<a href="https://kyzylorda-news.kz/">Kyzylorda-news.kz</a> Бүгін Қармақшы ауданы әкімдігінің мәжіліс залында аудан әкімі Жандос Еркінбектің төрағалығымен кезекті жиналыс өтті.Жиында облыс әкімінің төрағалығымен өткен мәжілісте қаралған мәселелер талқыланып, өткен жылыту маусымының қорытындылары мен алдағы 2026–2027 жылдардағы жылу беру маусымына дайындық барысы қаралды.Қармақшы ауданы бойынша барлық әлеуметтік нысанның жылу жүйелері, отын қоры және коммуналдық қызметтердің қысқы кезеңге дайындығы талқыланды.&nbsp;<blockquote>Осы ретте Жандос Еркінбек: «Жалпы жылу беру маусымы кезек күттірмейтін мәселе. Сондықтан бұл салаға аса жауаптылықпен қарау қажет. Бірінші кезекте тұрғындарды қатты отынмен толық қамтамасыз етуіміз керек», – деп ескертті.</blockquote>Сондай-ақ аудан әкімі жауапты сала басшыларына коммуналдық инфрақұрылым нысандарын уақытылы жөндеу, қалпына келтіру жұмыстарын күшейту қажеттігін айтты. Әлеуметтік нысандардың барлығы белгіленген мерзімде жылу беру маусымына толық дайын болуы керектігін аудандық тұрғын үй-коммуналдық шаруашылық, жолаушылар көлігі және автомобиль жолдары бөліміне тапсырды.Мәжілісте бұдан бөлек, салық базасын ұлғайту мәселелері қаралды. Ауданда тиімді салық саясатын жүргізу, аудандық бюджетке түсімдердің толыққанды түсуін, тиімді игерілуін сапалы ұйымдастыру - басты міндет. Бүгінгі күні аймақ басшысы салық базасын ұлғайтып, қосымша резервтер тартуға ерекше мән беруде. Сондықтан бұл мәселе қазіргі жағдайда өте өзекті болып отыр.Сондай-ақ жолаушылар тасымалын реттеу бойынша: «Жосалы кентінен Қызылорда қаласы және Төретам кентіне жолаушылар тасымалымен айналысып жүрген автокөліктерде қауіпсіздік шараларының сақталуы және автокөлік иелерінің жұмысы заңдылыққа сәйкестігі қатаң қадағалануы қажет»,- деп аудан басшысы бірнеше міндеттерді жүктеді.Жиын қорытындысында тиісті бөлімдер мен мекемелерге тапсырмалар беріліп, қаралған мәселелердің орындалуы әрқашан бақылауда болатыны ескертілді.<img src="https://knadmin.beoblood.kz/uploads/arma_shy_zhylytu_mausymy_orytyndy_2_c0f85283c6.jpg" alt="Қармақшы жылыту маусымы қорытынды 2.jpg">

Коммуналдық қызметтердің қысқы кезеңге дайындығын бақылауға алды

<a href="https://kyzylorda-news.kz/">Kyzylorda-news.kz</a> Бүгін Қазалы ауданының әкімі Алмасбек Есмахановтың төрағалығымен өткен мәжілісте өткен жылыту кезеңінің қорытындылары және алдағы жылыту маусымына дайындық мәселелері қаралды.Мәжілісті бастамас бұрын аудан басшысы алдымен орын алған кадрлық өзгерістерге тоқталып өтті. Қазақстан Республикасының «Сайлау туралы» Конституциялық заңына сәйкес, 2026 жылдың 3 мамыры күні өткен Бірлік ауылдық округі әкімінің сайлауының қорытындысы бойынша ауыл халқының басым дауысына ие болып, Бірлік ауылдық округінің әкімі болып сайланған Аман Бауыржан Толықболұлын мәжіліске қатысушыларға таныстырып өтті.Мұнан кейін аудан әкімі негізгі мәселелерге көшіп алдағы жылыту маусымына дайындық, оқушылардың жазғы демалысын ұйымдастыру, көктемгі әскерге шақыру науқанының орындалу барысы және санитарлық тазалық мәселелеріне тоқталды.Аудан әкімі өткен 2025-2026 жылғы жылыту маусымының тұрақты өткенін атап өтіп, ендігі міндет – алдағы қысқы маусымға сапалы дайындық жүргізу екенін айтты. Осыған байланысты тұрғын үйлер мен әлеуметтік нысандардың дайындығы, қатты отын қорын уақытылы жасақтау, көпқабатты тұрғын үйлердегі жылу жүйелерін ретке келтіру және коммуналдық мекемелердің жөндеу жұмыстарын мерзімінде аяқтау жөнінде жауапты сала басшыларына нақты тапсырмалар берді.Осы ретте аудандағы газдандыру жұмыстарының қарқынына тоқталып, биыл Жанқожа батыр, Бекарыстан би, Майдакөл және Үрмәш Түктібаев ауылдарын табиғи газға қосу жоспарланып отырғанын айтып, әлеуметтік және әкімшілік ғимараттарды да газға бейімдеу жобаларын жеделдетуді тапсырды.Күн тәртібіндегі келесі мәселе – оқушылардың жазғы демалысын ұйымдастыру болды. Мәжілісте аудан басшысы Қазалы қаласындағы «Шағала» балаларды сауықтыру лагерінің қазіргі жағдайы сынға алынып, лагерь аумағын тазалау, ғимараттарды ретке келтіру және балалардың қауіпсіз әрі сапалы демалысын қамтамасыз ету бойынша жауапты сала басшыларына нақты міндеттер жүктеді. Сондай-ақ санитарлық-эпидемиологиялық талаптардың қатаң сақталуын ескертті.Бұдан бөлек, көктемгі әскерге шақыру науқанының орындалу барысы қаралып, жоспардың төмен деңгейде орындалып отырғанын сынға алды. Ауылдық округ әкімдері мен жауапты мекеме басшыларына әскерге шақырылушыларды нақтылау, шақыру қағаздарын табыстау және медициналық тексеруден өткізу жұмыстарын күшейтуді тапсырды.Мәжіліс соңында аудан аумағындағы санитарлық тазалық, көркейту-көгалдандыру, түнгі жарықшамдар мен қоғамдық орындардың жай-күйі бойынша кемшіліктер айтылып, барлық кент, қала және ауыл әкімдеріне тазалық жұмыстарын жүйелеу жөнінде тапсырмалар берілді.<img src="https://knadmin.beoblood.kz/uploads/azaly_zhylytu_mausymy_orytyndy_2_c98b8bcdc7.jpg" alt="Қазалы жылыту маусымы қорытынды 2.jpg">

Алдағы жылыту маусымына дайындық және мерзімді әскерге шақыру мәселесі қаралды

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен өткен Үкімет отырысында жылу беру маусымының қорытындыcы және алдағы кезеңге дайындық барысы талқыланды. Оған облыс әкімі Нұрлыбек Нәлібаев селекторлық режим арқылы қатысты.Үкімет отырысынан кейінгі мәжілісте аймақ басшысы жауапты тұлғаларға барлық әлеуметтік нысанды қыркүйек айына дейін, мектептерді тамыздың соңына дейін жылу беру маусымына толық дайындауды тапсырды.<blockquote>«Қала, аудан әкімдері, тиісті басқарма басшылары әлеуметтік нысандардың дайындығын күнделікті бақылауға алып, жұмысты жоспарға сәйкес жүргізіңіздер. Жылу беру маусымына қажетті көмір көлемін анықтау керек. Жеткізуші операторлармен алдын ала келісім жасасып, көмір қорын жасақтауды жаз мезгілінен бастаңыздар. Алдағы жылу беру маусымының дайындығына, жұмыс сапасына күнделікті мониторинг жүргізу керек», – деді Нұрлыбек Машбекұлы.</blockquote>Бұдан бөлек, заңсыз жолаушылар тасымалын тоқтату, апатты жағдайдағы ғимараттарды заңнамада белгіленген тәртіпке сәйкес комиссия арқылы есептен шығару, санитарлық тазалық жұмыстарын күнделікті бақылау тапсырылды.Айта кетейік, өңірде 2025-2026 жылғы жылу беру маусымы штаттық режимде өтіп, сәуір айында аяқталды. Қазір алдағы жауапты маусымға дайындық жоспарға сәйкес жүргізілуде.Биыл жылумен қамту нысандарын жаңғыртуға 7 млрд. 400 млн. теңге қаржы қаралған. Республикалық бюджеттен бөлінген 3 млрд. 622 млн. теңгеге 6 жобаның құрылысы аяқталып, қабылдануда. Сонымен қатар, 1 газтурбиналық қондырғы, 14 бу қазандығы мен 21 автономды қазандық жөнделуде.Мемлекет басшысының қолдауымен «Акса Энерджи» компаниясы Қызылордада 240 мегаваттық жаңа жылу-электр орталығын салды. Бүгінде орталықта 176 мегаватт электр энергиясы өндірілуде, 4 су жылыту қазандығы пайдалануға берілді.Қосымша қуаттылықтар мамыр айының соңына дейін, жалпы орталық алдағы жылу беру маусымында толық іске қосылып, тұрғындарды жылумен, электр энергиясымен үздіксіз қамтамасыз етеді.

Жылу беру маусымының қорытындысы және алдағы кезеңге дайындық мәселелері талқыланды

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың төрағалығымен өткен мәжілісте «Қызылорда электр тарату тораптары компаниясы» акционерлік қоғамы директорлар кеңесінің шешімімен компанияның басқарма төрағасы лауазымына тағайындалған Жантасов Бауыржан Русланұлы таныстырылды.Облыс әкімі жаңа басшыға өңірді электр энергиясымен тұрақты қамтамасыз етуде, облыс аумағындағы электр желілері мен қондырғыларының тозу деңгейін төмендетуде, компанияның қаржылық жағдайын тұрақтандыру және ретке келтіруде нақты шаралар қабылдауды міндеттеді. Сонымен қатар, алдағы жылу беру маусымына уақытылы дайындықты күшейтуді тапсырды.Бауыржан Жантасов 1978 жылы Алматы облысында дүниеге келген. Алматы энергетика және байланыс университетінде «Инженер-электрик» мамандығы бойынша білім алған. «Электр энергетикасы» мамандығы бойынша техника ғылымдарының магистрі. Германияның Бернбург қаласындағы Анхальт қолданбалы ғылымдар университетінде «Энергетикалық саясат және халықаралық сауда» мамандығында іскерлік басқару магистрі бойынша оқыған.Еңбек жолын «KEGOC» акционерлік қоғамында электр монтері болып бастаған. Әр жылдары «ПромСтрой-Энерго», «Кернеу» серіктестіктерінде, «Алатау жарық компаниясы» акционерлік қоғамында түрлі жауапты қызметтер атқарған, кәсіпорындардың жағдайын жақсарту, тиімді басқару бағытында нәтижелі жұмыс істеген.

«Қызылорда электр тарату тораптары компаниясы» АҚ басқарма төрағасы тағайындалды

<a href="https://kyzylorda-news.kz/">Kyzylorda-news.kz</a>&nbsp; &nbsp;Облыс әкімі Нұрлыбек Нәлібаев Сыр өңіріне арнайы іссапармен келген «Vana International Holding» халықаралық компаниясының өкілдерімен кездесті.Кездесуде тараптар әуе көлігі инфрақұрылымын дамыту, оны сенімгерлік басқаруға беру арқылы заманауи тетіктерді енгізу және халықаралық стандарттарға сай тиімді логистикалық хаб қалыптастыру мәселелерін талқылады. Қызылорда облысының әкімдігі мен «Vana International Holding» компаниясы арасында ынтымақтастық туралы меморандумға қол қойылды.Жаңа жоба өңірдің транзиттік әлеуетін арттырып, ішкі және халықаралық көлік дәліздерімен тиімді интеграциялануына жол ашады. Сонымен қатар аймақтың инвестициялық тартымдылығына, жаңа жұмыс орындарының құрылуына серпін бермек.Еске салайық, 2024 жылғы 12 қарашада Премьер-министр Олжас Бектеновтің қатысуымен Қызылорда қаласында «Қорқыт Ата әуежайының» жаңа терминалы пайдалануға берілген болатын. Заманауи талаптарға сай нысан өңірдің көлік инфрақұрылымын жаңа деңгейге көтерді. Қазіргі уақытта әуежайдан аптасына 28 рейс, атап айтқанда, Астана қаласына 20, Алматы қаласына 8 рейс ұшады. Өткен бірінші тоқсанда әуежай қызметін пайдаланған жолаушылар саны 47,6 мың адамға жетіп, былтырғы сәйкес кезеңмен салыстырғанда 58,5 пайызға артқан.Әуе тасымалына деген сұраныстың тұрақты өсімі, жүк айналымының ұлғаюы болашақта Қызылорда облысын ірі көлік-логистикалық тораптардың біріне айналдырады.Жоспарланған сауда-логистикалық орталық тек инфрақұрылымдық жоба ғана емес, өңір экономикасының жаңа драйверіне айналатын және халықаралық сауда, инвестиция ағынын бұруға бағытталған стратегиялық қадам болмақ.<img src="https://knadmin.beoblood.kz/uploads/FB_IMG_1777973263940_bc1f71ba42.jpg" alt="FB_IMG_1777973263940.jpg">

Қызылорда облысында заманауи сауда-логистикалық орталық құру жоспарлануда

<a href="https://kyzylorda-news.kz/">Kyzylorda-news.kz</a>&nbsp; Биыл облыс әкімі Нұрлыбек Нәлібаевтың қолдауымен республикалық бюджеттен жалпы көлемі 680 млн теңге қаржы бөлініп, Қазалы ауданындағы Жанқожа батыр, Бекарыстан би, Майдакөл және Ү.Түктібаев ауылдарына орамішілік газ желілерін жүргізу жұмыстары басталған болатын.Қазалы ауданы әкімі Алмасбек Есмаханов елді мекендердегі орамішілік газ желілерін жүргізу жұмыстарының сапасын бақылап, мердігер мекемелердің жауапты өкілдерімен кездесті.Алдағы уақытта аталған 4 ауыл толықтай көгілдір отынға қосылғаннан кейін 1300-ге жуық тұрғын үй мен 25 әлеуметтік нысан табиғи газбен қамтылып, 7000-нан астам тұрғын көгілдір отын игілігін көрмек. Сонымен қатар, кәсіпкерлік нысандар да табиғи газға қосылатын болады.Кездесу барысында аудан әкімі Президентіміздің, облыс әкімінің қолдауымен жүзеге асып жатқан бір мезетте 4 ауылға газ жүргізу жұмыстары бұл ауқымды жобалардың бірі екендігін айтып, мердігер мекемелерге құрылыс жұмыстарының сапалы әрі мерзімінде аяқталуы басты талап екенін ескертті. Газ желілерін жүргізу жұмыстарына жергілікті тұрғындарды тартып, оларды жұмыспен қамту мәселесіне де баса назар аудару қажеттігін атап өтті.Ауыл әкімдеріне мердігерлермен бірлесіп жұмыс жүргізуді тапсырып, елді мекендердегі санитарлық тазалық пен көркейту жұмыстарына да ерекше мән беруді тапсырды. Ауылдардың санитарлық тазалығы бойынша анықталған кемшіліктерді шұғыл түрде қалпына келтіру жөнінде нақты тапсырмалар берді.Айта кетейік, Бекарыстан би, Майдакөл және Ү.Түктібаев ауылдарын көгілдір отынмен қамту жұмыстарымен мердігер мекеме – «AsiaStroy KZ» ЖШС, ал Жанқожа батыр ауылындағы жұмыстармен – «Сырэнергогазстрой» жауапкершілігі шектеулі серіктестігі мекемесі айналысуда. Аталған 4 ауыл толықтай көгілдір отынға қосылғаннан кейін аудан бойынша тұрғындарды газбен қамту көрсеткіші 83 пайызға жеткізу жоспарланып отыр.

Қазалы: Аудан әкімі газ желілерін жүргізу жұмыстарын көрді

<a href="https://kyzylorda-news.kz/">Kyzylorda-news.kz</a> 2024 жылғы 11 наурыз. Дүйсенбі болатын. Хатшы қыз қоңырау шалып, бас директор Марат Жайылханұлы шақырып жатыр деген хабарды жеткізген. Ол кезде Қызылорда қалалық «Ақмешіт апталығы» газетінің бас редакторымын. Бас директор көп созбалақтамай шақырған себебін бірден айтып, «Қызылорда ньюс.кз» ақпарат агенттігіне бас редактор етіп ауыстырғысы келіп отырғанын мәлім етті.Содан не керек, сайтта да жұмыс істеп көрейік деп, білек сыбана кірістік те кеттік.Күн сайын жиналысБұрын істеп көрмеген адамға сайттың жұмысы аз секілді көрінеді. Газетте аптасына екі нөмір шығарып, мақалаларды соған лайықтап дайындайтынбыз. Бұл жерде минут сайын ақпараттар алмасып жатады. Оқып үлгеру қиын. Бас редактор болған соң шыққан әр мақалаға жауаптысың. Оның грамматикалық, стилистикалық қатесінен бөлек, саяси жағы тағы бар. Сайт қаралымын арттыруға сеп болатын жарқ еткен дүниелер өтімдірек. Тіпті әншілердің өміріне қызығатын, күнделікті бақылайтындар көп екен. Әйтсе де аудитория солай екен деп, жылтырақ дүниелерді беруге де болмайды.Жұмысты жетілдіру үшін ұжым болып іздендік. Басқа сайттар не істеп жатыр? Қандай мақала оқылымды? Қаралымды қайтіп көбейтуге болады? Міне, осы сұрақтардың жауабын іздей бастадық.«ҚазАқпарат», «Тенгри ньюс. Кз» сынды алдыңғы қатарлы сайттардың қандай мақала беріп жатқанын, тіпті қайсысы көп оқылғанына дейін сараладық.Редакциядағы жігіттер мен қыздар түгел жұмылды. Күн сайын ақылдасамыз. Бір мәселенің түйінін тарқату үшін әр пікірге мән бердік. Әлеуметтік желілердегі жұмысты күшейту жағын да кеңестік. Редакциядағы Фариза Омарова, Аида Маратбекқызы, Айжан Жарманова, Мөлдір Сабыржанқызы, Аружан Ералы сынды қыздар мен Айдос Мырзалы, Азамат Абимолда, Қуаныш Мұстафаев, Балтабай Тұраровтай жігіттер жанымнан табылып, қиын деген мәселенің өзі оңайға айналды.<img src="https://knadmin.beoblood.kz/uploads/Whats_App_Image_2026_05_05_at_11_06_57_aca223a0c7.jpeg" alt="Ньюс.jpeg">3 теңгенің жырыЖаңа редакцияға үйренемін дегенше мемлекеттік тапсырыс та келді. Мемлекеттік тапсырыс аясында 20 млн теңгені игеру керек болды. Оның үстіне әр мақала кемі мың белгіден тұруы керек деген талабы бар.Мемлекеттік тапсырыс болған соң облыстық, аудандық әкімдіктердің атқарған жұмысын ақпараттандыру керек. Күн сайын мемлекеттік мекемелерге хабарласып, департамент, басқарма басшыларымен сөйлесеміз. Олардан келіп жатқан ақпаратта да есеп жоқ. Сықиған цифр, &nbsp;болмаса жылдық не алты айлық есеп. Бірақ соны өңдеп, мақалаға айналдыру керек. Құрығанда әр белгіге 3 теңге 25 тиыннан төлейді екен. 20 млн белгісі бар мақалаларды жазып боламын дегенше өзіміз де бір сияқты болдық. Мың белгіден тұратын мақала жазғанның өзінде 20 мың мақала жазуымыз керек екен. Көлемді сараптамалық мақалалар мен сұхбаттарды көбейтпесек, өнбейтінін білдік. Бұл жолы «Сыр медиа» ЖШС-на қарасты барлық редакцияның сайт мамандары түгел көмекке келді. Әрқайсысына тапсырма беріп, меже бекіттік. Күн сайын есебін аламыз, күн сайын сараптап, қанша белгі қалғанын санаймыз. Әйтеуір не керек, 3 теңгенің жыры біткенше тоқтаусыз жұмыс істедік.Сол жылы әкімдікке хат жазып, мемлекеттік тапсырыс аясында жарияланған мақалаларға басқа аймақтарда бізден әлдеқайда көп төленетінін жеткіздік. Нәтижесінде мемлекеттік тапсырыс аясында сайтқа жарияланатын материалдағы әр белгі үшін 17 теңгеден төленетін болды.Жаңа жобалар нәтижесін берді«Қызылорда ньюс.кз» ақпарат агенттігіне бас редактор болып тағайындалған күні видеостудия ашу жайлы тапсырма берілді. Алдымен студияға қажетті құрал-жабдықтар тізімін дайындадық. Көп ұзамай барлығы алынды. Студияны Айдос Мырзалы мен Қуаныш Мұстафаев әрледі. Кейін Балтабай Тұраров деген азаматты жұмысқа алдық. Үшеуі бірігіп, алғашқы жобаларды жүзеге асырды. «5 жаңалық», «Қазақтың сөзі», «Мамандықтар әлемі», «Өзіңдей бала», «Спорт-11» деп аталатын жобаларды жүргізіп, нәтижесін көре бастадық. «5 жаңалықты» Айдос Мырзалы мен Айжан Жарманова жүргізді. «Мамандықтар әлемі» мен «Спорт-11»-дің тізгіні Қуаныш Мұстафаевта болды. Айдос Мырзалы «Өзіңдей бала» арқылы талай жасты үлгі етті. Осының барлығын түсіру, монтаждау, көрерменге сапалы дүние ұсыну Балтабай Тұраровтың мойнында екенін айта кеткен жөн.Осыдан 15 жыл бұрын, яғни 2011 жылдың 5 мамырында&nbsp;«Қызылорда ньюс.кз» ақпарат агенттігінің негізі қаланған. Бүгінде тәжірибелі журналист Айжан Абдуллаева басқаратын ұжымды «Қызылорда ньюс.кз» ақпарат агенттігінің 15 жылдығымен құттықтаймын. Әріптестеріме шығармашылық табыс тілеймін. Ең бастысы, шығар биік көп болсын! Өсіп-өркендей беріңіздер!Әзиз БАТЫРБЕКОВ,«Сыр медиа» ЖШС бас директорының орынбасары

Әзиз Батырбеков: «Шығар биік көп болсын, әріптестер!»

«Кyzylorda-news.kz» &nbsp;– 15 жыл«Цифрлық медианың енді ғана қалыптаса бастаған кезі. Сайт жұмысын жүргізу, ақпарат табу оңай болмады. &nbsp;Алғашында күн сайын 15 ақпарат табудың өзі қиын болды. Сайт жұмысын игеру үшін бағдарламалау тілін меңгеру қажет болды», – дейді кейіпкеріміз, зейнеткер Насреддин аға. Оның еңбек жолындағы ең бір шуақты сәттердің бірі – интернет басылымда жұмыс істеген кезі. Технология тілін көпшілік әлі үлгермеген кезде алғашқылардың бірі болып сайт жұмысын дөңгелетіп әкету оңай болған жоқ. Қызығы мен шыжығы мол жаңа жобаны жүзеге асыру үшін табандылық пен тынымсыз еңбек қажет.Осыдан 15 жыл бұрын «Кyzylorda-news.kz интернет газеті ақпарат кеңістігіне қадам басты. Бастапқы кезеңде тың бастама көпшілікті елең еткізгенімен интернет газеттің бір ізге түсіп кетуі оңай болмады. Себебі ол кезде ғаламтор игілігі облыс тұрғындарына бірдей қолжетімді емес еді. Сыр өңіріндегі тұңғыш интернет басылым ашылған жылдары интернет газетінің жауапкершілігін көтерген қызметкерлердің бірі, сайт операторы Насреддин Бахманов еді. &nbsp;2010 жылдары интернет басылымдар мен ақпарат агенттіктер бірінен соң бірі ашылып жатты. Ізінше 2011 жылдың 5 мамырында Сыр өңірінде екі тілде ақпарат тарататын алғаш «Kyzylorda-news.kz» интернет газеті өмірге келді. Жаңадан ашылған интернет газеттің бас редакторлық қызметіне республикалық «Караван» газетінің облыстағы меншікті тілшісі Елібай Жікібаев шақырылды. Ол интернет басылымның жүйесін бір жолға түсіру үшін аянбай еңбек етсе, Насреддин Бахманов дизайн жасау жұмысын қолға алды.<blockquote>– Алғашқы кезде ақпараттарды сайтқа орналастыру жұмысын игердік. Ол кезде бүгінгідей бір батырманы баса салу жоқ, ақпарат жариялау үшін бағдарламалау тілін меңгеру талап етілетін. Интернет газетте тек Қызылорда облысына қатысты жаңалық жариялап отырдық. Күніне екі тілде 15 ақпарат жариялау тапсырылды. Алғашқы күндері осынша ақпарат табу қиын болғанымен Елібай Зұлқарнайұлының іскерлігінің арқасында облыстық мекемелердің баспасөз қызметімен тығыз қарым-қатынас орнаттық. Ең бастысы, оқырманға жаңалықты дер кезінде жеткізіп отырдық, – дейді Насраддин Бахманов.</blockquote><img src="https://knadmin.beoblood.kz/uploads/nyus_56db808eba.jpg" alt="ньюс.jpg">Уақыт бір орында тұрмайтынцы белгілі. Сәт сайын технология өзгерген заманда аймақтық интернет басылым да уақыт көшіне ілесуге ұмтылды. Жаңа айдарлар қосылып, қазақ, орыс тіпті ағылшын тілінде ақпарат жариялана бастады. Оқырмандармен кері байланысты жандандыру мақсатында «Бізге жаңалық жіберіңіз» бөлімі жұмыс істеді. Технология жетіліп, сайттың мобильді нұсқасын жасау қажеттілігі де туындады. Ал оқырмандар жаңалықты кез келген уақытта, кез келген жерден оқи алатын мүмкіндікке ие болды. Тіпті, нашар көретіндерге арналған нұсқаға дейін жоғары деңгейде жасалды.<blockquote>– &nbsp;Уақыт өте келе сайтқа ақпарат салу жұмысын жеңілдеттік. Бұрынғыдай тек оператор ғана емес, әр тілші сайтқа өзі әзірлеген ақпаратты дер кезінде салуды үйренді. Сондай-ақ интернет газетте журналистер аптасына бір сұхбат, бір сараптамалық мақала жазуға міндетті болды. Бұл тілшілерге қиын болған жоқ. Сайтқа күніне жариялануы тиіс деген 15 ақпараттың санын 18-ге, одан кейін 20-ға жеткіздік. Осылайша, «Қызылорда облысының интернет газеті» деген атымызға сай болу үшін еңбек еттік, – дейді Насреддин Қайназарұлы. &nbsp;</blockquote><img src="https://knadmin.beoblood.kz/uploads/nyus_kollega_aeb9124a79.jpg" alt="ньюс коллега.jpg">Сол жылдары Президент жанындағы әлеуметтік зерттеулер институты оқырман­ды сайттар мен әлеуметтік желілердегі шоу-бизнес, жеке адамдардың өмірі және алып-қашпа әңгіме қызықтыратынын анықтаған. Сол уақытта елдегі сайттар рейтинг қуып, танымалдылыққа ұмтылып жатқанда, «Kyzylorda-news.kz» интернет басылымы сенсацияға, жылт еткен дүниелерге үйір бола қойған жоқ. Редакция тек ақпарат берумен шектелмей, визуалды контентке де ерекше мән берді. Сайтта жарияланған ақпараттың сапасы арта түсті. Фоторепортаждар беру жолға қойылып, апта сайын түрлі тақырыптарда суреттер топтамасын беру дәстүрге айналды.<blockquote>– Бірде редактор Мұрат Жетпісбаевқа тұңғыш немеремнің суретін ұсынып, «құр сурет тақырыпты ашпайды, астына өлең жазып бер», – деп қолқа салдым. Сол фоторепортаж 10 жылға жуық сайт бетінде сақталды. Кейін табиғат көріністерін, соның ішінде «Тораңғыл» ағашын суретке түсіріп, оған орыс редакциясының бас редактор орынбасары Әлібек Байшүленов арнайы мақала жазып, мазмұнды дүние жарық көрді, – дейді Насреддин Бахманов.</blockquote>Алғашқы жылдардағы табанды еңбек пен тәжірибе ақпараттық агенттік тарихындағы ұмытылмас кезең. Сол жолды бастаған буынның еңбегі бүгінгі жетістіктердің берік іргетасына айналды. Бүгінде облыстағы алғашқы «Kyzylorda-news.kz» ақпараттық агенттігінде аға буын мен жас толқын арасындағы сабақтастық жалғасып, жаңашылдық пен тәжірибе үйлесім тауып келеді.Думан КеңшілікФото: Kyzylorda-news.kz

Насреддин Бахманов: Рейтинг қуып, танымал болуға ұмтылмадық

<a href="https://kyzylorda-news.kz/">Kyzylorda-news.kz</a>&nbsp; Биыл тоғызыншы рет ұйымдастырылған, 37 шетелдік, 43 отандық баспаның басын қосқан, Орталық Азиядағы ең ауқымды мәдени-ағартушылық шаралардың біріне айналған «Astana Eurasian Book Fair – 2026» халықаралық кітап көрме-жәрмеңкесінде оқырман үшін жаңалық көп болды. Соның бірі – жерлесіміз Нұрсұлтан Мықтыбайдың «Ақ Жайықтың көз жасы» атты кітабының таныстырылымына зиялы қауым көп жиналды. Өйткені бұл кітап Қазақстанның еңбек сіңірген қайраткері, Мемлекеттік сыйлықтың және «Құрмет», «Отан» ордендерінің иегері Ақұштап Бақтыгереева публицистикасына арналған тұңғыш әрі жан-жақты зерттеу еңбегі болып отыр. Тұсаукесер рәсіміне келушілер автордан бөлек, ақынның өзімен жүздесу құрметіне ие болды. Ал кештің тізгінін танымал жазушы Жадыра Шамұратова ұстады.«Фолиант» баспасынан әдемі ди­­зайнмен жарық көрген аталған кі­тап­тың өзіндік үш ерекшелігі бар: бі­ріншіден, қалың оқырманы сонау алпысыншы жылдардан бері қазақ әйелінің бей­не­сін асқақтатқан поэ­зия­сы ерекше сыршыл­дықпен, сезімтал­дықпен өріл­ген ақын деп таныған адамның публи­цис­ти­ка­лық қыры кө­рінген еңбек. Екін­ші­ден, атауы ерек­ше: әдетте біз көз жа­сы де­генде қуа­ныштың көз жасы де­ген тіркес еске түседі. Бұл жерде Ақ Жа­йық жағ­рапиялық атау ғана емес, ол – ел, халық, оның арғы жағында сол елдің мұңы мен мұраты, шері мен ша­мыр­қанысы жатқаны анық. Сонымен бірге кітаптың екі авторы бар деуге болады. Біріншісі – ұлт тағдыры туралы қа­лам тербеген ақынның өзі болса, екін­­ші­сі – қаламгердің әр жылдары түрлі ба­сылымдарда жарық көрген мақа­лала­рын негізге ала отырып, та­қыры­бының өзектілігі мен айтар ойы, ұлттық мүдде мен болмыс, қа­зіргі қазақ қоғамындағы рухани құн­ды­лықтар, тіл тағдыры, ұлт­тық тәр­бие мен экологиялық мәселелер тұрғы­сы­нан жан-жақты талдап, сара­лаған, публицистің азаматтық ұстаны­мы мен қаламгерлік үнін, ұлттық кел­бе­тімізді сақтау жолындағы күресін қа­­ра­­па­йым тілде баяндап, ақынның өт­кір пі­кірлері мен пайымдауларын сарап­та­ған Нұрсұлтан Мықтыбай.Руханият пен әлеуметтік мәселелер жайын тоғыстырған әдемі әдеби жиын­­да алғаш болып сөз алған қоғам қай­рат­кері Ақұштап Бақтыгереева ай­рықша тебіреністе отырғанын жет­кізді.<blockquote>– «Ақ Жайықтың көз жасы» де­ген менің мақалам еді. «Неге олай деп жаз­дыңыз?» деп сұрап жатыр жа­ңа жас­тар жағы. Ақ Жайықтың қара­пайым түсі­нік­те көзі жоқ өзен екені рас. Бірақ Ақ Жайық және қазақтың басқа да жерлері жылайтыны рас. Оны неге жасырамыз? Қалай жыла­май­ды Ақ Жайық? Ол жер­де 40 жыл бойы полигон жасады, 40 жыл бойы ядролық жарылыстар болды. Жәң­гір хан отырғызған сыңсыған орман бір күнде жоқ болды. Қырық жыл бойы баққан малы арам өлді, ба­ла­сы ауру туды. Шын мәнінде, Ақ Жа­йықтың жы­ламаған кезі жоқ. Әлі де буырқанып, ішінен тынып, ебіл-себіл болып жатыр. Менің бір таңғалғаным, студент кезінен жанымда жүрген, әде­биетке құмар, со­нау Сырдың бойында қазақтың аталы сөзіне сусындап өс­кен Нұрсұлтан ба­лам менің барлық жазғандарымды, тіп­ті өзімде жоқ ма­қалаларымды жи­нап, оны зерттеп, зерделеп, әбден са­ра­лапты. Ол мақала неге жазылды, аста­рын­да не жатыр, оқырманға бәрін қара­па­йым тілде тү­сінікті етіп ұсынып отыр. Бұл кі­таптың ішінде ұлт тағдыры бар, қа­зақтың басынан кешіп келе жатқан тауқыметі жатыр. Мұнда «Үш мың шақырым созылып жатқан темір­жолдың бойында әлі күнге дейін самса сатып жүрген қазақ әйелдерін көремін, солардың бағы қашан ашылады?» де­ген жанай­қайым бар. Иә, сол жылдар қа­зақ қызы қараусыз қалып, өз бетінше өсті, аналары базар жағалап кетті. Мек­теп ашу, тәрбие сағатын жүргізу ме­нің арманым еді. Оны қолдаған кім бар? Қоғамдағы болып жатқан ке­лең­­сіз­дік­тер өлеңге сыймаған кезде пуб­ли­цис­тика етіп жаздым. Аға ұр­пақ туралы ке­йінгі буынның қалам тер­беуі, жас­тар­дың көңіл бөлуі – мен үшін қуаныш. Әсіресе, Нұрсұлтанның осын­дай үлкен еңбек жасағанына ана ретінде алғысым шексіз, – деді ақын ағынан жарылып.</blockquote>Жалпы кейінгі буынның алдың­ғы буынды іздеуі, оның шығарма­шы­лы­ғын өзі қызығып зерттеуі, жаз­ғанына құр­мет­пен қарауы сирек жағ­дай емес. Де­генмен, автор Н.Мық­тыбай бұл кі­тап­ты жазуды қолға алуына не түрт­кі бол­ғанын ерекше естеліктермен жет­кізді.<blockquote>– Шынымды айтсам, бұл кітап осы­дан 5-6 жыл бұрын жарық көруі тиіс болатын. 2017 жылы Махам­бет Өте­місов атындағы Батыс Қа­зақ­стан мемле­кеттік универси­тетінде «Ақ­ұш­тап Бақ­ты­гереева публи­цис­тика­сын­дағы ұлт­тық таным мәсе­лелері» атты дип­лом­дық жұмыс қорғадым. Ол ақын пуб­ли­цистика­сының бір бө­лігі ғана бо­латын. Содан бастап апам­ның көсем­сөз­деріне деген қызы­ғушылығым бас­талды. Бұрын ақын ретінде ғана тани­тын жанды енді публицист ретінде тани бастадым. Қаламгердің замана шын­дығын, қоғам келбетін тап басқан мақа­лалары мені қатты толғантты. Сол дип­ломдық қорғауға зерттеу нысаны – Ақұштап апамның өзі келіп қатысты. Қорғау жұмысына зерттеу нысанының келуі бұрын-соңды болмаған жаңалық еді. Сонда балалығым ба, әлде Алла ау­зыма сөз салды ма, апама көптің кө­зінше: «Сіздің публицистикаңызды те­ре­ңінен, мүлдем басқа арнада зерттеп кітап етіп шығарамын» деп уәде бер­ген едім. Сол уәдемді 9 жылдан кейін енді орындап тұрмын. «5-6 жыл бұрын жарық көруі керек еді» деп отыр­ға­ным осы. Ең болмағанда, қалам­гердің 80 жас мерейтойына орай шы­ға­ра­мын деп ойлағанмын. Одан да қалыс қалды. Ол жалқаулығым емес, пуб­лицистің әлі де жаза түсетініне, ұлттық мәсе­ле­лер­ді қаузайтынына сенген­ді­гімізден еді. Бірақ «ештен кеш жақсы» дейтін ха­­лық­пыз ғой. Осы тұста кітапты шы­ғарып, көпшілікке ұсынған «Фолиант» бас­пасына зор ризашылығымды білді­ремін, – деді ол.</blockquote>Осыдан соң кеш қонағы Ақұштап Бақтыгереева, Қазақстанның еңбек сі­ңірген қайраткері, филология ғы­лым­дарының докторы, профессор Се­рік Не­гимов, ақын, Мемлекеттік сый­лық­тың иегері, ТҮРКСОЙ Жазу­шылар ода­­ғының төрағасы Ұлық­бек Есдәулет, бел­гілі жазушы, кино­дра­матург, «Да­рын» мем­лекеттік жас­тар сыйлығының, «Ай­боз» ұлт­тық сый­лығының лауреаты Айгүл Кемел­баева кітаптың тұсауын кесіп, ақ жол тіледі.Салтанатты рәсімнен кейін сөз ал­ған қаламгерлер ұлттық мүдде, тіл тағ­дыры, рухани құндылықтар мен эко­ло­гия тақырыптарын қозғаған ақын пуб­лицистикасының өзектілігі мен қо­ғамдық маңызына тоқталды.<blockquote>– Ақұштап қаламынан туған мінсіз дүниелер – оның қоғам қайраткері ре­тін­дегі азаматтық болмысын, ұлт ал­­дындағы жауапкершілігін жан жү­­ре­­гі­нен тулап шыққан шындыққа суа­рыл­ған сөздері арқылы айқындайтын өзін­ше өзгеше әлем. Қоғамдық пікір қа­лып­тас­тырудағы рөлі өз алдына, ағар­ту­­шы­лық және тәрбиелік мәні, қо­ғам­ның көзі мен құлағындай халық пен би­лік арасындағы алтын көпір іс­петті әлеуметтік бақылау сипаты, өз дә­уірінің үніне айналуы тұрғысынан оның көшелі, зерделі мақалалары қо­ғам­дық, әлеуметтік маңызға ие. Ақын жаз­­баларынан ұлттық рухты айқын та­нытуға деген ұмтылыс, зор құш­тар­лық – ынтызарлық сезіледі. Ақұш­тап публицистикасын ақпарат тарату құ­ралындағы кезекті мақала емес, қо­ғам­дық ойдың айнасы және тарихи құжат ретінде зерттеу нысанына айналдырып отырған Нұрсұлтан Мықтыбайдың қо­лыңыздағы «Ақ Жайықтың көз жасы» атты кітабы теориялық негіздемесімен, жазушының тілдік ерек­шелігін жүйелі, жан-жақты, толық тал­дап зерделеуімен қым­бат. Бұл – Ақ­ұштап Бақ­тыгереева жазба­ларының қоғамдық сананы қа­лыптас­тырушы зияткерлік күш есе­­бін­де ғылыми ор­тада мо­йындалуы де­ген сөз. Журналистика, филология, сая­саттану ғы­лым­дары­ның түйіскен же­рін­дегі күр­делі процесс сана­латын бұл көсемсөздер – газет-журнал ма­те­­риалдары арқылы бел­гілі бір кезең­дегі қо­ғам­ның көңіл-күйін, әлеу­меттік мәселелері мен қоғамдық-саяси көз­­­қарасын айқын­дай­тын көшбас­шылық, стра­тегтік кемел идея­ларға ие дәуір да­уысы, ға­сыр құбыла­намасы. «Менің қаламым – тек сезімнің құралы емес, ол – шындықтың қаруы» деген ұста­ным Ақұштап көсемсөздерінің темірқазығы, беломыртқасы іспеттес. Қоғамдағы оқи­ға­ларға бейжай қара­майтын, ақи­қат шындыққа суарылған өткір ой­лар, шынайылық пен қайсар мінез, ба­тылдық пен қаһармандық рух сұңғыла оқырманды ойлантады. Бұл батылдық, жігерлілік болмаса, Ал­ланың ақ жо­лында жүрмесе, адам­шылықтың түзу жолын ұстанбаса, ол қалайша ақи­қат­ты іздер еді, қалайша ұлт сөзінің ай­на­­сындай алғаусыз ақта­рылып жа­зар еді?! – деді жаңа кітап жайында то­лым­ды пікір білдірген профессор Серік Не­гимов.</blockquote>Ал ақын Ұлықбек Есдәулет ке­зінде Ақұштап Бақтыгерееваның қайрат­кер­лік бейнесі туралы ұтымды сөз айтқан Әбіш Кекілбаевтың баянда­масын еске алып, мұндай адамның тұлғасын, бей­несін ашатын дүниелер кейінгілер үшін керектігін алға тартты. Жазушы Айгүл Кемелбаева болса: «Нұрсұлтан Ақұштап апайдың азаматтық пози­ция­сын, ер азаматтардан кем соқпайтын қай­раткерлігін зерттеп-зерделеп жаз­ған екен. Бұл кітап резонанс тудыра­ды, өйткені қазіргі геосаясат үстем за­манда тойшыл, бейқам қазақ қоғамы үшін маңызы ерекше зор деп білемін. Үлкен әдебиетте, проза, поэзия жан­­рында өзіне ғана тән дара үнің болуы биік бағаланса, ол ерекшелік Ақұштап ақын­ның шығармашылық қазынасында бар. Ақұштап апай – менің де кейіп­керім. Мен ақын өмірінен алып екі әңгіме жаздым және Ақұштап деп өз есімімен жаздым. Нұр­сұлтан Мықты­байдың мына кі­табы деректі, зерттеу жанрының ен­шісі болса, менікі көр­кем проза. Әдетте шығармашылық тұл­ға­лар ту­ра­лы зерттеулер, мақалалар жа­зылады. Мен ұмытыла бастағандай се­­зілетін тенденцияны жаңғыртып, да­­рынды адамдар туралы көркем про­за жаз­дым. Мысалы, осы залда отыр­ған Ұлықбек Есдәулет, Серік Не­гимов, Дәу­леткерей Кәпұлы тәрізді шы­ғар­машы­лық иелерінің прозалық обра­зын неге жасамасқа?!» деп жас жазу­шыларға ерекше идея ұсынды.Жалпы бұл тұсаукесерге Алматы, Орал қалаларынан арнайы келіп қа­тысқан жандардың қарасы қалың бол­ды. Солардың бірі Қазақстанның еңбек сіңірген қайраткері, «Дарын» мемле­кеттік жастар сыйлығының иегері, фи­лология ғылымдарының кандидаты, Құрманғазы атындағы Қазақ ұлттық консерваториясының профессоры, ән­ші, композитор Сәуле Жанпейісова А.Бақ­тыгерееваның сөзіне жазылған «Кіммін мен?», Н.Мықтыбайдың сөзіне жазылған «Ақұштап – ақ шағала» атты өзінің авторлық әндерін орындап, кеш­тің ажарын аша түсті.Әдеби жиынның соңы автограф-сессияға ұласты. Ақын мен автордан қолтаңба аламыз дескен оқырмандар легі бір толастамады.Ақнұр САҒЫНТАЙ.Астана

«Ақ Жайықтың көз жасы»

<a href="https://kyzylorda-news.kz/">Kyzylorda-news.kz</a> &nbsp;Қазалы ауданы әкімі Алмасбек Есмаханов аудандық мәслихат төрағасы Ғазиз Әлішпен бірге Қожабақы ауылындағы «Ауыл – Ел бесігі» бағдарламасы аясында салынып жатқан спорт кешенінің құрылысын көрді.Бүгінде мердігер мекеме «Намыс-Құрылыс» жауапкершілігі шектеулі серіктестігі ғимараттың негізгі құрылыс жұмыстарын толық аяқтап, ішкі әрлеу және сырлау, ғимарат алдындағы тас төсеніштер мен кафель плиталарын төсеу жұмыстарын жүргізуде. Инженерлік желілер толық тартылып, нысанды пайдалануға беру үшін қалған жұмыстар жоспарлы түрде атқарылуда. Спорт кешенінің жалпы құны 537,1 млн теңгені құрайды.Аудан басшысы спорт кешенінен кейін «Қазалы – Қожабақы – Бозкөл – Кәукей» автожолының 32,1 шақырымындағы көпірді күрделі жөндеу жұмыстарының сапасын бақылады. Жобаға сәйкес жаңа көпірдің ұзындығы 21,69 метр болса, жалпы өткел ұзындығы 375,13 метрді құрайды. Қазіргі таңда мердігер мекеме «Гүлнұр МК» ЖШС-і тарапынан жаңа көпір құрылысына қажетті жабдықтар құрылыс алаңына толықтай жеткізіліп, көпір жанына айналма жол мен уақытша су өткізгіш құбырлар жасалды. Қазіргі таңда арматураларды тоқу жұмыстары жүргізіліп, бірер күнде жердің терең қабатына темірбетонды қада қағу жұмыстары басталмақ.Аудан әкімі Қожабақы ауылындағы құрылыс нысандарын аралау барысында мердігер мекемелерге құрылыс сапасы мен мерзімін қатаң бақылауда ұстауды тапсырып, тұрғындар үшін маңызды жобаларды уақытылы әрі сапалы аяқтаудың маңыздылығын ескертті. Спорт кешенінің құрылысын маусым айына дейін, ал көпір құрылысын қыркүйек айына дейін толық аяқтауға жұмыс жасау керектігін айтты.

Аудан әкімі Қожабақы ауылындағы құрылыс жұмыстарының сапасын бақылады 

Бізге – 15 жыл

<a href="https://kyzylorda-news.kz/">Kyzylorda-news.kz</a> &nbsp;Бүгін&nbsp;Қазалы&nbsp;ауданы әкімдігінің мәжіліс залында ұзақ жылдар бойы мемлекеттік қызметте абыройлы еңбек еткен аудан әкімі аппаратының құжаттамалық қамтамасыз ету және бақылау бөлімінің іс жүргізуші инспекторы Абат Роза Жүнісқызын құрметті зейнеткерлік демалысқа шығарып салуға арналған жиын өтті.Тағылымды шарада аудан әкімі Алмасбек Есмаханов Роза Жүнісқызының саналы ғұмырын мемлекеттік қызмет саласына арнап, ауданның әлеуметтік-экономикалық дамуына қосқан еңбегі жайында айтып өтті.Зейнет жас иесінің көпжылдық адал еңбегі үшін алғыс білдірді. Ауданның ең жоғары наградасы «Құрмет грамотасын» табыстап, арнайы сый-құрмет көрсетті.Жиын барысында аудандық мәслихат төрағасы Ғазиз Әліш, аудан әкімінің орынбасары Жалғас Сүйеубаев, аудандық экономика және қаржы бөлімінің басшысы Бақытжан Жарылқап 40 жылдан астам уақыт аудан әкімдігі жүйесінде табысты еңбек етіп, кәсібилігімен, жауапкершілігімен және адамгершілік қасиетімен ұжым арасында зор құрметке ие болған азаматшаға жылы лебіздерін жеткізді.Өз кезегінде Роза Жүнісқызы арнайы қабылдап құрмет көрсетіп жатқан аудан басшысы мен азаматтарға және ұзақ жылдар бірге қызмет атқарған ұжымдастарына алғысын жеткізді.

Қазақстан және Қызылорда облысының жаңалықтары: Қоғам