Фото: ашық дереккөзден<a href="https://kyzylorda-news.kz/ru">Kyzylorda-news.</a> Типографиялар журналист Данияр Молдабековтің Қаңтар жайлы кітабын басудан бас тартты деп хабарлайды Kyzylorda news ақпарат агенттігі.Бұл жөнінде журналист Telegram арнасында хабарлады.<ul><li>Менің Қаңтар жайлы кітабымды басуды қолға алған баспа, барлық типография кітапты басудан бас тартқанын хабарлады. Алдын ала тапсырыс бергендерге ақшаларын қайтарып береді. Кітапты міндетті түрде басып шығарамын, тек қашан, қайда және қалай екенін ойластыру керек, - деп жазды журналист парақшасына.</li></ul>Ол алдыңғы жазбаларында Құқық қорғау органдарының кітапты оқуға сұрағанын және кітабы шығатын баспаханға келген айтқан еді. &nbsp;

Журналист Данияр Молдабековтің Қаңтар оқиғасы туралы кітабын басудан типографиялар бас тартты

Фото: drive2.ruДереккөз: <a href="https://tolqyn.kz/">Tolqyn.kz</a>&nbsp;<a href="https://kyzylorda-news.kz/ru">Kyzylorda-news.kz.</a> Аралдықтар көлік күтіп жүр. Иә, шынымен айдың басында ұтыстан көлік ұтқан жерлестерінің жолын бізге де берсін дейтіндер көп. Нақтырақ айтсақ,«Аладдин» шығыс шайханасының ашылғанына 4 жыл болуына орай ұйымдастырылған бұл ұтыстан дәмелі жандар тек Аралдан емес, еліміздің түкпір-түкпірінде бар. Былтыр 2 көлікті өз иесіне табыстаған шайхана иесі биыл да 3 көлік және 150 бағалы сыйлықты ұтысқа қойған. Бірінші кезеңінде 75 сыйлықпен қоса 1 автокөлік ойнатылса, соның иесі аралдық Қуаныш Жұбанова атанған. Бүгін біз сол жолы болған жерлесімізбен тілдескен едік.&nbsp;<blockquote> – Әдетте мұндай дүниелерге көп қызықпайтынмын. Нәпақамды еңбегіммен тауып жүрмін. Бұрын балық комбинатында есепші болып жұмыс жасадым. Ал қазіргі уақытта балық сатумен айналысамын. Бірде інімнің жарнамасынан ұтыс өтетіні туралы естідім. Қызығушылықпен өзіне қоңырау шалып, қаншалықты шынайы, әділ өтетінін сұрадым. Барлығы ашық, әділ өтеді деген соң бағымды сынап көргім келді, – дейді.</blockquote> Толық ақпаратты естіген соң бар-жоғы 3 билет сатып алып, ұтыс ойнына қатысуға тәуекел еткен. Әрі қарай өз сезімімен бөліскен кейіпкеріміз:<blockquote> – Ұтыс ойналатын күні көпшілікпен бірге барып, өз көзіммен көргім келді. Мыңнан аса адам жиналды. Одан бөлек, тікелей байланыс арқылы төрт мыңға жуық адамның тамашалап отырғанын да естідім. Басқа қанша адам барын тіпті ойлау мүмкін емес. Үміт бар, бірақ сенім аз болды. Менде осыншама адамның арасынан көлік маған бұйырады деген ой мүлде болмады. Ал есімімді атап, ортаға шақырғандағы сезімімді, қуанышымды сөзбен айтып жеткізе алмаймын. Жолдасымда тұрақты жұмыс жоқ. Өзім көп балалы анамын. Жеті қыз тәрбиелеп отырмын. Сол балаларымның несібесі шығар, «Нyundai sonata sport» көлігі маған бұйырды. Өзімде көлік жүргізуге рұқсат қағазым жоқ. Қазір жолдасым жүргізіп жүр – дейді.</blockquote>О.ЖОЛДАСОВ&nbsp;

Аралдық балық сатушы ұтыстан көлік ұтты

Видео сілтемесі: https://www.instagram.com/reel/CkDA58Lj8Re/?igsh=MTg0cDcyYTVkYTV2Ng%3D%3DФото: Жеке қорынан<a href="https://kyzylorda-news.kz/ru">Kyzylorda-news.kz.</a>&nbsp; Қызылордалықтың Сеулдегі өнері корейліктерді тәнті етті. Әлеуметтік желіде &nbsp;Ернұр Тәкеновтің ән шырқаған видеосы &nbsp;мыңдаған қаралым жинады. Бейнебаянда Сырдың сырбаз жігіті «Құсни-Қорланды» тебіріне шырқайды. Жүректен шыққан ән жүрекке жеткендіктен «Жарайсың, қазақ баласы», «Дауысы Димаштыкіне ұқсайды екен» деген пікір көп.&nbsp;<img class="image_resized" style="width:100%;" src="https://knadmin.beoblood.kz/uploads/Izobrazhenie_Whats_App_2024_01_23_v_15_11_50_e7501df8_a7439f19a7.jpg" alt="Изображение WhatsApp 2024-01-23 в 15.11.50_e7501df8.jpg">Ернұр – кәсіби әнші. Алғаш рет 12 жасында сахнаға шыққан, содан бері &nbsp;өмірін музыкамен тығыз байланыстырады. Қызылорда музыкалық колледжін тәмамдаған кейіпкеріміз оқуын Қазақ ұлттық өнер университетінде академиялық ән салу мамандығы бойынша жалғастырған.&nbsp; Қазір Оңтүстік Кореяда білімін шыңдауда. Айтуынша, қосымша жұмыс істейді. Арасында ән айтып, табыс табады. Ал әлеуметтік желіде тараған видеода Сеулдегі «Орталық Азия мәдениетінің апталығында» өнер көрсеткен. Ернұрдың өзі портты Пусан қаласында тұрады.<blockquote> – «Өнерлі жігіт озар» деген. Бала кезімнен музыкаға жақынмын, болашағымды да өнермен байланыстырамын. Сол үшін тер төгіп келемін. Әуелде бұл видео таралмай тұрып, жағалауда ән айтатынмын. Сол кезде жергілікті тұрғын видеоға түсіріп, желіге жүктеді. Ғаламторда таныла бастадым. Содан кейін концерттерге шақыра бастады, Сеулдегі «Орталық Азия мәдениетінің апталығына» осылайша қатысуға мүмкіндік алдым. «Қай тілде шырқап жатырсың?» деп сұрайды кореялықтар. Мақтанышпен, қазақ тілінде деп жауап беремін!, – дейді жерлесіміз.&nbsp;</blockquote> Ернұр қазір тіл үйренумен шектеліп қалмай, Корей халқының тарихы, мәдениеті, тұрмыс-тіршілігімен танысу үстінде. Айтуынша, кореялықтар &nbsp;қазақтар секілді қонақжай, үлкенге құрмет, кішіге ізет көрсетеді. Қолдауда да аянып қалмайды. Тек шын талант иесі тыңдарманның жүрегін жаулай алады емес пе?! Кореялықтардың Ернұрды Димашқа ұқсатып, қолдағанына қарағанда тағы бір қазақ баласының жұлдызы жанғалы тұр.Мөлдір СНАДИН&nbsp;

«Димаш секілді шырқайды»: Қызылордалық әнші Оңтүстік Кореяны таңғалдыруда

&nbsp;<a href="https://kyzylorda-news.kz/ru">Kyzylorda-news.kz.</a> ҚР Премьер-министрі Әлихан Смайыловтың төрағалығымен өткен Үкімет отырысында кәсіпорындарда экологиялық талаптарды сақтау, ғылымды коммерцияландыру мәселелері талқыланды. Ведомство басшылары баяндама жасап, тиісті тапсырмалар берілді.Үкімет жиынынан кейін облыс әкімі Нұрлыбек Нәлібаев арнайы мәжіліс өткізіп, аймақтағы қоршаған ортаға елеулі әсер ететін кәсіпорындарға жоспарлы тексеру жүргізу қажеттігін атап өтті.<blockquote>«Бүгінде Қызылорда облысында қоршаған ортаға жағымсыз әсер ететін І санатты 88 және ІІ санатты 110 кәсіпорын бар. Олардың ішінде мұнай және газ өндіру саласында 13 ірі, уран өндіру саласында 4 және қоршаған ортаға елеулі әсер ететін 2 кәсіпорын қызмет атқарады. Өткен жылдың қорытындысымен 15 субъектіге экологиялық бақылау жүргізіліп, 682 млн.теңгенің 54 әкімшілік айыппұлы салынып, оның 542 млн. теңге болатын 49-ы өндірілген. ҚР Кәсіпкерлік кодексіне енгізілген өзгерістерге орай еліміздегі кәсіпорындардың экологиялық талаптарды сақтауы жоспарлы түрде тексерілмеді. Биылдан бастап кодекс талаптарына сәйкестендіріліп, жоспарлы тексерулер жүргізілетін болады”, – деді аймақ басшысы.</blockquote>Мұнан бөлек, облыстық санитарлық-эпидемиологиялық бақылау департаментіне елді мекендердегі тұрғын үйлерге жақын орналасқан кәсіпкерлік нысандарына талдау жүргізіп, оларды сәйкестендіру тапсырылды. Ал экология департаменті санитарлық қорғаныш аумақтарының сақталуын бақылауы керек. Қала және барлық аудан әкімдері, облыстық кәсіпкерлік және өнеркәсіп басқармасымен бірлесіп, өз аумақтарында орналасқан кәсіпорындарда экологиялық, санитарлық, өндірістік қауіпсіздік талаптарының сақталуы бойынша және әлеуметтік дауларды болдырмау үшін кәсіпорын басшыларымен кездесу ұйымдастырып, түсіндірме жұмыстарын жүргізуі тиіс. Аймақ басшысы қоршаған ортаға теріс әсер еткені үшін төленетін төлемақылардың қосымша көздерін анықтап, салық базасын ұлғайтуды тиісті басқарма басшыларына тапсырды.Нұрлыбек Машбекұлы биылдан бастап Қазақстан төрағалық ететін Халықаралық Аралды құтқару қорының экологиялық жағдайды жақсарту бағытындағы қызметін тиімді пайдалану керектігін ескертті. Осыған орай, облыстық табиғи ресурстар және табиғат пайдалануды реттеу басқармасына қор дирекциясымен бірге орман және су қорын, жануарлар дүниесі мен балық ресурстарын қорғау, өсімін молайту және тиімді пайдалану бойынша жобаларды жоғарғы деңгейде үйлестіру міндеті жүктелді.Мемлекет басшысының Арал теңізінің құрғаған ұлтанына 1,1 млн гектар сексеуіл екпелерін егуді ұлғайту жөніндегі тапсырмасы жүйелі әрі мүлтіксіз орындалуы керек.Күн тәртібіндегі екінші мәселе бойынша, өңірлік жоғары оқу орындарының басшылары ғалымдардың өз идеяларын іске асыруы үшін қолайлы орта қалыптастыруы қажет. Коммерцияландыру бөлімдерінің материалдық-техникалық жарақтандырылуын қамтамасыз ету де өте маңызды. Алдағы уақытта ғалымдардың әлеуетін пайдалану үшін қала, аудан әкімдіктері, басқарма жанындағы комиссия, кеңес құрамына ғылым докторларын, оқытушы-профессорларды қосу және өңірдің әлеуметтік-экономикалық дамуына қатысты мәселелерде олардың ұсыныс-пікірін ескеруі керек.<img src="https://knadmin.beoblood.kz/uploads/417480591_680731644248083_4112567357315350838_n_884a57beee.jpg" alt="417480591_680731644248083_4112567357315350838_n.jpg"><img src="https://knadmin.beoblood.kz/uploads/417471370_680731717581409_8404597495109047174_n_f46e7f503a.jpg" alt="417471370_680731717581409_8404597495109047174_n.jpg">

Кәсіпорындарда экологиялық талаптарды сақтау мәселелері қаралды

Фото: baigenews.kz&nbsp;<a href="https://kyzylorda-news.kz/ru">Kyzylorda-news.kz.</a>&nbsp; Бұған дейін эколог, қоғам қайраткері Мелс Елеусізов Алматыда кез келген уақытта 12 баллдық жойқын жер сілкінісі болатынын айтқан еді деп жазады <a href="https://dalanews.kz/">Dalanews.kz.</a><blockquote>«1912 жылы үлкен сілкініс болды. Сол кезде 28 панфиловшылар паркіндегі орыстардың шіркеуі ғана аман қалған. Өте керемет салынған, қираған жоқ. Ал, Алматының барлығы қирады. Енді сондай жағдай болса сұмдық болады. Ғылыми негізде енді кез келген уақытта болуы мүмкін. Себебі, арада 100 жыл өтті, тарих көрсеткендей әр 100 жылда қайталанады. 12 баллдық жер сілкінісінде адамдардың тірі қалу ықтималдығы аз», – деді эколог.</blockquote>Оның айтуынша, қазіргі үйлерден адам шыға алмай қалуы да мүмкін.<blockquote>«Совет үкіметі уақытында үйлер 5 қабатты болатын, ал қазіргі 20-30 қабатты үйлер қиын. Физикада «инерция покоя» деген бар. Ол дегеніңіз сейсмикалық толқын төменгі жақта болғанда жоғары жақ толық сақталады. Кезіндегі 5 этаж бекер емес. Қазіргі үйлерде ешқандай сапа жоқ. Негізі халық ақырын-ақырын қайтадан ауылға бару керек. Алматыда тұруға болмайды», – деді ол.</blockquote>Елеусізовтың сөзінше, жер сілкінісі 12 баллға баратын Индонезия, Жапония, Курил аралдары, Чили елдерінен кейін бесінші біз.Күні кеше Алматыда 4 балл деңгейінде жер сілкініп, ел көше кезіп кеткен еді.Жерасты дүмпуі Алматыдан оңтүстік-шығысқа қарай 264 шақырым жерде, Қазақстан мен Қырғызстан шекарасы аумағында орын алған. Азанда да 3 баллдық толқын байқалған.Бірақ ТЖМ мамандары «Алматыда 7 баллдан асатын жер сілкінісі күтілмейді» деп сендіріп отыр.

Алматыдағы зілзала: Елеусізов қуатты жер сілкінісі жайлы ескерткен

<a href="https://kyzylorda-news.kz/ru">Kyzylorda-news.kz.</a>&nbsp;Қазақстанның көп бөлігі сейсмоқауіпті аймаққа жатады. Оның ішінде Алматы қаласы — аса қауіпті сейсмоаумақ. Сол себепті Алматыда 12 қабаттан артық ғимарат салынбауға тиіс. Қазақ құрылыс және сәулет ғылыми-зерттеу және жобалау институтының директоры Ералы Шоқбаров еліміздің сейсмоқауіпті аймақтарын тізіп берді және жер сілкінсе, қалай қорғану керек екенін айтты, деп хабарлады <a href="https://baribar.kz/203893/https-baribar-kz-p-203893-preview_id-203893-preview_nonce-e355e65792-post_format-standard-_thumbnail_id-203897-preview-true/?fbclid=IwAR01Zy-zBHcOmjsi9b4h1rZtOOc5BV1tgVrj6ZInXrIzmE-VO7C1K-AeXHs">Baribar.kz</a> сайты.&nbsp;Қазақстан аумағындағы ең қауіпті апаттар«Қазақ құрылыс және сәулет ғылыми-зерттеу және жобалау институты» акционерлік қоғамы басқарушы директоры Ералы Шоқбаров Қазақстанның көп бөлігі сейсмоқауіпті екенін айтады. Бұған дәлел ретінде ол ел аумағында болған ең ірі апаттарды тізіп берді.Қазақстан аумағындағы ең ірі зілзала 1877 жылы Верный қаласында болды, магнитудасы — 8,7 балл. 1911 жылғы Қырғызстан мен Қазақстан шекарасында орналасқан Кемен жазығында болған зілзала да аса ірі апаттардың бірі болды. 1971 жылы Жамбыл облысында, 1990 жылы Зайсан қаласында болған жер сілкінісін де ұмыт қалдыра алмаймыз. Егемендік алғаннан кейінгі ірі зілзаланың бірі 2003 жылы Луговой ауылы аумағында болды. Онда 5000-дай үй қирап қалды, жыл ішінде бәрі қалпына келтірілді.2009 жылы Алматы облысына (қазіргі Жетісу обл. — ред.) қарасты Текелі қаласындағы жер сілкінісін де қазіргі Қазақстандағы ең ірі зілзала деуге болады. Бұл апат шығыны, шамамен 400 миллион теңге болған еді.Ал Алматыда айқын сезілген жер сілкінісі 2022 жылғы 28 желтоқсанда қаладан 190 шақырым жердегі Қытай мен Қырғызстан шекарасында болды.Эксперт сөзіне қарағанда, елдегі сейсмоқауіпті өңірлер тізімі кейінгі жылдары толыға түскен. Бұрын бұл тізімде Алматы қаласы, Алматы облысы, Шығыс Қазақстан облысы, Жамбыл облысы, Түркістан облысы болатын.<blockquote>2017-2019 жылдары Сейсмология институтымен бірлесіп, жер сілкіну қаупі бар аймақтардың жаңа картасы әзірленді. Сейсмоқауіпті аймақтар тізіміне Атырау облысы, Ақтөбе облысы, Батыс Қазақстан облысы, Қызылорда облысы және Қарағанды облысы, Шымкент пен Тараз қаласы кірді. Бірақ бұл аймақтардың тек бірнеше өңірінде жер сілкінуі мүмкін, — дейді ғалым.</blockquote><figure class="image"><img src="https://knadmin.beoblood.kz/uploads/65d9bcb02cea180dd484fca55305be96_876ea70be1.jpg" alt="65d9bcb02cea180dd484fca55305be96.jpg"><figcaption>Сейсмоқауіпті аймақтар картасы Иллюстрация: Бекзат Исамбергенов/Baribar.kz</figcaption></figure>&nbsp;«Алматыдағы дүмпудің максимал күші 9-10 балл болуы мүмкін»Ералы Шоқбаров елдегі ең сейсмоқауіпті аймақ әлі де Алматы қаласы екенін айтады. Бірақ эксперт қаладағы көпқабатты ғимараттың бәрі талапқа сай деп есептейді.<blockquote>«Кез келген құрылыс басталмас бұрын сараптама жасалады. Құрылыс нормалары туралы арнайы құжат бар. Ол бойынша, әр өңірдегі жер сілкінісі қаупіне қарай ғимаратқа қойылатын сейсмотөзіміділік талабы да әртүрлі. Бұл құжат Кеңес кезінен бар. Тәуелсіздік алғаннан кейін мұндай құжат алғаш 1998 жылы қабылданды. Әлемде жер сілкінісі болып, оның себебі анықталған сайын біз осы құжатқа өзгеріс енгізіп отырамыз. Бұл елдегі жер сілкінісінің алдын алу үшін керек. Бірінші өзгеріс 2001 жылы, екіншісі 2004 жылы енгізілді. Одан соң 2006 жылы, 2017 жылы өзгеріс енді. Кейінгі өзгеріс 2021 жылы жасалды», — дейді эксперт.</blockquote>Оның айтуынша, қазіргі құжатқа сай, Алматыда 12 қабатқа дейінгі ғимарат сала беруге болады. Қабат саны одан көп болса, сол үйге арнайы техникалық құжат пен бөлек құрылыс нормативі дайындалады. Мұндай үйдің құрылысы қатаң бақылауға алынуға тиіс.Бірақ маман Алматыда жер сілкінісі бола қалса, қанша үй қирап, мемлекет бюджетіне қандай шығын келетіні жайлы ақпаратты жария ете алмайтынын айтты.<blockquote>Еліміз бойынша Алматы қаласы — аса қауіпті сейсмоаумақ, дүмпудің максимал күші — 9-10 балл. Сонымен қатар Алматы облысындағы кейбір таулы аймақта шама кейде 9-10 балға жетуі мүмкін. Осы қауіпті ескере отырып, жер сілкінісі болса, қандай шығын келуі мүмкін екені туралы есебіміз бар. Алайда оны көпке жария ете алмаймыз, — деді Ералы Шоқбаров.</blockquote>Эксперт сөзіне қарағанда, мұндай есеп қаладағы жер сілкінісінің алдын алу үшін жасалады. Ғылыми-зерттеу институты мен сейсмология институты мамандары бірлесіп, осындай есеп негізінде қаладағы сейсмоқауіпті ғимараттарды анықтаған.<blockquote>Алматыда ескі ғимарат көп. 2017-2018 жылдары Сейсмология институтымен бірлесіп, 10 мыңнан аса ғимаратқа толық дерегі жазылған арнайы паспорт бердік. Сол құжаттағы деректерді зерттей отырып, мемлекет сейсмоқауіпті ғимараттарды сүру туралы шешім қабылдады. Қазір осы бағыттағы жұмыс жүріп жатыр, — дейді ол.</blockquote>Ералы Шоқбаров бұған қоса 2004 жылдан бері Алматы ғимараттарын сейсмокүшейту шаралары қолға алынды дейді. Эксперттің айтуынша, қалада 50-жылдары сол заманның құрылыс нормасына сай салынған ғимарат көп. Бюджеттен осындай мектеп, балабақша және медицина мекемесі ғимараттарын жөндеуден өткізуге ақша бөлініп жатыр.<blockquote>Бірінші кезекте қаладағы мектептердегі сейсмокүшейтуді қолға алдық. Мұның себебі бар. Алматыда зілзала бола қалса, мектептер зардап шеккендерге пана ретінде берілетін ғимарат деп қарастырылып отыр. Бұған қоса ел болашағы — балалардың көп уақыты сол мектеп ғимаратында өтеді. Мектептің үш қабаттан аспайтыны да осыдан, — дейді эксперт.</blockquote>Жер сілкінсе, қалай қорғанамыз?Ералы Шоқбаров бірнеше жыл бұрын жер сілкінісі кезіндегі қауіпсіздік шаралары бойынша халыққа арналған арнайы карта әзірленгенін айтты. Бірақ белгісіз себептермен бұл жоба әлі іске аспай жатқан көрінеді.Қауіпсіздік шаралары бойынша арнайы карта әзірленген еді. Жоспарға сай, оны телеарналардан көрсетіп, халықты жер сілкінісі кезінде қалай қорғану керек екенінен хабардар ету ойда болған.Карта арқылы мамандар қауіпсіздік шараларын жеңіл тілмен, визуал негізде түсіндіргісі келген.<blockquote>Карта бойынша, бағдаршам әдісімен қауіп-қатер күшін түсіндіру амалы болуы керек еді. Мысалы, ғимараттан 5 метр қашық аймақты қызыл түспен белгілеп, мұның қауіпті екенін түсіндіреміз. Дәл солай 10 метрді сары түспен бояп, ол аймақта да қауіп сейіле қоймағанын білеміз. Үшінші шеңбер — 20 метр қашық аймақты жасыл түспен белгілейміз. Бұл — қауіпсіз аймақ. Демек, жер сілкінісі кезінде ғимараттан 20 метрге алыстауыңыз керек. Осындай қарапайым мысал негізінде сейсмоқауіпсіздік шараларын түсіндіргіміз келген еді. Әзірге неге екені белгісіз, бұл карта жарыққа шықпай тұр, — дейді Ералы Шоқбаров.</blockquote>Бұған қоса ғалым жер сілкінсе, былай қорғануға кеңес берді:Газды, суды және электр қуатын өшіріңіз. Жер сілкінісінің күші аз болса, алысқа ұзамай, тұрған жеріңізде сілкіністің басылуын күткен абзал. Күшті жер сілкінісі кезінде, яғни дүмпу күші 5 балдан асса, ғимараттың екінші және одан жоғарғы қабатында болсаңыз, ғимараттан шығуыңыз керек. Терезе мен ауыр жиһаздан алыс тұрған жөн. Лифтіні қолданбаңыз.Дүмпу кезінде көшеде болсаңыз, ғимарат пен электр желісінен қашықтап, ашық алаңға қарай кетіңіз. Оқушыларға мұндай жағдайда даладағы спорт алаңына жиналу керек екені айтылады. Үзілген электр сымдарына жақындауға болмайды. Сілкініс кезінде көлікте болсаңыз, дүмпулер тоқтағанға дейін көліктен шықпай, ашық алаңда қала беріңіз.Фото: <span style="background-color:rgb(246,246,249);color:rgb(102,102,135);font-family:-apple-system, BlinkMacSystemFont, &quot;Segoe UI&quot;, Roboto, Oxygen, Ubuntu, Cantarell, &quot;Open Sans&quot;, &quot;Helvetica Neue&quot;, sans-serif;">freepik

Жер сілкінісі: Алдын алу және қорғану шаралары

Фото: Анадолу.&nbsp;<a href="https://kyzylorda-news.kz/ru">Kyzylorda-news.kz.</a>&nbsp; Алматыда қуатты жер сілкінісі болды. Бұл туралы <a href="https://kaz.inform.kz/">Kazinform</a> хабарлайды.&nbsp;Төтенше жағдайлар министрлігіне қарасты «СТӘК» ЖШС-ның сейсмикалық стансалар желісі Алматы уақытымен 23 қаңтар күні 00 сағат 09 минутта жер сілкінісін тіркеді. Жерасты дүмпуі Алматыдан оңтүстік-шығысқа қарай 264 шақырым жерде, Қазақстен мен Қырғызстан шекарасы аумағында болды.Энергетикалық санаты – 15.1. MPV тербелісі – 6.7. Тереңдігі – 65 км.Жер сілкінісі Алматыда 4 балл деңгейінде (MSK-64 шкаласы бойынша) сезілді.Алматы қаласы Төтенше жағдайлар департаментінің мәліметінше, өзара іс-қимыл алгоритмі бойынша тиісті мемлекеттік органдарға хабар берілді. Тіршілікті қамтамасыз ету объектілерінің жұмысына мониторинг жүргізіліп жатыр.Алматы тұрығындары үрейленіп, үйінен көшеге, далаға шығып жатыр.&nbsp;&nbsp;

Халық үрейленіп аулаға шығып кетті - Алматыда 4 балдық жер сілкінісі сезілді

Фото: astanahub.comStorytelling<img src="https://knadmin.beoblood.kz/uploads/OSN_ab1a0c291c.jpg" alt="ОСН.jpg">Жерлесіміз Шыңғыс Дәулетбаев әке жолын қуып, дәрігер болуды қалаған. Алайда өмір жолы өзгеше өрбіп, өзін ІТ саласынан тапқан. Кейіпкеріміздің «TrustMe» стартап жобасы ІТ-дің астанасы саналатын Кремний алқабында үздік ондықтан да табылды.&nbsp; Мемлекеттік қызметте шыңдалып, медиа саласында сыналған, продакшн студиялар құруда тәжірибесі бар Шыңғыстың ендігі шығар шыңы қандай?<img src="https://knadmin.beoblood.kz/uploads/333_06067828b4.jpg" alt="333.jpg">Аллаға сенім, бизнестегі тәжірибе мен Англияға сапар&nbsp; Қазір 36-дамын. Спортқа жақынмын, бұрын осының әсерінен қызуқандылау болатынмын. 2008 жылдың қарашасында қыңыр мінез өмірімді өзгертті. Кезекті дау-дамайда пышақ тиіп, жүрек тұсынан жарақат алдым. Содан кейін барлығы өзгерді. Көзқарасым, мақсатым, Аллаға деген сенімім.&nbsp; Әкем – дәрігер. А.Н.Сызғанов атындағы Ұлттық ғылыми хирургия орталығында докторлық диссертация қорғауға мәжбүр болған кезде Қызылордадан көштік. Алайда әке жолын жалғамадым, оған денсаулығымның да әсері бар.&nbsp; Уақыт өте Қазақ-Британ техникалық университетіне «Менеджмент» мамандығы бойынша оқуға түстім. Оқумен қатар бизнеске қызығушылық таныттым. Ағаммен бірге сауда ісінде сыналдық. Одан кейін IT-компания ашып, маңызды саланы зерделеп шықтым. Бағасы өзекті құрылыс материалдары маркетплейсін құру жоспарымда болатын. Сатушыға хабарлассаң, қажетті тауар жоқ болып шығады немесе бағасы каталогта көрсетілген бағадан 20% қымбат. Жігіттерді жұмысқа алдым, олар барлық базарды аралап, құрылыс материалдарының бағасын жинады. Алайда техникалық инфрақұрылым құру кезінде қиындық көбейді. Бір жыл жүгірдім, жобаға көп ақша салдым, бірақ нәтиже көңіл көншітпеді. Кей жігіттер ақшаны алдын-ала алып, бірнеше ай бойы уәдеге тойдырып, жоғалып кететін. Басқасына жүгіндім, тағы осылай болды. Сөйтіп, компанияны жауып, Англияға оқуға түстім. Оксфорд Брукс университетінде менеджмент магистрі дәрежесін алдым. Ол жердегі білім беру жүйесі біздікінен мүлде басқа. Оқу бағдарламасында нұсқауланған сабақты және мұғалімді өзіміз таңдауға мүмкіндік жасалған. Қазақстанда мұғалімдер көбіне студенттерді міндеттейді. Сабаққа келмей қалса, «жоқ» деп белгілейді, баллын төмендетеді. Ал шетелде ешкім қинамайды, профессорлар бұндай мәселеге бас ауыртпайды.<img src="https://knadmin.beoblood.kz/uploads/44_d887fe3402.jpg" alt="44.jpg">Елге келіп, мемлекеттік қызметке бет бұрдым Кішкентай кезімнен елге қызмет етуді армандайтынмын. Атам 40 жыл басшылық қызметте болды. Кеңес одағын ауыл шаруашылығы техникасымен қамтитын зауытты басқарды. Сондықтан бұл атадан қалған қасиет болар.&nbsp; Экономикалық даму және сауда министрлігі (қазіргі ҚР Ұлттық экономика министрлігі – Digital Business ескертпесі) макроэкономикалық талдау және болжау департаментінің бас сарапшысы болып жұмысқа тұрдым. 9 айдан кейін басқарма басшысы, одан кейін жарты жыл өткенде департамент директорының міндетін атқарушы қызметіне дейін көтерілдім. Алайда департаментке жаңа басшы келгенде мені оның орынбасары лауазымына ауыстырды. Кейін жағдай өзгерді. Мұны байқағасын кетуді шештім, себебі жұмыссыз отыра алмаймын, бос уақыт болғанын қаламаймын. Осыдан соң бірден «Хабар» медиахолдингінің стратегиялық даму департаменті директоры болу ұсынысы түсті. Олар стратегияны бекіту керек екен, алайда шенеуніктер оны үнемі қабылдамай отырған. Сөйтіп, бір жылдың ішінде жаңа стратегия құрып, оны бекітіп алдық. Бұдан кейін де жұмысым азайды. Жаңа идея, жаңа орта, жоспар керегін түсіндім, мақсатты нықтауға кірістім.<img src="https://knadmin.beoblood.kz/uploads/img_4523_0d2a00ff9d.jpg" alt="img_4523.jpg">«ТrustMe» секілді компания әлемде жоқ&nbsp; Осылайша «ТrustMe» тұжырымдамасын ойлап таптым. Сол кезде 4 бизнесім бар еді. CDM Production мен TrustMe-ден бөлек, ADmasters (маркетинг бағыты) және Digital Academy (IT мамандықтар оқыту) болды.&nbsp; «ТrustMe» – жұмыс беруші, қызметкер немесе компания туралы ой қалдыратын платформа. 2021 жылдың ақпан айында Қазақстанда www.trustme.kz қызметі ресми түрде іске қосылды. Бүгінде сайтқа ай сайын 2000-нан астам қолданушы кіреді. Мақсаты – миллиондаған пайдаланушыларды қамту және бүкіл әлем бойынша іске қосу. Сондай-ақ қызмет қоғамдық рейтингті ескере отырып, ең жақсы және ең нашар жұмыс берушілерді, орындаушыларды және тұтынушыларды автоматты түрде анықтайды.&nbsp; Басында жеке қаражатымнан $200 мың «TrustMe»-ге салдым. 2021 жылдың жазында ақшам бітті, біз табысқа шықпадық. Инвестиция іздей бастадым, бірақ қажет жауап алмадым. Маған және менің жобама сенуді сұрап видео түсірдім де, оны ең жақын 20 адамға жібердім. 5 күннен кейін жалпы сомасы $100 мың инвестиция жинадық. Сол ақшаның көмегімен жалақы төлеп, әрі қарай жылжыдым. «TrustContract»-тен басқа тағы үш өнім болды: «ТrustInfo» (адамдар, мекемелер және компаниялар туралы ақпарат), «TrustBusiness» (QR мәзірлері және QR сауалнамасы) және «TrustPlaces» (мекемелерді іздеу).&nbsp; Бұл сервистер жақсы дамып жатты, сатылым болды. Бірақ клиент тару қымбатқа түсті, сол себепті юнит-экономика сәйкеспеді. Дегенмен әлеуеті зор жобалар еді. Тек «TrustContract»-қа көбірек күш салсақ, бұдан зор нәтижеге қол жеткізетінімізді түсіндік. Басты клиенттер – шағын және орта бизнес өкілдері. Саласы әртүрлі: туризм, көлік тасымалы, сауда, HoReCa және т.б. Ірі компаниялар бізге жүгінеді.&nbsp; Жалпы, бұл үлкен нарық. Тек Қазақстанда қазір 1,6 млн жеке кәсіпкер және 700 мыңға жуық компания бар. Бұл – 2 млн әлеуетті клиент. Қазір біздің шамамен 1000 клиентіміз бар. Күніне 200 шақты компания біздің платформада құжатқа қол қояды. «TrustContract» көмегімен 300 мыңнан астам келісім-шарт жасалды.&nbsp; Басты мақсат – Орталық Азиядағы алғашқы unocorn атану. 2025 жылдың соңына қарай мақсатымызға жетеміз деп үміттенемін. Бірақ бұл ең маңыздысы емес. «TrustContract»-тың даму және қосымша монетизация жасау перспективасы бар. &nbsp;Біріншіден, біз компанияларға келісімшарттар туралы заңды тұрғыда консультация береміз. Екіншіден, бұл келісімшарттарды өз жүйемізге енгізіп, оның кейбір пункттерін автоматтандырып, мобильді телефонға SMS түрінде баратындай етіп жасаймыз.&nbsp; Керек болса, адамның беті мен құжатын салыстырып, растаймыз. Олар небәрі тоқсан секундтың ішінде қол қойып, келісімшарт жасаса алады. Әлемде мұндай технология жоқтың қасы. Біздікіне ұқсас, құны 50 млрд доллар болатын DocuSign деген компания бар. Ол тек келісімшарттарға қол қою мүмкіндігін береді, бірақ оған жету жолы басқаша, нақтырақ айтсам, е-mail арқылы іске асады. Сондықтан біздікіндей компания тек Қазақстанда емес, әлемде жоқ деуге болады.<img src="https://knadmin.beoblood.kz/uploads/img_4761_44f09500b5.jpg" alt="img_4761.jpg"> Тим Дрейпердің қолдауы: Әлемдік 118 стартаптың арасынан үздік ондыққа ендік Біз бірнеше акселераторлық бағдарламаға қатыстық. Өткен жылы үш бағдарламада идея бөлісу бұйырды. Біріншісінде Astana-hub-тың бірлесіп ұйымдастырған Google for Startups бағдарламасына қатыстық. Сосын Азия даму банкі ұйымдастырған бағдарламаға қатысу мүмкіндігіне ие болдық. Үшіншісі – DraperU бағдарламасы.&nbsp;Соның арқасында Америкаға баруға жол ашылды. ІТ-дің отаны – Кремний алқабында бес апта бойы әлемнің 35 елінен келген 118 стартап иелерімен пікір алмасып, етене араластық. Бір-бірімізді жақындастыра түсетін ивенттер өткізілді.&nbsp; Бес аптаның соңғы аптасында Demo Day ұйымдастырылды. Ал оған осы тренингті ұйымдастырушы, әлемге танымал венчурлік инвестор, мультимиллиардер Тим Дрейпер қазылық етті. 118 стартапер арасынан суырылып шығып, ондыққа кірдік. Ол «Күшті екен» деп таңданысын жасырмады, қолдайтынын айтты.&nbsp;Бұған дейін миллионер қазақстандық компания – «Citix-ке» ға 1 миллион доллардан астам инвестиция салып, компаниядағы үлесін ұлғайту туралы келісімге қол қойған болатын. Бірақ инвестиция құю – оңай процесс емес. Бұл – ұзақ жүргізілетін процедура. Сондықтан біз де күтудеміз. Алдағы жоспарыма тоқталсам, ақпан айының аяғында Катар мемлекетінде өтетін веб саммитке қатысамын. Наурызда Сауд Арабиясына кетемін.&nbsp; Сосын уақытша АҚШ-қа көшу жоспарымда. Мақсатқа жету үшін. Қазір компанияда 75 адам жұмыс істейді, бірақ мен оны Google, Amazon, Meta, Apple секілді қызметкері көп, алпауыт компанияға айналдыруым керек. Бұйыртса, АҚШ-та жүріп, мықты инвесторларды тартып, Орталық Азиядағы алғашқы unocorn атануға күш салатын боламын. Әңгімелескен Мөлдір СНАДИН &nbsp;

Миллиардер Тим Дрейпер қолдау танытқан қызылордалық стартапер кім?

фото: Ақорданың ресми сайты&nbsp;<a href="https://kyzylorda-news.kz/ru">Kyzylorda-news.kz.</a> Президент Қасым-Жомарт Тоқаевтың төрағалығымен Ішкі істер министрлігінің кеңейтілген алқа отырысы өтті. Жиынға Президент Әкімшілігі мен мемлекеттік органдардың басшылығы, өңірлердің әкімдері, ІІМ алқа мүшелері, орталық аппараттың басшылық құрамы және аумақтық полиция департаменттерінің жетекшілері қатысты, деп хабарлайды Ақорданың ресми сайты.Мемлекет басшысы елімізде «Заң және Тәртіп» қағидатын біржола орнықтыруда полиция айрықша рөл атқаратынын атап өтті.<blockquote>– Қылмыспен күресу және қоғамдық тәртіпті сақтау – аса маңызды міндет. Бұл – жауапкершілігі өте үлкен жұмыс. Еліміздің әрбір азаматы өзін қауіпсіз сезінуге тиіс. Ол үшін құқық қорғау жүйесі үйлесімді әрі тиімді жұмыс істеуі қажет. Ең алдымен, мемлекетте заң талаптары мүлтіксіз орындалуы керек. Заң бұзған кез келген адам жазасын алуға тиіс, – деді Президент.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917178_IMG_4058.JPG">Қасым-Жомарт Тоқаевтың пікірінше, құқықтық сауаттың төмен болуы жағымсыз үрдістердің белең алуына әкеп соқтырады.<blockquote>– Оның бәрі, түптеп келгенде, еліміздің дамуын тежейді, мемлекеттің абыройына нұқсан келтіреді. Қоғамдық жерлердегі вандализм – соның айқын көрінісі. Халқымыздың дүниетанымына жат идеология да елімізге зор қауіп төндіреді. Әсіресе, жас ұрпақ жасанды идеялар мен «жалған батырлардың» жетегіне ілесіп кетуі мүмкін. Әлеуметтік желіде жастарды заңсыз іс-әрекет жасауға шақыратын материалдар таралуда.Тіпті, заң бұзған адамдарды үлгі етіп көрсететіндер бар. Біздің азаматтарымыз кез келген заңсыздыққа қарсы болуы керек, яғни бізге заң бұзушылыққа төтеп беретін мықты иммунитет қажет. Ел ішіне іріткі салатын, қауіп төндіретін әрекеттерді ақтауға қатаң тосқауыл қою керек.&nbsp; Құқықтық нигилизмге, яғни заң үстемдігін жоққа шығаруға жол берілмеуге тиіс. Заңға деген құрмет адал азаматқа тән қасиеттің бірі ретінде дәріптелуі қажет. Бұл – мемлекеттік органдарға ғана емес, барша халыққа ортақ міндет. Қысқасы, заң мен тәртіптің үстемдігін қамтамасыз ету – Әділетті Қазақстанды құрудың басты шарты, – деді Қасым-Жомарт Тоқаев.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917187_KZ1_2564_2.jpg">Мемлекет басшысы құқық қорғау органдары құқық бұзушылықтың алдын алу мәселесіне баса мән бергені жөн деп санайды.<blockquote>– Қылмыстардың негізгі себебі көбіне қоғамға жат әрекеттерден туындайды. Сондықтан заңды бұзуға бейім азаматтармен жүйелі жұмыс жүргізу маңызды. Сондай-ақ олардың қоғамдық тәртіпке қайшы істеріне түрткі болатын алғышарттарды түгел жою қажет. Бірақ бүгінде қылмыстың алдын алу шаралары тиімді жүргізіліп жатқан жоқ. Мұны мойындау керек. Сондықтан жүйені түбегейлі жаңарту қажет. Осы ретте қауіпті топтарға жататын азаматтардың басым бөлігі назардан тыс қалып қояды. Ал кейбір алдын алу шаралары шектеу-мәжбүрлеуден әрі аспайды. Мұндай жұмыстар жергілікті жерлерде жүйесіз жүргізіліп жатыр. Нақты үйлестіру тетіктері жоқ. Құқық бұзушылықтың алдын алу саласында бірыңғай заң әзірлейтін уақыт жетті. Заң жобасында профилактикадан өтетін азаматтар тізімін толықтай қайта қараған жөн. Жауапты органдардың құзыреттерін, үйлестіру тетіктерін, жеке профилактика құралдарын нақтылау қажет, – деді Президент.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917196_KZ1_2868_2.jpg">Қасым-Жомарт Тоқаев мұның, әсіресе, тұрмыстық зорлық-зомбылыққа қарсы күресте маңызы зор екеніне сенімді. Оның айтуынша, бұл жерде алдын алу жұмыстарының маңызы жедел әрекет ету және әділ жазасын беру ісінен кем емес.<blockquote>– Өздеріңізге мәлім, бұған дейін мұндай қылмыстар үшін жауапкершілікті күшейтуді қолдайтынымды айтқан едім. Қылмыстық кодекске енгізілген тиісті түзетулер жақын арада қабылданады. Ішкі істер министрлігі өз қызметкерлерін жаңа жұмыс тәсіліне көшуге алдын ала дайындауы керек. Құқық қолдану тәжірибесіндегі бұған дейін болған барлық мәселені ескеру қажет. Бұдан бөлек, кәмелетке толмаған азаматтардың құқығын қорғау жүйесін жаңғырту – өте өзекті мәселе. Үкімет азаматтық қоғам институттары мен сарапшыларды тарта отырып, бұл жұмысқа мұқият қарауы керек, – деді Мемлекет басшысы.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917208_KZ4_3117_2.jpg">Президенттің айтуынша, полицияның сервистік моделінің негізгі қағидаттарын іс жүзінде жүзеге асыру қажет. Бұл, ең алдымен, қоғамның талап-тілегіне құлақ асып, шұғыл әрекет ете білу деген сөз.<blockquote>– Халыққа ынтымақтастықтың өзара тиімді формасын ұсынып, кері байланыстың оңтайлы жолдарын реттеу маңызды. Бастамашыл және заңға қайшы әрекеттерге бей-жай қарамайтын азаматтарға арқа сүйеу құқық бұзушылықтарға мүлдем төзбеушілік қағидатының іс жүзінде сақталуына мүмкіндік беретініне сенімдімін, – деді Қасым-Жомарт Тоқаев.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917219_KZ1_2640_2.jpg">Сонымен қатар Мемлекет басшысы қоғаммен бірге полиция да түбегейлі өзгеруге тиіс екенін айтты.<blockquote>– Полиция қашанда халыққа үлгі-өнеге болуы керек. Сонда ғана жұрт полицияға сенеді, оны қорған көреді. Өкінішке қарай, тәртіп сақшыларының бәрі бірдей сондай деп айта алмаймыз. Ауыр қылмыс жасаған қызметкерлер анықталып жатыр. Соңғы кезде мұндай оқиғалар жиілеп кетті. Бұған жол бермеуіміз керек және ондай әрекеттерді мүлдем ақтауға болмайды. Осындай жағдайлар бүкіл жеке құрамның жұмысын бір сәтте жоққа шығарады. Ондай адамдарды полиция қатарынан шығару қажет. Олар биліктің абырой-беделін түсіреді. Қызметкерлерін дер кезінде тәртіпке салмаған басшылар мәселесін де қарау керек, – деді Президент.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917233_KZ1_2879_2.jpg">Алқа отырысы барысында Қасым-Жомарт Тоқаев орта буындағы басшылық құрамды биыл кезектен тыс аттестациядан өткізу туралы Ішкі істер министрінің ұсынысын қолдады.<blockquote>– Министрлік осы сынақ кезінде табандылық танытуға тиіс. «Бармақ басты, көз қысты» болмауы керек. Алайда аттестация біреуден есе қайтарудың құралы болмауға тиіс. Басты мақсат – жеке құрамды біліксіз және жұмысына адал емес басшылардан тазарту, яғни кәсіби кадр резервін жасақтау. Сонда ғана ахуалды түбегейлі өзгерте аламыз. Президент Әкімшілігі бұл жұмысты бақылауда ұстайды, – деді Мемлекет басшысы.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917244_KZ4_3141_2.jpg">Президент балалардың қауіпсіздігін қамтамасыз ету мәселесіне айрықша назар аударды. Атап айтқанда, былтыр кәмелетке толмағандарға қарсы жасалған қылмыс саны 22 пайызға артқан. Мемлекет басшысының пікірінше, осы бағытта алдын алу жұмыстарын күшейту қажет. Полиция мектеп басшылығымен бірлесе жұмыс атқаруға тиіс.<blockquote>– Жас ұрпақтың тағдыры, өмірі мен денсаулығы бәрінен маңызды. Үкіметке балаларды зорлық-зомбылықтан қорғау мәселесін мұқият саралап, нақты шаралар қабылдауды тапсырамын. Жасөспірімдер бос жүрмеуге тиіс. Олардың шығармашылыққа, спортқа қызығушылығын арттыру жағына көбірек көңіл бөлу қажет. Балаларды еңбекке баулып, волонтерлік қызметке жұмылдырған абзал. Көзбояушылық үшін жасалатын жұмысты доғару керек, – деді Мемлекет басшысы.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917259_KZ3_4784_2.jpg">Бұдан бөлек, Президент есірткінің таралуына батыл түрде тосқауыл қоюды талап етті.<blockquote>– Мен бірнеше рет осы мәселеге қатысты тапсырма бердім. Алайда ауыз толтырып айтатын нәтиже жоқ. Синтетикалық есірткінің қолжетімділігі және оның барынша тез таралуы жастар арасында нашақорлықтың белең алуына әкеп соқтырады. Оларға нашақорлықтың қаншалықты қатерлі екенін үнемі түсіндіріп отыру қажет. Полиция есірткі өндіру, оны сату және таратуға қарсы белсенді күрес жүргізуі керек. Науқаншылдық, көзбояушылық және статистика үшін жұмыс істеу дегенді тоқтату қажет, – деді Қасым-Жомарт Тоқаев.</blockquote>Сонымен қатар киберқылмыспен және интернет-алаяқтықпен күрес шараларын күшейту жөнінде тапсырма берілді.<blockquote>– Ұрылар мен бандиттер түрмеде отыруы керек. Бұл – сіздердің криминалға қарсы әрекеттеріңіздің бірден-бір мақсаты. Қылмыстық топтармен ымырасыз күресу – сіздердің тікелей міндеттеріңіз әрі қызметтік борыштарыңыз, – деді Мемлекет басшысы.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917287_KZ2_5327_2.jpg">Қасым-Жомарт Тоқаев жазасын өтеп жатқандардың негізгі құқықтарын сақтау маңызды екенін атап өтті. Оның пікірінше, абақты дегеніміз – айыпты адамды жазалау орны ғана емес, адамның қайтадан қылмыс жасауына жол бермейтін мекеме болуға тиіс.Сонымен бірге Президент құқық қорғау органдарының қызметі халық арасында бүкіл мемлекеттік жүйенің бет-бейнесі туралы түсінік қалыптастырады деп санайды.<blockquote>– Біз өздерінің қызметтік міндеттерін адал атқарып жүрген полицейлерді ескерусіз қалдырмауымыз керек. Әсіресе олардың нағыз ерлік істерін (ал мұндай жағдайлар аз емес), жұмысын лайықты бағалап, ең жоғары наградалармен марапаттауымыз қажет. Кәсібилік, жауапкершілік танытқан, ерлік көрсеткен нақты жағдайларды үлгі ету, Ішкі істер органдары қызметінің тиімділігін арттыру арқылы полицияның оң имиджін қалыптастыру маңызды, – деді Мемлекет басшысы.</blockquote><img class="image_resized" style="width:730px;" src="https://www.akorda.kz/public/assets/media/uploadMedia/1705917318_KZ2_5303_2.jpg">Алқа отырысы барысында Ішкі істер министрі Ержан Сәденов қылмысқа, тұрмыстық зорлық-зомбылыққа, жасөспірімдер арасындағы қылмысқа, интернет алаяқтыққа қарсы күрес және оның алдын алу шаралары мен жүргізіліп жатқан жұмыстар, сондай-ақ ішкі істер органдары қызметінің тиімділігін арттыру мәселесі туралы есеп берді.<img class="image_resized" style="width:730px;" src="https://www.akorda.kz/public/assets/media/uploadMedia/1705917328_KZ3_4842_2.jpg"><img class="image_resized" style="width:730px;" src="https://www.akorda.kz/public/assets/media/uploadMedia/1705917347_KZ4_3112_2.jpg"><img class="image_resized" style="width:730px;" src="https://www.akorda.kz/public/assets/media/uploadMedia/1705917358_KZ1_2951_2.jpg">

Мемлекет басшысы Ішкі істер министрлігінің кеңейтілген алқа отырысын өткізді

<a href="https://kyzylorda-news.kz/ru">Kyzylorda-news.kz.</a> Бүгін облыс әкімі Нұрлыбек Нәлібаев Чехия Республикасының бизнес өкілдерімен кездесіп, өңірдегі инвестициялық жобаларды таныстырды.Аймақ басшысы қызылордалықтар жаңа іскерлік байланыстар орнатуға, өзара тиімді қарым-қатынастарды дамытуға әрдайым ашық екенін жеткізді. Балық өнімдерін экспорттау, энергетикалық жобалар мен мұнай-газ құбырлары өндірісіне қызығушылық танытқан инвесторларға өңірдің мүмкіндіктері туралы айтты.<blockquote>«Біздің аймақ – ауыл шаруашылығы мен өнеркәсіп саласы дамыған, минералдық шикізат ресурстарына бай агро-индустриялық өңір. Қызылорда облысында Кіші Арал теңізі, Сырдария өзені және 201 көл бар, онда балық аулау кәсібі жолға қойылған. Өңірде жылына 36,5 мың тонна балық өндіретін 10 балық өңдеу зауыты жұмыс жасайды. Өткен жылы 8,3 млн. АҚШ долларына бағаланған 3,3 мың тонна балық өнімдері экспортталды. Оның ішінде құны 150 мың АҚШ долларын құрайтын 197,3 тоннасы Грузияға, 114,8 мың АҚШ доллары болатын 15,8 тоннасы Чехияға жіберілді.Энергетика саласына келсек, аймақта жиынтық қуаттылығы 89 мегаваттық 9 күн электр станциясы жұмыс жасайды. Оның үшеуі шетел инвесторларының қатысуымен жүзеге асты. «Акса энерджи» түрік компаниясы Қызылорда қаласында қуаттылығы 240 мегаваттық жылу-электр стансасын салуда. Оның қуаты өңірдің сұранысын толық қанағаттандырады. Экспортқа бағытталған, өңделген отандық өнімдерге бірқатар қолдау шаралары бар. Сыртқы нарыққа шығару үшін кәсіпорындарға жан-жақты сервистік қолдау көрсетіледі, жол шығындары 80%-ға дейін өтелуде. Сіздерге перспективалы жобаларды іске асыруда мүмкіндігінше жан-жақты қолдау көрсетеміз. Біздің өңірге келген сапарыңыз Қызылорда облысы мен Чехия арасындағы достық байланысты одан әрі кеңейтетініне сенімдімін», – деді Нұрлыбек Машбекұлы.</blockquote>Өз кезегінде, инвесторлар ұсынылған жобаларға қызығушылық танытып, алдағы уақытта аталған салалар бойынша әріптестік орнатуға ниет білдірді.

Облыс әкімі Чех инвесторларымен кездесті

<a href="https://kyzylorda-news.kz/ru">Kyzylorda-news.kz.</a> Бүгін облыс әкімі Нұрлыбек Нәлібаевтың төрағалығымен өткен кадрлық өзгерістерге байланысты актив отырысында Қызылорда облысының табиғи ресурстар және табиғат пайдалануды реттеу басқармасының жаңадан тағайындалған басшысы таныстырылды.Бұл лауазымға бұрын Арал ауданының әкімі қызметін атқарған Сермағамбетов Серік Сағитжанұлы тағайындалды.<blockquote>«Серік Сағитжанұлы Арал ауданында 3 жылға жуық қызмет жасап, ауданның әлеуметтік-экономикалық дамуының оң динамикасын қалыптастырды. Арал ауданы Мемлекет басшысы Қасым-Жомарт Кемелұлының ерекше қамқорлығында, ондағы бастамаларға айрықша көңіл бөледі. Биыл Қазақстан Халықаралық Аралды құтқару қорына төрағалық етеді. Қазіргі уақытта теңіздің кепкен ұлтанына сексеуіл егу жұмыстары қарқынды жүргізілуде.Жыл қорытындысымен аудан бюджеті 17,5 млрд. теңге болып, соңғы 3 жылда екі есе өсті. Осы уақытта ауданға 56,6 млрд. теңге инвестиция тартылып, ауыл шаруашылығы жалпы өнімінің көлемі 1,5 есе, өнеркәсіп өнімінің көлемі 2 есе өсті. Сонымен қатар, 85,6 мың шаршы метр 659 тұрғын үй пайдалануға беріліп, 21,3 млрд. теңгенің құрылыс жұмыстары жүргізілді. 2021 жылдан бері 213,4 шақырым жол жөнделді. Ауданда көп жылдан бері көтеріліп келген мәселелердің бірі – Арал қаласының екі бетін жалғайтын, теміржол үстінен өтетін көпір құрылысы басталды, жоба құны – 3,1 млрд. теңге. Сексеуіл кенті 3,6 млрд теңгеге газдандырылуда. Соңғы 2 жылда демеушілер2,5 млрд. теңгенің жобаларына қаржы салды. «2022-2024 жылдарға арналған ауыл шаруашылығы саласын дамытудың Жол картасын» тиімді іске асыру нәтижесінде ауданда егін шаруашылығы 2022 жылы 4 есе, 2023 жылы 7 есе ұлғайды. Мал басы 2021 жылмен салыстырғанда 12700-ге көбейіп, облыс көлемінде төрт түлік өсімін қалыптастырғаны үшін Арал ауданы екі жыл қатарынан «Озат аудан» номинациясымен марапатталды. Бұл маңызды жобаларды үйлестіріп, нәтижелі жұмыстарды жүзеге асыруда Серік Сағитжанұлының елеулі еңбегі бар екенін атап өту қажет», – деді аймақ басшысы.</blockquote><figure class="image"><img src="https://knadmin.beoblood.kz/uploads/418986585_680097557644825_6795833215047858931_n_22c9c3f9b5.jpg" alt="418986585_680097557644825_6795833215047858931_n.jpg"></figure>Актив отырысында облыстық мәслихат төрағасы Наурызбай Байқадамов, Қызылорда қаласының әкімі Серік Қожаниязов, Жаңақорған ауданының әкімі Мұрат Тілеуімбетов Серік Сағитжанұлын құттықтап, жаңа қызметінде сәттілік тіледі.Серік Сағитжанұлы 1965 жылы Қазалы ауданында дүниеге келген. Алматы халық шаруашылығы институтын экономист, Еуразия ұлттық университетін заңгер мамандықтары бойынша бітірген.Еңбек жолын 1988 жылы Балық шаруашылығы министрлігі материалдық-техникалық жабдықтау орталық базасының аға экономисі болып бастаған. 2005-2011 жылдары Қызылорда қаласы әкімі аппаратының басшысы, Шиелі ауданы әкімінің орынбасары, Қызылорда облысының кәсіпкерлік және өнеркәсіп басқармасының бастығы лауазымдарында қызмет етті. 2011-2016 жылдары Жалағаш ауданының әкімі, «Байқоңыр» әлеуметтік-кәсіпкерлік корпорациясы» ұлттық компаниясы» акционерлік қоғамы басқарма төрағасының орынбасары, Қызылорда облысының жұмылдыру дайындығы басқармасының басшысы, «Қызылорда облыстық кәсіподақтар орталығы» аумақтық кәсіподақтар бірлестігінің төрағасы қызметтерін атқарған.2021 жылдың мамыр айынан осы кезге дейін Арал ауданының әкімі қызметін атқарып келді.

Арал ауданының әкімі басқа қызметке ауысты 

<a href="https://kyzylorda-news.kz/ru">Kyzylorda-news.kz.</a>&nbsp;&nbsp; Қызылордада екі жасөспірім - қыз бен жігіт мұзға құлап, қауіпке тап болды.Абырой болғанда Сырдария өзенін патрульдеу кезінде полицейлер мұзға құлап кеткен 15 жасар қыз бен 14 жастағы жігітті байқапты.&nbsp;Мамандандырылған күзет қызметінің қызметкерлері Әділхан Молдағалиұлы мен Алтынбек Мейрамбекұлы дереу оларға араша түсіп, жеткіншектерді суық судан алып шыққан.Полицейлер жедел жәрдем шақырып, кейін балаларды ата-анасына тапсырды. Анықталғандай, жасөспірімдер ойнап жүріп, мұзға шығып, оның соңы шытырманға ұласқан.&nbsp;Фото: <span style="background-color:rgb(246,246,249);color:rgb(102,102,135);font-family:-apple-system, BlinkMacSystemFont, &quot;Segoe UI&quot;, Roboto, Oxygen, Ubuntu, Cantarell, &quot;Open Sans&quot;, &quot;Helvetica Neue&quot;, sans-serif;">freepik

Қазақстан және Қызылорда облысының басты жаңалықтары