<a href="https://kyzylorda-news.kz/">Kyzylorda-news.kz</a>&nbsp; &nbsp;«Ұстаз – ең алдымен, қадірлі маман. Ал, ұстаз болу – қастерлі міндет. Бүгінде еліміздің болашағы жарқын болып, дамыған мемлекетке айналуы үшін мұғалімдер қауымы аянбай еңбек етіп жүр. Жалпы, кім-кімнің де жақсы адам, мықты маман болуы ұстазына байланысты. Ахмет Байтұрсынұлы «Біз елді түзеуді бала оқыту ісін түзеуден бастауымыз керек» деген. Ұлт ұстазының бұл сөзі қашанда орынды. Білім мен ғылым – табысқа жетудің ең басты кілті. Өскелең ұрпаққа тағылымды тәрбие және озық білім беру – өте маңызды міндет»,деген Президент сөзі ұстаздар қауымына деген айрықша құрметтің белгісі екенін байқатып отыр.Сұлу Сырдың сағасында мұндай құрметке ие болған, өз заманында талай бұлақтың көзін ашқан көнекөз ұстаздар қауымы да болған. Айталық Бөгеннен жиырмаға тарта ақын-жазушы, журналистер шыққан десе, көршілеріміз Қаратереңді көк аспанға көз тіреген ұшқыштар ауылы деп атайды. Қалам ұстағандарға табиғат берген талантпен бірге, «бұлақ көрсең көзін аш» дегендей, әдебиетші ұстаздардың арқасы десек қателеспейміз. Қазақтың қайсар қаламгері Зейнолла Шүкіровтің туған топырағында туып-өскен, жағада бірге жүзіп, құшақтап қырға шығарған аға-інілері тегін бола ма? Әдебиет пәнінің мұғалімдері Әби Прекешов, Жалғас Құрманов дәл осындай ұлағатты ағайлар еді. Олар сабақты шәкірттерінің санасына сіңіріп, құлағына құйып жіберетін. Әлі есімде, сабақты түсіндіргенде «Зейнешханның қорасы оқтай түзу» дегенде мектеп пен іргесіндегі көкеміздің күнде көріп жүрген қорасы көз алдымызға келе қоятын. Немесе, Көнебөгеннен оқушылар таситын автокөлігінің жүргізушісі Сержанды «Аяқ-қолы балғадай шофер» деп суреттегенде, батыр денелі ағамыз елестеп, қозғалақтап қалатынбыз. Көрдіңіз бе, мынадай түсіндірулерден кейін оқуға қыры жоқ шәкірттердің өзі көздері жанып кететін. Осындай тума талант ұстаздардан дәріс алған ондаған бөгендік балалардың қиялына қанат бітіп, бүгінде көркем сөздің көрігін қыздырып жүргені бекер емес-ау деймін. Сондай мың бұлақтың көзін ашып, үлкен өмірге қадам бастырған, білім нәрімен сусындатқан ұстаздың бірі – Әби Прекешов болатын.Ағамыз 1923 жылы Бөген ауылының Қосуақ елді мекенінде дүниеге келген. «Мектебіміз Нұржан ишанның үш бөлмелі мешітінде еді, сонда бастауышты бітіріп, Бөгенде жетіжылдықты аяқтадық, – деп еске алған екен. &nbsp;Прекеш ақсақалдың үлкені Дүйсен ел басқару ісіне жастайынан араласқан белгілі азамат еді. Сонау 1921 жылы Поволжье бойындағы аштыққа байланысты 14 вагон балық жөнелтуге белсене араласқан ол кейін колхоздастыру кезінде көшбасшы болды. Көп жыл ұжымшар басқарып, партия ұйымының хатшысы болған. Ауылдың бірлігі мен тірлігіне елеулі үлес қосқан, ел ішінде төбе бидей төрелік айтқан абыз ақсақал еді.Текті әулеттен тәлім-тәрбие алған Әби ағамыз ат жалын тартып азамат болғанда соғыс басталып кетті. 1942 жылы 19 жасында майданға аттанды. Алдымен «Дуботка» деген жерде әскери даярлықтан өтеді. Содан қазан айында Қалмақ даласында болған соғысқа қатысады. Тарихта бұл жерде қиян-кескі шайқас болғаны белгілі. Ал 1943-1945 жылдары Украина, Белоруссия, Венгрия, Польша жерлерін азат етуге қатысып, жеңісті Германиядан қарсы алған-ды. Жауынгер ағамыз туған жерге 1947 жылы ғана оралды. «Ерлігі үшін», «Германияны жеңгені үшін», тағы басқа медальдармен, «Отан соғысы» орденімен марапатталған. Елге келген соң Қызылордадағы Н.В.Гоголь атындағы педагогикалық институттың қазақ тілі мен әдебиеті факультетін сырттай оқып бітірді. Ол көп жылдар бойы З.Шүкіров атындағы №20 Бөген орта мектебінде ұстаздық етті. Әби ағайдың шәкірттері бүгінде елге белгілі қаламгерлер, әдебиетшілер мен ғалымдар екенін атап өткен жөн.Саналы ғұмырын жас ұрпақ тәрбиесіне арнаған майдангер сабырлы да салмақты мінезімен елге беделді ауылдағы ақылшы ағасы, абыз ақсақалы еді. Көненің көзіндей, бидің өзіндей Әби аға отырған жерде елдің өткен-кеткені әңгіме болып, талай шежірелі сырлар, игі жақсылардың ғибраты айтылатын.Ғасырдан астам тарихы бар ауыл мектебінің тарихын жинақтаушылар ағамыздан өткен заманның деректерін тәптіштеп жазып алғанын білеміз. Ол сонау дүрбелең жылдардың демін сезініп, от пен оқтан аман келген, туған жерінде туын тігіп, өнегелі ұрпақ өсірген қазыналы қария еді. Жалпы ұстаздар – өз пәндерінің табиғатына сәйкес ерекше есте қалатын сияқты. Бастауышта білім беретін Әнуар Загидулина апай сондай балажан еді. Ауыл мектебінің химигі Шәйкен Нәкешов институтта сабақ беретін оқытушыдан артық болмаса кем емес еді. Қапи мен Тілеужан ағайлардың тәрбие мен тәртіптің тезі есіп тұратын. Әби ағамыз әдебиет пен өлкенің тарихын, шежіресін сабағында әдемі кіріктіріп, шәкірттерін зерделі болып өсуге тәрбиелейтін. Әлі есімде, Сәкен Сейфуллиннің «Көкшетау» поэмасын өткенде кербез ақын мен сұлу табиғатты шабыттана, әсерлі түсіндерер еді. Кейін Көкшені көргенде бала кезгі ағай әңгімелерінің әсері көз алдымызға келді. Өлкеміздің жер-су аттарының тарихын да сол кісіден естіген едік. Ауылда «Орманбет төбе» деген үлкен төбе бар. &nbsp;Жаугершілік заманда қарауыл болғандай биік еді. Ертеректе археологтар қазған болуы керек етегінде сүйектер мен көмір, тас шашылып жататын. Бұл туралы ел аузында «Он мың ноғай өткен жер, Орманбет хан өлген жер» деген аңыз да бар. Ал Көнебөген мен Қамау елді мекендерінің арасындағы екі адамның құшағына сыймайтын көне екі жидені сол Орманбеттен қалған деген аңыз-әфсана бар-тын. Міне, осындай-осындай бағзы замандардан жеткен әңгімелерді біздер Әби ағайдан естіген едік. Туған жердің тарихы, топырағының тылсымын өткен мен бүгіннің өрнегін жалғаған, шежірелі кеуде, құйма құлақ сырбаз ұстаздар арқылы ұрпақтан ұрпаққа жете бермек.Жеңіс күні сол Орманбет төбенің етегіне барып олармен алау жағылатын. Майдангер ұстаздар жорық жолдары жайлы естеліктерін айтатын. Ал жауынгер Әби Прекешов өзінің майдандас досымен кейін қатысып тұрғанын қызы Гүлжанның естелігінен біліп жатырмыз. Шайқаста шыңдалған достық бейбіт күнде жарасымды жалғасын тапқан. Жазғы демалыс күндері ағай қызы Гүлжанмен Украинадағы досына сапар шегеді екен. Аралдың ысталған, қақталған қаяздары мен ақбалықтарын майын тамызып досының үйіне базарлыққа апаратын көрінеді. Сөйтіп, жасыл желекті жерлерде екі-үш апта мейман болып, қанды көйлек достарын еске алып, марқайып қайтады екен. Досы да Аралға бірнеше мәрте келіп, Бөгеннің құмына аунап, теңізге демалып кеткен көрінеді. Әуеден жауған оттан, қардай бораған оқтан аман қалған екі достың сыры өз алдына бір әңгіме. Жеңісті жақындатқан қос майдангердің шынайы достығы жас ұрпаққа үлгі-өнеге емес пе?!Әбекең апамыз Ақжанмен екеуі бәйтеректей үлкен әулеттің алтын діңгегі болып, немере-шөбере сүйіп, салиқалы ғұмыр кешті. Бүгінде олар туған жердің топырағында мәңгі тыныстап жатыр. Ұл-қыздары мұғалім, инженер, жүргізуші секілді бір-бір мамандықтың иесі атанып, өз шаңырақтарын шаттыққа бөлеп отыр. «Адам ұрпағымен мың жасайды» деген халық даналығы. Жақсының жолы, мағыналы, өнегелі өмірі салиқалы ұрпақтарымен жалғасын табуда. Майдангер, ұлағатты ұстаз Әби Прекешовтің биыл туғанына жүз жыл толар еді, ал жақсының жолы ғасырдан да ұзақ болатыны белгілі.Ардагердің ғасырлық мерейтойына байланысты шаралар сонау Жамбыл облысындағы Жаңатас қаласынан басталды. Әбекеңнің ұлы «Қаратау» тау-кен өңдеу кешенінің бас энергетигі Нұрхан Прекешов үстел теннисінен ауданаралық турнир ұйымдастырды. Тағылымды жарыс жеңімпаздары марапатталып, қатысушылар әке құрметіне өткізілген шараны көпшілікке үлгі етті. Ал Жеңіс күні қарсаңында Бөген ауылында дүбірлі мерейтой мазмұнды да тағылымды істерге ұласты. Алдымен ұстаздың өзі еңбек еткен орта мектепте қазақ тілі мен әдебиетінен аудандық пәндік олимпиада өткізілді. Мерейтойға орай волейбол мен үстел теннисінен аудандық жарыс ұйымдастырылып, жеңімпаздар марапат төрінен көрінді. Майдангер ұстаздың атындағы ақындардың жыр-мүшәйрасы мәреге жетті. Сонымен бріге «Асыл бейне» атты деректі кітаптың тұсаукесер рәсімі жасалды. Ауылда ардагер ағамызға арналып ас беріліп, рухына Құран бағышталды.Соғыс және еңбек ардагері, ұлағатты ұстаз Әби Прекешовті мәңгі есте қалдыру мақсатында Арал қаласынан көше атауы берілсе, ұрпақ үшін өнегелі шара болар еді.Осылай туған жерінде өткен мерейтойлық шаралардың елге үлгі-өнегесі мол, тәрбиелік мәні зор болды.Ж.ӘБІШОВ

Сапалы білімге мән берген ұстаз

<a href="https://kyzylorda-news.kz/">Kyzylorda-news.kz</a>&nbsp; &nbsp;Айдынды өлкенің айбынына айналған Арал теңізінің тағдырына алаңдаулы жұрттың қолға алған қай ісі де қайырлы. Теңізді өлкенің негізгі күнкөрісінің бірі балық шаруашылығы болғандықтан бұл кәсіптен шетқақпай қалған жан жоқ десек, мұндағы жұрт теңіз тағдырына алаңдайды деуге негіз жоқ емес. Балық аулайтын балықшылардың заңды учаскелік аймақта тіркелгені өз алдына, бұл жұмысты тіршілік көзіне айналдырып, балық аулу ісінде табысты еңбек етіп жатқандары да жоқ емес. Бүгінде бұл салада «Қуаныш» ЖШС-нің жұмысы нәтижелі жүзеге асып келеді. Теңіз маржанын тереңнен сүзіп, оны өңдеуде табысты жұмыс атқаруда.Енді айдынды Аралдың кешегі Тәуелсіздік жылдарынан бері қарайғы уақыт аралығындағы тұтас тарихы мен арғы-бергі жағдайын аз-кем тақырыпқа тұздық етсек.1989 жылы Арал теңізі Берг бұғазынан екіге бөлінді. Берг бұғазының солтүстік жағы Кіші Арал теңізі, ал оңтүстік жағы – Үлкен Арал теңізі. Арал теңізін толықтай сақтау мүмкін болмағандықтан, оның екі бөлікке бөлінгендігін пайдалынып, Сырдария өзенінен келген суды тиімді пайдалану мақсатында Кіші Арал теңізін сақтап қалу жұмыстары қолға алынды. Бұл бағыттағы алғашқы жұмыстар еліміз Тәуелсіздік алған кезеңдерден басталған-ды. Яғни, 1992 жылдың шілде-тамыз айларында Берг бұғазында құмнан тұрғызылған Көкарал тоспасы. Бірақ 1993 жылдың көктемінде дария суы өте мол келіп, сәуір айында тоспаны бұзып кеткен. Бұдан кейін де қолға алынған жұмыстар нәтижесіз болды. Араға біршама уақыт салып, халықаралық және мемлекеттік деңгейдегі «Сырдария өзенінің арнасын реттеу және Солтүстік Арал теңізін сақтау» (САРАТС) жобасы жасалды. Мақсаты айқын жобаны ҚР Үкіметінің қолдауымен Дүниежүзілік Банк қаржыландырды. Осы жұмыстардың аясында нендей нәтижелерге қол жеткізілгені барлығыңызға аян болар. Берг бұғазында су реттегіші бар Көкарал бөгеті, дарияның теңізге құяр сағасынан 25 шақырым жоғарырақта Ақлақ тоспасын салу және қазіргі қолданыстағы Қазалы, Қызылорда және Шардара плотиналарына күрделі жөндеу жүргізу жоспарланды. Көкарал бөгеті аяқталған соң 2006 жылдың сәуір айының ортасында Кіші теңіз деңгейі жоғарыда айтқан Балтық жүйесі бойынша 39,0 метрден 42,0 метрге дейін жетті. Теңіз суының көлемі 27,07 текше метр, айдынның аумағы 3288,0 текше метр, теңіз жағалауының ұзындығы 435 км болды. Осылайша ертеңге сенім артқан жағалау жұртының үміті қайта жанды.Қазіргі таңда аудан бойынша жылдық қуаттылығы бірнеше мың тоннаны құрайтын 9 балық өңдеу зауыты жұмыс істейді. Солдың ішінде «Қуаныш» ЖШС-нің шоқтығы биік. Ауданға қарасты Қаратерең ауылдық округінде орналасқан кәсіпорынның тарихы 1998 жылдан басталады. Кіші Арал теңізінің номері 4 учаскесінен балық аулаумен айналысатын кәсіпорында тұрақты 30 адам,маусымдық кезеңде 50 адамға дейін жұмыс жасайды. Кәсіпорынның арнайы балық қабылдау және өңдеу орталығы жұмыс жасайды. Белгіленген лимит бойынша 372 тонна балық ауланады. Өңделген балық сұраныс бойынша Қазақстан қалаларына және ТМД елдеріне жіберіледі.Қаратерең ауылы тұрғындары жұмыспен қамтылып, жергілікті бюджетке уақытылы салығы төленіп отыр. Бүгінде тағдырлы теңіздің бір бөлігінен напақа теріп, оны өңдеп елге ұсынуда өзіндік орны бар өндіріс ошағының аудан жұртшылығы үшін орны әсте бөлек дер едік. Сырды жағалай қоныстанған атажұрт заманында теңізден нәпақа терді десек. Бұл ата кәсіп әлі де өз желісін үзген жоқ. Ел дамуында өзіндік ерекшелігі бар осындай кәсіпорынның алдағы бағыты айқын. Оны теңізбен тілдескен, теңізде күн кешкен қауым жақсы біледі.Алтынбек Бисенов

Ел дамуында «Қуаныш» ЖШС-ның үлесі ерекше

Дайрабайдың дара жолы

<a href="https://kyzylorda-news.kz/">Kyzylorda-news.kz</a>&nbsp; Алдағы уақыттарда су тапшылығы белең алады деген болжам бар. Маңызды ресурс саналатын бұл салада бүгінде көптеген түйіткүл бар. Бұған қатысты Президен өз Жолдауында:<blockquote>– Су ресурсы еліміздегі өзекті мәселелердің бірі. Әсіресе, судың сапасы және оның халыққа қолжетімді болуы аса маңызды болып тұр. Жыл өткен сайын халқымыздың саны да, экономикамыз да өседі. Бұл – қалыпты құбылыс. Сол себепті 2040 жылдарға қарай Қазақстандағы су тапшылығы 12-15 миллиард текше метрге жетуі мүмкін. Жалпы, біз – трансшекаралық су көздеріне тәуелді елміз. Еуразия құрлығындағы өзендер мен каналдар – баршамызға ортақ табиғат байлығы. Осы су көздері біздің халықтарымызды, экономикамызды жақындастырады. Сондықтан көршілес әрі достас елдермен бұл мәселе бойынша әрдайым өзара түсіністікке және келісімге келу керек. Жан-жақты ойластырылған су саясатын жүргізу, трансшекаралық суларды пайдалану мәселелерін шешу – Үкіметтің алдында тұрған аса маңызды міндеттер – деген болатын.</blockquote>Иә, су – тіршіліктің өзегі, өмірдің нәрі. Жаратылыстан бері тіршілік атаулығы тірек болып келе жатқан бұл нәрді адамзат ақылы толысқан сайын оны түрлі мақсаттарға пайдаланып келеді. Бірі көл суынан ризық терсе, бірі бұлақ суын күнделікті тіршілік үшін тұтынады. Алты құрлықтың асты-үстін жайлап жатқан осынау табиғи нәрдің бүгінде адамзат үшін пайдасы шаш-етектен. Қазір ауданның атын әлемге мәшһүр еткен теңізі бар. Тартылып кеткен талайлы тағдыры жанды жабырқатады демесек, бұл Аралдың арғы-бергі заманда талай пенденің тіршілігіне демеу болғанын мұқым ел жақсы біледі. Одан бөлек жағалау жұртының тұтынып отырғаны да бұлақ суы.Алғашқы желісі Бердікөл деп аталатын су тартқысы 1985 жылы жұмыс істей бастаса, бұл жұмыс тәуелсіздік алған жылдары қайта жанданып, буырқанған бұлақ көзі Қосамандағы су тартқысы арқылы 1993 жылы іске қосылды. Бұлай дегенімізбен Арал жұртшылығы сол жылдардан бастап сапалы су тұтынды деген сөз емес. Елдің енші алып, енді ес жиып жатқан елең-алаң тұсында мұндай су тартқысы бар станциялардың жұмысы тұаралады. Халыққа уақытпен су беріп, ескірген желілердің есті шығарғанын Аралдың халқы әлі ұмытқан жоқ. Десе де уақыт өте қолда бар алтынның қадірін біліп, елде бар нәрсенің ерінге тигенін құп көрген сол кездегі билік бұл жұмыстарды шын мәнінде қолға алып, аралдықтарды сапалы сумен қамтамасыз ету қарекетіне кірісті. Бұл 2000 жылдардың басы кезі еді. Жаңа ғасырға жаңаша серпінмен аяқ басқан аралдықтар көп ұзамай 2005 жылдары Сарыбұлақтың сапалы суына қол жеткізе бастады. Оны сол кездегі мемлекет басшысы Н.Назарбаев арнайы Аралға келіп ашып, ауыз судан қажыған қамкөңіл жұрттың көңілін бір серпілткен-ді. Міне, сол жылдардан бері ауданда «Арал-Сарыбұлақ» деп аталатын топтық су құбыры мекемесі жұмыс істеп келеді. Бұл мекеме қазіргі таңда аудан аумағына тартылған су желілерінің ақаусыз жұмыс істеп, оның табиғи құнарлылығымен қоса әр шаңыраққа қажетті мөлшерде жеткізілуін қамтамасыз етіп келеді. Қазіргі таңда Сарбұлақтың сапалы суы арнайы су желілері арқылы ауданның көптеген елді мекендеріне тартылып, ауыл халқының да сапалы су тұтынуына жағдай жасап отыр.Бүгінде аудандағы 49 елді мекеннің 38-і (78%) орталықтандырылған ауыз су жүйесімен қамтылды. 2019 жылғы 29 шілдеде ҚР Үкіметімен мақұлданған елді мекендерді 2023 жылдың соңына дейін сапалы ауыз сумен жабдықтауды жүз пайыздық қамтамасыз ету жөніндегі Жол картасына сәйкес, Арал ауданы бойынша барлық елді мекендерді ауыз су жүйесіне қосу жоспарланған.&nbsp;Алдағы уақытта ауданды толықтай ауыз сумен қамтамасыз ету межесі көзделген. Бұлай деуімізге негізгі себеп, ел Үкіметінің 2025 жылға дейін қазақстандықтарды 100 пайыз ауыз сумен қамтамасыз ету жоспарын қолға алуы. Қалалар мен ауылдарды сапалы ауыз сумен қамтуға республикалық бюджеттен қомақты қаржы 215 миллиард теңге бөлінеді. 9 су құбырын салуға және қайта жаңғыртуға 33 млрд. теңге жұмсалмақ.Ел аумағындағы, әсіресе шалғайдағы елдімекендерді ауыз сумен қамту мәселесі күн тәртібінен түспеген. Бұл міндетті мемлекет басшысы үкіметке кезекті рет қайта тапсырды. Осы мақсатта 511 ауылға орталық су құбыры тартылады. Бұл бағыттағы жұмыстар легі ауданда да бір сәт тоқтаған емес. Қазірдің өзінде ауданға қарасты екі ауылға су тарту жұмыстары жүргізілуде. Соның бірі – аудан орталығынан 50 шақырымдай алшақтықта жатқан Көктем елді мекеніне су тарту жұмыстары. Темір жол бойындағы Сапақ елді мекеніндегі су айдау станциясынан басталған қазу жұмыстары бүгінде бітуге жақын. Көктем елді мекеніне дейінгі 23 шақырымдық қашықтыққа су құбырын тартқан «Корпарация Алем-құрылыс» ЖШС мердігер мекемесі бүгінде ауыл іргесіне жақындап қалған. 30 ға жуық қызметкер, 10 жуық техниканың тынымсыз еңбегі нәтижесінде ел іргесіне жеткен ауыз су құбыры әне-міне, ауылдағы су айдау станциясына жетеді. Бүгінде ауыл ішіде салынып жатқан су айдау станциясының құрылысы жүріп жатыр. Қазіргі таңда ішкі электр жұмыстары жүргізіліп жатқан бұл ғимарат алдағы уақытта көктемдіктердің әрбір шаңырағына жоғары қысымдықтағы ауыз су жеткізуде мүлтіксіз қызмет ететін болады.<blockquote>– Қазіргі уақытта мердігер мекеме тарапынан жүргізіліп жатқан қазу жұмыстары жақын күндері аяқталуға жақын. Қыс қақарына мінбей тұрып, құрылыс жұмытарын жобаласақ, ауыл ішіндегі үйді-үйге шүмек орнатып, арнайы есептегіш құрылғысын орнатату жұмыстары жүргізіледі. Ал тартылған ауыз суды толық пайдаланау мәселесіне келетін болсақ, бұл алдағы уақытта тиісті қаралатын қаржы мәселесіне байланысты. Көзделген қаржы уақытылы берілер болса біз бұл жұмыстары алдағы жылдың бірінші жарты жылдығында толық аяқтаймыз ба деген жоспарымыз бар, - дейді аудандық тұрғын-үй комуналдық шаруашылығы, жолаушылар көлігі және автомобиль жолдары бөлімінің маманы Нұрхан.</blockquote>Бұл жаңалықты естігелі Көктем ауылының тұрғындары да сапалы суды пайдаланатын күнді асыға күтіп жүр. Елге көрік берген бұл жұмыстардың басы-қасында жүрген, туған жердің жанашыр азаматтары да ауылдағы игілікті істің тез біткенін қалайды. Су келетін күнді асыға күтіп жүрген Көктем ауылының тұрғыны:<blockquote>– Бұл хабарды осыдан бір жылдай бұрын естідік. Расында осы кезге дейін ауылда ауыз су мәселесі қиындық тудырып келді. Қажетті ауыз суын құдықтан тартып ішкен ауылдастар үшін бұл бейнеттің де артта қалатын күні алыс емес деп ойлаймын. Халықтың алғысына бөленген ел азаматтарының бұл жұмысты бастандыруда еңбегі ерекше деп білемін. «Көрінген таудың алыстығы жоқ» демей ме? Бастысы жұмыс қолға алынды. Тіпті бітуге жақын. Енді әрбір үйге шүмек орнатып, сапалы судың игілігін көрер күнді күтіп жүрміз. Бізге ауыл ауыл болғалы мұндай мүмкіндікті жасап, жарқын келешекті қалыптастыруға күш салып жатқан барша ел ағаларына алғыс білдіреміз, - дейді М.Жәкешов.</blockquote>Осы жылдың бас кезінде аудан орталығанан шалғай орналасқан Құланды ауылдық округіне қарасты Ақбасты елді мекеніне ауыз су құбыры тарту жұмыстары қолға алынған болатын. Енді міне көп ұзамай өтпелі негізде жүзеге асырылатын жоба арқылы ауыл тұрғындары таза ауыз сумен қамтылатын болады.Қазіргі таңда мердігер «Сапа Құрылыс» мекемесі тарапынан барлығы 116 шақырым болатын құбыр желісінің 108 шақырымдайы қазылған. Қазіргі таңда бұл жұмыстарды 26 адам жұмыс күші мен 2 погрузшик, 2 эксковатор сынды маңызды техникалар атқарып жатыр. Сондай-ақ, су құбыры желісінің 34 шақырымынан су айдау стансиясы салынғалы жатыр. Мұнымен бірге ауылішілік су жүйесін жүргізу жұмыстары да аяқталуға жақын. Айталық, бүгінде ауылдағы 72 үйдің 30-на арнайы шүмек орнатылып, есептегіш құрылғылары қойылған. Бұл ауыл тұрғындары үшін таза ауыз су мәселесі жылдар бойы көтеріліп келе жатқан еді. Енді ел тұрғындарының ол тілегі де орындалар күн жақын.Фото: elitar.kzА.Бисенов

Ауыз сумен қамту – ауқымды мәселе

<a href="https://kyzylorda-news.kz/">Kyzylorda-news.kz</a>&nbsp; Еліміздің батысында өткен Ұлттық Құрылтайдың үшінші отырысында Президент «Адал азамат» ұғымын қалыптастырып, өзінің адал еңбегімен және рухани таза болмысымен елге белгілі азаматтардың бір шоғыры қалыптасқанын айтқан еді.<blockquote>– Адал азамат дегеніміз – жақсы қасиеттерге ие болып, адал еңбек ететін және табысқа адал жолмен жететін адам. Яғни, адалдық пен әділдікті бәрінен биік қояды. Озық ойлы ұлт болу үшін бүкіл қоғам сана-сезімін өзгертіп, жаңа құндылықтарды орнықтыруы керек. Әрбір адам «Адал азамат» деген атқа лайық болса, елімізде әділ қоғам орнайды. «Адал адам – Адал еңбек – Адал табыс» – бір-бірінен ажырамайтын ұғымдар. Осы үш тағанды озық әрі табысты елге айналудың басты кілті деуге болады, – деген Президент осындай ізгі қасиеттерлің жастарымыздың бойына сіңіре білуіміз керектігін айтқан еді. Біз Арал ауданында сондай ұғымға лайық, өмірі мен еңбегін кейінгі жасқа үлгі етуге болатын жан жайында айтпақшымыз.</blockquote>Бала күнімізде үлкендер «Жарыққа төлеген ақша адал» деп жиі айтушы еді. Жарық дегені күні бүгінге дейін пайдаланып келе жатқан электр энергиясы екенін есейе келе біліп жатырмыз ғой. Асылында осы жарықсыз адамзаттың күні жоқтай. Қараңғылықты ақ самаладай жарыққа айналдыратын ерекшелігін былай қойғанда тіршілікке қажетті құрылғылардың барлығы осы электр энергиясына тәуелді екенін еңкейген қарттан еңбектеген балаға дейін біледі. Айтар ауызға жеңіл көрінгенмен сол жарықты әрбір шаңыраққа жеткізіп, оны тұрақты беріп отыруда қаншама жанның майдай тер, табан ет еңбегі жатқанын ендігі жұрт білетін де шығар. Энергетик немесе электрик деген қауымның осы салада еңбек ететіні көптен белгілі. Ал осы сала майталмандарын Аралдан іздер болсақ алдымен Арапхан Сұлтанов есімі ойға оралатыны тағы бар. Олай болмағанда ше? Заманның қиын уақытында халық тұтынатын электр жарығы үшін талмай еңбек етіп, тіршілігі қайнаған өңірдің сұранысын қанғаттандыруға қам қылған жанның бірі осы Арапхан ағамыз еді.Анығында сіз бен біз үзіксіз тұтынып отырған электр жүйесі бірден құрыла қойған жоқ. Сонау 1964 жылға дейінгі есеппен алсақ та ауданға қарайтын ірілі-ұсақты қыстақтар мен елді мекендерге, қала берді осы аралдағы ірі балық өңдейтін өндіріс ошақтарына тұрақты электр жеткізу оңай шаруа еместігі белгілі. Соған қарамастан бұл салада қызмет ететін еңбекқор қауымның үздіксіз жұмысы жалғасып жатты. Десе де сол кездерде берілген электр көздері ауданның өндірістік және тұрмыстық қажетін өтеуге қауқарсыз еді. Қайнаған қызу тіршілік мұндайда қажеттілікке сай басқа қадамдарға итермелейтіні сөзсіз ғой. Сәйкесінше сол 1964 жылы қуаты 4000 киловаттық Арал энергопйызы монтаждалып, іске қосылды. Сонымен бірге қуаты 6600 квт амперлік 36/6 киловаттық қосалқы станса құрылысы іске қосылды. Электр қуаты көздерінің молайуына байланысты осы жылдан бастап 13,5 км. Арал-Аралсульфат электр желісі, 10,8 км. Қалаішілік желілер тартылып, бірнеше төмендеткіш қосалқы стансалар пайдалануға берілді. Осындай жаңа, игілікті істердің нәтижесінде аудан аумағын толық электрлендірудің басы сол 1964 жылдан бастау алған-ды. Әрине мұндай маңызды жұмыстардың басы-қасында жоғарыда есімі аталған Арапхан ағамыздың жүргені және ол кісінің бұл жұмыстарда еңбегі өлшеусіз екені айтпаса да түсінікті болар. Енді сол кейіпкеріміздің есім-сойы мен өмірлік ұстанымы, қызметтің кестелі жолы жайында сөз сабақтасақ.«Жақсының жақсылығын айт нұры тасысын» дейді дана халқымыз. Біліктілігімен белдеу асқан, іскерлігімен үлгі болған бүгінгі кейіпкерліміздің балалық шағы теңіз жағалауындағы Құланды ауылдық кеңесінде бастау алған. Нақ 1947 жылы жарық дүние есігін ашқан шақалақтың өмір шатқалдарымен өрлей жүріп, өзі өмір сүрген өлкенің жарыққа кенелуіне себепші болатынын ол кезде ешікім білмеген-ді. Ер елінен ұзап қайда барсын. Балалық дәурен артта қалған соң әке кәсібінен дәм татқан Арапхан Сұлтанов еңбек жолын «Аралбалық» өндірістік бірлестігінде жұмысшы болып еңбек қолын бастаған. Мұнан соң арамн қуған жас Сұлтанов 1965 жылы Қазақ политехникалық институтына оқуға түсіп, 1971 жылы оны инженер-электрик мамандығы бойынша бітіріп шықты. Өмір ағыны бір орында тұрмайтынын ескерсек, кешегі жұмысшының бүгінгі бейнесі сіз бен біз ойлағаннан бөлек болатынын өмірдің өзі дәлелдеді емес пе?! Қарапайыс жұмысшының мамандық алған маманға айналуы ол кездерде белгілі бір өмір белесі болатын. Кейіпкеріміз бұл белесті бағындырды. Ер азаматқа артылар абройлы міндетті әскер сапында жүріп атқарған соң 1972 жылы аудандық электр жүйесі мекемесіне элетромонтер болып жұмысқа орналасты. Міне содан бері қиын заманның бар ауыртпалығы мен өмірдің бейнетке толы түрлі өзгерістерін бастан өткерді. Сыналды, шыңдалды. Беліне шынжыр, аяғына темір доға іліп, бағана бойымен биікке де өрмеледі. Сәтсіздіктерден сабақ алды, басты бұл салада қателік кешірілмейтінін ұғынды. Солай басталған сым бойындағы серпінді қызмет жіті жыл қатарынан қосалқы стансаларда жөндеу жөніндегі инженерлік міндеттермен ұштасты. 1981 жылдан былай аудандық электр жүейсі мекемесін басқарды. Бұл кездерде атқарылған жұмыстың ауырлығы атан түйе жүк боларлық. Ауқымды жұмыстың ауаны жаңа тұрпаттағы өндірістік жөндеу базасын жасақтаумен жалғасты. Бұл бір белес еді. Ендігі кезек шағыл құмдарды шиырлай өтіп, белдеулерден асып өтетін Қосаман, Атанши, Жіңішкеқұм, Бірлестік, Ақеспе ауылдарын орталық электр жүйесіне қосу. Арманы асқақ Арапхан ағамыз бастаған жұмысшы жасақтың қолынан бұл жұмыстар да келді. Қолынан іс келетін азаматтың шалғайда қалған туған жері де бұл нәтижелі жұмыстан шет қалмады. Бастысы тіршілік нәріне айналған алып өндіріс ошақтарының оты өшпеді. Қуат көзінен күш алған олардың күретамыры күн құрғатпай соғып тұрды. Мұндай қалыпты жұмыс ырғағының артында Арапхан ағамыз бастаған ұйымшыл ұжым, іскер әріптестер тұрды.Саланың өсу жолын сым бойымен салыстырса жүздеген тірік бағаналар мен мыңдаған шақырымдарға созылған желілерді қуалай жөнелер едік. Өйткені бодандықтағы бейнет пен бостандықтағы бақыттың арасы жер мен көктей. Сол Тәуелсіздік алған ауыспалы кезеңдерде тоқырау станогі тінін тарқатқан салалар тізімінде осы электр станциялары мен орталықтары да бар еді. Қадымын ендік басқан саланың қалжыраған халі сол тұстарда Арапхан ағамызға мәлім еді. Бір ғана Жіңішкеқұмға тартылған желілік кернеулердің қараусыз қалып, көрінгеннің жемтігіне айналуы да ондағы ағайынға ауыр сынақ болды. Сол сынақтың салқынын елмен бірге тартқан А.Сұлтанов ағамыз жарықсыз қалған ауылдық жабырқау көңілін табуда табандылық танытты. Ішкі резервтың қоры сол үзіктерді жалғауға жұмсалды. Жаңақұрылыстағы су шайған, белі кетіп билеген бөренелерді аннан-мұннан құрап, 25 шақырымдық желені қайта қалпына келтірді. Бұл кезеңдердегі Арапхан ағамыз бастаған батыл қадамдар мен бел жазбаған бейнетті кезеңдердің боямасыз бейнесі жаңақұрылыстық ағайынға мәлім болды. Желідей созылған жылдар жігі осылайша жақсылы-жаманды 30 жыл басшылық қызметпен ұштасты.Ортақ жұмыста абройын алға салып, жұмсақ креслоның жанын шықпай қалатын бұйрықшыл адам Арапхан емес еді. Қазіргі басшыларда тапсырманы туралап, атқарушылық міндетті үйіп-төкпей, арасында ортақ межеге айналған ауқымды жұмысты бірлесе атқаруға ықыласты еді. Сол көпшілдігі мен кең пейілдігінен болар кейіпкеріміз құрмет төріне жақын болды. Үш шақырылым бойы қалалық кеңестің, сонша мерзім аудандық мәслихат депутаттығына сайланып, ел сенім артқан мандатты халқы үшін пайдаланды. 1991 жылы кәсіподақтар сыйлығының лауреаты атанды. Ал 2007 жылы республикалық энергетика және минералдық ресурстар министрлігінің Құрмет грамотасымен марапатталды. Сол жылдың еншісіндегі ең жоғарғы атақ Қазақстан Республикасына еңбегі сіңген энергетик атануы еді. Бұдайын кейінгі жетістік тізбегі ұжыммен бірге ұштасып жатты. Сұлтанов басқарған сала саңылақтары облыстық кәсіби конкурстарда тоғыз жыл қатарынан жеңіс тұғырынан көрінді.Биыл 75 жастың желкенін керген қарт кейіпкеріміз мұндай жетістікке өзім жеттім деуден әсте аулақ. Өйткені оның отбасындағы өнеге байрағының биікке желбіреуіне жұбайы Күлпаршын мен балалары бірден-бір себепші. Еңбек майданында шыңдалған әулеттің алып шынары Арапхан ағамыздың аяулы жары ауданға белгілі балалар дәрігері болды. Ата-ананың өнеге боларлық өмір жолынан көп олжа түйген балалары да бүгінде бір-бір саланың шылбырын ұстаған кәнігі мамандар. Берекесі мен мерекесі артқан мерейлі шаңырақтың мәңгілік музарты жайлы біз түйген ақиқат осы.А.Қарасай

Аралдың Арапханы, ауданның шамшырағы

&nbsp;<a href="https://kyzylorda-news.kz/">Kyzylorda-news.kz</a>&nbsp; Қызылорда облыстық Қазақстан Халық Ассамблеясы жанындағы ақпараттық түсіндіру тобы мүшелерінің кезекті кездесуі «Петро Қазақстан Құмкөл ресорсиз» АҚ мұнай компаниясында өтті. Оған облыстық қоғамдық даму басқармасының «Қоғамдық келісім» КММ директорының орынбасары, Phd докторы, облыстық ҚХА жанындағы ғылыми-сарапшылық тобының мүшесі Дәулет Омаров, Ақсақалдар кеңесінің мүшесі Асылбек Жұмабаев, Корей этномәдени бірлестігінің төрағасы Денис Пак және мұнай компанияның қызметкерлері қатысты.Топ мүшесі Асылбек Жұмабаев мемлекет басшысы Қасым-Жомарт Кемелұлы Тоқаевтың «Әділетті Қазақстан – Адал азамат» деген басты қағидатын негізге ала отырып, дамудың даңғыл жолына түсудегі тұрақтылықтың маңыздылығына тоқталып өтті. Сондай-ақ, дін бостандығы төңірегінде сөз қозғады.Ұлттық Құрылтайда көтерілген жастар арасындағы тәлім-тәрбие, адал еңбек, адал табыс, еңбексүйгіштік, отансүйгіштікке баулу, кітап оқу, әлеуметтік желідегі мәдениеттілік жөнінде атт мүшесі Дәулет Омаров түсінік берді.Ал Корей этномәдени бірлестігінің төрағасы Денис Пак бірлестіктің ынтымақ пен достықтың нәтижесінде 35 жылда жеткен жетістіктері мен игілікке толы ізгі жұмыстарына тоқталып, екі ел арасындағы достық қарым-қатынасты айтып өтті.Қатысушылар тарапынан сұрақтар қойылып, кездесу пікір алмасуға ұласты.

Қызылордада мұнай компаниясының қызметкерлерімен кездесу өтті

<a href="https://kyzylorda-news.kz/">Kyzylorda-news.kz</a> Жүзін танымасам да Саматтың атына бұрыннан қанықпын. Оның есімі &nbsp; байқау, көрмелерде жиі аталып та, айтылып та жүреді. Естуімше, қолынан көп нәрсе келеді. Сырттан келетін меймандарға ұсынылатын естелік кәдесыйлардың бірсыпырасы осы Саматтыңқолынан шыққан бұйымдар. &nbsp;Шығармашылығына іштей риза болып жүретінмін. Өкінішке орай, қазір қолөнермен айналысатындар қарасы аз. Көз шырымы, қол күші мен ой, қиялұшқырлығын қажет ететін шығармашылық жұмысты кез келген адам таңдай бермейтіні сол себептен болар. Оның үстіне бұл атадан балаға берілетін ерекше қасиет екені тағы бар.Аудандық оқушылар үйінде безендіруші және «Шебер қолдар» үйірмесіне жетекшілік ететін Самат Өскелеңовті жұмыс орнынан таптық. Кісі жатырқамайды екен. Ашық-жарқын амандасып болған соң, үстел үстінде тұрған ағаш, мүйіз, майлы бояумен салынған мүсін, макет, Қорқыт композициясымен таныстыра бастады.<blockquote>– Сыр елінің азаматы болғандықтан шығармашылық жұмыстарым Қорқыт атаға арналады. «Жер кіндігі», «Күй», «Күй толқыны» атты туындыларыма ағаш пен ірі қара малының мүйізін пайдаландым. Оңай деп айта алмаймын. Себебі, бір шығарманың өзіне кейде бір айдан астам уақыт кететін кездер болады. Ойылады, иіледі, кептіріледі дегендей. Сазбен де жұмыстар жасаймын. Елбасымыздың «Болашаққа бағдар: рухани жаңғыру» мақаласы жарыққа шыққаннан бері ұмыт бола бастаған әдет-ғұрпымыз бен салт-дәстүріміз қайта түлеуде. Өзіңіз білесіз, станоктан шыққан зат пен адамның қолымен жасалған бұйымның арасы жер мен көктей. Осындайда сонау дәуірлердегі қыш құмыралар, ыдыс-аяқтар, зергерлік бұйымдардың араға &nbsp;ғасырлар салып бүгінгі күнге бүлінбей жеткеніне таңқаласың. Оқушылар үйінде балаларға саздан қыш құмыралар жасауды үйретудемін. Оларға сазбен жұмыс жасаған өте қызықты. Гипстен мүсіндер құямын. Балық сүйегінен де сан түрлі нәрселер шығаруға болады. Тек ынта мен ықылас-ниетің болса болды,-дейді С.Мұсағалиұлы.</blockquote>Әрі қарай оның майлы бояулармен салынған «Кешкі мұң», «Бұғылар махаббаты» тақырыбындағы картиналарын тамашаладым. Саматтың сурет өнеріне қабілеті жас кезінен байқалған. 4 сыныпта оқып жүрген кезінен-ақ ол теледидардан көрген ертегі кейіпкерлерінің суреттерін айнытпай сала бастаған. Ер жете келе оны осы қабілеті Алматы қаласындағы О.Таңсықбаев атындағы сәндік қолданбалы өнер колледжіне жетелейді. Оқу орнын «Суретші-шебер» мамандығы бойынша бітіріп шығады.Сегіз қырлы, бір сырлы шеберге бұл қасиет екі жақтан да дарыса керек.<blockquote>-Өз жағымда әкемнің ағасы Иса Қасенов ат әбзелдерін жасайтын ағаш &nbsp;ұстасы болса, інісі Төребек Өскелеңовтің де қолынан бірқатар шығармалар дүниеге келген. Нағашы жағымда Кенжеқара атам қазақтың ұлттық аспабы-домбыра жасаудың шебері болған екен. &nbsp; Ал, менің суретші, этнодизайнер болуыма әпкем Ләззат ықпал еткен еді. Бала кезімізде ол да киім шебері болуды армандаған. Менің қиялымды самғатып, &nbsp;суретшілік өнерге &nbsp;тартқан бірден-бір жан осы әпкем, – дейді ол ризалық сезіммен.</blockquote>Үлгілі отбасынан өсіп-өнген Саматтың әкесі Мұсағали Өскелеңовтің &nbsp;көркейту-көгалдандыру, бау-бақша сүйікті ісі. Анасы Ұлболсын Кенжеқараева әуез мектебінің ардагер-ұстазы. Домбыра, баянда ән салады.Бұдан бөлек Самат үйінде &nbsp;жеке шеберхана жабдықтаған. Онда жиһаздар құрап, ескілерін жаңартады. Домбыра, қобызға, тұрғын үйлерге ұлттық нақышта &nbsp;қазақы ою-өрнектермен безендіруге тапсырыстар қабылдайды.– Оқушылар үйінде еңбек еткеніме 8 жыл болыпты. Осы уақытта 100-ден аса сурет, мүсін, тағы басқа дүниелерім сыйға тартылды. Әлем назарын өзіне аударған «ЭКСПО-2017» көрмесі аясында да ізденістер жасалды. Бүгінде оқушылар үйінде шәкірттер тәрбиелеудемін. Олардың арасынан дарынды балалар шығатынына сенімдімін. Құммен сурет салатын Жансая Кенжалиеваның болашағынан үлкен үміт күтемін. Көктемге қарай Қорқыт атаға арналған туындыларымнан көрме ұйымдастырмақпын,-дейді жақсылыққа жаны құмар қолөнер шебері.Сәрсенкүл ЖАУДАТБЕКҚЫЗЫ

Суреттермен сыр түйген қармақшылық өнерлі жас

<a href="https://kyzylorda-news.kz/">Kyzylorda-news.kz</a>&nbsp; Сырдария аудандық мекемелер үйінде Жастар денсаулығы орталығының мамандарымен нарколог-фельдшер Қ.Жұмабеков, акушер-гинеколог С.Жәнібекқызы, уролог-дәрігер А.Қуатов пен психолог мамандардың қатысуымен аудан жастарымен кездесу өткізілді.Кездесуде 26 маусым халықаралық нашақорлыққа және есірткінің заңсыз айналымына қарсы күрес күні&nbsp;туралы және жасөспірімдер мен жастардың репродуктивтік денсаулықты күту жөнінде мағлұмат берілді. Жастарға жұқтырылған қорғаныш тапшылығының инфекциясын жұқтырудың, есірткі құралдарын пайдаланудың алдын-алуға және есірткі қылмысына қарсы іс-қимылды жүргізуге, есірткінің жағымсыз салдары туралы, сондай-ақ репродуктивтік денсаулыққа әсер ететін факторлар туралы ақпараттар беріліп, ақпараттық үнпарақтар таратылды.<blockquote>– Нашақорлық – адамды өлімге әкелетін өте қауіпті дерт. Нашақорлықпен күрес дүниежүзі бойынша жүргізілгенімен, оның түп тамырына балта шабу оңай шаруа емес. Мемлекет тарапынан, құқық қорғау органдарымен кешенді іс-шаралар жүргізілгенімен жастар арасында есірткіге тәуелділік кең етек алуда. Жастарды бұл дерттен бойын аулақ ұстау, оның салдарының қандай деңгейге әкелетінін айтып, түсіндіру қоғамның алдындағы міндет. Біздер, мамандар жыл сайын үгіт-насихат жұмыстарын жүргізіп, келеңсіз әдеттен сақтануға шақырамыз. Кез келген отбасын айналып өтпеуіне ешкім кепілдік бермейді. Баласын нашақор екенін ата-ана кеш байқауы мүмкін. Сондықтан балаларға дұрыс тәрбие беріп, олардың бос уақытын қатаң қадағалау керек, – дейді аудандық емхананың нарколог-фельдшері Қалдыбек Жұмабеков.</blockquote>Жиын барысында сала мамандары жастарды есірткіден бойды аулақ ұстаудың маңыздылығы ескертіліп, саламатты өмір сүру салтын ұстануға шақырды.

Сырдарияда жастармен кездесу өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;Кеше жаңадан тағайындалған Сырдария аудандық мәдениет және тілдерді дамыту бөлімінің басшысы Анар Қалдыбаева Асқар Тоқмағамбетов ауылындағы клуб үйі мен Тереңөзек кенті мәдениет үйінің жұмысымен танысты.Өз кезегінде бөлім басшысы &nbsp;сала жұмысына серіпн керектігін жеткізді.<blockquote>– Аудандық мәдениет және тілдерді дамыту бөлімінің басшысы ретінде ақиық ақын Асқар Тоқмағанбетов ауылына арнайы барып, елді мекендегі мәдениет ошағының жұмысымен таныстым. Бөлімнің бас маманы Ақбота Ертісқызы екеуміз ауылдық клуб үйінің материалдық базасын, сала мамандарының біліктілігін құжат айналымын зерделеуге мүмкіндік алдық. Кездесу барысында ауылдық кітапхана жұмысын зерделеп, оқырманға қызмет ететін руханият ордасының жай-күйіне қанықтық. Салаға өзгеріс жасау мақсатында тың жобаларды қол алу керектігі тілге тиек етілді. Сонымен қатар үйірмеге бала тарту мәселесі назардан тыс қалған емес.&nbsp;Бірқатар олқылық бойынша сала мамандарына жан-жақты тапсырма берілді. Содан соң Тереңөзек кенті мәдениет үйінің қызметкерлерімен кездестік. Мұнда көптеген мәселелер ортаға салынып, алдағы жоспар барысы айқындалды. Алдағы уақытта мұндай кездесулер жалғасын табатын болады, – деді бөлім басшысы.</blockquote>

Бөлім басшысы мәдениет ошақтарының жұмысымен танысты 

<a href="https://kyzylorda-news.kz/">Kyzylorda-news.kz</a> «Еңбек ерлікке жеткізер, ерлік елдікке жеткізер» демеп пе еді дана халқымыз.&nbsp;Кәсіпкер болу әр адамның маңдайына жазылған несібе деп айта алмаймыз. Десек те, өз мүмкіндігіне сене білген, алға ұмтылған әр азамат небір сыннан &nbsp;сүрінбей өтіп, тынымсыз тірлік кешкенінің арқасында биік белестерді бағындыра алады. Көпке танымал тұлғалардың, оның ішінде ауданға белгілі кәсіпкер азамат Ешниязов Серғали Сыдықұлының &nbsp;өмір жолдары бұған мысал.Сыдық әке мен Шолпан ананың отбасында тәрбиеленген 8 баланың екіншісі Серғали 1957 жылы дүниеге келген. №26 орта мектепте оқыған сол кездегі толқындар, яғни оның құрдастарының көбі білім алуға құштар болды. Жоғары оқу орнына түсуді, жақсы мамандық алуды мақсат тұтатын. &nbsp;Соған жету жолында қатарластарынан қалмай, терең білім алуға талпынған ол арман қуып, Алматыға жол тартты.Келер күнге құлаш ұрып, үлкен азамат болуды аңсайтын кез келген адамның қиялында өзіне ғана мәлім, ішкі түйсігімен бекіген бір армандар болатыны анық. Ол көп жағдайда мамандық таңдауға келіп тіреледі. Әркімнің болашақ мамандығы оның бала кезінен әуестенетін, қызығушылық танытатын әрекеттерінен көрініп тұрады. Мектепте алғырлығымен ерекшеленіп, діттеген мақсатына жетуге талпынатын Серғали Сыдықұлы 1974 жылы өз білімімен Алматыдағы медициналық институттың фармацевтика факультетіне оқуға түседі. Бүгінге дейін жемісін берген мамандығын жүрек қалауымен таңдап алады.Жоғары білімі бар мамандар жеткіліксіз тұста оқу орнын тәмамдап келген жас бірден Қызылорда облыстық дәріхана басқармасына инспектор болып жұмысқа орналасады. Еңбек жолы осылайша тек білікті деген мамандар еңбек ететін үлкен ортада басталады. Тәжірибелі тұлғалардың ортасына түскен жас тез ысылып, жұмысқа деген жауапкершілігін күшейтіп, алған білімін тәжірибесімен ұштастыра біледі.Сауатты, өз-өзіне нық сенімді жас жігітті Жалағаш ауданындағы №6 дәріхананың меңгерушілігі қызметіне жібереді. Кейіннен Қармақшы ауданындағы №31, 76, 26 дәріханалардың меңгерушісі қызметтерін атқарады. Дәрі-дәрмек тапшы, қазіргідей жаңа технологиялар мен техникалар жоқ, түрлі аурулар кең етек алған қиын тұстары, &nbsp;1990 жылдары күн-түн демей, уақытпен санаспай дәрілер жасап, емхана мен аурухананы қажетті дәрілермен қамтамасыз етуге көп үлес қосқан жандардың бірі осы кісі. Өз ісінің білікті маманының жұмысына сол кездері сұраныс та аз болған жоқ. Бірақ, туған ауылында еңбек етуді міндеті санады.&nbsp;1997 жылдан бері «Шапағат» жауапкершілігі шектеулі серіктестігін құрып, зайыбы Алма Исабекова екеуі дәрі-дәрмек сатып, халыққа қалтқысыз қызмет етіп келеді.Қазір басы ауырып, балтыры сыздамайтын адам жоқ. Қыс айларында тымау, салқын тию секілді аурулардың тіпті күшейетін кезеңі. Сонда дәрі-дәрмексіз ауруымыздан айыға алмай жатамыз. Іздеген дәрілік препараттардың барлығын көпшілік осы дәріханадан табады. &nbsp;Ондағы бағалар да халықтың көңілінен шығады. Сонымен қоса ол ақысы бюджеттен бөлінетін тегін дәрі-дермектерді аудандық емхананың рецептісімен босату жұмысын жақсы жүргізіп келеді. Оның өзі сұранысы көп, жауапкершілігі мол жұмыс.Серғали аға мен Алма апай 3 бала тәрбиелесе, тұңғыштары Нұржан Астана қаласындағы Қазақ мемлекеттік құқық университетінде аға оқытушы, Ержаны әке жолын жалғап провизор мамандығын меңгерген.&nbsp;Кенжелері Ербол әл-Фараби атындағы Қазақ Ұлттық университетінің ақпараттық технологиялар факультетін бітірген, өз мамандығы бойынша еңбек етеді, қосымша кәсіпкерлікпен айналысады.Отбасымен кәсіпкерлікпен айналысатын абыройлы азаматқа жастарға қандай ақыл-кеңес айтасыз дегенімізде:<blockquote>– Бүгінде жаңа мүмкіндіктерге жол ашатын жаңа тетіктерді игеру – өз өмірімді өзгертіп, өз деңгейімді өсірем, өз болашағымды қалыптастырсам деген азаматтың бірден-бір ізденіс жолы. Ең бастысы қатардан қалмай ұмтылу және оқып-білуден, үйренуден шаршамау керек, – дейді.</blockquote>Бүгінгідей нарықтық қарым-қатынастарға негізделген заман кезінде танымал меценаттар мен кәсіпкерлер ауылдық жерлерде мешіт, мектеп салып, ауруханаларды қажетті құрал-жабдықтармен қамтамасыз етіп, қарттар үйіне көмектесіп, жетімдерді жебеп, әр саладағы дарынды жастарды қолдап, демеушілік көрсетуде. Мұндай жұмыстар алдағы уақытта да жарасымды жалғасын табатынына сенеміз. Қолы ашықтың жолы да ашық. Көршің аш отырғанда, тойып ас ішіп, оған қараспауың күнә болып саналатынына сенетін Серғали Сыдықұлы қолдан келгенше мұқтаж жандарға көмектесуге дайын тұрады. «Кең болсаң кем болмайсың» деген сөзді өмірлік ұстаным еткен. Ол көбіне науқас балаларға ем алуға жағдай жасайды екен. Себебі денсаулықсыз дүние бос дейді.<blockquote> – Жақсылық жасау да бақыт. Оны жария етудің еш қажеті жоқ. Сен біреуге көмек қолын созсаң, сенің Алла Тағала несібеңді еселеп қайтарады. Бұған сан мәрте көз жеткізгенмін,- дейтін қайырымды кәсіпкер.&nbsp;</blockquote>

 Серғали Ешниязов: Ең бастысы үйренуден шаршамау керек

<a href="https://kyzylorda-news.kz/">Kyzylorda-news.kz</a>&nbsp; &nbsp;Бабы мен бағы келіскен бозкілем шеберлерін жас бапкер Аружан Темірғали бірнеше жарыста сынап көруде. Мәселен, Қызылорда қаласының ашық біріншілігінде 5 дзюдошы жеңімпаз атанды.Жеңімпаз атанған спортшылар қатарында +50 келі салмақта Нұрислам Қожа, 38 келі салмақта Алихан Мұханбетов, 42 келі салмақта Мұхаммедали Гажданбек, 35 келі салмақта Нұртілеу Сұлтанғазиев, 46 келі салмақта Жалғасбек Айтбай жеңіс тұғырынан көрінді.<blockquote>– Жыл көлемінде «Аслан» спорт орталығының спортшылары жеңісті жолды жалғауда. Бапкер ретінде маған жүктелген міндетті мүлтіксіз орындағым келеді. Қашанда спортшыларға мықты тактика қойып, жеңіске жетелей білген дұрыс. Облыс көлемінде өткізілетін біріншіліктерден спортшылармыз барынша тәжірибе жинақтайды. Бұл ретте, әркез қолдау көрсеткен сала мамандарына шынайы алғысымды білдеремін. Баланың дамуына, өзіндік шынығып, майталман спортшы ретінде шығуына барлық жаттығу залында көрсетілген &nbsp;бағыт-бағдар &nbsp;өз өміршеңдігін жоймайды. Алдағы уақытта тыңбай еңбек етіп, ата-ана үмітін ақтауға тырысамыз, – дейді жас бапкекер Аружан Темірғали.</blockquote>Негізінен, Нағи Ілиясов ауылындағы &nbsp;«Аслан» спорт орталығында оқушылар 5 спорт бойынша жаттығады.

5 спортшы жеңіс тұғырында

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp;Сырдария ауданының орталығы Тереңөзек кентінде 1971-1972 оқу жылында өнер мектебі ашылып, қазіргі уақытқа дейін жас өнерпаздарды өнерге баулып келеді. Қазіргі таңда өнер мектебінде 345 оқушы бар. Оларға 31 мұғалім домбыра, қобыз, баян, дәстүрлі ән, фортепиано, скрипка, хореография, вокал, труба – барлығы 9 мамандық бойынша сабақ беруде. Ұстаздардың 4-і педегог-зерттеуші, 2-і педагог-сарапшы, 10-ы педагог-модератор, біреуі - І санатты, үшеуі – ІІ санатты, 11 – педагог санатында жұмыс жасайды. Оқушылардың 124-і домбыра, 22-і қобыз, 52-і баян, 9-ы дәстүрлі ән, 10-ы фортепиано, 11-і скрипка, 110-ы хореография, 1-і труба, 6-ы вокал мамандықтарында білім алуды.Өнер мектебінде білім сапасын заман талабына сай ұйымдастыру басты міндет. Осы бағытта оқушылардың үлгерімінің сапасын арттыру, олардың орындаушылық шеберлігін шыңдау, оқушылардың түрлі өнер сайыстарына кеңінен қатысып, жүлделі орындарға ие болу жұмыстары жалғасуда.<blockquote>– Мұғалімдердің кәсіби біліктілігін көтеру мақсатында ұсатаздарға арналған біліктілікті арттыру курстары мен түрлі семинарлар, тәжірибе алмасу алаңдарына қатысу жоспарлы түрде жүзеге асырылмақ. 2024-2025 оқу жылында Сырдария өнер мектебінің 12 ұстазы біліктілік арттыру курсына қатысады. Біліктілік санатын алу үшін 13 ұстаз аттестациядан өтеді. Озық тәжірибе жұмысын анықтап, ұстаздардың сабақ беру шеберлігін арттыру мақсатында әрбір сынып жетекшісі жылына 2 рет ашық сабақ өткізіп, оған барынша ұстаздарды көптеп қатыстыру жоспарлануда. Оның ішінде жас мамандардың үлесі басым болады, – дейді өнер мектебінің директоры Марат Сәдуақас.</blockquote>Мектепте оқушылар ансамбілі, оқушылар қоры, "Тұмар", "Айтұмар", "Назкерім" бишілер тобы, қобызшылар ансамбілі, скрипкашылар ансамбілі, вокальдық топ жұмыс жасауда.Оқушылар мен ұстаздардың сахна мәдениетін дамыту, орындаушылық шеберліктерін дамыту, аудан тұрғындарына&nbsp;мәдени қызмет көрсету мақсатында өнерпаздар ауданда өтетін мәдени іс-шараларға қатысады.Алдағы уақытта, 2024-2025 оқу жылында республикалық жас музыканттар байқауы халық аспаптары арасында өткізіледі. Аталған байқауға мектеп оқушыларын, оның ішінде домбыра, қобыз, баян аспаптары бойынша қатыстырып, жүлделі орындарды жеңіп алу жоспарлануда. Домбыра, қобыз, баян бойынша аудандық кезеңге 20 бала, облыстық кезеңге 10 бала, республикалық кезеңге 4 бала қатыстыру бағытында дайындық жұмыстары жүргізілуде. Сонымен қатар жыл сайын өткізілетін ҚР Оқу-ағарту министрлігінің №514 бұйрығымен бекітілген жас музыканттар байқауы, "Ақ шағала" бишілер байқауы, "Ақберен" балалар шығармашылығының фестиваль байқауына қатысу үшін оқушылар дайындығы жалғастырылатынын атап өтті мектеп директоры.<blockquote>– Балалардың бос уақытын тиімді пайдалану, ата-ана мен балалардың сұранысын қанағаттандыру, оларға кәсіби білім беру өнер мектебі ұстаздарының басты міндеті. Балаларға ұлттық өнерді, ұлттық құндылықтарды үйрету арқылы оларды Отан сүйгіштікке, еңбекқорлыққа, адамгершілікке, ізденімпаздыққа тәрбиелеу үшін ұстаздар қауымы жұмыла жұмыс жасай беретін болады, – дейді мектеп басшысы Марат Сансызбайұлы.</blockquote>

Қазақстан және Қызылорда облысының жаңалықтары