<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев жұмыс сапарымен Қазалы ауданы барды. Аймақ басшысының қатысуымен әлеуметтік осал топтағы отбасылар үшін сатып алынған 120 пәтерлі 60 тұрғын үйдің кілтін табыстау рәсімі өтті. Оған ҚР Парламентінің Сенат депутаты Наурызбай Байқадамов, жауапты сала басшылары, еңбек ардагерлері мен қала тұрғындары қатысты.Өңір басшысы жаңа пәтер иелерін қоныс тойымен құттықтап, облыс көлеміндегі құрылыс жұмыстарын тізбектеді.<blockquote>«Президентіміздің және Үкіметтің қолдауымен Сыр өңірінде соңғы жылдары мақсатты бастамалар қолға алынып, ауқымды жобалар жүзеге асуда.Аймақтағы электр энергия тапшылығы мәселесін шешу мақсатында Қызылорда қаласында қуаттылығы 240 мегаватты құрайтын 215 млрд.теңгеге жаңа жылу электр орталығының құрылысы қарқынды жүруде. Бүгінде инвестор – «Акса Энерджи» түрік компаниясы жылу орталығының құрылысына 115 млрд.теңгеден астам инвестиция салды. Келер жылы қыркүйек айында ел игілігіне табысталады.Мемлекет басшысының қолдауымен аймағымыз қарқынды құрылыс алаңына айналуда. Өңірде құны 123 млрд. 400 млн. теңгеге 81 әлеуметтік нысан салынуда. Құны 58 млрд. 900 млн. теңгеге 332 мың шаршы метрді құрайтын жаңа 452 көппәтерлі тұрғын үйлердің құрылысы жүргізілді.Бұдан бөлек, жергілікті кәсіпкерлер, облыстан шыққан меценаттар Сыр елін көркейтуге, ауылдарды дамытуға белсенді араласып, өз үлестерін қосуда. Аймағымызда демеушілер есебінен барлығы 50 млрд. теңгенің жобалары жүзеге асуда.Қазалы ауданында да тұрғындарының өзекті деген мәселелерін шешуге бағытталған ауқымды жұмыстар атқарылуда.Өткен жылы Қазалы ауданының 95 жылдық мерейтойы қарсаңында халықтың әлеуметтік осал топтары үшін салынған баспаналар кілтін қазалылық 50 отбасыға табыстаған болатынбыз.Биыл да үлгілі үрдіс жалғасын тауып, жаңа үйлерді тұрғындарға табыстаудамыз. Ауданның ажарын айшықтай түсетін бұл үйлер инженерлік инфрақұрылым желілерімен толықтай қамтылған. Қадірлі жерлестер, жаңа пәтер иелері жаңа қоныстарыңыз құтты болсын!», - деді Нұрлыбек Нәлібаев.</blockquote>Іс-шарада жаңа үйлердің құрылысын жүргізген мердігер мекеменің мамандарына облыс әкімінің Алғыс хаты табысталып, Қызылорда қаласы, Арал, Қазалы және Сырдария аудандарының Құрметті азаматы, «Құрмет» орденінің иегері Айтбай Көшербаев батасын берді.Үй беру рәсімінен кейін аймақ басшысы тұрғындармен кездесті. Әлеуметтік-экономикалық дамудың бағыт-бағдары, инфрақұрылымдық жобалардың жүзеге асу барысы туралы айтып, ой-пікірлерді тыңдады.<img src="https://knadmin.beoblood.kz/uploads/azaly_audanynda_120_otbasy_baspanaly_boldy_1_ecae4d1bad.jpg" alt="Қазалы ауданында 120 отбасы баспаналы болды 1.jpg"><img src="https://knadmin.beoblood.kz/uploads/azaly_audanynda_120_otbasy_baspanaly_boldy_2_1577ca649e.jpg" alt="Қазалы ауданында 120 отбасы баспаналы болды 2.jpg"><img src="https://knadmin.beoblood.kz/uploads/azaly_audanynda_120_otbasy_baspanaly_boldy_3_ae25aecdde.jpg" alt="Қазалы ауданында 120 отбасы баспаналы болды 3.jpg">Фото: Қызылорда облысы әкімінің баспасөз қызметі

 Қазалы ауданында 120 отбасы баспаналы болды

<a href="https://kyzylorda-news.kz/">Kyzylorda-news.kz</a> Бүгін қала әкімі Нұржан Ахатовтың төрағалығымен 9 айдың қорытындысы бойынша аппарат мәжілісі өтті. Жиынның күн тәртібінде үш мәселе қаралды.Алдымен орындаушылық тәртіп бойынша қала әкімінің аппарат басшысы Мұрат Тасқараев хабарлама жасап, хаттамалық тапсырмалар мен хаттардың орындалу барысы туралы баяндады.Орындаушылық тәртіп мәселесі жергілікті әкімдіктердің жұмыс сапасының негізгі индикаторының бірі. Сондықтан, барлық мәжілістердің хаттамалық тапсырмаларын мерзімінде әрі сапалы орындау маңызды. Осы ретте, қала әкімі түскен арыз-шағымдардың мерзімінде орындалуын, сондай-ақ, «Е-Өтініш» ақпараттық жүйесі мен «Таза Қазақстан» телеграм бот арқылы жолданған өтінімдердің орындалуында мерзім бұзушылықтарға жол берілмеуін қатаң тапсырды.Келесі мәселе, қалалық құрылыс бөлімінің басшысы Жеңіс Файзуллаевтың 9 айдың қорытындысы бойынша атқарған жұмыстар мен алдағы міндеттер туралы баяндамасы тыңдалды.Биыл құрылыс саласында ауқымды жұмыстар атқарылуда. Биылға бөлінген қаражатқа тұрғын үй құрылысы, электр желілері, ауыз су жүйесі мен кәріз желілерін қайта жаңғырту, елді мекендерді газдандыру сынды жұмыстар жүргізілуде. Жиында келер жылға жоспарланған жобалар да тиянақталды.Айта кету керек, биыл «Газ тасымалдау жүйесін дамыту» бағдарламасы шеңберінде Сабалақ елдімекеніне газ тарту жобасы бойынша құрылыс жұмыстары жүруде. Жобаны 2025 жылы аяқтауға энергетика басқармасына бюджеттік өтінім толықтай жолданған. Сондай-ақ, қаладағы орамішілік газ құбырлары желісін салу мақсатында «Гагарин», «Титов», «СПМК-70», «Арай», «КБИ», «Сәулет», «Саяхат», «Бәйтерек», Орталық, және «Шұғыла» шағын аудандарындағы газ құбырлары жүргізілмеген көшелерге газ тартуға қаржы қаралып, мердігер анықталды. Ендігі ретте, қалаға қарасты елді мекендерден Қызылөзек ауылдық округіне газ жүйесін тартуға жобалау жұмыстары басталмақ.Шаһар басшысы жауапты сала сапаға аса мән беріп, орындалу мерзімдерін қадағалап отыруын тапсырды.Күн тәртібіндегі үшінші мәселе, қаладағы жолдардың жай-күйі туралы қалалық тұрғын үй – коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтанов баяндама жасап, атқарылып жатқан жұмыстар жөнінде тоқталып өтті.Биылғы жылға қаламыздың жол-көлік инфрақұрылымын дамыту бағытында құны 22 млрд. теңге болатын 70 жобаны жүзеге асыру жоспарланған. Оның ішінде, Назарбаев даңғылынан Тәуелсіздікке 25 жыл даңғылына дейінгі жаңа жол пайдалануға берілді. Жаппасбай батыр көшесі және Е. Көшербаев көшесі кеңейтілді. Тәуелсіздікке 25 жыл даңғылы бойындағы «Қызылжарма» каналы арқылы өтетін автомобиль көпірінің құрылысы, сондай-ақ, Қ. А. Яссауи көшесін, Тәуелсіздікке 25 жыл даңғылын және «Самара-Шымкент-Қызылорда» аудандық маңызы бар автомобиль жолын кеңейту жұмыстары қарқынды жүргізілуде. Мүлдем жол құрылысы жүргізілмеген 15 көшеде тас жол құрылысы аяқталса, 35 көшедегі жүргізілген орташа жөндеу жұмыстарынан бөлек, қосымша 11 көшеге жол жөндеу жұмыстарын жүргізу қарастырылып отыр. Қаламыздың шет аймақтары қамтылған 107 көшеге күрделі жөндеу жұмыстарын жүргізуге жоба әзірлеу жоспарланып отыр.Жиынды қорытындылай келе, шаһар басшысы аппараттық мәжілістің қорытындысы бойынша жауапты сала басшыларына бірқатар тапсырмалар берді.Фото: Қала әкімдігі

Аппарат мәжілісі өтті

<a href="https://kyzylorda-news.kz/">Kyzylorda-news.kz</a> Кез келген адам мамандық таңдауда қателеспеуі керек. Өзінің өмірін медицина саласымен байланыстырған жандарға тіпті үлкен жауапкершілік жүктеледі.Облыстық жұқпалы аурулар ауруханасы "БОКС" бөлімшесінің меңгерушісі Гүлжаухар Сүгірбаева бұл тұрғыда қателік жасамаған. Отыз жылдан астам уақыт денсаулық сақтау саласында еңбек етіп келе жатқан жанның абыройы асқақ, білімі терең, біліктілігі жоғары.Гүлжаухар Калдыбайқызының жолдасы да медицина саласында қызмет жасайды. Облыстық көпбейінді ауруханасы "Нейрохирургия" бөлімінің меңгерушісі – Шынжырбай Оразмаханұлы. Алтын қолды дәрігердің есімі Сыр медицинасы тарихында алтын әріптермен жазылмақ. Талай науқасқа сәтті ота жасап, дертінен сауықтырып келеді. Шынжырбай Оразмаханұлын алыс және жақын шет елдерден арнайы іздеп келетін науқастар аз емес.<blockquote>"Мен күйеуіммен Ақтөбе мемлекеттік медициналық институтында бірге оқыдық, үлкен салаға бірге қадам бастық. Отау құрғанымызға биыл 31 жыл. Азаматым екеуміз бір-бірімізге тіреу болып келеміз. Атқаратын қызметіміз оңай емес, науқастар бізге өзінің өмірін сеніп тапсырады", – дейді Гүлжаухар Калдыбайқызы.</blockquote>Дәрігер бүгінде "БОКС" бөлімшесінің меңгерушісі, аса қауіпті жұқпалы ауруларға шалдыққан науқастарды емдейді. Жүктелген жауапкершіліктің салмағы аса ауыр. Гүлжаухар Калдыбайқызы төрт баланың анасы, бес немересінің сүйікті әжесі.<blockquote>"Отағасы екеуміз балаларымыздың тәрбиесіне үлкен көңіл бөлдік. Перзенттеріміз елге қызмет жасайтын азаматтар болғанын қалаймыз. Ұлым Дастан біздің жолымызды жалғап келеді. Астана медициналық университетін бітірді, бүгінде Елордадағы емдеу мекемесінде уролог - дәрігер болып еңбек етуде. Мен балаларымның болашағына үлкен үмітпен қараймын", &nbsp;– деді дәрігер.</blockquote><img src="https://knadmin.beoblood.kz/uploads/G_lzhauhar_S_girbaeva_2_71ef40d6b2.jpg" alt="Гүлжаухар Сүгірбаева 2.jpg"><img src="https://knadmin.beoblood.kz/uploads/G_lzhauhar_S_girbaeva_2b42b09896.jpg" alt="Гүлжаухар Сүгірбаева.jpg">

 Гүлжаухар Сүгірбаева: Ақ халатымызға дақ түсірмеу – басты парыз! 

<a href="https://kyzylorda-news.kz/">Kyzylorda-news.kz</a> «AMANAT» партиясы Қызылорда облыстық филиалының мобильді көшпелі қабылдау тобы Жалағаш ауданына қарасты Мақпалкөл және Мәдениет ауылдық округтерінде болып, халықтың толғандырған сауалдарына жауап берді.Қабылдауға партияның облыстық филиалының төрағасы Алмасбек Есмаханов, облыстық мәслихаттағы фракция мүшесі Әмірбек Шаймағанбетов және тиісті &nbsp;басқарма өкілдері мен заңгерлер арнайы қатысты.Екі ауылда өткен мобильді қабылдауға&nbsp;азаматтар келіп, түрлі бағыттағы өтініштерін білдірді. &nbsp;Соның ішінде, ауылдағы көшелерді жөндеу, жарықтандыру, инфрақұрылым мәселелерін реттеуге қатысты сауалдар жолданды.Қабылдауға арнайы қатысқан заңгерлермен мүгедектігі бар азаматтардың заңдылық аясында пәтер алу жолдарын қарастыру мәселесі талқыланды. Ауылдағы жөндеу жұмысын қажет ететін әлеуметтік нысандардың&nbsp;жағдайына алаңдаған азаматтар да өз ұсыныс-тілектерін білдірді.Тұрғындардың сауалдары бойынша заң аясында түсіндірме жұмыстары жүргізіліп, тиісті сала басшылары жауап берді. Елді мекен тұрғындарының өтініштерін тыңдап, мобильді қабылдау жұмыстарын ұйымдастыру әрі қарай да жалғасатын болады.Айта кетейік, 2024 жылға мобильді қабылдау жұмыстарын аймақтың &nbsp;14 елді мекенінде өткізу жоспарланып, бүгінгі таңға оның 10-ы &nbsp;кестеге сай жүзеге асырылды. &nbsp;Нәтижесінде, 123 өтініш қаралып, 52-і оң шешілді. Сонымен қатар арыз-шағымның 35-іне түсіндірме жұмыстары жүргізіліп, 36 өтініштің орындалуы бақылауға алынды.<img src="https://knadmin.beoblood.kz/uploads/Auyl_t_r_yndaryny_synys_tilegi_ty_daldy_1_06575b3d11.jpg" alt="Ауыл тұрғындарының ұсыныс-тілегі тыңдалды 1.jpg">

«AMANAT»: Ауыл тұрғындарының ұсыныс-тілегі тыңдалды

<a href="https://kyzylorda-news.kz/">Kyzylorda-news.kz</a> Бүгінде облыста табиғи монополияның 34 субъектісінің қызметі мен&nbsp;қоғамдық маңызы бар 4 нарық субъектілеріне тарифтік реттеу және баға белгілеу жұмыстары жүргізіледі. Былтырдан бастап меншік иелерінің есебінен саланы инвестициялауға бағытталған жаңа тарифтік саясат енгізілді.&nbsp;Бағдарлама аясында инженерлік желілер мен жабдықтардың тозуын төмендету, қызметкерлердің жалақысын арттыру, саланы алдыңғы қатарлы инновацияларға бейімдеу көзделген. Бұл туралы Өңірлік коммуникациялар қызметінің ақпарат алаңында ҚР ҰЭМ Табиғи монополияларды реттеу комитетінің Қызылорда облысы бойынша департаментінің басшысы Айбек Егембергенов айтты.<blockquote>– 2023-2024 жылдар ішінде Қызылорда облысында коммуналдық салалардағы табиғи монополия субъектілерінің инвестициялық бағдарламалары қайта қаралып, 2 жылға инвестициялардың жалпы сомасы бекітілді. Мәселен, «Қызылорда электр тарату тораптары компаниясы» АҚ-ның өткен жылғы инвестициялық бағдарламасы желілердің тозу деңгейін 68 пайыздан 65,5 пайызға төмендесе, биыл тозу деңгейін 64,08 пайызға дейін төмендейтін болады.&nbsp;</blockquote>Ал, «Қызылордажылуэлектрорталығы» МКК-ның желілердің тозу деңгейі 44,87 пайызға төмендесе, биыл көзделген 41,84 пайызға дейін төмендету көзделіп отыр.&nbsp;<blockquote>Биыл облыс орталығындағы вокзал маңының бөлігі мен өңір разъездеріндегі тұтынушыларды сумен қамтамасыз ететін «Теміржолсу-Қзыл-Орда» ЖШС-нің 55,13 пайызға дейін төмендетеді. Айта кету керек, 2029 жылға дейін тозу деңгейін 15-20 пайызға&nbsp; төмендету мақсатында тиісті жұмыстар одан әрі жалғасатын болады. Қазіргі уақытта департамент қызметкерлері 2025 жылға тартылатын инвестициялардың мөлшерін анықтау жұмыстары жүргізілуде,- деді Айбек Асылханұлы.</blockquote>

Табиғи монополиялар субъектілері қызметінің ережелері өзгерді

<a href="https://kyzylorda-news.kz/">Kyzylorda-news.kz</a> Сенатор Бибигүл Жексенбай өзінің депутаттық сауалында мәслихаттардың тиімділігі мен жергілікті халықтың мұқтажына орай әрекет ету туралы айтып берді.&nbsp;Депутат мәслихат туралы заңнаманың жетілмегендігі және оның мәслихат депутаттарының өкілеттігін шектейтіні, әсіресе бюджет және ресурстарды бөлу мәселесінде негізгі кедергі болатыны туралы айтты. Мәслихаттарды қаржыландыру да ұдайы жеткіліксіз болып келеді, бұл олардың жұмысына және әлеуметтік маңызы бар жобаларды іске асыру мүмкіндігіне әсер етеді.&nbsp;<blockquote>«Мәслихат депутаттарының алдына халық мүддесінің білдіру жүктелген, бірақ сонымен бірге олардың заңнамалық және әкімшілік деңгейде мүмкіндіктері айтарлықтай шектелген. Мәслихаттардың шешім қабылдау өкілеттігі, әсіресе қаржы және бюджет бағытында жиі шектеледі. Бұл олардың жергілікті қажеттілік пен қоғамдық сұраныстарға тиімді жауап беру қабілетіне кері әсер етеді. Жергілікті өзін өзі басқару дербес десек те мәслихаттар атқарушы билікке аса тәуелді. Тұрғындар жергілікті басқару тетіктерінің жоқтығынан мәслихаттардың тиімділігі мен пәрменділігі төмендігін айтады. Мәслихат аппаратының қаржыландыруы толыққанды шешілмегендіктен оның функциялары талапқа сай орындалмай отыр», - деді Бибигүл Жексенбай.</blockquote>Депутат сонымен қатар шалғай аудандарды кадрмен қамтамасыз ету мәселесін атап өтті. Азаматтар көбінесе мәслихаттың қызметі туралы біле бермейді және шешім қабылдаудан сырт қалады, бұл жұмыстың тиімділігін төмендетеді. Мұның бәрі жалпы мәслихат жүйесін, олардың рөлі мен жергілікті қоғамдастықтың дамуына ықпалын арттыру үшін реформалау қажеттігін көрсетеді.<blockquote>«Мәслихаттардың жергілікті істерді басқаруға белсенді қатысуға мүмкіндік беретін қосымша өкілеттіктер қарастыру керек. Атқарушы және өкілді билік тармақтары арасындағы функциялардың қайталануын болдырмау үшін мәслихаттардың, әкімдіктердің және қоғамдық кеңестердің міндеттерін нақты айқындау керек. Депутаттардың халық алдындағы есеп беруін депутаттың сайлау алды бағдарламасымен байланыстыра отырып бір жүйеге келтіру керек», - деді Бибигүл Жексенбай. &nbsp;</blockquote>Фото: osdp.kz

Бибигүл Жексенбай мәслихаттардың тиімділігін арттыру шараларын ұсынды

<a href="https://kyzylorda-news.kz/">Kyzylorda-news.kz</a> Бүгін Қазалы ауданында облыс әкімі Нұрлыбек Нәлібаевтың қатысуымен Әйтеке би Бәйбекұлының 380 жылдығына арналған ғылыми-танымдық конференция өтті. Оған Парламент Сенатының депутаты Наурызбай Байқадамов, облыстың зиялы қауым өкілдері, ғалымдар мен еңбек ардагерлері қатысты.Аймақ басшысы конференция жұмысына сәттілік тілеп, тарихи тұлғаны ұрпақ жадында жаңғыртудың маңызына тоқталды.<blockquote>«Халқымыз батырлары мен сал-серілерін, даңқты дала қаһармандарын дәріптеп, ұлыларын қастерлеп келеді. Баршаңызды қазақ халқының бірлігін нығайтуға үлкен үлес қосқан аса көрнекті мемлекет қайраткері, кемеңгер ойшыл Әйтеке би Бәйбекұлының 380 жылдығымен шын жүректен құттықтаймын!Әйтеке би Бәйбекұлы – қазақ тарихына өзінің жасампаздық қызметімен із қалдырған тұлға. Қазақтың үш ұлы биі, үш даңқты данагөйі – Төле би, Қазыбек би, Әйтеке бидің есімдері ұлт бірлігінің айнымас символы болып бізге жеткен. Қазақ тарихындағы ең күрделі кезең – жоңғар шапқыншылығы уақытында елді бірлікке үндеп, Бұқара мен Самарқанда би болған.Биыл Өзбекстанның Науаи облысында Әйтеке бидің 380 жылдығы кең көлемде тойланды. Мерекелік іс-шараларда Сыр өнерпаздары өнер көрсетіп, үш дүркін «Алтын домбыра» иегері Мұхтар Ниязов айтыстың бас жүлдесін еншілеп қайтты. Наурыз айында Қызылорда қаласында республикалық командалық айтыс ұйымдастырылып, жерлестеріміз топ жарды.Баба есімін ұлықтау мақсатында Ақтөбе облысының бұрынғы Қарабұтақ және Комсомол аудандары біріктіріліп, Әйтеке би ауданы, Жаңақазалы поселкесі Әйтеке би кенті деп аталғаны бәріңізге мәлім. 2000 жылы Қазалы ауданының орталығында Әйтеке бидің құрметіне кесене тұрғызылды. Бас көше бабамыздың атымен аталып, 2019 жылы аудан әкімдігі ғимаратының алдынан 12 метрлік еңселі ескерткіші бой көтерді.Тарих – тағылым. Өткенінен сабақ алмаған ел табысқа жетпейді. Әйтеке бидің ұлағатты өмірін ұлтқа, ұрпаққа кеңінен өнеге етудегі шаралар жалғасын таба берсін. Бүгінгі конференция жұмысына сәттілік тілеймін!», – деді Нұрлыбек Нәлібаев.</blockquote>Конференцияны Қазалы ауданының әкімі Мейрамбек Шермағанбет жүргізді. Іс-шарада Ұлттық Ғылым академиясының академигі, әл-Фараби атындағы Қазақ ұлттық университетінің профессоры, тарих ғылымдарының докторы Берекет Кәрібаев «Әйтеке би және оның заманы», фольклоршы, филология ғылымдарының кандидаты Берік Жүсіпов «Әйтеке би: мұрағат мәліметтерін қайта зерделеу мәселесі» тақырыбында баяндама жасады. Көтерілген тақырыптар бойынша қатысушылар өз ой-пікірлерін ортаға салды.Сонымен қатар, қоғам қайраткері, республикалық Жалаңтөс баһадүр қорының президенті Нажмадин Мұсабаев, тарих ғылымдарының кандидаты Нұрлыбек Мыңжас, Қорқыт Ата атындағы Қызылорда университетінің профессоры, тарих ғылымдарының докторы Өтеубай Қожақов сөз сөйледі.Фото: Қызылорда облысы әкімінің баспасөз қызметі

Әйтеке би Бәйбекұлының 380 жылдығына орай ғылыми-танымдық конференция өтті

<a href="https://kyzylorda-news.kz/">Kyzylorda-news.kz</a> 17 қазанда кәмелетке толмаған Ш.Болаттың өліміне қатысты жүргізілген тергеу жұмыстары аясында тағы бір күдікті ұсталды, деп хабарлайды <a href="https://egemen.kz/">Egemen.kz</a> облыстық Полиция департаментінің баспасөз қызметіне сілтеме жасап.<blockquote>«Қазіргі уақытта оқиғаның барлық мән-жайын анықтауға бағытталған жедел-іздестіру шаралары жүргізіліп жатыр», делінген хабарламада.</blockquote>Айта кетейік, тергеу барысы Ішкі істер министрінің жіті бақылауына алынған.Естеріңізге сала кетейік, 4 қазанға қараған түні Талғарда бір топ жас жігіт арасында ауызша жанжал шығып, соңы төбелеске ұласқан. Жанжал салдарынан 16 жастағы Шерзат Болат пышақ жарақатынан көз жұмды, тағы екі адам ауыр жарақат алды. Куәгерлердің айтуынша, дүкен маңында оқ атылған.Сондай-ақ 12 қазанда Азат ауылында Шерзат Болаттың отбасына тиесілі үй өртенген еді. Полицейлер мүлікті қасақана жою дерегі бойынша іс қозғап, оқиғаның себептерін анықтап жатыр. Отбасы қауіпсіздікпен қамтамасыз етіліп, істі ҚР Бас прокуроры бақылауына алды.Фото: Видеодан алынған кадр

Талғардағы жасөспірімнің өлімі: Тағы бір күдікті ұсталды

<a href="https://kyzylorda-news.kz/">Kyzylorda-news.kz</a> Қазан айының үшінші жексенбісі – орман шаруашылығы қызметкерлерінің кәсіби мерекесі. Бұл күн – табиғаттың байлығын сақтап, оны ұрпақтан-ұрпаққа аманат ету жолында еңбек етіп жүрген жандарға деген құрметтің белгісі. Бүгінде облыс аумағындағы мемлекеттік орман қоры жерлерінің жалпы көлемі 7,0 млн гектарды құраса, оның 3,8 млн гектары орманды алқаптар. Бұл туралы Өңірлік коммуникациялар қызметінің ақпарат алаңында облыстық табиғи ресурстар және табиғат пайдалануды реттеу басқармасы басшысының орынбасары Мәріп Акбар мәлімдеді.<blockquote>&nbsp;– Облыстағы ормандарды қорғау, сақтау және молықтыру мақсатында 8 орман шаруашылығы мекемелері жұмыс істейді. Онда барлығы 729 қызметкер бар.Мемлекет басшысының 2021-2025 жылдар аралығында Арал теңізінің құрғаған ұлтанында 1,1 млн гектар сексеуіл екпелерін ұлғайту жөнінде тапсырмасын орындау мақсатында облыстық деңгейде 2024 жылы 100 мың гектар фитоорманмелиорациялық жұмыстары жоспарланды. Биылғы жылдың көктем айында 50 мың гектар жерге сексеуіл көшеттері отырғызылды. Қалған 50 мың гектар жерге себу жұмыстары агротехникалық талаптарға сәйкес қараша – желтоқсан айларында орындалатын болады. Экологиялық жағдайды жақсарту мақсатында Арал теңізінің табанында биыл 610 мың гектар алқапқа ормандандыру жұмыстары жүргізілді. Орман шаруашылықтары күнделікті жұмыс барысында табиғатты қорғау, қорды күзету жұмыстарымен қатар оны молайтып өсірумен айналысады. Орманды көгалдандыру жұмыстарына қажетті сексеуіл мен саялы ағаш көшеттерін өсіретін 158 гектар орман тұқымбақтары ұйымдастырылуда. Онда 12 түрлі жергілікті жерге жерсіндірілген көшеттер өсіріледі,- деді Мәріп Шәріпұлы.</blockquote><img src="https://knadmin.beoblood.kz/uploads/azan_ajyny_shinshi_zheksenbisi_orman_sharuashyly_y_yzmetkerleri_k_ni_d9aa112208.jpg" alt="Қазан айының үшінші жексенбісі – орман шаруашылығы қызметкерлері күні.jpg">Фото: Қызылорда облысының Өңірлік коммуникациялар қызметі

Қазан айының үшінші жексенбісі – орман шаруашылығы қызметкерлері күні

<a href="https://kyzylorda-news.kz/">Kyzylorda-news.kz</a> Қазан айының 3-4 күндері Астана қаласында ҚР Судьяларының ІХ съезі өтті. Судьялар съезі – Қазақстанның сот жүйесін талқылап қана қоймай, оны жетілдіру жолдарын қарастырып, маңызды стратегиялық шешімдер қабылдайды. Жоғарғы соттың жұмысын жеңілдету мақсатында келер жылдан бастап кассациялық сот жұмысын бастамақ. &nbsp;Өңірлік коммуникациялар қызметінің ақпарат алаңында жауапты сала мамандары келіп судьялардың ІХ съезінде талқыланған мәселелерді айтты.<blockquote>– Мемлекет басшысының қатысуымен өткен жиынның ерекшелігі – географиясының ауқымы мен биліктің үш тармағының да бірдей қатысуында. Себебі, атқарушы, заң шығарушы және сот билігі бірге қатысқан жиын болды. Ел Президенті сот жүйесіндегі реформаларға, сот жұмысына оң бағасын берді. Әсіресе, биылғы жылы сот отырыстары өте ұтымды ойластырылып, адамдардың құқықтық сауаттылығын арттыра түскенін жеткізді. Жаңа кассациялық соттардың сот төрелігін жүргізудегі тиімділігін, сот практикасының бірыңғай болуын қамтамасыз ететінін баса айтты. Жалпы, бұл жиыннан алған әсерім мол. Себебі, 19 жылдық судьялық еңбек жолымда осындай алқалы жиынға қатысу мүмкіндігі алғаш рет бұйырды,- деді Қызылорда облыстық сотының судьясы Шолпан Маликова.</blockquote>&nbsp;Қазақстанның соты тәуелсіздік жылдарында үлкен даму белестерінен өтті. Осы жылдар ішінде үздіксіз жүзеге асырылған реформалар саланың аяғынан тік тұрып, өзіндік бет-бейнесін қалыптастыруына, жұмысын жүйелеуіне ықпал етті.<blockquote>– Соттың беделін биіктетіп, судьялар тәуелсіздігін нығайтуда жыл сайынғы Президент Жолдаулары мен әр төрт жыл сайын ұйымдастырылатын республика судьялары съезінің орны зор. Бүгінде соттағы жаңашылдықтардың күретамырына айналған "Судьялар одағы" республикалық қоғамдық бірлестігі де бастауын осы съезден алған болатын. Бұл бірлестік 1996 жылғы алғашқы съезде өз жұмысын бастады. Міне содан бері Судьялар одағы сот жүйесінде іске асырылып жатқан іргелі жобалар мен жаңашылдықтардың, заңнамаларға енгізілген өзгерістердің, қоғамдағы айтулы бастамалардың жаршысы болып келеді,- деді Қызылорда облысының мамандандырылған ауданаралық экономикалық сотының төрағасы, Судьялар одағының Қызылорда облысы бойынша филиалының төрағасы Бақытбек Елшібеков.</blockquote>&nbsp;Бүгінде мемлекеттік қызметшілер мен азаматтық қызметшілердің қызмет әдебі кодексі бар. Әдептілік қағидаттары жинақталған кодекс судьялар қауымының да басты бағдар етер құжатының бірі.&nbsp;<blockquote>– Бұл кодекс судьялардың кәсіби және қызметтен тыс өміріндегі мінез-құлықтарының этикалық ережелерін анықтауымен бағалы. 1996 жылы республика судьяларының І съезінде қабылданған Әдеп кодексіне бірнеше жаңғыртулар жасалып, бүгінгі күнге дейін судьялардың қызметтегі және қызметтен тыс кездегі әдебінің басты талаптарын белгілеген болатын. Міне, осы жылдар бойы судьялардың қорғаны болған Әдеп кодексін заман талабына сай қайта дайындау қажеттілігі туындап отыр. Бұл өзгеріс бүгінгідей жаңа технология жетістіктері жаппай қолданысқа енгізіліп, ақпараттар тасқынын сүзгіден өткізу мүмкіндігі төмен кезеңде аса өзекті болып отыр. Кодекс көпшіліктің көкейіндегі талап пен тілекке толық сәйкес келуі үшін судьялардан арнайы жұмыс тобы құрылған еді. Осы жұмыс тобының құрамында маңызды құжаттың дайындалуына атсалысу мен үшін үлкен мәртебе. Жалпы Әдеп кодексін дайындау ісінен республика судьяларының ешқайсысы шет қалған жоқ. Алдымен жергілікті жерлердегі судьялар кодекске қатысты өз пікір-ұсыныстарын білдіріп, сол бойынша құжаттың негізі жасалды,- деді Қызылорда облысының мамандандырылған ауданаралық әкімшілік сотының төрағасы Гүлжан Мырзатаева.</blockquote><img src="https://knadmin.beoblood.kz/uploads/dep_kodeksi_sudyalardy_basty_tiregi_c71deeeba4.jpg" alt="Әдеп кодексі – судьялардың басты тірегі.jpg">Фото: ser-per.kz

 Әдеп кодексі – судьялардың басты тірегі

<a href="https://kyzylorda-news.kz/">Kyzylorda-news.kz</a>&nbsp; Медицина өте үлкен сала. Халық денсаулығы жолында мыңдаған адам қызмет етіп жасап, науқастардың алғысына бөленіп келеді. Бұл салада отбасымен бірге еңбек ететін жандар да аз емес. Бүгінгі біздің кейіпкеріміз – облыстық жұқпалы аурулар ауруханасының бөлім меңгерушісі Қанат Жукешев солардың бірі.Білікті маманның ауруханада қызметін бастағанына біраз уақыт болды. Осы жылдар ішінде ол өзін жауапкершілігі зор, міндетіне тиянақты қарайтын дәрігер ретінде көрсете білді. Талай науқасқа сапалы медициналық көмек көрсетіп, дертінен айығуға септігін тигізіп келеді. Баланың бабын тауып, денсаулығын жақсартуға зор еңбегін сіңіруде.Айта кету керек, Қанат Талғатұлының өмірлік жары да медицина саласының маманы. Меруерт Аққайырова облыстық перинаталды орталықта дәрігер – неанотолог болып абыройлы қызмет жасайды. Аяулы жан шала туған нәрестелерді күтіп-бастауда, тиісті ем-домын жасауға жоғары кәсіби біліктілігін көрсетуде.<blockquote>“Біз Қарағанда мемлекеттік медициналық академия табалдырығында таныстық. Аққұба, мінезі жұмсақ Меруертті бір көргеннен ұнаттым, кейін отбасын құрдық. 12 жыл бойы дәм-тұзымыз жарасып келеді. Көп балалы отбасымыз, 5 перзенттің ата-анасымыз.</blockquote>Расымен, бізді табыстырған – медицина. Бір салада еңбек еткеннен кейін бір-бірімізді өте жақсы түсінеміз. Айтатын ортақ әңгімеміз бар. Кейде бір-бірімізбен ақылдасып, кеңес сұраймыз. Мен қашанда жарымды қолдап отырамын. Мамандығымызды ерекше мақтан етеміз", – дейді Қанат Талғатұлы.Бүгінде Қанат Жукешевтің шаңырағы шаттыққа толы. Өз антына адал, міндетін зор жауапкершілікпен атқаратын жандар перзенттеріне үлгі.<img src="https://knadmin.beoblood.kz/uploads/Bizdi_tabystyr_an_mediczina_394745fc78.jpg" alt="Бізді табыстырған - медицина.jpg">

Қанат Талғатұлы: Бізді табыстырған – медицина

<a href="https://kyzylorda-news.kz/">Kyzylorda-news.kz</a> Қызылорда облысы бойынша Қылмыстық-атқару жүйесі департаментіне қарасты 68 мекемесінде жазасын өтеуші сотталған азаматша өзінің бұрын некеде болған жұбайы мен қайта некесін қиды.Ашып айтатын болсақ сотталған азаматша тергеу изоляторында ҚР ҚК-нің 190 бабы 3 бөлігі 4 тармағы бойынша 3 жылға бас бостандығынан айырылған. Қазіргі таңда өзінің бұрынғы некеде болған жұбайымен қайта некесін заңдастыру мақсатында мекеменің заңгер маманының көмегіне жүгініп, АХАТ бөлімінің маманы арнайы келіп, неке куәлігін табыстады.&nbsp;Жазасын өтеуші азаматшаның айтуынша, қателікпен шалыс басып екіге айрылдық. Енді міне бізді тағдыр қайта тоғыстырып өз некемізді заңдастырып жатырмыз. Бұл үшін қуаныштымыз. Сонымен қатар, мекеме басшылығына, мекеме заңгеріне және АХАТ бөлімінің маманына өз алғысымызды білдіреміз деді, – жазасын өтеуші азаматша.

Архив