<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев бастаған делегацияның Қытай Халық Республикасына жұмыс сапары аясында елшілікте бірнеше маңызды келісімге қол қойылды. «Саутс-Ойл» ЖШС мен Қытайдың «Carrie Technology Holding Limited» компаниясы арасында мұнай саласындағы ынтымақтастық, «Абзал және К» ТС мен «Hubei Yongxiang Food Processing Machine» компаниясы арасында күріш өндірісі саласындағы келісім және «Алтын орда» ЖШС мен «Jiangsu Hanpu Mechanical Technology» компаниясы арасында тұз өндіру саласындағы әріптестік орнатылды.Аймақ басшысы облыс әкімдігі тарапынан тиісті қолдау көрсетілетінін айтып, Қытай компанияларын бірлесіп жұмыс жасауға шақырды.<blockquote>«Қызылорда облысында минералды шикізат ресурстарының, атап айтқанда мұнай, газ, полиметалл және уран қоры мол. Тау-кен металлургия саласындағы ерекше назар аударатын жобалардың бірі «Шалқия Цинк LTD» акционерлік қоғамының полиметалл кен орындарын игеру бойынша арнайы ұсынысымыз бар. Бүгінгі кездесуге компания директоры Асқар Тлеулин мырза да арнайы қатысуда. «Шалқия Цинк» жобасы бойынша жылына 4 миллион тонна кен өңдеу жоспарланған. Қазіргі уақытта жерасты жұмыстары басталды. Жобаға 309 миллион АҚШ доллары көлемінде инвестиция тартылды. Өндіріс осы жылдың II тоқсанында, ал байыту фабрикасы 2026 жылы іске қосылады. Оған дейін «Шалқия» кені еліміздегі басқа байыту фабрикаларында өңделетін болады. Қазір кәсіпорында 500-ден астам адам жұмыс істейді, ал фабриканы іске қосқаннан кейін 1500-ге артады. Бұл өз кезегінде аймақтың еңбек нарығына оң әсер етеді. Сіздерді бірлесіп жұмыс жасауға шақырамыз. Облыс әкімдігі тиісті жер телімін беруге, инженерлік-инфрақұрылым жеткізуге, өндірілген өнімді сату үшін жан-жақты қолдау көрсетуге дайын», – деді Н.Нәлібаев.</blockquote><img src="https://knadmin.beoblood.kz/uploads/Ekizha_ty_kelisim_9f4019d140.jpg" alt="Екіжақты келісім.jpg">Фото: Қызылорда облысы әкімінің баспасөз қызметі

Қытай компанияларымен бірге әріптестік байланыс орнатты

<a href="https://kyzylorda-news.kz/">Kyzylorda-news.kz</a> Қазақстанда&nbsp;көпбалалы отбасылар салықтан босатылады. Енді жұмыс беруші салық төлеу кезінде қол астындағы&nbsp;көпбалалы анаға төленетін салықты жеңілдікпен шегеріп, ақшаны айлығына қосып бере алады. Мұндай жеңілдік&nbsp;90 мың теңге шеңберінде қарастырылған. Бұл туралы <a href="https://stan.kz/">Stan.kz</a> ақпарат агенттігі&nbsp;<a href="https://24.kz/kz/zha-aly-tar/kogam/696870-kopbalaly-otbasylar-salyk-tan-bosatylady">24.kz</a> арнасына сілтеме жасап хабарлайды.&nbsp;1 қаңтардан бастап елімізде бірнеше санат аясында салық шегерімдері күшіне енді. Өзгерістің бірі – көпбалалы отбасыларға жасалып отырған жеңілдік.&nbsp;Мысалы, отбасындағы ер мен әйелдің біреуі жұмыс істейтін болса 90 мың теңге, ал екеуі де жұмыспен қамтылса, әрқайсысы 47 мың теңге есебінде салықтық шегерімді қолдана алады. Бұл жерде ата-ана жеңілдікті қалай бөлу керек екенін өздері таңдайды. Салық шегерімін алу үшін жұмыс берушіге өтініш жазуы керек. Балаларының туу туралы куәлігінің көшірмесін қоса тапсыруы қажет.<blockquote>“Аталған салық шегерімін жеке тұлғаның өзі де қолдана алады немесе жұмыс беруші де қолдана алады. Мысалы, жеке тұлға салық шегерімін салық агентінде қолданғысы келсе, жұмыс берушіге өтініш пен құжаттарын туу туралы куәлігінің көшірмесін ұсыну керек. Өз кезегінде жұмыс беруші аталған жеке тұлғаның жеке табыс салығы салынатын кірісін көпбалалы отбасы үшін салықтық шегерім соммасына азайтуы тиіс”, –&nbsp;деді&nbsp;Қаржы министрлігі жұртшылықпен байланыс-хатшылық басқармасының басшысы Гүлжан Қалменова.&nbsp;</blockquote>Тағы бір ескеретіні, отбасындағы бала саны 4-ке жетуі керек. Барлығы 18-ге толмаған болуы шарт. Ал төртінші баласы қаңтар айында дүниеге келгендер&nbsp;шегерімді келесі жылғы пайдалана алады. Жеңілдіктің ең жоғары сомасы – жылына 282 айлық есептік көрсеткіш. Яғни 1 млн 108 мың теңгеге дейін салық шегерімі қарастырылған.<blockquote>“Отбасылардың салықтық аударымдарына жасалып отырған жеңілдік – бұл бірінші кезекте көпбалалы отбасылардың жанұялық бюджетін тиімді басқаруға беріліп отырған мүмкіндік. Ер азамат жылына, айына 200 мың алатын болса, барлығын төлеп, жеке табыс салығы бар, зейнетақы қорына бар аударымдары, МӘМС-ке төлеген соң қолына 155 мыңдай алатын болса, егер де осы салықтық жеңілдікті қолданатын болса, әр ай сайын 12-13 мың теңгеге дейін көбірек алады. 167 мың тенгеге дейін”, –&nbsp;деді&nbsp;экономист-сарапшы Бауыржан Ысқақ.</blockquote>Фото: Нұрболат Нұржаубай

Қазақстанда көпбалалы отбасылар салықтан босатылады

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Қазақстан Республикасының Қытайдағы Төтенше және Өкілетті Елшісі Шахрат Нұрышевпен кездесіп, аймақ делегациясының іссапарын қысқа мерзімде әрі жан-жақты ұйымдастыруға көрсеткен қолғабысы үшін алғыс білдірді.<blockquote>«Өзіңізге белгілі, Мемлекет басшысы отандық және шетелдік инвестицияларды тарту арқылы ірі жобаларды іске асыруды, халықтың әл-ауқатын арттыруды тапсырды. Жұмыс кестесінің тығыздығын ескеріп, құрамында тәжірибелі кәсіпкерлер бар делегация іссапармен келдік. Бүгін сізбен кездесіп, Қызылорда облысы мен Қытай арасында ынтымақтастық орнату мүмкіндіктерін талқылағанымыз үшін шын жүректен алғысымды білдіремін. Қытай – Қазақстанның серіктесі және біздің облысымыз осы елдің компанияларымен өзара тиімді байланысты одан әрі дамытуға мүдделі. Осыдан екі жыл бұрын, яғни 2023 жылғы Қытайға іссапар кезінде қол жеткен келісімдер аясында Қызылордада жылына 5 млн. шаршы метр энергия үнемдейтін шыны өндірісі іске қосылды. Қуаттылығы 141 МВт-тық 4 күн және 1 жел-электр станциясының құрылысы жүргізілуде. Оның біреуін қытайлық «Huadian» компаниясы қолға алған. Осы жолғы іссапарымыз да өзіңіздің қолдауыңызбен нәтижелі болады деп ойлаймын, дипломатиялық қызметіңізге табыс тілеймін. Қазақстан мен Қытай арасындағы ынтымақтастықты одан әрі нығайтуға бағытталған бірлескен әрекеттеріміз биіктерге жеткізеді деп сенемін», – деді Нұрлыбек Машбекұлы.</blockquote>Аймақта мұнай қорының сарқылуы салдарынан он жыл бойы төмендеу тенденциясын көрсетіп келген өнеркәсіп өндірісі көлемі соңғы жылдары оң динамикаға шықты. Өсім өңдеу өнеркәсібі есебінен қалыптасты.Өңірде қытайлық инвесторлардың қатысуымен жылына 1 млн. тонна цемент, 197 мың тонна табақша шыны өндіретін зауыттар жұмыс істейді.Фото: Қызылорда облысы әкімінің баспасөз қызметі

Аймақ басшысы Қытайдағы Қазақстан елшісіне алғыс айтты

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев бастаған делегация Қытай Халық Республикасына жұмыс сапары барысында Сычуань провинциясының губернаторы Ши Сяолиньмен кездесті. Басқосуға жауапты сала басшылары, бизнес қауымдастық өкілдері қатысып, ауыл шаруашылығы өнімдерін өңдеу, баламалы энергия көздері, құрылыс индустриясы, тау-кен өнеркәсібі, машина жасау мәселелері талқыланды.Сычуань – табиғи газ өндірісімен, ауыл және орман шаруашылығымен айналысатын, электр энергиясын экспорттайтын Қытайдағы ірі аймақтардың бірі.<blockquote>«Бүгінде «Бір белдеу, бір жол» бастамасы халықаралық жобаға және ынтымақтастықтың ірі платформасына айналды. Ғасырлар бойы қалыптасқан Ұлы Жібек жолы бойындағы қарым-қатынасымыз одан әрі дамып, жаңа Жібек жолы – «Батыс Еуропа – Батыс Қытай» халықаралық көлік дәлізі Еуропа, Азия және Таяу Шығыс елдерін байланыстырады.Қытай негізгі сауда-экономикалық серіктесіміз болғандықтан, өзара тауар айналымы мен инвестиция көлемі жыл сайын өсіп келеді. Қызылорда облысында қытайлық бизнес қауымдастық өкілдерімен, инвесторлармен бірлесіп жұмыс істеудің берік негізі қаланғанын, мол тәжірибе жинақталғанын атап өткім келеді»,– деді Н.Нәлібаев.</blockquote>Аймақтағы 15 мұнай өндіруші компанияның 8-і қытай кәсіпорны. Қытайлық инвесторлардың қатысуымен өңірде ірі индустриялық жобалар іске асырылуда.«Чайна Гежуба» компаниясымен бірлескен цемент зауытында жылына 1 млн. тонна цемент өндіріледі. «Чайна Гласс» компаниясының қатысуымен ашылған шыны зауытының қуаттылығы – жылына 197 мың тонна табақша шыны. Зауыт өнімінің 30%-ы ішкі нарыққа жіберіліп, 70%-ы Ресей, Өзбекстан, Қырғызстан, Тәжікстан және Грузияға экспортталады. Бүгінде шыны кластерін құру бойынша жаңа ілеспе жобаларды іске қосу бағытындағы жұмыстар белсенді жүргізілуде.Фото: Қызылорда облысы әкімінің баспасөз қызметі

Облыс әкімі Сычуань провинциясының губернаторымен кездесті

<a href="https://kyzylorda-news.kz/">Kyzylorda-news.kz</a> &nbsp;«AMANAT» партиясының қоршаған ортаның ластануын болдырмау, өлкеміздің табиғатын сақтау және экологиялық мәдениетті қалыптастыру мақсатында ұйымдастырып келе жатқан «Таза бейсенбі» акциясына бүгін Қызылорда облысы, Жаңақорған ауданындағы партияластар да үлес қосты.Олар аудан орталығындағы МАЙ бекеті ықшам ауданына тазалық жұмыстарын жүргізіп, тұрғындары тазалық мәдениетін сақтауға шақырды.Жаңақорғандық Алма Мамирова ұдайы тазалық шараларының басы-қасынан көрiнiп, көпшілікке насихат етіп жүрген партияның аудандық филиалына қарасты «Орталық» бастауыш партия ұйымының төрайымы. Ол тұрғындардың тазалық мәдениетін сақтауға үйренгендігін айтады.<blockquote>«Ауданда апта сайын тазалық жұмыстары жүргізіледі. Таза жерге қоқыс тастаудың өзі саналы адам үшін ыңғайыз жағдай. Қазір азаматтар да мұны түсінген сыңайлы. Қоқыстарды арнайы қоқыс жәшіктеріне тастап, үй айналасын тазартып отырады. Бұл әрине, Мемлекет басшысының «Таза Қазақстан» бастамасы мен партиямыздың «Таза бейсенбі» акциясының жемісті нәтижесі деп ойлаймын»,-дейді Алма Мамирова.</blockquote>Акция алдағы уақытта да жалғасын табатын болады.&nbsp;<blockquote>– «Тазалық – табалдырықтан басталады» демекші қоршаған ортаның тазалығына жауапкершілікпен қарау – әрбір азаматтың міндеті. Дегенмен біз «Таза бейсенбі» акциясын өткізу арқылы қоқыс тазалап ғана қоймай, тұрғындардың санасына күнделікті тазалық жұмыстарын жасап жүрген қарапайым еңбек адамдарының бейнетін бағалау сынды мәдениетті қалыптастырып келеміз, – &nbsp;деді &nbsp;«AMANAT» партиясының Жаңақорған аудандық филиалының төрағасы Арман Мажитов.</blockquote><img src="https://knadmin.beoblood.kz/uploads/Taza_bejsenbi_8b0cef7bca.jpg" alt="Таза бейсенбі.jpg">

 «Таза бейсенбі» акциясы өз нәтижесін беруде

<a href="https://kyzylorda-news.kz/">Kyzylorda-news.kz</a> Рамазан – жақсылық пен мейірімге толы ерекше ай. Күллі мұсылман күтетін қасиетті рамазан айы 1-29 наурыз аралығында өтеді. Ал, ораза айт мерекесі 30 наурызға тура келеді. Қасиетті Қадір түні 26-нан 27-не қараған түні өтеді. Бұл туралы бүгін «Ақмешіт-Сырдария» мешітінің бас имамы Дастан Құрманбаев айтты.&nbsp;<blockquote>– Баршаңызды мұсылмандар үшін қасиетті болып саналатын Рамазан айының келуімен құттықтаймын! Бұл айда қайырымдылық пен жанашырлық, ізеттілік пен имандылық сияқты қасиеттерді дәріптейтін ерекше кезең. Биыл Рамазан айы 1-і наурызда басталады. Ал наурыз айының 26-нан 27-не қараған түн – қасиетті Қадір түні. 30-ы наурыз – ораза айт мерекесі. Биыл Рамазан айында 29 күн ораза ұстаймыз. Сонымен қатар, Қазақстан мұсылмандары діни басқармасының Төралқа мәжілісінде биылғы пітір садақасының мөлшері 655 теңге болып белгіленді. Пітір садақаның мөлшері еліміз бойынша 2 келі ұнның орташа бағасымен есептелді. Ал ұнның бағасы ҚМДБ-ның қала және облыс өкілдіктерінің берген мәліметі негізінде анықталды. Пітір садақасын құрма, мейіз бағасымен де беруге болады. Сонымен қатар “Рамазан қоржыны”, “Мұқтаждарға 35 мың азық-түлік себет” республикалық телемарафоны, “Құран сыйла Уақып ет”, “Рамазанда бір тал ек”, “Рамазан сыйы” сынды қайырымдылық акцияларын және түрлі форматтағы іс-шаралар мен жарыстар өткізу жоспарлануда,-деді, Дастан Жанасұлы.</blockquote><img src="https://knadmin.beoblood.kz/uploads/Ramazan_bereke_men_mejirimge_toly_asietti_aj_dbef4e2dce.jpg" alt="Рамазан – береке мен мейірімге толы қасиетті ай.jpg">Фото: Freepik

Рамазан – береке мен мейірімге толы қасиетті ай 

<a href="https://kyzylorda-news.kz/">Kyzylorda-news.kz</a>&nbsp; Дін – қоғамдағы әлеуметтік-мәдени саланың бірі. Сондықтан діни сауаттылық пен діни танымды дамыту әрбіріміз үшін өте маңызды. Әсіресе &nbsp;жастардың деструктивті ағымдар жетегінде кетпеуі үшін не істеуге болады? Алдын алудың қандай алғы шарттары бар? Осы тақырып төңірегінде Қызылорда облысы дін істері басқармасы «Дін мәселелерін зерттеу орталығы» КММ-нің дінтанушы маманы Олжас Нарымбетовпен сұхбаттасқан едік.– Олжас Жақыпбекұлы,&nbsp;өзіңіз білесіз діни сауаты жоқ кез келген адам жат ағымдардың жетегінде кетіп жатыр. Мұның соңы жақсылыққа апармайды. Оны алдын алу үшін не істей аламыз?– «Иә дұрыс айтасыз. Әуелгі мәселе сауаттылықпен байланысты болған соң кез келген мектеп оқушысына әуелі әліппенің үйретілгені секілді балаларға алғашқы негізгі діни негіздер мен мағлұматтардың қысқаша болса да үйретілгені маңызды деп есептеймін. Ислам діні болсын және өзге діндер болсын жастардың ақпараттандырылуы қажет. Себебі әр саланың лайықты маманы болу үшін сол саланы шығу тарихынан және негізгі деректерінен бастап зерттеу қажет болады. Діни мәселе де сол секілді. Қоғамда адамдардың жат ағымға еріп кетпесі үшін әуелі діни ақпараттарды өзінің ақыл тұрғысынан сүзгіден өткізе алуы қажет. Дін тек әр түрлі саладан ғана қамтылмаған. Дін ол адамдардың өмір сүру салты, мәдениеті, қоғамдағы адамдардың қарым-қатынасы т.б. өмірлік қажеттіліктерді қамтып жатқан дүние. Дін – ол өте нәзік. Сол себепті діни мәселеде өте жауапкершілікпен қарау маңызды. Діни проблеманың алдын алуда осы жауапкершілікті тек дін саласының мамандарымен емес жалпы қоғам болып атқаруда.– Жат ағым өкілдерінің негізгі белгілері қандай?– Жат ағым өкілдерінің бірнеше белгілері бар. Әуелі сыртқы бейнесінен, яғни киім кию үлгісі және түр сипатынан аңғаруға болады. Ер азаматтардың ұзын сақалды және шолақ балақты болуы. Әйел азаматшалардың толықтай қара жамылып киінуі секілді сипаттарынан білеміз. Екіншіден, қоғамда тек өздерін ғана ақиқат жолындамыз деп есептейді. Басқаларға адасқандар деп үкім шығарады. Қоғамдағы дінбасыларға және имамдарға бағынбайды. Оларды да адасқан және білімсіз деп санайды. Еліміздің дәстүрлі сенімі мен мәзһабтарды жоққа шығарады. Адамдарды «тура жолдағылар» мен «адасқандар» деп екі топқа бөліп қарастырады. Ұлттық құндылықтарымызды, жалпыға тән салт-дәстүрлерді мойындамайды. Зайырлы тұрғыдағы мерекелер мен шараларды тойлаудан бас тартады. Мемлекетіміздің заңдарын, басқару құрылымдары мен билік органдарын мойындамайды, бағынбайды. Азаматтық міндет болып саналатын әскерге бару немесе вакцина қабылдаудан &nbsp;бас тартады. Ең көп көзге түсетін белгілердің бірі де қоғамдағы әйелдердің құқығын таптауы. Оларға құдды бір бұйым немесе пайдаланатын зат секілді қарауы. Некелесіп, ұзақ уақыт өтпестен ажырасып абыройына нұқсан келтіру сияқты себептерін айтсақ болады. Соңғы уақыттарда жат ағым өкілдерінің белгілері жаңаша сипатқа ие боп жатқандығы байқалуда. Оған мысал ретінде әлеуметтік желілерде психологиялық дайындықтарын қолдана отырып адамдарды адастыруын айтуға болады.– Таңғалдыратыны деструктивті діни ағым ұстанушылары көзі ашық, оқыған адамдарды да өздеріне ілестіріп, топтарына қосып алады. Мұның сыры неде? Арбау сәтінде олар неге мән береді?– &nbsp;«Ол рас. Тіпті діни сауаты бар адамдардың да жат ағымға кетіп жатқандары жоқ емес. Олардың қатарында жоғары ғылыми дәрежесі бар немесе бұрын мемлекеттік құзырлы органдарда лауазымды қызмет атқарған азаматтар да жетерлік. Жалпы білімге, ғылымға құштар адамның әділдік пен тұрақтылық ұстанымының жоғары болатыны мәлім. Осы сипатқа ие адамның жат ағымның идеологиясына алдануы және сол сенімін салыстырмалы түрде барлығынан «дұрыс» деп есептеуі жат ағым арбаушыларының басты мақсаты десек болады. Шенді әскери адамның адасқан сәттегі өзгеруін мысал ретінде келтірсек болады. Яғни, әсери адам жат ағымның құрығына түскен күннен бастап нағыз «қарулы джихад» жолында өз жанын құрбан ете алатын, қару-жарақтың сырын толықтай түсінетін таптырмас соғыс құралына айналары сөзсіз. Бұның себебі де арбаушының психологиялық тұрғыдан дайындығының көрсеткіші. Ғылым жолында тер төгіп, еңбек етіп, түрлі кітаптар жазып, көпшіліктің алдында өзінің насихатын жүргізіп жүрген бір ғалымның осыншама еңбегі еленбей қалса, оның қоғамға деген өкпе-реніші жат ағым өкілдерінің назарына ілінетін қайталанбас мүмкіндік десек болады. Себебі қоғамда еленбей қалған ғалым жат діни ағымның құрығына түскен сәтте нағыз дайын радикалды уағызшыға айналары сөзсіз. Радикалдардың көздеген мақсаты да осы. Олар үшін қарапайым халыққа қарағанда, қоғамда беделді орны бар азаматты құрығына түсіру пайдалы қазба тапқанмен тең. Сауатсыз мың адамды тартқаннан, сауатты да білімді бір адамды арбауы сауаптырақ іспетті. Себебі радикалды ғалым сол сауатсыз мыңдаған адамды өз идеологиясына тартып насихаттай алатын бірден-бір адам. Бұл деген олардың миссиясының айқын жеңісі секілді.&nbsp;&nbsp; – &nbsp;Діни білім алуға ұмтылған жастарға не айтасыз?– Қазіргі кезде жастардың дінге қызығушылығының артуы қуантарлық жағдай. Дегенмен әр жақсы көрінген нәрсенің жанында жаман нәрсенің де тепе-тең жүретіні ақиқат. Егер дінді радикалдар емес, тек қана сенімді дін мамандары насихаттайтын болса діни проблема мен адасушылық мүлде болмаушы еді...Діни білім алғысы келетін немесе дін маманы болғысы келетін жастарға айтқым келетіні, қазақта керемет айтылған дүние бар «тауық сойса да, қасапшы сойсын»-деген. Дінді үйренерде ең алдымен діни мағлұматтарды білікті маманынан алыңыз. Өмірлік бағыт-бағдар беретін сенімді имам немесе ұстазыңыз болсын. Соңғы кездерде шет мемлекеттерде білім алғысы келетін жастардың қатары көбеюде. Діни білім алуға ниеттеніп шетел асып жатқан жастар да аз емес. Жалпы кез келген саланың лайықты маманы болу үшін шет елдерде өз тәжірибесін арттыру жақсы мүмкіндік. Десек те, «әр елдің салты басқа, иті қара қасқа» демекші өзге елдің ішіндегі діни тұрақтылық пен ұстану ережелері өзге бір елдің ұстанымына, дәстүріне сәйкес келе бермейтінін ұмытпаған жөн. Дінге қызығып жүрген жастарға айтарым, ең әуелі қазақтың әдебиеті мен тарихын, ондағы діннің орны және сал-дәстүрмен сабақтастығын жақсылап зерттеңіз. Себебі, жат ағымдарға ілесіп кетудегі себептердің бірі де ұлттық салт-дәстүр мен тарихты ұмыту. Елімізде діни білім алатын оқу орындары жоқ десеңіз қателесесіз. Өз кезегінде шетелде діни білім алғысы келетін жастарға діннің негіздері мен қағидаттарын әуелі еліміздегі отандық діни білім беру орындарында үйренгені абзал. Келесі кезекте сол алған діни білімін шыңдау мақсатында шет елдердегі мемлекеттік университеттерде жалғастыруға кеңес берер едім.– Мазмұнды сұхбатыңызға рахмет!Сұхбаттасқан:Балауса Қасымханқызы,журналист

Жат ағым жарылқамайды 

<a href="https://kyzylorda-news.kz/">Kyzylorda-news.kz</a> 2023 жылғы 3 наурыздан бастап Қазақстанда азаматтарға ресми түрде өздерін банкрот деп тану мүмкіндігін беретін «Қазақстан Республикасы азаматтарының төлем қабілеттілігін қалпына келтіру және банкроттығы туралы»&nbsp;Қазақстан Республикасының Заңы&nbsp;қолданылады. Аталған заң азаматтарға борыш жүктемесін төмендетуге мүмкіндік беріп, олардың төлем қабілеттілігі мәселесін реттеудегі маңызды қадам болды.&nbsp;Заңнамаға қандай өзгерістер енгізілгені, банкроттық рәсімі қалай өтіп жатқаны және азаматтарға нелерді білу маңызды екені жөнінде &nbsp;Fingramota.kz-ке &nbsp;Қазақстан Республикасы Қаржы министрлігі Мемлекеттік кірістер комитетінің Дәрменсіз борышкерлермен жұмыс басқармасының басшысы Меруерт Сисембаева айтып берді. Заңда банкроттықтың қандай түрлері қарастырылған және оған қандай өзгерістер енгізілді?Азаматтардың банкроттығы туралы заң үш негізгі рәсімді көздейді: соттан тыс банкроттық, сот банкроттығы және төлем қабілеттілігін қалпына келтіру.Соттан тыс банкроттық, егер борыш сомасы 1600 АЕК-тен аспаса (2025 жылы — 6,3 млн теңге) қолданылады.Егер бұрын қарыз алушы-жеке тұлға банктер, микроқаржы ұйымдары және коллекторлық агенттіктер алдында берешегі болған кезінде банкроттық рәсімін қарастыра алған болса, бүгінгі күні бұл процесс айтарлықтай жеңілдетілген.&nbsp;Ендігі жерде азаматтар тек банктер мен микроқаржы ұйымдары алдындағы қарыздары бойынша ғана емес, сондай-ақ бүгінгі күнге &nbsp;қаржы ұйымдары болып табылмайтын, алайда банктік қарыздар мен микроқаржы ұйымдарынан алынған қарыздар бойынша талап қоюға құқығы бар мекемелер алдындағы қарыздары бойынша өтініш бере алады. Өтінішті ХҚО, eGov порталы немесе e-Salyq Azamat мобильдік қосымшасы арқылы беруге болады.Басты жаңалық «Qoldau» платформасында «Tazalau» автоматтандырылған жүйесін енгізу болды. Бұл жүйе өтініш берушінің өлшемшарттарға сәйкестігін адамның қатысуынсыз тексеруге мүмкіндік береді.Соттан тыс банкроттық кезінде не өзгерді?&nbsp;&nbsp;&nbsp;• &nbsp; енді қарызды өтеу әрекеттері туралы құжаттарды ұсыну талап етілмейді, себебі барлық ақпарат кредиттік бюролардың базасынан автоматты түрде жүктеледі;&nbsp;&nbsp;• &nbsp; 1 АЕК-тен аз төлемдер енді қарызды өтеу ретінде есепке алынбайды (яғни, азғантай сомалар үшін рәсімді қолданудан бас тартылмайды);&nbsp;&nbsp;• &nbsp; соттан тыс банкроттыққа жататын кредиторлардың тізбесі кеңейтілді (таратылған және тізілімнен шығарылған ұйымдар енгізілген).&nbsp;Заң күшіне енген сәттен бастап соттан тыс банкроттықты 21 000-нан астам азамат пайдаланды, 50,4 млрд теңге сомаға&nbsp;қарыздар есептен шығарылды.Сот банкроттығы кезінде не өзгерді?&nbsp;Сот банкроттығын азаматтар 1600&nbsp;АЕК-тен астам (2025 жылы – 6,3 млн теңге) борышы болған кезде қолдана алады.Меруерт Сисембаева сот банкроттығы рәсімі, егер ол кепілде болмаса және сот пен қаржы басқарушысының қатысуын талап етсе, жалғыз баспанасын қоспағанда, борышкердің мүлкін сатуды қамтитынын еске салды.Қаржылық басқарушы борышкердің активтерін бағалайды және егер оның мүлкі болса, оны борышты өтеу есебінен сатуға болады. Алайда, егер ол кепіл болмаса, борышкердің&nbsp;жалғыз&nbsp;баспанасы&nbsp;алынбайды.Мыналар қаржылық басқарушылар бола алады:&nbsp;&nbsp;• &nbsp; заңды тұлғалардың банкроттық әкімшілері,&nbsp;&nbsp;• &nbsp; аудиторлар,&nbsp;&nbsp;• &nbsp;&nbsp;кәсіби&nbsp;бухгалтерлер,&nbsp;&nbsp;• &nbsp;&nbsp;заңгерлер.Қаржылық басқарушының қызметтері ақылы. 2025 жылы олардың құны айына 85&nbsp;000 теңгені құрайды. Алайда, мүлкі жоқ халықтың әлеуметтік осал топтары үшін қызметтер тегін&nbsp;көрсетіледі.Бұл рәсім 6 айға созылады, содан кейін борышкердің міндеттемелерінің күші жойылады. Алайда, маңызды шектеу бар: банкроттықтан кейінгі 3 жыл ішінде борышкер қаржылық мониторинг аясында болады.Бүгінгі&nbsp;күні сот тәртібімен 120 азамат банкрот деп танылды, ал есептен шығарылған сома 65,1&nbsp;млрд теңгені құрады.Кредиторлар&nbsp;борышкердің&nbsp;банкроттығына өз бетінше өтініш бере ала ма?&nbsp;Жоқ, банкроттық рәсімін азаматтың өзі ғана бастай алады. Кредиторлардың немесе басқа үшінші тұлғалардың мұндай құқығы жоқ. Бұл норма қарыз алушыларды мәжбүрлі банкроттықтан қорғауға бағытталған.Банкроттық&nbsp;қарыз алушының&nbsp;кредиттік&nbsp;тарихына&nbsp;әсер ете ме?&nbsp;Иә, банкрот деп танылғаннан кейін азамат 5 жыл ішінде кредит ала алмайды (ломбардтағы қарыздарды қоспағанда). Сонымен қатар, әр банктің өзінің кредиттік саясаты бар, осыған байланысты 5 жылдық мерзім өткеннен кейін де банк қарыз беруден бас тарта алады.Банкроттық рәсімінен өткен азаматтар үшін қандай шектеулер қолданылады?&nbsp;1) 5 жылға кредиттер алуға тыйым салынады (ломбардтардағы шағын қарыздарды қоспағанда).2) қайта банкроттық 7 жылдан кейін ғана мүмкін болады.3) банкроттықтан кейін 3 жыл бойы қаржылық мониторинг жүргізіледі (жылжымалы және жылжымайтын мүлікті тіркеу фактісі тексеріледі). &nbsp;Банкроттыққа балама бар ма? &nbsp; Егер борышкердің кірісі немесе мүлкі болса, ол төлем қабілеттілігін қалпына келтіру рәсімін пайдалана алады. Бұл оған 5 жылға дейін бөліп төлеуге және банкроттықтың салдарын болдырмауға мүмкіндік береді. Бұл рәсімнің тетігі мынадай: сот қаржы басқарушысымен бірлесіп әзірленетін берешекті өтеу кестесін бекітеді және бұдан әрі азамат төлемді осы кесте бойынша уақтылы енгізуі қажет.Бұл опция ыңғайлы, себебі адам банкрот мәртебесін алмайды және кредиттік тарихы бұзылмайды.&nbsp;Жақын арада заңда қандай жаңа өзгерістер күтілуде?2025 жылы:&nbsp;&nbsp;• &nbsp; 2025 жылғы 1 қаңтарға дейін берілген кредиттер үшін борышты реттеу туралы талапты алып тастау;&nbsp;&nbsp;&nbsp;• &nbsp; барлық кредит берушілерді борыштарды есептен шығару туралы есеп беруге міндеттеу (қазіргі уақытта кейбір ұйымдар борышкерлердің құқықтарына нұқсан келтіре отырып, мұны жасамай отыр);&nbsp;&nbsp;• &nbsp; борышкерге себебін көрсетпей, өз қалауы бойынша соттан тыс банкроттық рәсімін тоқтату құқығын беру жоспарлануда.Банкроттыққа өтініш бермес бұрын азаматтар нені білуі керек?&nbsp;Банкроттық туралы шешім қабылдамас бұрын, азаматтар барлық салдарды ескеруі керек:&nbsp;&nbsp;• &nbsp; 5 жылға кредит алуға тыйым салынады.&nbsp;&nbsp;• &nbsp; 3 жыл бойы қаржылық жағдай мониторингтен өтеді.&nbsp;&nbsp;• &nbsp; қайта банкроттық тек 7 жылдан кейін мүмкін болады.Қосымша ақпаратты қайдан алуға болады?&nbsp;Толық консультацияны:&nbsp;&nbsp;• &nbsp; 1414 байланыс орталығында (қосымша 3-ті теру керек),&nbsp;&nbsp;• https://t.me/SalyqBot Telegram чатында,&nbsp;&nbsp;• &nbsp; ҚР Қаржы министрлігі мен Мемлекеттік кірістер комитетінің ресми сайттарында алуға болады. Қаржылық сауаттылығыңызды Fingramota.kz-пен бірге арттырыңыз!Фото: fingramota.kz

Қазақстанда азаматтардың банкроттығы: ол қалай жұмыс істейді және қандай жаңалықтар енгізілді?

<a href="https://kyzylorda-news.kz/">Kyzylorda-news.kz</a> Қазақстан Респбликасы Индустрия және инфрақұрылымдық даму министірлігінің 2023 жылғы 5 шілдедегі №492 бұйрығына сәйкес, көктемгі кезеңде жол төсемі бөлігінің бұзылуын&nbsp; болдырмау мақсатында жалпы пайдаланымдағы республикалық маңызы бар KAZ06 «Қарабұтақ-Қызылорда-Шымкент» автожолының 1240-2055,5 шақырым аралығы, KAZ14 «Қызылорда-Жезқазған» автожолының 12-24 шақырымы аралығына 2025 жылдың 1 наурызы мен 1 сәуірі аралығында уақытша әрбір оське түсетін жүктемесі 8 тоннадан артық автокөлік құралдарының қозғалысына уақытша шектеу еңгізіледі.Халықаралық келісімдерге сәйкес жүктердің және жолаушылардың халықаралықтасымалдарын жүзеге асыратын, төтенше жағдайлар мен олардың салдарын алдын алу және оларды жоюжөніндегі іс-шараларды жүзеге асыратын, зардап шеккендерге гуманитарлық көмек көрсетуді жүзеге асыратын, азық-түліктерді тасымалдауды жүзеге асыратын, жолаушылар мен багаж тасымалын жүзеге асыратын, &nbsp;дәрі-дәрмектерді тасымалдауды жүзеге асыратын, мердігер ұйымдарға реконструкциялау жұмыстарын жүргізу үшін берілген учаскелердегі жол-құрылыс жұмыстарын жүзеге асыратын, қарулы күштер, басқа да әскерлер мен әскери құралымдарды, сондай-ақ әскери тасымалдауларды жүзеге асыратын автокөлік құралдарына шектеулер қолданылмайды.&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; «КАЖсервис» ЖШС,«ҚазАвтоЖол» ҰК» АқҚызылорда облыстық филиалдарыФото: Нұрболат Нұржаубай

Жолдарға уақытша шектеу қойылды

<a href="https://kyzylorda-news.kz/">Kyzylorda-news.kz</a> Алматы облысының полиция департаменті кәмелетке толмаған баланы өлтіру фактісі бойынша қылмысты тергеу аяқталғанын хабарлады.&nbsp;Тараптар қылмыстық іс материалдарымен толық танысып, іс сотқа жіберу үшін прокурорға жолданған. Бұл туралы <a href="https://kaz.inform.kz/news/62-tom-zhinalgan-sherzat-sne-katisti-kilmisti-tergeu-ayaktaldi-dc9749/">kaz.inform.kz</a> мәлімдеді.&nbsp;Полиция мәліметінше, тергеу барысында 40 сот сараптамасы жүргізіліп, шамамен 200 куәгерден жауап алынған. Барлық күдіктінің оқиға орнында айтқан жауаптары тексерілді, процесс қатысушылары арасында беттестірулер өткізілді.<blockquote>– Қылмысқа қатысушылардың барлығына құқықтық баға бере отырып, 8 бейнематериал зерттелді. Қылмыстық іс 62 томнан тұрады, оның ішінде барлық жиналған дәлелдеме, сараптама қорытындысы, жауап алу хаттамасы және басқа да маңызды материалдар бар, - деп хабарлады департаменттен.&nbsp;</blockquote>Облыстық полиция тергеудің барысы және процесс қатысушыларының конституциялық құқықтарының сақталуы прокуратура органдарының бақылауында болғанын атап өтті.Фото: Нұрболат Нұржаубай

62 том жиналған: Шерзат ісіне қатысты қылмысты тергеу аяқталды   

<a href="https://kyzylorda-news.kz/">Kyzylorda-news.kz</a> Кеше «Азаматтарға арналған үкімет» Мемлекеттік корпорациясы» коммерциялық емес Акционерлік қоғамы алаңында «AMANAT» партиясы Қызылорда облыстық филиалы жанындағы Сыбайлас жемқорлыққа қарсы іс-қимыл жөніндегі аймақтық кеңестің көшпелі отырысы өтті. Кеңес мүшелері алдымен орталықта халыққа көрсетілетін мемлекеттік қызметтің қол жетімділігі мен тиімділігіне мониторинг жасап, жұмысымен танысты. Мұнан соң бас қосып, орталықтағы мемлекеттік қызметтер көрсету кезінде сыбайлас жемқорлық тәуекелдерін болдырмау бағытында атқарылған жұмыстарды талқылады. Кеңес құрамына өзгеріс енгізіп, Кеңес төрағасының орынбасарын сайлады.Азаматтарға арналған үкімет – мемлекеттiк қызмет көрсету саласында қызметтердi «бiр терезе» қағидаты бойынша жүзеге асыратын Қазақстан Республикасындағы бiрегей ұйым. Бұл жерде ең бастысы мемлекет қызметінің халыққа қол жетімділігі ғана емес, оның тиімді және ашық болуы маңызды. Осы орайда «Азаматтарға арналған үкімет» мемлекеттік корпорациясы» коммерциялық емес Акционерлік қоғамының Қызылорда облысы бойынша филиалы директоры Аида Әбибуллаева хабарлама жасап, халыққа жасалып жатқан жағдайлар мен сыбайластықтың алдын алуда атқарылған жұмыстарды баяндады.Корпорация барлық мемлекеттік қызметтерді ҚР Үкіметінің қаулыларымен бекітілген қағидаларға сәйкес көрсетеді. Қағидаларда қызмет көрсету тәртібі, орындалу мерзімі, алым сомасы, күту уақыты мен қабылдау уақыттары, қажетті құжаттар тізбесі және т.б. талаптар белгіленген. 9 бағыт бойынша 1300-ге жуық мемлекеттік қызмет түрлерін көрсетеді. Сыбайлас жемқорлықтық алдын алу мақсатында 11 бағыт бойынша жұмыс жасалуда. Соның бірі өткен жылдың қыркүйек айында іске қосылған «Жасыл дәліз» жобасы. Өткен жылы жоба аясында 451 қызмет көрсетілген.<blockquote>«Бұл жоба сыбайлас жемқорлық тәуекелдерін алдын-алу, сыбайлас жемқорлыққа қарсы мәдениетті қалыптастыру және тұрғындарға көрсетілетін қызметтер сервисін жетілдіруге ықпал етіп отыр»,- деді Аида Әбибуллаева.</blockquote><blockquote>«Өздеріңіз білесіздер әрбір қызметтің заңды бекітілген мерзімі бар. Мәселен, бір азамат жылжымайтын мүлікті тіркеу, техникалық паспорт сызу секілді т,б қызметтерді заңды белгіленген мерзімнен жылдам алу үшін орталық қызметкерлеріне ақша ұсынып, сыбайластық әрекеттеріне әкелуі мүмкін. Осындай фактілердің алдын алу үшін осы жоба арқылы біз оңай, әрі жылдам мүмкіндікті ұйымдастырып отырмыз. Яғни, жылжымайтын мүлікті тіркеу 3 жұмыс күні орындалуға тиіс болса, оны 2 сағатта жүргізуге, Техникалық паспорт сызу 3 және 7 жұмыс күнінде орындалу керек болса, 7-12 сағат аралығында, Жер учаскесіне сәйкестендіру құжатын дайындау және беру 4 жұмысы күні болса, оны 5 сағатта орындау секілді жұмыстарды жүзеге асырып отырмыз. Пилоттық жобамыз қазір өз нәтижесін беруде дейді ол.</blockquote>Кеңестің көшпелі отырысына арнайы қатысқан облыстық мәслихат төрағасы Мұрат Тлеумбетов, партияның облыстық филиалының төрағасы Алмасбек Есмахановтар халыққа көрсетілетін қызмет пен сыбайластықтың алдын алу бағытында атқарылған жұмыстар бойынша өз пікірлерін білдіріп, ұсыныстарын айтты.<blockquote>«Бұл орталық халықтың күнделікті және түрлі сұрақтары бойынша келетін орны. Халық мекеме жағалап жүрмей мемлекеттік қызметті ең бірінші кезекте осы жерден алады. Орталық органдармен тікелей байланыс орнатып, сұраныстарын да шұғыл алуға мүмкіндігі бар. Жаңа мекеменің халыққа көрсететін қызметінің бірқатарымен таныстық. Баяндама барысында да көп ақпарат алынды. Қазір технологияның озық үлгілері қолданыста. Сондықтан бұл салада жемқорлық немесе сыбайластық фактілері болмауы қажет және орын алмайды деген ойдамыз»,- деді өз сөзінде Алмасбек Есмаханов.</blockquote>Жиын барысында сонымен қатар Кеңес құрамынан басқа қалаға қызмет ауыстыруына байланысты Қазақстан Республикасындағы Адам құқықтары жөнінде уәкілдің Қызылорда облысы бойынша өкілі қызметін атқарған Шәріпбаев Дәурен Сақтапбергенұлы шығарылып, орнына осы қызметке келген Байхожаев Берікбол Ұзақұлы сайланды.Атап өтейік, кеңестің көшпелі отырысына облыстық мәслихаттағы «AMANAT» партиясы депутаттық фракциясының мүшелері, жергілікті атқарушы органдар мен құқық қорғау органдары басшылары мен өкілдері де қатысты.&nbsp;

Мемлекеттік қызметтер көрсету кезінде сыбайлас жемқорлық тәуекелдерін болдырмау мәселесі талқыланды

<a href="https://kyzylorda-news.kz/">Kyzylorda-news.kz</a> Наурыз айындағы мерекелер тек табиғаттың жаңаруы мен көктемнің келуін атап өтумен шектелмейді. Бұл мерекелер халық арасында достықты, сыйластықты және бірлікті нығайтуға, еліміздің мәдени мұрасын сақтауға бағытталған. Наурыз айында өткізілетін әрбір мереке өзінше маңызды және терең мағынаға ие. Ал бұл мерекелерді өңірде кең көлемде атап өту мақсатында түрлі іс-шаралар жоспары бекітілді. Бұл туралы облыс әкімінің орынбасары Шахмардан Байманов брифингте баяндады.Көктемнің алғашқы мерекесі Алғыс айту күні - биыл Қазақстан халқы Ассамблеясының құрылғанына 30 жыл толуымен қатар келіп отыр.<blockquote>- «Бірлік пен ынтымақтастыққа 30 жыл» айдарымен біз қазақылықтың қаймағы бұзылмаған Сыр өңірінің мызғымас бірлігі мен әрбір азаматтың Отанға деген мәңгілік сүйіспеншілігін одан әрі ұлықтауымыз қажет. Мерекелік іс-шаралар 25 ақпан – 2 наурыз аралығында ұйымдастырылады. Апта көлемінде облыс бойынша 200-ге жуық кешенді іс-шаралар облыс орталығымен қатар, аудандарда және барлық елді мекендерде өткізіледі. Негізгі іс-шаралар 1 наурыз күні Достық үйінде Қазақстан халқы Ассамблеясының 30 жылдығына арналған тақтаның ашылу салтанатынан бастау алады. Одан әрі аймақ басшысының қатысуымен салатанатты іс-шара, гүл шоқтарын қою рәсімі, «Қайырымдылық қоржыны» акциясы ұйымдастырылады, - деді облыс әкімінің орынбасары.</blockquote>8-наурыз Халықаралық әйелдер күнін мерекелеудің қалыптасқан дәстүрі аясында облыс көлемінде 173 іс-шара өткізілмек. Жұмысшы мамандықтарға басымдық беріле отырып, барлығы 50-ге жуық нәзік жандар қатысатын аймақ басшысының мерекелік қабылдауы 7 наурызға белгіленген.Былтырдан бері елімізде «Наурыз мейрамын атап өтудің тұжырымдамасы» қабылданған. Соған сәйкес Наурызнама онкүндігі 14-23 наурыз аралығында өтеді.<blockquote>- Биыл да Наурызнама онкүдігінде әр күнге арнайы тақырыптар бекітілді. Осы бағытта облыс көлемінде 103 іс-шара жоспарланса, оның 38-і облыстық деңгейде өткізіледі. 14 наурыз – «Көрісу күні - Амал мерекесі» атап өтуден «Наурыз» мейрамын тойлау бастау алады. 15 наурыз – «Қайырымдылық күні», 16 наурыз – «Мәдениет және ұлттық салт-дәстүр күні», 17 наурыз – «Шаңырақ күні», 18 наурыз – «Ұлттық киім күні», 19 наурыз – «Жаңару күні», 20 наурыз – «Ұлттық спорт күні», 21 наурыз – «Ынтымақ күні», 22 наурыз – «Жыл басы», 23 наурыз – «Тазару күні» наурызнаманың қорытынды күні жалпыұлттық экологиялық акция ұйымдастырылып, «Тазалық эстафетасы» басталады, - деді облыс әкімінің орынбасары.</blockquote><img src="https://knadmin.beoblood.kz/uploads/Nauryz_601c612cfa.jpg" alt="Наурыз.jpg">Фото: Нұрболат Нұржаубай&nbsp;

Қазақстан және Қызылорда облысының жаңалықтары