<a href="https://kyzylorda-news.kz/">Kyzylorda-news.kz.</a>&nbsp; Балаларды қорғау күні мерекесі қарсаңында аудандық «Жалын» тынығу-лагері жазғы маусымын бастады.
Ашылу салтанатына аудан әкімі Мұрат Ергешбаев қатысып, жас өрендерді құттықтады.
<blockquote>
 «Бүгіннен бастап балаларымыз жазғы мектеп аясында лагерьлерде демалып, шығармашылықпен айналыса алады. Биылғы маусымда жазғы демалыспен 6 мың бала қамтылса, тарихи экскурсиялармен 1 мың жас жеткіншекті таныстыру қолға алынбақ. Бұл демалуға тиісті балалардың 90 пайызын құрайды. Оның ішінде аз қамтылған əлеуметтік қолдауды қажет ететін отбасынан шыққан балалар 100 пайыз демалыспен қамтылады. Сонымен бірге балалар жылы аясында демеушілер есебінен аз қамтамасыз етілген отбасынан шыққан 
 100 бала Алматы облысындағы «Тау Жаңашар» лагеріне жіберілетін болды», – деді Мұрат Нәлхожаұлы.
</blockquote>
Айта кетейік, аудан әкімінің қолдауымен облыстық мәслихат депутаты Расул Есенов «Жалын» тынығу лагеріне демеушілік етіп, музыкалық аппаратура сыйға тартылды. Мерекелік іс-шара балғындардың концертіне ұласты.

Сырдария ауданында 6 мың бала жазғы демалыспен қамтылады

<a href="https://kyzylorda-news.kz/">Kyzylorda-news.kz.</a> Шиелі ауданында «Сыр ұланы» тынығу жазғы демалыс лагерінің ашылу салтанаты өтті. Лагерьдің ашылуында сөз алған аудан әкімі Нариман Мақұлбеков пен аудандық білім бөлімінің басшысы Қанат Әмзеев оқушыларға сәттілік тілеп, лагерьде көтеріңкі көңіл күймен демалуларына өз тілектестігін білдірді.
Салтанатты жиын барысында 1 маусым – Халықаралық балаларды қорғау күніне орай балғын балаларымызға аудан кәсіпкерлерінің көмегімен 50 велосипед сыйға тартылды.
Сондай-ақ, “Балалардың қауіпсіздігі басты назарда” акциясы аясында жазғы демалыс уақытында төтенше жағдайлар орын алған жағдайда шұғыл түрде жүргізілетін авариялық құтқару жұмыстарымен және арнайы техникаларымен төтенше жағдайлар бөлімі тарапынан таныстырылып, акция аясында лагерь тынығушыларына тегін балмұздақтар таратылды.
Жалпы «Сыр ұланы» балаларды сауықтыру қосымша білім беру орталығында биыл 700 бала тынығады.
«Сыр ұланы» балалар лагерінде оқушыларға көңіл көтеріп, жазғы демалыс уақытын қызықты етіп өткізуге барлық жағдайлар жасалған. 
«Көркемсурет», «Киімді моделдеу және дизайн», «Жас шахматшылар», «Халық биі» «Тенис», «Робототехника» үйірмелері лагерь ұжымымен бірлесіп жұмыс жасайды.
Әр ауысым бойынша лагерь тынығушылары 1 күндік табиғат аясына саяхатқа шығып, онымен қоса кент әкімшілігіне қарасты «Арман» мәдениет үйімен, спорт кешенімен тығыз байланыста болады. 
Әр ауысымдағы 100 тынығушы уақыттарын тиімді және қызықты өткізу мақсатында келісімшартпен шомылу орталығына апарылады.
Лагерь 7 ауысым бойынша жұмыс жасап, әр ауысымда 100 бала қабылдану жоспарлануда. Келетін тынығушылар ауданның 40 мектебі бойынша әлеуметтік жағдайларына байланысты жинақталып, тынығуға келетін болады.
<img src="https://kyzylorda-news.kz/wp-content/uploads/2022/06/284663288_1369039723599229_7448856670598740859_n.jpg" alt="" />
<img src="https://kyzylorda-news.kz/wp-content/uploads/2022/06/285404109_1369039423599259_1420875857489772594_n.jpg" alt="" />

Шиелі ауданында «Сыр ұланы» сауықтыру лагері жұмысын бастады

<a href="https://kyzylorda-news.kz/">Kyzylorda-news.kz.</a> 1 маусым – халықаралық балаларды қорғау күніне орай «Атамекен» отбасы үлгісіндегі балалар ауылында «Көк аспанда күн күлсін, бірге күлсін бүлдіршін» атты мерекелік шара ұйымдастырылды.
Бақыт пен шаттықтың ордасы «Атамекен» ауылының құрылғанына биыл – 7 жыл. 
Бүгінде мұнда «Сарыарқа», «Байқоңыр», «Ақжайық», «Мадияр», «Оқжетпес», «Ұлытау», «Үшқоңыр» отбасының балалары тату-тәтті ғұмыр кешуде.
Мерекелік шарада Қорқыт ата атындағы Қызылорда университетінің проректоры Жандос Базартай мектеп бітіруші түлектерге білім грантын табыстады. Грантты биыл ұлттық бірыңғай тестілеуге қатысатын Нұршат Нышанова мен Әділет Мәді иеленді.
Сондай-ақ, салтанатты шарада университетке бекітілген «Ақжайық» отбасының балаларына қызықты кітаптар сыйлыққа берілді.
Университеттің «Экономика және басқару» кафедрасының әлеуметтік жұмыс мамандықтарын даярлау мақсатында балалар ауылында филиалы жұмыс істейді. Профессор-оқытушылар және білім алушылар тарапынан мереке күні түрлі топтағы балаларға арнайы сыйлықтар табысталды.
<img src="https://kyzylorda-news.kz/wp-content/uploads/2022/06/283701444_2576709375799806_256414237483152665_n.jpg" alt="" />
<img src="https://kyzylorda-news.kz/wp-content/uploads/2022/06/283486790_2576709112466499_6074262084924222306_n.jpg" alt="" />
<img src="https://kyzylorda-news.kz/wp-content/uploads/2022/06/283535305_2576709209133156_7746477946762966657_n.jpg" alt="" />
<img src="https://kyzylorda-news.kz/wp-content/uploads/2022/06/284532263_2576708959133181_6966968257678473028_n.jpg" alt="" />

Балалар ауылындағы түлектерге білім гранты табысталды

<a href="https://kyzylorda-news.kz/">Kyzylorda-news.kz.</a> Биыл Қызылорда облысы бойынша 1-10 сынып аралығындағы 169 263 баланың 100 мыңнан астамы жазғы тынығу лагерьлерінде демалатын болады. 1 маусымнан бастап аймақтағы 9 тынығу лагері өз жұмысын бастайды. Бұл туралы Қамбашта өткен көшпелі брифингте облыстық білім басқармасы тәрбие бөлімінің бас маманы Жадыра Шариева хабарлады.
Мектеп туризмін жандандыру бойынша өңірдегі тарихи-мәдени ескерткіштерге 32 мыңнан астам оқушы саяхаттайды. Сонымен қатар жаз маусымында 5 мың баланы облысымыздағы меценаттар мен демеушілер есебінен демалдыру, Нұр-Сұлтан қаласына экскурсиялау жұмыстары да жүзеге асырылады. Жазғы уақытта балалардың бос уақытын тиімді ұйымдастыру мақсатында аулалық клубтар, бұқаралық спорт пен салауатты өмір салтын қалыптастыру, зияткерлік, дебаттық, техникалық, өнер, тілді шеберлігін дамыту бағыттарында оқушылар кең көлемде қамтылады. Айта кетейін, экскурсиялар кезеңінде балалардың қауіпсіздігін сақтау және түрлі төтенше жағдайлардың алдын алу бойынша тиісті шаралар қабылданып, арнайы медициналық көмекпен қамтамасыз етілетін болады.
Айта кетейік, аймақта 270 мектеп жанында тамақпен және тамақсыз күндізгі тынығу лагерлерінің жұмысы жүргізіледі. Мұнымен қоса, ата-анасының қамқорлығынсыз қалған, көп балалы және аз қамтылған отбасылардан шыққан 31 мың баланы сауықтыру демалысымен, саяхаттармен қамту бағытында қолдау шаралары бірінші орында ұйымдастырылатын болады.

1 маусымнан бастап Қызылордада 9 тынығу лагері жұмысын бастайды

<a href="https://kyzylorda-news.kz/">Kyzylorda-news.kz.</a>&nbsp; Халықаралық пәндік олимпиадалардың, спорттық жарыстардың және әлемдік деңгейдегі шығармашылық байқау жеңімпаздары мен жүлдегерлері ҰБТ тапсырмай-ақ ЖОО-ға грантқа түсуге мүмкіндік алады. Осыған қатысты тиісті бұйрыққа Білім және ғылым министрі Асхат Аймағамбетов қол қойды.
<blockquote>
 «Халықаралық олимпиадалардың, спорттық және шығармашылық байқаулардың тізбесін бекіту туралы бұйрыққа қол қойдым. Бүгін Білім және ғылым министрлігі Дүниежүзілік гимназиада – 2022-нің жеңімпаздары мен жүлдегерлерін марапаттау рәсімін өткізеді. Оқушыларымыз әлемнің 70-тен астам елінен келген жасөспірімдерді басып озып, 86 медаль жеңіп алды. Осылайша ұлттық құрамамыз ІІІ орынды иеленген болатын. Енді олар бірінші болып ЖОО-да оқу үшін гранттар алады. Жас дарындар Мемлекет басшысының шешімі арқасында осындай қолдауға ие болып отыр», – деп жазды министр желідегі парақшасында.
</blockquote>

Халықаралық жарыс жеңімпаздары ҰБТ тапсырмай-ақ білім грантына ие болады

Kyzylorda-news.kz. Мағжан Жұмабаев қазақ әдебиетінің көрнекті өкілі, 100 жылда бір туатын ақын. Өзінің жалынды, оттай ыстық жырларымен талай қазақтың жүрегін жылыта білген Алаш қайраткері. Жылдағы игі дәстүрге сай бүгін облыстық білім басқармасының қолдауымен, «Дарын» облыстық қосымша білім беру орталығының ұйымдастыруымен поэзия Пайғамбарының шоқ жырлары оқылып, оқушылар арасында аймақтық сайыс өткізілді.
Жалпы білім беру ұйымдарының 7-11 сынып оқушылары арасында өткізілген «Мағжан оқулары» ғылыми-шығармашылық байқауына облысымыздан 30-дан астам оқушы қатысып, ақиық ақынның шығармаларын оқып бақ сынасты.
Балалар жылына орай өткізілген бұл байқаудың басты мақсаты жастар арасында сөз зергерінің шығармашылығын насихаттау, отансүйгіштікке тәрбиелеу болып табылады.
Дүбірлі додада үздіктер арасынан алға суырылып жеңімпаз атанған 14 оқушы арнайы басқарманың дипломдармен және бағалы сыйлықтармен марапатталды.

«Мағжан оқулары» облыстық ғылыми-шығармашылық байқау өтті

Kyzylorda-news.kz. ҚР Президенті жанындағы Адам құқықтары жөніндегі комиссия Қызылорда облыстық әкімдігінің, Еуропалық қауіпсіздік және ынтымақтастық ұйымының Нұр-Сұлтандағы Бағдарламалар офисінің және «Winrock International» халықаралық үкіметтік емес ұйым өкілдерінің қатысуымен Қызылорда қаласының және Қызылорда облысының мемлекеттік қызметшілеріне, үкіметтік емес ұйымдардың және дағдарыс орталықтарының өкілдеріне арнап екі күндік семинар-тренинг өтті.
Кездесу “Қазақстандағы адам құқықтарын қорғаудың ұлттық және халықаралық тетіктері. Қазақстан Республикасындағы адам саудасына қарсы іс-қимылдың өзекті мәселелері” тақырыбына арналды.
Жиында Қызылорда облысы әкімінің аппарат басшысы Шахмардан Байманов, ҚР Президенті жанындағы Адам құқықтары жөніндегі комиссияның хатшысы Тастемір Әбішев, ҚР Бас прокуратурасының басқарма прокуроры Қуантай Сағынаев, USAID-тің «Орталық Азиядағы қауіпсіз көші-қон» жобасы жетекшісінің орынбасары, «Winrock International» ХҮЕҰ-нің өкілі Гүлмира Қуанжанова, ЕҚЫҰ-ның Нұр-Сұлтандағы Бағдарламалар офисінің жауапты қызметкері Күнсұлу Демеуова сөз сөйледі.
Қызылорда облысы әкімінің аппарат басшысы Шахмардан Байманов семинар жұмысына сәттілік тілеп, өңірдегі адам құқықтары мен заңды мүдделерін қорғау бойынша жүргізіліп жатқан жұмыстарын атап өтті.
<blockquote>
 «Президент Қасым-Жомарт Кемелұлы Тоқаев «Адам құқығы – ең қымбат қазына. Адам құқықтары мен бостандықтарын, мүдделерін қорғау – Қазақстан саясатының басты бағыты» деп айқындап өтті. Өйткені, адамның құқы мен бостандығы табиғи және ажыратылмас болып табылады, туғаннан бастап беріледі жөне жоғары құндылық болып табылады», – деді Ш.Байманов.
</blockquote>
Іс-шара барысында елдегі адам құқықтарын, сондай-ақ адам саудасы құрбандарының құқықтарын қорғаудың ұлттық және халықаралық жүйесі жан-жақты пысықталды. Адам құқықтары жөніндегі ұлттық мекемелердің сот және құқық қорғау органдарымен, басқа да мемлекеттік органдармен, сондай-ақ азаматтық қоғам институттарымен өзара іс-қимылы қаралды. Сарапшылар адам құқықтарын қорғау мен көтермелеу саласындағы жұмыс тәжірибесімен алмасты және сұрақтарға жауап берді.
<img src="https://kyzylorda-news.kz/wp-content/uploads/2022/05/fb_img_1653652990875.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653652997822.jpg" alt="" />
<img src="https://kyzylorda-news.kz/wp-content/uploads/2022/05/fb_img_1653652994285.jpg" alt="" />

Қызылордада адам құқықтарын қорғау бойынша семинар-тренинг өтті

Kyzylorda-news.kz. Облыстық білім басқармасы мен облыстық дене шынықтыру және спорт басқармасының қолдауымен «Нұрсәт» теннис орталығында ерекше қажеттіліктері мен даму мүмкіндіктері бар балалар арасында «Жұлдызай-2022» Ұлттық инклюзивті ойындардың облыстық кезеңі өткізілді.
Балалар жылына орай «Дарын» облыстық қосымша білім беру орталығының ұйымдастыруымен өткен сайыста оқушылар голбол, үстел теннисі, асық ату, бестас, мини-футбол, пара-каратэ және жеңіл атлетика спорт түрлерінен сайысты.
Жыл сайын дәстүрлі түрде өткізілетін спартакиаданың облыстық кезеңіне қала мен аудандардан және арнаулы мектеп-интернаттарынан барлығы 67 оқушы қатысып, 36 қатысушы жеңімпаз атанып, бағалы сыйлықтармен марапатталды.
Даму мүмкіндіктері шектеулі балаларды спортқа тарту, оларды әлеуметтендіру және ерекше қажеттіліктері мен даму мүмкіндіктері бар балалар арасында салауатты өмір салтын насихаттауды мақсат тұтқан сайыстың жеңімпаз бүлдіршіндеріміз енді республикалық кезеңге жолдама алып, аймақ абыройын қорғайтын болады.

«Жұлдызай-2022» Ұлттық инклюзивті ойындардың облыстық кезеңі өтті

<a href="https://kyzylorda-news.kz/">Kyzylorda-news.kz</a>.&nbsp;Қазіргі күні адамзат баласы мүлдем жаңа индустрияландыру дәуіріне өтуде.&nbsp; Осыған байланысты болып жатқан өзгерістер білім беру жүйесіне де қатысты. Білім беру ісі аса маңызды әлеуметтік институттар қатарына жатады және өзінің&nbsp; мәні, көлемі мен мазмұны бойынша қоғам өмірінде шешуші рөл атқарады. Соған байланысты оны индустриялы қоғам талаптарына сәйкес жетілдіру проблемасы өткір болып отыр.
Бүгінгі күні білім беруді модернизациялауға (жаңарту) баса назар аударылғанына қарамастан, ол әлі де болса уақыт талабына жауап бере алмай отыр, көбінесе қазіргі заман парадигмасына сәйкес келмейтін ескі дәстүрлерді сақтап келеді, бүгінгі күнге дейін осы заман мамандарын даярлаудағы инновациялық тәсілдер мен технологияның рөлі қаншалықты маңызды екені айқындалған жоқ. Мұндай теорияның болмауы қазіргі заманғы ЖОО-ның инновациялық ортасын құрудың жалпы заңдылықтарын айқындау мүмкіндіктеріне едәуір шектеу қайып отыр.
Адам қалыпты өмір сүру үшін, өзінің психикалық қасиеттерін дамыту үшін, жеке тұлғалық ерекшеліктерін жетілдіру үшін, сондай-ақ білім меңгеріп тәжірибе жинақтау үшін адамдармен қарым-қатынас жасайды. Баланың жастайынан айналасындағылармен қарым-қатынас жасауы өзінің кім екенін танып, өзін өзгелерден ажырата алудың, өзін басқалармен салыстыру арқылы басқа адамдардағы қасиеттерді меңгерудің, балалардың әлеуметттік мінез-құлқы мен жеке басының дамуының негізгі тірегі деп қарастырсақ, онда олардың қарым-қатынас жасауын жақсарту аса қажет болып табылады.
Адам адам болып жаратылғаннан соң, оның өмір сүруінің негізгі тірегі мен қажеттілігі, сондай-ақ қалыпты өмір сүру жағдайы басқа адамдармен қарым-қатынас жасау болып табылады. Сондықтан оқушылардың қарым-қатынасындағы мәселе – бүкіл қоғам алдындағы негізгі міндеттер болып қала бермек.Мектептегі оқушылар арасындағы туындайтын кейбір қарама-қайшылықтар, кейбір балалардың мінез-құлқы мен даралық ерекшеліктеріне байланысты түсінбеушіліктер, топқа енгісі келмейтін жағдайлар жиі кездеседі. Мұндай жағдайлар бала өмірі мен психикасында едәуір дақ қалдырады. Осыдан келіп баланың дамуында түрлі ауытқулар, сабаққа қатынасының өзгеруі байқала бастайды. Топтың жеке адамға, адамның топқа әсер ету негізінде оқушылар арасында дараланатын немесе оқшауланатын жағдайлар да туындап жатады.
Мектеп жасына дейінгі шақта баладағы әлеуметтік изоляция белгілері үлкендердің үрейін туғызбайды. Жеке дара ойынмен ойнап жатқан бала тәрбиешілер мен ата-аналарға проблемалы болып көрінбейді. Алайда мұндай балаларды мұқият зерттеген кезде, олардың алдында өз қатары мен қарым-қатынасқа түсуінде біршама потенциалды қиындықтар туындайтындығы байқалған.Олай болса өз құрбыларымен қарым-қатынас жасау барысында қимыншылық туындаудың негізгі себептерін былайша түсіндіруге болады.
Мектеп оқушылары арасында туындайтын оқшауланған балардың болу себебін түсіндіретін оқушылардың өзара конфликтерін түгелдей болдырмау мүмкін емес. Конфликтерді алдын алу жолында маңызды роль алатын – тәртіп болып табылады. Тәртіп – белгілі бір тәртіптілікке бағыну әрекеті арқылы балаға өзіне қажетті бостандығының толық дамуын қамтамасыз ететін әрекет. Ұжымда балалардың оқшаулану себептерін анықтау мәселелері. Психологтан көмек сұрап келетін балалардың көпшілігі – көпшілікпен қарым –қатынасы нашар, өте тұйық немесе ашушаң болып келеді. Қарым-қатынастың бұзылуы мектепке дейінгі және алғашқы мектеп жасында байқалып қана қоймай, соның салдарынан бала өзінің дегеніне жете алмай, айналасындағылармен жанжалдасып, үйде, мектепте дұрыс қарым-қатынас түзе алмайды. Осы кері қарым-қатынас баланың танымдық және жеке тұлғалық даму саласына әсерін тигізеді.
Қорыта келе айтарым мектеп психологының қызмет көрсету сферасы оқушылар, мұғалімдер, әкімшіліктер, яғни кез-келген адамдар арасындағы қарым-қатынас қиыншылықтарын шешу болып табылады. Себебі, сыныптағы қарым-қатынас сипаты баланың білім алуы мен тәрбиеленуіне едәуір әсер етеді. Егер мұғалім оқушыларға дұрыс тәрбие беріп, оларлың білімдерін жоғарылатамын десе, онда ең бірінші кезекте оқушылардың өзара қарым-қатынасын, сондай-ақ мұғалім мен оқушы арасындағы қарым-қатынасты реттеп алған жөн. Олай болса, біз әрбір сабақта балалармен бірлесе жұмыс жүргізу барысында балаларды тату болуға, бірігуге үйрететін, басқаларды түсінуге, қолдауға көмектесетін ойындар мен жаттығуларды тиімді қолданудың жолдарын білуіміз керек.
Гульмира Сембиева,
Қорқыт ата атындағы Қызылорда университеті, Практикалық ағылшын тілі кафедрасының оқытушысы
<img src="https://kyzylorda-news.kz/wp-content/uploads/2022/05/img-20220516-wa0021.jpg" alt="" />

Оқшауланған балалар мәселесімен психологиялық жұмыс істеу ерекшеліктері

<a href="https://kyzylorda-news.kz/">Kyzylorda-news.kz</a>. «Жол активтерінің ұлттық сапа орталығы» Қорқыт ата атындағы Қызылорда университетімен әріптестік байланыс орнатып, бұдан-былай техникалық мамандарды даярлауға өз үлесін қоспақ.
Биыл іргелі оқу орнында зетрханашы мамандығы бойынша білім алып жатқан 5 студент жол құрылысының сапасын қадағалайтын орталықта өндірістік тәжірибеден өтіп жатыр.
<blockquote>
 «Болашақ жас мамандар мұнда теориялық білімін жетілдіріп, білікті мамандардан зертханалық процестердің қыр-сырын меңгеретін болады. Сондай-ақ, шәкірттердің білім-біліктілігіне қарай мекеме тарапынан ақы төлеу мүмкіндігі қарастырылған. Яғни, студенттер өндірістік тәжірибеде жүріп-ақ, жалақы алып уақытша жұмыспен қамтылады. Ал университет бітірген соң көзге түскен жас мамандардыңжол саласына тұрақты қызметке қабылдануына да зор мүмкіндік бар», – деді «Жол активтерінің ұлттық сапа орталығы» РМКҚОФ зертхана меңгерушісі Мағжан Қасымхан.
</blockquote>
Жалпы еліміз бойынша бүгінде жол саласында маман тапшы. Сол себепті, «Жол активтерінің ұлттық сапа орталығы» РМК жергілікті Қорқыт ата атындағы Қызылорда университетімен бірлесіп, жаңа буын жолшыларды қалыптастыруды көздейді.

Мағжан Қасымхан: Өндірістік тәжірибеден өтіп жатқан студенттерге ақы төленеді

<a href="https://kyzylorda-news.kz/">Kyzylorda-news.kz</a>.&nbsp; Бүгін Өңірлік коммуникациялар қызметі ұйымдастырған көшпелі брифингте Әли Мүсілімов атындағы №101 мектеп-лицейінде жазғы мектептің жұмысы таныстырылды. Мұнда бастауыш және жоғары сыныптардан барлығы 500-ге жуық білім алушы дәріс алады.
Сондай-ақ, оқушылардың шығармашылықпен айналысуына бірнеше үйірмелер қамтылған. Солардың бірі – білім ордасының ұстаздары мен шәкірттері «жасыл мектеп» жобасы аясында әртүрлі өсімдік түрлеріне тәжірбие жасап, тың дүниелермен айналысуды қолға алған.
<blockquote>
 26 мамырдан бастап жазғы мектеп өз жұмысын бастады. Білім алушыларға 23 педагог сабақ береді. Оқушылардың шығармашылығы мен ойлау қабілетін жан-жақты дамуы үшін әртүрлі үйірмелер жұмыс істейтін болады. Атап айтқанда, «Сoworking» орталығы, «Дарынды дос» жолдастық көмек көрсету жобасы, «Жасыл мектеп», домбыра сыныбы, және IT бағытындағы үйірмелер жас өрендердің шығармашылығын ұштастыруға арналған. Сондай-ақ, пәндік жұмыстарды жүйелі түрде жүргізу басты назарда. Мектеп ұстаздары, өзін-өзі басқару ұйымының мүшелері, дебат клубы жоспарға сай түрлі бағытта сабақ үйретеді, – деді Әли Мүсілімов атындағы №101 мектеп-лицейдің директоры Айгүл Өткелбаева.
</blockquote>
Айта кету керек, облыстағы 295 мектептің 117 мыңға жуық оқушысы жазғы мектепке қатысуға ниетті. Оларға 14 мыңнан астам педагог сабақ беріп, арнайы сыныптар жасақталды.
<blockquote>
 Білім беру ұйымдарында 26 мамыр мен 17 маусым аралығында жазғы мектеп жүргізіледі. Оқу пәндері бойынша күніне 3-4 сабақ 40 минуттан өткізіледі. Оқушыларға үй тапсырмасы берілмейді. Сонымен қатар еркін киім үлгісін киюге рұқсат берілген. Айта кететін жайт, мұғалімдерге еңбек ақы толық төленетін болады. Кезекті еңбек демалысының күндері өзгеріссіз беріледі, – деді облыстық білім басқармасының бөлім басшысы Нұрлан Дәулеталиев.
</blockquote>
<img src="https://kyzylorda-news.kz/wp-content/uploads/2022/05/283755134_1540712186324288_9006811160509133899_n.jpg" alt="" />
<img src="https://kyzylorda-news.kz/wp-content/uploads/2022/05/283947371_1540712149657625_4061907029070195328_n.jpg" alt="" />

26 мамырдан бастап жазғы мектеп өз жұмысын бастады

<a href="https://kyzylorda-news.kz/">Kyzylorda-news.kz</a>. Назарбаев Зияткерлік мектептерінің 2021-2022 оқу жылы домбыра сабақтарымен аяқталды.
Сыр өңіріндегі NIS-те өткен «Күй құдіреті» атты ашық сабақта қазақ музыка өнерінің тарихы мен ерекшеліктері басты тақырып болды. Белгілі сазгер, педагог Үкітай Ерниязов домбыра тартудың түрлі техникалары бойынша тәжірибелік сабақтар өткізді. Топтық тапсырмада балалар «Тел қоңыр», «Аққу», «Ақсақ құлан» секілді танымал күйлерді талдады. Жас музыканттар атақты «Балбырауын» күйін орындап, оқу жылын ерекше шабытпен қорытындылады.
Ал елордадағы физика-математика бағытындағы Зияткерлік мектепте өткен домбыра сабағын Гиннестің рекордтар кітабына енгізу жоспарланып отыр. Қазақ халқының басты музыкалық аспабында бір мезгілде мың оқушы ойнады. Ең ауқымды домбыра сабағына қосымша білім беру педагогы, Қазақстан Республикасының еңбек сіңірген мәдениет қайраткері Айтжан Тоқтаған дирижерлік етті. Мыңдаған оқушының орындауында «Сарыарқа», «Балбырауын», «Еркем-ай», «Кеңес», «Жастар биі» сынды атақты күйлер күмбірлеп, туындылардың шығу тарихы баяндалды.
<blockquote>
 «Елордадағы физика-математика бағытындағы Зияткерлік мектеп оқушылары бүкіл әлемге біздің еліміз бен мәдениетімізді, халықтың жаны деп атауға болатын басты музыкалық аспапты таныстырды. Нағыз қазақ – домбыра екенін бәріміз жақсы білеміз, сондықтан бүгінгі күнді тарихи деп атауға болады», – деп мойындады «Назарбаев Зияткерлік мектептері» ДББҰ Басқарма төрайымы Күләш Шәмшидинова.
</blockquote>
Guinness World Records-қа (GWR) өтінім 2021 жылдың желтоқсан айында берілді. Гиннесс рекордтар кітабының талаптары бойынша ауқымды сабақты 25-тен астам стюард пен 2 куәгер қадағалады. Әрбір 50 қатысушыны бір тәуелсіз стюард бақылап, бейнежазба аймағынан шыққан немесе қажетті әрекетті орындамаған топтағы кез-келген қатысушыны дисквалификациялау жұмысына жауапты болды. Куәгерлер GWR-дің сенімді өкілі ретінде қызмет атқарып, рекордтың орнауы мен Кітаптың барлық критерийлерінің толық сақталуын қамтамасыз етті.
Қазақ халқының басты ұлттық аспабы – домбыра Назарбаев Зияткерлік мектептерінің символына айналды. Бүгінгі таңда еліміздегі барлық NIS-те домбыра пәнінің элективті курстары енгізіліп, оның аясында Құрманғазы Сағырбайұлы, Тәттімбет Қазанғапұлы, Нұрғиса Тілендиевтің атақты күйлерінің тарихы міндетті түрде оқытылады, ал ең танымал жобалардың қатарында «100 күйдің тарихы» жобасы бар, барлық мектепте домбыра ансамбльдері мен студиялары жұмыс істейді, домбыра сабақтары математика, физика, шет тілі сабақтарымен ұштастырылуда, жас музыканттар «Ұлы дала мұрагерлері» дәстүрлі флешмобында жыл сайын ел сахналарын бағындырып жүр. Домбыра мен ұлттық музыкаға деген қызығушылықты арттыру бойынша жүйелі жұмыс NIS-тің халықтық құндылықтар мен дәстүрлерді сақтау бойынша ауқымды бағдарламасы аясында іске асырылып келеді.
<img src="https://kyzylorda-news.kz/wp-content/uploads/2022/05/d3c65305-ab64-4f89-9a93-142c9df3c5d8.jpg" alt="" />
<img src="https://kyzylorda-news.kz/wp-content/uploads/2022/05/08b26c87-d5bf-4249-a81b-9c5e26671770.jpg" alt="" />

Қазақстан және Қызылорда облысының жаңалықтары: Білім