<a href="https://kyzylorda-news.kz/">Kyzylorda-news.kz</a> ҚР Премьер-министрінің орынбасары – Ұлттық экономика министрі Серік Жұманғариннің төрағалығымен Экономиканың нақты секторын дамыту мәселелері жөніндегі штаб отырысы өтті.Жиынға облыс әкімі Нұрлыбек Нәлібаев, Су ресурстары және ирригация вице-министрі Нұрлан Алдамжаров, «Ұлттық ақпараттық технологиялар» АҚ интеграцияланған шешімдер департаменті инвестициялық жобалар басқармасының басшысы Мағжан Серікбаев, «Тау-кен Самұрық» ұлттық тау-кен компаниясы» АҚ басқарма төрағасының міндетін атқарушы Нариман Абсаметов, «АКК» АҚ басқарма төрағасының орынбасары Айдын Досқараев, «Даму» кәсіпкерлікті қолдау қоры» АҚ басқарушы директоры Нұрбол Жаңабеков пен жауапты сала басшылары селекторлық режим арқылы қатысты.Күн тәртібінде үш мәселе қаралды. Атап айтсақ, Ұлттық цифрлық инвестициялық платформаның жұмыс барысы, Қызылорда облысының әлеуметтік-экономикалық дамуы, инвестициялық жобалары және ірі инвестициялық жобалардың проблемалық мәселелері.​Басқосуда Серік Жұманғарин Мемлекет басшысының экономиканы әртараптандыру, өңірлер мен экономиканың нақты секторларын кешенді дамыту туралы тапсырмаларын орындау негізгі басымдық екенін айтып, Сыр еліндегі жұмыстарға оң бағасын берді.<blockquote>​«Экономикалық өсуді қамтамасыз ету жөніндегі жедел штабтың осы жылғы алғашқы отырысын өткіземіз. Мемлекет басшысының тапсырмасына сәйкес елдің инвестициялық ахуалын жақсарту мақсатында өткен жылдың желтоқсан айында Ұлттық цифрлық инвестициялық платформа іске қосылды. Бұған дейінгі көшпелі отырыстың қорытындысы бойынша мемлекеттік органдар мен ұйымдарға бірқатар тапсырма берілді, оның ішінде цифрлық платформаны ақпаратпен сапалы толтыру тапсырылды. Өңдеу өнеркәсібі, тау-кен, металлургия және агроөнеркәсіптік кешенді қамтитын, осы жылы жүзеге асырылатын инвестициялық жобалар пулын қалыптастыру жөніндегі жұмысты жалғастыру қажет. Бұл жұмысқа мемлекеттік органдардың, әкімдіктер мен қаржы институттарының белсенді қатысуы талап етіледі. Жалпы әкімдіктер аймақтың ерекшеліктерін ескеріп, өңдеу өнеркәсібіндегі шағын және орта бизнес кәсіпорындарының үлесін арттыруы, экономиканың нақты секторларындағы инвестициялық жобаларға басымдық беруі, қолдауды күшейтуі қажет. Әрбір өңірде аймақтық дамудың берік негізін құрайтын ірі жобалар болуға тиіс. Атап өту қажет, Қызылорда өңірінің даму қарқыны өте жақсы. Барлық секторда белсенділік танытып келеді. Осы жұмыстарды одан әрі жалғастыру маңызды. Қаражатты мақсатты жұмсап, ауқымды жобаларды сәтті жүзеге асыратын аймақтарға біздің тарапымыздан әрқашан қолдау көрсетіледі», – деді С. Жұманғарин.</blockquote>Штаб отырысында облыс әкімі Нұрлыбек Нәлібаев аймақтың әлеуметтік-экономикалық жағдайына тоқталып, алдағы жоспарлар туралы айтты.<blockquote>«Президентіміздің, Үкіметтің ерекше қолдауының арқасында Қызылорда облысының әлеуметтік-экономикалық дамуында оң тенденция сақталды. 2024 жылдың қорытындысымен экономикалық көрсеткіш 107,0 пайызды (2023 жылы – 107,3%) құрады. Жоспар бойынша жалпы өңірлік өнімнің көлемі 3,2 трлн. теңге, өсім 6,3 пайыз болады деп күтілуде. Бюджеттің өз кірістерінің көлемі 44 пайызға ұлғайды, барлық негізгі макроэкономикалық көрсеткіштің өсімі қамтамасыз етілді. Өңдеу өнеркәсібі 19,6 пайызға, ауыл шаруашылығы 2,3 пайызға, тұрғын үй 16,9 пайызға, көлік 2,8 пайызға, сауда 6,6 пайызға, құрылыс жұмыстарының көлемі 53,8 пайызға артты. Өткен жылы облысымызға барлық көздерден 639 млрд. 500 млн теңге инвестиция тартылды. 2023 жылмен салыстырғанда өсім 21,7 пайыз, республикалық көрсеткіштен (РК – 107,5%) 3 есе артық орындалды. Жеке инвестициялардың үлесі 70,5 пайыз. Өңірге шетелдік инвесторларды, озық технологияларды тарту бойынша белсенді жұмыс жалғасуда», – деді Н.Нәлібаев.</blockquote>Сондай-ақ, жиында облыс әкімінің орынбасары Ардақ Зебешев өңірдің әлеуметтік-экономикалық дамуы және инвестициялық жобалар туралы баяндады. «Шалқия мырыш ЛТД» АҚ бас директоры Асқар Тілеулин, «Арал Сода» ЖШС құрылтайшысы Дәурен Мұқашев өндірістегі мәселелерді ортаға салды.Фото: Қызылорда облысы әкімінің баспасөз қызметі

Экономиканың нақты секторын дамыту мәселелері қаралды

<a href="https://kyzylorda-news.kz/">Kyzylorda-news.kz</a> Профилактикалық құрал қызметін атқаратын жемқорлардың мемлекеттік тізілімі енгізіледі. Оның негізгі мақсаты – қоғамдық мін тағумен қоғамда сыбайлас жемқорлыққа төзбеушілікті қалыптастыру. Тізілімде ауыр немесе аса ауыр сыбайлас жемқорлық қылмыстарын жасағаны үшін сотталғандар туралы мәліметтер болады. Олар оған соттың заңды күшіне енген айыптау үкімі негізінде енгізіледі. Ал ақтау үкімінің заңды күшіне енуі және соттылығының жойылуы негізінде алынып тасталады. Тізілімді Сыбайлас жемқорлыққа қарсы іс-қимыл агенттігі жүргізеді және ведомствоның веб-сайтында жалпыға қолжетімді болады. <a href="http://t.me/mazhilis_kz">t.me/mazhilis_kz</a>Фото: Нұрболат Нұржаубай

Қазақстанда жемқорлардың жария тізілімі жасалады

<a href="https://kyzylorda-news.kz/">Kyzylorda-news.kz</a> Италияның Турин қаласында өтіп жатқан Қысқы универсиадада бүгін Қазақстан қоржынына бір күміс, бір қола медаль түсті, – хабарлайды <a href="https://kaz.inform.kz/news/kiski-universiada-kazakstan-korzhinina-tagi-ek-medal-tust-bf700f/">ҚазАқпарат.</a>Ел құрамасынан Денис Зинов парашаңғышылар арасында 10 шақырымға еркін жүрістен мәреге екінші болып келіп, күміс жүлде алды.Ал аталған сайыста Роман Құрбанов қола медаль иеленді. Ол көзі нашар көретіндер санатында жарысқа қатысып, жүлдеге қол жеткізді.Айта кетсек, бұдан бұрын 14 қаңтарда Анастасия Городко фристайлдан&nbsp;чемпион атанған еді.Италияның Турин қаласында өтіп жатқан Қысқы универсиадада қазақстандық 103 спортшы 11 сайыс түрі бойынша бақ сынайды. Олар биатлон, шорт-трек, шаңғы жарысы, мәнерлеп сырғанау, қысқы спорттық бағдарлау, фристайл, тау шаңғысы, ерлер және әйелдер хоккейі, сондай-ақ парашаңғы жарыстары бойынша сынға түседі.Фото: Ұлттық ғылыми-практикалық дене тәрбиесі орталығы

Қысқы универсиада: Қазақстан қоржынына тағы екі медаль түсті

<a href="https://kyzylorda-news.kz/">Kyzylorda-news.kz</a> Петропавлдық ер адам&nbsp;көлігін 5 минуттан артық қыздырып, айыппұл төлеуге мәжбүр болды. Ер адамды полицияға көршілері ұстап берген. Бұл туралы<a href="https://stan.kz/korshileri-ystap-bergen-koligin-5-minuttan-artik-kizdir-412444/"> Stan.kz</a> ақпарат агенттігі хабарлайды.Әлеуметтік желілерде тараған мәлімет бойынша, көршілерінің бірі оның әрекетіне наразы болып, "102" нөміріне қоңырау шалып, полиция шақырған. Соның нәтижесінде көлік иесіне 5 АЕК (19 660 теңге)&nbsp;айыппұл салынған. Бұл жағдай өңір тұрғындарының арасында қызу талқыға түсті. Олар мұндай айыппұлдың әділетсіз екенін айтады. Себебі ауа температурасы кейде -40 градусқа дейін төмендейтін аймақта көлікті 5 минутта жылыту мүмкін емес дейді. Бұл тұрғыда өңірдің климаттық ерекшеліктері ескерілмегені сынға қалды.Ішкі істеп департаменті бұл талаптың жаңалық емес екенін, Жол жүрісі қағидаларының 20 жылдан бері бар бөлігі екенін түсіндірді. Олардың мәліметінше, егер көлік қозғалтқышы қосулы күйде 5 минуттан артық тұрса және бұл тұрғындарға қолайсыздық тудырса, көлік иесіне Әкiмшiлiк құқық бұзушылық туралы 597-бабының 1-бөлігі “Көлiк құралдарын тоқтату немесе тоқтап тұру қағидаларын бұзу” бойынша айыппұл салынады.Солтүстік Қазақстан облысының полиция департаменті мұндай айыппұлдардың жаппай салынбайтынын, тек тұрғындардан шағым түсіп, жеткілікті дәлелдер болған жағдайда ғана шара қолданылатынын айтты. Ер адам көршілерін осылай "көмек бергені" үшін кекетіп, алғыс білдірген. Осылайша ер адам дәл солардың бұл оқиға туралы жеткізді деп болжады.Еске салайық, бұған дейін Қазақстанда көлікті 5 минуттан артық қыздыруға айыппұл салынатынын жаздық. Тұрғын аудандарда қозғалтқышы қосулы көліктің тоқтап тұруына тыйым салынған. Егер қозғалтқыш қосулы жағдайда 5 минуттан артық тұрса, 5 АЕК (19 660 теңге) мөлшерінде айыппұл салынады. Ал қайталанған жағдайда – 10 АЕК (39 320 теңге).Ереже бұзушыларды жауапкершілікке тарту үшін көліктің мемлекеттік нөмірі көрсетілген және 5 минуттан асқанын дәлелдейтін видео қажет.Фото: Нұрболат Нұржаубай

Көлігін 5 минуттан артық қыздырған тұрғын 19 660 теңге айыппұл төледі

<a href="https://kyzylorda-news.kz/">Kyzylorda-news.kz</a> 2024 жылы облыс бойынша табиғат заңдылығын бұзудың алдын алу мақсатында 67 рейд жұмыстары ұйымдастырылды. Нәтижесінде түрлі заң бұзушылық анықталып, әкімшілік хаттама толтырылды. Сондай-ақ инспекция бастамасымен табиғат заңнамаларының сақталуы бойынша 36 тексеріс жүргізілген. Бұл туралы облыстық орман және жануарлар дүниесі аумақтық инспекциясының басшысы Марат Нұрмағанбетов хабарлады.<blockquote>- 2024 жылдың көктем айында мемлекеттік орман қоры жерлерінде жалпы аумағы 127 737 га жерге орман мелиорациялық шаралар жүргізілді. Ал 2025 жылға жалпы көлемі 376 291 га жерге орман патологиялық шаралар жүргізу жоспарланған. Жүргізілген 61 рейд жұмыстарының 2 дерегі қарау реттілігімен полиция органдарына жолданып, тиісті шара қаралды. Сондай-ақ балық аулау қағидасын бұзудың 4 дерегі анықталып, жинақталған құжаттар сотқа жолданды. Жалпы жағдай жіті бақылауда. Сонымен қатар облыста ерекше қорғалатын табиғи аумақтар бар. Республикалық маңызы бар Барсакелмес МТҚ-ның 2024 жылы атқарған жұмыс қорытындылары бойынша 2024 жылы 3 рет тыңдаулар өткізіліп, арнайы тапсырмалар берілді,- деді Марат Жалпақбайұлы.</blockquote>

Жыл бойы атқарылған жүйелі жұмыстар қорытындыланды

<a href="https://kyzylorda-news.kz/">Kyzylorda-news.kz</a> Медицина ғылымдарының докторы, академик, белгілі онколог Диляра Қайдарова С.Д. Асфендияров атындағы ҚазҰМУ-дың бірінші проректоры болып тағайындалды. Бұл туралы білім ордасының баспасөз қызметіне сілтеме жасаған <a href="https://kaz.nur.kz/showbiz/2211803-baian-maqsatqyzynyng-qudagiy-qazumu-birinshi-prorektory-bolyp-tagaiyndaldy/">KAZ.NUR.KZ</a> хабарлайды.&nbsp;Диляра Радикқызы ҚазҰМУ-дың директорлар кеңесінің шешімімен университеттің бірінші проректоры болып тағайындалды. Бұл туралы басқарма басшысы, ҚазҰМУ ректоры Марат Шоранов кеңесшілерінің, проректорлардың және құрылымдық бөлімшелер жетекшілерінің қатысуымен өткен жиналыс барысында хабарлады. Диляра Қайдарова 2016 жылдан 2025 жылдың қаңтарына дейін онкология институтын басқарды. Ал 2006-2016 жылдар аралығында Алматыдағы онкология орталығында басшы қызметін атқарған. Қызметтік жолын 1992 жылы Алматы онкологиялық диспансерінің гинекологиялық бөлімшесінде дәрігер-онколог болып бастаған.&nbsp;Айта кетерлігі, Диляра Қайдарова белгілі продюсер Баян Мақсатқызының құдағиы, Айсәуле Бақытбектің енесі болып келеді.Фото: Диляра Қайдарова инстаграм парақшасынан/Малика Хадид/Nur.kz

Баян Мақсатқызының құдағиы ҚазҰМУ бірінші проректоры болып тағайындалды

<a href="https://kyzylorda-news.kz/">Kyzylorda-news.kz</a> Мәжіліс депутаты Азат Перуашев Премьер-министрдің орынбасары – Ұлттық экономика министрі Серік Жұманғаринге жолдаған сауалында салық органдарын мобильді аударымдарды қадағалау саясатын қайта қарауға шақырды.Депутат мобильді аударымдарды қадағалаудың қазір ұсынылып жүрген нұсқасы Түркияның қателіктерін қайталатуы мүмкін екенін айтады.<blockquote>– Олжас Байділдинов сияқты сарапшылар қазіргі ұсынылып отырған тәсіл Түркиядағыдай ұлттық валютаның қосар бағамын туындатуы мүмкін екенін айтып жүр. Бұл елде қолма-қол емес ақша қалма қол ақшадан 10 пайыз қымбат. Бұл ондағы сұмдық қарқынмен келе жатқан инфляцияның бір көзі болып отыр, – деді Азат Перуашев.</blockquote>Сондай-ақ ол бұл істе әлемдегі табысты тәжірибелерді басшылыққа алу керек деген ой айтты.<blockquote>– Мысалы, көршілес Ресейде күн сайын 30-дан артық аударым қабылдайтын тұлғалар ғана бақылауға алынады. Оның өзінде әр төлемнің мөлшері 1000 рубльден артық, мұндай төлемдердің бір айдағы жалпы сомасы 1 млн рубльден көп болуы керек. Бұл біздің валютамен алғанда 5,5 млн теңгеден артық деген сөз. Ал бізде жалпы сомасы 255 мың теңгеден асатын ең ұсақ төлемдердің өзі мониторингке алынайын деп тұр. Іргедегі Ресейдің мөлшерлі шегінен 20 есе аз деген сөз. Қажетсіз ақпараттың мұнша көлемі кімге, не үшін керек, – деп сұрады ол.</blockquote>«Ақжол» партиясы мониторинг жүргізуге жататын төлемнің ең төменгі шегін 2000-нан 5000-ға дейін көтеруді ұсынып отыр.<blockquote>– Бір айдағы аударымдардың жалпы сомасына белгіленген 255 мың теңгелік шек біздің ахуалда ақылға сыймайтын мөлшер деп есептейміз. Төлемдердің сомасын кәсіпкерлердің таза пайдасы деп қарауға болмайды. Іс жүзінде шағын бизнестің таза пайдасы 15-20 пайыздан аспайды. Сондай 255 мың теңгенің айналымынан көретін кірісі 50-60 мың теңгенің айналасында ғана. Яғни, ең төменгі айлық мөлшерінен де төмен. Кәсіпкердің таза пайдасы 255 мың теңгеден асу үшін айналым 1 млн теңгеден асуы керек. Осыған байланысты «Ақжол» партиясы айына 1 млн теңгеден асқан мобильді аударым қабылдағандарға ғана мониторинг жүргізуді ұсынады, – деді депутат.</blockquote>Фото: Нұрболат Нұржаубай

Мобильді аударымдардың шегін 255 мыңнан 1 млн теңге көтеру керек — депутат   

<a href="https://kyzylorda-news.kz/">Kyzylorda-news.kz</a> Қызылорда облысына «Байдарка мен каноэде есуден» мемлекеттік жаттықтырушы Дәулет Сұлтанбеков арнайы жұмыс сапарымен келген болатын. Осыған орай, бүгін Қызылорда облысының дене шынықтыру, спорт және туризм басқармасының басшысы Бахтияр Ғарифоллаұлы, Қызылорда облысының есу спорты түрлері бойынша «Каноэ федерациясы» қоғамдық бірлестігінің президенті Садық Мұстафа Қызылорда қаласындағы есу базасының жұмысымен танысты.Қызылорда облысының дене шынықтыру, спорт және туризм басқармасының хабарлауынша, басқарма басшысы Бахтияр Ғарифоллаұлы жауапты сала мамандарына есу базасының техникалық жағдайын одан әрі жақсартуды тапсырып, жұмыс барысын күшейту керектігін тілге тиек етті. Сондай-ақ, алдағы жұмыс жоспары талқыланып, спортшылар дайындығы сөз болды.Айта кетейік, облыста 1494 спорт нысаны бар. Сәйкесінше, өңірдегі 1000 адамға шаққандағы спорттық нысандарымен қамтылу көрсеткіші 46,2 пайызды құрап отыр.Фото: Спорт басқармасы

Басқарма басшысы есу базасының жұмысымен танысты

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен Үкімет отырысы өтті. Күн тәртібінде электрондық сауданы дамыту, Харбин қаласындағы IХ қысқы Азия ойындарына дайындық, Үкімет қаулыларының жобалары қаралды. Жиынға облыс әкімі Нұрлыбек Нәлібаев селекторлық режим арқылы қатысты. Үкімет отырысынан кейін аймақ басшысының төрағалығымен аталған мәселелер бойынша міндеттер айқындалған мәжіліс өтті. Қызылорда қаласы, аудан әкімдері мен жауапты сала басшыларына тапсырмалар жүктелді.<blockquote>«Жергілікті кәсіпкерлерді электронды сауда негіздеріне оқыту жұмыстарын ұйымдастырыңыздар. Электронды саудадағы экспорт көлемін арттыру мақсатында бұл саладағы кәсіпорындардың интернет маркетплейстарға тіркелуіне көмек беріп, тиісті жұмыстарды жүргізіңіздер. Тұтынушылардың құқықтарын қорғау бағытында электронды саудадағы тауар сапасына аса мән беріп, дер кезінде қажетті шараларды қабылдаңыздар.</blockquote>2025 жылғы 7 ақпан – 14 наурыз аралығында Қытайдың Харбин қаласында тоғызыншы Қысқы Азия ойындары өтеді. Жарысқа мемлекетімізден 139 спортшы қатысып, ел намысын қорғайтын болады. Дене шынықтыру және спорт басқармасы, қысқы спорт түрлерін дамыту бойынша нақты шаралар қабылдап, осы бағытта қызмет көрсетететін спорт мектептерінің санын арттыру қажет. Жұмыстарды күшейтіп «Мұз айдыны» спорт кешенінің, өңірдегі спорт мектептерінің әлеуеттерін барынша пайдалануымыз керек»,- деді аймақ басшысы.Айта кетейік, өңірде тауарлар мен қызметтерді өткізу үшін интернет-ресурсты пайдаланатын 10 кәсіпорын тіркелген.Аталған кәсіпорындармен 2023 жылы 18 мыңнан аса тапсырыс жасалып, сауда айналымы 281 млн. теңгені құрады.Тапсырыстарды сақтау мен жеткізу бағытында аймақта «Қазпошта» желісінің 11 супермаркеті және өзгеде интернет дүкендердің тарату пунктері жұмыс жасайды. Қазіргі таңда тауар өндірушілер электронды портал арқылы өз өнімдерін сатуда.Облыста барлығы 14 822 спорттық секцияда 342 223 адам, оның ішінде қысқы спорт түрлері бойынша 14 секцияда 153 спортшы спортпен шұғылданады. Спорт түрлеріне облыстық бюджеттен барлығы 1 млрд 869 млн. теңге бөлінсе, соның ішінде қысқы спорт түрлеріне 51 млн. 476 мың теңге қаржы бөлінген.Аймақтың климаттық ерекшелігіне байланысты «Мұз айдыны» спорт кешенінде қысқы спорттың 3 түрі бойынша үйірмелер жұмыс жасайды.Бүгінгі таңда республикалық чемпионаттарда орын алып жүрген 4 спортшымыз бар. Оның екеуі шорт-тректен кіші жасөспірімдер арасында болса, екеуі мәнерлеп сырғанаудан. Өңірде барлығы 22 балалар мен жасөспірімдер спорт мектептері жұмыс жасаса, оның ішінде1 спорт мектебінде қысқы спорт түрлерінен қызмет көрсетіледі.<img src="https://knadmin.beoblood.kz/uploads/kimet_otyrysynda_y_k_terilgen_m_seleler_bojynsha_mindetter_aj_yndaldy_1_3c38504feb.jpg" alt="Үкімет отырысындағы көтерілген мәселелер бойынша міндеттер айқындалды 1.jpg"><img src="https://knadmin.beoblood.kz/uploads/kimet_otyrysynda_y_k_terilgen_m_seleler_bojynsha_mindetter_aj_yndaldy_2_38701d4f32.jpg" alt="Үкімет отырысындағы көтерілген мәселелер бойынша міндеттер айқындалды 2.jpg"><img src="https://knadmin.beoblood.kz/uploads/kimet_otyrysynda_y_k_terilgen_m_seleler_bojynsha_mindetter_aj_yndaldy_3_3e775a086c.jpg" alt="Үкімет отырысындағы көтерілген мәселелер бойынша міндеттер айқындалды 3.jpg">Фото: Қызылорда облысы әкімінің баспасөз қызметі

Үкімет отырысындағы көтерілген мәселелер бойынша міндеттер айқындалды

<a href="https://kyzylorda-news.kz/">Kyzylorda-news.kz</a> Арал аудандық мәдениет үйінде көрнекті жазушы, қазақ әдебиетінің заңғары, халық жазушысы Әбдіжәміл Нұрпейісовтің 100 жылдығына арналған қорытынды шара өтті.Шарада аудан әкімінің орынбасары Н. Бохаев сөз алып, ұлы қаламгер Әбдіжәміл Нұрпейісовтың шығармашылығы мен оның рухани мұрасы дәріптеуге арналған 100 жылдық мерейтой аясында өткізілген шаралардың және жыл бойы ұйымдастырылған барлық мәдени-көпшілік шаралардың жоғары деңгейде өтуіне елеулі үлес қосқан мәдениет саласының қызметкерлерлеріне алғысын жеткізді.&nbsp;<blockquote>- Бүгін біз қазақ әдебиетінде алтын әріппен жазылған ұлы есім – халық жазушысы, аса көрнекті қаламгер, Ұлы Отан соғысының ардагері Әбдіжәміл Нұрпейісовтің 100 жылдығына арналған қорытынды шараға жиналдық. Қасиетті Сыр елінде, Арал топырағында дүниеге келген Әбеңнің 100 жылдық мерейтойы – тек біздің өңірдің ғана емес, күллі қазақ халқының қуанышы. Алаштың асыл перзентінің мерейтойы аясында Аралда бірқатар іс-шаралардың аталып өткенін жақсы білесіздер. Олардың ішінде ғылыми-танымдық конференциялар, әдеби және мәдени кездесулер, спорттық жарыстар, халықаралық суретшілер симпозиумы, шығармашылық байқаулар сияқты ел руханиятына серпін беретін игі істер бар. Бұл шараларға ел руханиятына үлес қосып жүрген ақын-жазушылар, ғалымдар, өнер майталмандары қатысты. Мен осы мүмкіндікті пайдаланып, Әбдіжәміл Нұрпейісовтің 100 жылдығына арналған шаралардың жоғары деңгейде өтуіне атсалысқан барша ниеттес жандарға, ұйымдастыру жұмыстарына белсенді түрде қатысқан азаматтарға аудан әкімінің және өз атымнан ерекше алғысымды білдіремін! Шын мәнінде, Әбеңнің рухына жасалған құрмет – болашақ ұрпақтың рухани қазынасын молайта түсудің бір жолы. Біз Әбеңнің мол мұрасын қастерлеп, келер ұрпаққа жеткізуге міндеттіміз. Баршаңызға шығармашылық шабыт, зор денсаулық, отбасыларыңызға амандық тілеймін! Әбеңнің рухани мұрасы мәңгілікке ел жадында жаңғыра берсін!»-деді.&nbsp;</blockquote>Мұнан соң, ел руханиятының қалыптасуы жолында аянбай қызмет етіп, халықтың көңілінен шыға білген мәдениет саласының бірқатар қызметкерлері марапат төрінен көрінді. &nbsp;Іс-шара соңы аудандық өнерпаздардың концерттік бағдарламасына ұласты.Фото: Арал ауданының әкімдігі

Өнер иелері марапат төрінде

<a href="https://kyzylorda-news.kz/">Kyzylorda-news.kz</a> Бүгін облыс әкімінің жиналысынан кейін аудан әкімі Аманжол Оңғарбаевтың төрағалығымен мәжіліс өтіп, Үкімет отырысының күн тәртібіне сәйкес электрондық сауданы дамыту және Харбин қаласындағы қысқы ІХ Азия ойындарына дайындық мәселесі қаралды.Арал ауданы бойынша тауарлар мен қызметтерді өткізу үшін интернет-ресурсты пайдаланатын 10 ға жуық кәсіпорын тіркелген. Тапсырыстарды сақтау мен жеткізу бағытында «Қазпошта» желісінің 1 супермаркеті, 19 бөлімшесі және Каспи.кз интернет дүкенінің 6 тарату пунктісі жұмыс жасауда.Аудан әкімі электронды саудадағы экспорт көлемін арттыру мақсатында өңдеу өнеркәсібі саласындағы кәсіпорындардың интернет-маркетплейстарге тіркелу жұмыстарын ұйымдастыру керектігін айтып, жауаптыларға тапсырма жүктеді.&nbsp;Халқымыздың рухын көтеріп, еліміздің мерейін асыратын спортшыларымызға мемлекет тарапынан үлкен қолдау көрсетілуде. Бұл сала бойынша ауданда атқарылып жатқан жұмыстар жайына басымдық берген аудан басшысы елімізде спортты дамыту - мемлекеттік саясаттың басым бағыттарының бірі екені атап өтті. Салаға көрсетіліп жатқан айрықша қолдау мен мүмкіндіктерді пайдаланып, бұқаралық және кәсіби спортты дамыту жөнінде бірқатар міндеттер жүктеді.Мәжілісте көтерілген әр мәселенің өзекті екенін айтқан аудан әкімі Аманжол Сақыпұлы тапсырмалардың уақытылы орындалуы әркез бақылауда болатынын жеткізді.Фото: Арал ауданының әкімдігі

Электронды сауданы дамыту күн тәртібінде

<a href="https://kyzylorda-news.kz/">Kyzylorda-news.kz</a> ​Аймақ басшысының қолдауымен шаһарда жол құрылысы қарқын алып, басты жолдар мен көшелердің аясы кеңейтілуде. Байыпты бастамалардың бірі – Тәуелсіздікке 25 жыл даңғылында жүргізілуде.​Бұл жоба 2024-2025 жылдарға жоспарланған, екі кезеңнен тұрады. Жолды кеңейту жұмыстары 27 тамыздан бастау алды. Жобаның бірінші кезеңі бойынша бюджеттен бөлінген қаржыға ұзындығы 6 711 метрді құрайтын даңғыл екі жолақтыдан төрт жолақтыға ауыстырылуда. Яғни, С. Бейбарыс көшесінен бастап Жастілек көшесіне дейінгі бөлігі кеңейтіліп, жобада қарастырылған 4 қабат асфальт жабынының 3 қабаты салынды. Соңғы мастика қоспасы бар асфальт қабаты биыл салынады. Жоба аясында Әбілқайырхан және Есенов көшелерінің аралығындағы Сырдария өзенінің бөгетін нығайту жұмыстары да қоса жүргізілуде. Жұмысты атқарушы «УАД» ЖШС.​Сондай-ақ, жобаның екінші кезеңі яғни, даңғылдың Әбілқайыр хан көшесінен бастап Саламатов көшесіне дейінгі бөлігіне жаңадан 4 жолақты жол құрылысын салу үшін жоба әзірленіп, мемлекеттік сараптамадан өтуде. Жоба биыл жүзеге асырылады.​Айта кету керек, Тәуелсіздікке 25 жыл даңғылының қолданысқа берілгеніне 8 жыл өтті. Қала сыртын айналып өтетін осы даңғылдың бойында кептелістер көптеп орын алатыны жасырын емес. Осы жобаның нәтижесінде Тәуелсіздікке 25 жыл даңғылының бойындағы, сондай-ақ, «Ескі базар» аумағындағы көлік кептелісі түбегейлі шешіледі деп күтілуде.Фото: Қызылорда қаласының әкімдігі

Қазақстан және Қызылорда облысының жаңалықтары