<a href="https://kyzylorda-news.kz/">Kyzylorda-news.kz.</a> 2025 жылға дейін колледж студенттерінің шәкіртақысы 2 есе өседі. Бұл туралы Үкімет отырысында Премьер-Министр Әлихан Смайылов айтты, деп хабарлайды <a href="https://kaz.inform.kz/">Kazinform</a>.&nbsp;<blockquote>«Дамыған елдерде кадр даярлау жүйесіне, оның ішінде кәсіптік техникалық білім беру сапасын арттыруға басымдық беріледі. Бұл мәселе Біріккен Ұлттар Ұйымының декларациясында Мыңжылдық даму мақсаттары ретінде айқындалған. Жалпы әлемдік тәжірибе бойынша жастардың еңбек нарығына араласып, алғашқы мамандық алып шығуына мемлекет тарапынан кепілдік беріледі. Бұл ретте экономикалық жетістігі дуалды оқыту жүйесіне негізделген Германия мемлекетін мысалға келтіруге болады. Бізде 9-сынып түлектеріне колледжде тегін оқуға мүмкіндік берілген», - деді Үкімет басшысы.</blockquote>Оның атап өтуінше, 3 жыл ішінде кадр даярлауға тиісті мемлекеттік тапсырыс көлемі артты.Егер бұған дейін колледждерде бюджет есебінен 95 мың студент оқыса, биыл олардың саны 133 мыңға дейін ұлғайды.<blockquote>«Мемлекеттік тапсырысты бұдан әрі де арттыра береміз. Биыл колледж студенттерінің стипендиясы 50 пайызға өсті. 2025 жылға дейін стипендия тағы 2 есе өсіріледі. «Жас маман» жобасын іске асыру аясында 180 колледжді қайта жарақтандыру үшін республикалық бюджеттен 48 млрд теңге бөлінді», - деді Әлихан Смайылов.</blockquote>

2025 жылға дейін колледж студенттерінің стипендиясы екі есе өседі

<a href="https://kyzylorda-news.kz/">Kyzylorda-news.kz.</a>&nbsp;Бүгін 6-сынып оқушыларына арналған NIS Виртуалды мектебі өз жұмысын бастады.Виртуалды мектеп – 5 және 6-сынып оқушыларын «Өркен» білім беру гранты бойынша Назарбаев Зияткерлік мектептерінің 7-сыныбында оқуға конкурстық іріктеуге дайындайтын тегін білім беру платформасы.Виртуалды мектептің «Математика», «Қазақ тілі», «Орыс тілі», «Ағылшын тілі», «Жаратылыстану» пәндерінен оқу бағдарламалары білім берудің тиімділігін арттыруға, баланың ынтасы мен қажетті дағдыларын дамытуға және Назарбаев Зияткерлік мектебіне түсуге дайындықты бастауға мүмкіндік береді.Виртуалды мектепте оқу аяқталғаннан кейін оқушы қашықтан өтілген тақырыптарды бекітуге арналған тапсырмаларды орындау және қорытынды тесттен өтуі қажет.Қорытынды тестілеуде ең жоғары ұпайдың 50 және одан да көп пайызын жинаған оқушылар демалыс кезінде Назарбаев Зияткерлік мектептері базасындағы Каникулярлы мектепке шақырылады.NIS Виртуалды мектебінде Қазақстан Республикасының жалпы білім беретін мектептерінен 22 949 оқушы оқыды, 4 574 (20%) оқушы «Өркен» білім грантын иеленіп, Назарбаев Зияткерлік мектептеріне сәтті оқуға түсті. Виртуалды мектептің 11 мыңнан астам қатысушысы шекті ұпай жинап, өз аймақтарындағы Каникулярлы мектепте оқуын жалғастырды.Еліміздегі жалпы білім беретін мектептердің 6-сынып оқушыларына арналған NIS Виртуалды мектебіне тіркелу 2023 жылдың 18 желтоқсанына дейін жүргізіледі.NIS Виртуалды және Каникулярлы мектептері туралы толық ақпаратты <a href="https://vs.nis.edu.kz/?lang=kk">vs.nis.edu.kz</a> сайтынан табасыздар.

NIS Виртуалды мектебі өз жұмысын бастады

<a href="https://kyzylorda-news.kz/">Kyzylorda-news.kz.</a>&nbsp; «ҚазРоботикс» федерациясы Қызылорда өңірлік филиалы және «Жастар рухы» ЖҚ облыстық филиалының ұйымдастыруымен «KazRoboSport-2023» Робототехника чемпионатының облыстық іріктеу кезеңдері өтті.Негізгі мақсат – STEAM және робототехника бағытын танымал ету, балалар мен жастардың STEAM және робототехника саласындағы техникалық шығармашылығы мен қажетті дағдыларын дамыту.№125 High school мектебінде өткен жарысқа барлығы 30-дан аса команда қатысып Robo-Summo 10x10 санаты бойынша сынға түсті.Ойын қорытындысы бойынша бірінші орын алған Жалғасбек Эльдар және Жетенов Мақсат ағымдағы жылдың 5 қараша күні Астана қаласында өтетін республикалық конкурста Қызылорда облысының намысын қорғайтын болады.Өткен жылдармен салыстырғанда, қазір балалардың робототехникаға қызығушылығы артып келеді. Бұл үйірме жас буынның бағдарламалау мен алгоритмдік ойлау қабілетін, техникалық қиялын дамытады. Келешекте сұранысқа сай маман болуға дайындайды. Робототехника негізінен бірнеше пәнді, атап айтқанда математика, физика, информатиканы бір арнаға тоғыстырады. Баланың конструкцияға қызығушылығы болса, оны осы салаға бейімдеген дұрыс, - дейді «ҚазРоботикс» федерациясы Қызылорда облысындағы өкілі С. Ералиев.<figure class="image"><img src="https://knadmin.beoblood.kz/uploads/384103144_716475123851460_5562599376687995636_n_446213d2cf.jpg" alt="384103144_716475123851460_5562599376687995636_n.jpg"></figure>

«KAZROBOSPORT-2023» робототехника чемпионатының облыстық кезеңінің жеңімпаздары анықталды

<a href="https://kyzylorda-news.kz/">Kyzylorda-news.kz.</a>&nbsp; Білімді ұстаз – мектептің тірегі, һәм жүрегі. Қай заманда болмасын, көреген халқымыз ұстаз мәртебесін жоғары бағалаған. Оның дәлелі, «Ұстазы жақсының – ұстамы жақсы» деп, бар жақсы ниет- тілекті ұстазға арнаған. Ұстаз шәкірттеріне сапалы білім ғана емес, &nbsp;сонымен қатар бойындағы бар мейір-шапағатын аямай, оларды &nbsp; &nbsp;қамқорлық шуағына бөлеп, білімнің асқар биік шыңына шығаруға &nbsp;бар &nbsp;күш-жігерін жұмсағанда ғана білім беру жүйесінде үлкен жетістік пен оның жемісі көрінері айқын. Өскелең ұрпаққа білім беруді өзіне кәсіп қана емес, өмірлік мән қылған ардақты да қадірлі мұғалімдер өңірімізде жетерлік. Сондай жандардың бірі – Ақгүл Қалжанова.Ол 1991 жылы Қызылорда облысы, Қазалы ауданында дүниеге келген. Сол аудандағы №234 орта мектепте оқып, білім алады. &nbsp; &nbsp;Қарашаңырақтан түлеп ұшқан соң Қорқыт ата атындағы Қызылорда мемлекеттік университетіне грант негізінде қазақ тілі мен әдебиеті мамандығына оқуға түсіп, үздік дипломмен бітіреді. Одан соң Қорқыт ата атындағы Қызылорда мемлекеттік университетіне грант негізінде қазақ тілі мен әдебиеті мамандығына магистратураға түсіп, педагогика ғылымдарының магистрі ғылыми дәрежесін алған. Талапты жастың еңбек жолы 2013 жылы &nbsp;Ақсуат ауылдық округіне қарасты Ж.Маханбетов аулындағы №268 мектеп-лицейінде қазақ тілі мен әдебиеті пәні мұғалімі ретінде басталады.<blockquote>«Осындай қиындығы мен қызығы қатар жүретін, жауапкершілігі мол мамандықтың иесі болғаныма әркез қуанамын. Менің &nbsp;мақсатым – еліміздің ғылымының &nbsp;дамуына тамшыдай болса да өз үлесімді қосу. Осы мақсатым мені ғылымға ден қойып, педагогика ғылымдарының магистрі ғылыми дәрежесін иеленуіме &nbsp;өз ықпалын тигізді. Міндетім – ел болашағы болар жас ұрпақты тәрбиелеу жолында жаны мен тәні таза, рухани бай, алған білімін болашақта қолдана алатын, сандық сауаттылығы артқан, өз ойын еркін жеткізе алатын, бәсекеге қабілетті ұрпақ тәрбиелеу.&nbsp; Жаңашыл ұстаз – заман талабы. Ендеше, теориялық білімін тәжірибе жүзінде іске асыра алатын, жауапкершілігі жоғары, ізденімпаз жеке тұлға болу – біздің басты міндетіміз. «Жаңа Қазақстан, жаңашыл ұстаз, жаңа ұрпақ» — бұл білім беру жүйесіндегі бәсекеге қабілетті маман даярлау, білім кеңестігіндегі мәдениет пен өнердің даму негізі», - дейді Ақгүл Қалжанова.</blockquote>10 жылдан бері оқушыларды білім нәрімен сусындатып келе жатқан жан бүгінде екі баланың анасы. Отбасылық өмірімен қызметін қатар алып келе жатқан сол &nbsp;мектеп-лицейдің қоғамдық жұмыстарына, оқу-тәрбие істеріне &nbsp;белсене араласып, шәкірт тәрбиелеуде еңбек етуде. Облыстық, қалалық деңгейдегі &nbsp;іс-шараларда белсенділікпен қатысып келеді. Ұйымдастырылған кәсіби байқаулар мен сайыстарға қатысып, жетістікке жетіп, кәсіби шеберлігін шыңдауда. 2021 жылы өткен қалалық «Үздік қазақ әдебиеті пәні мұғалімі - 2021» &nbsp;кәсіби байқауының &nbsp;I орын иегері атаныпты. Одан басқа да түрлі марапат иесі атанған Ақгүл Қуанышқызы бағдарлама бойынша мақалалары республикалық басылымдарда жарияланып жүр. Жұмыс жасау кезінде білім алушылары &nbsp;да түрлі байқаулар мен сайыстарға қатысып, биік белестерді бағындыруда.<blockquote>«Білімді, жан – жақты, бәсекеге қабілетті, жаңашылдыққа &nbsp;бейім &nbsp;тұлғаны дайындаушы тек мұғалім екенін үнемі жадымда сақтаймын. Осы мақсатта, білім жүйесіне &nbsp;енген реформаны меңгеріп, өз тәжірибемде пайдалану үшін &nbsp;жаңартылған білім мазмұны бойынша курстан өттім. Өз позициямды іске асыру мақсатында қазақ тілі мен әдебиеті пәнінде &nbsp;сын тұрғысынан ойлау технологиясын дамыту, топтық, жұптық әдістер арқылы оқушылардың өзара ынтымақтастығын нығайту және дамыту үшін жеті модульдің әдіс-тәсілдерін қолданып келемін. Оқушылар топтық жұмысты ұнатады, олар үшін ең маңыздысы терең білім алу және өздері үшін оқиды, яғни алға деген ұмтылыс бар. Өз ойларын сабақта айту оқушылар үшін өте маңызды. Оқушының әрбір жетістігін қалт жібермей мақтап, мадақтап отырып, оқушыға оң әсер қалдыру, қалыптастырушы бағалауға көп көңіл бөліп, оқушымен арадағы диалогты дұрыс, тиімді, мәдениетті және жетелеуші түрде ұйымдастыру нәтижесінде оқушылардың білім сапасының артқанын байқауға болады. Жаңашыл мұғалімнің міндеті – оқушының &nbsp;белсенділігі мен &nbsp;ой-еңбегінің дамуына &nbsp;жағдай жасау, қажет кезде жол көрсету болып табылады. Мұнда мұғалімнің шығармашылық жұмысы үлкен рөл атқарады. Нәтижесінің маңызы – оқушы жинақталған білімін тәжірибеде, өмірде &nbsp;пайдалана алуда», – дейді жас ұстаз.</blockquote>

Жаңашыл ұстаз – жаңа заман айнасы

<a href="https://kyzylorda-news.kz/">Kyzylorda-news.kz.</a> Кеше ел болып Ұстаздар мерекесін алғаш рет 5 қазанда атап өттік. Осындай айтулы мерекеде оқушыларын білім нәрімен сусындатып жүрген ұлағатты жандар жайында қанша айтсаң да, жазсаң да аз болар. Бала тәрбиесінде ер адамның да орны ерек. Мектепте сабақ беретін ұстаздардың арасында ер азаматтардың бары рас. Сондай азаматтың бірі &nbsp;– Бекболат Жекенов.Ол Жалағаш ауданы, Бұхарбай батыр аулында дүниеге келген. №33 орта мектепті &nbsp;тәмамдаған соң Тараз қаласындағы М.Х.Дулати атындағы Тараз Мемлекеттік Университетіне “Жеңіл өнеркәсіп тауарлары мен бұйымдарының технологиясы” мамандығы бойынша оқуға түсіп, оны 2010 жылы қызыл дипломмен бітіріп шығады. Сол Университетке “Қаржы” мамандығы бойынша қайта оқуға түсіп, оны 2012 жылы тәмамдайды. 2011 жылы қаңтар айында Қызылорда қаласындағы М.Ықсанов атындағы Қызылорда политехникалық колледжіне жұмысқа тұрады. Одан соң Қызылорда қаласындағы Болашақ Университетіне «Алғашқы әскери дайындық» мамандығы бойынша білімін шыңдайды. 2014 жылы Қызылорда қаласындағы Т.Есетов атындағы №264 мектеп-лицейіне директордың тәрбие ісі жөніндегі орынбасары қызметіне тағайындалады. 2018 жылы мамыр айында осы мектепте Алғашқы әскери және технологиялық дайындық пәнінің оқытушы-ұйымдастырушысы қызметіне ауысқан. Содан бері осы қызмет бойынша жұмыс атқарып келеді.<blockquote>«Мұғалім – мамандық болса, ұстаздық адам бойындағы ұлы қасиет. Ұстаз мәртебесінің артуы ең алдымен ұстаз деген есімге қаншалықты лайық болуына байланысты. Бүгінгі жаңа дәуірдің, жаңарған білімнің мұғалімге қояр талабының жүгі ауыр, олар үлгі боларлық бар жақсылық атаулының ең биігінен көрінуі тиіс. Шәкірт тәрбиелеуде ұстаздардың орны ерекше, еңбегі елеулі. Барша мамандық иелерін кәсіби мерекесімен құттықтаймын» дейді ол.</blockquote>

Ізгілік пен ізденіс иесі

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев Мұғалімдер күніне орай педагогтерді төл мерекемен құттықтап, оларға аймақ дамуына, өскелең ұрпақ тәрбиесіне қосқан үлестері үшін алғыс білдірді.Мерекелік іс-шарада ардагер ұстаз Әлима Әбдіқалықова Қызылорда облысының Құрметті азаматы атанып, «Орта білім беретін үздік ұйым» облыстық байқауының жеңімпазы Ә.Мүсілімов атындағы № 101 мектеп-лицейге 34 млн. теңге табысталды.<blockquote>«Мемлекет басшысы Қасым-Жомарт Кемелұлы өз Жолдауында «Болашаққа жол сілтейтін мұғалімнің еңбегін лайықты бағалау – маңызды міндет» деп ерекше атап өтті. Бүгінгідей өзгерістерге қадам басқан уақытта жас ұрпаққа сапалы білім беріп, тәрбиелеуде ұстаздардың еңбегі ерекше, мәртебесі биік. Мемлекет басшысының бастамасымен қолға алынған «Жайлы мектеп» ұлттық жобасы аясында өңірімізде 100 млрд. теңгеге &nbsp;12 300 орындық 21 мектеп салынуда. «Білімді қолдау қоры» есебінен &nbsp;7,9 млрд. теңгеге физика-математика бағытындағы мектеп-интернат құрылысы қарқынды жүргізілуде. Жаңа оқу жылында Қызылорда қаласындағы 4 іргелі мектептің жанынан қосымша ғимараттар пайдалануға берілсе, «Бәйтерек» шағын ауданы тұрғындары асыға күткен 600 орындық жаңа мектеп бүгін салтанатты түрде ашылып, ел игілігіне табысталды», – деді Н.Нәлібаев.</blockquote>Мерекеде Сыр елінің үлгілі ұстаздары ҚР Оқу-ағарту министрлігі мен облыс әкімінің &nbsp;марапаттарына ие болды. Е.Әуелбеков атындағы дарынды балаларға арналған № 4 облыстық мектеп-интернатының мұғалімі Әсемкүл Жақсылықова «Қазақстанның еңбек сіңірген ұстазы» құрметті атағымен марапатталса, педагогтердің бірқатары ҚР Оқу-ағарту министрлігінің «Еңбек ардагері», «Білім беру ісінің құрметті қызметкері» құрметті атағын, Құрмет грамотасын, «Орта білім беру ісінің үздігі» құрмет дипломын, облыс әкімінің Алғыс хатын алды.Салтанатты кеш жергілікті өнерпаздардың концертіне ұласты.<img src="https://knadmin.beoblood.kz/uploads/369258851_620735376914377_6579784906488221450_n_216876c578.jpg" alt="369258851_620735376914377_6579784906488221450_n.jpg"><img src="https://knadmin.beoblood.kz/uploads/385733832_620735323581049_650749442395932941_n_3a90204ee1.jpg" alt="385733832_620735323581049_650749442395932941_n.jpg"><img src="https://knadmin.beoblood.kz/uploads/385775199_620735706914344_937972653105933318_n_207b0301ec.jpg" alt="385775199_620735706914344_937972653105933318_n.jpg">

Нұрлыбек Нәлібаев: Өңірімізде 100 млрд. теңгеге  21 мектеп салынуда

<a href="https://kyzylorda-news.kz/">Kyzylorda-news.kz.</a>&nbsp;Бүгін елімізде барлық мамандықтың атасы атанған мұғалімдердің кәсіби мерекесі.&nbsp;Тек білім беріп қоймай тұтас ұлттың тәрбиесіне қатысатын, әр бір шәкірттің өміріне даңғыл жол салып беретін ұстаздар қауымына қоғамның құрметі ерекше. Ілім-білімнің, мәдениет пен өркениеттің дамуына үлес қосып келе жатқан аймақ мұғалімдерінің еңбегі өлшеусіз. Сондай білікті мұғалімдердің бірі Жадыра Жаңабаева. Ол бүгінде Сырдария&nbsp;ауданы Ақжарма&nbsp; ауылындағы №130 Абай атындағы&nbsp; орта мектебінің тарих пәнінен сабақ береді.&nbsp;Жадыра Ерболатқызы осыдан 13 жыл бұрын еңбек жолын Қызылорда қаласындағы №15 М.Дүйсенов&nbsp;атындағы гимназияда&nbsp; тарих пәнінің мұғалімі болып бастайды. Жаңа ғасырға сай өзгеше қабілетке ие шәкірттің жүрегіне жол табу оңай емес. Жадыра осы жолда тынбай ізденіп, біліктілігін арттырып, еңбек етіп келеді. Қала мектебінен жинаған мол тәжірибесімен Ақжармалық балаларды оқытуға күш салып жатыр.&nbsp;<blockquote>«Мектеп бітіргеннен кейін бала арманыма қол жеткізу үшін Қорқыт ата атындағы Қызылорда университетіне «Тарих пәнінің мұғалімі» мамандығына оқуға түстім. Жоғарғы оқу орнын тәмамдаған соң мамандығым бойынша ұстаздық жолға түстім. Дүниеге әкелген ата-анадан кейінгі адам өмірінде маңызды орны бар ол - мұғалімдер. Қай мамандық болмасын мұғалімнің алдынан өтеді. Сондықтан мәртебелі мамандықтың иесі болғанымды зор абырой санаймын. Алдымдағы әр бір шәкірттің білімді, саналы азамат болып қалыптасуына әсер ете алсам мамандықтың шыңына жету деген сол шығар», - дейді жас ұстаз.&nbsp;</blockquote>Ұстаздың еңбегі шәкірттің шыққан шыңы мен жеткен жетістігімен бағаланады. Бұл тұста Жадыраның еңбегі еш кетпеді. Білім берген оқушылары облыстық, республикалық білім бәйгелері мен ғылыми жоба байқауларында алдыңғы орындардан көрініп жүр.&nbsp;<blockquote>«Елдің ертеңі - балалар. Қазіргі біздің мақсатымыз және міндетіміз елімізді&nbsp; алға жетелейтін ұрпақ тәрбиелеу. Адамзат қоғамын алға қарай жетелеуші құдіретті күш тек білімге ғана тіреледі. Мектепте оқытуды ұйымдастыратын бірден&nbsp; бір нұсқа сабақ болса, сабақтың нәтижелі болуына ықпал ететін нұсқа сол сабақты өткізудің әртүрлі әдіс-тәсілдері. Мен сабақта жаңа әдіс – тәсілдерді пайдалана отырып, балалардың ой-пікірін еркін жеткізулеріне мүмкіндік беремін. Ол өздеріне деген сенімділікті арттырады. Сабақ барысында&nbsp; «Ассоциация» , «Топтау», «Түртіп алу», «Болжау», «Әлемді шарлау», «Ыстық орындық», «Мәліметтеу»&nbsp; тағы сол сияқты әдістерді пайдаланамын. Бұл әдістер оқушыларға әр тақырып бойынша нәтижелі білім алуға көмектеседі», - дейді Жадыра Жаңабаева.&nbsp;</blockquote><figure class="image"><img src="https://knadmin.beoblood.kz/uploads/2a575097_a51b_4d30_b8a8_bbe9586e3380_1c1f407f88.jpg" alt="2a575097-a51b-4d30-b8a8-bbe9586e3380.jpg"></figure><figure class="image"><img src="https://knadmin.beoblood.kz/uploads/ffaea174_6049_4afa_ab35_cde5e83b11df_1a4a7fbffd.jpg" alt="ffaea174-6049-4afa-ab35-cde5e83b11df.jpg"></figure>&nbsp;

Жадыра Жаңабаева: Мұғалім – мәртебелі мамандық

<a href="https://kyzylorda-news.kz/">Kyzylorda-news.kz.</a> Облыс орталығының шет аймақтары кеңейіп, оларға қоныстанушылар саны жыл сайын артып келеді. Солардың бірі Қызылорда қаласының «Бәйтерек» шағын ауданы инфрақұрылымы жеткізілген, қанатын кең жайған елді мекенге айналды.Бүгін Қызылорда облысының 85 жылдығы және Мұғалімдер күні аясында «Бәйтерек» шағын ауданындағы №287 орта мектеп ел игілігіне табысталды. Жаңа білім ордасы облыс орталығындағы үш ауысымда білім беретін №261, №280 мектептердегі оқушылар жүктемесін азайтады.Облыс әкімі Нұрлыбек Нәлібаев тұрғындарды жаңа нысанның ашылуымен құттықтады.<blockquote>«Ел Президентінің, Үкіметтің қолдауымен Сыр өңірінің білім саласында ауқымды жобалар сәтті жүзеге асырылуда. Мемлекет басшысының бастамасымен қолға алынған «Жайлы мектеп» ұлттық жобасы аясында алдағы екі жылда 12 300 орындық 21 мектеп салынады. Осы жылы 10 мектептің құрылысы басталса, оның бесеуі облыс орталығында бой көтереді. Бұған дейін қаламызда бір ғана Оқушылар үйі болса, «ҚазГерМұнай» компаниясының демеушілігімен 2,3 млрд. теңгенің 350 орындық заманауи үлгідегі Оқушылар сарайы құрылысы жақын күндері басталады. «Саутс Ойл» компаниясының демеушілігімен Сырдария өзенінің сол жағалауынан құны 4,8 млрд. теңгені құрайтын музыкалық колледждің жаңа ғимараты құрылысын қараша айында бастап, ауыл балаларына арналған 900 орындық 4 мектепті жыл аяғына дейін табыстаймыз», – деді аймақ басшысы.</blockquote>Салтанатты іс-шарада облыстық білім саласы ардагерлері кеңесінің төрағасы Ғалым Бекенов жерлестерін жаңа білім ошағының ашылуымен құттықтап, ҚР еңбек сіңірген қайраткері Қорғанбек Қайруллаев бата берді.Облыс мектептеріне жаңа оқу жылында 180 мыңнан аса оқушы келді, мектеп табалдырығын алғаш аттаған бүлдіршіндердің саны 17 мыңнан асты.2022-2023 оқу жылында облыс бойынша Ұлттық бірыңғай тестілеуге қатысқан 7 219 түлектің 4 973-ы мемлекеттік грант иегері атанды. Олардың саны алдыңғы оқу жылымен салыстырғанда 885-ке көбейген. Биыл өңірге қажетті мамандықтар бойынша 100 түлекке облыс әкімінің гранты тағайындалды. Бұл мақсатқа облыстық бюджеттен 85,2 млн. теңге қаржы бөлінді.

Қызылордада жаңа мектеп ашылды

<a href="https://kyzylorda-news.kz/">Kyzylorda-news.kz.</a>&nbsp;Биыл 5 қазанда алғаш рет мерекеленіп отырған айтулы күнде қызметі мен отбасылық өмірді тең ұстап, қарапайым қалпынан айнымаған халық қалаулысы Күлжауһар Раевамен сұқбаттасқан болатынбыз.&nbsp;Шәкiрттерiн бiлiм нәрiмен сусындатып, тәлім-тәрбиe беру, жақсы қасиeттерді бойына дарытып, адамгершілік рухта бағыт-бағдар берудe қармақшылық ұстaздың еңбегi зор. Сондықтан да ол әрдайым құрметті тұлға ретінде Қармақшы ауданына сыйлы жан. Жастайынан еңбек жолын ұстаздық жолдан бастаған ол адал жар, сүйікті келін, ардақты ана бола білді. Жұмыс пен тұрмыстық өмірді қатар алып, бүгінде ақжаулықты әже болып отыр. Зейнет демалысына шықса да қоғамдық жұмыстардың басы-қасынан табылады.<blockquote>«Үлкен болмаса да, орта жанұяға келін болып түстім. Енем, жолдасым, қайын інім барлығымыз бірге тұрдық. Анам айтушы еді, «Кісі есігі тоң есік, жібітуге ер керек». Өзің таңдап барғаннан кейін сол үйдің отымен кіріп, күлімен шық. Қайтып босағаға келуге болмайды» деп, осы тәрбиені бойымызға сіңіріп өскеннен болар, ененің көңілінен шығу, анаңдай көру, сыйлау, сол кісінің айтқан тәртібіне қарай жүру – бірден оңай бола қойған жоқ. Тұрмысқа шыққан уақытым №105 мектепте мұғалімдіктен оқу ісінің меңгерушісіне ауысып жатқан сәтіммен тұспа-тұс келді. Ол қызметтің арқалар жүгі ауыр ғой. Енемнің артықшылығы «жұмыс істеп жүрсің», «уақытылы келмедің» деп айтпайтын. Мен үшін бұл үлкен қолдау болды. Жұмыс орным кенттің бір шетінде болса, келін болып түскен үйім келесі бір бөлігінде. Соған қарамастан таңертеңмен жұмысқа барып, түс уақытында үйіме келіп тамақ дайындап, үлкендердің шайын беріп қайта жұмысыма кететінмін. Қазіргідей көлік жоқ, жаяу жүреміз. Алланың қалауымен дүниеге ұл мен қыз келді. Сөйтіп жүріп мектеп директоры болдым. Мұның барлығы сол кезде отбасымдағы енем мен марқұм жолдасымның қолдауының арқасы еді... Әлі күнге дейін сиыр сауып, қатығымды ұйытамын. №105 мектепте 25 жылдай жұмыс істедім. 2004 жылы №27 мектепке директор болып келдім. Онда 5 жыл қызмет еткеннен кейін Қармақшы аудандық «Nur Otan» партиясына жұмысқа келдім. Осы жерден зейнетке шықтым. Мұндай қоғамдық жұмыстармен отбасылық өмірді қатар алып жүру оңайға соқпады. Десе де шыдам, төзім қажет. Қандай жағдай болмасын үйің таза, асың пісірулі болуы шарт. Қолымнан келгенше үлгеруге тырысатынмын. Менің бақытыма орай мектепте тәлім берген ұстаздармен әріптес болдым. Олар қашанда тура жолды нұсқап, оң бағыт беретін. Енем 93 жасында өмірден озды. Қазыналы қарттың көңілінен шығуға тырыстым. Қызметте қандай да бір мәселе болсын жұмыстың табалдырығында қалуы қажет. Ал отбасыңа ондағы көңіл-күйді әкелмеген дұрыс. Жұмысың қарбаласып жатса да, келген қонақты қабақ шытпай қарсы алуың керек. Үлгілі келін бола алдық па, бола алмадық па? Оны ағайын-туыс, көрші көлем айтар» дейді ол.</blockquote>Бұрынғы қарапайым мұғалім қазіргі уақытта халық қалаулысы. Шәкірттері талай белестерді бағындырған ұстазды осындай жетістікке жеткізген қандай қасиет?<blockquote>«Мұғалімдіктен оқу ісінің меңгерушісі болып ауысқан тұсымда Гүлбаршын Сыздықова деген ақылшы апайым «Бірнәрсе айтайын. Адам өсіп, көтерілген сайын көкірегі де өседі. Соған сай адамдарға деген көзқарасы да басқаша қалыптасуы мүмкін. Сенің тәрбиеңде ондай жоқ деп ойлаймын. Қандай жағдай болмасын адамгершілігіңнен аттама, ардан биік болма» деген еді. Сол кездерде мектеп басшысы болған Райхан Жұмаділдаеваны оқушы күнімнен үлгі тұттым. Оның өзіне жоғары талап қойғыштығы, қандай мәселе туындаса да өзін бірқалыпты ұстауы ұнайтын. Жетістікке жету үшін – қатты қызуқандылықтың қажеті жоқ. Қай істің болса да ақыры, қандай мәселенің де шешімі бар. Мені осы дәрежеге жеткізген қасиет – сабырлылық пен байсалды шешім қабылдау болар. Қоғамдық қызметке келмес бұрын әлеуметтік комиссия құрамында жұмыс атқардым. Сонда есік жағалап, көмек сұраушылардың әл-ауқатын білуге үй аралаймыз. Сондай кездерде үй тазалығын сақтамай, лас жерде тұрып жатқан отбасыларды көрдік. Бойында күш қуаты бар жас келіншектің осындай күйіне қарным ашады. Маған қиын тиетіні, балалар оны көзбен көріп, санасына сіңіреді. Олар да масыл болу арқылы күн көруді жалғастырып кете ме деген қорқыныш бар. Сондай-ақ әрбір үшінші шаңырақтың шайқалуы мен ауқатты тұратын туыстың жәрдемге мұқтаж ағайынына мән бермеуі ойландырады... Берекелі шаңырақтың отанасы болуыма сеп болған, бір ауыз сөзі арқылы ой салатын аналарым көп, әрине. Атап айтар болсам, Назым Бүркітбаева, Ұлмекен Ақшолақова, Көптілеу Қазақбаева, Забира Сүюбердиева, Дәмелі Жалғасбаева, Тынышкүл Далиева, Гауһар Бөлтіріковалардан алған өнегем көп. Олар қызмет пен отбасылық өмірді тең ұстап, жүріс-тұрысы, мәнді сөзі арқылы бізге аналықтың, даналықтың үлгісін көрсетті. Қай кезде де қоғам ұстаз мәртебесін биік қойған. Өйткені ұстаз тұтас ұлтқа тәрбие берген. Мемлекетіміз «Мұғалім мәртебесі туралы» Заң қабылдады, мұғалімдердің еңбек жалақысын көтерді, қазіргі кезде жайлы мектептер салу жұмыстары қолға алынды. Осының бәрі ұстазтаздаға көрсетілген үлкен құрмет. Ұлы Абайдың «Адамның адамшылығы – жақсы ұстаздан» деген сөзі санада тұрады. Мұғалім болу екінің-бірінің қолынан келе бермейтін мамандық. Ол Тәуелсіз еліміздің дамыған елдерімен теңесуі үшін білім бәсекесіне қабілетті ұрпақ тәрбиелеу міндетіне сай болуы қажет. Сондықтан жас ұрпақты тәрбиелеуде ұстаздарға жүктелетін міндет зор. Мұғалімнің терең білімділігімен қатар, оның жүріс-тұрысы, жайдары мінезі, тіпті сырт пішіні, киген киімі де сай болуы керек. Ұстаз шәкіртінің білімді, жан-жақты, адамгершілігі мол болуып өсуіне аянбай еңбек етеді. Қанша жасқа келсемде өмір бойы жалықпай шәкірт тәрбиелеген ұстаздарым мәңгі жадымда тұрады, оларды мақтан тұтамын. Мұғалім қашанда, қай уақытта да ұлы тұлға болып қала береді. 5 қазан – мұғалімдер күні мерекесіне орай барша ұстаздар қауымын кәсіби мерекесімен құттықтап, еңбектеріне зор табыс тілеймін» дейді Халықаралық Қазақ тілі қоғамы Қармақшы аудандық филиалының төрайымы Күлжауһар Раева.</blockquote>Айта кеткен жөн, биыл алғаш рет Мұғалімдер күні мерекесі 5 қазанда мерекеленуде. Тиісті қаулыны ҚР Үкіметі биыл 10 наурызда қабылдаған болатын. Мемлекеттік мерекелер тізіміне сәйкес, осы уақытқа дейін республикада Мұғалімдер күні қазан айының бірінші жексенбісінде тойланып келді. Енді бұл мереке 5 қазанда әлемнің 100-ден астам елі атап өтетін Дүниежүзілік мұғалімдер күнімен сәйкестендірілді.<img src="https://knadmin.beoblood.kz/uploads/1570084767_71834124_2375460645999927_2112686321184014336_n_3960ce92e2.jpg" alt="1570084767_71834124_2375460645999927_2112686321184014336_n.jpg"><img src="https://knadmin.beoblood.kz/uploads/1661695339_3_48b22ffdcc.jpg" alt="1661695339_3.jpg"><img src="https://knadmin.beoblood.kz/uploads/316282432_874768423679223_8328786106541188004_n_afdd962a7c.jpg" alt="316282432_874768423679223_8328786106541188004_n.jpg">

Ұлағатты ұстаз туралы бір үзік сыр

<a href="https://kyzylorda-news.kz/">Kyzylorda-news.kz.</a>&nbsp; ҚР Оқу-ағарту министрлігі орта білім беру ұйымдарында 2023–2024 оқу жылының басталу мерзімін, ұзақтығын және каникул кезеңдерін бекітті.Орта білім беру ұйымдарында 2023-2024 оқу жылы 1 қыркүйекте басталды, 25 мамырда аяқталады. Бірінші тоқсанда оқу уақыты 8 апта, күзгі каникул 30 қазаннан 5 қарашаны қоса алғанда 7 күнге созылады. Екінші тоқсанда 8 оқу аптасы, қысқы каникул 2023 жылдың 29 желтоқсанында басталады, 2024 жылдың 7 қаңтарын қоса алғанда күнтізбелік 10 күнге жалғасады. Үшінші тоқсан 10 оқу аптасынан тұрады. 11 күндік көктемгі каникул 2024 жылдың 21 наурызында басталып, 31 наурызға (қоса алғанда) дейін жалғасады.Айта кетейік, жыл сайын бірінші сынып оқушылары үшін үшінші тоқсанда қосымша демалыстар беріледі, ұзақтығы 7 күн – 2024 жылдың 5 ақпанынан 11 ақпанға (қоса алғанда) дейінгі уақытты қамтиды. Төртінші тоқсанның ұзақтығы 8 оқу аптасын құрайды. Сондай-ақ 25 мамырда қорытынды шығарылып, оқу жылы аяқталады.<figure class="image"><img src="https://knadmin.beoblood.kz/uploads/kestee_0d3e256df8.jpg" alt="kestee.jpg"></figure>&nbsp;<figure class="image"><img src="https://knadmin.beoblood.kz/uploads/keste_51fe95167a.jpg" alt="keste.jpg"></figure>

Оқушылардың оқу және демалыс уақыты белгіленді

<a href="https://kyzylorda-news.kz/">Kyzylorda-news.kz.</a>&nbsp; Қорқыт ата атындағы Қызылорда университетінде ұстаздар күні ерекше атап өтіліп, оқу орнының профессор-оқытушыларына «Ұстазым, бір өзіңе бас иемін!» атты салтанатты жиын ұйымдастырылды.&nbsp;Мерекелік шарада университеттің Басқарма төрағасы-Ректоры Бейбіткүл Кәрімова профессор-оқытушылар құрамын кәсіби мерекемен құттықтап, осы уақытқа дейін атқарылған жұмыстарға тоқталды.<blockquote>– Қадамы сәтті әрбір адамның артында өміріне жол сілтеуші Ұстазы тұр. Бүгінгі таңда ұстаз еңбегінің сапасы түлектің өмірдегі біліктілігімен, бәсекеге қабілеттілігімен, сұранысымен өлшенсе, олардың жетістіктері біздің кәсіби деңгейіміздің басты өлшемі болып табылады, – деді Бейбіткүл Сәрсемханқызы.</blockquote>Жиын барысында университеттің бірқатар қызметкерлері марапат төрінен көрінді. Білікті кадр даярлауда еңбек етіп жүрген профессор-оқытушылар ҚР Ғылым және Жоғары білім министрлігінің Алғыс хатымен, Қызылорда облыстық білім басқармасы, Білім және ғылым қызметкерлері кәсіподағының облыстық комитетінің «Құрмет» грамотасымен, «Қорқыт Ата атындағы Алтын медалі», «Үздік түлек», «Үздік оқытушы» медалімен марапатталды. Сонымен қатар, оқытушыларға «AMANАT» партиясы қалалық филиалының атқарушы хатшысы Гүлшат Мұсаева «AMANAT» партиясының Алғыс хатын табыстады.&nbsp;Салтанатты шараға зиялы қауым өкілдері, университет ардагерлері, профессор-оқытушылар және білім алушылар қатысты. Мерекелік кеш Педагогика және дәстүрлі өнер институты профессор-оқытушылары мен білім алушыларының мерекелік концертімен қорытындыланды.Бүгінде Қорқыт ата атындағы Қызылорда университетінде 481 профессор-оқытушы жұмыс істейді. Олардың қатарында &nbsp;22 ғылым докторы, 38 PhD, &nbsp;174 ғылым кандидаты, 40 «Болашақ» халықаралық бағдарламасының түлегі еңбек етеді. Соңғы екі оқу жылында 20 оқытушы Президенттің &nbsp;«500 ғалым» жобасы аясында шетелдік жетекші ЖОО-да ғылыми тағылымдамадан өту құқығын жеңіп алды. Сонымен қатар, биыл оқу орнында білім алушылар саны 10 мыңнан асты. &nbsp;<figure class="image"><img src="https://knadmin.beoblood.kz/uploads/P2422009_3a9681cb90.jpg" alt="P2422009.jpg"></figure>

Қорқыт ата атындағы Қызылорда университетінде 481 профессор-оқытушы жұмыс істейді

<a href="https://kyzylorda-news.kz/">Kyzylorda-news.kz.</a> Биыл ұстаздар мерекесі 5 қазан күні аталып өтіледі. Мемлекет басшысының тапсырмасына сәйкес соңғы 4 жылда мұғалімдердің жалақысы 100 пайызға артты. Соның арқасында мұғалімнің мәртебесі көтерілді. Ыбырай Алтынсариннің ізін жалғаған ұстаздардың төл мерекесі аймақта қалай тойланатыны жайында Өңірлік коммуникациялар қызметінің баспасөз алаңында облыстық білім басқармасы басшысының міндетін атқарушы Бағдат Бердаулетов айтты.<blockquote>«Ұстаздар күнін атап өту жөніндегі облыстық іс-шаралар жоспарына сәйкес 25 қыркүйек – 10 қазан аралығында &nbsp;«Тұлғаңды арманыма ұқсатқанмын» тақырыбында барлық балабақшаларда, мектептерде, техникалық және кәсіптік білім беру ұйымдарында, интернаттарда ұстаздар күніне арналған ашық сабақтар, тәрбие сағаттары өткізілуде. Сондай-ақ, мектептегі оқушылардың өзін-өзі басқару күні, колледж ұстаздары арасында дәстүрлі үстел теннисі, тоғызқұмалақ және шахматтан облыстық жарыс, барлық кітапханаларда ұстаздар шығармашылығын насихаттауға бағытталған шаралар, ардагер ұстаздармен мерекелік кездесу, білім саласы қызметкерлері арасында ұстаздар күніне орай спартакиадалар өткізілуде», - деді Бағдат Камбозұлы.</blockquote>Ұстаздың мақтанышы оның шәкірті екені сөзсіз. 4 жылда халықаралық, республикалық, облыстық деңгейдегі олимпиадаларда 37 медальді иеленген С.Шаухаманов атындағы №9 дарынды балаларға арналған «Білім-инновация» лицей-интернатының информатика пәнінің мұғалімі Батыр Жарқын әріптестерін мерекесімен құттықтады.<blockquote>«Ұстаз – ұлы тұлға ол күннің құдіретті сәулесі сияқты. Сондықтан ұлт баласын тәрбиелеген ұстаздардың кәсіби төл мерекесімен құттықтаймын! Ұстаз тек білім берумен шектеліп қалмайды. Ол – болашақ қоғамды қалыптастырады. Баршаңызды тынымсыз еңбек жолында табысты болуларыңызды тілеймін. Білімді де, білікті шәкірттеріңіз көбейе берсін», - деді Батыр Жарқынұлы.</blockquote>

Қазақстан және Қызылорда облысының жаңалықтары: Білім