<a href="https://kyzylorda-news.kz/">Kyzylorda-news.kz</a> Нью-Йорк, 2026 жылғы 31 тамыз - Біріккен Ұлттар Ұйымының Бас Ассамблеясы Қазақстан Республикасының бастамасымен әзірленген «Халықаралық планетаны көгалдандыру күні» қарарын қабылдап, 22 сәуірді Халықаралық планетаны көгалдандыру күні деп жариялады.Халықаралық күнді белгілеу туралы бастаманы Қазақстан Республикасының Президенті Қасым-Жомарт Тоқаев 2025 жылғы қыркүйекте БҰҰ Бас Ассамблеясының 80-сессиясының жалпы пікірталастары барысында ұсынған болатын.Қарарға әлемнің түрлі өңірлерін білдіретін 32 мемлекет тең автор болды. Бұл аталған бастаманың халықаралық қоғамдастық үшін сұранысқа ие әрі өзекті екенін көрсетеді.Қарардың қабылдануы Қазақстанның жаһандық экологиялық күн тәртібін ілгерілетуге және қоршаған ортаны қорғау, экожүйелерді қалпына келтіру, жасыл желектер аумағын кеңейту және экологиялық мәдениетті қалыптастыру бағытындағы халықаралық күш-жігерді біріктіруге қосып келе жатқан дәйекті үлесін көрсетеді.Құжат әлемдік қоғамдастықтың көгалдандыру мен табиғи экожүйелерді қалпына келтірудің маңыздылығы туралы хабардарлығын арттыруға, сондай-ақ мемлекеттерді, БҰҰ жүйесін, халықаралық және өңірлік ұйымдарды, азаматтық қоғамды және басқа да мүдделі тараптарды тиісті іс-шаралар мен бастамаларды жүзеге асыруға ынталандыруға бағытталған.Халықаралық күннің белгіленуі Қазақстанда жүзеге асырылып жатқан қоршаған ортаға жауапкершілікпен қарауды қалыптастыруға, аумақтарды абаттандыруға және қоғамның экологиялық мәдениетін арттыруға бағытталған «Таза Қазақстан» жалпыұлттық экологиялық акциясының мақсаттарымен үндеседі.Қарардың қабылдануы Мемлекет басшысының тағы бір халықаралық бастамасының іс жүзінде жүзеге асырылуы болды және Қазақстанның орнықты даму мен болашақ ұрпақ үшін қоршаған ортаны сақтауға бағытталған көпжақты ынтымақтастықты нығайту жөніндегі тәсілдерінің сұранысқа ие екенін растайды.Сурет: gov.kz

Қазақстанның бастамасымен БҰҰ Бас Ассамблеясы Халықаралық планетаны көгалдандыру күнін жариялады

<a href="https://kyzylorda-news.kz/">Kyzylorda-news.kz</a> 2026 жылғы 1 қыркүйектен бастап Қазақстан Республикасында ауылдық шағын жинақты мектептердің білім беру үдерісіне жасанды интеллект технологияларын енгізуге бағытталған ұлттық білім беру платформасының пилоттық жобасы іске қосылды.Пилоттық жобаға алғашқы кезеңде Қызылорда және Павлодар облыстарының 10 шағын жинақты мектебі қатысуда. Оның ішінде Қызылорда облысынан Арал ауданындағы №58, №227 және №22 мектептер, Қазалы ауданындағы №259 мектеп және Шиелі ауданындағы №84 шағын жинақты мектеп пилоттық жобаға енгізілді.Жобаның алғашқы сабағына Қазақстан Республикасы Премьер-Министрінің орынбасары – Жасанды интеллект және цифрлық даму министрінің міндетін атқарушы Жаслан Мәдиев қатысты.Жоба аясында ауыл мектептерінің оқушыларына сабақтарды Астана қаласының жетекші педагогтері арнайы студиядан тікелей эфир арқылы өткізеді. Оқушылар цифрлық платформа арқылы онлайн қосылып, білім алады. Ал мектептердегі жергілікті педагогтер онлайн және офлайн оқыту үдерістерін үйлестіріп, оқушыларға әдістемелік қолдау көрсетеді.Ұлттық платформа тікелей оқытуды, заманауи білім беру контентін және жасанды интеллект құралдарын біріктіреді. Бұл өз кезегінде ауылдық шағын жинақты мектептердің оқушыларына тәжірибелі педагогтердің сапалы білім беруіне қолжетімділікті кеңейтіп, қала және ауыл мектептері арасындағы білім сапасындағы алшақтықты төмендетуге мүмкіндік береді.Жобаны іске асыру аясында 2026 жылғы 21–25 тамыз аралығында Астана қаласында педагогтерге арналған ALFA Kazakhstan Teacher Training Camp бес күндік оқыту бағдарламасы ұйымдастырылды. Оқу барысында мұғалімдер жасанды интеллект платформасын пайдалану және бірлескен оқыту моделін тиімді жүзеге асыру бағытында арнайы даярлықтан өтті.Алдағы кезеңде пилоттық жобаның нәтижелері негізінде ұлттық платформаны еліміздің өзге өңірлеріндегі мектептерге кезең-кезеңімен кеңейту жоспарлануда.

Қазақстанда ауыл мектептерінде жасанды интеллект білім беру платформасының пилоттық жобасы іске қосылды

<a href="https://kyzylorda-news.kz/">Kyzylorda-news.kz</a> Шиелі ауданының әкімі Айтбай Жандарбеков тиісті сала басшыларымен бірге Мемлекет басшысының бастамасымен жүзеге асып жатқан “Таза Қазақстан” экологиялық акциясы аясында Шиелі ауданындағы абаттандыру және көгалдандыру жұмыстарының барысын аралап, атқарылып жатқан жұмыстарды жан-жақты саралады.Аралау барысында кент аумағындағы орталық көшелердің тазалығы, санитарлық жағдайы, кәсіпкерлік нысандардың сыртқы келбеті, демалыс орындарын күтіп ұстау назарға алынды.&nbsp;Сонымен қатар, аудан тұрғындарының қауіпсіз ортаны қалыптастыру үшін аудан басшысы жаңа жобаларды қолға алып, жол көлік оқиғаларының алдын алу және жол кептелістерін болдырмау мақсатында автомобиль жолдарын салу мәселесін айқындады. Сондай-ақ жол бойындағы ретсіз қоқыс орындарын жою, көше бойларын біріздендіру және қоғамдық орындардың эстетикалық келбетін жақсарту бағытындағы жұмыстар пысықталды.Аудан әкімі көркейту-көгалдандыру жұмыстарының сапалы әрі белгіленген мерзімде орындалуы маңызды екенін атап өтіп, жауапты сала басшыларына нақты тапсырмалар жүктеді. Әсіресе, тазалық жұмыстарын жүйелі түрде жүргізу, тұрғындардың экологиялық мәдениетін қалыптастыру бағытындағы жұмыстарды күшейту қажеттігін айтты.Сондай-ақ, аудан басшысы Айтбай Жандарбеков тазалық пен тәртіп - баршаға ортақ міндет екенін атап өтіп, тұрғындарды туған жердің тазалығына бейжай қарамай, қоршаған ортаны қорғау мен елді мекеннің көркеюіне бір кісідей атсалысуға шақырды.<img src="https://knadmin.beoblood.kz/uploads/Shieli_abattandyru_zh_mystary_2_e789dc3237.jpg" alt="Шиелі абаттандыру жұмыстары 2.jpg">

«Таза Қазақстан»: Шиелі ауданында абаттандыру мен тазалық жұмыстары жүйелі жалғасуда

<a href="https://kyzylorda-news.kz/">Kyzylorda-news.kz</a> Отан қорғау – әр азаматтың қасиетті борышы. Әскери қызмет – ер жігіттің азаматтық жауапкершілігін арттырып, елге деген сүйіспеншілігін нығайтатын маңызды мектеп.Қазалы ауданында күзгі мерзімді әскери қызметке шақырылған азаматтарды әскер қатарына шығарып салуға арналған патриоттық іс-шара өтті.Қазалы мәдени-демалыс кешенінің «Даңқ» аллеясында ұйымдастырылған шараға аудан әкімінің орынбасары Жәнібек Алиев, аудандық қорғаныс істері бөлімінің бастығы Нұрлыбек Сейтханов, Ауған соғысының ардагері, «Қызыл Жұлдыз» орденінің иегері Күмісбай Серікбаев, әскерге шақырылушылардың ата-аналары мен аудан жастары қатысты.Іс-шара барысында сөз алған аудан әкімінің орынбасары Жәнібек Алмасұлы жас сарбаздарға ақ жол тілеп, әскери тәртіпті қатаң сақтап, Отан алдындағы азаматтық борыштарын абыроймен өтеудің маңыздылығына тоқталды.<blockquote>«Әскер – азаматтың өміріндегі маңызды кезеңдердің бірі. Бұл жерде сіздер жауапкершілікті, тәртіпті, отансүйгіштікті және бірлік пен өзара қолдауды үйренесіздер. Ел қорғау – үлкен мәртебе әрі жауапкершілік. Сондықтан әскери міндеттеріңізді адал атқарып, ата-аналарыңыздың, туған жерлеріңіз бен елдің үмітін ақтайтын азамат болыңыздар. Әскери қызметті абыроймен атқарып, туған жерге аман-есен оралуларыңызға тілектеспін. Алдарыңыздан ақ жол ашылып, қызметте жақсы жағынан көрініп, болашақта ел игілігіне қызмет ететін білікті маман болуларыңызға тілектеспін», – деді Жәнібек Алмасұлы.</blockquote>Сондай-ақ шарада аудандық қорғаныс істері бөлімінің бастығы Нұрлыбек Сейтханов пен Ауған соғысының ардагері Күмісбай Серікбаев жас сарбаздарға әскери қызметтің маңызы жөнінде айтып, ел қорғау жолында табандылық пен жігер танытуға шақырды.Жас сарбаздарға ата-аналары да ақ батасын беріп, ел алдындағы міндеттерін абыроймен атқарып, аман-есен елге оралуына тілектестігін білдірді.Айта кетейік, күзгі мерзімді әскери қызметке аттанған 10 қазалылық азамат Қазақстан Республикасы Ұлттық қауіпсіздік комитеті Шекара қызметінің әскери бөлімдерінде Отан алдындағы борыштарын өтейтін болады.&nbsp;

Қазалылық жастар Отан алдындағы азаматтық парызын өтеуге аттанды

<a href="https://kyzylorda-news.kz/">Kyzylorda-news.kz</a> Қызылордадағы "Студенттер сарайында" Қазақстан Республикасының Президенті Қасым-Жомарт Кемелұлы Тоқаевтың «Әділетті қоғамға – шыншыл сөз» атты кітабын талқылауға арналған өңірлік дөңгелек үстел өтті.Алқалы жиынды облыс әкімінің орынбасары Мейрамбек Шермағанбет жүргізді. Оған зиялы қауым, мемлекет және қоғам қайраткерлері, ғылыми-академиялық орта өкілдері, заңгерлер мен белсенді жастар қатысты.Жиында Мемлекет басшысының еңбегінде көтерілген негізгі тақырыптар, қоғамдық-саяси, әлеуметтік, рухани-адамгершілік мәселелер мен ел дамуының стратегиялық бағыттары жан-жақты талқыланды.Мемлекет және қоғам қайраткері Мұрат Бақтиярұлы «Әділетті Қазақстан, Таза Қазақстан, халықаралық саясат» атты баяндамасында еліміздегі жүйелі реформалар, қоғамдық жауапкершілік және экологиялық бастамалардың өзара сабақтастығына тоқталды.Қорқыт ата атындағы Қызылорда университетінің басқарма төрағасы – ректоры, облыстық қоғамдық кеңес төрағасы Наурызбай Байқадамов өз баяндамасында бәсекеге қабілетті ұлт қалыптастырудағы сапалы білім, ғылым мен тиімді мемлекеттік басқарудың маңызын атап өтті.Қазақстан Жазушылар одағы облыстық филиалының төрағасы Қаршыға Есімсейітова «Тарих, мәдениет және руханият туралы пайымдар» тақырыбында ұлттық құндылықтарды сақтау, тарихи сананы жаңғырту және рухани сабақтастық мәселелерін ортаға салды.Қазақстан Республикасы Президенті жанындағы Мемлекеттік басқару академиясы Қызылорда облысы бойынша филиалының директоры, заң ғылымдарының кандидаты Ақзада Мадалиева «Конституция және Заң мен Тәртіп» тақырыбындағы баяндамасында құқықтық мемлекетті нығайту, заң үстемдігін қамтамасыз ету және азаматтық жауапкершілікті арттыру мәселелерін саралады.Қорқыт ата атындағы Қызылорда университетінің философия докторы (PhD) Серікхан Жүзеев «Жастарға арналған ойлар: білім, еңбек, жауапкершілік және болашақ» тақырыбында сөз сөйлеп, жас ұрпақтың бойында білімге ұмтылыс, еңбекқорлық, отаншылдық және жауапкершілік құндылықтарын қалыптастырудың маңызын атап өтті.Дөңгелек үстелге қатысушылар Мемлекет басшысының еңбегіндегі әділеттілік, заң үстемдігі, ашықтық, адал еңбек пен жауапкершілік қағидаттарының қоғам дамуындағы маңызын жан-жақты талқылады.Пікір алмасу кезінде «Заң мен Тәртіп» қағидатын қоғамдық санада орнықтыру, ұлттық руханиятты дамыту, білім мен ғылымның беделін арттыру, жастарды адал еңбек пен азаматтық жауапкершілікке баулубойынша ұсыныстар айтылды.Жиын Мемлекет басшысының еңбегінде көтерілген бастамалар мен құндылықтарды қоғамда кеңінен насихаттауға, ел болашағына қатысты өзекті мәселелер төңірегінде мазмұнды пікір алмасуға мүмкіндік берген маңызды диалог алаңына айналды.

Қызылордада Мемлекет басшысының «Әділетті қоғамға – шыншыл сөз» кітабы талқыланды

<a href="https://kyzylorda-news.kz/">Kyzylorda-news.kz</a> Тіл – ұлттың жаны, халықтың рухани өзегі. Ана тілін ардақтау – елдікті, ұлттық болмысты, атадан балаға жалғасқан асыл мұраны құрметтеу деген сөз. Мемлекеттік тілдің мәртебесін көтеру, оның қадір-қасиетін жас ұрпаққа насихаттау мақсатында елімізде жыл сайын түрлі тағылымды іс-шаралар ұйымдастырылып келеді.Осы игі бастамалардың жалғасы ретінде 5 қыркүйек – Қазақстан халқының тілдері күніне орай және қазақтың көрнекті ағартушысы, ақын, ғалым, қазақ тіл білімінің негізін қалаушы, ұлт ұстазы Ахмет Байтұрсынұлының туғанына 154 жыл толуына арналған «Ұлт ұстазы ұлықтаған ұлы тіл» атты облыстық жыр мүшәйрасы болып өтті.Тағылымды шараны Мәдениет және тілдерді дамыту бөлімі ұйымдастырды. Мүшәйраның негізгі мақсаты – мемлекеттік тілдің мәртебесін арттыру, қазақ тілінің көркемдігі мен құдіретін кеңінен насихаттау, ұлттық әдебиетке деген қызығушылықты арттыру, жас таланттарға қолдау көрсету және Ахмет Байтұрсынұлының ұлт үшін атқарған өлшеусіз еңбегін кейінгі ұрпаққа дәріптеу.Ахмет Байтұрсынұлы – қазақ халқының рухани тарихында айрықша орны бар ұлы тұлға. Ол бар ғұмырын халқына қызмет етуге арнап, қазақтың сауатын ашуға, ана тілін зерттеуге, ұлттық жазу мен білім беру ісін дамытуға зор еңбек сіңірді. Ғалымның қазақ тілінің ғылыми жүйесін қалыптастырудағы еңбегі бүгінгі күнге дейін маңызын жойған жоқ. &nbsp;Оның тіл, әдебиет, ұлт тағдыры жөніндегі ойлары жас ұрпаққа бағыт-бағдар беретін рухани мұра болып қала береді.Ұлт ұстазының өнегелі өмір жолын дәріптеу мен ана тіліміздің абыройын асқақтатуды мақсат еткен жыр мүшәйрасы да мазмұны мен тәрбиелік мәні жағынан ерекше болды. Жыр додасына қатысушылар өз шығармаларында қазақ тілінің қасиетін, туған жердің қадірін, ел мен жерге деген сүйіспеншілікті, Отанға деген адалдықты, ұлттық құндылықтарды арқау етті.Көркем сөздің қуатын сезінген қатысушылар өз жырларын мәнерлеп оқып, тыңдарманға ой саларлық өлеңдерін ұсынды. Әрбір шығармада ана тілін құрметтеу, туған елге деген мақтаныш, ұлттық рухты биік ұстау секілді маңызды тақырыптар көрініс тапты. Ақындық өнер арқылы қазақ тілінің байлығы мен бейнелілігін танытуға талпынған қатысушылардың өнері көрерменнің көңілінен шықты. Мүшәйраның мазмұнын байыта түскен ерекше сәттердің бірі – Отан алдындағы азаматтық борышын өтеп жүрген 5547 әскери бөлімінің 1 взвод 2 бөлімше сарбазы, атқыш Балтабаев Біржан мен 3 взвод 3 бөлімше аға сарбазы Керімбектің Абайдың жыр додасына қатысуы болды.Ел тыныштығын күзетіп, әскери міндетін абыроймен атқарып жүрген сарбаздардың ана тіліне арналған шығармашылық сайысқа қатысуы көпшілікке ерекше әсер қалдырды. Әскери киімдегі жас жігіттердің сахна төріне шығып, қазақтың қасиетті тілін жырға қосуы – Отанға деген сүйіспеншіліктің, ұлттық рухтың жарқын көрінісіндей әсер қалдырды.Сайыс барысында Балтабаев Біржан мен Керімбек Абай өз өнерлерін ортаға салып, жыр сүйер қауымның ыстық ықыласына бөленді. Сарбаздардың орындауындағы өлеңдер мазмұндылығымен, отансүйгіштік рухымен ерекшеленді. Туған жерге, елге, ана тілге деген сүйіспеншілікті жырлаған олардың өнері әділ қазы алқалары мен көрермен тарапынан жоғары бағаланып, зор қошеметке ие болды.Жас сарбаздардың әскери міндетін атқарып қана қоймай, ұлттық өнер мен әдебиетке деген қызығушылығын танытып, мемлекеттік тілдің мәртебесін көтеруге бағытталған шараға белсенді қатысуы – көпке үлгі боларлық іс. Себебі Отанға қызмет ету тек ел шекарасын қорғаумен ғана шектелмейді. Елдің тарихын, мәдениетін, тілін, дәстүрін құрметтеу де – азаматтық парыздың маңызды бөлігі.Мәдениет пен руханият тоғысқан шара барысында көрермендер де қатысушылардың өнеріне қолдау білдіріп, әрбір сәтін ықыласпен тамашалады. Әсіресе, сарбаздардың өнер көрсетуі көпшілікке көтеріңкі көңіл-күй сыйлап, олардың бойындағы өнерге деген құштарлықты айқын аңғартты.Мүшәйра соңында белсенділік танытып, өнерлерімен көпшіліктің көңілінен шыққан 5547 әскери бөлімінің сарбаздары Балтабаев Біржан мен Керімбек Абайға Алғыс хат табысталып, бағалы сыйлықтар табыс етілді. Бұл марапат – олардың жыр мүшәйрасына белсенді қатысқанына, ана тілін дәріптеуге қосқан үлесіне берілген лайықты баға.Фатима Маратова,Тәрбие және әлеуметтік-құықтаржөніндегі бөлімше бастығыныңаға көмекшісі&nbsp;

«Ұлт ұстазы ұлықтаған ұлы тіл» атты облыстық жыр мүшәйрасы өтті

<a href="https://kyzylorda-news.kz/">Kyzylorda-news.kz</a> Қаламын серік етіп, ғұмырын журналистикаға арнаған ардагер- журналист, жазушы-сатирик Қайырбек Мырзахметұлы 90 жасқа толды. Қаламгер тоқсанның төріне шықса да қолынан қаламын тастамай, әлі де болса әлеумет үшін қызмет етіп келеді.&nbsp;Мерейлі жасқа орай Қайырбек Мырзахметұлын бір топ азамат арнайы үйіне барып құттықтады. Қаламгерге облыс әкімі Мұрат Ергешбаевтың &nbsp;құттықтау хатын облыстық қоғамдық даму басқармасының басшысы Руслан Қаюпов табыстап, шапан жапты. Сондай-ақ облыстық ардагерлер кеңесінің атынан Күләй Ермағамбетова мен Жұмабек Әлиев ардагер-журналисті мерейтойымен құттықтап, облыстық ардагерлер кеңесінің төрағасы Серік Дүйсенбаевтың құттықтау хатын табыстады. Қос азамат мерейтой иесінің &nbsp;иығына шапан жауып, ақжарма тілегін жеткізді.Қайырбек Мырзахметұлын әріптестері де арнайы құттықтады. «Сыр медиа» ЖШС бас директоры Марат Аралбаев пен Қазақстан Журналистер одағы Қызылорда облыстық филиалының төрағасы Қуат Шарабидинов, сала ардагерлері Кенжалы Ерімбетов пен Бақыт Қайымов қаламгерге баспадан күні бүгін шыққан «Армысың, 90!» атты жаңа кітабын табыс етті.&nbsp;<img src="https://knadmin.beoblood.kz/uploads/Whats_App_Image_2026_09_03_at_16_02_17_792554ed26.jpeg" alt="Қайырбек Мырзахметұлы 90 жас мерейтой.jpeg">Бұл – мерейтой иесінің қаламгерлік жолындағы кезекті еңбегі. Қайырбек Мырзахметұлы осы күнгі Қоғалыкөл ауылында дүниеге келген. Елу жылдан астам уақыт бойы облыстық «Сыр бойы» газетінде еңбек етіп, журналистиканың ыстығына күйіп, суығына тоңған ардагер өңірдің қоғамдық өмірін, ел ішіндегі елеулі оқиғаларды жазып, талай буын оқырманға ой салды. Қаламгердің қаламынан «Сыр перзенті», «Менің бабаларым», «Ағалар салған жол», «Сырда туып, Сырда өстім», «Аманат», «Көзкөргендер» &nbsp;сынды кітаптар дүниеге келді. Енді міне, тоқсанның төріне шыққан шағында оқырманға «Армысың, 90!» атты жаңа кітабын ұсынып отыр. Бұл кітапты қаламгердің тоқсан жылдық ғұмырының, шығармашылық жолының, елмен етене араласқан өмірінің бір үзік шежіресі деуге болады.<blockquote>– Тоқсанға келсем де қолымнан қаламымды тастамадым. Оқырманның талабы бөлек. Оншақты газет аламын, астын сызып оқып отырамын. Әсіресе «Сыр бойына» деген құрметім бөлек. Барған жерімде газетке жазылуды насихаттап жүремін, – деген Қайырбек Мырзахметұлы құттықтап келген азаматтарға алғыс айтып, ризашылығын білдірді.</blockquote>Сурет: Нұрболат Нұржаубай

Қарымды қаламгердің мерейтойымен құттықтады

<a href="https://kyzylorda-news.kz/">Kyzylorda-news.kz</a> Бүгінгі таңда Сырдария өзені арқылы аудан аумағына 185 текше метр су келіп түсуде. Алдағы күндері Шардара су қоймасынан Сырдария өзенінің төменгі ағысына қарай секундына 250-300 текше метрге дейін су көлемі жіберіледі деп күтілуде. Қазір Ә.Тыныбаев атындағы су торабы арқылы Ақсай арнасына 3, «Оң жаға» каналына 7, «Сол жаға» каналына 10 текше метр секундына су жіберілуде.Осыған сәйкес, бүгін Қазақстан Республикасы Су ресурстары және ирригация министрлігінің Су ресурстарын реттеу, қорғау және пайдалану комитетінің төрағасы Сейілбек Нұрымбетов пен Арал-Сырдария бассейндік инспекциясының басшысы Зейнулла Қазтоғанов ауданға жұмыс сапарымен келді.Жұмыс сапары барысында комитет төрағасы мен инспекция басшысы аудан әкімі Алмасбек Есмахановпен бірге Ә.Тыныбаев атындағы су торабына барып, Сырдария өзеніне келіп жатқан суды тиімді пайдалану, оны реттеу және ауыл шаруашылығы саласына бағыттау мәселелерін талқылады.Кездесу барысында комитет төрағасы Сейілбек Нұрымбетов өңірдегі барлық дарияаралық, шабындық каналдар мен көлдер жүйесіне суды жеткізіп, толықтыру қажеттігі жөнінде мәселелер талқыланды.Су торабынан кейін ауданға жұмыс сапарымен келген делегация құрамын аудан басшысы Басықара ауылындағы «АралРыбторг» ЖШС-нің құны 650 млн теңге болатын тауарлы балық өсіру тоғанының жұмысымен таныстырды. Өткен жылдың қазан айында аталған шаруашылықтың балық өсіру тоғандарына 360 мың дана тұқым әкелініп салынған. Бүгінде шаруашылықта тоғандардан балық жинау жұмыстарына дайындық жұмыстары жүргізілуде. Балық жинау жұмыстары қазан айында жүргізілмек.«Арал Рыбторг» ЖШС-нің жетекшісі Қуаныш Өмірзақовтың айтуынша қазан айында тоғандардан 500 тоннаға жуық тауарлы балық алу жоспарлап отыр. Негізгі мақсат - өсірілген балықтардан тауарлы балық шығару және оны халықтың игілігіне жарату.

ҚР Су ресурстары және ирригация министрлігінің комитет төрағасы Қазалы ауданына жұмыс сапарымен келді

<a href="https://kyzylorda-news.kz/">Kyzylorda-news.kz</a> Отан қорғау – әр азаматтың қасиетті борышы. Әскери қызмет – ер жігіттің азаматтық жауапкершілігін арттырып, елге деген сүйіспеншілігін нығайтатын маңызды мектеп.Бүгін Қазалы ауданында күзгі мерзімді әскери қызметке шақырылған азаматтарды әскер қатарына шығарып салуға арналған патриоттық шара өтті.Қазалы мәдени-демалыс кешенінің «Даңқ» аллеясында ұйымдастырылған шараға аудан әкімінің орынбасары Жәнібек Алиев, аудандық қорғаныс істері бөлімінің бастығы Нұрлыбек Сейтханов, Ауған соғысының ардагері, «Қызыл Жұлдыз» орденінің иегері Күмісбай Серікбаев, әскерге шақырылушылардың ата-аналары мен аудан жастары қатысты.Іс-шара барысында сөз алған аудан әкімінің орынбасары Жәнібек Алмасұлы жас сарбаздарға ақ жол тілеп, әскери тәртіпті қатаң сақтап, Отан алдындағы азаматтық борыштарын абыроймен өтеудің маңыздылығына тоқталды.<blockquote>«Әскер – азаматтың өміріндегі маңызды кезеңдердің бірі. Бұл жерде сіздер жауапкершілікті, тәртіпті, отансүйгіштікті және бірлік пен өзара қолдауды үйренесіздер. Ел қорғау – үлкен мәртебе әрі жауапкершілік. Сондықтан әскери міндеттеріңізді адал атқарып, ата-аналарыңыздың, туған жерлеріңіз бен елдің үмітін ақтайтын азамат болыңыздар. Әскери қызметті абыроймен атқарып, туған жерге аман-есен оралуларыңызға тілектеспін. Алдарыңыздан ақ жол ашылып, қызметте жақсы жағынан көрініп, болашақта ел игілігіне қызмет ететін білікті маман болуларыңызға тілектеспін», – деді Жәнібек Алмасұлы.</blockquote>Сондай-ақ шарада аудандық қорғаныс істері бөлімінің бастығы Нұрлыбек Сейтханов пен Ауған соғысының ардагері Күмісбай Серікбаев жас сарбаздарға әскери қызметтің маңызы жөнінде айтып, ел қорғау жолында табандылық пен жігер танытуға шақырды.Жас сарбаздарға ата-аналары да ақ батасын беріп, ел алдындағы міндеттерін абыроймен атқарып, аман-есен елге оралуына тілектестігін білдірді.Айта кетейік, күзгі мерзімді әскери қызметке аттанған 10 қазалылық азамат Қазақстан Республикасы Ұлттық қауіпсіздік комитеті Шекара қызметінің әскери бөлімдерінде Отан алдындағы борыштарын өтейтін болады.&nbsp;

<a href="https://kyzylorda-news.kz/">Kyzylorda-news.kz</a> Бүгін «Достық үйінде» Қазақстан Республикасы Құрылтай депутаттарының сайлауын жоғары деңгейде ұйымдастыруға елеулі үлес қосқан мамандарды марапаттау рәсімі өтті. Салтанатты жиынға облыстық қоғамдық даму басқармасының басшысы Руслан Каюпов қатысып, бірқатар азаматқа облыс әкімінің арнайы «Алғыс хатын» табыстады.Іс-шара барысында басқарма басшысы жауапты кезеңде ұйымшылдық пен жоғары кәсібилік танытқан мамандардың еңбегін атап өтті.<img src="https://knadmin.beoblood.kz/uploads/El_m_ddesi_zholynda_y_e_bek_elendi_2_39a46fac2c.jpg" alt="Ел мүддесі жолындағы еңбек еленді 2.jpg"><blockquote>– Бұл науқан азаматтардың қоғамдық-саяси үдерістерге белсенді араласуына, азаматтық ұстанымын танытуына мүмкіндік берді. Осы кезеңде ақпараттық-түсіндіру жұмыстарын жүйелі жүргізіп, тұрғындарға қажетті ақпаратты уақытылы жеткізуде мемлекеттік органдармен қатар бұқаралық ақпарат құралдарының, азаматтық қоғам институттарының, сарапшылар мен белсенді азаматтардың еңбегі айрықша болды. Сіздердің еңбектеріңізді жоғары бағалаймыз, - деді Руслан Мұхамедәліұлы.</blockquote>Алдымен өңірдің ақпараттық кеңістігінде кәсіби әрі жүйелі жұмыс жүргізіп, қоғамдық маңызы бар шараларды сапалы ақпараттандыруға үлес қосқан бұқаралық ақпарат құралдарының өкілдері марапатталды.Сонымен қатар, Қызылорда облысының қоғамдық даму басқармасының қызметкерлері мен оған қарасты мекемелерінің мамандарына да құрмет көрсетілді.Іс-шара соңында басқарма басшысы марапат иелеріне алғысын білдіріп, өңірдің қоғамдық-саяси дамуына бағытталған жұмыстардың алдағы уақытта да жүйелі түрде жалғасатынын атап өтті.<img src="https://knadmin.beoblood.kz/uploads/El_m_ddesi_zholynda_y_e_bek_elendi_3_fae29bc5ca.jpg" alt="Ел мүддесі жолындағы еңбек еленді 3.jpg">

Ел мүддесі жолындағы еңбек еленді

<a href="https://kyzylorda-news.kz/">Kyzylorda-news.kz</a> Алматы қаласындағы Әбілхан Қастеев атындағы Қазақстан Республикасының Мемлекеттік өнер музейінде қазақ бейнелеу өнерінің көрнекті өкілі, жерлесіміз, Қазақстанның еңбек сіңірген қайраткері, Мемлекеттік сыйлықтың лауреаты Ағымсалы Дүзелхановтың 75 жылдығына арналған тағылымды көрме өтті.1951 жылы Қазалы қаласында дүниеге келген Ағымсалы Дүзелханов ұлттық бейнелеу өнерінің дамуына өлшеусіз үлес қосып, қазақ руханиятында өзіндік қолтаңбасын қалдырған бірегей суретші болды. Кескіндеме, графика және кітап иллюстрациясы салаларында жемісті еңбек етіп, тарихи-фольклорлық тақырыптағы шығармалары арқылы ұлттық өнердің өрісін кеңейтті. Сондай-ақ талай жыл ұстаздық етіп, жас буынға өнердің қыр-сырын үйретіп, кәсіби жол сілтеді.Суретшінің 75 жылдығына арналған көрмеге аудан әкімі Алмасбек Есмаханов арнайы қатысып, сөз сөйледі. Көрме барысында Қызылорда облысының әкімі Ергешбаев Мұрат Нәлқожаұлының Ағымсалы Дүзелхановтың отбасы мен өнерсүйер қауымға арналған арнайы Құттықтау хатын жеткізді.Сондай-ақ аудан әкімі Әбілхан Қастеев атындағы өнер музейіне естелік сыйлық табыстады.Тағылымды шараға Қазақстанның мемлекет және қоғам қайраткері Қуаныш Сұлтанов, жазушы Бексұлтан Нұржекеев, Әшірбек Көпішев, зиялы қауым өкілдері, өнер саласының мамандары мен студент жастар қатысты.Көрмеде жерлесіміздің шығармашылық мұрасы кеңінен таныстырылып, суретшінің ұлттық өнердегі айрықша орнына мән берілді.Шара барысында қазалылықтар атынан белгілі журналист-жазушы, Ақпараттану академиясының академигі Ермек Зәңгіров бастаған жерлестер Ағымсалы Дүзелхановтың жары, қазақтың тұңғыш кәсіби суретшісі Әбілхан Қастеевтің қызы Гүлдария Қастееваға заманауи үлгідегі шапан жауып, қазақы дәстүрмен құрмет көрсетті. Ал Қазалы ауданының Құрметті азаматы, жазушы Молдахмет Қаназов суретшінің жұбайына камзол кигізіп, ақ жаулық тарту етті.Кеш соңында өнер шеберлерінің концерті ұйымдастырылып, көрермендер суретшінің шығармаларынан сыр шертетін көрмені тамашалады.Ағымсалы Дүзелхановтың ғибратты ғұмыры мен мол шығармашылық мұрасы – қазақ өнерінің алтын қорында мәңгі сақталатын құнды қазына. Жерлесіміздің есімін ұлықтап, өнегелі жолын кейінгі ұрпаққа насихаттау – елдік парыз.

Қылқалам шбері Ағымсалы Дүзелхановтың 75 жылдығына орай көрме өтті

<a href="https://kyzylorda-news.kz/">Kyzylorda-news.kz</a> Мемлекет басшысының Жарлығымен Нұрлыбек Машбекұлы Нәлібаев Қазақстан Республикасы Премьер-Министрінің бірінші орынбасары болып тағайындалды, – деп хабарлайды Ақорда.Нұрлыбек Нәлібаевтың Қазақстан Республикасы Премьер-Министрінің бірінші орынбасары лауазымына кандидатурасы Қазақстан Республикасы Құрылтайының Өңірлік және инфрақұрылымдық даму жөніндегі комитетінің отырысында мақұлданды.Мәселені депутаттар «Қазақстан Республикасының Құрылтайы және оның депутаттарының мәртебесі туралы» Қазақстан Республикасының Конституциялық заңының 30-бабына сәйкес қарады.Отырыс қорытындысы бойынша Комитет ұсынылған кандидатты Қазақстан Республикасы Премьер-Министрінің бірінші орынбасары лауазымына тағайындауды ұсынатын қорытынды қабылдады.Сурет: primeminister.kz

Қазақстан және Қызылорда облысының жаңалықтары: Қоғам

Қазақстанның бастамасымен БҰҰ Бас Ассамблеясы Халықаралық планетаны көгалдандыру күнін жариялады

Қазақстанда ауыл мектептерінде жасанды интеллект білім беру платформасының пилоттық жобасы іске қосылды

«Таза Қазақстан»: Шиелі ауданында абаттандыру мен тазалық жұмыстары жүйелі жалғасуда

Қазалылық жастар Отан алдындағы азаматтық парызын өтеуге аттанды

Қызылордада Мемлекет басшысының «Әділетті қоғамға – шыншыл сөз» кітабы талқыланды

«Ұлт ұстазы ұлықтаған ұлы тіл» атты облыстық жыр мүшәйрасы өтті

Қарымды қаламгердің мерейтойымен құттықтады

ҚР Су ресурстары және ирригация министрлігінің комитет төрағасы Қазалы ауданына жұмыс сапарымен келді

Қазалылық жастар Отан алдындағы азаматтық парызын өтеуге аттанды

Ел мүддесі жолындағы еңбек еленді

Қылқалам шбері Ағымсалы Дүзелхановтың 75 жылдығына орай көрме өтті

Нұрлыбек Нәлібаев ҚР Премьер-Министрінің бірінші орынбасары болып тағайындалды