<a href="https://kyzylorda-news.kz/">Kyzylorda-news.kz.</a> Облыстық білім басқармасы мен Қазақстандық математика мұғалімдерінің қауымдастығы бірлесіп бүгін қаламыздағы №187 ІТ мектеп-лицейінің базасында математика пәні мұғалімдерінің облыстық шығармашылық байқауын өткізуде.Жас математиктердің кәсіби дағдылары мен шығармашылық әлеуетін дамыту, мектеп оқушыларының білім сапасы мен математикалық дайындық деңгейін арттыруды мақсат еткен білім бәсекесіне облыс бойынша 120 мұғалім қатысуда.Байқауға қатысушылармен кездесуге және облыстағы «ІТ-Математика» жобасының жұмыстармен танысу үшін бүгін арнайы физика-математика ғылымдарының докторы, профессор, Қазақстан ҰҒА академигі Асқар Серқұлұлы Жұмаділдаев қатысып, оң бағасын берді.Жиын барысында қатысушыларға «ІТ-Математика» облыстық жобасы аясында мектеп оқушыларының шығармашылық көрмесі, мектеп мұғалімдерінің математика пәнін тереңдетіп оқыту және ІТ-технологиялар көмегімен оқыту бағыттары бойынша жасалып жатқан жұмыстары, университет ғалымдарымен бірлесіп дайындалған авторлық әзірлемелер мен оқушылардың ғылыми жобалары, математика пәнін оқытуда пайдаланып жатқан цифрлық білім беру ресурстары таныстырылды.Сонымен қатар қатысушылар мен қонақтар мектептегі Асқар Жұмаділдаев атындағы арнайы кабинет, алгебра, геометрия, ІТ-математика және т.б. тереңдетіп оқытуға арналған бейінді кабинеттерді камтитын блок жоспары мен дайындығын тамашалады.<figure class="image"><img src="https://knadmin.beoblood.kz/uploads/346078643_6095362903865963_2387189885456499046_n_7a4710adc3.jpg" alt="346078643_6095362903865963_2387189885456499046_n.jpg"></figure>&nbsp;<figure class="image"><img src="https://knadmin.beoblood.kz/uploads/346480450_615448380635817_4229747600134234767_n_17593a5c5b.jpg" alt="346480450_615448380635817_4229747600134234767_n.jpg"></figure>

Академик Асқар Жұмаділдаев аймағымызда жүзеге асырылып жатқан «ІТ-Математика» жобасымен танысты

<a href="https://kyzylorda-news.kz/">Kyzylorda-news.kz.</a> Бүгін жас математик мұғалімдердің кәсіби шеберлігін дамытуға, студенттер мен оқушылардың білім деңгейін арттыруға арналған «Асқар Жұмаділдаев атындағы жас математиктер арасындағы халықаралық байқау» өз мәресіне жетті.Облыс әкімінің тікелей қолдауымен дәстүрге айналған байқау Қызылорда облысында биылғы жылы екінші рет халықаралық деңгейде ұйымдастырылды.Жас математиктер арасындағы білім додасына еліміздің барлық аймақтары мен көршілес Ресей, Қырғызстан, Өзбекстан мемлекеттерінен 18 бен 28 жас аралығындағы жас математиктер қатысты. Байқауға 1700-ден аса үміткер өтінім беріп, ең мықты деп іріктеліп алынған 100 қатысушы байқауда бақ сынасты.Байқауға қатысушылар құрамын сапалы іріктеу мен тапсырмаларды әзірлеуге «Математика пәні мұғалімдерінің Қазақстандық қауымдастығы» республикалық қоғамдық бірлестігі атсалысты. Комиссия құрамына еліміздегі және көршілес елдердің ең мықты деген мамандары тартылды.Халықаралық байқаудың салтанатты жабылу рәсімінде Қызылорда облысы әкімінің орынбасары Сақтағанов Нұрымбет Аманұлы, академик Асқар Серқұлұлы Жұмаділдаев сөз сөйлеп, барлық қатысушыларды құттықтап, ризашылықтарын білдірді.Шара барысында дарындылар додасының жеңімпаздары марапатталып, арнайы диплом мен «Үздік математик» номинациясы берілді. І орын иеленген Алматы қаласынан қатысушы Жолдасов Қуанышқа 1 миллион теңге, жүлделі ІІ орын иегерлері Кунгожин Нұрбек (Алматы қаласы) пен Сәбит Бәйменге (Қызылорда қаласы) 500 мың теңгеден, ІІІ орын иегерлері Исатай Ақылбек (Астана қаласы) пен Кеңесов Бауыржанға (Тараз қаласы) 300 мың теңгеден қаржылай сыйлық сертификаттары табысталды. Сонымен қатар байқауда белсенділік танытқан 10 қатысушы&nbsp;Әнуарбек Тынышбек (Өскемен қаласы), Нәжмадинов Марат (Ақтөбе облысы), Басар Әділет (Тараз қаласы), Мақұлбек Аслан (Тараз қаласы), Күбенқұлова Гүлжас (Батыс Қазақстан облысы), Жаруллаев Дастан (Алматы қаласы), Кулболдин Данияр (Тараз қаласы), Жәлдешқожаев Бекасыл (Қызылорда облысы), Тыныштықбай Абылай (Алматы қаласы), Рахметуллаев Айтымбет (Маңғыстау облысы) 100 мың теңгеден ынталандыру сыйлығымен марапатталды.Халықаралық байқауға қатысушылар бұл байқауды жыл сайын дәстүрге айналдыру қажеттігін айтып, шараның ұйымдастырылуы мен ерекше форматына ризашылықтарын білдірді.

Асқар Жұмаділдаев атындағы жас математиктер арасындағы халықаралық байқау қорытыланды

<a href="https://kyzylorda-news.kz/">Kyzylorda-news.kz.</a> Мемлекет қайраткері, математик, Қазақстан Ұлттық ғылым академиясының академигі, профессор Асқар Жұмаділдаев Нағи Ілиясов ауылына арнайы ат басын бұрып, тыныс-тіршілігімен танысты.&nbsp;Академик ауылдағы өткен жылы салынған «Еңбекшілер» аллеясын және әлеуметтік нысандарды аралады. Сондай-ақ «Мағжан и К» ЖШС-нің жұмысымен де танысты. Ауыл кітапханасына да барып, математика туралы кітаптардың сапасына мән берді. Бұған қоса, ауыл ақсақалдарымен жолығып, олармен тілдесті.&nbsp;Бұған дейін академик Қорқыт ата атындағы Қызылорда университетінің Студенттер сарайында жас математиктерге арналған ғылыми тереңдетілген лекциясын өтті. Асқар Жұмаділдаев лекцияда күрделі есептердің шешілу жолын және оның тәсілдерімен бөлісті.Сондай-ақ, Асқар Жұмаділдаев ғылымды дамыту, жастардың ғылыммен айналысуына қолдау көрсету мәселелеріне тоқталды. Ұлттық ғылым академиясының әлеуеті, ғалымдардың академияға жұмысқа орналасуы, тәжірибе алмасуы туралы сөз қозғады.Айта кетейік, бүгін Асқар Жұмаділдаев атындағы жас математиктер арасындағы байқаудың жеңімпаздары анықталатын болады.<img src="https://knadmin.beoblood.kz/uploads/347555375_266837779115768_6266903767301005888_n_eaf9238e57.jpg" alt="347555375_266837779115768_6266903767301005888_n.jpg"><img src="https://knadmin.beoblood.kz/uploads/347260315_1398378744035338_7669557083159981145_n_26b7ffadc3.jpg" alt="347260315_1398378744035338_7669557083159981145_n.jpg">

Академик Асқар Жұмаділдаев Нағи Ілиясов ауылының тыныс-тіршілігімен танысты 

<a href="https://kyzylorda-news.kz/">Kyzylorda-news.kz.</a>&nbsp; Мектепке дейінгі білім беру саласындағы ауқымды жұмыстарды ақпараттандыру тұрақты түрде жүзеге асып келеді. Оның ішінде, аудан көлемінде бүлдіршіндерге білім мен тәрбие беріп келе жатқан балабақша қызметі назардан тыс қалмайды. Бес мыңға жуық халқы бар Шаған ауылында «Нұр Ай Сая» жеке балабақшасы жұмыс істейді.«Нұр Ай Сая» жеке балабақшасы осыдан 7 жыл бұрын пайдалануға беріген. Бүгінде бала¬бақшада 2 топта 50 бала тәрбиеленіп жатыр. Алғашқы жылдары өз қаражаты есебінен жұмысын жандандырған Ұлбала Тұрғанбекқызы отбасылық кәсіпті игере білді. Нәтижелі жұмысты ұйымдастырған білікті басшы ұжымға тәжірибелі педагогтарды тарта білді. Қазіргі уақытта 18 қызметкер білім сапасын арттыруға, халық баласын тәрбиелеуге барын салуда. Мемлекеттік қолдау аясында балабақшаның материалдық базасы кеңейген. Сонымен бірге тәрбиешілердің кәсіби біліктілігін арттыру мақ-сатында инновациялық білім беру бойынша арнайы курстарға жіберіліп тұрады.<blockquote>«Шаған ауылында бірнеше мемлекеттік және жеке балабақша жұмыс жасайды. «Нұр Ай Сая» жеке балабақшасын ашудағы негізгі мақсат – отбасылық бизнесті жандандыру, ауыл балаларына жан-жақты тәрбие беру болатын. Әрине, сұраныс бар жерде сапаға көңіл бөлінеді. Балабақша қызметін үйлестіру бір ғана адамның қолынан келмейтіні рас. Қашанда педа-гогикалық құрам мен әрбір техникалық қызметкердің алдында зор жауапкершілік тұратыны сөзсіз. Сондықтан тұтастай ұжымның өлшеусіз еңбегі бағалану аса маңызды рөл ойнайды. 50 баланың күнделікті күтімі, оларды оқыту әдіс-тәсілі, уақытылы тамақтандыру, сауықтыру шараларын жүргізу, санитарлық тазалықтың сақталуы басты назарда болатыны сөзсіз», – дейді балабақша меңгерушісі Айзат Рахатқызы.</blockquote>Нарықтық заманда бәсекеге қабілетті болу айрықша ойнайды. Аудан бойынша балабақшалардың әлеуеті сараланып отырады. Баламен жұмыс жасау барысында шығармашылыққа назар аудару керек. Жетістікке жеткен әрбір бала үшін ұлағатты ұстаз бен ата-ана марқаяды. Соңғы 7 жылда балабақшаның табысты болуы – озық тәжірибенің арқасы деп білеміз. Төрт жыл қатарынан аудан көлемінде семинар «Нұр Ай Сая» жеке бала-бақшасында ұйымдастырылды. Әр семинарда бала қабілетін шыңдауға көңіл бөлінді. Балабақша директоры Жанат Рахатқызы «Кәсіпкерлік саласын дамытуға қосқан елеулі үлесі үшін» атағы бойынша облыс әкімінің марапатына ие болды. Сонымен бірге Айзат Рахатқызы «Үздік балабақша меңгерушісі – 2019» номинациясын иеленді. Екі жыл қатарынан Жамила Алиева мен Бағила Алтаева «Үздік балабақша қызметкері» атанды.<blockquote>«Білім және өнер бәсекелерінде бүлдіршіндеріміз зор табысқа қол жеткізіп келеді. Әрбір баланың ерекше дамуына ұстаздар барын салады. Айта кетейік, біз көпбалалы, тұрмыстық жағдайы төмен отбасыларға көмек ретінде балабақша төлемақысын төлеуді өз мойнымызға алғанбыз. Сан түрлі мерекеде 50 балаға арналып бағалы сыйлық беріледі. Алдағы уақытта тың жоспарға иек артып, жаңа жобаларды жүзеге асырамыз. «Балалар жылы» аясында жүйелі жұмыстарды жүргіземіз. Айтулы жыл шеңберінде өткізілетін іс-шараларға, түрлі жоғары деңгейдегі байқауларға қатысуға ниеттіміз», – дейді балабақша директоры Айзат Рахатқызы.</blockquote>&nbsp;&nbsp;

Шағандағы жеке балабақшада  50 бала тәрбиеленіп жатыр 

<a href="https://kyzylorda-news.kz/">Kyzylorda-news.kz.</a> Бүгін Сыр елінде Асқар Жұмаділдаев атындағы жас математиктер арасындағы халықаралық байқаудың ашылу салтанаты өтті.&nbsp;Аталмыш шараға облыс әкімінің орынбасары Нұрымбет Сақтағанов қатысып, жас математиктерге сәттілік тіледі.<blockquote>«Ел жастары қашан да қайсарлығымен, белсенділігі мен жарқын болашаққа ұмтылуға құштарлығы арқылы артылған сенім үдесінен шығып келеді. Өркениет жолында әлемдік дамудың биік белесіне көтерілу үшін білім мен біліктің орны қашан да ерекше. Сондықтан, мемлекеттік жастар саясатын дамыту, жастардың ғылымға деген ынтасын арттыру негізгі бағыттардың бірі. Бүгін өткізіліп отқан «Асқар Жұмаділдаев атындағы жас математиктер арасындағы халықаралық байқау» осы сөзімінің бір дәлелі»,-деді Нұрымбет Аманұлы.</blockquote>Байқаудың мақсаты – жас математика мұғалімдерінің кәсіби шеберлігі пен шығармашылықтарын дамыту, мектеп оқушыларын математикалық сұрақтарға дайындау деңгейін және білім сапасын арттыру, жастардың арасында өзара достық қарым-қатынас қалыптастыру.Кездесу барысында Қазақстан Ұлттық ғылым академиясының академигі, математик, профессор Асқар Жұмаділдаев ғылымды дамыту, жастардың ғылыммен айналысуына қолдау көрсету мәселелеріне тоқталды. Жас математиктерге бүгінгі жарыста сәттілік тіледі. Сонымен қатар, Ұлттық ғылым академиясының әлеуеті, ғалымдардың академияға жұмысқа орналасуы, тәжірибе алмасуы туралы сөз қозғады.Сондай-ақ, ғылыми журналдар шығарып, медиа арқылы оқушылар мен студенттерді ғылымға қызықтыру өзекті екенін де жеткізді.&nbsp;Дәстүрлі түрде өткізілетін байрақты бәсекенің халықаралық деңгейде өтуі, еліміздің соның ішінде Сыр өңірінің білім деңгейі мен математика ғылымының көрсеткіші жоғары екендігін айғақтайды.Айта кетейік, бүгінгі білімділер додасында 100 қатысушы бақтарын сынауда.

Нұрымбет Сақтағанов: Жастардың ғылымға деген ынтасын арттыру негізгі бағыттардың бірі

<a href="https://kyzylorda-news.kz/">Kyzylorda-news.kz.</a> Қазақстан Ұлттық Ғылым академиясының академигі Асқар Жұмаділдаев Қорқыт ата атындағы Қызылорда университетінің профессор-оқытушыларымен кездесті.Жиында университеттің Басқарма Төрағасы – Ректоры Бейбіткүл Кәрімова оқу орнының ғылыми әлеуетімен таныстырды. Білім ордасының халықаралық байланыстары кеңейгенін атап өтіп, Сеул ұлттық техникалық университетімен (Сеул) Ақпараттық технологиялар және жасанды интеллект жобасын әзірлеу бойынша жұмыстар жүзеге асырылатынын айтты.Кездесу барысында Асқар Жұмаділдаев ғылымды дамыту, жастардың ғылыммен айналысуына қолдау көрсету мәселелеріне тоқталды. Ұлттық ғылым академиясының әлеуеті, ғалымдардың академияға жұмысқа орналасуы, тәжірибе алмасуы туралы сөз қозғады. Сондай-ақ, ғылыми журналдар шығарып, медиа арқылы оқушылар мен студенттерді ғылымға қызықтыру өзекті екенін жеткізді.Өз кезегінде ғалымдар ғылыми жоба конкурстарын өткізу және ғылыми мақалаларды жариялау талаптары туралы ұсыныстары мен идеяларын ортаға салды.Университетте қазір он мыңнан астам білім алушы бар. Оның ішінде физика-математика бағыты бойынша 621 студент&nbsp; оқиды. Олардың 483-і бакалавриат студентттері, 129-ы магистрант, 9-ы докторант.Айта кету керек, Қызылорда қаласында Қазақстан Ұлттық Ғылым академиясының академигі Асқар Жұмаділдаевтың жүлдесіне арналған халықаралық жас математиктер байқауы басталды.Байқауға еліміздің барлық өңірлерімен қатар, Қырғызстан, Өзбекстан және Ресей мемлекеттерінен 1 700-ге жуық үміткерден өтінім тіркелген. Іріктелген 100 қатысушы байқауда бақ сынауда. Дәстүрлі байқау 2014 жылдан бері Қызылорда қаласының жас математиктері арасында өткізіліп келеді.&nbsp;<figure class="image"><img src="https://knadmin.beoblood.kz/uploads/347020761_171550395868618_6349013067932453702_n_6ab64e829a.jpg" alt="347020761_171550395868618_6349013067932453702_n.jpg"></figure>&nbsp;<figure class="image"><img src="https://knadmin.beoblood.kz/uploads/346095355_257971513461721_7450516038847248076_n_7ffce0ec55.jpg" alt="346095355_257971513461721_7450516038847248076_n.jpg"></figure>

Академик Асқар Жұмаділдаев қызылордалық ғалымдармен кездесті

<a href="https://kyzylorda-news.kz/">Kyzylorda-news.kz.</a> Қызылорда қаласындағы Назарбаев Зияткерлік мектебінің төрт түлегі Италия мен Мажарстанның беделді жоғары оқу орындарында тегін білім алу мүмкіндігіне ие болды. &nbsp;Аида Даниярова Будапештегі Корвин атындағы университеті мен Обуда университетінде оқуға грант жеңіп алды. Бұл екі оқу орны деректер ғылымы мен электротехник секілді заманауи мамандықтар бойынша мамандар даярлайды. Мұнан бөлек Аида тағы он шақты шетелдік &nbsp;ЖОО-на құжат тапсырып, әртүрлі жеңілдіктермен оқуға шақыртулар алып отыр. &nbsp;&nbsp;«Stipendium Hungaricum» үкіметаралық бағдарламасы арқылы 100%-дық білім грантына ие болған жас түлек – Нұржан Бишенбек, ол Мажарстандағы 5 топ университеттің құрамына кіретін Debrecen University мен Budapest University-не азаматтық құрылыс мамандығы бойынша оқуға қабылданды. &nbsp;<blockquote>«Үміткерлерді таңдау екі кезеңді қамтыды. Алдымен «Болашақ» халықаралық бағдарламалар орталығының комиссиясымен сұхбаттасу өтті. Бұл арқылы болашақ мамандық бойынша білімім мен тілдік дағдыларым бағаланады. Келесі кезеңде грант тағайындайтын ұйымның іріктеу конкурсына қатыстым. Үш тілді жетік меңгеруім, әртүрлі деңгейдегі жобалардағы белсенді болуым және оқудағы орташа баллдың жоғары болуының арқасында оқуға қабылдандым», &nbsp;– дейді жас түлек.&nbsp;</blockquote>Нұржанның досы Нұрмұхаммед Оразбек те Дебреценнің ең ірі оқу орнынан шақырту алып, отбасын қуанышқа кенелтті. Оқу ақысын, ай сайынғы қаржылай көмек пен жатақханада орналасу мүмкінідігіне ие болған дарынды жас &nbsp;электротехник саласының қыр-сырын меңгеруді жоспарлайды. &nbsp;Сонымен қатар Нұрмұхаммед Түркия мен Қытайдың үздік ЖОО-на құжат жіберіп, нәтижелерін күтіп отыр. &nbsp; Камила Женисова дүниежүзіндегі ең ірі қауымдастық — &nbsp;«Утрехт желісі» құрамына кіретін &nbsp;және Италиядағы жетекші орында орналасқан Болонья университетіне &nbsp;«Экономика, саясат және әлеуметтік ғылымдар» бағдарламасы бойынша оқуға қабылданды. Айта кетейік, бұған дейін де Камилла ағылшын тілі деңгейін анықтайтын халықаралық IELTS емтиханынан жоғары 8 балл жинап, мектеп мерейін үстем еткен болатын.<img src="https://knadmin.beoblood.kz/uploads/347293349_596484555785274_7555471005488374777_n_d53d04e1cd.jpg" alt="347293349_596484555785274_7555471005488374777_n.jpg"><img src="https://knadmin.beoblood.kz/uploads/347422632_551413253817726_8531585871892150161_n_a1da16dc01.jpg" alt="347422632_551413253817726_8531585871892150161_n.jpg"><img src="https://knadmin.beoblood.kz/uploads/347414880_2619921461495933_1294851306866509916_n_6a84df8bc3.jpg" alt="347414880_2619921461495933_1294851306866509916_n.jpg"><img src="https://knadmin.beoblood.kz/uploads/347102734_798379931401045_2646201907031031398_n_6479aac3e7.jpg" alt="347102734_798379931401045_2646201907031031398_n.jpg">

Қызылордада бір сыныптың төрт оқушысы әлемдегі үздік университеттерге қабылданды

<a href="https://kyzylorda-news.kz/">Kyzylorda-news.kz.</a> Мемлекет тарапынан білім беру саласын дамыту бағытында нақты қолдаулар көрсетілуде. Соның негізінде мұғалімдердің кәсіби біліктілігі артып, шығармашыл ұстаздардың саны артуда. Қаламыздағы №2 Абай атындағы дарынды балаларға арналған мектептің көркем еңбек пәні мұғалімі Айдана Өмірзақова – оқушыларға білім берумен қатар, шығармашылық жұмыстармен де айналысатын жоғары білікті маман.Ол бала күнінен сурет салуға бейім болып өседі. №235 Қ.Қаракөзов атындағы орта мектебінде білім алып ол болашақта суретші болуды армандайтын. Бала күнгі арманына қол жеткізу үшін 2008 жылы М.Мәметова атындағы Қызылорда педагогикалық колледжіне құжат тапсырады. Мұнда бейнелеу өнері және сызу мамандығы бойынша Ұлжан Қалиева, Кенже Бабасова, Индира Шәмшатова секілді білікті оқытушылардан білім алып, кейін Қорқыт ата атындағы университетте оқуын жалғастырады. Жоғары оқу орнын қызыл дипломға тәмамдаған Айдана Болатқызы еңбек жолын Абай атындағы дарынды балаларға арналған мектепте бастаған.<blockquote>«Мұғалімдік қызметке кіріскен күнім әлі көз алдымда. Жұмысымды ерекше тебіреніспен, жүрексініп бастадым. Уақыт өте келе білікті басшы Жанат Сәдуақасова басқаратын бірлігі бекем педагогикалық ұжымға сіңісіп кеттім. Қазір мектепсіз, оқушыларсыз бір күнімді де елестете алмаймын. «Ұстаз бақыты – шыңға шыққан шәкірті» демекші, халықаралық, республикалық сурет салу, сызу байқауларында топ жарған оқушыларым көп. Олар ата-аналарының ғана емес, мектебіміздің де мақтанышы», – дейді Айдана Өмірзақова бізбен әңгімелесу барысында.</blockquote>Ізденісті серік еткен білімді ұстаз бейнелеу өнері бойынша тың тәсілдерді меңгеруді жолға қойған. Ол оқушыларға үйрете жүріп өзінің де кәсіби біліктілігін жетілдіріп келеді. Өзі де түрлі шығармашылық байқауларға қатысып, бақ сынап жүр. Сол еңбегі еленіп, 2019 жылы республикалық деңгейдегі жас мамандар байқауында «Үздік жас маман» төсбелгісімен марапатталған. Сонымен қатар облыстық білім басқармасының, қалалық білім бөлімінің бірнеше рет Құрмет Грамотасы мен Алғыс хатын иеленген. Түрлі қоғамдық ұйымдар мен білім беру орталықтарынан алған марапаттары да бір төбе. Бұл марапаттар жас маман үшін жетістіктердің бастауы екені анық.<blockquote>«Әр жетістікке жеткен сайын маған білім берген ұстаздарымның еңбегін жоғары бағалаймын. Университет қабырғасында өз ісінің шебері атанған Айдана Әләйдарова мен Тұрсынбек Омаровтан білім алдым. Бізге сурет өнерінің қыр-сырын, әр бояудың өзіндік орны, қолданылатын реті бар екенін үйретті. Қазір білімімізді оқушыларға үйретіп, бағыт-бағдар беріп келеміз. Мектебімізде шығармашылыққа бейім, өнерге икемді оқушыларға барлық жағдай жасалған. Басшымыз Жанат Мылтықбайқызы педагогтердің кәсіби шеберлігін арттыруға ерекше мән береді және оқушыларды ынталандыру шараларын ұйымдастыруға көңіл бөліп, қолдау көрсетіп келеді», – дейді жас маман.</blockquote>Халық даналығында «Ұстазы жақсының – ұстамы жақсы» деп бекер айтылмаған. Айдана Өмірзақованың шәкірттері де ұстазы секілді белсенді. Олар әр оқу жылында жақсы жетістіктерге қол жеткізіп келеді. Облыстық білім басқармасының қолдауымен өткізілген «Суретшілер салтанаты», «Қызықты сызу әлемі», «Менің қалам – Қызылорда», «Рухани жаңғыру – ұлтты ұлықтаудың ұлы жолы», «Түстер әлемі» атты облыстық, қалалық байқауларда топ жарған өнерлі оқушылардың қарасы қалың. Ең маңыздысы, ұстаз әр оқушыға ерекше көңіл бөліп, бос уақытының бәрін шәкірттерінің талабын шыңдауға арнап келеді.<blockquote>«Ел ертеңі – озат оқушылар. Біз бүгінде жас ұрпаққа сапалы білім, саналы тәрбие беру арқылы болашақтың негізін мықтап қалап жатырмыз. Сондықтан өз мамандығымды мақтаныш етемін. Мерей Оңдалы, Аминат Жомарт, Мадилана Егенбергенова, Ақбота Сәрсеналиева секілді болашағынан көп үміт күттіретін оқушыларым көп. Оқушыларымның ата-аналарына алғысымды айтқым келеді. Сіздердің қолдауларыңыз білімнің биік шыңын бағындыруымызға жол ашып, жаңа серпіліс сыйлайды деп сенемін», – дейді Айдана Өмірзақова.</blockquote>Ұзақ жылдар білім беру саласында жемісті еңбек еткен анасы Ботагөз Дабылованың жолын қуған жетістігі көп шығармашыл ұстаздың ізденісі мен белсенділігін үйінің төрінде, сынып бөлмесінде ілініп тұрған Алғыс хаттар мен сертификаттардан аңғаруға болады. А.Болатқызының «Заманауи білім беру тенденциялары, педагогикалық шеберлік» тақырыбындағы зерттеу жұмысы &nbsp;мұғалімдерінің тәжірибелік жинақ кітабында енген. Болашақта оқушыларының туындыларынан көрме ұйымдастыруды жоспарлап жүр.&nbsp;

Шығармашыл ұстаздардың саны артуда

Қазалыдағы алғашқы мектепті кім салдырды?

<a href="https://kyzylorda-news.kz/">Kyzylorda-news.kz.</a>&nbsp; &nbsp;Бүгін Қызылорда қаласында Қазақстан Ұлттық Ғылым академиясының академигі Асқар Жұмаділдаевтың жүлдесіне арналған халықаралық жас математиктер байқауы басталды. Облыс әкімі Нұрлыбек Нәлібаев аймаққа арнайы келген конкурстың қазылар алқасының төрағасы Асқар Серқұлұлымен кездесіп, білім бәсекесінің жоғары деңгейде өткізілуіне тілектестік білдірді.<blockquote>«Ең алдымен, байқаудың жоғары деңгейде өткізілуіне қолдау білдіріп, атсалысып жүрген Сізге және Қазақстан Математика пәні мұғалімдері қауымдастығына шынайы ризашылығымды білдіремін. Байқауға еліміздің, сондай-ақ, көршілес мемлекеттердің жастарын қатыстыруға мүмкіндік жасау туралы ұсынысыңызға сәйкес 2019 жылы тұңғыш рет халықаралық деңгейде өткізілді. Ал, былтыр белсенді жастармен кездесу кезінде байқауды облыстық деңгейде және халықаралық сипатта өткізу туралы шешім қабылдадым. Бүгін міне, сайдың тасындай іріктелген дарынды жастар Сыр өңірінде ұйымдастырылған білімділер додасына жиналды. Бұл дода жастардың білімін шыңдауға, өзара достық қарым-қатынас орнатуға зор септігін тигізеді деп сенемін», - деді аймақ басшысы.</blockquote>Ал, академик Жұмаділдаев облыс әкіміне іс-шараны өткізуге қолдау көрсеткені үшін алғыс айтып, туған жеріне деген ыстық ықыласын білдірді.Айта кетейік, байқауға еліміздің барлық өңірлерімен қатар, Қырғызстан, Өзбекстан және Ресей мемлекеттерінен 1 700-ге жуық үміткерден өтінім тіркелген. Іріктелген 100 қатысушы байқауда бақ сынауда. Дәстүрлі байқау 2014 жылдан бері Қызылорда қаласының жас математиктері арасында өткізіліп келеді.Бүгінгі таңда облыстағы 295 білім беру ұйымының 47-сі тереңдетілген жаратылыстану–математикалық бағытта оқытады. Барлық ұйымдарда 1 627 математика пәнінің мұғалімі жұмыс жасайды. Ғылым мен білімге жаны құштар жастар мен білікті мамандарды қолдау мақсатында «Жайлы мектеп» ұлттық жобасы аясында алдағы 3 жылда облыста 15 100 орынға арналған құны 100 млрд. теңгеден асатын 21 мектептің құрылысы жүргізіледі. Биыл 10 мектептің құрылысы басталады.Мұнан бөлек, Мемлекет басшысының қолдауымен, облыс әкімдігінің ұсынысына сәйкес Қызылорда қаласында 300 орындық жатақханасы бар, 400 орындық дарынды балаларға арналған физика-математика мектеп-интернатының құрылысы «Білімді қолдау қоры» қаражаты есебінен қаржыландырылатын мектептер құрылысы тізіміне енгізілді. Құрылыс құны 7,9 млрд. теңге. Осы тізімге облыс бойынша тағы 1 775 орынға арналған 4 мектеп құрылысын аяқтау енгізілді. Олар - №101 Ә.Мүслімов, №2 Абай, Жезқазған трассасы бойында 600 орындық және Шиелі ауданы Байсын ауылындағы 250 орындық білім ордалары. Құрылыс жұмыстары 2023-2024 жылдары аяқталмақ.&nbsp;<figure class="image"><img src="https://knadmin.beoblood.kz/uploads/346775142_630926252269513_977419542054481516_n_eb9bf17d92.jpg" alt="346775142_630926252269513_977419542054481516_n.jpg"></figure>

  Қызылордада халықаралық жас математиктер байқауы басталды

<a href="https://kyzylorda-news.kz/">Kyzylorda-news.kz.</a> Қызылорда қаласы бойынша білім бөлімінің басшысы Ерлан Теңізбайұлы мен қалалық кәсіподақ комитетінің төрағасы Орынша Міржақыпқызы І.Қабылов атындағы №12 ІТ мектеп-лицей ұжымымен кезектен тыс педагогикалық кеңес өткізді.Кеңесте бөлім басшысы мұғалімдердің сағат бөлінісін дұрыс бөлу, оқушыларға жайлы жағдай жасау, мектеп бітіру кешіне ақша жиналмау керегін қатаң ескертті. Сонымен қатар, оқушылардың білімді, өнерлі болуы білікті ұстаздың қолында екенін жеткізді. Жиында мектеп директоры Жадыра Садыққызы атқарылған жұмыстар мен мектептің даму жоспары жайында баяндама жасады.<blockquote>«Жалпы, 2022-2023 оқу жылында мектепте 1156 оқушы білім алуда. &nbsp;Барлық мұғалімдер саны139. Оның ішінде педагог-зерттеушілер саны-40, педагог-сарапшылар саны-47, педагог-модераторлар саны-20, педагогтер саны-27, І санатты-1 мұғалім, ІІ санатты-4 мұғалім оқушыларға білім беруде. Конкурстар, олимпиада, ғылыми жобалар нәтижесінде қалалық кезең бойынша 22-І орын, 19-ІІ орын, 29-ІІІ орын иеленсе, &nbsp;облыстық кезең бойынша 6-Іорын, 5-ІІ орын, 6-ІІІ орын; Республикалық кезеңде 2-І орын, 2-ІІорын, 3-ІІІ орын иеленген. Республикалық Елбасы медальінің сайысына қатысқан 11 сынып оқушыларымыз Тыныштықбай Аяулым, Ақарыстан Нұрай, Дүйсенова Айымжан қола медалына ие болды. «АЙБЫН-2023» әскери-патриоттық жастар жиынының «АК-74 БӨЛШЕКТЕУ ЖӘНЕ ЖИНАҚТАУ» әскери-спорттық сайысының облыстық кезеңінде 10 сынып оқушысы Сугурбаева Аяжан І орынды иеленіп, республикаға жолдама алды. Байқоңыр қаласындағы «Восход» МАИ-де «Гагарин оқулары» XLIX халықаралық жастар ғылыми конференциясында 6 сынып оқушысы Мухомедали Нурислам Информатика пәні бойынша І орын алды. Алматы қаласындағы ғарыштық технологиялар мен техникалар бойынша мектептер, колледждер және жоғары оқу орындары студенттері арасындағы 2-ші халықаралық Қазақстандық SMART SPACE конкурсында 8 сынып оқушысы Қуаныш Айвар зымыран модельдері үйірмесі бойынша ІІ орынды иеленді, – деді мектеп директоры.</blockquote>Жиында Ерлан Теңізбайұлы ІТ мектеп мүмкіндік мекені деді. Сол үшін оқушылармен ІТ бағытта жұмыс жасап, шығармашылығын шыңдау қажеттігі туралы айтты. Бүгінде Қызылорда қаласында 6 білім ордасына ІТ-мектеп-лицей статусы берілген. Мұндай өзгеріс өңірдегі білім жүйесіне жаңашылдық әкеліп, шәкірттердің түрлі бағытта білім жетілдіруіне мүмкіндік беруде. &nbsp; Кеңесте бөлім басшысы мектеп ұстаздарымен кері байланыс жасап,ұсыныс-пікірлерін білдірді.<img src="https://knadmin.beoblood.kz/uploads/346888556_9444976298877693_8640398223084400749_n_81b16cc963.jpg" alt="346888556_9444976298877693_8640398223084400749_n.jpg">

Қызылорда: ІТ мектеп мүмкіндік мекені

<a href="https://kyzylorda-news.kz/">Kyzylorda-news.kz.</a> Қызылорда қаласы бойынша білім бөлімінің басшысы Ерлан Теңізбайұлы мен қалалық кәсіподақ комитетінің төрағасы Орынша Міржақыпқызы №253 орта мектебінің ұжымымен кезектен тыс пед кеңес өткізді.&nbsp;Кеңесте бөлім басшысы оқушыға мектеп ішінде жағдай жасалу, мектеп бітіру кешіне ақша жиналмау керегін қатаң ескертті. Сонымен қатар, мұғалімдердің сағаты дұрыс бөлу қажеттігін де тілге тиек етті.&nbsp;Жиында мектеп директоры Зейнулла Мырзаханұлы атқарылған жұмыстар мен мектептің даму жоспары жайында баяндама жасады.&nbsp;<blockquote>«Жалпы 2022-2023 оқу жылында оқушы саны -1214 білім алуда. Сабақ беретін мұғалімдер саны -123. Сабақ беретін мұғалімдердің санаттары тралы мәлімет зерттеуші-36, сарапшы-40, модератор-23, жоғары санатты -2, І санатты-3, ІІ санатты 1 оқушыларға білім беруде. 2022-2023 оқу жылында мектеп оқушылары мен мұғалімдер түрлі сайыстарға, байқауларға қатыстырылды. Байқаулар нәтижесінде оқушылар мен мұғалімдер облыстық кәсіподақ комитетінің «Құрмет грамотасымен», Өрлеу біліктілік арттыру ұлттық орталығының «Құрмет грамотасымен», қалалық білім бөлімінің «Құрмет грамотасымен» марапатталды. Уақытымен ұйымдастарылған кәсіби байқаулардан мұғалімдер жүлделі орындарға ие болды. Республикалық пәндік олимпиадаларға оқушылар қатыстырылып, 6 оқушы жүлделі орынға ие болды. 2022-2023 қалалық кезеңге 29 оқушы қатысып, 6 оқушы жүлдегер атанды», – деді мектеп директоры.</blockquote>Жиында Ерлан Теңізбайұлы мұғалімдер еңбек демалысына жаңа оқу жылындағы сағатынан хабардар болып кету керектігін де назардан тыс қалдырмады. Бөлім басшысына мектеп ұстаздарымен кері байланыс жасап,ұсыныс-пікірлерін білдірді.

Қазақстан және Қызылорда облысының жаңалықтары: Білім