<a href="https://kyzylorda-news.kz/">Kyzylorda-news.kz.</a> Қызылорда облысы полиция департаменті бастығының орынбасары, полиция подполковнигі Жұмағұлов Ілияс Байжұманұлының төрағалығымен жедел кеңес өткізілді. Жедел кеңеске департаменттің Есірткі қылмысына қарсы іс-қимыл басқармасының бастығы қатысып, барлық қала, аудандық полиция бөлімдерінің басшылары бейнеселекторлық режимде қосылды.Күн тәртібінде екі мәселе қаралды. Оның бірі - 1 маусым мен 31 қазан аралығында өтетін «Қарасора - 2023» жедел профилактикалық іс-шарасына дайындық жұмыстары және атқарылған жұмыстардың жай-күйін бағамдау. Ілияс Байжұманұлы осы шара аясында атқарылып жатқан іс-шараларға тоқталып, нақты нұсқаулар берді.Айтар кетерлігі, Қызылорда облысында полиция департаментінің есірткі қылмысына қарсы іс-қимыл басқармасымен жалпы 28 қылмыстық іс-әрекет анықталған. Оның ішінде 4-і есірткі сату болса, 7-і аса ірі мөлшерде сақтау, 1-і есірткіні жарнамалау және 16-ы есірткі өсіру қылмысы бойынша тіркелген. Заңсыз айналымнан 70 килограммға жуық марихуана есірткісі және 4 атыс қаруы тәркіленіп, барлығы 21 мың 910 түп сора өсімдігі жойылып, қылмыстың жолы кесілген.

Полиция департаменті бастығының орынбасары жедел кеңес өткізді

<a href="https://kyzylorda-news.kz/">Kyzylorda-news.kz.</a> Бүгін Қызылордада Абылай хан атындағы №140 қазақ орта мектебінде «Отбасы мектеп» штабы жұмысы аясында «Ата ақылы – асыл мұра» тақырыбында ер балаларға арналған лекторий өтті.Қызылорда облыс әкімі жанындағы әйелдер істері және отбасылық-демографиялық саясат жөніндегі комиссия, облыстық ардагерлер кеңесі, қалалық білім бөлімі, Абылай хан атындағы №140 қазақ орта мектебі, облыстық ҚХА жанындағы Аналар кеңесінің бірлескен шарасының басты мақсаты – отбасы мүшелері арасындағы сыйластық, үлкенді құрметтеу, ананы сыйлау, әкені қадір тұту, сүйіспеншілік құндылықтарды қалыптастыру. Оқушыларға отбасының ұйытқысы, негізгі тірегі ата мен әке екенін дәріптеу. Бала мен әке арасындағы тығыз әрі ыстық байланысты игерту.Танымдық шараға қатысушылар бірінші бөлімде «Green study» жылыжай ғылыми-зерттеу орталығы, “Метеорология» тәжірибелік-зерттеу алаңымен танысты. &nbsp;Екінші бөлімде «Ата сөзі –ақылдың көзі» тақырыбында облыстық ардагерлер кеңесі мүшелерімен тәжірибе алмасты. «Ұлыдан ұлағат – ұрпаққа аманат» атты отбасы мектеп штабы мүшелерінің сынып сағаты ұйымдастырылды. «Парасатты отбасы» жобасы аясында «Әке – дара тұлға» тақырыбымен лекторий өтті. Сонымен бірге, «Менің өмірімдегі мақал-мәтелдер» мен «Ұлы тұлғалардың нақыл сөздері» жобасының тұсау кесері болды.Шарада әр сала мамандары өз ой-пікірлерімен бөлісті. Қызылорда облыстық Қазақстан халқы ассамблеясы жанындағы Аналар кеңесінің төрайымы, «Отбасы мектеп» шатыбының мүшесі Нұрсәуле Мұсаева елдің болашақ қорғандары ер азаматтарға өз аналық тілегін айтып өтті.<blockquote>«Баланың жеке тұлға болып қалыптасуын &nbsp;қамтамасыз етуде ата-ана мен мектептің &nbsp;арасындағы &nbsp;қарым–қатынасты нығайту, жетістікке жету үшін &nbsp;бірлескен әрекеттің ортақ мақсаттарын анықтау, отбасы ерекшеліктерін ескере отырып қиындықтарды бірлесе шешу бағытындағы «Отбасы мектеп» штабының жұмысы ауқымды. Осы ретте Абылай хан атындағы №140 қазақ орта мектебінің директоры, Аналар кеңесінің мүшесі Айгүл Нәжмадинқызы мен мектеп ұжымына ризашылығымды білдіремін. Бүгінгі шарада жас ұрпаққа айтарым, ең бастысы тәрбие. Орынды тәрбие арқылы адам баласының тағдыры шешіледі. Біз үйде тоғыз бала болып өстік. Әкем бізге әрдайым адал, еңбекқор, мақсатшыл болыңдар деп айтатын. Қазіргі технология заманында барлығы бар, тек тәлім-тәрбиедегі бір жүйелілік жетіспейді. Елдің берік тірегі сіздердің қолдарыңызда. Себебі біздің болашағымыз сіздермен байланысты. Әрбір жасаған дүниелеріңізбен ата-аналарыңызды, жақындарыңызды қуанта жүріңіздер»,- деді.</blockquote>

Қызылордада Отбасы күніне орай лекторий өтті

<a href="https://kyzylorda-news.kz/">Kyzylorda-news.kz.</a> 15 мамыр – Халықаралық отбасы күні. Атаулы мерекенің мазмұндық мәнін жоғары деңгейде әрі кең көлемде өткізу үшін түрлі шаралар өткізу жоспарланған. Ұйымдастырылатын іс-шаралар 25 қоғамдық-бұқаралық, мәдени-көпшілік, ағартушылық-зияткерлік, ғылыми-танымдық және спорттық бағытта өткізіледі. Бұл туралы Өңірлік коммуникациялар қызметінде өткен брифингте Қызылорда облысы әкімі аппаратының басшысы Шахмардан Байманов мәлімдеді.<blockquote>«Біздің халқымыз үшін Отбасы – қасиетті ұғым, қастерлі құндылық. Адам баласына берілетін тәрбиенің ең негізі жанұяда қалыптасады. Осы мереке аясында арнайы бекітілген іс-шаралардан бөлек, қала және аудандардағы үлгілі отбасы мүшелерімен мектеп пен колледждерде танымдық кездесулер өтеді. Сондай-ақ, Халықаралық отбасы күніне орай әлеуметтік желілерде отбасы құндылықтарын насихаттау мақсатында арнайы флешмоб басталды. Оған қатысу үшін кез келген жан әлеуметтік желіде «#Отбасым» хэштегін белгілей отырып, жанұя мүшелерімен түскен әдемі суреттерді, қызықты оқиғаларды, тіпті әрбір азамат өзінің үлгілі отбасын келешекте қалай көргісі келетіні туралы армандарымен бөлісуге болады. Өздеріңізге белгілі, елімізде отбасы институтына қамқорлық пен көмек үздіксіз беріліп келеді. Ана мен баланы қорғауға және оларға берілетін мемлекеттік жәрдемақылар көлемі жыл сайын көбейтілуде. Біздің өңірде 16 751 «Алтын алқа», «Күміс алқа» алқасымен марапатталған көп балалы аналар мен 33 851 көп балалы отбасыларына мемлекеттік жәрдемақылар төленуде. Сонымен қатар аз қамтылған жанұяларда мемлекеттің қамқорлығынан тыс қалмай, қажетті көмектер беріліп жатыр», - деді Қызылорда облысы әкімі аппаратының басшысы Шахмардан Асқарұлы.&nbsp;</blockquote>Сондай-ақ, отбасы құндылығын дәріптеу мақсатында 2014 жылдан бері ұйымдастырылып келе жатқан «Мерейлі отбасы» ұлттық конкурсына құжат қабылдау басталды. Ұлттық конкурстың негізгі мақсаты - Қазақстандық отбасының жағымды имиджін насихаттау, отбасы институтын, адамгершілікті, руханиятты нығайту, бала тәрбиелеудегі жауапкершілікті және ұлттық тәрбиені барынша дәріптеу. Бұл байқау 3 кезеңнен тұрады. Конкурстың бірінші кезеңіне қатысу үшін керекті құжаттарды қалалық және аудандық қоғамдық даму бөлімдеріне тапсыру қажет. Аудандық және қалалық кезең жеңімпаздары облыстық кезеңге, облыста үздік деп танылған отбасы республикалық байқауға жолдама алады. Осы байқауға үміткер боламын деген жанұялардың құжаттары 15 мамыр мен 15 маусым аралығында қабылданады. Сонымен қатар, қатысушылар отбасылық дәстүрлерімен, тарихи сәттерімен, қызықты оқиғаларымен әлеуметтік желіде #Мерейліотбасы, #МерейліотбасыKZO2023 хэштегтерін пайдалана отырып бөлісе алады.&nbsp;Айта кетейік, осы уақытқа дейін «Мерейлі отбасы» ұлттық байқауына Сыр өңірінен 1900-ге жуық жанұя қатысқан.

Сыр елінде «Мерейлі отбасы» ұлттық конкурсына құжат қабылдау басталды

<a href="https://kyzylorda-news.kz/">Kyzylorda-news.kz.</a> Мемлекет тарапынан кәсіпкерлікті дамытуға қолдау көрсетіліп келеді. Президент Жолдауында да шағын және орта кәсіпкерлікті дамытуға ерекше тоқталды. Олардың өз кәсібін кеңейту үшін төмен пайызбен несие мен қайтарымсыз грант бөлінуде. Оларды салықтан босатуы да кәсібін жаңадан бастаған жандардың еңсесін тіктеуіне жасалған мүмкіндік. Арал ауданда жыл сайын кәсіпкерлер қатары артып келеді. Әсіресе ауыл тұрғындарының бизнеске ден қоюы көңіл қуантады. Сондай жандардың бірі – Әйгерім Даненова.Әйгерім Жақсықылыш кентінде тұрады. Ол мемлекеттік қолдаудың арқасында өз кәсібін бастауға мүмкіндік алды. Қазір бесінші перзентін күтіп отырған жас ана өзінің не себепті кәсіпкерлікке ден қойғаны туралы айтып берді.<blockquote>– Мен медицина мамандарын дайындайтын оқу орнын тәмамдап, жалпы медбике мамандығын алғанмын. Бірақ тұрмыс құрған соң, бірінен соң бірі балаларым өмірге келе бастады. Оларды бағып, үйде отыруыма тура келді. Осылайша уақыт өтіп жатты. Менің мамандығым бойынша жұмыс істеуге мүмкіндігімнің жоқ екендігіне көзім жетті. Бірақ мемлекеттің берген жәрдемақысына қарап отыра беруге тағы болмайды. Осылайша кәсіппен айналысу керек деген шешімге келдім, – деді жас кәсіпкер.</blockquote>Ол қаланың қызы болатын. Қызылорда қаласында туып, сонда өскен. Бірақ әже тәрбиесін алғандықтан, ісмерлікке жақын болды. Әйгерімнің айтуынша, әжесі бала күнінен қасына алып, көрпе құрауды үйреткен. Әжесіне қолғабыс бола жүріп, өзі де мұның қыр-сырын меңгеріп алған.<blockquote>– Әжем он саусағынан өнері тамған адам еді. Құрақ көрпе, тоқыма жұмыстарының бәрін жасайтын. Ол қолөнер жұмысына кіріскенде мен жанында жібін иіріп, тауарларын құраққа дайындап, көмектесіп жүріп үйреніп алдым. Бұл кейін менің кәсібіме айналды. Бірақ тап сол кезде болашақта тігіншілікті жаныма серік етемін деп ойламаған едім, – деді ол.</blockquote>Қолынан іс келгенімен, Әйгерімнің кәсіп бастауға қажетті машина, тігін құралдарын алатын қаражаты болған жоқ. Ол мемлекет тарапынан кәсіпке ынталы жұмыссыз адамдарға берілетін гранттық қаражатты алу үшін курсын оқып, сертификатын алып, бизнес жоспарын әзірледі. Ақырында өткен жылдың қыркүйек айында гранттық қаражатқа қол жеткізді.<blockquote>– Қазір көп адам жанын қинап, жұмыс істеуден қашады. Мемлекет тек тегін ақша бере берсе дейді. Мен ондай ойдан аулақпын. Қазір Үкімет барлық жағынан қолдау көрсетіп жатыр. Кәсіп ашамын деушілерге қайтарымсыз ақша беру деген ғажап қой! Мен ол қаражатты алған соң, Шымкент қаласына барып, екі түрлі тігін машинасын, қиюға арналған құралдар, маталарды алып келдім. Осылайша өз кәсібімді бастап кеттім. Бастапқыда дайын көрпелер тігіп қойып, әлеуметтік желі арқылы жарнама жасап сатып жүрдім. Кейіннен біртіндеп тапсырыстар түсе бастады. Бағасын да қолжетімді етіп қойдым. Ата-анамыз бала кезден "қарғыс алма, алғыс ал" деп үйреткен. Сондықтан тігісін мұқият тігіп, мақтасын мол саламын, – дейді Әйгерім.</blockquote>Әйгерімнің өзі ғана емес, жолдасы Аралбек те мемлекеттік бағдарлама арқылы мал алып, кәсіппен айналысуда. Еңбекқор отбасы осылайша тірліктің көзін тауып, балаларын бағып отыр. Балаларын да еңбекқорлыққа баулыған. Үлкендері қолғанат болуға жараған. Анасы мен әкесінің жанында көмекші болып жүр. Болашақта өздерінің шаруашылықтарын дамытуды мақсат еткен жандардың алға қойған жоспары көп-ақ.

Қайтарымсыз грант: Көпбалалы отбасы өз кәсіптерін дамытуда

<a href="https://kyzylorda-news.kz/">Kyzylorda-news.kz.</a>&nbsp;Жыл сайын 15 мамыр – Отбасы &nbsp;күніне арналған аудандық іс-шаралар жоспары бекітіліп, түрлі жиындар ұйымдастырылады. Әсіресе «Мерейлі отбасы» ұлттық конкурсының әр жылдардағы жеңімпаздарының қатысуымен отбасылық құндылықтарды, насихаттау мақсатында кездесулер өткізу дәстүрге айналған.Одан бөлек биыл мереке қарсаңында жас отбасылар мен әйел-аналарға арналған білікті мамандардың семинар-тренингтері ұйымдастырылды. Сондай-ақ барлық білім беру ұйымдарында тәрбие сағаттары, оқушыларға отбасының адам өміріндегі маңыздылығын түсіндіру, ата-аналарға, үлкендерге құрмет көрсету мақсатында «Менің отбасым» атты сурет байқауы, мектепке дейінгі білім беру ұйымдарында «Біз бақытты баламыз!» ұранымен эстафеталық сайыстар өткізілді. Психологтардың қатысуымен ата-аналардың педагогикалық сауаттылығын арттыру мақсатында кездесулер, танымдық шаралар да өз кезегінде ұйымдастырылуда. Бұл туралы кеше аудан әкімінің орынбасары Б.Ысмағұлов брифинг барысында баяндады.Отбасы – сүйіспеншіліктің, құрмет пен ынтымақтастықтың ошағы, яғни кез келген зиялы қоғамның діңгегі, – деген Б.Ысмағұлов, – Әр жылы өтетін «Мерейлі отбасы» байқауында еліміздің ең үлгілі отбасылардың өмірі насихатталып, түрлі айтулы марапатқа ие болуы да елімізде дәстүрге айналды.2016 жылы облыстық кезеңнен Ноғайбаевтар отбасы 3 орынды иеленсе, 2017 жылы Исламхановтар отбасы облыс¬тан бас жүлдеге &nbsp;ие болып, республикалық ақтық мәреде Елордамыздың төрінде өткен ұлттық байқауда сертификатпен марапатталды. 2018 жылы Ишанқұловтар отбасы облыстан бірінші орынды иеленіп, республикалық кезеңнің дипломанты атанды. Мемлекет басшысының атынан Ишанқұловтар отбасына «Нива – Шевролет» көлігінің кілті табысталса, 2019 жылы Қиянбековтер отбасы республикалық байқауда үздік деп танылса, 2021 жылы Әбілдашевтар отбасы «Мерейлі отбасы» ұлттық конкурсының облыстық кезеңінен бас жүлдені иеленді.&nbsp;<blockquote>«2022 жылы ауданымыздан Рыспембетовтер, Байжановтар отбасы жеңімпаз атанып, республикадан Байжановтар отбасы мерейімізді үстем етті. «Мерейлі отбасы – 2023» ұлттық конкурсын өткізу жайлы Шиелі ауданының қоғамдық даму &nbsp;бөлімі, Жастар ресурстық орталығы фейсбук әлеуметтік парақшаларында ақпараттандырылды. Конкурсқа қатысуға ниет білдірген отбасыларға өтінімді және құжаттарды дайындау бойынша мағлұматтар беріліп, тиісті жұмыстар жасалуда», – деді Б.Ысмағұлов.</blockquote>Айта кетейік, қазір аудан бойынша 3776 көпбалалы ана бар. Оның 967-сы «Алтын алқа», 1575-і «Күміс алқа» иегерлері.

Отбасы ынтымақ ошағы

<a href="https://kyzylorda-news.kz/">Kyzylorda-news.kz.</a> Қазалы ауданы Әйтеке би кентінің тұрғыны Айсұлу Насыр ерекше сый жасап, тұтынушылар талғамынан шығып жүр. Анығын айтқанда, кептірілген жемістерден керемет сый дайындайды.Әңгімемізге арқау болған кейіпкер Кәукей ауылында туған. 9 сыныптан кейін Қызылордадағы М.Мәметова атындағы педагогикалық жоғарғы колледжін «Қазақ тілі және әдебиеті» мамандығы бойынша үздік бітірген. Жоғарғы білімді Қорқыт Ата атындағы Қызылорда мемлекеттік университетінен алған. Бала күнінен шығармашылыққа жаны құмар Айсұлу қосымша журналистика саласында да білімін жетілдірген. Кәсіпке келмей тұрып, Басықара ауылындағы №182 мектепте тәлімгер, Кәукейдегі №225 орта мектепте қазақ тілі мен әдебиеті пәнінен шәкірттерге білім берді. Жолдасы Фараби Мұхтарұлымен екі бала тәрбиелеп отырған аяулы ана.<blockquote>«Жолдасым қаржы саласында жұмыс істейді. Кәсіппен айналысамын дегенде бірден қолдау білдірді. Бұған дейін үйде отырып та мақала жазып, шығармашылық жұмыспен айналыстым. Қазіргі ақпараттық заманда әр саланы байқап көрейін деген оймен елімізде енді дамып келе жатқан фуд флористиканы қолға алуды жөн көрдім. Яғни, кез келген адамның ағзасына пайдасы зор кепкен жемістен букет жасаймын. Сондай-ақ түрлі шоколадтарды да букет қылып ұсынуға болады. Мәселен, гүл орнына берсе, таптырмас сыйлық. Ауылдағы анасын немесе сүйіктісін, басқа да жақындарын қуанту үшін өзі алыста болса да тапсырыс бере алады. Жеткізу жағын қарастырып қойдық», – деп кәсібінің қыр-сырымен бөлісті Айсұлу.</blockquote>Айтуынша, букеттердің бағасы 5000 теңгеден жоғары. Күнде тапсырыс түседі. Әсіресе тойтабақ ретінде беретін шағын букеттерге сұраныс жоғары. Әрбір жасаған композицияны әртүрлі етіп шығаруға тырысатын келіншек көп ізденетіндігін де айтып қалды.<blockquote>«Қазір көп нәрсеге таң қала бермейтін болдық. Ерекше дүние шығуы үшін үздіксіз үйреніп отыру маңызды. Жасаған өнімдерімді Instagram парақшама жариялап отырамын. Көбісі сол арқылы тапсырыс береді. Құдалық себетінде кепкен жемістерден түрліше безендіріп жасап беруге болады. Ең бастысы халықтың көңілінен шығу. Әрекет етсең, берекесі де болады. Шүкір, табыссыз емеспін», – дейді Айсұлу.</blockquote>Сөз арасында жас кәсіпкер жеке бизнесті бастауда ешқандай қорқыныштың қажеті жоқ екендігін айтып қалды. Жүрек қалауымен жасаған жұмыстың жемісті боларына сенеді. Мемлекет жұмыс береді деп қол қусырып отыру – жалқауларға тән. Кез келген адамның қолынан кем дегенде бір кәсіп келеді. Тек қорықпай, нық қадаммен алға басу және бойыңдағы өнеріңді дамыту керек екенін жеткізген Айсұлу Сайфуллақызы жастарды еңбектенуге шақырды.

Қазалылық кәсіпкердің өнімі көптің көңілінен шығып жүр

<a href="https://kyzylorda-news.kz/">Kyzylorda-news.kz.</a> Бүгін Қазалы ауданындағы Жалдыбай жырау және Мұстафа Шоқай көшелері тұрғындарының ұйымдастыруымен «Береке бастауы бірлік, ел іші тату тірлік» атты тағылымды іс-шара өтті.&nbsp;Шараның мақсаты – келместің кемесіне жайғасқан көше тұрғындарының рухын ұлықтап, құран бағыштау.&nbsp;Танымдық шараға арнайы барған Қазалы ауданы әкімінің орынбасары Дәурен Тілеумбетов көше тұрғындарының бұл ісі көпке үлгі екенін айтып, аудан әкімі Мұхтар Оразбаевтың жылы лебізін жеткізді.&nbsp;<blockquote>«Қазақта «Өлі разы болмай, тірі байымайды» деген сөз бар. Осы сөздің тереңіне бойлай білген Жалдыбай жырау және Мұстафа Шоқай көшелерінің тұрғындары өздерінің ауызбіршілігін көрсетіп, көпке үлгі боларлықтай іс жасап жатыр. Өмірден өткен жандардың жатқан жері жайлы, топырағы торқа болсын», - деді Дәурен Оңғарбайұлы.</blockquote>Сонымен қатар ауданы әкімінің орынбасары көшенің ұйтқысы, абыз ақсақалы мен асыл әжесіне аудан әкімінің «Алғыс хатын» табыстады.&nbsp;Мұнан соң қалың көпшілік көше тұрғындарының арасында өткен гір көтеру, арқан тартыс, қол күрес және қой көтеру сынды спорттық сайыстарға куә болды.&nbsp;Жиын соңында аймақ жұрты шараға арнайы лебізін жеткізген аудан әкіміне алғыстарын айтты.

Қазалыда көпке үлгі болған көше тұрғындары марапатталды

<a href="https://kyzylorda-news.kz/">Kyzylorda-news.kz.</a> «AMANAT CUP» XXI республикалық пікірсайыс турнирі қорытындыланып, кубок иегерлері анықталды. Алматы қаласында өткен турнирге 60 пікірсайыс командасы қатысты.<blockquote>«Бүгінгі ойынның барысы қандай болса да, ең алдымен сіздер бір-біріңізбен ой бөлісетін жақсы дос, мықты әріптес, пікірі бір азаматтарды таба білдіңіздер деп ойлаймын. Алдағы уақытта мұның барлығы сіздерге өз жемісін беріп, тұлғалық дамуларыңызға әсерін тигізеді. Бүгін жеңіске жеткен командаларды құттықтаймын. Ал жеңіс тұғырынан көріне алмағандар тағы да шынығып, келесі жолы өз ұтқырлығын дәлелдейді деп сенемін»,- деді партия Хатшысы Дәулет Кәрібек.</blockquote>Өз кезегінде «Жастар Рухы» Жастар қанатының төрағасы Нұржан Жетпісбаев барша пікірсайысшыларды ауқымды турнирдің аяқталуымен құттықтап, ойыншыларға сәттілік тіледі.Пікірсайыс ойындарының нәтижесі бойынша қазақ лигасының «AMANAT CUP» XXI Республикалық пікірсайыс турнирі кубогын Қызылорда облысынан келген «Amanatka kyanat jasama» фракциясы (Абылайхан Палмағанбет, Дәулет Естанов) жеңіп алды. Күміс жүлдені алматылық «Дулат» командасы (Жазира Жөндербек, Нұрдаулет Өмірзақ) иеленсе қола жүлдені Алматы облысының «Ади Шарипов» (Ерғали Инкаров, Асет Оразғали) командасы алды.Орыс лигасы бойынша І орынды Алматы қаласының «не Қағанат, но тоже дешёво» (Мадина Раилова, Әділбек Рамазанов) командасы, ІІ орынды «Диана и Ғалымжан» командасы (Диана Жұмағұлова, Ғалымжан Мақашев) иеленді. Жүлделі ІІІ орын «Карфаген должен быть разрушен» (Рүстем Арманов, Азат Шайкенов) командасына бұйырды.«Ең үздік спикер» номинациясы мен онығ арнайы сыйлығын қазақ лигасынан Маңғыстаудан келген Қалдығали Тұрақбай, орыс лигасынан алматылық Артем Посвеженский қанжығаға байлады.Қазақ және орыс лигасы бойынша «Үздік спикер» аталымын Алматы қаласынан Әлібек Сандыбек және Әділбек Рамазанов иеленді.Ал ойында әділдік көрсетіп көзге түскен Арайлым Әбдукәрімова мен Жақсылық Бекхан «Үздік төреші» номинациясын иемденді.<figure class="image"><img src="https://knadmin.beoblood.kz/uploads/347142051_807825637009726_6943861395742179371_n_f4e6e6143d.jpg" alt="347142051_807825637009726_6943861395742179371_n.jpg"></figure>&nbsp;<figure class="image"><img src="https://knadmin.beoblood.kz/uploads/346799940_764304825419075_4893953691814341812_n_8672865be4.jpg" alt="346799940_764304825419075_4893953691814341812_n.jpg"></figure>

Қызылордалық жастар «AMANAT CUP» пікірсайыс турнирінің жеңімпазы атанды

<a href="https://kyzylorda-news.kz/">Kyzylorda-news.kz.</a> Өткен аптада Сырдария ауданына қарасты «Сұлу-ай» шығармашылық және «Аслан» спорт орталығының шәкірттері толағай табысқа қол жеткізе білді. Халық қалаулысы Анар Қалдыбаева жетекшілік ететін екі орталықтың өнерпаздары өнер мен спорттан өзара даралана алған еді.Бірінші кезекте Алатау бөктерінен ақжолтай жаңалық келіп жеткен болатын. Атап айтқанда, «Сұлу-ай» шығармашылық өнер орталығының асқарлық өнерпаздары республикалық «Жарқын Болашақ» өнер орталығының ұйымдастыруымен жүзеге асқан VII «Жарық жұлдыз» тақырыбындағы өнер байқауының финалдық кезеңінде аудан мерейін тасытты. Аталған байқауда Марфуға Әубәкірова «Вокал» жанры бойынша І орынды жеңіп алды. Ал Ақәділ Пернебаев «Аспапта ойнау» жанры бойынша І орынды, Еркежан Кеңесбайқызы ІІІ орынды еншіледі. Осы ретте, республикалық байқауға оқушыларын бастап барған жетекшілер Әсел Ибраева мен Гүлназ Сералиеваның еңбегі ерен.<blockquote>Алматы қаласында өткізілген байқауда орасан табысқа қол жеткізген өнерлі өрендер «Сұлу-ай» шығармашылық өнер орталығының жас таланттары болып табылады. Біз мақтан тұтатын шәкірттеріміз көбейе бергенін қалаймыз. Оқушыларды өнерге баулып жүрген жетекшілеріміз бен ата-аналарды кезекті жеңісімен құттықтаймын, – деді Анар Қалдыбаева.</blockquote>Өз кезегінде «Аслан» спорт орталығының жетістігі де күн санап артып келеді. Мысалы, өткен аптаның соңында дзюдо ше­берлері «Samruk kids» жүлдесіне орай өткізілген облыстық ашық біріншіліктен олжалы оралды. Екі тәулікке созылған жарыстың алғашқы күнінде 8 жүлдеге іліккен спортшылар жексенбіде жүлде санын еселей түскеніә мәлім.Расында, «Samruk kids» жүлдесіне орай дзюдодан облыстық ашық біріншілікте 2016-2017 жылы туған балалар арасында 23 келі салмақта Мирас Марат І орын, 26 келіде Дарын Куанышұлы І орын, 2014-2015 жылы туған балалар арасында 23 келіден Асылхан Нұрлан ІІІ орын, 26 келіден Нұралы Мейрамбекұлы мен Бақдәулет Саятұлы ІІІ орын, 29 келіден Нұрғиса Бекболат ІІ орын, Нұрбол Мұханбет ІІІ орын иеленді. 2014-2013 жылы туған балалар арасында 23 келіден Дастан Нұрланов ІІ орын, 29 келіден Нұрғиса Бекболат І орын, 26 келіден Мағжан Нұрлан ІІІ орын, 2012-2013 жылы туған жасөспірімдер арасында 23 келіден Дастан Нұрланов І орын, 26 келіден Мағжан Нұрлан ІІІ орын, 29 келіден Рахман Дарханұлы мен Әділет Қалдыбек ІІІ орын, 42 келіден Мирас Алтынбеков ІІІ орын, 2010-2011 жылы туған жасөспірімдер арасында 29 келіден Санат Бақытжанұлы мен Сабыржан Мешітбаев ІІІ орын, 35 келіден Арман Тұрғанбай мен Гажданбек Мұхаммедәли ІІІ орын, 32 келіден Диас Нұрланов ІІІ орын, 38 келіден Мырза Смагұл ІІІ орын иегері атанды.<blockquote>Мақтаулы бапкеріміз Аружан Темірғали – өте еңбекқор жан ретінде көпшілікке таныс. Әр апта сайын спортшыларды жарыс жолына шығарып, зор жетістігімен риза қылуда. Оның табандылығы мен қайсарлығын айрықша атап өту керек. Спортшыға жоғары талап қояды. Белгіленген межеден көріну үшін алға қойған мақсаты мен ұмтылысы жақсы. Бірнеше жүлдеге қол жеткізген спортшылардың жеңісі бізге қуаныш сыйлады, – деді Анар Қалдыбаева.</blockquote>Негізінен, өткен аптаны көңілді нотада түйіндеген ақжармалық бишілеріміз болды. «Сұлу-ай» шығармашылық өнер орталығының Ақжарма ауылындағы «Ұлтық би» үйірмесінің жетекшісі Ақжан Сәкенова шәкірттерін киелі Түркістан қаласына апарған болатын. Мұнда «Сұлу-ай» би тобының екі ұжымы «Атадан-мұра» қоғамдық қорының бүлдіршіндер, мектеп оқушылары мен жасөспірімдер арасында ұйымдастырылған республикалық байқауында І және ІІ орынды жеңіп алды. Жүлдегерлер қатарынан көрінген өнерпаздарымыз Алматы қала­сында өткізілетін халықаралық байқауға қатысу үшін 50 пайыз жеңілдік ұта білді. Өз кезегінде «Ұлттық би» үйірмесінің жетекшісі Ақжан Сәкенова «Атадан-мұра» қоғамдық қорының президенті Т.Сауранбаевтың «Алғыс хатына» ие болды. &nbsp;

Сырдарияда қос орталықтың оқушылары жеңімпаз атанды

<a href="https://kyzylorda-news.kz/">Kyzylorda-news.kz.</a> Спорт – мемлекетіміздің әлеуметтік саясатының маңызды бағыты екені белгілі. Әсіресе, өскелең ұрпақты салауатты өмір салтын ұстануға шақыру, бұқаралық спорттың ауқымын кеңейтуге мемлекет басшысы жете назар аударып отыр. Осы бағытта мерекелік күндері және жыл сайын дәстүрлі түрде спорттың бірнеше түрінен ұдайы сайыстар ұйымдастырылып келеді. Бірер күн бұрын Қазалы ауданы бойынша білім бөлімінің бастамасымен аудандық спартакиада басталды.10-13 мамыр аралығында мектеп оқушыларының арасында өткен ХХІV аудандық спартакиада Қазалы ауданының 95 жылдығына арналды. Спартакиада бағдарламасына сәйкес спорттың 12 түрінен, яғни кіші футбол, волейбол, баскетбол, қол добы тоғызқұмалақ, шахмат, үстел теннисі, дойбы, қол күрес, президенттік көпсайыс, гір тасын көтеру мен арқан тартудан мықтылар анықталды.<blockquote>«Жыл сайын аудандық білім бөлімі басшысының қолдауымен жүзеге асатын ауқымды сайыс биыл ауданымыздың 95 жылдығымен тұспа-тұс келіп отыр. Бүгінгі доданың мақсаты шәкірттерімізді теріс қылыққа бармауға, дені сау ұрпақ ретінде қалыптасутыруға үндеу екенін білесіздер. Бұған бірлесе дайындалған балалар бір-бірімен жақынырақ достасып, жұдырық болып жұмылуды үйренері бесенеден белгілі. Бұдан бөлек, кіл мықтылар арасынан үздік спортшылар анықталып, аудан абыройын байрақты бәсекелерде қорғайтын болады. Алуан түрлі жүйрік бар, әліне қарай шабады. Бүгінгі сайыс шын жүйрікті анықтап берді деп ойлаймын», – деді аудандық білім бөлімінің сектор меңгерушісі Кенжетай Шамшадинов.</blockquote>Бұдан кейін тартысқа толы сайыс қорытындыланды. Бабы мен бағы қатар шапқан Е.Бозғұлов атындағы №249 мектеп-лицей командасы 84 ұпай жинап, спартакиада жеңімпазы атанды. Б.К.Мергенбаев атындағы №226 гимназия командасы мен №266 мектеп-лицей құрамасы екінші орынды бөліске салса, үздік үштікті №276 мектеп пен Қ.Күлетов атындағы №92 мектеп ұжымы қорытындылады.Сондай-ақ, жеңіске жеткен командалар мен үздік ойын көрсеткен оқушылар аудандық білім бөлімі мен білім қызметкерлері кәсіподақ комитетінің арнайы кубоктары және мақтау қағаздарымен марапатталды.

Қазалы ауданында спартакиада өтті

<a href="https://kyzylorda-news.kz/">Kyzylorda-news.kz.</a> Көзін тапқан адамға кәсіптің сан алуан түрі бар. Мұны түсінген жастардың дені қазіргі күні өз кәсіптерін ашып, тәуір табыс тауып отыр. Бірі мемлекеттік қолдаудың арқасында шаруасын ширатса, енді бірі жинаған қаражатын кәсіпке салып, мол табысқа жетуде. Бүгінде ауданда кәсіпкерлік көлемі артқан. Бұл халықтың сапалы өнім тұтынуына да оңтайлы болып отыр. Аудан орталығында ғана емес, кент пен ауылдық жерлерде де кәсіппен айналысушылар көбейді. Солардың бірі – Сексеуіл кентінің тұрғыны Нұрай Ерланқызы.Бала кезден кәсіпкерлік саласымен таныс болып өскен Нұрай бірнеше мәрте жас кәсіпкерлер форумдарына қатысып, тәжірибе жинақтаған. Жақсыны көріп, керегін үйренген жас кәсіпкер өзінің тың кәсіп түрін бастауына осындай шаралардың септігі көп болғандығын айтты.<blockquote>&nbsp;Мен бұған дейін ата-анамның қолдауымен ашылған жеке балабақшаны басқардым. Осыдан аз уақыт бұрын тұрмысқа шықтым. Сонан соң жолдасым Сұлтанғали екеуміз бірігіп жаңа кәсіп түрін ашуды жоспарладық. Бұрын да ойлап жүретінмін тәтті мақталарға деген балалардың қызығушылығы жоғары екендігін. Содан дүкен иелерінен қайдан алдырып отырғандығын сұрастырдым. Сөйтсем бұл тәттілер бізде жасалмайтын болғандықтан, көршілес облыстардан алдырады екен, – деп әңгімесін бастады Нұрай.</blockquote>Әрине алыс жолдан келген соң тәтті мақталардың өңі кетіп, пішіні өзгерген. Ал өтпей қалған тауарлар дүкен иелеріне шығын әкеле бастаған. Осыны ескерген Нұрай тәтті мақтаны жасаудың жолын қарастыра бастайды.<blockquote>&nbsp;Алдымен мақта жасайтын аппарат керек болды. Мұны қалтаға қонымды бағада алу үшін көп іздестірдім. Себебі біз бұл кәсіпті өз қаражатымызбен бастадық. Ақырында көп іздеген құралымыз жақыннан табылды. Бұл ретте жолдасым Сұлтанғалидің қолдауы ерекше болды. Мұнан соң кәмпит жасауға қажетті бояғыштар мен қоспаларды, сыртқы қаптамаларды Алматы қаласынан тапсырыспен алдырдық,– дейді.</blockquote>Нұрайдың аталған кәсіпті бастағанына көп уақыт болған жоқ. Сонда да болса тапсырыс көлемі күн сайын артып отыр, дейді. Әсіресе кенттегі дүкендер бастапқыда аз мөлшерде алған болса, қазір біртіндеп тапсырыс көлемін көбейткен.<blockquote>&nbsp;Шынымды айтсам, бір аптаның ішінде 450 тәтті мақтаға тапсырыс қабылдадым. Бұл кішкентай кентте басталған кәсіп үшін үлкен жетістік деп ойлаймын. Алдағы уақытта жұмысымның алға басатынына сенімдімін. Өйткені тәттіге құмар емес бала жоқ шығар, – деген Нұрай алғашқы табысы туралы айтты.</blockquote>Нұрай өзінің жоспарларын жүзеге асыру үшін уақыт талабымен үндесе отырып жұмыс жасауға үйренген. Қазір де жас келін атанған Нұрай қайын жұртының талап-тілегінен шығумен қатар, табыс тауып, тәуір тұрмыс кешіп отыр. Оның талпынысы замандастары үшін үлгі. Ол мұнымен тоқтап қалмақ емес. Кәсібін дамытып, биік белестерді бағындырғысы келеді. Жоспары көп жас кәсіпкердің болашағына табыс тіледік.<figure class="image"><img src="https://knadmin.beoblood.kz/uploads/1613735446_mata_yz_908247e08c.jpg" alt="1613735446_mata-yz.jpg"></figure>

Сексеуілдік жас кәсіпкер балаларға арнап ерекше тәтті шығаруды қолға алған

<a href="https://kyzylorda-news.kz/">Kyzylorda-news.kz.</a> Бүгін Қармақшы ауданы әкімінің орынбасары Жұлдызхан Ерқосаевтың қатысуымен 15 мамыр – Халықаралық отбасы күніне орай брифинг өткізді, Онда алғы сөзді құттықтаумен бастады.&nbsp;<blockquote>«Біздің халқымыз үшін отбасы – қасиетті ұғым, қастерлі құндылық. Адам баласына берілетін тәрбиенің ең негізі отбасында қалыптасады. Мемлекет басшысы Қасым-Жомарт Кемелұлы: «Халқымыз қай заманда отбасы дәстүрін берік ұстанып, қадірлей білген. Үлкенге құрмет, кішіге ізет біздің қанымызға сіңген қасиет. Әрбір азаматтың адамгершілік болмысының қалыптасуына отбасындағы ахуал айрықша әсер етеді. Сондықтан мемлекет әр шаңырақтың әл-ауқатын арттырып, әр азаматтың өсіп-өркендеуі үшін барлық жағдайды жасайды», – деп атап өтті. Ұлттық тәрбиенің, адамгершілік пен имандылықтың, ізеттілік пен парасаттылықтың бастау бұлағы – отбасы. Осы ретте, барша аудан тұрғынын құнды мерекемен құттықтап, отбастарына бақ-береке, дендеріне саулық тілеймін», – деді ол.&nbsp;</blockquote>Жанұя берекесін арттыруға, іргесін берік ету мұратында ауданда көптеген мәдени іс-шара ұйымдастырылып келеді. Солардың негізгісіне тоқталар болсақ, &nbsp;«Мерейлі отбасы» ұлттық конкурсына қатысып, жеңімпаз атанған, сондай-ақ басқа да үлгілі отбасы мүшелерімен қала және аудандардағы мектептер мен колледждерде кездесулер мен танымдық шаралардың өткізілуі. Қазақстан Республикасы Президенті жанындағы Әйелдер істері және отбасылық-демографиялық саясат жөніндегі Ұлттық комиссиясының төрағасы Аида Балаеваның бастамасымен Отбасы күніне байланысты &nbsp;әлеуметтік желілерде отбасы қадір-қасиетін дәріптеу бойынша арнайы флешмоб басталды. Отбасы құндылығын насихаттап, жан-жақты таратуға біздің өңір де белсенділік танытуда. Бір қуанарлығы – оған қатысушылардың түрлі әлеуметтік платформаларда «#Отбасым» хэштегін белгілей отырып, отбасылық тәрбие, оның маңызы, жанұя мүшелерімен түскен жарқын суреттер, басқаларға үлгі қылып көрсетуге тұрарлық тағылымды жайттар мен қызықты оқиғалардың жарияланып, тіпті кейбір азаматтың өзінің үлгілі отбасын келешекте қалай көргісі келетіні туралы да асыл армандарымен бөлісіп жатқандығы.&nbsp;Елімізде отбасы институтына қамқорлық пен көмек үздіксіз көрсетіледі. Ана мен баланы қорғауға арналған қаржы, көпбалалы отбасыларына берілетін мемлекеттік жәрдемақылар көлемі жыл сайын артуда. Қазақстанда отбасы құндылығы мен дәстүрлерін нығайтуда&nbsp;2013 жылы қыркүйектің екінші жексенбісі «Отбасы күні» болып белгіленіп, келер жылдан бастап «Мерейлі отбасы» ұлттық конкурсы бастау алды. Былтыр ұлттық байқаудың облыстық кезеңіне жолдама алған Шамшатовтар отбасы «Үлгілі отбасы» номинациясымен, Бердібаевтар отбасы «Өнегелі отбасы» номинациясымен марапатталған болатын. Конкурстың қазақтың ұланғайыр даласындағы тағылымы талайға тәрбие болар отбасыларды елге танытып, жанұялық, адамгершілік, рухани құндылықтарды жаңғыртуда маңызы зор. Әсіресе, отбасы мен некенің (ерлі-зайыптылықтың) жағымды үлгісін дәріптеуге, отбасы мәртебесін арттыруға бағытталғаны – көңіл тебірентеді. Байқауды ұйымдастырудағы алғышарт – қазақстандық отбасының жағымды имиджін насихаттау, &nbsp;отбасы институтын, адамгершілікті, руханиятты нығайту, ерлі-зайыптылықтың маңызын тану, ата-ананың бала тәрбиелеудегі жауапкершілігін арттыру, кәмелетке толған балалардың еңбекке қабілетсіз және егде жастағы ата-аналарына қамқорлығын дәріптеу және кеңінен насихаттау.Байқау үш кезеңнен тұрады. Әуелі аудандық және қалалық кезең жеңімпаздары облыстық кезеңге, ал облыста үздік деп танылған отбасы – &nbsp;байқаудың республикалық кезеңіне жолдама алады. Конкурстың бірінші кезеңіне қатысу үшін құжаттарды жергілікті атқарушы органдардың, яғни аудандық Қоғамдық даму бөліміне тапсыру қажет. Айтулы конкурстың бірінші кезеңіне үміткер боламын деген отбасыларға құжат қабылдау осы жылдың 15 мамырынан басталып 15 маусымға дейін жалғасады.&nbsp;Дәстүрлі құндылықтарымыздың қазақы қаймағы бұзылмаған Сыр өңірінде ерекше сақталуы бір қарағанда заңдылық та секілді. Ұрпағына ұлағатты тәрбие беріп, салауатты өмір салтына сай бағыт-бағдар беріп &nbsp;отырған ауданымыздың өнегелі отбасыларына айтар алғысымыз шексіз. Бұл тұрғыда тәуелсіз мемлекетіміздің одан әрі өркендеп, іргесінің нығайып, шаңырағының биік болуында әрбір қазақстандық отбасына жүктелер міндет те аз емес. Десе де, бірлігі мен татулығы жарасқан мемлекетімізде отбасының құндылығы күн санап артпаса, төмендемейтіні ақиқат. Ал мұндай қасиетті жолда халық арасында өткізілетін іс-шаралардың орны қашанда бөлек болған. Енді конкурсқа қалай қатысуға болады? Сол жағына тоқталып өтсек. Конкурсқа қатысушы отбасыларды жанұялары мен әулеттері туралы өздерінің өнегелі отбасылық дәстүрлерімен, тарихи сәттерімен, қызықты оқиғаларымен #Мерейліотбасы, #МерейліотбасыKZO2023 хэштегтерін пайдалана отырып, әлеуметтік желілерде бөлісулерін сұраймыз. Бұл мерейлі отбасыларды танымал етуге және халық арасында отбасы құндылығын кеңінен насихатауға зор мүмкіндік. Жергілікті комиссия өкілдері аталған шарттарға ерекше мән беретінін атап өткім келеді. Тағы бір түйіндеп айта кетеріміз, осы байқауға ауданымыздың барлық отбасыларын қатысуға шақырамын, – деді брифинг соңында аудан әкімінің орынбасары Жұлдызхан Байназарұлы.

Қазақстан және Қызылорда облысының жаңалықтары