<a href="https://kyzylorda-news.kz/">Kyzylorda-news.kz</a> Әскери қызмет – абыройлы міндет. Осы ұранды өзіне өмірлік мақсат етіп жүрген азаматтар жетерлік. Ел әскерінің беделін арттырып, айбынын асыра түсуге үлесін қосып жүрген әскери қызметшілердің бірі &nbsp;қармақшылық – Нұрдидар Құдайбергенов. Ол жаста болса жұмысқа деген жауапкершілігімен көзге түсіп жүрген білікті маман. Оның отбасы жақында ғана жас әскери қызметшінің жаңа шен алғанын айтып сүйіншіледі. Еңбегі ескеріліп, дәрежесі жоғарылаған қызметкердің өмір жолына тоқталсақ.Нұрдидар Аралбайұлы – 1987 жылы Қармақшы ауданына қарасты Қуаңдария ауылында дүниеге келген. №186 орта мектепті бітіріп, сол жылы бала кезінен әскери қызметші болсам деген арманы оны әскери кадрлардың ұстаханасы «Алматы қаласындағы Құрлық Әскери институтына» жетелеп, мотоатқыштар факультетіне қабылданып, курсант атанады. Аталған әскери оқу орнын 2009 жылы аяқтап, Алматыдағы «Шет ел тілдер Әскери институтына» взвод командирі, 2010-2012 жылдары «Алматы қаласындағы Байланыс және Радиоэлектроника институтының» курсанттар ротасының рота командирі, кейіннен Луговой стансасы №03811 әскери бөлімінің арнайы мақсаттағы (спецназ) барлау ротасының командирі болып тағайындалған. 2014-2015 жылдары Тараз қаласындағы №91678 Әскери бөлімінің Спорт бөлімінің бастығы, Қызылорда қаласындағы &nbsp;№66597 Әскери бөлімінің Дене дайындағы және спорт қызметінің бастығы қызметтерін абыроймен атқарған. 2020-2022 жылдары Тараз қаласындағы Оңтүстік өңірлік Әскери қолбасшылығының Спорт басқармасының бастығы болса, биылдан бастап Шымкент қаласындағы арнайы операциялар күштерінің дене дайындығы және спорт қызметінің бастығы қызметінде. Отбасында жары Айсұлумен бірге 5 перзент тәрбиелеуде.Білікті маман жақында подполковник шенін иеленді. Шағын ғана ауылдан түлеп ұшып, үлкен арман қуған бозбала, жігіт ағасы болған шағында мақсатына жете білді. Алдағы уақытта да өз ісінің білгірі екенін дәлелдеп, ел үшін қызмет ете бермек. Ата-анасы Аралбай мен Күнсұлудан алған тәлімді тәрбие, алға қадам бастырып, жетістікке жетелеуде. Өмірінде қарапайым тірлік кешіп, адал еңбекпен перзент тәрбиелеген ата-анасы да балаларын мақтан тұтады. Ата-ананың бақыты деген осы емес пе? Бүгінде ауыл балалары да Нұрдидардың есімін естісе, «мен де осындай әскери қызметкер боламын» деп бой түзеп келеді екен.<blockquote>– Нұрдидар Құдайбергенов – ауылымыздың тумасы. Ол өз ісінің майталманы болумен қатар, бойында үлкенді сыйлау, кішіні құрметтеу, білгенін әріптестеріне аянбай үйрету секілді сыпайылылықтың өнегесі қалыптасқан. Жақында әскери шені өскенін естіп ауыл болып қуандық. Осындай ауылды елге танытатын, елімізді әлемге танытатын азаматтарымыз көп болсын, – дейді ауыл әкімі Ардақ Аймырзаев.</blockquote>Иә, «Ерім дейтін ел болмаса, елім дейтін ер қайдан шығады» дегендей, біз де жағымды жаңалықпен бөлісуге асықтық. Биік рухты, өр мінезді, білімді де білікті, өскен елін өрге сүйрейтін туған жер перзенттерінің қатары арта берсін!

Қармақшылық әскери қызметтің майталманы

<a href="https://kyzylorda-news.kz/">Kyzylorda-news.kz</a> Адалдық – адам бойындағы ең асыл қасиеттің бірі. Ол кез келген нәрседен көрініс табады. Мысалы, отбасыңа, мамандығыңа, туған жерге, сүйген жанға және деп санамалап кете беруге болады. Бірақ не нәрсеге де адалдық танытқан жанның алға озары мәлім. Әсіресе, адал еңбек еткеннің еңбегі елеусіз қалмасы анық. Адалдық пен тұрақтылықты ту етіп, ел құрметіне бөлену – ер үшін үлкен мәртебе. Біз сөз еткелі отырған Ғалымжан Жақсылықов та осындай еңбексүйгіш жан.Ол Қармақшы ауданына қарасты Ақтөбе ауылының тумасы. 1994 жылдан бастап шаруашылықта механизатор. 2015 жылдан бері «Ақтөбе и К» жауапкершілігі шектеулі серіктестігінде табысты жұмыс атқаруда. Жасынан механизаторлықты өміріне серік еткен ол 26 жыл бойы бір салада. Тапсырылған жұмысты тыңғылықты орындайтын қызметкер кімге ұнамасын? Басшылық та оның жауапкершілігі мол, ісі ұнамды екенін алға тартты. Сөзден гөрі, тындырымды тірлікті ұнататын ағамыздан сыр тартып көрдік.<blockquote>– Бұл сала бойынша арнайы мамандығым жоқ. Десе де, көп қызметтің ішінде өзіме қолайлысы осы болды. Қолымнан келген іспен шұғылданып, отбасымды адал еңбекпен асыраудамын. Мен үшін ең бастысы – осы. Себебі таза еңбек, маңдай термен келген наннан тәтті, астан жұғымдысы жоқ. Балаларымды да адалдыққа, тазалыққа тәрбиелеймін. «Бала көргенін істейді» демей ме, сол үшін де оларға бірінші өзім үлгі болуға тырысамын. Бүгінгі жастардың қатарында механизаторлыққа қызығушылар саны аз. Ал мен бұл саланы меңгергеннің болашағы зор демекпін. Оған себеп, технология дамып, мамандықтар түрленуде. Көпшілік заман ағымына ілесіп, жаңа мамандықты таңдағанда, бұл сала мамандарына сұраныстың артатыны сөзсіз. Қай істің де нағыз маманы болу – әрбір жастың мақсаты болса екен, – дейді Ғалымжан Жақсылықұлы.</blockquote>Қармақшылық арумен шаңырақ көтерген кейіпкеріміз алты перзенттің әкесі. Үлкен ұлы Отан алдындағы борышын өтесе, одан кейінгі қызы – студент. Ал өзге балалары мектеп қабырғасында. Отанасы бала тәрбиесімен айналысып, ерінің тапқанын ұқсатуда. Адал ас тұтынатын отбасы перзенттерінің болашағынан күтер үміті мол.<blockquote>– Мамандық таңдауды балаларымның өз еркіне қалдырамын. Себебі әркім өз ісін шын жақсы көруі қажет. Сонда ғана нәтижелі болады. Әрқайсысы өзі таңдаған саланың білікті маманы болса деген арманым бар, – дейді кейіпкеріміз.</blockquote>«Еңбек адамды қашан да бақытқа бөлейді» дегендей, Ғ.Жақсылықұлының ұзақ жылдар бойы жасаған жұмысы елеусіз емес. Адал еңбекпен атқарылған іс қашан да жемісті ғой. Оны жыл сайын алған алғыс хат пен бағалы сыйлықтан аңғардық. Нақтырақ тоқталсақ, 2015 жылы І дәрежелі «Озат жатка машинисі» атанса, 2017 жылы ІІІ дәрежелі «Озат күріш орушы», 2019 жылы ІІ дәрежелі «Озат жаткашы» дипломдарымен марапатталған. Әрдайым озаттардың қатарында жүрген ол 2015 жылы аталған шаруашылықтан сый ретінде жеңіл көлік тізгіндегенін де тілге тиек етті.Иә, адалдықты ту еткен жанның абыройлы боларына тағы да бір көз жеткіздік. Шын мәнісінде кейіпкеріміз үлгі етуге тұрарлық қамқор әке, білікті маман, әрі адал еңбек иесі.

Еңбегіне адал ақтөбелік азамат

<a href="https://kyzylorda-news.kz/">Kyzylorda-news.kz</a> Айдынды Арал өлкесінің көркін келтірген теңізіміз бұрындары көлемі жағынан дүниежүзі бойынша төртінші орынды алған болатын. Теңіз жағалауында кәсіптің түр-түрі дамып, саяхаттап келуші туристер де күн санап артатын. Балғын балалық шағын теңіз жағасында өткізген бүлдіршіндердің де қуанышында шек болмайтын. Сондай-ақ қаламыздан шыққан түрлі өнімдерді шетелге экспорттап, оған қоса кемелерді қабылдап алып тұратын порт бар еді.Теңіз порты 1935-1980 жылдар аралығында жұмыс істеп, мыңдаған халықты жұмыспен қамтыды. Теңіз тіршілігімен ұштасып жатқан ыстық естеліктер жайында сөз қозғайық. 1976 жылдары Теңіз порты халықтық бақылау тобының есеп беру жиналысы болып өткен. Атаулы жиында бақылау тобының председателі М.Ізбасаров 1973-1976 жылдар аралығына дейінгі халық бақылаушылары тындырған істер жайында жан-жақты баяндама жасаған екен. Бұл уақытта теңіз портында 40 халық бақылаушысы болған. Бір халықтық бақылау тобы, үш бақылау постысы жұмыс істеген. Сонымен бірге олар ішкі резервтерді іске қосу, үнем тәртібін күшейту жолында тынымсыз еңбек еткен. Жиналыс барысында Теңіз портының басшысы Бақи Нысанбаев: «Халық бақылаушылары әрдайым бізге көмектесіп отырады.&nbsp;Дегенмен атқарылуға тиісті жұмыстар да аз емес. Мысалы жұмыс орнын даярлау, еңбекті ұйымдастыруда кемшіліктер бар. Соның салдарынан вагонның, қайықтың жүк тиеу кездерінде бос тұрып қалуы кездеседі» – деп жұмыс барысындағы кемшіліктерді атап өткен екен.Тағы айта кетсек, 1976 жылдары Теңіз порты ұжымы КПСС XXV съезінің тарихи шешімдерімен жігерлене отырып, бесжылдықтың алғашқы күндерінен бастап-ақ қарқынды еңбек еткендерін көрсеткен екен. Еңбектерінің нәтижесінде 20 мың тонна жүк өңдеуді қамтамасыз ете білген. Осындай нәтижеге қол жеткізген жүкшілер бригадасы тынымсыз теңіз тіршілігіне зор үлес қосқан. Атап өтер болсақ, Ж.Сайғондиев, Ә.Биболатов және басқа да еңбегі сіңген қызметкерлер есімі ерекше аталады. Бригада мүшелері әрдайым жұмыс істеу үстінде болған. Сондай-ақ олар жұмыстың ыңғайына қарай басқа да қалаларға барып жұмыс істеген.Теңіз портында елеулі еңбегі сіңіп, сылақшы қызметін атқарған З.Алдабергенова:– Мен Теңіз портында сылақшы болып көптен еңбек етіп келемін. Әрбір мамандықтың өзіндік құпиясы, қыры мен сыры болады. Алғашқы кездері көптеген қиыншылықтарды жеңуге сол кездері еңбек еткен тәжірибесі мол апайлар көмектесті. Міне, қазір бұл мамандықты толық меңгеріп, алдыңғы қатарлы жұмысшы атанудамын. Біздің бригадада он адам ынтымақтаса еңбек етуде. Олардың барлығы да көп жылдан бері осы салада жұмыс істеп, тәжірибелерін толықтырған жандар. Сондықтан да болар, ай сайынғы тапсырма мен міндеттеме артығымен орындалады. Мен КПСС XXV съезі алға қойылған жаңа міндеттермен жігерлене отырып, биылғы жылға жаңа межелер белгілеп алдым. Онда негізінен атқарылатын жұмыстың сапасы мен тиімділігін жақсарту басшылыққа алынған. Әрине, бұл қиын нәрсе. Міндеттеме алу бір ерлік, оны орындау мың ерлік дегендей мен бар күш-жігерімді серттен шығу үшін жұмсаймын,– деген бір естелігінде.Міне, кішкене естеліктердің өзінде теңіз портының тынымсыз еңбек еткендігі жөнінде білуге болады. Ондағы әр бөлімге жауапты мамандардың өзі жұмысты адал және аса жауапкершілікпен жұмыс істегендері көрініп-ақ тұр. Қаншама әлем елдеріне зат тасымалдаған теңіз портының таңғажайып естеліктері бір бөлек. Енді ол – тарих.

Портты қала қызметкерлері туралы естіп пе едіңіз?

<a href="https://kyzylorda-news.kz/">Kyzylorda-news.kz</a> Апта басында Шиелі аудандық прокоротураның бастамасымен,&nbsp; Мансап орталығының ұйымдастыруымен бос жұмыс орындары жәрменкесі өтті. Жәрменке өткізудің мақсаты – екі қолға бір күрек іздеген азаматтарды жұмыспен қамту, жұмыссыздық деңгейін төмендету. Осы орайда Шиелі аудандық жұмыспен қамту әлеуметтік бағдарламалар бөлімінің ғимаратында&nbsp; 19 жұмыс беруші мекеме қажетті мамандар тізімін ұсынды. Оған әлеуметтік тұрмысы төмен отбасылардан жұмыссыз 50-ге жуық азамат қатысты.&nbsp;Бос жұмыс орындары жәрмеңкесіне Шиелі аудандық білім бөлімінің №149 Әлиакбар Монтаев атындағы орта мектебі, Шиелі индустриалды-аграрлық колледжі, «Honeymood-Балдай» кондитерлік дүкені, «Гежуба Шиелі Цемент» ЖШС, «Шиелі ауданаралық көпбейінді орталық ауруханасы», «САС Қазақстан» ЖШС, СПМ-Қызылорда ЖШС, Бала би ауылдық мәдениет үйі, «KMF» микроқаржылық ұйымы мен жеке кәсіпкерлер тарапынан 61 бос жұмыс орны ұсынылды. Жәрмеңкеде Қазақстан Республикасының еңбек нарығын дамытудың 2024-2029 жылдарға арналған тұжырымдамасының мүмкіндіктері мен жұмыспен қамту саласында көрсетілетін әлеуметтік колдау түрлері туралы кеңінен мәліметтер берілді. Сонымен қатар 8 азамат тұрақты жұмысқа орналасып, 15 азаматтың түйіндемесі әңгімелесуден өткізу үшін қабылданды. Пробация есебінде тұрған 2 азамат бизнес-идеяларды дамытуға қайтарымсыз грант алуға өтініш білдірді.Қазіргі таңда «Гежуба Шиелі Цемент» ЖШС, Шиелі электр тарату торабы акционерлік қоғамы, «Ритм» ЖШС, «Honeymood-Балдай», «САС Қазақстан» ЖШС тарапынан ұсынылған бос жұмыс орындарына «электромонтер», «Аспаз», «Тау-кен инженері», «сатушы» «қосалқы жұмысшы», «Бетоншы» маманы қажет. Толық ақпарат алу үшін Шиелі кенті М.Шоқай №53 мекен-жайында орналасқан аудандық Мансап орталығына жүгінсеңіздер болады.

Шиеліде 61 бос жұмыс орны бар

<a href="https://kyzylorda-news.kz/">Kyzylorda-news.kz</a> Өңірдегі кәсіпкерліктің дамуы сан қырынан көрініс табуда. Қолдағы барды мол табыс көзіне айналдырып, ел игілігіне еңбек ету қазіргі кәсіпкердің басты ұраны. Аймақ кейінгі жылдары кез келген сала бойынша алдыңғы қатарда. Әсіресе, кәсіпкерлік саласындағы өсу өңір экономикасының әлеуетін арттыруда. Жаңа жобалар жалғасын тапты. Жұмыс орындары ашылып жатыр.Қармақшыда сервистік көлік жөндеу орталығының бірі – «АНС».&nbsp;Аудан орталығындағы көлік жөндеу шеберханасын ашқан жас кәсіпкер Бауыржан Алпысбайұлы бүгінде тұрақты тұтынушыларын жинап үлгерген.&nbsp;Ол басшылық ететін орын 2018 жылы қайта жөндеуден өткен. Алғашқыда кәсіпкер көлік жуу &nbsp;орталығын ашады. Алайда көлік жөндейтін орын аз екенін ойлана келе жаңа кәсіптің көзін ашуды мақсат етеді. «Бизнестің жол картасы – 2020» бағдарламасы арқылы 6 млн. теңге көлемінде несие алады. Қолға тиген қаржыға қажетті құрал-жабдығын алып, нысанға күрделі жөндеу жұмысын жүргізеді.<blockquote>– Орталықта орналасқан соң мұнда көлік жиі келеді. Себебі бұрынғыдай емес, қазір көлік тізгіндеушілердің қатары көбейген. Кейде шеберлер үлгермейді. Десе де олар – өз ісінің маманы, – дейді Бауыржан Алпысбайұлы.</blockquote>Қазірде мұнда&nbsp;көлік жөндеу шеберханасында шина-құрсымды жөндеу, дөңгелек теңгеру, көтергіш секілді жаңа құрылғылар жұмыс жасап тұр. Мұнда заматында екі көлікке дейін қабылдайтын мотор қозғалғыш бөлшектерді жөндеп, байқастау мен ірілі-ұсақты жұмыстар істеледі.<blockquote>– Табыс табамын деушіге жұмыс көп.&nbsp;Бос жатқаннан еңбек ету керек. Ал сол еңбек ащы тер шығарса, соңында тәтті жемісін береді. Тек мемлекет тарапынан көрсетілген қолдауды тиімді пайдаланса болғаны. Тұтынушылар көлігіне қосалқы бөлшектерін өзімен қоса алып келеді. Алдағы уақытта осы шеберханадан дүкен ашып, оны келушіге өзіміз ұсынсақ деген ойымыз бар. Сервис ашу бұрыннан жоспарда болған.&nbsp;Қазір бес жыл уақыт болып қалыпты, – дейді жас кәсіпкер.</blockquote>

Қармақшыдағы сұранысқа ие сервистік орталық

<a href="https://kyzylorda-news.kz/">Kyzylorda-news.kz</a> Адамзат тарихында қоршаған ортаға зияны мен денсаулыққа тигізетін әсері бойынша жоғары деңгейлік көрсеткішке жеткен ірі ядролық апаттар бар.&nbsp;Соның алғашқысы – Чернобыльдағы АЭС апаты. Бұдан 38 жыл бұрын Украинаның Чернобыль қаласындағы атом-электр стансасында алапат апат орын алған-ды. Станса аумағындағы төртінші энергоблокта қатты жарылыс болып, көп мөлшерде радиоактивті сәуле ауаға таралады. Осы техногенді апаттың салдарын жоюға КСРО-ның барлық республикасынан еріктілер қатысса, қазақ жерінен де сарбаздар жасақталып, АЭС-ке аттанады. Алайда апаттың денсаулыққа зияны тиеді дегенді ешкім ойламайды. Ойлағандар болған жағдай да өз өмірін қатерге тігіп, сол жақтағы жергілікті халықтың жағдайын алдыңғы қатарға қояды.Украина халқының басына түскен қауіп-қатерді жою ісіне ауданнан 14 азамат аттанады. Солардың бірі болған қармақшылық Асылхан Бисенбаев сол кезеңнің оқиғасын еске алып, бізбен әңгімесін бөлісті.<blockquote>– Жарылыстан кейін 1987 жылы шілдеде аудандағы әскери бөлімде бізді бір ай бойы апат ошағына дайындады. Ол кезде әскерге барып келсең де қатардағы жауынгер ретінде есепте тұрасың. Азанғы сағат 5-те келіп, аман-сау екенімізді білдіріп, тіркеліп жүрдік. Соңғы күні дайындықтан кейін барлығымызды бір бөлмеге жинады. Ол уақытта қазіргідей ұялы телефон деген жоқ. Радиограмма арқылы облыстағы әскери комиссариат бастығы байланысқа шығып, бірден Чернобыльге баратынымызды ескертті. Қалтамызға құжатымызды салып шығумен қатар, әркім өз мамандығы бойынша сол жақта жұмыс істейтінімізді айтты. Таңғы 5-те көлікпен облысқа жетіп, екі күн комиссиядан өттік. Үстімізге жаңа форма киген 80 сарбаз сөйтіп облыстан Украинаға аттандық. Ол кезде эшелон пойызы болғасын жәй жүріспен 1 апта да жеттік. Жеткеннен кейін әрқайсымызды мамандығымыз бойынша жан-жаққа бөлді. Қармақшыдан төрт жігіт Чернобыльден 30 шақырым қашықтықта орналасқан Иванов ауданы, Аранов ауылындағы 74161 әскери бөлімге орналастық. Штабтағы инженер мамандығымды сұрап, астыма трактор техникасын берді. Сөйтіп ОГЕМ механикалық колоннасында үш күн қыш тасыдым. Одан кейін қайтадан жаңа ЮМЗ тракторын ұсынды. Төрт жігіт 15 минуттан кезектесіп жұмыс істеп, 45 минуттан демалып отырдық. Себебі техникада көп отыруға болмайды. Ауаға тараған улы сәуле кез келген жерге қонып залалын тигізуде. Біздің жұмыс құйылған бетондарды бұзу. Бізге дейін жарылыс болған аумаққа топырақ төгіп, үстіне 40 см бетон құйып тастаған екен. Өйткені радиациялық қалдықтар көкке көтерілмес үшін осылайша беті жабылған. Ал бізге берілген тапсырма жер астымен жүргізілген байланыс немесе су каналдарының көзін ашу. Одан бөлек те құлаған бетондарды жару секілді үлкен жұмыстарға атсалыстық. Міне осылай атом-электр стансасында вахталық жұмыс істедім, – дейді куәгер Асылхан Сағынтайұлы.</blockquote>Әскери тәртіп бойынша азанғы сағат 5-те басталған жұмыс осылайша үш айға созылады. Кейін елдің заңы бойынша отыз жасқа толмағандар елге қайтарылсын деген бұйрық шығып, бірқатар жұмысшылар туған жеріне оралады. Сол бұйрыққа облыстан барған сарбаздар да ілінді. Оның ішінде Өмірбек Шораяқов, Гресс Петро, Владимир Клеменко және Асылхан ағамыз да болыпты. «Ол кезде небәрі 27 жастамын» дейді ол. Стансада үш ай вахталық жұмысын өтеген кейіпкеріміз 6 қарашада елге оралады. Радиациямен ластанған қала осылайша қаншама адамның өміріне залалын тигізбей қоймады. Улы ауаның әсері бір кездері сол кезден-ақ жұмысшыларға кесірін тигізсе, кейіннен де елге жеткен талай сарбаздың өмірін жалмаған.<blockquote>– Біз ол кезде радиацияның мұншалық қатты әсері бар екенін білмедік. Бірақ мен бірінші 15 күндік жұмыстан кейін-ақ сезіндім. Ол жақта күн салқындау болатын. Күншуақта демалып отырған жерімде ұйықтап кетіппін. Көп ұзамай оянсам еңсемді ауыр зіл басып тұрғандай болды. Басым қатты ауырып тұр екен. Денемді әрең икемге келтіріп, зорға тұрдым. Одан кейін үйреністім бе, әйтеуір білінбей кетті. Менен бөлек сол жерде жүрген адамдардың біразы ауырып, тіпті өліп кеткені де болды. Енді жер үсті және жер асты сулары ластанған, өсімдік тіпті тіршілік атауы қатты уланды десем артық айтқаным емес. Қаншама үй иесіз қалды. Бір қала солайымен бос қаңырады. Үйін қимай көшпей отырғанды да көрдік. Стансадан шыққан көліктерді су шашып жуу арқылы тазалап отырды. Дөңгелекпен ілесіп түсіп қалған майда тас қалдықтарынан радиация тарамас үшін үстін қорғасынмен бастырып қойған. Бір сөзбен айтқанда бұл апат соғыстың залалынан да асып түскені сөзсіз, – дейді Чернобыль ардагері.</blockquote>Биыл Чернобыль атом электр стансасындағы ядролық апаттың орын алғанына 38 жыл толып отыр. Талай боздақтың өмірін қиған қайғылы оқиға 1986 жылдың 26 сәуірінде орын алды. Дерекке сүйенсек, дүниежүзіндегі атом энергетикасы тарихындағы ең ірі жарылыстың зардабын жоюға 800 мыңдай адам қатысқан. Соның 32 мыңы қазақстандық. Бүгінде солардың санаулысы ғана аман қалған. Қазіргі таңда зардапты жоюға атсалысқандардың ішінде аудан бойынша 7 ардагеріміз бар. Олардың басым бөлігі ІІ және ІІІ топтағы мүгедектер. Сонымен қатар соғыс ардагерлерімен заң бойынша теңестірілген.&nbsp;

Асылхан Бисенбаев: Өткен күннің естелігін жадымыздан шығармаймыз 

<a href="https://kyzylorda-news.kz/">Kyzylorda-news.kz</a> Қазақстан Республикасының Конституциясында «Балаларына қамқорлық жасау және оларды тәрбиелеу – ата-ананың табиғи құқығы әрі парызы» деп, отбасындағы бала тәрбиесіне ата-ананың жауапты екендігі анық көрсетілген. Сондай-ақ «Отбасы туралы Заңда» әр ата-ана өз ұрпағын тәрбиелеп, оны қоғамға араластырып, қатарға қосуы міндеттелген. Иә, отбасы – баланы қалыптастырушы алғашқы бесік болып табылады. Балаға ең алдымен өз ата-анасы тәрбие береді және бала сол тәрбиені келешекте сыртқы ортада көрсетері анық.Отбасы мүшелерінің жалпы қарым-қатынасы, бір-біріне сый-құрметі немесе басқа адамдарға деген сыйластығы, яки болмаса, жағымсыз іс-әрекеттері баланың қалыптасуына ерекше әсер етеді. Шаңырақ басындағы ұрыс-керіс, реніш, орынсыз жанжал бала психологиясында жағымсыз қалыптасып, алдағы уақытта балаға зиянын тигізіп, оны бұзақы әрекеттерге итермелеуі мүмкін. Яғни&nbsp; баланың қатігез, өзімшіл, дөрекі болып өсуіне әкеп соқтырады.Ендігі кезекте бүгінгі күннің өзекті мәселелесінің біріне айналып отырған – бала құқығы. Ертеңгі ел болашағын қалыптастырушы бүгінгі ұрпақ құқығын қорғау аса маңызды. &nbsp;Оның тәрбиесіне отбасы, мектеп, сондай-ақ бүкіл қоғам болып атсалысуымыз қажет. Иә, қай ата-ана болмасын өз баласының жаман болғанын қаламайды және жаман тәрбие бермейді. Бірақ тәрбиенің немқұрайлығынан, шектен тыс еркелетуден немесе ата-ананың ішімдік ішіп баласына қысым көрсетуінен бала психологиясы бұзылып жатады. Мұндай тәрбие көрген бала бұзақылық әрекеттерге барары сөзсіз.Бұл жөнінде Арал ауданының жергілікті полиция қызметінің кәмелетке толмағандар істері жөніндегі аға учаскелік полиция инспекторы, полиция майоры Алма Сермағамбетова:- Бала құқығын қорғауды ата-ана, бағып-қағу және қамқорлыққа алу органдары, сот, прокурор жүзеге асырады. Сонымен қатар заң баланың абыройын төмендетуден, ата-аналар тарапынан болатын қиянаттан қорғайды. Елімізде балалардың мүддесі қорғала отырып, ондай ата-аналарды ата-аналық құқығынан және баланы бағып-қағуға беруден айырылуға байланысты шараларды қолдану заңдылық тұрғыда қарастырылған. Сондай-ақ әкімшілік құқық бұзушылық жасауға бейім балаларды есепке қоямыз. Яғни баланың тұрғылықты мекенжайын есепке қойып, психологиялық-профилактикалық жұмыстар жүргіземіз. Құқық бұзушылық әрекет жасаған баланы психологтың жеке қабылдауынан өткізіп, оның қызығушылығы жайында ақпарат аламыз. Мәселен, балалардың бірі дала ойындарына қызықса, енді бірі сурет салуға қызығушылы болады деген секілді. Ақпарат алынған соң білім бөлімімен байланысып, баланың &nbsp;бос&nbsp; уақытын шектеу мақсатында арнайы үйірмелерге тартамыз. &nbsp;Сонымен бірге аудандағы кәмелетке толмағандардың кешкі және түнгі беймезгіл жүрістерін ырықтау, келеңсіз жайттарды олардың тарапынан қылмыс пен құқық бұзушылықтардың алдын алу мақсатында полицияның кешенді күштері жүйелі түрде жұмылдырылуда.&nbsp; Қылмыс пен құқық бұзушылықтардың жолын кесу мақсатында, жыл басынан үкіметтік емес ұйымдармен және бала тәрбиесіне мүдделі органдармен бірлесе отырып, аудан көлемінде «Жасөспірім», «Қауіпсіз мектеп автобусы», «Жасөспірім-Көше», «Заң – Бала– Қауіпсіздік», «Түнгі қаладағы балалар», «Абайлаңыз, балалар!», «Отбасында әкенің рөлі», «Зорлы- зомбылықсыз балалық шақ» және «Демалыс» атты жедел-профилактикалық іс-шаралар өткізілді. Тағы айта кетерлігі, «Жастар ресурстық орталығымен» бірігіп, құқығын танып-білу мақсатында мектеп оқушыларына семинар-тренингтер, видео қойылымдар көрсетіп, жиын өткізіп, пікірталас ұйымдастырамыз. Жалпы, әр бала өз құқығын білуге және оны қорғауға міндетті. Әрбір ата-ана өз баласының тәртібі мен тәрбиесіне мән беріп, бос уақыттарында немен айналысатынына қатаң бақылау жасап, жасөспірімдер арасында құқық бұзушылық пен қылмыстың төмендеуіне септігін тигізер еді. Сол үшін тәуелсіз елімізде бала құқығын шеттетпей, алдыңғы қатарға қойғанымыз жөн,–деді.Отбасы болған соң онда түрлі жағдаяттар орын алып жатады. Мәселен, баланың бұзықтық жасап қоюы, ата-ана арасында келіспеушілік туындауы сынды оқиғалар болып тұрады. Аталған екі жағдайға баланың көзқарасы қандай болады? Сондай-ақ бұл баланың психологиясына қалай әсер етеді? Әрине ой-өрісі толықтай дамып үлгермеген&nbsp; баланың психологиясы да қалыптасып үлгермейді. Ол айтылған сөз бен іс-әрекетті ой елегінен өткізбей тура қабылдайтын болады. Бұл туралы Ж.Әбдірашев атындағы №62 мектеп-лицейінің педагог-психологы Айгерім Еркінқызы:-Қазір біздің қоғамда «бұл бала ғой, не түсінеді дейсің? Бүгін көргенін ертең-ақ ұмытып қалады» деген ой қалыптасып қалған. Әрине бұл бала психологиясын қалыптастырудағы қателік болып табылады. Себебі ақыл-ойы тап-таза тіршілік иесінің есте сақтау қабілеті де тасқа қашалған жазумен тең. Мәселен, ата-ана баласына сыртта көп ойнауға болмайтынын айтады. Бірақ ойын баласы тыңдамай, қатарластарымен ойнап кете береді. Келесі күні баланы далаға шығармау мақсатында «сыртта мастар, ұрылар, қорқынышты құбыжықтар жүреді» деп қорқытсаңыз, бала ойынға шығуға қорқып қалады. Міне, осы әрекеттен соң бала есейгенде өзін еркін сезіне алмайтын, ылғи да қорқыныш жетегінде жүретін болады. Бір сөзбен айтқанда, өзімен өзі қоғамнан оқшауланып қалады. Мектепте біз оқушылардан түрлі психологиялық тесттер аламыз. Мәселен, баланың мінез-құлқын анықтайтын, суицидке қарсы және әлеуметтік сауалнамалар жүргіземіз. Тест нәтижесі бойынша мінез-құлқында өзгеріс табылып тұрған баланы жеке сұхбатқа шақырамыз. Сонымен бірге мінез-құлқы жағынан өзгеріс табылған жағдайда оның ата-анасы және сынып жетекшісімен байланысамыз. Баланы жеке бақылауға алып, онымен түзету-дамыту жұмысын ұйымдастырамыз. Отбасынан қысым көрген немесе ата-анасы ішімдікке салынған баламен арнайы психологиялық жұмыстар жүргіземіз,– деді.Бала құқығын қорғау оның ата-анасынан бастап әр адамның азаматтық борышы болып саналады. Сот тарапынан бала құқығының қорғалуы қай уақытта болмасын басты назарда болады. Ендеше бүгінгі бала тәрбиесіне келгенде заманға сай білімді де, білікті болып қалыптасуы жолында олардың қазірден бастап құқығын қорғап, психологиялық қолдау – бізге міндет. Елімізде із-түзсіз жоғалып кетіп жатқан балалар жетерлік. Тәуелсіз елдегі тәрбие процесінде әділетті болуды әр адам өзінен бастағаны жөн.

Аралда бала құқығы басты назарда

Қызылорда облысындағы “Руханият” жылы аясында композитор, ҚР Еңбек сіңірген қайраткері, «Құрмет» орденінің иегері, Қазақстан Композиторлар Одағының мүшесі, Қызылорда облысының Құрметті азаматы Рамазан Таймановтың 70 жасқа толу мерейтойына арналған І республикалық «Сыр Ана» әншілер конкурсы қорытындыланды.Сыр даласын әсем әнге бөлеген конкурста республикамыздың түкпір-түкпірінен және Сыр өңірінен арнайы іріктелген 17 талапкердің өнерін композитор, Қазақстан Композиторлар одағының төрағасы, Қазақстанның еңбек сіңірген қайраткері Серік Әбдінұров, әнші, Қазақстанның еңбек сіңірген қайраткері Жеңіс Ысқақова, продюсер, Мәдениет қайраткері Сәрсен Ибрашева, композитор, Мәдениет саласының үздігі Сәбит Ұлықпанұлы және мерей той иесі Рамазан Тайманов бағалады.Конкурс қорытындысы бойынша жүлделі lll орынды Назым Мауленқызы (Алматы қаласы), Әкімжан Шакиров (Ақтөбе облысы), «Шабыт» тобы (Қостанай облысы), ll орынды Арайлым Маханбетжанова (Қызылорда қаласы), Ақтоты Абдрахманова (Көкшетау қаласы), l орынды Замира Көлімбетова (Байқоңыр қаласы) иеленсе, Бас жүлдені Айсұлу Әбді (Қызылорда қаласы) жеңіп алды. Сондай-ақ, жүлдегерлерге қаржылай сыйлық табысталды.Марапаттау рәсімі композитордың шығармашылық ән кешіне ұласып, кеште Сыр өңірінің өнерлі өрендері мен конкурс жүлдегерлері және Сыр елінің мақтанышы Жеңіс Ысқақова Рамазан Тайманов әндерін орындап, көрермен қошеметіне бөленді.<img src="https://knadmin.beoblood.kz/uploads/FB_IMG_1716617173820_ddb58853fe.jpg" alt="FB_IMG_1716617173820.jpg"><img src="https://knadmin.beoblood.kz/uploads/FB_IMG_1716617166720_19e73497ba.jpg" alt="FB_IMG_1716617166720.jpg"><img src="https://knadmin.beoblood.kz/uploads/FB_IMG_1716617155306_cb768335e1.jpg" alt="FB_IMG_1716617155306.jpg">

Республикалық «Сыр Ана» әншілер конкурсы қорытындыланды

<a href="https://kyzylorda-news.kz/">Kyzylorda-news.kz</a> Жуырда Шиеліге қарасты "Көкшоқы" мөлтек ауданындағы «Арман» мәдениет үйінде Шиелі ауданының қоғамдық даму бөлімінің мемлекеттік әлеуметтік тапсырысы шеңберінде "Қоғамдық бірлік пен тұрақтылықты қалыптастыру, этносаралық қатынастарды дамыту" әлеуметтік жобасы аясында «Қызылорда облысының жастар Одақтары» қоғамдық бірлестігінің ұйымдастыруымен татулықты, бірлікті, ортақ құндылықтарды насихаттау мақсатында сурет салуға құмар жасөспірімдер арасында «Ұлт бірлігі – ел тұтастығы» тақырыбында сурет салу байқауы ұйымдастырылды.Сурет салу байқауына Шиелі аудандық әйелдер кеңесінің төрайымы Найлә Палымбет, Шиелі аудандық қоғамдық даму бөлімінің басшысы Кенжехан Есенбаев және №252 Г.Н.Ковтунов атындағы мектеп-гимназиясының сурет пәнінің мұғалімі Ғабиден Нұрмаханов әділ-қазылық жасап, оқушылардың жұмыстарын бағалады.Байқау нәтижесінде І орынды №127 Ш.Уәлиханов атындағы мектеп-лицейінің 4-сынып оқушысы Бегімсұлу Шатланбек иеленсе, ІІ орынды №45 «Ақ Орда» мектеп-гимназиясының 3-сынып оқушысы Айгерім Әшімова алды. Ал ІІІ орынды №181 орта мектебінің 7-сынып оқушысы Жанерке Елтай қанжығасына байлады.Барлық жеңімпаз иелеріне бағалы сыйлықтар мен дипломдармен марапатталды.Сонымен қатар, байқауға белсене қатысқаны үшін Кәусар Абдуғаппарға, Александр Кимге, Жанерке Әйтімге, Ұлзере Зинабдиноваға, Кәусар Қайратқызына, Нұрила Панабекке, Айсұлтан Мейірбекке Алғыс хат пен ынталандыру сыйлығы табысталды.

Шиеліде сурет салу байқауы өтті

Kyzylorda-news kz. "Amanat" партиясының облыстық филиалы жанындағы Жастарды қолдау жөніндегі аймақтық кеңестің отырысы өтті. Жиынға партияның облыстық филиалы Атқарушы хатшысының орынбасары Алтынбек Жарылқасынов, жастарды қолдау бойынша кеңестің мүшелері, қалалық мәслихат депутаттары, атқарушы орган мен «Жастар Рухы» ЖҚ оқу орны бөлімшелерінің жетекшілері қатысты.Кеңес отырысының күн тәртібінде кәмелетке толмағандар арасында құқық бұзушылық &nbsp;деңгейін төмендету және жастар арасындағы құқық бұзушылықтың алдын алу, өңір жастарын қолдау, шығармашылығын дамыту бағытында атқарылған жұмыстар мен жоспарлар туралы қаралып, талқыланды.Күн тәртібіндегі мәселелер бойынша кеңес және Сырдария аудандық мәслихаттағы «AMANAT» партиясы депутаттық фракциясының мүшесі &nbsp;Ақтөре Ибрагимұлы, облыстық «Жастар ресурстық орталығы» КММ директоры Талғат Оспанұлы баяндама жасады.Жиын соңында білім беру ұйымдарында және полиция басқармасының профилактикалық есебінде тұрған жасөспірімдерді бақылау және жасөспірімдердің &nbsp;қауіпсіздігін қамтамасыз ету бойынша ұсыныстар айтылды.Отырыс қорытындысы бойынша кеңес мүшелері аталған тақырыптар аясында сұрақтар қойып, талқыланған мәселелердің шешімі нақтыланды.

Жастарды қолдау жөніндегі аймақтық кеңестің отырысы өтті

Фото: Асфендияров атындағы ҚазҰМУҚазақстан тағамтану академиясының президенті, әлемдік денсаулық сақтаудың аңызы және қазақстандық медицинаның мақтанышы, академик Төрегелді Шарманов 93 жасында өмірден озды.&nbsp;<blockquote>«Әлеуметтік-гуманитарлық саладағы үздік жетістіктері және денсаулық сақтау саласын дамытуға қосқан зор үлесі үшін марапатталған, Қазақстан Республикасының жоғары дәрежелі «Еңбек ері» белгісінің иегері, академик Төрегелді Шарманов өмірден өтті», - деп хабарлады С.Д.Асфендияров атындағы Қазақ ұлттық медицина университетінің баспасөз қызметі.&nbsp;</blockquote>Төрегелді Шарманұлы Республиканың Денсаулық сақтау министрлігін 12 жыл басқарып, алғашқы медициналық-санитарлық көмектің теңдесі жоқ жүйесін құрды. 1974 жылдан бастап республикадағы жетекші ғылыми ұйымдардың бірі – Қазақ тағамтану академиясының тұрақты меңгерушісі.2005 жылы академик Шармановқа Дүниежүзілік денсаулық сақтау ұйымының жоғары ерекшелік дәрежесі – Леон Бернард сыйлығы берілді, оның иегері бүкіл әлем тарихында небәрі 29 адам болған. Бұл денсаулық сақтау саласындағы Нобель сыйлығының бір түрі саналады.&nbsp;<blockquote>«Төрегелді Шарманұлы Қазақстанның медицина қауымы арасында ғана емес, зиялы қауым, шығармашыл жастар, көптеген саясаткер, республиканың басқа да азаматтары арасында үлкен беделге ие болды. Академик Шарманов 93 жыл ішінде елге, әлемге көп еңбек сіңірді», - деп толықтырды ҚазҰМУ.</blockquote>

Академик Төрегелді Шарманов дүниеден өтті 

<a href="https://kyzylorda-news.kz/">Kyzylorda-news.kz</a> №14 мектеп-лицейдің орыс тілі мен әдебиеті пәнінің мұғалімі Қонарова Жанна Құспанғалиқызы республикалық «Үздік педагог» конкурсының қорытындысымен жеңімпаз болып танылып, 3 миллион теңге сыйақы иеленді.Биылғы оқу жылында жалпы аудан мектептерінің 11-сыныбын 947 оқушы, 9-сыныбын 1611 оқушы бітіргелі отыр. Олардың ішінде 35 түлек «Алтын белгіге» үміткер. 63 оқушы «Үздік аттестат» иегерлері, 9-сыныптар бойынша үздіктер қатарында 154 оқушы бар. Ереже талаптарына сай Алтын белгіге үміткерлердің жазбаша емтихан материалдары Қызылорда облысының білім басқармасының сараптамасына ұсынылып, қорытындысы шығарылатын көрінеді.&nbsp;Жоғары оқу орындарының мемлекеттік гранты конкурсына арналған Ұлттық бірыңғай тестілеу шарасы 16 мамыр-5 шілде аралығында өтеді. Аудан бойынша кезеңдік шара 3 маусым күні басталады. І кезеңге 682, ІІ кезеңге 679 оқушы тіркеліп отыр. Биылғы жылдың басты жаңалығының бірі, әрине, бұл аудан орталығынан көптен бергі күткен ҰБТ пунктінің ашылуы болды.&nbsp;Ауданда үш ауысымда оқитын және апатты жағдайда деп танылған мектептер толықтай жойылды. «Жайлы мектеп» жобасы бойынша Арал ауданында 4 мектеп салу жоспарланған еді. Бүгінде оның 2-інің құрылыс жұмыстары жүргізілуде. Ағымдағы жылдың қыркүйек айында пайдалануға берілмек. Қалған екеуінің құрылыстары жыл соңына дейін басталады деп күтілуде. Сондай-ақ Тоқабай елді мекеніндегі 100 орындық №248 орта мектеп&nbsp; және&nbsp; Ақшатау елді мекеніндегі 50 орындық жаңадан ашылатын негізгі орта мектебінің ғимараттары жеке инвесторлар есебінен жүргізіліп жатыр. Және жаңа оқу жылына дейін қолданысқа енгізілетін болады деп жоспарлануда.Жазғы тынығу маусымын ұйымдастыру мақсатында 48 мектепте лагерь жұмыс істейтін болады. Оған 1-10 сынып аралығында 16509 бала тартылған. Оның ішінде Қамбаш лагеріне – 803, мектеп жанындағы лагерьлерге - 8356, 17 мектептегі шатырлы лагерьге – 285, 14 мектептегі этнолагерьге – 290,&nbsp; еңбек лагеріне – 1125, аула клубтарына – 1155 оқушы, қосымша білім беру ұйымдары жанындағы лагерлерге – 960 бала қамтылады.

Қазақстан және Қызылорда облысының жаңалықтары