<a href="https://kyzylorda-news.kz/ru">Kyzylorda-news.kz.</a> Әсел – білікті дәрігер, өз ісінің шебері. Ол Алматыда С.Ж.Асфендияров атындағы медициналық университетті тәмамдаған. Науқастардың көңілінен шығып келеді. Ол жасаған ота да сәтті өтеді. Диагнозды ойланып, түрлі аппараттарға түсіріп, содан кейін барып қояды. Бүгінде ақ халатты абзал жан облыстық көпбейінді аурухананың көз аурулары бөлімінде офтальмолог болып жұмыс істейді.Пациенттері оның кез келген адамның диогнозын анықтағандай, көңілін де табатынын айтады. Дәрігер адамды емдемес бұрын ол алдымен оның тілін тауып, сенімінен шығу керек. Әселдің бойынан бұл қасиеттердің барлығы да табылады. Сонымен қатар ол волонтерлықпен де айналысып, науқас жандардың еміне шипа табуға көмектесіп жүр. Мәселен, Батыс Африка Мали республикасында 3 ай дәрігер волонтер болып жұмыс істегенін білдік.<blockquote>– Көз ауруларының түрі көп. Туабітті, жүре пайда болған аурулар бар. Сонымен бірге қабыну аурулары, жарақаттар, т.б түрлері кездеседі. Қазіргі таңда бәріміз телефонға тәуелдіміз. Азаннан кешке дейін қолымыздан телефон түспейді. Арасында көзді демалтып, жаттығу жүргізбейміз.Айналып келгенде содан көз ауруы пайда болады. Компьютерге де кешке дейін отырамыз. Мақұл жұмыс істедік деген күннің өзінде компьютерге арнайы киетін көзілдірік бар, сосын арнайы көзге тамызатын дәрілерібар. Көз ауыра бастағаннан дәрігерге көрініп, тиісті тексерулерден өтіп алған жөн. Күтіну жолы көп. Көп компьютер пайдаланатын адам ылғалдандырушы тамшы тамызып тұру керек. Жаттығудың түр-түрі бар.Мәселен компьютермен жұмыс кезінде 15 минут үзіліс жасап, жаттығуға кезек беру керек. Оны ғаламтор арқылы қарап отырып та жасауға болады. Мәселен, алыс, жақын нүктеге қарау арқылы да жаттығу жасалады, 8 рет қозғалту керек. Көзді демалту үшін екі алақаныңызды бір-біріне үйкелеп, жұмулы көздеріңізге басыңыз. Осы қалыпта 10-20 секунд ұстап тұру керек. Бұл жаттығуды 5-7 рет қайталаған жөн.Жұмыс орныңыздан қозғалмай орындауға болатын жаттығудың бірі: көзіңбен алыстағы нысанды белгілеңіз. Мысалы, терезеден сырттағы ағашқа қараңыз, одан кейін терезе әйнегіне қараңыз. Осылайша 10 рет нысананы алмастыра отыра, көз жаттығуын орындаңыз, – дейді дәрігер.</blockquote>Сондай-ақ маман көптеген аурудың себеп-салдарымен бөлісіп, керекті мағлұмат беріп үлгерді. Айтуынша, бүгінде көз ауруларының жиі кездесетін түріне бленнорея, катаракта, коньюктивит, көзге ақ түсу секілді дерт жатады екен. Лейкома – көздің қасаң қабығының ауруы. Бұл көбінесе жарақаттанудан, қабынудан, көзге шыққан түрлі жарадан ушығуы ықтимал. Қызылша, шешек, туберкулез ауруларының асқынуынан қасаң қабақта ақ дақ пайда болып, ол кейде беріштеніп бітуі мүмкін. Мұның салдарынан көздің көру функциясына нұқсан келеді. Қасаң қабықтың қай жеріне ақ түскеніне, оның көлеміне байланысты. Егер ақ қарашыққа түссе, адамның көзі көрмей қалады. Көзге түскен ақ дәрі-дәрмекке жазылмаса, оған хирургиялық ота жасалады. Ішкі ағзалардың ауруы да көз ауруларына алып келеді. Мысалы, қоян көз, бадырақ көз аурулары сөзімізге дәлел. Уақытында емделмеген көз ауруы көруді нашарлатып, соқырлыққа да алып келуі мүмкін.Глаукома оптикалық нервтің атрофиясына әкеледі, нәтижесінде адам мүлдем соқыр болады. Бұл егде жастағы адамдар үшін қауіпті, бірақ соңғы кезде глаукома орта жастағы адамдарға, тіпті жастарға көбірек әсер етуде. Бұл – созылмалы ауру, үнемі тамшы тамызу керек. Көздегі қысым гипотензивті тамшымен емделеді.<blockquote>– Глаукома диагнозы бірден қойылмайды, науқасты толық тексеруден өткізіп, көзішілік қысым, көру аумағы периметрия, оптикалық көз томографиясы секілді зерттеу нәтижесіне сүйеніп жасалады. Глаукома жастар арасында, туа біткен түрі нәрестелерде де кездеседі, – дейді дәрігер.</blockquote>Жалпы бір күнде көз аурулары бөлімінде 10-нан аса ота жасалады екен. Мұның өзі өзімізді жаттай күту керегін білдіретіндей. Салғырттықты қойып, сақтыққа мән беріңіз!

Қызылордалық дәрігер көз жанарын сақтаудың құпиясымен бөлісті

<a href="https://kyzylorda-news.kz/ru">Kyzylorda-news.kz.</a>&nbsp; &nbsp;Медициналық қызмет түрленінің арасынан тіс дәрігерінің еңбегі ерекше. Жаныңа батқан сәтте емін іздеуге кірісетін тіс мамандарының қызметі бүгінде сұранысқа сай. Рас, дәрігер – адам өмірінің арашашысы. Жаны қиналып, дертіне дауа іздеген адамға бұл кісінің құтқарушыдай көрінетіні анық. Міне, осындай сан мыңдаған адамның құтқарушысына айналған ақ халатты абзал жанның бірі, стоматолог дәрігер – Еламан Қазиев. Ол 7 жылдан аса тіс дәрігері болып халқына қалтқысыз қызмет етуде.Еламан бұл салаға кездейсоқ келмеген. Нағашысы Махмұд Есенгелдиев бозбаланың медицинаға икемі барын байқап, ата-анасынан рұқсат алып, клиникасына көмекші етіпті. Бұл, бір жағынан, Еламанға өндірістік тәжірибе болса, бір жағынан, мамандығын айқындауға сеп болған көрінеді.<blockquote>– Ата-анам құрылыс саласының мамандары. Әу басында құрылысқа қадам бассам қалай болады деген сауал болды. Әке жолын қуып, құрылысшылар династиясын жалғастырғым-ақ келді. Дегенмен өсе келе ойым өзгерді. Нағашым – тіс маманы. Азды-көпті қасында жүріп, стоматологтың қоғамға қажеттілігі зор екенін ұғып, Қызылорда медициналық жоғары колледжіне оқуға түстім. Оқуды бітірісімен еңбек жолымды тіс емханасында көмекші қызметінен бастадым. Жұмыстың арасында Отан алдындағы борышымды да өтеп келдім.</blockquote>7 жылдан аса уақыт ол осы салада тер төгіп, дертіне шипа іздеген сан мыңдаған науқасқа қол ұшын берді. Көпшіліктің ыстық ықыласына бөленген Еламан дәрігер науқастың тілін табу оңай шаруа емес екенін айтады. Білікті маман әр адамға ерекше мейіріммен қарап, емінің шипалы болуына бар күш жігерін салады.<blockquote>– Осы салада жүрген соң бір жағынан психолог болдық. Олай дейтінім тісі сыздап келген адам ашушаң келеді. Оны емдемес бұрын жағдайын сұрап, көңілін аулаймыз. Сонымен қатар науқас дәрігердің ем-домына емес, қабағына, мейірімі мен жан жылуына мұқтаж. Қабағыңнан қар жауып тұрса, емдеген науқасыңа ем қонып, тез арада жазылып кетеді деу – бекершілік. Сондықтан бірінші кезекте дәрігер мейірімді болғаны абзал. Сырқаттанған адамға жаны ашып тұрған дәрігер – мықты маман. Ондай дәрігердің емі де тез қонады. Қолы шипалы тұлға, адамдардың сеніміне де ие болады. Сондай-ақ біздегінің бір жаманы аурудың алдын алмаймыз. Тіс құрдымға кеткен кезде ғана стомед жағалайтынымыз жасырын емес. Сол себепті тіске де мұқият болғанымыз абзал.</blockquote>Әр науқасқа асқан ептілікпен ем жасайтын кейіпкеріміз әңгіме барысында қажетті кеңестерін де ұсынды.<blockquote>– Үй жағдайында тісті ағарту кезінде абай болу қажет. Себебі тіс эмалін жұқартып алуыңыз мүмкін. Ағарту құрылғысын айына бір рет, ас содасын аптасына бір рет қана қолданған жөн. Ағарту рәсімін жасаған соң, 48 сағат өткенше кофе ішуге, темекі тартуға және бояуы бар сусындар мен азық-түлік қолдануға болмайды. Тісті табиғи жолмен ағарту үшін қышқылы мол жеміс-жидек (ананас, алма, алмұрт, құлпынай) жеу керек.</blockquote>Сонымен қатар қанты бар кофені аз-аздап ұзақ уақыт бойы ішу тіс эмалін жылдам құртады. Кофені қантсыз ішу немесе қантпен жылдам ішіп қою керек. Содан соң міндетті түрде тісті жуыңыз.Мамандықты дұрыс таңдай білген адам жемісті болары сөзсіз. Жемісті еңбек етіп жүрген Еламанның әлі де науқастар үшін тигізер көмегі көп. Қысқасы, бүгінгі кейіпкеріміз кісінің құлан таза айығып кетуіне ешқашан бей-жай қарамайды.

Стоматолог дәрігері сұранысқа сай

<a href="https://kyzylorda-news.kz/">Kyzylorda-news.kz.</a> Бүгін қызылордалық полицейлердәрігер-әріптестерін кәсіби мерекелері – Медицина қызметкерлері күнімен құттықтады.&nbsp;Кәсіби мерекеге орай, ҚР Денсаулық сақтау министрлігінен «Денсаулық сақтау ісінің үздігі» төсбелгісімен ведомстволық емхананың аймақтық дәрігері Райкүл Сейтенова және ӘДК төрайымының м.а. Гаухар Бақбергенова марапатталды.&nbsp;Сонымен қатар, Қызылорда облысы Полиция департаменті бастығының бұйрығымен емхананың дәрігер-бактериологі Ахметова Гульнара, &nbsp;аймақтық терапевт дәрігер ЕсмахановаМарал, емхананың аймақтық аяжаны Тулкибаева Раушан &nbsp;«Грамотамен» марапатталса, &nbsp;емхананың шаруашылық аяжаны Тұрманов Мәншүк, Жалағаш ауданы полиция бөлімінің уақытша ұстау изоляторының фельдшері Жамалатов Алмат «Алғыс хатпен» марапатталды.&nbsp;Департамент бастығының орынбасары полиция полковнигі Искаков Ермек Бердалыұлыведомстволық емхана қызметкерлерін кәсіби мерекелерімен құттықтап, ізгі тілегін білдірді.&nbsp;<blockquote>«Сіздерді кәсіптік мерекелеріңіз – медицина қызметкерлері күнімен шын жүректен құттықтаймыз! Дәрігер – адам жанының арашасы, жер бетіндегі сан алуан кәсіптің ішіндегі ең ізгі, ең қастерлі мамандықтың иесі. Ерен еңбектеріңізге, шипалы алақандарыңызға, мейірімді жүректеріңізге алғысымыз шексіз. Сіздерді төл мерекелеріңізбен құттықтай отырып, отбасыларыңызға амандық, дендеріңізге саулық, күш - жігер, баянды бақыт пен жаңа табыстар тілей отырып, биік асулардан көріне беріңіздер деген тілегімізді білдіреміз!», - деді Ермек Бердалыұлы.</blockquote>

Қызылордалық полицейлер медицина қызметкерлерін құттықтады

<a href="https://kyzylorda-news.kz/">Kyzylorda-news.kz.</a> Қызылорда облысында 25 фельдшерлік-акушерлік бекет бар. ФАБ-те қандай медициналық көмек көрсетіледі, ауыл тұрғындары ауруды анықтау, дәрігердің кеңесін алу немесе қымбат ота жасау қажет болса, қайда бару керек? Осы және өзге де сауалдарға тілшілер Шиелі ауданындағы баспасөз туры барысында жауап алды. Баспасөз турын Әлеуметтік медициналық сақтандыру қорының Қызылорда облысы бойынша филиалы ұйымдастырды.Жиделіарық ауылында мыңға жуық халық тұрады. Құрметті агроном Есімұлы Әбусағи ФАБ-қе жүрек және қан қысымының жоғарылауы шағымдарымен жүгінді. 75 жастағы еңбек ардагеріне алғашқы медициналық-санитарлық көмек көрсетіліп, қосымша медициналық тексеруден өтуге кеңес берілді.<blockquote>«Зоб, жоғары қан қысымы мазалайды. Жұбайымның да қан қысымы көтеріледі. ФАБ мамандары кәсіби медициналық көмек көрсетеді. Дәрі-дәрмектерді де уақытылы алып тұрамыз», - деді ардагер.</blockquote>Пациент Еңбекші ауылының дәрігерлік амбулаториясына жіберілді. Мұнда қабылдауды жергілікті дәрігер жүргізіп, жоспарлы медициналық көмекке жолдайды. Негізгі шарт - пациент МӘМС жүйесінде сақтандырылуы тиіс.<blockquote>«ФАБ дәрігерге дейінгі алғашқы медициналық-санитарлық көмек көрсетеді. Еңбекші ауылының дәрігерлік амбулаториясында жергілікті дәрігер ауылдың тұрғындарды консультациялық-диагностикалық қызмет алуға, күндізгі және тәулік бойы стационарларда емделуге және т.б. медициналық қызметтерге жібереді. Ауылдың 118 тұрғыны диспансерлік есепте тұрады. Көбінесе жүрек-қан тамырлары аурулары, қант диабеті, бронхитпен ауырады», - деді Жиделіарық ауылының фельдшері Дархан Сәрсенбаев.</blockquote>Науқастың жағдайын бағалағаннан кейін, жергілікті дәрігер ем тағайындайды немесе аудандық ауруханаға мамандырылған дәрігерінің кеңесіне жібереді. Төтенше жағдайда, сақтандыру мәртебесіне қарамастан, пациент жедел жәрдем көлігімен ауруханаға жеткізіледі. Осылайша, бас миы шайқалған Жиделіарық ауылының тұрғыны Анар Сармақова аудандық ауруханаға түсті. 53 жастағы әйелге компьютерлік томография тағайындалды.<blockquote>«Басым айналып, есінен танып қалдым. Содан сон құсу басталды. Қазір денсаулық жағдайым жақсы, ем қабылдап жатырмын. Менде анемия бар, бірақ диспансерлік есепте тұрмаймын. Мұғалім болып жұмыс істеймін. Енді медициналық тексеруден өтіп, әрі қарай емделемін», - дейді Анар Сармақова.</blockquote>Айта кетейік, қазір ауыл тұрғындары КТ-дан аудандық ауруханада өтеді. Бұрын олар облыстық медициналық ұйымдарға жүгінуге мәжбүр болды.<blockquote>«Компьютерлік томография бойынша зерттеу осы жылдың наурыз айынан жүргізілуде, кәзірдің өзінде 500-ге жуық пациент тексеруден өтті. КТ тәулік бойы жұмыс істейді. КТ нәтижелерін аудандық аурухананың рентгенологы жүргізеді және КМАЖ-ге (кешенді медициналық ақпараттық жүйе) жібереді, содан кейін Қызылорда қалалық ауруханасының маманы қорытынды береді», - деп түсіндірді Шиелі аудандық ауруханасы бас дәрігерінің орынбасары Гүлмира Құрбанғалиева.</blockquote>Биыл Шиелі ауданының тұрғындарына медициналық көмек көрсету үшін Әлеуметтік медициналық сақтандыру қорынан 6,7 млрд. теңге бөлінді.<img src="https://knadmin.beoblood.kz/uploads/1_8c67ee1159.jpeg" alt="1.jpeg"><img src="https://knadmin.beoblood.kz/uploads/4_87a976d6aa.jpeg" alt="4.jpeg">

Қымбат медициналық қызметтерді ауыл тұрғыны қалай алады?

<a href="https://kyzylorda-news.kz/">Kyzylorda-news.kz.</a>&nbsp; Медицина қызметкерлерінің кәсіби мерекесіне орай Сырдария ауданының әкімі Берік Сәрменбаев жиын өткізді. Жиынға облыстық мәслихат депутаты Жұмабек Ембергенов, аудандық мәслихат хатшысы Ержан Әжікенов, аудандық аурухананың бас дәрігері Жалғасбек Үсенов, аудандық ардагерлер кеңесінің төрағасы Мұса Келдібаев, аудандық қоғамдық кеңес төрағасы Марат Еспенбетов, аудандық әйелдер кеңесінің төрайымы Ұлмекен Жанәлиева мен сала ардагерлері мен қызметкерлері қатысты.Алдымен төл мереке иелерін құттықтаған аудан басшысы ізгі тілегін жеткізді.<blockquote>Құрметті сала ардагерлері, медицина қызметкерлері! Сіздерді кәсіби мерекелеріңіз – медицина қызметкерлері күнімен шын жүректен құттықтаймын! Бұл мереке – адам жанын жүрегімен сезінетін денсаулық сақтау саласының барлық қызметкерлерінің ерен еңбегі бағаланатын күн. Сіздердің еңбектеріңіздің өлшемі – өмірмен қайта табысқан адамдардың тағдырымен тікелей байланысты. Дәрігер – адам жанының арашасы, жер бетіндегі сан алуан кәсіптің ішіндегі ең ізгі, ең қастерлі мамандықтың иесі. Ал оның иесі болу – үлкен мәртебе. Әрдайым адамзат баласы тағдырын сеніп тапсыратын мамандықтарыңызды абыроймен атқарып, халық сеніміне ие болып жүре беріңіздер. Ел мүддесі жолын¬дағы қиындығы мен қуанышы мол еңбектеріңізге табыс, отбастарыңызға амандық тілеймін, – деді Берік Әбдіғаппарұлы.</blockquote>Мерекелік құттықтаудан соң аудан басшысы сала ардагерлері Рүстем Садықұлына, Астрахан Қожақовқа, Нұрипа Оралбаеваға, Тәжігүл Жорабекқызына алғыс хат тапсырып, сый сияпат көрсетті.&nbsp;Ақ халатты абзал жандарды аудандық мәслихат хатшысы Ержан Әжікенов құттықтап, мамандықтың ішіндегі ең қиыны да жауапты дәрігерлікті таңдаған, адам жанының арашасы болған ақ халатты абзал жандарға ізгі тілегін жеткізді.&nbsp;Мерекелік құттықтауларды аудандық әйелдер кеңесінің төрайымы Ұлмекен Жанәлиева, аудандық ардагерлер кеңесінің төрағасы Мұса Келдібаев жалғастырды. Сала ардагерлері Рүстем Садықұлы мен Астрахан Қожақов аудан әкіміне ардагерлерді төрге шығарып, құрмет көрсеткеніне алғыстарын айтты.<blockquote>&nbsp;Ауданда аурухана құрылысы 1993 жылы басталды. Елдегі қиыншылық, қаржы тапшылығы болған кез еді. Осындай күрделі уақытта жаңа аурухананы салып бітіруге күш салдық. Қазіргі дәрігерлерге айтпағым, адам жанына араша түсу үшін өміріңнің көп уақытын ауруханада, науқас жанның жанында өткізуің керек, бір ауыз жылы сөздің өзі жаны жабырқаулы адамға күш береді. Абыройлы болу үшін жұмысты күшейту керек, – деді саланың байырғы басшысы болған, ардагер Рүстем Садықұлы.&nbsp;</blockquote>Ауданның медицина саласында ұзақ жыл қызмет етіп, еңбек кітапшасында бір ғана жазбамен зейнеткерлікке шыққан ардагер Астархан аға Қожақов та &nbsp;қиын кездегі қызметі жайында естелік айтып, аудан басшысына өз ұсынысын жеткізді.<blockquote>Дәрігерлікке 1966 жылы институтты бітіріп келіп, кірістім. Сол жылы аудандық туберкулезге қарсы диспансерге жұмысқа қабылданып, өмір бойы сонда жұмыс істеп, зейнеткерлікке шықтым. Медицина өте қиын сала екені белгілі, абыроймен жұмыс жасау үшін науқастың жанын түсіну керек. Қай кезде дәрігерден көмек сұрап келетін адамға жылы шырай танып, білгеніңді айтсаң, одан артықтың керегі де жоқ. Науқастың қолынан ұстап, "кешегіден бүгін тәуірсіз" деп айтқан сөзіңіздің өзі науқастың бетіне қан жүгіртеді. Сондықтан әрдайым алақандарыңыз шипалы болсын. Ал аудан әкіміне айтатын ұсынысым, ауданда радиобайланысы қайта іске қосылса, халық радионың үнімен оянып, онда айтылатын керемет тағылымды әңгімелерді естіп, бір сәт мына қолдағы ұялы телефоннан бас тартатын еді, – деді ардагер.</blockquote>Мерекеге орай өткен жиын соң аудандық мәдениет үйінде салтанатты іс-шарамен жалғасты. Іс-шарада саланың үздіктері марапатталып, құрмет көрсетілді. Концерттік бағдарламаға ұласқан жиында әннен шашу шашылды. &nbsp;

Сырдарияда медицина қызметкерлері төл мерекесін атап өтті

<a href="https://kyzylorda-news.kz/ru">Kyzylorda-news.kz.</a> Денсаулық – әр адамның және тұтас қоғамның бүтін бір байлығы мен бақыты. Өйткені, адамның бойын ауру меңдесе жаны қалжырап, әл кетіп, қайта қан жүгіруі қиын болады. Сосын да шыбын жаны шырқырап, сай-сүйегінің сырқырағанын сезген жұрт дертіне дауа іздеуге дайын тұрады. Жұмысқа жегіліп, қаржыны күректеп табу керек болса да, денсау¬лыққа күтім керек екенін бәрі біледі. Қанша дегенмен ауру батып, жаның көзіне көрінгенде басқаны ойлап, бас қатырудың өзі бекер. Осыдан-ақ, саулықтың басты байлық екенін аңғаруға болады. Әсте, халықтың мықты денсаулығы мемлекет үшін де маңызды. Медицинаны дамыту мақсатында қабылданған шешімдер түйткілді түйінді тарқатып, оңды болуына ықпал етіп келеді. Сайып келгенде, денсаулық саласында қозғалатын даудың азайып, кемшіліктің кемігені атқарылған ауқымды жұмыстардың үлесінде екені айдан анық. Қазіргі таңда денсау¬лық сақтау жүйесінде дабыл қағарлық жүгенсіздіктің жоқтығы көпті қуантады. Осы ретте, облысымызда денсаулық сақтау саласын дамыту бағытында іске асырылған жұмыстарға тоқталып өтуді жөн көрдік.Өміріміздің негізі де, діңгегі де – денсаулық. Тасыған қуат, қажыр-қайрат болмаса, төртбұрышты керуетте төсекке таңылып жатуға тура келеді. Әсте, ауруды ауыр немесе жеңіл деп қарастыруға болмайды. Ауру асқынар болса, ағзадағы берік байланыстар бытырап, ажалмен күресу керек болады. Сондықтан емге шипа іздеуді ертерек ескерген ләзім. Иә, ауру-сырқау айтып келмейді. Мезгіл меңземейтін, уақыт таңдамайтын сырқаттың қашан жаныңды шырқырататынын болжап білу мүмкін емес. Сол себепті де аудандарда жаңа емханалардың салынып жатқаны орынды. Әйтпесе, орталыққа жетем дегенше оқыстан қауіп төнсе, үздіккен үміт те үзілмей ме?! Тұрғындарға тынбастан көмек көрсететін емхананың болғаны көңілдегі күмән мен күдікті сейілтіп, сенім ұялататыны сөзсіз. Осы ретте, республикалық бюджет есебінен жалпы құны 2,3 млрд. теңгені құрайтын 80 мыңнан аса тұрғынға қолжетімді және жоғары сапалы бастапқы медициналық-санитарлық көмек көрсететін Қазалы ауданы, Әйтеке би кентінде 250 келушіге арналған ауданы емхана ғимараты құрылысы аяқталды. Нанымды нәтиже болса, науқастың айтар назы азаятыны белгілі. Құрылыстың қарқынды жүріп, мезетінде аяқталғаны тұрғынды да қуанышқа кенелтіп, бақытқа бөлейтіні рас. Сонымен қатар, өткен жылдың наурыз айында медициналық ғимараты жоқ шалғай елді мекендерде 2 медициналық бекет іске қосылды. Мұның өзі жағымды жаңалықтар легін толтырып, жүзеге асырылған жұмыстардың жүйесін көрсетіп берді.Өткен жылдың қорытындысы құлазытып тұрған жоқ. Тиісінше, биыл да атқарылатын жұмыстар жемісін беріп, шаш етектен шаруаның шешімі табылып, жоспарлар іске аспақ. Мәселен, «Ауыл – ел бесігі» бағдарламасы шеңберінде іске асырылып жатқан Жалағаш ауданы Таң ауылындағы дәрігерлік амбулатория құрылысының 1 қыркүйекте қабылдау актісі алынды. Шынтуайтында, емхана есігі қашан да ашық әрі көптеп салынғаны жақсы. Себебі, алыстан ат терлетіп жеткенде ауру күшейіп, емдеуге мүмкіндік жолы жабылуы мүмкін. Әсіресе, шалғай орналасқан елді мекендерге көп көңіл бөліп, тұрғын талабы мен тілегін назарға алуы құптарлық іс. Демек, денсаулық сақтау жүйесінің дамуында дамыл жоқ деген сөз.Құрылысы қарқынды һәм бірқалыпты жалғасқан емханаларды айтпағанда медициналық мекемелерді жаңа құрал-жабдықтармен жабдықтау ісі қолға алынған. Бюджеттен бөлінген қаржының қажетті жұмсалуы жоқты түгендеуге сеп болуда. Мәселен, 2022 жылға денсаулық сақтау саласына жалпы сипаттағы трансферттер есебінен 1523,9 млн. теңге қаражат қаралды. Бөлінген қаражат шеңберінде Қармақшы және Шиелі аудандық ауруханасына компьютерлік томограф, №3 қалалық емхана, Арал және Жаңақорған ауданаралық ауруханаларына видеоэндоскопиялық жүйесі, қалалық орталық емханаға цифрлы стационарлық флюрографиялық рентген аппараты, №3 қалалық емханаға рентген жүйесі, №5 қалалық емханаға маммографиялық рентген жүйесі аппараттары сатып алу жоспарлануда. Нәтижесінде құрал-жабдықтармен қамтылу көрсеткіші 83,5 пайыздан 85%-ға дейін көтерілетін болады. Медициналық мекемелердің құрал-жабдықтармен толығуы науқастың назын азайтып, алғысын көбейтетін тәрізді. Осы жоспарлар нық жолға қойылса, «бармаған жерім, баспаған тауым қалмады» деп, еміне шипа таба алмай, санасы сан-саққа жүгіріп, жан-жақта сандалып кететін, яғни өзге елге барып ем қабылдауға мәжбүр болатын науқастар көңілі жайланушы еді. Денсаулық сақтау саласын дамыту бағытында атқарылып жатқан жұмыс¬тардың бәрі бағдарлы түрде орындалып-ақ жатыр. Бір ғана кем-кетігін түзеп ғана қоймай, бүге-шүгесіне дейін атқарылар істі жүйелеп, ұсақ-түйекке дейін мән берген басшылықтың мақсаты айқын екені байқалып тұр. Облыста орайын тапқан жұмыстың жемісін көрсеткішімен-ақ бағалап, бағамдап алуға әбден болады. Атап айтсақ, облыстық жедел жәрдем стансасына линзинг арқылы 20 санитарлық автокөлік алынды. Яғни, құрал-жабдықтармен және санитарлы автокөліктермен жабдықталуы 100 %-ды құрайды.Ендігі көзделген мақсат – 2023 жылы республикалық бюджеттен 3,5 млрд. теңгеге медициналық бұйымдар сатып алу. Сонымен қатар, 14 наурызда «Қызылорда қаласында бір ауысымда 100 келушіге арналған емханасы бар 300 төсек орнына арналған көп бейінді аурухана (онкологиялық бөлімшемен) салу» жобасы бойынша жобалық-сметалық құжаттама әзірленіп, мемлекеттік сараптаманың оң қорытындысы алынған болатын. Әкімдік тарапынан Қазақстан Республикасы Денсаулық сақтау министрлігіне 2023-2025 жылдарға арналған республикалық бюджет қаражаты есебінен жоспарланған инвестициялық жобалардың тізбесін енгізу үшін бюджеттік өтінім ұсынылды. Осыған орай, Қызылорда облысы үшін жедел және шұғыл қажеттілігін, сонымен қатар, Арал өңірі аймағы үшін маңыздылығын ескере отырып, аталған нысан құрылысын бастауға 2023 жылға 750 миллион теңге республикалық бюджет есебінен бөлінді. Қазіргі таңда конкурс рәсімдері жүргізілуде. Әлбетте, бұл да өз кезегінде Сыр медицинасында жаңа серпін барын айғақтайтыны анық. Енді құрылысы жүріп, жаңа аурухананың кірпіші қаланса, бұл да жағымды жаңалық болмақ.Денсаулық саласында жүргізілген ұлттық жобалардың ұтымды тұсы көп болғаны мәлім. Мәселен, «Дені сау ұлт» жобасы аясында жеткен жетістіктер аз емес. Жоспары жүйелі, бағыты айқын ұлттық жоба мақсатына жетуде десек артық болмас. Соңғы жылдардың қорытындысында ұлттық жобаның барлық іс-шаралары орындалып, көрсеткіштер деңгейі жоспарлағандай мәнге ие болды. Енді «Ауылдық денсаулық сақтау¬ды жаңғырту» пилоттық ұлттық жобасының облыста қалай жүзеге асып жатқанына тоқталып көрелік. Аталған жоба бойынша ауылдық инфрақұрылымды дамытуда қомақты қаржы көлемінде 27 нысан, яғни 24 дәрігерлік амбулатория, 2 фельдшерлік-акушерлік бекет, 1 медициналық бекет құрылысының тізімі бекітіліп, Денсаулық сақтау министрлігіне жолданған болатын, өз кезегінде қолдау тапты.Қазіргі таңда бірнеше ауданда 15 дәрігерлік амбулатория және 1 медициналық бекет құрылысының жобалық-сметалық құжаттамасы әзірленіп, сараптама қорытындысы алынды. Нысан құрылысына жер учаскесі бөлініп, инженерлік инфрақұрылым жүргізілген. Аталған 16 нысанның құрылысы осы жылы басталмақ. Сонымен қатар, қалған 9 дәрігерлік амбулатория мен 2 фельдшерлік-акушерлік бекет құрылысына типтік жобаға байланыстыру жүргізілетін болады. Осыған қатысты жер учаскелерін рәсімдеу жұмыстары жүргізіліп, нысандар құрылысына жер таңдау актілері алынған.Асылында, алға қойған мақсатты міндетті орындауға көшкен басқармалардың бастамасы жаман емес. Адам өмірі мен тағдырының ойыншық емес екенін ескерсек, денсаулық сақтау жүйесінің жүйке жұқартпайтындай болғаны игі. Осы орайда, жауапкершілік жүгі ауыр салмақты салада болған әрбір серпін көңілге серпіліс сыйламақ.

Сыр медицинасының дамуы қарқынды

<a href="https://kyzylorda-news.kz/">Kyzylorda-news.kz.</a> 2023 жылдың бірінші жартыжылдығында әртүрлі байланыс арналары арқылы Қызылорда облысы бойынша Әлеуметтік медициналық сақтандыру қорының филиалына 744 өтініш келіп түсті, оның 254-і - медициналық көмектің сапасы мен қолжетімділігіне байланысты шағымдар. Бұл көрсеткіш 2022 жылдың сәйкес кезеңімен салыстырғанда 0,5 есеге жоғары, деп хабарлады ӘМСҚ облыстық филиалының директоры Бақыт Исмаханбетов.Әлеуметтік медициналық сақтандыру қорының (бұдан әрі – Қор) міндеттерінің бірі пациенттердің құқықтарын қорғау болып табылады. Күн сайын Қор келесі ресми байланыс арналары арқылы өтініштерді қабылдайды:&nbsp;- 1414 байланыс орталығы,&nbsp; - Qoldau 24/7 мобильді қосымшасы,&nbsp; - fms.kz ресми сайты,&nbsp; - Telegram-дағы @SaqtandyrýBot.Талдау көрсеткендей, байланыстың ең сұранысы жоғары тәсілі Qoldau 24/7 – мобильді қосымша арқылы өтініштердің 134 келіп түсті. Екінші орында – 1406 байланыс орталығы (112 шағым).&nbsp;Қор филиалы директорының айтуынша, пациенттер медициналық көмектің сапасыз көрсетілуіне немесе одан бас тартылуына, консультациялық-диагностикалық қызметтерді ұзақ күтуіне, тар бейінді мамандарға жазбаның болмауына шағымданды.&nbsp;<blockquote>«Шағымдардың негізгі себептері - тағайындалған емдеумен, қойылған диагнозбен келіспеу, дәрігердің медициналық қызметтерге жолдама беруден бас тартуы, бейінді дәрігердің консультациясын немесе диагностикалық тексеруді күту, өңірде қажетті мамандардың болмауы. Қор әрбір шағым бойынша егжей-тегжейлі талдау жүргізуде. Біз пациенттерді өз құқықтарын білуге және олар бұзылғанда, жағдайды сол жерде шешу үшін алдымен медициналық ұйымның өзінде Пациенттерге қолдау көрсету қызметіне жүгінуге шақырамыз. Бұл қызметтер барлық емханалар мен ауруханаларда бар. Егер мәселені сол жерде шешу мүмкін болмаса, Қорға жүгіну қажет», – &nbsp;деп атап өтті Бақыт Исмаханбетов.</blockquote>Өтініштерді талдау қорытындылары бойынша пациенттердің құқықтарын бұзу жағдайларын болдырмау немесе алдын алу үшін Әлеуметтік медициналық сақтандыру қоры клиникалармен қажетті жұмыстарының бағыттарын анықтайды. Бұл үшін Қор апта сайын семинарлар ұйымдастырады, медицина қызметкерлерін оқыту бағдарламаларын түзетеді, тестілеу өткізеді, қызмет көрсету сапасын жақсарту бойынша ұсыныстар береді.Медициналық ұйымдарда қызмет көрсету сапасын жақсарту үшін Қор тұрақты түрде «Жасырын пациент» акциясын өткізеді. Қор қызметкерлері медициналық ұйымдарға «жасырын» қоңырау шалу арқылы тіркеу мамандары мен медицина қызметкерлерінің медициналық сақтандыру жүйесі, МӘМС пен ТМККК кіретін медициналық қызметтер, медициналық көмек көрсету стандарттары, сондай-ақ пациенттердің сақтандырылу мәртебесі мәселелері туралы біліміне мониторинг жүргізеді.Медициналық сақтандыру жүйесіндегі өз мәртебеңізді тексеру және жүргізілген төлемдер туралы Медициналық сақтандыру қорының "Qoldau 24/7" мобильді қосымшасы мен Telegram-дағы @SaqtandyrýBot арқылы біле аласыз, немесе ҚР және egov.kz электрондық үкіметі сайтының «Денсаулық сақтау» бөлімінде «Міндетті әлеуметтік медициналық сақтандыру жүйесіне медициналық көрсетілетін қызметті тұтынушы ретінде қатысу туралы және аударымдардың және (немесе) жарналардың аударылған сомалары туралы ақпарат ұсыну» мемлекеттік қызметіне тапсырыс бере аласыз. &nbsp;

Медициналық қызмет көрсету сапасына  пациенттердің шағымдары көбейді

<a href="https://kyzylorda-news.kz/">Kyzylorda-news.kz.</a>&nbsp; Денсаулық – зор байлық. Денсаулық сақтау ұйымдарының жаңа заман талабына сай әрі қолжетімді болуы маңызды. Осы ретте, ауданға қарасты А.Тоқмағамбетов, Қалжан ахун, Іңкәрдария ауылдық емханаларына күрделі жөндеу жұмыстары жүріп жатыр.Аудан әкімі Берік Сәрменбаев А.Тоқмағамбетов және Қалжан ахун ауылдарындағы құрылыс жұмыстарымен танысты. Аудандық аурухананың бас дәрігері Жалғасбек Үсеновпен бірге ауылдық емханалардың құрылыс сапасын бақылаған аудан әкімі сапалы нәтижеге қол жеткізудің маңызды екенін айтты. Аталған ауылдық емханаларда ішкі жұмыстар бойынша ішкі есіктерін орнату, электр желілері және жылумен жабдықтау жұмыстары жүргізілуде. Айта кетейік, қос ауылдағы құрылыс жұмыстарын «Ахат+ГС» ЖШС, ал Іңкәрдария ауылдық емханасының жөндеу жұмыстарын «Жылу ХХІ» ЖШС жүргізуде.<blockquote>– Сырдария ауданы бойынша денсаулық сақтау нысандары күлделі жөндеуден өтуде. Әрине, халықтың денсаулығын жақсартуға жіті көңіл бөлуіміз керек. Қазіргі уақытта аурушаңдық деңгейін төмендету мақсатында профилактикалық іс-шаралар жүргізіледі. Сонымен бірге аудан көлемінде Асқар Тоқмағамбетов, Іңкәрдария, Қалжан ахун ауылындағы құрылыс жұмыстарын сапалы орындауға көңіл айрқша көңіл бөуіміз керек. Өйткені, алдағы балалар, жүкті әйелдер, қарт кісілер, жалпы аудан тұрғындарына қолайлы орта қалыптастыруымыз керек, – деді аудан әкімі. &nbsp;</blockquote>Сондай-ақ аудан әкімінің ауылдық округ тұрғындарымен кездесуі кезінде көтерілген медициналық құрал-жабдықтармен қамтамасыз ету мәселелері шешім тауып, аудандық аурухана тарапынан Аманкелді дәрігерлік емханасына ВА200 биохимиялық анализ анықтайтын аппарат жеткізілді. Аудан орталығынан шалғай орналасқан Айдарлы, Жетікөл, Аманкелді және Бесарық ауылдық округі тұрғындары биохимиялық қан талдауларын Аманкелді дәрігерлік емханасына келіп тапсыра алады. Биохимиялық қан анализаторы кез келген пациенттің денсаулығы туралы деректерді дереу алуға мүмкіндік береді. Заманауи автоматты анализаторлар өте маңызды параметрлердің бүкіл массасын анықтауға мүмкіндік береді, олардың дерек-тері тез әрі дұрыс диагноз қоюға ықпал етеді.Ауданымызда халық денсаулығын жақсарту, медициналық қызмет сапасын арттыру, халықты қолжетімді медицинамен қамтамасыз ету, профилактикалық медицинаны дамыту мақсатында бірқатар жұмыстар жүзеге асырылып, оңтайлы шешім табуда. Бұл бағыттағы жұмыстар үнемі назарда болады.&nbsp;&nbsp;&nbsp;

Аудан басшысы медициналық нысандарды аралады

<a href="https://kyzylorda-news.kz/">Kyzylorda-news.kz.</a>&nbsp; Әйгерім – Жалағаштың тумасы. Ал есейіп, мектептен соң жоғары білім арқылы мамандықпен кәсіп бастаған жері – Қармақшы ауданы. Иә, былайынша, қатар жатқан қос ауданның арасы тым алыс емес. Дәрігерлік оқу орнының «терапия» бөлімін бітірген қыздың болашақ жары осында кездесті. Енді, міне, қармақшылықтарға дәрігерлік те, келіндік те міндетін қатар атқарып жүр.Бала кезінен дәрігер болып ойнап, көршінің кішкентай ұл-қызын емдеп жүретінін бүгінде ол күліп еске алады. Сол бала қиялымен мамандығын адаспай тапты емес пе?! 2006 жылы Жалағаштағы Т.Жүргенов атындағы дарынды балалар мектебін бітірген соң Ақтөбеде білім алды. Осындағы М.Оспанов атындағы Батыс Қазақстан мемлекеттік медицина университетіне түсті. 2013 жылы «терапевт» мамандығы бойынша аяқтап шықты. Еңбек жолын да осы жылы Қармақшы аудандық ауруханасында дәрігер болып бастаған.<blockquote>– Бала күнімде &nbsp;ауруханада жұмыс жасап жүрген дәрігерлерге қарап, қатты қызығатынмын. Олар адам жанының арашашысы ғой. Мен солардың бірі болуды армандадым. Үстіне киген ақ халаттарынан олардың жүректері таза, пейілдері кең, көңілдері кіршіксіз екенін байқауға болатын еді. Міне, сондықтан кішкентайымнан медицинаға құмар болып өстім. Әлбетте, жаны қиналып тұрған адамға қуаныш сыйлауды үлкен бақыт деп санаймын. Сол себепті мамандығымды мақтан тұтамын. Қармақшы аудандық ауруханасының «Шипагер» емханасына терапевт-дәрігер болып қабылданғанымда қатты қорықтым. Қуанышым да болды. Бірақ нағыз жауапкершілік арқалағанымды сол кезде анық түсіндім. Осында келгеннен қабылдау бөлімінде, жедел жәрдем стансасында түнгі кезекшілікке тұрып, жауапкершілікпен орындап, тәжірибелі дәрігерлерден көп нәрсе үйрендім. Әлі де өз мамандығым бойынша ізденісімді тоқтатпадым, – дейді Әйгерім Балымбетова.</blockquote>Антына адал жас 10 жылдан бері тұрғындардың денсаулығын тексеріп, ауырып ем іздеп келгендерге көмек беруден аянбай жүр. Жұмысын үлкен жауапкершілікпен, тиянақтылықпен атқаратын дәрігер үлкенмен де, кішімен де тез тіл табысады. Қоғамдық жұмыстарға да белсенді. Әйгерімнің жетістіктері де жоқ емес. Еңбегі ескеріліп, бас дәрігердің, аудан әкімінің бірнеше рет Алғыс хатымен марапатталған. Қазақстан Республикасы медицина қызметкерлері қоғамының 2022 жылғы қорытындысы бойынша «Үздік медицина қызметкері» медалінің иегері. Әйгерімнің жұбайы Нұрлыбек Сайымов та – ауданға белгілі азамат. Қазір «ІІІ Интернационал» ауылдық округінің әкімі қызметін атқарады. Отбасында бір қыз тәрбиелеп отыр.&nbsp;«Ауырған адамға ең бірінші керегі – жылы сөз» дейді Әйгерім. Ал он жыл мерзімде аға буыннан көп нәрсе үйренген дәрігердің ел-жұртқа тілегі біреу ғана. Ол тілек бәрімізге түсінікті… «Адамдар ауырмаса екен…»

Айгерім Балымбетова аудан тұрғындарына медициналық қызмет көрсетіп келеді

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданына қарасты батыр атын иемденген ауылдық округ бар. Республика көлемінде үлгілі ауыл атанып, танымалдығы артқан ауыл әрбір мереке мен атаулы күнді бей-жай қалдырған емес.«Нағи Ілиясов ауылдық округі әкімі аппараты» коммуналдық мемлекеттік мекемесінің қолдауымен медицина қызметкерлерінің кәсіби мерекесіне арналған «Абзал жандар» атты мерекелік іс-шара өткізілді. Көңілді әрі салтанатты жиынды ауылдық мәдениет үйінің ұйымдастырырған.Адам жанының арашасы ақ желеңді асыл жандар. Бұл сөздер қашаннан дәрігерлер мен мейірбикелер атына таңылған. Дәрігерлер ісі ең жауапты, қиын да қарапайым әрі адалдықты қажет ететін маман иесі. «Ұлт денсаулығы – біздің табысты болашағымыздың негізі» салауатты қоғам қалыптастырып, дені сау ұрпақ өсіруде дәрігерлердің орны ерекше.Салтанатты іс-шарада зор құрметке лайық ақ халатты абзал жандарға ілтипат көрсетілді. Оларға күнделікті күйбең тіршіліктен демалыс сәті болып, кеш көңілді жалғасты. Адам жанына араша болған абзал жандардың құрметіне концерттік нөмірлер дайындалды. Сонымен қатар, «Мағжан және К» жауапкершілігі шектеулі серіктестігінің демеушілігімен ақ халатты абзал жандарға құрмет көрсетілді. &nbsp;

Нағи Ілиясов ауылында медқызметкерлерге құрмет көрсетілді

<a href="https://kyzylorda-news.kz/">Kyzylorda-news.kz.</a> Маусым айының әр үшінші жексенбісі – медицина саласының қызметкерлері күні екені мәлім. Жыл сайын өз деңгейінде тойланатын бұл айтулы дата шиелілік ақ халаттылар үшін де мереке. Өйткені бұл күн – жан саулығын қорғай білетін дәрігер еңбеңінің еленетін күні. Иә, дәрігерлік – аса жауапты, әрі қиын мамандық. Сондықтан да бұл іске екінің бірінің ебі келе бермейді. Майталман маман болу үшін – темірдей төзім мен мықтылық керек. Өкінішке қарай, біздің арамызда темірдей төзімді тал бойына тұрақ етіп, тіпті салқын қандылықты жанына серік еткен ақ халаттылар көп-ақ. Аладайда «Дәрігер – сөзбен емдейді» деген тәмсілді негізге алар болсақ, ақ халатты абзал жандарға ең әуелі мейірбандық пен қарапайымдылықтың, дертке жылы сөз арқылы дауа таба білудің аса қажет екенін ұғынған болар едік. Арамызда да науқасты бірінші дәрі-дәрмек арқылы емес, жылы сөзімен емдей білетіндер баршылық. Солардың бірі – еңбекшілік Ернұр Өмірзақ.Дәрігерлік сала – тек іспен ғана емес, сөзбен де терең тамырлас. Жоғарыда айтқанымыздай, «Дәрігер – жартылай сөзбен емдесе, жартылай іспен емдейтіні» &nbsp;даусыз. Ал көне Иран даналығында «Дәрігердің үш қаруы бар: сөз, шөп және пышақ» деп айтылады. Мұндағы сөздің бірінші орынға қойылуы жай емес. Демек, «дәрігердің науқас психикасына, оның ойына, көңіл күйіне, ерік-жігеріне ықпал етуі – ең басты қаруы» екені анық. Қай кезеңде де ақ халаттылар бұл қағидатты санаға сақтап, науқастармен тиісті дәрежеде сөйлесіп, қарым-қатынас құра білген. Бірақ қазір бәрін олай деп айта алмаймыз. Көптеген науқастардың өзі медицина қызметкерлерінің салыңқы қабағы мен тұнжыр, немқұрайлы көзқарасынан дертіне дерт қосып, көңілі жараланып жататынын айтады. Ал біз Ернұр Жандарбекұлын көргенде мейірім иесінің нақ өзі екенін аңғарамыз. Еңбекші ауылының тұрғындары да Ернұрды өз саласының нағыз маманы екенін айтады. Тіпті, ол елден алғыс алып қана қоймай, мейірімді жүзімен кез келген науқасты аурудан айықтыратын көрінеді. Ендеше, біз де жүрегінде жылулығы, көзінде нұры бар өз мамандығын өзідей сүйетін Ернұрды мақаламызға арқау етпекпіз.Ернұр Өмірзақ – Еңбекші ауылының епті азаматы. Олай деуімізге себеп көп. 2002 жылы дүние дидарына келген ол бала күнінен ақ халатты абзал жан болуды арман еткен. Мектепте оқып жүрген күннің өзінде оның медицина саласына деген махаббаты оянып, 9 сыныпты тәмамдаған соң 2018 жылы Түркістан жоғары медицина колледжіне «Емдеу ісі» мамандығына оқуға түседі. Аталған оқу орнында жүріп ол мақтаулы жанға айналып үлгереді. 2022 жылы төрт жылдық оқуын аяқтаған Ернұр туған жеріне келіп еңбек етуді мақсат тұтқан.&nbsp;Мақсатына бір қадам табан тіреген ол 2023 жылдың ақпан айынан бастап «Жастар тәжірибесі» арқылы Еңбекші ауылына жұмысқа орналасады. Өз саласына білек сыбана кіріскен жігіт сол уақыттан бері ауыл халқының саулығы үшін қалтқысыз қызмет етіп келеді. Алты ай уақыт бойы абыройлы қызмет етіп, «Жастар тәжірибесінен» өткен жас маман жуырда ғана сол ауылдағы медицина орталығына штаттық негізде тұрақты жұмысқа орналасқан.&nbsp;Қазіргі таңда Ернұр Жандарбекұлы аймақтық мейіргер қызметін ойдағыдай атқаруда. Және өзіне берілген тапсырмаларға жауапкершілікпен қарап, көше тұрғындарының саулығын бақылап, қан-қысымын өлшеп тұрады. Ауыл халқы да Ернұрдың атқарған жұмысына, тынымды тірлігіне дән риза. Ендеше, біз де оның алдағы жоспарлары мен жұмыстарына сәттілік тілейміз!

Еңбекшілік дәрігер өз ісінің маманы

<a href="https://kyzylorda-news.kz/">Kyzylorda-news.kz.</a> «Біздің бақытымыздың оннан тоғызы денсаулығымызға байланысты» демекші, жанын қоярға жер таппай қиналғанда өміріне араша болып, саулығы сыр бергенде емдеп-жазып жатса, науқас үшін бір ғанибет емес пе? Адам өмірі қиындығы мен қызығы қатар жүретін ақ халатты абзал жандармен тікелей байланысты. Әу баста өмірге Алланың қалауымен келсек, ең бірінші бізді құшағына алып, қамқорлық танытатын дәрігерлер қауымы. Ауру алқымнан алып, дерт дендегенде әр адам ақ халат киген алтын қолды қауымнан көмек күтеді. Тырп етпестен төсек тартып жатқан жандардың жебеушісі де осы мамандар. Яғни дәрігерлерге артылар жүк те жауапкершілік те ауыр. Алайда олардың ешқайсысы ел басына күн туғанда жұмысын тастап, қара бастың қамын ойлап, тасаға тығылып қалмайды. Алмағайып заманда да, төтенше жағдай да, зілзала мен тасқында да дәрігерлер адам жанының арашасы болуға әзір. Бұл сөзімізге қай уақытта да көмек сұрап барғанда бетімізді қайтармай қызмет көрсететін дәрігерлердің еңбегі дәлел.Медицина қызметкерлерінің жұмысы таңғы 8-ден бастап қыз-қыз қайнайтынын білеміз. Білсек те жұмыс барысымен аурухана табалдырығын таңғы тоғызда аттауға тура келді. Осы уақытқа дейін дәрігердің алдына шипа іздеп баратын едім, енді міне, олардың жұмысымен жіті танысуға келдім. Бұл жолғы бағытым – «Болашақ» дәрігерлік-амбулаториялық емханасы. Емханаға кіргеннен бастап тазалыққа мән беретінін білеміз. Тазалықты қатаң талап ететін орында қылаудың ізі де байқалмайды. Ал әр аймаққа арналған кабинетте анализ тапсыру, балаларды тексеру, емделушілердің арыз-шағымын тыңдау секілді жұмыстар қызу жүргізілуде. Бізді аталған емхананың бөлім меңгерушісі Қарлығаш Назарова қарсы алды. Жоғары санатты дәрігермен тілдесе отырып, «Болашақ» емханасында 5 дәрігер, 21 мейірбике бар екенін білдік. Бес дәрігер бес аймаққа бөлініп, әр көшенің тұрғындарына уақытылы тексеріс жүргізіп отырады. Ал өздері шағымдарымен келген науқасты ауруханаға дейін жеткізбей, керекті ем-домын жасап, шығарып салады.Сөз барысында Қарлығаш Назарова аймақтық дәрігерлер мен медбикелердің барлығы өз ісіне жауапты, тиянақты екенін айта кетті. Әсіресе аймақтық медбикелердің жұмысына ерекше тоқталды.<blockquote>«Дәрігер – зілі ауыр мамандық. Бұл салада жауапкершілік, ұқыптылық пен білімділік бірінші орында тұрады. Ел аузында «СВА» атанып кеткен емханадағы қызметкерлердің әрқайсысы өз ісіне жауапты деп айта аламын. Әсіресе, аймақтық медбикелер күннің ыстығы мен суығына қарамастан, қыстың күндері кеш қарайып қалса да үй-үйді аралап, аяғы ауыр келіншектерге, жаңа туған сәбилерге немесе егде жастағы кісілердің үйіне барып бақылап тұрады. Егер науқастың жағдайы мүшкіл болса, қасына дәрігер де еріп барып, бірге емдейді», – дейді бөлім меңгерушісі.</blockquote>Бөлім меңгерушіден мағлұмат алып болған соң, әрмен қарай Қарлығаш Назарованың ізіне ілестік. Бағытымыз – ІІ санатты дәрігер Ғазиза Мамышевамен танысу. Себебі осы уақытқа дейін редакциямызға Ғ.Мамышеваға алғыс айтып, газет оқырманы келген болатын. Елдің ризашылығына бөленіп, жұмысын жауапты атқарып жүрген маманды біз де көргіміз келді.Ғазиза Төрехановна – бала кезінен медицина мамандығына қызығып, ақ халат киюді армандаған. Содан кейін бойжеткеннің ұшқыр арманы қияға қонып, 2008 жылы Астана медициналық университетіне оқуға түскен. Бұлтарысы мен қалтарысы көп мамандықты игеру барысында Ғазиза ұқыптылық, тазалық, тәртіп сынды қасиеттерге аса мән беріп, Гиппократ антын алғаш рет қабылдаған.<blockquote>«Дәрігер мамандығында ең қиыны – ар азабы. Өздеріңіз білетіндей, біз жұмысқа тұрмас бұрын ант қабылдаймыз. Осы ант бізді өмір бойы адал жұмыс істеуге итермелейді. Әрі қазақ халқында «Уәде – Құдай сөзі» деген бар. Сол үшін барынша тырысып жүрміз. Көптің алдында жүзім жарық, беделім биік болып жүргенге не жетсін? Бұрын ақ халатты абзал жан болуды армандасам, қазір сол ақ халатқа дақ жұқтырмауды мақсат тұттым. Біздің жұмыстың астарында еліміздің алғысы мен ақжарма тілегі жатыр», – дейді Ғазиза Мамышева.</blockquote>Медицина – сан түрлі сынақтармен сыналатын сала. Бұл мамандықты меңгерген жандарға мүлт кетуге болмайды. Дәрігер өз ісіне қаншалықты жауапты әрі сенімді болса, соншалықты адамды ажал аузынан алып қалуға мүмкіндік бар. Сондықтан дәрігер болғысы келетін жандар бұл қызметке сатылап көтеріледі. Ғазиза да солай. Ол 2015 жылы оқуды аяқтаған соң, Бестам ауылдық округінде және Тартоғай, Сұлутөбе ауылдарының дәрігері болған. 2017 жылдың ақпан айынан бастап «Болашақ» емханасында қызмет атқаруда.<blockquote>«Бұл мамандыққа түсуімді ең бірінші ата-анам қалап еді. Қазіргі таңда ол кісілердің тілегіне құлақ асып, мамандық таңдауда қателеспегенімді түсіндім. Ал еңбек өтілімді ең бірінші ауылдан бастағаным – бөлек әңгіме. Өйткені ол жақта үлкен кісілер бізге сеніммен қарайды. Ал ауданда талап жоғары. Мұнда халық саны көп болғандықтан ба келушілердің арасында әртүрлі адамдар болады. Кейбіреулері біздің жұмысымызға түсіністікпен қараса, енді біреулері тым жоғары нәрсені талап етеді. Арасында сөзбен сұлқ түсіріп, сілкіп-сілкіп алатындары да &nbsp;табылады. Біраз біз барлығына түсіндірме жұмыстарын жүргізіп, әрқашан көмек беруге дайынбыз», – дейді Ғазиза дәрігер сөз тізбегін әрмен қарай жалғап.</blockquote>Иә, дәрігермен сұхбаттасу барысында жұмысының қауырт екеніне көзіміз жетті. Өйткені бөлменің есігі бір емес, бірнеше рет қағылып, дәрігер де қайта-қайта сыртқа шығып, емделушілердің қабылдаумен әлек болды. Сол арада түсінгеніміз ақ халаттылар үшін әр минут маңызды екен. Олар тығыз әрі шапшаң қызмет атқаруда. Бір сәтте бірнеше адаммен сөйлесіп, анализдер тізімін беріп, алғашқы көмек көрсетуде. Тіпті аяғы аяғына жұқпай, әрлі-берлі жүгіріп жүрген медбикелер де көп. Бір сөзбен айтқанда, емханадағы жұмыс медицина мамандарына бір сәт демалуға мұрша бермейді екен.Ғазиза Төреханқызы өзінің дәрігерлік жолын және жұмыс барысын таныстыру барысында 38 жыл еңбек өтілі бар Адаскүл Натбаева туралы тілге тиек етті. Өзінің қасындағы сенімді серіктесіне айналған медбикенің ерен еңбегі туралы бізбен бөлісті. Қазіргі таңда барлық салада жастардың көп екенін білеміз. «Болашақ» емханасында да жас мамандар жетерлік. Соларға үлгі болып, жол көрсетіп келе жатқан – осы Адаскүл Орынбасаровна екен. 38 жыл өмірін медицинаға арнаған маманмен жүздесуді жөн көрдік.Алғашқы сәттен-ақ жақсы әсер қалдыратын Адаскүл Натбаеваны жылы жүзді, мейірімді медбике десем артық айтқаным болмас. «Біздің міндетіміз – халықтың денсаулығын сақтау. Сол міндетті абыроймен алып шығуға тырысамыз» дейтін мейірімді медбикенің зейнеттік демалысқа шығатын уақыты да алыс емес. Бірақ сонда да алдына келген емделушіні күні кеше жұмысқа түскендей бар ынта-шынтасымен қарап, ем-шарасын жасауда.<blockquote>«Әулетімізде қыз апаларымыз медициналық колледжде оқыған. Бала кезден соларға еліктеп, 1983 жылы Түркістан облысына оқуға тапсырдым. Алғашқы еңбек жолым 1985 жылы Шымкент өңірінде басталды. Хирургия бөлімінде үш жыл еңбек етіп, тағдырдың қалауымен Шиелі ауданына тұрмысқа шығып, 1988 жылдан бері балаларға кеңес беру орталығында еңбек еттім. «Болашақ» емханасына 1999 жылы табан тіредім. Сол сәттен бері осындамын. 30 жылдан асқан еңбек өтілімнің арқасында мені көпшілік жақсы таниды. Аймақ аяжаны болып баланы да, жасты да, кәріні де қарап, олардың денсаулығының жақсы ¬болуына атсалысамыз. Өзіміз де кейде ауырып, мазамыз болмай тұрса да, ең бірінші келіп отырған науқасты қарауға тырысамыз. Мемлекеттің басты байлығы – адам емес пе? Сондықтан біреудің басы ауырып, балтыры сыздағанын қаламаймыз», – дейді көпті көрген медбике.</blockquote>Дәрігер Ғазиза Мамышева және медбике Адаскүл Орынбасаровна туралы тұрғындардың пікірі оң екенін білеміз. Сол сияқты ұжымдастары да қос маманды мақтап, әрқашан жақсы қарым-қатынаста жүргенін айтады. Ғ.Төреханқызы халықпен тіл табысып, дер кезінде нәтижелі ем ұсынып көзге түссе, А.Орынбасарова көп жылдық тәжірибесімен, көпті білгендігімен ұжымдастарына үлгі.Адам жанының арашасы болып жүрген жандардың орнына өзіңізді бір сәт қойып көріңізші? Әр емделушіні сағат сайын бақылап, әртүрлі диагнозбен жұмыс істеп, көңілін аулауға, ине салып тыныштандыруға, ауруханадан құлан таза айығып кетуіне атсалыса аласыз ба? Сырт көзге қарағанда бір сарында көрінетін дәрігерлердің жұмысын атқаруға сабырыңыз бен батылыңыз жете ме? Бұл сауалдардың жауабын білу үшін бір сәт дәрігерлердің тіршілігімен тыныстап көрген дұрыс шығар. Сол сәтте дәрігердің жұмысы жанқиярлық еңбек екенін ұғынармыз, бәлкім?!

Қазақстан және Қызылорда облысының жаңалықтары: Денсаулық