<a href="https://kyzylorda-news.kz/">Kyzylorda-news.kz.</a> Сырдария ауданы әкімінің орынбасары Д.Байдушев аудан көлеміндегі БАҚ өкілдеріне арналған отбасы күні мерекесін өткізу, отбасы құндылығын насихаттау, аудан көлеміндегі әйелдер істері және отбасылық-демографиялық саясат жөніндегі ақпарат алмасу мақсатында брифинг өткізді.Брифингте аудан әкімінің орынбасары ауданда осы күні 37821 халық тұратынын айтты. Халық санының 48 пайызын әйел-аналар, қыз-келіншектер құрайды. Олардың басым көпшілігі білім, денсаулық, мәдениет салаларында қызмет атқарады. – «Сырдария ауданының әйелдері» қоғамдық бірлестігінің жанынан құрылған «Жас отау» клубы және «Әжелер мектебі», аудандық жастар ресурстық орталығы жанынан «Еркежан» қыздар клубы жұмыс жасайды. Отбасы құндылықтарына, ана мен бала мәселелеріне байланысты бұл ұйымдардың жұмыстарының айтарлықтай маңызы бар. Аудандық қоғамдық даму бөлімімен жыл сайын «Отбасы және неке құндылықтарын сақтау, гендерлік теңдікті насихаттау, отбасылық қатынастарды нығайту бағытында шаралар ұйымдастыру» әлеуметтік жобасы жүргізілуде. Аудан деңгейінде 2014 жылдан бастап «Мерейлі отбасы» конкурсы тұрақты өткізіліп келеді. «Мерейлі отбасы» ұлттық конкурсының өткізілу мақсаты – өнегелі құндылықтарды жаңғыртуға, отбасы мен некенің жағымды үлгісін таратуға, қазақстандық отбасының жағымды имиджін насихаттауға, отбасы мәртебесін арттыруға бағытталған. 2014-2022 жылдар аралығында аудан көлемінде 100 жуық отбасылардан өтінім келіп түсті. Бұл мерейлі іс-шараға қатысуға ниет білдірушілер жылдан жылға артып келе жатқаны қуантады. Бұл отбасылардың барлығы да ұрпағына ұлағат дәнін сеуіп, ынтымағы жарасқан әулеттер. Биылғы жылға ұлттық конкурстың құжаттарын қабылдау 15 мамырдан бастау алғанын хабарлап өткен жөн. Ағымдағы жылдың &nbsp;маусымына дейін құжаттар қабылау жүргізілетін болады, – деді Димаш Серікбайұлы. Айту керек, ауданда халықаралық отбасы күніне орай аудандық мәдениет және спорт бөлімінің ұйымдастырумен сазгер, «Ритм» халықтық-вокалды ансамбілінің мүшесі Серік Байдәулетовтің отбасымен «Отбасым – өнер ордасы» атты сыр-сұхбаты өтті. Сонымен қатар білім беру мекемелерінде «Менің отбасым» суретшілер конкурсы, «Толағай» отбасылық сайысы, денсаулық сақтау саласында «Ашық есік күні», жастар ресурстық орталығымен «Отбасылық құндылықтар» тақырыбында челлендж ұйымдастырылды. &nbsp;

Сырдарияда «Мерейлі отбасы» ұлттық конкурсына қатысуға ниет білдіргендер саны артып келеді  

<a href="https://kyzylorda-news.kz/">Kyzylorda-news.kz.</a> Қазалы ауданында көпбалалы кәсіпкер ана Меруерт Қожабергенова алғашқыда той дастархандарын дайындап, табыс тапқан. Уақыт өте келе тойханалардан тапсырыс алып, үлкен тойдың дастархан мәзірін жасауға кіріскен. Алайда пандемия салдарынан кәсібі тоқтап, жұмыссыз қалады.<blockquote>&nbsp;Жолдасым екеуміз 5 бала тәрбиелеп отырмыз. Карантин уақытында жаңа кәсіп бастауды ойға алып, жолдасыммен ақылдастым. Біраз уақыттан соң мемлекеттік бағдарлама арқылы қайтарымсыз қаржыға ие болып, полуфабрикат өнімдерін дайындайтын «Қазалы» атты жаңа кәсіпті қолға алдым, – дейді Меруерт Қожабергенова.</blockquote>Кәсіпкер Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы бойынша алған қайтарымсыз грантқа тоңазытқыш және басқа да құрал-жабдықтар сатып алған. Қазіргі таңда бірнеше еңбекқор қыздарды жұмыспен қамтып отырмын.<blockquote>&nbsp;Біз қолдан түйілген таза, табиғи, сапалы түшпара, манты, вареники, самса, тефтели өнімдерін әзірлеп келеміз.Барлық санитарлық талаптар сақталуда, – дейді кәсіпкер ана.</blockquote>Меруерт Қожабергенова өнімдердің сапалы әрі дәмді болуын өзі қадағалайды. Ол үшін арнайы курсқа да қатысып үлгерген. Барлық өнімді кәсіби рецепт бойынша дайындайды. Ол үшін арнайы курстан өткен. Барлық жартылай дайын өнімдер арнайы қаптамаға салынып, дүкендерге өткізіледі. Арнайы қаптаманы Алматы қаласынан алдыртады. Ол үшін келісім шарт та жасалды.Айналымға шыққан өнімге аудан халқы қызығушылық танытуда. Тұтынушыларды көбейетініне сенім білдіреді. Сондай-ақ алдағы уақытта бұл өнім түрлерін аудандарға да жеткізуді жоспарлауда. &nbsp;

Көпбалалы ана бизнесті дамытуға арналған бағдарламаның игілігін көруде

<a href="https://kyzylorda-news.kz/">Kyzylorda-news.kz.</a> 15 мамыр – Халықаралық отбасы күні. Бұл датаны қазақстандықтар әр жыл сайын ерекше атап өтуді үрдіске айналдырған. Ал біз «Отбасы – шағын мемлекет» деген сөздің мағынасына терең бойлайтын болсақ, оның ең қымбат байлық, татулықтың, сыйластықтың айнасы екенін түсінеміз. Бүгінде көпке үлгі болып, тамырын тереңге жайып, шағын ғана мемлекеттің шырайын келтіріп, шаттыққа кенеліп отырған отбасылар көп-ақ. Солардың бірі – Әбдірашевтер әулеті.Әбдірашевтер әулетін аудан халқы жақсы біледі. Бұл отбасы көпке үлгі болып отырған жанұялардың қатарында. Себебі Жұмабек көке мен Шынархан ападан тараған ұрпақ бүгінде тірлігі келіскен, бірлігі жарасқан әулетке айналған. «Халық айтса, қалып айтпайды» деген сөз бар емес пе? Олай болса, халықтың ықыласына бөленіп, ел сүйсіне қарап, ауыз толтырып айтатын, үйіне қонақ болып барғандар бір марқайып қайтатын мәуелі бәйтерек иелерін ¬Отбасы күні мерекесі қарсаңында біз де мақаламызға арқау етуді жөн көрдік.&nbsp;«Жақсының аты өлмейді, Ғалымның хаты өлмейді» демекші, Жұмабек ағаның өзі өмірден өтсе де, артынан өшпестей мұра қалдырды. Ұзақ жылдар бойы «Арғымақ» ЖШС мекемесінде көлік жүргізушісі болған кейіпкеріміз ғұмырының соңына дейін қарапайым қалпымен ел есінде қалды. Ал Шынархан апа бүгінде әулеттің ұйытқысына айналып, балаларының аяулысы, келіндерінің ақылшысы, немерелерінің қамқоршысы болып отырған жайы бар. Шынархан Байтұрсынқызы үш ұл, екі қыз тәрбиелеген алтын құрсақты ана. Он сегіз немеренің аяулы әжесі. Бүгінде бейнетінің зейнетін көріп отырған бақытты жан. Оны айналасындағылар білікті маман, өз ісіне жауапты болған білгір есепші деп біледі. Тіпті, Шынархан апа Шиелідегі қаншама жанды есепшілікке баулыған ұстаз болып, талай шәкіртті тәрбиелеген. Ол – «Отбасы» деген киелі ұғымды, үлкен құдірет деп біледі. Шынархан апаның бүгінде үш бірдей келіні бар. Бақытты әже балалары мен немерелерін де жастайынан еңбекке баулыған. Мереке сайын барлық немерелер мен жиендер қара шаңыраққа жиналып, әжелеріне арнайы келеді. Отбасы толық жиналғанда үй іші думанға толады. Немерелері мен шөберелері әжесімен ән айтып, тыңдаушылардың делебесін қоздырады. Иә, расында ынтымағы жарасқан Әбдірашевтер отбасының көрсетер өнегесі мол.Отбасы – жеке құндылықтарды қалыптастырудың қайнар көзі, тәрбиенің бастауы, әр үйде балалар санасына ұлттық құндылықтарға деген көзқарасты, салт-дәстүр мен әдет-ғұрыптарды, даналық сөздерді, тәрбиенің жоғары үлгілерін сіңіретін де отбасы.&nbsp;Ынтымағы жарасқан бұл отбасында екі келін еншілерін алып, бөлек шықса да тату-тәтті өмір сүріп, балалары жиі бір дастархан басында бас қосады. Ал Шынархан апаның кенже келіні қара шаңырақтың түтінін түтетіп отыр. «Абысын тату болса, ас көп, Ағайын тату болса, ат көп» демекші, абысынды-келіндерді көргенде шын қуанасың. Бір үйдің қыздарындай тату-тәтті.&nbsp;Осындай өнегелі ұл мен тәрбиелі қыз өсірген отбасылар қатары көбейген сайын қазақтың мәртебесі биіктей беретініне біз қашанда сенімдіміз. Тамыры тереңге кеткен бәйтерек сынды үлкен әулеттің тыныс-тіршілігі, сыйластығы, балаларына көрсеткен өнегесінің ұмытылмас ұлағатын көруге болады. Міне, татулығымен тартымды болып отырған Әбдірашевтер әулетінің бүгінгі жай-күйі осындай.&nbsp; Барлық отбасы осындай болса, еліміздің іргесі де әрдайым мықты болмақ. Ендеше, махаббатқа толы жылы әлемдерінде бақытты әрі тату-тәтті өмір сүріп жатқан, берекесі мен бірлігі жарасқан шаңырақтан шаттық кетпесін деп тілейміз!

Бірлігі бекем, тірлігі келісті әулет

<a href="https://kyzylorda-news.kz/">Kyzylorda-news.kz.</a> Қазіргі уақытта кент орталығына көркейту-көгалдандыру жұмыстарын жүргізу мақсатында &nbsp;ауқымды жұмыстар атқарылуда. Мәселен, Тереңөзек кентіне қарасты Аманкелді Иманов көшесіне &nbsp;«Жасыл белдеу» жұмыстары жүргізілуде. Аталған аумаққа тал көшеттері отырғызылып, екі жағының шарбақтары жаңаланатын болады. Қазіргі таңда шарбақтармен толықтай қоршалану жұмыстары жүргізілу үстінде.Сонымен қатар, негізгі &nbsp;жұмыстар «Қызылорда-Жалағаш» автожолы бойындағы «Рассойл» АЗС - «Кіші қалған» каналы аралығындада жүргізілетіні мәлім. &nbsp;Жалпы ұзындығы - 750 метр құрайтын жерге тегістеу, арық қазу жұмыстары қарқын алды. Алдағы уақытта трубалары салынып, көшет отырғызылатын болатындығын жеткіземіз.&nbsp;Тереңөзек кентіндегі «Майжарма каналын абаттандыру» жұмыстары жүзеге асуда. Жоба құны &nbsp;155714,6 теңгені құрайды. Мердігер мекеме- Град сервис строй болып табылады. Осы күні Канал іші тазаланып, артық құмдары шығарылып, каналдың екі жақ бетін тегістеу жұмыстары жүргізіліп жатыр.&nbsp;Бюджеттен 132 981 201 теңге қаржы бөлініп И.Тоқтыбаев көшесін орташа жөндеу, оның ішінде тротуар мен темір бетонды лоток орнату жұмыстары атқарылуда. Аталған жұмыстар ағымдағы жылдың маусым айына аяқтау жоспарлануда. Бүгінгі күнге Қ.Қазантаев көшесінің қиылысына дейінгі екі жақ бетіне темір бетонды лоток пен бордюрлар толықтай орнатылды. &nbsp;Жаяу жүргіншілер жолына толықтай асфальт төселінді. Кент көшелеріндегі электр желілеріне кедергісін келтіріп тұрған ағаштарды бұтау, балақтау, сонымен қатар бұталған шыбықтардан тазарту жұмыстарын жүргізуде. Атап айтқанда, Ә.Тәжібаев, Абай, &nbsp;Қ.Қазантаев, А.Иманов, Алшынбаев, 1 Мамыр, Қазақ, А.Әлиакбаров көшелеріндегі ағаштар 4 метр биіктіктен балақталды. Тереңөзек кентінде абаттандыру, санитарлық жағдайын жақсарту, көгалдандыру жұмыстарын оңтайландыру мақсатында сенбіліктер ұйымдастырылып отыр. Сенбілікте арықтар тазаланып, күл-қоқыстар шығарылып, талдар әктеу, арам шөптерді шабу жұмыстары жүргізіледі. Жылдың басынан төрт сенбілік өткізіліп, &nbsp;көшеттер отырғызылды. &nbsp;Кент ішіндегі тазалық жұмыстары күнделікті жүргізілуде. &nbsp;А.Иманов көшесіндегі талдар әктеліп, бордюрлар жанадан әрлеу жұмыстары жүргізілді. «Әйтек», &nbsp;«Майжарма», «Айтбай арық» каналының көпіріне қоқыстан тазарту және әктеліп, көпірдің тұғыры жуылды. Кенттегі барлық билборд тұғырларының айналасы тазаланып, әктеу жұмыстары жүргізілді. &nbsp;

Тереңөзек кентінде ауқымды жобалар қолға алынған

<a href="https://kyzylorda-news.kz/">Kyzylorda-news.kz.</a> 15 мамыр – Халықаралық отбасы күні. Отбасы – мейірім мен махаббаттың, жан тыныштығы мен ауызбіршіліктің ұштасқан ордасы. Жарасым тапқан әр отбасы – мемлекет тыныштығының кепілі. Мереке қарсаңында Қармақшы ауданындағы ұрпақ өрбітіп, бақыт кілтін отбасынан тапқан жандар туралы сөз еткелі отырмыз. Жұбы жарасқан ерлі-зайыптылардың жастармен бөлісер қандай сыры бар екен? Кеңінен тарқатайық.«Адалдығы ұнады»«Адамгершілік қасиеттің басында адалдық тұрады» деуші еді аталарымыз. Адалынан ас жеп, еңбек етуді санаға құйып өткен абыздарымыздың ұрпақ үшін айтқан өсиеттерін ойлап отырсақ, неткен даналық деп толғанасыз. Жақсы қасиет тәрбиемен де, қанмен де беріледі екен ғой қарап отырсақ. Жарының бойындағы адалдық қасиетін бағалаған әкелеріміздің бұл ісі бекерден-бекер емес екен. Өйткені адалдық – пендесін жамандық атаулыдан қорғап, жақсылыққа қарай жетелейді екен-ау. Бақ та, бап та – адалдық тұрған жерге тұрақтап, сәулесін шашады екен-ау!Сөзіміздің дәлелі – Жалғасбаевтар отбасы. Жақсылық атамыз 1934 жылы туған. 1953 жылы Қызылорда мелиоративтік су шаруашылығы техникумын бітіреді. Одан кейін туған ауылы Ақжарға келіп, еңбек жолын бастайды. Сол кезде «Ақжар МТС» деген мекеме болған. Ауыл тұрғындарының денсаулығына қарау үшін Люба Ким деген кәріс қызы қызметке &nbsp;келеді.&nbsp;<blockquote>«1953 жылы Любамен таныстым. Көп ұзамай әскерге кеттім. 1958-дің күзінде борышымды өтеп қайтқаннан кейін екеуміз үйлендік. Оның бойындағы қарапайым да адал мінезі маған қатты ұнап қалды. Өмірде ең керек қасиет те осы адалдық қой. Ақ некемізден 4 ұл, 4 қыз өмірге келді. Қазір олардың өздері немере сүйіп отырған ата мен әже. Апаңмен бірге жүріп ұлды – ұяға, қызды – қияға қондырдық. Балалардың оқу-біліміне ден қойдық. Оқыған адамның қоғамнан алар орны қанша дегенмен бөлек болады. Шүкір перзенттеріміз &nbsp;үмітімізді ақтап, қызметтерін жасауда. Тоқсанға келген жасымыз бар. Саналы ғұмырымда отбасының берекесін арттырып, еңбек етуді ғана &nbsp;насихаттадым. Жол бастадым, көрсеттім. Отанасымен әй-шай деспедік. Ол да сондай сабырлы, мейірімді жан. Сыйластықта 65 жыл бақытты өмір кешіп келеміз. «Баласы жақсы адамдар ешқашан қартаймайды» деуші ме еді. Балаларыма да әкелік ризалығымды айтқым келеді», – дейді атамыз өмірден көрген-түйгенін жеткізіп.</blockquote>Қазақ бала санын айтпайды негізі. Бірақ, жақсы болса ұрпағымен марқаяды, қанатын кеңге жаяды. Өркені өседі. Жалғасбаевтар жанұясының ұл-қызынан тараған 26 немере мен 36 шөбере атасы мен әжесінің көз қуанышы бүгінде. Солардың тілеуін тілеп, амандығын Алладан сұрап отырады қос қария. Үйлесімді өмір, мейірім мен махаббат жарасымын тапқан деген осы болар. Атамыз бен әжеміздің кешегі әлпештеп өсірген балалары бүгінде оларды алақандарына салып, әлпештеп отыр.60 жыл біргеБір қарағанда 60 жыл бір адамның өмірі іспетті. Иә, Сәметовтер отбасының алып бәйтерегі, асқар тауы Тұрабай көкеміз бен осы әулеттің отанасы Тыныштық Аманбалаеваның түтін түтеткендеріне де асқаралы алпыс жыл болады екен. 4 ұл, 4 қызды дүниеге әкелген салиқалы отбасында әке мен ананың орны қашан да биік. 1964 жылы шаңырақ көтерген ерлі-зайыптылар жанұя жарасымын айналасына паш етіп келеді. Бүгінде отағасы 88 жасқа таяса, отанасы сексеннің сеңгірінен асқан. &nbsp; &nbsp;&nbsp;– Қазақтың салтымен жанұя құрдық. Ұнатпаса адам үйленбейді ғой. Көкелерің ауыл шаруашылығына еңбегі сіңген азамат. Бригадир, механик, техникалық көлік жөндеу орталығының меңгерушісі қызметтерін атқарды. Мен ауылда поштада газет тасымалдаушы болдым. Ерім сырттың жұмысымен жүретіндіктен көбінесе бала тәрбиесімен өзім айналыстым. Балалардың сегізі де мектепте жақсы оқыды. Тұрекең зейнетке шыққасын Ақжар ауылдық ардагерлер кеңесінде ұзақ жылдар төрағалық етті. Елдің ішіндегі түйіткілді мәселелердің шешімін табуына атсалысты. Сексенге келгенше осы жұмысты абыроймен істей білді, – дейді Тыныштық анамыз еріне деген сыйластығын білдіріп.&nbsp;Көпбалалы отбасының балалары да сайдың тасындай өз істеріне мығым. Өмірден орындарын тапқан. Оның ішінде ата-анаға деген құрмет-қошеметінде шек жоқ. 20 немере мен 24 шөбере өсіп-өнген бақытты шаңырақта бірлік пен береке басты ұстанымы.&nbsp;– Әкеміз талапшыл, қатал адам. Жалпы ер адамға қатал мінез де керек. Біз сол әкеміздің берген тәрбиесінің арқасында дұрыс жолмен жүріп, адалдықпен өстік. Жастайымыздан еңбекке, бір-бірімізге қамқор болуға &nbsp;баулыды. Өзі уақытында техникум бітірген адам. Мамандығы – механик. Өте білімді. Ауылда елдің бәрі құрметтеп, төрден орын береді. Ұл-қыздарының да білімді болуларына септігін тигізді. Ата-анамыздың ұрысқан, балағаттаған кезін көрген емеспіз. Жалпы нағашымызда осал емес. Елге белгілі өсіп-өнген Мұнарбаевтар отбасы, – дейді Асқар Тұрабайұлы әке-шешеге деген құрметін білдіріп. &nbsp; &nbsp; &nbsp; &nbsp; &nbsp;Пысықтығына қызыққанАна бір ән бар еді ғой. «Басталады махаббат мектептегі партадан» деп келетін. Бұл кісілердің де бір-біріне деген балалық махаббаты бастауыш сыныпта оқып жүргенде басталғанға ұқсайды. Ағамыздың көзіне сыныптастары ішінен тұлымшағы желбіреген дөңгелек жүзді, кіп-кішкентай, томпақ қыздың пысықтығы түскен. Сабақты озат оқитын ақ бантикті қыз баланың зеректігі де назарынан тыс қалмапты. Бұл – Сақтапберген ағамыз бен Бақыткүл жеңгеміздің ең бір керемет, ең бір ұмытылмастай сақталып қалған бала шақтағы ғажап естелігі. &nbsp;<blockquote>«Майлыөзекте Бақыткүлмен бір сыныпта оқыдық. Мінезі – жайдары. Артық сөзі жоқ. Сабағын жақсы оқитын. Математиканы шемішкіше шағады. Басқа қыздарға қарағанда бойы кішкентай келген. Соған қарамастан пысық. Бермесіңді тартып алатындай-ақ. Пысық мінезіне қызықтым. Мен кейіннен оқуымды басқа мектепте жалғастырдым. Отбасындағы жалғыз бала болған соң әскерге бармадым. Орта мектепті бітірген соң көлік жүргізуші болып еңбек еттім. Мектепте еңбектен сабақ бердім. Дипломым болмады. Қолымнан ұсталық келетін болған соң, жұмысқа қабылдаған. 1986 жылы сөз салдым. Ол мұғалім болып істейтін. Математикадан сабақ беретін. &nbsp;Қарсы болмай, ұсынысымды қабыл алды. Ортақ келісіммен шаңырақ көтердік. Қолдан ұзатып берді. Құда түстік. Биыл отбасын құрғанымызға 37 жыл толып отыр. Осы уақыт аралығында бірліктің, татулықтың арқасында көптеген сыннан сүрінбей өттік. Қиындықты да бірге еңсердік», – дейді Т.Көмекбаев ауылының тұрғыны СақтапбергенТөлегенұлы. &nbsp;</blockquote>«Жақсы әйел ерінің басын төрге сүйрейді» дегендей, Бақыткүл Қаһарманқызы жарының педагог болуына тікелей ықпал еткен. Жұбайы да әйелінің сеніміне қарсы келмей, жоғары оқу орнынан тарих пәнінің мұғалімі мамандығы бойынша білім алып шығады. Осылайша, 25 жыл жас ұрпаққа тәрбие мен білім беріп, зейнеткерлік демалысқа шыққан ағамыздың жан-жарына деген құрметі ерекше. Ардагерлердің қол жеткен табыстары аз емес. 39 жылдық мұғалімдік еңбек өтілінде апай республикалық, облыстық дәрежедегі марапаттарға ие болса, ағамыз ауыл тарихын айшықтайтын мұражай ұйымдастырса, шығармашылық бағытта «Ауылдың иісі», «Қызылқұмның жерұйығы», «Ғұмырымның алтын белесі» және «Құтты болсын» атты кітаптары оқырманнан жоғары бағасын алған. Отбасындағы 5 баланың барлығы білікті мамандар. Ел дамуына дәрігер, педагог, археолог, геолог ретінде үлестерін қосуда.&nbsp;<blockquote>«Біздің отбасының ұстанатын басты қағидасы – еңбекқорлық, қарапайымдылық, шыншылдық. Ағайын-досқа адалдық пен қамқорлық» дейді ерлі-зайыптылар. &nbsp;&nbsp;</blockquote>Жар таңдаудан жаңылмады&nbsp;Айта беретін мамандық таңдау мен жар таңдау мәселесі адам бар жерде ешқашан күн тәртібінен түспейді-ау. Өміріміздің басты тетігі саналатын осы екі таңдау да маңызды саналады. Сондай жар таңдау мен мамандық таңдаудан қателеспеген жанның бірі – Бахытбек Пірмаханов.Ол 1960 жылы Жосалы кентінде дүниеге келген. Болашақ жары Күлпаршын Төлепбайқызын бір көргеннен сезімі оянады. Бірақ отбасылық өмірдің жай нәрсе емес екенін білген екеуі асығыс қадам жасамай, сабырлық танытады. Кұлпаршын әпкеміз де сымбатына сәні келіскен қыз. Дегенмен, Алла бұйрығы болар, арада біршама уақыт өткен соң екі жас отау құрып, керегесін кеңге жаяды. &nbsp; &nbsp;– Жолдасыммен 1980 жылы таныстым. Онда 19 жаста екенмін. Жол бойында жұмыс істейтінмін. Ол да жол бойында еңбек етті. Сол кезден бастап достасып, киноға бірге барып жүрдік. Ол уақытта жігіттер қыздарды киноға шақыратын еді. &nbsp;Арадағы достығымыз екі жылға жалғасты. Ағаң 1982 жылы әскер қатарына шақырылса, мен Өскеменге &nbsp;оқуға түсіп, жан-жаққа кеттік. Содан 1985 жылы оқуымды бітіріп аудандық электр торабына жұмысқа тұрдым. Ол да әскерден борышын өтеп келіп, қайтадан темір жол стансасында кезекші болып орналасты. Қайтадан достығымыз жарасып, аяғы махаббатқа ұласты. 1987 жылы отбасын құрдық. Құдайға шүкір қазір 4 бала тәрбиелеп, барлығы жоғары білімді маман. Үлкен қызым тұрмыс құрып, Астана қаласында Қорғаныс министрлігінің ансамблінде жұмыс істеуде. Екінші бала Алматыда Абылайхан атындағы халықаралық университетін бітіріп, одан әрі Варшава қаласынан магистрлік &nbsp;бітірді. Бүгінде Астанада Казмедиа корпорациясында диктор-журналист мамандығымен еңбек етуде. Мөлдіріміз Алматыда Азаматтық авиация академиясын бітіріп, Кореяның Сеул қаласында оқуын жалғастыруда. Кенжеміз Сымбат &nbsp;Санкт-Петербург &nbsp;университетін бітіріп, осы университеттің магистрлігін жалғастыруда. Үлкен қызымыздан 2 немере сүйіп отырмыз, – дейді отанасы.Ал отағасы болса, жарының мейірімділігі мен әркез ашық та адал мінезін &nbsp;жақсы көретінін тиек етеді.– Отасқанымызға биыл 35 жыл. Осы жылдар арасында бір-бірімізге түсіністікпен қарап, балаларымызға жақсы тәрбие бере білдік. Оларға үлкенге құрмет, кішіге ізет көрсетуде біреудің ала жібін аттамауды, жаман іске ешқашан бармауды санасына сіңіріп өсірдік. Темір жол саласында еңбек еткеніме 40 жылдан асыпты. &nbsp;Мен түздің жұмысын атқарсам, жарым отбасының ұйытқысын келтіріп, берекемізді кіргізіп отырады, – дейді жарын жазбай таныған Бахытбек ағамыз.

Қармақшылық жұбы жарасқан жандар

<a href="https://kyzylorda-news.kz/">Kyzylorda-news.kz.</a> Жосалы кенті әкімі аппаратының мәжіліс залында VIII шақырылымдағы аудандық мәслихатының кезекті 3-сессиясы өтті. Оның жұмысына аудан әкімі Ж.Еркінбек, облыстық тексеру комиссиясының мүшесі А.Сәдуақасова, аудан әкімінің орынбасары, аудан әкімі аппаратының басшысы, кірістер басқармасы мен дербес бөлім басшылары, кенттер мен ауылдық округ әкімдері қатысты.&nbsp;Сессияның күн тәртібі бойынша 20 мәселе қаралды. Атап айтқанда, бірінші мәселе бойынша "2022 жылға арналған аудандық бюджеттің атқарылуы жөніндегі есепті бекіту туралы" аудандық экономика және қаржы бөлімінің басшысы Ж.Ниматулланың және қосымша облыстық тексеру комиссиясының мүшесі А.Сәдуақасованың хабарламалары тыңдалды.Сондай-ақ, екінші және он бесінші мәселелер аралығында кенттер мен ауылдық округі әкімдері "2022 жылға арналған бюджетінің атқарылуы жөніндегі есепті бекіту туралы" мәселелері талқыланды. Оның ішінде Жосалы кентінің әкімі Ш.Сыдықов, Төретам кентінің әкімі Ғ.Елеусінов, Ақай ауылдық округінің әкімі Э.Қазиева, ІІІ Интернационал ауылдық округінің әкімі Н.Сайымов, Ақжар ауылдық округінің әкімі Н.Тұрсынбаева, Жаңажол ауылдық округінің әкімі Ә.Қоқанов, Дауылкөл ауылдық округінің әкімі М.Алдамұратов, Ақтөбе ауылдық округінің әкімі Қ.Әбдіғаппарұлы, Т.Көмекбаев ауылдық округінің әкімі Н.Ахметов, Қармақшы ауылдық округінің әкімі А.Есқараев, Алдашбай ахун ауылдық округінің әкімі Н.Тоғызбаев, Қуаңдария ауылдық округінің әкімі А.Аймырзаев, Иіркөл ауылдық округінің әкімі Ж.Төлегенов, Жосалы ауылдық округі әкімінің міндетін уақытша атқарушы В.Жалғасбай хабарлама жасады.&nbsp;Сессияның күн тәртібіндегі он алтыншы, он жетінші, он сегізінші мәселелері бойынша: "Қармақшы аудандық мәслихатының Регламентін бекіту туралы", "Қармақшы &nbsp;аудандық мәслихат аппараты» мемлекеттік мекемесі туралы Ережені бекіту туралы" және "Қармақшы аудандық мәслихат аппараты" мемлекеттік мекемесінің "Б" корпусы мемлекеттік әкімшілік қызметшілерінің қызметін бағалаудың әдістемесін бекіту туралы" аудандық мәслихаттың төрағасы Ә.Қошалақов баяндады.Ал он тоғызыншы мәселесі бойынша "Қызылорда облысы Қармақшы аудандық мәслихатының 2022 жылғы 21 желтоқсандағы №257 "2023-2025 жылдарға арналған Ақтөбе ауылдық округінің бюджеті туралы" шешіміне өзгерістер енгізу туралы" Ақтөбе ауылдық округінің әкімі Қ.Әбдіғаппарұлының, жиырмасыншы мәселесі бойынша "Қызылорда облысы Қармақшы аудандық мәслихатының 2022 жылғы 21 желтоқсандағы №262 "2023-2025 жылдарға арналған Иіркөл ауылдық округінің бюджеті туралы" шешіміне өзгерістер мен толықтыру енгізу туралы" Иіркөл ауылдық округінің әкімі Ж.Төлегенов баян етті.Сессияда күн тәртібіндегі мәселелер бойынша аудандық мәслихаттың тиісті шешімдері қабылданды. Сессия алдында тұрақты комиссиялардың бірлескен отырысы өткізілді.

Қармақшы аудандық мәслихатының кезекті сессиясы өтті

<a href="https://kyzylorda-news.kz/">Kyzylorda-news.kz.</a> Жосалы кентіндегі Төребай би, Кірекесов, Ібаш жырау көшелері тұрғындарының ұйымдастыруымен тасаттық берілді. Алдымен осы көшелер тұрғындары Сарыөзек көлінде ірі қара малын құрбандыққа шалса, ертесіне &nbsp;«Қазақ хандығының 500 жылдығы» атындағы кешен маңында әруақтарға арнап ас ұйымдастырды.&nbsp;«Ораз ахун» мешітінің діни қызметкері Шайхысылам Исламханов «Жаңбыр-Тасаттық» намазын оқығаннан кейін оған жиналған қауым арнайылап берілген ас дастарқанынан дәм татып, Құран-қатым сағырына қол жайып, дұға жасады.Сондай-ақ, мешіт қызметкері түрлі тақырыпта, тасаттық туралы салауат айтып, жамағатты діни біліммен сусындатты.&nbsp;<blockquote>«Осындай тағылымды іс-шараны ұйымдастырушылардың бірі &nbsp;– ұлағатты ұстаз, еңбек ардагері Рауа Бүркітбаевадан көше тұрғындары тарапынан өткізілген тасаттық жайлы айтып беруін сұрағанымызда ол: «Бұл игі шара Төребай би, Ібаш жырау, Кірекесов көшелерінің тұрғындарының бастамасымен ұйымдастырылуда. Оның ішінде, Жаңыл Меңдібаева, Нұргүл Шөкенова, Асылхан Бисенбаев, Мықтыбай Төлегенов, Әбен Қаракөзиев, Айған, Болатбай Сәтпен, Жұмагүл Әбдімомынова, Жақсылық Айтбаев сынды азаматтардың, сонымен қатар Нұрлан Райымбаев, Нұрбол Төлегенов, Алмат Жәкеев, Мейірімжан Айтбаев, Рашид Созақбаев, Еркебұлан Шәлтіков, басқа да жастардың қолдауымен жүзеге асырылған шара деп айтсақ артық емес. Келіндер де инабаттылығын танытып, жиналған қауымға қызмет етті. Жігіттеріміз өз міндеттерін атқарып, аға буыннан алғыс алуда. Осы ретте, тағы бір ерекше айта кететін жайт, Жолдас Бекбаев деген азаматымыз жеке көлігімен осы шараның өтуіне үлкен қолдау көрсеткенін айта кеткен жөн. Қазақ қашан да ұйымшылдығымызбен, бірлігімізбмен танылған халықпыз. Жетімінің арқасынан қағып, бауырымызға басқан, жесірін жылатпаған елміз. Пана сұрап келгенге қол ұшын созып, бір үзім нанымызды беріп, пана болған ұлтпыз. Бұл шараның басты мақсаты Алладан &nbsp;жаңбыр жауғанын тілеп, егілген егіннің бітік шығуына, мал-жанның &nbsp;амандығын сұрауы», – деді ол.</blockquote>Тасаттықта &nbsp;аудандық ардагерлер кеңесінің төрағасы Асқар Мереков, еңбек ардагерлері Жазықбай Нұржанов, Орынбасар Сариев сөз сөйлеп, ағалық баталарын берді.

Қармақшылық тұрғындар тасаттық берді

<a href="https://kyzylorda-news.kz/">Kyzylorda-news.kz.</a> ​ ​Достық үйінде Қызылорда облыстық және Шымкент қаласының Қазақстан халқы ассамблеясы жанындағы Ғылыми-сарапшылық топтарының тәжірибе алмасу отырысы өтті.&nbsp;Іс-шараға Шымкент қаласы ҚХА жанындағы Ғылыми-сарапшылық тобының жетекшісі Саипжамал Қорғанова, Оңтүстік Қазақстан мемлекеттік педагогикалық университетінің «Рухани жаңғыру және тәрбие» бөлімінің басшысы Қайрат Анарбаев, Қызылорда облыстық ҚХА хатшылығының меңгерушісі, облыстық қоғамдық даму басқармасының этносаралық қатынастар мәселелері жөніндегі бөлімінің басшысы Айгерім Алиева, өңірлік ғст жетекшісі мен мүшелері қатысты.Отырыстың алғы сөзін алған Шымкент қаласы ҚХА жанындағы Ғылыми-сарапшылық тобының жетекшісі, өзбек этносының өкілі, философия ғылымдарының кандидаты, 38 жыл ғылым мен педагогика саласында қызмет еткен Саипжамал Қорғанова ғылыми-сарапшылық топтың атқарып жатқан жұмыстарына тоқталып өтті. Толыққан тәжірибесімен бөлісті.<blockquote>«Біздің өңірдегі топ мүшелігінде 12 адам бар. Бекітілген жоспар бойынша жұмысымызды жүргізіп келеміз. Өңірімізде 108 этнос өкілі бар болса, 16 этномәдени бірлестіктер белсенді жұмыс істейді. Әр жыл сайын топ мүшелерінің монографиялық еңбектері жарық көруде. Сан ғасырлар өтсе де мұқалмаған тіліміз туралы және шекарамыз жайлы атадан жеткен асылды бүгінгі ұрпаққа жеткізу баршамыз үшін парыз. Қазақ жеріндегі қай ұлт пен ұлыс болмасын, олар өмір сүретін елдің ұлттық тарихы мен мәдениетін, жалпы ділін білуі керек. Туған өлкесінің салт-санасын бойына толыққанды сіңірген тұлға ғана кез келген жерде «Мен қазақ елінің азаматымын!!!» дей алады. Мемлекет басшысы ҚХА 32 сессиясында елдің бірегейлігі мен бірлігін нығайту мәселесін алға тартты. Біз ұлттық құндылықтарды насихаттау арқылы бірегейлікке қол жеткізе аламыз. Осы бағытта жұмыстарды одан әрі жандандыра түспекпіз», - деді.</blockquote>Оңтүстік Қазақстан мемлекеттік педагогикалық университетінің «Рухани жаңғыру және тәрбие» бөлімінің басшысы Қайрат Анарбаев қазіргі елдегі жүріп жатқан реформалар, мемлекеттік билік пен халықтың арасының алшақтап кетуі, тіпті цифрлық технологиялардың кіруі еліміздің алдында жаңа проблемалардың туындап отырғандығына тоқталып өтті.«Қоғамдағы келісім білім мен қатар тәрбиеге тікелей қатысты. Осы ретте «Ұлтқа, елге қызмет істеу - бұл мінезден», деген Әлихан Бөкейханұлы сөзі еске түседі. Біздің бабаларымыздың жалаң ұраншылдықпен емес, өзінің кең де толерантты мінезімен, дана ойымен бүкіл әлемге танылды. Олай болса, ел Президенті Қасым-Жомарт Тоқаевтың бастамасымен «Естуші мемлекет» тұжырымдамасының жүзеге асыратын бірден-бір мекеме «Қоғамдық келісім» мекемесі деп білемін. Әсіресе ғылыми-сарапшылық топ мүшелері халықтың тамырын ұстап, қоғамның тынысы болып, мемлекеттік басқарудың барометрлік қызметін атқаруды естен шығармауымыз қажет. Халықты тыңдай білген мемлекет қана әрбір меселенің алдын алады. Қоғамдағы келісімді сақтай отырып, халық пен билік арасындағы көпір болуға үлесімізді қосуымыз қажет», - деді.<blockquote>Келелі кездесуде қоғамдағы этносаралық және конфессияаралық қарым-қатынастар мәдениетін қалыптастыру тәжірибесі, проблемалары және перспективалары туралы сөз қозғалды. Екі өңірдің ҒСТ мүшелері этностар арасындағы мәдени қарым-қатынас пен мемлекеттік тілді меңгеру және олардың қоғамдағы рөлі жайлы тақырыптарды қаузалады. Жиынға келгендердің ортақ әңгімесі алыс-жақын шетелдердегі болып жатқан саяси оқиғалардан көптеген елдер сабақ алуы керек дегенге сайды. Этностар арасындағы толеранттылық, яғни, төзімділік тақырыбы да сөз болды. Өңірлік ғылыми-сарапшылық топтың белсенді мүшелері Дастан Сәтбай, Баймырза Қожамберлиев, Әлібек Жаппасбаев, Мұрат Насимов өз пікірлерін ортаға сала отырып, Шымкенттік әріптестеріне бірнеше бағыттар бойынша сұрақтар қойды. Өзара пікір таластырды.</blockquote>Жиын соңында екі өңірдің Ғылыми-сарапшылық топ өкілдері отырысты қорытындылап, естелік суреттерге түсті.

Ғылыми-сарапшылық топтардың тәжірибе алмасу  отырысы өтті

<a href="https://kyzylorda-news.kz/">Kyzylorda-news.kz.</a> ​ Өзбекстан астанасы Ташкентте бокстан ерлер арасындағы XXII әлем чемпионаты мәресіне жеткен болатын. Осы дода нәтижесінде Қазақстан әлем чемпионаты тарихындағы медальдар саны бойынша үшінші орынға көтерілді, деп хабарлайды Спортты дамыту дирекциясының баспасөз қызметі.Еске салайық, чемпионат финалында 4 отандасымыз – Санжар Тәшкенбай, Махмұд Сабырхан, Асланбек Шымбергенов пен Нұрбек Оралбай жұдырықтасып, бәрі жеңіске жетті.Алдыңғы әлем чемпионатының күміс жүлдегері Махмұд Сабырхан (54 кг) бұл финалда сол кездегі қателіктерін қайталаған жоқ. Отандасымыз ринг қожайыны Ойбек Джураевпен жекпе-жекте бар шеберлігін паш етті. Мұны қапталдағы төрешілер де мойындады. Тіпті, 21 жастағы боксшымыз 3-раундта қырғыз төрешісіне 2 мәрте нокдаун тіркетті. Қазақ боксшысы осыған дейін шаршы алаңда Куба, Гана, Үндістан мен Мажарстан спортшысын ұтқан. Айта кетейік, Махмұд 2 жыл бұрынғы Белградтағы әлем чемпионатында да күміс жүлдеге ие болған.Ұлттық құрама капитаны Асланбек Шымбергенов өзі қатысқан 2-і әлем чемпионатында топ жарды. Отандасымыз финалда (71 кг) тағы бір өзбекстандық Саиджамшид Джафаровты тізе бүктірді. Алдыңғы жекпе-жектерде Асланбек Үндістан, Франция, Израиль, Тринидад және Тобаго боксшысынан басым түскен.Нұрбек Оралбай Ташкентте өз салмағында (80 кг) қарсылас шақ келтірмей тағы бір мәрте әнұранымызды шырқатты. Отандасымыз шешуші, көптің қызығушылығын тудырған жекпе-жекте Қытай атынан сынға түскен қазақ Тоқтарбек Таңатқанды ұтты. Осыған дейін Нұрбек Ресей, Иордания, Түркия мен Әзербайжаннан келген боксшылардан басым түскен.Финалдардың алғашқы күні Ұлттық құрамадағы ең жеңіл спортшы Санжар Ташкенбай топ жарып, чемпион атанған ең жас қазақ боксшысына айналды. Ал одан кейін шаршы алаңға шыққан Дулат Бекбауов (67 кг) қарсыласына жол беріп, күміс медальға қол жеткізді. Өзбекстандағы додаға Ұлттық құрама барлық 13 салмақта спортшы апарған болатын. Бұл қатардағы Сәкен Бибосынов (51 кг), Серік Теміржанов (57 кг), Талғат Сырымбетов (60 кг), Санатәлі Төлтаев (63,5 кг), Нұрқанат Райыс (75 кг), Сағындық Тоғамбай (86 кг), Айбек Оралбай (92 кг) мен Қамшыбек Қонқабаев (+92 кг) жүлдегерлер қатарынан көріне алмады.Осылайша, Қазақстан құрамасы Ташкентте 4 алтын, 1 күміс медальді қоржынға салып, жалпы есепте 2-орын алды. Көш басында жарыс қожайыны Өзбекстан қалды. Жалпы Қазақстан 1993 жылдан бері егемен ел ретінде осымен 16 рет әлем чемпионатына былғары қолғап шеберлерін жіберді. Қазір еншімізде 18 алтын, 16 күміс, 22 қола жүлде бар. Осының арқасында жалпы Әлем чемпионаты тарихындағы медаль есебінде Қазақстан АҚШ-ты басып озып, 3-орынға көтерілді. Бірінші орынға - Куба, екінші орынға Ресей жайғасқан. Ұлттық құрама осыған дейін тек 2013 жылы Алматыда өткен дүниежүзі бәсекесінде 4 алтынға ие болған.«Құрметті Қазақ елі, бәріңізді шын жүректен құттықтаймын! Бұл – бүкіл елдің жеңісі! Ташкенттегі осы әлем чемпионаты құрамамыз үшін ерекше нәтижемен есте қалды. Боксшыларға қолдау көрсету үшін Қазақстаннан көп жанкүйер келгенін алғашқы күннен байқадым. Федерация мен команданың атынан оларға рақмет айтамын»,-деді Қазақстан бокс федерациясының президенті Кеңес Рақышев финалдардан кейін берген сұхбатында.Тағы айта кетейік, әлем чемпиондары Халықаралық бокс қауымдастығынан (IBA) 200 мың АҚШ долларынан алды. Күміс жүлдегерлерге 100 мың, қола жүлдегерлердің әрқайсысына 50 мың АҚШ доллары берілді. Биылғы доданың жалпы жүлде қоры – 5,2 млн АҚШ доллары.Сондай-ақ Қазақстан бокс федерациясының президенті Кеңес Рақышев осы нәтижеге үлес қосқан Мырзағали Айтжанов бастаған бапкерлер қосынын, боксшыларды, дәрігерлерді, ғылыми топтың мамандарын өз есебінен марапаттайды. Бұл ретте чемпион атанған Ұлттық құрама боксшыларына сыйақы ретінде 100 мың АҚШ долларынан табыстайды.

Бокстан әлем чемпионаты тарихында Қазақстан үшінші орынға көтерілді

<a href="https://kyzylorda-news.kz/">Kyzylorda-news.kz.</a> ​ <a href="https://www.kazhydromet.kz/weather/prognoz-sinopticheskoy-situacii-i-opasnyh-yavleniy-pogody-po-territorii-kazahstana">«Қазгидромет»</a> РМК-сы мамырдың 15-і күнгі ауа райы болжамын жариялады.Кәсіпорынның болжамына қарағанда, бүгін атмосфералық фронталды бөліктердің өтуіне орай Қазақстанның басым бөлігінде күн құбылмалы болады. Найзағай ойнап, жаңбыр жауады.Күндіз елдің оңтүстік-батысында найзағай ойнап, нөсер жауын, бұршақ жауады. Республика бойынша жел күшейіп, солтүстік-батыста тұман түсіп, күндіз оңтүстікте – шаңды дауыл тұрады.Күндіз Маңғыстау облысының батысында қатты жаңбыр күтіледі.Түнде Ақмола, Павлодар облыстарының солтүстігінде, шығысында, Абай облысының батысында, Шығыс Қазақстан облысының шығысында 1-3 градус үсік, Қостанай облысының батысында, солтүстігінде, Солтүстік Қазақстан облысының батысында топырақ бетінде 2 градус үсік жүреді. Қызылорда облысында, Түркістан облысының солтүстігінде, Жетісу және Ақтөбе облыстарының оңтүстігінде, Алматы облысының солтүстік-батысында төтенше өрт қауіпі сақталады.

Үсік жүреді: 15 мамырға арналған ауа райы болжамы жарияланды

<a href="https://kyzylorda-news.kz/">Kyzylorda-news.kz.</a> Жас ақын Піржан Сандыбай балалар әдебиетінің абызы, ақын, жазушы Адырбек Сопбеков туралы «Ақындар – адалдық жаршысы» атты мүшайрада осылай тебірене жырлады. Жаңақорған жұртшылығы Адырбек Сопбеков атындағы жүлде үшін аймақтық жазба ақындар мүшайрасы М.Нәлібаев ауылдық округінде ұйымдастырылды. «Рухани жаңғыру» бағдарламалық мақала асында өткен сөз сайысында Түркістан шаһары мен Павлодар облысынан келген ақындар Адырбек Сопыбековты ұлықтады.Поэзия әлеміне саяхаттап, ақын туралы ел мен жер туралы тебіренген таланттылардың таудай талабына әділ қазылар баға беріп, жүлделерін табыстады. Ауданға қонақ болып келген Павлодар өңірі, Успен аудандық мәдениет, тілдерді дамыту, және спорт бөлімінің басшысы Медет Тауасқан, «Сыр бойы» газетінің тілшісі, ақын Биболат Сәтжан және «Жаңақорған тынысы» газеті бас редакторының орынбасары Баян Үсейінова ақындарға төрелік етті. Шара басталмас бұрын ауыл ақсақалы Бексейіт Сәрсенбаев ақ батасын беріп, өнер ұжымы қонақтарға шапан жауып, қыздарға камзол кигізіп, сый-сыяпат көрсетті. Ақындар топқа қосылмас бұрын кішігірім көрініс тамашалап, өткенге ой тастап, келешекке көз жүгірттік.Сонымен ой-қиялы ерек, шабысы бөлек сегіз ақын сахна төріне көтерілді. Үш кезең бойынша сынға түскен ақындар алдымен ел егемендігіне орай «Тәуелсіздік бәрінен қымбат» тақырыбында өлеңдерін оқыды. Одан кейін, «Аймақтардан ақ тілек» атты кезеңмен толықтырса, түйінін ақын рухына арнап «Арнау жырымен» көрермендерін сусындатты. Жас толқын шоғырының қалыптасып келе жатқанына көңілінде бір қуаныш пайда болғанын жасырмаған ақын жары Шарипа апамыз көпке рахметін айтып, алғысын жеткізді. Айман Үсенова, Еркебұлан Серік «Алғыс хат» төрінен көрінсе, 3-орын Дидар Өмірзақ пен павлодарлық Перизат Құрманәліге бұйырды. Даналықпен өрілген жырларынан, балалықтың иісі аңқып тұратындай, деп ақын атасына өлең арнаған Жалағаш ауданынан келген Зылиха Жаңабай екінші орыннан көрінді. Ал, бірінші орынға Бексаба Ұланбекпен пен Піржан Сандыбай жайғасты.Ал бас жүлде «Бала тілінде сөйлеген ақын» деп тебіренген керекулік ақын Нұрбек Кеңесбайдың тақымында кетті.<blockquote>«Солтүстік пен оңтүстікті жалғап, байланыстырған осынау ақындық өнердің төрінде өмірден өткен Адырбек атаның рухы бір аунап тұрған болар. Иә, ол кісінің өлеңін оқып, балалық шаққа саяхаттап алатының ақиқат. Ақынын құрметтеп, дәріптеп жатқан жаңақорғандық жұртшылыққа, өнер ұжымына алғыс айтамын. Алла сәтін салып, жол түссе келер жлы да Сыр еліне қайта келуге әзірмін», – деді Нұрбек ақын.</blockquote>Жаңақорғанның жарығы жаһанға түседі. Өйткені онда ақын Адырбек тұрады. Керемет теңеу, бұл ақынның поэзия әлемі қазақ балалар әдебиетінен ойып орын алатынын ғана аңғартпайды, оның әрбір кітабы балабақша мен бастауыш сынып ұстаздары үшін үлкен көмекші құрал екенін көрсетеді. Бастауыш сыныптан бастап оқушыларға варианттық компоненттен таңдау бойынша сабақтарда «Адырбектану» пәнін ұйымдастыру арқылы туған жердің ақыны, жазушысы, ғалымы, батырын танып қоймай, туған жерінің тарихын жан-жақты танытатын поэмаларын жаттап өскен балалардың танымдық дүниесін арттыруға болар еді.<blockquote>«Батыр ақын болмаса, ол бойына мін емес! Ақын батыр болмаса, көрген күні-күн емес», деген нақыл бар қазақта. Иә, қазақтың батырлары ақын, ақындары батыр екенін бүгінгі буын да көрсетіп келеді. Түйдек-түйдек ой айтып, елдің мұңын, бітімін білдіріп, мағыналы да, мәнді құндылықтарды қаламға сыйдырған жастардан күтеріміз көп. Бүгінгі Адырбек ақынның кешіне алғаш қатысқан ақындардың балалар әдебиетінің классигін суреттеп, пейілі мен көңіл пернесін, тұла бойы талантын, ең бастысы шығармасын айтып тауса алмай жатқаны көңілімізге медеу болды. Осындай тұлғаларды ұлықтап, ұрпаққа есімін мұра ету біздің міндет, сондықтан ұйымдастырушыларға үлкен алғыс айтамыз», – деді Медет Тауасқан.</blockquote>Міне, Адырбек атасын жырға қосып, кең даланы жұмыр өлеңге сыйдырған ақындардың поэзия әлеміндегі бір күндік шабысы осылай түйінделді. Ең бастысы, жазушы, көсемсөзші, этнограф, өлкетанушы, тарихшы, ағартушы Адырбек Сопыбековтың есімі мәңгі есте сақталып қаларында. Айта кететіні, М.Нәлібаев ауылдық клубы, ауыл жастары, Айғаным Мырзалиева, Тәжібек Тайбеков, Байкенже, Кейден, Қыркеңсе, Жаңарық, Өзгент клубтары жүлде қорына қомақты үлес қосыпты. Ал, осы шығармашыл кештердің жоғары дәрежеде өтуіне, ұйытқы болып жүрген Зульфия Шалабаева бастаған аудандық мәдениет үйінің қызметкерлерінің еңбегі зор екенін айту керек.

Жаңақорғандық ақындар Адырбекті ұлықтады

<a href="https://kyzylorda-news.kz/">Kyzylorda-news.kz.</a>&nbsp; Қызылордада шыңдалған шыны шығаратын «Комфорт 1KZ» ЖШС бірегей зауыты бар. Ерекшеліктері - одан энергияны үнемдейтін және шағылыстыратын әртүрлі сипаттамаларға ие екі қабатты терезелер жасалады, айналар да шығарылады.Серіктестіктің негізін қалаушы – Қайрат Үсенов. Ол бизнестегі алғашқы қадамдарын 2009 жылы көтерме саудадан бастады. 2014 жылы ол бастапқы капиталды жинақтап, теңдесі жоқ жеке өндірісін ашуды ұйғарды. Таңдау шыңдалған шыны өндірісіне түсті.<blockquote>«Біріншіден, мен қала ішінен шикізатты жеткізуге және дайын өнімді жөнелтуге өте ыңғайлы темір жол төсемі бар қолайлы жер таптым. Шыныны шынықтыруға және екі қабатты терезелерді шығаруға арналған жабдық сатып алдым. Кәсіпорынның кірісі жыл сайын артып отырды, бұл кейінірек жылтырату, сырлау, шыны жиектерін өңдеу үшін көп функционалды өңдеу желілерін, сондай-ақ шикізат пен дайын өнімді тасымалдауға арналған автопаркті сатып алуға мүмкіндік берді», – деді Қ.Үсенов.</blockquote>Кәсіпкердің айтуынша, өткен жылы Қазақстанда үлкен сұранысқа ие қаңылтыр айна шығаратын жаңа құрал-жабдықтарды сатып алып, өнім түрін кеңейтуді ұйғарды. Оның жеткізушілері негізінен Ресейден келген өндірушілер. Кәсіпкер бизнес-идеясын жүзеге асыру үшін «Даму» кәсіпкерлікті дамыту қорының облыстық филиалына мемлекеттік қолдауға жүгінген. Жоба «2021-2025 жылдарға арналған ұлттық кәсіпкерлікті дамыту жобасы» мемлекеттік бағдарламасы бойынша жеңілдетілген несие алуға мақұлданды.&nbsp;

Қазақстан және Қызылорда облысының жаңалықтары