<a href="https://kyzylorda-news.kz/">Kyzylorda-news.kz</a> ҚР Парламенті Сенатының депутаттары Байқадамов Наурызбай Сейтқалиұлы мен Рүстемов Руслан Рүстемұлы, сондай-ақ ҚР Парламенті Мәжілісінің депутаты Ергешбаев Мұрат Нәлқожаұлы жұмыс сапарымен Қармақшы ауданына келді.Сапарға Қармақшы ауданының әкімі Жандос Еркінбек, «AMANAT» партиясының Қызылорда облыстық филиалының төрағасы Алмасбек Есмаханов және салалық құрылым басшылары қатысты.Депутаттар алдымен Жаңажол ауылдық округіндегі «Жаңажол» жауапкершілігі шектеулі серіктестігінің егіс алқаптарында болды. Мұнда олар күріш алқаптарының жай-күйі мен бақша дақылдарының өсірілу барысымен танысты. Сонымен қатар, шаруашылықтарда қашыртқы суларын екінші рет пайдалану арқылы егін алқаптарын сумен қамтамасыз ету тәжірибесі көрсетілді.Сапар барысында ҚР Парламентінің өкілдері серіктестікке қарасты алма бағының жұмысын көріп, тамшылатып суару технологиясының қолданылуымен танысты. Аталған технология заманауи тәсілдерге негізделіп, су үнемдеу мен өнімділік көрсеткіштерін арттыруға бағытталған.Мұнан кейін депутаттар Дүр Оңғар, Иіркөл және Төребай би ауылдарындағы газдандыру жобаларына арналған стендтік таныстырылымға қатысты. Жоба аясында ауылдық елді мекендерге газ құбырлары мен орамішілік желілер тарту жұмыстары жүргізілуде. Депутаттарға жобаның кезеңдері мен қаржыландыру көздері жөнінде тиісті сала мамандары ақпарат берді.Жұмыс сапары аясында Парламент мүшелері инфрақұрылымдық жобалардың жүзеге асырылуы мен ауыл шаруашылығы саласындағы өзекті мәселелерге назар аударып, ұсыныстарын білдірді. Сонымен қатар, халықтың өмір сүру сапасын арттыру бағытында атқарылып жатқан жұмыстарға оң бағасын берді.

Парламент депутаттары аграрлық және инфрақұрылымдық жобалармен танысты

<a href="https://kyzylorda-news.kz/">Kyzylorda-news.kz</a>&nbsp; Жыл сайын 18 шілдеде әлем халқы Нельсон Мандела күнін атап өтеді. &nbsp;Нәсілшілдікке қарсы күрескер, бейбітшілік пен келісімнің жаршысы болғаны көпке белгілі. Осы ретте, ҚАЖ департаментіне қарасты №68 мекемесі де атаулы күнді ескермек. Соның аясында жазасын өтеуші азаматтар арасында іс-шара өтті.&nbsp;Мекеме бастығының тәрбие жұмыстары жөніндегі орынбасары, әділет майоры Мирамбек Тұрымбетов Нельсон Мандела туралы тарқата айтты. Оның өмір жолы – қайсарлықтың, ел бірлігі мен бейбітшіліктің шынайы мысалы болғанын тілге тиек етті.<blockquote>– Қайраткердің есімін бұрын-соңды естуім болса да, бүгін толыққанды ақпарат алдым. Манделаның мұрасы мәңгілік екеніне, оның жас ұрпаққа сабақ болатынына көзім жетті. Қоғамға пайдалы игі іспен айналысқаны үлгі боларлық. Осыдан соң мен де болашаққа зор үмітпен қарауға бекіндім, - деді жазасын өтеуші азамат.</blockquote>АКАӘПТЖББ-ның жасақ бастығының міндетін атқарушы, әділет майоры Айзат Мырзалы атаулы күнге орай жазасын өтеуші азаматтар арасында іс-шара легі жалғасатынын айтып өтті. Спорттық жарыс ұйымдастырылатыны хабарланып, оған белсенді қатысуға шақырды.

Нельсон Мандела күні атап өтілмек

<a href="https://kyzylorda-news.kz/">Kyzylorda-news.kz</a> Халық қалаулылары Қармақшы ауданына жұмыс сапары барысында «Жаңажол» ЖШС – нің күріш өңдеу зауытының жұмысымен танысты.Күріш өңдеу зауыты Жаңажол ауылдық округінде 2024 жылы қыркүйек айында іске қосылды.Зауытқа құны 92,0 млн теңгені құрайтын өндіріс желісі (диірмен) орнатылған. Жобалық қуаттылығы тәулігіне 100 тоннаға дейін күріш өңдеп шығарады, сондай-ақ сыйымдылығы 5000 тонна астық сақтау қоймасы қайта жаңғыртылған. Зауыт заманауи технологиялармен жабдықталған және экологиялық стандарттарға сай жұмыс жасайды.Танысу барысында депутаттар мұндай өндіріс орындары ауыл экономикасын дамытуға, өнімнің құнын арттыруға және экспорттық әлеуетті көтеруге зор үлес қосатындығын атап өтті.&nbsp;<img src="https://knadmin.beoblood.kz/uploads/Agrosala_amanat_3a41627d7f.jpg" alt="Агросала аманат.jpg">

Күріш өңдеу зауыты – агросала дамуының нақты нәтижесі

<a href="https://kyzylorda-news.kz/">Kyzylorda-news.kz</a> Қармақшы ауданында жұмыс сапарымен жүрген ҚР Парламенті Мәжілісіндегі «AMANAT» партиясы депутаттық фракциясының мүшесі Мұрат Ергешбаев, партияның облыстық филиалының төрағасы Алмасбек Есмаханов, Сенат депутаттары, партия мүшелері Наурызбай Байқадамов пен Руслан Рүстемов ауыл тұрғындарының тұрмыс сапасын арттыруға бағытталған Дүр Оңғар, Иіркөл және Төребай би ауылдарына газ құбыры мен орамішілік газ желісін тарту жобасымен танысты.Дүр Оңғар ауылына газ тарту жобасының жалпы құны 7 млрд. 172 млн. теңгені құрайды. Қазіргі таңда «МБК Құрылыс» ЖШС мен құрылыс-монтаж жұмыстары жүргізілуде. Бұл жұмыстарға 2024 жылы облыстық бюджеттен 1,7 млрд. теңге биыл Ұлттық Қордан 5,2 млрд. теңге қаржы қаралып отыр. Жоба аясында 86,9 шақырым газ құбыры тартылып, 3 газреттегіш шкафты пункттер орнатылмақ.Ал, Иіркөл және Төребай би ауылдарына газ желілерін тарту жұмыстарына жобалық-сметалық құжаттары әзірленіп, мемлекеттік сараптамадан оң қорытынды алынған. Тиісті басқармаларға бюджеттік өтінім өткізіліп, нәтижесінде 2025 жылғы маусым айындағы нақтылауында облыстық бюджеттен жиыны 643,4 млн. теңге қаржы қаралған. Қазіргі таңда мемлекеттік сатып алу жұмыстары жүргізуде.Мәжілістегі фракция мүшесі Мұрат Ергешбаев партияның сайлауалды бағдарламасына енген жобаның сапалы және мерзімінде халық игілігіне берілуі қатаң бақылауда екенін атап өтті.Жалпы өңірде газдандыру деңгейі 78 пайызға жетті. Жыл соңына дейін бұл көрсеткішті 83 пайызға дейін жеткізу көзделуде.

Газдандыру жұмыстары депутатттардың назарында

<a href="https://kyzylorda-news.kz/">Kyzylorda-news.kz</a> Интравитреальды инъекция – көз ауруларын емдеудің заманауи әрі тиімді әдістерінің бірі. Бұл – дәрілік препаратты көздің шыны тәрізді денесіне тікелей енгізу процедурасы. Бұл медициналық көмекті МӘМС жүйесі аясында қалай тегін алуға болады – біздің материалда.Ляззат көз ауруы бойынша диспансерлік есепте тұр. Бұған дейін оған катаракта жою ота жасалған. Енді пациентке интравитреальды инъекция тағайындалды. Қажетті жолдаманы ол Емдеуге жатқызу бюросы арқылы алды.<blockquote>– Учаскелік дәрігердің жолдамасы бойынша офтальмологтың тексеруінен өтіп жатырмын. Консультациялар, анализдер мен диагностикалық қызметтерді МӘМС жүйесінде сақтандырылған болғандықтан тегін аламын. Дәрігерлерге алғысым шексіз! – деді Ляззат.</blockquote>Мамандардың айтуынша, бұл әдіс қант диабеттік ретинопатия, жасқа байланысты көз торының дегенерациясы, көздің қабыну аурулары және тағы басқа ауруларды емдеу үшін қолданылады. Жіңішке инемен дәрі тікелей көз ішіне енгізіледі, бұл емнің тиімділігін арттырады.<blockquote>– Бір инъекцияның бағасы шамамен 150–200 мың теңге. Қант диабетімен ауыратын науқастарға бұл ем 20 ретке дейін қажет болуы мүмкін. Жалпы шығын көлемі үлкен. Ал МӘМС аясында бұл процедура толығымен тегін, – деп түсіндірді №3 қалалық емхананың офтальмолог дәрігері Толқын Таңатова.</blockquote>

Көзге интравитреальды инъекция – МӘМС аясында тегін

<a href="https://kyzylorda-news.kz/">Kyzylorda-news.kz</a> Бүгін ҚР Парламенті Мәжілісіндегі «AMANAT» партиясы депутаттық фракциясының мүшесі Мұрат Ергешбаев, партияның облыстық филиалының төрағасы Алмасбек Есмаханов, Сенат депутаттары, партия мүшелері Наурызбай Байқадамов пен Руслан Рүстемов Қармақшы ауданына жұмыс сапарымен болды.Сапар барысында халық қалаулылары Жаңажол ауылдық округінде орналасқан "Жаңажол" ЖШС-нің 4 егіс бригадасының күріш алқабымен танысты.«Жаңажол» серіктестігінің егіс көлемі 6 мың гектарға жуық. Бөліп қарайтын болсақ, оның 3100 гектары күріштік, 469 гектар жаңа жоңышқа, 600 гектары ескі жоңышқа, 5 гектар картоп, 325 гектар бидай, 39 гектар жүгері және 56 гектары судан шөбі егілген. 9,5 гектарды құрайтын алма бағы бар. Жерді игеруге 245 арнайы техникалармен қамтамасыз етілген. Бүгінгі күні серіктестікте 400 адам жұмыс жасайды.Шаруашылық жұмысымен танысу барысында халық қалаулылары күріш егістігінің жай-күйі, агротехникалық шаралардың орындалуы мен өнімділік мәселелерін ортақ талқыға салып, шаруалардың ұсыныс пікірлерін тыңдады.&nbsp;

Халық қалаулылары егістік жағдайын бағамдап қайтты

<a href="https://kyzylorda-news.kz/">Kyzylorda-news.kz</a> Көпқабатты үйлердің қасбеттерін панельдермен қаптау жұмыстары биыл да жалғасуда. Облыс әкімінің қолдауымен игілікті іске облыстық бюджеттен 1,4 млрд. теңге бөлініп, көпқабатты 20 тұрғын үйдің қасбетін жаңалау жүргізілуде.Жоспар бойынша «Астана», «Шұғыла» мөлтек аудандары, Тәуелсіздік, А.Тоқмағамбетов, Д.Қонаев, Е.Әуелбеков, Әйтеке би, Төле би, Т.Әбуов көшелері мен Н.Назарбаев, Абай даңғылдарындағы көпқабатты тұрғын үйлердің қасбеті ретке келтірілмек.Фото: Қала әкімдігі

Көпқабатты тұрғын үйлердің қасбеттері жаңартылуда

<a href="https://kyzylorda-news.kz/">Kyzylorda-news.kz</a> Облыстық дене шынықтыру, спорт және туризм басқармасы басшысының төрағалығымен алты ай көлемінде атқарылған жұмыстардың қорытындысы бойынша барлық спорт мекемелерінің басшыларына жиын өткізді.Басқосуда мекеме басшыларының функционалдық міндеттемелеріне қойылатын жаңа талаптар, «Қайсар» футбол клубының қазіргі нәтижесі және ойыншылар алу, сондай-ақ, клубқа қосымша инвестор тарту мәселесі тапсырылды, қала және аудандарда орналасқан спорт кешендеріне жөндеу жұмыстарын уақытылы орындау, басқармаға қарасты мекеме бюджетін жоспарлы игеру және алда болатын ауқымды спорттық іс-шараларды жоғары деңгейде өткізу бойынша бірқатар мәселелер талқыланды.Бұдан былай мекеме директорларының келісім-шартына қосымша жүктемелер енгізіледі. Бұл міндеттемелерге олимпиадалық спорт түрлеріне басымдық беру, Әлем, Азия және ҚР чемпионаттарындағы көрсеткіштердің жоғары болуы, мекемедегі бюджет қаражатын жоспарлы және тиімді игеру талабы да қойылды. Бұдан бөлек, аймақ басшысының тапсырмасына сәйкес, жеке кәсіпкерлер теңгеріміндегі спорт алаңдарын қайта жаңғырту және барлық спорт мектептеріне осы бастан жылу беру маусымына дайындық жұмыстарын жүргізу сынды жаңа талаптар қойылды.Айта кетейік, бұрың-соңды мекеме басшыларының функционалдық міндеттемелерінде олимпиадалық спорт түрлеріне басымдық беру, бюджет қаржысын олимпиадалық спорт түрлеріне бағыттау және Әлем, Азия, ҚР чемпионаттарының медаль саны олимпиадалық спорт түрлері бойынша есептеу пункті ешқашан болмаған.Бұл бастама салаға жаңа серпіліс пен оң өзгеріс әкелері сөзсіз.Биыл Мемлекет басшысының бастамасымен шет мемлекеттерден келген ойыншыларға бюджеттен және квазимемлекеттік секторлардан қаржы бөлмеу туралы Жаңа Заң қабылданған болатын. Осыған байланысты, аймақ басшысы Нұрлыбек Машбекұлының батыл қадам жасауы арқылы елімізде алғашқылардың бірі болып «Қайсар» футбол клубы легионерлерден бас тартты. Өз кезегінде командаға тәжірибелі қазақ балалары алынып, олар аймақ абыройын лайықты түрде қорғау үшін өз мүмкіндіктерін көрсетуде.Дегенмен, басқарма басшысы біраз уақыт бұрын команданың нәтижесін жақсарту мақсатында футбол клубтың директорына инвестор тарту, келесі тур ойындарына тәжірибелі 4-5 ойыншы алу, кәсіпкерлермен келіссөздер жүргізу арқылы инвестиция көлемін арттыру туралы тапсырма берген болатын.Жиында аталған мәселелер бойынша клуб директоры Талғат Әбдіғаппарұлы өз баяндамасын жасады. Айтуынша, қазіргі таңда «Қазгермұнай» АҚ команиясымен келіссөздер жүргізіліп, нәтижесінде командаға 30 млн теңгеге жуық қосымша инвестиция тартылмақ. Сонымен қатар, басқа да жергілікті кәсіпкерлермен келіссөздер жүргізу жоспары бар екендігін жеткізді.Бұдан бөлек, қазіргі уақытта «Қайсардың» сапына жаңадан 3 ойыншы қосылып, жасыл алаңда өз мүмкіндіктерін көрсететінін айтты. Одан бөлек, жақын арада команда құрамына тағы да тәжірибесі мол екі ойыншы қосылатынын жеткізді.Осы ретте, басқарма басшысы бұл бағыттағы жұмыстарды уақытылы жалғастыруды, инвестиция көлемін одан әрі арттыруды, кәсіпкерлермен тиімді келіссөздер жүргізуді тапсырды. Сонымен қатар, команданың бас бапкері Виктор Кумыковқа премьер-лига ойындарындағы нәтижені көтеруді және команда жетекшісі Мақсат Байжановқа клубтың нәтижесіне тікелей жауапты екендігін қатаң түрде ескертті.Фото: &nbsp;freepik.com

Спорт: Басқармаға қарасты мекеме басшыларына жаңа талаптар жүктелді

<a href="https://kyzylorda-news.kz/">Kyzylorda-news.kz</a> Қалалық ауыл шаруашылығы және жер қатынастары бөлімінің басшысы Мейрамбек Әжібеков бұқаралық ақпарат құралдарының өкілдеріне І жартыжылдықта салада атқарылған жұмыстар мен алдағы жоспарлар бойынша баспасөз конференциясын өткізді.&nbsp;Есепті кезеңде ауыл шаруашылығы жалпы өнімінің көлемі 1 млрд. 836,2 мың теңгені құрады. 8695 гектарға ауыл шаруашылық дақылдары орналастырылды. Оның ішінде негізгі дақыл күріш 3454 гектарға, картоп 130 гектарға, көкөніс 1329 гектарға, бақша дақылы 990 гектарға егілді. Ал, мал шаруашылығы бойынша, 1100,1 тонна ет, 1093,8 тонна сүт, 149,4 мың дана жұмыртқа өндірілді. Жалпы, қала бойынша мүйізді ірі қара 31 407 бас, уақ мал 35 709 бас, жылқы 21 257 бас, түйе 3306 бас, құс 16 344 бас өсірілуде.<blockquote>– Мақсатына сәйкес пайдаланбаған кәсіпкерлік және ауыл шаруашылығы үшін берілген жер учаскелерін заң талаптарына сәйкестендіру бағытында мониторинг жұмыстары өз жалғасын табуда. Бүгінде осындай 616 гектар жер учаскесі мемлекеттің арнайы жер қорына қайтарылды. 180 жер учаскесі, атап айтқанда жер учаскесін нысаналы мақсатына сай пайдаланылмаған (игерілмеген) кәсіпкерлік мақсатында 76 жер учаскесі, мемлекеттік жерді заңсыз иеленіп, артық қоршау жүргізген 73 меншік иесі, жер учаскесін нысаналы мақсатына сәйкес пайдаланбай отырған 31 меншік иесінің құжаттары Қызылорда облысының жер ресурстарын басқару департаментіне жолданды. Нәтижесінде меншік иелеріне ҚР жер заңнамасының талаптарын бұзушылықтарды жою туралы нұсқама беріліп, көлемі 1,66 гектарды құрайтын мемлекет меншігіндегі жерді заңсыз иеленген 37 тұлғаға әкімшіліктік жазалау шаралары қолданылды, – деді бөлім басшысы Мейрамбек Темірханұлы.</blockquote>Жалпы, Қызылорда қаласы бойынша 71 099 азамат жер кезектілігіне тіркелген. 2005 жылғы кезектіліктен қалған 2 387 азаматқа жер учаскелерін табыстау жұмыстары жүргізілуде. Ал, «Дипломмен ауылға» бағдарламасы бойынша 110 маманға 43,2 млн. теңге көтерме жәрдемақы және 25 маманға 196,6 млн.теңге бюджеттік кредит бөлініп, тиісті жұмыстар жүргізілуде.

 Ауыл шаруашылығы мен жер қатынастары саласындағы көрсеткіштер

<a href="https://kyzylorda-news.kz/">Kyzylorda-news.kz</a> &nbsp;Қызылорда облысы Төтенше жағдайлар департаментінің күштер мен құралдары 2025 жылғы 23-24 шілдеде Шымкент қаласында өткізілетін «Жер-2025» республикалық командалық-штабтық оқу-жаттығуна қатысады.&nbsp;Оқу-жаттығуға жұмылдырылатын жеке құрам мен техниканы Департамент бастығының міндетін уақытша атқарушы полковник М. Мырзагелдиевпен тексеріліп, 2025 жылғы 15 шілде сағат 8.00-де күштер мен құралдары құрамында 37 жеке құрам 11 бірлік техника және азаматтық қорғау қызметтерінен 12 қызметкер 7 бірлік техника Шымкент қаласына марш жасады. Жұмылдырылатын күштер мен құралдар оқу-жаттығу кезеңінде төтенше жағдайға әзірлігін шыңдайтын болады.<img src="https://knadmin.beoblood.kz/uploads/whatsapp_image_2025_07_16_at_10_1_d30f071930.webp" alt="whatsapp-image-2025-07-16-at-10.-1.webp">

Сыр құтқарушылары жоғары дайындыққа келтірілді

<a href="https://kyzylorda-news.kz/">Kyzylorda-news.kz</a> Кеше Жаңақорған ауданында облыс әкімінің тапсырмасына сәйкес ұйымдастырылған пресс-тур аясында бұқаралық ақпарат құралдарының өкілдері «Жаңақорған Автоматтандырылған Газ Тарату Станциясын (АГТС) кеңейту» жобасының жүзеге асырылу барысымен танысты.Жаңақорған ауданы аумағында жүзеге асып жатқан бұл маңызды инфрақұрылымдық жоба – қолданыстағы «Жаңақорған АГТС»-тің қуатын 20 000 м³/сағаттан 40 000 м³/сағатқа дейін ұлғайтуды көздейді. Жобаның жалпы құны – 2,3 млрд теңгені құрайды.Құрылыс жұмыстарын «Транс Азия Констракшн» ЖШС жүргізуде. Ал қажетті технологиялық құрал-жабдықтар «Батыс Мұнай Газ Жабдықтары» ЖШС тарапынан жеткізіліп, бүгінде 13 блок-модуль мен тиісті құрылғылар толық орнатылды.Бүгінгі таңда құрылыс жұмыстарының 98 пайызы орындалып, нысанды ағымдағы жылдың шілде-тамыз айларында толық аяқтау жоспарлануда.Айта кетейік, жоба іске қосылған жағдайда аудандағы&nbsp;8 елді мекеннің (Қожакент, Өзгент, Ақсуат, М.Нәлібаев, Жаңарық, Қыркеңсе, Байкенже, Билібай) тұрғындары мен кәсіпорындары көгілдір отынға қосылады. Бұл – 1793 тұрғын үй мен 11604 халықтың өмір сапасын жақсартуға сеп болмақ.Сондай-ақ, БАҚ өкілдері «Шалқия тас» ЖШС-нің бастамасымен жүзеге асып жатқан асфальт шығару зауытының құрылысына барды. Аталған жоба жыл аяғына дейін іске қосылады. Жоба аясында дайын асфальт өнімдері шығарылмақ.Қазіргі уақытта қажетті құрал-жабдықтар сатып алынып, құрылыс-монтаж жұмыстары жүргізілуде. Бүгінде құрылыс жұмыстарының 88 пайызы аяқталған.Жоба бірыңғай индустрияландыру картасына енгізілген. Мемлекеттік қолдау аясында зауытқа 6 гектар жер телімі берілді. Жоба құны – 700 миллион теңге. Жоба іске қосылған жағдайда 10 жаңа жұмыс орны ашылады.Жобаның құрылтайшысы — «Engineering &amp; Construction Company» («ЕСС») ЖШС, компания басшысы Ашимов Талғат Әзімханұлы.<img src="https://knadmin.beoblood.kz/uploads/ASFALT_Sh_Y_ARU_ZAUYTYNY_Zh_OBASYMEN_TANYSTY_622b954756.jpg" alt="АСФАЛЬТ ШЫҒАРУ ЗАУЫТЫНЫҢ ЖОБАСЫМЕН ТАНЫСТЫ.jpg">

БАҚ өкілдері «Жаңақорған АГТС» жобасымен танысты

<a href="https://kyzylorda-news.kz/">Kyzylorda-news.kz</a>&nbsp; Өңір спортшылары жуырда ғана Астана қаласында өткен ауыр атлетикадан жасөспірімдер арасындағы Азия чемпионатында жоғары нәтиже көрсетіп, ел мерейін асқақтатты. Аймақ атынан сынға түскен бес спортшының төртеуі жүлдегер атанып, еліміздің туын көкке көтерді. Жеңімпаз және жүлдегер спортшыларды Өңірлік коммуникациялар қызметінде өткен брифингке арнайы шақырып, олардың жетістігі мен алдағы жоспарлары туралы әңгімелесті.<blockquote>– Қазіргі таңда Қызылорда облысы бойынша 1 310 спортшы ауыр атлетикамен шұғылданады. Олардың дені халықаралық және республикалық деңгейдегі жарыстарда топ жарып, өңір абыройын көтеріп жүр. Биылғы Азия чемпионатына облыс атынан 5 спортшы қатысып, соның 4-еуі жүлделі орынға ие болды. Бір спортшымыз жарақатына байланысты жарысқа қатыса алмады. Қазіргі таңда барлық аудандарда ауыр атлетика секциялары тегін жұмыс істейді. Алғашқы даярлық тобына 8 жастан бастап қабылдаймыз. Бірақ егер балада ерекше ынта байқалса, 6 жастан бастап та жаттығуға ала береміз. Қазір жетістікке жетіп жүрген балалардың дені осындай ерте жастан келгендер,- деді Қызылорда облысының аға жаттықтырушысы Жеңіс Алдабергенов.</blockquote>Жаттықтырушы Айдар Ералиев "Болашақта бұдан да биік белестерге жететінімізге сенімдіміз" деп жастарға сенім артты.<blockquote>– Мен Қармақшы ауданындағы №15 олимпиадалық резервтер мектебінің жаттықтырушысымын. Оқушым Сәулебеков Ерасыл биылғы Әлем чемпионатында серпе көтеру жаттығуында алтын, ал қос сайыста қола медаль иеленді. Бұдан кейін, Астанада өткен Азия чемпионатында үш алтын жүлдеге (жұлқа, серпе және қос сайыс бойынша) қол жеткіздік. Ерасыл ел намысын абыроймен қорғап, көк туды көкте желбіретіп қайтты. Бұл жеңіске жету жолында мектеп директоры Алиев Артурдың қолдауы ерекше болды. Ол шәкіртімізді әрдайым бақылап, жігерлендіріп, барлық жағдайын жасап берді. Осы орайда Артур мырзаға алғысымыз шексіз. Болашақта бұдан да биік белестерге жететінімізге сенімдіміз,- деді жоғары санатты жаттықтырушы Айдар Ералиев.</blockquote>Жарыс өте жоғары деңгейде өтті.<blockquote>– Біз дайындықты наурыз айында бастап кеттік.&nbsp;Алматы қаласындағы базада оқу-жаттығу жиынын өткіздік. Әрине, қиындықтар болды. Бірақ соның бәрін еңсеріп, жеңіске қол жеткіздік. Жалпы жарыстың өзі бір сын болса, оған дейінгі сбор нағыз шыдамдылықты шыңдайтын кезең. Сол кезеңді артта қалдырып, жақсы нәтижеге қол жеткізіп отырмыз. Кез келген спортшының арманы – Олимпиада шыңын бағындыру ғой. Біздің де арманымыз, мақсатымыз сол. Бізге қолдау білдірген баршаңызға алғысымды білдіремін,- Халықаралық дәрежедегі спорт шебері, Азия және Әлем чемпионатының жеңімпазы Ерасыл Сәулебеков.</blockquote>Бейбарыс Ерсейіт бұл спортқа 9 жасында келген.<blockquote>– Мен спортқа 9 жасымда келдім. Қазіргі таңда тұрақты түрде жаттығып жүргеніме 7 жыл болды. Осы уақыт ішінде мені жаттықтырып, әрдайым қолдау көрсетіп келе жатқан Алдабергенов Айбол, Алдабергенов Жеңіс және Қайратов Марат есімді бапкерлеріме ерекше алғыс білдіремін. Осы жеті жылдың ішінде талай қиындықты бірге еңсердік. Жарыс жоғары деңгейде ұйымдастырылды,- деді ауыр атлетикадан Әлем чемпионы, Азия чемпионатының қола жүлдегері Бейбарыс Ерсейіт.</blockquote>Жарыс та, дайындық та жоғары деңгейде өтті.<blockquote>– Ауыр атлетикамен айналысып жүргеніме 8 жыл болды. Бұл спортқа деген қызығушылығым Илья Ильиннің жетістіктерін көріп, соған еліктеуден басталды. Бүгінде сол қызығушылықтың нақты нәтижесін көріп отырмыз. Әлем чемпионатынан кейін қайта күш жинап, Азия чемпионатына дайындалу оңай болмады. Бірақ барымызды салып, лайықты нәтиже көрсеттік. Жарыс та, дайындық та жоғары деңгейде өтті,- деді Азия чемпионатының күміс және қола жүлдегері Ернұр Мырзахмет.</blockquote>Ал Қайсар Мысырбектің жаттықтырушысы Аят Әмірбеков. Ол бүгінде нәтижелерге қол жеткізіп келеді.<blockquote>– Мен спортқа 10 жасымда келдім. Міне, 6 жыл болды тұрақты түрде айналысып келемін. Бұл &nbsp;менің қатысып отырған алғашқы Азия чемпионатым. Менің жаттықтырушым – Аят Әмірбеков. Сол кісінің жетекшілігімен осы жарысқа жолдама алып, ел намысын қорғауға мүмкіндік алдым,- деді Ауыр атлетикадан Азия чемпионатының қола жүлдегері Қайсар Мысырбек.</blockquote>

Қазақстан және Қызылорда облысының жаңалықтары