<a href="https://kyzylorda-news.kz/ru">Kyzylorda-news.kz.</a> «Дарын» мемлекеттік жастар сыйлығын иеленгендердің ішінде Сыр бойының перзенттер бар. Оның бірі – жыршы, киелі өнердің насихатшысы Күнсұлу Түрікпен. Қуанышты сәтте Күнсұлумен сұхбаттасудың сәті түсті.– Күнсұлу, «жүзден жүйрік, мыңнан тұлпар» шыққан жеңісіңіз құтты болсын. Бұл сыйлық кез келгенге берілмейтіні белгілі. «Дарын» жастар сыйлығын алғандағы әсеріңіз?..– Расында, «Дарын» мемлекеттік сыйлығы дарынды, шығармашыл жастарға үлкен шабыт сыйлайтын мемлекеттік сыйлықтың баспалдағы деп түсінемін. Әрине, «Дарын» сыйлығына шашасына шаң жұқтырмайтын талантты үміткерлер аз болған жоқ. Несібемізге орай биыл бұл сыйлықты өнердің ішінде жыр өнеріне бергенді жөн көрген болу керек. «Сырдың елі – жырдың елі». Сыр елі – жырдың ошағын сөндірмеген, қасиетті өнердің қарашаңырағы. Бұл сыйлық Сыр мәдениетінің, оның ішінде жырдың айналасында жүрген Сыр жыршыларының ортақ жеңісі дер едім. Осындай мәртебеге қол жеткізудегі әсерді сөзбен жеткізе алмаймын. Өнердегі еңбегімізді бағалап, осындай құрметке бөлегені үшін еліме алғысым шексіз. Мені қолдаған, «Дарын» сыйлығына ұсынған сырбойылықтарға, облыстық мәдениет басқармасына, облыстық халық шығармашылығы ұжымына ризашылығымды білдіремін. Сонымен қатар менің жетістікке жетуіме септігін тигізген өмірдегі алғашқы ұстазым – ата-анама, өнердегі ұстаздарыма алғысымды айтамын.– Жыраулық өнердің ізін жалғап келе жатқан жас буынның бірісіз. Шығармашылығыңызда нендей жаңалық бар?– Осыдан бір-екі жыл бұрын жыршылық өнерді насихаттау мақсатында Марат Сүгірбай деген азаматпен бірге бірнеше фестиваль ұйымдастырдық. Бұл фестиваль нәтижелі болды. Жастардың ата мұрасын көзінің қарашығындай сақтап, қасиетті өнердің болашағына бей-жай қарай алмайтынына көзіміз жетті. Бұл мақсатта біршама жобалар жасадық. «Жырласа, жастар жырласын!» атты кең көлемде республикалық фестиваль ұйымдастырдық. Сол шараның ізінше өзім «Ән, терме, домбыра курсы» жұмысын бастадым. Онлайн форматтағы курстың мақсаты – жастардың дәстүрлі ән-жыр өнеріне деген қызығушылығын ояту. Бір қызығы, бұл курсқа бұрын қолына домбыра ұстап көрмеген, жыр айтып көрмеген, тіпті жырдың не екенін білмейтін талапкерлер де қызығушылық білдіріп, қатысуда. Олардың ынтасы мені қуантады. Бір-екі аптаның ішінде жырды түсінгендер аз емес. Сондай-ақ курсқа шетелдегі қандас бауырларымыз қатысуда. Бұл арқылы әр қазақтың қанында бар дәстүрлі жыр өнеріне үлкен жауапкершілікпен қарайтынын түсіндім. Сонымен қатар кәсіби шеберлігін арттырып жүрген аға буын, орта буын өкілдері де бар. Курстың алғашқы кезеңін аяқтадық. Бүгінде екінші кезеңге талапкерлерді қабылдау басталады. Болашақта бұл курсты үлкен жыр мектебіне айналдырсам деген мақсатым бар.– Бір сұхбатыңызда «әрбір орындаушы өзінің жыр қорымен өлшенеді» деген екенсіз. Сіздің қорыңызда қанша жыр бар? Таңды таңға ұрып жыр айтқыңыз келетін сәттер болады ма?– Шынында солай. Қазіргі кезде таңнан-таңға жыр айтатын сәт болмауы мүмкін. Бірақ халық сұраған кезде тартынып қалмайтындай деңгейде әрдайым дайындық, ізденіс болуы керек. Әрине, екі-үш күн қатарынан жыр айтатын сәттер болады. Сырттан келген қандастарымыз немесе ауылдағы ағайын әлі де жыр тыңдаудан жалықпайды. Өзім сондай сәттердің куәсі болдым. Биыл карантин кезінде халықтың дәстүрлі өнерге деген қызығушылығы қайта оянды. Әр істің қайыры бар деген ғой. Сол себепті жыршылар халық жыр сұраған кезде дайын болуы керек. Өзім әрдайым дайынмын деп айта аламын.– Дәстүрлі өнерде жаңа есімдер бар ма?– Әр өңірде жаңа есімдер бар. Бір ғана Қызылорда облысының Қармақшы ауданындағы Жыраулар мектебі жыл сайын қаншама шәкірттер дайындауда. Шиелі ауданында Нартай мектебі жұмыс істеуде. Арал ауданында да Жыраулар үйі бар. Жыл сайын жыраулық өнерге жүздеген есім қадам басады. Бұл – үлкен жетістік.– Сұхбатыңызға рахмет!

Күнсұлу Түрікпен: Жырдың ошағын сөндірмеймін

<a href="https://kyzylorda-news.kz/">Kyzylorda-news.kz.</a>&nbsp;Сырдария ауданының әкімі Берік Сәрменбаев төрағалығымен аудан әкімдігі жанындағы құқық бұзушылық профилактикасы жөніндегі ведомствоаралық комиссия отырысы өткізілген болатын.Комиссия отырысына жергілікті бюджеттен қаржыландырылатын атқарушы мекемелердің және құқық қорғау органдарының басшылары қатысып, күн тәртібіне сәйкес, 3 мәселе қаралды. Атап айтқанда, «Есірткі бизнесіне қарсы күресте мүдделі органдармен атқарылып жатқан шаралар туралы» Сырдария аудандық полиция бөлімібастығының міндетін атқарушы Азамат Оспанов, Сырдария аудандық ауруханасының бас дәрігері &nbsp;Жалғасбек Үсенов баяндама жасады.Ал екінші мәселе бойынша «Есірткі егу алқаптары анықталған жер учаскелерін мемлекет меншігіне қайтару және жер учаскелерінің иелері мен жер пайдаланушыларға заңмен белгіленген жауапкершіліктерін түсіндіру жұмыстары туралы» аудандық ауылшаруашылығы және жер қатынастары бөлімінің басшысы Нұрбол Жұмабеков баяндады. Сонымен бірге &nbsp;«Қауіпсіздікті қамтамасыз етуде сервистік тәсілдерді енгізу жобасының кейбір мәселелері туралы» Сырдария аудандық полиция бөлімі бастығының міндетін атқарушы Азамат Оспанов хабарлап өтті.Аудан басшысы өзекті мәселе бойынша тиісті ұсынымдар енгізіп, комиссия отырысының қорытындысымен бойынша жауапты мекеме басшыларына «Есірткісіз аймақ» жобасын іске асыру бойынша іс-шаралар жоспарында көзделген тапсырмалардың уақытылы әрі сапалы орындалуына тиісті тапсырмалар берді. Аталған мәселелердің орындалуы бақылауға алынатындығын ескертті.&nbsp; &nbsp;

Құқық бұзушылық профилактикасы жөніндегі комиссия отырысы өткізілді

<a href="https://kyzylorda-news.kz/ru">Kyzylorda-news.kz.</a> Қорқыт ата кесенесі. Мұнда тәу етіп келгендерді қобыздың қоңыр үні қарсы алады. Жүрегіңе тыныштық сыйлайтын үн. Еріксіз ойландырады. Мұнда біз бойлай алмайтын құдіретпен қатар сәулетшінің шығармашылығы үйлесім тапқаны сезіледі.Осыдан тура 40 жыл бұрын уақыттың қиындығына қарамастан бой көтерген Қорқыт ата ескерткіші бүгінде әлемге белгілі қасиетті орын. Иә, 40 жыл бұрын Қорқыт ескерткішін тұрғызу оңай болған жоқ. Сол кездегі қызмет тізгінін ұстаған ел азаматтарының, сәулетшінің қолға алған істі соңына жеткізуді мақсат еткен қайсарлығы жолдағы кездескен кедергі мен қиындықтың бәрін жеңді.Қандай қиындық дейсіз бе? Қызмет тізгінін ұстаған азаматтардың бұл бастамасы үшін арыз қардай бораса, мәселе шешімін тапты дегенде үлкен іске бел буған азаматтардың жолы болмай қиналғандығы. Жол апаты, қаза. Бір емес, бірнеше рет. Мұнда бір сыр барын сәулетші түсінді… Қасиетті Сыр топырағында туған аты әлемге мәшһүр сәулетші Бек Ибраевтың туған жерде ғана емес, қазақ елінде қолтаңбасы қалды.Байтақ еліміздегі белгілі ескерткіштер мен кесенелер, қасиетті орындардың ескерткішке айналуына көп еңбек сіңірген сәулетші. Ол туралы жазбақ ниетпен ізденгенімізде өзінің бойындағы талантын қадірлеген, сәулет өнерінің қадір-қасиетін жанымен ұғынған және ескерткіштерге жан бітіру үшін қолға алған жұмысқа рухани дайындықпен келгенін ұғындық. Оның шығармашылығы арқылы сәулет өнері біз ойлағандай жай сызба емес, шығармашылық пен рухани дүниенің үйлесім табу қажет екенін ұғынғандай болдық. Әрине, сәулетшінің жанын түсіне алдық деп артық айта алмаспыз.Тағы бір атап айтарлығы, әлем таныған сәулетші туралы көп дерек жоқ. Сәулетшінің қолтаңбасы қалған ауыз толтырып айтарлық ескерткіштер аз болмағанмен, «мен мынадай жасадым деп» өзін жарнамалаған немесе құлаш-құлаш сұхбаттарын таба алмадық. Үндемей іс бітірген сәулетшінің бұл да өзгелерден дара қасиеті болар, бұл.Бек Ибраев 1947 жылы, 2 мамырда Қызылорда қаласында дүниеге келген. Мұғалімдер отбасынан шыққан бала Бек қаламыздағы №5 мектепті тәмамдаған соң сәулетші мамандығын таңдайды. Жүрегі қалаған мамандығын үздік бітіріп, жоғары оқу орнында «Архитектура» кафедрасында мұғалім болып еңбек жолын бастаған ол осы сала бойынша ғылым жолында да жемісті із қалдырды. &nbsp;Өзінің еңбек жолын сәулет өнеріне арнаған Бек Әнуарбекұлы талай қасиетті орындардың, еңселі ескерткіштердің сызбасын сызды. Соның бірі де, бірегейі – Сыр топырағындағы Қорқыт ата кесенесі.Қорқыт баба басына кесене салып, ескерткіш қою кеңестік кезеңдегі үлкен ерлік болатын. Сол уақытта Қармақшы аудандық партия комитетінің І хатшысы қызметін атқарған Елеу Көшербаев түрлі пікірлер мен айыптауларға қарамастан Қорқыт ата ескерткішін салуға бел буғаны жайында «Парыз» атты кітабында былай деп жазады: «1978 жылдан үш ескерткіштің құрылысына кірістік. Бірі – Қармақшыда Отан соғысында қаза тапқандарға теміржол вокзалының қарсысынан арнаулы бау орнатып, олардың аты мен әкесінің атын алтын әріппен жазып, ескерткіш орнаттық. Кейін ағаштары желкілдей өсіп, өткенді еске алып демалатын орынға айналды.Екіншісі – Москва автожолы мен теміржолы арасындағы екі жақтан бірдей көрінетін, Қорқыт станциясының шығыс жағына, бұрынғы қабірінің тұсынан биік төбенің басында Қорқыт ата ескерткіші орнатылды. Оған жергілікті құрылысшылармен қатар, Алматының мамандары мен ғалымдары қатысты.Үшіншісі – Ленин атындағы совхоздың Ақжар совхозы жағынан Сыр елінің, қазақтың дүлдүл ақыны Тұрмағамбет Ізтілеуовке мазар-ескерткіш орнатылды. Оған аудан, облыс құрылысшылары мен мамандары қатысты. «Қорқыт – діни тұлға, ал Тұрмағамбет – молда, халық жауы. Соған қарамастан, жаңа хатшы ескерткіштер орнатып жатыр» деген арыздар қайта-қайта тексеріліп, мазаны алды. Тексерушілер «ескерткіш салуды тоқтат» деген қорытындыға келгенмен, «байқаңыздар, өздеріңіз біліңіздер» деген де екіұшты пікірлерін айтты. Сол кездегі облыстық Совет атқару комитетінің төрағасы, қазақтың белді де беделді азаматы Сағидолла Құбашевтың қолдап, қорғауымен сол кісіге арқа сүйей отырып ескерткіштерді бітірдік.1980 жылдың бірінші қарашасы күні Қорқыт ата мен Тұрмағамбет Ізтілеуовке арналған ескерткіштерді ашуға ауданда салтанатты той өткізілді. Тойға республикадан белгілі ғалымдар Толыбеков, Қоңыратбаев, кинорежиссер Сұлтан Ходжықов пен ақын-жазушылар, өнер қайраткерлері, партия, советоргандарының басшылары қатысты. Халық көп жиналды, көрші ауданның кісілері кеп тамашалады, ғалымдар мен өнер адамдары ескерткіштерге байланысты тарихи сөз қозғап, көптеген ғылыми мағлұматтар берді».Ескерткіш салу туралы шешім қабылданып, жобасын сызу үшін Алматыда еңбек етіп жүрген сәулетші Бек Ибраевқа жауапкершілік жүгі жүктеледі. Сәулетші үшін де бұл жұмысты бастау оңай болған жоқ. Уақыт қиындығынан бөлек, бір тылсым күш жұмысты бастауға кедергісін келтіреді. Мұның сырын сәулетші де түйсінеді. Бұл туралы кейіннен журналис¬терге берген сұхбатында айтады: «Жетпісінші жылдардың соңы коммунистердің айдарынан жел есіп, халықтың да ұлттық санадан алшақтап, өз болмысына жатырқай қараған кездері еді ғой. Кесенені салу кезінде де жергілікті қызыл комиссарлардың түртпектеуінен талай түсінбеушіліктер туындады. Олардың қаупі де орынды, халықтың тағзым етіп күш алатын, космостық қуаты бар орынның айналасында күмәнді алып-қашпа сөз туындатып, қарапайым халықты дүдәмәл халге жеткізу оларға үлкен пайда. Құрылысқа кіріскен біздерді бір қырсық айналдырған сияқты. Шығармашылық тобымыздың арасында ши жүгірткен органдардың әрекеті, ерекше тылсым күштің көлеңкесінде, айдалада қалды. Құрастырушы, салушы, темірші, тас қашаушы сияқты әртүрлі мамандардан тұратын үлкен ұжымның кейбірінің отбасында қатарынан қайғылы оқиғалар бола бастады. Сап-сау жүрген жүргізуші бір күнде жынданып кетеді. Екі қалада бір күнде, бір сағатта екі бірдей азаматтың әйел, баласының тосыннан қазаға ұшырағаны туралы суық хабар мүлдем есеңгіретіп жіберді. Өзім де бір өлімнен аман қалдым. Содан кішкентай бақсы қызға бардық. Сонда әлгі қыз баланың айтқаны: Бір әжені көріп тұрмын, аяғы ақсақ, сол кісі назалы, ажалдың себепшісі сол» деді. Есіме Қорқыт жайлы аңыздағы Ақсақ қыздың сап ете қалғаны. «Ақсақ қыз ба?» десем, «Атын қайдан білесіз?» дейді. Ақсақ қыздың мұнарасын бірнеше жыл бұрын солдаттардың қиратып тастағанын естігенмін. Дереу пойызға отырып, Жосалыға келдім. Қармақшы аудандық атқару комитеті төрағасының орынбасары Ө.Мұхамбедиевке кіріп, жағдайды түсіндіріп: «Ақсақ қыздың мұнарасын қайта тұрғызбасақ, бәріміз де ана жаққа кетеміз» дедім. Кірпіш, цемент тауып берді. Мұнарасын қалап біткен¬нен кейін Ақсақ қыздың әруағынан тізерлеп отырып кешірім сұрадым. Содан кейін тынышталды ғой» деп еске алған екен.Бұл сәулетшінің кез келген адам түйсіне бермейтін қасиеті екені сөзсіз. Бұл туралы өзі де бір сұхбатында: «Қасиетті адамдар бұл дүниеден өткенде олардың шарқ ұрған шыбын жаны ешқашан оны тастап кетпейді екен. Қарапайым адамның санасы жете бермейтін басқа бір болмысқа айналып, о дүние мен бұ дүниенің арасындағы байланыстарды бойынан өткізетін таңғажайып сипатқа ие болады. Бұл туралы әлемде жинақталған мәліметтер бар, оны білу-сезу жай пендеге міндетті емес. Қасиетті әруақтардың бірі Қорқыт атаның кесенесін жобалауға үлкен толғаныспен, рухани дайындықпен кірістім десем, артық айтқаным емес. Оның қалдырған мұрасына тереңдеп, қобыз күйлерінен жүрек толғанысы мен шерін түсінуге тырыстым. Ақырында ескерткіш тек қана музыка аспабы үлгісіндей болуы тиіс деп ойладым. Құлағымнан кетпейтін қобыз үнін жеткізгім келіп, талай мамандармен ақылдастым, оның да сәті түсті» дейді.Сәулетшінің қолынан шыққан ғажайып дүние бұл ғана емес. Алтын Емелдегі Шоқан ескерткіші, Абай мен Шәкәрім кешені, Қабанбай батыр, Райымбек батыр ескерткіші және тағысын-тағы.Артына өшпестей із қалдырған сәулетшінің есімі ұмытылмайтыны анық. Қорқыттың қобыз үнін қайта тірілткен сәулетшінің есімі де мәңгілік жасайды. Ескерткіштегі қобыз үні желмен бірге оның есімін шартарапқа жеткізіп жатыр. Қоңыр үн бізге осындай сыр айтқандай болды.

Сыр бойылық сәулетші қандай мұра қалдырды?

<a href="https://kyzylorda-news.kz/ru">Kyzylorda-news.kz.</a> Бүгінде дамудың даңғыл жолына түскен ұялы телефон операторлары сымсыз байланыстың сергек сипаты саналады. Ал ондай өренің жемісін жете тану үшін ақыл, іскерлік, шеберлік, тәжірибе тәлімі мүмкіндік береді. Біздің кейіпкерде табиғат тарту еткен таным бар. Табиғаттың тартуына терең бойлау үшін Қыдырбек көп уақыт жұмсаған. Жақында ұялы телефонның ақауын әп-сәтте реттейтін маманның қызметімен танысып қайттық.Мектеп бітірісімен тіршілігін түгендеген Қыдырбек 2014 жылы қаладағы «Жайна» сауда дүкеніндегі телефон жөндеу орталығына тап болады. Әу баста мықты маман саналатын ұсталар бозбаланы қалың топқа қоса қоймаған. Жеті күн жүріп, Қыдырбектің қолына жалғыз телефон тиеді. Смартфонды қуаттайтын тетігін алмастыруға бір күндік жұмысын арнаған жас маман алғашқы еңбекақысын ұмытқан емес. Адал еңбекпен тапқандағы жалақысы – 1500 теңге. Маңдай термен тапқан қаржы Қыдырбектің алға жылжуына септігін тигізсе керек. Былайша айтсақ, телефон қуаттайтын қызметті ауыстыру ең жеңіл жұмыс саналады екен. Дегенмен жас маман әу баста ақауын табуға ниеттініп, 5 смартфонды істен шығарып, иелеріне жаңа телефон алып беруге мәжбүр болған. Тәжірибесі тоғысып, шаһардағы үздік маман болған Қыдырбек ең алғашқы қызметін тебіреніспен еске алады.8 жыл ішінде 15 мыңнан аса телефонды қалыпқа келтірген маманнан смартфон таңдауда нені аңғарған жөн деп сұрау салдық. Ойланбастан ең әуелі бөлшегі табылатын телефон ұстауға кеңес берді. «Телефон дегеніңіз автокөлік секілді. Бөлшегі табылса іске асады, табылмаса қоқыс жәшігіне тастауға тура келеді. Мейлінше &nbsp;іphone, samsung, huawei-ден артығы жоқ. Мысалы, қазір заманына қарай телефон модельдері көбейді. Lenova, pocophone, realmi, redmi сынды смартфондар қызу сатылымда. Бірақ аталған маркалардан ақау шықса, жөндетуге әуре болмаған жөн. Өйткені нарықта бөлшектері жоқ. Сондықтан телефон таңдауда мұқият болған жөн» деп кеңес берді ол.Әңгіме барысында Қыдырбектің қызметі де қызып барады. Келушілер қатары көп, қалың топтың арасынан сұрағымызға да жауап беріп үлгеруде. Диалог арасында &nbsp;ең жиі бұзылатын смартфонды сұрап алдық. «Менің пайымдауымша ең жиі бұзылатын – samsung. Өйткені осы уақытқа дейін 15 мыңнан аса телефонды жөндеуден өткіздім. Соның тең жартысынан көбі – samsung. Бірақ samsung-тың бөлшегі көп. Кез келген механизміне бөлшек табылады. Әйтеуір іске асады. Ал іphone-да айклауд деген мәселе бар. Егер блокқа түссе, жаңа телефон сатып алуға тура келеді.Істен шыға қоймайтын huawei-дың өз кемшілігі бар. 2020 жылдан бастап huawei &nbsp;play market-пен келісім шартын тоқтатып, мәзірін әлсіретіп алды. Жалпы телефонның ең жиі істен шығатын бөлшегі – экран, платасы, телефон қуаттайтын бөлшегі. Ең қымбат экран samsung S 20-қа тиесілі. Экранның құны – 195 мың теңге. Оған ауыстыру қызметін қосыңыз. Міне телефонның осындай құдіреті бар», – деп жауап қатты.Қыдырбек қызметінен ләззат алады. Өзінің білгенін өзгеге үйреткісі келетінін әңгімесінен байқадық.&nbsp;<blockquote>«Бізде техникалық колледждердің түр-түрі бар. Бірақ сол оқу орындарында ұялы телефон жөндеуге машықтайтын маман мен мамандық жоқ. Бұл да кәсіптің бір түрі. Үйренген, білген адам жерде қалмасы анық. Өйткені бір отбасының өзінде 5-6 смарфон бар. Қызылорда қаласында 350 мың тұрғын тұрса, соның 300 мыңы ұялы телефонды пайдаланады. Соның тең жартысы бұзылады емес пе?! Оған «Жайна» мен «Отырар» сауда үйіндегі 30 маман жеткіліксіз. Білікті ұсталар қатарға қосылса қызмет те артады. Бәсекелістік артады. Мысалы, өзімде үйреткім келеді. Қажетті құрал жабдықтардың барлығы бар. Сол себепті оқу орындарына осындай ұсынысым бар», – дейді білікті маман.</blockquote>

Қызылордалық жас ұялы телефон жөндейді

<a href="https://kyzylorda-news.kz/ru">Kyzylorda-news.kz.</a> Шетелде білім алу, тәжірибе жинақтау жастар үшін үлкен мүмкіндік екені рас. Оңтүстік Кореядағы Кангнам университетінде білім алған &nbsp;Іңкәр Халиқызы да шетел асып, жаңа дүниелерді білудің пайдасы мол екенін айтады. &nbsp;Білімді бойжеткен бізге &nbsp;«таңғы шық еліндегі» жаңа мүмкіндіктер жайлы айтып берген еді.Минусты плюске айналдыру жолы‒ Бастапқыда кәріс тілін анамның &nbsp;ұсынысы бойынша үйрендім. Мектеп қабырғасында сыныптастарым шеттілін жетік білетін, соларға қызығып жаңа тілді &nbsp;үйренгім келді, алайда ағылшын курсының оқу ақысы қымбат екен. Қаржының біріне жетсе келесі біріне жетпейтін аз кезі. Анама «менде басқа тілді үйреніп, аудармашы болғым келеді» деген тілегімді айтқанымда, іздестіріп жүріп, тегін оқытатын кәріс тілінің курсын тауып берді. &nbsp;Менің бұл мүмкіндікке қалай қуанғанымды білсеңіз ғой?! Уақыт өте келе Кореяда білім алсам деген ой да қылаң берді.Қорқыт ата атындағы ҚМУ-ға оқуға түскен сәттен бастап Кореяда білім алуға талпындым. Бірінші курсымда қайта-қайта халықаралық қатынастар бөліміне барып шетелге қалай оқуға түсуге болатынын сұрастырып жүрдім. Ондағы оқытушылардың «сен әлі бірінші курс студентісің, әлі төрт тоқсанды оқуың керек» дегеніне амалсыз көндім. Арада тағы бір жыл өтті. Үшінші курсқа өткен кезде жөн сұрап халықаралық қатынастар бөліміне тағы бардым. Бұл жолы оқытушылар отбасылық деңгейімнің шетелге шығуға жетпейтінін алға тартты. Ол кісілерді де түсінуге болады, себебі шетелде оқу мен жатақхана тегін болғанмен ұшақ билеті, виза, медициналық сақтандыру, коммуналдық төлем, ас-ауқат, күнделікті шығынды студенттің ата-анасы қамтамасыз ете алу керек. Ал менде шетелде оқып келетіндей асып-тасып жатқан қаражат болмады. Анам жалғызбасты кісі, оның үстіне балабақшада жұмыс істейді. Ай сайын алатын жалақысы мені Кореяға жіберуге жетпейтіні белгілі еді. Сондықтан менің &nbsp;шекара асуым мүмкін емес дүниеге айналды. Соңында жағдайдың бәрі қаржыға келіп тірелгеніне қатты қиналдым, бірақ қалайда Кореяда білім алатыныма &nbsp;сендім. Сол үшін қалада алғаш рет Шеф аспаздық өнер студиясын аштым, оған қоса корей тілін үйренуді жалғастырдым. Алған бетімнен қайтпай тағы да құжат тапсыруға барғанымда жеке кәсібім бар екенін айтып, шетелде жүріп өз-өзімді қамтамасыз ете алтынымды дәлелдедім. Содан кейін ғана &nbsp;университет мұғалімдері маған сенім артып, академиялық &nbsp;ұтқырлық бағдарламасымен грант иегері &nbsp;атанғанымды сүйіншіледі. Негізі Кореяда оқу ақысы бір тоқсанға − бір жарым миллион теңге. Бір курста студент екі тоқсан оқиды деп есептесек, жылдық төлемақы үш миллион теңгені құрайды.Университет ұсынған мүмкіндіктер− &nbsp; &nbsp;Тағы бір қызық жағдай, университет тауда орналасқан, әрі &nbsp;студенттер қалашығында жастарға барлық мүмкіндік қарастырылған. Бастапқыда лекцияны толық түсіну үшін бір жылды тілдік курсқа арнауға тура келді. Кәріс тілінің тарихы қытай тілінен бастау алады, сондықтан сатылай оқып, тереңдеген сайын қиындай береді екен. Мен бір жылда &nbsp;кәріс тілінің үш деңгейін бітіріп, арнайы &nbsp;сертификат алдым.Университеттің ең жақсы тұсы, айына &nbsp;бір рет арнайы сабақ ретінде Кореяның танымал аудандарын аралатады немесе кәрістің дәстүрлі тарихи орындарын таныстырады. Әрі оқу орнында студенттер пәнді, сабақ уақытын өзі таңдай алады. Сабақты таңғы сағат 9.00-ден кешкі 22.50-ге дейінгі аралықта ыңғайлы етіп орналастыруға мүмкіндігі бар. Мысалы, менің мамандығым кәріс &nbsp;және ағылшын тілі &nbsp;пәнінің мұғалімі болса да, негізгі мақсатым бизнес саласын оқу еді. Арнайы міндетті пәндерден бөлек, гольф, атқа міну, дизайн тәрізді салаларды таңдауға болатынын білген соң, бизнес-стартап бағытын да оқимын деп шештім. Себебі қосымша пәннің бәрі есептеліп, дипломға жазылады.Кәріс студенттер ата-анасына салмақ салмайды‒ Бірнеше айдан соң Кореядағы таныс құрбым пицца дайындайтын орталыққа жұмысқа шақырды. Өз-өзімді күнделікті қаражатпен қамтамасыз ету үшін барынша жақсы жұмыс істеуге тырыстым. Ол жерде менімен бірге төрт қазақ қызы қызмет етеді. Аптасына үш күн жұмысқа барамын, себебі шетелдік жастардың жұмыс уақыты күніне бес, аптасына он алты сағаттан аспау керек. Маған Кореяда ерекше &nbsp;ұнаған бір жағдайды айта кетейін, ол жақта кез келген жұмыс орны студенттерді қызметке қабылдай береді, бірақ алдымен сабақ графигі сұралады. Ал біздің елде университет таңғы сегізден кешкі алтыға дейін сабақ кестесін бекітеді де, студент тек сабақ үшін жүгіреді. Егер студент ақылы оқитын болса оқуының ақшасын қалай төлейді? Ал Кореяда студенттер ата-анасына салмақ салмай өзін-өзі оқумен де, жұмыспен де қамтамасыз ете алады. Маған әлеуметтік желі арқылы ҰБТ-дан төмен балл жинап, білім грантын ала алмаған жастар жиі хат жазады. Оларды дипломы жоқ болған соң еш жерге жұмысқа алмайды, сондықтан жастар ақылы оқуға тәуекел етпейді. Сырттай бақыласаң, біздің елдің студенттері не оқу орны, не жұмыстағы басшы түсінбейтін кезеңде тұр. Сол үшін алдағы уақытта Қызылорда қаласында &nbsp;пицца орталығын ашсам, тек студенттерді ғана жұмысқа аламын деп шештім.Қымыздан да сабын дайындалады‒ Бос уақыт аз болған соң кәрістер жұмыс, сабақ кестесін алдын-ала бір айға жоспарлап қояды. Сондай-ақ бәрі кітап оқығанды жақсы көреді. Университете шетелдік жастарға &nbsp;арналған Friends &nbsp;деген үйірме клубы ашылған. Ол жерде өзге елден келген студенттер кәрістің ерікті жастарымен бірге сабын, иіссу, экосөмке, былғары сағат, сусабын т.б заттардың &nbsp;жасалу жолын тегін үйренеді. Мысалы, мен макколи деп аталатын күріш суынан сабынның қалай жасалатынын, әрі макколидің орнына қымызды пайдалануға &nbsp;болатынын білдім. Алдағы уақытта ШЕФ студиясына келген балаларға қымыздан сабын жасау жолын үйрететін боламын.«Құлаққа балауыз шамын құюға бола ма?»‒ Кореяда медициналық қызмет көрсету бағасы өте қымбат. Бірде құлағыма аздап салқын тиген соң, емханаға барып тексерілдім. Сол кезде диагностикалық кеңес берілгені үшін 35 000 теңге төлем жасағаным бар. Бірақ кейін бұл шығын медициналық сақтандыру есебінен алынып, қаржы өзіме қайтарылды. Сондықтан жастар шетелге шықпас бұрын медициналық сақтандыруды ескергені жөн.Жалпы кәрістер – өте сенгіш халық. Осы орайда Кореяда орын алған келесідей қызық жағдай есіме түсіп отыр. Жақында ғаламторда «құлақты тазалаған кезде балауыз шамын ерітіп құйса толық залалсызданады» деген ақпарат тарады. Соған сеніп, үй жағдайында қайталаған кәріс тұрғындары ауруханадан бір-ақ шықты. Ал жалған ақпартты &nbsp;бесінші сыныптың оқушысы парақшасына ермек үшін жаза салған екен.

Жерлесіміз Кореяда білім алды

<a href="https://kyzylorda-news.kz/ru">Kyzylorda-news.kz.</a> Маркетинг дәуіріне көшкелі жаңа мамандықтар сұранысқа ие бола бастады. Яғни біз бұрын назар аудармаған SMM, таргетолог, дизайнер, копирайтерлер арасында бәсекелестік болуы да заңды дүние. Бизнес саласында жүргендердің сатылымын бір ғана батырмамен миллионға жеткізіп жүрген қызылордалық Ақбөпе Мұсатаева – таңдаулы таргетолог. Өз мамандығының қыр-сырымен бөлісіп, шәкірттерін осы салада шыңдап жүрген тәжірибелі маманмен жақында сұқбаттасқан едік.– Ақбөпе Дүйсенханқызы, инфобизнес десе үрке қарайтындар көп. Бұл мамандыққа қалай қадам бастыңыз?– Өзім &nbsp;Жаңақорған ауданы Жайылма ауылында дүниеге келдім. Мектепте 9-сыныпты бітірген соң, Шымкент қаласындағы Авиценна колледжіне оқуға түсіп, мейірбике ретінде кәсіби білімімді жалғастырдым. Оны да жақсы деңгейде аяқтадым. Тұрмысқа шыққанша дәріханада 40 мың теңге жалақыға жұмыс істеп жүретінмін. Бірнеше жыл бұрын болса да, ол кезде айлығым жолым мен тамағымнан артылмайтын.Кейін тұрмысқа шығып, балалы болдым. Үйде отырып немен айналысуға болады деген ой келді. Қандай жұмыс істеймін? Қолымнан не келеді? Үйде отырып ақша табуға болатын жаңа мамандықтарды зерттей бастадым. Жеке кәсіп бастау туралы да ой келді. Ниша таңдаудан біраз қиындықтар болды. Содан инстаграм арқылы жоба сатып алдым. Сол жобаның серіктесі атанып, дайын курсты сату арқылы табыс таба бастадым. Алғашқы клиенттер өзімнің достарым, туыстарым болды. Уақыт өте тұтынушы таусыла бастады. Блогерлерге жарнама беріп көрдім, бірақ нәтиже болмады. Сол кезде алғаш рет таргет жарнамасымен &nbsp;танысып, оны инстаграм арқылы «продвигать» батырмасы арқылы жіберген болатынмын. Нәтижесі жақсы болды. Осылайша таргеттің пайдасын және ол арқылы табыстың қанша есе артатынын түсіндім, толықтай осы мамандыққа ауыстым. Нақты бір сарапшыны білмегендіктен, түрлі онлайн жоба, курсты сатып алып, соларды оқу арқылы таргет жарнамасын үйрендім.– Жеке кәсіпте сұраныстың артуы таргетке қаншалықты тәуелді?– Пандемия кезінде барлық кәсіп үйге дейін жеткізіп беру, қашықтан онлайн қызмет көрсетуге бейімделіп үлгерді. Ал кез-келген онлайн бизнес иесі таргет жарнамасын қолданады. Кәсіпкер ретінде оны қолданбау қателік сияқты. Себебі өзім бірге жұмыс істейтін жобаларда таргет қолданатындардың саудасы ең кемі 2 есе алға жылжуда. Кез-келген тұрақты клиенті бар, жақсы жүріп тұрған кәсіп иелері де таргетке жүгініп жатады. Демек, жарнаманың пайдасы көп.– Осы мамандықтың қыр-сырын айтып өтсеңіз…– Таргет жарнамасы алғаш 2015 жылдың соңында инстаграм желісіне жаңа функция ретінде қосылған еді. Басында көбі түсінбегенмен әлеуметтік желі кәсіпкер мен кәсіптің бет-бейнесін қалыптас¬тыратын ғып, өзін ұсынатын алаңға айналғанда таргетке сұраныс артып, тұтынушыны көбейтіп, табысты арттырудың тиімді құралы болып үлгерді.Тәжірибелі маман ретінде өзіме таргет жарнамасы үшін сұраныс көп. Инстаграм желісінде 92000 оқырманым бар. Күніне кем дегенде түрлі бизнес иесінен 10 жарнама келеді, солардың ішінен таңдап, 5 жарнаманы шығарамын. Бұл мамандық қазір қазақ қоғамында кеңінен қанат жайғанын мойындау керек. Сонымен бірге таргетолог мамандығы – жастарға, үйде отырған аналарға, жұмыссыз адамға керемет мүм¬кіндік. Себебі беделді кәсіпкерлердің өзі таргет жарнамасын шығара алмай, таргетологқа жүгінеді.Жоғарыда айтып өткенімдей, мейірбике болып алатын 40 000 теңге жалақымды қазір күніне тауып жүрмін. «Бизнес set» және «Cosmos» жобалары бойынша біраз қазақты таргет арқылы табыс табуға үйреттім. 3 айда жасап жатқан жобалардың сертификатталған миллионері атанып, қазір шәкірттерімнің өзі бұрынғы жылдық табысын бір айда шығарып алуда. Бұл – мен үшін үлкен қуаныш.– Мамандықтар жойылып, жаңасы пайда болып жатады. Таргет «қашанға дейін өмір сүреді» деп ойлайсыз?– Қолданыстан қашан шығатынын білмеймін. Бірақ әзірге кәсіпкерлер мен қоғамдық маңызы бар орындар үшін басты қажеттіліктің бірі. Меніңше, таргет жарнамасы қажетсіз болып қалмайды, тек өзге бағытқа өзгеріп, жаңа функциялар, әдіс-тәсілдер енуі мүмкін. Әрине, ешқандай мамандықты тон пішіп, осынша уақыт қана өзекті болып, қажеттілердің қатарында болады дей алмаймыз. Себебі кезінде бір ғана техника шыққанға дейін қаншама адам қарапайым қарды қатырып, мұздатқыш ретінде қолданды ғой. Азық-түлікті мұздатып тұру қызметі үшін мұз тасушы, оны қатырып беруші мыңдаған адам бір ғана тоңазытқыш пайда болған уақытта жұмыссыз қалып кетті. Сондықтан таргет жайлы нақты кесіп-пішіп айта алмаймын. Мүмкін, оның орнын басқа техникалар басатын шығар. Мүмкін, таргет жаңа деңгейге көтерілетін болар. Оны алдағы бесжылдықта білетін боламыз.

Жерлесіміз таргетолог саласының қыр-сырымен бөлісті

<a href="https://kyzylorda-news.kz/ru">Kyzylorda-news.kz.</a>&nbsp; &nbsp;Медициналық қызмет түрленінің арасынан тіс дәрігерінің еңбегі ерекше. Жаныңа батқан сәтте емін іздеуге кірісетін тіс мамандарының қызметі бүгінде сұранысқа сай. Рас, дәрігер – адам өмірінің арашашысы. Жаны қиналып, дертіне дауа іздеген адамға бұл кісінің құтқарушыдай көрінетіні анық. Міне, осындай сан мыңдаған адамның құтқарушысына айналған ақ халатты абзал жанның бірі, стоматолог дәрігер – Еламан Қазиев. Ол 7 жылдан аса тіс дәрігері болып халқына қалтқысыз қызмет етуде.Еламан бұл салаға кездейсоқ келмеген. Нағашысы Махмұд Есенгелдиев бозбаланың медицинаға икемі барын байқап, ата-анасынан рұқсат алып, клиникасына көмекші етіпті. Бұл, бір жағынан, Еламанға өндірістік тәжірибе болса, бір жағынан, мамандығын айқындауға сеп болған көрінеді.<blockquote>– Ата-анам құрылыс саласының мамандары. Әу басында құрылысқа қадам бассам қалай болады деген сауал болды. Әке жолын қуып, құрылысшылар династиясын жалғастырғым-ақ келді. Дегенмен өсе келе ойым өзгерді. Нағашым – тіс маманы. Азды-көпті қасында жүріп, стоматологтың қоғамға қажеттілігі зор екенін ұғып, Қызылорда медициналық жоғары колледжіне оқуға түстім. Оқуды бітірісімен еңбек жолымды тіс емханасында көмекші қызметінен бастадым. Жұмыстың арасында Отан алдындағы борышымды да өтеп келдім.</blockquote>7 жылдан аса уақыт ол осы салада тер төгіп, дертіне шипа іздеген сан мыңдаған науқасқа қол ұшын берді. Көпшіліктің ыстық ықыласына бөленген Еламан дәрігер науқастың тілін табу оңай шаруа емес екенін айтады. Білікті маман әр адамға ерекше мейіріммен қарап, емінің шипалы болуына бар күш жігерін салады.<blockquote>– Осы салада жүрген соң бір жағынан психолог болдық. Олай дейтінім тісі сыздап келген адам ашушаң келеді. Оны емдемес бұрын жағдайын сұрап, көңілін аулаймыз. Сонымен қатар науқас дәрігердің ем-домына емес, қабағына, мейірімі мен жан жылуына мұқтаж. Қабағыңнан қар жауып тұрса, емдеген науқасыңа ем қонып, тез арада жазылып кетеді деу – бекершілік. Сондықтан бірінші кезекте дәрігер мейірімді болғаны абзал. Сырқаттанған адамға жаны ашып тұрған дәрігер – мықты маман. Ондай дәрігердің емі де тез қонады. Қолы шипалы тұлға, адамдардың сеніміне де ие болады. Сондай-ақ біздегінің бір жаманы аурудың алдын алмаймыз. Тіс құрдымға кеткен кезде ғана стомед жағалайтынымыз жасырын емес. Сол себепті тіске де мұқият болғанымыз абзал.</blockquote>Әр науқасқа асқан ептілікпен ем жасайтын кейіпкеріміз әңгіме барысында қажетті кеңестерін де ұсынды.<blockquote>– Үй жағдайында тісті ағарту кезінде абай болу қажет. Себебі тіс эмалін жұқартып алуыңыз мүмкін. Ағарту құрылғысын айына бір рет, ас содасын аптасына бір рет қана қолданған жөн. Ағарту рәсімін жасаған соң, 48 сағат өткенше кофе ішуге, темекі тартуға және бояуы бар сусындар мен азық-түлік қолдануға болмайды. Тісті табиғи жолмен ағарту үшін қышқылы мол жеміс-жидек (ананас, алма, алмұрт, құлпынай) жеу керек.</blockquote>Сонымен қатар қанты бар кофені аз-аздап ұзақ уақыт бойы ішу тіс эмалін жылдам құртады. Кофені қантсыз ішу немесе қантпен жылдам ішіп қою керек. Содан соң міндетті түрде тісті жуыңыз.Мамандықты дұрыс таңдай білген адам жемісті болары сөзсіз. Жемісті еңбек етіп жүрген Еламанның әлі де науқастар үшін тигізер көмегі көп. Қысқасы, бүгінгі кейіпкеріміз кісінің құлан таза айығып кетуіне ешқашан бей-жай қарамайды.

Стоматолог дәрігері сұранысқа сай

<a href="https://kyzylorda-news.kz/">Kyzylorda-news.kz.</a>&nbsp; Сыбайлас жемқорлық – қоғам дерті. Оның алдын алу мақсатында Сырдария ауданында түрлі іс-шаралар, жиындар, акциялар, түсіндірме жұмыстары ұдайы жүргізіліп келеді.Осы ретте, 2023 жылдың 22 маусымында Cырдария аудандық емхана қызметкерлерімен түсіндірме жұмыстары жүргізілді. Жиын «Сыбайлас жемқорлықты болдырмау шаралары және оның алдын алу» деген тақырыпты арқау етті. Кездесуге арнайы мамандар және аудандық емхана қызметкерлері қатысты. Түсіндірме жұмыстарын аудандық қоғамдық даму бөлімінің бас маманы Т.Нұрмағанбетов жүргізді.Аудандық қоғамдық даму бөлімінің бас маманы жиында сыбайлас жемқорлықты болдырмау шаралары және оны алдын алу тақырыбына кеңінен тоқталып өтті. Сондай-ақ, сыбайлас жемқорлық көріністеріне бармау, жол бермеу керектігі жөнінде айтылды. Егер осындай оқиғаға тап болған жағдайда қандай әрекетке бару қажеттігі де сөз етілді.Қатысушылар өз сұрақтарын қойып, тиісті жауап алды. Сала маманы осы бағыттағы жұмыстар алдағы уақыттарда да өз жалғасын табатынын айтты.Сыбайлас жемқорлық – қоғамның ең басты қауіп-қатерлерінің бірі. Бұл кесел мемлекет пен қоғамның тұрақтылығына, ел экономикасының ілгерілеуіне үлкен кедергі келтіріп отыр. Десек те, осындай келеңсіз құбылыстармен күрес жүргізу тек сот, құқық қорғау және басқа да мемлекеттік органдардың міндеті емес, әр азаматтың парызы екенін естен шығармаған абзал. &nbsp;

Сырдариялық дәрігерлер сыбайлас жемқорлық мәселесін талқылады

<a href="https://kyzylorda-news.kz/">Kyzylorda-news.kz.</a>&nbsp; Аудан әкімі Берік Сәрменбаевтың төрағалығымен сыбайлас жемқорлыққа қарсы іс-қимыл мәселелері жөніндегі аудандық комиссия отырысы өткізілген болатын.Жиынға аудандық мәслихаттың төрағасы Ержан Әжікенов, аудан прокуроры Асқар Кемалов, аудандық полиция бөлімі бастығының міндетін атқарушы Азамат Оспанов және комиссия мүшелері, жергілікті бюджеттен қаржыландырылатын атқарушы мекемелердің басшылары қатысты.&nbsp;Комиссия отырысында аудандық құрылыс, сәулет және қала құрылысы бөлімі басшысының міндетін атқарушы Сабит Аймаханов «Аудандық құрылыс, сәулет және қала құрылысы бөлімімен сыбайлас жемқорлық сипатындағы заң бұзушылықтарды болдырмау және алдын алу бағытында қабылданған шаралар туралы» баяндамасы мен аудандық қоғамдық даму бөлімінің басшысы Бейбіт Смайлов «Сыбайлас жемқорлыққа қарсы мәдениетті қалыптастыру мақсатында мемлекеттік әлеуметтік тапсырыс аясында 2022 жылы және 2023 жылдың есепті мерзімінде әлеуметтік жобалардың іске асырылуы туралы» баяндамасы тыңдалды.&nbsp;Аудандық құрылыс, сәулет және қала құрылысы бөлімі тарапынан биылғы жылы жалпы құны 2,4 млрд.теңгеге 11 жобаның құрылысы іске асырылады. Оның ішінде, 2,1 млрд.теңгеге 8 жобаның құрылыс жұмыстары жүргізілуде, қалған 246 млн.теңгенің 3 жобасына облыстық мемлекеттік сатып алу басқармасы арқылы мемлекеттік сатып алу жұмыстары жүргізілуде. Бөлім тарапынан 5 мемлекеттік қызмет көрсетіледі. 2023 жылдың 5-айында 418 қызмет көрсетілген. Аталған бөлім ғимаратында «Өзіне-өзі қызмет ету бұрышы» орнатылған. Ал аудандық қоғамдық даму бөлімі арқылы 2022 жылы жергілікті бюджеттен «Қоғамдық санада сыбайлас жемқорлықтың көріністеріне жол бермеуді қалыптастыру» әлеуметтік жобасы жүзеге асырылды. Қаржысы 700,0 мың теңге. Жоба бойынша «Сырдария-Нұрдария» қоғамдық қоры жыл көлемінде профилактикалық шараларды жүргізген.Жоба аясында 14 кездесу, 4 акция, 5 қоғамдық қабылдау, 1 байқау, 10 мақала, 100 әдестемелік нұсқаулық таратылды. 2000-ға жуық адам қамтылған.Биылғы жылы, облыс әкімдігі жанындағы сыбайлас жемқорлыққа қарсы іс-қимыл мәселелері жөніндегі комиссия отырысының хаттамалық тапсырмасына сәйкес сыбайлас жемқорлыққа қарсы мәдениетті қалыптастыру саласындағы әлеуметтік жобаның қаржысы қайта қаралып, аудандағы жалпы жобалардың қаржысының 5 пайызына дейін ұлғайтылды. Қазіргі таңда, жергілікті бюджеттен бұл бағыттағы жұмыстарға 3 млн.теңге қаржы қаралып отыр. Жобаның техникалық ерекшелігіне ҚР Үкіметінің 2021 жылғы 31 мамырдағы №358 қаулысының №4 Үлгілік базалық бағытының «Сыбайлас жемқорлыққа қарсы мәдениетті нығайту» жобалар тобының іс-шаралары бойынша жасақталған. Мәжілісті қорытындылаған аудан әкімі Берік Әбдіғаппарұлы комиссия отырысының қорытындысымен бірқатар бөлім және тиісті мекеме басшыларына нақты тапсырмалар берді. &nbsp;

Сыдарияда қоғамдық қор сыбайлас жемқорлықпен күрес жүргізуде

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарат Тоқаев ауылдық аумақтарын дамытудың 2023-2027 жылдарға арналған тұжырымдамасы туралы жарлықты қабылдады. «Мен сайлауалды сөздерімде ауылды өркендету ісіне баса назар аудардым. Бүгінде Қазақстан халқының 40 пайызға жуығы ауылда тұрады. «Ауыл – ел бесігі» деп халқымыз бекер айтқан жоқ. Сондықтан, ауылдағы жағдайды жақсарта алмасақ – бәрімізге сын. Сол үшін мен бүгін ауылды дамыту мәселесі туралы жарлыққа қол қоямын», - деді президент.&nbsp;Осы орайда Арал ауданы, Қамыстыбас ауылында «Арал әйелдері» қоғамдық бірлестігі «Менің дамыған ауылым» атты жобаны жүзеге асыруда.&nbsp;Жобаның негізгі мақсаты - «Қамыстыбас» ауылындағы жергілікті өзін-өзі басқарудағы халықтың рөлін арттыру, ауыл тұрғындарының өмір сүру деңгейін көтеру үшін жергілікті маңызы бар мәселелерді сапалы шешуге тұрғындардың қатысуы арқылы дамыту.&nbsp; Жобаның ауылдағы негізгі серіктесі Қамыстыбас ауылдық округінің әкімдігі болып табылады. Жобаның негізгі шаралмары мен қадамдары ауылдың даму жоспарымен негізделіп, әкімдіктің қолдауымен жүзеге асырылуда.&nbsp;<blockquote>&nbsp;Жоба аясында «Арал әйелдері» қоғамдық бірлестігі және Ауыл әкімдігінің ұйымдастыруымен ауылдағы тозығы жетіп тұрған балалар алаңы жөндеуден өткізілді. Жөндеуге бөлінген жеті жүз мың теңге қаражаттың аздығына байланысты ауыл әкімдігінің ұйымдастыруымен қол күші жұмылдырылып, балалар алаңы қайта балалардың демалыс орнына айналды, - дейді «Арал әйелдері» қоғамдық бірлестігінің төрайымы Бақытжамал Жүгінісова. &nbsp;</blockquote>Сонымен қатар, жоба барысында ауыл тұрғындарына бизнес-бастауға 7 шағын грант беріліп, «Бизнес негіздері» тақырыбында оқыту тренинг жүргізілді. Жоба командасы әрі қарай да осы жобалардың табыстылығын арттыру мақсатында қолдау көрсетуде.&nbsp; Жобаны Евразия қоры жүзеге асыратын, АҚШ-тың даму агентігі (USAID) қаржыландыратын Орталық Азиядағы Әлеуметтік Инновациялар бағдарламасының қолдауымен «Арал әйелдері» қоғамдық бірлестігі жүзеге асыруда.<figure class="image"><img src="https://knadmin.beoblood.kz/uploads/af3ac1dd_b74d_4382_b04e_498f643372dc_4c53ebb8c0.jpg" alt="af3ac1dd-b74d-4382-b04e-498f643372dc.jpg"></figure>

Аралда балалар ойын алаңы жаңғыртылды

<a href="https://kyzylorda-news.kz/">Kyzylorda-news.kz.</a> Осы жылдың бес айында Қызылорда облыстық мемлекеттік сатып алу басқармасы 2763 конкурс жариялаған. Сәйкесінше, бүгінде жарияланған конкурстардың 82 проценті аяқталды. Бұл туралы Өңірлік коммуникациялар қызметінің ақпараттық алаңында өткен брифингте облыстық мемлекеттік сатып алу басқармасының басшысы Бауыржан Шаменов мәлімдеді.&nbsp;Бес айда атқарылған жұмыстарға тоқталған басқарма басшысы п - мемлекеттік сатып алу рәсімдерін және қолданыстағы заңнама талаптарын түсіндіру бойынша басқарма қызметкерлерімен онлайн форматта әлеуметтік желі қолданушыларын ақпараттандыру шаралары жүйелі түрде жүргізіліп отыроғандығын тілге тиек етті. Сонымен қатар, басқарма заң нормаларын қолдану тәжірибесінен жинақтаған ақпараттарға талдау жасап, осы мемлекеттік сатып рәсімдерін оңтайландыру мақсатында саладағы уәкілетті органға, яғни, Қаржы министрлігіне өз ұсыныстарын үнемі жолдап отырады.&nbsp;<blockquote>«Мәселен, осы жылдың 5 айында басқарма тарапынан 13 ұсыныс жолданды», – дейді Бауыржан Серікұлы.&nbsp;</blockquote>Айта кетейік, мемлекеттік сатып алу веб-порталында жергілікті атқарушы органдарға бағынысты 1041 тапсырыс беруші тіркелген.

Қызылордада мемлекеттік сатып алу бойынша жарияланған конкурстардың 82 пайызы аяқталды

<a href="https://kyzylorda-news.kz/">Kyzylorda-news.kz.</a> Қызылорда қаласына қарасты елді мекендерде ауыз су жүйесіне байланысты ақау орын алған болатын. Қазіргі таңда арнайы топ құрылып, жөндеу жұмыстарын жүргізуде. Бұл туралы Өңірлік коммуникациялар қызметінде өткен брифингте облыстық энергетика және тұрғын үй-коммуналдық шаруашылық басқармасы басшысының міндетін атқарушы Ерлан Жоламанов хабарлады.<blockquote>«Орын алған ақаулықты анықтай келе, насос станциясында орналасқан 3 ұңғыманың екеуі істен шыққаны белгілі болды. Осылайша таза су лайланған. Қазіргі таңда Ақсуат ауылдық округінің тұрғындарына Маханбет және Наурыз елді мекендерінде орналасқан ұңғымалардан ауыз су берілуде. Қазіргі таңда 2 авариялық топ қайта қалпына келтіру жұмыстарын жүргізуде. Ақау орын алған ұңғыманың жалпы тереңдігі - 420 метр болса, қазір оның 380 метрі тазаланды», - деді Ерлан Жоламанов.</blockquote>Ақсуат ауылында істен шыққан екі ұңғымаға тазалық жұмыстары жүргізіліп жатыр.<blockquote>«Су ұңғымаларында пайда болған техникалық ақаулықты ретке келтіру жұмыстары жалғасып жатыр. Қазіргі таңда Ақсуат ауылдық окугіндегі тұрғындарға үшінші ұңғымадан ауыз су берілуде. Ал істен шыққан 2 ұңғымаға тазалық жұмыстары жүргізіліп, қайта қалпына келтірілуде», - деді «Нұра» топтық су құбыры ШЖҚ РМК филиалы директорының топтық су құбырлары бойынша орынбасары Ержан Әмиша.</blockquote>

Қазақстан және Қызылорда облысының жаңалықтары