<a href="https://kyzylorda-news.kz/">Kyzylorda-news.kz.</a> Жазғы демалыс кезінде балалардың &nbsp;сауықтырылу демалысын, бос уақытын тиімді ұйымдастыру мақсатында &nbsp;1 маусым – Халықаралық балаларды қорғау күні қарсаңында Тәкей Есетов атындағы № 264 мектеп-лицей жанынан құрылған «Жаз самалы» күндізгі тынығу лагері өз жұмысын бастады.&nbsp;Лагерге &nbsp;4 топ, 80 оқушы қамтылды. &nbsp;Спорттық, ән - би, қолөнер үйірмелері жұмыс жасауда және «Әрбір бала бақыт үшін жаралған!» тақырыбында лагердің ашылу салтанаты өтті. Концерттік бағдарламаны мектеп-лицей директоры Бек Сұлтанбекұлы балаларға деген ыстық ықылас лебізін білдіріп ашса, мектеп-лицей жанындағы қосымша білім беру орталығының «Жас дарын» хор және «Көркем-ай» би үйірме мүшелері өз өнерлерін көрсетіп, ән мен биден шашу шашып, жазғы тынығу лагерінің демалушы балаларына көтеріңкі көңіл-күй сыйлады.Сонымен қатар лагерге қамтылушы балаларға «Қауіпсіз жаз» тақырыбында балалар жарақатының алдын алу мақсатында мәліметтер беріліп, түсіндірілді.<figure class="image"><img src="https://knadmin.beoblood.kz/uploads/350477201_212752755045364_6649914084247630855_n_444baf5e42.jpg" alt="350477201_212752755045364_6649914084247630855_n.jpg"></figure>&nbsp;<figure class="image"><img src="https://knadmin.beoblood.kz/uploads/350999103_1025859532130149_5277729055828048120_n_f183058f2b.jpg" alt="350999103_1025859532130149_5277729055828048120_n.jpg"></figure>&nbsp;<figure class="image"><img src="https://knadmin.beoblood.kz/uploads/348954638_790168936050854_1596366551934599501_n_407b265d29.jpg" alt="348954638_790168936050854_1596366551934599501_n.jpg"></figure>&nbsp;&nbsp;

Лицей жанынан құрылған күндізгі тынығу лагері өз жұмысын бастады

<a href="https://kyzylorda-news.kz/">Kyzylorda-news.kz.</a> 1 маусым – халықаралық балаларды қорғау күніне орай аудан әкімінің орынбасары Дәурен Тілеумбетов, аудандық мәслихат депутаты Талғат Әліпбаев және аудандық білім бөлімінің басшысы Әділхан Жөлекешов ерекше білім беруге қажеттілігі бар үйден оқитын оқушыларға арнайы барып, мерекемен құттықтады.&nbsp;Нақтыласақ, Ыбырай Алтынсарин атындағы №204 орта мектептің 2 сынып оқушысы Бағдәулет Темірхан, Сәкен Сейфуллин атындағы №165 мектептің 5 сынып оқушысы Дидар Әбдіғани және Жамбыл Жабаев атындағы №234 мектептің 8 сынып оқушысы Дамир Жолдыбайдың үйлеріне аялдап, аудан әкімі Мұхтар Оразбаевтың ыстық ықыласын жеткізді. Сонымен қатар арнайы сыйлықтарды табыстап, жылы лебіздерін білдірді.&nbsp;<blockquote>«Ерекше балаларды ескерусіз қалдырмаған аудан әкіміне және шаңырағымызға келіп жатқан Сіздерге шынайы алғымызды білдіремін. Немереме қай жағынан болмасын қолдау жоғары. Ендігі жерде басқа түскен сынаққа мойымай, Дамирдың азамат болып өсуі жолында қолдан келгенді аямаймыз. Жаратқан ешбір ата-ананы баламен сынамасын. Әрбір шаңырақта тек қуаныш болсын. Балам қатты қуанып қалды. Ата-ана үшін бақыт деген осы ғой», – деді Дамирдің әжесі Райкүл Оңдабаева.</blockquote>

Білім бөлімінің басшысы үйден оқитын оқушыларға арнайы барып, мерекемен құттықтады

<a href="https://kyzylorda-news.kz/">Kyzylorda-news.kz.</a> Бұл қаладағы үздік ұстаз, №10 Білім-инновация лицейінің қазақ тілі мен әдебиеті пәні мұғалімі Нағиша Есбосынның ең алғаш мектеп табалдырығын аттаған кезде ойға алған мақсаты мен бала арманынан туындаған жыр шумағы. Арман алдамайды дейді. Ұстаз болып, сол жолда адал қызмет етуді кейіпкеріміз о бастан-ақ көңілге нықтап тоқыса керек. Бүгінде 50 жыл бұрынғы арманы 35 жылдан астам тәжірибеге ұласып аймақтың мақтан тұтар мұғаліміне айналған.Ауыл қызы 8 сынып бітірісімен арман қуып қалаға келеді. Мақсаты мұғалім мамандығы бойынша оқу түсу болатын. Қазіргі М.Мәметова атындағы Қызылорда гуманитарлық колледжіне құжат тапсырып, бастауыш сынып мұғалімін даярлау бөліміне оқуға қабылданады. Оқу бітіргесін еңбек жолын Қазалы ауданындағы №249 мектепте тәлімгер, бастауыш сынып мұғалімі қызметінен бастаған. Кейіпкеріміздің мамандығына деген адалдығы оның ізденісін арттырып, өзін жаңа қырынан көрсетуге жол ашты. Осылайша білімі мен білігінің арқасында білім саласының түрлі сатысынан өтті. Кейін Алматы қаласындағы әл-Фараби атындағы Қазақ мемлекеттік университетінің қазақ тілі мен әдебиеті факультетін бітіріп, жоғары білімді маман атанды. Одан кейін Қорқыт ата атындағы Қызылорда университеті жанындағы «Қабілет» гимназиясында сабақ береді. 2012 жылдан бастап №10 білім-инновация лицейінде еңбек етуде.&nbsp;<blockquote>«Мен үшін мұғалім – мамандықтың төресі. Ақын М.Жұмабаевтың «Алты Алаштың баласы бас қосса, төр мұғалімдікі» деген нақылы текке айтылмаған. Мен балалардың ортасында бақыттымын. Тіпті өзімді басқа сала маманы ретінде елестете алмаймын. Мектепке келгенше асығып, шәкірттеріме жаңа, тың дүниелерді үйреткенді жақсы көремін. Білім саласында абыройлы еңбек етуімнің бірден-бір себебі осы шығар деп ойлаймын», – дейді Нағиша Есбосын бізбен әңгімесінде.&nbsp;</blockquote>Білікті маманға сұраныс қашанда жоғары. Кейіпкерімізге де талай мәрте лауазымды қызмет ұсынылыпты. Алайда әу бастан, қарапайым мұғалім болуды ұстаным еткен оған мұнан артық қызметтің қажеті болмады. Өйткені, ол «шәкіртсіз ұстаз – жетім» деп түсінеді.<blockquote>«Мұғалім мамандығына адал болу керек. Алдында отырған әр оқушыны жақсы көруі тиіс. Оның жақсы көргенін бала сезеді. Ұстаз бен оқушы арасындағы жақсы қарым-қатынасы солай қалыптасады. Кейбір мұғалімдер баланы қаталдықпен, бағамен бағындырамыз деп ойлайды. Бірақ, мейірімділік басты орында болуы қажет деп ойлаймын. Мен әр сабақтың өз «тағдыры» бар деп айтамын. Себебі, сабақ барысы әр сыныптағы оқушының көңіл-күйіне байланысты жүргізіледі. Оқушының қабілеті, жаңа сабақты қабылдау деңгейі ескерілуі керек. Бүгінгі жас мамандар да осындай болса деймін. Жаһандану заманында көштен қалмай, жаңашылдыққа бейім болса екен. Қазіргі оқушылар заманына сай бәрін игерген. Мұғалім де шет қалмай, олардан көш ілгері болғаны дұрыс. Көп ізденіс жасаған мұғалім ұстаз деңгейіне жете алады», – дейді &nbsp;кейіпкеріміз.</blockquote>Иә, мұндай қасиет әрбір мұғалімнің бойынан табылуы керек-ақ. Ұстаздық етуден жалықпаған Нағиша Есбосынның еңбегі еш кеткен емес. Ол өзін бақытты ұстазбын деп есептейді. Ал, ел алдындағы еңбегің еленсе, тіпті, керемет емес пе? Кейіпкеріміз талай марапат биігінен көрінген жан. Десе де оған «Облыстық білім беру ісіне қосқан үлесі үшін» медалін кеудесіне тағып, үздік ұстаз атануы қоғамның, оқушылардың алдындағы жауапкершілігін екі есе сезіндіре түсті.

Аймақтың мақтан тұтар мұғалімі

<a href="https://kyzylorda-news.kz/">Kyzylorda-news.kz.</a> Тәрбиеші-педагогтың тынымсыз еңбегін қандай сөзбен өрнектесек те аздық ететіндей көрінеді. Әрбір шаңырақты шаттыққа кенелткен бүлдіршіндердің қылығына төзіп, еркелігін көтеріп, тәлімді-тәрбие беру төзімділік пен парасат-пайымды қажет ететіні сөзсіз. Осыны ойға алған ұлы кемеңгер Абай Құнанбаев «Адамның адамгершілігі жақсы тәрбиеші-ұстаздан болады» деген ой орамын қалдырыпты.Қазақтың ұлы ақынынан артық ешкім тәрбиешінің болмысын шынайы суреттей алмас. Осындай ілтипатқа ие тәрбиешілер арамызда аз емес. Ал, бүгін тәжірибелі тәрбиеші-педагог Қарлығаш Бағдатқызы жайында әңгіме өрбітуді жөн көрдік.Кенттегі қос бірдей балабақшаның меңгерушісі Қ.Амангелдиеваның бала тәрбиелеудегі еңбегін тілге тиек етейік. Ол 1996 жылы Ақмая ауылында дүние дидарына келген. Отбасының тұңғышы дүниеге келгенде әкесі Бағдат пен анасы Зағира қызының болашағы жарқын болуы үшін жеке кәсібін жолға қоя бастайды. Одан соң 1 қыз, 2 ұл дүниеге келеді. Бауырларына үнемі жанашырлық танытып жүретін Қарлығаш алғаш еңбек жолын 2018 жылы «Ясмин» жеке балабақша-яслиінде меңгеруші болып бастайды. Жылға жуық уақыт ішінде тәжірибе жинақтап, тәрбиеленушілердің сан түрлі байқауларда бақ сынап, жұлдызын жағуға еңбек етеді. Жас та болса жалын жігерімен сенімнің үдесінен табыла білген Қарлығаш кенттегі «Думан» жеке балабақша-яслиіне меңгеруші қызметіне орналасады. Бұл күндері қос бірдей балабақшаның халық талабына сай жұмыс істеуін қадағалап, балабақша қызметкерлерінің жетістігін шыңдауына себепкер болуда.&nbsp;2020 жылы «Үздік жас педагог» медалін кеудесіне таққан Қарлығаштың бұдан да өзге жетістіктері жетерлік. Республикалық «Бала дарын» балалар байқауы жобасына шәкірт дайындап жетістікке жеткен ол 2020 жылы тағы да марапат төрінен көрінді. Одан бөлек аудандық байқауларда да балабақша балалары белсенділік танытып, үнемі жүлделі орындардан көрініп жүргені баршаға мәлім. Осындай белсенділігі мен жаңашылдығы, іскерлігінің арқасында аудандық білім бөлімінен бірнеше рет алғыс хат алады. Ұжымға сыйлы басшының тың идеялары балабақша қызметкерлері үшін алға қарай адымдауға үлкен мүмкіндік беруде дейді әріптестері.&nbsp;Расында, тәрбиеші – балабақша тірегі. Бала жанының бағбаны қандай болса, өскелең ұрпақ солай өнеге алып өседі. Солай болған соң, ең алдымен балабақшаға керегі – озық педагогикалық методиканы меңгерген, сауаты жоғары, тәлімді тәрбие бере алатын тәрбиеші. Осындай иіріммен тақырыпты түйіндеуді жөн көрдік.

Қарлығаш Бағдатқызы: Тәрбиеші – балабақша тірегі

<a href="https://kyzylorda-news.kz/ru">Kyzylorda-news.kz.</a> Мектеп – әр адамның құтты мекені, білім ұясы. Он бір жыл білім нәрімен сусындатар білікті ұстаздың жиылған ордасы. Сыныптастармен өткізген қызықты кезеңнің куәсі. Алғашында әліппені құшаққа қысқан оқушы кемел келешегіне қанат қаққан түлек атанады.Соңғы қоңыраудың сәті таяғанда түлектің жүрек түкпірінде толқыныс пайда болады. Мектеп қабырғасындағы көңілден өшпес көрініс көз алдына келгенде кез келген оқушы қимастық пен қобалжуды қатар сезінетіні ақиқат. Т.Есетов атындағы №264 мектеп-лицейінің 11-сынып оқушысы Ақерке Шамшатова соңғы қоңырау соғатын үздік түлек. Осы орайда, мектеп мақтанышы жан тебіреніспен арман-мақсатын тарқатып айтты.Бүгін ерекше тебіреніс пен толғанысқа толы күн. Аяулы мектебімді тәмамдайтын уақыт та келіп жетті. Мектебімде 11 жыл бойы түрлі қуанышты сәттер орын алды. Үлкен өмірге жасаған алғашқы қадамымыз да осы жерден бастау алды. Мұғалімдер мені үздік әрі белсенді оқушы ретінде «соңғы қоңырау» соғуды табыстауы мен үшін үлкен мәртебе! Біз бүгінгі маңызды күнге біраз уақыт бар күш-жігерімізді салып дайындалдық.Дайындық барысы өте қызықты әрі естелікке толы болды. Мен үшін алтын ұя мектебім – балалық шағымның балғын уақыты болып есімде қалады.Естен кетпес естелікӘрине, мектепте өткен әрбір уақыт шаттыққа толы кездер. Дәл осы кездер есімізде ең жарқын әрі ұмытылмас естеліктер болып қалатыны сөзсіз. Кеше ғана мектеп табалдырығын аттап, бірінші сыныпқа қадам басқан кішкене бүлдіршін едім, міне бүгін бітіруші түлекпін. Т.Есетов атындағы №264 мектеп-лицейі маған үлкен өмірге жолдама берді, үлкен өмірге дайындады. Білім деңгейі жоғары, көптеген мүмкіндіктерді сыйлай отыра, оқушы кезімнің ұмытылмас сәттерін осы мектепте өткізгеніме өкінбеймін. Сол себепті қимастықпен қоштасқалы тұрмын. Осы ретте, алғашқы Әліпбиді танытқан ұстазым – Айгүл Жанұзаққызына алғыс айтамын. Балаларға деген мейірімімен баулып, алғаш әріпті танытқан жан.Сонымен бірге 7-сыныптан бері бізге бар білгенін үйретіп, екінші анамыздай болып кеткен ұстазым – Гүлзира Әбдіқайыр апайыма да айтар алғысым шексіз. Әрдайым бізді тек дұрыс бағытқа бағыттап, жетістіктерге жету жолында қосқан үлесі зор. Әрбір шәкірттің өзі сүйген, жылдар бойы тәлім алған ұстазының аяулы бейнесі көкірек көрігінде, жүрек түбінде сақталуы заңдылық. Сондықтан да ұстаздарымның берген ақылын ешқашан ұмытпаймын!Мектеп – жетістіктің алғашқы баспалдағыИә, Алтын белгі үміткерімін. Мен мектепте әрбір іс-шарада белсенді болуға тырыстым. Түрлі олимпиадаға білімімді шыңдау мақсатында қатысып, жігеріммен жетістікке жетуді көздедім. Себебі, мектеп қабырғасындағы жетістігім жарқын болашағыма үлкен септігін тигізетініне сеніммен қарадым. Атап өтер болсам, 9-сыныпты «қызыл аттестатпен» тәмамдап, республикалық олимпиадаға қатысып 1-орын иелендім. Сондай-ақ, «Қазақстан ұстаздары» қоғамымен ұйымдастырылған «Ағылшын тілі» және «Қазақстан тарихы» пәні бойынша еспубликалық олимпиададан 1-дәрежелі диплом иегері атандым. Е.Б.Бекмаханов атындағы республикалық «Қазақстан тарихы» пәні олимпиадасынан 2-дәрежелі дипломды еншіледім. Республикалық пәндер олимпиадаларының қалалық кезеңінен жеткен нәтижелерімді айта аламын. Белесті бағындыруға талпынысым білім деңгейімді арттырды. Бұл марапаттар үлкен нәтижеге бастау деп білемін.Асқақ арман алға жетелейдіҚазіргі таңда Ұлттық бірыңғай тестілеуге дайындығым қарқынды. Болашаққа нық сеніммен қадам басып, алдағы білім сынағынан сүрінбес үшін тынымсыз дайындалып, үздіксіз ізденісте үзіліс жариялағым жоқ.Мамандық таңдау – жауапкершілік және маңызды іс. Түлектер мамандықты дұрыс таңдау арқылы келешегінің бір кірпішін қалайды. Менің таңдауым журналистика саласы. Бала кезімнен бері қызығушылығым осы мамандыққа бағыттады. Журналистика – қиындығы мен қызығы қатар жүретін мамандық. Оның қоғамдағы рөлі зор. Болашақта журналистиканың майталманы болып, елімізде осы саланы әлемдік деңгейге жеткізгім келеді. Арманымды алдыма үміт етіп, өз саламның шыңына табан тіреп тұратын күнге де жетемін.Жоғарғы оқу орны туралы айтар болсам, менің таңдауым – Еуразия Ұлттық университеті. Себебі, біріншіден, Қазақстандағы ең үздік топ – 10 ЖОО қатарында 2-орын. Екіншіден, QS TOP 50 UNDER 50 нұсқасы бойынша әлемнің жас жоғары оқу орындарының рейтингіне енген Орталық Азиядағы жалғыз жоғары оқу орны. Бұл университет жоғарғы білімі бар оқушыларды талап етері анық. Сондықтан мемлекеттік грантты иемденіп, даңғыл жолымды қаласам деймін.

Ақерке Шамшатова: Алтын белгі иегері атанғым келеді

<a href="https://kyzylorda-news.kz/">Kyzylorda-news.kz.</a> Қызылорда қаласындағы №6 кітапханасы «Белсенді ұзақ өмір орталығы» КММ-мен бірлесіп 4 маусым – ҚР Мемлекеттік рәміздер күніне орай «Азаттықтың бой тұмары» атты шара ұйымдастырды. Ондағы мақсат – әрбір азаматтың елге, жерге деген патриоттық сезімін нығайту, Қазақстан Республикасының Мемлекеттік рәміздері туралы түсініктерін кеңейту, елінің Туын, Елтаңбасын, Әнұранын қастерлеуге, халқының тарихын білуге тәрбиелеу.&nbsp;Танымдық шара еліміздің Әнұранын айтудан басталды. Мұнан соң сөз алған облыстық ардагерлер кеңесінің төрағасы Серік Дүйсенбаев мемлекеттік рәміздеріміздің құндылығы жайлы кеңінен әңгімеледі. Кітапхана қызметкері Г.Залиева «Ел рәміздері – тәуелсіздік айғағы» атты кітап көрмесіне библиографиялық шолу жасап, елдіктің, тәуелсіздіктің, мемлекеттіліктің ерекше белгісі болып табылатын мемлекеттік рәміздеріміздің тарихымен, авторларымен таныстырып өтті.&nbsp;Кітапхананың жас оқырмандары Көмекбай Қаракөзов атындағы №235 орта мектептің бастауыш сынып оқушылары Ә.Рүстембек, А.Ералиева, А.Нұралы, А.Мейрамбек, А.Мұратбай, Ж.Жасұланқызы, А.Байтемір қазақ ақындарының патриоттық рухта &nbsp;жазылған өлеңдерін мәнерлеп оқыды.&nbsp;Шара соңы ақын Қадыр Мырза Әлі сөзіне жазылған композитор Ескендір Хасанғалиевтің «Атамекен» әнімен қорытындыланды.

Қызылордалық оқушылар мемлекеттік рәміздерді ұлықтады

<a href="https://kyzylorda-news.kz/">Kyzylorda-news.kz.</a> Білім айдынында мектеп атты кемені 11 жыл мекен еткен түлектердің желкенін үлкен өмірге қарай бұратын сәті келді. Міне, тағы бір оқу жылы аяқталып, мектебін бітіріп, қияға қанат қағатын жас түлектер үшін ең қымбат, ең қимас, ең бір ұмытылмас жүрек тебірентер сәт, соңғы рет қоңырау үні сыңғырлады. Бұл – балалық балдәуреннің бір белесі.Биылғы соңғы қоңыраудың ерекшелігі – халықаралық Балалар күнімен тұспа-тұс келгені. Бейсенбі күні еліміздің барлық өңіріндегі білім ордасында күміс қоңыраудың сыңғыры естіліп, жұртшылық түлектерге сәттілік тіледі. Бұл күні он бірінші сыныпты бітірушілер өмір айдынына жолдама алса, былтыр мектеп табалдырығын аттаған бүлдіршіндер бір сатыға көтеріліп, ата-ана мен ұстаздың көз қуанышына айналды. Соңғы қоңыраудағы салтанат әрбір жанның көңіл түкпірінде қалатын, санаңда сақталатын сәттердің бірі. Сол бір балалық шақтың ерекше естелігі ретінде өзіне әрдайым тартып тұратыны да жасырын емес. Осындай естелікке толы ерекше күні біз де кент орталығындағы Т.Көмекбаев атындағы №250 мектеп-лицейден табылдық. Арман мен мақсат жетелеген жас түлек, үкілеген үмітінің мектеп бітіргеніне қуанған ата-ана, бір жылды артқа қалдырған бүлдіршін, қимастық сезімі басым ұстаздар бұл кештің сәні болды. Салтанатты іс-шараға аудан әкімі Жандос Еркінбек, аудандық ардагерлер және қоғамдық кеңес төрағалары Асқар Мереков пен Әбдірахман Құлдүйсеновпен арнайы келіп, оқу жылының аяқталуымен құттықтады.Аудан басшысы ұстаздар мен мектеп түлектерін балалар күнімен тұспа-тұс келген соңғы қоңырау мерекесімен құттықтап, сәттілік тіледі. Сондай-ақ, білім беру саласына үлес қосқан ұстаздардың еңбегін ерекше атап өтіп, мектеп бітіруші түлектерге үлкен үміт артатынын жеткізді.Ата-аналар атынан сөз алған Сәлима Ертайқызы ұстаздар еңбегін жоғары бағалап, алтын ұядағы білім мен тәрбие алдағы уақытта өз жемісін беретініне сендірді. Жас түлектер ұстаздарына алғыстарын айтса, ұстаздары 11 жыл бойы білім алып, бозбала мен бойжеткендер қатарына бет алған шәкірттеріне сәт сапар тіледі. Балалықтың бал шағын артқа тас¬тап, үлкен өмірдің табалдырығын аттағалы тұрған мектеп түлектері мектеп вальсін сән-салтанатпен билеп, бірінші сынып бітірген бүлдіршіндермен соңғы қоңырау соқты. Оқушылар үшін оқу жылының аяқталуына орай кезекті қоңырау қағылса, бітіруші түлектер үшін оқушы кезеңіндегі қоңырау соңғы рет соғылды. Осылайша «мектеп» атты кемел білім кемесі жалынды жолаушыларын үлкен өмірге тағы бір мәрте шығарып салды.Алтын ұямен қоштасар сәт таяп, кешегі тұлымды ұл атжалын тартып, азамат болғанын, тұлымшақты қыз бой жеткенін бүгін ғана сезінгендей, көңілдері толқып, жүректері лүпілдейді. Алғаш әріп танытқан, бойларына жақсылықты дарытқан, балалығы мен шалалығын кешірген аяулы ұстаздарын қимаса да, қияға құлаш сермейді, аңсауға толы арманға қол созады. Мектеп бітірушілер бұдан кейін қоңырау олар үшін сыңғырламайтынын, мектеп партасына қайтып отырмайтынын білсе де, соның бәрін көкірегінің бір түкпіріне түйілген сырлы сағынышқа айналдырып кете бармақ. Ұстаздар он бір жыл бойы тәрбиесін шыңдаған, білімін жетілдіріп, қанаттандырған өрендерінің өздерін ешқашан ұмытпайтынына сенімді.&nbsp;Айта кеткен жөн, биыл аудан бойынша 655 оқушы мектеп бітіруде. Оның ішінде 566 оқушы Ұлттық бірыңғай тестілеуде бақ сынайды. Олардың арасынан 46 түлек «Алтын белгіге», 68 оқушы «Үздік аттестатқа» үміткер. Арманға қол созып, ата-ана мен ұстаздың үмітін арқалаған түлектерге ақ жол!

Қармақшыда соңғы қоңырау соғылды

<a href="https://kyzylorda-news.kz/ru">Kyzylorda-news.kz.</a> Әлқиса, адамзат баласының жеткен жетістігі болсын, жиған дүниесі, тіпті еткен еңбегінің жемісі басқалармен бөліскенде ғана тәтті болатынын қазақ халқы әлімсақтан білген. Әр адам ең болмаса күніне бір рет түймедей жақсылық жасаса, әлем де нұрлана түсері хақ. Біздер басқаға қалай пайдалы бола аламыз? Қолыңда болса дәулетіңмен бөліс, жетім жесірге қарайлас, мүгедек жанның қолын ұзарт, мүмкіндік бер! Даулетің өзіңнен артылмаса ақылыңмен көмектес, сырқат жанның, жарымжанның көңілін сұра, ең болмаса біреудің бетіне шынайы жымия қарап, жан жылуын сыйла. Бір амал қыл да, адамдардың жүрегіне қуаныш ұялат! Ол әрқайсымыздың қолымыздан келеді. Бірақ өкінішке орай бұл сөзді терең түсіну баршамызға мүмкін болмай келеді.Сондықтанда «Жақсының жақсылығын айт, нұры тасысын» деген ұстанымды жүзеге асыратын «Алтын жүрек» премиясы дәстүрлі марапатқа айналып үлгерді. Ұлттық премиясы меценаттар қатарының &nbsp;көбейіп, елімізде игі істердің &nbsp;қарқын алуына түрткі болып келеді. Міне, ауданымыздың азаматшасы, қолы ашық, жүрегі жомарт, жүрегі алтын жан биыл дәл осы марапат төрінен көрінді.&nbsp; Анығырақ айтсақ 35 жыл бойы ұлағатты кәсіп ұстаздықтан қол үзбеген білім саласының біліктісі, қайырымдылық дейтін асыл қасиетті жанына серік еткен Бақытгүл Елюбаева қоғамдық-ұлттық &nbsp;"Алтын жүрек" премиясын иеленді.Республикалық қайырымдылық қоры ұйымдастырған шара Алматы қаласында өтіп, қоғамдық ұлттық номинация салтанатты түрде табыс етілді. Бақытгүл Кәрімқызы:<blockquote>«Қазақта "оң қолың бергенді сол қолың көрмесін" дейді ғой. Сол себепті қайырымдылықпен айналысып келе жатқанымды барынша жасырын ұстаймын. Шындығына келгенде басы-қасында жүрген азаматтар болмаса, менің осындай шарада бой көрсетіп жүргенімді ешкім білмейді десем де болады. Бірақ соңғы 15 жылда расымен мектептегі балаларға қайырымдылық жасап, оқу құралдарымен, өзге де қажеттіліктерімен қамтамасыз етіп жүрдім. Мұнан бөлек аз қамтылған, көмекке мұқтаж отбасыларға да азық-түлікпен де, ақшалай да қамқорлық жасап келдім. Міне, осының өтеуі болар, "Алтын жүрек" премиясы бұйырды. Бұл марапатқа облыс көлемінде 3 адам ұсынылса, ауданнан тек мен ғана алдым», – дейді.</blockquote>Иә, марапат төріндегі Бақытгүл Елюбаева қызметте де табысты болған жан. 2018 жылы "Ұстаз-білім шырағы" атты Республикалық байқауының жеңімпазы болса, "Білім жолы-нұрлы жол" топтама жинағы на үздік мақала үшін 1 дәрежелі дипломмен марапатталған. Астана қаласының Білім басқармасының Құрмет грамотасымен, Арал ауданы әкімінің Алғыс хатымен, Алматы қаласы Республикалық ғылыми-әдістемелік "Білім әлемі" журналына үздік мақала жариялағаны үшін арнайы дипломмен, Білім және ғылым қызметкерлері кәсіподағының облыстық &nbsp;комитетінің Құрмет грамотасымен, одан бөлек 35 жылдық еңбек өтілі уақытында көптеген марапаттарға ие болған ол "Активные методы обучения на уроках русского языка " атты әдістемелік &nbsp;кітаптың авторы.&nbsp;Тағы бір айта кетер нәрсе ұстаздықтан бөлек шығармашылықтан да алыс емес жан. "Тарихымды танысам деп жыр жазам" атты аймақтық жазба ақындар мүшайрасының бас жүлдесі мен "Ұлы даланың Ұлы тұлғасы "Әбу Насыр әл-Фараби бабамыздың 1150 жылдығына орай өткізілген жазба ақындар мүшайрасында І орынды жеңіп алуы соның анық дәлелі.&nbsp;Мемлекеттік қызметте ерекше еңбегі үшін "Мейірім", "Ұлағатты &nbsp;ұстаз", қоғамға айрықша еңбегі үшін Қазақстан Республикасының құрметті азаматы &nbsp;төс белгілерімен қатар Қазақстан Республикасының 100 жаңа есіміне енген кейіпкеріміздің жетістігі жайлы айтып тауыса алмаймыз.Қазақта "Қайырымдылық жасасаң, қайырын өзің көресің" деген терең мағыналы тәмсіл бар. Ендеше жүрегі алтын жанның алдағы уақытта жақсы жаңалықтарын бөлісіп отырамыз деп сенейік.

Аралдық ұстаз «Алтын жүрек» премиясын алды    

<a href="https://kyzylorda-news.kz/">Kyzylorda-news.kz.</a> 4 маусым – ҚР Мемлекеттік рәміздер күні қарсаңында Жастар орталығының ұйымдастыруымен «Мемлекеттік рәміздер — ұлт мақтанышы» атты патриоттық шарасы өтті.&nbsp;Жастардың бойында патриоттық тәрбиені сіңіріп, отансүйгіштікке баулу, ұлттық нақыштарды дәріптеп, мемлекеттік рәміздерге құрмет көрсету мақсатында ұйымдастырылған шара Мемлекеттік Тудың ортаға келу рәсімімен басталды. «Жас сарбаз» жастар мен жасөспірімдер ұйымының тәрбиеленушілері саптық шеру жасап, шара қатысушылары мемлекеттік әнұранды бірге орындады.&nbsp;Шараға арнайы қатысқан қоғамдық даму басқармасының басшысы Алмасбек Есмаханов жалынды жастарды, кеш қонақтарын айтулы мерекемен құттықтап, көрме жұмысына сәттілік тіледі.&nbsp;Жиында сөз алған кәсіпкерлік және өнеркәсіп басқармасының басшысы Ансат Исатай жас кәсіпкерлердің бастамасына қолдау білдіріп, жұмысын жандандыруға бағыт-бағдар берді. Алдағы уақытта бірлесе жұмыс жасауға шақырыр, қолдау білдіретінін жеткізді.&nbsp;Жергілікті жас кәсіпкерлер өздері қолдан жасаған ұлттық нақыштағы қолөнер бұйымдарын көрермен назарына ұсынып, оң бағасын алды. Патриоттық шараға бірқатар басқарма басшылары, қоғам белсенділері, азаматтық қоғам өкілдері мен жалынды жастар қатысып, мазмұнды шараның мәнін айшықтай түсті.&nbsp;Шараға арнайы қатысқан облыстық «Атамекен» кәсіпкерлер палатасының директоры Пірмұхаммед Айтбайұлы кәсібін енді бастаған жастарға мемлекеттік бағдарламалар мен қолдаулар жөнінде жан-жақты мағлұмат беріп, кәсіп бастауға арналған субсидия мен жеңілдетілген несие, мемлекеттік қайтарымсыз гранттарға тоқталып өтті.&nbsp;Сонымен қатар, шараға қонақ болған Әйелдер істері және отбасылық демографиялық саясат жөніндегі облыстық комиссия хатшысы, облыс әкімі аппаратының бас инспекторы Қаламқас Каримова, облыстық маслихат депутаты, «Сыр елі облыстық әйелдер кеңесі» ҮЕҰ-ның төрайымы Райкүл Байназарова, Қызылорда облысының және «Ақмешіт-Сырдария» мешітінің бас имамы Болатбек Абуов және бірқатар қоғам белсенділері жас кәсіпкерлердің жұмысына сәттілік тілеп, қазақы құндылықтарды, ұлттық нақыштарды дәріптеп жүрген жастарға жұмыстарының жандана беруін тіледі.&nbsp;Шара барысында ҚР Төтенше жағдайлар министрлігінің ардагері Ғани Байменов бейбіт заман мен жарқын болашақта, елдік пен еркіндікте өмір сүріп жатқан жастарға ақ батасын беріп, барлық бастамалардың оң болуын тіледі.

Қызылорда: Мемлекеттік рәміздер — ұлт мақтанышы

<a href="https://kyzylorda-news.kz/">Kyzylorda-news.kz.</a> Өздеріңізге белгілі, биыл «Жайлы мектеп» пилоттық ұлттық жобасы аясында Қазалы ауданында 2 мектептің құрылысы басталады. Оның бірі Жанқожа батыр ауылындағы 300 орындық апаттық жағдайдағы №94 мектеп құрылыс болса, екіншісі Әйтеке би кенті мен қала арасындағы 600 орындық мектеп.Жуырда Ұлттық жобаға енгізілген мектептер құрылысының жер учаскелерін нақтылау және орналастыру мәселесі бойынша «Samruk-Kazyna Construction» АҚ Басқарма Төрағасының ұлттық жоба және Өңірлік даму жөніндегі орынбасары, Басқарма мүшесі Саттаров Амангелді Серікұлы, Ұлттық жоба және Өңірлік даму департаменті Құрылыс бөлімінің өңірлік жоба жетекшісі Қонақбаев Ерік Болатұлы мен Ұлттық жобаны іске асыру және Өңірлік даму департаменті Жобалау бөлімінің топ жетекшісі Хами Әнуарбек Орынбасарұлы Қазалы ауданында іс-сапарда болды.Олар білім ордалары бой көтеретін жер учаскелеріне барып, құрылыс жоспарымен танысты.Ел ертеңі – бүгінгі шәкірт. Олардың жайлы жерде, сапалы білім алуы қашанда маңызды. Осыны ескерген басшылық тарап «Жайлы мектеп» пилоттық ұлттық жобасын қолға алды. Алда шәкірттер жанға жайлы білім ордасының табалдырығын аттайтын күн алыс емес.

Қазалы: «Жайлы мектептің» жай-жапсарымен таныстырды

<a href="https://kyzylorda-news.kz/">Kyzylorda-news.kz.</a> Қызылордада Халықаралық балаларды қорғау күніне орай және «Соңғы қоңырау» шарасы кезінде &nbsp;полиция қызметкерлері күшейтілген түрде қызмет атқаруда.1 маусым – халықаралық балаларды қорғау күні және мектеп бітірушілердің Соңғы қоңырау мерекесіне орай қала аумағында орналасқан барлық мектептерде жəне Президент саябағында салтанатты іс-шаралар өткізілді.&nbsp;Шара барысында жол қозғалысы қауіпсіздігін және қоғамдық тәртіпті сақтауды қамтамасыз ету мақсатында Қызылорда қалалық Полиция басқармасының қызметкерлері мектептер мен басқа да білім беру мекемелерінде іс-шаралардың арнайы жоспарын бекітті.Қала аумағында орналасқан 45 &nbsp;мектепте соңғы қоңырау соғылды, салтанатты жиынға барлығы &nbsp;2076 түлек қатысты. Әр мектептің жанында полиция жасақтарының күшейтілген кезекшілігі ұйымдастырылды.Соңғы қоңырау және Халықаралық балаларды қорғау күні мерекелік іс-шарасы кезінде қала бойынша қоғамдық тәртіп пен жол қауіпсіздігін қамтамасыз етуге барлығы &nbsp;198 &nbsp;қызметкер мен 47 қызметтік патрульдік автокөлік жұмылдырылды.<blockquote>«Құрметті ата-аналар! Жазғы демалыс қарсаңында балаларыңыздың бос уақытын дұрыс ұйымдастырып, олардың уақытын бақылауға кеңес береміз. ҚР Әкімшілік құқық бұзушылық туралы Кодексінің 442-бабы 1-бөлігінің санкциясы «Кәмелетке толмағандардың заңды өкілдерінің еріп жүруінсіз түнгі уақытта сағат 22-ден таңғы 6-ға дейін ойын-сауық мекемелерінде болуы» заңды өкілдеріне үш айлық есептік көрсеткіш мөлшерінде айыппұл салуға әкеп соғады. Кәмелетке толмағандардың заңды өкілдерінің еріп жүруінсіз тұрғынжайдан тыс жерде сағат 23-тен таңғы 6-ға дейін болуы – заңды өкілдеріне ескерту жасауды көздейді. Егер бұл әрекеттер бір жыл ішінде қайталап жасалса, құқық бұзушыларға жеті айлық есептік көрсеткіш мөлшерінде айыппұл салынады»,- деді Қызылорда қалалық Полиция басқармасы бастығының бірінші орынбасары, полиция подполковнигі Қордабаев Нұрлыбек Құрбаналиұлы.</blockquote>

Қызылордалық полицейлер мереке күні балалар қауіпсіздігін қамтамасыз етті

<a href="https://kyzylorda-news.kz/">Kyzylorda-news.kz.</a> Аузынан сүт дәмі кетпеген ақмаялық балғындар 30 мамыр күні балабақшамен қоштасты. Енді олар балдәурен күннен оқушылық кезеңге аяқ баспақ. Балабақшаның меңгерушісі Ақерке Баймаханованың айтуынша, биыл он бірінші түлектер тәлім ошағынан білім ұясына қоныс тепкен.«Қош бол, ойын ортамыз» атты мерекелік шара барысында балалар әннен шашу шашып, ауылдық клуб үйін бимен көмкерді. Бұғанасы қатпай жатып, мың бұралған балғындар өздерінің болашақ мамандығын бүгіннен бастап нықтаған тәрізді. Ертегі кейіпкерлерін сомдап, түрлі тапсырмалар орындау арқылы балабақшада алған білімдерін паш етті. Бойы мен ойы өскен балалар мектеп табалдырығын аттауға дайын екендіктерін аңғартты. Тақпақтарды мүдірмей айтып, жиналғандардың ыстық ықыласына бөленді.Балалардың іс-шараға белсенділікпен және тыңғылықты дайындықпен қатысуы балабақша ұжымының жемісті жұмысының нәтижесі екені айқын. Тәрбиеші Айгүл Жұмағұл мұнда он жылдан бері еңбек етіп келеді. Ол баланың тұлға болып қалыптасуы үшін ата-ана мен балабақша бірлесе жұмыс жасау керек деп санайды.<blockquote>«Балабақша – бүлдіршін үшін ұжымдық қарым-қатынастың бірінші тәжірибесі. Әр баланың мүмкіншілігі, қабілет-қарымы әртүрлі болуына қарай бейімделуі де түрліше өтеді, сондықтан алдымен баланың жағымды ішкі эмоционалды жағдайын қолпаштау керек. Балаға жайлы және жақсы болғанда ғана ол ортаға тез үйреніседі, үйлесімді дамиды. Бүлдіршін ата-анасы сұрамай-ақ балабақшада жаттаған тақпағын көңілдене айтып берсе, күні бойы болған топ оқиғаларын өзі баяндаса – бұл оның бейімделгенінің бірінші белгісі. Ата-ана мен педагогтар бірлесіп, балаға оң психологиялық ахуал тудыра алса ғана бала тұлғасы қалыптасып, жан-жақты дамиды. Бұл менің еңбек тәжірибемде жинақтаған қағидаларым», – дейді А.Жұмағұл.</blockquote>Қоштасу кешіне қатысқан ата-аналар да балаларының бойына сан өнерді жиып алып, көпшілік алдына шығып талантын танытқанына дән риза. Көңілдері шаттанып, тәрбиешілерге алғыс білдіріп жатты.<blockquote>«Балабақша қызметкерлеріне алғысым зор. Баланың қабілетін шыңдап, талантын ашып, биікке қарай жол сілтеп отыр. Қызметте абыройлы болсын. Еңбектеріне жеміс тілеймін», – дейді ата-ана Арайлым Рахметова.</blockquote>«Аймира» балабашасы 2011 жылы «Балапан» бағдарламасы негізінде ашылған. Содан бері ауыл тұрғындары игілігіне, бала бақытына қалтқысыз қызмет етіп келеді. Айта кетейік, балабақша шәкірттерінің алды биыл 10-сыныпты тәмамдайды.Зияткер ұрпақ тәрбиелеп, еліміздің білім саласындағы әлеуетін көтеруде балабақшалардың орны ерек. Бұл тұрғыдан алғанда «Аймира» бөбекжайы мемлекеттік талаптарға сай білім беріп отырған бірден-бір мекеме.

Қазақстан және Қызылорда облысының жаңалықтары: Білім