<a href="https://kyzylorda-news.kz/">Kyzylorda-news.kz.</a>&nbsp;Енді біршама уақыттан соң барлық білім ошағы соңғы қоңырау соғып, түлектерін қанат қақтырады. Тарыдай болған қалпынан таудай өрен етіп қалыптастырған алтын ұясынан түлеп ұшу әрбір шәкірттің жүрегіне қимастық сезім ұялатары анық.«Тойдың боларынан боладысы қызық» демекші, баласының мектеп бітіруі ата-ана үшін де уайым. Оқу жылын ойдағыдай аяқтағанымен алдағы сынақ сәттері, салтанатты шараларды өткізудің өз жауапкершілігі бар. &nbsp;Алайда биыл мектеп бітіру кешін өткізуге тыйым салынды. Енді соңғы қоңырау шарасы талапқа сай өткізіліп, бітіру кеші бұрынғыдай кең көлемде атап өтілмейді. Бұл туралы биылғы оқу жылының мектеп бітіру кештерін ұйымшылдықпен өткізу, бітірушілердің өмірі мен денсаулығын қорғау, құқық бұзушылықты болдырмау және сыбайлас жемқорлық тәуекелдерін жою мақсатында облыстық білім басқармасының 2023 жылғы 3 сәуірдегі №56 бұйрығы шыққан. Онда оқу жылын аяқтау шараларын ұйымдастыруға және мектепке жөндеу жұмыстарын жүргізуге оқушылар мен ата-аналардан, педагогтардан ақша жинауға қатаң түрде тыйым салынған.Бүгінде бұл бағытта мектеп директорлары мен мұғалімдерге, ата-аналарға түсіндірме жұмыстары жүргізілуде. Қалалық білім бөлімінің басшысы Ерлан Теңізбайұлы мектеп ұжымдарымен кездесу өткізіп, мәселенің мән-жайын түсіндірді.<blockquote>«Қатаң түрде ескертетін жайт, мектеп бітіру кеші міндетті түрде білім ошағында немесе ауласында өтуі, түлектердің мектеп формасымен қатысуы және барынша қарапайым түрде болуы міндеттеледі. Сондай-ақ соңғы қоңырау барысы бітірушілер мен қызметкерлердің өмірі мен денсаулығына қауіпсіз болуы жүктеледі. Бітіру кешін үйде не мейрамханада, ойын-сауық орындарында өткізуге және түлектердің автокөліктермен кортежге шығуына жол берілмеуі тиіс. Оқушылардың қауіпсіздігі мен құқық бұзушылықты болдырмау және алдын алу бағытында медицина, өрт қызметтері, ішкі істер органдарымен бірлесіп шара қабылданады. Сонымен бірге кешті ұйымдастыру үшін ана-аналардан ақша жинамау, ата-аналар тарапынан мектеп әкімшілігі мен мұғалімдерге сыйлықтар беруге қатаң тыйым салынады. Салтанатты шараларды мектептің қолда бар мүмкіндігімен ұйымдастыру керектігі ескертіледі. Сондай-ақ табиғат аясына серуендеуге, өзен-көлдерге, шағын су алаптарына суға түсуіне де тыйым салынған. Бұл ретте төтенше жағдай бөлімімен бірлесіп кезекшілік ұйымдастыру, бітірушілер, ата-аналар және педагогтар арасында ақпараттық-түсіндірме жұмыстарын қамқоршылық кеңес мүшелерімен бірлесіп белсенді түрде жүргізу керек», – деді бөлім басшысы.</blockquote>Бөлім басшысы айтқан талаптар бұйрықта нақты көрсетілген. Сондықтан соңғы қоңырау кеші талапқа сай ұйымдастырылады. Ал бітіру кешін өткізуге мүлде тыйым салынған.Әлеуметтік желіде бұл жаңалықты қолдаушылардың қарасы қалың. Расымен, мектеп бітіру кеші жастар үшін есте қаларлық қуанышты сәт болғанымен, шараның ойдағыдай өтуі, оқушылардың қауіпсіздігі мұғалімдерге де, ата-анаға да үлкен жауапкершілік жүктейді. Баласы үшін барын аямайтын ата-ана қарызданса да қатарынан қалдырмауға тырысады. Осылайша, күні бүгінге дейін мектеп бітіру ата-аналар үшін әрі қуаныш, әрі уайымға айналған.<blockquote>«Осыдан 10 жыл бұрын қызым мектеп бітірді. Ол кез¬де де мектеп бітіру кешін өткізуге, мейрамханада атап өтуге тыйым салынған-ды. Бірақ ата-анасының қадағалауымен тойлауға рұқсат ететін. Кешке киетін киіміне, ұстаздарға сыйлығына әжептәуір қаржы жұмсалды. Екі жыл бұрын ұлым мектеп бітірді. Карантиннен кейінгі кезең болғандықтан тек соңғы қоңырау салтанаты өтті. Бітіру кештерін дүркіретіп атап өтпесек те ол кезде де біршама қаржы жұмсағаным есімде. Жалпы балаң мектеп бітіреді дегеннен ақша жинап отырасың. Қанша тыйым салу болса да қаржысыз болмайды. Енді биыл бітіру кеші атап өтілмейді дейді. Сыйлық беруге тағы да басқа шараларды өткізуге тыйым салынған. Бұл нақты іске асса, құба-құп болар еді. Өз басым мұны қолдаймын. Бір жалақыға күн көріп отырған ата-ана үшін бұл үлкен көмек болар еді», – дейді Жәмила есімді ата-ана.</blockquote>Оқушы кезең қайта келмес шақ. Өмірде бір-ақ рет алтын ұя табалдырығын аттап, түлеп ұшасың. Он бір жыл бір сыныпта білім алған достарың да арман қуып жан-жаққа кетеді. Әрі қарай әркім өз тіршілік ағынымен алыстай береді. Сондықтан түлектер сыныптастармен өткізетін соңғы бітіру кешін ойдағыдай атап өткенді қалайды. Десе де талап орындалуы тиіс.<blockquote>«Биыл он бір жыл тәлім алған түлектерімді қанат қақтырғалы отырмын. Олардың әрқайсысының асқақ арманы, ойлаған мақсаты бар. Еліміздің болашағы – осы білімді балаларымыз. Олардың мектеп қабырға¬сынан аман-есен түлеп ұшқанын кез келген ұстаз, сынып жетекшісі қалайды деп ойлаймын. Биыл жылдағыдай – мектеп бітіру кешін атап өтуге тыйым салынды. Бұл өте дұрыс шешім. Әсіресе балалардың қауіпсіздігі үшін қажет. Қазіргі таңда ата-аналарға түсіндірме жұмыстары жүргізілуде. Бүгінгі ұрпақ білімді, көзі ашық. Сондықтан бұған көңілі түспейді деп ойлаймын», – дейді Ж.Махамбетов атындағы №43 орта мектебінің мұғалімі Анар Күзембаева.</blockquote>Үлкен өмірге қадам бастым деп қызықтың жетегіне еріп, оқыс жағдайға ұшырағандар бар. Иә, мектеп бітіру кеші оқушылардың бірінің өмірін қиып, бірінің тағдырын тәлкек еткен оқиғалар жетерлік. Осыдан біраз уақыт бұрын Талдықорған мен Маңғыстау қаласының бітіруші түлектері мінген көлік апатқа ұшырап, оқушылардың өміріне қауіп төнген оқиғаны жұртшылық ұмыта қойған жоқ. Жеңіл көлікпен серуенге шыққан оқушылардың өмірі әп-сәтте астаң-кестең болған-ды. Мұндай оқиғалар кім-кімге де сабақ болуы тиіс. Арман қуып, жаңа өмірге қадам басқалы тұрған сәтте әрбір өреннің сол арманы аласармаса екен дейсің. Ұстаздың да, ата-ананың да қалауы сол.

Соңғы қоңырау: Қызылорда да мектеп бітірушілер қалай тойлайды?

<a href="https://kyzylorda-news.kz/">Kyzylorda-news.kz.</a>&nbsp;Алғаш іргесі қаланып, ашылған тұста 200 балаға тәлім берген білім ұясы бүгінде жарты ғасырдан астам уақытты артқа тастаған. Ә.Молдағұлова атындағы №173 орта мектебінде қазіргі кезде 1570 оқушы білім алуда.Жарты ғасырдан астам тарихы бар білім ошағы осы уақыт ішінде талай шәкіртті қанат қақтырып, үлкен өмірге қадам бастырды. Талай шәкіртті тұлға етіп қалыптастырды. Өзіндік мол тарихы бар оқу ордасына еліміз тәуелсіздік алған жылы халқымыздың батыр қызы Әлия Молдағұлованың есімі берілген екен. Содан бері білім бәсекесінде білікті ұстаздар мен білімді шәкірттерді тоғыстырып келеді.Іргесі қаланғанына 60 жыл болған бұл мектепке әр жылдары білікті ұстаздар басшылық етті. Олар тек шәкірт тәрбиелеп, білім беруді емес білім ордасының материалдық-техникалық базасын нығайтып, оқушыларға қолайлы жағдай жасау мүмкіндігін де қарастырды. Осылайша бұл оқу ордасы 1985 жылы осы күнгі көпқабатты ғимаратқа көшірілген.Бүгінде Ә.Молдағұлова атындағы №173 орта мектеп ұжымы ғасыр көшіне ілесіп, білім саласындағы жаңа жүйеге сай қызмет етуді мақсат еткен. Мұндағы &nbsp;1500-ден аса оқушы білім нәрімен сусындайды. Олар заманауи үлгідегі технологияны пайдаланып, ғылыми ізденістер жасайды. Зерттеулер жүргізеді. Соған сәйкес физика, химия, еңбек технологиясы, мультимедиалық кабинеттер қажетті құрылғымен жабдықталған.Сапалы білім беру, саналы ұрпақ тәрбиелеуде 161 педагог аянбай еңбек етіп келеді. Олардың қатарында түрлі деңгейде әдістемелік құралдардың, оқулық авторы, авторлық бағдарламалардың иелері бар. Қалалық, облыстық дең-гейдегі үздік пән мұғалімдері де осы ұжымнан табылады. Осы орайда басшылық тарапынан көрсетілетін қолдаудың маңызды екенін атап өткен жөн. Білім саласында 30 жылдық тәжірибесі бар ұстаз Гүлмира Қоңырбаева ұжымды төрт жылдан бері басқарып келеді. Бұған дейін Абылай хан атындағы №140 мектепке басшылық жасап, баланың сапалы білім, өнегелі тәрбие алуына еңбек сіңірген оның іскерлігін көпшілік жақсы біледі. Білім мен біліктілігінің арқасында «Ы.Алтынсарин» төсбелгісімен марапатталған, «Білім беру саласындағы 100 жаңа есім» жобасына енген, бұдан өзге де лайықты марапат иегері атанған.<blockquote>«Ұжымды басқарғаныма 4 жыл болыпты. Мектеп ұжымының ауызбіршілігі мол, өзі ісін сүйетін мамандар. Алпыс жылдық тарихы бар білім ордасы ғой. Басшылыққа алғаш келгенде мектепке жөндеу жұмысы қажет екендігін ұқтым. Келе сала қолға алған ісім де сол болды. Солай 2020 жылы білім ошағына мемлекеттік бағдарлама аясында күрделі жөндеу жүргіздік. Айналасын қоршадық. Көркейту-көгалдандыру жұмыстарын қолға алдық. Дегенмен аяқсудың тапшылығы салдарынан бұл жұмыстар әлі де жандандыруды қажет етеді», – дейді мектеп басшысы.</blockquote>Бәсекеге қабілетті елдер көшіне ілесу үшін ең бастысы – сауатты, саналы ұрпақ тәрбиелеу. Оның кепілі сапалы білімде. Бұл ретте ұстаздарға қойылар талап күшейген. Соның үдесінен шығуда оларға талмай ізденіс керек. Шәкірттерінің қызығушылығын арттыру, алға жетелеу, танымын кеңейту, онымен етене жұмыс жасау қай кезде де мұғалімнің негізгі міндеті саналады. Үздік атанған әрбір оқушының жетістігінде оның маңдай тері, жылдар бойы еткен еңбегі бар. Сол еңбектің еш кетпегені ол үшін бәрінен қымбат. Осы орайда, мектеп ұжымын абырой биігінен көрсетіп жүрген шәкірттер баршылық. Олар тек қалалық, облыстық емес, республикалық, халықаралық деңгейдегі білім додаларының жеңімпаздары.<blockquote>«Білім сапасына баса көңіл бөлу – басты міндет. Мұны ұстаздар қауымына үнемі айтып отырамын. Ұжымда мектеп мақтанышына айналған білімді, білікті мамандар баршылық. Мәселен, Баян Салходжинова, Алтынбек Қадырбекұлы, Мария Тоқбаева есімді ұстаздар «Білім беру ісінің үздігі» атанған. Мұғалімдердің кәсіби біліктілігін арттыруда түрлі байқауларға қатысып, «Үздік жас маман», «Үздік математика пәні мұғалімі» аталымының иегерлері де біздің ұжымда. Бұдан бөлек оқулық, әдістемелік құралдар авторлары да бар. Оқушыларымыздың жетістігі де қуантарлықтай. Респуб-ликалық «Алтын тобылғы» зияткерлік олимпиадасында әр сынып бойынша қатысқан шәкірттеріміз оза шауып, жүлделі орындарға ие болды. Сонымен бірге оқушылар «Ақбота», «SAPSAN» сынды республикалық олимпиаданың облыстық деңгейдегі жеңімпазы атанды. &nbsp;Ғылыми жоба, түрлі байқаулар мен жыр мүшәйраларына қатысқан шәкірттеріміз үнемі өздерінің білімді, өнерлі екендігін жүлделерімен дәлелдеуде. Сондай-ақ пікірталас алаңдарында бойынша оқушыларымыз аймақта үздіктер қатарында. Спорттық жарыстарда да жетістігіміз мол. Мектебімізде болашағынан үлкен үміт күттіретін спортшы оқушыларымыз жетерлік», – дейді ұстаздар мен оқушылардың жетістігімен бөліскен Гүлмира Рәсілқызы.</blockquote>Оқушының білім деңгейін арттыруда оқытудың жаңа технологиялық әдістерін қолдану өз кезегінде нәтижесін беріп келеді. Мұны мектеп түлектерінің жеткен жетістіктерінен байқауға болады. Білікті басшы білім ордасын барынша заман талабына сай жабдықтап, мұғалімнің сабақ беруіне, оқушының білім алуына қолайлы жағдай жасауды мақсат еткен. «Алда атқарылатын жұмыс көп, соған сәйкес жоспар да бар деген» мектеп директоры Гүлмира Қоңырбаева кемшін тұстарды да жасырмады.<blockquote>«Мектеп ауласы өте кең. Соны тиімді пайдалансақ деймін. Жоғары сынып оқушылары мен бастауыштағы балаларға арналған спорттық алаң салсақ деген жоспар бар. Қаржы мәселесі қолдау тапса, жуық арада жүзеге асады деп ойлаймын. Сонымен қатар «Жасыл мектеп» жобасын іске асыру мақсатында жылыжай салуды көздеп отырмыз. Мұны іске асырудың өзіндік талаптары бар. Сол мәселелер шешім тапса, тағы бір мақсатымыз орындалады», – дейді ол.</blockquote>Былтыр білім ордасының ашылғанына 60, ал Ә.Молдағұлова есімі берілгеніне 30 жыл толған. Бұл мерейлі күнді мектеп ұжымы өз деңгейінде атап өтті. Осы мақсатта мектеп қабырғасынан қазақтың қаһарман қызы Ә.Молдағұлованың мұражайын ашқан. Сондай-ақ батыр қыздың Ақтөбе қаласындағы мемориалдық орталық мұражайымен екіжақты меморандумға отырып, мектеп мұражайын құнды мұралармен толықтыруда.Білім мен өнерді, спортты қатар алып жүрген өрендердің қоғамда өз орнын қалыптастырары анық. Бұл ретте оқу ордасында спорт және өнер бағытында 17 үйірме мен секция жұмыс істейді. Бүгінде оған қатысушы оқушылар волейбол, футбол сынды спорттық жарыстарда қалалық турнир жеңімпаздары. Сонымен бірге домбыра, жас ақындар үйірмесінің өнерпаздары да үздіктер қатарынан көрініп келеді.Бала тәрбиесінде тек білім беріп қана қоймай, оны рухани азықтандырып, танымын кеңейтуді де көздеген ұжымның білім бәсекесіндегі бәсі жоғары.

Қызылордадағы Ә.Молдағұлова атындағы мектептің 60 жылдық тарихы бар

<a href="https://kyzylorda-news.kz/">Kyzylorda-news.kz.</a> Осыдан алты жыл бұрын Әйтеке би кентінің шығыс жағында тұрғындардың өтінішімен іргетасы қаланған 300 орындық білім ордасы бүгінде оқушыларға сапалы білім мен саналы тәрбие беріп келеді.&nbsp;Талапқа сай жабдықталған ғимарат 2018 жылы ашылды. Сол тұста облыс әкімінің орынбасары Серік Қожаниязов мектеп директоры Мейрамбек Жұмашовқа білім ордасының кілтін табыстады. Осы жылы 1 қыркүйек – Білім күніне орай аудан әкімі М.Ергешбаевтың қатысуымен «Сыңғырла күміс қоңырау» атты салтанатты жиын өтіп, білім ордасының табалдырығын 316 бала аттады.&nbsp;Жаңа мектепке облыс әкімдігі тарапынан бір, аудан әкімдігі тарапынан да бір және аудандық білім бөлімінің атынан үш интерактивті тақтаны сыйға берді. Мектептің оқу-әдістемелік кеңесі жанынан жаңартылған білім мазмұны бойынша І-ІІІ деңгей оқыған мұғалімдер арасында тәжірибе алмасу мақсатында «Сенім көкжиегі» атты қауымдастық құрылып, пән мұғалімдерінен жасақталған 5 әдістемелік бірлестікке 5 интерактивті тақта қолдануға берілді. Оқу ордасында 18 пән кабинеті, 2 информатика, 1 лингофон, қыз және ер балаларға арналған 2 шеберхана, 521 шаршы метрді құрайтын спорт зал, спорт алаңы, кітапхана, АКТ залы, 100 орындықтан тұратын асхана және жаратылыстану-математика бағытына сәйкес химия, биология, физика пәндерінің зертханалық кабинеттері толықтай қажетті құралдармен жабдықталған. Қазіргі таңда 447 оқушымен толықты.<blockquote>«Білім беру жүйесінің мақсаты – бәсекеге қабілетті маман дайындау. Мектеп – үйрететін орта болса, оның жүрегі – мұғалім. Ізденімпаз мұғалімнің шығармашылығындағы ерекше тұс – оның сабақты түрлендіріп, тұлғаның жүрегіне жол таба білуі. Ұстаз атану, оны қадір тұту, қастерлеу, арындай таза ұстау – әр мұғалімнің борышы. Ол өз кәсібін, пәнін, барлық шәкіртін, мектебін шексіз сүйетін жан. Міне, мектебімізде осындай қасиетті бойына сіңірген 61 педагог, оның ішінде 5 магистр маманы жұмыс жасайды. Басым көпшілігі жас мамандар. Алғашқы оқу жылында 61 педагогтің ішінде жоғарғы және педагог-зерттеуші 4, педагог-сарапшы маман 17, модератор 24. Ұжым мүшелерінің тыңғылықты жұмыс жасауының, дұрыс бағыт-бағдардың, оқу-әдістемелік жұмысқа жұдырықтай жұмыла білудің нәтижесінде білім ордамыз аудан бойынша үшінші орыннан көрінуде», – дейді мектеп директоры Мейрамбек Жұмашов.&nbsp;</blockquote>Ұстаз жетістігі – мектеп мәртебесіОқушыларды түрлі білім додаларына баулу, жан-жақты етіп тәрбиелеу, республикалық, халықаралық деңгейдегі сайыстарға даярлауда ұстаздар аянбай тер төгіп келеді. Бес жыл ішінде білікті мұғалімдер жетістіктерге жетіп, мектеп мәртебесін асырып келеді. Халықаралық А.Жұмаділдаев атындағы математикалық олимпиададан математика пәнінің мұғалімі Құдайберген Төлепберген жүлделі үшінші орын иеленді.Республика көлеміндегі сайыстардан да сүрінбей, жеңімпаз атанғандар жетерлік. 2023 жылы гоеграфия пәнінің мұғалімі Гүлшахар Әймішоваға Қазақстан Республикасының Оқу-ағарту министрі Ғани Бисенбаев мырзаның арнайы «Алғыс хаты» табысталды. «Үздік жас математик маман» байқауынан математика пәнінің мұғалімі Құдайберген Төлепберген жүлделі І орын, қазақ тілі мен әдебиеті пәнінің мұғалімі Сая Утепова «Мәңгілік ел ұстаздары – 2020» атты республикалық байқауда 1000 педагогтің арасынан екінші бағыт бойынша 62 мұғалім іріктеліп, «Үздік педагог» медалімен, куәлікпен және Диплом марапатталды. Тарих пәнінің мұғалімі Бағдат Орымбас Қазақстан Республикасының Президенті Қ.К.Тоқаевтың «Құрмет грамотасы» және Ы.Алтынсарин атындағы төсбелгі иегері атанды. Математика пәнінің мұғалімі Айдана Алшоразова Қазақстандық салалық білім және ғылым қызметкерлерінің кәсіподағы төрағасының «Құрмет грамотасымен», «Абай әлемі» бағыты бойынша буктрейлер сайысында ағылшын пәнінің мұғалімі Әнел Әбдіраш І және бастауыш сынып мұғалімі Ақсұлу Құрман ІІІ орын алды. 2020 жылы «Ұлттық мектеп лигасы» асық ойынынан 7-8 сынып оқушылары арасында ІІ орын (жетекшісі: Құрманбайұлы Ақжол), 2021 жылы Талдықорған қаласында өткен «Ұлттық мектеп лигасы» гандболдан 9-11 сынып қыз балалар ІІ, 2022 жылы 11 республикалық мектеп оқушыларының жазғы гимназиядасында І, 2023 жылы Астана қаласында өткізілген гандболдан 9-11 сынып оқушылары арасында ер балалар ІІІ, қыз балалар ІІ иеленді. Спорт сүйер шәкірттерді шыңдаған жетекшісі Нұркен Жұбатқан.Облыстық жарыстарта ағылшын тілі пәнінің мұғалімі Әнел Әбдіраш «Үздік жас маман – 2019» байқауында бақ сынап, «Үздік ашық сабақ» бағамымен және «Тіл дарын» сайысында ІІ орын иеленді. Жаңақорған ауданында өткен білім қызметкерлерінің спартакиадасында дене тәрбиесі пәнінің мұғалімдері Нұркен Жұбатқан мен Таңшолпан Қаниева аудан намысын қорғап ІІ орын, Таңшолпан Қаниева Білім және ғылым қызметкерлері кәсіподағының облыстық комитетінің «Құрмет» грамотасын алды. «Ұлы даланың жеті қыры – ұлттық тарихи құндылықтарымыз» облыстық семинарына қазақ тілі мен әдебиеті пәнінің мұғалімі Сая Утепова мен орыс тілі пәнінің мұғалімі Алима Асқарова ашық сабақ көрсетіп, оларға арнайы сертификатқа берілді. «Үздік бастауыш сынып мұғалімі – 2020» тақырыбында облыстық байқауда бастауыш сынып мұғалімі Ақгүл Танабергенова «Алғыс хат», «Абай әлемі» атауымен буктрейлер сайысында ағылшын пәнінің мұғалімі Әнел Әбдіраш ІІ, бастауыш сынып мұғалімі Ақсұлу Құрман ІІІ орынға лайық деп танылды. Сондай-ақ жан-жақты, ізденімпаз ұстаз Әнел Әбдіраш Қазақстандағы Фулбрайт ұйымы мен АҚШ елшілігі бірлесе ұйымдастырған ағылшын тілі пән мұғалімдеріне арналған семинарында І орынды жеңіп алды. Тарих пәнінің мұғалімі Раушан Қазбаева мен бастауыш сынып мұғалімі Эльмира Көшербай облыстық кәсіподақ комитетінің Алғыс хатымен, дене тәрбиесі пәнінің мұғалімі Ақжол Құрманбайұлы «Нұр Отан» партиясы Қызылорда облыстық филиалы төрағасының бірінші орынбасарының «Алғыс хатымен», Сыр өңірінің тұрғындарының цифрлық сауаттылығын арттырудағы кәсіби маман ретінде көрсете білгені үшін Ғабит Ақшатау облыс әкімінің орынбасары Н.Байқадамовтың «Алғыс хатымен», облыстық білім басқармасының басшысы А.Қасымованың «Құрмет грамотасымен», облыстық буктрейлер сайысында қазақ тілі мен әдебиеті пәнінің мұғалімі Сая Утепова «Мәриям Хәкімжанованың 115 жылдығы» бағыты бойынша және бастауыш сынып мұғалімі Құрман Ақсұлу «Қажымұқан Мұңайтпасовтың 150 жылдығы» бағыты бойынша І орын берілді.«Үздік сандық білім беру ресурсы – 2021» байқауында тарих пәнінің мұғалімі Алдияр Жамет ІІ, бастауыш сынып мұғалімдеріне арналған «Алтын тұғыр» математикалық олимпиадасында бастауыш сынып мұғалімі Айгүл Досанова ІІІ орын алса, білім беру ұйымдарының директордың оқу-ісі жөніндегі орынбасарларына арналған «Халықаралық зерттеулер бойынша үздік мектеп үйлестіруші – 2022» сайысында оқу-ісі жөніндегі орынбасары Гүлшахар Әймішоваға да үшінші орын берілді. Жалпы білім беру мекемелерінде дене шынықтыру пәні мұғалімдерінің арасында өткізілген «Үздік жас маман – 2022» сайысында Нұркен Жұбатқан оқып бойы оза шауып, бірінші орынды жеңіп алды.Талапшыл мұғалім танымал шәкір тәрбиелейдіМұғалімдері майталман мектептің шәкірттері де білім шыңдары мен өнер белестерін бағындыруда. Республикалық «Қазақтың қара өлеңі – құдіретім» атты Мұқағали Мақатаев шығармашылығына арналған көркемсөз оқу байқауында Ғазиз Жүсіпбек бас жүлде, Елжан Бисенов, Ғазиза Жүсіпбек І дәрежелі, Самұрат Тәңірберген, Амира Нысанжан ІІ дәрежелі дипломдарымен марапатталды. Жетекшілері Анар Бакенова мен Ақгүл Танабергенова. Тараз қаласында өткен ұшқыр доп ұлттық лигасында Әсет Сәдуақас пен Арсен Еркінұлы ІІ орын иеленді. Қазақстан Республикасының Тәуелсіздігі күніне арналған «Мен – репортермін» байқауында 7 сынып оқушысы Балнұр Жаңабай ІІІ орын алды.&nbsp;«Менің кішкентай Отаным» атты республикалық зияткерлік байқауының облыстық кезеңінде 9-сынып оқушысы Бекарыс Әбдіқани ІІ орынға қол жеткізді. Жетекшісі Мейрамбек Жұмашов. «Orda junior – 2018» ғылыми жоба байқауында 3 сынып оқушысы Жансерік Өтеміс пен жетекшісі Гүлмира Сүлеймен ІІІ орын, 5 сынып оқушысы Айнұр Қылышбаева және ұстазы жетекшісі Сая Утепова «Дипломмен марапатталды. 7 сынып оқушысы Фариза Қылышбаева өзін-өзі тану пәнінен жоба қорғап, «Алғыс хат»иеленді. Фаризаның жетекшісі Шаттық Тотанов.&nbsp;1-6 сынып оқушылары арасында өткізілген «Елдік пен ерлік мекені» тқырыбында жас суретшілер байқауында 6 сынып оқушысы Айтұмар Болсын ІІІ орын алды. Өнерлі өреннің жетекшісі Аян Арзы. Пәндік олимпиадада тарих пәні бойынша 6 сынып оқушысы Ерасыл Жеткерген ІІ орын (жетекшісі: Қазбаева Раушан), «Сыр қойнауы» бағдарламасы аясында «Рухани жаңғыру» орталығы мен «Өрлеу» педагогикалық қызметкерлердің біліктілігін арттыру орталығының ұйымдастыруымен «Біздің отбасының құнды жәдігерлері» атты жас зерттеушілер сайысында 10-сынып оқушысы Ақерке Қолдасбай І орын (жетекшісі: Шатуова Бағдат), 9 сынып оқушысы Аяулым Замадинова (жетекшісі: Утепова Сая) ІІ орын иеленді.&nbsp;«Ұстазым, менің ұстазым...» шығармалар байқауында 9 сынып оқушысы Аяулым Абдіқаниева ІІ орын, «Менің ұстазым» эссе байқауынан Фариза Қылышбаева мен Аяулым Абдіқаниева «Алғыс хат», «Қарттарым – асыл қазынам» сурет байқауынан Жабай Дінмұхаммед ІІ орын, 1-4 сынып оқушыларына арналған «Менің отбасым» тақырыбындағы сурет байқауында Ақбота Маханғали І орын, Ямшит Гүлсезім мен Нысанжан Амира ІІ орын, Жеткерген Батырхан ІІІ орынға лайық болды. Бұл оқушыларға бағыт-бағдар беріп жүрген жетекшілері Сая Утепова, Эльвира Өмірзақова, Гүлзат Бақытжановалардың еңбеігі ерекше. &nbsp;<blockquote>«Сонымен қатар, мектеп оқушылары мен педагогтері түрлі қашықтық олимпиадалардың (КИО, «Ақбота» интелектуалды марафон, «Пони», «Тарих ата», «Кенгуру» т.б.) жүлдегерлері. Республикалық «Qaztest» сайтының ұйымдастырумен өткізілген байқауда «Үздік ұжым» кубогімен марапатталдық. 21 мектеп ұстазының мақалалары мен үлгілі сабақ жоспарлары «Тағылым» республикалық ғылыми-әдістемелік журналына жарияланып, арнайы І және ІІ дәрежелі Дипломдар иеленді. Аудан көлемінде, 9 желтоқсан – Халықаралық сыбайлас жемқорлықпен күрес күні «Таңдауымыз – таза қоғам» акциясы аясында өткізілген эстафеталық жарыста ІІ, «Туған жерім – тұнған шежіре» тақырыбындағы аудандық бейнеролик байқауында ІІІ орын, гүлдер мерекесінде «Үздік аула гүлдері» бағамына ие болдық. Әр уақытта бала білімін алға қоюшы ұстаз үлкен көрсеткішке қол жеткізу жолында талмай талаптанып, шаршамай еңбектенеді. Сол кезде ғана еліміз көкке шарықтап, басқа елге елді танытады. Елді өсіретін де, елді төмен түсіретін де – білім. Сондықтан қолда бар амалдарды тиімді пайдана білу біздің басты мақсатымыз», – дейді мектеп басшысы Мейрамбек Мырзағалиұлы.</blockquote>

Қазалы ауданы: Білім ордасындағы бес жылдық белес

<a href="https://kyzylorda-news.kz/">Kyzylorda-news.kz.</a>&nbsp; Жақында &nbsp;«Тағзым алаңыда» Сырдария ауданы бойынша білім бөлімінің, аудандық қорғаныс істері жөніндегі бөлімінің ұйымдастыруымен және аудандық кәсіподақ комитетінің қолдауымен АӘТД пәні мұғалімдері арасында әскери-қолданбалы спорт түрлері арасында аудандық жарыс өткізілді. &nbsp;Аудандық жарысқа аудан әкімі Берік Сәрменбаев қатысып, сөз сөйледі.<blockquote>Біз ер мұғалімдердің мәртебесін биіктетуге бар мүмкіндікті жасауымыз керек. Олардың &nbsp;шәкірттерін тәрбиелеу жолында &nbsp;аянбай етіп келеді. Асылында, білім саласындағы негізгі бағыттардың бірі ойқушыларды әскери өмірге дайындау, Отан қорғауға бейімдеу болып табылады. Осы жолда біздің ұстаздарымыз барын салуда. Бүгінгі байқаудың маңыздылығы жоғары. Себебі, болашақ Отан қорғаушыларды тәрбиелеп келе жатқан ұстаздарымыз өз мықтылықтарын танытады. Өзара үздікті анықтайды, – деді аудан әкімі.</blockquote>Негізінен, аталған жарыстың мақсаты – әскери-қолданбалы спорт түрлері арқылы мұғалімдерді салауатты өмір салтын насихаттау. Мұғалімдер арасында облыстық, республикалық жарыстарға құрама жасақтау болып табылады. &nbsp;АК-74 оқу қаруын толық емес бөлшектеп жинақтау сайысы бойынша жүлделі І орын №44 орта мектептің АӘТД пәнінің мұғалімі Н.Коспаков ІІ орынды №139 орта мектептің АӘТД пәні мұғалімі А.Базаров, ІІІ орын N126 орта мектептің АӘТД пәні мұғалімі М.Бөдеев еншіледі. АК-74 оқу қаруының оқжатарын патрондармен жарақтау сайысы бойынша жүлделі І орынды №132 орта мектептің АӘТД пәні мұғалімі С.Есжанов, ІІ орынды № 42 мектеп-лицейдің АӘТД пәні мұғалімі Ж.Кұлымбетов, ІІІ орынды №130 орта мектептің АӘТД пәні мұғалімі Г.Караев қанжығасына байлады. &nbsp;ИЖ-38 пневматикалық винтовкасынан нысанаға ату сайсы бойынша жүлделі І орынды &nbsp;№ 36 мектеп-лицейдің АӘТД пәні мұғалімі Ж.Жарасов, ІІ орынды №137 орта мектептің АӘТД пәні мұғалімі Р.Зейнуллаев, ІІІ орынды №44 орта мектептің АӘТД пәні мұғалімі Ж.Қасымов жеңіп алды. &nbsp;ЖҚЖ-ны плащ түрінде және жарақтарды кию сайысы бойынша жүлделі І орынды №210 орта мектептің АӘТД пәні мұғалімі Е.Садықов, ІІ орынды №135 орта мектептің АӘТД пәні мұғалімі Ғ.Бағдатов,ІІІ орынды №131 орта мектептің АӘТД пәні мұғалімі Ж.Кеукенов иеленді.Жалпы сайыстардың қорытындысы бойынша жүлделі І орын №210 орта мектептің АӘТД пәні мұғалімі Е.Садықов, ІІ орын №135 орта мектептің АӘТД пәні мұғалімі Ғ.Бағдатов, ІІІ орынды №42 мектеп-лицейдің АӘТД пәні мұғалімі Ж.Кулымбетов иеленді. Барлық АӘТД пәні мұғалімдері аудандық білім бөлімі және аудандық кәсіподақ комитетінің дипломдарымен және бағалы сыйлықтарымен марапатталды.&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;

Сырдарияда үздік АӘТД пәнінің мұғалімі анықталды

<a href="https://kyzylorda-news.kz/">Kyzylorda-news.kz.</a>&nbsp;Ұлы Жеңіс күні қарсаңында Қызылорда қаласындағы Зияткерлік мектеп қауымдастығы аймақтағы ҰОС ардагерлерінің шаңырағында болып, мерекемен құттықтады.Бүгінде Қызылорда облысында көзі тірі небәрі 6 соғыс ардагері қалды. Соның бірі - Төлеген Жүнісов. Майдан даласында атқыштар полкінде шайқасып, оқ пен оттың арасынан аман қалған қаhaрманмен тілдесу - оқушылар үшін тарихи ұмытылмас сәт болды. Жас зияткерлер ардагерге өз алғыстарын білдіріп,сый-құрмет жасады.<blockquote>«Осындай бейбіт өміріміз бен бақытты болашағымыз үшін ардагерлерімізге алғысымызды білдіреміз. Отан қорғаушылардың ерліктері мәңгілік есте қалады. Және ұрпақтан ұрпаққа үлгі-өнеге болып жалғаса береді. Батырларымызға мықты денсаулық, ұзақ ғұмыр тілейміз», - деп тілегін жеткізді 9 «В» сыныбының оқушысы Айым Тәуекел.</blockquote>Отты жылдардың бел ортасында болып, соғысты басынан өткерген тағы бір тарихи тұлға - Әбдірахман Байтиков. Курск түбіндегі шайқаста көрсеткен ерлігі үшін Ұлы Отан соғысы Батыры атағына ие болған майдангерге оқушылар шапан жауып, мектеп директорының Алғыс хатын жеткізді.«Ардагерлерді ардақтайық» акциясы аясында мектеп қауымдастығы аймақтағы барлық ардагерлердің шаңырағына барып, сый-құрмет көрсетті. Өз кезегінде майдангерлер ризашылықтарын білдіріп, ақ батасын берді.

Қызылордадағы NIS оқушылары ардагерлерге құрмет көрсетті

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласы бойынша білім бөлімінің басшысы Ерлан Теңізбайұлы мен қалалық кәсіподақ комитетінің төрағасы Орынша Міржақыпқызы және қалалық білім бөлімінің мамандары Әли Мүсілімов атындағы №101 мектеп-лицей ұжымымен кезектен тыс педагогикалық кеңес өткізді.&nbsp;Жалпы 2022-2023 оқу жылында мектепте 94 сынып комплектісі бойынша ІІІ ауысымда 2307 оқушы білім алуда. Бүгінде мұнда 89 зерттеуші, 57 сарапшы, 51 модератор мұғалім оқушыларға білім беруде.&nbsp;Жиында мектеп директоры Айгүл Алтынбекқызы өткен жылы атқарылған жұмыстар мен мектептің даму жоспары туралы баяндама жасады.&nbsp;Мектеп-лицейдің жалпы білім беретін пәндер бойынша қалалық, облыстық олимпиададағы жетістіктері мен ғылыми жобалар байқауларындағы толағай табыстары, оқушылар мен ұстаздардың шығармашылық жетістіктері туралы республика, Халықаралық деңгейде мектеп абыройын асқақтатып жүрген шәкірттері туралы сөз етілді.Сонымен қатар педагогикалық кеңесте 2023-2024 оқу жылына арналған мұғалімдердің &nbsp;болжамды сағат жүктемесі мәселесі де талқыланды.&nbsp;Бүгінде Әли Мүсілімов атындағы №101 мектеп-лицейінде салынған 375 орындық бастауыш сыныпқа арналған құрылыс та аяқталуға жақын. Нәтижесінде оқушы тығыздығы, мектеп тарлығынан болған қиындық та шешімін тауып, жаңа, заманауи ғимаратқа кіргелі отыр. Бұл өз кезегінде сынып жетіспеушілік мәселесін шешетін болады.&nbsp;Ерлан Теңізбайұлының ұжымға барып, жұмыс барысымен, оқу ағынымен танысып, ашықтық пен жариялылықта кері байланыс орнатқаны алдағы уакытта да «бір жағадан бас, бір жеңнен қол» шығаратын ынтымақты ұжымның іргелі істері арқылы алғы шептен көрінуіне үлкен серпін бермек.Сонымен қатар жиында мұғалімдердің сағат жүктемесі мәселесі талқыланды. Бөлім басшысы мектеп ұстаздарымен кері байланыс жасап,ұсыныс-пікірлерін білдірді.Әли Мүсілімов атындағы №101 мектеп-лицей &nbsp;қосымша 375 орындық бастауыш сыныпқа арналған қосымша құрылыс жұмыстарының жүргізіліп жатқанын айта кету керек.<img src="https://knadmin.beoblood.kz/uploads/346459291_190038890620561_1148185905292847117_n_8c2b9f6f07.jpg" alt="346459291_190038890620561_1148185905292847117_n.jpg">

Қызылорда қалалық бөлімнің басшысы мектепте кезектен тыс педагогикалық кеңес өткізді

<a href="https://kyzylorda-news.kz/">Kyzylorda-news.kz.</a> Қазалы көлік-техникалық жоғары колледжі кітапханасында кітапханашы Сәуле Сүгірованың ұйымдастыруымен «Оқуға кұштар колледж» іс-шаралар жоспарына сәйкес «Тамыры терең, тарихы кенен – Қазалым» тақырыбында таным сағаты өтті.&nbsp;Бұл шараның мақсаты – студенттердің туған жерге, туған ауылға деген сүйіспеншілігін арттыру, туған ѳлкенің байлығы, алуан түрлі табиғаты туралы түсінік беру. Отанынды қорғай білуге, табиғатты аялауға, таланты ақындардың ѳлеңдері мен ата-бабаларымыздың ѳнеге етіп қалдырған даналық сѳздері арқылы студенттерді ұлтжандылыққа, атамекенін кѳздің қарашығындай сақтай білуге тәрбиелеу.<blockquote>«Сыр елінің экономикасы мен әлеуметтік дамуында Қазалы ауданының алар орны ерекше. Астарына үңілсең көптеген деректі кезіктіресіз. Ұлан байтақ қазақ даласында мұндай қастерлі орындар көп. Қазақылықтың қаймағы бұзылмаған Сыр бойында осындай жер-су атаулары жетерлік. Мәселен, өзіміз тұратын аудан туралы «Тарихы терең, тамыры кенен – Қазалы», «Қасиетті Қазалы», «Қазыналы Қазалы» деген тіркестерді жиі қолданамыз. Қазалы атауына байланысты мына бір болжам да аракідік айтылып қалады. Ол көне Жанкент шаһарына қатысты. Бұл қаланың тарихы жайлы айтылар әпсана аз емес. Солардың бірі – Бегім сұлу оқиғасы. Бегім – Жанкенттің билеушісі Санжардың әйелі. Көрікті жарын қызғанған Санжар оның бір қолы мен бұрымын қырқып тастайды. Бегім сұлудың ақтығы дәлелденіп, қолы мен бұрымы бұрынғы қалпына қайта келген екен. Қызының жазықсыз зәбір көргеніне көзі жеткен Қарабура әулие күйеу баласы Санжарға налиды. Жазықсыз жабылған жаладан әйеліне опасыздық жасаған ханның қаласына жыландар шабуыл жасайды. Қайғылы оқиға салдарынан қаза болғандар көп болған екен. Сондықтан бұл аймақ Қазалы аталып кеткен деседі», – деп кітапханашы Сәуле Сүгірова сутденттерге туған өлке тарихынан сыр шертетін бірнеше деректерді тілге тиек етті.&nbsp;</blockquote>Таным сағаты кезінде студенттер арнайы жасақталған көрмені тамашалап,жергілікті ақын-жазушылардың кітаптарымен танысты. Қойнауы құтқа оранған қасиетті топырақ туралы көнекөздерден қалған естелік сөздерді тыңдады.&nbsp;

Туған жерді дәріптеуге арналған таным сағаты

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласындағы №285 мамандандырылған мектеп-лицей-интернатында «Әке – асқар тау» тақырыбында волейболдан жарыс өтті.&nbsp;Жобаның мақсаты білім алушылардың отбасылық және әлеуметтік құндылықтары мен құзыреттерін қалыптастыруда отбасы, мектеп, әлеуметтік серіктестердің өзара ынтымақтастығын орнатуға жағдай жасау, балалар тәрбиесінде отбасы рөлін көтеру.Мектеп-лицей-интернат директоры Балзия Абдуллаева жарысқа қатысушыларға сәттілік тілеп жобаның маңызы зор екенін атап өтті.Жарысқа 4 команда қатысып, ойын қызықты, тартысты өтуіне ат салысты. «Әкелер академиясы» жобасы аясында ұйымдастырылған турнир соңында I орынды 7 «А» сыныбының «Қыран» әкелер командасы, II орынды 8 «А» сыныбының «Көк бөрі» әкелер командасы, III орынды 7 «Ә» сыныбының «Тұлпар» әкелер командасы иеленді. Алғыс хатпен 8 «Ә» сыныбының «Достық» командасы марапатталды және сайыста ерекше ойын тактикасымен көзге түскен Бауыржан Баймаханға «Үздік ойыншы» номинациясы берілді.

«Әкелер академиясы»: Мамандандырылған мектепте волейболдан жарыс өтті

<a href="https://kyzylorda-news.kz/">Kyzylorda-news.kz.</a>&nbsp;Қазіргі таңда балалардың көпшілігінің көңілі компьютерлік ойындарға бейім тұратындығына қарамастан, кітап әлеміне құштарлықты жоққа шығаруға болмайды. Әдеби кітапты оқу арқылы әсерлі сезімге, ерекше көңіл күйге, эстетикалық сұлулыққа бөлену, танымдық, энциклопедиялық білімге ие болу – баға жетпес рухани қазынаны игеру. Кітап оқу – үлкен мәдениет пен интеллектуалдық жетістіктің негізі. Кітап баланың білімін молайтады, көп үлгі-өнеге мен тәрбие береді. Сондай-ақ ой-өрістің кеңеюіне, тереңнен ойлауға үйрете отырып, сөйлеу қабілетін, есте сақтауды, қиял көкжиегін дамытады.Осы мақсатты Қызылорда қаласы бойынша білім бөлімінің ұйымдастыруымен Б.Момынбаев атындағы №278 ІТ мектеп-лицей базасында «Қазіргі уақыт талабы – өскелең ұрпақ бойында кітап оқуға деген құштарлықты қалыптастыру» тақырыбында облыстық семинар өтті.Шараға Қызылорда қаалсы бойынша білім бөлімінің басшысы Ерлан Теңізбайұлы мен облыстық оқу орталығының директоры Сырым Құрманғазыұлы қатысып, сәттілік тіледі.Семинарға қатысушы қонақтар этноауылға саяхат жасады. Онда түрлі тағамдардан дәм татты. Мұнаң соң С.Әлжіков атындағы №144 орта мектебінің «Замануи кітапхана – заман талабы» атты тақырыпта мектеп ішінен жаңадан жабдықталған кітапханамен таныстырды. Ал, М.Шоқай атындағы №187 ІТ мектеп-лицейінің оқушысы QR код арқылы «Алтын ұя» повесінің ұлттық құндылықтарын оқырманға ұсынуға болатынын көрсетті. Сонымен қатар С.Толыбеков атындағы №3 ІТ мектеп-лицейі болса, «Кітап оқып, рухани бай бол» оқуға ұсынылған 17 кітап көрмесін көпшілікке ұсынды.Семинар аясында ақын, жазушылармен «Мәртебелі минуттар» атты ашық сұхбат алаңы ұйымдастырылса, коворкинг алаңында тәжірибе алмасты.Б.Момынбаев атындағы №278 ІТ мектеп-лицейінің оқушылары Т.Жүргеновтің туғанына 125 жыл толуына орай «Құйынды жылдар құрбаны» көрініс көрсетті. Ал, Абай атындағы дарынды балаларға арналған мектеп Б.Соқпақбаевтың «Менің атым Қожа» поесінен үзінді, №268 мектеп кітапханашылары «Кино терапия» кино кейіпкерлерін сомдап көпшілік көңілінен шықты. Шараның қортынды бөлімінде семинарға қатысушы қонақтар пікір алмасып, кері байланыс жасады.

Қызылорда: ІТ мектеп-лицейде облыстық семинар өтті

<a href="https://kyzylorda-news.kz/">Kyzylorda-news.kz.</a> Жыл сайын білім беру үдерісіне өзгерістің енуі қалыпты жағдайға айналды. Саладағы жаңа жобалар заман талабы екенін айқындай түседі. Мәселен алдағы уақытта білім беру саласы цифрландыруға бағыт алмақ. Атап айтқанда, ұстаздар мен оқушылардың жеке мәліметтері енгізілген цифрлы портфолиосы әзірленеді. Ал аттестаттар мен дипломдар QR-код арқылы цифрлы форматта беріледі. Оқулықтар электронды форматта болады. Осылайша оқушылардың ауыр сөмкесі планшетке ауыстырылуы мүмкін.Соңғы жылдары бастауыш сыныптың оқушыларының арқалайтын ауыр сөмкесі денаулығына зиян екені жиі айтыла бастады. Десе де бұл мәселе өз шешімін тапқандай болатын. Нарықта плекс мұқабалы, яғни жеңіл оқулықтар пайда болды. Ереже бойынша бастауыш сыныптар үшін кітаптың салмағы 300, 5-6 сыныптарға 400, 7-9 сыныптарға 500 граммдық өлшеммен бекітілген. Алайда болашақта мектеп оқушылары оқулықтарды мүлдем қажетсінбеуі ғажап емес. Себебі кітаптардың орнын электронды оқулықтар алмастыруы бек мүмкін. Барлық пәннің оқулығын электронды түрге ауыстырудың пайдасы қандай болмақ?Жаһандану заманында баланың қолында сөмке емес планшеттің болуын бүгінде көптеген дамыған, дамушы мемлекеттер қолдап отыр. Мамандар электронды оқулықтардың қарапайым кітаптардан бірнеше &nbsp;артықшығын алға тартады. Электронды оқулықтардың, дәстүрлі қағаз кітаптардан айырмашылығы біріншіден «жанды» болып келеді. Екіншіден, ол оқушыға ешқандай салмақ түсірмейді, бір құрылғының ішінен кез-келген уақытта кез-келген пәнді ақтарып, оқуға мүмкіндігі бар. Үшіншіден, республикалық мектептерде кітап санының жетіспеушілігі байқалады. Сондықтан ата-аналар әр оқулықты кем дегенде 800-1000 теңгеден сатып алатыны анық. Егер электронды оқу үрдісіне көшкен жағдайда кітапқа шығындала қоймайсыз. Төртіншіден, баланың жастайынан технологияны жетік меңгеріп кетуіне жол ашылады. Оқушы электронды оқулықпен жеке жұмыс жасайды. Мысалы, оқушы физика, химия, биология пәнінен тәжірибелер жүргізіп және зертханалық жұмыстарын үйінде отырып компьютерде орындай алады.Қарыштап дамып келе жатқан еліміздің шәкірттері &nbsp;заманға сай білім алғаны әрине, құптарлық. Дегенмен электронды құрылғымен оқушылардың көп жұмыс жасауы, ұдайы пайдалануы олардың денсаулығына, физилогиялық дамуына кері әсерін тигізетінін ғалымдар дәлелдеп отыр. Соған қарамастан электронды кітаптар дәстүрлі кітаптардың &nbsp;орнын түгелімен &nbsp;алмастыра ала ма?Цифрлық даму, инновациялар және аэро-ғарыш өнеркәсібі министрі Бағдат Мусиннің айтуынша, мұндай әдіс бірқатар дамыған елдерде, оның ішінде Ұлыбритания, Норвегия, Оңтүстік Корея және Түркия мектептерінде жақсы нәтиже көрсеткен. Сонымен қатар бұл оқушылар үшін шығармашылық пәндер бойынша өз контентін жасауға мүмкіндік береді.Оқу-ағарту министрлігінің мәліметіне сүйенсек, электронды планшеттер оқушылардың оқуына қосымша мүмкіндіктер береді. Сондай-ақ мектеп сөмкесінің салмағын жеңілтеді. Яғни кішкентай балалар ауыр сөке көтеріп жүрмесе де болады.<blockquote>«Планшеттердің көмегімен балалар цифрлы сабақтарға, жаттығулар мен тапсырмаларға қосымша қол жеткізе алады. Интернеті нашар өңірлер үшін жүктелген цифрлы сабақтарды, тапсырмаларды, білім беру ресурстары және оқулықтарды офлайн пайдалану мүмкіндігі болады. Егер қандай да бір себептермен бала планшеттерді қолданғысы келмесе, онда ол әдеттегідей дәстүрлі оқулықтарды және стационарлық құрылғылардан білім беру ресурстарына қол жеткізе алады. Яғни планшеттер оқулықтарды алмастырмайды, бұл – оқудың қосымша ресурсы. Таңдау ата-аналар мен оқушылардың еншісінде болады», – деді оқу-ағарту вице-министрі Айбат Ілиясов.</blockquote>Айта кетейік, өткен жылдың соңында Цифрлық даму, инновациялар және аэроғарыш өнеркәсібі министрі Үкімет отырысында сервистік модель механизмі арқылы 2023 жылы бірінші сыныпқа баратын 400 мың қазақстандық баланы Қазақстанда жасалған планшеттермен қамтамасыз ету жоспарланып отырғанын мәлімдеген болатын.<blockquote>«Қазірдің өзінде баламызға кітапты зорға аштырамыз. Болашақта оқулық бірте-бірте ысырылып қалмай ма? Қазіргі балалардың өзі ұялы телефонға әуес. «Мектепте планшетпен оқиды» дейді. Бұл балаға зиян емес пе? Тым болмаса сабақ уақытында телефоннан алшақтайтын еді. Енді мектепте де гаджет пайдаланса не болмақ? Оқулықпен оқығаны, бұрынғыдай бағаны күнделікке қойдырғаны жақсы еді», – дейді ата-ана Аружан Исаева.</blockquote>Жаңа бастаманы бірі қолдаса, бірі цифрлыққа көшіруге әлі ерте дейді. Өйткені аз уақытта оқулықты планшетке ауыстыруға интернеттің әлсіздігі әсер етпей қоймайтыны тағы бар. Көпті толғандырып, талқыға түскен бұл жобаның қалай жүзеге асып, тапсырмалардың уақытылы орындалуы болашақтың еншісінде. Еліміздің дамуы білімді жастардың қолында &nbsp;екені анық. Сондықтан олардың бәсекеге қабілетті білім алуы да міндет.

Оқулықты планшет алмастыра ма?

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласы бойынша білім бөлімінің басшысы Ерлан Теңізбайұлы М.Сужиков атындағы №6 орта мектебінің ұжымымен кезектен тыс пед кеңес өткізді. Кеңесте бөлім басшысы мұғалімдердің сағат бөлінісін дұрыс бөлу, оқушыларға жайлы жағдай жасау, мектеп бітіру кешіне ақша жиналмау керегін қатаң ескертті. Сонымен қатар, оқушылардың білімді, өнерлі болуы білікті ұстаздың қолында екенін жеткізді.Жиында мектеп директоры Асылхан Әміржанұлы атқарылған жұмыстар мен мектептің даму жоспары жайында баяндама жасады.Жалпы 2022-2023 оқу жылында мектепте 914 оқушы білім алуда. Мұғалімдердің біліктілік санаты бойынша педагог-зерттеуші-38, педагог-сарапшы-30, педагог-модератор-31, 1-санат-1 мұғалім оқушыларға білім беруде.<blockquote>«Елбасы медалі» жобасының күміс медалін Тілеуберген Еркебұлан иеленді. Кеңес Одағының Батыры Т.Бигельдиновтің 100 жылдығына орай алғашқы әскери дайындық пәні мұғалімдері арасында әскери-қолданбалы спорт түрлерінен өткізілген қалалық және облыстық сайыста АК-74 оқу қаруының оқжатарын патрондармен жарақтау бойынша жүлделі І орын Жұмахметов Сейітқасым марапатталды. «Әуезовтану» олимпиадасының қалалық кезеңінен 9-сынып оқушысы ІІІ орын иеленді. Республикалық турнирден №6 орта мектеп оқушысы Сәулетбай Айлана, Каратэ-до шотокан спорт түрінен жүлделі І орын иеленді. Жалпы білім беру ұйымдарының 7-8 сынып оқушылары арасында 6 оқушы жүлделі орынға ие болды. Ал, 9-11 сынып оқушылар арасында 10 оқушы жүлделі орыннан көрінді. Математика пәнінен «Алтын сақа» олимпиадасының қалалық кезеңінде оқушылар жүлделі орындарға қол жеткізді», – мектеп директоры.</blockquote>Жиында Ерлан Теңізбайұлы мұғалімдер еңбек демалысына жаңа оқу жылындағы сағатынан хабардар болып кету керектігін де назардан тыс қалдырмады. Бөлім басшысына мектеп ұстаздарымен кері байланыс жасап, ұсыныс-пікірлерін білдірді.

Оқушының білімді болуы білікті ұстаздың қолында

<a href="https://kyzylorda-news.kz/">Kyzylorda-news.kz.</a> Қазалы қаласында көрген көзді сүйсінтер зәулім ғимарат бар. Ауласы әсем гүлмен, жасыл-желекпен көмкерілген бұл ғимарат – бүлдіршіндердің бақыт мекені. Еңселі әрі көрікті балабақша былтыр ғана пайдалануға берілді. Қазіргі таңда ел игілігін көруде.&nbsp;140 балаға арналған жаңа типтік балабақшада 1 мен 5 жас аралығындағы 8 топ бар. Балақайларға жоғары білімді алты педагог сарапшы, екінші санатты 5 тәрбиеші тәрбие беріп, білім нәрімен сусындатады. Заманауи құрал-жабдықтармен жабдықталған орында музыка залы, дене тәрбиесі, STEM бағытындағы үйірме кабинеті, эко кабинеті, ұлттық кабинеттер жұмыс жасайды.&nbsp;Ауласынан бастап әсемдік тұнып тұрған тәрбие ордасы тәрбиеленушілерді есіктен енгеннен-ақ ерекше дүниелермен қарсы алады. Әр қабат, әр бөлме сәні мен салтанаты келіскен сарай іспеттес. Балаларға барлық қажетті жағдай жасалынған. Жан-жақты, танымдық, зияткерлік, шығармашылық дағдыларын &nbsp;дамытуға арналған «Әнші балапан», «Сымбат» би, «Ұлттық спорт», «Жас зерттеушілер», «Жас математик», «Шахматшылар» үйірмелері мен «Жас шеберлер» шеберханасы балаларды өнерге баулып, шығармашылықтарын шыңдай түсуде. Үнемі ізденіс үстінде жүретін тәрбиешілер кішкентайларды үлкен сахнаға шығаруда аянбай еңбек етіп келеді. Аудан көлемінде қандай іс-шара болмасын басы-қасынан табылатын өрімталдық өрендердің өнеріне көпшілік бұрыннан тәнті. Облыс, республика тіпті халықаралық деңгейдегі сайыстарды топ жарып жүрген тәрбиеленушілер жетерлік. Жетістіктер қоржынын ай сайын емес, апта сайын толтырып отыратын өнерлі өрендердің ата-аналары да балабақша ұжымына дән риза.&nbsp;Балабақшада 2022 жылдың қараша айында Мектепке дейінгі білім беру ұйымдардын арасында ұйымдастырылған «Үздік жоба – 2022» облыстық байқауының аудандық кезеңде балабақша тәрбиешілері Құралай Жүсіпова, Айман Тұрсынбай жүлделі ІІІ орын иеленді. Қызылорда облысының білім саласы қызметкерлері кәсіподағының ұйымдастыруымен өз саласында елеулі жетістікке жетіп, кәсіби қызметінде жасаған еңбегі мен атқарған қызметі үшін балабақша тәрбиешісі Айшагүл Жолмырзаева «Жыл үздігі – 2022» номинациясын жеңіп алды. ҚР Оқу ағарту министірлігі балаларды ерте дамыту институтының ұйымдастыруымен 1-15 желтоқсан арасында өткізілген «Ән шырқайық, бәріміз» республикалық патриоттық әндерді хормен айту челленджге музыкант Роза Ахметованың жетекшілігімен ересек «Ертөстік» тобының тәрбиеленушілері балабақша педагогтары мен бірге «Менің Қазақстаным» атты патриоттық әнін орындап, жүлделі ІІ орынды қанжығаға байлады.&nbsp;Білім құмар балаларға арналған республикалық «Үркер» зияткерлік марафонның жүлдегері Ерасыл Әділбек, Назарбек Сражадин арнайы дипломмен марапатталды. ҚР оқу ағарту министірлігі «Балаларды ерте дамыту» институтының жылдық жоспарына сәйкес өткізілген «Шымырлық пен шеберлік күні» республикалық байқауының «Ханталапай» ұлттық ойындар бойынша ересек топ бүлдіршіндері Байғани Досымұлы, Назарбек Сражадин, Ақмедияр Өмірбекұлы қатысып, аудандық «Ләңгі» ұлттық ойын сайысында бірінші, облыстық кезеңінде үшінші орын иеленді. Жетекшісі хореограф Мереке Дәрібаева.ҚР оқу ағарту министірлігі «Балаларды ерте дамыту» институтының жылдық жоспарына сәйкес өткізілген республикалық «Анам, әжем және мен» байқауында тәрбиеленушіміз Жансая Ілиясова, анасы Жақсыгүл Қуандықова, әжесі Сара Сатаймен қатысып аудандық және облыстық кезеңде де жоғары дәрежелі бірінші орынға лайық деп танылды. Республикалық кезеңінде «Үздік» номинациясымен марапатталды. Жетекшісі тәрбиеші Феруза Толыбаева.Мектепке дейінгі ұйым педагогтары мен тәрбиеленушілеріне арналған «Ән шырқаймыз, бәріміз!» облыстық челленджінде ІІІ орын иеленді. Балалардың ән әлемінде еркін самғап, әсем үндерімен тыңдарманын баурап алуына бар күшін сарқитын музыка жетекшісі Роза Ахметованың еңбегі ерекше.&nbsp;«Атадан-мұра» қоғамдық қорының бүлдіршіндер, мектеп оқушылары мен жасөспірімдер арасында ұйымдастырылған «Ана туралы жыр» халықаралық байқауында «Вокал» номинациясы бойынша балабақшамыздың ересек топ бүлдіршіндері Раяна Әділ, Көзайым Аралбаева, Ақнұр Серғазы, Жансая Ілиясова, Дария Аралбек, Мақсат Бақытбек, Ақмедияр Өмірбек, Аман Кеңес, Еркесұлу Ермырза үздік өнер көрсеткені үшін «Әнші балапан» тобы жүлделі үшінші орынмен, жетекшісі Роза Ахметова «Атадан – мұра» қоғамдық қорының Алғыс хатымен марапатталды.&nbsp;Аталған байқауда «Көркем сөз» номинациясы бойынша Дария Аралбек үздік өнер көрсетіп, «Бас жүлде» иеленді. Жетекшісі Алия Сембиева «Атадан – мұра» қоғамдық орының Алғыс хатымен марапатталды.&nbsp;<blockquote>«Балабақшаға балалар қызығып келуі үшін ұжым болып күш-жігерімізді жұмсаймыз. Біздің мақсат – жас ұрпақты жан-жақтылыққа, біліммен қоса өнерге баулу. Олардың өз ойын еркін әрі ашық жеткізе алатын тәуелсіз елдің ұл-қыздары екенін ерте бастан бойына сіңіру. Әрбір тәрбиеленушіге бала деп қарамай, олардың іс-әрекетімен, ойымен санасуды тәрбиешілер жақсы меңгерген. Кез келген бүлдіршіннің ішінде бүгіп жатқан таланты, дарыны болады. Оны жарыққа шығарып, дамытуда балабақшаның қосар үлесі зор. Осы орайда әріптестерім елеулі еңбек сіңіріп келеді деп сеніммен айта аламын», – дейді «Өрімтал» бөбекжай-балабақшасының меңгерушісі Рабиға Қарымсақова.</blockquote>

Қазақстан және Қызылорда облысының жаңалықтары: Білім