<a href="https://kyzylorda-news.kz/">Kyzylorda-news.kz</a> Жыл бойы толымды тірліктермен көш бастаған Арал ауданы жыл соңында тоғай табыстармен қорытындыламақ. Жуырда&nbsp;Арал ауданы жұртшылығы&nbsp;тағы бір&nbsp;қуанышқа кенелді. Ауданда экономикалық маңызы бар жол бойы сервистік қызмет көрсету орталығы мен бірқатар елдімекен халқы ауызсуға қол жеткізді.Мемлекет басшысының «Қуатты өңірлер – қуатты ел» қағидаты ел дамуының негізгі күшіне айналып келеді. Бұл бағытта өңірде жол бойы сервистік қызмет көосету орталықтарының құрылысына басымдық беріліп келеді. Бұған дейін Жаңақорған сынды бірқатар ауданның үлкен трассасы бойында ашылған нысан, жыл соңында Арал ауданында да бой көтеріп отыр.«Батыс Еуропа – Батыс Қытай» халықаралық автомобиль дәлізінің бойындағы жол сервисті дамыту үшін автокөлікке газ құю компрессорлық станциялары бар көпфункционалды кешендер салынуда. Оған «Qazaq Oil», «Compass», «Алаш Метан», «Dom» сияқты компаниялар тартылып, жобалар кезең-кезеңімен іске асырылып келеді. Жақында тағы екі заманауи газ құю станциясы пайдалануға беріледі деп жоспарланған. Мемлекет басшысы Қасым-Жомарт Кемелұлының биылғы Жолдауында «Кіші Аралды» сақтап қалу және «СексеуілБейнеу» бағытындағы автомобиль жолы құрылысын жеделдетіп бастауды тапсырған болатын. Мұндай ауқымды жобалар тек ауданның емес аймақтың да экономикалық әлеуетін арттыра түспек. Жалпы бүгінгі таңда «Батыс Еуропа – Батыс Қытай» халықаралық автомобиль дәлізінің бойында облыс көлемінде 55 жол бойы сервистік кешені жұмыс істейді екен. Ал Арал ауданындағы «PetroRetail» серіктестігінің В санатты кешені 2 миллиард теңгеге салынған. Инвестициялық жоба аясында заманауи талаптарға сай келетін 31 орындық қонақүй бой көтеріп, 20 келушіге қызмет көрсететін қоғамдық тамақтану орны іске қосылған. &nbsp;Жаңа нысанның бой көтеруі ауданның жұмыссыздық мәселесін шешуге де аз да болса үлесін тигізбек. Жол бойы қызмет көрсету орталығында қазір 20 адам тұрақты жұмыспен қамтылған.Ауданға қарасты алыс орналасқан ауылдардағы көптен бері түйіні тарқамаған мәселелерде ақырындап оң шешім тауып келеді. Елімізде шалғай ауылдардың инфрақұрылымын дамыту, ең алдымен сапалы сумен, жолмен қамтамасыз ету тұрғындардың жайлы өмір сүруіне, тұрмыстық жағдайының жақсаруына оң әсер беруге басымдық беріліп келеді. Бұған Мемлекет басшысының өзі тікелей тапсырма беріп, ел аумағын ауызсумен қамтуды биылдан қалдырмай аяқтауды нықтап айтқан еді. Президент тапсырмасы өңірде толық орындалып, барлық елді мекенге ауызсумен қамтамасыз етілді. Соның бірі – аудандағы Ерімбетжаға және Тоқабай елдімекенінде ауызсу берілді. Мемлекет басшысы 2025 жылы еліміздің барлық аймағын ауызсумен 100 пайыз қамтамасыз ету туралы тапсырмасы аясыгнда облыс аумағында 2022 жылдан бері 14 миллиард теңгенің 60 жобасы қолға алынған. Өткен жылдың қорытындысы бойынша өңір халқын орталықтандырылған ауызсумен қамту деңгейі 98,6 процентке жеткен. Биыл тағы 9 елді мекенге ауызсу жеткізілуде.Осы жылы 8 миллиард 100 миллион теңгеге Арал ауданындағы Абай, Тоқабай, 1 миллиард 45 миллион теңгеге Ерімбетжаға, Тастүбек елді мекендерін ауызсумен қамту жобалары жүзеге асып отыр. Қазір 1 миллиард 166 миллион теңгеге Тастүбек елді мекеніне су жеткізу жұмысы жүргізілуде. Осылайша, өңірдегі барлық елді мекен 100 пайыз орталықтандырылған ауызсумен қамтамасыз етілетін болады. Ауданға қарасты Ерімбетжаға елді мекеніне су жеткізу жобасына 1 022 350 миллиард теңге қаражат жұмсалған. Оның ішінде арнаулы қордан 636 325 миллион теңге бөлінген. Ал тоқабайлық тұрғындар үшін ауызсу мәселесі базыналы еді. Бүгінде ауыл жұртшылығы көптен күткен қуанышты күнге де жетті. Енді ауыл тұрғындары таза ауыз суды пайдаланып, қажетіне жарататын болады.&nbsp;

Аралдағы ауылдарда ауыз су мәселесі шешімін тапты

<a href="https://kyzylorda-news.kz/">Kyzylorda-news.kz</a>&nbsp; Шиелі ауданының әкімі Айтбай Жандарбеков тиісті сала басшыларымен бірге Шиелі ауданында жүзеге асып жатқан ірі инвестициялық жобалардың құрылыс барысымен танысты.<img class="image_resized" style="width:63.42%;" src="https://knadmin.beoblood.kz/uploads/V_Shielijskom_rajone_realizuyutsya_investiczionnye_proekty_1_de8cdcd53a.png" alt="В Шиелийском районе реализуются инвестиционные проекты 1.png">Атап айтқанда, аудан басшысы алдымен «Тесис» ЖШС-ның 40 МВт қуаттылықтағы күн электр станциясы жобасының жүзеге асу алаңына барды. Жоба құны – 11,5 млрд теңге. Бұл – еліміздің «жасыл энергия» бағытындағы ірі бастамаларының бірі саналады. Қазіргі таңда құрылыс жұмыстары толық аяқталып, станцияны іске қосуға дайындық жүргізілуде. Жоба толық іске қосылған жағдайда 10 адам тұрақты жұмыспен қамтылатын болады.Айта кетейік, бұл жобаға инвестиция Қытайдың China Huadian Corporation Ltd компаниясы тарапынан тартылған. Аталған халықаралық корпорация «Тесис» ЖШС-нің 100% құрылтайшысы болып табылады. Бұл өз кезегінде екі ел арасындағы экономикалық әріптестіктің айқын көрінісі.Сонымен қатар, аудан әкімі «Шиелі Әк» ЖШС-ның жаңа жобасымен танысты. Қытайлық инвесторлардың қатысуымен жүзеге асырылатын бұл өндіріс орны жылына 1 млн тонна әк өндіруді көздейді. Аталған жоба еліміздегі ең ірі әк өндіретін зауыттардың бірі болмақ. Жобаның жалпы құны – 20 млрд теңге.Жоба толық жүзеге асқанда 40 адам тұрақты жұмыспен қамтылатын болады. Қазіргі таңда зауыттың іргетасын қалау жұмыстары жүргізілуде. Сонымен қатар, жобаны өңірлік индустриялық картаға енгізу мақсатында тиісті құжаттар әзірленуде.Аудан басшысы жобалардың экономикалық және әлеуметтік маңызына тоқталып, құрылыс сапасы мен уақытылы аяқталуына жауапты мамандарға нақты тапсырмалар жүктеді.

Шиелі ауданының әкімі инвестициялық жобалардың жүзеге асу барысымен танысты

<a href="https://kyzylorda-news.kz/">Kyzylorda-news.kz</a> Шиелі кентіндегі дене шынықтыру-сауықтыру кешенінде 2008–2009 жылы туған жасөспірімдер арасында Түркі әлемінің көсемі, Алаш арысы – Мұстафа Шоқай атындағы қазақ күресінен республикалық турнир өтті.&nbsp;Тарихи тұлғаның есімін ұлықтауға арналған жарысқа еліміздің әр аймағынан келген үздік жас балуандар қатысып, боз кілемде бақ сынауда.<img src="https://knadmin.beoblood.kz/uploads/M_stafa_Sho_aj_atynda_y_respublikaly_turnir_tude_1_c842109722.jpg" alt="Мұстафа Шоқай атындағы республикалық турнир өтуде 1.jpg">Турнирдің ашылу салтанатында аудан әкімінің орынбасары Болатбек Ысмағұлов құттықтау сөз сөйлеп, жас спортшыларға сәттілік тіледі.&nbsp;<blockquote>— “Мұстафа Шоқай — ұлт азаттығы жолында күрескен ұлы тұлға. Оның есімімен аталған бұл турнир жастарды елжандылыққа, табандылыққа, ұлттық рухты биік ұстауға тәрбиелейді,” — деп атап өтті, аудан әкімінің орынбасары өз сөзінде.</blockquote>Сондай-ақ салтанатты шарада Қазақстанның еңбек сіңірген жаттықтырушысы, Абай облысынан келген Шыңғыс Тұрсынов, жарыстың маңыздылығына тоқталып, балуандарға ізгі тілегін жеткізді.Турнир аясында қазақ күресін дамытуға сүбелі үлес қосып жүрген Әлімбай Дәулетов пен Ғалымжан Әлиев ҚР Туризм және спорт министрлігінің “Дене шынықтыру мен спортты дамытуға сіңірген еңбегі үшін” төсбелгісімен марапатталды.Жарыс барысында жас балуандар өз шеберліктерін танытып, әр белдесу тартысты өтуде. Бұл турнир — жастар үшін үлкен тәжірибе мектебі ғана емес, сондай-ақ ел намысын қорғауға деген алғашқы қадам.&nbsp;

Шиелі: Мұстафа Шоқай атындағы республикалық турнир өтті

<a href="https://kyzylorda-news.kz/">Kyzylorda-news.kz</a>&nbsp; Шиелі ауданының әкімі Айтбай Жандарбековтың төрағалығымен мәжіліс өтті. Мәжілісте 2025 жылғы қаңтар–қараша айлары аралығындағы Шиелі ауданының әлеуметтік-экономикалық даму көрсеткіштері мен республикалық бюджеттің атқарылуы жөніндегі қорытындылар қаралды.<img class="image_resized" style="width:80.44%;" src="https://knadmin.beoblood.kz/uploads/Shielijskij_rajon_Obsuzhdeny_aktualnye_voprosy_1_945bfcdb07.png" alt="Шиелийский район Обсуждены актуальные вопросы 1.png">Күн тәртібіндегі мәселе бойынша аудандық экономика және қаржы бөлімінің басшысы Жұмаділ Маратжан баяндама жасап, ауданның негізгі макроэкономикалық көрсеткіштері, өнеркәсіп, ауыл шаруашылығы, құрылыс, инвестиция тарту, шағын және орта бизнес салаларындағы жетістіктер мен шешімін күткен мәселелерге кеңінен тоқталды. Сонымен қатар, бюджеттік түсімдер мен шығыстардың орындалу жайы талқыланды.Аудан әкімі Айтбай Жандарбеков өз сөзінде:<blockquote>— Әлеуметтік-экономикалық даму – аудан халқының әл-ауқатының негізгі көрсеткіші. Сондықтан бұл бағыттағы жұмысты жүйелі түрде бақылауда ұстауымыз қажет. Мемлекет басшысы мен облыс әкімінің тапсырмаларын орындау мақсатында инвестициялық жобаларға қолдау көрсету, жұмыс орындарын арттыру, кіріс көздерін ұлғайту, бюджет қаржысын тиімді игеру мәселелеріне ерекше көңіл бөлуіміз тиіс, — дей келе, аудан әкімі барлық жауапты сала басшыларына аталған міндеттерді мерзімді түрде орындауды және олардың орындалу барысы туралы тұрақты есеп беруді тапсырды.</blockquote>

Шиелі: Әлеуметтік-экономикалық даму мәселелері талқыланды

<a href="https://kyzylorda-news.kz/">Kyzylorda-news.kz</a>&nbsp; Бұдабай Қабылұлы атындағы аудандық мәдениет үйінде «Шиелі жастар форумы–2025» аудан жастарының қорытынды форумы өтті.Жастар форумының ашылуында аудан әкімі Айтбай Жандарбеков сөз сөйлеп, жиынға қатысушыларды маңызды іс-шарамен құттықтады.Өз сөзінде аудан басшысы жастардың ел болашағындағы рөліне ерекше тоқталып, бүгінгі таңда Шиелі ауданында 14 пен 35 жас аралығындағы жастар саны 27 545 адамды, яғни аудан халқының 30,2 пайызын құрайтынын атап өтті. Бұл көрсеткіш жастар саясатын жүйелі түрде жүргізудің маңыздылығын айқындайтынын жеткізді.Аудан әкімі биыл мемлекеттік жастар саясатын іске асыруға жергілікті бюджеттен 46,3 млн теңге бөлінгенін, жыл басынан бері 127 түрлі іс-шара өткізіліп, оған 8 мыңға жуық жас қатысқанын айтты.Сонымен қатар, Мемлекет басшысы Қасым-Жомарт Тоқаевтың бастамасымен 2025 жыл «Жұмысшы мамандықтар жылы» деп жарияланғанын атап өтіп, адал еңбек пен кәсіби шеберлік – ел дамуының негізгі тірегі екенін жеткізді.Жастарды жұмыспен қамту және кәсіпкерлікті дамыту бағытында атқарылған жұмыстарға тоқталған аудан басшысы:– «Бастау-Бизнес» жобасы аясында жастар кәсіпкерлік негіздеріне оқытылып, бірқатар жас азаматтарға қайтарымсыз гранттар берілгенін;– Skills.Enbek платформасы арқылы мыңдаған жас онлайн курстардан өтіп, еңбек нарығына қажетті мамандықтарды таңдауға мүмкіндік алғанын;– жыл басынан бері 1300-ден астам жаңа жұмыс орны құрылғанын атап өтті.<img src="https://knadmin.beoblood.kz/uploads/Shieli_zhastar_forumy_2025_Zhyl_belesi_men_zha_a_bastamalar_1_eb05ab6984.jpg" alt="«Шиелі жастар форумы–2025» Жыл белесі мен жаңа бастамалар 1.jpg">Сондай-ақ, «Жасыл ел», «Дипломмен ауылға», жастар практикасы, қоғамдық жұмыстар секілді бағдарламалардың аудан жастары үшін тиімді жүзеге асырылып жатқанын жеткізді.Аудан әкімі өз сөзінде спорт, өнер мен мәдениет саласында аудан абыройын асқақтатып жүрген дарынды жастарды ерекше мақтанышпен атап өтіп, олардың жетістіктері жас буынға үлгі екенін айтты.Сөз соңында аудан басшысы:<blockquote>«Ел болашағы – жастардың қолында. Әрбір жас терең білім мен адал еңбекті серік етсе, биік белестерді бағындырары сөзсіз», – деп жастарға сәттілік тіледі.</blockquote>Форум барысында қоғамдық өмірге белсене араласып, түрлі салада үздік нәтиже көрсеткен бірқатар аудан жастары Қызылорда облысы әкімінің және аудан әкімінің Алғыс хаттарымен марапатталды.Сондай-ақ, Қызылорда облысының қоғамдық даму басқармасы жанындағы «Жастар ресурстық орталығы» директоры Әліби Басаров сөз сөйлеп, жастарды қолдауға бағытталған облыстық бастамаларға тоқталып, бірқатар жасқа Қызылорда облысының Қоғамдық даму басқармасы басшысының Алғыс хатын табыстады.Форум соңы аудан өнерпаздарының ән мен күйден шашу шашқан мәдени бағдарламасына ұласып, мазмұнды әрі әсерлі түрде қорытындыланды.

«Шиелі жастар форумы–2025»: Жыл белесі мен жаңа бастамалар

<a href="https://kyzylorda-news.kz/">Kyzylorda-news.kz</a>&nbsp; Шиелі ауданының орталық алаңында жаңа жылдық бас шыршаның шамын жағу салтанатты рәсімі өтті.&nbsp;Салтанатты шарада аудан әкімі Айтбай Жандарбеков құттықтау сөз сөйлеп, аудан жұртшылығын келе жатқан Жаңа жыл мерекесімен құттықтады.<img src="https://knadmin.beoblood.kz/uploads/Shielide_shyrsha_shamy_zha_yldy_1_efb2643d81.jpg" alt="Шиеліде шырша шамы жағылды 1.jpg">Аудан басшысы өз сөзінде өткен 2025 жылдың Шиелі ауданы үшін табысты болғанын атап өтті. Киелі Шиелі ауданы «Үлгілі елді мекен» облыстық байқауында «Үлгілі аудан» атанып, агроөнеркәсіп кешенін дамыту бағытында «Үздік аудан» номинациясын иеленгенін жеткізді.Сонымен қатар әлеуметтік-экономикалық даму көрсеткіштері бойынша ауданның облыста алдыңғы орындарда тұрғанын айтып, тұрғындардың өмір сүру сапасын арттыру бағытында жүйелі жұмыстар атқарылып жатқанын баяндады. Электр жүйесінің қосалқы станциясы жаңғыртылып, газдандыру жұмыстары нәтижесінде көгілдір отынмен қамту деңгейі 81 пайызға жеткенін, тұрғын үймен қамту және инфрақұрылым саласында бірқатар маңызды жобалар жүзеге асқанын атап өтті.Денсаулық сақтау, білім, мәдениет және спорт салаларында жаңа нысандар пайдалануға беріліп, аудан қарқынды құрылыс алаңына айналғанын жеткізді.Сөз соңында аудан әкімі:<blockquote>«Өтер жылға өкпе жоқ, келер жылдан үміт көп. Алдағы уақытта да ауқымды жоспарларымыз бар. Бірлесе еңбек етіп, ауданымызды одан әрі көркейте береміз. Жаңа жыл баршаңызға құт-береке, мол табыс әкелсін!» – деп тілек білдірді.</blockquote>Салтанатты шарада аудан өнерпаздары мерекелік концерт ұсынып, кеш соңы отшашумен қорытындыланды.

Шиеліде шырша шамы жағылды

<a href="https://kyzylorda-news.kz/">Kyzylorda-news.kz</a> &nbsp;Жаңақорған ауданында кәсіпкер саны көбейіп келеді. Мемлекеттен қайтарымсыз грант, жеңілдетілген несие алып, ісін бастағандар табысқа кенелуде. Ауданда биыл шағын және орта кәсіпкерлік субъекті саны 6435-ке жеткен. Оның 398-і заңды тұлға, 1962-сі шаруа қожалығы, 4075-і жеке кәсіпкер. Белсенді жұмыс істеп тұрғаны 6230 болса, көрсеткіші 96,8 пайыз. Нәтижесінде 8409 адам жұмыспен қамтылып, 95961 млн теңгенің өнімі өндірілген. Өткен жылдың осы кезеңімен салыстырғанда кәсіпкерліктің сандық және сапалық даму деңгейі әлдеқайда жоғары.Мұнда 596 сауда мен қызмет объектісі тіркелген. Олардың қа¬тарында 11 сауда үйі, 380 азық-түлік және азық-түлік емес сауда дүкені, 146 тұрмыстық қыз-мет көрсету және 59 қоғам¬дық тамақтану орны бар. Бөлшек сауда айналымы 8213,8 млн теңге болса, өткен жылдың осы кезеңімен салыстырғанда индекс өсімі 100,1 пайыз. &nbsp;Кәсіпкерлік саласын дамытуда жүйелі жұмыс жалғасуда. Мәселен, «Жаппай кәсіпкерлікті дамыту» аясында іске асырылатын жаңа жобаларды қолдау, жұмыс орнын ашу арқылы халықтың әл-ауқатын жақсарту, салықтық базаны көбейту, кә-сіпкерлікті &nbsp;қолдау &nbsp;инфрақұрылымын &nbsp;дамыту &nbsp;жұмысы атқарылуда. Кәсіпкерлікті дамыту жөніндегі 2021-2025 жылдарға арналған ұлттық жоба шеңберінде аудандық жұмыспен қамту орталығы арқылы 171 жоба грант жеңіп алды. Сондай-ақ пайыздық мөлшерлемені субсидиялау арқылы құны 575,3 млн теңге болатын 7 жоба қаржыландырылды.«Аграрлық несие корпорациясы» АҚ облыстық филиалы арқылы 79, Қызылорда өңірлік инвестициялық орталығы арқылы 14 және «Ауыл аманаты» бағдарламасы аясында «Байқоңыр» ӘКК АҚ арқылы 36 жоба несие алды.Ауданда жыл басынан бері барлық қаржы көзінен 136 жоба 2475,3 млн теңгенің несиесін, 171 жоба 268,9 миллион теңгенің мемлекеттік грантын жеңіп алды.Кәсіп бастап, ісін дамытуды қолға алған Сәбит Камалов мемлекеттік қолдаудың игілігін көруге ниетті. Ол жылқы шаруашылығымен айналысады. Төрт түліктің бабын тауып, өнімін жергілікті тұрғындарға өткізеді. Сонымен қоса бөдене бизнесін дамытуда. Іскер азамат шаруасы жайында кеңінен әңгімелеп берген болатын.<blockquote>– Біздің ауыл егін егіп, мал бағады. Негізгі астық – күріш. Бала күнімізден атакәсіпке ден қойып, еңбекке ерте араластық. Ірі шаруа қожалықтарында еңбек еттік. Әлі де бел жазбай келеміз. &nbsp;Одан жаман болған жоқпыз.</blockquote>Ал жылқы бағудың өзіндік себебі бар. Осыдан үш жыл бұрын денсаулығым сыр беріп, емін медицинадан таппай, бие¬нің сүтінен жазылдым. Содан жылқы санын көбейтіп, қымыз ашыта бастадым. Ондағы ойым дерті бар жандарға өзім секілді пайдасы тисе деген ниет ғой. Қымыздың адам денсаулығы үшін пайдасы көп екені белгілі. Бір жағынан табиғи сусын, емдік қасиетке ие әрі құрамы дәруменге бай, – дейді ол.Қазір Сәбит күнделікті үш бие сауып отыр. Шаруасына жолдасы қолғабыс етеді. Қымыз дайындау да оңай шаруа емесін, оны ашытудың да тәсілі ерекше екенін айтқан ол кейінгі кездері ұлттық сусынға сұраныс барын &nbsp;жеткізді.&nbsp;<blockquote>– Биені жазда күніне 6-7 рет сауамыз. Саумалдың екі-үш күндігін жинап аламыз. Жиналған саумалға ашытқы қосып, бөлек күбіде сақтаймыз. Одан әрі күбіге қаймақ жағып, тобылғымен ысытып, пісеміз. Бапталған, ерекше әдіспен дайындалған қымыздың дәмі тұщы болады. &nbsp;Дайын болған қымызды арнайы құтыға құйып, саудаға шығарамыз. Негізінен тұрақты тұтынушылар бар. Кейде үйден де әкетеді, – дейді ол.</blockquote>Шаруаның айтуынша, қазір мал бағу қиындап кеткен. Оның бірнеше себебін атады. Алдымен жайылымдық жердің тапшылығы өзекті болып тұрғанын жеткізді. Бұрын ауыл маңында бос жер болса, бүгінде көпшілігі шаруашылықтарға тиесілі. Одан қалса, жем-шөптің бағасы да қымбат. Сондықтан шаруалардың көбі төрт түлігін қорада ұстауға мәжбүр. Осындай қиындықтарға қарамастан, Сәбит жылқының бабын келтіріп отыр. Алдағы уақытта да кәсібінен қол үзбек емес.Бөдене бизнесін бастағанына біршама уақыт болған. Қазір 200-ден аса бөденесі бар. Жұдырықтай құстың күтімі де ерекше. Еті мен жұмыртқасы пайдалы болғандықтан, тапсырыс беруші көп екен. Алғашында қызығушылықпен айналысқан ісі қазір әжептәуір табыс көзіне айналған. Бөдененің бабы жұ-мыртқадан басталатынын айтқан ол кәсібінің қыр-сырымен бөлісті.<blockquote>– Еңбек етемін дегенге қашанда екі қолға бір күрек табылады. Бөдене кішкентай құс, аса нәзік. Бұл істі қызығушылықтан бастадым. Жұмыртқасын Шымкент қаласынан, инкубаторды Қызылордадан алдырдым. Балапан бір ай өткен соң жұмыртқа бере бастайды. Бұл тез жетілетін құс. Бір жылға жуықтағанда ет бағытында пайдаланамыз. Бір ерекшелігі, құс тұмауымен ауырмайды. Сондай-ақ паразиттер жоламайды. Себебі дене температурасы 40 градустан жоғары. &nbsp;Бөдененің арнайы жемі бар. Құрамы түрлі қоспадан тұрады. Оны Тараздан алдырамын. Күннің көзін ұнатпайды. Көлеңкеде, ауа температурасы тұрақты жерде өсіріледі. Жел, жауын-шашынға төзбейді. Сондықтан барынша бабын тауып, 3-4 жылдан бері кәсіп етіп келемін. Құстың жұмыртқасы мен етіне сұраныс жоғары. Байқайсыз ба, тамақтанатын орындарда бөдене сорпасына тапсырыс беретіндер көп. Бағасы да әжептәуір. Өйткені емдік қасиеті ғылыми тұрғыдан дәлелденген. Жұмыртқасын да тағам мен салаттарға пайдаланады. Бұл кәсіпті келешекте кеңейту ойда бар, – дейді ол.</blockquote>Сара АДАЙБАЕВА, «Сыр бойы»Фото: автордікі

Сәбит Камалов: "Еңбек еткенге құт қонады"

<a href="https://kyzylorda-news.kz/">Kyzylorda-news.kz</a>&nbsp; Шиелі кенті «Арман» мәдениет үйінде аудан әкімі Айтбай Жандарбековтың қатысуымен Мемлекет басшысы Қасым-Жомарт Кемелұлы Тоқаевтың 2025 жылды «Жұмысшы мамандықтар жылы» деп жариялауына және Президент бастамасымен жүзеге асырылып жатқан «Таза Қазақстан» республикалық акциясы аясында салтанатты марапаттау шарасы өтті.<img src="https://knadmin.beoblood.kz/uploads/Shielide_e_bek_adamdaryna_rmet_k_rsetildi_1_f5567e6e63.jpg" alt="Шиеліде еңбек адамдарына құрмет көрсетілді 1.jpg">Шараның басты мақсаты қарапайым еңбек адамдарының қоғамдағы мәртебесін арттыру, еңбегін лайықты бағалау және Киелі Шиелі ауданында таза, жайлы әрі қауіпсіз орта қалыптастыру жолында аянбай еңбек етіп жүрген азаматтарды құрметтеу болып табылды.Салтанатты жиында аудан әкімі өз сөзінде Мемлекет басшысының «Жұмысшы мамандықтар жылы» бастамасы еңбекке адал азаматтарды қолдауға бағытталған маңызды шешім екенін атап өтті. Сонымен қатар «Таза Қазақстан» акциясы аясында ауданда тазалық пен абаттандыру жұмыстары жүйелі түрде жүргізіліп, елді мекендер, көшелер мен қоғамдық орындардың көркі айтарлықтай жақсарғанын жеткізді.Өтіп бара жатқан Жылан жылының аудан үшін табысты болғанын атап өткен аудан әкімі Шиелінің «Үлгілі елді мекен» облыстық байқауында «Үлгілі аудан» атануын, сондай-ақ тазалық жұмыстарын күшейту мақсатында арнайы техникалардың алынуын оң нәтиже ретінде атап өтті.&nbsp;Сөз соңында аудан басшысы Айтбай Жандарбеков тазалық әрбір тұрғынның ортақ жауапкершілігі екенін атап өтіп, еңбек адамдарына алғысын білдіріп, барша аудан халқын бірлік пен еңбекке шақырды.Салтанатты шара барысында 5 азаматқа "Сарыағаш шипажайына" жолдама, 27 азаматқа қаржылай сыйлықтар табысталды.&nbsp;Сонымен қатар аудан өнерпаздары ән мен күйден шашу шашып, еңбек адамдарына мерекелік көңіл-күй сыйлады және салтанатты шараға қатысушыларға аудан әкімдігінің атынан жаңа жылдық сыйлықтар таратылды.

Шиеліде еңбек адамдарына құрмет көрсетілді

<a href="https://kyzylorda-news.kz/">Kyzylorda-news.kz</a> Жаңақорғандағы екі келешек мектептің бірі – Жаңарықтағы №167 білім ордасы. Заманауи жабдықтармен жабдықталған білім ошағында оқушылардың жан-жақты білім алуына үлкен мүмкіндіктер қарастырылған. Теориялық қана емес, практикалық негізге бейімделген мектептің бұған дейінгі жетістігі де аз емес еді. Енді шәкірттер білім бәсекесінде көштің алдыңғы қатарынан көрініп келеді. Бұл ең алдымен ұстаз еңбегінің жемісі десек болады. Ширек ғасырдан бері ұстаздық ететін Ақмарал Мұхамедханқызының шәкірттерінің бағындырған белесі бір төбе. Біз бүгін ұстаз өнегесіне тоқталып, маңдай терінің жемісі туралы жазуды жөн көрдік.Қаншама мемлекет және қоғам қайраткерлері білім алып, қанат қақққан бұл ыстық ұядан әлі талай дарынды, талантты балалар шығатынына сенімдіміз. Өйткені мұнда Ақмарал апай сынды білікті мұғалімдер аз емес. Педагог-зерттеуші Ақмарал Қаржаубаеваның бір ғана жетістігін тілге тиек етсек, оның авторлық бағдарламасы өңірдегі үш бірдей ауданға таратылды. Яғни, сабақ беру әдіс-тәсілінің қыр-сырын меңгерген ұстаздың озық тәжірибесі өзге ұстаздарға үлгі, әрі оқулық ретінде ұсынылған.Әңгімемізді ұстаздың еңбек жолынан бастайық. Қорқыт ата атындағы Қызылорда мемлекеттік университетін бітіргеннен кейін кейіпкеріміз еңбек жолын облыс орталығындағы No235 мектепте бастайды. Жаңарық ауылына келін болып түсіп, ұстаздық жолын осында жалғастырады. Екі жыл Қыркеңседегі №213 мектепте ұстаздық етеді.<blockquote>– Әрбір мамандық иесі өзінің жұмысын шынайы сүйгенде ғана білікті ұстаз, қабілетті оқытушы, талантты тәрбиеші бола алады. Мен жастайымнан ұстаз болуды мұрат еткен жанмын. Өзімнің атам мен әпкем осы салада еңбек сіңірген жандар. Сондықтан ұстаздықты текпен келген дей аламын, – деп бастады ол әңгімесін.</blockquote>Ұстаздың жеткен жетістігі бір төбе. 2010 жылы «Аудандағы үздік сынып жетекші» атанды. Одан бөлек, облыс әкімі және салалық кәсіподақтан алған марапаттары жетерлік. Оның басты ерекшелігі – үш тілді еркін меңгерген маман. Қазір ол биология пәнін ағылшын тілінде оқытады. Бұл пәннен дәріс алатын оқушыға барлық жағдай жасалынғанын көрдік. Цифрландырылған зертханалық кабинеттер материалдық-техникалық құралдармен толық қамтылған. Орыстың белгілі педагогы Антон Макаренко: «Адамды тәрбиелеу – демек оның ертеңгі қуанышқа ие болатын келешек жолын тәрбиелеу» дейді. Біздің кейіпкеріміз де қаншама шәкірттің ертеңіне жол салды.Оқушыларының көбі медицина саласында тер төгіп келеді екен. Олардың қатарында Мерей Жұмаш, Жансая және Самал Әшімовалардың есімін бөліп-жарып атау керек. Түркістан шаһарында тұратын дәрігер-терапевт Тәттігүл Тұрмановны да айтуға болады. Әсіресе, ҰБТ кезінде шәкірттері жоғары балл жинап, көбі «Алтын белгі» иегері атанып келеді. Басқа да шәкірттерінің жетістіктері бір төбе.<blockquote>– Ізімді жалғап, ұстаз боламын деген шәкірттерім аз емес. Солардың бірі – Қалдыбай Жүсіпбек. Ол Қазақ ұлттық аграрлық университетінде білім алуда. Химия пәнінен де оқушыларым ҰБТ-дан жоғары балл жинап, жоғары оқу орындарына түсіп, қазір әр салада қызмет атқаруда. Ветеринария саласында Әуелбек Бағдат, Жалғас Арынғазиев, Жұмаш Шапағат сынды шәкірттерім оқиды. Сондай-ақ Астана, Алматы және Ақтөбе медициналық университетінде болашақ дәрігер шәкірттерім бар, – деп мақтанышпен жеткізді.</blockquote>«Шеше көрген тон пішер» демекші, өзінің қызы да осы саланың тізгінін ұстауға бет бұрыпты. Ол тек білім саласында ғана емес, өзін қоғамның белсендісі ретінде де көрсетіп келеді екен. 2011-2015 жылдары әлеуметтік педагог өз жұмысын абыройлы атқарды. Яғни қайырымдылық акцияларын жиі ұйымдастырып, оқушылардың алаңсыз білім алуына қол үшін беретін азаматтардың басын біріктірді.Қорыта айтқанда, Ұланбек Бейімбетов басқаратын келешек мектебінің келешегі зор деп білеміз. Бүгінгі көкжиегінің өзі бір тарих, енді заманауи ұстаздардың бұдан да биіктен көріне беретіні анық. Сол жас ұстаздарға жол сілтеп, жөн көрсете алатын қабілет-қарымы жоғары Ақмарал Мұхамедханқызы секілді педагогтер тұрғанда мектеп шәкірттерінен күтеріміз көп.Әлібек ЖАРЫҚБАЕВ

Шәкірт жеңісі – ұстаз жемісі

<a href="https://kyzylorda-news.kz/">Kyzylorda-news.kz</a> Күн сайын ерте оянып, арайланып атып келе жатқан таң шапағын қуана қарсы алған ауыл тұрғындары жаңа піскен нан иісі мұрынға келгенде адал еңбекке бас иері анық. Тау баурайындағы Талап ауылы халқының алғысына бөленіп келе жатқан Олимпиада Бектөреқызы үш бірдей кәсіпті айналдырып келеді екен. Оның бір күндік тыныс-тіршілігі біздің осыған көзімізді жеткізді. Таңғы төрттен бастап наубайхананың отын жағып, ауылдың азанғы шайына ыстық нанын қамдап беретін кәсіпкер ханымды сағат тоғыздан кейін ақ халат киген абзал жан деп тануыңызға болады. Ал кешкісін, жұмыстан оралған бетте алма бағына бас сұғып, жолдасымен бірге жас көшеттердің күтіміне кірісіп кетеді екен.Осы бір қарапайым тірліктің артында қажырлы еңбек, табандылық, төзім мен махаббат жатыр. Сол себепті де ауыл тұрғындарының бірі оны «еңбекқор келін», бірі «алтын қолды жеңеше», енді бірі «жаны таза мейірбике» деп атайды. Ал біз үшін ол өз ісіне адалдығымен көпке үлгі бола білген, еңбегімен көптің алғысын арқалаған – нағыз қазақ қызы. Оның «Димаш» атты шағын наубайхана ашқанына сегіз жылдай уақыт болыпты. Өзінің айтуынша, бастапқыда отбасына пісірген күлшелерін көршілері, туыстары жоғары бағалап, сұраныс та туған көрінеді. Осылайша қарапайым кәсібінің көкжиегі кеңейіп, наубайхана ашуға тура келгенін айтты.<blockquote>– Нан пісіру – қастерлі кәсіп қой. Қай заманда да нанның қадірі ерекше. Сондықтан кәсібіме ықыласым кеміген емес, – дейді ол. Наубайханадан шыққан таба нан, бөлке нан, қара нан, күлшелері ауылдағы дүкендерге, мектепке және көрші елді мекендерге саудалауға жетіп жатыр. Көмекшісі екеуі бірігіп күніне 100 нан, ал жаз мезгілінде 200-ден аса нан пісіреді. Бұл – ауыл үшін өте үлкен көрсеткіш. Ең бастысы, тұрғындар таза, табиғи, сапалы нанды тұтынады. Бұл кәсіппен айналысу үшін тек қол шеберлігі аздық етеді. Кәсіпкер келіншек жаңа рецептер мен технологияларды меңгеріп, нанның түр-түрін көбейтуді қолға алған. Себебі бәсеке бар, талап жоғары. Олимпиаданың қолынан шыққан нанның ерекшелігі – табиғи, еш қоспасыз дайындалуында. Бұл ауыл халқы үшін аса маңызды. Өйткені, сапасыз өнім денсаулыққа зиян. Наубайшы осыны жақсы түсінеді. Сондықтан бірінші кезекте тазалық пен табиғилықты сақтауға назар аударады. Олимпиаданың тағы бір қыры – ширек ғасырдан бері Талап дәрігерлік амбулаториясында еңбек етіп келе жатқан мейірбике болуы. Оның айтуынша, медицина – ең алдымен жүрек қалауымен таңдалатын, жауапкершілігі жоғары сала. Ел саулығына сақшы болу үлкен міндет. Адамдар бізге үмітпен келеді. Сол үмітті ақтау – басты борышымыз. Әріптестеріммен бірге мүмкіндігінше науқастың сауығып кетуіне тер төгемін, – дейді ол.</blockquote>Кейіпкеріміз үшін мейірбикелік қызмет бірінші орында. Ауылдық жерде мейірбикенің рөлі ерекше. Кей жағдайда мейірбикелердің дәрігердің орнына науқасқа қарауына тура келеді. Оның жұмыс күнінің бір бөлігі медицинамен байланысты болса, екінші жартысы кәсіппен өтеді. Осы екі саланы қатар алып жүру – кез келген адамның қолынан келмейтін іс. Бірақ Олимпиада мұны аса қиынсынбайды. Керісінше, «еңбек етсең, бәріне үлгеруге болады» деген ұстанымды құптайды. Олимпиаданың тағы бір мақтанышы – алма бағы. Бұл бақ – өмірлік жодасы (суретте) екеуінің ұзақ жылғы еңбегі мен ізденісінің жемісі. Бастапқы жылдары шағын ғана бірнеше түптен басталған бақ бүгінде жайқалған жасыл баққа айналған.Бағбандық – ерекше күтімді қажет ететін сала. Әр ағаштың суы, топырағы, күн көзін көруі – бәрі маңызды. Осыны жақсы түсінген кәсіпкер ағаштың әрқайсысына жеке дара көңіл бөледі. Бір қызығы, ол алма бағынан табыс табуды емес, бақтағы сұлулықты, табиғатпен үндесуді жоғары қояды. Ал күз айларында ауыл балаларын жинап, алма теру мерекесін өткізіп тұрады. Кейіпкеріміздің айтуынша, кәсіпті жүргізуге отбасының қолдауы ерекше. Қария атасы да, балалары да, жолдасы қолғабыс көрсетіп отырады.<blockquote>– Қарашаңырақтың түтінін түтетіп отырған келінмін. Үлкеннің алдынан қия өтпеуді, батасын алуды өмірлік қағидам деп білемін. Үйдің берекесі әйелдің сабырында деп есептеймін, – дейді ол.</blockquote>Иә, елде соңғы жылдары әйелдердің кәсіпкерлікке белсенді араласуы – қоғамдағы оң өзгерістердің көрінісі. Ауылдық жерлерде бизнес ашып, нарықта бәсекеге қабілетті болу – кез келген әйелдің қолынан келе бермейді. Осы тұрғыдан алғанда, Олимпиада Бектөреқызы сияқты іскер әйелдердің тынымсыз тіршілігі замандастарына үлгі болары анық. Олар тек өз отбасының ғана емес, ауыл тұрғындарының да жағдайын жақсарта түседі. Кәсібі арқылы жаңа жұмыс орны ашылып, ауыл экономикасына серпін береді. Ол үйде отбасына қамқор ана болса, қызметте ел саулығына жауапты мейірбике, кәсіпте ауылды нанмен қамтамасыз етіп отырған білікті кәсіпкер, ал қоғамда сыйлы азамат. Міне, қазақ қызының нағыз бейнесі – осындай.Айсұлу АЛДАНАЗАР

Еңбек – бәрін жеңбек

<a href="https://kyzylorda-news.kz/">Kyzylorda-news.kz</a> Мемлекет басшысының 2021-2025 жылдар ішінде Арал теңізінің құрғаған ұлтанында 1,1 млн.га сексеуіл екпелерін ұлғайту жөнінде тапсырмасын орындау мақсатында 2021-2024 жылдары барлығы 659,1 мың гектар алқапқа екпелер жасалды. Оның ішінде 332,5 мың гектары (201 млн. дана) облыстық деңгейде орындалды, қалған көлем, яғни 326,6 мың гектары, Орман шаруашылығы комитеті мамандарының көмегімен жүзеге асырылды.Аталып отырған кешенді жоспарды жүргізу үшін барлығы 1071 мың гектар алқапқа топырақ зерттеу және жобалау жұмыстары жүргізілді. Сонымен қатар өткен жылғы егілген екпелердің шығымдылығы төмен алқабының 26500 гектарына (облыстық деңгейде) толықтыру жұмыстары жүргізілді.2025 жылы Орман шаруашылығы комитеті арқылы Арал теңізінің құрғаған табанына 340,9 мың гектар жерді орманға айналдыру мақсатында біршама жұмыстар жоспарланды. Сөйтіп биылғы көктемде 120 мың гектар жерге тұқым себілді. 11,8 мың гектар жерге көшет отырғызу жұмыстары жүргізілді. Ал күз айында 60 мың гектар жердің табиғи өсіп-өнуіне ықпал ету үшін 30 мың гектар жерге тұқым себу жұмыстары жүргізілді. Айта кетейік, бұл жұмыстар әлі де жалғасып жатыр.Ал, облыстық деңгейде 100 мың гектар (15 мың гектар алқапқа сексеуіл көшетін отырғызу, 85 мың гектар (71,4 мың кг сексеуіл, 285,6 мың кг қарабарақ) алқапқа галофитті тұқымдар себу жұмыстары) алқапты ормандандыру мақсатында биылғы күзде атқарылуы тиіс біршама жұмыстар жүзеге асырылды. Мәселен, бүгінгі күнге 15 мың гектар жерге көшет отырғызылып, 357 мың кг сексеуіл, қарабарақ тұқымдарын себу жұмыстары жүзеге асырылу үстінде, 64,6 мың гектар жерге тұқым себу жұмыстары жүргізілуде. Жинақталған тұқымдар «Республикалық орман селекциялық тұқым өсіру орталығы» РМҚК Оңтүстік – Батыс аймақ филиалынан орман тұқымының өну сапасы арнайы тексерістен өткізілді.Жоғарыда аталған фитоорманмелиорациялық жұмыстары ормандарды толықтыру мен орман өсіру саласындағы мемлекеттік бақылау Қызылорда облыстық орман шаруашылығы және жануарлар дүниесі аумақтық инспекциясының бақылауымен жүргізілуде.&nbsp;Жоспарланған фитомелорация жұмыстары жыл соңына дейін толық орындалатын болады.Фото: Арал ауданы әкімдігі

 Арал теңізінің құрғаған ұлтанында фитоорманмелиорациялық жұмыстары қарқынды жүргізілуде

<a href="https://kyzylorda-news.kz/">Kyzylorda-news.kz</a> Жаңақорған ауданы медицинасының дамуына қырық жылдан астам уақыт үлес қосып келе жатқан ақ халатты абзал жан Молдахмет Бидашұлы – қазір «Жан Арай» шипажайының бас дәрігері. Білікті маманмен сұхбатымызда урологиялық сырқат түрлері мен ер-азаматтардың денсаулығына қатысты өзекті мәселелер сөз болды.– Дәрігерлікті таңдауыңызға не себеп болды?<blockquote>– Балалық шақ – аппақ қағаз секілді, не өрнек түссе, өшпестей жазылып қалады. Әлі есімім де қойылмаған шарана күнімде үйге соққан атақты дәрігер Модахмет Бақбаевтың құрметіне «Молдахмет» деген есімді еншілеппін. Бәлкім, осы кісіге ұқсауға тырыстым. Бұл жолдың ауыр екенін де, жауапкершілігін де сезіндім. Алғашқы еңбек жолымды аудандық ауруханада хирург болып бастадым. Қызмет барысында аудан ауруханасына жансақтау бөлімінің аса қажеттігіне көз жетті. Сол үшін Украинаның Запорожье қаласында оқып келіп, ауданда жансақтау бөлімінің ашылуына тер төктім. Кейін 2004 жылы Алматы қаласында білімімді жетілдіріп, сол қаладағы №12 ауруханада тәжірибеден өтіп, урологияны меңгердім. Содан бері медицинаның урология саласында еңбек етіп келемін. Бүгінде «Жан-арай» ЖШС-де бас дәрігер әрі уролог дәрігер ретінде қызмет атқарып жүрмін. Урология тек емдеуді емес, жан-жақты ойлануды, дәлдікті, хирургиялық дағдыны, психологиялық дайындықты қажет етеді. Аурудың сипаты жасырын жүреді, ер-азаматтар көп жағдайда дәрігерге дер кезінде қаралмайды. Сондықтан осы саланың маманы болу – өзіңе ғана емес, бүкіл қоғамға деген жауапкершілік деп ойлаймын. Урология – ерлер денсаулығымен қатар, жалпы адам ағзасының зәр-жыныс жүйелерін зерттеп, емдейтін кең ауқымды сала. Оның ішінде бүйрек, қуық, несеп жолдары, ерлердің репродуктивтік жүйесі – бәрі біздің бақылауымызда. Урологияның ерекшелігі – диагноз қоюда өте мұқият болу қажет. Ұсақ-түйек белгі үлкен аурудың басы болуы мүмкін. Мысалы, қарапайым белдің ауырсынуы кейде бүйректегі тас ауруының белгісі, ал жиі зәр шығару – қант диабеті немесе простатиттің алғашқы симптомы болуы ықтимал. Бұл салада қателесуге болмайды. Урологтың алдына келгендер ашыла бермейді. Сондықтан дәрігердің этикасы, сабырлылығы, психолог ретіндегі қабілеті өте маңызды.</blockquote>– Қазіргі уақытта ер-азаматтардың урология саласына деген көзқарасы қандай? Дәрігерге қаралу мәдениеті өзгерді ме?<blockquote>– Соңғы жылдары айтарлықтай өзгеріс байқалады. Бұрын ер адамдар көбіне «бәрі өзінен-өзі жазылады», «еркек адам ауруын айтпайды» деп жүре беретін. Ал қазір ерлер арасында урологтың көмегіне жүгінетіндер бар. Бірақ көп емес. Ауруы асқынып кеткенде ғана келеді. Әсіресе қуықасты безінің қабынуы немесе бүйрек-тас аурулары бар науқастар көбіне асқынған кезде ғана келеді. Бұл – дұрыс емес. Науқас неғұрлым ерте келсе, ем соғұрлым жеңіл әрі тиімді. Әсіресе жастар жағы денсаулыққа көбірек мән бергені абзал.</blockquote>– Урология саласында ең жиі кездесетін аурулар мен олардың себептері қандай?<blockquote>– Ең жиі кездесетіндер – простатит, бүйрекке тас байлану, цистит, пиелонефрит, несеп-жыныс жүйесінің инфекциялары, эрекцияның бұзылуы, бедеулік мәселелері. Суық тию – ол ерлер арасында простатиттің басты себебі. Екінші, артық салмақ пен дұрыс тамақтанбау бүйрек ауруларына әкеледі. Үшінші, қимылсыз өмір, яғни аз қимыл қан айналымын нашарлатып, урологиялық аурулардың қаупін арттырады. Төртінші, стресс – барлық ерлер ауруларының жасырын триггері. Жыныстық жолмен берілетін инфекциялар – үлкен проблема. Мысалы қазіргі уақытта жастардың арасында да урологиялық аурулар жиілей бастады. Себебі жұмыс көбіне компьютер алдында, қозғалыс аз, ұйқы режимі бұзылған.</blockquote>– Бүгінгі күннің алаңдатарлық мәселесі – ерлер бедеулігі жөнінде не айтар едіңіз…<blockquote>– Иә, соңғы жылдары ерлер бедеулігі өте өзекті мәселеге айналды. Бұрын адамдар бедеулік туралы кінәратты тек әйелден іздейтін. Ал қазір статистика көрсеткендей, бедеуліктің ерлер тарапынан болуы әйелдермен бірдей. Ерлер бедеулігінің себептері көп. Мәселен, жас кезден көп суықтау, созылмалы инфекциялар, гормондық бұзылыстар, варикоцеле, стресс, дұрыс өмір салтын ұстанбау, ішімдікке әуестену осының барлығы себеп болуы бек мүмкін. Бірақ бұл емделмейтін дерт емес. Ең бастысы, дер кезінде тексеріліп, дұрыс ем қабылдау. Урологияда ең үлкен қателік – науқастардың өз бетімен ем қабылдауы. Мысалы, простатитке қарсы дәрілерді шамадан тыс ішіп қойса, керісінше ағзаның гормондық жүйесін бұзуы мүмкін. Тағы бір үлкен қателік – интернеттен оқып, өздеріне диагноз қойып, емделу. Бұл дұрыс емес. Интернеттегі ақпарат көзінің қайдан алынғаны белгісіз. Дұрыс қабылданбаған ем үлкен қателіктерге соқтыруы мүмкін. Сондықтан ең алдымен дәрігерге қаралу міндет.</blockquote>– Шипажайдың емдік ерекшелігі жөнінде не айтасыз…<blockquote>– Адамның денсаулығы – адам тағдырының тетігі. Емделушілер қатарында 19 және 17 жыл бойы бала сүймеген ерлі-зайыптылардың осы жерден ем алғаннан кейін сәбилі болған қуанышымен бөлісуі біздің де еңбегімізге шабыт сыйлағанын айтқым келеді. Көптеген ер азаматтар дәрігерге қаралудан ұялады. Бұл қате түсінік. Осы саладағы бірнеше жылдық тәжірибемде менің түсінгенім урология саласында тек емдеу емес, ағарту, түсіндіру, психологиялық қолдау көрсету де маңызды.</blockquote>– Ер-азаматтардың денсаулығын жақсарту үшін қандай кеңестер берер едіңіз…<blockquote>– Жылына кемі бір рет урологқа қаралу маңызды. Суыққа отырмауға, аяқ-қолды жылы ұстауға тырысу керек. Дұрыс тамақтану – майлы, тұзды тағамды азайту, күніне кемі 1,5-2 литр су ішу, қозғалысты арттырып, спортпен айналысуды да дағдыға айналдырса деймін. Бүгінде жастардың урологиялық ауруларға шалдығуы жиі байқалады. Бұл дұрыс тамақтанбау мен қозғалыстың аздығынан дер едім.</blockquote>– Ауруды ауыздықтауда қандай кешенді шаралар қажет?<blockquote>– Бізге жас мамандардың тәжірибесін шыңдайтын орталықтарды көбейту қажет. Заманауи аппараттар, сапалы диагностика барлық аудан-ауылдарда қолжетімді болуы тиіс.</blockquote>– Отбасыңызда өзіңіздің ізіңізді жалғаған балаларыңыз бар ма?<blockquote>– Бізді «дәрігерлер отбасы» деп атаса болады. Өйткені, келіншегім 40 жылға жуық аудандық емханада мейірбике болды. Ұлым Бейбіт Қызылорда қаласындағы СЭС-тің басшысы болса, қызым Ақсәуле аудандық аурухананың балалар бөлімінің меңгерушісі, қызым Ақжелен «Қызылқұм» өндірісінде дәрігер. Тек бір ұлым ғана темір жол саласында қызмет атқаруда.</blockquote>– Жастарға қандай тілек айтасыз?<blockquote>– Ер азамат – отбасының, елдің тірегі. Денсаулық – Алланың берген аманаты. Сол аманатты күту әр адамның өз қолында. Қазақта «Ауырып ем іздегенше, ауырмайтын жол ізде» деген нақыл бар. Уақытында тексеріліп, жоспарлы қаралып тұру – ер адамның өз отбасына деген жауапкершілігі. Барша ер-азаматқа зор денсаулық, қажымас күш, шалқар ғұмыр тілеймін.</blockquote>Айсұлу АЛДАНАЗАР

Қазақстан және Қызылорда облысының жаңалықтары