<a href="https://kyzylorda-news.kz/">Kyzylorda-news.kz</a>&nbsp; Азаматтық қоғам – мемлекеттің тұрақты дамуының негізгі тіректерінің бірі. Оның басты қозғаушы күші – халықтың бастамаларын жүзеге асыратын, қоғамдағы маңызды әлеуметтік, экономикалық және мәдени мәселелерді көтеретін үкіметтік емес ұйымдар болып табылады."TALQILAU" дилогтық алаңында «Miras» аймақтық кеңесінің мүшелері баc қосып, Президент Жолдауынан туындайтын міндеттер, ҮЕҰ-дың азаматтық қоғамды дамытудағы орны, қол жеткізген жетістіктері мен бүгінгі күнгі түйткілдерін жан-жақты талқылады.Жиынға партияның облыстық филиалының төрағасы Алмасбек Есмаханов, азаматтық қоғам мен мәдениетті дамыту жөніндегі «Miras» аймақтық қоғамдық кеңесінің төрағасы Баймырза Қожамберлиев, кеңес мүшелері және ҮЕҰ жетекшілері мен тиісті басқарма өкілдері қатысты.Кеңесте сөз алған партия филиалының төрағасы Алмасбек Есмаханов: «Жасанды интеллект, цифрлық трансформация, жаңа білім беру модельдері – мұның барлығы заман талабына сай, бәсекеге қабілетті ұрпақ қалыптастырудың кепілі. Президентіміздің жасанды интеллектіні қолдауы — заманауи технологияны дамытуға бағытталған өте орынды әрі дер кезінде жасалған қадам болып табылады. Бұл бастама еліміздің ғылым мен экономиканы цифрландыру жолында алға жылжуына серпін береді.»-деді.Отырыста алдымен Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауы бойынша хабарлама жасаған кеңес төрағасы маңызды құжаттың еліміз үшін үлкен жаңалықтар мен жетістіктердің және алдағы жоспарлардың негізінде жасалғанына тоқталып өтті.Мұнан соң күн тәртібіндегі азаматтық қоғамды дамытудағы үкіметтік емес ұйымдарының рөлі, жетістіктері мен мәселелері жөнінде қоғамдық даму басқармасы басшысының орынбасары Уалихан Ибраев хабарлама жасап, атқарылған жұмыстар жайында баяндады.«Тәуелсіздіктің алғашқы жылдарында облыстағы қоғамдық ұйымдар саны 15 болса, бүгінде олардың қатары 1000-ға жетеді. Оның 300-ге жуығы өңірдің қоғамдық-саяси, рухани –мәдени өміріне белсенді араласуда. Облыстық және аудандық әкімдіктер жанындағы кеңестер мен комиссиялар құрамында 250-ге жуық үкіметтік емес ұйым өкілдері бар.Мемлекеттік әлеуметтік тапсырыс аясындағы жобалар салалық принцип негізінде 14 бағытта, 3000-ға жуық адам жұмыспен қамтылуда. Қазіргі таңда ауылдық үкіметтік емес ұйымдардың әлеуетін дамытуға бағытталған кешенді шаралар жүзеге асырылуда. Бұл «Халық үніне құлақ асатын мемлекет» тұжырымдамасының және «Адам мемлекет үшін емес, мемлекеттің игілігі адам үшін» қағидасының аймақта жүйелі жүзеге асуының көрінісі»-деді басқарма басшысының орынбасары өз сөзінде.Жиын соңында қатысушылар өңірдегі азаматтық қоғамның дамуына серпін беретін бірқатар ұсыныстарын айтып, мәселелерді жан-жақты талқылады.&nbsp;

«TALQILAU» диалогтық алаңында "Miras" аймақтық кеңесі мүшелері бас қосты

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласындағы Достық үйінде Қазақстан халқы Ассамблеясы жанындағы облыстық Аналар кеңесінің ұйымдастыруымен «Адал еңбек – нәзік жандар» тақырыбында дөңгелек үстел өтті.Жиынның негізгі мақсаты – қоғамдағы әйелдердің рөлін айшықтау, отбасы құндылықтарын дәріптеу, тұрмыстық зорлық-зомбылықтың алдын алу мәселелерін ортаға салу болды.<img src="https://knadmin.beoblood.kz/uploads/550188768_4185350501784098_938996768944183952_n_36595998cd.jpg" alt="550188768_4185350501784098_938996768944183952_n.jpg">Іс-шараға ҚХА жанындағы Республикалық Аналар кеңесі төрағасының орынбасары Баян Ахатай, Тұрмыстық зорлық-зомбылық құрбандарына арнаулы әлеуметтік қызмет көрсету орталығының психологы Айсұлу Нұрманбаева, Отбасы қолдау орталығының маманы Айгүл Мешітбаева, облыстық Полиция департаментінің өкілі, полиция майоры Замира Сайгондықызы, сондай-ақ коммуналдық қызмет өкілдері мен әлеуметтік көмек алушы азаматтар қатысты. Жиынды облыстық Аналар кеңесінің төрағасы Айгүл Мұсабаева жүргізді.<blockquote>Баян Ахатай өз сөзінде жастарды еңбекке баулудың маңызына тоқталып, отбасының тұрақтылығы мен ұрпақ тәрбиесіндегі жауапкершілік жайында ой қозғады. Оның айтуынша, соңғы жылдары отбасы институтына әсер ететін келеңсіз факторлар – ажырасу деңгейінің артуы, нашақорлықтың жасаруы – алаңдатарлық жағдай. «Өркениетті қоғамның негізі – мықты отбасы. Ал берекелі отбасының тірегі – адал еңбек. Сондықтан ата-ана да, жас ұрпақ та осы құндылықтарды жадында ұстап, өнеге етуі тиіс», – деді ол.</blockquote><img src="https://knadmin.beoblood.kz/uploads/550520827_4185350508450764_836997506354098111_n_3a7faa32e8.jpg" alt="550520827_4185350508450764_836997506354098111_n.jpg">Жиында қатысушылар нәзік жандардың қоғамдағы орнын, еңбектегі қажыр-қайратын атап өтіп, тұрмыстық зорлық-зомбылықтың алдын алу тетіктерін талқылады. Сонымен қатар облыс әкімдігі жанындағы әйелдер істері және отбасылық-демографиялық саясат жөніндегі комиссияның хатшысы Қаламқас Каримоваға туған күніне орай гүл шоқтары табысталды.Шара аясында психологиялық тренинг ұйымдастырылып, дөңгелек үстел жұмысы қорытындыланды. Басқосу соңында әйелдердің адал еңбегін бағалау мен қоғамдағы мәртебесін көтеру – баршамыздың ортақ парызымыз екендігі ерекше атап өтілді.<img src="https://knadmin.beoblood.kz/uploads/552996964_4185350425117439_4940626839495039734_n_745caf3a09.jpg" alt="552996964_4185350425117439_4940626839495039734_n.jpg">

Адал еңбек - ұрпаққа өнеге

2025 жылғы 22-23 қыркүйекте Қазақстан Республикасы Орталық сайлау комиссиясының Төрағасы Нұрлан Әбдіров ағымдағы жылдың 28 қыркүйегіне тағайындалған Қызылорда облысы Қазалы ауданы әкімінің және 26 қазанда өтетін Қызылорда қаласы мен Жалағаш ауданындағы шығып қалған мәслихаттар депутаттарының сайлауын дайындау және өткізу шеңберінде Сыр еліне инспекциялық сапармен келді. Сапарға ОСК мүшесі Азамат Айманакумов және комиссия аппаратының жауапты қызметкерлері қатысты. Іссапар барысында жоспарланған барлық іс-шаралар сайлау комиссияларының дайындық деңгейін бақылауға, электоралдық оқыту барысына мониторинг жүргізу, сайлау процесінің заңдылығы мен ашықтығын қамтамасыз етуге және сайлау процесіне қатысушалырмен өзара іс-қимыл жасауға бағытталған. Қазалы ауданы әкімінің сайлау науқанына 41 сайлау комиссиясы жұмылдырылған: 1 аумақтық және 40 учаскелік. Қызылорда қаласы және Жалағаш аудандық мәслихат депутаттарының сайлауына 2 аумақтық, 2 округтік, 6 учаскелік сайлау комиссиясы тартылған. Сапардың алғашқы күнінде Ортсайлауком басшысы аумақтық сайлау комиссияларының, жергілікті атқарушы органдардың, прокуратура, полиция департаменті, жұмыспен қамту және әлеуметтік бағдарламалар басқармасы және өзге де уәкілетті органдар басшыларының қатысуымен кеңес өткізді. Жиында сайлау науқанының ұйымдастырушылық-құқықтық мәселелері, сайлау өткізудің күнтізбелік жоспарына сәйкес іс-шараларды іске асыру, азаматтардың сайлау құқықтарын сақтау, электоралдық процесс барысында заңдылық пен қоғамдық тәртіпті қамтамасыз ету шаралары талқыланды. &nbsp;ОСК Төрағасы жиынға қатысушылардың аудан әкімі және мәслихаттар депутаттарының сайлау науқанында заңнаманы сақтау, ашықтық пен айқындықты, сондай-ақ қоғамдық қауіпсіздікті қамтамасыз ету мәселелеріне мән беру қажеттігін атап өтті.23 қыркүйекте &nbsp;Нұрлан Әбдіров Қазалы ауданына барып, бірқатар учаскелерді аралап, аумақтық, учаскелік сайлау комиссиясының мүшелерімен кездеседі. Сондай-ақ, ауданның белсенді жастарымен еркін форматта басқосып, Жас сайлаушылар клубының мүшелерімен пікірлеседі.

ҚР ОСК Төрағасы Нұрлан Әбдіров Қызылорда облысына жұмыс сапарымен келді

<a href="https://kyzylorda-news.kz/">Kyzylorda-news.kz</a> Қызылорда облыстық қоғамдық даму басқармасының қолдауымен «Қоғамдық келісім» КММ ұйымдастыруымен ЭТНОQUIZ интеллектуалды сайысы өтті.ЭТНОQUIZ-дің мақсаты – бірлік пен татулықты, достықты дәріптеу, қоғамдық келісімді нығайту.Сайысқа облыстық Қазақстан халқы ассамблеясының жанындағы ғылыми-сарапшылық топ мүшелері, этномәдени бірлестіктің өкілдері, Ассамблея жастары және облыстық қоғамдық даму басқармасына қарасты орталықтардың қызметкерлерінен құралған 6 топ қатысты.<img src="https://knadmin.beoblood.kz/uploads/1_ETNOQUIZ_intellektualdy_sajys_tti_f7b8ee2e52.jpg" alt="1 «ЭТНОQUIZ» интеллектуалды сайыс өтті.jpg">Сайыс 6 кезең бойынша өтті. Әр кезеңнің сауалдары қиын әрі қызықты болды. Әсіресе Ва-Банк және Капитандар туры тартысты өтті.Квиз барысында облыстық қоғамдық даму басқармасының этносаралық қатынастар мәселелері жөніндегі бөлімінің басшысы Ерлан Сисенбиев және «Қоғамдық келісім» КММ директоры Бақытжан Камалов сөз сөйлеп, сайыс танымдық білім жетілдірудегі ұтымды бастама екендігін алға тартты.<img src="https://knadmin.beoblood.kz/uploads/2_ETNOQUIZ_intellektualdy_sajys_tti_e0e8af6c6c.jpg" alt="2 «ЭТНОQUIZ» интеллектуалды сайыс өтті.jpg">Шығармашылық даму мен рухани азық сыйлаған ЭТНОQUIZ-де 1 орынды – этномәдени бірлестіктер төрағалары мен мүшелерінен құралған «Достық» тобы, 2 орынды – Қоғамдық даму басқармасының қызметкерлерінен құралған «Даму» тобы, 3 орынды – Жастар ресурстық орталығының қызметкерлерінен құралған «SYR JASTARY» тобы жеңіп алды, облыстық қоғамдық даму басқармасының алғыс хаттарымен, дипломдарымен және бағалы сыйлықтарымен марапаттады.

«ЭТНОQUIZ» интеллектуалды сайыс өтті

Алла Тағала Құран Кәрімде: «Расында, Алла бір қауымның халін, олар өздері өзгертпейінше өзгертпейді» («Рағд» сүресі, 11-аят) деп баян етеді. Бұл аяттан түсінетініміз – қоғамның өркендеуі де, құлдырауы да әрбір адамның рухани ахуалына байланысты. Қандай да бір елдің дамуы тек материалдық игіліктермен өлшенбейді, оның шынайы қуаты – имандылықта, бірлікте, рухани құндылықтарда. Жаһандану заманында адамдардың көбі дүние-мүлік пен пайда табуды алдыңғы орынға шығарып, жүрек тазалығы мен рухани байлықты кейінге ысырып жатады. Мұндай жағдайда қоғамның тұрақтылығы мен болашағы әлсіреп, адамдар арасындағы мейірім, сенім және сыйластық азаяды. Сондықтан да рухани құндылықтарды дәріптеу – әрбіріміз үшін ең маңызды міндет. Рухани құндылық дегеніміз – адамның жүрегін тазартып, өміріне бағыт-бағдар беретін, қоғамға пайдасын тигізетін қасиеттер. Олардың негізін Құран мен Сүннет құрайды. Атап айтқанда: – Иман – Аллаға сенім, аманатқа адалдық, ақиқатқа берік болу. – Адалдық – әрбір істі әділдікпен атқару, арамнан сақтану. – Мейірім мен бауырмалдық – бір-біріне жәрдемдесу, қиындықта қолдау көрсету. – Сабыр мен қанағат – сынақтарда төзімділік танытып, барға шүкір ету. – Құрмет пен ізет – ата-анаға, ұстазға, үлкенге ізгілік көрсету, кішіні аялау. Осы асыл құндылықтар отбасының тыныштығын, қоғамның татулығын және елдің тұрақтылығын қамтамасыз етеді. Енді отбасындағы, жастар арасындағы, қоғамдағы рухани құндылықтарға жекелей тоқталып өтсек. Отбасындағы рухани құндылықтар Отбасы – қоғамның кішкентай үлгісі. Егер әр шаңырақ берекелі болса, тұтас елдің де жағдайы жақсы болады. Отбасында балаларға имандылықты, адалдықты, еңбексүйгіштікті үйрету – ең үлкен тәрбие. Алла Елшісі (с.ғ.с): «Сендердің ең жақсыларың – отбасына жақсы қарым-қатынаста болғандарың» деген. Демек, рухани құндылықтарды насихаттау алдымен үйден басталуы тиіс. Әке – отбасының тірегі, ана – шаңырақтың берекесі, бала – сол отбасының болашағы. Жастар тәрбиесіндегі маңызы Жастар – елдің ертеңі. Қазіргі таңда жастарды түрлі теріс ағымдар, жат мәдениеттер өз ықпалына тартуға тырысуда. Бұған қарсы тұратын күш – рухани тәрбие. Жастарға Құран мен хадистерден өнеге көрсету, ата-баба дәстүрімен сусындату – олардың жүрегіне имандылық дәнін себеді. Жас ұрпақ рухани құндылықтарды бойына сіңірсе, ол ертеңгі күні әділетті басшы да, адал азамат та, мейірімді ата-ана да бола алады. Қоғамдық татулық пен рухани құндылықтар Ислам діні – бейбітшілік пен татулықтың діні. Алла Тағала Құранда: «Бәрің бірдей Алланың жібіне (дініне) жабысыңдар да, бөлінбеңдер» («Әли Имран» сүресі, 103-аят) деп әмір етеді. Бірлік – берекенің бастауы. Қоғамда әділеттілік орнап, адамдар бір-біріне сеніммен қараса, әрбір салада ілгерілеу болады. Ал рухани құндылықтарды ұмытқан қоғамда алауыздық, әділетсіздік және мейірімсіздік белең алады. Ұлттық дәстүр мен руханият Қазақ халқы ғасырлар бойы ислам құндылықтарын өз дәстүрімен сабақтастырып, салт-санасына сіңіре білді. Үлкенді құрметтеу, жетімге қамқор болу, қонақжайлық, адал еңбек ету – бәрі де Құран мен Сүннеттегі қағидалармен үндеседі. Сондықтан рухани құндылықтарды насихаттау – тек дінге қатысты міндет қана емес, ұлттың болмысын сақтап қалудың жолы. Рухани құндылықтарды насихаттауда имамдардың рөлі Рухани құндылықтарды насихаттауда мешіт пен дін қызметкерлері де үлкен рөл атқарады. Мешіт – рухани тәрбие мен насихаттың ордасы. Имамдардың міндеті – жамағатқа тек құлшылық амалдарын үйрету емес, сонымен бірге қоғамға өнеге көрсетіп, имандылыққа бастау. Әрбір жұма уағызы, әрбір діни сабақ – халықты ізгілікке үндейтін үлкен мүмкіндік. Рухани құндылықтарды насихаттау – бүгінгі қоғам үшін ауадай қажет. Егер әрбіріміз жүрегімізді тазартып, бір-бірімізге мейірімділікпен қарасақ, қоғамымыздың да іргесі мығым болмақ. Пайғамбарымыз (с.ғ.с): «Адамдардың ең қайырлысы – өзгелерге пайдасы тигендер» деген. Ендеше, баршамыз айналамызға имандылық пен ізгілік нұрын шашайық. Алла Тағала елімізді тыныш, жерімізді берекелі, ұрпағымызды иманды етсін!Асхат АСҚАРҰЛЫ, Қызылорда қалалық «Айтбай» мешітінің имамы

Рухани құндылықтарды насихаттау – ұлттық болмысты сақтаудың бірден-бір жолы

<a href="https://kyzylorda-news.kz/">Kyzylorda-news.kz</a> &nbsp;Биыл Екінші дүниежүзілік соғыстың аяқталғанына тура 80 жыл толып отыр. Осыған орай қыркүйек айында Бейжің қаласында Ұлы Жеңіске арналған салтанатты әскери парад өтті. Оған Қазақстан Республикасының Президенті Қасым-Жомарт Тоқаев қатысты. Бұған дейін Мемлекет басшысы мен қазақстандық әскери қызметшілер Мәскеудегі Жеңіс парадына қатысқан болатын.Бұл шаралардың негізгі мақсаты – аға буынның ерлігіне терең құрмет білдіру және болашақта сондай қасіретті қайталамауға ұмтылу.1945 жылы Қытайды жапон басқыншыларынан азат етуге қазақстандық сарбаздар да белсенді қатысты, олар Жеңіс жолында жанын пида етті. ҚХР-дың Чжанбэй уезінде қаза тапқан батырларға арналған ескерткіш орнатылған, онда біздің отандастарымыз — Аселжан Бербеков, Ауезхан Жапаров, Төлепбек Өтебаев және басқа да жауынгерлердің есімдері мәңгілікке жазылған. Біз олардың Қазақстанда тұратын туыстарын таптық. Олардың көпшілігі бұрын ата-бабаларының қайда жерленгенін де білмеген. Қытай Халық Республикасының Қазақстандағы Төтенше және Өкілетті Елшісі Хан Чуньлин мырзамен кездесу кезінде біз қаза тапқандардың ұрпақтары туған жердің бір уыс топырағын апарып, ата-бабаларының қабірлеріне зиярат етуді армандайтынын айттық.Әртүрлі деректер бойынша, соғыс жылдарында Қазақстаннан майданға 1,5 миллионға жуық адам аттанған. Олардың 600 мыңнан астамы қаза тапты, 271 мыңнан астамы хабар-ошарсыз кеткен.Осыған байланысты, Екінші дүниежүзілік соғыс жылдарында қаза тапқан немесе хабарсыз кеткен қазақстандық жауынгерлердің жерленген орындарын іздеумен айналысатын «Atamnyn Amanaty» қоғамдық бірлестігінің қызметі ерекше назар аударуға лайық.Атқарылған істер:<ul><li>Осы уақыт ішінде ұйымның сайты арқылы 10 000-нан астам іздеу өтініші түсті;</li><li>4500-ден астам қазақстандық жауынгердің тұлғасы мен жерленген жері анықталды;</li><li>21 жауынгердің сүйегі отанына қайтарылып, әскери құрметпен жерленді.</li></ul>«Atamnyn Amanaty»-дың басты бағыттарының бірі — халықаралық ынтымақтастық. 100-ден астам келісімшарт жасалып, сәтті жүзеге асырылуда. ҚР Сыртқы істер министрлігімен бірлесіп, ТМД және Еуропа елдерінің аумағында жерленген қазақстандық жауынгерлердің дерекқоры жинақталды. Онда шамамен 28 000 есім бар. Бүгінгі таңда олардың туыстарын Қазақстанда табу бойынша белсенді жұмыс жүргізілуде.«Atamnyn Amanaty» қоғамдық бірлестігі жыл сайын «Ортақ тарих. Ортақ жеңіс. Ортақ көзқарас» атты халықаралық конференция ұйымдастырады. Бұл форум ТМД елдерінің үкіметтік емес ұйымдары мен іздестіру ұйымдары үшін маңызды диалог алаңына айналды.Форумның мақсаты – мұрағаттық және далалық іздеу жұмыстарының әдістемесін талқылау, тәжірибе алмасу, жауынгерлердің сүйектерін Отанға қайтару мен есімдерін мәңгі есте қалдырудың ортақ тәсілдерін әзірлеу.Біз «Ресейдің Іздестіру қозғалысы» және «Жеңіс Волонтерлері» ұйымдарының тұрақты серіктесіміз. «Atamnyn Amanaty» құрамынан құралған біріккен іздестіру жасағы жыл сайын Ресейдің Калуга облысындағы «Батыс майданы. Варшава тас жолы» атты халықаралық әскери-тарихи экспедицияға қатысады. Жасақ құрамында ҚР Қорғаныс министрлігінің Әскери-техникалық мектептерінің оқытушылары мен курсанттары бар.Экспедиция барысында 1941 жылдың тамызында Ақмолада құрылған 387-атқыштар дивизиясының жауынгерлеріне арналған мемориалдық тақта орнатылды. Бұл дивизия ауыр шығынға ұшыраған: 12 мың жауынгерден 1942 жылдың тамызында тек 800-і ғана сапта қалған. Жергілікті билік деректеріне сәйкес, Калуга облысы аумағында бес қазақстандық дивизия соғысқан екен. Біз далалық жұмыстарды жалғастыру үшін әкімдікпен келісімге келдік.Жастармен жұмыс және әскери-патриоттық тәрбие«Atamnyn Amanaty» жастарды патриоттық бастамаларға белсенді тартып келеді: дөңгелек үстелдер, викториналар, квесттер, спорттық турнирлер және естелік акциялар ұйымдастырылады. 2019 жылдан бері 2 миллионнан астам жас біздің іс-шараларға қатысты, олар туралы БАҚ пен әлеуметтік желілерде кеңінен жарияланып келеді.Біз Астана қаласының 33 колледжімен меморандумға қол қойдық. «Аталар аманатына адалмыз» акциясы аясында әр оқу орны Қазақстанда құрылған әскери бөлімдердің тарихын зерттеу бойынша ғылыми жұмыс жүргізді.2023 жылдың 19 тамызында Елорданың Триатлон паркінде Кеңес Одағының екі мәрте Батыры, шабуылдаушы ұшқыш Талғат Бигелдиновтің 101 жылдығына арналған алғашқы жыл сайынғы жүгіру жарысы өтті. Оған 1000-нан астам адам – әскери қызметшілер, ардагерлер, спортшылар мен еріктілер қатысты. Жүгіру жарысы Қазақстанда да, шетелде де қолдау тапты.Біз әрбір іс-шара өткен тарихты баяндап қана қоймай, жастарды жеке үлгімен шабыттандырғанын қалаймыз. Қарулы күштердің ардагерлері жастармен бірге жарыстарға қатысып, естеліктер эстафетасын табыстауда.Мысалы, 2023 жылдың қараша айында Астана колледждері арасында Кеңес Одағының Батыры, Халық Қаһарманы, армия генералы С. Нұрмағамбетовтің 100 жылдығына арналған волейбол турнирі өтті. Әр команда Ұлы Отан соғысының қазақстандық Батырларының есімімен аталды.Іздестіру жұмыстары және жаңа жобаларБіз еріктілеріміз бен іздеушілеріміздің жанкешті жұмысына ерекше мақтанамыз. Олар ақысыз негізде қазба жұмыстары мен мұрағаттық зерттеулер жүргізеді. Олардың ең үлкен марапаты — ондаған жылдан кейін ата-бабаларының мәңгілік тыныштық тапқан жерін тапқан туыстарының алғыс жасы.Қазіргі уақытта «Atamnyn Amanaty» келесі жобалармен айналысуда:<ol><li>Қазақстаннан шақырылған солдаттар мен офицерлер туралы электронды дерекқор — ұлттық жады платформасын құру;</li><li>«Батыс Қазақстан — Сталинград шайқасының алғы шебі» атты халықаралық экспедиция — жауынгерлердің сүйектерін қазып алу, есімдерін қалпына келтіру, мемориалдар салу;</li><li>Қазақстандағы эвакогоспитальдардың тарихын зерттеу, госпитальдық жерлеу орындарына естелік тақталар орнату;</li><li>Еуропада қаза тапқан қазақстандықтарды іздеу. Қазіргі күнге дейін 2,2 миллионнан астам Қызыл Армия жауынгері, соның ішінде қазақстандықтар да белгісіз болып есептеледі.</li></ol>Біздің миссия — тарихи жадыны сақтау, ұрпақтар сабақтастығын нығайту және жастарды батырлар ерлігі негізінде тәрбиелеу.Мұрат Молдағалиев, «Atamnyn Amanaty» ҚБ Басқарма төрағасы

Жадымда тұрар жаңғырып…

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласы бойынша қатты отын жеткізу жұмыстарын 2 оператор жүзеге асырады. Оның ішінде «Хас Ком» ЖШС қоймасында – 14 793 тонна, ал «Олжас 2005» ЖШС қоймасында – 207 тонна көмір қоры қалыптастырылған. Бұл – алдағы жылу беру маусымында тұрғындар мен әлеуметтік нысандарды көмірмен толық қамтамасыз етуге жеткілікті көлемнің бір бөлігі болып табылады.Қала аумағында көмір тапшылығын болдырмау мақсатында операторлар тарапынан тәуліктік үздіксіз жеткізу жұмыстары жүргізілуде. Әлеуметтік нысандарға көмір белгіленген кестеге сәйкес жеткізіліп отыр. Сонымен қатар, тұрғындардың да қажеттіліктерін қанағаттандыру мақсатында қоймаларда сатылым жүйелі түрде ұйымдастырылған.Ағымдағы жылдың тамыз айынан бастап қала тұрғындарына 1 410 тонна көмір сатылды.Жалпы, көмір қорының тұрақты жеткізілуі және қоймалардағы барлығы 15 мың тоннаға жуық қордың болуы – алдағы жылыту маусымын қиындықсыз өткізуге мүмкіндік береді.

Қызылордада көмір қоры жеткілікті

<a href="https://kyzylorda-news.kz/">Kyzylorda-news.kz</a> Қала әкімі Нұржан Ахатовтың қатысуымен қалалық мәслихаттың кезектен тыс 41-сессиясы өтті. Күн тәртібінде «2025-2027 жылдарға арналған Қызылорда қаласының бюджетін бекіту туралы» Қызылорда қалалық мәслихатының шешіміне өзгерістер енгізу туралы» қаралды.Сонымен қатар, Қызылорда қаласы бойынша округтік және учаскелік сайлау комиссияларында қалыптасқан бос орындар толықтырылып, тиісті өзгерістер енгізілді.Сессияда халықтың әлеуметтік осал топтары үшін тұрғын үй сатып алу, Қызылорда қаласының архитектуралық-сәулеттік келбеті мен туристік әлеуетін арттыру, жолдарды жөндеу, тұрғындарды ауыз сумен жабдықтау, кәріз желілерін жүргізу, «Сабалақ» елді мекенін газдандыру мен осы елдімекендегі су қоймасының құрылысын жүзеге асыру барысы талқыланды. Оған қоса, ағын суларды биологиялық тазарту станциясын жаңғырту, автоматтандыру және басқа да ауқымды жұмыстарды атқару үшін 2025-2027 жылға арналған қалалық бюджетті нақтылау туралы ұсыныс енгізілді.Қала әкімі Нұржан Сәбитұлы: «Жыл басында 73,1 млрд. теңге болып бекітілген қала бюджеті 8 айдың қорытындысында 144,2 млрд. теңгеге жетіп, екі есеге артты. Салық базасын кеңейту жұмыстары аясында 499 нысан қайта бағаланып, олардың жалпы құны 13,5 млрд. теңгеден 60,5 млрд. теңгеге өсті. Бұл нақтылау тек қарапайым қаржылық түзету емес, ол – тұрғындарымыздың тұрмыс сапасын арттыруға тікелей әсер ететін қадам»,-деді жиында.

Қалалық мәслихаттың кезектен тыс 41-сессиясы өтті

<a href="https://kyzylorda-news.kz/">Kyzylorda-news.kz</a>&nbsp; 2025 жылғы 15-17 қыркүйек аралығында Қызылорда облысында республикалық ақпараттық-түсіндіру тобының (РАНТ) мүшесі, теолог Арман Қуанышбаевтың қатысуымен бірқатар маңызды іс-шаралар өтті. Шаралар «Асыл Мұра-Орда» қоғамдық қоры жүзеге асырып жатқан әлеуметтік жоба аясында ұйымдастырылды.Іс-шаралар барысында Арман Қуанышбаев қала мешіттерінде жамағатпен жүздесіп, дін мен дәстүр, діни сауаттылық және рухани құндылықтар жөнінде тағылымды уағыздар айтты. Сонымен қатар, жастармен, мәдениет және спорт саласы өкілдерімен, жазасын өтеушілермен және дін қызметкерлерімен кездесулер өтті.Кездесулерде радикалды идеологиялардың алдын алу, діни тұрақтылықты сақтау, рухани иммунитет қалыптастыру және ақпараттық қауіпсіздік мәселелері кеңінен қозғалды.Сапар дін қызметкерлеріне арналған семинармен аяқталып, имамдардың кәсіби біліктілігін арттыру мен қоғаммен тиімді байланыс орнату жолдары талқыланды. Үш күндік жұмыс Сыр өңірінің рухани тынысын жаңғыртып, діни тұрақтылықты нығайтуға оң әсер етті.

РАНТ мүшесі, танымал исламтанушы Арман Қуанышбаев Сыр өңірінде

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев өңірдегі ірі өнеркәсіп кәсіпорындарының бірі – «Orda Glass Ltd» табақша шыны өндіру зауытының бас директоры Цай Го мырзамен кездесті. Кездесуде зауыттың ағымдағы жұмысы, өндірістік қуаты және алдағы инвестициялық жобалар талқыланды.Айта кетейік, «Orda Glass Ltd» зауыты 2022 жылы Индустрияландыру бағдарламасы және «Бір белдеу – бір жол» Қазақстан-Қытай ынтымақтастық жобасы аясында іске қосылған. Жылдық қуаттылығы 197,1 мың тонналық бұл кәсіпорын – республикадағы табақша шыны өндіруші жалғыз инновациялық зауыт. Жобаны жүзеге асыру үшін 42 млрд теңге шетелдік инвестиция тартылған.Зауыт іске қосылғаннан бері өнімінің 70%-ы ішкі нарыққа бағытталса, 30%-ы Өзбекстан, Қырғызстан, Тәжікстан және Грузия елдеріне экспортталуда.2023 жылы облыс әкімінің Қытай Халық Республикасына жұмыс сапарының нәтижесінде былтыр жылына 5 млн шаршы метр энергия үнемдейтін шыны өндіретін жаңа желі іске қосылды. Жобаның инвестициялық құны 15 млн АҚШ доллары.Облыс әкімдігі зауыттың тұрақты жұмысын қамтамасыз ету, инфрақұрылымдық қолдау көрсетуде кешенді шаралар атқарып келеді. Өз кезегінде қытайлық инвестор құны 55 млн АҚШ доллары болатын, екі кезеңнен тұратын жаңа инвестициялық жобаны жүзеге асыруды жоспарлаған.Шыны зауытының жұмысы аймақта ілеспе өндірістердің дамуына серпін берді. Алдағы уақытта айна, бөтелке және шыңдалған шыны шығаратын зауыттар ашылмақ. Бұл жобалар өңір экономикасын әртараптандыруға, шыны кластерін дамытуға, жаңа жұмыс орындарын ашуға, сондай-ақ импортты алмастырып, ішкі нарықты сапалы отандық өніммен қамтамасыз етуге мүмкіндік береді. Бастамалар облыстық бюджетке қосымша кіріс әкеліп, жергілікті тұрғындарды жұмыспен қамтуға жағдай жасайды.Фото: Қызылорда облысы әкімінің баспасөз қызметі

Аймақ басшысы «Orda Glass Ltd» шыны зауытының басшылығымен кездесті

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда қалалық филиалының мәжіліс залында ҚР Президенті Қасым-Жомарт Тоқаевтың 2025 жылғы 8 қыркүйекте жариялаған «Жасанды интеллект дәуіріндегі Қазақстан: өзекті мәселелер және түбегейлі цифрлық өзгерістер арқылы шешу» атты Қазақстан халқына Жолдауы талқыланды.Жиынға фракция мүшелері, Саяси кеңес мүшелері қатысты. Басқосуда Мемлекет басшысының елдің әлеуметтік-экономикалық дамуына, цифрлық технологияларды енгізуге, жасанды интеллектті тиімді пайдалануға бағытталған бастамалары кеңінен сөз болды.Талқылау барысында фракция мүшелері Жолдаудың басты басымдықтарына тоқталды. Атап айтқанда, цифрлық қауіпсіздікті қамтамасыз ету, халықтың тұрмыс сапасын арттыру, білім мен ғылымды қолдау, сондай-ақ жасанды интеллектке негізделген жаңа өндірістерді дамыту мәселелері ерекше аталды.<img src="https://knadmin.beoblood.kz/uploads/2_5f115e79f4.jpg" alt="2.jpg">Пікір алмасу барысында қатысушылар Президент бастамалары еліміздің жаһандық бәсекеге қабілеттілігін арттыруға серпін беретініне сенім білдірді. Сонымен қатар, жолдауда айтылған міндеттерді орындауға әр азамат өз үлесін қосуы қажет екені атап өтілді.Жиын қорытындысында Мемлекет басшысының Жолдауын жүзеге асыру елдің дамуы мен болашағына жол ашатыны айтылып, барлық деңгейдегі бастауыш партия ұйымдары мен қоғам өкілдерімен бірлесе жұмыс жасау ұсынылды.

Жолдауды жүзеге асыру тетіктері талқыға түсті

<a href="https://kyzylorda-news.kz/">Kyzylorda-news.kz</a> &nbsp; «Азаматтарға арналған үкімет» мемлекеттік корпорациясында Отбасы күніне орай ұйымдастырылған 10 күндік мерекелік іс-шаралар жалғасуда. Әр күн белгілі бір тақырыпқа арналып, қоғамдағы отбасының орны мен маңызын айқындайтын мазмұнды бағдарламалар ұсынылуда.Бүгінгі күн «Саналы ұрпақ» тақырыбымен өтті. Бұл бастама отбасы құндылықтарын дәріптеп қана қоймай, жас ұрпақтың саналы, жауапты, ізгілікті болып қалыптасуына бағытталған.Іс-шараға АХАТ басқармасының басшысы Ботагоз Идрисова және теолог маман арнайы қатысып, жастармен сұхбат жүргізді. Сондай-ақ психолог мамандардың қатысуымен студенттерге арналған семинарлар өтті. Кездесуде саналы отбасының негізгі қағидалары, өзара сыйластық пен сенім, ата-ана мен бала арасындағы ашық қарым-қатынастың маңызы сөз болды.Ботагоз Идрисова отбасылық құндылықтардың қоғамдағы тұрақтылық пен рухани даму үшін ерекше рөл атқаратынын атап өтті.Осындай тағылымды кездесулер жастарға өз болашағына жауапкершілікпен қарауға, саналы шешім қабылдауға және отбасын құндылық ретінде бағалауға ықпал етеді.

Қазақстан және Қызылорда облысының жаңалықтары: Қоғам