<a href="https://kyzylorda-news.kz/">Kyzylorda-news.kz.</a>&nbsp; Бүгін Қызылорда облыстық тарихи-өлкетану музейінің филиалы С.Айтбаев атындағы көркемсурет галереясында ҚР Қолөнершілер одағының мүшелері Роза Алибатирова мен Марияш Әлжанованың «Өрнекпен өрілген өмір» атты шығармашылық көрмесінің ашылу салтанаты өтті.&nbsp;Көрменің ашылуында Қызылорда облыстық тарихи-өлкетану музейі директорының орынбасары Жанар Ахметова сөз сөйлеп, қолөнер шеберлеріне облыстық мәдениет және спорт басқармасының басшысы Мира Қазбекованың арнайы құттықтауын жеткізді. Сонымен қатар, Қазақстан Қолөнершілер одағының Қызылорда облыстық филиалы төрағасы, Суретшілер, Қолөнершілер одағының мүшесі, Жақыпов Бекзат Әнісұлы көрменің ашылуымен құттықтап, шығармашылық жетістіктер тіледі.Көрменің мақсаты – ұлттық қолөнерді дамыту, қолөнер шеберлеріне қолдау көрсету, олардың жасаған бұйымдарын халық арасында насихаттау.&nbsp;Бүгінгі көрмеге кілем, тоқыма, киіз бұйымдары, басқұрлар, текеметтер, т.б. 60-қа жуық қолөнер туындылары қойылып, Роза Алибатированың шәкірті Салтанат Әбдіраманова кілем тоқудан шеберлік сағатын көрермендер назарына ұсынды.Ұлттық құндылық ұлтпен бірге жасайтын, қазығы тереңге қағылған мәңгілік мұра. Қолөнер ғасырлар бойы дамып, жетіліп, уақыт сынынан сү¬рін¬бей өтіп келе жатқан халық шығар¬машылығының сарқылмас қайнар көзі, халқымыздың мәдени айнасы. Ол талай ғасыр елегінен өтіп, түрленіп-жаңарып бізге жетіп отырған қастерлі құндылық. Ол адамды әсемдікке, нәзіктікке деген сезімін тербеп, сұлулыққа деген қабілетін арттырады. Сол арқылы адамзат баласы зор эстетикалық рухани қуат алып, әлемдік өнер шыңына қанат қағады. Алибатирова Роза 1953 жылы 10 тамызда Айдарлы ауылында дүниеге келген. Кілем тоқуды өте жас кезінен, бастап үйренген. 1971 жылы № 139 орта мектебін бітіріп, 1971-1973 жылы Қызылорда қалалық профкооптех училищеде білім алған. 2018 жылдан ҚР Қолөнершілер одағының мүшесі.&nbsp;Қазіргі таңда зейнеткер, Роза Алибатирова халқымыздың ұмытылып бара жатқан тоқыма өнерін жаңғыртып, ежелден келе жатқан көне ізгі дәстүрді насихаттаушы. Тоқыма өнерін кәсіпке айналдырып күнделікті өмірде пайдалануға шәкірттер дайындап, оларға ұлттық қазынаны зерделеуді ұғындырып, көрген-білгенін үйретіп жүрген өз ісін жетік білетін шебер.Марияш Әлжанова 1958 жылы 20 наурызда Сырдария ауданы, Айдарлы ауылында дүниеге келген. 1975 жылы Айдарлы ауылындағы №139 А.Иманов атындағы орта мектепті бітірген. 1977 жылы Жамбыл гидромелиораторлық институтына түсіп, 1982 жылы құрылыс инженер мамандығын бітірген. 2018 жылдан Қазақстан Қолөнершілер одағының мүшесі. Қазіргі таңда зейнеткер, жеке кәсіп иесі.&nbsp;Халқымыздың ұмытылып бара жатқан мәдени мұрасы киіз үйлерге жабатын кесте, сырмақтар, басқұр-баулар өнерін жаңғыртып және халқымыздың ежелден келе жатқан көне де ізгі дәстүрі арқылы қазіргі заманымызға лайықты, сапа түр беріп сәндік қолөнерді дамытуға өз үлестерін қосып келеді.Көрмеге өнер иелері, туыстары, БАҚ өкілдері, суретшілер мен қолөнер шеберлері қатысты. Көрме 2023 жылдың 25 маусымға дейін жалғасады.

«Өрнекпен өрілген өмір» қолөнер көрмесі ашылды

<a href="https://kyzylorda-news.kz/">Kyzylorda-news.kz.</a> Кеше Мұхтар Әуезов атындағы қазақ Ұлттық театрының кіші залында Анураг Кашьяптың «Кім?» мистикалық триллері ұсынылды.&nbsp;Театр сахнасына орындықтар қойылып, көрермендер спектакльді жақыннан тамашалау мүмкіндігіне ие болды. Айта кету керек, тың ізденіспен қойылған режиссер Қанат Архабаевтың спектаклі көрермендерге өзгеше әсер қалдырды. Қорқыныш, үрей, сенімсіздік секілді сезімдер тоғысқан қойылымнан кейін алматылық көрермендер сыр сахнагерлерінің өнеріне қошемет көрсетіп, ыстық ықыластарын жаудырды.Сонымен қатар кеше алматылық талғампаз көрермендер назарына Ұлттық театр сахнасында Александр Володиннің «Кездесу мен қоштасу» психологиялық драмасы ұсынылды. Спектакль соңында қойылым композиторы Ғазизхан Шекербеков, режиссер Данияр Базаркулов сахнаға шығып, театр актерлерімен бірге көрермен қошеметіне бөленді.Айта кету керек, Сыр сахнагерлерінің гастрольдік сапарына орай М.Әуезов атындағы қазақ Ұлттық драма театрында баспасөз брифингін өткізді.&nbsp;Қызылорда облысының мәдениет және спорт басқармасының басшысы Қазбекова Мира Жомартқызы, майталман режиссер Хұсейн Әмір-Темір және театр басшысы Ниязов Мұхтар Мәуленұлының қатысуымен өткен брифингке БАҚ өкілдері, театр сыншылары гастрольдік сапар жөнінде ақпараттар алды. Сонымен қатар театрдың 1-ші қабатында «Сыр сахнасының келбеті» атты көрме ұйымдастырылды.&nbsp; Алғашқы гастрольдік сапардың ашылуында сахна төріне басқарма басшысы Мира Қазбекова, Қазақстанның халық артисі, профессор Есмұхан Обаев, Қазақстанның еңбек сіңірген қайраткері Әубәкір Рахимов сыр театрының қазақ сахнасына қосқан үлесі, шығармашылық деңгейі туралы сөз қозғап, жылы лебіздерін білдірді.&nbsp;Қалың көрермен арасынан жазушы драматург Дулат Исабеков, педагог Дариға Тұранқұлова, белгілі театр сыншысы Бахыт Нұрпейіс және өнер майталмандары қойылымды тамашалады.Бүгін алматылықтар Шыңғыс Айтматов повесінің желісі бойынша «Жәмилә» драмасын тамашалайды.&nbsp;&nbsp;

Қазақ сахнасындағы алғашқы мистикалық триллер ұлттық театр төрінде

<a href="https://kyzylorda-news.kz/">Kyzylorda-news.kz.</a> Қазалының Шәмшісіне айналған сазгер Нұрмаш Алғашбаев бүгінде 300-ге жуық әннің авторы. Қара сөздің қаймағын қалқыған ақындығы да бар жан-жақты жанның жүрегінен шыққан төл туындылары аудан, облыс көлемінен асып, республикалық сахналарда шырқалып жүр.&nbsp;Қарапайымдылығымен ерекшеленетін өнер иесінің Отан, туған жер, табиғат, әке мен ана, бейбітшілік, махаббат, салт-дәстүр, тәуелсіздік тақырыптарындағы әндері республикалық телерадионың алтын қорында сақтаулы. «Жастық шақ әуендері», «Сырдың сұлу саздары», «Сыр әуендері» жинақтарына бір топ әндері, балаларға арналған бірнеше әуендері мектеп оқулықтарына енгізілген. Бүкілодақтық фестивальдің лауреаты Нұрмаш Алғашбаев қазірде аудандық «Атамұра» ардагерлер ансамблінде өнер көрсетеді. Жуырда саз әлемінде өзіндік қолтаңбасын қалыптастырған сыршыл сазгермен сұхбаттасудың сәті түскен еді.– Аға, бойыңыздағы өнер қанмен берілген қасиет пе әлде…– Солай деуге болады. Өйткені анам Разия өнерлі кісі еді. Ән салатын. Үй шаруашылығында болып, балалардың тәрбиесімен айналысты. Әкем Қабылбай күрішші болды. Бауырларымның ішінде ағам Әбілтай екеуміз өнерге жақынбыз. Ол кісі де мен секілді аудандағы өнерпаз ардагерлерден құралған «Атамұра» ұлт-аспаптар ансамблінің құрамында.Мектеп қабырғасында жүрген кезден-ақ аудандағы оркестердің құрамында болып, ән айтып жүрдім. Талай жарыстарға қатысып, жүлдемен оралдық.&nbsp;– Ең алғашқы туындыңыз туралы айтсаңыз…– Мектептен кейін өнер жолына түскім келді. Алайда шығармашылық тапсыру емтиханына кешігіп қалыппын. Сөйтіп Алматыдағы Зооветеринариялық университетке оқуға түстім. Зоотехник-инженер мамандығын алған соң, жолдамамен Қарағанды облысының Нұра ауданына қарасты Киевка совхозында екі жыл еңбек еттім. Содан соң туған жерге оралып, сол кездегі Қазалы қаласындағы СПТУ-34 мекемесінде, кейін №17 мекепте мұғалім болдым. Бертін келе С.Сейфуллин атындағы №165 мектептен музыка пәнінен оқушыларға білім беріп, зейнеткерлік демалысқа шықтым.&nbsp;Алғашқы туындым университет қабырғасында өмірге келді. Бір күні бөлмеде жалғыз өзім отырғанда радиодан Мұхиттың әні шырқалды. Сол әннен шабыт алсам керек, ойыма әуен оралып, «О,Зәуреш» әнін шығардым. Сөзі де өзімдікі, алғашқы орындаушысы да өзім. Университетте өнер студиясы болды. Оркестрдің құрамында болып, домбырада ойнадым. Гитара, прима-қобыз, баян, бас домбырада тара аламын.&nbsp;– «Өлең деген тумайды жайшылықта» деп Мұқағали ақын жыралағандай әр өнер адамының шабыт алатын дүниесі болады? Сіздің жүрегіңзді тербеп, көңіліңізді шалқытатын не нәрсе?– Көбіне оңаша қалғанда тың дүниелер туады. Табиғаттың керемет көрінісі де менің музама айнала алады. Әсемдіктен алатын әсерім де жоқ емес.&nbsp;– Білуімше, 300-ге жуық әннің авторсыз. Жаныңызға ерекше жақыны бар ма?– Әр ән өзінше бір әлем. Бір-бірінен бөле-жара қарау мүмкін емес. Олда балаңдай ғой. Әрбірінің өзіндік орны мен шығу тарихы бар. Мен патроттық тақырыпта да, лирикалық жанрда да жазамын.&nbsp;«Аралым, Аяулым», «Он екі ирек», «Әләулім» әндерім қазақ телевизиясының алтын қорына қабылданған. 1998 жылы жазылған «Қызыма» атты әнім сол уақыттан бері ұзату тойларында айтылып жүр. 70 әні қазақ авторлар қоғамында тіркелген. Күйлерім мен арнайы шығармаларым да бар.– Балалар тақырыбына қалам тербедіңіз бе?– Иә, 50-60 шақты балаларға арнап жазған әнім бар. «Әжем айтқан ертегі», «Көгершіндер», «Суық торғай», «Су торғай», «Анашым», «Егеменді ел Қазақстан» сынды әндерім мектеп оқулықтарына енген.– Ұл-қыздарыңыздың ішінде өнерге жақыны бар ма?– Жолдасым Жаңыл бастауыш сынып мұғалімі болып еңбек етіп, зейнеткерлікке шықты. Ол кісі де ән салады. Екеумізді табыстырғанда осы өнер жолы. Ол кезде жолдасым Қызылтуда мұғалім еді. Мен СПТУ-34 мекемесіндемін. Аудан өнерпаздары болып, Жалағашқа жарысқа бардық. Оркестр құрамында жолдасымда болды. Сөйтіп танысып, сөзіміз жарасып, шаңырақ көтердік. Үш ұл, бір қыз тәрбиелеп, өсірдік. Қызым Ақсамал фортепиано, ұлым Ғани баян класын бітірді. Алайда өнер жолында тек Ғани ғана. Оның қыздары Жаннұр мен Қарақат ән салады. Түрлі сайыстардың жеңімпаздары.&nbsp;– Бір сөзіңізде кітапты жиі оқитыныңызы айтып қалдыңыз. Қандай ақындармен шығармашылық байланыстасыз?– Сазгер болғандықтан әніңе сәйкес өлең іздейсің. Сол себепті де кітапты көп оқимын. Кейде бірінші ән өмірге келеді. Оған лайықты өлең жолдарын қараймын. Қазалылық ақындардан Жетіскен Мәкеналы, Насыр Баекеев, Жұмабек Табынбаев, Жұмабек Құлбаевпен бірлесіп, бірнеше туындыны жарыққа шығардық.&nbsp;– Қазіргі эстрада әншілерінен кімді тыңдайсыз? Қандай сазгерлердің әні көңіліңізге қонымды.– Шынымды айтсам, қазіргі әншілерді көп тыңдамаймын. Шәмші, Ескендір, Әсеттің әндері жүрегіме жақын.&nbsp;– «Өнер – ортақ байлық» деген тәмсіл бар. Кейінгіге мұра ретінде туындыларыңызды топтастырып, кітап қылып шығару ойыңызда бар ма?– Ілгеріде Болатбек Пұсырманов аудан әкімі болған тұста: «Кітабыңызды шығарайық. Қанша қаржы болсада көтереміз» деген еді. Алайда өзім құнттамадым. Әндерімді жарнамаламаймын. Жазылып, орындалмай жатқаны қаншма. Уақыт өте келе ойланып жүрмін. Барлығы дайын. Енді жүйелеп, жинақтап, кітап қылу ойда жүрген істің бірі.– Армансыз адам болмас аға. Сіздің де жетсем деген мақсатыңыз бар шығар…– Атақты Шәмшінің өзі «Естайдың Қорланындай ән жазсам шіркін» деп армандаған екен. Менің де көкейімде жүрген мақсатымның бірі әрі бірегейі – керемет туындыны өмірге әкелу. Сол арманның жетегімен «Естай-Қорлан» атты ән жазудамын. Жуырда жарыққа шығады деген ойдамын.&nbsp;– Әңгімеңізге рахмет. Шабытыңыз шалқи берсін!

Қазалылық сазгер Нұрмаш Алғашбаев 300-ге жуық әннің авторы

<a href="https://kyzylorda-news.kz/">Kyzylorda-news.kz.</a>&nbsp;Қызылорда облыстық филармониясында «Жылы жүздесу» айдарымен «Мәдениет қайраткері» төсбелгісінің иегері Үміт Медеуованың бенефис-концерті өтті.40 жылға жуық Сыр сахнасында өнер көрсетіп жүрген Үміт Еменқызының репертуарындағы әндерін «Жылы жүздесудің» қағидасына сай филармония әртістері мен шәкірттері орындап көрерменнің ыстық ықыласына бөленді.<blockquote>«Кезекті концертім өз ойлағанымнан да жоғарғы деңгейде өтті. Жиналған халқыма алғысым шексіз. «Бенефис концерттің ерекшелігі менің 40 жылға жуык өнер жолында жинаған қоржынымдағы әндерді облыстық филармония әншілерінің орындауында шырқалды. «Жылы жүздесуде» халықпен емін еркін отырып қойған сұрақтарына жауап беріп, ой бөлістік. Бұрыңғы өткізген концерттерімнен үзінділер көрсетті, жалпы алған әсерім ерекше. Еткен еңбектің,, төккен тердің қайырымы болды. Құшақ гүлге толды. Мені қолдаған қазағымның әрбір отбасына бақ береке тілеймін», - дейді әнші Үміт Медеуова.</blockquote>Концертте «Ақмешіт» фольклорлық ансамблі, жетекшісі Нұрғиса Нұрбай, «Томирис» би ансамблі, «Тұран» триосы, аспапты трио және облыстық филармония әртістері: &nbsp;«Мәдениет саласының» үздігі төсбелгісінің иегерлері: И.Елубаева, Р.Ысқақова, Г.Алиханова, С.Тасбергенова, М. Аманжолов, Б. Молдабергенов, Р. Үсенов, Б.Найманов, З. Баймұрзаева, А.Әбді, А.Махамбетжанова, А.Қойшығара және «Әдемі» балалар музыкалық театр студиясының әртістері: Қ. Боранбаев, Қ. &nbsp;Әбжалиев, Қазанғап атындағы Қызылорда жоғары колледжінің ерлер хор ансамблі, шәкірттері: Е. Омаров, Т. Бауыржанқызы және баласы Әлфараби Аманжолұлы өнер көрсетті.Идея авторы және режиссёры «Мәдениет саласының үздігі» төсбелгісінің иегері Азиза Издикулова.<figure class="image"><img src="https://knadmin.beoblood.kz/uploads/ff1e97da_10ad_4cd3_a6d3_bb3cb05fd147_ea8fb09f5f.jpg" alt="ff1e97da-10ad-4cd3-a6d3-bb3cb05fd147.jpg"></figure>&nbsp;<figure class="image"><img src="https://knadmin.beoblood.kz/uploads/fde7b422_9752_4331_8c6d_ce62b51fa6e9_8001c69f39.jpg" alt="fde7b422-9752-4331-8c6d-ce62b51fa6e9.jpg"></figure>&nbsp;<figure class="image"><img src="https://knadmin.beoblood.kz/uploads/49a47c0e_71ea_4790_941f_7f4d2fa2460e_e5685ac876.jpg" alt="49a47c0e-71ea-4790-941f-7f4d2fa2460e.jpg"></figure> &nbsp;

«Жылы жүздесу»:  Үміт Медеуованың бенефис-концерті өтті

<a href="https://kyzylorda-news.kz/">Kyzylorda-news.kz.</a>&nbsp;Қазақ жерінің қай пұшпағын алып қарасаңызда қасиет пен киеге толы. Десек те, елінің еркіндігі мен жерінің тұтастығы үшін жан аямай күрескен батырларды, ауызымен құс тістеген ақындар мен ұлттық өнеріміздің дамуына өлшеусіз үлес қосқан дарынды тұлғаларды бесігінде тербеген киелі Шиелі жерінің алар орны бір бөлек. Себебі бұл киелі жерде талай саңлақтар өмірге келіп, ауданның атын жер-жерде шығарып, топ жарып жүр. Солардың бірі «Музыкалық жас көрермен театрының» актрисасы – Гүлдана Алиханқызы. Назарларыңызға талант иесімен болған сұқбатты ұсынамыз.– Театр – тектілік мекені. Қала берді бұл тірі өнерді хас сұлудың көз жасындай мөлдір өнерге теңейміз. Гүлдана ханым, әуелі біздің оқырмандарымызға өскен ортаңыз туралы ақпар беріп өтсеңіз…– Мен Қызылорда облысы, Шиелі ауданы, Ақмая ауылында дүниеге келдім. Жастайымнан әнге, биге құмар болып өстім. Бұл менің әкем мен анамнан дарыған қасиет. 15 жасымда арман қуып Алматыға келіп, колледжге оқуға түстім. Мектеп табалдырығында жүргенде-ақ «Шиелі аруы», «Алматы аруы» байқауларына қатысып, сахнада өз өнерімді көрсетіп жүрдім. 2012 жылы Т.Жүргенов атындағы Қазақ Ұлттық Өнер академиясына «Драма және кино артисі» мамандығына грантқа оқуға түстім. Ұстазым Қазақтың еңбек сіңірген қайраткері Тұңғышбай Қадырұлы Жаманқұлов.– Жалпы өнер адамы болу бала күңгі арманыңыз ба? Бас қаладағы «Музыкалық жас көрермен театры» жайлы және еңбек жолыңыз жайлы сөз өрбітсек... Аталмыш театрды таңдаудағы себеп?– Иә, өнер адамы болу бала күнгі басты арманым. Теледидардан біреу ән салса, мен де соған ере қосылатын едім. Ауылда балаларды жинап, өзімше концерт қоятынмын. Бала күнгі арманым мені осындай үлкен өнер жолына алып келген шығар. Өзімнің өнерде босқа жүрмегенімді ата-анама, ағайын-туысқа дәлелдеп келемін деп ойлаймын. Қазір жақындарым менің әрбір жетістігіме тілеулес болып отырады. Ал Нұр-сұлтандағы «Музыкалық жас көрермен театрына» келер болсақ, театрдың ашылғанына екі жылдан асты. Оған дейн Алматы қаласында Ғ.Мүсірепов атындағы ТЮЗ театрында жұмыс істедім. Ал 2017 жылы Астана «MUSICAL» театрында актриса болып қабылдандым. Осы Астана «MUSICAL» театрымен Европаның бес қаласына гастрольдік сапармен барып қайттық. Франция, Вена, Канны, Бельгия, Брюссель, Москва елдеріне «Қыз Жібек» қойылымын сахналап, шет елге ата дәстүрімізді таныстырып қайттық. Қазіргі таңда «узыкалық жас көрермен театрында» актриса болып жұмыс істеудемін. Бұл театрды таңдауым – жаңа леп, жаңа энергия, жаңа туынды, жаңа жалын.– Ең алғаш қандай рөлді сомдадыңыз? Ол табиғатыңызға сай ма? Сіз сомдаған рөлдердің қайсысы жаныңызға жақын?– Ең алғашқы сомдаған рөлім «Дипломдық жұмыста» Шыңғыс Айтматовтың «Жәмилә» спектаклінің – Жәмилә мен Уильям Шекспирдің «Антонио мен Клеопатра» трагедиясындағы – Клеопатра рөлі. Ал театр сахнасындағы алғашқы рөлім «Шәмші» қойылымындағы сыған қызы – Изольда. Мамандығымыз актриса болған соң рөлді табиғатымызға жақын, жақын емес деп бөліп қарамаймыз, кез келген образды барынша ізденіп, сомдауға тырысамын. Қазіргі таңда ойнап жүрген рөлдерімнен өзіме шын қабылдап, аса жауапкершілікпен жанымды салып ойнайтын рөлім ол – А.Л.Ж.И.Р тұтқындарына арналған «CHANEL 5» спектаклінде белгілі режиссер Наталья Сац рөлі.– «Тазарғың келсе – театрға бар» деген тәмсіл бар. Мұнымен қаншалықты келісесіз? Тірі өнердің құны төмендемеу үшін не істемек керек?– Иә, мен бұл тәмсілмен толықтай келісемін. Себебі мұнда ешқандай өтірік жоқ. Өте таза, рухани тұрғыда биік – тірі өнерді көруге болады. Театр – ол қазақ мәдениетінің айнасы деп білемін. Тірі өнердің құны төмендемеу үшін ұдайы тер төгу қажет. Соңымыздан келе жатқан ізбасарларға осы өнер түрін тереңінен таныстырып, қызығушылығын арттыру керек. Театрға келген жан тек тазарып қана қоймай, рухани тұрғыда байып, кемелденіп қалады. Ауылдық жерлерде түрлі ой салар спектакльдерді көруге әрине, мүмкіндік жоқтың қасы. Алайда, жазғы демалысты пайдаланып, қалаға жолыңыз түсн қалса, міндетті түрде театрға баруға кеңес берер едім.– Қорытындылай келе, болашақтағы мақсат-жоспарыңыз қандай?– Болашақта жоспар көп. Тек театрмен ғана шектеліп қалмай, бүгінгі таңда жеке өзімнің «New Theatre» атты балалармен жасөспірімдерге арналған өнер мектебін аштым. Осы мектепте өнерге құштар балаларды тәрбиелеп, ұстаздық қызметті атқарып жүрмін. Қала берді театрда да жақсы рөлдер сомдау ойда бар. Айта кеткен жөн, қазіргі таңда «драма және театр режиссерінің» өнер мамандығының магистранты атандым. Ел Президенті Қасым-Жомарт Тоқаев осы жылға «Балалар жылы» деп айдар таққанын баршамыз білеміз. Атаулы жылға естелік сый ретінде жасөспірімдерге арналған кино түсіруді қолға алмақшымын.P.S.: Театрға бет алған әр көрермен бүгінгі шыңғырған шындықты, бүгінгі ақжарқындау ақиқатты көргісі келеді. Көріп те жүр. Осы тұста көпке танымал режиссер, актер, сценарист Александр Адабашьянның «Театр мен киноның айырмашылығы неде? Кино – көрсетеді, ал театрда көресіз…» деген сөзі ойға оралады. Бүгінгі мәдениет саясатына бір сәт көз жүгіртсек, онда көбіне-көп киноиндустрияға көңіл бөлініп жатқанын байқауға болады. Кино – аса үлкен саясат, ал театр – ғаламдық идеология! Қазақ театры да сол «идеологияның» маңызды бір бөлшегіне айналса деген арман жүректің төрінде.

Гүлдана Алиханқызы: Тірі өнердің құны төмендемеу керек

<a href="https://kyzylorda-news.kz/">Kyzylorda-news.kz.</a>&nbsp;&nbsp; Жыл сайын Қазалы ауданында Роза Бағланова атындағы аудандық мәдениет үйінде қобызшы, музыканттар Махамбет және Раманқұл Әуезовтердің атындағы "Қастерлеп жүрсін өнеріңді ұрпағың!" атты дәстүрлі республикалық халықтық отбасылық ансамбльдердің байқауы өтеді.&nbsp;Қызылорда облысы бойынша өнер бауқауына көптеген халықтық атағы бар отбасылық ансамбльдер қатысып, бақ сынайды. Биылғы жылы өткен байқауға Сырдария ауданынан Сәдуақасовтар халықтық отбасылық ансамблі қатысып, үздік өнер көрсетті. Есімі республикаға белгілі Сансызбай Сәдуақасов басқаратын ансамбль өнер додасында бірінші орынды жеңіп алды.<blockquote>– Жыл сайын отбасымызбен дәстүрлі түрде өтетін байқауға қатысып, өенр көрсетеміз. Бұл бір жағынан шығармашылық ізденіске есеп берудің көрінісі болса, екінші жағынан өнер десе ішкен асын жерге қоятын, ән мен күйге ерекше сүйсінетін, бағалайтын тындармандарымызды қуанту. Отбасымызда жұбайымнан бастап, балаларым, немерелерімнің барлығы өнерлі, музыкалық қабілетімен қатар арнайы білімдері де бар музыканттар, түрлі аспаптарда ойнайды. Келіндерім де басқа салада еңбек етсе де, өнерге жақын жандар. Міне, біздің халықтық отбасылық ансамбльдің өнеріне жоғары баға берген Қазалы жұртына айтар алғысымыз мол. Өнер бар жерде адам ешуақытта рухани аласармайды. Алдағы уақытта да осындай байқауларға қатысып, өнерімізді тамашалайтын боласыздар, – дейді халықтық отбасылық ансамбльдің жетекшісі, әрі Сәдуақасовтар отбасының отағасы Сансызбай Сәдуақасов.</blockquote>Айту керек, өткен жылы да дәстүрлі республикалық халықтық отбасылық ансамбльдер байқауында Сырдариялық Сансызбаевтар отбасылық ансамблі үздік өнер көрсетіп, жүлделі орын алған болатын. &nbsp;

Сырдариялық Сәдуақасовтар отбасы өнер байқауынан бірінші орын алды

<a href="https://kyzylorda-news.kz/">Kyzylorda-news.kz.</a> ​Бүгін Қызылорда қаласы әкімінің орынбасары Жанмұрат Сейілов Алматы қаласында өткен XXV Халықаралық балалар шығармашылығына арналған «Бозторғай» байқауында топ жарған талантты балаларды және жетекшілерін арнайы қабылдап, сый-құрмет көрсетті.​Балалар мен жастар музыкалық шығармашылығын насихаттау, жаңа заманауи туындыларды жасауды жандандыру, көркемдік және шебер кәсібилікке тәрбиелеу, вокалдық, халықтық, хореографиялық жанрлардың дәстүрлерін жаңғырту, жас таланттарды тауып, қолдау көрсету мақсатын мұраттаған аталмыш байқауда Сыр өңірінің намысын қорғаған қызылордалық Саят Сарманбек, Абай Ермағанбет, Дарханқызы Муслима, Нұртілеу Ерасыл және Бектемір Қарақатты айтулы жетістіктерімен құттықтаған Жанмұрат Жақсымұратұлы дарынды балаларды өнерге баулыған жетекшілері Бағдагүл Есмұрзаева мен Ақзәуре Смағамбетоваға алғыс білдірді.<blockquote>​«Аймақта балалар шығармашылығын дамытып, өнерлі өрендердің өрістеуіне қосып жүрген өлшеусіз еңбектеріңіз үшін алғысымды білдіремін. Асқан кәсібилік бен өнерге деген шексіз құрметтеріңіздің арқасында өңірде өскелең ұрпақты тәрбиелеу ісі лайықты жалғасып келе жатыр. Ел игілігі жолында атқарған істеріңіз алдағы уақытта да жалғасын тауып, шәкірттеріңізбен бірге талай шыңдарды бағындыра беріңіздер» – деген қала әкімінің орынбасары өнерлі өрендер мен жетістікке жетелеген ұстаздарына шаһар басшысының арнайы алғыс хаттары мен естелік сыйлықтарын табыс етті.</blockquote><img src="https://knadmin.beoblood.kz/uploads/352473727_5946792262092317_6885922274230618924_n_5d4d156a85.jpg" alt="352473727_5946792262092317_6885922274230618924_n.jpg">

Қызылорда: Жүлдегерлерге құрмет көрсетті

<a href="https://kyzylorda-news.kz/">Kyzylorda-news.kz.</a>&nbsp; Халықаралық ТҮРКСОЙ ұйымының шешімімен түркітілдес елдерде 2023 жыл – Темірбек Жүргенов жылы болып белгіленді. Қайраткердің мерейтойы туған жері – Сыр елінде кең көлемде атап өтілмек. Бұл туралы облыс әкімі Нұрлыбек Нәлібаев Астана қаласындағы Орталық коммуникациялар қызметінде өткен брифингте хабарлады.<blockquote>«Сыр елі – ұлттың бағына туған талай тұлғаларды дүниеге әкеліп, қаншама қабырғалы қайраткерлерді түлетіп ұшырған қасиетті мекен. Халықаралық ТҮРКСОЙ ұйымы тұрақты кеңесінің ХХІХ отырысы шешіміне сәйкес түркітілдес елдерде 2023 жыл – Темірбек Жүргенов жылы болып белгіленді. Қайраткердің 125 жылдығына орай Мәдениет және спорт министрлігі республикалық іс-шаралар жоспарын бекітіп, жерлесіміздің есімін ұлықтау бойынша кешенді шаралар өткізілді және мерейтой жыл соңына дейін жалғасады», – деді аймақ басшысы.</blockquote>Асқар Жұмаділдаев атындағы жас математиктердің байқауы және Кеңес Дүйсекеев атындағы әншілер конкурсы биыл алғаш рет халықаралық деңгейде өтті. Басқа да қоғамдық-саяси маңызды шаралар жоспарға сәйкес ұйымдастырылуда.Жақында облыста құрамында симфониялық оркестр құрылып, мүмкіндігі шектеулі өнерпаздар шығармашылығын шыңдауға арналған Инклюзивті театр жұмысын бастады. Бұған дейін үйірме ретінде жұмыс жасап келген «Жастар театры» өз алдына кәсіби ұжым ретінде қайта жасақталуда.Өңіріміздегі табылған сақтардың «Шірік-Рабат Алтын адамы» мен Алтын Орда кезеңіндегі «Сығанақ ханшайымының» қалпына келтірілген мүсіндері жасалады. Биыл мәдениет және әдебиет өкілдеріне арналған облыс әкімінің «Тұран» сыйлығын табыстау басталды.<a href="https://www.facebook.com/photo/?fbid=556465070008075&amp;set=pcb.556457596675489&amp;__cft__[0]=AZUNLUsH9dn0ms8d1umkA5LFbYRCmXYh4yxGeSohzp24vgSjrjvR8DaKS3YPdeKxQCNX7BCVk5IYfs7aXtJP2zza_vs8XpUEvImm_HdWxsshVhCWRhfqj3zMlzV74TuuUlgkA8G9xWE_7s-iGfIhJq7sc1jiWaDRzHESFQ6sSmfxkOl_KXELdrOF7KpAH1J4GHQ&amp;__tn__=*bH-R"><img class="image_resized" style="width:441.075px;" src="https://scontent.fala4-3.fna.fbcdn.net/v/t39.30808-6/352378184_101106759685278_5076945888796470856_n.jpg?stp=dst-jpg_p600x600&amp;_nc_cat=100&amp;ccb=1-7&amp;_nc_sid=8bfeb9&amp;_nc_ohc=ovQWNIO8VskAX_ENYp_&amp;_nc_ht=scontent.fala4-3.fna&amp;oh=00_AfAiJawGhcqoyJTAAlsr6j6GctMSZbAUt-8VoKiVOuikgQ&amp;oe=64861F8F" alt=""></a> &nbsp;

Сыр өңірінде Темірбек Жүргенов жылы кең көлемде атап өтілмек

<a href="https://kyzylorda-news.kz/">Kyzylorda-news.kz.</a>&nbsp;«Сыр өңірі – жыр өңірі» деп талай ақын жырлаған сырдың бойы расымен талант пен өнерге бай өлке. Бұл жерден ежелден өнер мен қасиет қонған Қорқыт бабамыз, қазақтың атын асқақтатқан жарық жұлдыздар – Роза Бағланова, жезтаңдай әнші Мәдина Ералиева, дарынды композитор Кеңес Дүйсекеев сынды мәдениет көгіндегі темірқазығы саналған перзенттердің өмірге келуі оған айқын дәлел болса керек. Солардың бірі – өнерімен өнеге өрбіткен, аудан абыройын асқақтатып, талай биік мінберлерден көрінген Махамбет Әуезов пен оның "Әуезовтер" отбасылық ансамблі.Өнеге өрбітер өмірМәдениет майталманы Махамбет Әуезов 1926 жылы Сарыкөл ауылында дүниеге келген. 1931 жылы ашаршылық, қуғын-сүргін кезінде әкесі Әуез Қарақалпақстанның Тақтакөпір ауданына көшеді. Кейін білім ошағын тәмамдап, ер жеткен Махамбет 1947-1952 жылдарда Нөкіс қаласындағы педагогикалық институтын тарих-филология факультетіне түседі. Жоғары оқу қабырғасында жүріп, Москва қаласындағы Чайковский атындағы мемлекеттік консерватория түлегі Александр Павлович Закаринкодан қосымша дәріс алып, институтты сәтті тәмамдайды. Сонан соң Тақтакөпір ауданында орта мектепте ұстаздық етеді.&nbsp;Араға біршама уақыт салып, 1957 жылы елге оралып, Қазалы ауданы, Лақалы елді мекенінде сегіз жылдық мектепте сурет, сызу және музыка пәндерінен сабақ берді. Одан кейін 1961 жылдан өмірінің соңына дейін №87 орта мектепте сурет, өнерден балаларға дәріс беріп, сауатты, адал оқытушы болды.Бір жылдан соң ауданның мәдениеті мен өнеріне тығыз араласып, скрипка, домбырада ойнап, аудан халқына таныла бастады. Сегіз оқушыдан «Скрипачтар» ансамбльін құрып, облыста бірінші орынды алды.1967-1969 жылдары Махамбет Әуезов Қазалы ауданының ұлт аспаптары оркестрін басқарып, бірнеше мәрте облыс жүлдегері атанған. Жары Жеңіс екеуі 3 қыз, 4 ұл тәрбиелеп өсіріп, олардың әрқайсысын музыка өнеріне баулиды. Содан 1975 жылы Махамбет Әуезов өзінің ұл-қыздарынан алғаш отбасылық ансамбль ұйымдастырып, халық арасында құрметке ие бола бастады. Облыста, республикада отбасылық ансамбльдердің байқауларына қатысып, бірнеше рет лауреат атанды.Содан бері өнерімен өркендеген әулет – өнеге өрбітер өмір иесі Махамбет Әуезовтың жолын жалғап, Әуезовтер отбасылық ансамблі болып елге танылып, аудан абыройын асқақтатып келе жатқандарына бүгінде 45 жыл толып отыр. Базар жырау айтқандай "Жақсыдан жақсы туар жарқылдаған" демекші, балаларының алды ҚР «Мәдениет саласының үздігі» болып, нағыз мәдениет майталманы атағын арқалап жүр.&nbsp;Сәрсенбіде аудандық Р.Бағланова атындағы мәдениет орталығында күйші, қобызшы, майталман музыкант Махамбет және Романқұл Әуезовтер атындағы "Қастерлеп жүрсін өнеріңді ұрпағың" атты республикалық дәстүрлі отбасылық ансамбльдер байқауы өтті.Байқауға Тараз, Атырау, Ақтөбе қалалары мен Арал, Шиелі, Сырдария аудандарынан келген халықтық отбасылық ансамбльдер қатысты. Келген қонақтар ең алдымен «Әуезовтер» халықтық отбасылық ансамблінің 45 жылдығына арналған көрмемен танысты. Мұнан соң байқаудың ашылу салтанаты өтіп, көпшілікке қатысушы ансамбльдер таныстырылды. Жиынды аудан әкімінің міндетін атқарушы Күнтілес Назымбеков ашып, қатысушыларға сәттілік тіледі.<blockquote>«Баршаңызды күйші, қобызшы Махамбет және Романқұл Әуезовтер атындағы дәстүрлі республикалық халықтық отбасылық ансамбльдер байқауының ашылуымен шын жүректен құттықтаймын! Өздеріңізге мәлім, Сыр өңірі – талант пен өнерге бай өлке. Ел арасында «жыр елі» аталып кеткен мекеннен талай шайырлар мен жыр дүлдүлдері түлеп ұшты. Қазалы ауданының мәдениетінің тарихы да салмақты, өткені мен келешегі де кемел. Осы қасиетті топырақта дүниеге келген өнерлі жандардың арасында күйші, қобызшы Махамбет және Романқұл Әуезовтердің шоқтығы биік. Киелі өнерді дәріптеп, қастерлей білген Әуезовтер отбасы – ауданымыздың мақтанышы. Өмірлерін өнер жолымен байланыстырған бұл тұлғалар өз замандарында ел мәдениетін дамуына зор үлес қосты. Бүгінде ата мұрасын өнерлі ұл-қыздары жалғастырып келеді. Өздері негізін қалаған отбасылық ансамбль әлі күнге халыққа қызмет етуде. Ансамбль құрамы әулеттегі өнерлі немерелермен толыққан. Төл өнердің дамуына үлес қосар осындай отбасыларды насихаттау, олардың қатарын көбейту, ансамбльдер арасындағы шығармашылық байланысты дамыту мақсатында бүгінгідей ерекше байқау ұйымдастырылып отыр. Осы бір айтулы күні өңіріміздің мәдениеті мен өнерін өркендетудегі қызметтеріңіз үшін Сіздерге шынайы алғысымды білдіремін. Ел мәдениетінің одан әрі гүлденуіне, өнеріміздің асқақтауына қызмет етіп, халқымызды шығармашылық табыстарыңызбен қуанта беріңіздер», – деді Күнтілес Айдарбекұлы.</blockquote>Сонымен қатар «Әуезовтер» отбасына облыс әкімінің орынбасары Н.Амановтың пен аудан әкімі Мұхтар Оразбаевтың «Құттықтауын» табыстады.&nbsp;Бұдан кейін көпшілік ансамбльдің 45 жылдығына орай жарық көрген «Өнерімен өркендеген әулет» атты кітаптың тұсаукесерінің куәгері болып, ансамбльдердің өнерін тамашалады.&nbsp;Дарынды отбасылардың өнеріне ҚР «Мәдениет саласының үздігі» төсбелгісінің иегері, күйші-қобызшы Арман Әуез, Қазақстан Композиторлар Одағының мүшесі, ҚР «Мәдениет қайраткері», «Мәдениет саласының үздігі» төсбелгісінің иегері Сәукен Әліш, Қазанғап атындағы жоғары музыкалық колледжінің оқытушысы Төлеген Каденов, «Мәдениет саласының үздігі» төсбелгісінің иегері, Шымкент Саз колледжінің ұстазы, филармония ұлттық оркестрінің, опера театрының симфониялық оркестрінің концертмейстері Космонавт Аюбаев және Қазалы ауданының білім саласының ардагері, «Атамұра» халықтық ардагерлер ансамблінің сүйемелдеушісі, дирижер, қобызшы Ерпазыл Жүсіп қазылық етті.&nbsp;Нәтижесінде республикалық байқаудың бас жүлдесі Ақтөбе қаласынан келген «Шашу» халықтық отбасылық ансамбліне бұйырды. Сол секілді бірінші орын сырдариялық «Сәдуақасовтар», екінші орын Атырау қаласынан «Қарабалиндер» және үшінші орынды Тараз қаласынан қатысқан «Жаңабаевтар» халықтық отбасылық ансамблі иеленді. Ал арнайы жүлдеге Арал ауданынан келген «Қадырқұловтар» отбасы қол жеткізді.

Өнерімен өркендеген қазалылық әулет

<a href="https://kyzylorda-news.kz/">Kyzylorda-news.kz.</a>&nbsp; Аслан Айтмұхамед – ұлттық өнерді дәріптеп, оның қадір-қасиетін бойына сіңіріп жүрген жеткіншек. Ол облыс орталығындағы «Orda school» жеке мектебінде оқиды. Кішкентайынан домбыраға деген қызығушылығы жас өнерпазды өзі білім алатын мектептегі домбыра және халық аспаптар үйірмесіне қатысуға жетеледі. Ұстаздарының айтуынша, Аслан ән-күй, жыр-термелерге жаны құмар. Өнермен қатар сабағын да жақсы оқиды.12 жастағы өнерпаз бірқатар қалалық, облыстық, республикалық байқауларға, сайыстарға қатысып, жеңіс тұғырынан көрініп жүр. Мәселен, дәулескер күйші Д.Нұрпейісованың 160 жылдық мерейтойына орай ұйымдастырылған шараға белсене қатысқаны үшін мектеп директорынан алғыс хат алса, ҚР Тәуелсіздігінің 30 жылдығына арнап өткізілген «Ұлы Дала дауысы» ІІІ республикалық балалар мен жасөспірімдер шығармашылық байқауының аспапта орындау номинациясы бойынша ІІ орын лауреаты атанды. «Жас жұлдыз» республикалық балалар мен жасөспірімдер арасындағы өнер байқауында жүзден жүйрек шығып, аспапта орындау жанры бойынша бас жүлдені жеңіп алды. Сонымен қатар республикалық «Тәуелсіздік – жыр, әнім» атты өнер байқауында да аспапта ойнау жанры бойынша бас жүлдені иеленді. Ал «Жұлдыз – АРТ» халықаралық байқауында аспаптық өнер номинациясы бойынша ІІ дәрежелі лауреат атанды.Асланның бойындағы домбыра тарту өнерін дамытуда білім ұясының рөлі айрықша. Мұндағы домбыра және халық аспаптары үйірмесі талабы бар балғындарға халқымыздың күйлерін, жыр-термелерін&nbsp; таныстырып, оларды аспапта ойнауды үйретеді. Шәкірт бойынан өнерге деген қабілетті тап басып танып, оны әрі қарай дамытуға күш салып жүрген білім ұясынан талай дәулескер күйшілер мен дүлділ домбырашылар шығары сөзсіз. Ал халқымыздың қасиетті қара домбырасының киесін түйсінген өнерлі өрен – Асыланға талабыңа нұр жаусын дейміз.

Аслан Айтмұхамед өнер байқауында жүзден жүйрік атанды

<a href="https://kyzylorda-news.kz/">Kyzylorda-news.kz.</a>&nbsp; Әр жыл сайын &nbsp;дәстүрлі түрде өтетін балалардың сүйікті байқауы жоғары деңгейде ұйымдастырылады. Алатау бөктерінде жүзеге асқан аталмыш байқауға Сырдария ауданының өнерпаз өрендері де катысып, жүлделі орындарға қол жеткізді.Алматы қаласында 1-5 маусым аралығында өткен &nbsp;балалар шығармашылығына арналған "Бозторғай" халықаралық конкурсы өз мәресіне жетті.Конкурсқа Беларуссия, Латвия, Өзбекстан, Болгария, Украина, Тәжікстан, Қырғызстан және Қазақстан Республикасынан 1100-ден аса жеке орындаушылар мен аспаптық ансамбльдер және би ұжымдары, ән, би, терме, күй жанрлары бойынша үздіктер қатысты.&nbsp; Қазылар алқасының құрамында &nbsp;Қазақстан Республикасының атынан &nbsp;Қазақстанның Халық әртістері Нағима Есқалиева, Лаки Кесоглу, ҚР Еңбек сіңірген қайраткерлері Айгүл Үлкенбаева, Рамазан Стамғазиев, Әлішер Каримов, композитор Бейбіт Оралұлы және де өзге мемлекеттерден арнайы шақыртылған әділ қазы алқалары төрағалық жасады.Отандастарымыздың арасында Аманкелді ауылынан өнер көрсеткен өнерпаздарымыз жүлделі орындармен оралды. Жеңімпаздардың қатарында бас жүлде иемденген Дінмұхамед Алмасұлы. Лауреат атанған Диас Берлібек, жетекшісі Дайырханов Қожаберген. Хореография &nbsp;жанры бойынша 11-13 жас аралығы “Балдәурен” би тобы, жетекшісі Гүлсім Иманбердиева, вокал жанры бойынша 14-17 жас аралығы Батыржан &nbsp;Аманкелдиев, жетекшісі Қожаберген &nbsp;Дайырханов – бірінші орын алды. Жеке аспапта ойнау жанры бойынша 14-17 жас аралығы Батыржан Аманкелдиев, жетекшісі Ғазиз Жұбанов үшінші орын жүлдегері атанды.<blockquote>Ауылдың өнерлі өрендерімен Алматы шаһарына барып, халықаралық байқауға қатысып қайттық. Өнерпаздар керемет өнер көрсетті. Киелі сахнада ән шырқап, би биледі. Қазақтың &nbsp;дүлдүл өнер иелері балалардың дайындығына ризашылықтарын білдірді. Алдағы уақытта аманкелділік өнерпаздар көптеген байқауларды бақ сынайтын болады. Өнер фестиваліне қатысуға қолдау білдірген демеушілерге алғыс айтамыз, – дейді Аманкелді ауылдық мәдениет үйінің директоры Гүлайна Нартайқызы.</blockquote>Сыр елінің атын, туған жер Сырдария ауданын әлемге танытар өнерпаздарымыз қанатты талмай, биікке самғай берсін. Өнерлі бүлдіршіндердің келешегі кемел, болашағы жарқын болсын!&nbsp;

Аманкелді өнерпаздары халықаралық байқау жүлдегерлері

<a href="https://kyzylorda-news.kz/">Kyzylorda-news.kz.</a> Қазақтың ұшы-қиыры жоқ даласы, оның ішінде Сыр өңірінің киелі ән өнеріне деген махаббатын таразыға салу мүмкін емес. Жеті өнерді де аздық етіп, туған жерден түлеген таланттар қаншама!?. Әйгілі сөзді «әу демейтін қазалылық жоқ» деп өзгертсек те, жарасатындай. Күміс көмей қыз-жігіттердің мемлекет ішінде мойындалып, шетелдерде де шеткері қалмай, жетістік пен жеңістің шекпенін иелене жүруі көпке мақтаныш.Ел мақтаған елеулі азаматтың бірі Алтынбек Әбілда – опералық әнші, Астана мемлекеттік академиялық филармониясының жеке солисті, Қазақстан Республикасы Тұңғыш Президенті Елбасы қоры стипендиясының иегері. 22 қараша күні Мемлекеттік «Дарын» сыйлығын «Классикалық музыка» номинациясы бойынша иемденген жерлесімізбен сұқбаттасудың сәті түсті.– Алтынбек Еркінбайұлы, таланттарды тап басып танитын «Дарын» сыйлығын иемденіпсіз. Құтты болсын! Өнер саласында, соның ішінде, классикалық әншіге берілуі бұл бағытқа деген жақсы көзқарасты білдіретін сияқты…– Үлкен рақмет! Мемлекеттік «Дарын» сыйлығын иелену, оған лайық бола білу – мен үшін зор мәртебе. Жастарға қолдау, жарқын болашаққа ұмтылуға жігер беретін аталмыш сыйлықтың орны ерекше. Әрі қарай жаңа мақсаттарға, жетістіктерге жетелейтін жол іспетті. 1993 жылдан бастап ұйымдастырылып келе жатқан сыйлықты аға буындағы талантты әншілер иемденген. Ал маған опералық әнші болғандықтан, «Классикалық музыка» номинациясы бойынша берілді. Бұл музыка өнерінің ішіндегі ерекше бағытқа назар аударылып, мемлекет тарапынан бағасы беріліп жатқанына дәлел. Классикалық бағыт түбегейлі тарамаса да, қазақта бұрыннан бар. Ал соңғы жылдары тыңдарман талғамы өзгеріп, жаңа көзқарас қалыптасқандай.– Балалық шағыңыз туралы айтып берсеңіз... Музыкамен алғашқы таныстығыңыз қалай басталды?– Кіршіксіз таза, балалық кезең десе, туған жер көз алдыма келеді. Өзім 1993 жылы 6 маусымда қасиетті Қазалы қаласында қарапайым отбасыда дүниеге келдім. Бала жастан алғашқы музыкалық байқауларға қатыстым. Мектептің абыройын аудандық, облыстық, республикалық деңгейде қорғап, жеңіс тұғырынан көрініп жүрдім.Барлық бала дарынды, тек сол таланттың ұшқынын байқай білу керек. Өнер жолына келуіме себепкер әжем Зада Қонысова еді. Әжем алғаш менің бойымнан дарынымды байқап, музыкалық мектепке берген болатын. Осылайша Қазалыда бес жыл бойы музыкалық мектепте білім алып шықтым.– Неліктен классикалық музыка бағытын таңдадыңыз?– Классикалық бағыттың ішінде менің мамандығым – опералық әнші. Өнердің сүрлеуі бөлек ерекше бағыты алғаш Италияда пайда болған. Музыкалық жанрлардың ішінде ең шоқтығы биігі классикалық әуендер деп есептеймін. Оқушы кезімде ән өнерімен жалпылама танысып жүріп, классикалық бағытқа қызықтым. Әрі қарай мақсат қойып, 2009 жылы мектеп бітірген соң Қызылорда қаласындағы Қазанғап атындағы музыкалық колледжіне академиялық ән салу мамандығына тапсырып, жалғастырдым. Оны үздік боп тәмамдадым. Өнерге деген құштарлығымнан шығар, кәсіби білім алуды тоқтатпадым. 2013 жылы Нұр-Сұлтан қаласы Қазақ ұлттық өнер университетінде «Вокалдық өнер» мамандығы бойынша оқуға түстім. Студенттік жылдарымда Халықаралық «Звездный мост», ҚазКСР xалық әртісі профессор Н.Шарипова атындағы І республикалық вокалистер байқауы, Х Ұлттық жастар Дельфийлік ойындары сынды түрлі деңгейде кәсіби байқауларға қатысып, сахна мен театр мәдениетін бойыма сіңіре түстім. Ал 2020 жылы аталған университет магистратурасын бітіріп, «өнертану ғылымдарының магистрі» атандым.– «Адамдардың көбі 25 жасында өледі, тек оларды 75-інде жерлейді» дейді Бенджамин Франклин. Арманы жоғалған күні адамның да өлетінін меңзесе керек. Осы жолда қандай қиындық кездесті?– Өнер жолы оңай емес. Дегенмен қиындықтар кездесті деп айтқым келмейді. Адам алдына мақсат қойып, нені қалайтынын білсе, жақсы көретін ісімен айналысса, қиындық кедергі емес. Әр қиындық – бір баспалдақ. «Өзіңе сен, өзіңді алып шығар, ақылың мен еңбегің екі жақтап» деген Абай сөзі бәріміздің ұстанымымызға айналуы тиіс. Өзім мектеп бітірген кезімде опералық әнші болуды мақсат еттім. Әрі қарай оқуды жалғастырып, барлығын үздікке бітіруім осы мақсаттан, арманға адалдық танытудан шығар.– Тәжірибелі кәсіби маман ретінде шәкірт тәрбиелеуге қалай қарайсыз?– Қазіргі буынның, жастардың классикаға деген құлшынысы жоғары, қызығушылығы басым. Шәкірт тәрбиелеуге университет бітірген кезден кірісіп, осынау нәзік бағыттағы қазақтың мықты әншілерін шығаруға бар жиған білімімді, күш-жігерімді салуға тырысудамын. «Шәкіртсіз ұстаз тұл» демекші, алғашқы ізбасарларым түрлі байқаулардан жүлделі орынға ие болып, өзім де тәжірибе жинақтай түстім. Ұстаз үшін шәкіртінің болашағы, өзіне, өнеріне сенгені маңызды. Кәсіби маман ретінде қазақ мәдениетін әлемге танытар бұлбұл дауысты ұл-қыздарды дайындау – басты мақсат.– Соңғы жылдары өнер ғана емес, ғылым саласында ізденген талай қазақтың шетелге көшіп жатқаны мәлім. Себеп жеткілікті: шетелде қолдау көп, өнерге құрметпен қарайды, материалдық жағынан да тиімді. Бұл туралы ой болмады ма?– Басқа салаларды білмеймін, классикалық бағыттағы әншілерді, таланттарды елімізде алып қалу үшін мемлекет тарапынан қолдау көрсетіліп, түрлі жобалар іске асырылуда. Шетелден кем емес. Соның бір дәлелі – 2021 жылы Астана Халықаралық опера академиясының ашылуы. Мұнда жастар екі жыл білім алып, түрлі шеберлік сағаттарына қатыса алады. Арнайы осы мақсатта шетелдің үздік маэстролары, кәсіби кадрлары шақырып алынды. Осыдан кейін шетелге кетудің мәнісі жоқ.Жалпы мақсат қойған адамға мүмкіндік көп. Қазақстанда жүріп-ақ қолдау табу, керемет мүмкіндіктерге ие болу өз қолымызда. Ешқашан көшу туралы ойлаған емеспін. Қазақстанда классиканың алтын дәуірі келе жатыр.– Өзіне сенімді, рухани иммунитеті мықты ұрпақты қалай тәрбиелейміз?– Мен үшін отбасы – бірінші орында. Жолдасым екеуміз ұлымыз бен қызымызға көп көңіл бөліп, қазақи тәрбиеден ажырап кетпеуін қадағалаймыз. Ата-әжеміз, әке-шешеміздің үлгісінде үлкенді сыйлап, кішіге ізет көрсетуді ұстанамыз. Қадыр Мырзалиев ақынның «Адам боп оңай туғанмен, адам боп қалу көп қиын» деген өлеңі бар. Уақыт өткен сайын құндылықтар өзгереді, қоғамдағы қарым-қатынас үлгісі ауысады. Бірақ бәрібір адам болып қалудан айнымау керек. Ал бала тәрбиесінің өзі осы адамгершілік үлгісі емес пе?!– Басшылыққа келіп, отырған орнынан айырылмайтын «ақсақалдар» көп. Еліміздің болашағы жастар десек, сенім білдірер кез жеткен сынды. Бұл жүйеге көзқарасыңыз қандай?– Мәселенің біздің салаға аса қатысы жоқ. Дегенмен қалыптасқан жүйенің бары рас. Қазіргі жастар өздеріне сенімді, ой, сөз еркіндігі бар. Тәуелсіз, саналы ұрпақтың көші келді. Бейбітшілік заманда әркім өз ісімен айналысып, сол саланы дамытса, одан артық жетістік жоқ. Ендеше неге жастарға орын бермеске?!Алға жылжу бары байқалады. Түрлі басшылықта жастарды көремін. Ғанидың өзі 23-інде жаспын деген жоқ. Жастардың қолынан бәрі келеді. Тек сену керек.– Өнер аш халықты тойдырып, материалдық тұрғыдан жыртықты жамамайтыны анық. Шынайы өнердің мақсаты не?– «Қылдан нәзік, қылыштан өткір» өнер саласы адамды аштықтан, материалдық қиындықтан құтқара алмайды. Дегенмен, ең бастысы, адамның жанына рух, жүрегіне жігер беріп, жақсылыққа құлшындырады. Өнер деген – қасиет пен кие. Мәселен, екінші дүниежүзілік соғыс кезінде Роза Бағланова апамыздың ән салып, сарбаздарға жігер беруі неге тұрады? Өнер адам жанының тазартқышы іспетті. Бір ауыз өлеңнің өзі өмірді өзгертіп, бойыңды тіктеп жібере алады.– Әдемі әңгімеңізге рақмет!

Қазақстан және Қызылорда облысының жаңалықтары: Мәдениет