<a href="https://kyzylorda-news.kz/">Kyzylorda-news.kz.</a> ҚР Мәдениет және спорт вице-министрі Сәрсен Абайұлы Құранбек жұмыс сапарымен Қызылорда облысына келді. Вице-министр Ә.Тәжібаев атындағы облыстық әмбебап ғылыми кітапханасында тұрғындармен кездесті.Жиынды Қызылорда облысы әкімі аппаратының басшысы Байманов Шахмардан Асқарұлы жүргізіп, өңірдегі спорт саласы жетістіктері мен даму динамикасына қысқаша тоқталып өтті.Сондай-ақ, кездесуге облыстық мәдениет және спорт басқармасына қарасты мекеме басшылары, жаттықтырушылар және қоғам белсенділері мен БАҚ өкілдері қатысты.Сәрсен Абайұлы өз сөзін "Қасиетті Қорқыт бабаның рухымен тыныстаған киелі өңірде өздеріңізбен кездесіп отырғаныма қуаныштымын" деп бастады. Вице-министр сапарының басты міндеті елімізде жүріп жатқан реформалар туралы халықты ақпараттандыру, мемлекеттік органдардың ел тұрғындары алдындағы жауапкершілігі мен жұмысын күшейту екендігін айтты. Осы орайда ол министрлік тарапынан атқарылып жатқан жұмыстарға тоқталып өтті. Кездесуден соң С.Құранбек қоғам белсенділері мен БАҚ өкілдерінің сұрақтарына жауап беріп, тұрғындарға жеке қабылдау өткізді.&nbsp; Ендігі кезекте вице-министрді "NAMAN ATA" спорт кешенінің құрылтайшысы Мұрат Абайұлы Сәрсенбаев кешен жұмысымен таныстырды.&nbsp;Кешенде Сәрсен Абайұлы жаттығу өткізіп жатқан балалармен сұхбаттасып, оларға болашақ ел намысын қорғар чемпион болуын тіледі.Вице-министрдің соңғы нысаны Жаңақорған ауданынының жергілікті спорт кешені болды. Мұнда ол гандбол, баскетбол және үстел теннисімен айналысушы жас спортшылармен кездесті. Сонан соң, аудандық ипподромдағы Көкпаршылардың жаттығуын тамашалап, жетістіктері мен алдағы жоспарлары жайында ақпарат алды. Сәрсен Абайұлы Көкпар спортын дамыту бойынша аудандық спорт саласы басшыларының білдірген ұсыныстарын қолдап, елімізде ұлттық спортты дамыту мәселесі қашан да алдыңғы орында тұруы қажет екендігін тілге тиек етті. Сондай-ақ ол министрлік тарапынан ұлттық спорт түрлерін дамыту үшін барлық жағдай жасалып, ұсыныстар қашан да қабылданатындығын жеткізді.<img src="https://knadmin.beoblood.kz/uploads/343301671_229133879800043_6688878125797563700_n_231a5f060e.jpg" alt="343301671_229133879800043_6688878125797563700_n.jpg">

ҚР Мәдениет және спорт вице-министрі қызылордалықтармен кездесті

<a href="https://kyzylorda-news.kz/">Kyzylorda-news.kz.</a>&nbsp; Мен қазақ қыздарына қайран қалам... «Қазақтың әнін, ұлттық киімі мен салт-дәстүрін өмір бойы серік еттім» деген күміскөмей әнші, Қазақстан және КСРО Халық әртісі, Халық қаһарманы Роза Бағланова болса, «қазақтың бұлбұлы» атанған Күләш Бәйсейітова, Сыр елі, жыр елінің тумасы, Қазақстанның халық әртісі, «Қазақтың Ақбаяны, ақ еркесі, ақ қозысы» Мәдина Ералиева, КСРО және Қазақстанның Халық әртісі, КСРО Мемлекеттік сыйлығының лауреаты Бибігүл Төлегеновалар күллі қазақ даласын әнімен тербеген. Қазақтың әнші қыздарының, ерке қыздарының ізін жалғап жүрген жастарымыздың бірі – Аманкелді елді мекенінің тумасы Құралай Мейрамбек. Әлемнің 100 елінде көрсетілетін әйгілі «The Voice» телешоуының қазақстандық нұсқасы – «Қазақстан дауысы» мега-жобасының алғашқы кезеңінде-ақ бүкіл өнер сүйер қауымды үнімен таңқалдырып, «қобыз-қыз» атанған жерлесімізбен сұхбаттасқан едік.– Құралай Мейрамбекқызы, алғашқы сұрақты танысудан бастасақ?– Мен «Сыр өңірі – жыр өңірі» атанған Сырдария ауданы, Аманкелді ауылында дүниеге келген едім. Шағын ғана ауылдың қызымын. №10 дарынды балаларға арналған облыстық «Білім-инновация» лицей-интернатын 2019 жылы тәмамдағанмын. Одан кейін арман қуып, еліміздің бас қаласы Астана қаласына бағыт алдым. Қазіргі уақытта Қазақ ұлттық өнер университетінде арт-менеджмент мамандығы бойынша білім алып жатырмын. Отбасымда анам, әкем және бауырларым бар. Барлығы өнер саласында қызмет етеді. Екі әпкем – опера әншілері. Үлкен әпкем Гүлзат Әбдікәрімова – этно-фольклорлық «Қоңыр» тобының әншісі, екінші әпкем Ұлпан Әбдікәрімова – Қазақ ұлттық өнер университетінің түлегі, жоғарғы оқу орнынан кейінгі білімді Италияда алған. Ағамның негізгі мамандығы – дәрігер, бірақ ол да өнер саласынан алыс жан емес. Артымнан ерген інім бар. Қазір 9-сынып оқиды. Ол да отбасымыздың дәстүрін жалғап, жыр-термеші, әншілік бағытқа бет бұрып келеді. Қазірдің өзінде халықаралық байқаулардың жеңімпазы атанып үлгере алды.– Негізгі сұраққа көшсек. «Қазақстан дауысы» жобасына қалай келдіңіз? Жалпы әншілік қасиет кімнен дарыған?– Аталған жоба – Қазақстандағы ең үлкен жобалардың бірі. Тасада жүрген таланттарды танытуға, қазақ жастарын көтеруге бағытталған керемет мүмкіндік. Жобаға қатысушылардың бәрі «сен тұр, мен атайын» деп тұрған нағыз талант иелері. Бұл көңілге қуаныш сыйлайды. Әншілік бабамның қанымен, анамның сүтімен дарыған қасиет деп айта аламын. Сыр бойының топырағын басып өскен адамның «әу» демейтіні жоқ шығар, сірә! Атам – ақын, әжем 40 жыл мектепте тарих және қазақ әдебиетінің мұғалімі болған. Әсем дауыс маған Алланың берген сыйы деп ойлаймын. Одан соң әкем мен анамнан дарыған асыл қасиет дер едім. Ата-анам – өнер адамдары. Әкем – дәстүрлі жыр-термеші, анам – вокал сыныбының мұғалімі. Екеуі де Аманкелді ауылдық өнер мектебінде жұмыс жасап, жас өнерпаздарды өнерге баулуда. Осы кісілердің арқасында кішкентайымыздан қазақтың ұлттық өнеріне, ұлттық аспаптарына жақын болып өстік. Бұған дейін де ән айтып, үлкен сахналарда бақ сынағанмын. «Қазақстан дауысы» жобасына қатысу да үлкен армандарымның бірі болатын. Биылғы іріктеу басталғанынан хабар алған бойда, еш ойланбастан жобаға қатысуға шешім қабылдадым. Маусым айында іріктеуден өтіп жолдама алдым. Бірінші кезең сәтті өтті. Қазір екінші кезеңге дайыңдық үстіндеміз.– Аталған жобаның алғашқы кезеңінде Қазақстанның еңбек сіңірген қайраткері, Сырдария ауданының «Құрметті азаматы» Рамазан Таймановтың әніне жазылған «Қорқыт-қобыз» әнін орындап, төрт тәлімгердің де жүрегін жаулап алдыңыз. Бұл – жеңіл-желпі ән емес, оны орындау үшін ерекше дарын мен үлкен жүрек керек деп ойлаймын. Дәл осы әнді таңдауға не себеп болды?– Өзім қайда жүрсем де, мейлі Қазақстанның басқа қаласында болсын, мейлі шетелде болсын, өзімнің Сыр өңірінің тумасы екенімді, шағын ауылдың қаракөз қызы екенімді мақтан етіп, айтып келемін. Осы әнді таңдауға да сол туған жерге деген сүйіспеншілік себеп болды. Бұл әннің әуенін, өзіңіз айтып өткендей, өнердегі үлгі тұтар ағамыз Рамазан Тайманов, ал сөзін Оңталап Нұрмаханұлы ағамыз жазған. 1999 жыл «Қорқыт ата жылы» болып жарияланған екен. Соған орай, өнертанушылар Қорқыт мұрасын терең зерттесе, ақын-сазгерлер жыр шумақтарын арнаған. Соның ішінде «Қорқыт-қобыз» әні де бар. Жарыққа шығып, бүкіл қазақ елін тамсандырған әннің дүниеге келгеніне биыл – 22 жыл. Алғаш сахнаға Гүлнұр Оразымбетова шығарса, біз өз кезегімізде бұл әнді жаңаша өңдеп, қайта жаңғыртуды көздедік. Ал қайырмасында қобыздың даусын келтіру идеясын өзімнің туған жездем ұсынды. Ол кісі де өнер саласында жүрген азамат. Осы ойды жандандырып, әнге жаңаша леп бердік. Әрине, оңай болмады. Қажырлы еңбектің арқасында.– Әншілік жолдағы ұстаздарыңыз туралы айтып өтсеңіз.– Мен қандай жетістікке жетсем де әуелі Алла, одан кейін ата-анам себепкер. Әрине, ең алғашқы ұстаздарым – әке-шешем. Бала кезімізден Рамазан Тайманов ағайымыздың студиясында өстік. Қандай байқауға қатыссақ та, ағайымызбен ақылдасып отырамыз. Сол кісінің өңдеуімен көптеген әндер жарық көрді. Рамазан ағаға айтар алғысымыз шексіз. Жоғарғы оқу орнындағы ректорымыз Айман Мұсаходжаева апайымыз да өнер саласында жүрген, өнерді бағалай білетін жан. Осы жолда тәлім берген ұстаздарымның еңбегі ерен. Қазақстанның еңбек сіңірген қайраткері Қаракөз Ақдәулетова апайымды ерекше атап өтер едім. Өкінішке орай, ол кісі қазір ортамызда жоқ. «Жарқын болашақ», халықаралық «Бозторғай» байқауының президенті Қарлығаш Әбдікәрімова апайымызға үлкен рақмет. Сол кісінің жетекшілігімен «Славян базары» байқауына қатысып, жүлдегер атанған болатынмын.– «Қазақстан дауысы» сіздің алғашқы үлкен сахнаңыз емес екенінен хабардармыз. Бұған дейін қандай байқауларда бақ сынадыңыз? Ең алғаш үлкен сахнаға шыққан Құралай Мейрамбек туралы айтып өтсеңіз.– 5 жасымда «Ботақан» байқауына қатысып, «Бас жүлде» иелендім. Ол менің алғашқы үлкен сахнам еді. Сол уақыт менің санамнан ешқашан ұмытылмайды. Одан кейін 2011 жылы Испаниядағы Льорет-де-Мар қаласындағы «Опус» байқауына қатысып, одан да жүлделі орын алдым. Сол жылы Белорусиядағы Витебск қаласында өткен балалар арасындағы «Славянский базары» сайысына қатысып, 1-орын иелендім. 2014 жылы Африканың Мозамбик қаласында «IFLC Mozambique» фестивальінде өнер көрсетіп, арнайы марапат алдым. 2015 жылы Румынияның Бухарест қаласында өткен халықаралық «ХІІІ Түрік олимпиадасында» Бас жүлде иегері болдым. 2015 жылы «Bala Turkvizyon» халықаралық байқауының 1-орын иегері атандым. 2016 жылы Бразилияның Сан-Пауло қаласында өткен «Colors of the world» фестивальінде өнер көрсеттім. 2018 жылы «Жарқын болашақ», «Miss innovation» республикалық байқауларында 1-орын жүлдегері атандым. 2020 жылы «Қызылорда дауысы» байқауында өз өнерімді көрсеттім. Бұлар менің ірі байқаулардағы жеңісім ғана емес, үлкен өмірге қадам бастырған негізгі баспалдақтар деп білемін. Сахнаның киесі толғандырмай, толқытпай тұрмайды. Сондықтан мен еш қорықпадым деп айтпаймын. Кішкентай болсын, үлкен болсын, әр сахнаға шыққанда қобалжу болады, бірақ соның барлығын ақылмен, оймен дер кезінде жинақтау қажет. Түрлі байқауларға қатысып, тәжірибе жинаудамын. Бұл – мен үшін тек бастамасы.– Керемет! Өз-өзіңізге деген сенімділігіңіз бен қайсарлығыңыз – нағыз қазақ қызына тән қасиет. Соның нәтижесінде небәрі он сегіз жасыңызда күллі Қазақстанды таң қалдырдыңыз. Бұрындары да ірі жетістіктерге жеткенмен, сіздің жұлдызыңызды жаққан «Қазақстан дауысы» жобасы секілді?– Иә, дұрыс айтасыз. «Қазақстан дауысы» – еліміздегі ең үлкен жобалардың бірі. Телевизиялық байқау болғандықтан түгел ел тамашалай алады. Әлеуметтік желідегі қаралымдар саны бір аптаның ішіне 500 мыңға жетті. Барлығы оң пікір білдіруде. Халықтың ықыласы мен сүйіспеншілігіне бөлену, әнді тыңдарман жүрегіне жеткізу – басты мақсат. Елдің қолдауы мен тілеуі мені қанаттандыра түседі. Халық сенімін ақтауға күш-жігерімді саламын.– Өнерді кие тұтқан халық өнер адамын да биік қояды. Қазақ халқы әрдайым сізге тілектес. Енді бір кәсіби сұрақ болсын. Даусыңызға арнайы күтім жасайсыз ба?– Әрине, күтім жасау қажет. Күнделікті ән айтып, дауысты шынықтырамыз. Дауыстың да қалыбы бар. Сол формадан ауытқуға болмайды.– Алдағы жоспарларыңыз қандай?– Арман адамды алысқа жетелейді. Болашаққа арман да, мақсат та, жоспар да көп. Дәл қазір оқуымды үздік аяқтауым керек. &nbsp;Болашақта халықаралық сайыстарға қатысып, қазақ елін, қазақ өнерін әлемге танытып жүрген аға-апаларымның ізін жалғасам деген арманым бар.- Әдемі әңгімеңіз үшін рақмет!&nbsp;&nbsp;

 Сырдариялық әншінің бағындырған белесі зор

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде «Университет аруы-2023» байқауының қорытынды кеші өтті. &nbsp;Биыл сұлулық сайысына 50-ге жуық ару қатысып, &nbsp;ақтық мәреде 9 бойжеткен бақ сынады.&nbsp;Салтанатты кешке Басқарма төрағасы-Ректор Бейбіткүл Кәрімова қатысып, қатысушыларға сәттілік тіледі.<blockquote>«Қазақ қашанда қыз баланы құрмет тұтып, төрден орын беріп, ерекше мейіріммен өсірген. Болмысы нәзік аруларымыздың ибалы, әдепті әрі ақылды болуын басты орынға қойған. Университетте тәрбиелі әрі білімді, ұлтжанды, салт-дәстүр мен мәдениетті дәріптейтін қыздардың ортасын құру мақсатында «Қыз Жібек» қыздар клубы жұмыс істеп келеді.&nbsp; Биылғы сұлулық байқауына қатысушылар бірнеше ай бойы түрлі бағытта өздерін сынады. Ақтық мәреге жолдама алған әр бойжеткеннің ақылына көркі сай екеніне сенімдімін»,-деді Бейбіткүл Сәрсемханқызы.</blockquote>Байқаудың шешуші кезеңі 4 айналымнан тұрды. Алғашқы айналымда бойжеткендер өзін таныстырса, келесі кезеңде университет қызметкерлері, белсенді студенттермен бірге өз өнерін көрсетті. Ары қарай сұлулық пен сәндікті серік еткен арулардың сахна мәдениеті, жүріс-тұрысы сынға түсті. Соңғы кезеңде бойжеткендердің білімі мен парасаты сараланды.&nbsp;Нәтижесінде әділқазылар алқасының шешімімен Айкерім Нұрғалиева «ІІІ Вице Мисс-2023», Аружан Сұлтан «ІІ Вице Мисс-2023», Аружан Ермағанбетова «І Вице Мисс-2023» атанды. Ал «Университет аруы-2023» байқауының тәжі Фатиха Асылбекқызына бұйырды.Сайыста Нартай Бекежанов атындағы облыстық қазақ академиялық музыкалық драма театрының басшысы Мұхтар Ниязов, облыс әкімі жанындағы әйелдер істері және отбасылық-демографиялық саясат жөніндегі комиссия хатшысы Қаламқас Каримова, Үкіметтік емес ұйымдарының Альянсы Ассоциясы заңды тұлғалар бірлестігінің төрайымы Анар Ізден, Сыр елінің эстрада әншісі Алмас Шынберген, Ғылыми жұмыстар және халықаралық байланыстар жөніндегі проректор Майнұр Бөрібаева және Әлеуметтік және тәрбие жұмыстар бөлімінің басшысы Жанар Бимұратқызы төрелік жасады.Айта кетейік, байқау «Қыз жібек» қыздар клубының ұйымдастыруымен өтті. Биыл ұйымның құрылғанына – 10 жыл. Алдағы уақытта клубтың мерейтойын кең көлемде атап өту жоспарлануда. &nbsp;

 «Университет аруы – 2023» байқауының жеңімпазы анықталды

<a href="https://kyzylorda-news.kz/">Kyzylorda-news.kz.</a> Нартай Бекежанов атындағы облыстық музыкалық-драма театрында “Aleks”мектебінің 25 жылдық мерейтойы аталып өтті.&nbsp;Алдымен өнерсүйер қауымға мектептің құрылу тарихы бейнеролик арқылы таныстырылды. Бұл күні өнер ордасының құрылуына бар күш-қайратын аямай, негізін қалаған, қаншама қиын кезеңдерден мойымай өткен өнер жанашыры Ким Елена Алексеевнаға ерекше қошемет көрсетілді.Мерейтойға Қызылорда облысы әкімінің орынбасары Нұрымбет Сақтағанов қатысып, жылы лебізін білдірді.&nbsp;<blockquote>«Бүгін облысымыздағы белсенді би мектептерінің бірі «Aleks» мектебінің құрылғанына 25 жыл толды. Би мектебінің ұжымын мерейлі мерекелерімен құттықтаймыз! Бұл шарамызға арнайы республикалық Коре Ильбо басылымынан келген делегациясы қатысып отыр. Сыр еліне қош келдіңіздер құрметті қонақтар! Қазақстан мен Корея республикаларының өзара қарым-қатынасына былтырғы жылы 30 жыл толды. Сонымен қатар Қызылорда облысындағы «Қазақстандағы кәрістер ассоциациясы» &nbsp;филиалының құрылғанына да 30 жыл болды. Бұл айтулы тарихи даталарды бірлесіп атап өткен болатынбыз», - дей келе, аймақ басшысы Нұрлыбек Нәлібаевтың Құттықтау хатын мектептің, Корей этномәдени бірлестігінің жетекшісі Елена Кимге табыстады.&nbsp;</blockquote>Концерт ересектер тобының биімен ашылып, мазмұнды туындылармен жалғасты.&nbsp;Сахнада Қазақ эстрадасының жұлдызы жерлесіміз Гүлнұр Оразымбетова, Наталья Махмудова, скрипкашы Анастасия Мусинова және саксафоншы Ғалымжан Ұлықпан өнер көрсетті.Концерт соңында қаладағы би өнерінің майталмандары «Aleks» ұжымын құттықтап, Елена Кимге өз ризашылықтарын білдіріп, сый-сыяпат жасады.25 жыл бұрын би мектебінде өнер қуған алғашқы түлектер де келіп, өз жүрекжарды лебіздері мен шынайы ықыластарын білдірді. Сол кезеңдердегі есте қалған қызықты сәттерімен бөлісіп, көрермендерді ерекше билерімен тамсандырды.&nbsp; Айта кету керек, мектеп өнерпаздары репертуарындағы билердің әрқайсысының мазмұны сан қилы, кейбірі жеңіл болса, енді бірінің орындалуы қиын, әйтсе де олардың бәріне ортақ ерекшелік - өнерге деген сүйіспеншілік бар.&nbsp;Расында да, мектеп бишілерінің түрлі нақыштағы әсем қимыл-қозғалыстарына жергілікті жанашыр жұрт қана емес, шетелдерде де ерекше сүйсініп, тамсанады.&nbsp;<figure class="image"><img src="https://knadmin.beoblood.kz/uploads/342912191_1426181488214566_2055037930693926335_n_afdc418be6.jpg" alt="342912191_1426181488214566_2055037930693926335_n.jpg"></figure>

Қызылорда: «Аleks» би мектебіне 25 жыл толды

<a href="https://kyzylorda-news.kz/">Kyzylorda-news.kz.</a>&nbsp;Шиелі ауданында «Махаббат мәңгі ертегі» атты кеш өтті.XIII-XIV ғасырдағы лиро-эпикалық поэмасының кейіпкерлері Қозы мен Баянның құрметіне әр жыл ғашықтар күні мерекесі ерекше аталып өтіледі. Махаббат – дүйім дүниедегі ең асыл, ең кіршіксіз сезім болса, ұлы сезімнің шырқау шыңына көтерілген сезімге адал, сертке берік Қозы Көрпеш пен Баян Сұлу шынайы махаббаттың символы іспетті. Сондықтан «ғашықтар күні» бір-бірімен сүйіп қосылған егіз жандар үшін айтулы мереке саналады. Осы мереке қарсаңында «Арман» мәдениет үйінде «Махаббат мәңгі ертегі» атты кеш өтті.Лирикалық бағытта өткен мерекелік кешке бірқатар сала мамандары мен жас өнерпаздар қатысты. Ең әуелі шараның шымылдығы ғашықтарға арналған арнайы бейнероликпен ашылды. Мұнан соң «Арман» мәдениет үйінің директоры, Шиелі ауданы мәслихатының депутаты Нұргүл Шәлекеева сөз алып, мерекелік құттықтауын жеткізді. Сондай-ақ сахна төрінде 15 сәуір күні отбасын құрған жас жұбайлардың неке қию рәсімі өткізіліп, ғашықтардың алғашқы құжаттары табысталды.Көрермен қауымды сүйсінткен бұл рәсімнен соң Өміржан Мінуаров пен Бибінұр Мұхтарқызы «Жаным» атты махаббатқа толы ән шырқап, қонақтардың ықыласына бөленді. Сондай-ақ Шиелі топырағынан шыққан, елге танымал өнерпаз Азамат Жолдасбек &nbsp;жанды дауыста «Таптым-ау сені» әнін гитарамен сүйемелдеп, көштің көркін қыздырды. Мерекелік көңіл-күймен өз жалғасын тапқан шараға ауданның бірқатар &nbsp;жарық жұлдыздары мен жас өнерпаздары қатысты. Бірі мың бұрала билесе, енді бірі махаббат әнін шырқап, жұртты сүйсінтті. Сонымен қатар ауданның айнасына айналып, ел алғысына бөленіп жүрген өнерлі жұптар да бұл кеште өз өнерлерін көрсетіп, қалың көпшіліктің ықыласына бөленді.

Шиеліде «Махаббат мәңгі ертегі» атты кеш өтті

<a href="https://kyzylorda-news.kz/">Kyzylorda-news.kz.</a> Бүгінде аймақтағы 560 тарихи-мәдени мұра нысаны мемлекет қорғауына алынған. Оның ішінде, 31-і республикалық, 256-сы жергілікті маңызы бар тарих және мәдениет ескерткіштерінің мемлекеттік тізіміне енгізілген болатын. Бұл туралы Өңірлік коммуникациялар қызметінің ақпарат алаңында өткен брифингте Облыстық тарихи және мәдени ескерткіштерді қорғау жөніндегі коммуналдық мемлекеттік мекемесінің басшысы Ерқазы Алданазаров мәлімдеді.Сондай-ақ 273 ескерткіш алдын ала есепке алынған тарихи-мәдени мұра нысандарының тізіміне алынған.<blockquote>«Ескерткіштер – халықтың мәдени мұрасы. ЮНЕСКО шешімімен 1983 жылы 18 сәуір – халықаралық ескерткіштер мен тарихи орындар күні болып бекітілді. &nbsp;Қазіргі күнде «Қазақстанның киелі жерлерінің географиясы» жобасы жүзеге асырылды. Оның нәтижесі бойынша энциклопедия жинағына жалпыұлттық 12, өңірлік 60 қасиетті нысан енгізілді. Тәуелсіздік жылдары 15 археологиялық ескерткішке зерттеу жасалып, 38 сәулет ескерткішіне қайта жаңғырту жұмыстары жүргізілді. Сондай-ақ 125 монументті өнер құрылысы салынып, 80 ескерткіштің қорғау аймақтары &nbsp;белгіленді. &nbsp;Бүгінде 3 ескерткіш – Қорқыт &nbsp;ата ескерткіш кешені, Сығанақ, Жанкент &nbsp;қалашықтары толығымен қоршалды. Соңғы жылдары мәдени құндылықтар мен ұлттық тарихымызға көп назар аударылып жатыр. Биыл облыс әкімдігінің қолдауымен бірқатар жобалар жүзеге асырылады. Соның негізінде ежелгі өркениет ошақтары саналатын &nbsp;сақтардың орталығы Бәбіш мола, оғыздардың ордасы Жанкент және қыпшақ, қазақ хандықтарының астанасы болған Сығанақ қалашықтарында археологиялық қазба жұмыстары жүргізіледі. Мұнан өзге, 2023-2024 жылдары Қызылорда облысында бірқатар ескерткіштерге реставрациялық жұмыстарды жүргізу жоспарланып отыр. Осы орайда тұрғындарды ескерткіштер мен тарихи орындарды сақтауға, қастерлеуге шақырамыз», - деді Ерқазы Жарылқасынұлы.</blockquote>

Қызылордада 560 тарихи-мәдени мұра нысаны мемлекет қорғауына алынған

<a href="https://kyzylorda-news.kz/">Kyzylorda-news.kz.</a> Н.Бекежанов атындағы Қызылорда облыстық қазақ академиялық музыкалық драма театрында белгілі қоғам қайраткері Т.Жүргеновтың 125 жылдығына орай «Жыр арқауы-Жүргенов» атты республикалық жыр мүшәйрасы өтті. Жыр додасына еліміздің түкпір-түкпірінен ақындар қатысып, өз жалынды өлеңдерін көрерменге тарту етті. Мүшәйраға облыс әкімінің орынбасары Нұрымбет Сақтағанов арнайы қатысып, Т.Жүргеновтың қазақ даласына сіңірген өлшеусіз еңбегін баяндады.<blockquote>«Темірбек Қараұлы тек ҚазақССР-дың ғана емес күллі Орта Азияның өнер-мәдениетінің дамуына елеулі үлес қосқан аса ірі қайраткер. Т.Жүргенов Қазақ елінде көптеген мектеп ашуға түрткі болған ұлтының адал перзенті. Биыл Т.Жүргеновтың 125 жылдығына қаламыздан қайраткердің зайыбы Дәмеш Ермекова-Жүргеноваға көше берілді. Кеше Н.Бекежанов театрында «Нарком Жүргенов» спектаклі қалың көрерменге жол тартты. Темірбек Қараұлының есімін ұрпағы ешқашан ұмытпайды»,-деді Нұрымбет Аманұлы.</blockquote>Мүшәйра қорытыныдысы бойынша бас жүлдені қызылордалық ақын Мөлдір Айтбай, жүлделі І орынды Ғалымхан Марлен (Орал), ІІ орынды Динара Төлеутай (Абай облысы), ІІІ орынды Ақжол Түменбай, Айдар Сайлауов (Қызылорда), Тілеухан Дәурен (Ақтөбе) жеңіп алса, Т.Жүргенов атындағы арнайы жүлде Әлібек Азаматқа (Түркістан) бұйырды. Сондай-ақ, ТҮРКСОЙ халықаралық ұйымы атынан Ахмет Байтұрсынұлының медалі Нұржан Байтусовқа (Абай облысы) табысталса, Бас жүлде иегері Мөлдір Айтбайға ТҮРКСОЙ ұйымының бас хатшысы С. Раев алтын жалатылған домбыраны тарту етті.<img src="https://knadmin.beoblood.kz/uploads/341593740_937704990716778_143075698817105563_n_29d57b43ff.jpg" alt="341593740_937704990716778_143075698817105563_n.jpg"><img src="https://knadmin.beoblood.kz/uploads/341638015_762729578555970_4390032937713821325_n_97586d2ac4.jpg" alt="341638015_762729578555970_4390032937713821325_n.jpg">

Қызылордада Т.Жүргеновтың 125 жылдығына орай республикалық жыр мүшәйрасы өтті

<a href="https://kyzylorda-news.kz/ru/">Kyzylorda-news.kz</a>. Расында, әу бастағы мақсатымыз кітап дүкендерін жарнамалау немесе мәселе іздеу болмағаны белгілі. Бар болғаны қызылордалық жастар үшін қалада кітап сату орындары жеткілікті ме, соны назарға алуға тырысқанбыз. Сол ниетпен жүрген жерімізде «жастар қайтадан кітап оқып жүр, олар телефоннан жалыға бастады» деген сүйіншіні көп естідік. Іштей марқайып, мәз болып қалғанымызды несіне жасырайық?!Қала тұрғындары үшін Әйтеке би көшесінде орналасқан «Мұстафа Шоқай» кітап үйі жақсы таныс. «Ата мұра» корпорациясына қарайтын бұл орталыққа келушілердің қарасы қалың. Басым көпшілігі жаңа оқу жылына дайындықты бастаған ата-аналар мен балалар. Айтпақшы, біздің замандастарымыз да мұнда жиі келеді екен. Бұл тақырыпта кітап үйінің иесі Еркін Маженовпен тілдескенмізде, жастардың қызығушылығына тағы бір мәрте сүйсіндік.&nbsp;<blockquote>‒ Осыдан 7-8 жыл &nbsp;бұрын телефон өмірімізге әбден ене бастаған тұста жастар бізге келмей қалды. Көбісі «электронды кітап тұрғанда, кітап дүкеніне барып не істеймін?» деп ойлағаны рас. Сол кезде тек зейнеткерлер ғана кітап іздейтін. Соңғы үш-төрт жылда жағдай өзгерді. Дүкенге жастар жиі келеді, қазақ тілінен бөлек орысша, ағылшынша тіпті түрік, италян тілдеріндегі кітапты да сұрап жатыр. Меніңше, жастар интернеттен шаршады, телефоннан да жалықты. Онысы дұрыс, қазір кинотеатрға бұрынғыдай бара алмайсың, сонда бар қызық тек кітапта болғаны ғой… Жастар іздеген кітаптарға жиі тапсырыс береміз. Медицина, техника саласы бойынша кітаптар табу қиындау, ал қалған салалар бойынша кітаптың түр-түрін табуға болады. Қазір оқырмандар жеткізу қызметін сұрайтын болды, оған да жайлап үйрендік. Бұрын ондай дәстүр &nbsp;жоқ еді, қазір аудандарда да жеткізу қызметін қарастырдық, ‒ дейді мекеме иесі.</blockquote>Еркін Маженовтың айтуынша, қазір шетел әдебиетінде Дейл Карнегидің, Орхан Памуктың аударма кітаптары, ал қазақ авторларынан Мирас Кесебаевтың «Ағылшын тілін екі айда үйрен» кітабы үлкен сұранысқа ие екен. Ал тарихи кітаптардан «Қан мен тер», «Арпалыс», «Сақтар» кітабы оқырман сұранысы бойынша екі тілде жарық көрген. Осы тұста жастар үшін кітап бағасының да маңызды фактор екені рас. Сол үшін кітап бағасын сұрауды да ұмытпадық.<blockquote>‒ Ең біріншіден кітап дүкені «Ата мұра» баспасының оқулықтарымен қамтамасыз етілген. Оқулықтардың бәрі баспа бағасымен сатылады, үстіне бір тиын қосылмайды. Мысалы, мың теңгеге бағаланған кітапты жеткізу жолы бар, жанармайы бар, салығы бар, бәрі есептеледі. Бірақ қай өңірде алып қарасаңыз да, бір бағамен сатылады. Сол үшін халық бізге жиі алғыс айтады.Одан бөлек кітап дүкені барлық баспамен байланыс орнатқан. Алматының өзінде 60 жуық баспа бар, бірақ кейде оқырманның сұрауы бойынша жақын шетелдерге де тапсырыс береміз. Ескере кететін жайт, басқа баспалардың кітаптарын сату кезінде бағада айырмашылық болады. Себебі кітапты сату кезінде жоғарыда айтылған мекеме қажеттіліктері ескеріледі, – дейді Е.Маженов.</blockquote>Расында сөредегі қазақ авторларын түгел қамтыған «Ата мұра» баспасының кітаптары 800-1200 теңге аралығында екен. Ал басқа баспа кітаптары тақырыбына қарай әртүрлі бағаланған. &nbsp; &nbsp; &nbsp; &nbsp;Қала орталығынан ашылған «Kitapal» дүкенінде шамамен 3000-ға жуық кітап бар. Алматыдағы «Kitapal» кітап дүкенінің қаладағы франшизасы түрлі жанрдағы: қазақ тіліндегі әдеби шығармалар, әлем классикасы, психология, мотивация, әлемдік заманауи мелодраммалар, фантастика, мистика жанрындағы, балалар мен жасөспірімдерге арналған әдебиеттерді түгел қамтыған. Айта кетейік, бұл кітап дүкені де Әйтеке би көшесінде орналасқан. Кітап дүкенімен жайлап танысқан соң, мекеме қызметкері Ажар Сағиқызымен кітаптардың сапасы турасында әңгіме өрбіттік:&nbsp;<blockquote>‒ Соңғы кезде басылған аударма кітаптардың сапасы, мазмұны өте жақсы. Бұрын маған кітаптарды түпнұсқадан оқыған ұнайтын, өйткені аударманы түсіну біраз уақытқа дейін қиын болды. Ал қазір керісінше аудармаларды еш кедергісіз оқи беремін. Мысалы, жақында Хэл Элродтың «Магия утра» кітабын орыс және қазақ тіліндегі нұсқасынан оқыдым. Қазақшасы өте керемет, тіпті мазмұны ағылшын тіліне жақынырақ деп айтар едім. Құдды бір түпнұсқадан оқығандай боласың, ‒ дейді А.Сағиқызы.</blockquote>Мұндағы кітап бағасына да ерекше назар аудардық. Мотивациялық, психологиялық кітаптардың өзге басылымдарға қарағанда бағасы сәл жоғары. Орташа бағасы 2500-3000 теңге аралығында. Ажардың айтуынша, бұл қалыпты жағдай, өйткені қай қалада болсын осы кітаптар үлкен сұраныста. Ал қазақ авторларының кітабы орташа бағамен ‒ 1500 теңге.<blockquote>‒ Орталыққа жастар жиі келеді. Студенттер, оқушылар да бас сұғып тұрады. Жастар көбіне психологиялық, мотивациялық кітаптарды сұрайды, ал оқушылар фантазия мен мистиканы жақсы көреді. Қазақ авторларын сұрайтын оқырмандарға қуана-қуана қызмет көрсетеміз. Қазақ әдебиетіне қызығушылық барын білгенде жүрегім жылып қалады. Өйткені қазақ шығармаларын оқитын жастар салыстырмалы түрде әлі де аз. Қазір «Қасым» баспасынан шығатын Бердібек Соқпақбаевтың, Шерхан Мұртазаның, Зейнеп Ахметованың кітабы жоғары сұранысқа ие. Өйткені бұл кітаптардың мұқабасы тартымды, көлемі де шағын. Кейде мотивация іздеп келген жастарға да қазақ әдебиетін оқуға кеңес береміз. Өйткені психология мен мотивацияның төресі осы кітаптарда. Әзірге діни кітаптарды сатуға әкімшілік тарапынан рұқсат берілмеген. Бірақ жастар осы тақырыптағы кітаптарды жиі сұрайды. Алдағы уақытта қаладан тағы бір кітап дүкені ашылуы мүмкін, сол кезде діни тақырыптағы басылымдар сатылатын болады, ‒ дейді А.Сағиқызы.</blockquote>«Kitapal» дүкенін аралап жүріп, қаржы, бизнес, спорт саласында жетістікке жеткен адамдардың үздік кітаптары жинақталғанын байқадық. Таңғы сағат 10.00-нан кешкі сағат 20.00-ге дейін демалыссыз жұмыс істейтін кітап дүкені жеткізу қызметін де жолға қойған. Өзіндік әдемі атмосферасы қалыптасқан орталықта кофехана да қызмет көрсетеді. &nbsp;

Қызылордалық жастар үшін қалада кітап сату орыны жеткілікті ме?

<a href="https://kyzylorda-news.kz/">Kyzylorda-news.kz.</a>&nbsp; Қайбір елдің болмасын ұлттық болмысында музыка өнерінің алатын орыны ерекше. Ұлттың ұлылығын да өзгеге ұқсамас айрықша қасиетін де танытатын осы киелі өнер. Біздің де сан ғасырдан жалғасқан төл өнеріміздің шашауын шығармай ұрпақтан ұрпаққа жеткізуде талантты музыканнатармыздың еңбегі өлшеусіз. Сондай жандардың бірі аудандық өнер мектебінің мұғалімі, сазгер Октябрь Ізбанов.Киелі өнерді бойға дарытқан Октябрь Ізбанов 1965 жылы 7 қазанда Арал ауданы, Аманөткел ауылында дүниеге келеді. Заманында ол дүниеге келген күн констетуция күні болып тойлатын болған. Сол себепті айтулы күні өмір есігін ашқан ұлыны әкесі «Октябрь» деп ат береді. Ауылдағы мектепті бітірген соң өнерге құмар болып сөкен бозбала өзінің шығармашылық қабілетін шыңдау мақсатында оқуға аттанады.<blockquote>– Негізінен мен ата анамнан ерте айырылдым. Анам өмірден озғанда тіпті жөргектегеі бала болғам. Ал әкем бірінші сыныпта оқып жүрген шағымды дүниеден озды. Көзкөргендердің айтуынша әкем домбырада ойнайтын болған екен. Тіпті менің де әкемнің домбыра шертіп отырған кездері есімде бар. Бірақ ол кезде мән бермеген екенмін. Кейін ауылдағы өнерлі азаматтардың қасында жүріп, соларға қызығып домбырада ойнай бастадым. Бірақ мынау менің ұстазым деп айта алмаймын. Бәрін өз бетімше үйрендім. Мектеп қабырғасында оқып жүргенде бұл өнерім шыңдала түсті. Осылайша болашағымды музыкамен байланыстырып әкеттім. Кейін, 1990 жылы Ақтөбе қаласындағы мәдениет ағарту колледжінің музика бөліміне оқуға түстім, - деді Октябрь Ізбанов.</blockquote>Оқу орынын бітіріп келген соң 1993 жылдан бастап Арал аудандық өнер мектебінде жұмысқа орналасады. Содан бері 27 жылдан астам уақыт оқушыларды домбыраға шертуге үйретіп келеді. Бұған қоса, аудандағы өнер иелерінен құрылған Қазанғап ұлт аспаптар орестрінің белді мүшесі. Октябрь аға домбырашы, әншілігімен қатар сазгерлік қырымен де көпшілікке таныс. Оның авторлығынан туған 15-тен астам ән бар.<blockquote>– Көбіне Ерғали Абдулла, Шолпан Балманова, Аманқос Есмырзаев сынды ақындардың өлеңдеріне ән жазып жүрмін. Негізінен 2009 жылдан бастап ән жаза бастадым. Ол да аяқ астынан пайда болды десем де болады. Сол кезде мектепте оқитын қызым Нұрбала ән айтушы еді. Сол өтініші жасады «Папа маған ұстаз туралы өзгеше бір ән тауып беріңізші» деп. Әрі бері қарап көрдім. Бәрі ел жадында жатталған бұрынан келе жатқан әндер екен. Содан ең алғашқы рет ұстазым әні өмірге келді. Онан соі біртіндеп жаңа әндердің тұсауы кесіле бастады, - дейді ол.</blockquote>Ол «Толқын» газетінің 90 жылдығына арналаған «Толқыным» әнінің де сазын жазды. Осылайша төл баспаға керемет тарту жасады. Әннің қалай өмірге келгені туралы да әңгімелеп берген еді.<blockquote>– «Толқын» газетін ес білгенен бастап білеміз. Ауданның бар жаңалығын толқынан оқып отырамыз. Аудандағы жалғыз баспамыздың 90 жылдық мерейтойы дегенде үнсіз қалғым келмеді. Бірақ бастапқыда жүрегім дауаламай көп жүрдім. Не дегенмен мұнда қаншама мықты азаматтар жұмыс жасаған ауданның айнасы болған соң елдің назары түсетінін білдім. Көпшіліктің көңілінен шықпай қалса қайтемін деген ой болды. Не керек, тәуекелге бел буып кірісіп кеттім. Бір жарым айға жуық уақытта ән толыққанда өмірге келді. Көптің көңілінен шықты, - деген сазгер мұны үлкен жетістікке балайды.</blockquote>Октябрь Ізбановтың балалары да өнерден құр алақан емес. Бес баласы да әке жолын жалғаған. Еліміздің әр түкпірінде бірі өнер саласында қызмет етіп жүрсе, енді бірі өнер академиясының студенті.Төл мәдениетімізді төрге сүйреп, өнерлі жастарға бағыт-бағдар беріп жүрген ағамыздың жеткен жетістіктерді да баршылық. Респуликалық, облыстық, аудандық жарыстарда топ жарғаны үшін алғыс хаттармен, медальдармен марапатталған. Ал 2020 жылы аудандағы З. Шүкіров атындағы шығармашылық бірлестік атынан «Жылдың үздік сазгері» атанды.Ол жетістікке масаттанбайды. Қарапайым, адами болмысынан айнымаған жанды да құрметті еткен осы болса керек. Үнемі шығармашылығын шыңдап отырады. Алдағы уақытта жеке ән кешімді өткізсем деген жоспары да жоқ емес. Бәрін уақыттың еншісіне тапсырған өнер адамының жүрек түкпірінен әлі де талай тамаша туындылар өмірге келері сөзсіз.

Сазгерлігімен танылған талант

<a href="https://kyzylorda-news.kz/">Kyzylorda-news.kz.</a>&nbsp; Сыр өңірінде Ұлт руханиятының көрнекті өкілі, мемлекет және қоғам қайраткері Темірбек Қараұлы Жүргеновтің 125 жылдығына арналған мерейтойлық іс-шаралар бастау алды.&nbsp;Бүгін аз ғана ғұмырында артына өшпес із қалдырып, Қазақ қоғамның қалыптасуына өлшеусіз үлес қосқан аңыз адам, тарихи тұлға Темірбек Қараұлының 125 жылдығына арналған «Ұлт руханияты және Т.Жүргенов мұрасы: жасампаздығы мен зерттелу кеңістігі» тақырыбында Халықаралық ғылыми-тәжірибелік конференциясы өтті. Конференцияға белгілі ғалымдар, ҚР ҰҒА Академиктері, зиялы қауым өкілдері, мемлекет қайраткерлері, сонымен бірге, облыс әкімінің орынбасары Н.Сақтағанов, Халықаралық «TURKSOY» ұйымының бас хатшысы С.Раев қатысты.Жиынға қатысушылар Т.Жүргеновтің қайраткерлік, қаламгерлік, азаматтық болмысы жайында ой бөлісті. Арда азамат туралы естеліктер айтып, қайраткердің республика тарихында алар қоғамдық-саяси орны, қаламгерлік мұрасы, жас ұрпаққа берер өнегесі туралы әңгімеледі. Сондай-ақ, Қорқыт ата атындағы Қызылорда университетінің ғылыми кітапханасында «Қазақ руханиятының жарық жұлдызы» тақырыбында арнайы кітап көрмесі ұйымдастырылды.&nbsp;Көрменің мақсаты – қоғам қайраткері Темірбек Жүргеновтің тағылымы мол өнегелі ғұмырын кейінгі өскелең ұрпаққа кеңінен насихаттау.&nbsp; Шараға қатысқан конференция қонақтары, зиялы қауым өкілдері көрмемен танысып, әдебиеттерге шолу жасалды.Мерейтойлық іс-шаралар Н.Бекежанов атыдағы Қазақ музыкалық-академиялық драма театрында өтетін Р.Отарбаевтың «Нарком Жүргенов» қойылымымен және «Жыр арқауы – Жүргенов» атты республикалық жыр мүшайрасымен жалғасын табады.<img src="https://knadmin.beoblood.kz/uploads/4abea06b_93ef_4c64_810d_ff17c59f6d05_c8519cb56d.jpg" alt="4abea06b-93ef-4c64-810d-ff17c59f6d05.jpg"> &nbsp;

Темірбек Жүргеновтің 125 жылдығына арналған конференция өтті

<a href="https://kyzylorda-news.kz/">Kyzylorda-news.kz.</a> Бүгін Сыр елінің бас шаһарында республикалық оқушылар айтысы өтті. «Көктем нұры» атауымен айшықталған дәстүрлі дода Алашқа белгілі ақын, сыншы, аудармашы, жерлесіміз Жарасқан Әбдірашевтың 75 жылдығына арналды.Айтыста еліміздің 6 өңірі мен Қызылорда қаласынан &nbsp;және Сырдария, Шиелі, Жаңақорған аудандарынан келген 10 жас ақын бақ сынады.Айтысты ашып беріп, талапкер жас ақындарға сәттілік тілеген шаһар басшысы Асылбек Шаменов сөз додасына түсетін жас ақындарға жүрекжарды лебізін білдірді.<blockquote>«Аралдың айдынынан ұшып шығып, атағы Алатаудан әрі асқан, әдебиетке, өнерге деген сүйіспеншілігінің, поэзияға деген құштарлығының арқасында небары 21 жасында КСРО Жазушылар Одағына мүше болған қайталанбас дарын Жарасқан шайырдың 75 жылдығына арналған дәстүрлі оқушылар айтысының жас таланттарға берері мол, жетелер шыңы биік деп білемін. Бүгінгі сөз бәйгесінің көрігін қыздырсақ деп келген ақындар жыр байрағын биіктен желбірете бергей!» - деді қала әкімі Асылбек Шаменов.</blockquote>Сөздің құнын жоғары қойған жас ақындардың өнеріне «Құрмет» орденінің иегері, белгілі айтыскер ақын, «Көктем нұры» айтысы жобасының авторы Мамыр Байдәулетов, үш дүркін «Алтын домбыра» иегері Мұхтар Ниязов және белгілі жыршы-термеші, халықаралық конкурстардың лауреаты, халықаралық ақын-жыраулар Одағының мүшесі Амандық Бүрлібаев төрелік етті.Жыр додасының қорытындысымен халық ақыны Манап Көкенов атындағы бас жүлде мен ақшалай сыйлықты жеңіп алған Сырдария ауданынан келген жас өрен Нұрахмет Мансұровты қала әкімінің орынбасары Жанмұрат Сейілов марапаттады. Биылғы жылдың басты ерекшелігі, бас жүлде иегеріне белгілі өнер қайраткерлері мен арқалы ақындар, барша алқалаған әлеумет А.Тоқмағамбетов атындағы қалалық мәдениет үйінің алдында тұлпарға мінгізіп құрмет көрсетті.І орын маңғыстаулық Ерсұлтан Аушановқа, ІІ орын Арқалықтан келген Рағат Нұрисламға бұйырды. Сондай-ақ, Жамбыл облысы, Талас ауданы, Аққұм ауылының тумасы Жүнісбек Айсұлу, қызылордалық Ұлықбек Бектай және жаңақорғандық Мұхамедали Абдуллаев ІІІ орынды өзара бөлісті. &nbsp;Мұнан бөлек, «Сүре айтыстың Сұржекейі – Серік Өтеуов», «Қайым айтыстың хас шебері – Бекұзақ Тәңірбергенов», «Түре айтыстың тарланы – Махамбетқали Тұрсанов», «Тап берме сөздің тапқыры – Серік Ыдырысов» және «Аламан айтыстың ақтаңгері – Кенжебай Жүсіпов» атындағы арнайы номинация жеңімпаздарына 100 мың теңгеден 5 жүлде табысталды. Екі ғасырдан астам тарихы бар Тұранның төрінде қасиетті Тәуелсіздік тағылымын жастардың санасына сіңіру, азат еліміздің жарқын жетістіктерін кеңінен дәріптеу, Жарасқан ақынның өлмес мұрасын, өшпес даңқын насихаттау мақсатында ұйымдастырылған «Көктем нұры» республикалық оқушылар айтысы көптің көңілінен шықты.

Қызылордада «Көктем нұры» республикалық оқушылар айтысы өтті

<a href="https://kyzylorda-news.kz/">Kyzylorda-news.kz.</a>&nbsp; Музыка маманы шәкіртін мәдени талғамы жоғары етіп тәрбиелеу жолында өнерге үйретеді. Мектеп оқушыларын музыкаға баулуда, оларға эстетикалық білім мен тәрбие беруде әуез пәні мұғалімінің орны ерекше. Ой-санасын рухани мол қазынамен байытып, музыканы ілім ретінде ғана емес, өміріне қажетті өнер ретінде де танытады.Сырдария ауданына қарасты Іңкәрдария ауылындағы №191 орта мектептің әуез пәні мұғалімі Ақгүл Сәрсенбаева – тәжірибелі ұстаз. Оның оқушыларға музыкалық-эстетикалық тәрбие беріп, өнерге деген сүйіспеншілігін арттырып келе жатқанына 27 жыл болды. Ұстаз әрбір сабағында балалардың өнерге жақындай түсуіне, талантты оқушылардың жан дүниесін рухани қазынамен сусындатуға барын салып келеді. Өз ісінің маманы оқушыларды ұлттық аспапты меңгеруге де ден қояды.<blockquote>&nbsp;Музыка пәніне деген қызығушылығым бала кезімнен қалыптасты. Отбасылық жиындарда қолымызға домбыра алып, халық әндерін айтатынбыз. Арнайы білім алған соң менің таңдауым музыка екеніне анық көзім жетті. Шәкірттерге музыка құдіретін ұғындыру, әсемдікке баулу, музыканың тілін меңгерту – ұстаз ретіндегі мақсатым. Қазір балалардың талғамы жоғары. Әр елдің музыкасын тыңдайды. Ал олардың ерек­шеліктерін түсіндіру, көркем мұраларды зерттеу, әрбір оқушының бойына патриоттық сезімді қалыптастыру ізденісті қажет етеді, – дейді білікті ұстаз.</blockquote>Ақгүл Көшербайқызы – Арал ауданының тумасы. Белгілі айтыскер ақын Бекұзақ Тәңірбергеновтың ауылы Шижаға елді мекенінде дүниеге келіп, бала кезінен өнерге жақын болды. Отбасындағы «өнер десе ішкен асын жерге қоятын» жандармен қосылып, домбыра тартып, ән салуды жаны сүйетін. Отбасылық жиындарды әп-сәтте той думанға айналдырып жіберу қазақтың қарапайым қызына қиын соқпайтын. Музыкаға деген сүйіспеншілігінің арқасында жоғарғы білім алған Ақгүл алғашқы еңбек жолын Қызылқұмдағы ауылдан бастайды. Отбасымен Іңкәрдарияға көшіп келіп, 1996 жылы осындағы мектепке мұғалім болып қызметке орналасады.Өз ісінің шебері әуез пәнінен дәріс берумен қатар мектептегі эстетикалық пәндер әдіс бірлестігіне жетекшілік етеді. Бірлестік мүшелерінің әрдайым біліктілігін арттыруға, шығармашылықпен айналысып, оқушылардың жан-жақты тәрбие алуына атсалысады. Өнер мен білімді ұштастыруда алдынан жан салмайтын білікті педагог Ақгүл Сәрсенбаева білім ошағында өтетін барлық іс-шаралардың бірден-бір ұйытқысы.Білікті маманның ізденімпаздығының арқасында өнерлі балаларға арнап «Балдәурен» үйірмесін ұйымдастырды. Үйірме мүшелері ән мен жыр үйреніп, сан түрлі байқауға дайындалып, мәдени-көпшілік іс-шараға қатысады. Шығармашыл ұстаз «педагог-сарапшы» ғылыми дәрежесін алды.Ұзақ жылғы еңбегінің жемісі ретінде Ақгүл облыстық білім басқармасының Құрмет грамотасымен марапатталды. Ауданда «Үздік әуез пәні мұғалімі – 2020» сайысының жеңімпазы болды. Республикалық «Тәуелсіздікке тарту», «Абай мұрасы», «Дала сазы», «SMАRT art», «Берекелі, мерекелі Алтын күз» атты республикалық байқаулардан шәкірттері жүлделі орындар алып, ұс­таз мерейін үстем етті. Шығармашылығын шыңдау мақсатында републикалық «Өнер әлемі» журналына «Айтыс өнері» тақырыбында &nbsp;ашық сабағы жарияланып, авторлық бағдарламасы жарық көрді.<blockquote>&nbsp;Шәкірттерінің жүрегінен орын алған музыка пәнінің мұғалімі Ақгүл Сәрсенбаева оқушының музыкаға деген қызығушылығын арттыру мақсатында әрбір сабағын ұтымды ұйымдастырады. Ақгүлдің өзіне тән еңбексүйгіштік, адам­гершілік шынайы қасиетімен бірге &nbsp;коммуникативтік және ұйымдастырушылық деңгейдегі үйлесімділік қа­сиеті бар. Оған қоса мейірбан, жауапкершілігі мол, әріптестері мен оқушылары, ата-аналары арасында еңбегі сіңген беделге ие ұстаз, – дейді әріптесі, мектеп психологі Жанар Шахаева.&nbsp;</blockquote>Ақгүл – отбасында сүйікті ана, аяулы әже. Қызы – Шырайлым автокомпанияда менеджер, екі жиен сүйгізіп отыр. Ал ұлы Нұртуған анасының ізін қуып музыкалық колледжде баян сыныбын тәмамдады. Ауылдық клуб үйінде мәдени ұйымдастырушы болып жұмыс істейді. Жоғарғы білім алу мақсатымен Нұртуған Қызылорда қаласында Қорқыт ата атындағы университетте оқиды.Аяулы ұстаз әрбір жетістігін ұзақ жылғы ізденіс пен шығармашылықпен байланыстырады. Білім көшін ілгері жылжытып келе жатқан, шырақ отын маздатқан ұстаздың еңбегі қашан да бағалы. &nbsp;

Қазақстан және Қызылорда облысының жаңалықтары: Мәдениет