бойынша медицина мамандарының жетіспеуі үлкен мәселенің біріне айналып отыр. Бұл халыққа көрсетілетін қызмет сапасына да әсер ететіні белгілі. Неонатолог маманы мерзімінен ерте, түрлі ақаумен туылған нәрестелермен айналысатын маман болғандықтан сұраныс жоғары. Біздің өңірде бұл маман жеткіліксіз деп ойлаймын, себебі медицинаны 9 жыл оқыған адам сол үлкен қалалардың бірінде қалғанды жөн санайды. Біздің өңірде де маман тарту, оны тұрақтандыру бағытында жұмыстар жасалып жатыр. Дегенмен де медицинаның жыл сайын дамып келе жатқан сала екенін ұмытпаған жөн. Сондықтан да ондағы кадр даярлауға, аймақтардың дәрігерлермен қамтылуына облыс басшылығы жете мән беруі керек. Әйтпесе, маман тапшылығы үлкен мәселе болып қала береді.– Маманның жұмыста жетілуі үшін шеберлік дәрістерінің рөлі басым. Осы салада қандай білікті дәрігерлерден кеңес аласыз?– Әрине, алға жылжу үшін тәжірибемізді толықтырып жатамыз. Көпбейінді балалар ауруханасында білікті мамандар көп. Соның бірін айтайын, неонатальды хирургия және интенсивті терапия бөлімінің меңгерушісі, білікті неонатолог Ольга Хегайдың ақыл-кеңестерін жиі тыңдаймын.– Жұмысыңыздың шырайлы сәтін қалай бағалайсыз?– Жұмыс барысында түрлі жағдаймен бетпе-бет келуге тура келеді. Қиын сәттерде күрделі жағдайдан шыға білу – тапқырлықтың белгісі. Әйтпесе сенімсіздіктің кесірінен шалыс басуың бек мүмкін. Сол себепті сабырлы шешім қабылдай білудің маңызы зор. Әрине, еңбек жолында есте қаларлық сәттер көп. Алайда, мен үшін сәбилердің өмірін арашалап қалуға жанталасқан оқиға дер едім. Біздің жұмыс науқастың жанын қинаған азапты жеңуден тұрады. Бойыңдағы қайсар мінез – дәрігердің басты қаруы. Яғни алдында қандай қиын іс күтіп тұрса да, бәріне бірдей төтеп беруге дайын болуымыз керек. Сондай-ақ адам өмірінің арашашысы шешімді тез қабылдап, жауапкершіліктен жалтармауы керек. Өйткені қай жерің ауырса, жаның сол жерде. Ақ халатты абзал жандар да шаршайды. Бірақ артқан үмітті ақтап, науқас сәбилерді аман-есен ата анасына қауыштырған шаршауды басады.– Әңгімеңізге рақмет.

Қазақстан және Қызылорда облысының жаңалықтары