<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев бастаған Сыр өңірінің делегациясы Қытайға жұмыс сапарымен барды. Делегация құрамында ауыл шаруашылығы құрылымдарының, құрылыс және мұнай компанияларының басшылары, кәсіпкерлер бар. Сапардың негізгі мақсаты – аймақтың агроөнеркәсіп, құрылыс, қызмет көрсету салаларына инвестиция тарту.Жұмыс сапары аясында аймақ басшысы Сиань қаласындағы мұнай-газ, химия өнеркәсібі саласындағы компания жетекшілерімен кездесті. Алдымен «Yan'an Energy Equipment Group» компаниясы басшысымен жүздесіп, өңдеу өнеркәсібі саласында бірлесіп жұмыс жасауға дайын екенін айтты.<blockquote>«Бірінші кезекте Қызылорда облысы мен Қытай арасындағы ынтымақтастықты нығайту мақсатындағы бүгінгі кездесуге қызығушылық танытқаныңыз үшін алғыс білдіремін. Біз Қытайдың озық технологияларын облыс өнеркәсібіне енгізу үшін арнайы делегация жасақтап келдік. Мұнай-газ – өнеркәсіптің маңызды салаларының бірі және облыс экономикасының негізі. Оның үлесі өңірдің өнеркәсіптік өндірісінің 48,7%-дан астамын &nbsp;құрайды, 10 мыңға жуық адамды жұмыспен қамтиды. Облыс аумағында мұнай өндірумен және барлаумен 49 кеніште 25 компания айналысады. Алайда, мұнай ұңғымаларының көпшілігінің сарқылуына байланысты қорды толықтыру мақсатында геологиялық зерттеу жұмыстары жүргізілуде. Одан бөлек, «ҚазМұнайГаз» ұлттық компаниясы «Торғай-палеозой» кен орнында тереңдігі 5,5 мың метр ұңғыманы бұрғылауда. Қазіргі таңда бұрғылау жұмыстары шамамен 5,4 мың тереңдікке жетті. Осы ретте, құрметті мырзалар, компанияның заманауи технологиясы мен тәжірибесін ескеріп, Қызылорда облысында бірлесіп жұмыс жасауға шақырамыз. Облыс әкімдігі өз тарапынан зауыттарды орналастыру үшін жер, инженерлік инфрақұрылым, жан-жақты логистикалық қолдау білдіруге дайын», – деді Нұрлыбек Машбекұлы.</blockquote>Мұнан бөлек, аймақ басшысы «Xian ANCN Smart Instrument Inc» мұнай-газ компаниясының &nbsp;басшысымен кездесті. «Xian ANCN Smart Instrument Inc» компаниясы 2007 жылы құрылған. Негізгі қызметі – газ кен орнының автономды басқару жүйелерін, жарылысқа қауіпсіз тексеру роботтарын, смарт өлшеу құралдарын және басқа да мұнай-газ жабдықтарын өндіру. Компанияда 320 қызметкер, 100 ғылыми-зерттеу тобының мүшесі, 340 ғылыми зерттеу патенті бар.Сонымен қатар, облыс әкімінің орынбасары Ардақ Зебешев, жауапты сала басшылары, кәсіпкерлер Синьянь қаласында &nbsp;инвестициялық тұрғыдан әлеуетті бизнес өкілдерімен кездесті.Аймақ басшысы бастаған облыс делегациясының жұмыс сапарын ҚР Сыртқы істер министрлігі мен Қазақстан Республикасының Қытай Халық Республикасындағы Елшілігі ұйымдастырған. Келіссөздер басқа қалаларда да жалғасады.<img src="https://knadmin.beoblood.kz/uploads/ytaj_kompaniya_basshylarymen_kezdesu_cf0f3b59ae.jpg" alt="Қытай компания басшыларымен кездесу.jpg">Фото: Қызылорда облысы әкімінің баспасөз қызметі

Аймақ басшысы қытайлық компания басшыларымен кездесті

<a href="https://kyzylorda-news.kz/">Kyzylorda-news.kz</a>&nbsp; «Қазгидромет» 25 ақпанда болатын қауіпті метеорологиялық құбылыстарға болжамын жасады.Синоптиктер болжамынша, циклондар және олармен байланысқан фронтальды бөліктер әліде ҚР аумағының басым бөлігіне өз әсерін тигізетін болады, нәтижесінде елімізде жауын-шашын (жаңбыр, қар) күтіледі.<blockquote>—&nbsp;Түнде Ұлытау облысында, күндіз Қызылорда облысында қатты жауын-шашын (жаңбыр, қар) жаууы ықтимал. Күндіз Түркістан облысының оңтүстігінде қатты жаңбыр, батысында қатты жауын-шашын күтіледі. Тек еліміздің шығысында, оңтүстік-шығысында жауын-шашынсыз ауа райы сақталады. Республика бойынша тұман, көктайғақ, желдің күшеюі, бұрқасын болады,&nbsp;— делінген «Қазгидромет» таратқан хабарламада.</blockquote>Фото: freepik.com

Синоптиктер 25 ақпанға арналған ауа райы болжамын жариялады 

<a href="https://kyzylorda-news.kz/">Kyzylorda-news.kz</a> Қаламыздағы қоғамдық көліктердің үздіксіз қызмет көрсетуі – автобус жүргізушілерімен қатар, оларды жөндеуден өткізетін мамандардың &nbsp;тынымсыз еңбегінің нәтижесі.&nbsp;Бүгінгі кейіпкеріміз «Қызылорда» автобус паркі» мекемесінде цех шебері болып он жылдан аса еңбек етіп келе жатқан Алмат Төлеков. Ол тәуліктің кез келген уақытында көлік ақауларын түзеп, жолаушылардың жайлы әрі қауіпсіз жетуін қамтамасыз ететін көзге көріне бермейтін мамандық иесінің бірі.&nbsp;<blockquote>- Биылғы жылды Мемлекет басшысы Жұмысшы мамандықтарының жылы деп жариялады. Еңбек адамдарын бағалап, олардың еңбегін насихаттау – қоғамдағы жауапкершілікті арттырады деп білемін. &nbsp;Қай сала да жүрсек те, өз ісімізге адал болып, қоғамға пайда тигізуді міндет еттім. Еңбекпен келген нан ғана нағыз адал ас дейді. Автобусты жөндеуден өткізе отырып біз қала тұрғындарының жайлы сапарын ұйымдастырып келеміз, - дейді шебер Алмат &nbsp;Құттымұратұлы.</blockquote>Цех шебері жол-көлік оқиғалары мен тозу салдарынан зақымданған автобустардың шанағын түзеп, қайта қалпына келтіреді. Әрбір майысқан темірді түзетіп, әрбір ұсақ бөлшекті орнына келтіреді.

Елге қызмет – абыройлы міндет

<a href="https://kyzylorda-news.kz/">Kyzylorda-news.kz</a> «Таза Қазақстан» экологиялық жобасы елімізде қоршаған ортаны қорғау және экологиялық мәдениетті қалыптастыру мақсатында ұйымдастырылған ауқымды іс-шара.&nbsp;Аталған жоба Қызылорда облысында кеңінен қолдау тауып, түрлі іс-шаралар ұйымдастырылуда. Елді мекендердің тұрғындары, қоғамдық қызметкерлер, ұйымдар мен кәсіпорындардың қызметкерлері іргелес аумақтар мен аулаларды тазартуға атсалысуда. Сонымен қатар тарихи-мәдени ескерткіштердің аумағын абаттандыру жұмыстары жүргізілді. Көшеттер отырғызылып, ағаштар әктелді.Жасыл аймақтарды көбейту және тазалықты сақтау бағытында жергілікті мекемелер белсенді түрде еңбек етуде. “Жасыл Қызылорда” мекемесінің мамандары Қызылорда қаласындағы Н.Назарбаев даңғылы бойында жасыл желектерді күтіп-баптап, көктемгі егу жұмыстарына қызу дайындалуда. Қазіргі таңда топырақтың құнарлылығын арттыру үшін арнайы көңмен байытылған құм төселіп жатыр. Бұл іс-шаралар егілетін өсімдіктердің жақсы өсуіне және қала экожүйесінің жақсаруына ықпал етеді. Жақын арада бұл аумаққа мекеменің жылыжайында бапталған көпжылдық гүлдер отырғызылмақ. Сондай-ақ, қала көлемінде арық жүйелерін тазалау және көгалдарды күтіп-баптау жұмыстары да жүйелі түрде жүргізілуде.Тазалық жұмыстарына “Қызылорда тазалығы” мекемесі де белсене атсалысып, көшелер мен қоғамдық орындардағы қоқыс жинау, абаттандыру жұмыстарын жалғастырып жатыр. Қала тұрғындары мен қонақтарына таза әрі жайлы орта қалыптастыру мақсатында сенбіліктер ұйымдастырылып, шаһар аумағы абаттандырылуда.Қала аумағында ұйымдастырылған сенбілікке &nbsp;барлығы 24 мекемеден 218 адам қатысып, 20 техника (7 арнайы қоқыс жинайтын техника, 4 трактор, 5 камаз, 4 жүк тиегіш) &nbsp;жұмылдырылды. Нәтижесінде орталық полигонға 120м3 қоқыс шығарылды.Сырдария ауданы тұрғындары да сенбіліктер ұйымдастырып, жоғары белсенділік танытты. Осылайша «Таза Қазақстан» жобасы аудан орталығы Тереңөзек кентінде жалғасын тапты.Аудан тұрғындарының демалыс орнына айналған «Орталық саябақ», «Тағзым» алаңы, орталық алаңдағы кіші архитектуралық формалар, кент көшелері мен арықтары тазалану жұмыстары жүргізілді. Жаңаша өзгеріп жатқан «Тағзым» алаңындағы арықтар қайта қазылды. Экологиялық жобасы жалпы 500-ден аса адам және 6 техника қатысып, 36 текше метр қоқыс шығарылды.Айта кету керек, облыс бойынша «Таза Қазақстан» экологиялық іс-шарасы басталғаннан бері облыстың 730 000-ға жуық тұрғыны қатысты. 27 000 тоннадан астам қоқыс шығарылды, 505 сквер мен саябақ, 225 тарихи мәдениет ескерткішінің аумағы, 791 әлеуметтік нысан, 4596 өнеркәсіп және бизнес нысаны, 322 су нысаны, 47 451 аула мен көше тазартылды.«Таза Қазақстан» жобасына қатысу арқылы әрбір азамат өз аумағын таза ұстап, қоршаған ортаға қамқорлық көрсетуге үлес қосады. Бұл шара экологиялық мәдениетті қалыптастыруға және табиғатты қорғауға бағытталған маңызды қадам.

"Таза Қазақстан" экологиялық жобасына қызылордалықтар белсенділік танытуда

<a href="https://kyzylorda-news.kz/">Kyzylorda-news.kz</a> Ақтөбеде өткен жаратылыстану-математикалық бағыттағы республикалық ғылыми жобалар конкурсында Қызылорда қаласындағы NIS оқушылары марапат төрінен көрінді.Алтын жүлде иегерлері – Аяжан Төребек пен Әділхан Жантурин. Олар инсульт алған науқастардың моторикасын қалпына келтіруге арналған интерактивті тренажер жасап шығарды. Сондай-ақ, І орынды жеңіп алған Еламан Мирзахан атмосфералық ауадағы адам ағзасына зиянды PM2.5 бөлшектерін анықтайтын Dabyl құрылғысын әзірледі.Күміс жүлде Надира Атымтай мен Дара Сактапбергенге бұйырды. Олардың RauSAT 2.0 нано-спутнигі жарықтылық, қысым, температура, теңіз деңгейінен биіктік секілді қоршаған орта көрсеткіштерін бақылауға арналған. Сонымен қатар, бұл құрылғы Жердің жасанды серіктерінің ғарыштағы бағдарын басқаруға көмектеседі.Қола жүлдені иеленген Гүлім Болатқызы мен Ерасыл Айдарбек ғарыштық байланыс саласына арналған ерекше құрылғы ойлап тапты. Олар «Ақпаратты алыс қашықтыққа жіберу үшін лазер сәулесін пайдалану» тақырыбын зерттеп, деректерді тиімді тасымалдауға мүмкіндік беретін инновациялық модель ұсынды.<blockquote>«Радиотолқындар алыс қашықтыққа деректерді жеткізуде кеңінен қолданылады, әсіресе ғарышта. Алайда, олар ұзақ қашықтықта әлсіреп, кешігуге ұшырайды. Бұл мәселені шешу үшін лазерлік технологиялар қолданылып, деректерді жіберу жылдамдығы мен дәлдігі арттырылуы мүмкін», – дейді жоба авторларының бірі Ерасыл Айдарбек.</blockquote>Айта кетейік, байқауға қатысқан сырбойылық оқушылардың барлығы жүлдемен оралды. Олардың ғылыми жетекшісі – информатика пәнінің мұғалімі Әділжан Науан.<img src="https://knadmin.beoblood.kz/uploads/N_Ishsh_efece0eeab.jpg" alt="НИшш.jpg">Фото: Назарбаев зияткерлік мектебі

Республикалық ғылыми жобалар байқауы: сырбойылық зияткерлер төрт жүлделі орын жеңіп алды

<a href="https://kyzylorda-news.kz/">Kyzylorda-news.kz</a> “Ауыл” партиясы Қызылорда облыстық филиалының ұйымдастыруымен Ә.Тәжібаев атындағы әмбебап кітапханасында “Ауыл нақыштары” фото көрмесі өтті.Көрмеге партияның ұйымдастыруымен 2024 жылы “Ауыл нақыштары” байқауына келіп түскен туындылар қойылды. Ауылдың керемет көрінісін тосыннан түсірген авторлардың еңбегін қала тұрғындары жоғары бағалап, керемет әсер алды.Айта кетейік, “Ауыл нақыштары” фото байқауы партияның ықпалымен биыл да жалғасын табуда. Байқаудың жүлде қоры 3 900 000 теңге. Қатысушылар партияның сайтына ауылдың әсем көрінісінен 3 фото жүктей алады.<img src="https://knadmin.beoblood.kz/uploads/Auyl_na_yshtary_foto_k_rmesi_tti_2_c88bfc7d0c.jpg" alt="“Ауыл нақыштары” фото көрмесі өтті 2.jpg"><img src="https://knadmin.beoblood.kz/uploads/Auyl_na_yshtary_foto_k_rmesi_tti_1_789744e96f.jpg" alt="“Ауыл нақыштары” фото көрмесі өтті 1.jpg">

“Ауыл нақыштары” фото көрмесі өтті

<a href="https://kyzylorda-news.kz/">Kyzylorda-news.kz</a> Өткен жылдың қорытындысы бойынша Қызылорда облысының 2059 тұрғыны тегін, атын немесе әкесінің атын өзгертуге өтініш берген. Бұл қызметті Халыққа қызмет көрсету орталығына барып немесе электрондық үкімет порталы арқылы да ресімдеуге болады.Аты-жөнін өзгерту рәсімі заңнамамен реттеледі. ҚР Кодексінің "Неке (ерлі-зайыптылық) және отбасы туралы" 257-бабына сәйкес, аты мен әкесінің атын немесе тегін өзгертуге 13 дәлелді себеп бар. Егер өтініш берушінің көрсеткен себептері заңнама талаптарына сәйкес келмесе бұл мемлекеттік қызмет көрсетілмеуі мүмкін.Аталмыш қызметті ХҚКО арқылы өтінім беру үшін азаматқа жеке куәлігін беру арқылы өтінішті толтырып, 1932 теңге мөлшерінде мемлекеттік бажды төлеу қажет.<blockquote>Аты-жөнін өзгертудің ең көп тараған себептері ата-анасының біреуінің тегін алып жүруге деген ұмтылыс, некеге дейінгі фамилияға оралу немесе үйлесімсіздік. Облыс орталығында өтініштердің ең көп саны – 1 104. Байқоңырда аты–жөнін 375 адам, Шиеліде - 161 адам ауыстырғысы келді", - деп атап өтті облыстық АХАТ басқармасының басшысы Ботагөз Ыдырысова.</blockquote>Айта кетейік, 2024 жылы бұл қызметті 26 212 қазақстандық пайдаланған.Фото: Халыққа қызмет көрсету орталығы

Өткен жылы екі мыңнан астам қызылордалық аты-жөнін өзгертті

<a href="https://kyzylorda-news.kz/">Kyzylorda-news.kz</a> Этникалық қазақтарға – басқа елдердің азаматтарына Қазақстанда 10 жыл өмір сүруге және жұмыс істеуге құқық беретін 65 «Ата жолы» картасы берілді. Елімізде өз ісін дамытуға дайын бизнес-иммигранттар 27 карта алды, ал сұранысқа ие мамандар осындай 38 картаның иегері атанды.«Қазақтар қай жерде өмір сүрсе де, олардың жалғыз Отаны – Қазақстан. Сондықтан біз үшін шетелде тұратын отандастарымызды қолдау әрқашан маңызды», – деді Қазақстан Республикасының Президенті Қасым-Жомарт Тоқаев.«Ата жолы» картасын алушылар ішінде инженер-физик, инженер-математик, химиялық технологтар, жақ-бет хирургиясының дәрігерлері, педиатрлар және т.б. мамандар бар, олар Ресей, Германия, Моңғолия, Қытай, Ұлыбритания, АҚШ, Израиль, Франция, Нидерланды, Финляндия, Қырғызстан және Өзбекстан секілді шет елдерден келді.«Ата жолы» картасын енгізудің мақсаты тарихи отанымен байланысты нығайту, ұлттық дәстүрлерді сақтау, Қазақстанда олардың әлеуетін іске асыру үшін елге кәсіпқойлар мен табысты бизнесмендерді тарту болып табылады. Бұл Карта шетелде тұратын этникалық қазақтарға өз шығу елдерінің азаматтығын сақтай отырып беріледі.«Ата жолы» картасының иегерлері елге кірген кезде 10 жыл мерзімге тұруға рұқсат алады және еңбек қызметін жүзеге асыру немесе бизнес жүргізу үшін қоныстану өңірін дербес таңдайды.«Ата жолы» картасы бар этникалық қазақ басқа елдің азаматы бола отырып, Қазақстан азаматтарымен және қандастармен тең құқықтарға ие.«Ата жолы» картасының иегерлері (және олардың отбасы мүшелері) мынадай құқықтарға ие:- медициналық көмектің кепілдік берілген көлемі шеңберінде медициналық мекемелерде қызмет және әлеуметтік төлемдер алу;- ҚР Еңбек кодексіне және «Халықтың көші-қоны туралы» ҚР Заңына сәйкес Қазақстан аумағында жұмысқа орналасу;- ҚР Кәсіпкерлік кодексіне және өзге де құқықтық актілеріне сәйкес Қазақстан аумағында кәсіпкерлік қызметті жүзеге асыру;- «Білім туралы» ҚР заңына сәйкес мемлекеттiк бiлiм беру ұйымдарында тегiн орта бiлiм алу, мемлекеттiк орта арнаулы және/немесе жоғары оқу орындарында конкурстық негiзде тегiн орта арнаулы және/немесе жоғары бiлiм алу, жеке оқу орындарында ақылы білім алу;- «Адвокаттық қызмет және заң көмегі туралы» ҚР заңына сәйкес мемлекет кепілдік берген заң көмегін алу;- азаматтық саласындағы халықаралық шарттарға және ҚР заңнамалық құқықтық актілеріне сәйкес жеңілдетілген тәртіппен Қазақстан Республикасының азаматтығын алу.«Ата жолы» картасы бар адамдардың &nbsp;ҚР Парламенті мен мәслихаттарына сайлануға, сондай-ақ сайлауда дауыс беруге, республикалық референдумға қатысуға құқығы жоқ әрі мемлекеттік қызметке қабылданбайды.Егер «Ата жолы» картасының иесі Қазақстан азаматтығын алатын болса, онда Карта жарамсыз деп танылады.Естеріңізге сала кетейік, Мемлекет басшысының тапсырмасы бойынша 2023 жылдың шілдесінен бастап шетелде тұратын этникалық қазақтар үшін елге жеңіл кіру/шығу мәселесі пысықталған «Ата жолы» картасы енгізілді.Фото: gov.kz

«Ата жолы» картасы: дүние жүзіндегі этникалық қазақтар тарихи Отанына оралып, елге қызмет ету мүмкіндігін пайдаланады

<a href="https://kyzylorda-news.kz/">Kyzylorda-news.kz</a> Қызылорда облысының солтүстігінде, орталығында түнде қатты қар, жаяу бұрқасын күтіледі, – деп хабарлайды «Қазгидромет» РМК баспасөз қызметі.Облыстың орталығы мен солтүстігінде көктайғақ, ал шығысында тұман күтіледі. Жел солтүстік-батыстан соғады, түнде облыстың орталығында, солтүстігінде күші 15-20 м/с жететін жел соғады. Қызылорда қаласында кей уақыттарда тұман болуы мүмкін.Фото: Нұрболат Нұржаубай

Қар, тұман, көктайғақ: «Қазгидромет» ескерту жариялады

<a href="https://kyzylorda-news.kz/">Kyzylorda-news.kz</a> Қазақстан әйелдердің құқықтарын қорғауға және олардың мүмкіндіктерін кеңейтуге бағытталған негізгі халықаралық келісімдер мен құжаттардың қатысушысы болып табылады.Олардың ішінде әйелдердің жағдайын жақсарту жөніндегі Бейжің іс-қимыл платформасы, әйелдерге қатысты кемсітушіліктің барлық нысандарын жою туралы БҰҰ Конвенциясы, сондай-ақ, әйелдердің саяси құқықтары және ерлер мен әйелдердің еңбегіне тең сыйақы туралы конвенция бар. Бұл құжаттар елдің гендерлік теңдік қағидаттарына берілгендігін көрсетеді.БҰҰ-ның Орнықты даму мақсаттарына қол жеткізу үшін Қазақстан заңнамалық деңгейде ерлер мен әйелдер құқықтарының теңдігін қамтамасыз етеді. 2024 жылдың 16 маусымынан бастап әйелдер мен балаларды қорғауды күшейтуге бағытталған заң күшіне енді. Онда зорлық-зомбылық үшін жауапкершіліктің қатаң шаралары және отбасы институтын нығайту шаралары қарастырылған.Түзетулер бүкіл азаматтық қоғамның белсене қатысып, түрлі алаңдарда алдын ала кеңінен талқыланған&nbsp;мәселелердің нәтижесі бойынша әзірленді.Заңдар мемлекеттік отбасы саясатының құқықтық, әлеуметтік, институционалдық және өзге де негіздерін жетілдіруге, әйелдердің құқықтары мен балалардың қауіпсіздігін қорғауды күшейтуге бағытталған. Сонымен бірге заң әйелдер мен балалардың қауіпсіздігін бұзғаны үшін әкімшілік және қылмыстық жауапкершілікті қатаңдатуды, отбасылық-тұрмыстық саладағы зорлық-зомбылықтың алдын алуды көздейді.Бұрын тұрмыстық зорлық-зомбылық бойынша&nbsp;ұрып-соққаны үшін әкімшілік жаза, ескерту немесе 10 тәулікке қамауға алу қолданылатын. Енді ұрып-соғу Қазақстан Республикасының қылмыстық кодексінің 109-1 бабына сәйкес қылмыстық жауапкершілікке тартылады, яғни&nbsp;сексен айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына, не сексен сағатқа дейінгі мерзімге қоғамдық жұмыстарға тартуға, не жиырма бес тәулікке дейінгі мерзімге қамаққа алуға жазаланады.Денсаулығына жеңіл зиян келтіргені үшін бұрын әкімшілік жаза ескерту жасауға немесе 15 тәулікке &nbsp;қамауға алу қолданылатын. Енді бұл қылмыстық жауапкершілікке ауысты, Қазақстан Республикасының қылмыстық кодексінің 108-1 бабына сәйкес&nbsp;екі жүз айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына, не екі жүз сағатқа дейінгі мерзімге қоғамдық жұмыстарға тартуға, не елу тәулікке дейінгі мерзімге қамаққа алуға жазаланады.Сонымен қатар, жәбірленушіні азаптағаны үшін 600 сағатқа дейін қоғамдық жұмыстарға тарту немесе 3 жылға дейін бас бостандығынан айыру, денсаулыққа орташа ауырлықтағы зиян келтіргені үшін – 2 жылға дейін бас бостандығынан айыру, денсаулыққа ауыр зиян келтіргені үшін – 3 жылдан 8 жылға дейін бас бостандығынан айыру жазасы қарастырылды.Сонымен қатар, әйелдер мен балалардың құқығын қорғау мақсатында ақпараттық-анықтамалық және психологиялық көмек көрсету жөніндегі «111» байланыс орталығын құру, әр ауданда отбасын қолдау орталықтарын ашу, өмірлік қиын жағдайдағы отбасыларды ерте анықтау бойынша мобильді топтардың жұмысын ұйымдастыру туралы нормалар да бекітілді.Уәкіл институты Отбасылық-тұрмыстық зорлық-зомбылыққа қарсы іс-қимыл туралы арнайы баяндама дайындады. Ол елдегі жағдайды, халықаралық тәжірибені және осы құбылыспен күресудің ұлттық шараларын талдайды. Баяндамада гендерлік кемсітушілікті жоюға және теңдік мәдениетін дамытуға бағытталған мемлекеттік органдарға арналған ұсынымдар бар. Кейбір ұсыныстар қазірдің өзінде жүзеге асырылды: отбасылық-тұрмыстық зорлық-зомбылық үшін жауапкершілік күшейтілді, қылмыстың алдын алу және зардап шеккендерді оңалту жұмыстары жүргізілуде.2024 жылы әйелдер құқығын бұзу мәселелері бойынша өтініштер саны өткен жылмен салыстырғанда екі есеге жуық өсті. Көбінесе олар отбасындағы зорлық-зомбылыққа, мүліктік дауларға және алимент міндеттемелеріне қатысты.Мемлекеттік органдар азаматтық қоғам институттарымен бірлесіп гендерлік теңдік мәдениетін қалыптастыру, стереотиптерді еңсеру және Қазақстанда әйелдер мен қыздар үшін қауіпсіз орта құру жөніндегі жұмысты жалғастыруда.Берікбол Байхожаев,ҚР Адам құқықтары жөніндегі уәкілдіңҚызылорда облысы бойынша өкілі&nbsp;

Қазақстанда әйел құқығын қорғау мәселесі өзекті

<a href="https://kyzylorda-news.kz/">Kyzylorda-news.kz</a> Арал ауданында соңғы үш жылда 228,3 шақырым газ құбыры тартылып, бүгінде тұрғындардың 71,2%-ы табиғи газға қол жеткізді. Бұл туралы бүгін&nbsp;өңірлік коммуникациялар қызметінің ақпарат алаңында Арал ауданының әкімі Аманжол Оңғарбаев айтты.<blockquote>– Арал қаласындағы №4, №5, №6 мөлтек аудандары және Сексеуіл кенті мен Шижаға елді мекенінің тұрғындары көгілдір отынға қосылды. Сыр беткейдегі тұрғындар үшін маңызды жаңалық – Қамыстыбас елді мекеніне газ жеткізетін автоматты газ тарату стансасының құрылысы басталды. Бұл жоба 18 елді мекеннің 15-мыңға жуық тұрғынын кезең-кезеңімен газбен қамтуға мүмкіндік береді, –&nbsp;деді Аманжол Сақыпұлы.</blockquote><img src="https://knadmin.beoblood.kz/uploads/Aral_gazdandyru_4b6f5a8843.jpg" alt="Арал газдандыру.jpg">Сондай-ақ,&nbsp;Арал өңірінің әлеуметтік-экономикалық дамуына, экологиялық жағдайдың жақсаруына және туризмді дамытуға серпін беретін «Geopark Aral» жобасы жаңа жұмыс орындарын құруға да мүмкіндік ашады.<blockquote>– Жақында ҚР Су ресурстары және ирригация министрі Нұржан Нұржігітов ресми сапармен Аралға келіп, көп жылдардан бері елдің талқысында жүрген Кіші Арал теңізін сақтап қалудың бірнеше кезеңдері бойынша нақты байламға келу мәселесінде елдегі теңіз жанашырларымен бірге арнайы жиын өткізді. Арал теңізі мәселесіне шетелдіктер мен халықаралық қорлардың назарын аудару, өңірдегі экологиялық ахуалды жақсартуға бағытталған осындай маңызды жобалар жалғаса беретін болады, – деді Аманжол Сақыпұлы.</blockquote><img src="https://knadmin.beoblood.kz/uploads/Aral_geopark_30a6b61c69.jpg" alt="Арал геопарк.jpg">Арал ауданында 2024 жылы ауданға 25 санитарлық автокөлік беріліп, шалғайдағы Жіңішкеқұм, Құланды, Жаңақұрылыс, Ақбасты, Қарашалаң елді мекендеріндегі медициналық бекеттер қажетті көлікпен қамтамасыз етілді.<blockquote>– Медициналық қызмет түрлерін кеңейту мақсатында аудандық аурухана негізінде 54 төсектік «Кардиология» және «Инсульт» бөлімшелері ашылып, жұмыс істеуде.&nbsp;Арал аудандандық көпбейінді орталық ауруханасы ультрадыбыстық зерттеу аппаратымен жабдықталды. 2025 жылы орталық аурухана жанынан 17 төсектік нейро-инсульт, 35 төсектік кардиология бөлімшелеріне арналған жапсаржай салу жұмысы жүргізіледі. Оны МРТ және ангиограф қондырғыларымен жабдықтау жоспарлануда, –&nbsp;деді Аманжол Сақыпұлы.</blockquote><img src="https://knadmin.beoblood.kz/uploads/Aral_ekologiya_3887edf5a5.jpg" alt="Арал экология.jpg">Арал теңізінің экологиялық ахуалын жақсарту мақсатында мемлекетаралық келісімдер аясында және Үкіметтің қолдауымен теңізге жоғарыдан келетін су көлемі соңғы жылдары екі есеге артты. Сонымен қатар, аймақта Аралды құтқару бағытында инвесторларды тарту жұмыстары жүйелі түрде жүргізілуде.<blockquote>– Қазақстан 2024 жылдан бастап Халықаралық Аралды құтқару қорына төрағалық етуде.&nbsp;Осыған орай, өткен жылы ауданға Еуроодаққа мүше 19 мемлекеттің елшілері арнайы іс-сапармен келіп, Кіші Арал теңізінің жағдайымен танысты. Қонақтар аймақтың климаттық және экологиялық ерекшеліктерін зерттеп, құмды алқаптарға төзімді өсімдіктер отырғызу және құм көшкінін тоқтату бойынша қажетті қолдау шараларын айқындады, –&nbsp;деді Аманжол Сақыпұлы.</blockquote>Фото: Өңірлік коммуникациялар қызметі

Арал: Атқарылған жұмыстар ауқымды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев бюджет қаржысының игерілуі, «Артспорт» бағдарламасы, жол жөндеу, құрылыс жұмыстары және республикалық бағдарламалардың орындалу барысы талқыланған жиын өткізді.&nbsp;Аймақ басшысы жауапты сала басшылары мен аудан әкімдеріне бірқатар тапсырмалар берді. Нақтырақ айтсақ, әлеуметтік маңызы бар нысандарды сапалы салу әрі кестеге сай мерзімінде бітіру жұмыстарын қатаң бақылауға алу, 5 наурызға дейін барлық әлеуметтік нысандағы кемшіліктерді жоюды міндеті жүктелді.<blockquote>«Елді мекендердің тазалығы үнемі бақылауда болуы тиіс, соңғы 20 жылда салынған ғимараттар бойынша жауапты мекемелермен кездесіп, жөндеу жұмыстарын жүргізу қажет. Тазалыққа және абаттандыруға қатысты жұмыс қарқынын күшейтетін мезгіл жақындады. Қала және аудан орталықтарындағы ғимараттардың сыртын жөндеп, көгалдандыруды белсенді түрде қолға алу, апта сайын сенбіліктер ұйымдастыру керек»,- деді Н.Нәлібаев</blockquote><img src="https://knadmin.beoblood.kz/uploads/Oblys_kimi_zhinalys_2_f9f68c2e62.jpg" alt="Облыс әкімі жиналыс 2.jpg">Фото: Қызылорда облысы әкімінің баспасөз қызметі

Қазақстан және Қызылорда облысының жаңалықтары: Қоғам