<a href="https://kyzylorda-news.kz/">Kyzylorda-news.kz</a> Еліміздің бірнеше аймағында соғыс ардагерлеріне 9 мамырға орай жергілікті бюджеттер есебінен біржолғы ақшалай төлемдер берілді. Бұл туралы<a href="https://stan.kz/ortasha-molsheri-15-million-tenge-zhenis-kunine-oray-ar-399791/"> Stan.kz</a> ақпарат агенттігі хабарлайды.Бүгінгі таңда Қазақстанның барлық өңірі мен Астана, Алматы және Шымкент қалаларында ардагерлерге арналған бір реттік төлем үшін жергілікті бюджеттерден барлығы 187 миллион теңге бөлінген.Әлеуметтік көмек көрсетудің қолданыстағы қағидаларына сәйкес 9 мамырға орай берілетін біржолғы төлемдер сомасы жергілікті бюджеттердің мүмкіндіктеріне және мәслихаттардың шешімдеріне байланысты әр облыста дербес белгіленеді.Айта кетері, еңбек және халықты әлеуметтік қорғау министрлігінің ұсынысы бойынша соңғы жылдары көптеген облыста ардагерлерге төлемдер бірыңғай мөлшерде төленеді.Мәселен, биыл республика бойынша біржолғы әлеуметтік көмектің орташа мөлшері 1,5 млн теңгеге тең. Бұл ретте көптеген өңірлерде орташа мөлшерден жоғары сома төленді: Ақмола облысында – 3 млн теңге, Ақтөбе облысында – 2 млн теңгеден астам. Абай, Алматы, Қарағанды, Павлодар облыстары мен Астана және Алматы қалаларында ҰОС қатысушылары 2 млн теңгеден алды.Бүгінде республикада Екінші дүниежүзілік соғыстың 148 ардагері тұрады. Оларға әлеуметтік қолдаудың басқа да түрлеріне қарамастан ай сайын 16 АЕК (2024 жылы 59 072 теңге) мөлшерінде арнаулы мемлекеттік жәрдемақы төленеді.&nbsp;Фото: Нұрболат Нұржаубай

Орташа мөлшері 1,5 миллион теңге: Жеңіс күніне орай ардагерлерге бюджеттен бір реттік төлем берілді

<a href="https://kyzylorda-news.kz/">Kyzylorda-news.kz</a> &nbsp; Облыс әкімі Нұрлыбек Нәлібаев Сырдария ауданына арнайы барып, Ұлы Отан соғысының ардагері Яхия Тасыровты Жеңіс күнімен құттықтады. Майдангердің үйіне облыстық мәслихат төрағасы Мұрат Тілеуімбетов, Қазақстанның Еңбек Ері Абзал Ералиев те барды.Яхия Тасыров 102 жаста. Ғасыр куәгері Ташкентте текстиль оқуын оқып, 1940 жылы текстиль фабрикасына шебердің көмекшісі болып жұмысқа орналасады. 1941 жылдың аяғында Ташкент облысы Фрунзе аудандық әскери комиссариатынан әскерге алынған. Сібірде, Омбы қаласында алғашқы әскери дайындықтан өтіп, 1942 жылдың қазанында майданға жіберілген. Соғыс жылдарында Сталинградты, Курскіні, Польшаны жаудан қорғаған. Данск жерінде портта аяғынан ауыр жараланған. 1944 жылы шекарадан Германияға кірген. 1945 жылы тамыздың аяғында елге оралған. Бейбіт өмірге араласқаннан кейін аудан орталығындағы сүт зауытында қойма меңгерушісі болып 16 жыл жұмыс жасаған. 1960 жылы Жалағаштың сүт зауытында мастер, 1982 жылы аудан орталығындағы астық қабылдау пунктінде жұмыс жасап зейнеткерлікке шыққан. «Қызыл жұлдыз» орденімен, «Ұлы Отан соғысы І-ІІ дәрежелі орденімен», «Ерлігі үшін», «Германияны жеңгені үшін», «Ұлы Жеңістің40-50-60 жылдығы» медальдарымен марапатталған. Бүгінгі күні 3 ұл, 1 қыздан 15 немере сүйген қазыналы қарт.Облыс әкімі ардақты ақсақалға ізгі тілегін жеткізіп, сыйлық табыстады. Егемен еліміздің жас ұрпағына патриоттық тәрбие берудегі ардагерлердің зор үлесін атап өтті.Айта кетейік, Жеңістің 79 жылдығына облыста арнайы іс-шаралар жоспары бекітілді. Онда мерекелік құттықтаулар, қайырымдылық, әлеуметтік-тұрмыстық көмек көрсету шаралары қамтылған. Бүгінде аймағымызда Ұлы Отан соғысының қатысушылары мен оларға теңестірілген 3948 ардагер бар. Мереке қарсаңында бюджеттен біржолғы әлеуметтік қолдау көрсетілмек. Облыстағы Ұлы Отан соғысының ардагерлеріне 2 млн 500 мың теңгеден біржолғы әлеуметтік көмек төленеді.Фото:&nbsp;Қызылорда облысы әкімінің баспасөз қызметі

Облыс әкімі ғасыр жасаған майдангерді құттықтады

<a href="https://kyzylorda-news.kz/">Kyzylorda-news.kz</a>&nbsp; Бақыт бас қалада не биік баспанада еместігін өмірімен ұғындырған кейіпкерлеріміз ауылдан ұзамай-ақ абыройға бөленуге болатынының жарқын үлгісі. Кішкентай мекеннен шығып, бір-бірімен табыстырлары табысқан арандылық Асаубаевтар әулеті.Ауданнан қырық бес минуттық қашықтықтықтағы Қожабақы қазіргі таңда тұрмысы түгел, түтіні түзу ұшқан ауыл. Жыл санап аясы артып келе жатқан округ орталығында қоныс тепкен үйді шаттық ұялаған шаңырақ деуге болады.Қазірде отанасы Қуаныш апа жасы жетпістен асса да, қимылы ширақ, әдеттенген дағдысымен үй шаруасына, қарашаңырақтағы ұлы Жәнібек пен келіні Маржанның аралас заттар дүкеніне де қолқабыс танытып жүр. Өсімдіктер әлеміннен де алыс емес. Ауласындағы саялы ағаштар, қаз-қатар тізілген көшеттердің әрбірін апа баладай мәпелейді.Мектепте ұзақ жыл шәкірттерді шыңдауға дағдыланған ұлағат иесінің жиғаны көп, айтары бар адам. Ерін күткен енеден кеніндердің де көрері көп.Небәрі бір жасында, соғыс салған салдардан әкеден айырылған отағасы бүгінгідей құрмет биігіне көтерілуге дейін ұзақ жолдан өткен. Анасы Наурыз колхозшы, ветеринар, ферма меңгерушісі, ауылдық кеңес хатшысы болып, еңбек ете жүріп, баласын қатарға қосады. Мектеп бітірген соң Болат анасына қарайлап, үш жылдай ауылдық шаруашылықта электрмен темір пісіруші болды. Алайда қамқор ана: «Заман оқығандікі. Өзім бірдеңе қылып күнімді көремін. Ағайын-туыстың арасында отырмын, артыңа алаңдама», – деп ақ батасын беріп, шығарып салады.1968 жылы Павлодар қаласындағы индустриалды институтқа қабылданған Болат Асаубайұлы 1972 жылы инженер-құрылысшы мамандығын алып шығады.Жас маман еңбек жолын Бозкөл ауылында құрылыс шебері болып бастайды. Ұзамай туған ауылына ауысып, құрылыс шебері, аға прорабтыққа жоғарылайды. Ел егендігін алған тұста инженер-гидротехник болып та тер төгеді. Ал 1999 жылдан-2019 жылға дейін ауылдық пошта меңгерушілігін атқарады.Еңбегі еленіп, әр жылдарда алғысқа бөлінгенін сөреде тізілген сол сәттер куәгерлерінен көрдік.Қуаныш Кәдір оқушыларға француз тілінен сабақ берген, Н.В.Гоголь атындағы институттың түлегі.Алғашқы қадамын Абай ауылындағы N90 мектепте бастаған мұғалімнің өмірі тұрмыс құрғаннан – зейнет жасына жеткенше ауылдағы N25 мектепте жалғасады. Шығармашыл жан әрдайым ізденісті жұмыстарымен дараланып, Алғыс, Құрмет грамоталары, медальдар алады. Тек мамандығының мақтаулысы ғана болмай, партия ұйымының жетекшісі, әйелдер кеңесінің төрайымы сынды жұмыстарда да жауаптылығымен көрінеді. Оқушылары олимпиада, пәндік жарыстар мен түрлі іс-шараларда топ жарады.Отбасы мен жұмыстың жүгін қалай қатар алып жүруге боатыны туралы сұрағанымызда, мына бір естелікті еске алды.<blockquote>«Енем, марқұм, көрегенді кісі еді. Маған: «Балам, қазіргі келіндер балаларын шектеу үшін қастандыққа барады дейді. Сенің ақылың бар ғой, ондайды жасама. Ұлым аз қиындық көрген жоқ. Жалғызымның шырағын сөндірме», – дегенді үнемі аманаттап отыратын. Анамыздың алғаусыз пейлі мен ақ тілеуі болар, балаларым өмірден өз орындарын тапты», –дейді «Алтын алқа» иегері.</blockquote>Үлгілі ұядан түлеп ұшқан перзенттер де түрлі салада биіктерді бағындырып келеді.Құралай, Жаңагүл, Ақгүл, Жәнібек мұғалімдік мамандықты таңдаса, Құрманбек – мемлекеттік қызметкер. Мейрамбек – өрт сөндіруші, Әлібек – теміржолшы. Мақпал есеп қызметкері болса, Қожахмет – аудандық балалар мен жасөспірімдер спорт мектебінің бөлім меңгерушісі. Немерелерінің үлкені еңбекке араласса, өзгелері студент, оқушы, балабақша тәрбиеленушілері.<blockquote>«Ата-анамның қиындыққа қажып, мойығанын көрген емеспін. Оларды барлығынан бір-біріне деген құрмет құтқарды. Түсіністік шешпейтін түйін жоқ. Кейде бір мәселелер туындап жатса, жеңешем: «Көкесі, бұл сыннан да өтеміз», – деп қолдау білдіргеніне талай куә болдық.</blockquote>Бізге берген ең үлкен мұрасы, отбасымыздың басты құндылығы – бір-бірімізді қадірлеу, адам жанына жара салатын ауыр сөз айтпау. Қазір осы қасиеттерді балаларымыздан көріп, марқаямыз», – дейді қыздары Құралай. Мұнан өзге адалдықтан аттамау, қинат ету қияға бастырмайтынын Болат аға әке өсиеті ретінде балаларының санасына зерделеп отыратынын көрінеді. Жақсылармен өткен жарты күнде сенім мен сабыр сыйластыққа жеткілетін терең ұғындық.

Шаттық ұялаған шаңырақ

&nbsp;<a href="https://kyzylorda-news.kz/">Kyzylorda-news.kz</a>&nbsp; Қызылорда қалалық орталықтандырылған кітапханалар жүйесіне қарасты №4 кітапханада ғалым-жазушы, ҚР Мемлекеттік сыйлығының иегері, Қазақстанның еңбек сіңірген қайраткері Қойшығара Салғариннің 85 жасқа толуына орай «Тарих ғылымының тамыршысы» атты кітап көрмесі ұйымдастырылды. Көрмеде жазушының «Алтын тамыр», «Көмбе», «Қазақтың қилы тарихы», «Қазақтар» роман-эссе, «Ұлы дала», «Қазына», «Сол бір күндер» деген шығармаларына шолу жасалып, №112 мектептің оқушыларына кеңінен насихатталды.Қойшығара Салғараұлы 1939 жылы 1 сәуірде Торғай облысының Көкалат ауылында туған. Еңбек жолын шопандықтан бастаған ол, ҚазМУ-дің филология факультеті журналистика бөлімін бітірген соң, 1964–1965 жылдары «Ауыл өмірі» газетінің редакторы, 1965–1971 жылдары Қазақ радиосының Қостанай облысындағы меншікті тілшісі, 1971–1975 жылдары Торғай облыстық телерадио комитетінің редакторы болған. 1975–1990 жылдары «Егемен Қазақстан» газетінде тілші, бөлім меңгерушісі, 1990–1993 жылдары Әдебиет және өнер институтында қызметкер. 1993–1997 жылдары ҚР Мемлекеттік хатшысының кеңесшісі, мемлекеттік саясат жөніндегі ұлттық кеңес хатшысының орынбасары, хатшысы, 1997 жылы Қазақстан Республикасының ҚХР-дағы Елшілігінде мәдениет жөніндегі кеңесші қызметтерін атқарған.

Қызылордада «Тарих ғылымының тамыршысы» атты кітап көрмесі өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;Ә.Тәжібаев атындағы облыстық кітапханада ақын, ғалым, ұстаз Рахат Наурызбаеваның 80 жасқа толуына орай «Бала тілін тапқан ақын» атты шығармашылық кеші өтті. Шараның мақсаты – жас ұрпақты ақынның шығармашылығымен таныстыру.Шараға ақын, Қазақстан Жазушылар Одағының Қызылорда облысындағы өкілі Қ.Есімсейітова, ақын, сазгер Д.Торғаева, жазушы Н.Рахмет, сазгер, ұстаз Л.Сүйінбаева, Т.Есетов атындағы №264 мектеп-лицейінің, І.Қабылов атындағы №12 ІТ мектеп-лицейінің, Ә.Мүсілімов атындағы №101 мектеп-лицейінің, К.Қаракөзов атындағы №235 мектеп-гиназиясының, А.Байтұрсынов атындағы №211 орта мектебінің, «Your English shool» жеке бастауыш мектебінің оқушылары және «Жайна Құлыншақ» балабақшасының бүлдіршіндері мен тәрбиешілері қатысты.Кеш барысында мекеме басшысы Н.Мыңжас ұйымдастырылған шараның маңыздылығына тоқталып, кештің басты кейіпкеріне ықыласын білдірді.Шараға қатысқан балалар ақынның білімге, еңбекке, имандылыққа баулыған өлеңдерін жатқа оқып, «Дәптерлер көтерілісі» шығармасы бойынша қойылым қойды. Сонымен қатар ақынның өлеңдеріне жазылған әндер шырқалып, би биледі. Ақын өз кезегінде жиналған қауымға ризашылығын білдіріп, ақ тілегін арнап, оқырмандармен естелікке суретке түсті.Шара соңында қатысушылар ақынның шығармашылығына арналған «Балғындарға жыр сыйлаған» атты көрмемен танысты.

Қызылорда қаласында «Бала тілін тапқан ақын» атты шығармашылық кеш өтті

<a href="https://kyzylorda-news.kz/">Kyzylorda-news.kz</a> Баспаналы болуға ниеттеніп жүрген жандар үшін қуанышты жаңалық. Елімізде «Наурыз» атты жаңа тұрғын үй бағдарламасы іске қосылды. Жаңа бағдарламаға барлық қазақстандықтың қатысуына мүмкіндік бар. Тұрғын үй бағдарламасына қатысуға өтінімдерді қабылдау 30 маусымға дейін жалғасады. Бұл туралы Өңірлік коммуникациялар қызметінің ақпарат алаңында «Отбасы банкі» АҚ Қызылорда облысы бойынша филиалының директоры Әділжан Сәулебаев хабарлады.– Мемлекет басшысы Атырауда өткен ұлттық құрылтайда «Наурыз» атты жаңа тұрғын үй бағдарламасының қосылатындығын хабарлаған болатын. Қазіргі таңда жаңа бағдарламаға өтінім қабылдау басталып кетті. Өтінімдерді «Баспана маркет» порталына жолдауға болады. «Наурыз» бағдарламасының негізгі шарттары мынадай: алғашқы жарна – 20 пайыздан басталады, азаматтардың барлық санаттары үшін несиелеу мөлшері 9 пайыз, ал әлеуметтік осал санаттағы жандар үшін 7 пайыздан басталады. Несиелеу мерзімі – 19 жыл. Бұл бағдарламаға барлық санаттағы азаматтар қатыса алады. Бағдарламаға қатысу үшін отбасы банкінде депозит шотын ашу керек, бірақ салым мерзімі ескерілмейді. Жинақ шотында кемі 1 млн теңге көлемінде қаражат болуы керек. Бұл қаржыны бағдарламаға қатысуға өтініш берер алдында аударуға болады. Сондай-ақ, соңғы 5 жыл ішінде азаматтардың және оның отбасы мүшелері меншігінде тұрғын үйдің болмауы тексеріледі. Жаңа тұрғын үй бағдарламасы 8 жылға арналған. Осы уақыт аралығында еліміздегі 68 мыңға жуық азамат қоныс тойын тойлайды деп жоспарлануда, - деді Әділжан Рахымжанұлы. &nbsp; &nbsp; &nbsp; &nbsp; &nbsp; &nbsp; &nbsp; &nbsp; Фото:&nbsp;Қызылорда облысының Өңірлік коммуникациялар қызметі

«Наурыз»: Жаңа тұрғын үй бағдарламасы іске қосылды

<a href="https://kyzylorda-news.kz/">Kyzylorda-news.kz</a> &nbsp;Аудан орталығынан шалғайда орналасқан Бесарық ауылында ақ жаулықты қарт ана тұратыны естіген едік. Жасы 90-ға келген Ұлжан Айтмұратова өмірден көргені мен түйгені мол кейуана екені даусыз. Оның ғибратты ғұмырын үлгі ету мақсатында қолымызға қалам алып, ізгіліктің дәнін сепкен қарияның өнегелі өмір жолына зер сала білдік.Айдарлы ауылында 1934 жылы әкесі Зікір мен анасы Құрманкүлдің тұңғышы болып жарық дүниеге келген Ұлжан көп жыл ата-анасының қызығы болып жалғыз өскен екен. Әттеген-айы әкесінен небәрі 9 жасында көз жазып қалғандықтан, анасына қолқанат, соңынан ерген бауыры Жарқынға бас-көз болып өседі. Әке-шешесінің көзінің ағы мен қарасы болып өскен Ұлжан мен інісі Жарқын ана­ларының айтқан өнегелі әңгімесін санасына тоқи біледі. Бойжеткен соң Айдарлыдан ұзатылып, бесарықтық азамат Досымбай Айтмұратовқа тұрмысқа шығады. Үлкен әулеттің табалдырығын аттап, жұбайының үйілмелі-сүйелмелі бауырларымен бір шаңырақ астында тұрған екен.<blockquote>– Он сегіз жасымда тұрмысқа шыққан едім. Ата-енеммен, күйеуімнің 5 бауырымен бірге тұрып, берекелі отбасына айнала білдік. Кейін азаматыммен совхоздың малын бағуға кеттік, бөлек шықтық. Дүниеге он бала әкелгеніммен оның бесеуі шетінеп кетті. Қалған бесеуін өсіріп, жеткіздік. Малшының әйелі болып, атқа мініп, мал бағуға бірге бардық. Өмірдің қиындығына ешқашан налыған емеспін. Жұбайым өте момын кісі еді. Оның дауыс көтеріп, қатты сөз айтқанын көрмедім. Үнемі сенім білдіріп, барлық кезде қолдау білдіріп отыратын. Ененің өнегесін де көрдік. Марқұм енемнің сіңлісі біздің үйде тұратын. Ол кісінің жұбайы қайтыс болған соң, әпкесінің қолына келді. Кейін енем дүние салғанда, екі көзі көрмейтін, зағип әйел менің қолымда болғысы келетінін айтты. Қарт кісіні 13 жыл бойы күтіп, бірге тұрдық, арулап жерледік. Әйел адамның бойына сіңірген қасиеті жақсы болса, Алла бар жақсыны үйіп-төгіп береді, – дейді көп жасаған ана.</blockquote>Өмірге өкпелемеу, адал болу, Алланың берген ырзық-несібесіне риза болу – имандылықтың белгісі саналады. Бойында имандылық пен ізгіліктің нұры тұнып тұрған кейуана айналасына жылулық пен адамгершіліктің нәрін септі. Адал еңбектің үлгісін көрсетті. Сондықтан болар, әлі күнге дейін қимылы ширақ, айтар ойы орнықты. Бұл көп адамға бұйыра бермейтін Жаратқанның сыйы. «Бейнетінің зейнетін көру – бұйырған бақыт» деп білетін қарт ананың айтар естелігі өте көп. Соның біріне назар салып, қайсарлығына еріксіз тәнті болдық.<blockquote>– Қырқым кезінде малшылар жиналып, қой қырқатын едік. Ондай кезде үлкен той болушы еді. Қазан-қазан ет асылып, әрбір шаңырақта береке-бірлік орнайтын. Көптен көріспеген малшылар шүйіркелесіп әңгіме-дүкен құрып, домбырамен ән айтылып, жыр тыңдалатын. Әйел, бала-шағаның барлығы науқанға атсалысып, құр қарап отыратын адам болмайтын. Мал-жанның жағдайын жасағанда шаршауды білмедік. Қыр­қымды еске алудың өзі көңілге қуаныш ұялатады. Нағыз мереке, нағыз той деп осындайды айтады.</blockquote>Тағы бір естен кетпейтіні, мына бір оқиға. Бірде мал қайырып келуге атқа қондым. Шіліңгір шілденің аптап ыстығы еді. Бауырымда төртінші 4 айлық балам бар. Маңыраған малды қайырып, суатқа апару керек болды. Баламды шоқ шеңгелдің көлеңкесіне жатқызып, қойды қайыруға кеттім. Арада біраз уақыт өтіп, алыстап кетсем керек, малды суатқа құ­латып келгенімде баламды таппай қал­­дым. Қорыққаннан жүрегім аузыма тығылды. Қайда кетуі мүмкін. Баламды жат­­қызып кеткен орыннан жаңылыстым ба деп, әр шеңгелдің астына үңіліп, әй­теуір тауып алдым. Баламның ауызы кеуіп, қып-қызыл болып, жылағаннан әл­сіреп қалыпты. Баламмен аман-есен қауыш­қаныма қуандым. Осылай жүріп те жұмыстан қалмадық, мал бақтық, бала туғанымызды міндетсінбедік. Өмір бойы жұбайымыздың көмекшісі болып, 4 ұл мен 1 қызды өсірдік, – дейді қарт ана.Иә, ана, ене өнегесін ұрпақтан-ұрпаққа жалғап келе жатқан әулеттің үлкені Ұлжан Зікірқызы ұлы құндылық қазақтың салт-дәстүрін бәрінен де биік қояды. Қазақылық, биязылық оған тән қасиет. «Қыз бала анасынан алған өнегесімен өседі» демекші, отбасында жалғыз қыз болып өскенімен, анасынан үйренгені көп болыпты. Сол дәстүрден әлі күнге дейін жаңылған емес. Тағам әзірлеуді, бау-бақша күтімін жасауды, егін егуді беріге дейін атқарды. Қазір бұл дәстүрді келіндері жалғастыруда. Көнекөз қария іс тігу, көрпе көктеу, мақта салу, ас әзірлеу, малдың жағдайын жасау­дың жайын келіндеріне үйретіп отырады.<blockquote>– Енемнің өнегесін үйреніп, ол кісінің балажандылығын, мейірім­ді­лігін көзіммен көріп келемін. Алғашқы немерелерін бауырына бас­ты. Қос немересі Талап пен Гүлнара әжелерінің тәрбиесін алды, мейіріміне бөленді. Қазір олар өсіп кетсе де әжелерін сағынып, арагідік уақыт тауып құшағына келуге асығып тұрады. Перзенттерінен сүйген 14 немере мен 21 шөбересінің бәрі әжені жақсы көреді. Қарашаңырақтың иесі ретінде жұбайыммен бірге анамызды бағып-қағып отырғанымызға шүкіршілік етеміз. Берекеміз бен мерекеміз саналатын әже­мізді бір сәт көрмесек сағынамыз, – дейді шаңырақтың келіні Салтанат Жұмабаева.</blockquote>Қара жұмыстың қазанында қайнап, адамның, малдың жайын күйттеген Ұлжан апа өмірлік қосағы Досымбай аға небәрі 56 жасында дүниеден өткенде есеңгіреп қалған екен. Уақыт өте жақындарының қолдауымен еңсесін көтеріп, белін бекем буып, қайта аяққа тұрады. Отбасының қазығы өзі болып қалғанын түсініп, бала-шағаны одан әрі жеткізуге қамданады. Жұмыстан да ажырамай, ата кәсіп мал өсірумен, бордақылаумен айналысып, балаларын жеткізеді. Үлкені Жайлаубай, екінші ұл Қыстаубай былтыр марқұм болған, үшінші ұл Дүйсенбай, кенже ұл Ғалым және үйдің кенжесі тұрмыстағы Гүлсара тамырын тереңге жайған әулеттің жал­ғасына, алтын қазығына айналғаны көпшілікке мәлім.<blockquote>– Жұбайыммен жарасымды өмір сүр­дім. Біз жастайымыздан бас қостық. Ер азаматымның арқа сүйері болдым. Біз ешқашан ұрысқан емеспіз. Бірдеңе айтатын болсам, еркелеп сөйлейтін едім. Бір-бірімізге деген сыйластықтың арқасында үйімізде береке болды. Қазіргі жастар шы­дамсыз. Сәл қиындыққа күйінеді. Содан барып отбасының берекесі кетіп, ажырап жатады. Ер азаматты қадірлейтін әйелдің басынан бақ кетпейді. Сондықтан айтарым, әйел адамға көп нәрсе байланысты. Берекелі Бесарықтың түтіні түзу ұшып, ер азаматтарымыз аман болсын, – деп батасын берді тоқсанның төріне шыққан Ұлжан апа.</blockquote>&nbsp;

Еңбекпен шыңдалған кейуана

<a href="https://kyzylorda-news.kz/">Kyzylorda-news.kz</a> Шіркейлі ауылдық мәдениет үйінде Социалистік Еңбек Ері, «Шіркейлі» шаруашылығының атақты күрішшісі, Социалистік Еңбек Ері, Балдырған Мұстапаева­ның туғанына 85 жыл толуына орай «Еңбекпен даңқы өрлеген» тақырыбында облыстық жазба ақындар мүшәйрасы өткізілген еді.Облыстық маржан сөз иелерінің бәсекесіне халықаралық «Алаш» әдеби сыйлығының иегері, Қазақстан Жазушылар одағының Қызылорда облысы бойынша өкілдігінің өкілі Қаршыға Есімсейітова, ақын, «Құрмет» орденінің иегері Мамыр Бәйдәулетов, «Еңбек даңқы» орденінің иегері, «Сырдария ауданының Құрметті азаматы» Бексұлу Синаева, Шіркейлі ауылының әкімі Талғат Құламқадіров, кеш қонақтары мен аудан тұрғындары қатысқан болатын. Облыс көлеміндегі Қызылорда қаласы мен бірнеше ауданнан 9 ақын бақ сынаған мүшәйраны аудан әкімінің орынбасары Талғат Нұртазаев ашып, даңғайыр диқанның өмір жолына тоқталған еді.<blockquote>– Адал еңбегімен елге танылған Балдырған Мұстапаеваның есімі мәңгілік жаңғыра бермек. Өткен ғасырдың белесінде ауыл шаруашы­лығы саласында қажыр-қайратын көрсете білген аяулы ана ер азаматқа тән болмысымен даралана білді. Ризық-несібесін жерден терген, қамбасы астыққа толған жанның өмір жолы қиындыққа толы болды. Жастайынан ерінен айырылып, перзенттерін өсіріп жеткізді. Облыс халқына есімі белгілі ардақты жан қарапайымдылық қасиетімен көптің арасында ерекшелене білді. Оның өнегелі ісін жырға қосатын талапкер ақындарға сәттілік тілеймін, – деді аудан әкімінің орынбасары.</blockquote>«Ауызымен құс тістеген» ақындар негізгі екі кезең бойынша шеберлік байқасқан еді. Олардың қата­рында, қызылордалық Бексұлтан Санақұл мен Қуаныш Мырзабаева қазалылық Қанат Сырлыбай, қармақшылық Бекқанат Смайылұлы, жалағаштық Нұрхан Қарабалаев, аралдық Айда Мырзабекова, сырдариялық Бақтөре Айтбаев, Биболат Опабеков, Ақәділ Талапбеков бар. Бірінші кезеңде ақындар Балдырған Мұстапаеваның өмір жолы мен еңбегін жырға қосса, екінші кезеңде ана тақырыбында өлең оқыған еді. Қазылар алқасының шешімімен ақындар табан астында «Сахна» тақырыбында өлең шумақтарын құрады. Өз кезегінде әділ қазылар алқасының төрайымы Қаршыға Есімсейітова мен ақын Мамыр Бәйдәулетов әрбір талапкердің өлең құраудағы мүмкіншілігін, қабілет-қарымын, деңгейін жан-жақты саралай білді.<blockquote>– Бүгін сахна төрінде жеңіс үшін ұмтылған кез келген ақынның поэзия­да алатын орны біршама қалыптасып келе жатқанын аңғардық. Әрине, өлең құрауда жан-жақты ізденіс, толғаныс, білім керек. Балдырған апамыздың жүріп өткен жолын жырға арқау еткен ақындар диқанның бел жазбай еңбек еткенін, талай мәрте жеңімпаз атанғанын, аналық образын аша білді. Жыр додасында қапелімде өлең құраған жастардың аяқ алысы бағамдалды. Соған байланысты лайықты бағасын алғаны мәлім, – деді қазылар алқасының төрайымы.</blockquote>Жазба ақындар мүшәйрасында еңбек ардагері Зылиха Сыздықова, Бексұлу Синаева, мәдениет саласының майталманы Нұржамал Жүзбаева, мемлекеттік қызмет саласының ардагері Мағрипа Жүсіпбекова сөз сөйлеп, әзиз ана туралы естелігімен бөлісті. Жыр додасының қорытындысы бойынша жүлделі ІІІ орынды сырдариялық Бақтөре Айтбаев пен аралдық Айда Мырзабекова иеленді. Ал ІІ орынды Шіркейлі ауылының жас өрені Биболат Опабеков еншілесе, І орын қазалылық Қанат Сырлыбайға берілді. Мүшәйраның бас жүлдесі қызылордалық Бексұлтан Санақұлға табысталды. Өз кезегінде жеңімпаз бен әрбір жүлдегерге, қатысушыға арнайы «Диплом», «Алғыс хат», қаржылай сыйлық табысталды. Ал даңғайыр диқанның ұрпақтары ұйымдастыру­шыларға шынайы алғысын білдіріп, ақындарға бағалы сыйлықтар үлестірген еді.

Сырдарияда облыстық жазба ақындар мүшәйрасы өткізілді 

<a href="https://kyzylorda-news.kz/">Kyzylorda-news.kz</a> Аудан әкімі Берік Сәрменбаев Тереңөзек кентінде жұмысын бастаған «Отбасын қолдау» орталығының жұмысымен танысты. Аудан басшысы орталық жұмысының маңызын айқындап өтті.– Мемлекет басшысы Қасым-Жомарт Кемелұлы Тоқаев отбасыларды, оның ішінде ана мен баланы әлеуметтік қолдау шарасына ерекше басымдық беріп, нақты тапсырмалар жүктеді. Осы ретте, Президент жуарда ғана ана мен бала құқығын қорғау жүйесін жетілдіру үшін тұрмыстық зорлық-зомбылыққа қатысты күшейтілген заңға қол қойды. Бүгінде біздің алдымызда отбасы институтын дамыту міндеті тұр. Ол үшін еңбекқорлық, білімпаздық, тілектестік сынды адал азаматқа тән қасиеттерді қоғамда жан-жақты дәріптеудің жаңа сапасын қалыптастыру керекпіз. Жанұяда отбасылық құндылықтар сақталуы тиіс. Осы бағытта Сыр өңірінде ауқымды жұмыстар атқарылып жатыр. Атап айтқанда, ел Президенті Қасым-Жомарт Кемелұлы Тоқаевтың тапсырмасымен, аймақ басшысы Нұрлыбек Машбекұлы Нәлібаевтың қолдауымен облыс орталығында «Отбасы», «Анаға тағзым» орталықтары ашылды. Жақында ғана аудан орталығында ұлттық құндылықтар дәріптелетін «Руханият» орталығының кірпіші қаланды. Міне, осындай игі істердің жалғасы ретінде бүгін «Отбасын қолдау» орталығы жұмысын бастады. Орталық жұмысының негізгі мақсаты – әлеуметтік жағынан осал отбасылардың өмір сүру сапасын жақсарту, олардың экономикалық дербестігіне және азаматтардың өмірлік қиын жағдайдан шығуына қолдау көрсету, – деді Берік Әбдіғаппарұлы.Орталық жұмысымен танысқан аудан ардагерлері қазіргі таңда осындай орталықтардың қоғамда қажеттілігі барын атап, аналар мен балаларға қолдау көрсетіліп жатқанына ризашылықтарын білдірді.Айта кетейік, «Отбасын қолдау» орталығында барлығы 7 қызметкер жұмыс істейді. Орталық қызмет алушыларына қолайлы жағдай жасау мақсатында арнайы құрал-жабдықтармен қамтамасыз етілген. Мұнда балалар ойын бөлмесі, психологиялық, медициналық көмек көрсететін мамандар кабинеттері бар. Сондай-ақ, жатын бөлмесіне өмірлік қиын жағдайға тап болған және зорлық-зомбылыққа ұшыраған адамдар уақытша орналастырылады. Орталықта медициналық, құқықтық, әлеуметтік, психологиялық кеңестер беріледі.

Аудан орталығында «Отбасын қолдау» орталығы жұмысын бастады

<a href="https://kyzylorda-news.kz/">Kyzylorda-news.kz</a>. Кеше Қызылорда облыстық мемлекеттік архивінің мәжіліс залында 1 мамыр – Қазақстан халқының бірлігі күніне арналған «Достық, береке, бірлік – тәуелсіздік тірегі» тақырыбында дөңгелек үстел өтті.Мақсат – көпұлтты еліміздің бірлігінің кепілдігі екендігін таныту, жастарды достыққа, бірлікке тәрбиелеу.Іс-шараға облыстық ҚХА төрағасының қоғамдық негіздегі орынбасары, облыстық татар этномәдени бірлестігінің төрағасы Г.Гизатуллина, облыстық «Вайнах» шешен этномәдени бірлестігінің төрағасы М.Гичиев, мүшесі С.Хаджиев, «Қазақстандағы орыс қауымдастығы» қоғамдық бірлестігінің Қызылорда филиалының төрағасы Н.Мишукова,&nbsp;"Қоғамдық келісім” КММ директорының орынбасары Д.Омаров, архив қызметкерлері және БАҚ өкілдері қатысты.Қатысушылар ең алдымен «Ел бірлігі – достықтың бастауы» атты тарихи-құжаттық көрмені тамашалады.Іс-шара модераторы Қызылорда облыстық мемлекеттік архивінің басшысы Жанат Абзалиева қатысушыларды татулық пен достықты ту еткен – Қазақстан халқының бірлігі мерекесімен құттықтап, шараның маңыздылығына тоқталды.Облыстық ҚХА төрағасының қоғамдық негіздегі орынбасары, облыстық татар этномәдени бірлестігінің төрағасы Г.Гизатуллина этномәдени орталықтардың құрылу тарихы жайында келелі пікірін жеткізді. «Қазақстандағы орыс қауымдастығы» қоғамдық бірлестігінің Қызылорда филиалының төрағасы Н.Мишукова қиын жылдары тағдыр тәлкегімен қазақ еліне келіп, Арал жерінде қоныстанған арғы аталары туралы мәлімет беріп, қазақтың киелі мекені – Сыр топырағында бірліктің бесігін тербеткен ұлттар татулығын нығайтуда Қазақстан халқы Ассамблеясының орны ерекше екендігіне тоқталып өтті. Облыстық архивтің ІІ санатты архивисті А.Елемесова қор құжаттарынан дайындалған «Тағдыр табыстырған ұлттар ордасы» тақырыбында баяндама оқыды.«Қоғамдық келісім» КММ директорының орынбасары Д.Омаров елімізде қалыптасқан ұлттардың тұтастығы мен халық достығының арқасында бүгінде мемлекетіміздің экономикасы өркендеп, дамып жатқанын, қоғамда тұрақтылық пен тыныштықтың сақталуы Қазақстанда мекендеген халықтардың достық қарым-қатынасының жемісі екендігін айтып, өз ойымен бөлісті.Соңында Т.Есетов атындағы №264 мектеп-лицейі жанындағы қосымша білім беру орталығының мүшелері өнер көрсетті.

“Достық, береке, бірлік – тәуелсіздік тірегі”

&nbsp;<a href="https://kyzylorda-news.kz/">Kyzylorda-news.kz.</a>&nbsp; Бүгінде аймағымызда Ұлы Отан соғысының қатысушылары мен оларға теңестірілген 3 843 ардагер бар. Оның ішінде Ұлы Отан соғысына қатысқан 4 ардагерге биыл 2,5 млн теңгеден біржолғы жәрдемақы төленетін болады. Бұл туралы Өңірлік коммуникациялар қызметінің ақпарат алаңында облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев хабарлады.<blockquote>– Ұлы Отан соғысына Сыр өңірінен 70 мыңнан астам азамат аттанып, олардың көпшілігі сол майданда ерлікпен қаза тапты. Ал, аман-есен елге оралған соғыс ардагерлері өкінішке орай жылдан жылға азаюда. Сондықтан ол кісілерді қадірлеу, барынша құрметтеу – біздің басты парызымыз. Жалпы, жыл сайын мереке қарсаңында облыс әкімінің қолдауымен ардагарлерімізге барынша әлеуметтік қолдаулар көрсетіліп келеді. Атап айтқанда, Ұлы Отан соғысына қатысқан 4 ардагерге - 2 510 560 теңгеден біржолғы жәрдемақы төленетін болады. Сонымен қатар, Ұлы Отан соғысы жылдарында тылдағы жанқиярлық еңбегі және мінсіз әскери қызметі үшін арнайы медальдармен марапатталған ардагерлерге 221,5 мың (60 АЕК) теңгеден беріледі. Ал, Ұлы Отан соғысында ерлікпен қаза тапқан жауынгерлердің жұбайларына және қайтыс болған мүгедек ардагерлердің жұбайларына – 147,6 мың (40 АЕК) теңгеден төленеді. Сондай-ақ, тылда кемінде алты ай жұмыс істеген 1 990 азаматқа - 147,6 мың (40 АЕК) теңгеден беріледі. Бұдан бөлек, Жеңіс күні қарсаңында Чернобыль, Семей, Ауғанстанда болған ұрыстарда ерлік көрсеткен азаматтарға біржолғы әлеуметтік көмекпен қамтылатын болады, –деді Ғабит Жұмабекұлы. &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp;</blockquote>Фото:&nbsp;Қызылорда облысының Өңірлік коммуникациялар қызметі

Ғ.Жаңабаев: Ұлы отан соғысына қатысқан ардагерлерге біржолғы әлеуметтік жәрдемақы беріледі

&nbsp; <a href="https://kyzylorda-news.kz/">Kyzylorda-news.kz.</a>&nbsp; Адамзат баласы өмірінің өткенін танытуда мұражай үлкен рөл атқарады. Ұлттың мәдени, азаматтық, әскери, еңбек жетістіктері, әдет-ғұрып, салт-дәстүр ерекшеліктеріне де осы қасиетті орын арқылы қанығамыз. Ол бойдағы патриоттық сезімді оятып, отанды сүюге тәрбиелейді. Осы мақсатта Ақтан батыр ауылындағы №190 мектеп жанынан өлкетану мұражайы ұйымдастырылған. Көларық ауылының мектеп тарихы әріден басталады. 1885 жылы 12 тамызда Қаракөл болысының Томанкөл ауылында орыс-қазақ училищесі ашылады.Мектепке сол кезеңнің беделді адамы Байеке Жамановтың үйі берілген. Мектепте жас­тары 18-20-дағы жергілікті байлардың 17 баласы оқыған. Мұғалімнің жетіспеушілігінен мектеп жабылған. 1934 жылы Көларық ауылында «Томан» бастауыш мектебі ашылады. 1937 жылы «Томан» бастауыш мектебі 7 жылдық «Көларық» мектебі болып аталады. 1965 жылы 1 қыркүйекте ауылда 8 жылдық мектеп ашылады. 1973 жылы 10 жылдық мектеп болып құрылады. 1984 жылы ауыл орталығынан 2 қабатты 392 орындық мектеп ғимараты пайдалануға берілді.Аталған білім ордасында өлкетану мұражайын жасақтау 2009 жылы қолға алынған. Алдымен ел ішінде зерттеу жұмыстары жүргізіліп, оқушылар ғылыми жобалар қорғап, құнды деректер мен жәдігерлер жинақталады. 2011 жылы көптен күткен мектеп мұражайы салтанатты түрде ашылды. Ұстаздар қауымы бұл істі атқаруда сол кездегі мектеп директоры Қайрақбай Жақсыбайұлы &nbsp;мен білім бөлімінің әдіскері Қатира Нияз­қызының табандылығын айрықша атады.Мұражай үш экспозициялық бөлімге бөлінген. Біріншісі, «Ерлік пен елдікті, иман мен адалдықты ту еткендер» тақырыбында. Бұнда қазақ халқының тәуелсіздігі жолында күрескен, Жанқожа бабаның жан досы, үзеңгілес жолдасы Ақтан батырдың өмір жолын насихаттайтын «Қорған болған халқына батыр баба», ислам дінін насихаттаған Әзілхан ишанға арналған «Тәрбие негізі – иман» атты экспозициялар қойылған. «Ауылым – алтын діңгегім» атты бөлімде ауыл тарихы суреттелген. Ауылдың экономикасы мен халықтың әл-ауқатының артуы және мәдениеттің дамуы 1976-1990 жылдар аралығына сәйкес келеді. Дәл осы кезеңдерде ауылда ірі құрылыстар бой көтерді. 1996 жылы совхоз Ақтан батыр ауылы аталып, 1997 жылы Ақтан батыр кесенесі салынып, ауылдағы «Әзілхан ишан» мешіті күрделі жөндеуден өткізілді. 1999 жылдан бастап «Сыр маржаны» ЖШС ауылдың өсіп-өркендеуіне зор ықпалын тигізіп, бүгінгі күні ауыл халқы берекелі тірлік кешуде. Бұның барлығы мұражай ішінде фотосуреттер арқылы көрсетілген.Екінші бөлім «Рухым бай, көрген емес азайып, біздің елдің перзенттері ғажайып...» деп аталады. Онда соғыс, еңбек, тыл ардагерлері, батыр аналар үшін «Ер есімі – ел есінде», «Тылда тер төккендер», «Қарттарым – асыл қазынам», «Алып та туар анадан», «Ауылдың абыройын асырғандар», «Еңбек ер атандырады» атты және ауыл экономикасын көтеруге зор үлес қосқан белгілі тұлғалардың өміріне арналған «Еңбектен тапқан бақытын», «Елі үшін еңбегін аямаған», «Артында нұрлы із қалған», «Өмір жолы өнеге», «Қалаулысы халықтың» атты экспозициялар жинақталған. Соның ішінде колхоздастыру жұмыстарының белсендісі, соғыс кезінде өз қаржысын майдан қорына жолдаған азамат Бермахан Мәшенбаев пен дархан дала төсінде шыңдалған майталман диқан, 1982 жылы КСРО Жоғары Кеңесінің Жарлығымен «Социалистік Еңбек Ері» атанған Әбуша Дінісламовтың өмір жолы жас ұрпаққа үлгі-өнеге болары сөзсіз.«Аға буын, қайыспаған нағыз нар, бүгінгі ұрпақ өздеріңе қарыздар» тақырыбындағы үшінші бөлімде «Мектебім тұнған тарих» атты экспозиция бар. Бұнда білім ордасының тарихы кеңінен көрсетілген. Сонымен қатар педагогтерге арналған «Мектеп басшылары», «Ұлағатты ұстаздар» және «Мектеп мақтаныштары» туралы мағлұматтардан ауыл мектебінің дамуына зор үлес қосқан білікті басшылар туралы таныса аласыз. 1988 жылы Мәскеу қаласында өткен Бүкілодақтық мұғалімдер съезінің делегаты Ж.Жәдиевке арналған «Білімнің болған бағбаны» атты бұрыш жасақталған.Мұражай Тәуелсіздіктің 20 жылдығына арналып ашылғандықтан «Тәуелсіздік жылнамасы» экспозициясы жасалған. Жалпы мұражайдағы жәдігерлер – 580, қосымша жәдігерлер – 120. Мұражай жетекшісі мектептің тарих пәні мұғалімі Шынар Кәрібайқызы. Мұражай жәдігерлерін жинауға атсалысқан Әзілхан Серікбаевтың еңбегі ерекше атап өтуге тұрарлық.Аудан көлеміндегі білім мен тәрбие, үкіметтік емес ұйымдармен тығыз әріптестік орнатқан мұражайда мәдени-танымдық, тәрбиелік шара үзбей өткізіліп тұрады. Бұған дейін де бірнеше байқауларда бақ сынап, жүзден жүйрік танылған мектеп мұражайы Астана төрінде өткен республикалық «Үздік мұражай – 2018» байқауында бірінші орынды иеленді. Шәкірттердің бойына білім нәрін себумен бірге тәрбиенің темір қазығын қатар қаққан мектеп ұжымы мұражай жұмысын жандандыруда да талай жоспарлы жұмыс атқарамыз деген ниетте.<img src="https://knadmin.beoblood.kz/uploads/4dcb3d23_e5aa_4e07_b760_8daf3a57a0d7_f440bc36c6.jpg" alt="4dcb3d23-e5aa-4e07-b760-8daf3a57a0d7.jpg"><img src="https://knadmin.beoblood.kz/uploads/8d423271_288b_4f6f_96b4_3409e12417a4_72ed1d1ef5.jpg" alt="8d423271-288b-4f6f-96b4-3409e12417a4.jpg">Ұлболсын ТАЛАПБАЕВА

Қазақстан және Қызылорда облысының жаңалықтары: Руханият