<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев Шиелі ауданына жұмыс сапары кезінде "Оқшы ата" кесенесінің жағдайымен танысты. Кесенені жөндеу, жаңғырту және абаттандыру жұмыстарын жүргізу жоспарлануда."Оқшы ата" кесенесі Шиелі ауданы Бәйгеқұм ауылынан шығысқа қарай 5 шақырым жерде орналасқан.Республикалық маңызы бар тарих және мәдениет ескерткіші. “Қазақстанның киелі жерлерінің географиясы” жобасы аясында “Жалпыұлттық қасиетті нысандар” тізіміне енген. Мазаратты халық «Жеті әулие» деп атайды.Аймақ басшысы кесенені қалпына келтіру жұмыстарын сапалы жүргізуді тапсырды.Айта кетейік, бұған дейін облыс әкімі Жаңақорған, Қармақшы аудандарына жұмыс сапары кезінде киелі орындарының жай-күйімен танысқан еді.Биыл тарихтың ізі қалған, сыры тұнған қасиетті орындар – "Қорқыт ата" ескерткіш- кешеніне, "Хорасан ата"," Оқшы ата" және "Марал баба" кесенелеріне қайта жаңғырту, айналасын абаттандыру жұмыстары жүргізілмек. Бұл – Қызылорда облысының 85 жылдығына арналған тарту.<img src="https://knadmin.beoblood.kz/uploads/367448491_1842159546179549_8204328939046617557_n_3a97263841.jpg" alt="367448491_1842159546179549_8204328939046617557_n.jpg">

Сыр өңіріндегі киелі орындар қайта жаңғыртылуда

<a href="https://kyzylorda-news.kz/">Kyzylorda-news.kz.</a> Қызылорда қаласының кейбір аумақтарында газ уақытша өшіріледі.<blockquote>«ҚазТрансГаз Аймақ» АҚ Қызылорда өндірістік филиалы тарату желілерінде жөндеу-профилактикалық жұмыстарының жүргізілуіне байланысты 17 тамыз күні сағат 8:00-ден 18:00-ге дейін Қызылорда қаласының Ақжайық, Сейхун, Демисинов көшелері және Текей батыр көшесі, «Шанырақ» тұрғын үй кешені, Арай-2, Арай-3, Нұр-Орда шағын ауданының (сызбаға сәйкес) көп қабатты тұрғын үйлері, сонымен қатар өндірістік және коммерциялық-тұрмыстық объектілерінің тұтынушыларына табиғи газ беру тоқтатылатынын хабарлайды. Газды өшіру кезеңінде газ қондырғылары алдындағы крандарды жабуды және «ҚазТрансГаз Аймақ» АҚ, «РЦКУ-Кызылорда» ЖШС, «Интергаз Центральная Азия» АҚ қызметкерлерінің тұтынушыларға газ беру үшін жұмыстар жүргізуге 2023 жылғы 17 тамыз сағат 13.00-ден бастап қол жеткізуін қамтамасыз етуді сұраймыз», - делінген хабарламада.</blockquote><img src="https://knadmin.beoblood.kz/uploads/367489983_3421623044771096_3303224837926492895_n_6e62b42a37.jpg" alt="367489983_3421623044771096_3303224837926492895_n.jpg">

Қызылорда қаласының кейбір аумақтарында газ уақытша өшіріледі

<a href="https://kyzylorda-news.kz/">Kyzylorda-news.kz.</a> Қазақстанда еш заңдастырылмаған 1,7 мың көлік айып тұрағына жіберілді. Бұл туралы ҚР ІІМ Әкімшілік полиция комитетінің төрағасы Қайсар Сұлтанбаев хабарлады.<blockquote>«Біз заңдастырудың 2023 жылдың 1 шілдесіне дейін жалғасатынын жарияладық. Кім заңдастыруға үлгермеді, өтінім беріңіздер, 2023 жылдың 1 шілдесіне дейін келіп түскен барлық өтінімдерді қарастырамыз. Әзірге 15 мыңға жуық көлікті уақытша тіркеуге алдық. Өтінім беріп үлгермегендерді де қарастырамыз және әрі қарай тіркейміз», - деді Қ. Сұлтанбаев Орталық коммуникациялар қызметінде.</blockquote>Сонымен бірге, спикер 2023 жылдан кейін әкелінген және сақтандыру мерзімі біткен, еш тіркеусіз көлік мініп жүргендердің бұл көлікті басқаруға құқығы жоқ екенін айтты.<blockquote>«Әкімшілік кодекс бойынша оларға алғашында 10 АЕК көлемінде айыппұл салынады. Біз қазір осындай алдын алу жұмыстарын жүргізіп жатырмыз. Екінші рет – әкімшілік хаттама жасалып, көлік айып тұрағына қойылады. Қазіргі уақытта сақтандырусыз, сақтандыру полисінсіз, техникалық байқаусыз жүрген 2 мыңнан астам көлік иелерін анықтадық және олар әкімшілік жауапқа тартылды. Қазір 1,7 мыңға жуық көлік айып тұрағына қойылды», - деді Қайсар Сұлтанбаев.</blockquote>Айта кетейік, 2022 жылдың 1 қыркүйегіне дейін елге заңсыз әкелінген көлік құралдарын заңдастыру 1 шілдеге дейін жүргізілді. Бүгінгі таңда барлығы 220 мыңнан астам автокөлік <a href="https://www.inform.kz/kz/kazakstanda-220-myn-avtokolik-zandastyryldy-kr-iim_a4101438">заңдастырылды.</a>

Заңдастырылмаған автокөлік жүргізушілері қандай жауапқа тартылады?

<a href="https://kyzylorda-news.kz/">Kyzylorda-news.kz.</a> Жаңа оқу жылынан бастап колледж студенттерінің стипендсиясы тағы 50 пайызға өседі. Бұл туралы Оқу-ағарту министрі Ғани Бейсембаев хабарлады.<blockquote>«Мемлекет басшысының тапсырмасы бойынша техникалық және кәсіптік білім беруге мемлекеттік тапсырысты ұлғайту жұмыстары белсенді жүріп жатыр. Биыл аталған салаға 133 мың грант бөлінді. Оның 60% техникалық мамандықтарға бағытталды. Сондай-ақ, 1 қыркүйектен бастап колледж студенттерінің стипендиясы өткен жылғы деңгейден 50%-ға артады», - деді Ғани Бейсембаев Үкімет отырысында.</blockquote>Министрдің мәлімдеуінше, бәсекеге қабілетті кадрларды даярлау мақсатында, міндетті жұмысқа орналастыру талабымен 10 мың орын бөлінді.<blockquote>«410 колледжді кәсіпорындар өз қамқорлығына алып отыр. Айта кетсек, бірқатар өңірде техникалық және кәсіптік білім беруді дамытуда оң нәтиже бар. Мәселен, Алматы қаласында техникалық және кәсіптік білімді дамыту бойынша 2023-2030 жылдарға арналған «Жол картасы» әзірленді. 600 колледж педагогы шетелдік тағылымдамадан өтеді. Дуалды оқыту шеңберінде тәлімгерлік институтын дамыту, 1200 орындық екі колледж және жатақхана салу жоспары бар», - дейді ведомство басшысы. &nbsp;</blockquote>

1 қыркүйектен бастап колледж студенттерінің стипендиясы 50 пайызға артады

<a href="https://kyzylorda-news.kz/">Kyzylorda-news.kz.</a> Қызылорда облысында «Бір ауыл – бір өнім» жобасының бренд-комитет отырысы өтіп, жеңімпаздар анықталды.Жобаның басты міндеті – ауыл тұрғындарының кәсіпкерлік әлеуетін арттыру, қолда бар жергілікті шикізатты пайдаға асыра отырып, өнім өндіру, елдімекендерде жұмыс орнын ашу. &nbsp;Қызылорда облысынан жобаға қатысуға 22 қыз-келіншек ниет білдіріп, маусымда өнімдерінен көрме ұйымдастырған еді. Сол көрмеде комиссия мүшелері үздік 10 өнімді іріктеп, бренд-комитеттің қарауына ұсынды.Іріктеу кезеңінен өткен қыз-келіншектер бренд-комитеттің алдында өнімдерін көрсетіп, жобасын қорғады.Өңірлік брендке қойылатын негізгі талаптар:- өнім жергілікті шикізаттан өндірілуі тиіс;- өнімді дайындау кезінде қарапайым құралдар мен механизмдер пайдаланылуы керек;- өнім мүмкіндігінше өндірілетін аумақтың өңірлік ерекшелігін көрсетуі және қамтуы тиіс;&nbsp;- тауар құрамында қауіпті немесе зиянды заттардың болмауы қажет.Бренд-комитеттің шешімімен:- жергілікті емдік шөптерден, жантақтан, түйе және ешкі сүті қосылған парфюмерлік сабын жасауды қолға алған Арал ауданының тұрғыны Арсена Күшжанова, бал өнімдерімен айналысатын Сырдария ауданының тұрғыны Эльмира Төретаева, &nbsp;осы ауданда қой жүнінен текемет және өзге де бұйымдар шығарып жатқан Мәрияш Әлжанова өнімдері алғашқы үштікке енді.Жеңімпаздарға маркетингтік сүйемелдеу, өнімді (тауарды) брендтеу, одан әрі өнімді нарыққа шығаруға қолдау көрсетіледі.Енді жеңімпаздар республикалық көрмеге қатысады.

Қызылордада «Бір ауыл – бір өнім» жобасының жеңімпаздары анықталды

<a href="https://kyzylorda-news.kz/">Kyzylorda-news.kz.</a> Бүгін ҚР Премьер-министрі Әлихан Смайыловтың төрағалығымен Үкімет отырысы өтті. Онда 2023 жылғы қаңтар-шілде айларындағы әлеуметтік-экономикалық даму қорытындылары, республикалық бюджеттің атқарылуы, жаңа оқу жылына дайындық. мәселелері қаралды.ҚР Ұлттық экономика министрі Әлібек Қуантыров 7 ай ішіндегі әлеуметтік-экономикалық даму қорытындыларын баяндап, ең жоғары өсім көрсеткен салалар — құрылыс, сауда, ақпарат және байланыс екенін атап өтті. Оның ішінде, құрылыс жұмыстарының көлемі бойынша Қызылорда облысында даму қарқыны жоғары.<blockquote>«Орындалған құрылыс жұмыстарының көлемі 12,2 пайызға ұлғайды. 17 өңірде өсім тіркелді. Әсіресе құрылыс-монтаждау жұмыстарының өсімі Жетісу, Батыс Қазақстан, Қызылорда және Абай облыстарында байқалды», - деді министр.</blockquote>Үкімет отырысынан кейін облыс әкімі Нұрлыбек Нәлібаев Премьер-министр берген тапсырмаларды пысықтау мақсатында жиын өткізді. Аймақ басшысы жаңа оқу жылына дайындық мәселесіне тоқталды.<blockquote>«Біз барлық шараларды қабылдап, жаңа оқу жылына ұйымдастыру-дайындық жұмыстарын жүйелі жүргізуіміз керек. Бұл тек білім басқармасының ғана жұмысы емес. Қала, аудан әкімдері де жұмысқа жұмылуы керек. Оқу процесі еш кедергісіз басталуы тиіс! Білім беру ұйымдары қажетті құрылғылармен, құрал-жабдықтармен толық қамтамасыз етілуі міндетті. Көмекке мұқтаж отбасылардың балаларына барлық қолдау шараларын жүзеге асырыңыздар. «Мектепке жол» дәстүрлі республикалық акциясына жергілікті кәсіпкерлерді тарта отырып, ұйымдастыру керек. Акцияның мақсаты – балаларды тек оқу құралдарымен қамтамасыз ету емес, сабаққа бармай қалған балаларды анықтау. Оларға нақты көмек көрсетілуі тиіс», - деді Нұрлыбек Машбекұлы.</blockquote>Облыс әкімінің аппараты қаладағы бірқатар мектептердің дайындығына инспекторлық бақылау жұмыстарын жүргізгенде, бірқатарында әлі де жұмыстар толығымен аяқталмағанын анықтады. Сондықтан қала және аудан әкімдері барлық мектептерге осылай зерделеу жүргізіп, дайындығын жеке қадағалауға алуы керек. Сонымен қатар мектептер жылу беру маусымына толық дайын болуы қажет. Облыстық басқармалар мен қала, аудан әкімдері жоспарланған қаражатты толық, сапалы және уақытылы игеру үшін тауар жеткізушілермен, мердігерлермен тиісті жұмыстар жүргізуі керек. Жиын қорытындысында жауапты басшыларға жаңа оқу жылы қарсаңында жоспарланған жұмыстарды мерзімінде аяқтау жүктелді.

Қызылорда облысы құрылыс жұмыстарының көлемі бойынша үздіктер қатарында

<a href="https://kyzylorda-news.kz/">Kyzylorda-news.kz.</a> Асханасы жоқ мектептердің мәселесі қалай шешілмек? Бұл сауалға Оқу-ағарту министрі Ғани Бейсембаев жауап берді.<blockquote>«Президенттің 1-4 сынып оқушыларын тегін тамақпен қамтамасыз етуге қатысты тапсырмасын орындау мәселесі Үкімет деңгейінде бірнеше рет қаралды. Бүгінгі күні осы тапсырманы орындау үшін барлық өңірдің әкімдіктері тарапынан қажетті қаржы бөлінді. 1 қыркүйектен бастап 1 млн 400 мың бастауыш сынып оқушысы тегін тамақтанады. Сіздің тапсырмаңызға сәйкес асханасы жоқ мектептерде (669 мектеп) Денсаулық сақтау министрлігімен бірлесіп тамақтандыруды 3 тәсілі ұйымдастырылады. Атап айтқанда, кейтеринг қызметін ұйымдастыру, модулді асханаларды құру, буфеттік тамақтану», - деді Ғани Бейсембаев Үкімет отырысында.</blockquote>Министрдің мәліметінше, 1 қыркүйектен бастап аз қамтылған отбасыдан шыққан 97 мыңнан астам балабақшаға баратын бала тегін тамақпен қамтамасыз етіледі.<blockquote>«Мемлекет басшысы тәрбиешілердің еңбекақысын арттыруды тапсырған болатын. Биыл 1 қыркүйектен бастап тәрбиешілердің еңбекақысы 30% - ға көтеріледі. Бұдан басқа, мектепке дейінгі ұйымдарда орындардың бөлінуін ашық жүргізу үшін жыл соңына дейін Балаларды кезекке қоюды есепке алудың бірыңғай базасы әзірленіп жатыр. Оны толықтай іске қосу жылдың соңына дейін жоспарланып отыр», - дейді ол.</blockquote>

Асханасы жоқ мектептерде модульді тамақтандыру енгізіледі

<a href="https://kyzylorda-news.kz/">Kyzylorda-news.kz.</a> Оқушылардың қауіпсіздігін сақтау мақсатында ел мектептерінде рұқсаты бар күзетпен қамту шаралары қолға алынып жатыр. Кейбір өңірде мәселеге баса назар аудару қажет. Бұл туралы Оқу-ағарту министрі Ғани Бейсембаев мәлім етті, деп хабарлайды <a href="https://www.inform.kz/kz/mektepter-84-licenziyalangan-kuzetpen-kamtylady_a4101249">ҚазАқпарат</a>.<blockquote>«Білім беру ұйымдарында балалардың қауіпсіздігін қамтамасыз ету мәселесі бойынша келесі жұмыстар жүргізілді. Алдымен мектептерді ішкі істер органдарының жедел басқару орталықтарына қосу. Ұлттық білім беру деректер базасына сәйкес бұл көрсеткіш 12 тамызда 83% болды. Егер жыл басында 1 673 мектеп қосылған болса, қазір бұл көрсеткіш 3 103 мектепке артып отыр. Алайда Алматы, Атырау және Қарағанды облыстарының әкімдіктері бұл жұмысты баяу жүргізіп жатыр. Сондықтан аталған өңірлер өзіңіздің тапсырмаңызға сәйкес жедел басқару орталықтарына қосылу бойынша жұмысты 25 тамызға дейін аяқтауы қажет», - деді Ғани Бейсембаев Үкімет отырысында.</blockquote>Сондай-ақ министр мектептердегі күзет мәселесін қозғады.<blockquote>«Лицензияланған күзет агенттіктерімен жасалған келісімшарттар негізінде жұмыс жүріп жатыр. Қазір бұл бағытта 84% жұмыс жүргізілді. Дегенмен Түркістан және Алматы облыстарының бұл бағыттағы жұмысы баяу екенін атап өткім келеді. Сонымен қатар дабыл түймелерін мектептердің 89%-ы орнатты. Егер жыл басында дабыл түймелері бар 1 789 мектеп болса, бүгінгі күні 1,9 есе (3 327 мектеп) өскенін атап өткім келеді.</blockquote>Оның айтуынша, Түркістан облысы, Ақтөбе және БҚО әкімдіктері аталған мәселені жүйелі түрде қатаң бақылауда ұстауы қажет.

Мектептер 84% лицензияланған күзетпен қамтылады

<a href="https://kyzylorda-news.kz/">Kyzylorda-news.kz.</a> Сыр халқы үшін биыл айтулы даталарға толы жыл. Олай дейтініміз, Қызылорда облысының 85 жылдығымен қатар Сыр елінің бас шаһарына 205 жыл толып отыр. Осы айтулы мерекеге орай Қызылордада ауқымды шаралар өткізілетін болады. Бұл туралы Өңірлік коммуникациялар қызметінің ақпараттық алаңында өткен баспасөз конференциясында Қызылорда қаласының әкімі Асылбек Шаменов толық ақпарат берді.&nbsp;<blockquote>«Биыл Қызылорда қаласына – 205 жыл. Қалыптасу тарихының әр кезеңі жеке-жеке баяндалып, зерделенетін, азат еліміздің думан байрағына, салтанат тұғырына айналған, өзгеріс ісімен өрнектелген толағай табысқа толы Тәуелсіздік жылдарындағы Сыр өңірінің қарқынды дамуына шолу жасалатын Қала күні барша қызылордалықтар асыға күтетін мерекелердің біріне айналды. Қала күнін мерекелеуге байланысты 20 тармақтан тұратын іс-шаралар жоспары бекітілді. Сәйкесінше, осы жылдың қыркүйек айының 15 жұлдызынан бастау алып, 7 қазанға дейін арнайы бекітілген жоспар бойынша шаһар тұрғындары мен қонақтарына мерекелік көңіл-күй сыйлайтын түрлі деңгейдегі мәдени-көпшілік шаралар ұйымдастыру жоспарлануда. Шаралар легі шаһар жастарының қатысуымен бастау алмақ. Нақтырақ айтқанда, қалалық жастар ресурстық орталығының ұйымдастыруымен түрлі деңгейдегі шаралар, және осы күні дәстүрлі «Жастар карнавалы»жастардың карнавал шеруі өткізіліп, республикалық жайдарманшылардың фестиваліне ұласады. Қала күніне арналған мерекелік шаралардың салтанатты ашылуы Орталық алаңда өткізіледі деп күтілуде. Одан кейін, облысқа қарасты 7 аудан ауылшаруашылық жәрмеңкелерін, кешкі уақытта мерекелік концерттік бағдарламаларын ұсынады. Сондай-ақ «Қаламгерлер» аллеясында кітап көрмесі мен сатылым акциясы, «Қызылорда қасиет қайнары”атты аймақтың 85 жылдығы және қаламыздың 205 жылдық мерейтойы қарсаңында өңір дамуына өлшеусіз үлес қосқан зиялы қауым өкілдері мен жергілікті ақын-жазушылардың қатысуымен өтетін рухани-танымдық поэзия кеші өтеді. Дәл осы күні Өнер арбатында дәстүрлі облыстық «Қызылорда менің көзіммен» атты фотографтар байқауы өткізіліп, сүйікті қаламыздың көрікті жерлерін таспаға тартқан фотосуретшілердің көрмесі жасалады. Бұдан бөлек, «Бала барысы» облыстық балалар арасындағы турнир, «Шаттық» облыстық балалар хор ұжымдары арасында қалалық ән байқауы, «Қызылорда - болашақтың қаласы» атты жас суретшілер байқауы, қалалық музейде ашық есік күні ұйымдастырылып, мектеп оқушыларына қала тарихы таныстырылады. Мұнан өзге, «Көңілді сенбілік» жалпықалалық сенбілік акциясы, қала көлемінде қызмет жасап жүрген тазалықшыларға құрмет көрсету, сый жасау, «Үлкенге құрмет - кішіге міндет» атты жалғызбасты, тұрмысы төмен, зейнет жасындағы үлкен кісілердің тұрғын үй аумағында тазалық жұмыстары ұйымдастырылып, «Үздік аула» байқауымен қорытындыланады. Өңірдің әлеуметтік-экономикалық дамуына өз үлестерін қосқан ардагерлермен кездесу шарасын облыстық тарихи өлкетану музейінде өткізу жоспарлануда», - деді Асылбек Өмірбекұлы.</blockquote>Айта кетейік, қала күні мерекесі осы жылдың 7 қазаны күні Ғ.Мұратбаев атындағы Орталық стадионда «Бірлік пен бақыт арнасы, Алаштың Қызылордасы» атты театрландырылған қойылым, аймақ басшысының және &nbsp;қала тұрғындары мен қонақтарының мерекелік құттықтауы, гала-концертпен қорытындыланады деп жоспарлануда. Қорытынды шара облыс аудандары және қаланың әр түрлі сала озаттарының шеруімен басталып, арнайы жазылған тақырыптық қойылым облыстың 85 жылдығы, қаланың 205 жылдығы және басқа да Сыр өңірінің белгілі тұлғаларының мерейтойлық даталарымен үндеседі.

Асылбек Шәменов: 20 тармақтан тұратын іс-шаралар жоспары бекітілді

<a href="https://kyzylorda-news.kz/">Kyzylorda-news.kz.</a> Биыл тамыры терең, тарихы кенен, түркі өркениетінің алтын бесігі саналатын &nbsp;қасиетті өлке Қызылорда облысының құрылғанына – 85 жыл. Аймағымыздың мерейлі мерейтойын кеңінен атап өту мақсатында 76 тармақтан тұратын арнайы іс-шаралар жоспары бекітіліп, ауқымды мерекелік оқиғалардың тізімі жинақталды. Жалпы мерекелік шаралар тамыз, қыркүйек, қазан айларында өткізілетін болады. Өңірлік коммуникациялар қызметінде өткен брифингте Қызылорда облысы әкімі аппаратының басшысы Шахмардан Байманов БАҚ өкілдеріне өңірде қолға алынған ілкімді істерді игілігіне тоқталып, мерейтой аясында ұйымдастырылатын іс-шаралар тізбегіне жеке-жеке тоқталып өтті.<blockquote>«Биыл облыс әкімі Нұрлыбек Нәлібаевтың бастамасымен Сыр өңірінің 85 жылдық мерейтойы аясында облыста тағылымы мол көптеген игі шаралар ұйымдастырылады. Бұл сыр маржанына орақ түсіп, қамба астыққа толып, шаруа адамы ілтипатқа бөленетін кезең. Дәстүрге айналған Қызылорда қаласы күнімен ұштастыра отырып мерекелік шаралар өткізу де облысымыздың айтулы мерейтойына &nbsp;ерекше мән беретіні анық. Негізгі шараларға тоқталып өтсем, жыр кештері, кітап көрмелері, Қызылорда туралы ретро концерт, халықаралық фольклорлық музыкалық өнер фестивалі, республикалық ақындар айтысы, бірқатар мемлекет және қоғам қайраткерлерінің өмірі мен қызметіне арналған танымдық конференциялар ұйымдастырылады. Аймақтың қоғамдық-саяси дамуы мен тарихи оқиғаларынан сыр шертетін республикалық ғылыми-практикалық конференция өткізу жоспарлануда. Бұдан бөлек, облыстың 85 жылдық тарихын кеңінен айшықтайтын «Қызылорда облысы: тарих, бүгін, болашақ» тақырыбында арнайы деректі фильм түсіру қолға алынды. Бүгінде жоғары мазмұнды кітап шығару және аймақтың көрікті жерлері бейнеленген «ФОТО КІТАП» әзірлеу жұмыстары да жүргізілуде. Жыл сайын дәстүрлі түрде өтетін «Алтын дән – 2023» мерекесінде ауыл шаруашылығы жәрмеңкелері, бәйге сайыстары ұйымдастырылып, бұл күн салтанатты шарамен қорытындыланады. 25 қазан – Республика күніне орай тақырыптық конференциялар мен салтанатты жиындар, &nbsp;15 қараша – Ұлттық валюта теңгенің 30 жылдығына мерекелік шаралар ұйымдастырылмақ», - деді Шахмардан Байманов.</blockquote>Брифинг барысында Шахмардан Асқарұлы алдағы жылу беру маусымына дайындық жұмыстарына тоқталып, ауыл шаруашылығы саласындағы серпінді жұмыстарды баяндады.<blockquote>«Бүгінде аймақ басшысы аудандарды арнайы аралап, әлеуметтік нысандардың жылу беру маусымына дайындық барысын пысықтауда. Алдағы жылу беру маусымын тұрақты түрде өткізу барысындағы жұмыстар әрдайым біздің жіті бақылауымызда болады. Ендігі кезекте облысымыздың ауыл шаруашылығы саласындағы жұмыстарға тоқталсам, биыл аймақта 195,9 мың гектарға егін егілді. Оның ішінде күріштің көлемі – 89 мың гектарды құрайды. Егілген егістікті суармалы судан қалдырмау үшін арнайы жұмыс тобы құрылып, шаруашылықтарға су көлемі кезекпен берілуде. Сондай-ақ, әлеуметтік маңызды дақылдарды егуге ынталы тұрғындар үшін қала мен аудандардағы 5 542 отбасына 3 мың гектардан астам жер берілді», - деді ол.</blockquote>Айта кетейік, бүгінде Сыр өңірінде аймақ басшысының бастамасымен ауқымды жобалар жүзеге асырылып, әлеуметтік нысандар бой көтеруде. Облысымыздың дамуына жергілікті кәсіпкерлер, облыстан шыққан меценаттар белсенді араласып, қайырымдылық шараларына, Сыр елінің көркеюіне сүбелі үлестерін қосуда. Бүгінде аймағымызда демеушілікпен барлығы 31 млрд. 700 млн. теңгенің жобалары жүзеге асуда. Атап айтқанда, Болат Өтемұратовтың демеушілігімен &nbsp; 15 млрд. теңгеге «Қорқыт ата» әуежайының жаңа терминалы салынуда. 2024 жылдың мамыр айында ел игілігіне табысталады. Қызылорда қаласында белгілі кәсіпкер, меценат Марат Дүйсенбаевтың демеушілігімен 1,5 млрд. теңгеге «Анаға тағзым» орталығының құрылысы жүруде. Нысан тамыз айында пайдалануға беріледі. «Қазгермұнай» ұлттық компаниясымен келісім нәтижесінде Қызылорда қаласында 2,3 млрд. теңгеге заманауи үлгідегі «Оқушылар сарайының» құрылысы ағымдағы жылы басталады.Маусым айынан бастап демеушілердің қолдауымен 1 млрд. 100 млн. теңге қаржыға облыс орталығында 50 үйдің қас беттері заманауи панелдермен қапталуда. Дәл осы секілді демеушілермен 1 млрд. теңгеге 20 көпқабатты тұрғын үйдің аулалары абаттандырылуда. Яғни, заманауи спорт-алаңдары, тротуарлары, жарық бағаналары жаңартылуда. Биыл облыс орталығында құны 1,6 млрд теңгені құрайтын «Неке сарайы» мен &nbsp;3,7 млрд теңге болатын мың орындық «Өнер орталығы» ел игілігіне берілмек. Сондай-ақ, құны 975 млн теңгені құрайтын заманауи үлгідегі жаңа автовокзал құрылысы да салынуда. Бұл нысан жыл соңында пайдалануға беріледі. Облысымыздың дамуына сүбелі үлес қосып жүрген жергілікті кәсіпкерлердің қолдауымен өңірде 31 млрд. 700 млн теңгенің жобалары сәтті жүзеге асырылуда.&nbsp;

Қызылорда облысына 85 жыл: Мерекелік шаралар тамыз, қыркүйек, қазан айларында өткізіледі

<a href="https://kyzylorda-news.kz/">Kyzylorda-news.kz.</a> Қызылорда облысының өңірлік коммуникациялар қызметінің ақпарат алаңында Қызылорда облыстық мәслихатының төрағасы Наурызбай Байқадамов, Қызылорда облысы әкімі аппаратының басшысы Шахмардан Байманов және Қызылорда қаласының әкімі Асылбек Шаменов БАҚ өкілдеріне арнайы баспасөз конференциясын өткізіп, Сыр өңіріндегі серпінді бастамаларды баяндады. Сондай-ақ Қызылорда облысының 85 жылдық мерейтойына орай өңірде өткізілетін шараларға тоқталды.<blockquote>«Сыр топырағының қойнына бүккен қазына-жауһарларына ерекше мән беру, оларды халық арасында кеңінен насихаттау, өскелең ұрпақты отаншылдық рухта тәрбилеуге және Тәуелсіздіктің құндылығын ұғындыруға ықпал етеді. Осы ретте, тамыз айының аяғы мен қыркүйек, қазан айлары мерейлі әрі саяси оқиғаларға толы екенін ескере отырып, сіздер арқылы барша облыс халқына Үндеу тастағым келеді. Отанға деген сүйіспеншілік – жиындарда ұран тастау немесе ән шырқау емес. Отаншылдық бұл – шынайы патриоттық сезім. Барлық азаматымыздың бойында жауапкершілік болса ғана, ісіміз оңға басады. Тамырын тереңнен тартып, руханиятымен тау тұрғызған Сыр жұртшылығы жарқын болашақ жолына тура таңдау жасап, ауызбіршіліктің үлгісін көрсететініне сенімдімін. Жалпы, алдағы қоғамдық маңызды шаралар азаматтардың жағымды көңіл-күйін қалыптастыруға, тұрақтылықты, қоғамдық келісім мен жалпыұлттық бірлікті нығайтуға ықпал етеді. Алдағы уақытта облыс әкімінің бастамасымен аймағымыздың 7 ауданында музей, кітапхана, архив, неке қию залы, ардагерлер және аналар, жастар орталықтары сынды бірқатар тарихи-мәдени, рухани ұйымдарды біріктіретін типтік үлгідегі «Руханият» орталықтары салынады», – деді Қызылорда облыстық мәслихатының төрағасы Наурызбай Сейтқалиұлы.</blockquote><blockquote>«Сыр өңірінің 85 жылдық мерейтойы аясында облыста көптеген игі шаралар ұйымдастырылады. Бұл – Сыр маржанына орақ түсіп, қамба астыққа толып, шаруа адамы ілтипатқа бөленетін кезең. Дәстүрге айналған Қызылорда қаласы күнімен ұштастырып өткізілетін мерекелік шаралар кезінде облысымыздың айтулы мерейтойына ерекше мән берілетіні анық. Негізгі шараларға тоқталып өтсем, жыр кештері, кітап көрмелері, Қызылорда туралы әндер шырқалатын ретро концерт, халықаралық фольклорлық-музыкалық өнер фестивалі, республикалық ақындар айтысы, бірқатар мемлекет және қоғам қайраткерлерінің өмірі мен қызметіне арналған танымдық конференциялар ұйымдастырылады. Сонымен қатар, аймақтың қоғамдық-саяси дамуы мен тарихи оқиғаларынан сыр шертетін республикалық ғылыми-практикалық конференция өткізу жоспарлануда. Облыстың 85 жылдық тарихын кеңінен айшықтайтын «Қызылорда облысы: тарих, бүгін, болашақ» тақырыбында арнайы деректі фильм түсіру қолға алынды. Мазмұнды кітап және аймақтың көрікті жерлері бейнеленген фотокітап та әзірленуде. Жыл сайын дәстүрлі түрде өтетін «Алтын дән – 2023» мерекесінде ауыл шаруашылығы жәрмеңкелері, бәйге ұйымдастырылып, бұл күн салтанатты шарамен қорытындыланады. 25 қазан – Республика күніне орай тақырыптық конференциялар мен салтанатты жиындар, 15 қараша – Ұлттық валюта теңгенің 30 жылдығына мерекелік шаралар ұйымдастырылмақ», – деді Қызылорда облысы әкімі аппаратының басшысы Шахмардан Асқарұлы.</blockquote><blockquote>«Биыл Қызылорда қаласына – 205 жыл. Бұл мерекеде Қызылорданың қалыптасу тарихының әр кезеңі жеке-жеке баяндалады. Тәуелсіздік жылдарындағы Сыр өңірінің қарқынды дамуына шолу жасалады. Осы жылдар ішінде Қала күні барша қызылордалықтар асыға күтетін мерекелердің біріне айналды. Қала күнін мерекелеуге байланысты 20 тармақтан тұратын іс-шаралар жоспары бекітілді. Сәйкесінше, осы жылдың қыркүйек айының басы мен қазан айының екінші онкүндігіне дейін арнайы бекітілген жоспар бойынша шаһар тұрғындары мен қонақтарына мерекелік көңіл-күй сыйлайтын түрлі деңгейдегі мәдени-көпшілік шаралар ұйымдастыру жоспарлануда. Нақтырақ айтқанда, қалалық жастар ресурстық орталығының ұйымдастыруымен түрлі деңгейдегі шаралар және дәстүрлі «Жастар карнавалы» шеруі өткізіліп, жайдарманшылардың республикалық фестиваліне ұласады. Қала күніне арналған мерекелік шаралардың салтанатты ашылуы Орталық алаңда өткізіледі деп күтілуде. Одан кейін, облысқа қарасты 7 аудан ауылшаруашылық жәрмеңкелерін, кешкі уақытта мерекелік концерттік бағдарламаларын ұсынады», – деді Қызылорда қаласының әкімі Асылбек Өмірбекұлы.</blockquote>

85 жылдық мерейтой аясында облыста көптеген іс-шара ұйымдастырылмақ

<a href="https://kyzylorda-news.kz/">Kyzylorda-news.kz.</a> Бүгінде құрылғанына 85 жыл болған Қызылорда облысының тарихи – мәдени және рухани даралығы күн өткен сайын өзінің мазмұнын тереңдетіп, Тәуелсіз еліміздің жылнамасынан өз орнын айшықтай түсуде. Бұл туралы Өңірлік коммуникациялар қызметінің ақпараттық алаңында өткен баспасөз конференциясында Қызылорда облыстық мәслихатының төрағасы Наурызбай Байқадамов мәлімдеді.&nbsp;<blockquote>«Сыр елінің қойнына бүккен қазына-жауһарларына ерекше мән беріп баптау, оларды халық арасында кеңінен насихаттау, өскелең жас ұрпақты отаншылдық рухта тәрбилеуге және Тәуелсіздіктің құндылығын ұғындыруға ықпал етеді. Осы ретте, тамыз бен қараша айларының аралағы мерейлі әрі саяси оқиғаларға толы екенін ескере отырып, Сіздер арқылы барша облыс халқына Үндеу тастағым келеді. Отанға деген сүйіспеншілік – жиындарда ұран тастау немесе ән шырқау емес. Отаншылдық бұл – шынайы патриоттық сезім. Отбасыңды бағалай білу, тұратын үйіңді, аулаңды, қалаңды таза ұстау, қоғамдық орындарды бүлдірмеу, ұқыпты болу деген сөз. Әрбір адам жауапсыз қадамның арты бүкіл елге қасірет әкелуі мүмкін екенін терең түсінуге тиіс. Барлық азаматымызда жауапкершілік болса ғана, ісіміз оңға басады. Тамырын тереңнен тартып, руханиятымен тау тұрғызған Сыр жұртшылығы жарқын болашақ жолына тура таңдау жасап, ауызбіршіліктің үлгісін көрсететіндігіне сенімдімін. Жалпы, алдағы қоғамдық-маңызды шаралар азаматтардың жағымды көңіл-күйін қалыптастыруға, тұрақтылықты, қоғамдық келісім мен жалпыұлттық бірлікті нығайтуға ықпал етеді. Осы орайда &nbsp;7 ауданда музей, кітапхана, мұрағат, неке қию залы, ардагерлер және аналар, жастар орталықтары сынды бірқатар тарихи-мәдени, рухани ұйымдарды біріктіретін типтік үлгідегі «Руханият» орталықтары салынады», - деді Наурызбай Сейтқалиұлы.</blockquote>

Қазақстан және Қызылорда облысының жаңалықтары