<a href="https://kyzylorda-news.kz/">Kyzylorda-news.kz.</a> Құбыл Ршымбетов Қазалы теміржол ауруханасының бас дәрігерілік қызметін ширек ғасырдан астам атқарып келеді. 47 жылдық жұмыс өтілінің 42 жылында басшылық қызметте шыңдайды.Бес жүзге жуық адамы бар үлкен ұжымды ширек ғасырдан бері нарық дауылына ұшыратпай, алып шыққан қайраткерге елдің берер бағасы өлшеусіз. Осындай бар салмақты көтере алған терапевт-дәрігер әрі І санаттағы ұйымдастырушы атағын иеленген ақ халатты інімізбен сұхбаттасудың сәті түсті.– Құбыл Ршымбетұлы, Қызылорда және Қазалы теміржол ауруханасында мамандығыңыз емдеу ісі болса да, инфекционер-дәрігер және бөлімше басқардыңыз. Институт қабырғасынан жаңа шыққан жас маманға бұл жүктеме ауыр тиген жоқ па?– Әрине, қос мамандықты бірдей алып жүрудің қиындығы болғаны рас. Осы тұста бұған рұқсат етілген-ді. Және өзімнің де талабым болған шығар. Оның үстіне Э.Файт, А.Абдуайтов, А.Ким, Ж.Қазмағамбетов, Г.Қанатова, В.Лим, К.Сансызбаев, А.Сейсенов, А.Жұбатов, А.Ержанов сынды тәжірибелі дәрігерлерден көмек алдым. Олар білгендерін айтуға әркез дайын еді.– Қызметке кіріскен 5 жылдан кейін бас дәрігердің орынбасарлығы қызметіне көтеріліп, осында 15 жыл отырдыңыз. Тым ұзақ емес пе?– Батыс теміржолының Ақтөбедегі санитарлық қызметінен, облыстық денсаулық сақтау басқармасы тарапынан бас дәрігерлікке ұсыныс болды. Бірақ, өзім бас тарттым. Мұндай үлкен іске дайын еместігімді, іс-тәжірибемнің аздығын айттым. Осы ауруханада екі бас дәрігер: В.А.Ким және Қ.Сансызбаевпен әріптес болдым. Қ.Сансызбаев 14 жыл бас дәрігерліктен зейнеткерлікке шықты да маған: «Орынбасарлықтан шөлің қанған шығар, Батыс Қазақстан теміржолы дәрігерлік-санитарлық қызметінің бастығы Я.Маруфов саған бұйрық бергелі жатыр, тартынба, іске кіріс, тәуелсіздік алған еліңе аянбай қызмет ет» деді.– Астана, Алматы, Ақтөбе, Қызылорда қалаларын айтпағанда, шетелдерде де болып, әлемді көрдіңіз. Солардан бірлі-жарым дерек келтірсеңіз…– 2013 жылдары Гонконгте медицина мекемелерін басқарудың, ал Испанияның Барселонасында жоғары менеджемент мектебінің мамандырылған 75 сағаттық іскерлік бағдарламасына, 2014 жылы «Денсаулық сақтаудың әлемдік үрдістері, Үндістан тәжірибесінің» көшпелі семинарына қатыстым. Сол сияқты «Жүйені реформалау кезіндегі» экономиканың өзектілігі және кәсіптік мекемелердің жұмысшыларына медициналық көмек ұйымдастыру тақырыптарында 144-162 сағаттық жиындарында да көптеген іс-тәжірибеге қанықтым.– Біраз уақыт бұрын Қызылорда облысы денсаулық сақтау департаментінің «Аудан деңгейінде емдеу диагностикалық жұмыстарына жаңа технологияларды белсенді енгізу» номинациясы бойынша дипломмен марапатталыпсыздар. Сол кезден бастап қандай алдыңғы қатарлы елдердің технологиясын енгіздіңіздер?– Сол жылы сандық УЗИ, гострофиброскоп, плазмафорез, Ресейден заманауи үлгідегі электрокардиограф аппараты, Қытайдан автоматты геоматологиялық және жартылай автоматты биохимиялық сараптама, тағы басқа да жабдықтар сатып алынып, орнатылды. Бүгінде технологиясыз, оны жетік білетін мамансыз медицинада ілгерілеу жоқ. Арал, Қазалы, Қармақшы ауданы тұрғындарының өтінішіне сәйкес 2011 жылдың шілде айынан «Реn medical» компаниясының филиалы есебінен аурухана ішінен гемодиализ бөлімшесі жұмыс жасауда. Оған дейін созылмалы бүйрек жетіспеушілігі бар науқастар Қызылорда қаласына күн сайын қатынап немесе пәтер жалдап ем қабылдайтын-ды.Қазір біздегі 8 гемодиализ аппаратынан науқастар аптасына үш мәрте ем алады. Ол жерде жедел және созылмалы бүйрек жетіспеушілігі бар 24 науқас емделуде. Көпшілігі Арал, Қазалы, Қармақшы аудандарынан келеді. Мұнда жылына 5500-ден астам науқас емделеді.2012 жылы облыс аудандарының алды болып, «Nel Viz Dial» маркалы компьютерлік томография сатып алынды. Арал, Қазалы, Байқоңыр тұрғындарына қызмет етеді. Жылына 3700-4000-дай зерттеу жүргізіледі.2020 жылы көп қатпарлы компьютерлік томография алынып, іске қосылды. 2016 жылдың ақпанынан бері облыстық денсаулық басқармасының арнайы бұйрығына сәйкес, аурухананың төсек қоры шеңберінде 10 төсектік нейроинсульттік және 10 төсектік ерте нейроинсульттік оңалту бөлімшесі ашылды. Қабылдау бөлімі оларға дер кезінде медициналық көмек көрсету үшін қажетті құрал-жабдық пен құрылғы, дәрі-дәрмектер мен тасымалдау арбасы, лифтімен жабдықталды. Үлкен және кіші операциялық зал тәулік бойы нейрохирургиялық ота жасау үшін дайындалып, арнайы жабдықпен қамтамасыз етілді. Реанимациялық-анестезиологиялық бөлімше 9 төсекке кеңейтілді әрі заманауи қондырғылар қойылды. Отадан шыққаннан соң ем алатын тағы да қосымша 4 төсектік реанимациялық палатаны жарақтадық.Бұдан бөлек Италиядан шыққан «MELODV» маркалы маммография аппаратымен қызмет көрсетеміз. Бұл туу және 35-49 жас аралығындағы әйелдердің сүт безі ауруларын тексеріп, мастопатияны, қатерлі ісіктің ерте кезеңін анықтай алады. Австриядан өндіріске енген ИФА аппараты да ерекше жетілген. Бұл құрылғы жүктіліктің 20-шы аптасында шарананың түрлі жұқпалы аурулар мен кемістіктерін анықтайды. Онымен бірге әйелдер мен еркектердің жыныстық гармондарын, жұқпалы және гепатит ауруларын зерттейді. АҚШ-тан жеткізілген «NICOLET companion» маркалы аппаратының қызметі зор. Ультрадыбысты допледограф деп аталады. Осы аппарат арқылы бас, ми қабығының жабық және ашық жарақаттарынан кейінгі өзгерістер, бас-ми қысымының жоғарлауы, жедел және өтпелі ми-қан айналысының бұзылуы, ұйқы артерияларының окклуюзиясы, мойын-омыртқа артерияларының қосылуы мен таралуы, қол басы артериялары мен аяқ-қан тамырларының ангиопатиялары, цереброваскуляр, ауруларын дәлме-дәл анықтай алады. Артериялық гипертензия, қант диабеті, жедел түрде болған қан айналуының бұзылысын диогонистикалық анықтауға көмектеседі.– Жергілікті басылымда ауруханада «Ортан жіліктің сынған ұршығына жаңа технология бойынша егде жастағы науқасқа жасалған ота сәтті шықты» деген ақпарат жарияланды. Жалпы бұл қалай болды?– Травматолог-ортопед А.Қанатов егде адамның сынығы жақын айларда бітіп, жазылып кетуі екіталай екенін пайымдап, сүйекті буынға арналған протезбен бекітуді ұсынды. Оған біз де келістік. Бұл облыстағы алғашқы ота болды. Ол Ресейден арнайы дайындықтан өтіп, 2012 жылы – 20, 2013 жылы – 24 ота жасады. Ал мемлекеттік тапсырыс республика мен жергілікті бюджет және денсаулық министрлігі мен облыстық денсаулық сақтау басқармасы арқылы келіп түседі. Соған сәйкес қаржы бөлінеді. Әрине қаржы босқа берілмейді. Оны уақытылы игеріп, тапсырыс деңгейінде қызмет етеміз.– Теміржол мекемелерінен сауықтыру кабинеттерін ашу, рейс алдында медициналық тексеру пункттерінің қойылуының мәнісі не?– Теміржол мекемелерінің талабына орай жұмыстан қол үзбей емделу мақсатында өздерінен профилактикалық кабинеттер ашты. Емдеу бізден, қаржы олардан болып келісілді. Рейс алдында медициналық тексеру қызметі Қызылорда магистралдық желі бөлімшесімен қағаз жүзінде іске асырылды. Ол үшін Арал, Сексеуіл, Қазалы, Төретам стансаларында төрт медициналық пункт жұмыс істейді. Онда сертификаттандырылған маман шартқа сәйкес қызмет көрсетеді. Теміржол бойындағы Алтай, Байқожа, Көбек, Майлыбас, Ойынды және 99-101 нөмірлі бекеттерде де мамандар жұмыс істейді.– Ауруханада ұста, токарь цехтарын ашудың нендей қажеттілігі болды?– Бұл қаржы үнемдеуден туған идея. Қазақ «Кісідегенің кілті аспанда» демекші, жабдықтар сынбай ма, істен шықпай ма? Кімге қол жаямыз әрі жөндеу пұлы қымбатқа түседі. Сондықтан да бұл цехтарды өзімізден аштық. Әрі тапсырыс қабылдап, ақылы түрде қызмет еттік. Бұл жұмыссыздарға да күнкөріс көзі болды.– Ауруханаішілік дәріханада 49 түрлі дәрілік зат дайындалады. Оның сапасы тексеріле ме?– Бұл іс мен бас дәрігерлікке тағайындалғаннан кейінгі екінші жылы басталды. Дәрілік заттарды дайындайтын шикізат мемлекеттің сатып алу қаулысы бойынша салыстырмалы баға ұсынысы арқылы алынады. Ал сапасын аурухананың зертханасы мен дәріхананың провизор аналитигі және дәрілік нысандарды сараптаудың ұлттық орталығы ай сайын тексереді. Дәрілердің сапасына жауапты Қ.Қарабала мен С.Қабылова. Бірі дәріхана меңгерушісі болса, екіншісі – провизор-аналитик. Бұлардың жұмысына еш күмән болмауы тиіс.– Бірнеше рет халық депутаттары поселкелік және аудандық кеңестер депутаттығына сайландыңыз. Осы аралықта бірқатар марапатқа ие болдыңыз. Тәуелсіздіктің 10 жылдық мерекелік медалін омырауыңызға таққанда қандай күйде болдыңыз?– Тәуелсіз елдің алғашқы 10 жылдық мерекелік медаліне ие болу әркімнің қолы жете бермейтін бақыт. Тәуелсіздікке аз да болса қосқан үлесімді бағалағаны үшін Елбасына аса риза болдым. Ал аудандық мәслихаттың депутаттығына Қазалы теміржол ауруханасының ұжымы ұсынып, №92 учаскеден додаға түстім. Сайлаушылар аманаты – емханада диспансерлік есептегі науқастарды диагностикалық аппаратпен қамтып, профилактикадан толық өткізу, дәрігер мамандарын дайындау, 5-кварталдың көшелерін асфальттау, жылу және кәріз жүйелерін орталықтандыру, маршрутты автобустарды уақытылы жүргізу еді. Мұның бәрі де жергілікті биліктің назарына алынып, жұрт күткендей дәрежеде орындалды.– Жоғарғы санаттағы дәрігер-терапевтсіз. Мұның сипаттамасы және ол атақ кімдерге тиісті?– Ол үшін еңбек өтілі 10 жылдан асып және кейінгі 5 жыл көлемінде 216 сағат біліктілігін жетілдіргені жөнінде куәлігі болу тиіс. Ұжымда менен басқа үш дәрігер де осы атаққа ие. Олар: Е.Дәрібаев – дәрігер-рентген, Қ.Қарабала – провизор, Ш.Байбазарова – дәрігер-педиатор. Мекемеде жалпы 424 қызметкер бар, оның 65-і дәрігер. Біліктілік санаты бары – 48. 199 мейірбекенің біліктілік санаты бары – 139.– Жергілікті басылымда аудандық ардагерлер кеңесінің төрағасы Оразғали Бекбановтың «Болса екен басшылардың бәрі осындай» тақырыбында ой тербеді. Аудандық ардагерлер үйіне медициналық жабдықтарды тегін бергендеріңізді жазды…– Орекең елге танымал ағамыз. Қарттарға, әсіресе, өзімізден зейнетке шыққан ардагерлерді мереке сайын шақырып, дастарқан жаямыз. Ақшалай-заттай сый-сияпат жасалып, отын-суына қолғабыс беріледі. Басқа жаққа емделу шығынына қаржылай көмектесеміз. Сол сияқты мүгедектер қоғамына, тұрмысы төмен жандарға, КВН командасына, шахмат федерациясына және тағы басқаларына да қолұшын беруден аянып қалған емеспіз.– Әңгімеңізге рақмет.

Басты мақсат – емделушілер үдесінен шығу

<a href="https://kyzylorda-news.kz/">Kyzylorda-news.kz.</a> Білім, біліктілік, мейірім мен адалдық. Бұл кез келген дәрігер бойында болуы тиіс қасиеттер. Бірақ бұның бәрінен де қажетті де, ең негізгісі – шыдамдылық. Медицинаға тек жүрек қалауымен келгендер ғана мамандыққа адал болып қалады. Сондай жұмысын үлкен жауапкершілікпен атқарып жүрген дәрігерлер ішінде Индира Опабекованы ерекше атауға болады. Ол Ақтөбе мемлекеттік медициналық институтын емдеу ісі бойынша бітіріп, Қызылорда мен Астана қалаларында акушер-гинеколог қызметін атқарды. Кейінгі жылдары гинеколог эксперт, бас гинеколог лауазымын абыроймен атқарып жүр. Әрдайым басшылық тарапынан ұдайы білімін жетілдіріп, біліктілігін дамытып отыруға мүмкіндік жасалады.&nbsp;Бүгінде Индира Ахметоллақызы бас гинеколог ретінде жоғарғы топтағы жүкті әйелдерді бақылап, күнделікті 30 әйелге дейін қабылдайды. Оларға тиісті шараларын қолданады. Қажет болған жағдайда жолдамамен облысқа жібереді. Барлық анализдерді теміржол емханасында тапсыртады. Мұнда мамандар да, дәрілер де жеткілікті деген уәжін жеткізді. Тіпті келіншектер екі ортада жол жүріп, уақытын жоғалтпау мақсатында басшылыққа ойлар қосып, жаңа жабдықтарға қол жеткізіп отырғандарын қуана жеткізді. Дегенмен де бала сүйіп, перзентті болуға зар борлып жүргендер де ақхалаттылардың көмегіне зәру екендігін алға тартты.<blockquote>"Бедеуліктің себептері көп. Бедеулік көрсеткіші өндіріс орындары шоғырланған өңірлерде жоғары болып жатады. Кейбірі аяқтан суық өткізіп, алғашқы балаға түсік жасату әрекеттері арқылы денсаулыққа немқұрайлы қарап немесе басқа да оқыс жағдайлар әсерінен адам табиғи жолмен бала сүю мүмкіндігінен айырылып қалуы мүмкін. Сондықтан әйел адам жылына бір рет гинекологтың тексеруінен өткені абзал. Жұмыс барысында ешкімді алаламай, әрбір келген пациентке Гиппократқа ант берген маман ретінде қолдан келген көмекті аямаймын. Бар білімім мен тәжірибемді жинақтап, дәрігерлік кеңес беремін. Бізде тоғыз ай бойы жүктілікті бақылауға барлық мүмкіндік бар. Ана мен бала денсаулығына айрықша көңіл бөлінеді", – Индира Ахметтолақызы.</blockquote>Өткен жылы 3 адам "Аңсаған сәби" бағдарламасымен мемлекеттік квота арқылы балалы болды. Олар 9 ай бойы Индираның бақылауында болып, аман-есен босанған. Осы күні 2 әйел өз күштерімен жасанды ұрықтандыру жолдарына жүгініп, білікті дәрігердің қарауында.&nbsp;Биыл есеп бойынша 25 нәзікжанды перзентті болу жолында мамандардан кеңес алуда. Ал 15-49 туу жасындағы әйелдерден 3977 тұрғын тіркеуде болса, 6670 еңбектеген баладан еңкейген кәріге дейінгілер теміржол ауруханасының емделушілер санатында. Қазір Индираның қарамағында гинекология бөлімінің меңгерушісі Асқар Ахмедов, аймақтық акушер-гинеколог дәрігерлер: Шаки Медетбаева мен Аманкүл Ақметова және акушерлар: Ұлболсын Тұрдығұлова, Жанат Ізбасарова, Күлтай Жолжанова тұрғындарға қалтқысыз қызмет етеді.&nbsp;Аңыз адам Дінмұхаммед Қонаев бір жиында "Білсем деген талап қай жастағы, қандай дәрежедегі адамға да таптырмас қасиет. Елдің ықыласынан асқан сый жоқ" деген деседі. Индира Опабекова әйелдер қауымының алғаусыз алғысына бөленуде. Ұжымдастары да ол жайында жақсы пікірде.&nbsp;<blockquote>“Өзге қызметкерлерге қарағанада, Индираның адаммен сөйлесуі мен қарым-қатынасы бөлек. Жүргізген емі нәтижелі, өте білікті дәрігер”, – дейді теміржол ауруханасының бас дәрігері Айгүл Құлмағамбетова.</blockquote>Ал ұзақ жылдар бойғы қызметте жүрген кәнігі маман Серік Адаев кез келген дәрігерді мақтамайтынын айтады.&nbsp;<blockquote>"Біз кез келген дәрігерді мақтай бермейміз. Соған лайықтысын ғана айрықша атап өтеміз. Индира қазір біліктілігін көтеріп, жан-жақты тәжірибемен толысқан маман ретінде қалыптасты. Ота жасауға да қатысады, "УЗИ" аппаратымен диагнозын шығарып, ем жасай береді. Қоғамдық жұмысқа да еш сылтаусыз белсене кіріседі. Осындай ерекшелігінің арқасында былтыр бірқатар марапаттарға ие болды. Азаматтардың денсаулығын сақтау ісіне қосқан жеке үлесі мен мінсіз адал еңбегі үшін "Медицина қызметкері күніне орай" бұрынғы министр Алексей Цойдың Құрмет грамотасымен құрметтелді. Ауданда "Жылдың үздік дәрігері" номинациясы ұсынылды. Аурухана қызметкерлерінің жетістіктерімен біз де марқаямыз, – дейді медицина саласының тарланы.&nbsp;</blockquote>Мемлекеттің басты байлығы адам деп танылады. Ендеше әрбір тұлғаның денсаулығын бақылайтын ақхалатты абзал жандардың қоғам алдындағы еңбегі еселі.

Аналардың алғысын алған қазалылық дәрігер

<a href="https://kyzylorda-news.kz/">Kyzylorda-news.kz.</a> Жаз мезгілінде түрлі жұқпалы аурулардың көбейе түсетіні белгілі. Әсіресе, жіті ішек инфекциясы, тамақтан улану жағдайлары жиілейді. Қазіргі кезде ауданда жіті ішек инфекциясы белең алып отыр. Сала мамандары жағдайдың бұлайша у-шығуына ауа райының аптап ыстықтың және жеке бас гигиенасының бұзылуы басты себеп болып отыр.Биылғы 6 айда аудан көлемінде жұқпалы жіті ішек инфекциясының 26 жағдайы есепке алынып, аурушаңдық көрсеткіш былтырғы жылға қарағанда 30,5 пайызға өскен. Жұқпалы жіті ішек ауруларымен науқастанғандардың 96,1 %-і &nbsp;(25 жағдайы) 14 жасқа дейінгі балалар, оның ішінде 38,5%-і (10 жағдайы) 2 жасқа дейінгі балалар үлесінде. Аурудың жоғары деңгейде тіркелуіне басты себеп – тұрғындар, әсіресе балалар арасында ішек инфекциялары мен тағамнан уланудың алдын алудағы санитарлық-гигиеналық нормалар мен қағидалардың сақталмауы себеп болып отыр. Балалар арасында жедел асқынған ішек инфекцияларымен сырқаттану жазғы маусымда көбейеді. Бұған қоршаған орта температурасының жоғарылауы, сусынды, көкөністерді, жеміс-жидектерді көп қолдану, азық-түліктің тез бұзылуы себеп болады. Жасыратыны жоқ, жаздың алғашқы айынан бастап тұрғындар мерзімінен ерте піскен бақша &nbsp;өнімдері мен жеміс-жидектерді жиі тұтынады. Атап айтсақ, қарбыз маусым айында сауда сөрелеріне түсе бастайды. Бұл уақытта өнімдер анағұрлым қауіпті, яғни нитратпен улану деңгейі жоғары. Себебі ең жылдам піседі деген сорттардың өзі шілде айының соңына қарай бабына келеді. Ал сапалы әрі қауіпсіз қарбыз тамыз айының соңына қарай жеткізіле бастайды. Өйткені бұл уақытта бақша дақылдары табиғи түрде пісіп, жетіледі.&nbsp;Жұқпалы жіті ішек инфекциясының алғашқы белгілері: іштің жиі-жиі судай өтуі, дене қызуының көтерілуі, сәбилердің емшектен бас тартуы, асқа тәбеті болмау, шөлдеу, құсу, бас ауру, жалпы әлсіздік, селқостық, мазасыздық, ауырсыну, кілегейдің пайда болуы. Науқастың жиі құсып, іші өткен сайын &nbsp;жағдайы ауырлай түседі. Өйткені, организм өзіндегі тіршілікке қажетті су мен тұздарды көп жоғалтады. Жоғарыдағы аталған клиникалық белгілер пайда бола бастаса, міндетті түрде дәрігерге көрінуі қажет. Мұндай кезде дәрігер келгенге дейін мүмкіндігінше ем жасай бастаған абзал. Ол үшін сұйықтықты мол, көбірек ішкізген дұрыс. Антибиотик қолдануға болмайды, өйткені аурудың клиникалық сипатын өзгертеді, мұның өзі дұрыс диагноз қоюды қиындатады. Сондықтан сақтық шараларын сақтап, денсаулықты мұқият күткен жөн.Биылғы жылдың 6 айында қызылша ауруы бойынша аудан &nbsp;көлемінде 7 жағдай тіркеліп, аурушандық көрсеткіші 100 мың адамға шаққанда 8,2 пайызды құрап отыр. Бұл көрсеткіш былтырғы жылдың 6 айымен салыстырғанда &nbsp;әлдеқайда өскен.&nbsp;Осылайшаэпидемиологиялық ахуалдың тұрақсыз болуы мамандар үшін алаңдатарлық мәселеге айналып отыр. Өйткені, тұрғындар ауру жағдайлары байқалғанда бірден дәрігердің көмегіне жүгінбейді. Көбісі үй жағдайында емделу жолдарын қарастырып, ауруларын асқындырып алады. Ауру жұқтырғандар 3-4 күннен кейін дәрігерлердің көмегіне жүгінеді. Мұның өзі адамның өз өмірі үшін үлкен жауапсыздық секілді.&nbsp;<blockquote>«Жіті ішек инфекциялары – бұл бактериялар, вирустар, қарапайымдылар тудыратын және балалар мен ересек адамдарда ішек қызметінің бұзылуымен (диарея) сипатталатын жұқпалы ауру. Ішек жұқпасы әлемде ең көп таралған инфекциялардың қатарына жатады. Ішек инфекцияларының пайда болуының алдын алу үшін тағамдық азық-түліктердің &nbsp;сапасы өте маңызды – көптеген тағамдарда бактериялар тек қана өміршеңдігін сақтап қана қоймай, олар ауру тудырушы адамның қолымен тағамды ауызына апарғанда асқазан-ішек жолына кір қолы арқылы, ластанған су арқылы, сапасыз азық-түліктер арқылы түсіп қарқынды түрде көбейеді.&nbsp;Әсіресе, тұтынар алдында термиялық өңдеуден өтілмейтін тағамдар өте қауіпті. Ондай тағамдарға салаттар, винегреттер, сондай-ақ жемістер мен жидектер жатады. Салаттар мен винегреттерді, әртүрлі тұздықтар мен гарнирлерді тоңазытқышсыз түнге қалдыруға болмайды. Жаз және күз маусымында сүт және сүт өнімдерінде бактериялардың көбеюіне қолайлы жағдайлардың туындайтынын білу керек. Жеке адамдардан сатып алған құйылып сатылатын сүтті міндетті түрде қайнату керек. Қазіргі таңда, аудан көлемінде аса қауіпті және жедел ішек инфекциясы аурулары бойынша эпидемиологиялық ахуалдың күрделі екендігін ескертіп, барынша қатаң сақтық шараларын сақтауға шақырамыз», – дейді Шиелі аудандық санитариялық-эпидемиологиялық бақылау басқармасының басшысы Гүлзада Айтекеева.</blockquote>Қазіргі уақытта кез келген кеселге бейжай қарауға болмайды. Әсіресе жұқпалы дертке салғырт қарау өміріңізге үлкен қауіп төндіреді. Сондықтан аталарымыздың «Ауырып ем іздегенше, ауырмаудың жолын ізде» деген тәмсілін естен шығармағанымыз жөн. Сақтанайық, сақ болайық, ағайын!

Басқарма басшысы жұқпалы ішек ауруларының алдын алу жолдарын айтты

<a href="https://kyzylorda-news.kz/">Kyzylorda-news.kz.</a> Дәрігер-терапевт, иммунолог Ирина Ярцева бүйрегіне тас жиналуға бейім адамдарға бірнеше кеңес берді, деп хабарлайды “Мәскеу 24”.Маман оларға ақуыз, кальций және тұзы бар тағамдарды аз жеуге және көбірек таза су ішуге кеңес берді.<blockquote>«Бүйрек тастары тағамда кальций, ақуыз және тұз көп болған кезде пайда болады. Кальций - бұл сүт өнімдері, ал ақуыз - ет. Егер бүйрек тастарының пайда болуына бейімділік болса, онда мұндай өнімдерді мүмкіндігінше аз жеу керек», - деді Ярцева.</blockquote>Дәрігер сонымен қатар көпшілік адам су ішпейтініне назар аударды.<blockquote>«Бұл қауіпті, өйткені зәр шоғырланады. Егер адам жеткілікті мөлшерде су ішсе, онда бүйрек тастарының пайда болу қаупі аз болады», - деп түсіндірді сарапшы.</blockquote>Бұл жағдайда тұтынылатын судың қатты кальцийленбеуі маңызды.<blockquote>«Егер сіз тұратын аймақта осындай су ағатын болса, үйге сүзгі қойып, тазартылған су ішу керек. Шамадан тыс минералданған суды ішу де - бүйрек тастары дамуының кең таралған факторы», - деп қорытындылады дәрігер.</blockquote>

Бүйрекке тастар жиналмас үшін не істеу керек? 

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының денсаулық сақтау басқармасының басшысы Ысқақов Олжас Ермекұлының медициналық ұйымдар жұмысымен танысу сапары Шиелі ауданында жалғасты.&nbsp;Аймақтың бас дәрігері алдымен «Тартоғай», «Балаби», «Бәйгеқұм», «Ақтоған», «Жөлек», «Алғабас» дәрігерлік амбулаториясының ахуалы, жедел жәрдем стансасы, жұқпалы аурулар бөлімшесі, «B.B.Nura» гемодиализдік орталығы, «Көкшоқы» ауылдық емханасы және Шиелі аудандық көпбейінді орталық ауруханасының жұмысымен танысты.&nbsp;Одан соң Шиелі аудандық көпбейінді орталық ауруханасының мәжіліс залында медицина қызметкерлерімен кездесіп пікірлесті.Медицина мекемелері жұмысымен танысқан өңір бас дәрігері халыққа әрдайым сапалы әрі медициналық қызмет көрсету басты мақсат екендігін айта келе, көңіл аударатын тұстарға тиісті тапсырмаларын беріп өтті. &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp; Басқарма басшысы сонымен қатар, тұрғындар ұсыныс-пікірлерін тыңдау мақсатында халық арасында қоғамдық қабылдау өткізді. Онда тұрғындар медициналық кеңестерге жүгінді. Өз кезегінде Олжас Ермекұлы айтылған өтініштердің шешу жолдарын қарастырып, тұщымды мағлұматтар беріп өтті.Кездесу соңында қоғамдық қабылдауға келгендер қатары аймақтың бас дәрігеріне ризашылықтарын білдіріп тарқасты.

Аймақтың бас дәрігері Шиеліге барды

<a href="https://tdmix.ru/kk/vegetables/chem-lechitsya-kishechnaya-infekciya-u-detei-lechenie-vidy-i-lechenie-kishechnyh.html">ФОТО</a><a href="https://kyzylorda-news.kz/">Kyzylorda-news.kz.</a> Жаз маусымында адамдардың аңсары ауатын қауын-қарбыздың дәмінде шүбә жоқ. Алайда осы аталған өнімдерден жедел ішек инфекциясымен ауырып жатқандарды да естиміз. Осы жайында бүгін Өңірлік коммуникациялар алаңында өткен брифингте облыстық санитариялық-эпидемиологиялық бақылау департаментінің басшысы Динара Жаңабергенова толық ақпарат берді.&nbsp;<blockquote>«Жаз маусымы басталысымен жедел ішек инфекциясы ауруларының тіркелу көрсеткіші басқа кезеңдерге қарағанда арта бастайды. Оған себеп – ыстық ауа райында тамақ өнімдерінің тез бұзылуы, мерзімінен ерте піскен жеміс-жидектерді мөлшерден тыс қолдану. Нақты атап кетсек, облыста жедел ішек инфекциясына шалдыққан 21 жағдай есепке алынды. Әдетте қарбыздар маусым айында сауда сөрелерінде пайда бола бастайды. Бұл уақытта өнімдер анағұрлым қауіпті, яғни нитратпен улану деңгейі жоғары. Бұдан бөлек, гербицид, пестицидтердің мөлшерден тыс болуы да денсаулыққа кері әсер етеді. Қарбызды мөлшерінен көп жеуге де болмайды. Ересек адамдар үшін бір күндік норма 500 грамм, 4-6 жастан асқан балаларға 150 грамм. 2 жасқа толмаған бөбектерге қарбыз беруге болмайды. Сонымен қатар, жеміс-жидектерді, қарбыз-қауынды сақтау және жеткізу ережесінің бұзылуы да осы өнімнен ауырып қалуға себеп болады. Айта кетейін, ерте піскен жеміс-жидектер мен қауын-қарбыздардан денсаулыққа зиян келмес үшін сақтық шараларына салғырт қарамауды, ауру белшілері байқалған жағдайда медициналық көмекке жүгіну керек», - деді Динара Олжабайқызы.</blockquote>

Динара Жаңабергенова: Жазда жедел ішек инфекциясы аурулары арта бастайды

<a href="https://kyzylorda-news.kz/">Kyzylorda-news.kz.</a> Негізінен, медицина саласында оториноларинголог &nbsp;маманының қызметі рөлі зор. &nbsp;Аталған мамандық иесі мұрын, тамақ және құлақ ауруларын зерттеуге және емдеуге машықтанған дәрігер ретінде белгілі. Бірақ, бұл тек жай үш орган ғана емес, адам денесінің үш маңызды жүйелері саналады. Сондықтан осы салада жұмыс істейтін дәрігердің терең білімі мен ерекше дағдылары болуы керек. Өз кезегінде Сырдария аудандық емханада білікті маман иесі &nbsp;Гүлнұр Жорабаева бар екенін айта кетейік.&nbsp;Кәсіби маман &nbsp;1989 жылы Түркістан облысы, Қазығұрт ауданында дүниеге келген. 2006-2012 жылы Қарағанды мемлекеттік медицина университетінде «Емдеу ісі» мамандығы бойынша білім алған. Бұл ретте, жас маман 2012-2013 жылдары Қызылорда облыстық ауруханасында интернатурадан өткен. Негізінен, ақ халатты абзал жан 2013 жылдың тамыз айынан бастап Айдарлы амбулаториялық емханасында жалпы тәжірибелі дәрігер болып еңбек жолын бастаған.Ал 2014 жылы №5 Алматы қалалық ауруханасында «Оториноларингология» мамандығын меңгерген. Қазіргі таңда аудандық емханада Лор дәрігері болып қызмет атқаруда.<blockquote>– Өз басым медицина саласын таңдағаныма өкінбеймін. Оңтүстік өңірден Сыр еліне келін болып түскенімде &nbsp;өз мамандығым бойынша қызмет ете бастадым. Ауданнан шалғайда орналасқан Айдарлы ауылында жергілікті халықтың денсаулығына жіті көңіл бөлдім. Жалпы, «Оториноларингология» мамандығы медицина саласының күрделі қызметінің қатарына кіреді. Үнемі біліктілік жетілдіріп отыру керек. Құлақ, тамақ, мұрын секілді адамның мүшелері өте нәзік келеді. &nbsp;Сондықтан шағымданған науқастарды мұқият зерделеп, ем-дом жасауға барымызды саламыз. Кей жағдайда науқастарға ота жасайтын кездер жиі кездеседі. Аурудың потологиясын ерте анықтап, ауруханаларға жолдама береміз. Біз қашанда антымызға адал болып, ел игілігі жолында еңбек ете береміз. Бүгінде аудандық емханада мамандандырылған дәрігерлер жеткілікті. Тынымсыз еңбектің арқасында аурушаңдық деңгейін азайтамыз, – дейді білікті дәрігер.&nbsp;</blockquote>Айта кетейік, &nbsp;кәсіби маман Гүлнұр Жорабаеваның жолдасы –Ермек те, медицина саласының маманы. Үйдегі отағасы стамотолия саласында қажырлы еңбек етіп келеді. Жалпы, жарасымды жұптар секілді бір салада жұмыс жасайтын ақ халатты абзал жандар баршылық. &nbsp;Өз кезігінде &nbsp;біліктілігі жоғары мамандарды &nbsp;кәсіби мерекемен құттықтай отырып, қызметтерінің жемісін көріп, ұлт саулығы жолында аянбай еңбек етіп, биік белестерді бағындыра беріңіздер демекпіз.&nbsp;&nbsp;

Медицинаның күрделі саласын меңгерген дәрігер 

<a href="https://kyzylorda-news.kz/ru">Kyzylorda-news.kz.</a> Адам өмірінде екі нәрсені бағалау керек. Ол – Алланың берген өмірі мен денсаулығы. Бақытты ғұмыр кешу денсаулыққа байланысты. Сондықтан «Денсаулықтың қадірін ауыр-ғанда білерсің» деп халық бекер айтпаған.Бізің бүгінгі кейіпкеріміз – денсаулық сақшысы, мамандығын сүйікті ісіне арнаған ақ халатты абзал жан Салтанат Рүстембекқызы. Дәрігер Салтанат Рүстембекқызы аудандағы қыз-келіншектердің нағыз жанашыр досына айналғанына біршама жыл болды. Акушер-гинеколог ретінде өзінің дәрігерлік кеңесін беруден жалықпайтын Салтанатпен мереке қарсаңында әңгімелесудің сәті түсті.Акушер-гинеколог, ана денсаулығын жіті &nbsp;қадағалап, әйел адамның саулығын арттыру үшін күні-түні қызмет атқаратын маман иесі. Жүктілікті жоспарлап, әйелдің босанғанға дейінгі ахуалы мен күтімі дәл осы абзал жандардың &nbsp;жауапкершілігіндегі шаруа.&nbsp; Әр ісіне осындай жауапкелшілікпен қарайтын маман иесі – Салтанат Рүстембек. Ол 1992 жылы Қызылорда облысы, Қармақшы ауданында дүниеге келіп, 1998-2007ж аралығында дарынды балалар мектебінде оқыған. 2005 жылы Сырдария ауданына қоныс аударып, № 210 О.Абдулпаттаев &nbsp;атындағы қазақ орта мектебіне оқуға қабылданып, &nbsp;2009 жылы бітірген. 2009-2016 жж БҚМУ акушерия гинекология саласы бойынша білім алып, 2016-2019 жж осы мамандық бойынша резидентураны жалғастырған. Сонымен бірге 2019 жылы Сырдария аудандық ауруханасының Шаған елді мекенінде аймақтық акушер-гинеколог қызметін атқарған. 2020 жылы &nbsp;«Перзентхана» бөлімішене акушер-гинеколог, және «Гинекология» бөлімшесінің меңгерушісі қызметіне алмасып, қазіргі уақытта қызметін абыроймен атқаруда. Негізінен, «Жатыр мойны патологиясы», «Интимді эстетикалық гинекология» тақырыбында білімін жетілдірген. 2021 жылдан &nbsp;бері Қалалық көпбейінді аурухананың гинекология бөлімінде кезекші дәрігері болып қызметін атқаруда.<blockquote>– Дәрігер – кең ұғым, қастерлі мамандық. Ауырған сәтте адам жанына араша, кісі денсаулығы үшін жауапты болатын жандардың атқаратын жұмысы да ауқымды. Саланың қызығынан шыжығы көп десек те, дәрігерлікті жан қалауымен таңдаған жан үшін адамдарды емдеу ісі қуаныш сыйлары анық. Шын мәнінде, аудан әйелдерімен сырласып, денсаулығына жеті көңіл бөлуді назарына саламыз. Шын мәнінде, ана мен бала бала денсаулығына аса күтім керек. Сондықтан аналарға барлық жасаймыз, – дейді білікті дәрігер.&nbsp;</blockquote>Қызмет пен отбасын қатар алып жүрген ақ халатты абзал жанды төл мерекесімен құттықтаймыз! Адам өміріне арашашы абзал жанды төл мерекемен құттықтай отырып, отбасына амандық, деніне саулық, кәсіби біліктіліктеріңіздің арқасында биік асулардан көріне беріңіз деген тілегімізді білдіреміз. &nbsp;

Акушер-гинеколог: Әр әйел өз денсаулығына жауапты

<a href="https://kyzylorda-news.kz/ru">Kyzylorda-news.kz.</a> Жақсы дәрігер болу үшін адамның ауруын ғана емес, жан-дүниесін де түсіну керек. Ем іздеп келген науқасқа жылы шырай танытып, үнемі күліп қарсы алатын білікті маман пациенттері үшін де сыйлы әрі ондай маманды арнайы іздеп келетіндер де көп. Өйткені, тәні ауырған адамның жанын да емдей білген маман жұртшылықтың құрметіне бөленері хақ. Сол үшін де ақ халақтты абзал жандарға көрсетілер құрмет ерекше.Біздің бүгінгі кейіпкеріміз антына адал, ауыл халқының алғысына бөленген &nbsp;дәрігер хирург Тағыбергенов Дәуірхан Жеткербайұлын ерекше атап өтуге болады. &nbsp;Ол 1991 жылы 13 желтоқсанда Қызылорда облысы, Қазалы ауданы, Ақтан батыр ауылында дүниеге келген. Қызылорда облысындағы №4 Облыстық тереңдетілген физика математика дарынды балаларға арналған мектеп интернатын бітіріп, 2009 жылы Марат Оспанов атындағы Батыс Қазақстан Мемлекеттік медицина университетіне оқуға қабылданып, 2016 жылы хирург мамандығы бойынша тәмамдаған. Дәуірхан Жеткербайұлы ең алғашқы еңбек жолын Ақтөбе облысы Ырғыз &nbsp;ауданынан басталған. 2019 жылы Ақтөбе облыстық жедел жәрдем ауруханасынның ота бөлімінде оташы болып қызмет атқарған. Ол бүгінде Сырдария аудандық ауруханасының хирургия &nbsp;бөлімінде дәрігер хирург қызметін атқарады. Қазіргі таңда, жедел және жоспарлы оталар жасауда. Атқарған еңбегі үшін Тағыбергенов Дәуірхан Жеткербайұлы Денсаулық сақтау министрінің алғысымен марапатталған.Мамандықтың ең қадірлісі – дәрігерлік. Ақ халат киіп, антқа адал болу, халық денсаулығы үшін еңбек ету екінің бірінің қолынан келмейді. Медицина саласын таңдаған адамға ептілікпен қатар үлкен жүректілік те қажет-ақ. Осы ретте еңбегі еленіп, тұрғындар алғысына бөленіп жүрген Дәуірхан Жеткербайұлын айтулы мерекемен құттықтай отырып, жауапты қызметіне сәттілік тілейміз. Отбасына амандық, деніне саулық тілейміз. Кәсіби біліктілігіңіздін арқасында биік асулардан көріне беріңіз демекпіз! &nbsp;

Антына адал білікті дәрігер

<a href="https://kyzylorda-news.kz/">Kyzylorda-news.kz.</a>&nbsp; Өңірде денсаулық сақтау саласының көкжиегі кеңейіп, жыл өткен сайын медициналық мүмкіндіктер молайып келеді. Қазіргі таңда ауданда 3 аурухана, 1 аудандық көп бейінді орталық аурухана, 3 ауылдық емхана, 11 дәрігерлік амбулатория, 36 медициналық бекет, 1 фельдшерлік амбулатория жұмыс жасайды. Солардың қатары бүгін тағы екі медициналық нысанға артып, Тастүбек пен Жалғызағым елді мекендерінде жаңа медициналық бекет бой көтеріп, пайдалануға берілді.Мергенсай ауылдық округіне қарасты Тастүбек елді мекенінде 200-ге жуық тұрғын бар. Аудан орталығынан шалғай орналасқан ауылда бұған дейін медициналық қызмет көрсету орталығы болмаған. Жаңадан бой көтерген бекетке тұрғындар ризашылықтарын білдірді. Нысанның ашылу салтанатында облыс әкімінің орынбасары Нұрымбет Сақтағанов сөз алып, тұрғындарды жаңа ғимараттың ашылуымен құттықтады.<blockquote>«Денсаулық зор байлық деген халқымызда аталы сөз бар. Осынау байлығымызды сақтау жолында жұмыс жасайтын мейіргерлерімізге жаңа нысанда сапалы қызмет көрсетіп, ел игілігіне қызмет жасай беріңіздер деймін. Бүгінгі жаңадан бой көтерген нысан ауыл тұрғындарының дертіне шипа табатын құтты орынға айналуына шын жүректен тілектеспін!»-деп ақжарма тілегін жеткізді.</blockquote>Мұнан соң, дәл осындай ғимарат Сексеуіл кентіне қарасты Жалғызағым ауылында да халық игілігіне берілді. Заман талабына сай жабдықталған мекеменің ашылғанына жергілікті жұртшылық алғаусыз алғысын айтып, іргелі істерге ұйытқы болып жүрген ел азаматтарына ізгі лебіздерін білдірді. Әлеуметтік нысанның ашылу салтанатына қатысқан облыс әкімінің орынбасары жиналған қауымды бүгінгі қуанышпен құттықтап, медициналық бекеттің лентасын қиды.Айта кетейік, бүгінде айдынды өлкеде денсаулық саласында қарқынды жұмыстар жүргізілуде. Мәселен, «Ауылдық денсаулық сақтауды жаңғырту» ұлттық жобасы аясында биылғы жылы Бөген, Қызылжар ауылдарында дәрігерлік амбулаторияның және Көктем елдімекенінде медициналық бекет құрылысы басталатын болса, Сексеуіл кентіндегі 40 төсектік аурухана құрылысы қайта жандануда.<figure class="image"><img src="https://knadmin.beoblood.kz/uploads/354664105_3578935169101510_6456541556669907326_n_680ea9ea49.jpg" alt="354664105_3578935169101510_6456541556669907326_n.jpg"></figure>

Аралда екі медициналық бекет пайдалануға берілді

<a href="https://kyzylorda-news.kz/">Kyzylorda-news.kz.</a> Қазір адамзат қатерлі ісік факторлары жайлы біраз нәрсе біледі. Дұрыс емес тамақтану, алкоголь ішу, темекі тарту және қозғалмау адам денсаулығына жағымсыз әсер етеді. Алайда зиянды әдеттер жасап үлгермеген кішкентай балаларда да қатерлі ісік пайда болып жатады. Балалардағы қатерлі ісік жайлы не білу керек? Doctorpiter порталына балалар онкологы Анна Елфимова жауап берді.Маманның айтуынша, кей балалар туа сала қатерлі ісікке шалдығады.<blockquote>«Біздің ағзамызда үнемі өсім мен жасушалар бөлінуі болады. Бұл процестер күрделі биологиялық механизмдермен реттеледі. Белгілі бір сәтте қалыптасқан жүйе істен шығып, бақылаусыз өсетін және бөлінетін жасушалар пайда болады. Бұл процесс мутациялармен іске асады. Мутациялар сыртқы орта факторларының әсерінен және себепсіз пайда болуы мүмкін» дейді ол.</blockquote>Жиі мұндай аномальді жасушаларды иммунитет анықтап, ол жойылады. Алайда қатерлі жасушалар одан "қаша алатын" және тірі қалып әрі қарай дамуға мүмкіндік беретін басқа да қабілеттерге ие.Балаларда қатерлі жасушалардың түзілуіне тұқымқуалаушылық бейімділік те әсер етеді. Балалардағы шамамен 10% онкологиялық аурулар туа біткен синдроммен және аурумен байланысты.Балаларда қандай қатерлі ісіктер болады?Балалардағы онкологиялық аурулар ересектердегіден бөлек. Балалар қан жүйесі қатерлі ауруларымен жиі ауырады: аққандылық (лейкоз) және лимфома (лимфалық жүйені зақымдайды). Екінші орында - ми мен жұлын қатерлі ісігі. Сондай-ақ, балаларда нефробластома&nbsp;(бүйрек қатерлі ісігі),&nbsp;нейробластома (симпатикалық жүйке жүйесінің жасушаларынан пайда болады) және сүйектер қатерлі ісігі жиі кездеседі.Қауіп-қатерді азайтуға бола ма?Қауіп-қатерді азайту үшін ата-ана не істей алады? Дәрігердің айтуынша, өкінішке қарай, мүмкіндіктер өте аз. Себебі балалардағы онкологиялық ауруларға сыртқы факторлар әсер ете қоймайды.Егер балада немесе отбасыда тұқымқуалайтын ауру және синдром анықталса және ол қатерлі ісік дамуына әкелуі мүмкін болса, генетикалық консультация алу керек.Кей жұқпалар балаларда және ересектерде қатерлі ісік даму қаупін арттырады, сондықтан вакцина алу маңызды.Жүкітілік кезінде темекі тарту, алкоголь ішу және психикалық белсенді заттар қолдану мен балада онкологиялық ауру дамуының, сондай-ақ баланың туа біткен аурумен дүниеге келуінің арасында байланыс бар екенін дәлелдеген зерттеулер бар. Сондықтан жүктілік кезінде және бала емізгенде бұл әдеттерден алшақ болған жөн.Әдетте, ерте жаста баладағы онкологиялық ауруды скрининг көмегімен анықтау мүмкін емес. Өкінішке қарай, қан анализі де, компьютерлік томография да ерте диагноз қоюға көмектеспейді.Балалардағы онкологиялық аурудың белгілерін басқа аурулар белгілерімен шатастырып алу оңай. Олардың өзіне тән ерекше белгілері жоқ. Алайда мына белгілер байқалса, міндетті түрде баланы дәрігерге көрсету керек:<ul><li style="text-align:justify;">жоғары температураның себепсіз әрі ұзақ уақыт болуы;</li><li style="text-align:justify;">денеде көп көгерген жерлер мен бөртпелердің пайда болуы;</li><li style="text-align:justify;">дене массасының жоғалуы, себепсіз дене массасының тоқтап қалуы;</li><li style="text-align:justify;">бұрын белсенді болған баладағы әлсіздік, сүйектерінің және буындарының ауыруы;</li><li style="text-align:justify;">бас ауруы. Бұл белгілер балада міндетті түрде онкологиялық аурулар бар екенін білдірмейді, бірақ бұл дәрігер бақылауын қажет етеді</li></ul>

Неліктен кей балалар туа сала қатерлі ісікке шалдығады? 

<a href="https://kyzylorda-news.kz/">Kyzylorda-news.kz.</a> Жаздың жайма шуақ күндерінде аталып өтетін мерекелер аз емес. Соның бірі – медицина қызметкерлерінің күні. &nbsp;­Маусым айының үшінші жексенбісі – елімізде медицина қызметкерлерінің кәсіби мерекесі дәстүрлі түрде аталып өтеді. Бұл – әр секунд сайын адам өмірін құтқаруға бар күш-қайратын салатын және өмірі арпалысқа түскен адам тағдырына араша түсуші абзал жандардың төл мейрамы. Осы күні мыңдаған дәрігер мен аталған саланың қызметкерлері мерекені асыға күтетіні жасырын емес. Аудандық мәдениет үйі сейсенбі күні халыққа лық толды. Емен-жарқын, көтеріңкі көңіл-күйдегі жандар, құшақ-құшақ гүлдер, құттықтаулар легі. Бұл құрметтің барлығы өздеріңіз байқағандай ақ халатты жандарға арналды. Нақ осы құрметке жауапкершілікті аса қажет ететін маман иелері лайық-ақ. Осыған орай, аудан көлемінде медицина қызметкерлерінің кәсіби мерекесіне арналған салтанатты шара өтті. Мерекелік жиынға ауданның денсаулық сақтау саласының мамандары мен ардагерлері жиналды.Медицина мамандарына арналған мерекелік шара аудандық аурухана мен емхананың күнделікті күйбең тірлігі көрсетілген бейнежазбамен басталды. Арнайы мәдениет қызметкерлері түсірген бейнебаянда аудан тұрғындары және аурухана емделушілері ақ халатты абзал жандарға алғыс айтты. Сонымен қатар, аудандағы аурухана қызметкерлері туралы аз-кем мәлімет берілді. Жанға шуақ, көңілге қуаныш сыйлаған бейнероликтен кейін аудан әкімі Нұржан Сәбитұлы сөз сөйледі.<blockquote>«Сіздерді &nbsp;кәсіби төл мерекелеріңіз – медицина қызметкерлері күнімен шын жүректен құттықтаймын. Дәрігер – адам жанының арашасы, жер бетіндегі сан алуан кәсіптің ішіндегі ең ізгі, ең қастерлі мамандықтың иесі. Мұның өзі, осынау шапағаты мен машақаты қатар жүретін, қадірі мен қасиеті мол мамандықтың маңызын көрсетсе керек. Ал оның иесі болу – сіздер үшін үлкен мәртебе болуы тиіс. Бұл мерекені сіздердің ерен еңбектеріңіздің дүйім жұртшылықпен бағаланатын күні деп есептеуге болады. Толассыз еңбектеріңіздің өлшемінде өмір қуанышымен қайта қауышқан талай жандардың тағдыры тұр. Сондықтан біз өз тарапымыздан ауданымыздың медицина саласын дамытуға, дәрігерлер жұмысының сапасын жақсартуға бағытталған жұмыстарды күшейтетін боламыз», – деді өңір басшысы.</blockquote>Сонымен қатар аудан ауруханасының жеткен жетістіктерімен және жоспарыларымен бөлісті. Нұржан Сәбитұлының айтуынша, өткен жылы Ұлттық аккредиттеу орталығы эксперттері жүргізген сараптаудың нәтижесінде Шиелі ауданаралық ауруханасы республикадағы үздік екі ауданның бірі болып, І санатты көпбейінді аурухана статусын алған. Әрине, бұл – аудан медицинасының, оның ішінде ақ халатты абзал жандардың еңбегінің жемісі. Дәрігерлерге арналған ізгі тілектің ізін Шиелі ауданаралық ауруханасының бас дәрігері Нұрлан Әмір жалғастырды.<blockquote>«Құрметті әріптестер және қонақтар. Бүгінгі медицина саласының мерейтойына келіп, біздің қуанышымызды бөлісіп отқандарыңызға үлкен алғысымды білдіремін. Медицина саласы – жауапркешілігі мен ауыртпалығы көп жұмыс. Осы саланың дамуына сүбелі үлес қосып келе жатқан дәрігерлер мен медбикелерге мың алғыс», – деп ақжарма тілегін айтты аурухана басшысы.</blockquote>Абзал жандар ардақталған шара ардагерлер кеңесінің төрағасы Өркен Исмаил мен «Өскен өңір» редакциясы және ақпарат агенттігінің бас редакторы Нұрболат Пірімбеттің дәрігерлерді құттықтау сөзімен және ыстық ықыласын жеткізумен жалғасты.&nbsp;Әрмен қарай салтанатты шарада қиындығы мен қуанышы мол қызметте абыройлы еңбек етіп, халық алғысына бөленіп жүрген ақ желеңділерді марапаттады. Атап айтар болсақ, «Шиелі ауданының құрметті азаматы» атағымен ауданның денсаулық сақтау саласының ардагері Б.Күлімбетов, «ҚР Құрметті азаматы» атты республикалық байқауының жеңімпазы атанып, І орын дәрежелі дипломмен Шиелі денсаулық сақтау саласы ардагерлер төрағасы С.Исламов, «SENIM» Денсаулық сақтау жүйесі жұмыскерлерінің салалық кәсіптік одағы Республикалық қоғамдық бірлестігінің «Үздігі» төс белгісімен бөлім меңгерушісі, ¬реаниматолог дәрігер Б.Болатов, ҚР-ның жедел медициналық жәрдем қауымдастығы «Үздік қызметкер» төсбелгісімен бас дәрігердің бастапқы санитарлық медициналық көмек жөніндегі орынбасары Қ.Шәукебаев, ҚР Денсаулық сақтау министрінің «Құрмет грамотасы» бөлім меңгерушісі, акушер-гинеколог дәрігері Ғ.Әшімов иеленді. Мереке қарсаңында өзге де медицина мамандарына алғыс хат пен құрмет грамотасы табысталып, мерейі үстемдей түсті. Сондай-ақ мерекелік шарада айтулы күнге арнап ұйымдастырылған медицина саласы қызметкерлері арасындағы спартакиаданың қорытындысы анықталып, жеңімпаздарды қаржылай сыйлықпен марапаттады. Мәселен, ерлер арасындағы қол күрестен І орын жалпы тәжірибелі дәрігерлік бөлім мейіргері Б.Ниязхановқа бұйырды. Ал ІІ орынды психиатрия бөлім мейіргері Б.Молабеков алса, шаруашылық бөлім жұмысшысы Н.Миндакулов ІІІ орынды қанжығасына байлады. Ал әйелдер арасындағы қол күрестен қабылдау және жедел медициналық көмек бөлімі фельдшері Г.Ескулова І орын, аудандық емхана бөлімі мейіргері Ә.Баймұратова ІІ орын, Көкшоқы ауылдық емханасы әлеуметтік қызметкері Г.Ермаханова ІІІ орын иеленді. Жұмыс пен үй шаруасын, одан қалды қызметтен тыс шараларға белсене қатысып, көптің көңілінен шығып жүрген медицина мамандары осылайша марапат мінберінен көрініп бір марқайып қалды.Адам жанын жылы сөзімен, шипалы қолымен емдей білген дәрігерлердің мерекесі әрмен қарай әдемі әнмен ұласты. Аудан өнерпаздары ақ халаттыларға арналған өміршең өлеңдерін шырқап, әуен арқылы алғысын айтқандай әсер қалдырды. Залда отырған дүйім халық медицина мамандарына да, өнерпаздарға да ризашылығын ду қол шапалақпен білдіріп отырды. Қазақта «Бірінші байлық – денсаулық» деп бекер айтылмаған. Аяқ астынан ауру алқымнан алып, төсекте тырп етпей таңылып қалсақ, осы уақытқа дейін жиған дүниеміз де, қалтамыздағы қаржымыз да құнсыз болып қалады. Сондықтан бірінші байлығымыз саналған денсаулықты жауапты мамандарға сеніп тапсырамыз. Ал денсаулық сақтау саласының қызметкерлері сенім үдесінен шығып, аурумен арпалысып келеді. Олай болса, өзінің біліктілігі мен білімінің арқасында қаншама өмірдің шырағын қайта жаққан дәрігерлердің жұмысына сәттілік тілейміз!

Қазақстан және Қызылорда облысының жаңалықтары: Денсаулық