<a href="https://kyzylorda-news.kz/">Kyzylorda-news.kz.</a>&nbsp; Шиелі ауданында тігін фабрикасы ашылды. Жаңа нысан «Ай-Мар» деп аталады. Кәсіпорын бірнеше бағытта қызмет көрсетіп, 60 адамды жұмыспен қамтымақ. Аумағы 1000 шаршы метрді алып жатқан кәсіпорын арнайы киім-кешек тігуге маманданған. Бұл туралы Қызылорда облысының кәсіпкерлік және өнеркәсіп басқармасы хабарлады.«Ай-Мар» тігін фабрикасы Қызылорда қаласында орналасқан «Далатекс» тігін фабрикасының филиалы.Аталған өндіріс орнын жеке кәсіпкер Дилмухамед Абизов өз қаражаты есебінен ашып, қазіргі таңда 30-дан астам аудан тұрғындарын жұмыспен қамтуда. Болашақта одан бөлек тағы 30 жұмыс орнын ашып, ересектер мен балаларға арналған киімдерді тігу жоспарлануда.Жеңіл өнеркәсіп нысаны әмбебап және бірнеше бағытта жұмыс жасайды. Заманауи тігін жабдықтарына ие кәсіпорын бүгінде арнаулы киім формаларын тігеді.<blockquote>-Бір күнде 400 көйлек, 300 арнайы киім өңдеп шығарамыз. Цехты ашудағы негізгі мақсатымыз - жергілікті тұрғындарды жұмыспен қамту, облысымызда басқа өңірлерден, сырттан келетін киім-кешек тауарларына тәуелділікті азайтып, өңірлік өнімнің үлесін арттыру. Нарықта отандық өнім арасында бәсекелестікті арттыру және өзара тауар айналымын жақсарту, - дейді Дилмухамед Абизов.</blockquote>Әр тігіншінің алдында —соңғы үлгідегі тігін машинасы. Қол күшін қажет етпесе де мұндағы шеберлерге жүктелген міндеттің жүгі ауыр.Өндірістің технологиялық процесі мен ассортиментіне байланысты бір ауысымда 500 дана өнім шығаруға қауқарлы.Фабрикадағы қыз-келіншектер тіккен киімдер Қазақстаннның түкпір-түкпіріне жол тартуда.

Шиелі  ауданында тігін фабрикасы ашылды

<a href="https://kyzylorda-news.kz/">Kyzylorda-news.kz.</a> Жаңақорғанда жалпы қандай құрылыс заты болмасын сұранысы өте жоғары тұрады. Әсіресе, үй мен ғимаратқа арналған кез келген тауар өте өтімді. Біздің кәсіпкерлер сырттан дайын өнім тасымалдаудан гөрі өндіріс саласын қолға ала бастады. Оның ішіне, қабырғаға қатысты, ішкі әрлеу жұмыстарына керекті желімдерді де қолға алдық. Солардың көшінде гипстен түрлі тауар жасау сәнге айналды. Ауданда бұл бизнесті серік еткен санаулы ғана азамат бар, олардың жасаған ісіне көпшілік баға беріп қойған еді. Біз бүгін Бірлікте тұратын Мұратбек ағамызбен байланысып, кәсібінің қыр-сырын зерделедік.Жалпы бұл кәсіптің түрі мүсіндер жасауға ғана емес, үйдің терезесі, есік жақтауы мен ішкі беттегі аркаларға көп қолданылады. Біздің бүгінгі кейіпкеріміз қалаған тапсырысқа сай дизайн жасай алады. 6 жылдан бері жанына жалау етіп, кәсіби тұрғыда айналысып келеді екен.– Өзім негізі өнерге жақын адаммын. Суретші болдым, кейіннен ән өнеріне ауыстым. Түптеп келгенде, қаннан сіңген қасиет жібермеді. Өйткені, ата-бабамнан мұра болып келе жатқан қолөнерлік маған да жұғыпты. Бұл кәсіпті жас кезімде арман ететін едім, уақыты келіп 80 000 теңгемен бастап кеттім. Екі қалып сатып алдым да дизайн, модулін барлығын қолдан жасап бастадым. Шүкір, қазір кәсібім ілгерілеп, тапсырыс өзге өңірлерден де келуде. Мәселен, Тараз, Түркістан және Шиеліден көптеп тапсырыс қабылдаймыз.– Алдағы жоспарыңыз қандай?– Цехты кеңейтіп, баспалдақтардың арнайы формулаларын құюды ойластырып жүрмін. Оның барлығы қаражатқа келіп тіреледі. Жобамның аты – өнергипс деп аталады. Қазір “Атамекен” Қызылорда облыстық кәсіпкерлер палатасының Жаңақорған аудандық филиалының директоры Асылжан Жолдасбековтен бағыт-бағдар алып, грант пен төмен пайызды несие алуға ниет білдірудемін. Әрі ауылдағы жұмыссыз жастарға жұмыс көзін ашып берсем деген де жоспарым бар. Осыған дейін екі жігітті шәкірт еттім, бар білгенімді тәжірибе жүзінде үйреттім. Жақында Қазалы мен Байқоңыр қаласынан жастар келіп, практика жасап, біліктілігін толықтырды. Одан кейін, Жетісайдан да келген жігіттер бар, жалпы үйренемін деген ынталы жандар болса есігім әрдайым ашық. Иә, үйреніп қана қоймай кәсібіне идірген болса нұр үстіне нұр болады. Біз Байқоңырдан келген Нұрсұлтан есімді жастың осы бағыт бойынша бизнесін дөңгелетіп отырғанын естідік. Негізі гипстен шыққан кез келген тауар сұраныссыз емес. Оны аудан орталығында тұратын Өркен есімді кәсіпкердің шағын цехынан жиі көретінбіз. Сондықтан бүгінгі кейіпкердің шағын бизнесінің болашағына сенуге болады. Өйткені, гипс өнімдері бір бағытта ғана емес, бірнеше бағытта жұмсала береді.– Қолөнер кәсібі өте төзімділікті қажет етеді. Тапсырыс берген әрбір тұтынушының талғамына сай дүние жасау үлкен жауапкершілік. Сондықтан, қолым қалт етсе болды ізденіс үстінде жүремін. Аудан нарығында қатты танымал болмасам да, өз өнімдерімнің сапасын барынша жақсартуға ынтажігерімді салып жүрмін. Ең бастысы, тұтынушыларым бар, сапаға мін айтқанды көрмедім. Рас, кейде дұрыс шықпай қалуы мүмкін. Дегенмен мүмкіндігінше бір қателікті екінші қайталамауға тырысамын. Осы қағиданы шәкірттеріме үнемі үйретіп отырамын. Бұйырса, кәсібім кеңейіп жатса, тек аудан емес, облыс нарығына жорыққа шығамыз, – деді Мұратбек Нәлібаев.Ағамыз шикізатты Түркістаннан, Жаңақорған сауда үйлерінен алатынын айтты. Жол шығыны бар, қаншама қоспалары бар, барлығын өзі рттеп отырады. Ата кәсіпті перзенттеріне мирас етуді армандайды. Әзірге нәпақасын тауып, көпті дайын өніммен қамтамасыз етіп отырған жайы бар. Алты жыл төккен тердің жемісі енді ғана еңсе тіктетіп, үлкен нарыққа жол ашыпты. Берекелі Бірліктегі Мұратбек ағамыздың өнерін қажетіне идірген аудандағы ағайынның айтары тек алғыс.

Жаңақорғандық кәсіпкер гипстен сәнде бұйым жасауда

<a href="https://kyzylorda-news.kz/">Kyzylorda-news.kz.</a>&nbsp; 21 маусымда еліміз аумағының басым бөлігі атмосфералық фронталды бөліктердің ықпалында болады. Соған байланысты жаңбыр мен найзағай сақталады. Республиканың солтүстігінде, шығысында, оңтүстік-шығысы мен орталығында – бұршақ, дауыл, басым бөлігінде екпінді жел сақталады. Оңтүстік-шығыста, оңтүстік-батыс пен солтүстік-шығыста, сондай-ақ шаңды дауыл күтіледі.&nbsp;Бұдан бөлек, Түркістан, Жамбыл, Маңғыстау, Шығыс Қазақстан, Абай облыстарында, Қызылорда облысының батысында, шығысында, Павлодар облысының орталығында, Атырау облысының солтүстігінде, шығысында, Ұлытау облысының оңтүстігінде, Қарағанды облысының оңтүстігінде, орталығында, Қостанай облысының оңтүстік жартысында өрт тұтанудың өте жоғары қаупі сақталады.Батыс Қазақстан облысының орталығында, оңтүстік-шығысында, Алматы, Жетісу облыстарының басым бөлігінде, Ақтөбе облысының оңтүстік-шығысында өрт тұтанудың жоғары қаупі күтіледі. &nbsp;

Сәрсенбіге арналған ауа райы болжамы 

<a href="https://kyzylorda-news.kz/">Kyzylorda-news.kz.</a> Бүгін Өңірлік коммуникациялар қызметі шаһардағы жаңадан ашылған Нан зауытының жұмыс барысымен танысу мақсатында БАҚ өкілдеріне көшпелі брифинг ұйымдастырды. Кәсібін дөңгелетіп отырған бұл зауытта күніне 20 000 дана нан пісіріліп, шығарылады.Кәсіп иесі жалпы құны 400 млн. теңгені құрайтын жаңа наубайхананы іске қосу үшін жеке қаражаты есебінен 215 млн. теңге және «2021-2025 жылдарға арналған кәсіпкерлікті дамыту жөніндегі Ұлттық жоба аясында субсидиялау бағыты бойынша «Даму кәсіпкерлікті қолдау қоры» арқылы 185 млн.теңге «Халық банкінен» қаржы алған.<blockquote>«Ақжелең» ЖК-і 2018 жылдан бері нан өнімдерін пісірумен айналысып келеді. Биыл наубайхананың иесі Азамат Мәдениетұлы кәсібін кеңейтіп, 70 адамды тұрақты жұмыспен қамтып отыр. Бүгінде зауыттағы нан пісіруге арналған қажетті құрал жабдықтар заман талабына сай», - деді «Ақжелең» ЖК-нің өкілі Айдана Қылышбек.</blockquote>Зауытта наннан өзге кондитерлік өнімдерде шығарылады.<blockquote>«Зауытта тәулігіне 10 тонна нан пісіріледі. Наубайханадағы қызметкерлердің бәрі өз ісін білетін мамандар. Бүгінде екі ауысыммен жұмыс істеуде. Өнімдер күнделікті Қызылорда қаласындағы әлеуметтік дүкендер және келісім шартқа отырған кәсіпкерлерге жеткізіледі. Сондай-ақ, наннан өзге де кондитерлік тағамдар да сатылымға шығарылады»,-деді зауыт технологы Фарида Саменова.</blockquote>

Қызылордалық наубайхана күніне 10 тонна нан пісіреді

<a href="https://kyzylorda-news.kz/">Kyzylorda-news.kz.</a>&nbsp;&nbsp; Бегілік Төлешов – аудандық полиция бөлімінің ардагері ретінде қоғам тыныштығын сақтауда ерен еңбек еткен азамат. Полиция қызметкерлерінің төл мерекесі қарсаңында қырағы полицей туралы жазуды жөн көрдік.Бегілік Ақбергенұлының балалық шағы ауданнан шалғайда орналасқан Іңкәрдария ауылында өткен екен. Осындағы №191 орта мектепті 1985 жылы бітірген соң зоотехник мамандығын алу мақсатымен Қызылорда қаласындағы совхоз-техникумда оқиды. Алғашқы еңбек жолын зоотехник ретінде туған ауылында бастап, Отан алдындағы азаматтық борышын өтеу үшін Германияға әскерге аттанған екен. 1991 жылы екі жыл бойы әскери міндетін спорт ротада атқарған жауынгер туған елге оралған соң жоғарғы оқу орнына оқуға түскен екен. Семей қаласындағы Шәкәрім Құдайбердіұлы атындағы университетте жоғарғы білім алып, инженер-технолог атанады. Еліміздің тәуелсіздік алған алғашқы жылдары жас маманға тұрақты жұмыс табу оңай болмайды, сондықтан екінші жоғарғы білім алу мақсатымен Қорқыт ата атындағы Қызылорда мемлекеттік университетке оқуға түсіп, заңгер мамандығын алады.Ішкі істер саласындағы қызметін 1997 жылы бастаған Бегілік Ақбергенұлы өзі қызмет еткен жылдары жайлы айтып берген болатын.<blockquote>&nbsp;Мен заңгер мамандығын алған соң 1997 жылы Қызылорда облыстық ішкі істер департаментінде жедел уәкіл болып қызметке келген едім. Қызмет барысында талай қиындыққа тап болып, оны табандылықтың арқасында жеңе білдік. 1999 жылы Сырдария ауданына қызметке ауыстым. Осында ішкі істер бөлімінде жедел уәкіл болып, кейін 4 жыл қылмысты іздестіру бөлімшесінің бастығы, 6 жыл жедел істері жөніндегі бөлім бастығының бірінші орынбасары қызметін атқарған болатын. Біз қызмет еткен жылдары жағдай онше мәз емес болатын. Техника тапшылығы қылмысты жедел ашуға кедергісін келтірсе, байланыс деген мүлдем болмады, жалақы аздығы тағы бар. Бірақ, қызметке деген адалдық, қайткен күнде қылмысты ашу мақсаты бәрінен биік тұрды. Уақытпен санаспай, ізденістің арқасында абыроймен жұмыс істедік. Жеке құраммен бірге күні-түні бірге жүріп, қылмысты ашуды ұйымдастыру шараларын жүргізідік. Тіпті 3-4 күнге дейін отбасыңды көрмейтін кездер болды, ер азаматқа тән мінезбен, тәртіп сақшысына лайықты салқынқандылықпен қиындықты жеңуге күшімізді салдық, – дейді полиция ардагері Бегілік Ақбергенұлы.</blockquote>Қырық алты жасында полиция подпол­ковнигі ше­німен запасқа шыққан ардагер 17 жыл бойы ішкі істер бөлімінде бір салада, яғни жедел уәкіл болып келіп, жедел іздестіру жөніндегі орынбасары қызметін абыроймен атқарған аудандағы бірден бір тәртіп сақшысы.Алыстағы Қызылқұмда балалық шағы өткен азамат бала кезінен төрт-түлік мал­дың жайын біліп өседі. Бұл қасиеті кейін полиция қызметкері болғанда, әсіресе мал ұрлығын ашуға көп көмегін тигізеді. Мал ұрлығы орын алғанда жедел уәкіл мал иесімен сөйлескенде аса ыждағаттылық танытады. Малдың түр-түсін айна-қатесіз айтылғанын қадағалайды.<blockquote>&nbsp;Ауданда мал ұрлығы өршіп тұрған кезде, талай мәрте барымташыларды ұстадық, олар тиісті жазасын алды. Есімде қалғаны ауданның батагөй қариясы Яхия Тасыровтың қорасынан бір бас жылқы ұрланды. Малды арнайы асқа бағып отыр екен қария. Міне, барлық айтылған мәселені егжей-тегжей тексеріп, арнайы жоспарға сәйкес іздестіру шаралар ұйымдастырып, ақыры қылмысты жасаған адам Қызылорда қаласынан табылды. Мал бордақыда тұрғандықтан, әлі сойылмаған. Оны иесіне 11 күн дегенде қайтардық, ақсақал батасын берді, әлі күнге дейін алғысын айтып келеді. Қылмысты ашу үшін іздену керек. Өзіне өзі талап қоя білетін тәртіп сақшысы міндетті түрде қылмысты ашады. «Халық айтса, қалт айтпайды» деген сөз бар адамдармен дұрыс сөйлесе білу керек, қылмыста ұсақ-түйек деген нәрсе болмайды, болмашы нәрсенің өзі айғақ болады. Сондықтан қырағылық таныту тәртіп сақшысы үшін ең басты қасиет, – дейді байырғы полиция қызметкері Бегілік Төлешов.</blockquote>17 жыл бойы абыройлы қызмет атқарған ардагер ауданда талай ауыр қылмыстың, аса ауыр қылмыстың ашылуына атсалысты. Оның абыройлы еңбегі туралы әріптесі, аудандық полиция бөлімінің бастауыш ардагерлер кеңесінің төрағасы Марат Еспенбетов былай дейді:<blockquote>Бегілік Ақбергенұлымен полиция қыз­метіне қатар келдік. Бегілік жедел істері жөніндегі бөлім бастығының орынбасары болса, мен жол-патрульдік бөлімшенің бастығы болдым. Ауданда Қоғалыкөлде болған, Ақжарма, С.Сейфуллин ауылында болған мал ұрлығын ашуға күні түні қызмет етті. Іңкәрдариядағы кабель ұрлығы, ауданда есірткі қылмысын ашуда өзінің мықты тәжірибелі маман екенін көрсетті. Қазірдің өзінде малшылар, кәсіпкерлер кеңес сұрап келеді. Бегілік өзінің адамгершілік қасие­тінен таймайды. Қолынан келсе көмегін береді. Халық үшін адал еңбек еткенін бүгінде мақтанышпен айтамыз.</blockquote>Халықтың тыныштығы үшін аянып қал­маған, талай қылмыстың алдын алып, әділдіктің туын тіккен азамат «ІІМ үздік қызметі үшін», «Ішкі істер органдарындағы мінсіз қызметі үшін» 10 жылдық, 15 жылдық төсбелгісімен, «Қылмыстық іздестіру қыз­метіне – 100 жыл» төсбелгісімен, «Қазақстан полициясына 15 жыл» омырау бел­гісімен марапатталды.Бүгінде зейнеттегі подполковник жеке кәсіпкерлікпен айналысып, жұбайы Мирамен бірге 2 ұл, 2 қыз өсіріп отырған бақытты ата-ана. Үлкендері Меруерт биыл, аудармашы мамандығы бойынша магистратураны қызыл дипломмен бітірсе, үлкен ұл Ермұхаммед жақында әскери қызметтен оралады. Оның мамандығы заңгер. Үшінші бала Ерсұлтан Қорқыт ата атындағы университетте, дизайнер мамандығына оқуда, ал кенже қыз Мерей мектеп оқушысы. Перзенттеріне жақсы тәрбие берген ата-ананың бар байлығы халыққа адал қызмет еткен жылдары мен болашағынан зор үміт күттіретін балалары. &nbsp;

Саланың сыйлы ардагері 

<a href="https://kyzylorda-news.kz/">Kyzylorda-news.kz.</a> Қызылорда облысында ІТ саласындағы жастарға мол мүмкіндіктер қарастырылған. Мәселен, Kyzylorda Hub бизнес-инкубаторының базасында Google Developers Group Kyzylordа ұйымы ашылды. Сондай-ақ, осы жылдың қыркүйек айында Google Dev Fest іс-шарасы өткізіледі. Бұл туралы бүгін Өңірлік коммуникациялар қызметі алаңында өткен брифингте Grand Master бағдарламалау мектебінің директоры Алмат Қуанышбаев мәлімдеді.<blockquote>«Облысымыздың ІТ компаниялары мен стартап жобалары Астана Хаб халықаралық стартаптар технопаркінің қатысушысы ретінде тіркеле алады. Сонымен қатар, әрбір қатысушыға салықтық жеңілдіктер қарастырылған. Қатысушы болу үшін компаниялар инновациялық 17 бағытта жұмыс жасауы қажет. Google Developers Group – бұл Google корпорациясының адами капиталды дамыту бойынша жұмыс жасайтын бөлімі. Бұл ұйымда өңіріміздің жастары үшін ІТ және стартаптар тақырыбында оқу және дамыту іс-шаралары мен курстары ұйымдастырылып, жылына 4 мәрте Google корпорациясының қызметкелерімен кездесулер, семинарлар өткізіледі. Одан бөлек, аталмыш ұйымның білім бағытындағы іс-шараларға қатысқан жастарға тегін түрде Google корпорациясының онлайн курстары беріледі», - деді Алмат Жомартұлы.</blockquote>Байқауға өтінімді қабылдау осы жылдың 5 маусымы мен 10 шілдесі аралығында жүргізіледі<blockquote>«Елімізде жұмысын жандандырып отырған кәсіпорындарды технологиялық дамытуға арналған инновациялық грант байқаулары басталды. Байқауға өтінімді қабылдау осы жылдың 5 маусымы мен 10 шілдесі аралығында жүргізіледі. Аталмыш бағдарламалар бойынша біздің орталықтан кеңес алып, өтінім беру бойынша сұрақтарыңызға жауап аласыздар. Қазіргі таңдағы IT-қызметтер деңгейін көтеру мақсатында Tech Orda бағдарламасы жүзеге асырылуда. Осы бағдарлама аясында іріктеуден өткен әрбір үміткер еліміздің жеке мектептерінде IT-мамандықтар бойынша оқуға 600 000 теңгеге дейін ваучер ала алады. Сәтті бітірген түлектер IT компанияларда сынақтамадан өтіп, жұмысқа орналасуға мүмкіндігі бар. Өтінімдерді беру осы жылдың қыркүйек айынан басталады», - деді Қорқыт Ата университетінің Кәсіпкерлік орталығының басшысы Жанарыс Тубекбаев.</blockquote>ІТ мамандары брифингте IteachMe 7.0 бағдарламасына да өтінім қабылдау басталғанын тілге тиек етті. Жоба аясында мобилография, дизайн, SMM, копирайтинг және Motion дизайн мамандықтарын тегін үйретуге байланысты қосымша 2 курс жүргізіледі.<blockquote>«Бизнес-инкубатормен тығыз байланыс орнату арқылы жобаларымды жүзеге асырудамын. Қазіргі таңда, Chevron компаниясы және IteachMe қоғамдық қоры ұйымдастырған ITeachMe 7.0 бағдарламасына қатысуды қолға алудамын. Digital мамандықты игеріп, сұранысқа ие маман атану кез-келген студенттің мақсаты», - деді Қорқыт Ата атындағы Қызылорда университетінің студенті Айнұр Досжанова.</blockquote>

Қызылорда облысында ІТ саласы бойынша жастарға қолдау көрсетілуде

<a href="https://kyzylorda-news.kz/">Kyzylorda-news.kz.</a> Әкелер күні аясында қоғамда ер азаматтардың дәрежесін көтеру, оларға деген құрметті қалыптастыру, әсіресе, ұлттық ұстанымға сай ұрпақ тәрбиесіне әкенің ықпалын арттыру мәселесі жатыр.Тәрбиенің түп қазығы отбасында десек, осы орайда шаңырақтың егесі – әке тәрбиесін күшейту мәселесіне назар аударыла бастады. Өңірдегі барлық мектептер жанынан әкелер кеңесі құрылып, арнайы жоспар түзіп, жұмыс жүргізіп келеді. Осындай кеңестің бірі С.Шаухаманов атындағы №9 білім-инновация лицейінде жұмыс жасайды.Лицей мұғалімі, аталған кеңестің белсенді мүшесі Нұрбек Тілеуімбетовті әңгімеге тартып, Әкелер күніне қатысты ой-пікірін білген едік.<blockquote>– Біз бала күнімізден Аналар мерекесін білеміз, асыл аналарға, ардақты апа, аяулы қарындастарға деген құрметіміз айрықша. Қоғамда әйелдер қауымы ер азаматтармен тең тұрғаны рас. Өйткені олар барлық салада ерлермен тең еңбек етіп жүр.</blockquote>Енді Әкелер күні мерекелер тізіміне енгізілген екен. Мұның да өзіндік себебі бар болуы керек. Мысалы, қазір қоғамда ер балалардың тәрбиесі өзекті болып отыр. Мектеп қабырғасында жүріп, бір-біріне күш көрсетіп, ауыр зардапқа ұшыратып жатқан жағдайларды естіп-біліп отырмыз. Тағы бір мәселе, әскерге баруға құлықсыз жастар қатары көп. Неге десеңіз, әскердегі тәртіп те әлсіреп кеткен. Онда да жастардың қатыгездігінен қиындықтар туындап жатады.<blockquote>«Бір әкенің тәрбиесін жүз мектеп бере алмайды» деген сөз бар ғой. Демек осының барлығы ер баланың әке тәрбиесінен тыс қалғандығын аңғартатын сияқты. Осындай себеппен білім ошағы жанынан құрылған әкелер кеңесі тәрбиелік бағытта үздіксіз жұмыс жүргізіп келеді. Ер мұғалімдер қатары көп, сондықтан бұл мәселеге барлығымыз &nbsp;жауапкершілікпен қараймыз, – дейді ол.</blockquote>Кейіпкеріміз Нұрбек Тілеуімбетов – бес баланың әкесі. Отбасындағы өз міндетіне бей-жай қарамайтын, балаларының болашағының дұрыс болуын ойлаған әке ұлдарын еркін күреске және жүзу спортына баулыса, қыздарын би үйірмесіне бергенін айтады.Әңгіме барысында аңғарғанымыздай, әкелер кеңесі жалпы 7-11 сынып аралығында ер балалармен тәрбие сағаттарын өткізіп, түрлі тақырыптар бойынша ой-пікір алмасып отырады екен. Ал 10-11 сыныптар арасында мамандық таңдауға байланысты әр салада қызмет атқарып жүрген әкелермен кездесулер ұйымдастырылады. Сондай-ақ, сыныптағы оқушылар әкелерінің жұмыс орнына барып, күнделікті жұмыс барысын көзімен көреді. Бұл іс-шаралар жасөспірімдердің қоғам алдындағы жауапкершілікті сезінуіне өзіндік әсер ететіні рас.Қоғамның өзі алға тартып отырған отбасындағы әке тәрбиесі мәселесі әрбір шаңырақтың шырқы бұзылмай, шаттығы ортаймай, келісті өмір кешуінің кепілі болуы керек. Сайып келгенде, бұл – ежелден келе жатқан ұлттық тәлім-тәрбиенің ізгі жолы.&nbsp;

Әке тәрбиесі биікке жетелейді

<a href="https://kyzylorda-news.kz/">Kyzylorda-news.kz.</a>&nbsp; Жолдың сапалы болуы әрбір тұрғын үшін маңызды екені мәлім. Сондықтан жыл сайын жолды жөндеуге мемлекеттен қаржы бөлініп, барлығы жоспар бойынша кезектілігімен іске асуда.Өз кезегінде аудан әкімінің орынбасары Р. Еспенбетов Тереңөзек кентінде орналасқан Қ.Бөдеев көшесін жөндеуден өткізіп жатқан мердігерлермен кездесіп, жұмыстың барысымен танысты.<blockquote>&nbsp;Ауданда көше жөндеу жұмыстары қарқынды түрде жүзеге асырылуда. Ең алдымен, көше жөндеу барысында сапаға көңіл бөлуіміз керек. Қазіргі уақытта жауапты мекеме Қасым Бөдеев көшесінде тиісті жұмыстар жасауда. Өз кезегінде біз тұрғындардың талап-тілегін орындау мақсатында &nbsp;кешенді жоспарлар жүргізіледі. Біз қашанда сапаға көңіл &nbsp;бөлуіміз керек. Аталған көшенің жөнделуі сапалы болған жағдайда жергілікті халық игілігін ұзақ уақыт көретін болады, – деді Аудан әкімінің орынбасары.&nbsp;</blockquote>К. Бөдеев көшесі бойынша жолдың ұзындығы 2 шақырым және ені 6 метр асфалттанады, 3 жерде аяқ су арығының трубасы ауыстырылып қайта салынатын болады. Бұл ретте, мердігер мекеме «Әлем Қызмет Group» ЖШС-і тиісті жұмыстарды жүргізуде.Айта кетейік, Тереңөзек кенті бойынша ағымдағы жылы А.Алиакбаров, Д.Қонаев, Ә.Тоқмағанбетов, Қ.Бөдеев, Айтбай арық, Т.Қозыбаев, Б.Өтепов, Б.Момышұлы 2,3,4,5,6 көшелеріне жол жөңдеу жұмыстары жүргізілетін болады.&nbsp;

Сырдарияда бірнеше көшеге жөндеу жұмыстары жүргізіліп жатыр

<a href="https://kyzylorda-news.kz/">Kyzylorda-news.kz.</a> «Қазақстан Республикасының кейбір заңнамалық актілеріне тұрғын үй-коммуналдық шаруашылық мәселелері бойынша өзгерістер мен толықтырулар енгізу туралы» 2019 жылғы 26 желтоқсандағы Заңмен «Тұрғын үй қатынастары туралы» Заңның 42-бабына өзгерістер енгізілді, оған сәйкес кондоминиум иелері мүлік иелері бірлестігінің немесе көппәтерлі үйдің жай серіктестігінің кондоминиум объектісін басқарудың жаңа нысанын таңдауға міндеттелді.Бұл ретте аумақтық әділет органдары «Заңды тұлғаларды мемлекеттік тіркеу &nbsp; және &nbsp; филиалдар &nbsp; мен &nbsp; өкілдіктерді &nbsp; есептік &nbsp; тіркеу &nbsp; туралы» &nbsp; Заңның 4-бабына сәйкес мүлік иелері бірлестігін мемлекеттік тіркеуді жүзеге асырады.Заңның 2-бабының 5-тармағына сәйкес тіркелген және осы Заң қолданысқа енгізілгенге дейін қызметін жүзеге асыратын үй-жайлар (пәтерлер) иелерінің кооперативтері, &nbsp; пәтерлер, &nbsp; тұрғын &nbsp; емес &nbsp; үй-жайлар &nbsp; иелерінің &nbsp; тұтыну кооперативтері, &nbsp; тұтыну &nbsp; кооперативтері &nbsp; көппәтерлі &nbsp; тұрғын &nbsp; үйді &nbsp; басқару жөніндегі қызметті 2022 жылғы 1 шілдеге дейін жүзеге асуы қажет еді.Алайда, 30.06.2022 жылы «Қазақстан Республикасының кейбір заңнамалық актілеріне электр энергетикасы, энергия үнемдеу және энергия тиімділігін арттыру, жер қойнауын пайдалану, жергілікті мемлекетік басқару, мемлекеттік шекара, тұрғын үй-коммуналдық шаруашылық және ғылым мәселелері бойынша өзгерістер мен толықтырулар енгізу туралы» Қазақстан Республикасының Заңымен өзгерістер енгізілуіне орай, тұтыну &nbsp; кооперативтері &nbsp; көппәтерлі &nbsp; тұрғын &nbsp; үйді &nbsp; басқару жөніндегі қызметті 2023 жылғы 1 шілдеге дейін жүзеге асыра алады. Аталған заңның 6-бабына сәйкес «Тұрғын үй инспекциясы осы баптың 5-тармағында белгіленген талаптар орындалмаған жағдайда, үй-жайлар (пәтерлер) меншік иелерінің кооперативтерін, пәтерлер, тұрғын емес үй-жайлар меншік иелерінің тұтыну кооперативтерін, тұтыну кооперативтерін мәжбүрлеп тарату туралы арызбен сотқа жүгінуге құқылы» - делінген.Үй-жайлардың (пәтерлердің) меншік иелерінің кооперативтері 2023 жылғы 1 шілдеге дейін көп пәтерлі тұрғын үйді салуға, күтіп-ұстауға және пайдалануға байланысты барлық қолда бар құжаттарды қабылдау-беру актісі бойынша көп пәтерлі тұрғын үйдің Кеңесіне беруге, қабылдау-беру актісіне қол қойылғаннан кейін &nbsp; Қазақстан &nbsp; Республикасының &nbsp; заңнамасында &nbsp; айқындалған &nbsp; тәртіппен таратуды жүргізуге міндетті. &nbsp;Еркін Тәжікенов,&nbsp;Қызылорда облысының әділет департаментінің Коммерциялық емес ұйымдарды тіркеу және&nbsp; тіркеу қызметі саласындағы бақылау бөлімінің бөлімінің басшысы&nbsp;

Мүлік иелерінің бірлестігі не үшін керек? 

<a href="https://kyzylorda-news.kz/">Kyzylorda-news.kz.</a> Аудан әкімі Берік Сәрменбаев Тереңөзек кентіндегі жаңа демалыс жағажайының ашылу рәсіміне қатысты. Жұртшылық асыға күткен іс-шараны тамашалауға жүздеген адам жиналып, жаңа демалыс орнының өз жұмысын бастағанын тұрғындар қуанышпен қарсы алды.Аудан әкімі жағажайға келіп суға түсіп, ойын ойнап, демалуды мақсат еткен тұрғындармен пікірлесті. Сонымен қатар жазғы демалысқа шыққан балалармен сөйлесіп, жағажайдың ашылуымен құттықтады.<blockquote>Тұрғындарға қолайлы жағдай жасау – біздің басты мақсатымыз. Осы ретте жергілікті жұртшылықпен жүздесу барысында жаз мезгілінде демалыс жағажайының керектігі айтылған болатын. Тиісті сала басшыларымен ақылдаса келе жағажай үшін орын белгілеп, тазарту жұмыстарын жүргізіп, қажетті құрал-жабдықтармен жабдықтап, жағажай ашуды жолға қойдық. Бүгін соның нәтижесін көріп отырмыз. Байқауымызша, жағажай көпшілікке ұнаған секілді. Кәсіпкерлер де өз саудаларын жасап жатыр. Ендігі мақсат – қоғамдық қауіпсіздікті бақылауда ұстау. Бұл – бәріміз үшін ортақ жұмыс, – деді аудан әкімі.</blockquote>Жағажайдың ашылуында аудандық төтенше жағдайлар бөлімінің бастығы Н.Бақтияр демалыс аймағына арнайы тақтайша орнатылып, жадынамалар ілінгенін, сондай-ақ суға шомылудың қауіпсіздік ережелері жөнінде түсіндірме жұмыстары күнделікті жүргізілетінін айтты. Ал аудандық полиция бөлімінің өкілдері арнайы топ қоғамдық қауіпсіздікті бақылауға алатынын жеткізді. Айта кету керек, жағажай аумағында денсаулық сақтау саласының мамандарына арналған орын да бел¬гіленген. Сала мамандары қандай да бір төтенше жағдай бола қалса, алғашқы медициналық көмек көрсетуге әзір. Мұнан бөлек құтқарушылар да жасақталған және арнайы құрал-жабдықтармен қамтамасыз етілген.Аудан әкімі жағажай аумағын толық аралап көріп, кент әкімдігіне жарық бағаналарын орнату жөнінде тапсырма берді. Сонымен қатар демалыс орны халық көп жиналатын жайлы мекенге айналатынына сенім білдірді. &nbsp;

Сырдарияда жаңа жағажай  ашылды

<a href="https://kyzylorda-news.kz/">Kyzylorda-news.kz.</a>&nbsp; Денсаулық – зор байлық. Денсаулық сақтау ұйымдарының жаңа заман талабына сай әрі қолжетімді болуы маңызды. Осы ретте, ауданға қарасты А.Тоқмағамбетов, Қалжан ахун, Іңкәрдария ауылдық емханаларына күрделі жөндеу жұмыстары жүріп жатыр.Аудан әкімі Берік Сәрменбаев А.Тоқмағамбетов және Қалжан ахун ауылдарындағы құрылыс жұмыстарымен танысты. Аудандық аурухананың бас дәрігері Жалғасбек Үсеновпен бірге ауылдық емханалардың құрылыс сапасын бақылаған аудан әкімі сапалы нәтижеге қол жеткізудің маңызды екенін айтты. Аталған ауылдық емханаларда ішкі жұмыстар бойынша ішкі есіктерін орнату, электр желілері және жылумен жабдықтау жұмыстары жүргізілуде. Айта кетейік, қос ауылдағы құрылыс жұмыстарын «Ахат+ГС» ЖШС, ал Іңкәрдария ауылдық емханасының жөндеу жұмыстарын «Жылу ХХІ» ЖШС жүргізуде.<blockquote>– Сырдария ауданы бойынша денсаулық сақтау нысандары күлделі жөндеуден өтуде. Әрине, халықтың денсаулығын жақсартуға жіті көңіл бөлуіміз керек. Қазіргі уақытта аурушаңдық деңгейін төмендету мақсатында профилактикалық іс-шаралар жүргізіледі. Сонымен бірге аудан көлемінде Асқар Тоқмағамбетов, Іңкәрдария, Қалжан ахун ауылындағы құрылыс жұмыстарын сапалы орындауға көңіл айрқша көңіл бөуіміз керек. Өйткені, алдағы балалар, жүкті әйелдер, қарт кісілер, жалпы аудан тұрғындарына қолайлы орта қалыптастыруымыз керек, – деді аудан әкімі. &nbsp;</blockquote>Сондай-ақ аудан әкімінің ауылдық округ тұрғындарымен кездесуі кезінде көтерілген медициналық құрал-жабдықтармен қамтамасыз ету мәселелері шешім тауып, аудандық аурухана тарапынан Аманкелді дәрігерлік емханасына ВА200 биохимиялық анализ анықтайтын аппарат жеткізілді. Аудан орталығынан шалғай орналасқан Айдарлы, Жетікөл, Аманкелді және Бесарық ауылдық округі тұрғындары биохимиялық қан талдауларын Аманкелді дәрігерлік емханасына келіп тапсыра алады. Биохимиялық қан анализаторы кез келген пациенттің денсаулығы туралы деректерді дереу алуға мүмкіндік береді. Заманауи автоматты анализаторлар өте маңызды параметрлердің бүкіл массасын анықтауға мүмкіндік береді, олардың дерек-тері тез әрі дұрыс диагноз қоюға ықпал етеді.Ауданымызда халық денсаулығын жақсарту, медициналық қызмет сапасын арттыру, халықты қолжетімді медицинамен қамтамасыз ету, профилактикалық медицинаны дамыту мақсатында бірқатар жұмыстар жүзеге асырылып, оңтайлы шешім табуда. Бұл бағыттағы жұмыстар үнемі назарда болады.&nbsp;&nbsp;&nbsp;

Аудан басшысы медициналық нысандарды аралады

<a href="https://kyzylorda-news.kz/">Kyzylorda-news.kz.</a> Қай кезде де, ел тыныштығын күзетіп, тұрғындар қауіпсіздігін сақтау – тәртіп сақшысының абыройлы міндеті саналады. Мұндай жауапкершілігі мен жүгі ауыр қызмет аса қырағылықты да талап етеді.23 маусым – Полиция қызметкерлерінің кәсіби мерекесі. Осы ретте, біз тәртіп сақшыларының бір күнімен танысуды құп көрдік. Ондағы мақсат – қауырт қызмет иелерінің бір күн ішіндегі жұмысымен танысып, оны оқырманға баян ету һәм ел тыныштығын күзеткен сақшылар еңбегін насихаттау болып табылады.Шектеулі уақытқа өзімізді басқа сала қызметкері ретінде сезінуге жол-патрульдік полициясы қызметін таңдадық. Қазіргі таңда көлік те, үлкен қалаларда жол-көлік оқиғасы да жиі кездесіп жатады. Сол себепті де жол полицияларының қызметі қауырт.Аудан бойынша бір тәулік ішінде кезектілікпен жол-патрульдік полициясы қызметінде 2 экипаж жүреді. Таңмен таласа қызметке кіріскен тәртіп сақшылары тоғызға дейін полиция бөліміне жиналып, қажет-жарақ пен құжаттарды түгендеп, саптық даярлықтан өтеді. Ал одан кейін күнделікті қызметке кірісіп кетеді. Таңнан кешке дейінгі ауысымда біз аудандық полиция бөлімінің жергілікті полиция қызметі бөлімшесі потрульдік полиция тобы қызметінің аға инспекторы, полиция капитаны Әзімхан Әбдірасылға ердік. Жанында потрульдік полиция тобы қызметінің инспекторы, полиция аға лейтенанты Олжас Дос¬панов бар.Экипаж құрамы өз кезегінде Тереңөзек кенті көшелерін аралап, көше бойындағы көліктердің қозғалысын бақылады. «Жол мұраты – жету» деп жылдамдықты асырған, яки тәртіп бұзған көліктерді тоқтатып, тиісті хаттамалар толтырды. Көлік иелеріне түсіндірме жұмыстарын жүргізіп, жылдамдықты асыру адам өміріне қауіпті екенін айтты.Он жылдан бері осы салада елеулі еңбек етіп келе жатқан полиция капитаны Ә.Әбдірасыл саланың қырына, көлік жүргізушілердің сырына әбден қаныққан. Өз қызметіне зор жауапкершілік танытады. Ол аудан орталығындағы №131 Талғат Қозыбаев атындағы орта мектеп түлегі. Жоғарғы білімді Қарағанды қаласындағы Е.Бөкетов атындағы мемлекеттік университетте және Қызылорда қаласындағы «Болашақ» университетінде меңгерген. Алғашқы еңбек жолын Қызылорда облыстық полиция департаменті жол-патрульдік полиция батальонында бастап, облыста жол қозғалысы ережелерінің сақталуына қызмет еткен. Кейіннен Сырдария ауданына ауысып, жол қозғалысы саласына жауаптылық танытып келеді. Осы салада он жылдан бері абыройлы еңбек етіп келе жатқан тәртіп сақшысы – тұрғындардың ғана емес, отбасының арқасүйері, қорғаны. Бүгінде жары екеуі бір ұл мен бір қызды тәрбиелеуде.Нағыз еңбек жол полициясы қызметкерлерінікі ма дерсің?! Себебі, қанша сағат бойы үзіліссіз еңбек ету оңай емес екен. Ондағы мақсат та ел игілігі мен халықтың қамы үшін екені айқын.<blockquote>– «Тәртіпке бас иген құл болмайды». Тұрғындар қауіпсіздігі басты назарда. Адам өмірі бәрінен қымбат және жолдағы тәртіп – баршаға ортақ. Сондықтан күндегі жұмысымыз – жол қауіпсіздігін қамтамасыз ету, – дейді Әзімхан Әбдірасыл.</blockquote>Қай жұмыстың болмасын өзіндік қызығы мен қиындығы болатыны хақ. Полиция қызметкерлерінің жұмысы оңай емес. Үлкен міндет пен жауапкершілікті арқалау және оған адал болу екінің бірінің қолынан келмес. Әр тәртіп сақшысының бойында адалдық пен кәсібилік болуы шарт. Осы ретте, біз де қызметімізді пайдаланып, тәртіп сақшысының бір күндік жұмысын көрдік. Бір күн ішінде талай жайтқа куә болдық. Әрі күні бойы халықпен жұмыс жасау, әсіресе қауіпсіздігіне жауапты болу оңай шаруа емес екен. Бір күн ішінде қызметтің ауырлығын түсініп, физикалық тұрғыдан шаршап қалғанымыз да жасырын емес. Ал бұл – тәртіп сақшысы үшін күнделікті қайталанатын жұмыс. Бір ерекшелігі, өз мамандығына берілген полиция капитаны кәсібінен бақыт тауып, тұрғындар қауіпсіздігін сақтауды өз міндеті деп біледі.&nbsp;

Қазақстан және Қызылорда облысының жаңалықтары

Шиелі ауданында тігін фабрикасы ашылды