– Ақмарал Бақбергенқызы, әуелгі сұрақты еңбек жолыңыздан бастасақ. – Мен бала кезімнен ән мен биге құмар болдым. Үшінші сыныптан бастап ән салдым. Облыстық, республикалық «Шабыт», «Бозторғай» фестивальдеріне қатыстым. Алайда 9-сыныпты бітірген соң, «Қаржыгер» мамандығы бойынша орта білім алдым. Десе де, өмір жолы мені өнермен қайта тоғыстырды. Музыка саласында жоғары білімді игердім. 2008 жылы аудандық мәдениет үйіне әдіскер болып жұмысқа орналастым. 2014-2018 жылдары «Халық» театрының режиссері, 2018-2021 жылдары әдістемелік кабинеттің меңгерушісі, 2021 жылдан бері Төретам клуб үйінде директорлық қызметтемін. Осы жылдар ішінде біршама белестен, кезеңнен өттім десем де болады. Адам өзін әр бағытта сынап көрген сайын дами түседі екен. Тек талмай еңбектенсең болғаны.– Өзіңіз басқарып отырған ұжым туралы бірер сөз. Шығармашылықта қандай бағыттарды қамтисыздар? Қанша адам қызмет етеді? – Жалпылама алғанда 12 штаттық бірлік бойынша 13 адам жұмыс істейді. Ал шығармашылық бойынша 4 маман еңбек етеміз. Негізі шығармашыл жан болғандықтан басшылық қызметке өзімді 2 жылдан бері сынап келемін. Ұжымым ұйымшыл, ауызбіршілікті бірінші орынға қояды. Басты мақсатымыз – халыққа мәдени-рухани демалыс сыйлау, эстетикалық талғам қалыптастыру, балалардың бос уақытын тиімді пайдалану. Клуб үйінде вокал, актерлік шеберлік, хореграфия, көркемсөз, бисер, поэзия, проза үйірмелері жұмыс істейді. Әр саладан өзінің білікті маманы дәріс бергенді құп көремін. Сол бағытқа қарай жұмыс істеймін. Сондай-ақ бізде «Келіншектер» ансамблі құрылған. Құрамында мәдениет саласының қызметкерлері мен мұғалімдер бар. Қос етек көйлегімізді, қазақы қамзолымызды киіп, ақ орамалымызды тағынып, әрбір іс-шараға сахнаға сән беріп жүрміз. Сонымен қатар «Әжелер» ансамблінің де құрамы қайта жасақталуда. «Әжелер» мен «Келіншектер» ансамблінің бірлескен попури әні де бар. Халық оны зор ықыласпен қабылдады. Екі ансамблдің бірлесе сахнада өнер көрсетуінің өзі ұлттық тәрбиені насихаттап, үлкен мен кіші арасындағы сыйластықты нығайтады. Ұжым қызметкерлері өздері де, шәкірттерімен бірге де түрлі байқау мен конкурстардың белсенді қатысушылары. Аудандық, облыстық, республикалық додалардан топ жарып, біршама белесті бағындырып жүр. Олардың әрбір жеңісіне ұжым болып қолдау білдіріп, марқайып отырамыз.– Ұлттық салт-дәстүрді дәріптеп, ұлттық құндылықтарды болашақ ұрпаққа жеткізу қандай жұмыстар атқарылуда? – Дәл қазіргі таңда ұлттық тәрбиені мықтап қолға алып басымдық берудеміз. Былтыр Көшеней Рүстембековтің облыстық фестивалін өткіздік. Балалардың құлағына жыр-дастандарымыз арқылы ұлттық тәрбие сіңе берсін деген ниетпен осындай іс-шара өткіздік. Сол кездегі көрерменнің ықыласы ерекше болды. Яғни жыр-термеге кент тұрғындарының қызығушылығы жоғары. «Атадан қалған өсиет» деген аудандық іс-шара өткізілді. Онда өсиет те айтылды, батаның түр-түрі тарқатылды. «Поэзия түні» деген жобамыз облыста үздік деп танылды. «Аналар ізімен» атты жаңа жобамыздың да елге берері мол. Қармақшы ауданның 95 жылдығына орай «Төріңде жырау жырласын» тақырыбында жыр фестивалі өтті. Қазіргі ойымда жүрген дүниенің бірі – мүмкіндік болса Төретамнан жыраулардың үйірмесін ашу. Себебі жыр тыңдап өскен баланың жаманы болмайды. Ұлттық тәрбиенің ерен үлгісі жыр-термеде дер едім. Әрі тұрғындар тарапынан да жыр-терме үйірмесіне сұраныс бар.– Өнер – саф, таза әлем, ластықты кешірмейді деп жатады. Бірақ қазір тас лақтырсаң «әншіге» тиеді. Айтары болмаса да, қомақты табыс көзі қылып алғандар да аз емес. Бұл қаншалықты дұрыс? – Өте орынды сұрақ. Әнші көп, бірақ білімді, оқыған әнші аз. «Қарнымның ашқанына емес, қадірімнің қашқанына жылаймын» демекші, сахнаның сәні кетті деп кесіп айтуға болмас. Бірақ ән өнерінің ауласын былғап, табыс көзіне айналдырғандардың аз емес екені аян. Бірақ не нәрсенің шегі бар ғой, бұл да уақытша деп білемін. Уақыт бәрін өз орнына қоятынына сенемін Бірақ сахнаға шыққан әрбір жан таза өзінің маманынан сабақ алға, өнерді сүйетін, сахнаның қасиетін түсінетін жан болса деймін. Сонда ғана өнер өміршең болмақ. Ал біздің мәдениетіміз биік болса, мәртебеміз де биік болары анық.– «Ұстазы мықтының, ұстамы мықты». Өнердегі, өмірдегі ұстазың туралы айтпай кету ағаттық болар. Тоқтала кетсеңіз... – Өнердегі ұстазым Мұхамедқали Бағатов ағай. Бала күнімнен бізге бағыт-бағдар беріп, байқауларға дайындап, ән әлеміне баулыды. Ал өмірдегі ұстазым деп Несібелі Нұралиева апайды айтар едім. Жұмысқа кіріскеннен бастап бар білгенімен бөлісіп, бізді алға жетеледі. Қажет кезінде қатал да бола білді, талап та қойды. Біз сол талаптың үдесінен шығайық, апайдан артық сөз естімейік деп жүріп пісіп-жетілдік. Қазір өзім де қызметкерлерге талапшылмын десем болады. Себебі талап пен тәртіп болған жерде ғана нәтижелі жұмыс болмақ.– Алдағы жоспарлар туралы сөз етсек... – Шығармашылық жағынан жоспар көп әрине. Қолға алынып жатқан жаңа жобалар да жетерлік. Бір айта кетерлігі, мен қандай жобаны қолға алсам да жергілікті кәсіпкерлер демеушілік жасаудан бас тартқан емес. Оларға алғысым шексіз. Бұл өлкеде өнерді жоғары бағалайды, әрі оған жанашыр жандар көп. Ауыл ақсақалдары да үнемі әрбір іс-шарамызға қуана қатысып, алғысын жаудырып отырады. Қажет кезде ақыл-кеңесін айтып, бағыт-бағдар береді. Әр аптаның сәрсенбісінде ауыл ақсақалдары клуб үйінде бас қосып, өнегелі әңгіме өрбітеді. Жалпы Төретам – таланттардың мекені. Ал клуб үйі – өнер мен еңбектің ерен үлгісі. Себебі мұндағы санаулы маман ән де айтады, би де билейді, актер да бола біледі. Өз қызметіне берілген, жаңашыл ұжымның бағындырар белесі әлі алда екеніне сенімім мол.– Сұқбат үшін рахмет! Өмірдің төрінде, өнердің өрінде болыңыз!

Ақмарал Кішкентаева: Жыр-терме үйірмесіне сұраныс жоғары 

<a href="https://kyzylorda-news.kz/">Kyzylorda-news.kz</a>&nbsp; «Руханият» ғылыми-зерттеу орталығының ұйымдастыруымен Қызылорда Болашақ университетінің 1-курс білім алушыларына филология, журналистика және тарих кафедрасының аға оқытушысы, педагогика ғылымдарының магистрі Қ. Қыпшақбаев «Сыр бойындағы қала мәдениеті және рухани құндылықтар» тақырыбында ғылыми-танымдық дәріс өткізді. Дәріс Қызылорда облысының тарихи-өлкетану мұражайында өтті.«Сыр - Алаштың анасы», тарихқа жүгінсек, бұл жерде қазақтың үш астанасы − Жент, Сығанақ, Қызылорда қалалалары орналасқан. «Қазақстанның киелі жерлерінің географиясы» жобасы аясында Қызылорда облысы бойынша 12 тарихи ескерткіш еліміздің жалпыұлттық қасиетті нысандар тізіміне және 60 тарихи ескерткіш өңірлік қасиетті нысандар тізіміне енді. Жалпыұлттық қасиетті нысандарға − ежелгі Шірік-Рабат қалашығы, ортағасырлық Жанкент, Сығанақ, Жент қалашықтары жатады. Осы қалалардан қалған іздері, табаны, орналасқан аймағы туралы білім алушыларға толығымен карталармен, түрлі-түсті суреттермен мәлімет берілді.Сырдарияның төмен ағысындағы оғыз қалалары туралы мәлімет 1959-1960 жылдары С.П. Толстовтың жетекшілігімен ХАЭЭ-ның барлау отряды бұрын белгісіз болып келген Іңкәрдария және Жаңадария бассейндеріндегі орналасқан «Оңтүстік Оғыздар» ескерткіштер тобын ашып, зерттеу жұмыстарын жүргізді. Өңірдің ортағасырлық қалалары мен қоныстарын зерттеу оларды барынша бірнеше топқа бөлуге мүмкіндік берді. Іңкәрдария мен Жаңадария бассейінің шығыс, сирек жағдайда орта бөлігінде орналасқан қалашықтарына Жент, Сырлытам, Заңғар қала, Асанас, Орқала, Ақтөбе қала жұрты жатады. Бұл қалалар көп функционалды, саяси әкімшілік орталықтарының рөлін атқарды, қолөнер кәсіптерінің, сауданың және ауыл шаруашылығының шоғырланған жері, ғылымның, білім мен мәдениеттің орталығы болғанын көрсетеді.Облыстық тарихи Өлкетану мұражайының ғалым-хатшысы А. Сайлау «Қасиетті Қазақстан және археология» залында білім алушыларға неолит, кейінгі қала, ерте темір дәуірі, ортағасыр дәуірлері мерзімделетін Қызылорда облысы территориясында тиесілі археологиялық ескерткіш кешендер, архитектуралық ескерткіштер, тарихи маңызды оқиғалар, Сыр өңірінде ұйымдастырылған ғылыми-зерттеу экспедицияларынан көріністер, П.И. Лерх, А.Н. Бернштам, С.П. Толстов (ХАЭЭ) экспедициялары туралы құнды мәліметтер, «Мәдени мұра» бағдарламасы бойынша жүргізілген экспедициялар, «Қазақстанның киелі жерлерінің географиялық» жобасы бойынша Қызылорда облысынан жалпыұлттық қасиетті нысандар тізіміне енген 12 тарихи-мәдени ескерткіш, өңірлік қасиетті нысандар тізіміне енген 60 тарихи-мәдени ескерткіштер тарихы мен сол дәуірлермен мерзімделетін археологиялық экспонаттар және облыстық музейдің «Археология» экспозициясында орналасқан 2023 жылы жергілікті ғалым археологтардың тікелей бастамасымен «Шірік Рабат сақ жауынгері» мен «Сығанақ ханшайымы» реконструкцияларымен жалпы білім алушыларға қосымша дерек ретінде толығымен баяндап берді.Университет білім алушылары осы дәріс арқылы мұражайдағы 10-нан аса залда орналасқан экспонаттармен танысты, өлке тарихына байланысты мол мағлұмат алды. &nbsp;

 Сыр бойындағы қала мәдениеті және рухани құндылықтар 

<a href="https://kyzylorda-news.kz/">Kyzylorda-news.kz</a> &nbsp;Қызылордалық студенттер креативті индустрияның дамуына, яғни өздерінің шығармашылық әлеуеті, тың бастамалары арқылы мәдениеттің жандануына серпін беруде. Қорқыт ата атындағы Қызылорда университетінің студенттерінен құралған "Жауқазын" театры жаңа спектакльдерімен көрерменін қуантуда. Бүгін жас театрдың репертуары туралы сөз қозғамақпыз.Түрлі мамандықта оқыса да өнердің бағасын биіктетіп жүрген талантты студенттер бірнеше айдың ішінде төрт спектакльдің премьерасын өткізді. Атап айтсақ, бүгінге дейін Мұқағали Мақатевтың «Қош, махаббат» драмалық поэзиясын сахналады. Сонымен қатар Әбіш Кекілбаевтың «Махаббат мұнарасы» атты шығармасын көпшілікке ұсынды.Пьеса желісі әмірші Ақсақ Темір мен оның әйелі арасындағы оқиға төңірегінде өрбиді. Махаббат мұнарасын тұрғызып, алып ғимарат салдырған кіші ханымның әрекеті әлемді аузына қаратқан әміршінің жүзін төмен қаратты.Қойылым барысында сан алуан өнер бір сахнада тоғысты. Жастар заманауи музыка мен биді керемет ұштастырып, көрерменге ерекше әсер қалдырды.&nbsp;<blockquote>– Белгілі қаламгер, мемлекет және қоғам қайраткері Әбіш Кекілбаевтың бұл романын таңдап алуымыз бекер емес. Адамзат баласы үшін рухани құндылықтың құлдырамауы, сенім мен махаббаттың болуы аса маңызды. Қойылымға күн-түн демей дайындалып, қолдау білдірген барша студенттерге алғыс айтамын, – деді «Жауқазын» жастар театрының жетекшісі, 3-курс студенті Ақниет Мәулен.</blockquote>Ал жуырда студенттер театры Исраил Сапарбайдың «Сыған серенадасы» музыкалық спектаклін халыққа ұсынды. &nbsp;Көпшіліктің ілтипатына бөленген қойылымдар әрбір студенттің театрға деген қызығушылығын арттырды. 2024 жылдың ақпан айында «Шәмші сүйген Изольда», наурыз айында «Қаракөз» трагедиялық спектакльнің тұсауын кесіп, студенттік театрдың алтын репертуары жаңа қойылымдармен толысуда.<img src="https://knadmin.beoblood.kz/uploads/Studentter_irdegi_m_denietti_damuyna_les_osuda_1_87bfaef70d.jpg" alt="Студенттер өңірдегі мәдениеттің дамуына үлес қосуда 1.jpg"><blockquote>– Қазір студенттік театр қарқынды жұмыс істеуде.&nbsp;Жылына 2 рет кастинг өткізіледі, ал ұжымда 30-дан астам адам бар. «Жауқазын» театрының ең алғаш жасақталған командасы әлі күнге дейін шашырамаған. Тек қана университет қабырғасындағы шәкірттермен шектеліп қоймай, колледж, мектептерден үйірмемізге мүшелік ететіндер бар. «Жауқазынға» қызығушылық танытқан барша жанға театр мүшесі болуға мүмкіндік бар.</blockquote>Аға-буын өкілдері облыстық драма театрдың барлық спектакльдерін үзбей көріп, тәжірибе жинақтап, шыңдалуға тырысамыз. Сондай-ақ театрымыздың әрбір мүшесі ізденіс үстінде жүреді. Ән, би, қойылым, концерттік киімдерге дейін ұқыптылықпен қарап, сахна мәдениетін тереңінен ұстануға бейімбіз. Алдағы уақытта арнайы мамандармен біріге жұмыс істеуді жоспарлап отырмыз, – деді Ақниет Мәулен.Студенттер театры сәуір айында көрермендерін жақсы жаңалықпен қуантты. Махамбет Өтемісов атындаты Батыс Қазақстан университетінің ұйымдастыруымен «III Umit – 2024» республикалық студенттік театрлар фестивалінде «Жауқазын»&nbsp; студенттер театры&nbsp; алғаш рет қатысып, жүлделі II орын иеленді.Әртүрлі мамандық студенттерінен құралған «Жауқазын» студенттер театрының жас таланттары М.Әуезовтың «Қарагөз» трагедиялық қойылымын&nbsp; сахналады. Әділ-қазылар алқасы байқауда бақ сынаған жас өрендердің өнерін жоғары бағалады.&nbsp;<blockquote>– «Қарагөз» трагедиялық қойылымы көрермен жүрегінен орын алды. Қарагөз бен Сырымның жан тебірентерлік махаббаты әрі қыз тағдырының ауырлығы қойылымда толығымен ашылды. Байқау өте тартысты, қызықты өтті. Бастысы студенттік театрлар арасында мықты байланыс орнады,&nbsp; ̶&nbsp; деді ұйым төрағасы Ақниет Мәулен.</blockquote>Өзіндік бастамаларымен өнерге өзіндік үлес қосқан жастар әлі де талай рет көрерменін қуантады деп сенеміз.&nbsp;Фото:korkyt.edu.kz

Студенттер өңірдегі мәдениеттің дамуына үлес қосуда

<a href="https://kyzylorda-news.kz/">Kyzylorda-news.kz</a> Айтыс – қазақтың төл өнері. Кешегі қадау-қадау ғасырлардан бері жалғасып келе жатқан айтыс өнерінің алтын арқауы үзілмейтіндігі –тарих пен уақыттың өзі дәлелдеген шындық. Қиыннан қиыстырып, суырыла сөз саптау, қоғамның келбетіне үн қосу, ел мүддесін ескеру – нағыз айтыс ақынының қасиеті. Иә, Шиелі жұртшылығы да – айтыс өнеріне жақын халық. Сондай-ақ әрдайым тектілігінен танбай, өткеніне салауат айтып, талантты ұлқызын ұмытпай, ұлықтайтын киелі өлке. Осы үрдістен танбай жуырда Шиеліге қарасты Жөлек ауылында сыр жүйріктерінің басын қосқан дүбірлі айтыс өтті.Аталған шара Жөлектен шыққан мәдениет майталмандары Зәкір Жақыпов, Оразкүл Алтынбекова және Ержан Бәйімбетовті еске алуға арналды. Айтысқа елімізге танымал жерлестеріміз, шашасына шаң жұқпаған үш дүркін «Алтын домбыра» иегері Мұхтар Ниязов, шиелілік ақындардың ұстазына айналған Мәдениет қайраткері Кенжебай Жүсіп, көптеген додада дара келген республикалық айтыстардың жеңімпазы Иран-Ғайып Күзембаев, «Айтыстың ақтаңгері» Мейірбек Сұлтанхан, Сыр жүйріктері Нұрмат Мансұров, Зухра Төлепова, көптеген айтыстарда жеңімпаз атанған шиелілік дарабоз Ержан Әміров және аралдық жүйрік Ержеңіс Әбдиев қатысты.&nbsp;Шараны Шиелі аудандық мәслихат төрағасы Айтбай Жандарбеков ашып беріп, ауылдағы ауқымды шараға қолдау білдіріп, қиыннан қиыстырып уақыт тауып келген барша ақындарға алғысын айтты.&nbsp;<blockquote>– Айтсаң аңызға, тарқатсаң тарихқа сыймайтын Жөлек ауылы – сонау ІХ ғасырдан бастап, атағы хан базарына дейін көтерілген киелі топырақ. Халықаралық Жібек жолымен сабақтаса отырып сәуле шашқан Жөлек ауылының тарихы тым тереңде. Бүгінгі Зәкір Жақыпов, Оразкүл Алтынбекова, Ержан Бәйімбетов сынды мәдениет майталмандарын еске алуға арналған «Жөлек жауһарлары» атты облыстық ақындар айтысының ашылуымен шын жүректен құттықтаймын.&nbsp;</blockquote>Қара сөзбен темір балқытып, тұлпар тағалаған текті халық үшін айтыстың орны ерекше. Атадан қалған асыл сөзді ұрпақтан ұрпаққа жеткізіп, ұлтты ұйыстырған айтыскер ақындар халық руханиятының барометрі секілді. Бүгінгі сөз додасының жөні бөлек, бітімі басқа болмақ. Өмірден өтсе де, есімдері ел есінде сақталған тұлғаларды құрметтеп, шақыртуымызды қабыл алған барша ақындарға алғыс білдіремін. Біздің өңірімізді айтыс өңірінің алтын бесігі деуге толық негіз бар. Бүгінгі бәйге айтыс десе ішкен асын жерге қоятын ағайын үшін үлкен қуаныш екені сөзсіз. Қара домбыраның күмбір үнімен дана халқымыздың сөз өнерін жандарыңызға жалау етіп, дүйім елдің құрметіне бөленген салтанатты сапарларыңыз үзілмесін деп тілек білдіремін, – деді.&nbsp;Ақындар айтыс барысында мәдениет майталмандарын жырға қосып, әрі қағытпа қалжыңдарымен, ұтымды ойларымен айтысқа келген қалың көрерменнің ықыласына бөленді.&nbsp;Кеш соңында Жөлек ауылының әкімі Мейірбек Жолдасбеков айтысқа келген барша ақындар мен көрерменге алғыс білдіріп, ақындарға аудан әкімінің Алғыс хаты мен арнайы сый-сияпаттар табыстады. Туған жердің өткенін санада жаңғыртып, бүгінін ұлықтап, болашақты жас ұрпаққа аманаттау ел ағаларының қасиетті парызы десек, өткізілген айтыс тарих күнпарағына алтын әріптермен мәңгі жазылмақ...

Шиелі: Жөлектегі айтыстың жөні бөлек

<a href="https://kyzylorda-news.kz/">Kyzylorda-news.kz</a> &nbsp; ҚР халық әртісі, әнші Димаш Құдайбергеннің сахналық костюмі аукционға шығарылды. Бұл туралы<a href="https://stan.kz/kyni-2-million-tenge-dimash-kydaybergennin-kostyumi-auk-398129/"> Stan.kz</a> ақпарат агенттігі хабарлайды.Әншінің костюмі Dauletten қайырымдылық қоры ұйымдастырған ауызашарда сатылған. Сатылымнан түскен қаражат су тасқынынан зардап шеккен халыққа көмек ретінде жіберіледі.“Димаштың костюмін үйге алып кеттім. Еліміздің мақтанышы Димаш Құдайбергеннің концертке киген костюмін сатып алуға мүмкіндік болады деп ойламаппын. Бірақ менің қолымда сол костюм тұр. Осыдан бірнеше күн бұрын Дәулет Мұқаевтың қайырымдылық шарасына шақырту алдым. Он жылдан бері таныс болғандықтан, қайырымдылық шарасынан қалмайын деп шештім. Қорға 1 млн теңге аударамын деп бардым. Себебі, бар ақша Батыс Қазақстанда су тасқынынан зардап шеккен халыққа кетеді. Ауызашарда қайырымдылық іс-шара болды. Сонымен қатар Батыс Қазақстандағы халыққа ақша жинау мақсатында, аукцион өтті. Аукционда басты экспонат – Димаш Құдайбергеннің костюмі. 1 млн теңге жоспарлап барғанымен, аукцион басталған сәтте баға одан асып кетті. Соңында осы костюмді 2 млн теңгеге сатып алдым" , – деді Еркебұлан Әріпбай есімді азамат.Желі қолданушылары кәсіпкер жігітке ризашылығын білдіріп, жарыса пікір жазып жатыр.“Димаштай ұлдың әкесі болыңыз!”, “Керемет іс-шара екен”, “Ұлыма сіздер жолмен жүруді нәсіп етсін!”, “Ниеттерің қабыл болсын!”, “Дүниежүзіне танымал Димаштай дарынды тұлғаның елі суға кетіп жатқаны өкінішті”, “Біз батыспен біргеміз”, – жазды оқырман қауым.Еске салайық, еліміздің суға кеткен өңірлеріне танымал тұлғалар көмек қолын созып жатқанын жазған едік.&nbsp;Фото: Видеодан скриншот

"Құны – 2 миллион теңге": Димаш Құдайбергеннің костюмі аукционда сатылды

<a href="https://kyzylorda-news.kz/">Kyzylorda-news.kz</a> Қармақшы ауданы әкімдігінің қолдауымен Қармақшы аудандық мәдениет және тілдерді дамыту бөлімінің Көшеней Рүстембекұлы атындағы «Жыраулар үйінің» ұйымдастыруымен Сыр сүлейі, есімі алты Алашқа мәлім Шығыстың шайыры атанған, ақын Тұрмағамбет Ізтілеуовтің шығармаларын насихаттау, болашақ жастардың жадында қалдыру мақсатында «Тұрмағамбет жырлары – жаңа ғасыр көгінде» атты аудандық көркемсөз оқу шеберлерінің байқауы ұйымдастырылды.Көркемдеп оқу байқауына аудан көлеміндегі кент, елді-мекендердегі мектептерден 23 үміткер қатысты. Байқауға қатысушыларға Көшеней Рүстембекұлы атындағы Жыраулар үйінің директоры Айгерім Ешбаева сәттілік тілеп, құттықтау сөз сөйледі.&nbsp;Арнайы құрылған қазылар алқасының құрамында Халықаралық «Қазақ тілі» қоғамының аудандық филиалының төрайымы Күлжауһар Раева, ақын, ұстаз, «Тұрмағамбет ақын» үйірмесінің жетекшісі Нұршат Наурызбаева, жырау, ұстаз, Көшеней Рүстембекұлы атындағы Жыраулар үйінің директоры Айгерім Ешбаевалар болып, төрелік етті. Олар талапкерлердің өнерін саралап, сөз саптауын, дауыс мәнеріне қарап бағалады. Сайыс нәтижесінде №29 мектептің 5 сынып оқушысы Фатима Мархабатова І орынды қанжығасына байлады. Ал жүлделі ІІ орынды /№80 мектептің 9 сынып оқушысы Мақпал Құрманбекова мен №99 мектептің 9 сынып оқушысы Тоғжан Нұраддиндер өзара бөліссе, &nbsp;ІІІ орынға №30 мектептің 9 сынып оқушысы Құралай Аппазоваға №28 мектептің 3 сынып оқушысы Шерхан Әміреев, №269 мектептің 8 сынып оқушысы Меруерт Жасұланқызылар жайғасты. Оларға арнайы дплом мен марапатталып, сыйлықтар табысталды. Қалған барлық қатысушылар арнайы алғыс хаттар және сыйлықтар табыс етілді.Сыр өңіріндегі ақын-жыраулардың көкірегінен төгілген жырларын құмның арасынан іздегендей тірнектеп жинап, бұл қымбат қазынаның сыры мен сымбатын жұртшылыққа жеткізу – кейінгі ұрпақтың міндеті. Тарих қойнауында жатқан өз заманының белгілі тұлғалары ақындар мен жыраулар осылайша халықтан өз бағасын ал бермек. Артында сұлу сөз бен өлместей мұра қалдырған атақты дара тұлғаларды қалай құрметтесек те артық етпейді. &nbsp;

Қармақшылық жастардың жыр өнеріне қызығушылығы жоғары

<a href="https://kyzylorda-news.kz/">Kyzylorda-news.kz</a> Жалпы қай саланы болсын білікті маман дөңгелетпесе өрге емес керіге кетері сөзсіз. Себебі көзсіз ерлік жасай беретін жабайы орманда емес, алға қарай қарыштап дамып келе жатқан мемлекетте өмір сүріп жатырмыз. Ал сондай ізденімпаздығымен алға ілгерілеп жүрген жанның бірі қармақшылық – Айгерім Жанғабылова. Ол бүгінде Жосалы кентіндегі №3 «Ертөстік» балалар бақшасында хореограф болып еңбек етіп келеді.&nbsp;Білікті де білімді маманның түп тамыры мектеп қабырғасында қаланады. Айгерім де Шоқан Уәлиханов атындағы №26 орта мектепті үздік бітірген. Оның өнерге деген қызығушылығы бала жастан басталса керек. Себебі мектепте оқи жүріп қосымша Т.Салқынбайұлы атындағы әуез мектебінде баян үйірмесі бойынша Зина Рысбаевадан сабақ алады. Ал 2012 жылы Қазанғап атындағы Қызылорда музыкалық колледжіне оқуға түседі. Онда Халық аспаптар бөлімі, баян мамандығында Әсия Боранғұловадан тәлім алады. Одан кейін Қорқыт Ата атындағы Қызылорда жоғары университетінде музыкалық білім бөлімін бітіріп шығады.&nbsp;Адам баласы бұл өмірге келген соң &nbsp;өмірде қателеспей таңдауы керек жолдар бар. Бірі – өмірлік аяулы жары, ал екінші жолының бірі – мамандық таңдау. &nbsp;Бұл жолда кейіпкеріміз жаңылмапты. Айгерім Бақтыбекқызының еңбек жолы 2015 жылы №3 «Ертөстік» бөбекжай-бақшасында музыкант болумен басталады. 5 жылға жуық бүлдіршіндерге әуезді әннен сабақ береді. Шығармашылық өмір жолы уақыт өте келе би өнеріне қарай ойысады. Өзі еңбек ететін сала жайында кейіпкеріміз былайша жеткізеді.<blockquote>– Би өнері – тілсіз өнер, оның айтар өзіндік мағынасы бар. Мәселен, кей адамдар шаршы топ алдында мүдірмей, еркін сөйлей алса, бәзбіреулер осы тұсқа келгенде күмілжіп қалады. Бірақ бұл адамның бойында өнер жоқ дей алмаймыз. Ол өзінің ішкі сырын жазумен, қолөнермен, музыкамен, бимен жеткізе алады. Жүректегі, ойдағы жазуды би тілімен жеткізу, халықты бұған сендіре алатын жандар да жетерлік. Осы жағынан келгенде, қолдың, саусақтың, буынның, дененің әр қимылы – сөз. Ал осы өнерге баланы ерте жастан баулыған жөн. Осы орайда балалардың шығармашылық дағдысын қалыптастырып, өнерге баулып келемін. Би – балаларды тәрбиелеу мен дамытудың тамаша құралы. Ол рухани әлемді жалпылайды, баланың жеке тұлға ретінде ашылуына көмектеседі. Қозғалыс, музыка және ойынның үйлесімділігі жағымды көңіл күй тудырады. Сондай-ақ би әсемдікке, әдемілікке тәрбиелейді, – дейді Айгерім Бақтыбекқызы.&nbsp;</blockquote>Айгерім қазірде балабақшада «Шұғыла» би үйірмесін жүргізеді. Үйірмедегі бүлдіршіндердің де дайындығы жақсы. Өнер әлеміндегі қадамын нықтап басатын маманның шәкірттері қазіргі уақытта сахна төрінде топ жарып жүр. Мұны соңғы уақытта жиі байқап жүрміз. Соның арқасында көптеген байқауға қатысып жүлделі орын алып жүр. Жақында ғана «Өнеріміз саған – Қазақстан» республикалық байқауының аудандық кезеңі бойынша І орынды қанжығасына байлапты. Білікті маман әрдайым ізденісте жүреді. Соның негізінде Қызылорда облыстық оқу орталығы ұйымдастыруымен «Күннің екінші жартысында балалармен жүргізілетін инновациялық жұмыс түрлері» тақырыбында өткізілген әдістемелік вебинарында өз іс-тәжірбиесімен бөлісіп, орталық директоры С.Асқаровтың сертификатын алған. Еселі еңбегінің жемісі ретінде Қызылода облысының білім басқармасынан, Қармақшы ауданы әкімі, Қармақшы аудандық білім бөлімі, Қармақшы аудандық білім қызметкерлерінің кәсіподақ комитетінің алғыс хаттарымен марапатталған. &nbsp;Біз биді бишілердің әдемі қимылына ғана қарап бағалап жатамыз. Ал әр қимылдың астарындағы мағынасына, оның әрқайсысының қолданылу мақсатының бөлек екенін, топпен билегендегі үйлесімдікті ұйқастыра білуді елей бермейді екенбіз. Оның бәрі үлкен еңбекпен, көп дайындықпен, тәжірибемен көрермен назарына ұсынылатынын білікті бишімен әңгімелескенде түсіндік.&nbsp;Балабақша ұжымы да Айгерім секілді жалынды жаспен бірге жұмыс істейтініне қуанышты. Осындай тәрбиесі жоғары, сапалы білімі бар маман әрқашан елдің мерейін көтере беретіні сөзсіз. Болашақта осындай ел абыройын асқақтататын, жас ұрпақты әсем өнерге баулитын жандардың қатары көп болса, ел келешегі кемелдене түспек.«Әйел бір қолымен бесікті, екінші қолымен әлемді тербеді» дейміз. Айгерім жұмысында білікті маман болса, шаңырағында аяулы келін, ардақты ана. Жолдасы Бексұлтанмен бірге ұл-қыз өсіріп отырған көпбалалы жанұя.&nbsp;

Бүлдіршіндерді би өнеріне баулыған қармақшылық жас маман

<a href="https://kyzylorda-news.kz/">Kyzylorda-news.kz</a> Адамдықтың асыл қасиеті – адалдық. Адалдықтың тамыры терең бойлап, жапырағы жайқалған мемлекетте бірліктің берекесі кіріп, елдің өркендеуі қарыштайды. Осы ретте, Президент түркінің темірқазығына айналған Түркістанда өткен «Әділетті Қазақстан – Адал азамат» атты ұлттық құрылтайда адалдық жайында өз көзқарасымен бөлісті.<blockquote>«Отанға, отбасына адалдық – парасаттылық пен адамгершіліктің белгісі. Адал еңбек етіп, адал табыс тапқан адам жетістікке жетеді, құрметке ие болады. Ұлы Абай «Адал еңбекпен мал іздемек – арлы адамның ісі» деген. Ал арлы адам әділетсіздік жасамайды. Әр салада адалдық басты орында тұрса, әділ қоғам орнайды. Жемқорлыққа жол берілмейді, ел мүддесіне сай шешім қабылданады. Бір сөзбен айтсақ, қоғамдағы ізгіліктің бәрі адалдықтан бастау алады. Ендеше, Әділетті Қазақстан және Адал азамат ұғымдары ел тірегі болатын егіз құндылық ретінде әрдайым қатар тұруға тиіс. Әділетті Қазақстанды құру үшін әрбір отандасымыз адал азамат болуға ұмтылуы қажет. Сонымен бірге жас ұрпақты адал азамат етіп тәрбиелеуіміз керек. Ұлттық бірегейлігімізді нығай¬тып, еліміздің жаңа құндылықтарын орнықтыру үшін жүйелі жұмыс жасауға тиіс», – деді Қасым-Жомарт Тоқаев.</blockquote>Жалпы, әр қоғамның адалдық пен парасаттылық жайында өзіндік түсінігі бар. Бұл қалыпты жайт. Мәселен, бұрынырақ Абай атамыз адалдықты «толық адам» десе, кейініректе «кемел адам» тіркесін көбірек пайдаланамыз. Анығында, «кемел адамның» өзі араб тілінен аударғанда толық адам деген ұғымды білдіреді. Діни көзқараста кемел адам – кісілікке жат қылықтардан тазарған, жан-дүниесі ағарып, рухани қасиеті артқан асыл адам. Адал жолды таңдаған адам әрдайым адасқандарға жол нұсқаушы, әділдікке бастаушы. «кемел адам» ұғымының арғы төркіні сонау Жүсіп Баласағұнның «Құтты білік» дастанынан тамыр тартады. Аталмыш поэзияға көз жүгіртсек, «Адал адам» ұғымы екі таным тұрғысынан жырланады. Жырдағы Күнтуды (Әділет), Айтолды (Дәулет), Огдүлміш (Ақыл) үшеуі осы өмірге қызмет етуге ұмтылған «Кемел адам» бейнесінде бейнеленеді. Демек, мемлекет басшысы көтеріп отырған «Адал адам» концепциясы ата-баба өсиетінің қайта жаңғыруы, рухани өрлеу.Иә, бүгінгі қоғамға ауадай қажеттің бірі – адалдық. Әсіресе жастарды шын-шылдыққа тәрбиелеп, туған жердің топырағына мейлінше қалтқысыз қызмет етуге баулу басты назарда. Бұл жайында облыс әкімі Нұрлыбек Мәшбекұлы да тоқталып, білім беру ұйымдарының жай-күйі туралы кеңей-тілген мәжілісте биылдан бастап өңірдің барлық мекеніндегі клубтар мен мәдениет үйлерінен жас ұрпақты отаншылдық және патриоттыққа тәрбиелейтін үй¬ірмелері бар «Адал адам» рухани-мәдени орталығының ашылатынын айтқан еді.<blockquote>– Бала тәрбиесіне тек ата-ана, мұғалім ғана емес, қоғам болып атсалысуымыз керек. Оқушылар мен жастарымызға зиялы қауымның, ақсақал-абыздарымыздың сөзі өтімді болуы тиіс. Бұрынғыдан бізге жеткен «Жастай берген тәрбие – жас шыбықты игендей», деген сөз бар. Сондықтан жастарды адалдыққа баулуы өте маңызды, – деді аймақ басшысы.</blockquote>Осы орайда, ауданда атқарылып жатқан шаралар да аз емес. Атап айтар болсақ, Манап Көкенов атындағы аудандық мәдениет үйі «Адал адам» мәдени-тәрбие орталығын жүзеге асырып, жеті бағыт бойынша түрлі шаралар ұйымдастыруда.<blockquote>– Адалдыққа сенім артқан қоғам құру – әрбіріміздің міндетіміз. Әділетті Қазақстанды құру үшін оның кез-келген тұрғыны әділетті де адал болуы керек. Біз де осы тұрғыда жұмыстар атқарып, жастардың әділдік жолынан таймауына өз үлесімізді мейілінше қосу жолындамыз. Қазір аудандағы барлық мәдениет ошақтарында «Адал адам» мәдени-тәрбие орталығының маңдайшалары ілінген. Бүгінде жоба аясында жеті түрлі тұжырымдама жасалып, сол бойын¬ша ауданға қарасты барлық мәдениет және клуб үйлерінде, кітапханаларда «Кино TIME», «Әлем BOOK», «ART уақыты», «Еріктілер тобы», «Сұхбат TIME», «Креативті НUВ», «Жанұя шуағы» ат¬ты шаралар ұйымдастырылуда, – деді М.Көкенов атындағы мәдениет үйінің директоры Ролан Бақтыбаев.</blockquote>Біз «Адал адам» мәдени орталығы аясында жасалған жеті тұжырымдамаға жеке-жеке тоқталып өтсек. Мәселен, «Кино TIME» жобасы аясында апта сайын «Ордакент» жастар және ардагерлер үйінде оқушыларға тәрбиелік мәні зор, отансүйгіштік¬ке баулитын кино көрсетіледі. «Әлем BOOK» жобасында кітапханаларда балаларды әлеуметтік желінің әлегінен арашалап, кітапқа деген құмарлығын арттыру мақсатында шаралар жүзеге асса, «ART уақыты» аясында ән айту, би билеу, сурет салу, қолөнер сынды үйірмелер ашылып, балалармен жұмыс жасалуда. «Еріктілер тобы» болса қоршаған ортаның тазалығына үлес қосып, сенбіліктерге атсалысып, жалғызбасты қарияларға көмек қолын созуда. Мұндағы мақсат, үлкенге құрмет көрсетіп, адам бойына мейірімділік пен кішіпейілдікті, адалдықты ұялату. Сонымен қоса «Сұхбат TIME» арқылы жастарды елге белгілі спикерлермен кездестіріп, өзара сұхбаттастыру арқылы олардың қоғамға деген көзқарасын қалыптастыру. Үлгі-өнеге алатын тұлғаларды кездестіру арқылы жақсылыққа жұмылдыру. «Жанұя шуағы» жобасы аясында отбасылық зияткерлік, интеллектуалдық ойындар, өнерлі, үлгілі отбасылармен кездесу кештері өтеді. «Креативті НUВ» арқылы қолөнер шеберлерінің көрмесі мен тарихи өлкелерді таныстыру жұмыстары жүзеге асуда.Ролан Еркінұлының айтуынша, аталмыш шаралар ақпан айынан бастап жүзеге асуда. «Креативті НUВ» айына бір рет өтсе, қалған жобалар апта сайын ұйымдастырылады. Тұжырымдаманың негізгі мақсаты – тұрғындардың мәдениет нысандарына қолжетімділігін арттыра отырып, балалар мен жасөспірімдерді мәдени тәрбиемен баулу. Өскелең ұрпақтың бос уақытын ұтымды пайдаланып, шығармашылықпен айналысуына жағдай жасау.<blockquote>«Айта кетейік, Мемлекет басшысы «Адал адам» концепциясының білім ошақтарына да тікелей қатысы барын нұсқап, «Балалар арасында жалпы адамзаттық және ұлттық құндылықтарды дәріптеген абзал. Оқушылар мектеп бітіргенде, ең алдымен, Адал азамат болып шығуы керек», – деді ол.</blockquote>Әділеттілік пен адамгершілікті баланың бойына мектеп жасынан сіңіртіп, олар¬дың болашақта адал еңбекпен елге қызмет етуін бала жастан қамтамасыз ету. Өмірдің ащысы мен тұщысын әлі сезіне қоймаған, ақ қағаздай таза беттен басталатын жас ұрпақтың санасына адалдықты мызғымас алмастай етіп құю маңызды.<blockquote>– Жалпы, қазақ халқы қашанда адалдықты ту еткен. Баланы да адал¬дық пен адамдыққа тәрбиелеуге күш салған. Қоғамның дамуына сай әр оқушының өнегелі тәрбиесі мен білім алуы, оның алған білімін тура жолда жұмсауы өте маңызды. Осы тұста, біздің мектеп те оқушыларға «Адал адам» концепциясы бойынша «Кино Time» тұжырымдамасымен Қалила Омаров¬тың деректі фильмдерін көрсетудеміз.Сонымен қоса, «Жанұя шуағы» аясында «Аналар мектебі» мен «Әкелер кеңе¬сі» құрылып ата-аналармен тығыз жұмыс жасаудамыз. Мұндағы мақсат - балаларды өмір жолында қателеспей тура жүріп, адал еңбек етуге тәрбие¬леу. Жоба төңірегінде түрлі шаралар мен қойылымдар қойып, әр адамның бойында, ең бастысы мейірімділік пен парасаттылықтың, адалдықтың табылуы маңызды екенін әр балаға тереңнен түсіндіруге жұмыс жасаудамыз. Әсіресе, ата-анаға, ұстазға, айналасына құрмет көрсетуді, әр істі бастағанда тек адал жолмен жүруді бала күннен үйретсек өскенде ол баладан нағыз еліне адал азамат шығарына сеніміміз мол, – дейді №286 орта мектептің тәрбие ісі жөніндегі орынбасары Гүлнар Пернебекова.</blockquote>Адам бағасының өлшемін өлшейтін қасиет – адалдық. Ол қашанда санамызда сайрап, тұла бойымызға берік бекісе, біз бағындырмайтын белес болмайтыны анық. &nbsp;Демек, адал адам – әділетті қоғамның тірегі. &nbsp;

Жаңақорғанда «Адал адам» жобасы жүйелі жүргізіліп жатыр

<a href="https://kyzylorda-news.kz/">Kyzylorda-news.kz</a>&nbsp; Соңғы жылдары Сыр өңірінде театр саласы жанданып, жаңа есімдер ел жадында сақталуда.&nbsp;Әсіресе, шығармашылық еркіндік пен кәсіби шеберлік арқылы күрделі образды ашуға жүрексінбейтіндер жетерлік. Солардың бірі – Нартай Бекежанов атындағы облыстық қазақ академиялық музыкалық драма театрының әртісі Жауһар Еркінова. Ол жуырда «Raiymbek Fest» I республикалық театр фестиваліне қатысып, «Ең үздік әйел бейнесі» номинациясын еншіледі. Осы орайда талантты жаспен тілдесіп, театр төңірегіндегі ой-пікірін сұраған болатынбыз.<h2 style="margin-left:0cm;text-align:center;">«Жанар – күрделі бейне»</h2>Өнер тарланы Райымбек Сейтметовтің есімі театр саласында құрметке ие. Тұлғаның атына Түркістан төрінде өткізілген фестивальге қатысуды құп көріп, өнер көрсетуге де ол кісінің шығармашылық жолы шабыт берді. «Raiymbek Fest» I республикалық театр фестиваліне қырғыз драматургы Сұлтан Ыбырайымовтың «Ақ Ләйлек» лирикалық драмасын сахналадық. Мен Жанар рөлін ойнап, сыншылар шешімімен «Ең үздік әйел бейнесі» деген номинацияны иелендім. Көрермендер де образдың ашылуы мен спектакль мазмұнына оң баға берді. Бұл – менің ғана емес, театрдың ортақ табысы. Жалпы, мен сомдаған Жанар образы – күрделі бейне. Болмыс-бітіміме ұқсас та, жат та тұсы көп. Әсіресе қойылымның екінші бөлігінде кейіпкерім күрт өзгеріске ұшырап, психологиялық бейнесі күрделене түседі. Ішкі арпалыс, жан айнасы құбылады. Кейіпкерді ұға білу маңызды. Міне, сондай түрленген бейнені қатар сомдау қиынның қиыны.<h2 style="margin-left:0cm;text-align:center;">«Әріптестердің көмегі зор»</h2>Өнер жолындағы жемісті жолым Нартай Бекежанов атындағы Қызылорда облыстық қазақ академиялық музыкалық драма театрымен тығыз байланысты. Мұндағы ұжым мен алдыңғы буын әріптестердің ықылас-ниеті, ақыл-кеңесі өмірде де, өнерде де бағдар болды.Театрға келгеніме 2-3 жыл болса да жетекші әртістерден өнеге алдым. Сол аралықта Қазақстанның еңбек сіңірген қайраткері Хұсейін Әмір-Темір, Зәлипа Төлепова секілді тәжірибе мен білім тоғыстырған ұстаздар және Алмагүл Артықбаева, Ақтолқын Төлеуова сынды білікті мамандардан үйренгенім көп. Олар шеберлік шыңдап, кәсіби жетілуге барынша қолдау білдіргенін айта кеткен жөн. Ке­йіп­кердің мі­нез-құлқын ашуға септесіп, шынайы эмоцияны дөп басуға ықпал ете білді. Фестиваль барысында сахналаған қойылымды жоғары дәрежеде өткізуге де жәрдем етті.<h2 style="margin-left:0cm;text-align:center;">«Жастар театрға бармайды деген жалған сөз»</h2>Сыр жастарының өнерге көзқарасы қуантады. Театр құра­­мының жас өнер­паздармен толығуы сөзімізге дәлел болары анық. Әрбірі өзіндік жолын қа­лыптас­тырып, көрер­менін та­уып, ке­йіп­кер бейнесін ашуда жемісті еңбек&nbsp;етуде.Көрермендерге келер болсақ, ондағы жас ерек­шелік құ­был­малы. Алайда соңғы уақытта ЖОО студенттерінің қойылымға келуі үдеді. Сыр жастары театрға бармайды деген жалған сөз. Бір қуанарлығы, мұғалімнің тапсырмасы емес, өз еркімен өнер тамашалауға қызығатын буын қалыптасты. Тіпті топтастармен жиналып, қойылымды бірге талқылайтын жас көп. Бұл театр өнерінің болашағын айқындары сөзсіз.

Сырбойылық «Ең үздік әйел бейнесі» номинациясының иегері атанды

<a href="https://kyzylorda-news.kz/">Kyzylorda-news.kz</a> &nbsp;Бүгін «Қараөзек ауылдық клубы» МКҚК-ның ұйымдастыруымен халқымыздың ақын қызы Фариза Оңғарсынованың 85 жылдығына арналған «Фариза жыры - поэзия сыры» атты әдеби-сазды кеш өтті. &nbsp; Фариза Оңғарсынова еліміздегі нәзік жанды жазба ақындарының ішіндегі шоқтығы биік тұлға. Оның жазған өлеңдерінен өрлік пен ерліктің сыршыл сұлулықтың, ұлылықтың сырын ұғуға болады. Оның отты жырлары ұлттың қуанышы да, жұбанышы да болған. Ақын қыз шығармаларында әйел тақырыбы жиі қозғап, қоғамның ащы шындығын бүкпесіз жырлай білген. Халқы оны осы үшінде ерекше құрмет тұтқан. Шарада Фариза Оңғарсынованың шығармашылығы мен өмір жолына арналған бейнематериал көрсетілді. Сондай-ақ, ақынның өлеңдері, шығармалары оқылды.&nbsp; Қайсар рухты ақын қыздың өлеңдеріне сазгерлер ән жазған. Әдеби кеште ақын сөзіне жазылған әндер де жиылған жұртшылыққа жол тартты.&nbsp; Сонымен қатар, кеште мәдениет саласының ардагері Жібек Әбдіжәлелова ауылдың оқушы жастарына ақынның шығармашылығы жтуралы кеңінен &nbsp;баяндап берді. Ал №10 кітапхана меңгерушісі Досмырзаева Мираш арнайы кітап көрмесін ұйымдастырып, көпшілікке таныстырды.&nbsp; Әдеби-сазды кешке жиналған ауыл тұрғындары мен жастар, оқушылар рухани демалып, ақын шығармашылығымен танысып қайтты.

Қараөзекте "Фариза жыры - поэзия сыры" атты кеш өтті

<a href="https://kyzylorda-news.kz/">Kyzylorda-news.kz</a> Өнердің түр түрі болса, театр сол өнерлердің ішінде ең киелісі, қадірлісі.&nbsp;Театрдың тарихы тереңде және әр заманда жоғары бағаланады. Қазақ сахнасының да қазаны қайнап, көрермені жыл санап артуда.Өткен жылы Нартай Бекежанов атындағы Қызылорда облыстық Қазақ академиялық музыка театры айрықша қойылымдардың премьерасын халыққа ұсынды. Үсен Рамазанның режиссерлық бастамасымен «Шырмауық » атты Ахмет Ақмоншақтың психодрамалық моноспектаклі көрерменге жол тартты. Театрдың репертуары өзге де қойылымдармен толысып, балаларға арналған жаңа спектаклдерін паш етті. Атап өтсек, Шыңғыс Айтматовтың 95 жылдық мерейтойына орай «Жәмила» драмасы, Оңталап Нұрмахановтың «Көрғұлы» рухнамасы, Ақберген Елгезектің «Болмаған балалық шақ» драмасының премьерасы халық назарына ұсынылды. Алтын қор тек бұл қойылымдармен толығып қоймай, Сыр сахнасында басқа да спектакльдердің тұсауы кесілді. Сәуір айының 4-і Н.Баймаханның «Үйлену оңай…» атты ерекше форматтағы спектаклі халыққа жол тартады. Сондай-ақ театр балаларға арналған Е.Шварцтың «Күлше қыз» атты қойылымын тамашалауға шақырады.<blockquote>– Театр өнері нақты пайда табуға бағытталған сала емес. Тазалықты, шынайылықты талап ететін ерекше дүние. Дүйім жұрттың алдында белгілі бір рөлді сомдап шығу үлкен жауапкершілік. Бізде қазір жастар да бар, оларға бағыт-бағдар беретін орта буын да бар. Барлығы да осы бір өнерге адал болып, ел-халықтың алдында жоғары деңгей көрсетуде. «Бұлақ көрсең көзін аш» дегендей ізімізді басып келе жатқан жастардың әр жетістігіне тілекші болып, қуанып отырамыз, – деді режиссер, Қазақстанның еңбек сіңірген қайраткері Хұсейін Әмір-Темір.</blockquote>Көрерменнің көңілін толқытып, ойға жетелеген қойылымның бірі – «Болмаған балалық шақ».<blockquote>– Өзіме ұнайтын бірнеше рөлдерім болды. Онымен қоса сомдағым келген өзге де образдар аз емес-ті. Ал тосыннан ұсыныс түсіп, актерлық мансабымда маған қатты жақын болған кейіпкер Ақбергеннің рөлінде ойнау бұйырды. Лезде образды барынша ашу үшін кейіпкерімді «оқи» бастадым. Процесс барысында бұл баланың жан дүниесіне үңіліп, оның бастан кешкен тағдырын өз өмірімде өткізе бастағандай сезіндім. Табиғатынан ерекше Ақбергенге жаным ашып, көрген қиыншылығын мейлінше халыққа жеткізгім келді. Шынымды айтсам, «сахна әртістері образдан шыға алмай қалады» деген ұғымды осы кезде бастан кешкендей болдым. Бұл драманың қойылымы бірнеше айлар бұрын өтіп кетсе де, кейіпкерімді әлі күнге дейін сезінемін. Қорғағым келетін інім секілді. Ал спектакльді сахналайтын сәтте сол інімнің артына тұра қалатындаймын, – дейді «Болмаған балалық шақ» драмасының басты кейіпкері, актер Ердәулет Мәму.</blockquote>Облыстық театрдың биылғы жоспары – «Сыр әзілі» әзіл-сықақ бағдарламасының тұсауын кесіп, халыққа ұсыну. Сондай-ақ театр ұжымы Т.Жүргенов атындағы Қазақ Ұлттық Өнер академиясында шығармашылық тәжірибе алмасуды жоспарлап отыр. Театрдың жаңа репертуарымен Алматы, Байқоңыр қалалары және ауылдарға гастрольдік сапарға аттанбақ.Оңталап Нұрмахановтың бастауымен 2016 жылы «Жастар театры» құрылып, үйірме ретінде жұмыс істеп келді. 2024 жылдан бастап кәсіби театр ретінде өз жұмысын бастады. Мұндай театр еліміздің тек бірен-саран аймақтарында ғана бар. Бүгінде театр ұжымы халық арасында тағылымы терең спектальдерді сахналап жүр. Жастар театрының ұжымы республикалық, облыстық, қалалық дәрежеде өнер көрсетіп, беделді марапаттарды иеленді. Ағымдағы жылдың қаңтар айынан бастап жаңа өнер ордасының директоры Нұрмат Мансұров болып тағайындалды.<blockquote>– Жалпы Қазақстанда 5 мыңға тарта ауыл болса, оның 4 мыңға таяуында мәдениет үйі бар. Ал айналасы 70-ке жетер-жетпес театр бар. Бұл театр жұмысының ауырлығын, театрды құрудың қиындығын білдіреді. Осы бір ауыр міндетті қолға алуға бел буған Қызылорда қаласының жастары да үлкен жолға түсті. Енді-енді бастап, жүргелі тұрған жұмыс жетерлік.Бізде шешілмеген мәселе көп. Солардың ең үлкені – актерлық құрам құру. Қазір біз осы аталған актерлар труппасын құру үстіндеміз. Бұрын ұжым мүшесі болған жастар қазір өзге театрларда. Солардың орнын толтыру үшін жаңа жас таланттарды іздестеріп жатырмыз. Бізде аймақ берген штаттық мүмкіндіктер бар. Сондықтан актерлықты оқып жатқан студенттерге агитация жұмыстарын жүргізудеміз.Жас театр екенбіз деп қол қусырып отырған жоқпыз. Ақпан айында «Оң қол» атты Т.Әбдіктің үлкен шығармасын сахналадық. Қағазға сөзін түсіріп, сценарийін жазған Жастар театрының жас драматургі Нұрдәулет Баймахан. Ал режиссерлық шешімдермен толықтырған Берік Ахмет. Қойылымның тақырыбы ауқымды болған соң, «автордың ойынан тайқыды» деген секілді сыннан қашып құтылмадық. Десек те, режиссер мен драматургтің қызметі – туындыны өзіндік идеямен ерекше етіп, көрерменге айрықша етіп ұсыну. Албырт пікірлерге қарамастан, қалың халық «Оң қол» қойылымының тағы да сахналануын асыға күтуде. Бұл шығарма заманның шындығы болған соң көрерменнің құрметіне ие болды.Гастрольдік сапарлар туралы айтар болсақ, іргемізді нықтап, қазығымызды нық қаққан соң, алдағы уақытқа жоспарлап отырмыз. Ол күннің де ауылы алыс емес. Биыл аймаққа қарасты ауылдарды аралап, өнер көрсеткіміз келеді, – дейді Жастар театрының директоры Нұрмат Абдоллаұлы.&nbsp;</blockquote>Университет қабырғасында жүрген жас шәкірттер де өнерден қалыс емес.&nbsp;Қорқыт ата атындағы Қызылорда университетінің студенттері де көрерменнің сүйіктісіне айналып үлгерді.Университет жанынан құралған «Жауқазын» студенттік жастар театры бірнеше спектальді сахналап, көптің қошеметіне ие болып жүр. Студенттік театр бүгінге дейін Мұқағали Мақатевтың «Қош, махаббат» драмалық поэзиясын сахналап, сонымен қатар Әбіш Кекілбаевтың «Махаббат мұнарасы» атты шығармасы, Исраил Сапарбайдың «Сыған серенадасы» музыкалық спектаклі халыққа жол тартты. Көпшіліктің ілтипатына бөленген қойылымдар әрбір студенттің театрға деген қызығушылығын арттырды. 2024 жылдың ақпан айында «Шәмші сүйген Изольда», наурыз айында «Қаракөз» трагедиялық спектакльнің тұсауын кесіп, студенттік театрдың алтын репертуары жаңа қойылымдармен толысуда.<blockquote>– Қазір студенттік театр қарқынды жұмыс істеуде. Жылына 2 рет кастинг өткізіледі, ал ұжымда 30-дан астам адам бар. «Жауқазын» театрының ең алғаш жасақталған командасы әлі күнге дейін шашырамаған. Тек қана университет қабырғасындағы шәкірттермен шектеліп қоймай, колледж, мектептерден үйірмемізге мүшелік ететіндер бар. «Жауқазынға» қызығушылық танытқан барша жанға театр мүшесі болуға мүмкіндік бар.Аға-буын өкілдері облыстық драма театрдың барлық спектакльдерін үзбей көріп, тәжірибе жинақтап, шыңдалуға тырысамыз. Сондай-ақ театрымыздың әрбір мүшесі ізденіс үстінде жүреді. Ән, би, қойылым, концерттік киімдерге дейін ұқыптылықпен қарап, сахна мәдениетін тереңінен ұстануға бейімбіз. Алдағы уақытта арнайы мамандармен біріге жұмыс істеуді жоспарлап отырмыз, – деді «Жауқазын» студенттік жастар театрының төрағасы Ақниет Мәулен.</blockquote>Қазақтың киелі сахнасы ешқашан қадірін жоғалтпайтыны анық.&nbsp;&nbsp;Коллаж: kyzylorda-news.kz

Сыр театрының ұжымы Алматы, Байқоңыр қаласы және ауылдарға гастрольдік сапарға бармақ

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp;Театр – қиын сала. Олай дейтін себебіміз, әртіс сахнада, көрерменнің көз алдында ойнауы тиіс. Көрерменге түрлі эмоцияны тікелей сезіндіре алуы керек.&nbsp;Театр – өнерпаздарды бір шаңырақ астына біріктіріп, бір отбасындай жақындастыратын шаңырақ. «Әдебиет пен өнер ұлы болмаған жерде ұлт та ұлы болмайды» дейді Ғабит Мүсірепов. Сан түрлі өнердің ішінде театр өнері, театр мәдениетінің орны бір төбе. Сахнада өмір көріністерін драмалық әрекеттер арқылы көз алдыңа келтіретін театр өнері – қоғамдық ой-сананың шарықтау шегі мен адами дүниетанымның жемісі.Бұрнағы күні Халықаралық театр күніне орай Сырдария аудандық мәдениет үйінде «Өмірдің өзі – театр» атты іс-шара өтті. Мерекелік жиынға мәдениет және спорт бөлімінің инспектор меңгерушісі Ж.Төрәлиев, театр майталмандары мен аудан өнерпаздары қатысты.– Театр – барлық өнердің жиын­тығы, бір ғана қойылымда ән де, күй де, дәстүр де, ұлттық ұранды ұлықтату да тоғысады. Киелі өнердің алғашқы бастауы – грек елінен басталса, өнердің өрнегі қазақ елінде ең алғаш рет біз тұрған киелі сахнадан басталғанына уақыттың өзі куәгер.&nbsp;Театр – тәрбие бесігі. Көрнекті жазушы Ғабит Мүсіреповтің «Театр – хас сұлудың көз жасындай мөлдір өнер» деп баға беруі де тегін болмаса керек. Мәдениет пен руханият әлемін театрсыз елестету әсте мүмкін емес, – деген Жеңісбек Үсенұлы театр өнеріне қосқан үлестері үшін бірқатар өнерпазды марапаттады.<blockquote>Атап айтар болсақ, Сырдария аудандық мәдениет үйі жанындағы «Олжа» Халық театры облыстық кәсіподақ төрайымы­ның «Алғыс хатына» ие болды. Сонымен қатар, театр саласында өзіндік орны қалыптасқан мәдениет саласының ардагері, белгілі режиссер Рахия Әбду­каримова, аудандық мәдениет үйінің директоры Нұрхан Көшербаев, мәдениет үйінің әдіскері, театр мүшесі Гаухар Сәрсенбаева, мәдениет үйі басшысының орынбасары Азиз Садықов, Айдарлы халық театры­ның мүшесі Орынбай Оспанов, аудандық мәдениет үйі жанын­дағы халық театрының режиссері Дәулет Асанов, халық театрының суретшісі Жәнібек Әбдіреев аудан әкімінің «Алғыс хатымен» марапатталып, мерейі артты. Сонымен қатар, мәдениет саласының өркен жаюына өзіндік үлесін қосып жүрген өнерпаздар Алмат Өтеуов, Абзал Молдашев, Мақсұт Әбсадықов, Ербол Медет, Дастан Палмахов, Динара Жәкешова, Мөлдір Серікбай, Толғанай Қашақова, Ақбота Талғатова, Бақытжан Әлтаев, Сұңғат Раушанбеков, Бақытжан Беккулиев, Ержан Жүнісов, Нұрила Кенесары, Ерхан Қалуадинов, Ербол Бекжүнісов аудан әкімі орынбасарының «Алғыс хатымен» марапатталды.</blockquote>

Қазақстан және Қызылорда облысының жаңалықтары: Мәдениет