<a href="https://kyzylorda-news.kz/">Kyzylorda-news.kz.</a> Ұлт ұрпағының ұғымтал болып өсуі ұстаздарға байланысты. Өйткені халқымыз ертеден мектеп табалдырығын аттаған әр баланың санасына «Мектеп – екінші үйің, ұстаз – екінші ата-анаң» деген ұғымды сіңіріп келеді.Бойжеткен шағында ұстаздық деген ұлы жолды таңдап, бүгінгі күнге дейін мамандыққа деген адалдығын абыройлы ісімен көрсетіп келе жатқан жанның бірі – Гүлсара Боранбаева.Гүлсара Қыпшақбайқызы 1968 жылы Лахалы елді мекенінде дүниеге келген. №93 сегізжылдық мектептен сегізінші сыныпты бітіріп, 9-10 сыныпты Шымкент қаласындағы №7 Қ.Сыпатаев атындағы мектепте жалғастырды. 1987 жылы Ақтөбе педучилищесіне түсті. Алғаш еңбек жолын Ақтөбе қаласындағы Сазды орта мектебінде бастады. 1994 жылдан бері Әйтеке би кентіндегі Қ.Сәтбаев атындағы №216 орта мектебінде жұмыс жасайды.Мектеп табалдырығын имене аттаған талай бүлдіршіннің алғашқы ұстазы атанып, үлкен өмірге қадам басуына септігін тигізді. Әр баланы жанына жақын тартып, білім нәрімен сусындатып келеді. Ұстаз еңбегінің нәтижесі шәкірт жетістігімен өлшенері анық. Гүлсараның оқушылары мектеп мерейін үстем етіп жүр. Бүкілресейлік дүниетану пәнінен олимпиадада 2 сынып оқушысы Жансерік Әшірбек бірінші, Бақдаулет Жақсылық, Диас Мұқтар екінші, математика пәнінен Нұрай Көптілеу, Жансерік Әшірбек екінші орын иеленді. «Бастау» республикалық математикалық олимпиаданың аудандық кезеңінде 3 сынып оқушысы Диас Мұқтар II, «Білім академиясы» оқу орталығы ұйымдастырған І облыстық турнирде қазақ тілі пәнінен Кәусар Омарғазы ІІІ, математикадан Нұрай Көбейсін, Сая Жұмахан, Динара Өтеген ІІІ, Жаслан Арсен ІІ дәрежелі дипломмен марапатталды. ІІІ облыстық «Orda – Junior – 2019» ғылыми жоба байқауында Кәусар Омарғазы ІІІ орын иеленді. №10 ұлттық интернет олимпиадасында Нұрсұлтан Сахитжан, қазақ тілінен Кәусар Омарғазы, Динара Өтеген І дәрежелі дипломмен марапатталды.Гүлсара Боранбаеваның 2012 жылы «Мир учителя» сайтына – «Бастауыш сынып оқушыларының шығармашылық қабілетін арттыру жолдары» атты ¬баяндамасы жарияланды. Тілдерді оқытудағы жаңа әдістемелік көзқарас – ІІ халықаралық форумда «Бастауыш сынып оқушыларының логикалық ойлау қабілетін дамытудың қажеттілігі» баяндамасы, «Қазалы қаласының іргетасының қалануы» атты ғылыми жобасы жинаққа енді. Ұстаздық жолда атқарған адал еңбек ешқашан бағасыз қалмайды. Аудан әкімінің Алғыс хаты, «Nur Otan» партиясы Қазалы аудандық филиалының, TIO.kz Республикалық Дәстүрлі интернет олимпиадасының Құрмет грамотасы, KIO – Бастауыш сынып мұғалімдеріне арналған Республикалық қашықтық олимпиадасынан І дәрежелі, «Бастауыш білім беру педагогикасы» пәнінен ІІ дәрежелі, Парасат республикалық білім сайтының «Мұғалім мәртебесі – ел мерейі» атты байқауда І дәрежелі диплом иеленді.«Қазір мектептен ұшқан түлектерім әрбір жерде еңбек етіп жатыр. Айта кетер болсам, Еркебұлан Жетесов, Жанна Есбосынова, Ғабиден Айтуғанов, Райса Ераділова, Алмагүл Аяпберген, Тоғжан Жетілген, Әліби Жоламан, Нұрғиса Төлеу тағы басқа көптеген шәкірттерім түрлі мамандықты меңгеріп, еңбек етуде», – дейді ол.Алғашқы ұстазы шәкірттерімен мақтанса, сынып жетекшісіне еліктеп ұстаздық жолды таңдаған оқушылар да жоқ емес. Солардың бірі – Ақмарал Асанова. Ол Семей қаласындағы Ш.Құдайбердиев атындағы университетте “Қазақ тілі мен әдебиеті” пәнінің мұғалімі мамандығында оқиды.<blockquote>«Мұғалім болуды бала күнімнен армандадым. Оған алғашқы ұстазым Гүлсара Қыпшақбайқызының ықпалы зор болды. Апайымның өзін ұстауы, жүріс-тұрысы, балаларға деген қамқорлығы ерекше. “Мен де өскенде Гүлсара апайдай ұстаз боламын” деуші едім. Шүкір, сол арманға жету жолында білім алудамын», – дейді ол.</blockquote>Ал ұстаз Гүлсара Боранбаева: “Бұл мамандықты жақсы көре білу керек. Мен әлі де болса сүйікті кәсібімді жалғастырып, ұлтымыздың ұлы тәлімімен ұштасатын педагогикалық тәрбиені шәкірттеріме берсем деймін” – деген мақасатта еңбек жолын жалғауда.

Шәкірт жүрегіне жол тапқан жан

<a href="https://kyzylorda-news.kz/">Kyzylorda-news.kz.</a> Айналамызға қарасақ, жақсы жандардың бар екенін байқаймыз. Әсіресе, жаны мейірімге, жүрегі махаббатқа толы алтын құрсақты аналарымыздың көптігін аңғарамыз. «Ана» деген сөздің өзі терең мағынаны ұғындыратыны рас. Иә, бүгінде ақ жаулықтылардың тек бесік әлдилеген ана ғана емес, қоғам алдында құрметке ие болып, ел мәртебесін асқақтатып жүргенін көзіміз көріп жүр. Алысқа ұзамай-ақ қоялық. Шиелінің өзінде де қаншама іскер әйел бүгінгі күні ауданның дамуына үлес қосып жүр. Кейбірі еңбекке ерте араласып, қазіргі таңда зейнеткерлікке шығып, көпке үлгі болып отыр. Ал сіз бен біздің парызымыз – осындай жандарға ізет көрсетіп, төрге шығарып, түрлі іс-шаралар мен кездесу кештерін ұйымдастыру. Соның бір парасы жуырда ғана Досбол датқа ауылында көрініс тапты. Ауыл тұрғындары Шиелінің 95 жылдығына орай түрлі салада еңбек етіп, ел экономикасының дамуына үлес қосқан аналармен дидарласу мақсатында «Жақсы адамдарым» атты кездесу кешін өткізді.Досбол датқа ауылдық клубының ұйымдастыруымен өткен кездесу кешіне Ақтоған ауылдық округінің әкімі Ержанбек Ахметов, аудандық мәдениет және спорт бөлімінің бас маманы Жадыра Отарбаева, Бұдабай Қабылұлы атындағы мәдениет-шығармашылық орталығының мәдени шараларды ұйымдастыру және бос уақытты тиімді пайдалану бөлімінің меңгерушісі Гүлшат Шайзадақызы, сондай-ақ әйелдер кеңесінің төрайымы Баян Нәлібаева мен ардагерлер кеңесінің төрағасы Дайрабай Сармолдаев қатысты.Ең әуелі Ақтоған ауылдық округінің әкімі Ержанбек Ахметов сөз алып, жарқын жүздесуге келген аналарға құттықтау тілегін жеткізді. Мұнан соң әулет шаңырағын шалқытып, салиқалы ұрпақ өрбітіп, ауылдың гүлденуі үшін еселі еңбек етіп, қоғамдық өмірге белсене араласып, көпке өнеге беріп жүрген ғибратты ғұмыр иелері сахна төріне шығып, көрермен қошеметіне бөленді. Атап айтар болсақ, Дүйсенбай Шыныбеков атындағы №155 орта мектебінің физика және математика пәнінің мұғалімі, Досбол датқа ауылдық «Ақ әжелер» ансамбльінің мүшесі Фарида Ахметова, &nbsp;№155 орта мектебінің физика және математика пәнінің мұғалімі, оқу ісінің меңгерушісі Айгүл Дінбаева, сондай-ақ белсенді кәсіпкер «Заңғар» аралас сауда дүкенінің иесі Ақманат Мұхаммеджанқызы кездесу кешінің құрметті қонақтары ретінде шақыртылып, төрден орын алды. «Жақсы адамдарым» атты жүздесу кеші бұдан әрі «Ақ әжелерім» атты әжелер ансамбльінің «Сәулем, сәулем» атты әнімен жалғасын тапты. Жайна Жақыпова «Жүрегімде жүрсің сен» атты әнін шырқап, көрермен көзайымына айналса, Азамат Жолдасбеков «Анашым-ай» әнімен көпшілік құрметіне бөленді.Іс-шара барысында кешке жиналған көрермен қауым ақ жаулықты аналарға өздерінің сұрақтарын қойып, қызықты жауаптарын алды. Сондай-ақ аналар қонақтарға өз өмір жолдарынан сыр шертіп, бастан өткен қызықты күндері мен қиындықтарын баяндап берді. Ал ауыл тұрғындары осы іс-шараның өтуіне атсалысып, демеушілік танытты. Жылы жүздесудің соңы мерекелік кешке ұласып, түрлі әндер шырқалып, ауыл өнерпаздары өз өнерлерін көрсетіп, би биледі.

Шиеліде ел экономикасының дамуына үлес қосқан аналармен кездесу өтті

<a href="https://kyzylorda-news.kz/">Kyzylorda-news.kz.</a> Индустрия және инфрақұрылымдық даму министрі Марат Қарабаев жеңілдетілген автонесиеге қатысты сұраққа жауап берді, - деп хабарлайды Massaget.kz.Ақорда кулуарында журналистер министрден жеңілдетілген автонесие беру қашан жалғасатынын сұрады. Қарабаевтың сөзінше, жеңілдетілген автонесиеге бөлінген ақша қоғамдық көлікті несиелендіруге жұмсалады.&nbsp;<blockquote>"Қазір револьверлік қаржы жинақталған. Жеңілдікті автокредиттеуден түскен қаражатты қоғамдық автокөлікті кредиттеуге қайта бағыттау мүмкіндігі қарастырылып жатыр. Біз бірқатар өңірлерде болдық, әкімдік өкілдері автопаркті несиелеу мәселесін көтеріп жатыр", - дейді министр.</blockquote>Марат Қарабаевтың сөзінше, Қостанайда қоғамдық көліктің 90 пайызы тозып кетсе, Талдықорған мен Оралда қоғамдық көліктердің 70 пайызы тозған. &nbsp;<blockquote>"Біздің міндетіміз - қолда бар қаржыны барынша тиімді пайдалану. Осыған байланысты біз жеңілдікті автонесиеге - қоғамдық көлікті несиелеуге қаражат жіберу мүмкіндігін қарастырамыз. Оны күніне 9,3 миллион қазақстандық пайдаланады. Біз үшін басымдық-олардың қажеттіліктерін қанағаттандыру. Қаражат қоғамдық көлікті қаржыландыруға бағытталатын болады", - дейді Қарабаев.&nbsp;</blockquote>"Менің түсінгенім бойынша, қазақстандықтар жеңілдетілген автонесиелеу бағдарламасы бойынша авто сатып ала алмайды ма?", - деп сұрады журналист.&nbsp;<blockquote>"Енді қаржы қоғамдық көлікті қаржыландыруға жұмсалады", - дейді Қарабаев. &nbsp;</blockquote>&nbsp;

Жеңілдетілген автонесие бөлінген қаржы қоғамдық көліктерді жаңарту үшін жұмсалады 

<a href="https://kyzylorda-news.kz/">Kyzylorda-news.kz.</a> Арманы асқақ алмаш қалилақызының балдәурен жастық шағы ұлы отан соғысына тұспа-тұс келді. тұлымшағы желбіреген қаршадай қыз қиындық көріп өсті. Ауылдағы апа-әжелерімен бірге жұмыс істеп, еңбекке ерте араласты, тылда еңбек етті. 19 жасында ерғали таженұлымен бас қосып, ұл-қыз тәрбиелеп өсірді. Алайда олардың тату-тәтті өмір сүріп жатқан күндері ұзаққа созылмады. Ерғали 1968 жылы 41 жасында қайтыс болды. Ол 1952-1956 жылдары аралығында мұғалім болып қызмет атқарған. «Кейін екі көзден айырылып, дүниеден өткенге дейін ауданда соқырлар қоғамы ұйымының басшысы болып қызмет атқарғанын бала болсам да білетінмін» дейді қызы Қоғажай Ерғалиева.&nbsp;<blockquote>«Анамыз жас келін болса да қара жұмыспен шыңдалып, елге танылды. Жалағаш ауданындағы қазіргі «Сәрке батыр» шаруа қожалығында ұзақ жыл сушы, күрішші болып еңбек етті. Тірі пенде тіршілігін жасайды. Еңбектен қол үзбеді. Небары 36 жасында жесір қалып, 6 перзентін өсіріп, ұлын ұяға, қызын қияға қондырды. «Элеваторда» жұмыс істеген жылдары вагондарға астық тиеп, 70 келі ұнды жігіттермен бірдей көтеріп түсіретін. Ер азаматтармен бірдей жұмыс істеп, еңбекпен есейген анамыз жыл өткен сайын шыңдалып, қайратына қайрат қосты. Ол әйелдер арасындағы күресте алдына жан салмайтын. Қарсыласын алып та, шалып та жығатын. Жауырыны жерге тимеген палуан әйелді аудан халқы «Палуан Алмаш» деп орынды мақтан ететін», – дейді Қоғажай апай.</blockquote>1953 жылдың 1 қаңтар күні білім бөлімінің басшысы Ұзақ Еспанов Қараөзек бойында 4 фермаға сабақ беруге Қоғажай апайдың әкесін жібереді. Үскірік аязды артқа тастап, «Түйте» деген жерге келгенде аяқ астынан анасы толғатады. Өздері жаяу, көлдің ортасына барып, қалың &nbsp;қоғаны &nbsp;жапырып, сыртқы киімі солдат шинелін төсеп, сол жерде &nbsp;қызы Қоғажайды босанады. Әрі қарай ата-анасы жолға шығады. Түн келе жатып, ит үрген жаққа қарай бет алып, қариялардың үйіне кезігеді. Ол үйде ерлі-зайыпты екі қария тұрады екен. Мән-жайды түсіндіріп, сол жерде босанғанын айтқан. «Менің есімімді сол қария Мұратбек ата «олай болса, есімін Қоғажай деп қой» депті. «Содан таң атар-атбастан жолға шықтық. Кеш бата 4-ші фермаға да келіп жеттік» деп әрдайым анам айтып отырушы еді» дейді Қоғажай Ерғалиқызы.Бұл ерлік Алмаш әжейдің палуан екенін көрсетіп тұрған жоқ па? Ол 1970 жылы 10 сәуір күні «Ленин» орденімен марапатталады. 1975 жылдың 17 наурызында Қазақ СССР Республикалық комитеті «Ударник девяти пятилетка» төсбелгісімен марапаттайды. 1975 жылы маусым айында Жалағаш аудандық Еңбекшілер депутаттарының «Ақсу» ауылдық Советінің депутаттығына сайланады. 1961 жылдың көктемінде «Өрік ағашы» деген жерде күріш егіп, сушы болып жұмыс істейді. 1961-1963 жылдары аралығында ауданда балық зауытында жұмысшы болып еңбек етті. Ал 1963-1967 жылдары наубайханада жұмыс жасаған. 1967 жылдан зейнет жасына шыққанша көп жылдар бойы Элеваторда жұмысшы болып еңбек етті.Алмаш ана соғыс кезінде жастайынан еңбекке араласып, зейнетке шыққан соң «Тыл ардагері» атанды. Адал жар, аяулы ана, ардақты әже дүниеге 6 перзент әкеліп, олардан 28 немере, 87 шөбере, 6 шөпшек сүйді. 2020 жылдың 9 шілде күні 88 жасында дүние салды.Кешегі Алмаш ана атындағы турнирде осындай тағылымға толы естеліктер айтылды. Ұрпақтары қиын кезеңдерде адал еңбекпен шыңдалған ардақты ананың тағылымды өмір жолын сөз етсе, ұйымдастырушылар шараның маңыздылығына тоқталды.&nbsp;<blockquote>«Жалағаш жұрты қашаннан өткенін ұлықтап, өшкенін қайта жандыруда салтынан жаңылған емес. Бүгін де осындай игі шараның куәсі болып отырмыз. Алмаш ана атындағы турнирдің маңызы жоғары. Бұл шара қатысушыларды тек спортқа баулумен шектелмей, өнегелі өмір жолынан үлгі алуды үндейді. Алмаш ана атындағы аудандық турнирдің маңызы осында. Барлық қатысушы командаларға сәттілік тілеймін», – деді Жалағаш аудандық мәдениет және спорт бөлімі басшысының орынбасары Еркебұлан Жамалатов.</blockquote>Футзалдан өткен аудандық турнирде ауданға қарасты барлық елді мекеннен келген 16 команда қатысып, өзара бақ сынады. Жарыс шымылдығын «Мәдениет» пен «Жастар – 2004» командасы ашты. Алғашқы ойында мәдениеттіктер айқын басымдықпен жеңіске жетті. Ал жастардан құралған команда ойын соңына дейін жұбаныш голын да соға алмады. Осылайша мәдениеттіктердің 4 голы да жауапсыз қалды. Қос команда алаңды «Сұңқар» мен «Жалағаш жастары» командасына босатты. Бұл кездесуде жастардың бағы басым болды. Алаңда еркін көсілген «Жалағаш жастары» қарсылас қақпасына 4 гол тоғытты. Ал «Сұңқар» жұбаныш голын соғумен шектелді.&nbsp;«Бұқарбай батыр» мен «Таң» командалары арасындағы ойын да тартысты өтті. Ойын соңына дейін тең өнер көрсеткен батыр атындағы ауыл жігіттері соңында сыр берді. Мұны тиімді пайдаланған «Таң» командасы есепті еселеп үлгерді. Осылайша қарсыласын жарыс жолынан ысырды.&nbsp;«Далдабай» мен «Темірбек Жүргенов» командалары арасындағы кездесу драмаға толы ойын болды. Бірінші болып қос команданың бірі гол соқса, артынша есеп теңесіп жатты. Дәл осылай қос команда бір-бірінің қақпасына 4 гол тоғытты. Десе де ойынның соңғы уақытын тиімді пайдаланған қайраткер атындағы команда кездесудің бесінші голын соғып, қарсыласын жарыс жолынан қалдырды.&nbsp;«Мөрәлі Шәменов» пен «Ақарық» командалары ойын соңына дейін бір-бірін ала алмады. Қосымша уақытта да тең тарқасқан қос команда 11 метрлік айып добын орындауда өзара мықтыны анықтап, келесі кезеңнің жолдамасын сарапқа салды. Бұл сайыста кент іргесіндегі ауыл жігіттерінің бағы басым болды. Турнир Ақарық жігіттері үшін осымен тәмам.Дәл осы уақытта «Ақсу» мен «Адия» командалары кездесіп жатты. 2:1 есебімен ауыл жігіттері келесі кезеңге өтті. Ал «Адия» турнирдің алғашқы кездесуінде-ақ сыр алдырды. Алғашқы айналымда «Жастар» «Қаракеткенді» айқын басымдықпен жеңді. Қарсылас қақпасына жастар 4 гол тоғытса, ауыл жігіттері жұбаныш голын соғумен шектелді.&nbsp;Алғашқы айналым «Дәуімбай» мен «Наркескен» арасындағы ойынмен аяқталды. Бұл кездесуде Дәуімбай жігіттері «Наркескен» қақпасына жауапсыз 3 гол тоғытты. Бірінші айналым тәмам, 16 командадан 8 команда келесі кезеңге өтті. Кіл мықтылар іріктелген екінші айналым біз ойлағаннан да тартысты болды. Жеребе бойынша «Ақсу» екінші айналымда «Таңды» қабылдады. Кент іргесіндегі жігіттер бабында тұр екен. Бұл кездесуде «Ақсу» қарсылас қақпасына қатарынан 3 гол соқса, «Таң» тек жұбаныш голын салуға жарады. Алғашқы айналымда «Наркескенді» айқын басымдықпен жеңген Дәуімбай жігіттері келесі кездесуде сыр алдырды. Олардың ойын барысындағы қателігін қайраткер атындағы ауылдан келген жігіттер кешірмеді. Қонақтар «Дәуімбай» қақпасына жауапсыз 4 гол тоғытып, жартылай финалға жолдама алды.&nbsp;«Мөрәлі Шәменов» бұған дейінгі «Ақарықпен» кездесуінде келесі кезеңнің жолдамасын 11 метрлік айып добын орындау арқылы алған. Келесі кезеңде де есепте еш өзгеріс болған жоқ. Қос таймды да олар «Жастармен» 2:2 есебімен аяқтады. Алайда жастар бұл кездесуде «Мөрәлі Шәменов» командасын жарыс жолынан ысырды. Бірінші ойынды айқын басымдықпен аяқтаған «Мәдениеттің» келесі кезеңде жолы болмады. Оларды «Жалағаш жастары» айқын басымдықпен жеңіп, жартылай финалға жолдама алды. Жартылай финал, ақтық мәреге ақсулықтар үшін бір қадам қалды. Олар қайраткер атындағы ауылды осы кездесуде жеңсе, кемінде екінші орынды алатын. Алайда «Темірбек Жүргенов» командасы бұл турнирге тыңғылықты дайындықпен келіпті. Ақсулықтар алғашқы болып есеп ашқанымен оған қайраткер атындағы команда үш мәрте жауап қайырды. Алайда олардың екі голы жауапсыз қалды.Жартылай финалда «Жалағаш жастары» мен «Жастар» командасы да ақтық мәренің жолдамасын сарапқа салды. Осылайша финалға қарсылас қақпасына 4 гол салған «Жастар» өтті.Дәл осы кездесуде сүрінген «Ақсу» мен «Жалағаш жастары» бірінші болып үшінші орынға таласты. Бұл кездесуде біз ойлағандай көп гол бола қойған жоқ. Қос команда ойын соңына дейін қорғанысқа басымдық берді. Небары 1:0 есебімен кент іргесіндегі ауыл жігіттері үздік үштікті түйіндеді. Ақтық мәре. 16 команданың ішінде қарсылас шақ келтірмеген қос команда. Жанкүйерлердің де көңілі күпті. Бұл кездесуде «Жастардың» басы бағым бола ма, әлде қайраткер атындағы ауылдың жігіттері жеңіске жете ме? Барлығының көкейінде тұрған осы сұрақ.&nbsp;Иә, сөз басында айтқанбыз. «Темірбек Жүргенов» командасы расында бұл турнирге тыңғылықты дайындықпен келіпті. 4:1 есебімен жеңіске жеткен ауыл жігіттері Темірбек Жүргеновтың 125 жылдығында жерлестеріне жеңіс сыйлады. Осылайша Алмаш ана атындағы турнирдің кубогы «Темірбек Жүргенов» командасына бұйырды. Олар бұдан бөлек Алмаш ананың ағайын-туыстары әзірлеген қаржылай 70 мың теңге сыйақыға ие болды. Ақтық мәреде сүрінген «Жастар» да мұндай сыйақыдан құр қалмады. Оларға 50 мың теңге қаржылай сыйақы мен екінші орынның арнайы дипломы табысталды. Ал үздік үштікті түйіндеген Ақсу жігіттеріне 30 мың теңге берілді.&nbsp;Мұнан бөлек керемет ойын өрнегімен көзге түскен қатысушылар да қаржылай сыйақыдан құр қалмады. Олардың қатарында «Үздік қақпашы» номинациясына ие болған «Мөрәлі Шәменов» командасының ойыншысы Нағымет Бақдәулет, «Үздік қорғаушы» номинациясына лайық деп танылған «Жалағаш жастары» командасының ойыншысы Аймахан Шыңғыс және «Үздік шабуылшы» номинациясының иегері, «Жастар» командасының ойыншысы Батырхан Ысқақов бар.

Жалағашта Алмаш Қалилақызы атындағы турнир өтті

<a href="https://kyzylorda-news.kz/">Kyzylorda-news.kz.</a> Шиелі ауданының теміржол вокзалында тұрақтаған пойыздарға сабылып мініп, түсіп жатқан бір адам. Ал ­Ахмет аға екеуміз тапжылмай отырмыз. Себебі белгіленген уақыттан бір жарым сағат бұрын келіп алғанбыз.Билетіміз – Шым қалаға. Шиелі қажылары қоғамдастығының төрағасы Оразбай Мысырхановтың ұйымдастыруымен көрші Өзбекстан еліндегі Ташкент пен Самарқанд қалаларындағы бабаларға зиярат жасамақшымыз. Ұзаққа жолды жиі жүрмейтін Ахмет Әбдуалиев екеуміз бір-бірімізден «Не алып шықтың?» деп қайта-қайта сұраймыз. Онымен қоса шекарадан бұрын өтіп жүрген кісілерге де қоңырау шалып «не алып өтуге болады, не болмайды?» деп сұрақтарды жаудырамыз.Айнала қоюланып, қараңғы түсе бастады. Доңғалағы бар жол сөмкесін сүйреткен ақ жаулықты апалар мен қазақы нақыштағы тақия киген ақсақалдар келе бастады. Зиярат жасауға шыққандары алыстан-ақ байқалып тұр. Иығымызға сөмкемізді асынып, біз де жақындадық. Темір тұлпарға мінбей тұрып, танысып-білісіп жолға шықтық.Күннің көзі көрінбей тұрып, Шымкент қаласының вокзалына түстік. Күтіп тұрған газельге мініп, шекараға жол тарттық. Шекарадан бұрын өтпеген кісілердің жүректерінде күмән әрі қорқыныш басым.Осылай шекарадан асып, Өзбекстан елінен бір-ақ шықтық. Қазақстаннан жиырма метр жерде тұрғанымызбен, өзге елдің аты – өзге ел. Өзінің өгейлігін білдіріп тұр. Қалта телефонға «Өзбекстан республикасына қош келдіңіз!» деген хабарлама келсімен ұялы байланысымыздың аузы мен құлағы бітелді. Яғни интернет те, байланыс та үзілді.&nbsp;Шекарадан ары аяқ бастырмай Дильшад есімді азамат қарсы алды. Әзірленген екі «Жак» көлігін көрсетіп, барған 25-ді жайғастырып, Ташкентке бағыт алды. Көлікті алғандарына ай толмапты. Жаңа екені көрініп-ақ тұр. Ал мұздатқыштары болса, сырттың ыстығын сездірген жоқ.Таңғы астан соң «Хазіретті имам» мешітіне, Төле бидің ұстазы мен Төле би бабаға барып зиярат еттік. Ташкенттің көрікті жерлерін терезеден тамашалап, Самарқандқа жолға шықтық. 4-5 сағат жолды терезеге телмірумен өткіздік. Көз жетпес жерге дейін егілген жеміс ағаштары таңдаңдырды. Туризмді қолға алған елдің тазалығы сүйсіндірді.Діттеген жерімізге жетіп, Жалаңтөс Баһадүр, Имам Әл-Бұхари, Әмір Темір, Бибі ханым мешіттерін аралап, тарихтан тағылым алдық. Самарқандта бір түн өткізіп, елімізге қарай бет алдық. Түні бойы ұйықтамай, пойызда шай ішіп, көрген-түйгенімізбен бөлісіп, тарихтан шер тарқатқан қажылар осылай бір-бірімен қимай қоштасып, ұйымдастырушыларға алғысын айтып, тарқасты.

Шиелілік қариялар Самарқандқа саяхат жасады

<a href="https://kyzylorda-news.kz/">Kyzylorda-news.kz.</a> Қазалы ауданында сәні мен салтанаты келіскен ауылдар көп. Соның бірі – Тасарық ауылдық округі. Биыл округте жаңалық көп. Оның алғашқысы округ орталығына жобасы дайындалып жатқан жаңа саябақ. Демалыс орны еңсесін тіктесе ауыл тұрғындарының төбесі көкке бір елі ғана жетпес еді.Онан соң жаз маусымының бірінде «Жастар керуені» барысында алау басында берген уәде берген ауыл әкімі Әлмұхан Ерғалиұлы ауылға 4G интернет желісін орнатқан. Бүгінде тұрғындар игілігін көруде.2021-2022 жылдары типтік емес үлгіде округтің орталық көшесінен саябақ жасалып, ағаш көшеттері отырғызылып, ауыл кіреберісіне жасыл белдеу ұйымдастырылды.Ал ауылдың бас қақпасына сондағы 1983 жылы дүние есігін ашқан бірқатар жандар демеушілігімен арка салынған. Одан бөлек, орталық көшеде демеушілердің көмегімен ауылда ғибадатхана пайдалануға берілді. Сонымен қатар ауыл тұрғындарының демеушілігімен мешіт жанынан 35х5 көлемінде асхана салынып берілді. «Жақсының жақсылығын айт, нұры тасысын» демекші ,игі істе мұрындық болған ауыл азаматтары Айғабыл Қарлыбайұлы, Сұлтанхан Жарылқасынұлы, Мырзахан Тәжібайұлы, Ислам Сәрсенбайұлы, Мусабек Ізімғалиұлы, Ерболат Едігеұлы, Шынжырбай Әлқуатұлы, Асқар Нағашыбайұлы, Смамалхан Ерғалиұлы, Смалбек Жаңабайұлы, Райымбек Болатбекұлы пен Жанғабыл Қарлыбайұлы және Нұрболат Қаралпақұлына ауыл тұрғындары ерекше алғысын білдіреді.Білім ордасына жарты ғасырТасарық ауылындағы №238 орта мектептің тарихы тереңінен, яғни өткен ғасырдың 1970 жылнан басталады. Алғашында бастауыш мектеп болып ашылған білім ордасы 1973 жылы кеңейтіліп, жаңа ғимаратқа көшіп, №238 «Комунизм» сегіз жылдық мектебі болып жұмысын жалғастырған. Кейін білім саласындағы өзгерістерге орай 1995 жылы негізгі мектеп мәртебесіне ие болды.Содан соң, 2000 жылдан бастап орта мектепке айналды. Араға он жыл салып, ауылға екі қабатты жаңа мектеп салынып пайдалануға берілді. Сол уақыттағы білім ордасының меңгерушісі Шобдар Ержанов алғашқы ұстаз болған. Сегіз жылдық мектептің директоры Ерғали Кәрібаев болып, мектеп жанынан шопан балаларына арналған 50 орындық интернат ашқан. Сол жылдары мектеп-интернаты бірнеше рет облыстық «Социалистік жарыстар жеңімпаздары», ауылдың «қызыл туын» жеңіп алған.Қазіргі таңда №238 орта мектебінде 105 оқушы білім нәрімен сусындап жатыр. Тиісінше, 36 мұғалім ауыл балаларына тәлім-тәрбие беруде.Айта кетейік, бүгінде мектеп басшысы Әлия Талғатбекқызының бастамасымен осы жылдың сәуір айындағы педагогикалық кеңес шешімімен, ауыл төріндегі мектеп тарихында елеулі үлес қосқан, сонымен бірге осы мектептің құрылуына өз еңбегін қосқан ардагер ұстаздардың атына арнайы кабинет атаулары берілді.Атап айтсақ, ауыл советінің басқарма басшысы Бекқожа Бөлебаев. Ауыл мерейінін өсіре білген азаматтың атына музей ашылғалы жатыр.Бұрынғы мектеп директоры және ауыл тізгінін ұстаған апталдай азамат Құттыбай Аханов. Ауыл көркін келтірген азаматтың құрметіне ардагерлер кабинетіне есімі берілді. Жоғарыда аталған әрбір кабинетке бұл азаматтардың есімін берудегі мақсат – ауылдың даму процесіне зор үлесін қосқан жандарды мәңгілік есте сақтау мен дәріптеу және насихаттау.Басқа да жаңашыл бастамалар мен білім ордасының жетістіктерімен мектеп директоры бөлісті.«Оқуға құштар мектеп» жобасы аясында оқушылардың жаңа технологияларды игеруіне ықпал жасау негізінде мектебімізде жаңа химия кабинеті берілді. Мұнда жаңа технолгия және түрлі құрылғылармен жарақтандырылған. Кабинетті даярлау барысында Алматы шаһарындағы «МИР» компаниясы қызмет көрсеткен болатын.Мектеп оқушыларының білім дәрежесіне келер болсақ, өте жоғары. Тәлім алушылар әр түрлі пәндік және ғылыми бағыттағы жарыстарға қатысып жүр. Өткен және биылғы оқу жылында көптеген жетістіктерге жеттік.Жаңа 2022-2023 оқу жылында аудандық «Менің шағын Отаным» атты республикалық зияткерлік байқауының аудандық кезеңінде «Менің кіші отанымның тарихы» номинациясы бойынша 9 сынып оқушысы Дильназ Сұраған ІІІ орынды иемденді.Ал, «Менің кіші Отанымның болашағы» номинациясы бойынша 9 сынып оқушысы Аружан Құттыбай Алғыс хатпен марапатталды. Басқа да, «Яссауитану» халықаралық байқауының аудандық кезеңінде Аружан Құттыбай Алғыс хатпен марапатталды. Бұл оқушылардың жетекшілері тарих пәнінің мұғалімі Бақыткүл Бөлебаева.Біз мұнымен тоқтамай, алға қойған-мақсат мұратымызға жету жолында әлі де аянбай еңбек етеміз, – дейді №238 орта мектеп директоры Әлия Талғатбекқызы.Ауыл өнерпаздары мінбердеСонау 1989 жылдан бері тұрғындар үшін ауылдық клуб аянбай еңбек етіп келеді. Ауылдың мәдениет ордасы «Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасының 23 қаңтардағы және «Мемлекеттік мүлік туралы» Қазақстан Республикасының 2011 жылғы 1 наурыздағы заңдарына сәйкес Қазалы ауданының әкімінің қаулысы бойынша 25 шілде 2014 жылы мемлекеттік коммуналдық қазыналық кәсіпорны болып қайта құрылған. Содан бері клубта жоспарға сәйкес мәдени жұмыстар атқарылып келеді.Қазіргі таңда «Тасарық ауылдық клубы» МКҚК-да клуб меңгерушісі, есепші, әдіскер, сүйемелдеуші, күзетші, үй сыпырушы жұмыс жасайды.Бүгінде ауылдық клубта 4 үйірме жұмыс жасап келеді. Дәлірек айтсақ, ән, би, көркемсөз және қолөнер үйірмелері. Мұндағы жастардың өнерге деген сүйіспеншілігі артқан. Сол үшінде үйірмеге қатысушы саны – 42-ге жеткен. Бұл көрсеткіш аудан орталығынан бірнеше шақырым қашықтықта орналасқан аядай ауыл үшін жоғары дәрежеге жетуменен тең.«Бұлақ көрсең, көзін аш» демекші жас таланттарды тауып, олардың өнерін халыққа таныстыру, жасөспірімдерді отансүйгіштікке баулу, ұлттық өнер мен салт-дәстүрімізді насихаттау, мемлекеттік тіл мен жастар саясаты және отбасы гендерлік саясатты жүзеге асыру бағытында жыл басында бекітілген жоспарға сәйкес 9 ай бойынша 29 мәдени-көпшілік жұмыстар жүргізілген. Тиісінше өткен шараға ауыл тұрғындарының барлығы дерлік қатысқан. Мұнда карантин шағында туындаған қиындықтарға байланысты онлайн шаралар өткізу де қолға алынған. Биыл сондай онлайн 4 шара өткен.&nbsp;<blockquote>«Тасарық ауылдық клубы ағымдағы жылдың қазан айының 18-і жұлдызына «Балалар жылы» аясында «Мен қазақпын» атты балалар мен жасөспірімдер арасында өткізілетін аудандық патироттық ән байқауын жоспарлап отырмыз. Мұнда өнерпаздар жыл басынан бері аудандық, облыстық, республикалық барлығы 16 байқауға қатысып, барлығында дерлік мінберден көрінді. Биыл жазба ақындар мүшәйсынан жақсы нәтиже көрсете білдік. Атап айтар болсақ, Майлыбас ауылдық округі әкімі аппаратының «Ақсуат ауылдық клубы» МКҚК-ның ұйымдастыруымен, Қазақстан және Орта Азия жастарының жалынды жетекшісі Ғани Мұратбаевтың туғанына 120 жыл толуына орай өткізілген «Аққан жұлдыз» атты аудандық ақындар мүшәйрасына Тасарық ауылынан Меруерт Қарлыбай қатысып, ІІ орынды еншіледі. Жақында «5 қыркүйек – Қазақстан Халқы тілдері күні» мерекесі аясында, қазақ тіл білімі мен әдебиетттану ғылымдарының негізін салушы, ұлттың ұстазы Ахмет Байтұрсыновтың 150 жылдығына орай аудандық «Қазақ тілі» қоғамы және Қазалы аудандық мәдениет және тілдерді дамыту бөлімінің ұйымдастыруымен өткізілген «Өлең – сөздің патшасы» атты жазба ақындар байқауына, №238 орта мектептің мұғалімі Ізбасар Әділет Жақсылықұлы қатысып, ІІІ орынға ие болды. Міне Тасарық ауылының биылғы жеткен бірқатар жетістіктері осы. Алдағы уақытта ауыл жастарының уақытын тиімді пайдалану мақсатында көптеген іс-шараларды қолға алып, ауқымды концерттік кеш, бағдарламарды өткізуді мақсат етіп отырмыз», – дейді Тасарық ауылдық клубының меңгерушісі Зәуре Бекқожақызы.</blockquote>

Тірлігі түзу Тасарық

<a href="https://kyzylorda-news.kz/">Kyzylorda-news.kz.</a> Қыс мезгілі – биліктің білігі сыналар шақ. Әсіресе, коммуналдық салада кемшілік жіберуге әсте болмайды. Осыған байланысты таяуда аудан әкімдігінің баспасөз орталығында өткен брифингте аудандық тұрғын үй-коммуналдық &nbsp;шаруашылығы, жолаушылар көлігі және автомобиль жолдары бөлімінің басшысы Ғабит Аманжолов 2023-2024 жылдардағы жылу беру маусымының аяқ алысы туралы әңгімеледі.Бөлім басшысы жылыту маусымына жоспарланған және атқарылған жұмыстарға тоқталып, биыл және келер жылғы маусымға 134 әлеуметтік нысанның даярланғанын айтты.&nbsp;<blockquote>«Аталған нысанның 60-ы білім беру саласына бағытталса, мәдениет пен спорт – 33, денсаулық сақтау саласына – 41 мекеме ғимараттары даярланған. Ал, 134 нысанның 88-і қатты отынмен, 25 нысан көгілдір отынмен, 21 нысан сұйық отынмен қамтылған. Қазіргі таңда өткен жылдан үнемделген сұйық отын 32205 литр, 1873 тонна қатты отын бар. Оның 9200 тоннасы әлеуметтік салаға, 23000 мың тоннасы жеке тұрғындарға қажет. Сондай-ақ, алдағы маусымға жеке тұрғындарға жылдағы қажетті көмірін кәсіпкерлер жеткізуді жоспарлап отыр. Аудан бойынша қатты отын түсіретін 4 темір жол тұйығы бар, оның барлығында таразы орнатылған», – деді Ғабит Аманжолов.</blockquote>Ғабит Аманжоловтың айтуынша, биыл Бестам, Досбол датқа, Алмалы және Ә.Тәжібаев елді мекендеріне газ құбырларын жүргізуге конкурс жарияланып, Еңбекші мен Жиделіарық елді мекендеріне газ құбырларын жүргізу жұмыстары жүргізілуде. Сонымен қатар бүгінгі таңда кент бойынша 7016, Ы.Жақаев ауылында – 628, Бидайкөлде – 509, Байсында – 151, Н.Бекежановта – 402, Ш.Қодамановта – 380, Ақмаяда – 225, Алғабаста – 317 тұрғын үй көгілдір отын пайдаланып отыр.Айта кетейік, Шиелі кентіндегі А.С.Пушкин атындағы №46 мектеп-лицейінің қазандық ғимаратын салуға ҚР Ұлттық қоры есебінен «Ауыл – Ел бесігі» бағдарламасы аясында қазынадан 45млн 930,0 мың теңге қаржы бөлінген.

Ғабит Аманжолов: Ауданда қатты отын түсіретін 4 темір жол тұйығы бар

<a href="https://kyzylorda-news.kz/">Kyzylorda-news.kz.</a> Ювеналды полиция қызметкерлері бір аптада рейдтік жұмыстары аясында 78 әкімшілік хаттама рәсімдеді.Қызылорда қалалық полиция басқармасының кәмелетке толмағандар істері жөніндегі бөлім қызметкерлерімен күн сайын жасөсіпірімдер арасында құқық бұзушылықтардың алдын алу жұмыстарының тиімділігін арттыруға бағытталған іс-шаралар кешені жүзеге асырылуда.Мәселен, бір апталық рейдттік шаралар жүргізіліп, полицияға 65 жасөспірім жеткізілді. 78 азамат әкімшілік жауапкершілікке тартылды, оның ішінде:- кәмелетке толмағандардың түн тыныштығын бұзудың 3 дерегі анықталды;- кәмелетке толмағандардың ойын-сауық орындарында және түнгі уақытта заңды өкілдерінің еріп жүруінсіз тұрғын жайдан тыс жерде болуына жол бергені үшін 65 ата-ана;Кәмелетке толмағандарды бейімдеу орталығына 12 жасөспірім орналастырылды.<blockquote>«Кәмелетке толмағандардың заңды өкілдерінің еріп жүруінсіз тұрғын жайдан тыс жерде сағат 23-тен таңғы 6-ға дейін болуы-заңды өкілдеріне ескерту жасауды көздейді. Егер бұл әрекеттер бір жыл ішінде қайталап жасалса, құқық бұзушыларға жеті айлық есептік көрсеткіш мөлшерінде айыппұл салынады», - деді Қызылорда қалалық полиция басқармасының ювеналды полиция бөлімінің бастығы, полиция капитаны Айдос Прежекенов.</blockquote>

Тәртіп сақшылары бір аптада 78 әкімшілік хаттама толтырды

Жаңақорғанда жоңышқаның алғашқы орымы жиналды

<a href="https://kyzylorda-news.kz/">Kyzylorda-news.kz.</a> Қызылорда калалық мәслихаттың бюджет және экономикалық даму мәселелері жөніндегі тұрақты комиссиясының отырысы өтті.&nbsp;Комиссия отырысында 20 маусым күні өтетін қалалық мәслихаттың кезекті төртінші сессиясының күн тәртібіне енгізілген мәселелер алдын-ала талқыланды.&nbsp;Қалалық мәслихат депутаттары, күн тәртібіндегі мәселелерді талқылай келе өз ұсыныс-пікірлерін жеткізді.&nbsp;- Қала көлеміндегі салынған ойын алаңдарын жарықтандыру, себебі түнгі жарық болмағандықтан, балалардың кешкі мезгілде ойнауына кедергілер келтіруде. Ойын алаңдарын сындыру немесе бөлшектерін ұрлау орын алуда;&nbsp;- Ауыз су сапасын арттыру мақсатында қаражат бөлінуде, алайда су сапасының артуы төмен;&nbsp;- Қала бойынша аялдамалардың қоғамдық көліктер, автобустардың тоқтауына ыңғайлы (карман) болуын қамтамасыз ету;&nbsp;- Биылғы жылы Тасбөгет кенті бойынша 6 көшеге жасалған жоба-сметалық құжаттарының мерзімі аяқталады. Осыған байланысты аталған жобаларды биыл қаржыландырылуын қамтамасыз ету;&nbsp;- ПМК-29 саяжайы жолдарын жөндеуден өткізу, тазалығын қамтамасыз ету, маршруттық көліктердің жүруіне қолайлы жағдайлар жасау;&nbsp;- Яссауи көшесі бойындағы көгалдандыру жұмыстарын бақылауға алу;&nbsp;- Қалалық қоғамдық көліктерде мүгедектігі бар балаларға жеңілдіктер қарастыру;&nbsp;- Жер комиссиясының құрамына белгілі бір тұлғаларды енгізуде заңдылықты қамтамасыз ету;&nbsp;- Қала және елді-мекен көшелеріне атау беруде нағыз лайықты тұлғаларға көше атауларын беруді назарда ұстау;&nbsp;- Қаланың Шанхай, Гагарин аумақтарындағы Б.Момышұлы, И.Тайманов, М.Дулатов, М.Мәметова, Ә.Молдағұлова, Кеңесары, Марал ишан және т.б. сынды тарихи тұлғалардың есіміне берілген көшелерді абаттандыру, тарихи тұлғалардың есімдеріне лайықты болуын назарда ұстау.&nbsp;- Қала көшелерінде жағдайы жақсы көшелерге қаражат бағыттай бермей, қаланың басқа аумағындағы жағдайы төмен көшелерді жөндеуден өткізу;&nbsp;- Есетов көшесін жөндеуден өткізу;&nbsp;Комиссия отырысына қалалық мәслихат депутаттары, қала әкімінің орынбасары, тиісті дербес бөлім басшылары қатысты. Отырысқа бюджеттік комиссия төрағасы Е.Нұртазаев төрағалық етті.

Қызылордада сессия қарауындағы мәселелер алдын-ала талқыланды

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданына қарасты батыр атын иемденген ауылдық округ бар. Республика көлемінде үлгілі ауыл атанып, танымалдығы артқан ауыл әрбір мереке мен атаулы күнді бей-жай қалдырған емес.«Нағи Ілиясов ауылдық округі әкімі аппараты» коммуналдық мемлекеттік мекемесінің қолдауымен медицина қызметкерлерінің кәсіби мерекесіне арналған «Абзал жандар» атты мерекелік іс-шара өткізілді. Көңілді әрі салтанатты жиынды ауылдық мәдениет үйінің ұйымдастырырған.Адам жанының арашасы ақ желеңді асыл жандар. Бұл сөздер қашаннан дәрігерлер мен мейірбикелер атына таңылған. Дәрігерлер ісі ең жауапты, қиын да қарапайым әрі адалдықты қажет ететін маман иесі. «Ұлт денсаулығы – біздің табысты болашағымыздың негізі» салауатты қоғам қалыптастырып, дені сау ұрпақ өсіруде дәрігерлердің орны ерекше.Салтанатты іс-шарада зор құрметке лайық ақ халатты абзал жандарға ілтипат көрсетілді. Оларға күнделікті күйбең тіршіліктен демалыс сәті болып, кеш көңілді жалғасты. Адам жанына араша болған абзал жандардың құрметіне концерттік нөмірлер дайындалды. Сонымен қатар, «Мағжан және К» жауапкершілігі шектеулі серіктестігінің демеушілігімен ақ халатты абзал жандарға құрмет көрсетілді. &nbsp;

Нағи Ілиясов ауылында медқызметкерлерге құрмет көрсетілді

<a href="https://kyzylorda-news.kz/">Kyzylorda-news.kz.</a> Ерлі-зайыпты ұстаздар Қали Рүстемов пен Набат Тілекқызы алғаш еңбек жолын 1986 жылы №216 Қ.Сәтбаев атындағы қазақ орта мектебінде бастаған. Алғашында әріптес ретінде сыйласқан бозбала мен бойжеткен ортақ тіл табысып, отбасын құрды. Өмірге ұл мен қыз әкеліп, ата-ана атанды. Бүгінде балаларының барлығы әкесі мен анасы таңдаған ұстаздық жолды жалғап келеді.Қали Рүстемұлы орта мектептен кейін 1981 жылы Шымкент педагогикалық институтының дене шынықтыру бөліміне түсіп, 1985 жылы бітірген. 1986-1989 жылдары №216 Қ.Сәтбаев атындағы қазақ орта мектебінде дене шынықтыру пәнінің мұғалімі, 1989-1993 жылдары Ү.Түктібаев совхозындағы спорт мектебінің директоры, 1993-1995 жылдары білім бөлімінде әдіскер болды. Бұдан соң аудандық спорт мектебінде директордың оқу ісі жөніндегі орынбасары қызметін атқарды. Қазір 2011 жылдан бері №266 мектеп-лицейде дене шынықтыру пәнінің мұғалімі. Ұстаздықпен қатар аудан бойынша гір көтеру спортынан аға жаттықтырушы. Жастайынан спортты жанына серік еткен жанның жеткен жетістіктері де аз емес. Ол әр жылдары Орал қаласында ҚР ардагерлер арасында өткен чемпионатта үшінші, Алматы қаласында болған бәсекеде екінші, Қостанай қаласында гір көтеру спортынан ҚР біріншілігінде спортшылар арасында үшінші, осы жылы облыс біріншілігінде бірінші орын алды.Ал жұбайы Набат Тілекқызы Қызылордадағы М.Мәметова атындағы педагогикалық училищеден бастауыш сынып мұғалімі мамандығын тәмамдаған. Еңбек жолын №216 Қ.Сәтбаев атындағы қазақ орта мектебінде бастады. Қызмет ете жүріп, Қорқыт ата университетінен бастауыш класты оқыту методикасы мамандығын аяқтаған. Шәкірттері аудандық, облыстық сайыстардан жүлделі орынды иеленіп, мектеп абыройын арттырып жүр. Оқушылары алтын белгімен бітіріп екі мәрте Астана қаласына демалуға жолдама алды. Қазіргі таңда көптеген шәкірттері ұстаздық жолда еңбек етуде. Ұстаздардың ұлы Айбек Яссауи атындағы халықаралық қазақ-түрік университетінен спорт және дене шынықтыру мамандығын бітірді. Қазір №170 орта мектепте мұғалім. Ол 2014 жылдан бері қол добынан облыстық, республикалық дәрежеде төрешілік етіп келеді. 2018 жылы мектеп оқушылары арасында өткізілген облыстық күзгі спартакиадада қол добы жарысының жоғары дәрежеде ұйымдастырылуына үлес қосқаны үшін «Үздік төреші» номинациясымен марапатталды. Қазақстан Республикасы ІХ жазғы спартакиадасын өткізуге қосқан елеулі еңбегі үшін білім және ғылым министрлігі ұлттық ғылыми-практикалық дене тәрбиесі орталығының директоры С.Мұстафаевтың грамотасын алды. Айбектің жары Әсел Исабаева да ұстаз. Ол әл-Фараби атындағы қазақ Ұлттық университетінің физика пәні мұғалімі мамандығын бітірген. 2014 жылы аталған оқу орнында техникалық-физика факультетінің плазма физикасы кафедрасында маман болып жұмыс өтілін бастаған. Қазіргі таңда Жанқожа батыр атындағы №70 орта мектебінде физика пәні мұғалімі.Отбасының қос қызы Сәуле мен Айлуна да ата-ана жолын таңдаған. Айлуна Қалиқызы өзі түлеп ұшқан №216 Қ.Сәтбаев атындағы қазақ орта мектебінде бастауыш сынып мұғалімі. Бұл отбасы жанұялық жарыстарда үнемі топ жарады. Өздері еңбек ететін білім саласы бойынша да әрқайсысының жетістігі жетерлік.Мамандығын мақтанышына балап, бала жанының бағбаны болуға бар күш-жігерін сарп етіп жүрген Рүстемовтер отбасының алар асуы әлі алда.

Қазақстан және Қызылорда облысының жаңалықтары