<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаев азаматтарды кезектілік тәртібімен жеке мәселелері бойынша қабылдады. Қабылдауға 19 адам жазылып, оның үшеуі онлайн форматта қатысты.&nbsp;Негізгі көтерілген мәселелер – әлеуметтік қолдау, денсаулық сақтау, тұрғын үй және жұмыспен қамту. Тасбөгет кентінің тұрғыны Ә.Молдағұлова көшесі бойынан балалар ойын алаңын салу туралы ұсынысын жеткізді. Бүгінде Тасбөгет кентінде 14 балалар ойын алаңы, 1 стритбол және 1 жаттығу алаңы бар. Өткен жылы қалалық бюджеттен қаржы бөлініп, Қ.Баймағанбетов және З.Шүкіров көшелерінің қиылысындағы көппәтерлі үйлер ауласына балалар ойын алаңы салынды.Қазір кенттің басқа да аумақтарына ойын алаңдарын салу жолы қарастырылып жатыр. Атап айтқанда, Ә.Молдағұлова көшесі бойынан бос жер учаскесі анықталды, осыған орай ұсыныс енгізіледі. Бюджеттен қаржы бөлінген соң, кезең-кезеңімен салу жоспарланған.Қармақшы ауданының тұрғыны Төретам және Жосалы кенттеріндегі автобекеттердің жұмысына қатысты мәселе көтерді. Бұған дейін Жосалы кентіндегі «Шынар-Ана» және Төретам кентіндегі автостансалар жолаушыларға қызмет көрсеткен.&nbsp;Алайда ғимаратты осы мақсатта пайдалану экономикалық тұрғыдан тиімсіз болғандықтан, жұмысын тоқтатқан. Жосалы кенті арқылы өтетін бағыттарда жолаушыларға қызмет көрсету үшін бұрынғы «Самара–Шымкент» автодәлізі бойындағы «Айым» кафесінің жанынан диспетчерлік пункт ашылды. Пункт 15 шілдеден бастап жұмыс істеп келеді, 15 автобус және 5 «Спринтер» автокөлігі жолаушы тасымалдайды.Қабылдауға келген азаматтар көтерген мәселелерді жан-жақты саралап, заң аясында шешу &nbsp;жауапты басшыларға жүктелді. Айта кетейік, облыс әкімінің жеке қабылдауына жазылу үшін тұрғындар eGov порталы, e-Otinish бірыңғай платформасы арқылы немесе әкімдікке жазбаша өтініш қалдыра алады.<img src="https://knadmin.beoblood.kz/uploads/Ot_detskih_ploshhadok_do_avtostanczij_akim_oblasti_vyslushal_obrashheniya_zhitelej1_952fc930bf.jpg" alt="От детских площадок до автостанций аким области выслушал обращения жителей1.jpg">

Облыс әкімі тұрғындарды жеке мәселелері бойынша қабылдады

<a href="https://kyzylorda-news.kz/">Kyzylorda-news.kz</a> Үкімет отырысынан кейін облыс әкімінің төрағалығымен мәжіліс өтіп, онда «Жол қозғалысы мен жаяу жүргіншілердің қауіпсіздігін қамтамасыз ету туралы» мәселе қаралды. Бұл жиындағы міндеттер бойынша қала әкімдігінде шаһар басшысы Нұржан Ахатов тиісті сала жетекшілеріне бірқатар тапсырма жүктеді.&nbsp;Биыл қаланың жол-көлік инфрақұрылымын дамытуға 38 млрд.теңгеге жобалар жүзеге асуда. Одан бөлек, түнгі жарықтандыру үшін 42 көшеге жоба әзірленіп, оған 1 млрд. теңге қаралды. Жобалардың барлығы да жол қозғалысы мен жаяу жүргіншілердің қауіпсіздігін қамтамасыз етуді көздейді.Сондай-ақ тоқсан сайын жол белгілері мен жол таңбалары жаңаланып, қажетті аумақтарға бағдаршамдар орнатылуда. Дегенмен, тиісті талаптардың барлығы да сақталғанымен жаяу жүргіншілердің қатысуымен жол-көлік оқиғалары орын алуда. Осы жылдың 8 айында қала көлемінде 575 жол-көлік оқиғасы орын алып, өткен жылмен салыстырғанда 17 пайызға төмендеген.&nbsp;<blockquote>- Жол-көлік оқиғаларының алдын алу бағытындағы қауіпсіздікті қамтамасыз етіп, профилактикалық шараларды күшейту қажет. Жаяу жүргіншілерге және көлік тізгіндегендерге күнделікті түсіндірме жүргізілуі &nbsp;керек. Бізге адам өмірі маңызды. Тапсырманы тиянақты орындаңыздар, - деді Нұржан Сәбитұлы. &nbsp;</blockquote>Қазіргі таңда «Ақылды қала» және «Қауіпсіз қала» жобалары қарқынды жүргізілуде. Қосымша инновациялық жобалар да әзірленуде. Шаһар басшысы сала мамандарына заманауи талаптарға сай жол инфрақұрылымын дамытуға және инновациялық инженерлік шешімдерді енгізуге басымдық беру қажеттігін ескертті.

Жолдағы қауіпсіздік – басты талап

<a href="https://kyzylorda-news.kz/">Kyzylorda-news.kz</a> «Ай сайын төлеп жатқан МӘМС жарнасы қайда кетеді? Неге ол жеке шотта жиналып, қажет кезде өзімізге жұмсалмайды? Емханалардың қызметі қашан жақсарады?». Әлеуметтік желіде де, емхана кезегінде тұрғандар арасында да жиі қойылатын сұрақ. Азаматтардың сапалы әрі қолжетімді медициналық көмек алуы, мемлекеттік саясаттың негізгі бағыты, ал жүйедегі ашықтықты қамтамасыз ету &nbsp;қордың басты міндеті. Сондықтан қоғам тарапынан қойылған негізгі сауалдарға нақты деректер мен фактілерге сүйене отырып жауап іздеп көрдік.Жеке шот неге тиімсіз?Көптеген қазақстандықтар сақтандыруды жеке банк депозиті ретінде көреді: «ақша саламын, демек, соған сай емделуім керек». Жұмыс істейтін азамат үшін жылына орташа 276,8 мың теңге, ал өзін-өзі төлеушілер тарапынан шамамен 51 мың теңге жарна түседі. Ал шынайы медицинадағы баға бұл цифрлардан әлдеқайда жоғары. Мысалы &nbsp;босану 150 мыңнан 400 мың теңгеге дейін болса, ишемиялық және геморрагиялық инсультқа өткен жылы МӘМС қорынан 28,9 млрд теңгеден астам қаржы жұмсалған. Дің жасушаларын транспланттауға 2025 жылы 124 пациентті емдеуге 810,6 млн теңге бөлінсе, 743,3 млн теңгені МӘМС қаражаты көтерген.МӘМС жүйесіне жинақталған қаражат ынтымақтастық принципіне негізделген. Яғни «дені сау адам ауырған адамға, жұмыс істейтін азамат әлеуметтік әлсіз топқа көмектеседі». Жиналған қаражат есебінен халықтың қалтасына слмақ салатын қымбат бағалы операциялар (кардиохирургия, нейрохирургия, онкология, трансплантология) азаматтарға тегін жасалады. Қор қаражаты есебінен жоғары технологиялық зертханалық зерттеулер мен реабилитациялық көмектің көлемі де еселеп артқан.Бір сөзбен айтқанда, егер қолданыстағы МӘМС жүйесін жеке жинақтаушы жүйеге аустыратын болсақ, кенеттен ауыр дертке шалдыққан адамның жинаған ақшасы емнің алғашқы күні-ақ таусылар еді. Оның үстіне, сырқаттанып қалған азамат жұмыс істеуге жарамай, табысынан да айырылады.Ынтымақтастық жүйенің мәні жарна арқылы ем-домға қажет шығынды көтеру. Бүгін сіз ауырмай, біреудің өмірін сақтап қалуға септігіңізді тигізсеңіз, ертең сізге қауіп төнгенде қорда жинақталып жатқан ақша сіздің еміңізге бағытталады.Сақтандыру бар, бірақ кезек ұзақ: Халық неге ренжулі?Қор өкілдері жүйенің логикасын дұрыс түсіндіргенімен, халықтың жеке шотты талап етуінің артында тереңірек жатқан екі басты мәселе бар. Бірншісі, сапа мен қолжетімділік. Жарнаны ай сайын үзбей төлеп отырған азаматтар тар профильді мамандарға жазылу үшін апталап, тіпті айлап кезек күтуге мәжбүр. Салдарынан, жүйеде «сақтандырылған» мәртебең болса да, өз қалтаңнан ақша шығарып, жекеменшік клиникаларға баруға мәжбүрсің. Балтыры сыздап, басы ауырған адам қос төлем жасағандай күй кешеді. Екіншісі. Тіркелген, бірақ шын мәнінде көрсетілмеген қызметтер. Жүйедегі ашықтықтың жоқтығы сенімсіздікті арттыратын басты фактор. Қағаз жүзінде миллиондаған теңге емге жұмсалып жатқаны айтылғанымен, халық өз есебінен қандай қызмет сұранысқа ие болғанын нақты көре алмайды. Бірақ ашықтықты қамтамасыз ету үшін басқа жүйеге көшудің қажеті жоқ.Халық пен қор арасындағы бұл алшақтықты жою үшін билік «халықтық бақылау» тетігін іске қосуды жоспарлап отыр. Енді eGov Mobile және Бірыңғай жеке кабинет арқылы әрбір азамат өзіне көрсетілген медициналық қызметтердің тарихын көре алады, емдеу фактісін растап немесе «өтірік» көрсетілген қызметтер болса, дабыл қаға алады, көрсетілген медициналық қызметтің сапасына баға беріп, шағым түсіре алады.Ақша бәрібір де ортақ сақтандыру пулында қалады, бірақ оның қайда және қалай жұмсалып жатқаны ашық болады.Qalqan деген не және ол бізді неден қорғайды?МӘМС жүйесін жетілдіру – үздіксіз процесс. Және оған депозит немесе &nbsp;банк &nbsp;шоты ретінде қарамаған жөн. «Сақтықта қорлық жоқ» дейді. Оны қымбат ота немесе ұзақ емдеу қажет болғанда қалтаңызды қорғайтын ұжымдық қаржылық қауіпсіздік жастығы деп қарастырған дұрыс.Жыл басында Әлеуметтік медициналық сақтандыру қоры денсаулық сақтауды қаржыландыру тәсілдерін жүйелі түрде трансформациялайтын – &nbsp;«МӘМС 2.0» жаңа моделін іске қосты. Оның негізгі міндеті МӘМС қаражатының жұмсалуын бақылауды күшейту, қаржы айналымының ашықтығын арттыру және бақылаудың превентивті моделіне, яғни қаржылық проблемаларды ерте анықтау мен олардың алдын алуға бағытталған басқару тәсіліне көшу. Трансформацияның негізгі цифрлық құралдарының бірі –бірыңғай Qalqan порталы.Бұл жүйе қаражаттың әрбір теңгесін нақты уақыт режимінде қадағалауға және орындалған қызметтерді автоматты түрде тексеруге мүмкіндік береді. Соның арқасында жекеменшік клиникалар тарапынан негізсіз ақша алу &nbsp;немесе орындалмаған қызметтерді жазып қою сияқты заңбұзушылықтар дер кезінде бұғатталады. Qalqan адам факторын азайтып, қаржыны толық ашық ететін басты құрал.Алдағы уақытта пациенттің өзі медициналық көмектің нақты көрсетілгенін растай алады. Дегенмен пациенттің растауы медициналық қызметке ақы төлеуге негіз бола алмайды. Медициналық көмекті смартфонда қосымшаларды пайдаланбайтын балалар, егде жастағы адамдар, ауыр халдегі пациенттер де алады. Сондықтан пациент берген кері байланыс автоматтандырылған тексерулермен, медициналық құжаттамамен және сараптамалық мониторингпен қатар жалпы бақылау жүйесінің бір элементі ретінде қарастырылады.Жаңа модельдің негізінде медициналық көмекті қаржыландыруды толық әрі үздіксіз қадағалау қағидаты жатыр. Яғни төлемге ұсынылған әрбір медициналық қызмет нақты пациентпен, оған көрсетілген медициналық көмекті алу фактісімен, медициналық ұйымның қажетті ресурстарымен, оны растайтын құжаттармен және қаржылық мәліметтермен өзара байланыста болуы тиіс.Сурет: ЖИ көмегімен жасалды

МӘМС жарнасы – депозит пе, әлде салық па? Халықты мазалаған сауалдарға нақты жауап

<a href="https://kyzylorda-news.kz/">Kyzylorda-news.kz</a> Қорғаныс министрлігінің «Сарбаз 2.0» жобасы аясында биыл мерзімді әскери қызметін аяқтаған 1 745 әскери қызметші мемлекеттік білім беру грантына ие болды. Олардың 1 000-нан астамы жаңа оқу жылында еліміздің жоғары оқу орындарында білім алуға кірісті.Бастама 2023 жылдан бері жүзеге асырылып, заңнамалық тұрғыда бекітілген. Білім беру грантына белгіленген мерзімді өтеп, негізгі әскери пәндер бойынша жоғары нәтижелер көрсеткен әскери қызметшілер үміткер бола алады.Іріктеу мерзімді әскери қызметтің барлық кезеңінде «Сарбаз 2.0» цифрлық жүйесі арқылы жүргізіледі. Рейтинг қалыптастыру кезінде жауынгерлік даярлық нәтижелері, әскери тәртіп, арнайы міндеттерді орындау, психологиялық даярлық және тестілеу қорытындылары ескеріледі. Осы көрсеткіштер негізінде жүйе үміткерлердің рейтингін қалыптастырып, квоталар автоматты түрде бөлінеді.2025 жылдан бастап конкурс білім беру бағдарламаларының таңдалған тобына сәйкес екі бейіндік пән бойынша тестілеуді қамтиды. Әскери қызметшілер оған қызметтен бос уақытта дайындала алады.Грант иегерлерінің бірі – Дамир Тұзақбай. Әскери қызметтен кейін ол Л.Н. Гумилев атындағы Еуразия ұлттық университетіне түсіп, ақпараттық қауіпсіздік мамандығы бойынша білім алып жатыр.<blockquote>— Жауынгерлік даярлықта жоғары нәтиже көрсетіп, университетке тегін түсу мүмкіндігіне ие болдым. Қазір «Ақпараттық қауіпсіздік» мамандығында білім алып жатырмын. Қорғаныс министрлігінің бұл жобасы жастарға көрсетіліп отырған үлкен қолдау деп есептеймін, — деді бірінші курс студенті.</blockquote>Гранттар арасында сұранысқа ие бағыттар қатарында коммуникациялар, орман шаруашылығы, ақпараттық-коммуникациялық технологиялар бар.Грант иегерлеріне шәкіртақы тағайындалады. Сондай-ақ жатақханадан орын алуға басымдық беріледі. Әскерден кейін білімін жалғастыру мүмкіндігі грантпен ғана шектелмейді. Мерзімді әскери қызметтен босатылған азаматтар екі жыл ішінде жоғары және жоғары оқу орнынан кейінгі білім беру ұйымдарына ақылы негізде ҰБТ және қабылдау емтихандарының нәтижелерін есепке алмай түсе алады.

Әскерде болған сарбаз биыл грант бойынша жоғары оқу орындарында білім ала бастады

<a href="https://kyzylorda-news.kz/">Kyzylorda-news.kz</a> Қызылордада «Қауіпсіз қала» акциясы аясында Сырдария өзені бойында тұрғындардың қауіпсіздігін қамтамасыз етуге бағытталған алдын алу рейді өтті. Іс-шараға «Әділет» партиясы жанындағы «Жастар Рухы» жастар қанатының белсенділері мен Қызылорда қаласы Төтенше жағдайлар басқармасының қызметкерлері қатысты.Қазір өзен жағасында демалып, балық аулайтын тұрғындардың қатары артып келеді. Осыған байланысты рейд барысында азаматтарға судағы қауіпсіздік талаптары түсіндіріліп, өрттің алдын алу шаралары ескертілді.Төтенше жағдайлар басқармасының мәліметінше, жыл басынан бері түрлі себептермен 9 адам суға кеткен. Олардың арасында балық аулауға шығып, қауіпсіздік талаптарын сақтамау салдарынан суға кеткен азаматтар да бар. Мамандардың айтуынша, мұндай жағдайлардың алдын алуда қарапайым қауіпсіздік ережелерін сақтау маңызды.<blockquote>– Сырдарияда балық аулау кезінде қауіпсіздік талаптарын сақтау өте маңызды. Әсіресе өзен жағасының тайғақ, ағысы қатты жерлерінде абай болған жөн. Балық аулау кезінде суға тым жақын бармау, қауіпсіздік кеудешесін пайдалану және ауа райы қолайсыз кезде өзенге жақындамау қажет. Қарапайым сақтық шараларының өзі қайғылы жағдайлардың алдын алуға мүмкіндік береді», – деді Қызылорда қаласы Төтенше жағдайлар басқармасының аға инженері, азаматтық қорғау аға лейтенанты Елдар Есенгелдиев.</blockquote>Рейд барысында өрт қауіпсіздігіне де ерекше назар аударылды. Өзен жағалауындағы қураған шөптің тұтану қаупі жоғары болғандықтан, тұрғындарға табиғат аясында от жақпау, жағылған отты қараусыз қалдырмау және темекі тұқылын құрғақ шөпке тастамау қажеттігі түсіндірілді. Әсіресе желді күндері кішкентай ғана ұшқынның өзі өртке ұласуы мүмкін екені ескертілді.Өз кезегінде «Жастар Рухы» жастар қанатының белсендісі Аяулым Русланқызы қауіпсіздік мәдениетін қалыптастырудың маңызын атап өтті.<blockquote>«Сырдария – қаламыздың ажырамас бөлігі. Сондықтан өзен жағасына демалуға немесе балық аулауға келген әрбір адам қауіпсіздікке бірінші кезекте мән беруі керек. Кейде қарапайым ғана сақтық шарасын елемеу үлкен қауіпке әкелуі мүмкін. Біз жастар ретінде осындай рейдтерге қатысып, тұрғындарға қауіпсіздік талаптарын түсіндіру арқылы қоғамға пайдалы іске үлес қосып жүргенімізге қуаныштымыз. Ең бастысы – әр адам өз өміріне және айналасындағылардың қауіпсіздігіне жауапкершілікпен қарауы қажет», – деді Аяулым Русланқызы.</blockquote>Рейд барысында тұрғындарға судағы және өрт қауіпсіздігі бойынша жадынамалар таратылып, төтенше жағдайлардың алдын алу бойынша түсіндіру жұмыстары жүргізілді.«Қауіпсіз қала» акциясы аясындағы профилактикалық шаралар тұрғындардың қауіпсіздік мәдениетін арттыруға және өзен жағалауында болуы мүмкін төтенше жағдайлардың алдын алуға бағытталған.

Сырдария жағасында тұрғындарға су және өрт қауіпсіздігі түсіндірілді

<a href="https://kyzylorda-news.kz/">Kyzylorda-news.kz</a> Қызылорда облысының Жаңақорған ауданында ауыл шаруашылығы мен өндіріс саласына қажетті мамандарды даярлау мәселесі талқыланды. Жаңақорған аграрлық-техникалық колледжінде «Еңбек адамы: аграрлық саланы модернизациялау» тақырыбында кәсіби пікір алмасу өтті.Кездесуді «Әділет» партиясы аудандық филиалы ұйымдастырды. Жиында жұмысшы мамандықтардың беделін арттыру, жастарды кәсіптік білім алуға бағыттау және аграрлық саланы заманауи технологиялармен дамыту мәселелері сөз болды. Кәсіби пікір алмасуға «Әділет» партиясы Жаңақорған аудандық филиалының төрағасы Арман Мажитов қатысты.Колледж директоры Ерғали Илиясов білім беру мекемесінде студенттердің теориялық білімін тәжірибемен ұштастыруға басымдық берілетінін атап өтті. Оның айтуынша, ауыл шаруашылығы, техника және өндіріс салаларына қажетті білікті кадрларды даярлау – колледж жұмысының негізгі бағыттарының бірі.Бүгінде аграрлық сектордың дамуы жаңа техника мен технологияға ғана емес, сол құралдарды кәсіби меңгеретін мамандарға да байланысты. Осы ретте колледжде жастарға еңбек нарығында сұранысқа ие бірнеше бағыт бойынша білім беріледі.<img src="https://knadmin.beoblood.kz/uploads/Whats_App_Image_2026_09_22_at_15_47_01_1_dd94e9260e.jpeg" alt="Еңбек адамы.jpeg">Атап айтқанда, білім алушылар «Дәнекерлеу ісі», «Автомобиль көлігіне қызмет көрсету, жөндеу және пайдалану» сияқты техникалық мамандықтарды меңгеруде. Сонымен қатар қыз-келіншектерге тігін және тоқыма бағыттары бойынша кәсіби дағдыларды игеруге мүмкіндік жасалған.Жиында «Әділет» партиясы Жаңақорған аудандық филиалының төрағасы Арман Мажитов еңбек адамының қоғамдағы рөлі мен кәсіби мамандар даярлаудың ел экономикасы үшін маңызын атап өтті.«Әділет» партиясының сайлауалды бағдарламасында алдағы бес жылда 1 миллион сапалы жұмыс орнын құру міндеті қойылған. Бұл мақсатқа қол жеткізуде кәсіби білімі бар, еңбек нарығында сұранысқа ие мамандарды даярлау ерекше маңызға ие. Сондықтан жастардың жұмысшы және техникалық мамандықтарды таңдауына жағдай жасау – бүгінгі күннің ғана емес, елдің ұзақ мерзімді дамуының маңызды бағыты.Бүгінде ауыл шаруашылығы мен өндіріс саласына білікті кадрлар қажет. Жастарға кәсіптің қадірін түсіндіріп, заманауи технологияларды меңгеруге мүмкіндік беру арқылы біз еңбек нарығының сұранысы мен білім беру жүйесінің арасындағы байланысты күшейте аламыз», – деді Арман Мажитов.Пікір алмасу барысында еңбек мәдениеті, кәсіби шеберлік, жұмысшы мамандықтардың болашағы және аграрлық саланы технологиялық жаңғырту мәселелері талқыланды.Ауыл шаруашылығын дамытуда заманауи техника мен технологияның маңызы зор. Алайда оның тиімділігін арттыратын негізгі күш – кәсіби білімі бар, өз ісін жетік меңгерген еңбек адамы. Сондықтан бүгінгі колледж студенттеріне берілген білім мен тәжірибе – ертеңгі ауыл шаруашылығы мен өндірістің дамуына салынған маңызды инвестиция.<img src="https://knadmin.beoblood.kz/uploads/Whats_App_Image_2026_09_22_at_15_47_00_fb982df9de.jpeg" alt="Еңбек адамы.jpeg">

Еңбек адамы – ел дамуының негізгі тірегі

<a href="https://kyzylorda-news.kz/">Kyzylorda-news.kz</a> МӘМС жүйесінде жаңа туған сәбидің сақтандырылу мәртебесі қалай беріледі және жүкті әйел неліктен бұл жүйеден тыс қалуы мүмкін? Әлеуметтік медициналық сақтандыру қорының Қызылорда облысы бойынша филиалының бас сарапшысы Айгүл Аханова халықтан түскен осы және басқа да сұрақтарға жауап берді.Жаңа туған нәресте «сақтандырылған» мәртебеге қашан ие болады?Бала дүниеге келгеннен кейін ол туралы мәліметтер мемлекеттік ақпараттық жүйелер арасында беріледі. Осы деректер негізінде бала «балалар» жеңілдік санатына енгізіледі, ал Saqtandyrý жүйесіндегі МӘМС мәртебесі автоматты түрде жаңартылады.Егер мәртебе көрсетілмесе, баланың мемлекеттік ақпараттық жүйелердегі деректерінің өзектілігін тексеру қажет. Бұл үшін тиісті мемлекеттік органдарға, ең алдымен, ҚР Әділет министрлігіне жүгіну ұсынылады. Себебі бала туралы мәліметтер Жеке тұлғалардың мемлекеттік дерекқорынан беріледі.«Балалар» санатын қалыптастыру Әлеуметтік медициналық сақтандыру корының құзыретіне кірмейді. Мемлекеттік органдар деректерді өзектендіргеннен кейін МӘМС мәртебесі автоматты түрде жаңартылады.Егер бала шетел азаматы болса, қазақстандық үлгідегі туу туралы куәлікті алу оның Қазақстанда тұрақты тұратын шетелдік мәртебесін автоматты түрде алуын білдірмейді. Мұндай мәртебені рәсімдеу үшін тұрғылықты жері бойынша көші-қон қызметінің бөлімшесіне жүгіну қажет.Неліктен жеке кәсіпкерлік қызметі тоқтатылғаннан кейін «жұмыс істемейтін жүкті әйел» мәртебесі қайтарылмайды?Мәртебе мемлекеттік ақпараттық жүйелердегі деректер негізінде автоматты түрде қалыптастырылады.ЖК жабылғаннан кейін тиісті мәліметтер жүйеге түсуі қажет. Сол кезеңде міндетті зейнетақы жарналары (МЗЖ) мен әлеуметтік аударымдардың бар-жоғы тексеріледі.Тиісті төлемдер болмаған жағдайда «жұмыс істемейтін жүкті әйел» мәртебесі автоматты түрде беріледі.МЗЖ, әлеуметтік аударымдар болған немесе қолданыстағы ЖК тіркелген жағдайда бұл жеңілдік санаты берілмейді.Маңызды: Қор бұл мәртебені қолмен тағайындамайды және алып тастамайды.Егер жеке кәсіпкерлігіңіз жабылған болса, бірақ мәртебе өзгермесе, деректерді тексеру және өзектендіру үшін жүктілік бойынша есепте тұрған медициналық ұйымға жүгіну қажет.МӘМС жүйесінде төлемді уақытында жасамаған жағдайда не істеу керек?Ең алдымен «сақтандырылған» мәртебеңізді eGov Mobile, Saqtandyry мобильді қосымшалары немесе Қордың ресми сайты арқылы тексеріп алу қажет.Егер жарналарды өзіңіз төлейтін болсаңыз, өткізіп алған төлемді өтеңіз. Төлем түскеннен кейін ақпарат әдетте автоматты түрде жаңартылады.Жалдамалы жұмыскерге жұмыс берушінің орнына жарнаны өз бетінше төлеудің қажеті жоқ. Төлемнің түспеу себебін анықтау үшін бухгалтерияға хабарласқан жөн.Егер мәртебе өзгермесе, деректерді тексеру үшін 1414 нөміріне немесе тұрғылықты жеріңіз бойынша Әлеуметтік медициналық сақтандыру қорының филиалына хабарласыңыз.

МӘМС жүйесіндегі мәртебені қалай қалпына келтіруге болады?

&nbsp;<a href="https://kyzylorda-news.kz/">Kyzylorda-news.kz</a> Мемлекет басшысының Жарлығымен Қазақстан Халық Кеңесінің құрамы бекітілді. Бұл туралы <a href="https://www.akorda.kz/kz/kazakstan-halyk-kenesinin-kuramyn-bekitu-turaly-2284637">Ақорданың</a> баспасөз қызметі хабарлады.&nbsp;«Қазақстан Халық Кеңесі туралы» Қазақстан Республикасы Конституциялық заңының 5-бабының 1) тармақшасына сәйкес ҚАУЛЫ ЕТЕМІН:1. Қоса беріліп отырған Қазақстан Халық Кеңесінің құрамы бекітілсін.2. Осы Жарлық қол қойылған күнінен бастап қолданысқа енгізіледі.Қазақстан РеспубликасыныңПрезиденті Қ.ТоқаевАстана, Ақорда, 2026 жылғы 22 қыркүйек№ 1474Фото: Ақорда

Қазақстан Халық Кеңесінің құрамы бекітілді 

Бүгін ҚР Премьер-министрі Олжас Бектеновтің төрағалығымен өткен Үкімет отырысында жол және жаяу жүргіншілер қауіпсіздігін қамтамасыз ету мәселесі қаралды. Оған облыс әкімі Мұрат Ергешбаев селекторлық режим арқылы қатысты.Үкімет отырысында көтерілген мәселелерге орай жауапты сала басшыларына бірқатар нақты тапсырма берілді. Аймақ басшысы автомобиль жолдары мен көшелерге жол белгілерін орнатуды, тозығы жеткен жол белгілерін жаңартуды тапсырды. «Батыс Еуропа – Батыс Қытай» автодәлізі бойындағы елді мекендер тұрғындарына малды қараусыз жібермеуді түсіндіру жұмыстарын жандандыру қажет. Облыстық полиция департаментіне автомобиль жолдарындағы авариялық қауіпті учаскелерді анықтауға, жол қозғалысы ережелерінің сақталуына бағытталған рейдтік іс-шараларды тұрақты өткізу міндеттелді.Сонымен қатар, «ҚазАвтоЖол» ҰК» АҚ облыстық филиалына «Қызылорда – Ақтөбе» бағытындағы айналма жол мен «Қызылорда –Сексеуіл» автомобиль жолын қайта жаңғырту жұмыстарын қадағалау тапсырылды.Өңірдегі 3525 шақырым автомобиль жолының 1025 шақырымы республикалық, 555 шақырымы облыстық және 1945 шақырымы &nbsp;аудандық маңызы бар жолдар.Биыл жол инфрақұрылымын дамытуға республикалық, облыстық және аудандық бюджеттерден 40,5 млрд теңге бөлінді. Бұл қаражат есебінен 168 шақырым автомобиль жолы, көшелер мен көпір өткелдерінде жөндеу жүргізілуде. Жол қауіпсіздігін сақтау мақсатында заманауи бақылау құралдары орнатылып жатыр. Жаяу жүргіншілер қатысқан жол-көлік оқиғалары талданып, қауіпті учаскелерге 15 «Sunqar» құрылғысы қойылды. Аудандарда 539 бейнебақылау камерасы мен 49 жылдамдық өлшегіш іске қосылды. Қызылорда қаласында 1400 бейнебақылау камерасы, 80 зияткерлік қиылыс және 96 стационарлық жылдамдық өлшегіш жұмыс істейді.

Жол және жаяу жүргіншілер қауіпсіздігін қамтамасыз ету мәселесі қаралды 

Осы жылдың сегіз айының қорытындысы бойынша республикалық жолдарда жол-көлік оқиғалары санының төмендеуі тіркелді. Үкімет отырысында баяндалған көлік министрі Нұрлан Сауранбаевтың деректері бойынша өткен жылдың осы кезеңімен салыстырғанда жол-көлік оқиғалары 10%-ға, қаза болғандар саны 14%-ға, зардап шеккендер 11%-ға азайған.«Апаттың негізгі себебі — жүргізушілердің ережені сақтамауы. Жол апатының негізгі факторлары: 35%-ы – жылдамдықты асыру, 12%-ы — арақашықтықты сақтамау, 11%-ы — көлікті басқара алмау, 8%-ы — қарсы жолға шығу», &nbsp;— деді Нұрлан Сауранбаев.Қазақстанда жол-көлік оқиғаларының санын азайту мақсатында республикалық және жергілікті маңызы бар барлық автомобиль жолдарында орташа жылдамдықты бақылау жүйесін енгізу жұмыстары жалғасып жатқаны атап өтілді. Қазіргі уақытта көлік қозғалысының орташа жылдамдығын тіркеу жобасы 2,8 мың шақырым ақылы жолды қамтиды. Нәтижесінде ЖКО саны 10%-ға азайды.Жол инфрақұрылымының қауіпсіздігін арттыру үшін республикалық жолдардың 11 мың шақырымынан астамы I және II техникалық санатқа ауыстырылды. Нәтижесінде қарсы бағыттағы соқтығысу қаупі азайды.

Көлік министрлігі: Қазақстанда жыл басынан бері республикалық трассаларда ЖКО саны 10%-ға қысқарды

Қорқыт ата көшесінің бойында орналасқан №134 және №138 көпқабатты тұрғын үйлердің алдағы жылу маусымына дайындығы тексерілді.Тексеру барысында қала әкімінің орынбасары Дархан Тұрсынбаев тұрғын үйлердің жылу жүйелері, жертөле және ортақ пайдаланылатын инженерлік желілердің жай-күйін қарап, жауапты басқару субъектілеріне анықталған кемшіліктерді белгіленген мерзімде ретке келтіруді және жылу маусымына дайындық жұмыстарын толық аяқтау бойынша тапсырмалар берді.Басты мақсат – тұрғындарға қолайлы жағдай жасап, жылу маусымын сапалы әрі үздіксіз өткізу.

Көпқабатты тұрғын үйлердің жылу маусымына дайындығы тексерілуде 

Қармақшы ауданы бойынша биылғы егін жинау науқаны жоспарға сәйкес жүргізілуде. Осы бағытта аудан әкімі Жандос Еркінбек Жаңажол, ІІІ Интернационал, Ақтөбе, Ақжар және Дауылкөл ауылдық округтеріне жұмыс сапары барысында егіс алқаптарын аралап, күзгі дала жұмыстарының барысын бақылап қайтты.2026 жылы аудан бойынша жалпы 25 475 гектар ауыл шаруашылығы дақылдары орналастырылды. Оның ішінде 11 449 гектарға күріш, 1 027 гектарға жаздық бидай, 200 гектарға арпа, 1 182 гектарға мақсары, 733 гектарға дәндік жүгері, 140 гектарға соя, сондай-ақ жоңышқа, судан шөбі, сүрлемдік жүгері және картоп, көкөніс, бақша дақылдары егілді.Алдағы кезеңде шаруашылықтар алдында басты міндет – күріш жинау жұмыстарын белгіленген мерзімде аяқтау. Сондықтан жұмыс сапары кезінде Жандос Еркінбек астықты уақытылы жинауға және өнімді ысырапсыз қамбаға түсіруге қатысты жұмыстарды бақылап, жауапты сала мамандарына тиісті тапсырмалар берді.<img src="https://knadmin.beoblood.kz/uploads/FB_IMG_1790055533076_12c91e500f.jpg" alt="FB_IMG_1790055533076.jpg">

Қазақстан және Қызылорда облысының жаңалықтары: Қоғам