<a href="https://kyzylorda-news.kz/">Kyzylorda-news.kz</a>&nbsp; &nbsp;Ақордада ХІV Қысқы Паралимпиада ойындарының чемпионы Ербол Хамитов пен оның бапкерлерін марапаттау рәсімі <a href="https://aqorda.kz/kz/memleket-basshysy-hiv-kysky-paralimpiada-oyyndarynyn-chempiony-erbol-hamitovty-marapattady-2625852?fbclid=IwY2xjawQx_6VleHRuA2FlbQIxMABicmlkETFPZ3gwbmhXMXRBUlBjME5Ic3J0YwZhcHBfaWQQMjIyMDM5MTc4ODIwMDg5MgABHr79UQrKMaOYNNTCZ1UjRLDXMO67x6cDpDFbxSKI9Pun4KhJSaxaPVBnu9wc_aem_sui5D2V57JJ7rVafAv54Fw">өтті.</a>Қасым-Жомарт Тоқаев Италияда өткен әлемдік дода еліміз үшін өте табысты болғанына тоқталды. Жаһандық бәсекеде отандасымыз Ербол Хамитов алтын және қола медаль жеңіп алды.<blockquote>– Нағыз чемпион атанып, еліміздің мерейін үстем етті, көк Туымызды биікте желбіретті. Бұл – қазақ параспорты үшін тарихи жетістік. Ербол қазақтың қайсар, өр рухты әрі намысты ұлт екенін күллі әлемге паш етті. Сондықтан, ең алдымен, саған және бапкерлерге шынайы ризашылығымды білдіремін. Паралимпиада ойындарына аттанар сәтте мен еліміздің көк Туын саған табыстадым. Сол артылған сенімді толық ақтап, Қазақстанға жеңіспен оралдың. Керемет нәтижеге жеттің! Соның арқасында еліміз командалық есепте 18-ші орынға табан тіреді. Үздіктердің ішінен алға шығып, чемпион болу оңай емес. Бұл – жылдар бойғы тынымсыз дайындық пен қажырлы әрі табанды еңбектің жемісі екені анық, – деді Президент.</blockquote>Мемлекет басшысы Ербол Хамитовтың жетістікке жету жолында оның бапкерлері айрықша рөл атқарғанына назар аударды.<blockquote>– Сіздер Ербол Хамитовқа білгендеріңізді үйретіп, тәжірибелеріңізбен бөлістіңіздер. Оның чемпионға тән табандылық танытып, биік мақсатқа ұмтылатын күрескер мінезін шыңдадыңыздар. Олимпиада жылнамасына есімін жазған белгілі, көрнекті спортшы болуына күш салдыңыздар. Сіздерге алғыс айтамын. Орайлы сәтті пайдаланып, бапкерлерге, демеушілерге, дәрігерлерге және параспортшылармен жұмыс істейтін барша маманға ризашылығымды жеткізгім келеді. Атлеттеріміздің жетістігі – өскелең ұрпаққа үлгі-өнеге. Табысқа жету формуласын бәрі біледі. Алайда асқақ мұратқа қол жеткізу үшін көптеген игіліктен және өмірдің қызығынан бас тартып, қиын жолды еңсеруге екінің бірі тәуекел етпейді. Әлем біріншіліктерінде жеңіп алған әр медаль еліміздегі бұқаралық спорттың дамуына зор серпін береді. Бұл өте маңызды. Өйткені спортпен шұғылданатын, өз-өзін қамшылап, күн сайын шыңдайтын, сондай-ақ темірдей тәртіпке үйренген адамдар тіршіліктің тауқыметіне мойымайтынын өмірдің өзі көрсетіп отыр. Бұл ретте паралимпиадашылардың жөні тіптен бөлек. Олардың өмірі – нағыз ерліктің, қайтпас қайсарлық пен мұқалмас ерік-жігердің үлгісі, – деді Қасым-Жомарт Тоқаев.</blockquote>Президент баршаға тең мүмкіндік беретін Әділетті Қазақстанды құрып жатқанымызды айтты. Жуырда қабылданған жаңа Конституция еліміздің жасампаз әлеуетінің айқын көрінісіне айналды.<blockquote>– Жұртшылықпен ақылдаса отырып әзірленген Жаңа Халық Конституциясы ұлттық рухымыздың қуаты мен ауызбіршілігімізді, толеранттылығымызды паш етеді. Заң мен тәртіп үстемдік ететін, білім, ғылым, мәдениет, технология, табиғатты аялау және спорт құндылықтары дәріптелетін қоғамда өмір сүруге деген ортақ ниетімізді көрсетеді. Тәуелсіздігіміз, егемендігіміз бен мемлекетіміздің аумақтық тұтастығы, азаматтардың құқықтары мен бостандықтары, еңбекқорлық, жауапкершілік, патриотизм, сондай-ақ адами капиталды жан-жақты дамыту сияқты маңызды қағидаттар Ата заңымызға арқау болды. Сондықтан халқымыз конституциялық реформаны біртұтас қоғам болып жаппай қолдады, әр азаматымыз еліміздің жарқын болашағы үшін дауыс берді. Себебі мән-мазмұны жаңарған Конституция әр адамның дамуына жағдай жасайды. Ата заңда адам капиталын, яғни, білім, ғылым саласын және инновацияны дамыту елдің стратегиялық бағыты ретінде айқындалды. Ұлт саулығын сақтауға баса мән берілді. Конституциямыздың басты мақсаты – еліміздің Тәуелсіздігін, Егемендігін және жерінің тұтастығын қорғау, азаматтардың құқықтары мен бостандықтарын қамтамасыз ету. Енді алдымызда тұрған өзекті мәселе – Конституциямыздың негізгі қағидаттарын елімізде және шетелде кеңінен түсіндіру және дәріптеу. Қазақстан параспортшылары өздерінің тамаша жетістігімен, жарқын жеңісімен мемлекетіміздің мызғымас құндылықтарын нығайтуға мол үлес қосып жүр деп айтсақ артық болмас, – деді Мемлекет басшысы.</blockquote>Қасым-Жомарт Тоқаев бүгінде мемлекет тарапынан паралимпиада саласына жан-жақты қолдау көрсетіліп жатқанын айтты.<blockquote>– Былтыр елімізде 4 заманауи инклюзивті спорт кешені жұмыс істей бастады. Алдағы уақытта осындай орталықтар әрбір аймақта көбірек ашылуы керек. Біздің демеушілер осы өте маңызды жұмыстан тыс қалмауы қажет деп ойлаймын. Жалпы, мемлекет паралимпиада қозғалысын қолдауға айрықша мән береді, бұл бағытты қаржыландыру көлемі де ұлғайды. Параспортшыларымыздың өжет мінезі мен мұқалмас жігері – көпке үлгі, өскелең ұрпаққа өнеге. Ұлттық паралимпиада құрамасының әр мүшесі Қазақстанның шексіз мүмкіндіктер елі екенін әлемге әйгіледі. Осыған орай, мен сіздерді жоғары мемлекеттік наградамен марапаттау туралы Жарлыққа қол қойдым. Баршаңызға құтты болсын! Амандық, табыс тілеймін! – деді Президент.</blockquote>Мемлекет басшысы ХIV Қысқы Паралимпиада ойындарындағы (Италия) жоғары спорттық жетістіктері үшін Ербол Хамитовты III дәрежелі «Барыс» орденімен марапаттады. Туризм және спорт министрлігіне қарасты Дене мүмкіндіктері шектеулі тұлғаларға арналған спорттық даярлау орталығының жаттықтырушылары Василий Коломиец пен Антон Ждановичке «Парасат» ордені, Солтүстік Қазақстан облысындағы «Үміт» мүмкіндіктері шектеулі тұлғаларға арналған спорт клубының жаттықтырушысы Аслан Тоқбаевқа «Құрмет» ордені табысталды.Ербол Хамитов әлемдік додаға аттанар алдында мемлекеттік Туды тапсырып, &nbsp;сенім артқаны үшін Президентке алғыс айтты.<blockquote>– Осы Паралимпиада ойындары мен үшін үлкен жауапкершілік болды. Сіздің қолдауыңызбен жеңіске жеттік. Бұған мамандардың және бапкерлердің сіңірген еңбегі зор. Сіздің қолдауыңыз әр спортшыға күш-қуат береді. Біз мұнымен тоқтамаймыз, – деді Паралимпиада чемпионы.</blockquote>

Мемлекет басшысы ХІV Қысқы Паралимпиада ойындарының чемпионы Ербол Хамитовты марапаттады 

<a href="https://kyzylorda-news.kz/">Kyzylorda-news.kz</a>&nbsp; &nbsp;ҚР Денсаулық сақтау министрінің бұйрығымен денсаулық сақтау және білім беру ұйымдарындағы тамақтану талаптарына өзгерістер <a href="https://kaz.inform.kz/news/kazakstan-mektepternde-tamaktanu-talaptari-zhanartildi-a27a5b/">енгізілді.</a>Құжатта негізгі ұғымдар нақтыланып, мектептерде тамақтануды ұйымдастыру тәртібі қайта қаралды. Соған сәйкес медицина қызметкерлерінің міндеттері де өзгертілді.Енді медицина қызметкері:· дұрыс тамақтану қағидаларын енгізіп, оның сақталуын қадағалайды; · тағам сапасын бақылау комиссиясының жұмысына қатысады; · тағам таратылар алдында ас дайындайтын жерде дайын астың сапасын күн сайын тексеріп, нәтижесін журналға тіркейді; · ерекше тағамды қажет ететін оқушылардың тізімін жасап, олардың тамақтануын бақылауда ұстайды; · оқушылар, ата-аналар мен мұғалімдерге аурудың алдын алу және салауатты өмір салты туралы дәрістер мен семинарлар өткізеді; · мәзір өзгерген жағдайда тағамның мөлшерін, құрамын және қуаттылығын қадағалайды; · асхана қызметкерлерінің денсаулығын апта сайын тексереді.Құжатта балалардың дұрыс тамақтану әдетін қалыптастыруға ерекше мән берілген. Осы мақсатта мектептерде тәрбиелік және түсіндіру шаралары жүргізіледі.Атап айтқанда:· оқушыларға дұрыс тамақтану мен салауатты өмір салты туралы түсінік беру үшін денсаулық бұрыштарын ұйымдастыру; · дұрыс тамақтану және оның денсаулыққа әсері туралы плакаттар, жадынамалар мен буклеттер әзірлеп, ілу және тарату; · «Қауіпсіздік сабақтары» аясында жылына кемінде екі рет дұрыс тамақтануға арналған сынып сағаттарын өткізу; · оқушылар мен олардың ата-аналарына тамақтану әдебі, тағамның пайдасы мен зияны туралы түсіндіру; · дұрыс тамақтануды насихаттайтын байқаулар мен акциялар ұйымдастыру; · «Дұрыс тамақтану апталығын» өткізу; · мектеп асханаларында тағамға қосымша тұз қоспау арқылы тұз тұтынуды азайту (ас үстелдерінен тұз салғыштарды алып тастау); · оқушылар мен ата-аналарға дұрыс тамақтану туралы ақпаратты мессенджерлер арқылы тарату.Сонымен қатар мектеп асханалары мен тамақтану орындарында сатылатын азық-түлікке қойылатын талаптар да жаңартылды.Бұдан бөлек, құжатта білім беру ұйымдарындағы тамақтану нормалары белгіленген.Бұйрық 2026 жылғы 31 наурыздан бастап күшіне енеді.Фото: Ақтөбе облысының әкімдігі

Еліміздегі мектептерде тамақтану талаптары жаңартылды 

<a href="https://kyzylorda-news.kz/">Kyzylorda-news.kz</a>&nbsp; Қазақстан ұлттық құрамасымен “Қайрат” командасының шабуылшысы Дастан Сәтпаев әлемдегі ең үздік 50 жас футболшылардың қатарында енді. Бұл туралы&nbsp;<a href="https://stan.kz/dastan-satpaev-alemdegi-en-darindi-futbolshilardin-kata-432108/">Stan.kz</a>&nbsp;ақпарат агенттігі хабарлады.Танымал Goal басылымы жасайтын NXGN 2026 жылғы үздіктер рейтингін жариялады.Айтулы рейтингте Дастан Сәтпаев 43-орынға жайғасқан.Басылым Дастан Сәтпаевтың қысқа уақыт ішінде жарқ етіп шығып, қазақ футболының болашағына айналғанын атап өтті. Ол&nbsp;аз уақыт ішінде қарқында дамуы еуропалық клубтардың да назарын аударған.<blockquote>“Қазақстаннан шыққан ұлы футболшылардың есімі көпшіліктің ойына бірден келе бермейді. Алайда Дастан Сәтпаев осы ұғымды өзгертіп, әлем жанкүйерлеріне өз елінен шыққан кем дегенде бір жұлдыз бар екенін дәлелдеуге жақын. "Қайрат" сапында жарқырай көрінген 17 жастағы шабуылшыға "Челси" қызығушылық танытып, оны жазда "Стэмфорд Бриджге" ауыстыру үшін төрт миллион еуро көлемінде келісім жасады", - делінген мақалада.</blockquote>Сонымен қатар автор Сәтпаевтың Чемпиондар лигасында гол соққан ең жас футболшылардың бірі екенін атап өткен:<blockquote>"Чемпиондар лигасында гол соққан ең жас футболшылардан Ансу Фати мен Ламин Ямаль ғана Сәтпаевтың алдын орап тұр. Сондай-ақ ол Қазақстан құрамасы тарихында ең жас дебютант әрі гол авторы атанған".</blockquote>Басылым футболшының шеберлігіне де тоқталған.<blockquote>"Ойын мәнері мен шабуылды аяқтау шеберлігі тұрғысынан оны Серхио Агуэроға ұқсатады. 2025 жылғы Қазақстан чемпионатында ол 14 гол соғып, 7 нәтижелі пас берді. Енді оның BlueCo жүйесіне өткеннен кейін жаңа деңгейге қалай бейімделетіні қызық", – делінген материалда.</blockquote>Фото:”Қайрат” ФК

Дастан Сәтпаев әлемдегі ең дарынды футболшылардың қатарына енді

<a href="https://kyzylorda-news.kz/">Kyzylorda-news.kz</a>&nbsp; Іс-шараның негізгі мақсаты – тұрмыстық зорлық-зомбылықтың алдын алу, қиын өмірлік жағдайдағы отбасыларды ерте анықтау және оларға жан-жақты қолдау көрсету.Іс-шара барысында білім беру, денсаулық сақтау және әлеуметтік қорғау салаларының мамандарымен бірлескен мобильді топтар жұмыс істейді. Профилактикалық есепте тұрған тұлғалар тексеріліп, тұрғындар арасында түсіндіру жұмыстары жүргізіледі.Қажет болған жағдайда зардап шеккен азаматтарға құқықтық және психологиялық көмек көрсетіледі.Полиция азаматтарды тұрмыстық зорлық-зомбылық фактілері туралы дер кезінде хабарлауға шақырады. Әрбір өтініш міндетті түрде қаралып, заң аясында тиісті шаралар қабылданады.Фото: polisia.kz

 Қызылорда облысы аумағында «Қауіпсіз үй» жергілікті рейдтік іс-шарасы өткізіледі

<a href="https://kyzylorda-news.kz/">Kyzylorda-news.kz</a>&nbsp; Ломбардтан ресімделген қарыз кредит немесе ипотека алуға кедергi болмайды, алайда ол&nbsp;қаржы ұйымының шешіміне әсер етуі мүмкін, деп хабарлайды Қаржы нарығын реттеу және дамыту агенттігінің баспасөз қызметі, – деп хабарлайды <a href="https://kaz.inform.kz/news/lombardtagi-kariz-ipoteka-aluga-kederg-keltre-me-ce00cb/">KAZINFORM</a>Өтінімді қарау кезінде банктер мен микроқаржы ұйымдары қарыз алушының қаржылық жағдайын және оның қарыздарын өтеу қабілетін бағалайды. Кредиттік тарих мен борыш жүктемесінің деңгейі маңызды рөл атқарады.<blockquote>–&nbsp;Егер қарыз алушының ломбард алдында мерзімі өткен берешегі болса, бұл мақұлдау мүмкіндігін азайтады. Мұндай міндеттемелер борыш жүктемесін есептеу кезінде басқа кредиттермен және микрокредиттермен тең ескеріледі. Ломбардтар қарыздар туралы ақпаратты кредиттік бюроларға беруге міндетті, себебі мұндай қарыздар басқа қарыздарға ұқсас, ақылылық, мерзімділік және қайтарымдылық шарттарында беріледі. Егер қарыз алушы микрокредитті уақытында өтемесе, ломбард кепілге қойылған мүлікті кемінде 30 күн сақтауға міндетті. Осы кезеңде қарыз алушы қарызды төлеп, өз затын қайтара алады,&nbsp;— дейді агенттік мамандары.</blockquote>Осы мерзім өткеннен кейін ломбард кепілді сатуға не&nbsp;оны өз меншігіне ресімдеуге құқылы. Нәтижесінде ломбардтағы заттарды кепілге қою туралы шарт және микрокредит беру туралы шарт өз қолданысын тоқтатады.Қарыздың тоқтатылу фактісін кепілді сату актісі немесе оны ломбардтың меншігіне айналдыру туралы шешім және қарызды өтеу туралы анықтама сияқты құжаттар растайды.Кредит беру туралы шешімді банк немесе микроқаржы ұйымы заңнамалық талаптарды ескере отырып, сондай-ақ өзінің ішкі кредиттік саясатына, қарыз алушының төлем қабілеттілігін бағалауға және қабылданатын тәуекелдер деңгейіне сәйкес дербес қабылдайтынын назарға алу қажет.Фото: Gov.kz

Ломбардтағы қарыз ипотека алуға кедергі келтіре ме?

<a href="https://kyzylorda-news.kz/">Kyzylorda-news.kz</a> Қазақстанда көмір генерациясын дамыту жөніндегі ұлттық жоба бекітілді. Оның аясында жеңілдетілген жаңа ипотека бағдарламасын іске қосу жоспарланып отыр, деп хабарлайды үкіметке сілтеме жасаған <a href="https://kaz.nur.kz/nurfin/banks/2357621-qazaqstanda-tagy-bir-zhengildetilgen-ipoteka-iske-qosylmaq-ol-kimge-arnalgan/">KAZ.NUR.KZ.</a>Үкіметтің баспасөз қызметінің мәліметінше, премьер-министр Олжас Бектенов қол қойған құжат Қазақстанның 2030 жылға дейінгі энергетикалық қауіпсіздігінің стратегиясын айқындайды, сондай-ақ индустрияландыру және цифрлық экономиканы дамыту барысында қажеттілігі бірнеше есе арта түсетін базалық қуаттардың тапшылығын жоюға бағытталған."Ұлттық жобада 7,8 ГВт қуат көзін енгізу және жаңарту қарастырылған. Сегіз жаңа энергия өндіру көзін салу жоспарланған, оның ішінде Екібастұз (2 640 МВт), Курчатов (700 МВт) және Жезқазғандағы (500 МВт) ірі нысандар, сондай-ақ Көкшетау, Семей және Өскемендегі заманауи ЖЭО-лар бар.Сонымен қатар Ақсу ГРЭС, Екібастұз ГРЭС-2 және Қарағанды энергия торабын қоса алғанда, жұмыс істеп тұрған 11 стансаны терең жаңғырту басталады. Бұл жұмыстар саладағы негізгі жабдықтардың тозу деңгейін 2030 жылға дейін 12,6 пайызға төмендетуге мүмкіндік береді", - делінген хабарламада.Жобаларды жүзеге асыру бюджеттен тыс қаражатқа, яғни инвестициялар тарту жолымен орындалады. Инвестициялардың жалпы көлемі – 7,5 трлн теңгеден астам.Ұлттық жобада экологияға және "таза көмір" технологияларын енгізуге ерекше назар аударылып отыр. Енді жаңадан салынатын құрылыстар тек қана заманауи технологиялық шешімдерді қолдана отырып жүргізіледі.Сонымен қатар жобаның әлеуметтік блогы кадрлық өткір проблемаларды шешуге бағытталған.<blockquote>"Жаңа жұмыс орындарын құру, оның ішінде 4,5 мыңға жуық тұрақты жұмыс орындарын ашу қарастырылған және ауқымды әлеуметтік қолдауды іске қосу көзделіп отыр. "Отбасы банкімен" бірлесіп көмір электрстансаларының қызметкерлері үшін жеңілдікті ипотека енгізіледі. Одан бөлек салалық жоғары оқу орындарының базасында мамандардың біліктілігін жүйелі түрде арттыру жоспарланған", - делінген хабарламада.</blockquote>Бұдан бөлек, жоба жаңарған энергия жүйесінің тұрақты жұмысын жолға қою мақсатында өндіруші және көлік салаларымен үйлестірілген. 2030 жылға қарай энергетикалық мақсаттағы көмірге қосымша сұраныс жылына шамамен 20 млн тонна болмақ. Ол үшін ұлттық жоба ашық вагондар паркін кеңейтуді (тәулігіне қосымша 600 бірлік), теміржол инфрақұрылымын жаңғыртуды және ішкі қажеттіліктер үшін отын тасымалдаудың болжамды тарифтік дәліздерін енгізуді көздейді.Фото: Fingramota.kz &nbsp;

Қазақстанда тағы бір жеңілдетілген ипотека іске қосылмақ

<a href="https://kyzylorda-news.kz/">Kyzylorda-news.kz</a> «Өндірістік аймақ» жобасы аясында аудан орталығы Әйтеке би кентінде «АгроОптСервис» ЖШС директоры Бекболат Бибалаев жүзеге асырған «Көкөніс өнімдерін сақтайтын қойма салу» жобасы қайта жанданбақ. Қазалы ауданының әкімі Алмасбек Есмаханов шағын индустриалды аумақтағы көкөніс сақтау қоймасының жұмысын көрді.&nbsp;Аталған жоба бұған дейін 2020 жылы іске қосылып, 2022 жылға дейін жұмыс жасаған. Кәсіпкер «Бизнестің жол картасы – 2020» бағдарламасы аясында 21,0 млн теңге несие алып, қажетті құрал-жабдықтармен қамтамасыз еткен.Биылғы жылдың тамыз айында қойманың жұмысын қайта іске қосу жоспарлануда. Қуаттылығы 500 тоннаға дейін көкөніс өнімдерін сақтауға мүмкіндік беретін нысан толық іске қосылғанда 10 адам тұрақты жұмыспен қамтылады. Қазіргі таңда мұнда 4 адам еңбек етуде.Аудан басшысы жобаның қайта жандануы ауданның азық-түлік қауіпсіздігін қамтамасыз етіп қана қоймай, жергілікті тұрғындарды жұмыспен қамтуға да оң ықпалын тигізетінін айтты.&nbsp;Осыған сәйкес, салалық орынбасарына кәсіпкерлік нысанды қажетті инфрақұрылыммен қамтамасыз ету мәселесін нақты бақылауға алып, тиісті жұмыстарды жедел ұйымдастыруды тапсырды.

Көкөніс сақтау қоймасының жұмысымен танысты

<a href="https://kyzylorda-news.kz/">Kyzylorda-news.kz</a> 2026 жылы Қазақстанда «Жастар практикасы» жобасы аясында 25 мыңға жуық жасты жұмыспен қамту жоспарланып отыр. Бұл туралы Еңбек және халықты әлеуметтік қорғау министрлігі мәлімдеді, деп хабарлайды <a href="https://baq.kz/zhastar-praktikasy-qay-mamandyqtarga-suranys-zhogary-320019958/">BAQ.KZ</a> тілшісі.Бағдарлама еңбек нарығына енді қадам басқан түлектер үшін алғашқы жұмыс тәжірибесін жинақтауға бағытталған. Жобаға жасы 35-тен аспаған, оқу орнын тәмамдаған жұмыссыз азаматтар қатыса алады. Ол үшін Мансап орталығына өтініш беру қажет.Практика барысында қатысушылар тек жұмыс істеп қана қоймай, кәсіби ортаға бейімделу мүмкіндігіне ие. Әрбір жас маманға жұмыс беруші тарапынан тәлімгер бекітіліп, оның кәсіби дағдыларды меңгеруіне қолдау көрсетіледі.Жалақы төлемдері мемлекет есебінен жүргізіледі. Қаржыландыру «Азаматтарға арналған үкімет» мемлекеттік корпорациясы арқылы жүзеге асырылады. Қаражат жұмыс беруші ұсынған деректер негізінде қатысушылардың банк шоттарына ай сайын аударылады, - дейді министрлік.2026 жылғы ақпан-наурыз айларының қорытындысы бойынша жоба аясында 423 адам жұмыспен қамтылған.Ең сұранысқа ие мамандықтар қатарында:<ul><li style="text-align:justify;">мейіргер – 124 адам;</li><li style="text-align:justify;">заңгер – 66 адам;</li><li style="text-align:justify;">шет тілі мұғалімі – 57 адам;</li><li style="text-align:justify;">тәрбиеші – 47 адам;</li><li style="text-align:justify;">бастауыш сынып мұғалімі – 43 адам.</li></ul>Бұл көрсеткіштер білім беру мен әлеуметтік саладағы кадрларға қажеттілік жоғары екенін көрсетеді.Республика бойынша орташа жалақы мөлшері 129,7 мың теңгені құрады.Министрлік мәліметінше, «Жастар практикасы» жобасы жастар арасындағы жұмыссыздық деңгейін төмендетіп қана қоймай, білікті мамандарды қалыптастыруға ықпал етеді.

Жастар практикасы: Қай мамандықтарға сұраныс жоғары?

<a href="https://kyzylorda-news.kz/">Kyzylorda-news.kz</a> 2026 жылғы 16 наурыздағы жағдай бойынша Қазақстанда АИ-95 бензинінің бағасы шамамен литріне 0,51 доллар.&nbsp;Бұл әлемдік орташа көрсеткіштен&nbsp;шамамен үш есе төмен. &nbsp;Бұл туралы&nbsp;<a href="https://stan.kz/kazakstan-alemdegi-zhanarmay-bagasi-en-arzan-elderdin-k-432068/">Stan.kz&nbsp;</a>ақпарат агенттігі&nbsp;GlobalPetrolPrices сайтына сілтеме жасап хабарлайды.Әлемдік рейтингте Қазақстан тоғызыншы орында&nbsp;және жанармай бағасы қолжетімді елдер қатарында тұр. Бұл топқа рес­урсқа байлығы немесе субсидиялар арқылы жанармай бағасын төмен ұстайтын мемлекеттер кіреді: Ливия, Иран, Венесуэла, сондай-ақ Кувейт, Алжир, Түркменстан, Мысыр, Қатар, Сауд Арабиясы, Бахрейн және Оман.Бұл елдердің кейбірі жанармай бағасын минималды деңгейде ұстайды, бұл әлеуметтік саясаттың бір бөлігі ретінде қарастырылады. Сонымен қатар&nbsp;кей елдерде жанармай бағасын төмен ұстау үшін олардың экономикасы негізінен мұнай мен газ сияқты шикізатқа тәуелді болады. Егер шикізат бағасы құлдыраса, сол елдерде&nbsp;қиындық туады. Қазақстан бұл елдермен салыстырғанда тұрақтырақ көрінеді, бірақ бізде де бензин бағасын қалыптастыруда мемлекеттің шешімдері маңызды рөл атқарады. Яғни, бағаны нарық өзі емес, үкіметтің реттеуі де айтарлықтай әсер етеді.Экономисттердің айтуынша, ресурстардың бағасын ұзақ уақыт бойы төмен ұстау кейде “тәуелділік”&nbsp;тәрізді мінез-құлық&nbsp;қалыптастырады. Төмен бензин бағасы бірқатар жүйелік әсерге әкеліп соғады, олар&nbsp;бірден байқалмайды:<ul><li style="text-align:justify;">Біріншіден, бұл бюджетке және мұнай өңдеу секторына қысым жасайды. Төмен маржа модернизация мен инвестиция мүмкіндіктерін шектейді;</li><li style="text-align:justify;">Екіншіден, отын ішкі тұтыну көлемін арттырады. Бұл жолдардың жүктемесін, шығарындыларды көбейтеді және инфрақұрылымның тез тозуына себеп болады;</li><li style="text-align:justify;">Үшіншіден, көрші елдермен баға айырмашылығы пайда болады, бұл отынның заңды және заңсыз түрде елден шығарылуына итермелейді.</li></ul>Ұзақ мерзімді перспективада мұндай факторлар экономиканың жалпы тиімділігін төмендетуі мүмкін және жанармай бағасында тікелей көрінбейтін қосымша шығынңа әкеп соғады.Дамыған елдерде жағдай керісінше. Еуропа, Жапония және Оңтүстік Кореяда бензин бағасы айтарлықтай жоғары,&nbsp;көбіне&nbsp;литрі 3 доллардан асады.Бұл мемлекеттердің саясатына байланысты: жоғары баға салықтар арқылы қалыптасады, ал сол салықтар инфрақұрылымды дамытуға, экологиялық жобаларға және қоғамдық көлікті жетілдіруге жұмсалады. Сондықтан рейтингті зерттеген талдаушылардың айтуынша,&nbsp;дамыған елдедің экономикасында жанармайдың&nbsp;қымбат болуы айтарлықтай мәселе емес, керісінше реттеу мен тұрақты даму құралы ретінде қарастырылады.Қазақстан үшін жанармай&nbsp;бағасының төмен болуы әлі де маңызды әлеуметтік фактор. Осылайша логистика мен ауыл шаруашылығында бизнестің&nbsp;шығындары&nbsp;азаяды.&nbsp;Дегенмен, ел алдында саланың тиімділігін біртіндеп арттыру міндеті тұр. Бұл жанармайдың қолжетімділігі мен нарықтық механизмдер арасындағы тепе-теңдікті табуды қажет етеді.<blockquote>“Қазіргі&nbsp;модельді қысқа мерзімде сақтау мүмкін, бірақ ұзақ мерзімде баға қалыптастыруда икемдірек тәсіл қажет. Қазір Қазақстан ең қолжетімді бензині бар елдер қатарында, бұл айтарлықтай экономикалық артықшылық. Мұның бәрі күрделі реттеу жүйесінің нәтижесі&nbsp;және негізгі міндет –&nbsp;бұл артықшылықты экономикалық тиімділіктің төмендеуіне әкелмейтіндей ету”, –&nbsp;дейді сарапшылар.</blockquote>Фото: Нұрболат Нұржаубай

Қазақстан әлемдегі жанармай бағасы ең арзан елдердің қатарына енді

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың қатысуымен ІІ дәрежелі «Айбын» орденінің иегері, полиция аға лейтенанты Талғат Қозыбаевты еске алуға арналған республикалық турнирдің ашылу салтанаты өтті. Турнирдің ашылуына облыстық полиция департаментінің бастығы, полиция полковнигі Серік Ергешов, облыстық ішкі істер органдары мен Ұлттық Ұлан ардагерлері кеңесінің төрағасы Әмірбек Шаймағанбетов және Талғат Қозыбаевтың отбасы арнайы қатысты.Аудан басшысы бейбіт күннің батыры Талғат Қозыбаевтың өнегелі өмірі мен ерлігін атап өтіп, республикалық турнирге қатысушыларға сәттілік тіледі.<blockquote>– Халық даналығында «Ерлік ешқашан ұмытылмайды» деген нақыл бар. Қызмет бабында қайсарлықпен қаза тапқан батыр ұлымыз, полиция аға лейтенанты Талғат Қозыбаевтың есімі әркез жаңғырып тұрады. Өйткені, өз антына адал болған перзенттерін ел ешқашан ұмытпайды.Талғат Есентайұлы аудан орталығындағы №131 орта мектепте білім алып, Қарағанды қаласында заң факультетінде жоғары білім меңгерген. Болашағын құқық қорғау саласымен байланыстырған азамат ел тыныштығы жолында қызмет етіп, антына адал болды. Бейбіт күннің батыры Талғат Есентайұлы небәрі 25 жасында қылмыскердің қолынан қаза тапты. Ел тыныштығын қорғаудағы &nbsp;ерлігі үшін ІІ дәрежелі «Айбын» орденімен марапатталды. Оның ержүректігі мен табандылығы, азаматтылығы өскелең ұрпаққа өшпес үлгі-өнеге етілуде. Өзі қайтыс болған Тартоғай &nbsp;елді мекенінде және өзі туып өскен О.Мәлібаев мөлтек ауданындағы көшелерге батыр ұлдың есімі берілді. Қазақстан Республикасы Үкіметінің Қаулысымен өзі оқыған орта мектеп Талғат Қозыбаевтың есімімен аталады. &nbsp;Жыл сайын батыр ұлды еске алуға арналған казақ күресінен республикалық турнир өткізіліп келеді. Бұл турнир – тек спорттық дода ғана емес, батырларымыздың рухына тағзым, оның есімін ұрпақ жадында мәңгі қалдыру жолындағы игі шара, — деді Берік Әбдіғаппарұлы.</blockquote>Сонымен қатар, облыстық полиция департаментінің бастығы, полиция полковнигі Серік Ергешов, облыстық ішкі істер органдары мен Ұлттық Ұлан ардагерлері кеңесінің төрағасы Әмірбек Шаймағанбетов және батыр ұлдың әкесі Есентай Қозыбаев сөз сөйлеп, турнирдің мән-маңызына тоқталып, өтуіне атсалысқан азаматтарға алғыстарын білдірді. Арнайы "Алғыс хаттар" табыс етті.Жарысқа еліміздің түкпір-түкпірінен 200-ге жуық жас балуандар қатысып, өз шеберліктерін көрсетуде.<img src="https://knadmin.beoblood.kz/uploads/photo_output_40_e6e1cd022b.jpeg" alt="турнир">

Жас балуандар республикалық турнирде бақ сынады

<a href="https://kyzylorda-news.kz/">Kyzylorda-news.kz</a> “Евразия” спорт кешенінде велоспорттан Қазақстан Республикасы Кубогінің салтанатты ашылу рәсімі өтті. Жарыс бағдарламасына ерлер арасында көпкүндік дода, әйелдер арасында жекелей жарыс, сондай-ақ юниор ұлдар арасында «Критериум» бағдарламасы енгізілген.Салтанатты шараға облыстық дене шынықтыру, спорт және туризм басқармасының бөлім басшысы Сағидат Бертай, Қызылорда облысының велоспорт федерациясының президенті Рахат Ілияс, жарыстың бас төрешісі Алла Василенкова және спорт саласының ардагерлері қатысып, жарыс қатысушыларына сәттілік тіледі. Сондай-ақ, ашылу салтанатында велоспорттан ҚР спорт шебері атағын алған жас спортшылар марапатталды.&nbsp;Аталған жарысқа алғаш рет Әзірбайжан мемлекеті, сондай-ақ Астана, Алматы, Шымкент қалалары мен еліміздің өзге де өңірлерінен келген жалпы саны 12 команда қатысады. Спортшылар бірнеше күн бойы тас жолда өзара бақ сынап, өз шеберліктерін көрсетпек.Бұл жарыс аймақта велоспортты дамытуға және жас спортшылардың өзара тәжірибе алмасуына үлкен мүмкіндік болмақ.<img src="https://knadmin.beoblood.kz/uploads/Velosport_turnir_2_2672b239bd.jpg" alt="Велоспорт турнир 2.jpg">

Велоспорттан Қазақстан Республикасының кубогі басталды

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмахановтың төрағалығымен Сырдария өзеніндегі көктемгі су көтерілу кезеңіндегі қауіпсіздікті қамтамасыз ету және аудан аумағындағы санитарлық тазалық мәселелері бойынша кеңейтілген мәжіліс өтті.Жиында Сырдария өзеніндегі су деңгейінің көтерілуіне байланысты атқарылатын жұмыстар жан-жақты талқыланды. Алдын ала мәліметтерге сәйкес, Көктөбе су бекеті арқылы облыс шекарасына секундына 850 текше метр су келуі күтілуде. Осыған орай, аудан басшысы тиісті сала басшыларына су басу қаупі бар аймақтардың қауіпсіздігін қамтамасыз ету, көлдер жүйесі мен жайылымдық жерлерге суды тиімді бағыттау, қорғаныс бөгеттерін нығайту және инженерлік инфрақұрылымды ретке келтіру бойынша нақты тапсырмалар берді.Сонымен қатар жағалауларды бекіту, бөгеттерді жөндеу, каналдар мен арықтарды тазалау, су өткізгіш құрылғыларды жаңарту жұмыстарын белгіленген жоспарға сәйкес сапалы әрі уақытылы жүргізуді қатаң тапсырды. Төтенше жағдайлардың алдын алу мақсатында эвакуациялық пункттердің дайындығы пысықтап, түсіндірме және оқу-жаттығу шараларын тұрақты өткізу қажеттігін атап өтті.Мәжілістің күн тәртібінде Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» республикалық экологиялық акциясы аясындағы жұмыстар да қаралды. Осы ретте аудан әкімі Әйтеке би кенті мен ауылдық округтердің санитарлық тазалығын сынға алып, бірқатар кемшіліктерді атап өтті.Тазалық жұмыстарын жүйелеу, елді мекендердегі қоқыс мәселесін шешу, абаттандыру мен көгалдандыруды күшейту, заң талаптарын сақтамай, белгіленбеген орындарға қоқыс тастаған тұрғындарға қатысты әкімшілік шараларды күшейту қажеттігін ескертті.Жол бойындағы санитарлық тазалық, әсіресе «Батыс Еуропа – Батыс Қытай» халықаралық автодәлізі бойындағы тазалық мәселесін қамтамасыз ету бойынша тиісті мекемелерге нақты тапсырмалар берілді.Жиын қорытындысы бойынша аудан әкімі барлық жауапты тұлғаларға берілген тапсырмалардың сапалы әрі мерзімінде орындалуы қатаң бақылауда болатынын ескертті.<img src="https://knadmin.beoblood.kz/uploads/azaly_tazaly_m_selesi_2_6aabda971b.jpg" alt="Қазалы тазалық мәселесі 2.jpg">

Архив