<a href="https://kyzylorda-news.kz/">Kyzylorda-news.kz.</a> Дамыған елдерде кино саласы мемлекеттік идеологияның жаршысы әрі пайда алып келетін бизнес көзі болып табылады. Ал кино өнері пайда болған кезден бастап кинотеатр – оны таратушы басты құрал болып келеді.Киноны кең экранда кинотеатрда отырып көру мәдениеттіліктің белгісі. Қанша технология дамып, 3D, 4D теледидарлар пайда болғанымен, кино залдар үйдегі бейне құралдарына орнын бермей келеді. Ал интернет ресурстарына сүйеніп, онлайн түрінде ақылы фильмдер көруге мүмкіндіктің тууы таяу болашақта кино өнімдерін таратудың басты әрі жаңа нысанына айналуы бек мүмкін. Сол себепті өнеркәсіптік революция дәуірінде технологияның әрбір мүмкіндіктерін тиімді пайдалана білуіміз керек.Жалпы дамыған елдер осы кино өнері арқылы миллиондап пайда түсіріп отырғаны мәлім. Әлемдегі мұндай жүйенің алып мекені – Голливуд болып саналады. Ал әлемдегі ең ірі онлайн кино қорын жасаушы «Netflix»-тің табысы 2010 жылы 2,1 миллиард доллар болса, қазір 3-4 есеге артып кеткен. Қысқасы, әлемнің кино рыногі барған сайын ұлғайып, шекарасыз алып кеңістікке жайылып барады. Бизнес, мәдени құндылық әрі өнер ретінде кино-индустриясының жан-жақты мүмкіндіктерін әлем елдері барынша тиімді пайдаланып жатыр. Біз үшін де бұл бүгінгі күнгі кезек күттірмейтін өзекті проблема. Сондықтан тек қалалық жерлерде емес, бүкіл қазақстандықтардың кино мәдениетін қалыптастыруымыз керек-ақ.Кеңес кезеңінде әр ауылдағы клубтарда апта сайын көрсетілетін киноларды ел асыға күтетін. Жексенбіде мәдениет үйіне қарай ағылған жұрт кинодан алған әсерін айтып тауыса алмайтын. Ал Қазақстан егемендік алғаннан кейін бұл үрдіс кілт тоқтап, киноиндустрия ұзақ уақыт бойы өз орнын таба алмай келді.Қазір қазақ етек-жеңін жинап, өз қолы өз аузына жететін күнге де жетті. Қазақстанда түсірілген немесе Қазақстандық режисерлар түсірген фильмдер сапасы жағынан өте жоғары бағаланып, өз көрерменін табуда. Отандық актерлер көрермендердің сүйікті жұлдыздарына айналып келеді.Әрине, кеңестің кезеңдегідей әр елді мекеннен бір кинозал ұстау оңай емес. Десе де аудан орталығында 100 мыңға жуық халыққа ортақ бір кинотеатр болса несі айып? Көкшоқыдағы Арман мәдениет үйінде бірлі-жарым кинолар ұсынылып жатады. Бірақ жұрт көпшіліктің талғамынан шығатын туындылардың тұрақты түрде көрсетілуін қалайды.Иә, ғайыптан тайып ауданда кино зал ашыла қалса, халықтың мәдениеті артып қана қоймай, демалып, тынығатын ошағына айналар еді. Бұл туралы осыдан біршама уақыт бұрын Алғабас ауылдық мәдениет үйінің директоры, айтыскер ақын Кенжебай Жүсіптен сұрағанымызда:<blockquote>«Сіздер айтқан ұсыныс бойынша видео проектрмен тағылымы мол, тарихи фильмдерді көрсетуді қолға алғанбыз. Бұл жайында пікірлерімді де ортаға салып келемін. Алайда, белгілі бір бағытта не болмаса заңдылықтарға сүйенбей кез-келген киноны халыққа көрсете алмаймыз. Сондықтан арнайы талаптар бекітілсе, сол бағытта жұмыстар атқарар едік. Бұл ауыл тұрғындарының мәдениетімен қатар, демалып, тынығатын орнына да айналатын болады. Әрі мәдениет саласының да жұмысы алға ілгерілеп, кіріс көзіне айналатыны белгілі. Осы орайда мәдениет үйіндегі видео құрылғылардың шама-шарқына қарай 1.30-2 сағаттан аспайтын, тарихы терең қазақ киноларын көрсетуді талапқа енгізсе деген өзіндік пікірімді де білдіргім келіп отыр. Сондай-ақ, ауыл тұрғындарының жас шамасына қарай түрлі киноларды да жік-жігімен бөліп, қарастырсақ. Көбіне ауыл тұрғындарының аға буын өкілдері баяғы үнді киноларын көрсетуді сұрап жиі келеді. Сол себепті ауылдық жерлердегі кинотеатр мәселесі өте керек дүние. Көрермендері де табылатынына сенімім кәміл. Сондықтан, осы ұсынысқа жан бітірсе, алда атқарылар жұмыстың да ауқымы кеңи түспек», – деп өз пікірін білдірген болатын.</blockquote>Түйін: Сонау 70-90 жылдар аралығында аудандағы барлық клубтарда кино көрсетілетін. Оған ауыл тұрғындары ағылып барушы еді. Бүгінгі таңда осы үрдісті қайта жандандыруды қолға алса, мәдениет үйлерінің жұмысы жолға қойылып, әжептеуір табыс көзі де болар еді. Сіз не дейсіз, құрметті оқырман?

Кенжебай Жүсіп, Алғабас ауылдық мәдениет үйінің директоры: Ауылдарға кинотеатр керек

<a href="https://kyzylorda-news.kz/">Kyzylorda-news.kz.</a>&nbsp; Дертіне шипа іздеген науқастың сауығып кетуіне алдымен дәрігер жауапты болса, одан кем қарамайтын денсаулық сақшысы – медбике. Бүгінгі кейіпкеріміз – аудандық аурухананың хирургия бөлімшесінде еңбек жолын медбикеліктен бастап, табан аудармай 41 жыл жемісті еңбек етіп келе жатқан медбике &nbsp;Күлжақан Шәкірқызы Саймова.&nbsp; &nbsp; &nbsp; &nbsp; Күлжақан Шәкірқызы 1962 жылы 25 қаңтарда Арал қаласында дүниеге келді. Анасы үй шаруасында, әкесі теміржолшы болды. Отбасында 7 бала тәрбиеленді. Күлжақан 1969 жылы №213 мектепке қабылданып, осы мектептен &nbsp;сегізжылдықты бітіріп, 9-10 сыныпты №13 мектептен &nbsp;тәмамдады. Сөйтіп, 1979 жылы онжылдықты бітірген соң киелі Түркістан қаласындағы медициналық училищесіне оқуға түсті. Мамандық таңдауда қателеспеген алғыр қыз медициналық училищені 1981 жылы "қызыл" дипломмен бітіреді. Сол жылы жас мейірбике 19 жасында Арал аудандық ауруханасының хирургия бөлімшесіне өз мамандығы бойынша қызметке орналасады. Сөйтіп ата-анасынан өнегелі тәлім-тәрбие алған қаршадай қыз болашағын медицина саласымен байланыстырды. Оның &nbsp;қызметтегі алғашқы ұстазы, бүгінде зейнеткер Клара Доштаевадан үйренгені көп."Отан отбасынан басталады" деп бекер айтпаған. Әрбір адамзаттың — алтын ұясы десе алдымен отбасы ойымызға орала кетеді. Бала отбасында әкеден ақыл, анадан мейірім алады. Күлжақанды тағдыр еркелете қоймады. Медучилищеде оқып жүргенде анасы өмірден өтіп, қиындық туындаған сәтте мойымады. Ізінен ерген бауырларын ешкімнен кем қылмай оқытып-тоқытты, қатарға қосты. Аллаға шүкір, бүгінде барлығы да отбасылы, балалы-шағалы.<blockquote>Ақ халатты жандардың сенімді серігіне айналған мейірбикелердің жұмысы қашанда үлкен жауапкершілікті қажет етеді. Дәрігер емінің нәтиже беруі де ең алдымен медбикенің ұқыптылығына байланысты. Әр медицина қызметкері өз білімі мен біліктілігін үнемі жетілдіріп, медицина саласындағы жаңалықтарды оқып-біліп отыруы тиіс. Дәрігер науқасты тексеріп, тағайындауын бергеннен кейінгі бар жұмысты медбике атқарады. Адамның жаны өмір мен өлімнің арасында тұрғанда әр секунд қымбат. Әрбір өзгерісті қалт жібермей қадағалап, оны дәрігерге жеткізу – медбикенің міндеті. Сонымен қатар егуін жасап, дәрі-дәрмегін уақытылы беріп, төсек-орын, ас-ауқатын, жалпы хал-жағдайын қадағалап, науқасқа қарайтын медбикелердің еңбегі өлшеусіз. Осындай жауапкершілігі мол жұмысқа өзіммен қатар келіп, &nbsp;адал еңбек еткен, бүгінде зейнеткер Тәжігүл Дүйсенбаева, Марал Әбілдаева, Гүлнар Бимағанбетова сынды құрбыларым және аға медбике Шолпан Ахметова мен егу бөлмесінің аяжаны Ләззат Піренова және де басқа әріптестерімнің &nbsp;еңбектеріне табыс, отбастарына амандық тілеймін,– дейді ақ халатты абзал жан Күлжақан Шәкірқызы.</blockquote>Медбике Күлжақан осы күнге дейін қаншама жас буынның тәжірибесін толықтырды, білікті медбике етіп шығарды. Қазіргі таңда хирургия бөлімшесіндегі медбикелер Күлжақанның ізін жалғастырып келе жатқан Ақтоты Шынбергенова мен Назым Айсауытова, Динара Бимағанбетова мен Жазира Қанатова өз ісінің мықты мамандары. Үзілгелі тұрған үмітті қайта жалғайтын, тіпті кейде ажалдан арашалап, екінші өмір сыйлайтын ақ халаттылар қандай құрметке де лайық. Уақытпен санаспай тәулік бойы науқастың жанында қалатын медбикенің қызметі адалдық пен жауапкершіліктен жаратылғанына еріксіз бас иесің, құрмет тұтасың, мақтан етесің.Абзал жанның ұзақ жылғы қызметі аудандық, облыстық сала басшылығы тарапынан лайықты бағаланып, түрлі мақтау-марапатқа да ие болды. Жақында медицина қызметкерлері күні қарсаңында кезекші мейірбике Күлжақан Саймова хирургия бөлімшесіндегі 41 жыл азаматтардың денсаулығын сақтау ісіне қосқан үлесі мен мінсіз, адал қызметі үшін Қазақстан Республикасы Денсаулық сақтау министрлігінің Алғыс хатымен &nbsp;марапатталды. Еңбектің өтеуі деген осы болар.<blockquote>Күлжақанмен қызметке де бірге келдік. Оның мамандығына деген сүйіспеншілігі, адалдығына тәнтімін. Қызметіне жауапкершілікпен қарайды. Қазір қай салада болмасын талап күшейтілді. Білікті маман бөлімшедегі әріптестерімен тығыз байланыс орнатып, науқастарды күтіп-баптауды үйретуге де уақыт табады. Қолы қалт етсе, жастарға білгенін үйретіп, тәжірибесімен бөлісу, кәсіби деңгейін көтеруден жалыққан емес. Замандасым Күлжақан ұдайы алдыңғы шепте жүріп, науқастардың тез сауығып кетуіне атсалысып келеді, – деп жылы лебізін білдірді Алима Жандеуова.</blockquote>Өзінен кейінгі жас мамандарға білгенін үйретіп, кәсіби біліктілігін арттырып келе жатқан өз ісінің майталманы Күлжақан Шәкірқызы– отбасында сүйікті жар, аяулы ана, мейірімді әже. Жолдасы Әмірхан кеме құрастыру зауытында токарь болып еңбек етті. Қазір жеке кәсібімен айналысады. Жан жары Әмірханмен бірге төрт қыз, бір ер баланы дүниеге әкеліп, өсіріп-тәрбиеледі. Бүгінде ата-ана бақытына бөленген Әмірхан мен Күлжақан ұлын ұяға, қыздарын қияға қондырып, немере сүйіп отырған жандар. Балаларының барлығы да жоғары білімді мамандар. Бақытын отбасынан, сүйікті мамандығынан тапқан Күлжақан Шәкірқызының ендігі арманы – жолдасымен тең отырып, бейнетінің зейнетін көріп, балалары мен немерелерінің сүйіспеншілігіне бөленіп, олардың жақсылығын көру.Ақ халатты абзал жандар үшін ең бастысы – халықтың алғысына бөлену. Өйткені ол – марапаттың төресі. Еңбекқор әрі ізденгіш, абырой-беделі артқан қадірлі маман, аяулы ана, мейірбан әже Күлжақанның бақыты да, мұраты да – осы.

Мерейі үстем медбике 

<a href="https://kyzylorda-news.kz/">Kyzylorda-news.kz.</a>&nbsp; Осы жылдың наурыз айында Ашық НҚА порталында жарияланған Үкімет қаулысының жобасында аталған мерекені бекіту ұсынысы көтерілген болатын. &nbsp;Бастама негізінде Әкелер күнін маусымның үшінші жексенбісіне белгілеу жоспарланды. Атаулы күнге орай Премьер-Министр Әлихан Смайылов тиісті Үкімет қаулысына қол қойды. Тиісінше, мереке ресми бекітілді.Әкелер күнін атап өтуге бастамашы болған Ақпарат және қоғамдық даму министрлігінің мәліметінше, аталған мереке еліміздегі отбасы институтын нығайтуға әсер етпек.&nbsp;<blockquote>«Мерекелік күндердің тізбесіне «Әкелер күні» мерекесін енгізу Қазақстандағы отбасылық құндылықтарды ілгерілетуге, отбасы институтын нығайтуға, сондай-ақ әкелер институтын дамытуға ықпал етеді. Мұндай мереке көптеген әлем елдерінде бар», – деп мәлім етті министрліктен.</blockquote>Апта ағымында Сырдария аудандық қоғамдық даму бөлімінің қолдауымен және жастар ресурстық орталығының ұйымдастыруымен "Әке көрген оқ жонар" тақырыбында "Жалын" сауықтыру лагерінде еркін форматта кездесу өтті.Кездесуге аудандық ардагерлер кеңесінің төрағасы Мұса Келдібаев, Халықаралық "Қазақ тілі" қоғамдық бірлестігінің Сырдария аудандық филиалының төрағасы Шаһарбек &nbsp;Нұрсейітов, қоғамдық даму бөлімінің жетекші маманы Тұрар Нұрмағанбетов пен орталық кеңесшілері Нұржан Сейтжан Нұржан мен Айдана Мырзахметова қатысты.Кездесу барысында әкенің отбасындағы рөлі мен әкенің берер тәрбиенің маңыздылығы жөнінде кеңінен әңгіме өрбіді. Кездесуге келген қонақтар өмірден алынған мысалдар арқылы қызықты оқиғалар айтты.&nbsp;<blockquote>&nbsp;Ауданның барлық мектептерінде әкелердің қоғамдық ұйымы жұмыс істейді. Мұнда елге сыйлы, балаларына жақсы тәрбие берген отбасылардың әкелері арнайы сабақ өткізіп, әсіресе ер баланың тәрбиесі жөнінде кеңестерін айтады. Осындай жақсы жұмысты үйлестіріп отырған ел ағасы Мектепхан Елеусіновты көпшілігіңіз жақсы білесіздер. Мектепхан аға балаларына жақсы тәрбие берумен қатар, барлығын спортқа баулыған өнегелі отбасының иесі. Ардагер спортшы ауданда талай мықты спортшының шығуына атсалысты. Ардақты ардагер зейнетке шықса да ауданның қоғамдық жұмысында да белсенді. Ауданда Мектепхан аға секілді елге сыйлы азаматтар баршылық. Әкенің қоғамдағы орнын айшықтай түсетін атаулы күннің бекітілгеніне қуаныштымыз. Әр бала үшін отбасында әкенің орны бөлек. Әсіресе біздің ұлттық тәрбиемізде асқар тау боп саналатын ардақты әкелерге құрметіміз ешқашан кемімек емес. Сіздер бақытты ұрпақсыздар, ата-аналарыңыздың қадірін біліп, сабақты жақсы оқу үшін жазғы демалыста жақсылап тынығып, сауығып алыңыздар, – деді Шаһарбек Балтабайұлы.</blockquote>Лагерьдің аға тәлімгері Тұрар Жағыпаров кездесудің жоғарғы деңгейде өтуіне қолдау білдіріп, іс-шараны мазмұнды өткізді. &nbsp;

 Сырдарияда тұңғыш рет әкелер күні мерекесі аталып өтті

<a href="https://kyzylorda-news.kz/">Kyzylorda-news.kz.</a> «Ақмешіт тәттісі» кәмпиттерін шығаратын кәсіпорында күніне 100 келі кәмпит дайындалады. Бұл туралы Қызылорда облыстық кәсіпкерлік және өнеркәсіп басқармасының баспасөз қызметі хабарлады.Еліміздегі отандық өнім өндірушілерге қолдау көрсету мәселесі үнемі назарда. Өзімізде шығарылатын өнімнің сапасын арттыру, соған сай тұтынушылар назарын барынша отандық өнімге бұру, Қазақстанда жасалған бұйымдар, құрал-жабдықтар, азық-түлік тауарларының бәсекеге қабілеттілігін арттыру бағытында елімізде түрлі бағдарламалар жүзеге асырылуда.Орасан зор экономикалық әлеуетінің арқасында өңірімізде жыл сайын ірілі-ұсақты бірнеше кәсіпорындар ашылып, зауыт-фабрикалар іске қосылып жатыр.Солардың бірі - Қызылорда облысының бренд өнімдерінің қатарына қосылған «Ақмешіт тәттісі» кәмпиттерін шығаратын кәсіпорын. Цехта тәулігіне 100 келі кәмпит дайындалады.Кәсіп иесі Зәуре Ахметованың айтуынша, қазіргі таңда кәмпиттің апельсин, pоkс, барбарuс, coлoмкa, лuмон, дюшеc секілді түpлерi шығарылады. «Ақмешіт тәттісі» кәмпиті өз облысымызда ғана емес, өзге өңірлерде де сатылады.<blockquote>«Бұл кәсіпті 2021 жылы бастағанда кәмпиттің 2-3 түрін ғана өндіретін едік. Кәмпит шығарудың өз қиындығы бар. Қоспаларының мөлшерін білуің керек, брендке айналған өнімнің өз дәмін беруің керек. Әрине соған арналған құралдарымыз, маманданған кондитерлеріміз бар. Бұл жобаны бастау үшін біз «Қызылорда Өңірлік инвестициялық орталығына» жүгіндік. 10 млн теңге көлемінде несие қаражатына «Ақмешіт тәттісі» өнімдері ерекше және бірегей жарқын түрдегі жаңа қаптамамен шығарылатын болды. Болашақта өндіріс көлемін арттыруды көздеп отырмыз», - дейді кәсіпкер.</blockquote>Қазіргі таңда, цехта өндірілген өнімдері барлық аудандарда сатылуда. Жеке кәсіпкер өндірілетін өнім түрін кеңейтіп, тағы түрлі тәттілерді өндіріске қосуды жоспарлап отыр.

«Ақмешіт тәттісі» цехында тәулігіне 100 келі кәмпит дайындалады

<a href="https://kyzylorda-news.kz/">Kyzylorda-news.kz.</a> Бүгінгі қоғамда көпбалалы аналардың рөлі артпаса, кеміген жоқ. Оларға мемлекет тарапынан қолдау да жетерлік. Әкені асқар тауға, алып бәйтерекке, мықты қорғанға теңейміз. Балаларды өсіру, өмірге дұрыс бағыт беру&nbsp; әрине, оның иығына жүктеледі.Қала тұрғыны 37 жастағы Нұрлан Борамбаев – алты баланың әкесі. Келіншегі Айсұлу Талғатқызының жетінші бөпесіне аяғы ауыр. «Бұйыртса жақында тағы кішкентайлы боламыз» деген азаматтың жүзінен қуаныштың лебін байқадық.Әкесі Кәрімханның жалғыз тұяғы, ізін жалғар ұрпағы болғандықтан, анасы «көпбалалы болыңдар» деп әрдайым батасын беріп келеді. Кішкентайынан әкесінің жанында жүріп, еңбекке ерте араласқан Нұрлан қандай іске болсын бейім. Сантехникалық жұмыстар мен есік алдындағы шаруаны өзі атқара береді. «Көкшетау-Қызылорда» жүрдек поезында жолсерік болып жұмыс істейтін ол демалған уақытында отбасылық кәсіпті жүргізеді. Осыдан 3 жыл бұрын «Әлихан» атты түшпара шығарып, оны дүкендерге өткізу ісін қолға алған. Келіншегі Айсұлу түшпараның қамырын илеп, жайып берсе, балалары жабылып, оны әдемілеп түйіп шығады. Ал отағасына дайын өнімді дүкендерге уақытылы жеткізу міндеттелген.&nbsp; Ауызбіршілікпен кіріскен кәсіптері берекелі болып, қазіргі кезде тұрақты тұтынушылары қалыптасқан бірнеше дүкенде өнімдері сатылуда.&nbsp;Дүниеге әкелген үш ұлы мен үш қызы жасыл құрақтай жайқалып өсіп келеді. Балаларының алды Азамат 15-те болса, кенжесі Әлихан 3 жастағы бүлдіршін. Қыздары Кәусар, Қымбат, Қасиет – әжесі мен анасының көмекшілері.&nbsp; Рамазан мен Әлихан өзінің ізінде жүріп қазірден үй тіршілігіне араласады.<blockquote>&nbsp;Өзім әкемнің жалғыз ұлы болдым. Менен кейін бір қарындасым бар. Ол тұрмыста. Маған бір түйір бала деп қарамады. Керісінше, бала кезімде әкемнің жанынан қалмай, қолғанаты болдым. Ауыр жүк көлігімен алыс жолға шығатын. Бір жері бұзылып қалса, керек құрал-жабдығын алып беріп, қасында жүріп, көлік жөндеуді үйреніп алдым. Өкінішке қарай, ол кісі 48 жасында өмірден ерте кетті. Алайда мені еркелете жүріп, еңбекке баулыды. Өмірдің қандай сәттерінде де мойымауды үйретті. Қиындыққа төзе біліп, отбасындағы жауапкершілікті мойымай көтеруді құлағыма сіңірді. Қазір өзім де алты баланың әкесі атандым. «Баланы тәрбиелеме, өзіңді тәрбиеле» деп жатады ғой. Айтқан сөзің бөлек, ісің басқа болмау керек. Өйткені, бала көргенін қайталайды. Әкем қайтқан соң, отбасының барлық ісі өзіме жүктеліп, ерте есейдім. Анамның өмірі мен бала-шағамның болашағына жауаптымын, – дейді ол.</blockquote>«Әке көрген оқ жонар» демекші, біздің кейіпкеріміз әкесінің берген тағылымды тәрбиесін балаларына үйретіп, оларды өмірге бейімдеп, еңбекке баулып келеді. «Бір әкенің тәрбиесін жүз мектеп бере алмайды» деп бекерге айтпаса керек. Ұрпақтар сабақтастығы, үлгі-өнеге осылай атадан балаға жалғасатыны заңдылық секілді.

Нұрлан Борамбаев: Әкем бала кезімнен еңбекке баулыды

<a href="https://kyzylorda-news.kz/">Kyzylorda-news.kz.</a>&nbsp; Облыс орталығындағы жоғары мамандандырылған көмек көрсететін бірден-бір медициналық ұйым – көпбейінді облыстық аурухана. Медицина қызметкері мерекесі қарсаңында аурухананың бас дәрігері, облыстық мәслихат депутаты Нұридин Әмитовпен сұхбаттасудың сәті түскен еді.–&nbsp; &nbsp; Нұридин Егенбердіұлы, алдымен кәсіби мерекелеріңіз құтты болсын.– &nbsp; &nbsp;Рақмет.– Кейінгі уақытта портал қызметіне қатысты көпшілік арасында екіұдай пікір бар. «Портал шыққалы ауруханаға жату қиындап кетті» деген айтылады. Шынында солай ма?– Біздің аурухана 525 орындық тәуліктік стационарға арналған. Сонымен қатар 30 ақылы және 115 күндізгі стационар бар. Бүгінде 525 орындық тәуліктік стационарда &nbsp;600-ге жуық науқас ем алып жатыр. 70-80 науқас артық. &nbsp;Науқас артық болған сайын біздің де жүктемеміз артады, яғни, &nbsp;шығынымыз еселене түседі. Ол жерге қосымша төсек-орын қоямыз, қызметкерлеріміздің де жүктемесі артады деген сөз. Ал науқастардың артуы негізінен шұғыл түрде түсушілердің көбеюіне байланысты болып отыр. 80 пайызы жедел көрсетіліммен жеткізілуде. Портал арқылы келетіндер ол – жоспарлы түрде жататын науқастар, яғни, &nbsp;созылмалы ауруы бар кісілер. Порталға емхана салады. Арнайы программа арқылы жүзеге асырылады. Аурудың жағдайына қарай және ауруханадағы төсек-орын айналымына байланысты жүйе өзі есептеп шығарады. Біз тек стационарға жатуға көрсетілім бар ма, жоқ па соны айтамыз. Қалғанының бәрі автоматты түрде есептеледі, шешіледі. Біз оған араласа алмаймыз. Ал ол есебін шығарамын дегенше жедел науқастар келіп қалады. Осылайша күтіп қалатын жағдайлар болады. Бірақ менде өзімнің квотам бар. Ол көпбалалы аналарға, ардагерлерге, мүгедектерге беріледі. Сол арқылы да жатқызылады. Ол да шектеулі. Көпшіліктің жату қиын деп ренжитіні осыдан деп ойлаймын. &nbsp;Тағы бір айта кетерлігі, проктология, урология, нейрохирургия, кардиология, кардиохирургия, аллергология сынды бөлімшелер облыс бойынша бізде ғана бар. Сондықтан портал бойынша реніш туындап жатады. Сосын тағы бір нәрсе, негізінен науқас ауруханаға медициналық көрсеткіш бойынша жатқызылады. Бірақ бізде әлі күнге дейін «жатып алайыншы» деп келетіндер көп. Олай болмайды десек, «мені жатқызбай жатыр» деп шағымданады. Аурудың көрсеткішіне қарай тәуліктік стационардан басқа күндізгі бөлімдер бар, оның өзі аудандық деңгейдегі, облыстық деңгейдегі болып бөлінеді. Тіпті емхана дәрігерлерімен байланыса отырып, үйден ем алуға болатынын айтсақ, &nbsp;түсінбейтіндер көп.&nbsp;– Қандай жаңалықтарыңызды &nbsp;бөлісер едіңіз?– Ауруханада 2009 жылдан бері кардиология орталығы бар. Оның құрамында кардиохирургия бөлімшесі жұмыс істейді. Сонымен қатар аритмология, эндоваскулярлы бөлімше, кардиореанимация бар. Кардиохирургия бойынша жүрекке ашық ота жасаудың жаңадан бірнеше тәсілдері енгізілді. Әсіресе, жүректің жекелеген ақаулары бойынша ота түрлері жасалып жатыр. Мәселен, кардиологияның аритмология деген бағыты бар. Ол – жүрек ырғағының бұзылуы. Қазір көп адамда кездесетін сырқат түрі. Соны емдеудің тың тәсілдерін қолданып жатырмыз. Екі жылдай болды бастағанымызға. Арнайы құрылғысын да алдық. Нейрохирургия бойынша да бірқатар жаңа заманауи әдіс-тәсілдерді енгіздік. Бас миының аневризмасы, мальформациясы кезінде ашық ота түрінде жасауды біздің мамандар меңгеріп алды. Сондай-ақ, бел омыртқаларының зақымдануында құрсаулаудың жаңа түрлері енгізілді. Грыжаға ота жасауда кіші инвазивті тәсілдер қолданылуда. Урология бойынша да көптеген жаңалық бар. Соның бірі – лапароскопия арқылы қуықтан шығатын несепағар жолының реконструктивті оталары. Бұрын оны мамандар ашық түрде жасайтын, қазір жаңа әдіс бойынша жабық түрде жасалады. &nbsp;Сонымен бірге екі жылдай болды бүйректі лапароскопиялық әдіспен алып тастауды меңгердік.Жалпы ауруханада инсульттік, офтальмохирургия, реабилитациялық және хирургиялық бейіндер, терапиялық бейіндер орталықтары бар. Хирургиялық бейіндер орталығына хирургия, проктология, урология, ортопедия, травматология, тағы басқалар кіреді. Ал терапиялық бейіндерге неврология, пульмонология секілді бірнеше бөлімшелер қарайды.– Емдеу орнының материалдық-техникалық базасы қандай?– Аурухананың құрал-жабдықтармен жабдықталуы &nbsp;93-94 пайызды құрайды. Бірақ жыл өткен сайын материалдық-техникалық база тозады. Физикалық тозғаннан бөлек, моральды тұрғыдан да ескіреді. Медицина күн өткен сайын жаңарып жатыр. Жылдан жылға жаңа емдеу-тәсілдері, соған сәйкес заманауи техникалар, аппараттар да жасап шығарылуда. Сондықтан жаңа құрал-жабдықтарға деген қажеттілік туындай береді. Қазір бізге ауыр техникадан қажеті – МРТ аппараты. Биыл келеді деген, күтіп отырмыз. Екі ангиограф, екі КТ аппараты жұмыс істеп тұр. Ангиограф арқылы қаншама &nbsp;коронаграфия жасалуда. Жылына 2 мыңға жуық коронаграфия жасалады. Пандемияның кезінде пайдасы көп болды. Белгіленген екі аймаққа қойдық та науқастың анализі дайын болғанша қызметімізді жасай бердік. Ангиограф арқылы тек жүрек ауруын емдеп жатқан жоқпыз, бас ми қан айналысының патологияларын анықтап, анықталған жағдайда эндоваскулярлы тәсілмен ем жүргізіп жатырмыз. Сонымен бірге перифериялық қан тамырларының қан айналысын анықтаймыз. Мысалы, аяқтың, қолдың тамырларын тексеріп, тромб болған жағдайда оны алып тастаймыз. Жатыр миомалары, бауыр гемангиомасы кезінде де осы құрылғының көмегіне сүйенеміз.– Кадр мәселесіне тоқталсақ, маман тапшылығы бар ма? Медицина қызметкерлерінің біліктілігін арттыруда қандай жұмыстар жасалып жатыр?– &nbsp; &nbsp;Бізде маман тапшылығы деген мәселе жоқ. Мамандарды тұрақтандыруда 50 пәтерлік қызметтік үйіміз бар. Қазір медицина қызметкерлерінің айлығы көтерілді. Екі-үш жылдың ішінде бірқатар реаниматолог-анестезиологтарды жұмысқа алдық. Ал біліктілігін арттыру бойынша жұмыс жолға қойылған. Бес жылда бір рет мамандардымызды оқытуға міндеттіміз. Қажеттілік болғанда оған қарамай &nbsp;жібереміз. Пандемияның кезінде &nbsp;онлайн курстар өтті. Қанша маманды өзімізге шақырып, шеберлік кластар өткіздік. Жыл басынан бері 5 шеберлік класы өтті. Аритмология, кардиохирургия, нейрохирургия бойынша Астана, Алматы қаласынан мамандар келіп, біздің жігіттерге үйретті. Өзіміздің елден бөлек шетелге барып оқыту да жүйелі түрде жалғасып келеді. Денсаулық сақтау басқармасының жоспарында бар. 2019 жылы Кореяның Сеул қаласындағы ауруханаға біздің 12 дәрігеріміз барып, оқып келді. Биылдың өзінде мамандарды Израильге 5-6 бағыт бойынша жіберу жоспарланған, дайындық жүруде.– &nbsp; &nbsp;Өзіңіз айтып өткендей, емдеу, алдын алу мекемелерінің материалдық-техникалық базасы жақсы, медицина қызметкерлерінің білім-білігін жетілдіруде жүйелі жұмыс бар, еңбекақылары көбеюде. Соған қарамастан елімізде медициналық қызметке, дәрігерлерге деген тұрғындардың сыны, арыз-шағымы азаяр емес. Себебі неде деп ойлайсыз?– Оның әртүрлі себептері бар. Мысалы, жоғарыда айтқанымдай, біздің тұрғындардың арыздары «ауруханаға жатқызбай жатыр» дегеннен басталады. Тәуліктік стационарда жатып ем алуға медициналық көрсеткіші келе ме, жоқ па шаруасы жоқ «мені жатқыз» деп келеді. Міне, түсініспеушілік осыдан басталады. Қай жерге барсақ та порталға деген өкпе-реніш. Портал деген әлемде солай, оны біз өзгерте алмаймыз. Арыз-шағымның тағы бір кең тараған түрі бар ол – &nbsp;деонтологияға байланысты. Дәрігер мен науқастың немесе науқастың туысқанының арасындағы қарым-қатынасы. Дұрыс сөйлеспеді, қолын сілтеп кетті, дауыс көтерді деп жатады. Бірін бірі дұрыс түсінбей қала ма, жеткілікті түрде түсіндірмей ме білмедім. Үшінші бір себебі – көрсетілген ем-домның сапасына көңіл толмаушылық. Дәрігердің білімі, білігі жетпей қалуы мүмкін. Болмаса қанша тәжірибелі, білікті маман болса да кейде ойламаған жерден қате кетіп жатады. Мұны медицинада, оның ішінде хирургияда «ятрогения» деп айтады. Операция үстінде жақсылық жасаймын деп отырып, абайсызда басқа жерге тиіп кетеді. Ол бізде ғана емес, әлемде кездесетін жағдай. Меніңше, көп жағдайда дәрігер мен науқас арасында түсіністік, байланыс керек. Бізде сол жетіспейді. Дәрігер науқасты тыңдай білсе, жылы сөзін аямаса, біздегі арыз-шағымның 60 пайызы азаяр еді деп ойлаймын. Осыдан отыз жыл бұрынғы медицинамен қазіргіні салыстыруға болмайды. Қазіргі біздің медицина әлдеқайда дамып кетті. Ол кездегі жұмыс пен қазіргіні салыстыруға әсте келмейді. Қазір жаңа технологиялар, заманауи әдіс-тәсілдер жыл сайын енгізіліп жатыр. Мысалы, осыдан отыз жыл бұрын Қызылордада ашық жүрекке операция жасау дегенді ойлап па едік? Жоқ. Ондай миымызға да кірмейтін. Облыс орталығын былай қойғанда, ауданда жасалып жатыр. Мәселен, Қазалыда осындай оталар жасалады. Салыстырмалы түрде қарасақ, &nbsp;отыз жылда елімізде медицина алға шығып кетті. Жоғары технологияларды енгізу, күрделі операциялар жасаудан отандық медицина озып тұр. Оны мойындауымыз керек. Арыз-шағым көп дейміз, әрине, қоғам, сала дамыған сайын адамдардың талабы да өседі. Қазір Астана, Алматы қалаларындағы ғылыми орталықтарда ағза алмастыру, яғни, жүрек, бауыр, бүйрек ауыстыру оталары жасалуда. Тек донор жеткіліксіз. Буын ауыстырудан да кенде емеспіз. Біздің травматология бөлімінде жылына 300-ге жуық буын ауыстыру операциясы жасалады. Бұрын солардың бәрі жүре алмай, ерте мүгедек атанатын. Қазір операциядан кейін жүру былай тұрсын, жүгіріп кетеді. Операциядан кейін дұрыс болмай қалу жағдайы жүзден бір-екеу шығар. Онда да науқастың ағзасына байланысты болып жатады. Қазір әлеуметтік желі деген жақсы болды, анық-қанығын білер-білместен жариялап жібереді, оның ақыр аяғы белгілі.– Депутат ретінде өзіңіз көтерген, ықпал еткен мәселелер туралы айтып берсеңіз…– Депутат ретінде белгілі бір мәселені көтеріп, оны өзім ғана жүзеге асырдым деп айта алмаймын. Олай айтсам ұят болар. Мәселе бір адаммен шешілмейді ғой, басқармалар бар, ауыл, аудан, облыс әкімі бар, ауылдардың белсенді азаматтары болады солармен біргіп атқарылып жатқан шаруалар. Ауылдық жерлерде, атап айтқанда, Өзгент, Жаңарық, Бірлік елді мекенінде жаңадан дәрігерлік амбулатория салынып, тұрғындар игілігін көруде. Біршама ауылдарда &nbsp;клубтар салынып, күрделі жөндеуден өткізілді. Спорт кешендері салынып, іске қосылды. Жолдар жөнделіп, көпірлер, мектептер салынуда. Сондай шаруалардың ортасында себепші болып жүрміз. Әлгінде айтылғандай, қоғам алға жылжыған сайын жаңашылдық келеді. Бұл кімді де болса ширатып, әсіресе атқарушы органдар мен халық арасындағы дәнекерлік міндетін күшейте түсуде. Сол жолда еңбек ету, елдің мұң-мұқтажын жеткізу, әрине, біз үшін үлкен сын, жауапкершілік болып қала береді. &nbsp;

Нұридин Әмитов: Халықтың сенімі үлкен жауапкершілік жүктейді

<a href="https://kyzylorda-news.kz/">Kyzylorda-news.kz.</a> «Өркениет» медицина колледжі ұзақ жылдар бойы қалыптасып, дамып, облысымыздың медициналық мекемелеріне өз ісіне адал, іскер мамандар даярлап келеді. Оқу орны заман талабына жауап бере алатын жастарды тәрбиелеп, тәжірибесін жетілдіруде.Оқу базасы заманауи құрал-жабдықтармен толыққанды қамтамасыз етілген. Жиырма жылдық тарихы бар колледжді осы уақыт аралығында 3000-ға жуық түлек бітіріп, еліміздің түкпір-түкпірінде абыройлы қызмет атқарып жүр.Оқытушылар мен студенттер түрлі деңгейдегі жарыстарға қатысып, жүлделі орындар иеленіп жүргенін де айта кету керек.&nbsp;<blockquote>– Түлектеріміз ұшқан ұясымен тығыз қарым-қатынаста. Студенттермен жиі кездесіп маман тәрбиелеу ісіне өлшеусіз үлес қосып келеді. Жалпы колледж екі мамандық бойынша орта буын медицина қызметкерлерін дайындайды. Атап айтар болсақ, «Фельдшер» және «Жалпы практика негіздері» мамандығы. Негізі жеке оқу орнын тек табыс көзі деп қарастыруға болмайды. Мұндағы жүйе, жұмыс күрделі, 83 адамды жұмыспен қамтып отырмыз, 678 студент білім алуда, – дейді «Өркениет» медицина колледжінің директоры Анар Жайпанова. Колледж ұстаздары осы кезге дейін он бес оқу құралын дайындап, жариялады. Биыл «Жалпы патология» және «Паллиативті көмек және онкология» атты екі оқу құралын шығару жоспарда бар. «Адам өмірінің арашашыларын дайындау салғырттықты көтермейді. Сапалы білім беру – басты мақсат», – дейді оқытушылар.</blockquote>&nbsp;Бүгінде оқу процесінің 65 пайызы практика жүзінде өтеді, яғни, білім беру процесінің дені емдеу мекемелерінде жүреді. Ол үшін 19 денсаулық сақтау мекемесімен келісім-шарт жасалған. Себебі, болашақ маман теориялық ғана &nbsp;емес, шынайы жағдайда кәдеге асатын практикаға да қол жеткізуі шарт. Сондықтан, өндірістік, клиникалық іс-тәжірибелер қатаң бақылауда.Әрбір шәкірттің алаңсыз білім алуы үшін барлық жағдай қарастырылған. Қажеттілігіне қарай студенттер жатақханаға орналастырылады. Бітірген түлектердің 70-80 пайызы тұрақты жұмысқа орналасады. Бұл – заман талабына сай маман даярлаудың жарқын жолы.<figure class="image"><img src="https://knadmin.beoblood.kz/uploads/3a0b9eb3_bbb4_4eaf_a8dc_53c8dd7dc379_43738edcb8.jpg" alt="3a0b9eb3-bbb4-4eaf-a8dc-53c8dd7dc379.jpg"></figure>&nbsp;&nbsp;

Жиырма жылдық тарихы бар білім ордасы

<a href="https://kyzylorda-news.kz/">Kyzylorda-news.kz.</a> «Болашақ» бағдарламасы арқылы шетел асып білім алған жастар легі Қазақстанға қайтып оралып, елдің әлеуетін көтеріп, экономика мен қоғамдық өмірді дамыту жолында аянбай еңбек етуге кіріскен. Мұндай ел асып, ілім алған Қазалыдан түлеп ұшқан жастар баршылық. Солардың қатарында қазіргі таңда Қорқыт ата университетінде экономика және менеджмент кафедрасының оқытушысы болып қызмет атқаратын Бекзат Ырза да бағдарлама арқылы 2016-2019 жылдар аралығында Ұлыбританияның Борнмут университетінде “Халықаралық қонақ үй бизнесі және туризм менеджменті магистрі” атанып келген. Жерлесімізді сөзге тартып, бағдарлама, шетелдегі оқу сапасы, Қазақстан туризмі жайында әңгіме өрбіттік.– «Болашақ» бағдарламасы түлектерге нақты қандай мүмкіндіктер береді?– Шетелге шығып, білімі мен білігін арттыруға аттанған жастар кәсібилігін шыңдап, тұлғалық қабілетін ашып, жан-жақты дамыған дайын маман ретінде оралады. Сапалы білімді алып келгендерге сұраныс ел ішінде өте жоғары. Оларға түкпір-түкпірден ұсыныс, шақырту түсіп жатады. Ғылыми дәрежені көтеруге көп көмектеседі. Ерекшелігі әлем бойынша бұл бағдарламаның баламасы жоқ. Мұнда алаңсыз ілімнің ізіне түсу үшін сізге ешқандай кедергі келтірмейтін жоғарғы шәкіртақы тағайындалған. Европалық достарым Қазақстан жастардың өздерін көрсетіп, Отанға қызмет етуі үшін толықтай мүмкіндіктер сыйлағанына дән риза болып, таңдай қағып жатады. – Көбіне бағдарламаны бітірген қазақстандықтар сырт жақта қызметте қалуды көздейді деген пікір айтылып жүр. Сізде елден кету туралы ой болды ма? Шетелден шақыртулар түсті ме?– Бұл халықтың арасында қалыптасқан теріс пікір. Мұндағы ең бірінші міндет оқуын тәмамдаған адамның қазақ елі үшін туған жердің топырағында тер төгуі болып табылады. Алғашқыда түлектердің сыртта қалып кету жағдайлары орын алған шығар. Қазір бәрі заң жүзінде жолға қойылған. Әрбір болашақтық елге келіп қызмет етуді, Отаны сыйлаған мүмкіндікті екі есе қылып қайтаруды парыз санайды.Ал, жеке басыма келетін болсам өсіп-өнген әулетте дүниеге келіп, қазақы тәрбие алған қыз ретінде мен үшін шетелде орнығу деген ой ешқашан маңызды болған емес. Тағы бір себеп – Қызылорда облысында жетіліп, алғашқы қызметке орналасып, тәжірибе жинағаннан кейін магистратураны бітірген жағдайда осында қайта оралуды өзіме міндет етіп қойдым.Астана, Алматы және Канадамен қатар Ұлыбританиядан түскен ұсыныстардан толықтай бас тартып, Қызылордаға жұмыс істеуге қайтып келдім. Ешқандай өкініш жоқ, қазіргі жағдайым өзімді қанағаттандырады.– Байқауымша, сіз бакалаврды Нұр-Сұлтан қаласында оқып шықтыңыз. Өзіңіз білім алған Евразия мен Борнмут университеттеріндегі айырмашылықты айта аласыз ба?– Айырмашылық әрине байқалады. Евразияда мен жалпы білімді, бакалаврды алып шықтым. Мұнда активті туризм, спорттық туризмге көп көңіл бөліп, қонақ үй бизнесіне деген қызығушылығым артты. Екі оқу орынын салыстырғым келмейді. Борнмутта мамандығыма ғылыми тұрғыдан тереңдеп, тәжірибе жинауға бардым. Ұлыбританияда ғылыми, сыни ойлауды үйрендім. Европалық білім беру жүйесінде өзін-өзі дамытуға, уақытты тиімді пайдалануға басымдық беріледі.– Ұлыбританияға барған бастапқы уақыттағы өзгерістерді қалай қабылдадыңыз? Джетлаг, тіл мәселесі қаншалықты қиындық туғызды?– Онда жүріп жергілікті халықтың тарихы мен мәдениетімен таныстым. Ешқандай қиындық болмады деп айту бекер. Басқа елге барып, өзге қоғамның өмір сүру салтына кірігу өте қиын. Ағылшын ұлты барлық жағдайға бейтарап қарап үйренген. Қазақылығым бір басыма жететін мен үшін түсініксіз дүниелер көп болды. Мәдени шок алғаным рас. Джетлаг қатты әсер етпеді. «Болашақ» арқылы оқуға түсуге дайындалғаннан бері күніне үш-төрт сағат ұйқымен жүру әдетке айналып кетті. Оған қоса Қызылорда мен Лондон қаласының уақыт белдеуі айырмашылығы төрт-бес сағатты құрайды.Ағылшын тілін елдегі дайындық барысында жоғары деңгейге көтеріп, еркін сөйлей алатын жағдайда шетелге шықтым. Ағылшындармен тығыз байланыста болып, тілдік қорымды тереңдетуге тырыстым.– Борнмутты сипаттап берсеңіз? Қазақ диаспорасымен араластыңыз ба?– Борнмут – Англияның оңтүстік-батысында Ла-Манш бұғазының бойында орналасқан. Ауа рай қолайлы, әдемі қалалардың бірі. Маған оқу орындарын таңдау кезінде ең бірінші жылы климат маңызды болды. Бұл қалада мен маманданған қонақ үй бизнесі жетік дамыған. Оқу ордасы әлемдік мықты қонақ үй және туризм мамандығын дайындайтын университеттердің үздіктер тізімінде.Бастапқы дайындық кезеңінде ағылшын тілі курсын Рединг қаласындағы Рединг университетінде оқыдым. Мұнда қазақтар өте көп шоғырланған. Бірақ Борнмутта жоқтың қасы. Бес-алты қандасыммен араласып тұрдым.– Қонақ үй бизнесі және туризм мамандығы кімдерді даярлайды? Қазіргі қызметіңіз жайлы айта өтсеңіз…– Туризм әртүрлі салаларға бөлінеді. Мен соның ішінде қонақ үй бизнесін таңдадым. Жалпы білімді туризм саласының менеджері ретінде алдым. Негізі сервистік қызмет көрсету түріне жатады. Қазіргі таңда толықтай бұл саладан кетіп қалдым деп айта алмаймын. Бірақ осы кезде түскен ұсыныстарға байланысты Қорқыт ата университетінде Халықаралық байланыстарды дамыту бөліміне келдім. Мұнда өзіме ұнайтын, көңілімнен шығатын қызметке орналастым деп айта аламын. Жұмысқа қуанып бару адам үшін ең маңызды. Бөлімнің қызметі халықаралық дипломатияға қатысты болған соң үлкен жауапкершілікті жүктейді. Сонымен қатар Қорқыт ата университетінде докторантурада оқып жатырмын. Туризмнен алысқа кеткен жоқпын.– Қазақстан туризмі қандай деңгейде?– 2013 жылы туризмге қызығып бастаған уақытта елдің деңгейіне көңілім толмайтын. Қазір өзгеріс байқалады. Үкімет те оң қабақ танытып, экономиканың дамуына едәуір үлес қосуға қауқарлы салаға жеткілікті көңіл бөліп отыр. Қонақ үй бизнесімен айналысуға жергілікті кәсіпкерлер саналы түрде қадам жасауда. Бұған Батыс Еуропа – Батыс Қытай дәлізі бойында қызмет көрсету орындары, қонақ үй құрылыстарының бой көтеруі дәлел.Облыстық туризмнің әлеуеті зор. Ең бірінші біз басым бағыт ретінде туризмнің тарихи, танымдық, этно және ғарыштық түрлеріне көңіл бөлуіміз керек. Қызмет түрлері негізгі және қосымша болып екіге бөлінеді. Біз айтып отырған қонақ үй бизнесі, турагенттік, туроператорлар арқылы негізгі қызметтер орындалады. Мұражай, ресторан бизнесі мен сувенирлерден түсетін қызметтерді қосымша түріне жатқызамыз. Осы екі түрді облыста қатар дамыту арқылы қазынаға қаржы әкелуге болады. Осы бағытта бірқатар жұмыс атқарылуда. Үш тілде Қызылорда обылысының туристік жолсілтеме әзірленді. Болашақта бейнероликтер арқылы осы бағытты дамыту жұмыстары жүргізіледі.Кадр даярлау барлық қызмет түрлері үшін маңызды қажеттіліктің бірі. Алайда біздің облыста, жалпы елде сервистік қызметтің деңгейі төмен. Қазақ жалпы азиаттықтар өте үлкен, қымбат жерлерде демалғанды жақсы көреді. Төртжұлдызды, бесжұлдызды қонақ үйлер бізде осыған байланысты салынуда. Біз алдымен ғимараттың көлеміне, сән-салтанатына көп көңіл бөлеміз де ішіндегі қызметке, тікелей сервис ұсынатын мамандарды даярлауға селқос қараймыз. Осыны бір кемшілігіміз ретінде айтсақ болады. Қызылордада туризм мамандарын дайындайтын оқытушылардың да осы мамандықты таңдап келетін талапкерлердің саны аз. Бұл олқылықтың орнын толтырумыз керек.– Біздің туризмге жарнама жетіспейтін сияқты. Сіздің ойыңыз…– Иә, дұрыс айтасыз. Жарнама бізге толықтай жетіспейді. Себебі біз өз жеріміздің туризмге қатысты артықшылықтарын толық тани алмаған халықпыз. Бұл өте өкінішті. Жарнаманы бірінші кезекте шетелге емес, қазақ халқына насихаттау керек. Мұнда желінің маңыз өте зор. Халықтың көп бөлігі белсенді түрде қолданатын болғандықтан ақпараттандыру желі арқылы енді кірігіп жатыр. Келешекте жарнама мәселесі де бір жүйеге түседі деп сенемін.– Туризмнің қай түрі елде жақсы дамып келеді? Және көп көтерілетін тағы бір мәселе елдегі қонақ үйлердің қызмет көрсету сапасы төмен, бірақ сұрайтын ақысы өте жоғары деп жатады. Бұған не себеп?– Туризмнің түрлері өте көп деп айттым. Қазақ даласының тұмса табиғаты әралуандығымен ерекшеленеді. Алматы облысында табиғи, экологиялық туризмді дамытқан өте қолайлы. Бизнес туризмнің қанат жаюына таптырмайтын орын ол әрине Нұр-Сұлтан қаласы. Маңғыстау өңірі мен Оңүтүстік Қазақстан және Қызылорда жерінде жоғарыда айтып өткендей тарихи, танымдық, мәдени, этно бағытын жетілдіруге толықтай жағдай жасау керек.Қонақ үй бизнесінің артта қалуына мемлекеттік деңгейде бірегей стандарттың болмауы кінәлі деп ойлаймын. Осы саланы қадағалайтын белгілі бір басқарманың құрылмауы баға саясатының дұрыс жүргізілмеуіне әкеліп соғады. Қызмет оның сұрайтын бағасына тең емес.– «Болашақ» бағдарламасының түлегі, туризм саласының маманы ретінде біршама тақырып қаузалды. Бекзат, енді өзіңіз жайлы оқырманға аз-кем ақпарат айтып берсеңіз…– Қазалы ауданының тумасымын. Б.К.Мергенбаев атындағы №226 мектеп-гимназиясының түлегімін. Өзіміз көпбалалы әулет болдық. Бос уақытымда пайдалы дүниемен айналысқанды жақсы көремін. Көбіне кітап оқып, сурет салғанды ұнатамын. Аспаздық өнерден де қалыс қалғаным жоқ.Қоғамды өзгертуді өзімнен бастағанды жөн көрдім. Білгенімді әрқашан бөлісу менің өмірлік ұстанымымның бірі. Осы себепті де ғылымды таңдадым. Бұған дейін мемлекеттік қызметте орындаушы болып жұмыс істедім. Ол жерде де жаман болған жоқпын. Бірақ мемлекеттік қызметте жүрген уақыт менің креативті ойлауыма кері әсерін тигізген сыңайлы. Өзімнің толық қабілетімді аша аламағандықтан жаныма жақын ғылымға қайтып оралдым.– Әңгімеңіз үшін рақмет!

Бекзат Ырза: Облыстық туризмнің әлеуеті зор

<a href="https://kyzylorda-news.kz/">Kyzylorda-news.kz.</a> Үкіметтік емес ұйымдар ресурстық орталығының ұйымдастырумен «Әкелер күні» мерекесіне орай «Отбасындағы және бала тәрбиесіндегі әкенің рөлі» тақырыбында дөңгелек үстел өтті.Дөңгелек үстелге білім саласында 34 жыл қызмет жасаған ардагер ұстаз, «Германиядағы кеңес әскерінің тобы мен Варшава келісім шарты әскерінің тобы» ардагерлер» Қызылорда облыстық ҚБ филиалының төрағасы А.Шүренов, «Қызылорда облысы бойынша Таулы Қарабахтағы этносаралық қақтығыстарды реттеуге қатысқан, ұрыс қимылдарының ардагерлері» ҚБ төрағасы Б.Төлегенов, «Батыр ана» ҚБ төрайымы Г.Әбдіхалықова, Тасбөгет кенті мешітінің наиб имамы С.Райымбеков және п.ғ.м., психолог Қарлығаш Қойшыбаева және белсенді жастар ұйымдарының өкілдері мен өнерлі оқушылар қатысты.Отбасы құндылықтарын насихаттау, жанұядағы әкенің рөлі мен тәрбие, отбасы институттарын жаңғырту мәселелері сөз болған жиында алдыңғы буын ағалар өз өмірлік тәжірибелері мен отбасындағы құндылықтары және ұстанымдарын ортаға салды. Отбасы институтын дамытудың маңызы, бала мен әкенің қарым-қатынасына қатысты жастардың бірқатар сұрақтарына жауап берді.Шара аясында ата-бабаларымыздың, әкелеріміздің ертеректе тұтынған құнды жәдігерлерінен көрме ұйымдастырылды.Сондай-ақ, «Samruk kids» балаларға арналған спорттық-шығармашылық орталығы, «Zhanyia school» қосымша білім беру мектебінің өнерлі жастары домбырамен күй тартып, әкелерімізге мерекелік көңіл-күй сыйлады.Шара соңында Қызылорда қаласының тарихы музейіне экскурсия ұйымдастырылды.

Қызылордада Әкелер күніне орай жиын өтті

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласындағы жаңа мөлтек ауданда заманауи технологиялармен жабдықталған «NAZDARMED» отбасылық және интегративті медициналық клиникасы ашылды.Салтанатты шараға Қызылорда қаласы әкімінің орынбасары Жанмұрат Сейілов қатысты.<blockquote>«Медициналық қызметтердің сапасы мен қолжетімділігін қамтамасыз ету Мемлекет басшысы алдымызға қойған басты міндеттердің бірі. Біз шаһардың барлық тұрғындарына сапалы медициналық қызмет көрсетуді мақсат еткен мұндай ауқымды жобаларды қолдауға әрқашан дайынбыз», - деген Жанмұрат Сейілов клиника ұжымының жұмысына табыс тіледі.</blockquote>32 маман жұмыспен қамтылып, қызылордалықтарға қолжетімді медициналық қызмет ұсынатын емдеу нысаны жобасын клиника басшылығы «Даму» қорының қолдауымен Қазақстан Халық Банкінен 71 млн тг, екінші деңгейлі банктерден 42 млн теңге несие алу арқылы жүзеге асырып отыр.Соңғы үлгідегі құрылғылармен жарақтанып, білікті мамандардың басын қосқан емдеу нысаны қызылордалықтарға күндізгі стационар және диагностикалық кеңестер қызметін ұсынатын болады.Емдеу орталығының директоры медицина саласына 35 жылға жуық еңбегін сіңірген облысымызға белгілі акушер-гинеколог дәрігер Жұмашева Гүлнар Хамзақызы.Гүлнар Хамзақызы аймағымызда 130 мың бала, 8000 ауыр жағдайдағы ананың өмірін сақтауға үлес қосқан білікті маман. Тіпті елімізді індет шарпыған сәтте де ковидпен ауырған 30 ананың өмірін сақтап қалған. Осындай басшысы бар, дәрігері бар емдеу орталығының жоғары деңгейде халыққа медициналық қызмет көрсететіне күмән жоқ.

Қызылорда қаласында жаңа отбасылық клиника ашылды

<a href="https://kyzylorda-news.kz/">Kyzylorda-news.kz.</a>&nbsp; Алдағы уақытта елімізде қымбат автокөлігі барлар қосымша салық төлейтін болуы мүмкін.&nbsp;Бұл салықтың темір тұлпарға қатысты басқа салықтарға қарағанда жөні бөлек, тікелей машинаның бағасына қатысты салынады. Бәрі білетін қозғалтқыш көлеміне байланысты салық емес. Енді көпшіліктің ойында келесі сауалдар туындамақ: не үшін осы салық түрі енгізілмек, қандай пайдасы бар? Сараптап көрсек.Ауа ластайтындардың&nbsp;арынын басу амалы<blockquote>Жуырда Парламент Сенатының Қаржы және бюджет комитетінің депутаттары «Салық саясатының өзекті мәселелері және салықтық әкімшілендіруді жетілдіру» тақырыбы бойынша дөңгелек үстел өткізді. Біз айтқан тақырып осы жиында тілге тиек болған. Соңғы уақытта еліміз салық саясатын жетілдіру, көлеңкелі экономика деңгейін төмендету, бюджетке түсетін түсімдерді ұлғайту, сондай-ақ әкімшілік кедергілерді қысқарту сияқты мәселелерді жөнге келтіруге ден қойды. Оның үстіне қазір жаңа Салық кодексі әзірленуде. Мамандар оның құрылымы мен жаңа идеологиясы ерекше болатынын айтып жүр. Ең бастысы, адал салық төлеушілердің мүддесін қорғауға бағытталмақ. Аталған кодекс турасында сөз тарқатқан Ұлттық экономика министрінің орынбасары Азамат Әмрин қымбат көлік иелерін алдағы уақытта қосымша шығын күтіп тұрғанын жария етті. «Қазақстанда қымбат көлік иелеріне қосымша салық салынады. Оған 50 миллион теңгеге жуық шекті белгілеуді жоспарлап отырмыз. Егер көліктің нарықтық құны осы шекті мәннен асып кетсе, акциздер арқылы қосымша салық салынады», – деді ол.</blockquote>Әзірге бұл салықтың қалай есептелетіні белгісіз. Бұған қоса, әлі жоспар екенін ұмытпауымыз тиіс. Егер осы салық енгізілер болса, екі түрлі пайдасы болары сөзсіз. Біріншісі, қосымша салық мемлекет қазынасына қосымша пайда әкеледі. Қымбат көлікті қалталы жандар мінетінін ескерсек, қарапайым халыққа оның кедергісі болмайтыны анық. Екіншіден, түпкі астарына үңілсек, экологиялық талапты аңғарамыз. Мысалы, 50 миллион теңгеден қымбат тұратын көліктердің түгелінде қозғалтқыш көлемі 4000 текше сантиметрден кем болмайды, яғни, ауаға шығаратын зиянды заттары көп. Ал экологиялық талапқа сай делінген электромобильдердің бағасы бұл межеге жете қоймайды.Айтпақшы, бұны бәрі білетін көлік салығымен шатастыруға болмайды. Онда да қозғалтқыш көлемі үлкен машиналардың иелері өзгелерден көптеу төлейді. Демек, мемлекет қоршаған ортаны қорғау шарасы арқылы қазынаны да молайтудың көзін тауып отыр.Әлемде заманауи көлік салығы 1908 жылы АҚШ-та пайда болған. Оған дейін автомобиль отанының өзінде көлік тек таңдаулыларға, санаулыға ғана тиесілі еді. Ал 1908 жылы Құрама Штаттарда халық арасында «қаңылтыр Лиззи» аталып кеткен Ford Model T автокөлігі нарыққа жол тартты. Бұл – миллиондаған данамен шығарылған дүниежүзіндегі бірінші машина. Автомобильдің орташа ауқаты ғана бар америкалықтар үшін қолжетімді болғанын түсінген мемлекет, бірден көлік алымын енгізді. Оны айтасыз, ал КСРО өзінде жеңіл көліктердің аз екенін ескеріп, 1942 жылы «Жергілікті салықтар мен алымдар туралы» арнайы Жарлық қабылдады. Оған сәйкес, тіпті қолында мотоциклі, велосипеді, қайығы, кемесі, паромы, сондай-ақ жұмысқа жегілген аты бар адамдардың бәрі салық төлеуге міндеттелді. 1981 жылдан бастап кеңес республикаларында көлік салығының көлемі тек машина қозғалтқышының қуатына байланыстырылды. Еліміз Тәуелсіздік алғаннан кейін сол есептеу жүйесін сақтап қалып, көлік салығын қозғалтқыш көлеміне қарай бекітетін болды. Қазір сол арқылы жылына шамамен 30-40 миллиард теңге қазынаға құяды.Әлем тәжірибесін таразыға салсақОсы тұста әлем елдері көлік салығын қалай есептейтініне көз жүгіртіп өтсек. Мәселен, Францияда азаматтар темір тұлпар сатып алған кезде қазынаға бір рет төлем төлейді. Төлем көлемі машинаның ауаға тастайтын зиянды қалдығына, қозғалтқышының қуатына байланысты болып келеді. Айтпақшы, қазақстандықтар да осындай алым төлейді, алайда ол утилизациялық алым деп аталады. Ал Аустралияда жеңіл көлікке қол жеткізген адам оның бағасының 10 пайызы мөлшерінде алым аударуы тиіс. Егер жүк көлігін иеленсе, алым 5 пайызға дейін төмендейді. Бұдан басқа жыл сайын салық төлеу деген жоқ.АҚШ-та көлік алымы әу бастан бензин құнына қосылған «көп жүрсең, көп төлейсің!» қағидасы бар. Әділетті жүйе. Дания тұрғындары да жыл сайынғы көлік салығының не екенін білмейді. Рас, бұл елде сатып алынған көлікті тіркеу ставкасы – әлемдегі ең жоғарының бірі, алым машина құнының 105-180 пайызы арасында құбылады. Электромобильдер жеңілдікке ие. Жыл сайынғы көлік салығы Түркия тұрғындарын қыспаққа алып жатқанын білеміз. Түріктер жыл сайын арзандау көлігі үшін 964 лир, ал қозғалтқышының көлемі 4 мың текше сантиметрден асатын қымбат, жол талғамайтын машинасы үшін 45 924 лир салық төлейді. Бұл шамамен 870 мың теңгеге тең.Түйіндер болсақ, жаңа салықтың жақсылығы болмаса, кері әсер етер тұсы жоқ. Өйткені, дамыған Батыс елдерінің өзінде қоғам дарақылықтан арылып, күнделікті жүріс-тұрысына лайық шағын әрі бюджеттік көліктер таңдап жатқан кезеңде, шығыны мол, ауаны көп ластайтын автомобиль иелері жауапкершілікті сезінгені жөн.

Қымбат көлік иелеріне қомақты салық салынады

<a href="https://kyzylorda-news.kz/">Kyzylorda-news.kz.</a> Табиғаттың қолайлы немесе жайсыз мезгілін елемейтін болат жол бойындағы қауырт тірлік күндіз-түні тоқтаған емес. Мұндағылар қашан көрсең де ерсілі-қарсылы тынымсыз қозғалған жолаушылар пойызы мен жүк құрамаларының межелі жеріне дер кезінде, кідіріссіз жетуі жолында аянып қалмайды. Солардың арасында вагон қараушы-жөндеушілерге жүктелетін міндетті жеңіл дей алмаймыз.Осы саланы жанымен қалаған Нұрлыбек Бисенов Қазалы пайдалану вагон депосына қарасты Қазалы техникалық қызмет көрсету бекетінің вагон қараушы-жөндеушісі. Жиырма жылдан аса еңбек өтілі бар Нұрлыбек Ерғалиұлы ұжымдастары арасында ерекше бағаланады. Себебі темірдей тәртіпте шыңдалған ол жұмысына мұқияттылығынан былтыр наурыз айының 30-31 не қараған түні үлкен апаттың алдын алды. Ішкі ережемен журналға тіркелген 03 сағат 20 минутта стасансаға қабылданған №3424-ші жүк пойызына техникалық қызмет көрсету барысында №70504105 вагонының доңғалақ жұбының подшипнигінің сынғандығын анықтайды. Сол сәтте жедел қимылдайтын сала мамандары вагонды құрамадан ағытып, ағымды жөндеуге берді. Өз жұмысына жауапкершілікпен қарап, табылуы қиын ақауды дер кезінде анықтау арқылы жол қауіпсіздігін сақтап қалды. Мұндай жағдай мыңнан бірінде ғана кезігеді екен.<blockquote>«Кезінде әкем Үкілісай деген жерде №93 разъезде вокзал бастығы қызметін атқарды. Сонда теміржолшы болуды аңсайтынмын. Арлы-берлі өткен пойыздарға қызыға қарап, оларды жөндеумен айналысқым келетін. Осы арманның жетегінде жүріп сегізінші сыныптан соң Қазалыдағы техникалық училищеде оқып, 3 жыл 8 айда вагон қараушы мамандығын алып шықтым. Қазір мен сияқты теміржол саласында жолсерік ретінде бір ұлым қызмет етеді. Өмірлік жарым да осы салада жұмыс істейді. Қиындығына қарамастан өз мамандығым ұнайды. Пойыз доңғалақтарын тоқылдату арқылы ақаудың бар-жоғын шыққан дыбыстан байқаймын», – дейді Нұрлыбек Бисенов.</blockquote>«Талапты ерге нұр жауар» деген. Өз ісінің шебері Нұрлыбектің айтуынша, ауысымда 10 адам бар. Аға вагон қараушы Арман Айболатов, вагон қараушы-жөндеушілер: Айболсын Сүндетов, Иса Алмағамбетов, Қазтуған Өтемісов, Ермахан Күлімбетов, Айбек Өтепбергенов, Зинадин Жарылқасын, Қайрат Меңдібаев, Айбек Қараманов, Талғат Ақбаевтармен бірлесе теміржол қауіпсіздігіне жауап береді. Бүгінде теміржол саласының батыры Құдай қосқан қосағы Эльмира Махановамен бірге 3 ұл тәрбиелеуде.

Қазақстан және Қызылорда облысының жаңалықтары