<a href="https://kyzylorda-news.kz/">Kyzylorda-news.kz</a> Мәдениет және өнер қызметкерлері күніне орай партияның облыстық филиалында салтанатты шара ұйымдастырылып, мәдениет саласының дамуына елеулі үлес қосып жүрген бірқатар қызметкерлер мен белсенділер марапатталды.Сала өкілдерін кәсіби мерекемен құттықтаған партияның облыстық филиалының төрағасы Жандос Базартай мәдениет пен өнердің ұлт руханиятының алтын діңгегі екенін атап өтіп, мәдениет қызметкерлерінің қоғамдағы орнына ерекше тоқталды.<blockquote>«Мәдениет – ұлттың рухани келбеті. Сіздер ұлттық құндылықтарды дәріптеп, руханиятымызды байытып келесіздер. Өнер мен мәдениеттің дамуына қосып жүрген еңбектеріңіз өлшеусіз. Баршаңызды кәсіби мерекелеріңізбен құттықтай отырып, шығармашылық табыс пен толағай жетістіктер тілеймін», – деді ол.</blockquote>Филиал төрағасы өз сөзінде өңірде мәдениет саласын қолдау бағытында «AMANAT» партиясы тарапынан атқарылып жатқан жұмыстарды да атап өтті.<blockquote>«AMANAT» партиясы мәдениет пен өнер саласын әрдайым қолдап келеді. Әсіресе, осы салада еңбек етіп жүрген азаматтардың әлеуметтік жағдайын жақсарту мен өңірдегі мәдени инфрақұрылымды дамытуға басымдық берілуде. Мәселен, соңғы үш жыл ішінде партияның сайлауалды бағдарламасы аясында облыста 10 мәдени нысан ел игілігіне берілді. Сондай-ақ мәдени ошақтарды сақтап қалу мақсатында 10 нысанға күрделі жөндеу жұмыстары жүргізілді. Бұл бастамалар тұрғындардың мәдени ортаға қолжетімділігін арттырып, өңірдің рухани өміріне серпін беруде. Сонымен қатар кітапхана қызметкерлері мен сала мамандарының жалақысын көтеру, әлеуметтік мәртебесін арттыру мәселелері де партияның тұрақты бақылауында. Партия жанындағы «Miras» кеңесі мәдениет пен өнерді қолдау, ұлттық құндылықтарды дәріптеу және шығармашыл азаматтарға қолдау көрсету бағытында белсенді жұмыс атқарып келеді. Кеңес бастамасымен түрлі мәдени-көпшілік іс-шаралар, кездесулер мен рухани жобалар тұрақты түрде ұйымдастырылуда. Бұл жұмыстар алдағы уақытта да жалғасын табады», – деді Жандос Базартай.</blockquote>Салтанатты шара барысында мәдениет саласының бірқатар қызметкерлері мен өнер өкілдері Дәулет Кәрібектің Алғыс хатымен марапатталды.

Мәдениет саласының дамуына елеулі үлес қосқан қызметкерлер марапатталды

<a href="https://kyzylorda-news.kz/">Kyzylorda-news.kz</a> Қызылорда қаласында төрт жылда бір рет өткізілетін VIII халық ойындарына арналған облыстық іріктеу жарысы өз мәресіне жетті.Ауқымды спорттық додаға Қызылорда облысының барлық аудандары мен Қызылорда қаласынан келген спортшылар қатысып, спорттың бірнеше түрі бойынша өзара мықтыларды анықтады. Атап айтқанда, жарыс бағдарламасына волейбол, баскетбол 3х3, шахмат, тоғызқұмалақ, қазақ күресі, үстел теннисі, шағын футбол, асық ату, қол күресі және гір спорты енгізілді.Төрт күнге созылған жарыс барысында қатысушылар жоғары дайындық деңгейін көрсетіп, тартысты әрі қызықты бәсекелер өткізді. Әр спорт түрі бойынша үздіктер анықталып, командалар арасындағы бәсеке жоғары деңгейде өтті.Жарыс қорытындысы бойынша Арал ауданының құрама командасы барлық спорт түрлерінен жоғары нәтижелер көрсетіп, қарсыластарынан басым түсіп, жалпыкомандалық есепте жүлделі ІІ орынды иеленді. Бұл нәтиже аудан спортшыларының жүйелі дайындығы мен спорт саласындағы атқарылған жұмыстардың нақты жемісі болып табылады.Аталған жарыс өңірде бұқаралық спортты дамытуға, салауатты өмір салтын насихаттауға және спортшылар арасындағы тәжірибе алмасуды нығайтуға зор үлес қосты.<img src="https://knadmin.beoblood.kz/uploads/Aral_oblysty_irikteu_zharysy_2_c3315f3e82.jpg" alt="Арал облыстық іріктеу жарысы 2.jpg">

Халық ойындарына арналған облыстық іріктеу жарысы өз мәресіне жетті

<a href="https://kyzylorda-news.kz/">Kyzylorda-news.kz</a> Бүгін облыс әкімі Мұрат Ергешбаевтың төрағалығымен өткен мәжілісте өңірдегі маңызды инвестициялық және инфрақұрылымдық жобалардың &nbsp;жүзеге асырылу барысы талқыланды.Кеше облыс әкімі Мемлекет басшысының қабылдауында болып, аймақтың әлеуметтік-экономикалық дамуы және алдағы міндеттер жөнінде баяндады. Ұлттық құрылтайдың бесінші отырысында және өңірге жұмыс сапарлары кезінде Президент жүктеген тапсырмаларға тоқталды.Мәжілісте драма театр, Президенттік кітапхана, 500 орындық емхана және 200 орындық перинаталдық орталық құрылыстарына қатысты мәселелер талқыланып, жауапты тұлғаларға нысандарды талапқа сай етіп әрі уақытылы пайдалануға беру міндеті жүктелді.Бұдан бөлек, тиісті мекемелерге «Батыс Еуропа – Батыс Қытай» халықаралық дәлізінің Қызылорда – Ақтөбе бағытын кеңейтуге, Бейнеу – Сексеуіл автомобиль жолының құрылысына орай министрлікпен бірлесіп шешетін мәселелерді пысықтау тапсырылды.Өңір экономикасына серпін беретін инвестициялық жобалардың қазіргі жай-күйі де қаралды. Бұл ретте инвесторлармен байланысты күшейтіп, әр кезеңдегі мәселелерге нақты бақылау орнату қажет.Мәжіліс қорытындысында құрылыс және инфрақұрылым нысандарындағы жұмысты күшейтілген режимде ұйымдастыру, сапа мен мерзімді қатаң қадағалау тапсырылды.

Президент тапсырмаларының орындалу барысы пысықталды

<a href="https://kyzylorda-news.kz/">Kyzylorda-news.kz</a>&nbsp; Өңірлік коммуникациялар қызметінің көшпелі брифингі Қызылорда қаласындағы «Ақмешіт-Сырдария» облыстық орталық мешітінде жалғасты. Жиында 2026 жылы Қазақстанда Құрбан айт мерекесінің өту тәртібі, құрбан шалудың шариғи талаптары мен қайырымдылық шаралары кеңінен түсіндірілді.Брифинг спикері ҚМДБ-ның Қызылорда облысы бойынша өкілі, «Ақмешіт-Сырдария» облыстық орталық мешітінің бас имамы Дастан Құрманбаев қасиетті мерекенің рухани мәніне тоқталып, Құрбан айттың қоғамдағы татулық пен жанашырлықты нығайтатын ұлық мейрам екенін айтты.<blockquote>«Құрбан айт – тек құрбан шалумен шектелмейтін, мұсылман қауымын ынтымақ пен бірлікке үндейтін қасиетті уақыт. Бұл күндері мұқтаж жандарға көмек қолын созып, мейірім мен қайырымдылықты арттыруымыз қажет. Биыл һижри күнтізбесі бойынша зұлхижжа айы 18 мамырда басталып, 26 мамыр - Арапа күні, ал 27 мамыр Құрбан айттың алғашқы күні болып белгіленген. Айт намазы облыстағы барлық мешітте таңғы сағат 06:00-де оқылады», – деді Дастан Жанасұлы.</blockquote>Брифинг барысында құрбан шалудың үкімі мен тәртібі де түсіндірілді. Құрбандыққа қой, ешкі, ірі қара және түйе шалынатыны, малдың мінсіз әрі белгілі жасқа жеткен болуы шарт екені айтылды. Сонымен қатар, құрбандық етін мұқтаж жандарға тарату сауапты іс екені ерекше атап өтілді.<img src="https://knadmin.beoblood.kz/uploads/rban_ajt_mejirim_men_birlikti_merekesi_4ba5caf892.jpg" alt="Құрбан айт - мейірім мен бірліктің мерекесі.jpg">Өңір мешіттерінде мерекеге дайындық қызу жүргізілуде. Арнайы қасапханалар белгіленіп, еріктілер тобы жасақталған. Құрбан шалу рәсімдері санитарлық талаптарға сай ұйымдастырылып, онлайн форматта да жүзеге асырылады. Ол үшін qurban.muftyat.kz платформасы арқылы тапсырыс беруге мүмкіндік қарастырылған.Дастан Құрманбаев тұрғындарды күмәнді қорлар мен беймәлім ұйымдардың онлайн құрбандық акцияларынан сақ болуға шақырды. Сондай-ақ кәсіпкерлерге әлеуметтік маңызы бар азық-түлік пен құрбан малдарының бағасын негізсіз қымбаттатпау жөнінде үндеу жасады.<blockquote>«Құрбан айт - жүректерге иман нұрын, көңілдерге шаттық сыйлайтын мереке. Осы күндері көпшілікке жақсылық жасап, елдің алғысын алайық. Өткен жылы облыс мешіттерінің ұйымдастыруымен мыңдаған отбасыға құрбан еті таратылып, қайырымдылық шаралары кең көлемде өткізілген. Биыл да осы игі дәстүр жалғасын таппақ», – деді бас имам.</blockquote>Фото: gov.kz

 Қызылорда облысында Құрбан айт мерекесіне дайындық басталды

<a href="https://kyzylorda-news.kz/">Kyzylorda-news.kz</a>&nbsp; Биыл өңірде 185 мың 800 гектарға ауыл шаруашылығы дақылдары егіліп жатыр. Мемлекет басшысының суды көп қажет ететін дақылдарды азайту жөніндегі тапсырмасына сәйкес, күріш көлемі өткен жылмен салыстырғанда 10 мың 900 гектарға қысқартылып, 70 мың гектарға дейін төмендетілді. Бұл туралы Өңірлік коммуникациялар қызметінің ақпарат алаңында көктемгі Облыстық ауыл шаруашылығы және жер қатынастары басқармасы басшысының орынбасары Даулетбек Абдирасулов баяндады.Жиында егіс науқанының қазіргі ахуалы, су тапшылығының алдын алу шаралары мен су шаруашылығы жағдайы кеңінен сөз болды.<blockquote>«Қысқартылған күріш алқаптарының орнына суды аз қажет ететін жүгері, майлы және малазықтық дақылдар көлемі ұлғайтылуда. Бұл су үнемдеу мен егісті әртараптандыру бағытындағы маңызды қадам. Қазіргі таңда ерте егілетін дақылдарды егу толық аяқталды. Бүгінде картоптың 230 гектары, көкөністің 3,8 мың гектары және бақшаның 4,9 мың гектары егілді. Ал негізгі дақыл күріштің 49 мың 502 гектары себіліп, оның 41 мың 360 гектары суға бастырылған. Егіс жұмыстарын 1 маусымға дейін толық аяқтау жоспарланып отыр. Көктемгі дала жұмыстарына қажетті тұқым қоры толық дайындалды. Сонымен қатар, 2026 жылға қажетті 65 мың 600 тонна тыңайтқыштың 97,6 пайызы, гербицидтердің 64,1 пайызы сатып алынды. Егін науқанына қатысатын ауыл шаруашылығы техникалары да толық жөндеуден өткізіліп, жұмысқа кірісті», – деді спикер.</blockquote>Өңірде су үнемдеу бағытындағы жұмыстар да қарқын алған. Биыл күріш алқаптарын лазерлік тегістеу көлемі 65 мың гектарға жеткізілмек. Ал су үнемдеу технологияларын қолдану көлемі өткен жылмен салыстырғанда екі есеге артып, 16 мың 700 гектарға дейін ұлғайтылған. Қазіргі таңда жоспарланған меженің 82,2 пайызы орындалған.<blockquote>«Су тапшылығының алдын алу және агротехнологиялық талаптарды сақтау мақсатында барлық аудандарда арнайы жұмыс топтары құрылды. Олар су лимитінің сақталуын, каналдар арқылы судың тиімді бөлінуін және күріш көлемінің белгіленген межеден аспауын бақылауда ұстап отыр», - деді Даулетбек Жәнібекұлы.</blockquote>Сондай-ақ, өңірде егін шаруашылығын әртараптандыру және су үнемдеу мақсатында 4 ірі жоба жүзеге асырылуда. Соның бірі швейцариялық Харвест Груп компаниясының техникалық қарасора, жүгері және соя дақылдарын өсіру мен өңдеу жобасы. Бұл жоба аясында егіс көлемі 2028 жылға дейін 32 мың гектарға дейін ұлғайтылмақ.<img src="https://knadmin.beoblood.kz/uploads/Usileny_mery_po_vodosberezheniyu_v_Kyzylordinskoj_oblasti_371b6f3419.jpg" alt="Усилены меры по водосбережению в Кызылординской области.jpg">Бұдан бөлек, «Кең дала-2» бағдарламасы арқылы 59 шаруашылыққа 8 млрд 800 млн теңге көлемінде жеңілдетілген несие берілген.Брифингте «Арал-Сырдария» бассейндік инспекциясының басшысы Зейнулла Қазтоғанов Сырдария өзеніндегі қазіргі су шаруашылығы жағдайына тоқталды. Оның мәліметінше, бүгінгі күні Шардара су қоймасындағы су көлемі 5 млрд текше метрден асқан. Ал Көксарай су реттегішінде 813,63 млн текше метр су жиналған.<blockquote>«Қазіргі таңда Шардара мен Көксарайдан төменгі ағысқа секундына 550 текше метр су жіберілуде. Қызылорда облысы аумағына Көктөбе су бекеті арқылы 538 текше метр су келіп жатыр. Жалпы су шаруашылығы жағдайы тұрақты бақылауда», - деді инспекция басшысы.</blockquote>Сонымен қатар, Арал теңізіне секундына 48 текше метр су түсіп жатқаны айтылды. Жыл басынан бері теңізге 780 млн текше метр су жеткен. Мамандардың айтуынша, Сырдария бойындағы су жағдайына күнделікті мониторинг жүргізіліп, барлық су шаруашылығы нысандарының жұмысы бақылауға алынған.Фото: Нұрболат Нұржаубай

Көктемгі дала жұмыстары: Күріш көлемі қысқарып, су үнемдеу күшейтілді

<a href="https://kyzylorda-news.kz/">Kyzylorda-news.kz</a>&nbsp; Қорқыт ата атындағы Қызылорда университетінің Жасанды интеллект институты студенттері өндірістік практика барысында екі жыл бойы алған теориялық білімдерін нақты кәсіби ортада шыңдап, алғашқы еңбек тәжірибелерін жинақтауда.Практика – білім алушылардың кәсіби бағыт-бағдарын айқындап, өз мүмкіндіктерін өндіріс пен қызмет көрсету салаларында дәлелдеуге жол ашатын маңызды кезең.Бүгінде студенттер тек өңірлік мекемелерде ғана емес, еліміздің экономикасы мен цифрлық дамуына үлес қосып отырған ірі ұйымдарда тәжірибеден өтуде. Бұл – университетте берілетін білімнің заманауи талаптарға сай екенінің нақты көрінісі.Қаржы және банк секторында тәжірибе жинақтап жатқан студенттер Halyk Bank, Freedom Bank, Freedom Life және ҚазАгроҚаржы ұйымдарында банк құжаттарымен жұмыс істеу, клиенттерге қызмет көрсету, электронды база жүргізу және ішкі бизнес-процестермен танысуда. Бұл бағыт болашақ мамандардың қаржылық сауаттылығын арттырып, экономикалық жүйенің жұмысын терең түсінуге мүмкіндік береді.Өндіріс, мұнай-газ және өнеркәсіп салаларында тәжірибеден өтіп жатқан білім алушылар KazMunaiGas Digital, ПетроҚазақстан және Шалқия Цинк мекемелерінде IT-инфрақұрылым, ақпараттық қауіпсіздік, желілік жүйелер және өндірістік процестерді цифрландыру бағытында жұмыс жасауда.Ал IT және цифрлық технологиялар саласында студенттер АО “Национальные информационные технологии”, Государственная техническая служба, Kyzylorda Hub, IT Park, Grant Technology, Global Elements және Elements.kz секілді ұйымдарда веб-жобалар әзірлеу, киберқауіпсіздік, техникалық қызмет көрсету, желілік әкімшілендіру және цифрлық шешімдер бойынша тәжірибе жинақтап жатыр.Мемлекеттік басқару және қоғамдық қызмет саласында тәжірибеден өтуші студенттер Қызылорда облысының әкімдігі, Жалағаш аудандық әкімдігі, Полиция басқармасы, Облыстық сот, Халыққа қызмет көрсету бөлімі және Отбасын қолдау орталығы мекемелерінде электронды құжат айналымы, мемлекеттік қызметтерді цифрландыру және әкімшілік процестермен танысуда.Сонымен қатар статистика, медиа, логистика және жобалау салаларында да студенттердің белсенділігі байқалады. Ұлттық статистика бюросының департаменті, Qyzylorda TV / Қызылорда телеарнасы, Adal Logistics және “Шынар Проект и Компания” ұйымдарында білім алушылар деректерді өңдеу, инфографика, SMM, дизайн және логистикалық жұмыстарға қатысып, кәсіби машықтарын дамытып келеді.<img src="https://knadmin.beoblood.kz/uploads/Bolasha_IT_mamandary_k_sibi_ortada_t_zhiribe_aluda1_3835d640b1.jpeg" alt="Болашақ IT мамандары кәсіби ортада тәжірибе алуда1.jpeg">Практиканың алғашқы күндерінен-ақ студенттердің кәсіби қызығушылығы мен жауапкершілігі айқын көрінді. Евгений Решетников виртуалды ортада корпоративтік желі құрып, Kali Linux негізінде фаервол және веб-қауіпсіздік элементтерімен жұмыс жасады. Дәулет Талғат Cisco коммутаторын баптап, желілік әкімшілендіру бағытындағы дағдыларын көрсетті. Темирлан Рахмет KazMunaiGas Digital базасында ақпараттық қауіпсіздік және QazCloud жүйелерімен танысты. Әділет Дәуітбаев АО “Национальные информационные технологии” базасында домендік инфрақұрылым және Active Directory жүйесімен жұмыс жүргізді. Меруерт Ахметова, Асылжан Қалжан және Бекнұр Жолдин веб-дизайн, UI/UX және сайт жасау бағытында нәтижелі жұмыстар атқарды. Ал Нұртөре Баймұрат халыққа қызмет көрсету саласында азаматтарға электронды цифрлық қолтаңба мен электронды мемлекеттік қызметтер бойынша көмек көрсетті.Бұл – студенттердің аудиторияда алған білімін нақты өндірістік ортада тәжірибе арқылы бекітіп жатқан маңызды кезеңі. Университет тарапынан жасалған қолдау мен заманауи білім беру мүмкіндіктері олардың кәсіби қалыптасуына үлкен серпін беруде.Аталған тәжірибе Біріккен Ұлттар Ұйымының Тұрақты даму мақсаттарымен де үндеседі. Атап айтқанда, SDG 4 – сапалы білім беру, SDG 8 – лайықты жұмыс пен экономикалық өсуді қамтамасыз ету, SDG 9 – индустрия, инновация және инфрақұрылымды дамыту, сондай-ақ SDG 17 – серіктестік байланыстарды нығайту мақсаттарына үлес қосады.Қорқыт ата атындағы Қызылорда университеті білім алушылардың кәсіби дамуына жағдай жасап, еңбек нарығында сұранысқа ие, бәсекеге қабілетті мамандар даярлау бағытындағы жұмыстарын жүйелі түрде жалғастыруда.

Болашақ IT мамандары кәсіби ортада тәжірибе алуда

<a href="https://kyzylorda-news.kz/">Kyzylorda-news.kz</a> Сырдария ауданындағы «Руханият» орталығында Қызылорда облысы кәсіпкерлер палатасы Өңірлік кеңесінің көшпелі отырысы ұйымдастырылды. Іс-шараға аудан әкімінің орынбасары Роллан Еспенбетов, аудан прокурорының міндетін атқарушы Махмут Алмас, Қызылорда облысы Кәсіпкерлер палатасы Өңірлік кеңесінің төрағасы Ерлан Раимов, Қызылорда облысы кәсіпкерлер палатасы директорының орынбасары Салават Кулмаханов, Өңірлік кәсіпкерлік кеңесінің мүшесі Мұрат Сәрсенбаев, Сырдария ауданы бойынша мемлекеттік кірістер басқармасының бас маманы Ұлан Болат, қаржы ұйымдарының мамандары, кәсіпкерлер мен шаруа қожалықтарының жетекшілері қатысты.Жиынның негізгі мақсаты – кәсіпкерлікті дамытуға бағытталған мемлекеттік бағдарламаларды түсіндіру, бизнес өкілдерінің ұсыныс-пікірлерін тыңдау және кәсіпкерлерге туындаған мәселелер бойынша нақты қолдау көрсету болды.<img src="https://knadmin.beoblood.kz/uploads/Syrdariya_k_sipkerlik_1_c5cca171db.jpg" alt="Сырдария кәсіпкерлік 1.jpg">Кездесу барысында мемлекеттік бағдарламалар аясында көрсетілетін қолдау шаралары, жеңілдетілген несиелеу мүмкіндіктері, жаңа инвестициялық жобаларды қаржыландыру тетіктері туралы кеңінен ақпарат берілді.Сонымен қатар, кәсіпкерлерге салық саласы, заң талаптары және бизнес жүргізу барысында кездесетін өзекті мәселелер бойынша түсіндірме жұмыстары жүргізілді. Қатысушылар өздерін толғандырған сұрақтарын қойып, сала мамандарынан нақты жауаптар алды.Көшпелі отырыстан кейін делегация аудан орталығындағы бірқатар кәсіпкерлік нысандарды аралап, олардың жұмысымен танысты. Кәсіпкерлермен жүздесу барысында өндіріс көлемін ұлғайту, жаңа жұмыс орындарын ашу, мемлекеттік қолдау тетіктерін тиімді пайдалану және бизнесті дамыту бағытындағы өзекті мәселелер талқыланды.Айта кету керек, мұндай кездесулер кәсіпкерлер мен мемлекеттік органдар арасындағы байланысты нығайтып, бизнестің дамуына серпін беретін тиімді алаңға айналып келеді.Фото: Сырдария ауданы әкімінің баспасөз қызметі&nbsp;

Кәсіпкерлікті дамыту бағытында көшпелі отырыс өтті

<a href="https://kyzylorda-news.kz/">Kyzylorda-news.kz</a> Биыл Арал өңірінен шыққан қазақ поэзиясының көрнекті өкілі, Қазақстанның еңбек сіңірген қайраткері, ақын Шөмішбай Сариевтің 80 жылдығы.Осыған орай Арал ауданы Қамыстыбас ауылдық округінде ақын мұрасын ұлықтауға арналған мазмұнды шаралар өтті. Ақынның 80 жылдығына орай ұйымдастырылған шараларға ақынның жары Ж.Сариева, қызымен және немересімен бірге арнайы келіп қатысты.Алдымен №21 орта мектепте ұйымдастырылған «Ұлы дала – шөл даланың ұлымын» атты әдеби-сазды шарамен бастау алды. Жас шәкірттер ақын өлеңдерін мәнерлеп оқып, өнерпаздар халық жүрегінен орын алған әндерді орындады. Сондай-ақ, ақынның өмір жолы мен шығармашылығына арналған бейнеролик көрсетілді. Кеш соңында қонақтар мектеп жанындағы мұражайды аралап, ақын мұрасына арналған жәдігерлермен танысты.<img src="https://knadmin.beoblood.kz/uploads/A_yn_m_rasy_rpa_a_amanat1_14a646e47d.jpg" alt="Ақын мұрасы – ұрпаққа аманат1.jpg">Рухани шаралар легі ауылдық мәдениет үйінде өткен «Шөмішбай мұрасы – руханият шамшырағы» атты сыр-сұхбат кешімен жалғасты. Мәдениет үйінің фойесінде арнайы фотоаймақ ұйымдастырылып, ақын шығармашылығына арналған көрме көпшілік назарына ұсынылды.Тағылымды сыр-сұхбатты «Толқын» газетінің бас редакторы Айдар Сайлауов жүргізді. Кеш барысында Жұмагүл Сариева ақынның шығармашылық жолы, отбасылық өмірі мен азаматтық болмысы жайлы естеліктерімен бөлісті.Кеш Шөмішбай Сариевтің өз дауысымен оқылған «Кел, жылдарым!» өлеңінің бейнежазбасымен ашылып, көпшілікке ерекше әсер сыйлады. Одан кейін жас өнерпаздар мен көркемсөз оқу шеберлері ақын шығармаларын орындап, поэзия мен өнер үндескен мазмұнды кешке ұластырды.<img src="https://knadmin.beoblood.kz/uploads/A_yn_m_rasy_rpa_a_amanat2_beb054b77b.jpg" alt="Ақын мұрасы – ұрпаққа аманат2.jpg">Қамыстыбас ауылдық округінің әкімі А.Төлебайқызы сөз сөйлеп, Шөмішбай Сариев мұрасының ұлттық руханияттағы орны ерекше екенін атап өтті. Ол өз сөзінде ақын шығармаларының жас ұрпақ тәрбиесіндегі маңызына тоқталып, мұндай тағылымды шаралардың рухани құндылықтарды дәріптеудегі рөлі зор екенін жеткізді. Құрметті қонаққа ұлттық дәстүрге сай құрмет көрсетілді.Мазмұны бай, тәрбиелік мәні зор қос шара да ақын мұрасын ұлықтап, жас ұрпақтың рухани дүниесін байытуға бағытталған маңызды кездесулердің біріне айналды.&nbsp;

«Ұлы дала – шөл даланың ұлымын» атты шара өтті

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаевтың тапсырмасына сәйкес, Қазақстан Республикасының Франциядағы Елшілігінің қолдауымен, облыс әкімінің орынбасары Ардақ Зебешевтің жетекшілігімен Қызылорда облысының делегациясы Париж қаласына жұмыс сапарын бастады.Сапардың мақсаты – өңірдің экономикалық және инвестициялық әлеуетін таныстыру, Францияның жетекші компанияларымен, іскерлік ұйымдарымен ынтымақтастықты нығайту.Алғашқы күні делегация мүшелері бірқатар жетекші компания басшыларымен және өкілдерімен B2B форматында келіссөздер жүргізді. Олардың қатарында «Maisadour», «Hemp-it»,«LAROCHE Group», «Irri France», «Heartland Capital», «TotalEnergies» және «SUEZ» компаниялары бар. Кездесулерде ауыл шаруашылығы, тұқым шаруашылығы, техникалық қарасора өсіру, су үнемдеу технологиялары, жаңартылатын энергетика, экология және инвестициялық жобаларды қаржыландыру бағыттарындағы ынтымақтастық мүмкіндіктері талқыланды.Сапар аясында екі маңызды үшжақты меморандумға қол қойылды. Қызылорда облысының әкімдігі, «Maisadour» және «Harvest Agro» компаниялары арасында жүгері тұқымдарын өндіру бойынша үшжақты меморандум жасалды. Сондай-ақ, Қызылорда облысының әкімдігі, «Hemp-it» және «Harvest Agro» компаниялары арасында техникалық қарасора тұқымдарын өңдеу және өндіру бойынша үшжақты меморандумға қол қойылды.Бұл келісімдер өңірде заманауи агроөнеркәсіптік өндірісті дамытуға, жоғары сапалы тұқым шаруашылығын жолға қоюға, жаңа экспорттық бағыттарды қалыптастыруға және жұмыс орындарын ашуға мүмкіндік береді.Сонымен қатар, делегация мүшелері Францияның «MEDEF International» ұйымы бас директорының орынбасарымен кездесті. Бұл – Францияның ірі кәсіпорындары мен кәсіпкерлер федерацияларын біріктіретін беделді үкіметтік емес құрылым. «MEDEF International» ұйымының ұйымдастыруымен өткен дөңгелек үстелде Ардақ Зебешев өңірдің инвестициялық әлеуетін таныстырып, өзара тиімді әріптестікті дамыту мәселелері талқыланды. Француз бизнес қауымдастығы Қызылорда облысының бастамаларына қызығушылық білдіріп, бірлескен жобаларды жүзеге асыруға дайын екенін жеткізді.Фото: Қызылорда облысы әкімінің баспасөз қызметі

Қызылорда облысы делегациясының Францияға жұмыс сапары басталды

<a href="https://kyzylorda-news.kz/">Kyzylorda-news.kz</a> &nbsp;Кеше «ХАЛЫҚ ӘУЕНІ» жобасы аясында «Astana Musical» мемлекеттік театрының «Мюзикл әлемі» концерттік сапары Арал ауданынан бастау алды.Шығармашылық сапар Қазақстан Республикасы Мәдениет және ақпарат министрлігінің бастамасымен, «Қазақстан Халық банкі» АҚ демеушілігімен жүзеге асырылып отыр.<img src="https://knadmin.beoblood.kz/uploads/whatsapp_image_2026_05_21_at_21_07_45_004691bb29.webp" alt="whatsapp-image-2026-05-21-at-21.07.45.webp">Бағдарлама көрерменге әлемдік мюзикл мәдениеті мен қазақ музыкалық өнерінің үндестігін ұсынуға бағытталған. Кеш барысында қазақ халық әндері, әлемдік хиттер, театрландырылған қойылымдар мен мюзиклдерден үзінділер орындалды.Концерт барысында көрермен назарына балалар мен отбасылық аудиторияға арналған музыкалық нөмірлер де ұсынылды. Атап айтқанда, «Baby Shark», «The Lion King Sleeps Tonight», «In the Still of the Night» композициялары орындалды.Сондай-ақ театр әртістері қазақстандық мюзиклдерден арнайы үзінділер сахналады. «ХАЛЫҚ ӘУЕНІ» жобасы кәсіби театр және музыкалық өнерді өңірлерге кеңінен таныстыруға, мәдени байланысты нығайтуға және көрерменгесапалы шығармашылық жобаларды ұсынуға бағытталған.Айта кетейік, концерттік бағдарлама 22 мамырда сағат 16:00-де Қазалы ауданы, Әйтеке би кентіндегі Р.Бағланова атындағы аудандық мәдениет орталығында және 23 мамыр сағат 17:00-де Байқоңыр қаласындағы Карен Шахназаров атындағы «Сатурн» кино концерт залында өтеді.Фото: Арал ауданы

«Халық әуені» өнер керуені Арал ауданынан бастау алды

<a href="https://kyzylorda-news.kz/">Kyzylorda-news.kz</a> 2026 жылғы 9–10 мамыр күндері Тайвань мемлекетінің ұйымдастыруымен онлайн форматта өткен Asia-Pacific Informatics Olympiad (APIO 2026) халықаралық олимпиадасына әлемнің 32 елінен 187 оқушы қатысты.Аталған беделді білім додасында Қазақстан Республикасының құрамасы жоғары нәтиже көрсетіп, 1 алтын, 1 күміс және 4 қола медаль иеленді.Қазақстан құрамасының қоржынына түскен алтын медальдің иегері — Қызылорда облысындағы С.Шаухаманов атындағы №9 облыстық «Білім-инновация» лицей-интернатының оқушысы Мансур Мамадахунов болды.Айта кету қажет, Мансур Мамадахунов — Қазақстан тарихындағы APIO олимпиадасының үшінші алтын медалін иеленген оқушы. Сондай-ақ, талантты білім алушы 2026 жылғы 9–16 тамыз аралығында Өзбекстан Республикасының Ташкент қаласында өтетін IOI-2026 (38th International Olympiad in Informatics) дүниежүзілік олимпиадасына Қазақстан құрамасы сапында қатысуға жолдама алды. Іріктеу кезеңінің нәтижесі бойынша ұлттық құрама құрамына бірінші болып енді.Бұл жетістік — өңіріміздегі дарынды оқушыларды қолдау бағытындағы жүйелі жұмыстың және сапалы білім берудің нақты нәтижесі.Фото: Қызылорда облысы білім басқармасының баспасөз қызметі

Қызылордалық оқушы APIO 2026 халықаралық олимпиадасының алтын жүлдегері атанды

<a href="https://kyzylorda-news.kz/">Kyzylorda-news.kz</a> 2026 жылғы 29 мамырда Алматы қаласында қатты тұрмыстық қалдықтарды энергетикалық кәдеге жарату зауытының құрылысы басталады. Жоба Қазақстан Президентінің инвестиция тарту және «жасыл» экономиканы дамыту жөніндегі тапсырмаларын іске асыру аясында жүзеге асырылмақ.Қазақстан Республикасының Премьер-министрі Олжас Бектенов Қытайдың қалдықтарды энергияға айналдыру саласындағы жетекші компанияларының бірі – Hunan Junxin Environmental Protection Co., Ltd директорлар кеңесінің төрағасы Дай Даогомен кездесу өткізді.Кездесу барысында Алматы қаласында қалдықтарды энергетикалық кәдеге жарату бойынша жүзеге асырылатын инвестициялық жобаның барысы талқыланды. Жобаның жалпы инвестиция көлемі 145,5 млрд теңгені құрайды.Премьер-министр Олжас Бектенов қоршаған ортаны қорғау Қазақстанның жаңа Конституциялық басымдықтарының бірі екенін атап өтті. Оның айтуынша, Үкімет экологиялық жаңғыртуға бағытталған нақты жобаларды жүзеге асыруға және озық технологиялар мен инвестициялар тартуға ерекше көңіл бөліп отыр.Өз кезегінде Дай Даого құрылыс жұмыстары 29 мамырда басталатынын және зауыт екі жыл ішінде пайдалануға берілетінін мәлімдеді.Жоба аясында тәулігіне 2 мың тоннаға дейін қатты тұрмыстық қалдық өңделіп, 60 МВт-қа дейін электр энергиясы өндіріледі. Зауыттың іске қосылуы нәтижесінде жыл сайын шамамен 200 мың тонна көмірқышқыл газы шығарындылары азайып, полигондарға түсетін жүктеме төмендейді.Сонымен қатар құрылыс кезеңінде кемінде 700 уақытша жұмыс орны ашылып, жоба толық іске қосылғаннан кейін 120 тұрақты жұмыс орны құрылады.Жоба «жасыл» энергия өндірісін дамытуға, жергілікті мамандар даярлауға, технологияларды енгізуге және экологиялық мәдениетті арттыруға бағытталған.Кездесу қорытындысы бойынша Премьер-министр салалық мемлекеттік органдарға жобаны уақтылы іске асыруды қамтамасыз етуді тапсырды.

Қазақстан және Қызылорда облысының жаңалықтары