<a href="https://kyzylorda-news.kz/">Kyzylorda-news.kz</a> Ата Заңның жаңа мәтініндегі жаңа ұстанымдар мен нормалар басқа елдерге үлгі де бағдар да болатын жаңашылдықтар. Бұл туралы Конституциялық реформа жөніндегі комиссияның тоғызыншы отырысында Мемлекеттік&nbsp;кеңесшіЕрлан Қарин мәлімдеді.Оның айтуынша, кейбір азаматтар әлеуметтік желі арқылы «Әуреге түскенше, өзге елдің Конституциясын көшіріп ала салу керек қой» деген де пікірлерін жолдап жатыр.<blockquote>«Соңғы уақытта цифрландыру, цифрлық технология секілді мүлде жаңа бағыттардың дамып, өркендеуіне байланысты көптеген мемлекеттер тиісті нормаларды конституциялық-құқықтық жүйеге енгізуді ойластыруда. Біздің ел алғашқылардың бірі болып цифрлық деректерді қорғау нормасын&nbsp;Конституцияға енгізіп отыр. Яғни, жаңа мәтіндегі жаңа ұстанымдар мен нормалар басқа елдерге үлгі де бағдар да бола алады», – деп атап өтті Ерлан Қарин.</blockquote>Мемлекеттік&nbsp;кеңесші Конституцияның 21-бабының 1 және 2 тармақтарында&nbsp;жеке өмірге қол сұқпау құқығына, жеке және отбасы құпиясының болу құқығына,&nbsp;дербес деректерді заңсыз жинаудан, өңдеуден және пайдаланудан қорғау құқығына заңмен кепілдік берілетінін айтты.<blockquote>«Яғни, цифрлық кеңістікте жеке деректерді қорғауды&nbsp;адам құқықтарын қорғаудың жаңа өлшемі ретінде&nbsp;тұңғыш рет Конституцияда белгілеп отырған елдердің біріміз. Бұл&nbsp;– жаңа&nbsp;Конституцияның&nbsp;болашаққа бағытталғандығының&nbsp;тағы бір&nbsp;дәлелі», – деп нақтылап өтті ол.</blockquote>Ерлан Қариннің&nbsp;айтуынша,&nbsp;аймақтың құқықтық жүйесіндегі үлкен жаңашылдық –&nbsp;әйгілі&nbsp;Миранда ережесінің конституциялық деңгейде бекітілуі. Бұл өзгеріс азаматтардың құқықтық тұрғыдан қорғалуын арттырып, құқық қорғау органдарының қызметіне жаңа талаптар қояды.Сонымен қатар, жаңа саяси институттардың енгізілуі – Орталық Азия аймағы үшін ғана емес, жалпы айналамыздағы үлкен кеңістік үшін де саяси жаңашылдық болып саналады. Ерлан Қарин бұл тұрғыда бір палаталы парламент, вице-президент институты, «Халық кеңесі» жоғары консультативтік органы, Конституциялық соттың енгізілуі – көптеген елдердің саяси жүйесімен салыстырғанда, үлкен саяси инновациялық қадам екенін атап өтті.<blockquote>«Президент ұсынған конституциялық өзгерістерді тек қана жалпыхалықтық референдум арқылы жүзеге асыру бастамасы да – біздің аймақ үшін маңызды шешімдердің бірі. Көптеген лауазымды тұлғалардың қызметіне қатысты бір реттік мерзім белгілеу де – Ата Заң жобасындағы маңызды жаңашылдықтың бірі»,&nbsp;– деп&nbsp;түсіндірдіМемлекеттік Кеңесші.</blockquote>Сондай-ақ,&nbsp;Мемлекеттік Кеңесші атап өткендей, әйелдер&nbsp;мен&nbsp;балалардың құқығын қорғау, қоршаған ортаны – табиғатты аялау, волонтерлік, ата-аналарға жауапкершілік секілді қоғамдық дамуда пайда болып отырған жаңа талаптар, құндылықтар жаңа Ата Заңда қамтылды. Бұл да жаңа Конституцияның қоғамның қазіргі жағдайына, даму деңгейіне сәйкес екенін көрсетеді.<blockquote>«Жаңа&nbsp;Ата Заңдағы&nbsp;бірқатар&nbsp;саяси және институционалдық жаңашылдықтар&nbsp;аймақтағы және&nbsp;әлемдік конституциялық тәжірибеде сирек кездеседі.&nbsp;Түйіндеп айтқанда, басқа елдердің Конституциясын көшіру, қайталау – біздің жолымыз емес. Керісінше, келешекте Қазақстан жаңа Конституция арқылы өзге елдерге&nbsp;өзіндік үлгі, бағдар&nbsp;болмақ» – деп қорытындылады сөзін Ерлан Қарин.</blockquote>

Еліміз алғашқылардың бірі болып цифрлық деректерді қорғау нормасын Ата Заңға енгізіп отыр – Ерлан Қарин

<a href="https://kyzylorda-news.kz/">Kyzylorda-news.kz</a> Қызылорда облысының цифрлық технологиялар басқармасына қарасты Жедел әрекет ету орталығы мен «ROBOTECH» ЖШС арасында Қызылорда қаласы аумағындағы лифт шаруашылығына қатысты мәселелерді жедел әрі тиімді шешу мақсатында ынтымақтастық туралы меморандумға қол қойылды.Меморандум аясында тараптар лифт жабдықтарына техникалық қызмет көрсету, ақауларды жедел анықтау және жою, тұрғындардың қауіпсіздігін қамтамасыз ету, сондай-ақ лифт шаруашылығын цифрлық бақылау және мониторинг жүйелері арқылы жетілдіру бағытында бірлескен жұмыстар жүргізуге келісті.Аталған бастама лифттердің үздіксіз әрі қауіпсіз жұмысын қамтамасыз етіп, тұрғындарға көрсетілетін қызмет сапасын арттыруға мүмкіндік береді. Ендігі кезекте көпқабатты тұрғын үйлердегі лифт жұмысына қатысты ақаулар, істен шығу, қауіпсіздікке байланысты күмәнді жағдайлар немесе қызмет көрсету сапасы жөніндегі мәселелер туындаған жағдайда қала тұрғындары 📞 109 – Бірыңғай байланыс орталығына хабарласа алады.

Қызылорда: Лифт бұзылса, қайда хабарлау керек?

<a href="https://kyzylorda-news.kz/">Kyzylorda-news.kz</a> &nbsp;Qazaqstan ұлттық арнасының тележүргізушісі, Конституциялық комиссия мүшесі&nbsp;Ерқанат Көпжасарұлы&nbsp;жаңа Конституция жобасындағы сөз еркіндігі туралы баптардың маңызы&nbsp;жөнінде пікір білдірді.Комиссия мүшесі&nbsp;Ата&nbsp;заң жобасындағы&nbsp;сөз бостандығы мен ғылыми-техникалық, көркем шығармашылық еркіндігіне қатысты баптарға тоқталды.<blockquote>«Еркін ойсыз ел көсегесі көгермейді, ашық пікір алмасусыз алға баспайды.&nbsp;Жаңа жобада сөз бостандығын шектеуге қатысты норма жоқ. Басты мақсат – жауапкершілік жүгін күшейту, арандатушылық әрекеттердің алдын алу.&nbsp;Сондай-ақ, жобада ақпаратты еркін алу мен тарату құқығының айқын бекітілуі – өркениетке ұмтылған жұртқа лайық батыл қадам»,&nbsp;–&nbsp;деді журналист&nbsp;Конституциялық комиссияның тоғызыншы отырысында.</blockquote>Оның айтуынша, ақпаратқа қол жеткізу&nbsp;құқығының&nbsp;нақты тетіктермен бекітілуі баспасөздің демін ашып, мемлекеттік органдардың жауапкершілігін арттырады.<blockquote>«Ең маңыздысы,&nbsp;еркіндік пен жауапкершіліктің бір арнаға тоғысуы. Адамның ар-намысы мен абыройын биік қою, ұлттық құндылықтарды қадірлеу – еркіндікті желбуаздыққа айналдырмаудың, оны ел мүддесіне қызмет еткізудің парасатты қадамы.&nbsp;Мұндағы еркіндік&nbsp;–&nbsp;жүгенсіздік емес, мемлекеттік санаға негізделген жауапкершілік.&nbsp;Осы заңнамалық ұстаным пікір алуандығының&nbsp;тынысынашып, салауатты сынның өрісін кеңейтеді.&nbsp;Ел бірлігіне сызат түсіретін жөнсіздікке тосқауыл қояды»,&nbsp;– деп толықтырды Ерқанат&nbsp;Көпжасарұлы.</blockquote>Сөз соңында&nbsp;ол&nbsp;ұсынылып отырған конституциялық өзгерістер журналистиканың басты миссиясын&nbsp;–&nbsp;қоғам мен билік арасындағы алтын көпір болуды, ақиқатты айна-қатесіз жеткізуді, сындарлы сұхбат мәдениетін қалыптастыруды жүзеге асыруға мүмкіндік беретінін атап өтті.Фото: egemen.kz

Жаңа Конституцияда еркіндік пен жауапкершілік бір арнаға тоғысады – белгілі журналист

<a href="https://kyzylorda-news.kz/">Kyzylorda-news.kz</a> &nbsp;Өңірде жұқпалы аурулардың алдын алу бағытында кешенді жұмыстар жүргізілуде. Соның ішінде тұрғындарды вакцинациялау, медицина қызметкерлерінің біліктілігін арттыру және халық арасында ақпараттық-түсіндіру шаралары тұрақты түрде ұйымдастырылып келеді. Бұл бастамалар қоғамдық денсаулықты нығайтуға, сондай-ақ вакцинамен басқарылатын инфекциялық аурулардың таралуының алдын алуға бағытталған.&nbsp;Осы ретте сала мамандары профилактикалық екпелердің маңыздылығына ерекше назар аударып отыр. Қызылшаға қарсы күрес турасында Қызылорда облысының санитариялық - эпидемиологиялық бақылау департаменті басшысының орынбасары Алия Абдикаимова және облыстық денсаулық сақтау басқармасы басшысының орынбасары Мая Мирзанова мен облыстық жұқпалы аурулар ауруханасының бас дәрігерінің орынбасары Шарипа Алиева маңызды мәліметтерімен бөлісті.<blockquote>- Біздің басқарма тарапынан жасалып жатқан бастамалардың бірі - ҚР Денсаулық сақтау министрлігімен бекітілген дәрігерлермен бірлесіп жұмыс жүргізу. Сол дәрігерлермен біз арнайы онлайн және оффлайн семинарлар өткізіп, өңірдегі медицина қызметкерлерінің біліктілігін арттыруға ерекше көңіл бөліп келеміз. Бұл семинарлар барысында ана мен бала денсаулығын сақтау, ерте диагностика, асқынулардың алдын алу және заманауи емдеу әдістері кеңінен талқыланады. Сонымен қатар, тәжірибе алмасу алаңдары ұйымдастырылып, нақты клиникалық жағдайлар бойынша пікірлер ортаға салынады. Аталған жұмыстардың барлығы өңірдегі медициналық қызмет сапасын жақсартуға бағытталған,- деді Алия Муталипқызы.</blockquote><img src="https://knadmin.beoblood.kz/uploads/Aliya_706f79c19c.jpg" alt="Алия.jpg">&nbsp;Елімізде тұрғындарды вакцинациялау Ұлттық егу күнтізбесіне сәйкес 21 инфекциялық ауруға қарсы тегін жүргізіледі.<blockquote>– Соңғы 15 жылда вакцинамен басқарылатын бірқатар жұқпалы аурулар тіркелмеген. 2025 жылдың қорытындысы бойынша облыста 16 жасқа дейінгі балалар мен жасөспірімдерді профилактикалық екпемен қамту көрсеткіші 96,8 пайызды құрады. Дегенмен екпеден бас тартушылар азаймай отыр. Мамандардың айтуынша, салауатты өмір салты иммунитетті күшейткенімен, инфекциядан толық қорғай алмайды. Әсіресе қызылшаға қарсы екпе алмаған адамдар үшін жұқтыру қаупі жоғары. Осыған байланысты санитариялық-эпидемиологиялық бақылау департаменті тұрғындарға егу мәртебесін тексеріп, вакцинация алмаған жағдайда емханаларға жүгінуге кеңес береді,- деді Мая Миранбайқызы.</blockquote><img src="https://knadmin.beoblood.kz/uploads/Maya_95d7172714.jpg" alt="Мая.jpg">&nbsp;Вакцинация баланың ағзасына аурумен күресуді үйретеді.<blockquote>– Яғни, бала ауырмай тұрып, иммунитет қалыптастырады. Бұл - ғылымның үлкен жетістігі. Егілген бала қызылшамен ауырса да, ауру жеңіл өтеді немесе мүлде жұқпайды. Вакцинация салдырған адамда реакция болады. Қызуы көтеріліп, жайсыздық болуы мүмкін. Бірақ дұрыс бағытта. Ата-ана ретінде біз баламызды қалай тамақтандырамыз, қалай киіндіреміз - бәріне мән береміз. Сол сияқты вакцинация да баланың денсаулығына жасалған ең маңызды қамқорлық деп білемін,- деді Шарипа Жақсылыққызы.</blockquote><img src="https://knadmin.beoblood.kz/uploads/Sharipa_7028eff869.jpg" alt="Шарипа.jpg">Фото: freepik.com

Қызылшаға қарсы күрес: өңірде вакцинация жұмыстары жүргізілуде

<a href="https://kyzylorda-news.kz/">Kyzylorda-news.kz</a> 2025 жылы Қазақстанның көлік саласы еліміздің транзиттік-логистикалық әлеуетін нығайтуға, инфрақұрылымды жаңғыртуға және тасымалдау тиімділігін арттыруға бағытталған жүйелі дамуды жалғастырды. Бұл бағыттар Мемлекет басшысы Қасым-Жомарт Тоқаевтың тапсырмаларына сәйкес жүзеге асырылды.Қазақстан «Шығыс – Батыс», «Солтүстік – Оңтүстік» халықаралық көлік дәліздерін және Транскаспий халықаралық көлік бағытын дамыту арқылы Еуразия құрлық көпірінің рөлін тұрақты түрде арттыра отырып, Еуропа мен Азия арасындағы негізгі дәнекерге айналып отыр. Инфрақұрылымдық жобаларды жүзеге асыру, жылжымалы құрамды жаңарту, көлікті бақылауда цифрлық шешімдерді енгізу және халықаралық бағыттар желісін кеңейту еліміздің өңірдегі негізгі транзиттік хабтарының бірі ретінде позициясын нығайтуға ықпал етті.2025 жылдың қорытындысы бойынша транзиттік тасымалдау көлемі 36,9 млн тоннаны құрады, бұл 2024 жылдың сәйкес кезеңі көрсеткішінен 6,6%-ға артық (34,6 млн тонна).&nbsp;Транзит көлемінің артуы – автомобиль, теміржол, әуе және су көлігін кешенді дамытудың, сондай-ақ логистика саласындағы халықаралық ынтымақтастықты кеңейтуге бағытталған дәйекті жұмыстың нәтижесі.<img src="https://knadmin.beoblood.kz/uploads/1_kz_23_672609c6fa.png" alt="1-kz-23.png">Автожолдар мен жол инфрақұрылымын дамыту2025 жылдың басты жетістіктерінің бірі – автожол желісінің кең ауқымды дамуы. Құрылыс және жөндеу жұмыстары рекордтық 13 мың шақырым автожолды қамтыды.Нәтижесінде республикалық жолдардың 94%-ы техникалық нормативті жағдайда.Ішкі шекарадағы өткізу пункттерін модернизациялау жұмыстары жүргізілуде. 2027 жылдың соңына дейін 37 өткізу пунктін аяқтау жоспарлануда.&nbsp;Жол саласын цифрландыру ерекше назарда. Мемлекет басшысының тапсырмасы бойынша e-Joldar шеңберінде жолдардың цифрлық паспорттары қалыптастырылуда, бұл жолдардың техникалық жай-күйін, қозғалыс қарқындылығын және пайдалану параметрлерін орталықтандырылған түрде есепке алуды қамтамасыз етеді.&nbsp;Жыл сайын жасанды интеллект технологияларын қолдана отырып жол диагностикасы жүргізіледі.&nbsp;Жол төсемін сақтау үшін 220 бірлікке дейін автоматтандырылған өлшеу стансаларын орнату жалғасуда. Қазіргі таңда оның 71 бірлігі іске қосылған.Авиация: маршрут желісін кеңейту және инфрақұрылымға инвестиция тарту2025 жылы азаматтық авиацияның дамуы әуе паркін жаңарту, халықаралық бағыттарды кеңейту және әуежай инфрақұрылымына инвестициялар тартумен қатар жүрді. Әуе кемелері паркі 109 бірлікке жетті, оның ішінде 8 жаңа Airbus A320 ұшағы және 4 Boeing 737 MAX 8 ұшағы бар. &nbsp;<img src="https://knadmin.beoblood.kz/uploads/2_kz_5_1_decaf76dd5.png" alt="2-kz-5-1.png">Қазақстан 2025 жылдың желтоқсан айындағы мәліметтер бойынша аптасына жалпы жиілігі 626 рейсті құрайтын 135 халықаралық бағыт бойынша 30 елмен әуе қатынасы іске қосылды. Халықаралық маршрут желісі ТМД, Еуропа, Таяу Шығыс, Азия және Оңтүстік-Шығыс Азия елдерін қамтиды.Сала бойынша бүгінде 25 мың адам жұмыс орындарымен қамтылды, бұл оның тұрақты жұмысын қолдауға және негізгі операциялық процестердің үздіксіз орындалуын қамтамасыз етуге көмектеседі.Өткен жылы Арқалық әуежайын қалпына келтіру жұмыстары басталды, Алматы әуежайын дамытудың бас жоспары таныстырылды және құны $362 млн болатын TAV Airport Holding инвестициялық бағдарламасы таныстырылды, «Қорғас – Шығыс қақпасы» АЭА аумағында жүк-жолаушылар әуежайын салу бойынша жалпы құны 250 млрд теңгені құрайтын Инвестициялар туралы келісім жасалды.Қазақстан Республикасының пилотсыз азаматтық авиациясын дамытудың 2025-2031 жылдарға арналған тұжырымдамасының қабылдануы маңызды қадам болды. Сонымен қатар аз шығынды бірқатар жаңа авиакомпания ел нарығына шықты, сонымен қатар 35-тен астам жаңа халықаралық бағыт, оның ішінде Будапешт, Шанхай, Сеул, Гуанчжоу және Мюнхенге рейстері ашылды.ИКАО жүргізген аудит қорытындысы бойынша халықаралық авиациялық қауіпсіздік және формальдылықты жеңілдету стандарттарына сәйкестік деңгейі 95,7%-ды құрады.Теміржол және су көлігі: тасымалдаудың өсуі мен инфрақұрылымдық жобалар2025 жылдың қорытындысы бойынша жүктерді темір жол көлігімен тасымалдау көлемі 320 млн тоннаны құрады, бұл 2024 жылдың сәйкес кезеңімен салыстырғанда 5,5%-ға артық. Мемлекет басшысының тапсырмасы аясында 2029 жылға дейін 11 мың шақырым теміржол учаскесін жөндеу қарастырылған. Бүгінгі таңда 4,4 мың шақырымнан астам жолда жұмыстар орындалды, оның ішінде 1 575 шақырымы 2025 жылы аяқталды.<img src="https://knadmin.beoblood.kz/uploads/3_kz_3_1_5766582bd4.png" alt="3-kz-3-1.png">2025 жылдың негізгі оқиғаларының қатарына ұзындығы 836 шақырым «Достық – Мойынты» теміржолының екінші желісінің іске қосылуы, сондай-ақ ұзындығы 323 шақырым жаңа «Қызылжар – Мойынты» желісінің құрылысының басталуы болды. 775 локомотив пен 2,7 мың фитингтік платформаны жеткізу бойынша келісімшарттарға қол қойылды. Бүкіл ел бойынша 124 теміржол вокзалын жаңғырту басталды.Су көлігі де оң динамиканы көрсетті. 2025 жылы теңіз көлігімен 8 млн тонна жүк тасымалданды, бұл 2024 жылғы көрсеткіштен 7%-ға артық. Теңіз порттары арқылы контейнерлік тасымалдау 29%-ға артты – 90 637 ЖФЭ өтті; Транскаспий халықаралық көлік бағыты бойынша өсім 36%-ды құрады.Ақтау портында контейнерлік хаб құрылысы аяқталды, Құрық – Баку желісіне 1 құрғақ жүк кемесі жеткізілді, 2 паром сатып алынды.Өзен көлігімен тасымалдау көлемі 1,5 млн тоннаны құрады. Тасымалдау Ертіс, Орал – Каспий және Іле – Балқаш бассейндерінде жүзеге асырылды.Автомобиль тасымалдары және көлік бақылауы: цифрландыру мен халықаралық ынтымақтастық2025 жылы халықаралық автомобиль тасымалы географиясын кеңейту жұмыстары жалғасты. Қазақстан жыл сайын шетелдік рұқсат бланкілерінің квоталарымен алмасу жүзеге асырылатын 42 елмен үкіметаралық келісімдер жасасты.<img src="https://knadmin.beoblood.kz/uploads/4_kz_3_1_b5200f1976.png" alt="4-kz-3-1.png">Түркіменстанмен, сондай-ақ Иранмен екіжақты және транзиттік тасымалдарға рұқсат етілмеген тасымалдау жүйесі енгізілді. Түркиямен келісімге қол жеткізілді. Қазақстан Қытай аумағына транзиттік автотасымалдауды жүзеге асыру құқығын алған алғашқы ел болды.Қытаймен және Өзбекстанмен бірлесіп, шетелдік рұқсат бланкілерімен электрондық алмасу жүйесі енгізілді, бұл барлық ШРБ-ның 65%-ын цифрландыруға мүмкіндік берді. Цифрландыру жұмыстары Әзербайжанмен, Түркиямен және Қырғызстанмен жалғасуда.Нарықтың ашықтығын арттыру үшін шетелдік рұқсат бланкілерін бөлудің жаңа ережелері қабылданды, сондай-ақ жүк көлігін цифрлық өлшеуге көшу жөніндегі шаралар жүзеге асырылуда. Елде әкімшілік айыппұлдарды автоматты түрде рәсімдеу жүйесімен біріктірілген 73 автоматтандырылған өлшеу стансасы орнатылған.Бұдан бөлек, техникалық байқау операторларының қызметін ашуға рұқсат беру тәртібі енгізілді және белгіленген талаптарды бұзғаны үшін жауапкершілік күшейтілді.Фото: primeminister.kz

Президент тапсырмаларын жүзеге асыру: Еліміздің көлік саласы мен логистикалық әлеуетін дамыту

<a href="https://kyzylorda-news.kz/">Kyzylorda-news.kz</a> Қызылорда қаласындағы түнгі клубтардың бірінде азот оксиді құйылған шарлардың ашық түрде сатылып жатқаны туралы хабарлама түсті. Бұл туралы департаменттің <a href="https://kaz.inform.kz/news/kameletke-tolmagan-kizilordalik-tung-klubta-azot-oksid-kuyilgan-shar-satkan-2f8256/">баспасөз қызметі</a> жеткізді.Облыстық полиция департаменті есірткі қылмысына қарсы іс-қимыл басқармасының қызметкерлері прокуратура органдарының үйлестіруімен хабарлама негізінде рейдтік іс-шара жүргізді.<blockquote>– Рейд барысында түнгі клубтан 10 литрлік 4 газ баллоны және полиэтилен пакетке салынған 6 шар анықталып, заттай дәлелдеме ретінде алынды.&nbsp;Қылмыстық кодекстің 301-бабына сәйкес (улы заттардың, сондай-ақ есiрткi, психотроптық заттарды, сол тектестерді немесе улы заттарды дайындау немесе қайта өңдеу үшін пайдаланылатын заттардың, құрал-саймандардың немесе жабдықтардың заңсыз айналымы) қылмыстық іс қозғалып, тергеу басталды.Клуб қызметкері кәмелет жасына толмаған екен, сондықтан оның заңды өкілдеріне қатысты тиісті әкімшілік хаттамалар рәсімделді, – делінген хабарламада.</blockquote>Тәртіп сақшылары демалыс күндері күшейтілген режимде жұмыс істеп, барлық ойын-сауық орнында профилактикалық тексеру жүргізіп келеді.<img src="https://knadmin.beoblood.kz/uploads/V_Kyzylorde_presechyon_nezakonnyj_oborot_sharov_s_oksidom_azota1_69e1262416.jpeg" alt="В Кызылорде пресечён незаконный оборот шаров с оксидом азота1.jpeg">Жуырда біз Астананың бірқатар көңіл-көтеру мекемесінде 20-дан астам азот тотығы баллоны анықталып, тәркіленгенін&nbsp;жазғанбыз.Фото: Қызылорда ПД

Кәмелетке толмаған қызылордалық түнгі клубта азот оксиді құйылған шар сатқан

<a href="https://kyzylorda-news.kz/">Kyzylorda-news.kz</a> &nbsp;Ел азаматтары мен сарапшылардың Конституциялық реформаға қатысты ұсыныстарын талқылау белсенді кезеңінен өтіп, енді оларды нақты жүзеге асыру жұмыстары басталады. Бұл туралы Конституциялық реформа жөніндегі комиссияның тоғызыншы отырысында Мемлекеттік кеңесші Ерлан Карин айтып, әлеуметтік желілерде туындап жатқан сұрақтар мен пікірлерге қатысты өз ойын білдірді.Мемлекеттік кеңесші атап өткендей, жаңа Ата заңның мәтіні жарияланғаннан бері қоғамда қызу талқылау жүрді. Қазақстандықтардың конституциялық реформаға қатысты белсенділігі әртүрлі платформаларда көрініс тауып, мыңдаған ұсыныстар қабылданды.<blockquote>«Ел азаматтары е-Otinish және e-Gov платформаларындағы «Конституциялық реформа» арнайы бөлімі арқылы жаңа Конституцияға қатысты ұсыныстарын жолдап жатыр. Бір апта ішінде 4 мыңнан аса ұсыныс келіп түсті. Жаңа Ата Заңның мәтіні жарияланғаннан кейінгі бастапқы үш күнде күніге 1 мыңнан астам өтініш жолданса, одан кейінгі күндері өтініштер саны 500-ге дейін төмендеді. Ал кеше 100-ден аса ұсыныс келіп түсті. Бұл не дегенді білдіреді? Яғни, азаматтар жаңа Конституцияға қатысты өз ұстанымдары мен көзқарастарын негізінен толық қалыптастырды», – деді ол.</blockquote>Сонымен қатар, Комиссия отырысы барысында әлеуметтік желілерде конституциялық өзгерістерге қатысты сұрақтар мен пікірлердің кездесетіні айтылды. Ерлан Карин бұл мәселеге де кеңінен тоқталды.<blockquote>«Әлеуметтік желілер арқылы да пікір білдіріп жатқан адамдар бар. Мағынасы шамамен мынадай: «Жаңадан велосипед ойлап тапқанша, дамыған елдердің тексерілген, уақыттың сынынан өткен, жұмыс істеп тұрған Конституцияларын неге жай ғана көшіріп алмайсыздар?!». Және осы пікірді бір емес, бірнеше рет әртүрлі жерде қайталапты – посттың астына да қалдырыпты, жекеме де жазыпты», – деді ол.</blockquote>Мемлекеттік кеңесшінің пікірінше, мұндай сұрақтар қойылса, демек қоғамда, аз болса да, осылай ойлайтын азаматтар бар екенін көрсетеді. Белгілі бір топтың көзқарасын білдіреді. Сондықтан ол өзге елдің Конституциясын неге жәй ғана көшіріп алуға болмайтынын түсіндіріп кетті.<blockquote>«Біріншіден, Конституция – әр елдің айнасы. Өзге елдерде біздің мәдениетке, біздің құндылықтарға сай келмек түгілі, мүлдем жат, қайшы нормалар бар. Біз оларды қалайша қабылдауымыз керек? Біз, керісінше, жаңа Ата Заңда төл мәдениетке, төл құндылықтарға қарама-қайшы келетін дүниелерге тосқауыл қойып отырмыз. Екіншіден, бірдей мәтін бірдей нәтиже бермейді.Сондықтан, ең бастысы, мәселе мәтінде емес, мәселе – ондағы нормалардың қалай жүзеге асырылатындығында. Үшіншіден, біз өз тағдырымызды, өз болашағымызды өзіміз анықтаймыз. «Біз кімбіз? Біз қайда барамыз?» деген сұрақтарға өзге біреу сырттан емес, өзіміз тікелей жауап береміз. Сол үшін де оны жаңа преамбулада жариялап отырмыз», – деп Мемлекеттік кеңесші нақты және объективті себептерді алға тартты.</blockquote>Ерлан Карин тоқталып өткен тағы бір мәселе – Комиссияның құрамына қатысты. Ол қолданыстағы Конституцияны үш шетелдік сарапшыны қосқанда неге тек 12 адам жазғанын, ал жаңа Ата Заңды 130 адамнан тұратын комиссияның әзірлеуінің логикасы мен себептерін түсіндірді.<blockquote>«Қазір еліміздің жаңа Конституциясын осыдан отыз жыл бұрынғыдай жабық кеңседегі 12 адам емес, әрбір өңірден жиналған, түрлі саланың өкілдерінен құралған, тікелей эфирде, ашық форматта жұмыс істейтін 130 адамнан тұратын ауқымды Комиссия жазып жатыр. Арамызда бірде-бір шетелдік азамат жоқ. Өз Ата Заңымызды, өз құқықтық жүйемізді өзіміз жасайтын қабілетіміз бар. Яғни, жаңа Ата Заң Қазақстанның мемлекеттілігі, орнықтылығы тұрғысынан, өз мүддесі тұрғысынан әзірленуде. Бізге біреу сырттан келіп ақыл айтып жатқан жоқ. Сол үшін де тағы да қайталап айтамын, бұл шын мәнінде – халықтық Конституция», – деп ол өз сөзін түйіндеді.</blockquote>Фото: Конституциялық сот

Бірдей мәтін бірдей нәтиже бермейді – Ерлан Қарин біреудің дайын Конституциясын көшіріп алайық деген ұсыныс жөнінде пікір білдірді

<a href="https://kyzylorda-news.kz/">Kyzylorda-news.kz</a> &nbsp;Нұрлыбек Нәлібаев жаңа Конституция туралы пікір білдірді: өңірлер тұрақты даму үшін нақты тетіктерге ие болады.Нұрлыбек Нәлібаев: азаматтардың экологиялық қауіпсіздікке қатысты құқықтарын Конституциялық деңгейде бекіту – уақыт талабыЭкология саласындағы жауапкершілікті күшейту және қоршаған ортаны қорғау нормаларын Конституциялық деңгейде бекіту қажеттігін Қызылорда облысының әкімі Нұрлыбек Нәлібаев Конституциялық реформа жөніндегі комиссияның тоғызыншы отырысында көтерді.Комиссия отырысында ол экологиялық нормалардың өңірлер үшін, соның ішінде экологиялық ахуалы күрделі Арал маңы аймақтары үшін ерекше маңызға ие екенін айтты. Облыс әкімінің пікірінше, теңіздің тартылуы қоршаған ортаға ғана емес, аймақ халқының өмір сапасына, денсаулығына және әлеуметтік жағдайына да тікелей әсер етіп отыр.<blockquote>«Арал теңізінің тағдыры – бүкіл адамзат үшін ауыр сабақ. Оның салдарын біз әлі күнге дейін сезініп келеміз. Сондықтан мемлекеттің қолайлы қоршаған ортаны қамтамасыз ету міндетін, азаматтардың экологиялық қауіпсіздікке қатысты құқықтарын Конституциялық деңгейде бекіту – уақыт талабы», – деді Нұрлыбек Нәлібаев.</blockquote>Оның айтуынша, жаңа Конституция жобасында экологиялық ақпараттың ашықтығын қамтамасыз етуге және қоршаған ортаға зиян келтіргені үшін жауапкершілікті арттыруға бағытталған нормалар қарастырылған. Бұл өзгерістер экология саласындағы мемлекеттік бақылауды күшейтіп, өңірлерде алдын алу шараларын тиімді іске асыруға мүмкіндік береді.Сонымен қатар, Нұрлыбек Нәлібаев жаңа Конституция жобасы мемлекеттің әлеуметтік бағыттағы рөлін арттыруға арналғанын атап өтті. Құжат әлеуметтік теңсіздікті қысқартуға, ауылдық аумақтарды қолдауға, жұмыспен қамтуды кеңейтуге және инфрақұрылымды жүйелі түрде дамытуға құқықтық негіз қалыптастырады.Оның сөзінше, білім беру саласын стратегиялық басымдық ретінде бекіту – адами капиталды дамытудың басты тетігі. Бұл жастарды сұранысқа ие мамандықтарға даярлауға және олардың әлеуетін туған өңірлерінде жүзеге асыруына жағдай жасауға бағытталған.<blockquote>«Елімізде адами капиталды дамыту үшін білім беруді стратегиялық басымдық ретінде бекітеді. Біз жастардың болашағына инвестиция салуды, сұранысқа ие мамандарды даярлауды, жас азаматтардың өз әлеуетін туған жерінде іске асырып, болашағын туған елмен байланыстыруына жағдай жасауды толық қолдаймыз», – деп атап өтті облыс әкімі.</blockquote>Сондай-ақ, баяндамасында Нұрлыбек Нәлібаев жаңа Конституция жобасы мемлекеттік басқарудың тиімділігін арттыруға, өкілеттіктер мен жауапкершілікті нақты ажыратуға және билік органдарының халық алдындағы жауапкершілігін күшейтуге бағытталғанын айтты.Фото: Конституциялық сот

Экологиялық нормалар өңірлер үшін басты басымдық – Нұрлыбек Нәлібаев

<a href="https://kyzylorda-news.kz/">Kyzylorda-news.kz</a> Қызылорда облысында халықты жұмыспен қамту және әлеуметтік қолдау бағытында жүйелі жұмыстар атқарылуда. 2025 жылы облыс әкімі бекіткен «2025 жылға арналған өңірлік жұмыспен қамту жол картасы» аясында жоспарланған көрсеткіштер толық орындалып, нақты нәтижелерге қол жеткізілді.Аталған мәселе Өңірлік коммуникациялар қызметінің ақпарат алаңында өткен брифинг барысында кеңінен баяндалды. Облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаевтың айтуынша, жыл басынан бері өңірде 46 560 адамды жұмыспен қамту жоспарланып, іс жүзінде 46 603 адам жұмысқа орналастырылған. Осылайша, жоспар 100,3 пайызға орындалып, оның 68,5 пайызы тұрақты жұмыс орындарының үлесіне тиесілі болды.<blockquote>– Өңірлік жол картасының әрбір бағыты бойынша бекітілген жоспар артығымен орындалды. Жыл басынан бері 118 бос жұмыс орындары жәрмеңкесі ұйымдастырылып, 6 429 бос жұмыс орны ұсынылды. Нәтижесінде 2 041 адам тұрақты, 1 123 адам уақытша жұмысқа орналасты, ал 4 533 азаматқа кеңес берілді. Сонымен қатар, Мемлекет басшысының «10 мың тұрғынға 100 жаңа жұмыс орнын құру» тапсырмасы аясында өңірде 13 512 адам тұрақты жұмыспен қамтылып, жоспар 26,8 пайызға артығымен орындалды. Бұл көрсеткіштер аймақтағы еңбек нарығының оң серпін алғанын көрсетеді – деді басқарма басшысы.</blockquote>Жұмыссыздық деңгейі де төмендеген. Өңірде жалпы жұмыссыздық көрсеткіші 4,6 пайызға дейін қысқарып, республикалық деңгеймен теңесті. Ал жастар арасындағы жұмыссыздық деңгейі 3,4 пайыз шамасында тұрақтады.<img src="https://knadmin.beoblood.kz/uploads/Zh_myspen_amtu_zh_jesi_irdegi_na_ty_n_tizhe_men_zhospar_e938d016d7.jpg" alt="Жұмыспен қамту жүйесі өңірдегі нақты нәтиже мен жоспар.jpg">Брифинг барысында әлеуметтік қолдау шаралары да назардан тыс қалған жоқ.<blockquote>- Жергілікті атқарушы органдардың шешімімен әлеуметтік қолдауды қажет ететін 10 157 адамға тиісті төлемдер жасалып, әлеуметтік қызметтер порталы арқылы 36 779 мүгедектігі бар азамат 35 454 техникалық оңалту құралдары және қызметтерімен толық қамтамасыз етілді. Биылғы жылы да әлеуметтік қорғау және жұмыспен қамту саласында бірқатар нақты міндеттер айқындалды. Өңірлік жол картасы шеңберінде 26 234 жаңа жұмыс орнын құру, жалпы жұмыссыздық деңгейін 4,8 пайыз, жастар арасындағы көрсеткішті 3,4 пайыз деңгейінде ұстап тұру көзделіп отыр. Сонымен қатар, мүгедектігі бар азаматтардың оңалту бағдарламаларын орындау үлесін кемінде 90 пайызға жеткізу, 360 инфрақұрылым нысанын бейімдеу және әлеуметтік көмекті нақты мұқтаж жандарға бағыттау жоспарланған, – деді Ғабит Жұмабекұлы.</blockquote>Айта кету керек, әлеуметтік төлемдердің уақытылы берілуін қамтамасыз ету, арнаулы әлеуметтік қызметтерді жан басына шаққандағы қаржыландыру жүйесіне толық көшіру де алдағы кезеңнің басым бағыттарының бірі болып қала бермек. Бұл бағыттағы жұмыстар өңірде алдағы уақытта да жүйелі түрде жалғасын табатын болады.&nbsp;Фото: freepik.com

Жұмыспен қамту жүйесі: өңірдегі нақты нәтиже мен жоспар

<a href="https://kyzylorda-news.kz/">Kyzylorda-news.kz</a> Бұл туралы Ақорданың баспасөз қызметі хабарлады. 10 ақпан күні Мемлекет басшысы Қасым-Жомарт Тоқаевтың төрағалық етуімен Қазақстан Республикасы Үкіметінің кеңейтілген отырысы өтеді.Жиында еліміздің 2025 жылғы әлеуметтік-экономикалық дамуы қорытындыланып, Үкіметтің алдағы кезеңге арналған негізгі міндеттері айқындалады.Фото: Ақорда

Президент Үкіметтің кеңейілген отырысын өткізеді

<a href="https://kyzylorda-news.kz/">Kyzylorda-news.kz</a> Астана қаласында Конституциялық Сот төрағасы Эльвира Әзімованың төрағалығымен Конституциялық кеңестің кезекті отырысы өтті.Онда Ата Заңға енгізілетін өзгерістер жан-жақты талқыға түсті. Кезекті отырыста Қызылорда облысының әкімі, Конституциялық комиссия мүшесі Нұрлыбек Нәлібаев баяндама жасап, өңірлер үшін жаңа Конституция жобасының практикалық маңызы зор екенін айтты.<blockquote>"Бүгінде Қазақстан ауқымды өзгерістің, түбегейлі бетбұрыстың алдында тұр. Халқымыз ұлт жылнамасындағы жаңа кезеңге қадам басуда.Президентіміздің қатысуымен Сыр өңірінде өткен Ұлттық құрылтайдың қорытынды бесінші отырысы тарихи миссиясы айрықша мазмұнға ие алқалы жиын болды.Құрылтайда еліміздің келешек бағдары айқындалып, қоғамдағы ең өзекті мәселелер ашық талқыланды.Президентіміз бұған дейінгі ауқымды саяси реформаларының жалғасы ретінде Конституциялық реформаға қатысты өз ұстанымдарын жеткізді.Ел тарихындағы маңызды шешімдерді ұсынды.Конституциялық реформа – еліміздің саяси жаңғыруына, азаматтардың құқықтары мен бостандықтарын күшейтуге, қоғам мен мемлекет арасындағы өзара сенімді нығайтуға бағытталған.Өңірлер үшін жаңа Конституция жобасының практикалық маңызы зор. Құжатта әкімдіктер күнделікті жұмыс барысында бетпе-бет келетін мәселелер қамтылған.Бұл - су мен жер ресурстарын тиімді пайдалану, экологиялық жағдай, әлеуметтік қорғау, білім беру, аймақтардың тұрақты дамуын қамтамасыз ету.Конституция жобасы біз үшін, ең алдымен, шешімдер қалай қабылданатынын, оның жүзеге асырылуына мемлекет қандай жауапкершілік алатынын айқындайды.Сонымен қатар, мемлекеттің Егемендігін нығайтуға, азаматтар алдындағы жауапкершілігін арттыруға бағытталған тың тұстарын ерекше атап өту қажет.Маңызды құжатта әсіресе, экологиялық қауіпсіздік мәселесіне айрықша мән берілген. Қызылорда облысы үшін бұл нормалардың маңызы өте зор.Аралды құтқару – барша адамзат үшін әлі де өте өзекті міндет. Арал теңізінің тағдыры – ауыр сабақ. Оның салдарын бүгінгі күнге дейін сезініп келеміз.Мемлекеттің қолайлы қоршаған ортаны қамтамасыз ету міндетін, азаматтардың экологиялық қауіпсіздікке қатысты құқығын, адамдардың өмірі мен денсаулығына қауіп төндіретін ақпарат үшін артылатын жауапкершілік туралы нормаларды біз толық әрі саналы түрде қолдаймыз.Бұл - біздің өңір үшін тек жалпылама айтылған ұран сөз емес, болашақ үшін маңызы айрықша құқықтық кепіл. Жаңа Конституция жобасының маңызды бағыттарының бірі – мемлекеттің әлеуметтік жауапкершілігін күшейту. Бұл құжат адам құқықтарын қорғауға, өңірлерді қолдауға, әлеуметтік теңсіздікті төмендетуге бағытталған.Атап айтқанда, ауылдық аумақтардың дамуына, жұмыс орындарын құруға, инфрақұрылымды жаңғыртуға, қолжетімді әлеуметтік қызметтерді жүйелі іске асыруға, халық алдындағы міндеттемелерді толық орындауға мүмкіндік береді. Елімізде адами капиталды дамыту үшін білім беруді стратегиялық басымдық ретінде бекітеді. Жаңа Конституция жобасын қолдаймыз.Себебі, бұл құжат өңірлерді дамытудың шынайы қажеттіліктерін, аймағымыздың экологиялық жағдайы мен тұрақты даму мәселелерін толық қамтиды. Ең негізгісі, адам мен табиғат және мемлекет мүдделері біртұтас жүйе ретінде қарастырылған. Бұл - жауапкершілік, тұрақтылық және жарқын болашаққа бағытталған таңдау!”,- деді аймақ басшысы.</blockquote>Сондай-ақ, отырыста Конституциялық Сот Төрағасының орынбасары Бақыт Нұрмұханов Ата Заң жобасының жекелеген ережелерінің редакцияларын қайта форматтау және нақтылау туралы пікір білдірді.ҚР Парламенті Сенаты жанындағы Инклюзия жөніндегі кеңестің төрағасы Ләззат Қалтаева Ата Заң мәтінін Брайль форматына бейімдеуді ұсынды.«Еңбек адамы – экономиканың құралы емес, мемлекеттің басты құндылығы» тақырыбында депутат Максим Рожин,цифрлық ортада азаматтардың құқықтарын қорғаудың маңыздылығы туралы философия, саясаттану және дінтану институтының басшысы Айгүл Сәдуақасова айтты. Ақтөбе облыстық мәслихатының төрағасы Гүлқасима СүйінтаеваКонституцияда некенің еріктілігі қағидатын бекіту, ҚР Парламенті Мәжілісінің депутаты, «Ұлттық волонтерлік желі» заңды тұлғалар бірлестігінің басшысы Вера Ким волонтерлікті ынталандыруды бекіту туралы бастама көтерді.Премьер-министрдің орынбасары - Мәдениет және ақпарат министрі, Конституциялық реформалар жөніндегі комиссия төрағасының орынбасары Аида Балаева: «Ешкім медициналық көмек пен білім алу құқығынан айырылмайды»,-деп атап өтті.

Аймақ басшысы Конституциялық кеңестің кезекті отырысында баяндама жасады

<a href="https://kyzylorda-news.kz/">Kyzylorda-news.kz</a> Арал ауданы әкімдігінің мәжіліс залында аудан әкімі Аманжол Оңғарбаевтың төрағалығымен аудан әкімдігі жанындағы терроризмге қарсы комиссияның кезекті отырысы өтті.Отырысқа комиссия мүшелері, тиісті мекемелердің басшылары, сондай-ақ Қазақстан Республикасы Ұлттық қауіпсіздік комитетінің Қызылорда облысы және Байқоңыр қаласы бойынша департаментіне қарасты Терроризмге қарсы орталық бөлім бастығының орынбасары М.Телеуов, Қызылорда облысының жұмылдыру дайындығы және азаматтық қорғаныс басқармасы басшысының орынбасары А.Жылқыбай, Қызылорда облысының дін істері басқармасының мамандары арнайы қатысып, пікір алмасты.Жиында алдымен Арал аудандық қоғамдық даму бөлімінің басшысы М.Марат әлеуметтік жоба аясында атқарылып жатқан жұмыстар туралы баяндама жасады.Мұнан соң аудан аумағында орналасқан терроризм тұрғысынан осал объектілердің терроризмге қарсы қорғалу деңгейін тұрақты зерделеу, оларды қолданыстағы талаптарға сәйкестендіру барысында туындап отырған проблемалық мәселелер жөнінде Арал аудандық полиция бөлімінің бастығы Н.Әлтай хабарлады.Сонымен қатар аудан жастарын жыл бойы спорт түрлеріне, мәдени іс-шаралар мен үйірмелерге тарту мәселелері жөнінде аудандық дене тәрбиесі, спорт және туризм бөлімінің басшысы Т.Әлжанов пен мәдениет және тілдерді дамыту бөлімінің басшысы Б.Махатов баяндама жасады.Комиссия отырысының күн тәртібіндегі келесі мәселе «Батыс Еуропа – Батыс Қытай» халықаралық автожолы бойында өзге ұлт өкілдері арасында ұлтаралық қақтығыс тәуекелдерінің алдын алу мақсатында түсіндіру шараларының тиімділігін арттыру, ұлттық сипаттағы экстремистік әрекеттерге ықпал етуі мүмкін факторларды талдау және тәуекелдердің алдын алу бойынша ұсыныстарды қарастыру төңірегінде өрбіді. Бұл мәселе бойынша Арал аудандық қоғамдық даму бөлімінің басшысы М.Марат хабарлама жасады.Жиын қорытындысында аудан әкімі көтерілген мәселелерге байланысты атқарылған жұмыстарға оң баға беріп, жауапты тұлғаларға терроризмге қарсы бағыттағы жұмыстарды жүйелі түрде жалғастырып, нақты іске асыру жөнінде бірқатар тапсырмалар жүктеді.Фото: Аудан әкімінің баспасөз қызметі

Қазақстан және Қызылорда облысының жаңалықтары