<a href="https://kyzylorda-news.kz/">Kyzylorda-news.kz</a> Туризм және спорт министрі Ербол Мырзабосынов жуырда Өзбекстан астанасы Ташкент қаласында өткен таеквондодан (WT) юниорлар арасындағы әлем чемпионатының жеңімпаздары мен жүлдегерлерімен кездесті.Кездесу барысында министр спортшыларды жоғары жетістіктерімен құттықтап, олардың жеңісі ел мерейін үстем ететін маңызды нәтиже екенін атап өтті.&nbsp;<blockquote>«Әлем чемпионатындағы жарқын жеңістеріңіз – барша еліміздің мақтанышы. Сіздердің табандылықтарыңыз бен қажырлы еңбектеріңіз халықаралық аренада Қазақстанның беделін арттыруға зор үлес қосты», – деді министр.</blockquote>Өзбекстанда өткен таеквондодан (WT) юниорлар арасындағы әлем чемпионатында отандасымыз Айым Серікбаева әлем чемпионы атанды. Бұл нәтиже отандық спорт үшін тарихи маңызға ие. Бұған дейін еліміздің өкілі осы жас санатында соңғы рет 2006 жылы Жалғас Бекқасымов әлем чемпионы атанған болатын. Араға 20 жыл салып, бұл жетістікті Айым Серікбаева қайта жаңғыртты. Чемпионат қорытындысы бойынша Айым Серікбаева «Үздік спортшы» атағына ие болды.Сондай-ақ юниорлар арасындағы әлем чемпионатында Ерасыл Ерзат, Ислам Медетбай, Алидар Әбдікәрімов және Әділет Шері қола жүлдегер атанып, ел қоржынына жүлде салды.Кездесу барысында министр спортшылардың табысты өнер көрсетуінде жаттықтырушылардың еңбегі зор екенін атап өтіп, олардың кәсібилігі мен жүйелі жұмысы жоғары нәтижелерге жол ашқанын жеткізді.<blockquote>«Федерация басшылығының, жаттықтырушылар құрамының кәсіби біліктілігі мен жүйелі еңбегінің арқасында осындай жоғары нәтижелерге қол жеткізіліп отыр. Сіздердің еңбектеріңіз жас ұрпаққа үлгі болары сөзсіз», – деді Ербол Мырзабосынов.</blockquote>Жиын соңында Туризм және спорт министрлігі мен Қазақстан таеквондо федерациясы атынан спортшылар мен жаттықтырушылар марапатталып, оларға Құрмет грамоталары мен Алғыс хаттар табысталды.

Таеквондодан әлем чемпионатының жеңімпаздары мен жүлдегерлерін қабылдады 

<a href="https://kyzylorda-news.kz/">Kyzylorda-news.kz</a> Қызылордада «Жайдарман» ойындарының финалдық кезеңі өтіп, жеңімпаз команда анықталды.Аталған жобаға Қызылорда облысы бойынша Экономикалық тергеп-тексеру департаменті маусым басталғалы бері тұрақты түрде қолдау көрсетіп, оның мазмұндық бағытын нығайтуға үлес қосты. Финалдық кезеңде Департамент өкілдері де қатысып, қатысушылардың өнерін тамашалады. Жалпы маусым басталғалы жобаға 30 команда, 400-ден астам жас қатысып, өз өнерлерін ортаға салды. Финалға 5 команда қатысып, өзара тартысты ойын өрнегін көрсетті.Биылғы маусым «Заң мен Тәртіп» тақырыбына арналды. Қатысушылар сахнада әзіл мен сатира арқылы қоғамдағы маңызды мәселелерді көтеріп, көрерменге ой салды. Атап айтқанда, алаяқтық, қаржы пирамидалары және құмар ойынға тәуелділіктің зияны сынды өзекті тақырыптар &nbsp;қамтылды.«Жайдарман» – жастардың шығармашылық әлеуетін дамытумен қатар, олардың азаматтық ұстанымын қалыптастыруға бағытталған маңызды алаң. Осылайша, жоба тағы бір мағыналы маусымды сәтті қорытындылады.Мұндай жобалар алдағы уақытта да тоқтамай, жастардың шабытын ашуға, көрерменге ерекше әсер қалдыру үшін ұйымдастырылатын болады.

Заң мен тәртіп: Қызылордада «Жайдарман» ойындарының жеңімпаздары анықталды

<a href="https://kyzylorda-news.kz/">Kyzylorda-news.kz</a> Ағымдағы жылдың 21 сәуір күні Астана қаласында Қазақстан Республикасы Премьер-Министрінің орынбасары, Ұлттық экономика министрі С.Жұмангарин және Моңғолия Премьер-Министрінің бірінші орынбасары, Моңғолияның Экономика және даму министрі Ж.Энхбаярдың қатысуымен «Қазақстан–Моңғолия» бизнес-форумы өтті.Аталған іс-шара Моңғолия Президенті У. Хурэлсүхтің ресми сапары аясында ұйымдастырылды. Форумға моңғолиялық және отандық кәсіпкерлер, оның ішінде жүн мен тері өңдеу саласының өкілдері қатысты.Бизнес-форум аясында өңірдің инвестициялық және агроөнеркәсіптік әлеуеті баяндалды. Қызылорда облысы мал шаруашылығы дамыған өңірлердің бірі болып табылады. Өңірде мал басының тұрақты өсуі және ет, сүт өнімдері өндірісінің артуы байқалады.Өңірдің жүн және тері бағытындағы зор шикізаттық әлеуетін ескере отырып, аталған салада терең өңдеу өндірістерін кеңейтуге кең мүмкіндіктер бар.Қазіргі таңда облыста бірқатар инвестициялық жобалар жүзеге асырылуда. Атап айтқанда, Арал ауданында «Qazaq Camel» ЖШС тарапынан түйе сүтінен құрғақ ұнтақ өндіру жобасы іске асырылуда.Жобаның құны 3 млрд теңгені құрайды, жылдық қуаттылығы 392 тонна. Өнімді Қытай нарығына экспорттау бойынша 10 жылдық оффтейк-келісім жасалған.Сонымен қатар, Арал ауданында «Тоғыс-Аралотын» ЖШС жүн мен теріні өңдеу бойынша инвестициялық жобаны жүзеге асыруда. Қазіргі таңда өндірісті іске қосу үшін қажетті жабдықтар жеткізілуде.Бұдан бөлек, өңірде құны 7,5 млрд теңгені құрайтын 700 басқа арналған тауарлы-сүт фермасының құрылысы жүргізілуде. Форум барысында тараптар жүн және тері өңдеу саласында ынтымақтастықты дамыту, озық технологиялар енгізу және тәжірибе алмасу мәселелерін талқылады.Жалпы, аталған бизнес-форум Қазақстан мен Моңғолия арасындағы сауда-экономикалық ынтымақтастықты одан әрі нығайтуға және бірлескен жобаларды іске асыруға жаңа серпін береді.<img src="https://knadmin.beoblood.kz/uploads/yzylorda_Mo_oliya_yntyma_tasty_18e1512a0c.jpg" alt="Қазақстан-Моңғолия ынтымақтастық.jpg">

Бизнес-форумда Қызылорда облысының инвестициялық және агроөнеркәсіптік әлеуеті таныстырылды

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалы жанындағы Сыбайлас жемқорлыққа қарсы іс-қимыл жөніндегі аймақтық кеңестің кезекті отырысы өтті.Жиынды кеңес төрағасы Мақсұт Ыбрайханұлы Нәлібаев жүргізді. Отырысқа партияның облыстық филиалының төрағасы Жандос Базартай,кеңес мүшелері, сондай-ақ күн тәртібіндегі мәселеге жауапты мемлекеттік органдар мен мекемелердің басшылары қатысты.Жиында жол қауіпсіздігін қамтамасыз ету және жол-көлік оқиғаларының алдын алу мәселесі қаралды. Аталған тақырыптың өзектілігі ерекше атап өтіліп, бұл бағыттағы жұмыстарды күшейту қажеттігі айтылды. Әсіресе, облыс аумағынан өтетін «Батыс Қытай – Батыс Еуропа» халықаралық автодәлізіндегі қауіпсіздік мәселесіне баса назар аударылды.Күн тәртібіндегі мәселелер бойынша Қазақстан Республикасы Көлік министрлігі Автомобиль көлігі және көліктік бақылау комитетінің облыс бойынша көліктік бақылау инспекциясының басшысы Ербол Талекенов, «ҚазАвтоЖол» ҰК» АҚ облыстық филиалының директоры Жасұлан Керімқұлов және &nbsp;Қызылорда ОПД ӘПБ бастығының орынбасары полиция подполковнигі Нұркен Бақтияров баяндама жасады.Отырыста партия филиалының төрағасы Базартай Жандос Нұртайұлы жол-көлік оқиғаларының санының артуы алаңдаушылық туғызатынын атап өтіп, соңғы жылдары республика бойынша жол апаттары айтарлықтай көбейіп, зардап шеккендер санының өскенін айтты. Әсіресе, өңірлер арасында Қызылорда облысында бұл көрсеткіштің жоғары болуы мәселенің өзектілігін күшейте түседі. Осыған байланысты жол қауіпсіздігін қамтамасыз ету, алдын алу шараларын күшейту және жауапты мекемелердің үйлесімді жұмысын арттыру қажеттігіне баса назар аудару керек екенін тілге тиек етті.<blockquote>«Облыста жол қауіпсіздігін қамтамасыз ету және жол-көлік оқиғаларының алдын алу бағытында заманауи автоматтандырылған бақылау жүйелері кеңінен енгізілуде. Бүгінде әкімшілік құқық бұзушылықтарды автоматты түрде тіркейтін құрылғылар саны 124-тен 183-ке дейін көбейтіліп, 47,6%-ға артқан. Сонымен қатар, «ПЦ ЕРАП» жүйесімен біріктірілген «Интеллектуалды қиылыс» құрылғыларын орнату жұмыстары жүргізілуде. Бұл шаралар жол қозғалысын бақылауды күшейтіп, құқық бұзушылықтардың алдын алуға және жол қауіпсіздігін арттыруға мүмкіндік беруде.»-деді Қызылорда ОПД ӘПБ бастығының орынбасары полиция подполковнигі Нұркен Бақтияров.</blockquote>Инспекция басшысы Ербол Тәлекеновтың айтуынша Қызылорда облысы бойынша көліктік бақылау инспекциясы автомобиль, теміржол және су көлігі салаларында бақылау-қадағалау жұмыстарын тұрақты түрде жүзеге асыруда. 2025–2026 жылдар аралығында мыңдаған әкімшілік құқық бұзушылық анықталып, айыппұлдар өндірілген, мемлекеттік қызметтер толық көлемде көрсетілуде. Сонымен қатар, ауыр жүк көліктерін бақылау үшін автоматтандырылған өлшеу станциялары орнатылып, жол қауіпсіздігін арттыру бағытында нақты шаралар қабылдануда. Инспекцияда сыбайлас жемқорлықтың алдын алу мақсатында ішкі бақылау күшейтіліп, ашықтық пен заңдылықты қамтамасыз етуге бағытталған жүйелі жұмыстар жүргізілуде.Жиын барысында саладағы өзекті мәселелер талқыланып, жауапты мекемелерге нақты міндеттер жүктелді. Сонымен қатар, ұсыныстар мен пікірлер айтылып, алдағы жұмыстарды үйлестіру бағыттары айқындалды.

"AMANAT": Жол қауіпсіздігі мен жол-көлік оқиғаларының алдын алу мәселесі талқыланды 

<a href="https://kyzylorda-news.kz/">Kyzylorda-news.kz</a> Елордада өтетін RES 2026 халықаралық экологиялық саммитіне қатысу үшін бірқатар мемлекет басшылары мен үкімет өкілдері Қазақстанға келді, деп хабарлайды ҚР Үкіметінің баспасөз қызметі.<img src="https://knadmin.beoblood.kz/uploads/zbekstan_Prezidenti_927c72df48.jpg" alt="Өзбекстан Президенті.jpg">Шараға Өзбекстан Президенті Шавкат Мирзиёев, Әзербайжан Премьер-министрі Әли Асадов және Грузия Президенті Михаил Кавелашвили қатысады. Саммит 22-24 сәуір аралығында өтеді.<img src="https://knadmin.beoblood.kz/uploads/Lidery_stran_prodolzhayut_pribyvat_v_Astanu_na_ekologicheskij_sammit2_70777f62e7.jpg" alt="Лидеры стран продолжают прибывать в Астану на экологический саммит2.jpg">– Халықаралық RES 2026 экологиялық саммиті аясында мемлекеттер арасындағы экологиялық ынтымақтастықты нығайту және тұрақты даму мәселелері талқыланады, – делінген ресми ақпаратта.<img src="https://knadmin.beoblood.kz/uploads/Lidery_stran_prodolzhayut_pribyvat_v_Astanu_na_ekologicheskij_sammit1_f306471ddf.jpg" alt="Лидеры стран продолжают прибывать в Астану на экологический саммит1.jpg">Ауқымды іс-шара барысында қоршаған ортаны қорғау, климаттық өзгерістерге қарсы іс-қимыл және «жасыл» технологияларды дамыту бағыттары күн тәртібіне шығарылады.Фото: gov.kzҚР Үкіметі

RES 2026 саммиті: Астанаға бірқатар ел басшылары келді

<a href="https://kyzylorda-news.kz/">Kyzylorda-news.kz</a> Роза Бағланова атындағы Қазалы аудандық мәдениет орталығында Нартай Бекежанов атындағы облыстық музыкалық драма театрының «Болмаған балалық шақ» атты тағылымы мол қойылымы сахналанды. Жазушы Ақберген Елгезектің тағылымды туындысын қазалылық көрермен жылы қабылдап, өнер ұжымының шеберлігіне зор ризашылығын білдірді.Қойылым кешінде аудан әкімінің орынбасары Дәурен Тілеумбетов сөз сөйлеп, театр ұжымына аудан әкімі Алмасбек Есмахановтың ыстық ықыласы мен алғысын жеткізді.<img src="https://knadmin.beoblood.kz/uploads/Bolma_an_balaly_sha_spektakli_33338ed45d.jpg" alt="Болмаған балалық шақ спектаклі.jpg"><blockquote>- Ежелден өнер қонған, ән мен жырмен тербелген, тарихы тағылымға толы Қазыналы Қазалы жеріне қош келдіңіздер! Бүгін сіздердің ауданымызға арнайы гастрольдік сапармен келіп, көрермен назарына «Болмаған балалық шақ» атты тағылымы терең қойылымды ұсынуларыңыз – біздің өңіріміз үшін үлкен рухани олжа, мәдени өміріміздегі айтулы оқиға. Сахна төрінде адам жанының нәзік иірімдерін бейнелейтін, жүрекке жол табатын осындай туындылар көрерменді ойландырып қана қоймай, қоғамдағы өзекті мәселелерге бейжай қарамауға үндейтіні анық. Бүгін ұсынылып отырған «Болмаған балалық шақ» атты &nbsp;қойылым – тағдыр мен тағылым, өмір мен үміт жайлы терең ой қозғайтын туынды. Мұндай шығармалар жас ұрпақтың тәрбиесіне оң ықпал етіп, адамгершілік құндылықтарды насихаттауда ерекше маңызға ие. Сіздердің осы бағыттағы еңбектеріңіз – ел руханиятына қосылған зор үлес деп білеміз. Нартай Бекежанов атындағы театр – Сыр өңірінің ғана емес, бүкіл қазақ өнерінің мақтанышы. Осы киелі сахнаның абыройын асқақтатып жүрген сіздерге алғысымыз шексіз. Алдағы уақытта да ұлттық өнерімізді ұлықтап, көрермендеріңізді мазмұнды, тағылымды қойылымдармен қуанта бересіздер деп сенеміз. Қазалы жұртшылығының ықыласы әрдайым сіздермен бірге - деді, Дәурен Оңғарбайұлы.</blockquote>Қойылымда тағдыр тауқыметін ерте тартқан баланың мұңы мен жан жарасы, балалық шақтың ауыр көріністері шынайы бейнеленді. Шығарма арқылы жиылған көрермен өмірдің қиындығына мойымай, үміт пен сенімнің құндылығын ұғынды. Терең психологиялық иірімдерге құрылған қойылым адам жанының нәзік болмысын әсерлі жеткізіп, көпшілікті тебірентті.Қойылым соңында Нартай Бекежанов атындағы облыстық академиялық музыкалық драма театрының өнерпаздары қазалылық көрермендердің ыстық ықыласы мен зор қошеметіне бөленді.

Өнер ұжымы қазалылық тұрғындарға ерекше әсер сыйлады

<a href="https://kyzylorda-news.kz/">Kyzylorda-news.kz</a> Бүгінгі Үкімет отырысынан кейін облыс әкімінің төрағалығымен мәжіліс өтіп, инклюзивті саясатты іске асыру мәселелері талқыланды. Бұл жиындағы міндеттер бойынша қала әкімдігінде шаһар басшысы Нұржан Ахатов тиісті сала жетекшілеріне бірқатар тапсырмалар жүктеді.&nbsp;Инклюзивті саясаттың 2025–2030 жылдарға арналған тұжырымдамасын іске асыру, мүгедектікті белгілеу рәсімдерін цифрландыру және қолжетімді кедергісіз орта құру бүгінгі таңдағы басты мәселенің бірі. Бұл бағытта қалада жүйелі жұмыстар жүргізіліп, мүгедектігі бар адамдарды қоғам өмірінің барлық салаларына ықпалдастыру бағдарланып келеді.&nbsp;<blockquote>- Инклюзивті саясатты іске асыру тұжырымдамасындағы кешенді шаралар сапалы орындалуы керек. Сондықтан барлық жұмыстарды ашық әрі объективті түрде үйлестіріп, ақпараттық деректер базаларын интеграциялау бойынша тиянақты қызмет жасау қажет, – деді Нұржан Сәбитұлы.&nbsp;</blockquote>Айта кету керек, инклюзивті саясатты іске асыру тұжырымдамасы – ерекше қажеттіліктері бар адамдардың өмір сүру сапасын жақсартуға, оларды әлеуметтендіруге және білім беру, жұмыспен қамту ортасына тең құқылы қатысуына бағытталған 52-ден астам кешенді шараларды қамтиды. Бұл тұжырымдама білім беруді, мүгедектікке қатысты медициналық – әлеуметтік модельден әлеуметтік – құқықтық қорғау моделіне көшуді көздейді.<img src="https://knadmin.beoblood.kz/uploads/yzylorda_alasy_inklyuzivti_zhiyn_2_c06f295391.jpg" alt="Қызылорда қаласы инклюзивті жиын 2.jpg">

Инклюзивті саясат – игілік қадамы

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың, құқық қорғау органдарының бірінші басшылары, мәслихат депутаттары, зиялы қауым өкілдері, ел ағаларының қатысуымен Президент саябағының аумағында жаңа драма театрдың іргетасы қаланып, капсуласын салу рәсімі өтті.Аймақ басшысы жиналған жұртшылықты жаңа нысан құрылысының басталуымен құттықтады.<blockquote>«Президентіміз Қасым-Жомарт Кемелұлы қаламызда өткен Ұлттық құрылтайдың қорытынды отырысында «Жалпы «Сыр елі – жыр елі» деп бекер айтылмайды. Қорқыт ата &nbsp;заманынан жалғасып келе жатқан жыраулық-жыршылық және күйшілік өнер бұл аймақта кең қанат жайған» деп атап өтіп, Қызылордадағы жаңа драма театр құрылысы биыл басталатынына тоқталған болатын. Театр ұлтымыздың болмыс-бітімін сақтауға, руханиятты байытуға зор үлес қосып келеді. Жетпіс жылдан астам тарихы бар, қазақ театр өркениетінің қарашаңырағы Нартай Бекежанов атындағы облыстық қазақ музыкалық драма театры – Сыр өңірінің мәдени өмірінің ажырамас бөлігі. Бүгінде репертуарында 60-тан астам қойылым бар. Шығармашылық ұжым жыл сайын 70 мыңнан астам көрерменге рухани азық сыйлайды. Президент саябағы аумағында іргетасы қаланатын жаңа театр – төл өнерімізді түлететін, жас буынның шығармашылық әлеуетін шыңдайтын, ұлттың жаны сөйлейтін киелі мекен болады деп сенеміз», – деді Нұрлыбек Нәлібаев.</blockquote><img src="https://knadmin.beoblood.kz/uploads/yzylordada_zha_a_drama_teatrdy_rylysy_bastaldy_2_7b6d891a79.jpg" alt="Қызылордада жаңа драма театрдың құрылысы басталды 2.jpg">Қызылорда – қазақ театр өнерінің негізі қаланған жер. Бір ғасыр бұрын жаңадан құрылған ұлттық театрдың алғашқы қойылымы осында сахналанған. Сыр жұртшылығы халқымыздың асыл мұраттарын, құндылықтарын сахна арқылы ұрпақ санасына сіңіріп келген ұлт театрының Қызылордадан бастау алғанын мақтаныш тұтады.Қазақтың ұлттық кәсіби театрының шымылдығы түрілген Қызылордада бір ғасырдан соң жаңа ғимараттың іргетасы қалануының өзіндік мәні бар. &nbsp;Рәсімде Қазақстанның еңбек сіңірген қайраткері Хұсейн Әмір-Темір, «ВД Строй Инжиниринг» ЖШС-нің бас директоры Азамат Өсімбеков сөз сөйледі.Айта кету керек, 2022 жылдан бері өңірде 22 мәдениет нысаны жаңадан салынып, ел игілігіне берілді. Барлық ауданда «Руханият орталықтары» ашылды. Облыстың бас шаһарында «Өнер орталығы», «Анаға тағзым», «Отбасы орталығы», «Оқушылар сарайы» бой көтерді.Былтыр Қызылорданың астана болғанына 100 жыл толуына орай облыстық тарихи-өлкетану музейінің, Ассамблеяның 30 жылдығына орай «Қазатомөнеркәсіп» компаниясының қолдауымен «Достық үйінің» жаңа ғимараты салынды. Кейінгі жылдары &nbsp;«Сыр жұлдыздары» академиясы, Жалағаш, Жаңақорған, Шиелі аудандарында «Өнер мектебі» мен «Оқушылар үйі» іске қосылды. Жақында тәулік бойы жұмыс істейтін Президенттік кітапхана құрылысы басталады.

Қызылордада жаңа драма театрдың құрылысы басталды

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаев Қазақстан халқына арнаған Жолдауында экономиканы жаңғыртудың негізгі тетіктерінің бірі ретінде жаппай цифрландыру мен жасанды интеллект технологияларын кеңінен енгізудің маңыздылығын атап өткен болатын. Бүгінде бұл бағыттағы жүйелі жұмыстар нақты нәтижесін беріп, өңдеу өнеркәсібінде жаңа серпін қалыптастыруда.Оның айқын мысалы жиһаз өндірісінде табысты жұмыс істеп келе жатқан «Панабек» ЖШС. Кәсіпорын өндірістік процестерді толық цифрландыру арқылы өнім сапасын арттырып, еңбек өнімділігін едәуір ұлғайтты.Осыған орай, «Панабек» ЖШС базасында кәсіпорынның өндірістік әлеуетін таныстыру мақсатында баспасөз туры ұйымдастырылды. Іс-шараға кәсіпорын басшылығы, сала мамандары және бұқаралық ақпарат құралдарының өкілдері қатысты.Өндіріс қуатын арттыру мақсатында кәсіпорын өңірлік инвестициялық орталық арқылы 59 млн теңге жеңілдетілген несие алған. Өндіріс процесі толықтай автоматтандырылып, қазіргі таңда фабрика жылына 35 мың данаға дейін кеңсе, асхана, мектеп парталары мен өзге де жиһаз түрлерін өндіріп келеді. Кәсіпорын өнімдері облыс тұрғындары арасында жоғары сұранысқа ие. Айта кетейік, былтыр «Панабек» ЖШС«Қазақстанның үздік тауары» өңірлік көрме-байқауында «Халыққа арналған үздік тауарлар» номинациясы бойынша жеңімпаз атанды.Қазіргі таңда зауыттың жылдық қуаттылығы 20 мың дана жиһазды құрайды. Өндірісте заманауи автоматтандыру және цифрлық басқару жүйелері толық енгізілген. Атап айтқанда, Hyundai маркалы роботтар ағаш кесу мен лазерлік дәнекерлеу жұмыстарын атқарады. Сонымен қатар, ЛДСП кесу орталықтары, ПВХ жабыстыру автоматтары, MDF өңдеу желілері, ЧПУ станоктары, металл өңдеуге арналған лазерлік және құбыр кесу құрылғылары кеңінен қолданылады. Алдағы кезеңде роботтандырылған желілерді кеңейту жоспарлануда.Кәсіпорында 3D жобалау технологиялары енгізіліп, әрбір тапсырыс цифрлық форматта әзірленеді. Өндірістің барлық кезеңін қамтитын цифрлық бақылау жүйесі, оның ішінде ақауларды автоматты анықтау кешені өнім сапасын тұрақты қадағалауға мүмкіндік береді. Нәтижесінде өндіріс толық басқарылатын цифрлық ортаға көшкен.Инфрақұрылым аясында кәсіпорын аумағында 1000 шаршы метрлік шоурум мен көрме орталығы, 4000 шаршы метр өндірістік цех және заманауи қойма жұмыс істейді.<img src="https://knadmin.beoblood.kz/uploads/Panabek_Zh_Sh_S_af5f79843d.jpeg" alt="Панабек ЖШС.jpeg"><blockquote>– Қазіргі таңда өнімдер негізінен ішкі нарыққа бағытталған. Дегенмен, алдағы екі жылда компания Өзбекстан және Қырғызстан нарықтарына шығуды жоспарлап отырмыз. Осы бағытта халықаралық сертификаттау рәсімдері басталып, логистикалық тізбектер қалыптастырылып, серіктестермен келіссөздер жүргізілуде. Кәсіпорын мектеп жиһаздарын, кеңселік гарнитурларды, сауда витриналарын және авторлық үй жиһаздарын қоса алғанда, өнімнің кең түрін шығарады. 20 жыл бұрын шағын кәсіп ретінде басталған өндіріс бүгінде заманауи жиһаз фабрикасына айналды. Сонымен қатар, Мемлекет басшысының бастамасымен жүзеге асырылып жатқан Келешек мектептері ұлттық жобасы аясында кәсіпорын 5 мектепті жиһазбен қамтамасыз еттік, – деді жиһаз фабрикасы директорының орынбасары А.Жеткерген.</blockquote>Жалпы, «Панабек» ЖШС тәжірибесі цифрландыру мен автоматтандыруды тиімді енгізу арқылы өндірістің бәсекеге қабілеттілігін арттыруға болатынын көрсетеді. Бұл өз кезегінде өңір экономикасының дамуына серпін беріп, отандық өнімнің экспорттық әлеуетін кеңейтуге мүмкіндік ашады.Жиһаз фабрикасы директорының орынбасары Альбина Жеткергеннің айтуынша, «Панабек» ЖШС өндірістік процестерді толық цифрландыру арқылы еңбек өнімділігін арттырып, өнім сапасын жаңа деңгейге көтерген. Қазіргі таңда кәсіпорынның жылдық өндірістік қуаттылығы 20 мың дана жиһазды құрайды.<blockquote>«Зауытта заманауи автоматтандыру жүйелері толық енгізілген. Hyundai маркалы роботтар ағаш кесу және лазерлік дәнекерлеу жұмыстарын атқарады. Сонымен қатар, ЛДСП кесу орталықтары, ПВХ жабыстыру автоматтары, MDF өңдеу желілері, ЧПУ станоктары және металл өңдеуге арналған лазерлік құрылғылар жұмыс істейді», – деді кәсіпорын директорының орынбасары.</blockquote>&nbsp;<img src="https://knadmin.beoblood.kz/uploads/Panabek_Zh_Sh_S_1393b85e7c.jpeg" alt="Панабек ЖШС).jpeg">Сондай-ақ, кәсіпорында 3D жобалау технологиялары енгізіліп, әрбір тапсырыс цифрлық форматта әзірленеді. Өндірістің барлық кезеңі цифрлық бақылау жүйесі арқылы қадағаланып, ақауларды автоматты анықтау кешені өнім сапасының тұрақты болуын қамтамасыз етеді.Кәсіпорын мектеп жиһаздарын, кеңселік гарнитурларды, түрлі корпустық шешімдер мен авторлық үй жиһаздарын өндіреді. Бүгінде өнімдер негізінен ішкі нарыққа бағытталған. Дегенмен, алдағы екі жыл ішінде Өзбекстан мен Қырғызстан нарығына шығу жоспарланып отыр. Жиһаз фабрикасы директорының орынбасары Альбина Жеткергеннің айтуынша бұл бағыттағы жұмыстар алдағы уақытта да жалғасын табатын болады және де өндірісті цифрландыру мен автоматтандыру кәсіпорынның бәсекеге қабілеттілігін арттырып қана қоймай, отандық өнімнің экспорттық әлеуетін кеңейтуге де мүмкіндік береді.Негізінен жаңа жиһаз фабрикасының іске қосылуы өңіріміз үшін және облыс тұрғындары үшін үлкен мүмкіндік. Бұл дегеніміз өңірдің экономикасы мен кәсіпкерлік саласының дамуына септігін тигізсе, екінші жағынан жұмыссыз азаматтардың жұмыспен қамтылып, қоғамға тұрақты бейімделуіне және де отандық өнім көлемінің артуына, шағын әрі орта бизнестің дамуына оң әсерін тигізеді.<img src="https://knadmin.beoblood.kz/uploads/Panabek_Zh_Sh_S_f9985a2d82.jpeg" alt="Панабек ЖШС.jpeg">Аружан ЕРАЛЫФото: Нұрболат Нұржаубай

Заманауи технологиялар өндіріс орындарының дамуына оң ықпал етеді

<a href="https://kyzylorda-news.kz/">Kyzylorda-news.kz</a> Өңірде 24-30 сәуір аралығында «Вакциналар әр ұрпақ үшін жұмыс істейді» ұранымен иммундаудың еуропалық апталығы өтеді. &nbsp;Бұл туралы өңірлік коммуникациялар қызметінің ақпарат алаңында белгілі болды. Жиынға Қызылорда облысының денсаулық сақтау басқармасы басшысының орынбасары Мирзанова Мая Миранбайқызы және облыстық санитариялық-эпидемиологиялық бақылау департаменті басшысының орынбасары Әбдіқайымова Әлия Мүтәліпқызы қатысып, өңірдегі иммундау жұмыстарының маңызына тоқталды.<blockquote>«Жыл сайын сәуір айының соңғы аптасында өткізілетін Дүниежүзілік және Еуропалық иммундау апталығы барлық жастағы адамдарды жұқпалы аурулардан қорғауда вакцинацияның аса маңызын арттыруға бағытталған. Вакцинация - жұқпалы аурулардың алдын алудың ең тиімді жолы. Соңғы 50 жылда вакциналар 150 миллионнан астам адамның өмірін сақтап қалуға ықпал етті. Уақытында екпе алу әр адамның өз денсаулығына деген жауапкершілігі. Иммундау нәресте өлім-жітімін едәуір азайтып, миллиондаған асқынулардың алдын алуға мүмкіндік беріп отыр. Бүгінде балалардың аман-есен өсіп, дамуына вакцинацияның үлесі зор», - деді Мая Мирзанова.</blockquote>Ал Әлия Әбдіқайымова вакцинацияның қоғам үшін маңызын атап өтті.<blockquote>«Профилактикалық екпелер елімізде Ұлттық екпе күнтізбесіне сәйкес жүргізіледі. Ол 21 инфекцияға қарсы қорғанысты қамтиды. Қазіргі таңда облыста 215 екпе кабинеті жұмыс істейді, ал шалғай елді мекендерге 44 жылжымалы бригада қызмет көрсетуде. Вакцинадан бас тарту көбіне әлеуметтік желілердегі жалған ақпараттарға байланысты. Тұрғындарды тек ресми дереккөздерге сүйенуге шақырамын. Иммундау апталығы аясында халықтың ақпараттылығын арттыру, ата-аналармен түсіндіру жұмыстарын жүргізу және білім беру ұйымдарында насихат күшейтілмек», – деді ол.</blockquote>Мамандардың айтуынша, екпе тек жеке адамның емес, тұтас қоғамның қауіпсіздігін қамтамасыз ететін маңызды құрал. Сондықтан әрбір азамат уақытылы вакцина алып, өз денсаулығы мен жақындарының амандығына жауапкершілікпен қарауы тиіс.<img src="https://knadmin.beoblood.kz/uploads/Immundau_aptaly_y_brifing_ee5fa9f960.jpg" alt="Иммундау апталығы брифинг.jpg">Фото: Pexels

Өңірде иммундау апталығы өтпек

<a href="https://kyzylorda-news.kz/">Kyzylorda-news.kz</a> Қармақшы ауданының әкімі Жандос Еркінбектің төрағалығымен аудан әкімдігінің мәжіліс залында кезекті жиын өтті.Күн тәртібінде инклюзивті саясатты іске асыру мәселесі қаралып, азаматтарға қолайлы орта қалыптастыру бағытындағы жұмыстар талқыланды.Аудан басшысы бұл жұмыстардың маңыздылығына тоқталды.<blockquote>«Инклюзивті саясатты іске асыру - ауданымыз үшін де, жалпы қоғам үшін де маңызды әрі өзекті мәселелердің бірі. Өйткені әрбір азамат – қоғамымыздың толыққанды мүшесі және олардың құқықтары сақталып, қажеттіліктері қамтамасыз етілуі тиіс. Біздің міндетіміз - ауданымыздағы ерекшелігі бар азаматтарға қолдау көрсетіп, кедергісіз орта қалыптастыру»,– деді.</blockquote>Ерекше азаматтарға көрсетілетін «Инватакси» қызметінің сапасы әрдайым назарда. &nbsp;Биыл аудан бойынша бұл қызметке жергілікті бюджеттен тиісті қаржы қаралып, қазіргі таңда 7 арнайы көлік қызмет көрсетуде. Аудан басшысы аудандық жұмыспен қамту және әлеуметтік бағдарламалар бөлімінің басшысына ешқандай кемшіліктер орын алмауын және бұл бағыттағы жұмыстарды жүйелеу тапсырылды.Күн тәртібіндегі келесі мәселе - санитарлық тазалық пен абаттандыру жұмыстары. Жандос Еркінбек саланың тұрақты бақылауда екенін атап өтті.<blockquote>«Тазалық жұмыстарының сапалы ұйымдастырылуына барша аудан азаматтарының атсалысуы өте маңызды»,- деп бұл жұмысты сапалы ұйымдастыруын жеткізді.&nbsp;</blockquote>Сондай-ақ Конго-Қырым геморрагиялық қызбасының алдын алу шаралары да қаралып, мәселе жан-жақты талқыланды.Жиында көтерілген барлық салалар бойынша жауапты бөлімдерге бірқатар тапсырмалар жүктеліп, олардың орындалуын қатаң бақылауда ұстау тапсырылды.

Қармақшы: Азаматтарға қолайлы орта қалыптастыру бағытындағы жұмыстар талқыланды

<a href="https://kyzylorda-news.kz/">Kyzylorda-news.kz</a> Үкімет отырысынан кейінгі облыс әкімінің төрағалығымен өткен «Инклюзивті саясатты іске асыру шаралары туралы» жиыннан соң Жаңақорған ауданының әкімі Мажит Самитовтың төрағалығымен мәжіліс өтті.Күн тәртібіндегі негізгі мәселе бойынша аудан басшысы аудандағы қолжетімді орта қалыптастыру жұмыстарының барысына тоқталды. Атап айтқанда, қолжетімділіктің интерактивті картасына енгізілген бірқатар нысандарда жоспарланған жұмыстардың уақытылы орындалмай отырғанын сынға алды. Сонымен қатар, мүгедектігі бар азаматтарды жұмысқа орналастыру бағытындағы жұмыстардың жеткіліксіз деңгейде жүргізіліп отырғанын атап өтті.Осыған байланысты тиісті сала басшыларына қолжетімді орта қалыптастыру жұмыстарын жүйелі түрде жандандыру, сондай-ақ мүмкіндігі шектеулі азаматтарды жұмыспен қамту бағытындағы шараларды күшейту тапсырылды.Күн тәртібінен тыс бірқатар өзекті мәселелер де қаралды. Атап айтқанда, соңғы бес жылда бюджет қаражаты есебінен салынған және құрылысы жүргізіліп жатқан әлеуметтік нысандар сапасына бақылауды күшейту, анықталған кемшіліктерді жою бойынша нақты шаралар қабылдау міндеттелді.Сонымен қатар, көктемгі әскерге шақыру науқанының барысы, жасөспірімдердің қауіпсіздігін қамтамасыз ету мақсатындағы түнгі рейдтер, макроэкономикалық көрсеткіштер, жаз мезгілінде ауа температурасының көтерілуіне байланысты өрт қауіпсіздігі талаптарын сақтау мәселелері қаралып, тиісті сала басшыларына алдын алу және түсіндіру жұмыстарын жандандыру тапсырылды.<img src="https://knadmin.beoblood.kz/uploads/Zha_a_or_an_audany_inklyuzivti_sayasat_2_454945e05d.jpg" alt="Жаңақорған ауданы инклюзивті саясат 2.jpg">

Қазақстан және Қызылорда облысының жаңалықтары: Қоғам